رواية زوجي المحب الفصل الثالث 3 - بقلم سولييه نصار

-غادة.... -اخرس مش عايزة اسمع صوتك... طلقني بهدوء وروح للي كنت بتعك معاها... كانت بتتكلم وهي منهارة بس وقتها أنا كان باين عليا البرود لأني تعبت من شكها... تعبت من النكد اللي معيشاني فيه... لقيت نفسي بزعق ولأول مرة: -كفاية جنان بقا أنا قرفت منك!!! ضحكت وهي بتبكي وبتقول: -بعد ما خنتني جاي ترمي اللوم عليا! -هو أنا امتى خنتك حابب افهم؟! فتحت الموبايل وادتني الرسايل... فضلت اقرا في الرسايل وبعدين بصتلها ببرود وقولت:

-ده مش أنا... -يا سلام يعني صاحبتي هتكذب... ربعت أيدي وقولت: -يعني هتثقي فيا أنا ولا في صاحبتك... فضلت ساكتة لثواني بعدين بصتلي وقالت: -أنا مسكت عليك دليل يبقى هثق في صاحبتي... طلقني يا جمال... بصتلها بإحباط وعرفت أن طول الشهور اللي كنت مخلص فيها راحت في الهوا... محاولتي دايما إني أطمنها خلاص فشلت... محستش بنفسي إلا وأنا بدخل وبلم هدومي من الدولاب... كنت مقهور حرفيا أنها وثقت في صاحبتها وأنا لأ...

بشوية محادثات مش بتاعتي أصلا صدقت أني خاين... وقتها قررت أني خلاص مش مضطر أتحمل الحزن ده... طلعت بشنطة هدومي وأنا غضبان منها... هي كانت لسه بتبكي بصيت لها وقولت: -ورقة طلاقك هتوصلك قريب مدام بتثقي في أصحابك أكتر مني... وبعدين سيبتها ومشيت... فضلت ألف بالشوارع في العربية وأنا حزين ومكسور... قد إيه أتحملت منها وهي مفكرتش حتى تثق فيا... خلت حياتي جحيم بسبب شكها ومرضها... أنا استحملت لأني كنت عارف ظروفها...

عارف إن أبوها خان أمها كذا مرة لحد ما أمها انتحرت. ده سبب لها عقدة... حاولت كتير إني أعالجها عند دكتور وحجزت كذا مرة عند دكتور كويس بس هي كانت بترفض تيجي معايا... كانت مصرة أنها تخرجني عن طوري! ورغم كده استحملت وصبرت... وبدأت اخد شكوكها فيا على سبيل الهزار ورغم كده متعدلتش... بس خلاص أنا مش مضطر أتحمل.... روحت فندق وحجزت هناك وقررت خلاص أن اللي بيننا انتهى بس قبل كده قررت أعمل حاجة أخيرة!!!

طلعت تليفوني وبدأت أطلب الرقم! مرت الأيام وأنا بعيد عنها... كانت صحيح بتوحشني لكن خلاص مكنتش قادر استحملها خلاص... فاض بيا... عارف أنها مريضة بالشك بس أنا حاولت أساعدها كتير بس فشلت للأسف... في يوم طلبت غادة تشوفني ضروري وروحت عندها ولقيت صاحبتها ميار اللي حاطه وشها في الأرض... أول ما شافتني حضنتني وقالت: -أنا آسفة يا حبيبي أنا آسفة... بعدها عني فقالت: -ميار قالتلي على كل حاجة....

قالتلي إنها ضعفت وحاولت تفرق بينها لأنها لما شافت حبك ليا وإصرارك إنك متخونيش بعد ما عملتلها بلوك كذا مرة وعشان كده فبركت محادثات وبعتتهالي... بصت لميار بقرف وقالت: -مكنتش أعرف إني دخلت حية بيتي عينيها على جوزي.. بعدين ابتسمت وقالت: -سامحني يا حبيبي وعد مش هشّك فيك تاني... حطيت أيدي على شعرها وقولت: -غادة حبيبتي انتي طالق!