رواية #رواية...انا هي نساؤك.. الفصل الخامس والعشرون 25 - بقلم الكاتبه سمو العراق

البارت الثاني والعشرون
رواية...انا هي جميع نساؤك
بقلمي...نور سمو العراق

💔💔💔💔💔💔💔💔

لماذا قسوت حبيبي عليَّ ؟!

و حطمت كل قوارير عطري

و أسكبت دمعي

و مزقت سرا دفينا لديَّ

…

سأطفيء شمعي

و أحزم عمري

وأرحل حتى يكون ابتعاثي

على عزف ليلي

أرتحال رياح القضا

و القدرْ

................................

ضليت اصررخ بين اديه وهو مارحمني...

حسيت وجناتي تهشمت من ضربه اليه وخشمي وشفتي ضلن ينزفن...

مؤيد وعمتي اجوو يركضوون...

وهو يغلط ويسب حيل جرحني بكلامه واستهزائه بيه...

من غير ايده الثكيله الي ما تحملتها شعري احسنه انشال من جذوره...

انتقم مني احسنه انكلب وحشش وحشش

موش ذاك الاسد الافتخر بي ...ياله حيل كرهته...

لزمه مؤيد وهو يسب ويغلط ويتهدد عليه...

عمتي لزمتني وسحبتني،من بين اديه...

اني متمالكت نفسي وكعدت علئ الارض وانحب وابجي علئ حالي...

غريبة دار وغريبة وطن واهل....

مؤيد كله...خوويه علئ كيفك شبيك انجنيت صاير فهمونه

هو دفع مؤيد وصيح...والله اليوم ارشكم بانزين واحركم

شال التلفزيون وركعه بالكااع...

اني صررخت ولميت رجليه وحطيت اديه علئ اذاني...

دعيت علئ روحي امووتن مثل غرام

واخلي المنذر يعض اصابع الندم يوم غرام مو مثل هل يوم

دموعي ترست وجهي واختلطت بدمي....

عمتي لزمته كلتله...يممه استهدي بالرحمن كول باسم الله شبيك تخبلت

هو لزم المزهريه وفلشها بالكاااع...

يردون يعرفون شنهي السالفه ما فتهموو بس يصيح...

وجهه صار ناااااار....من عصبيته حتئ شرايين رگبته برزت..

هو كعد علئ الجربايه واسمعه يكوول والله اطلكها

المره التحجي هييج حجايه ما تصير الي مره...

عمتي سحبتني رادت تغسل وجهي اني بعدت ايدها وكعدت بالحمام ابجي....

دخلت نيران تباوع عليه لزمتني من ايدي كالت...كومي بغرفتي...

دفعت ايدها حيل ومسحت دموعي...

هي حطت ايدها علئ جتفي وكومتني كالت...كومي يمعووده هو صاير نار لا تعاندين

همست بنحيب...عوفيني

عمتي كالت...يممه منج والله عنوديه تردين تجلطين الرجال كومي يم نيران وبعدين حلوو اموركم...

سحبتني نيران وكفت وياها امشي مسلوبة الاراده

مو عبالك ببغداد عبالك بغير دووله...

شفته كاعد علئ الجربايه وحاط وجهه بين چفوفه ويتنفس بضيق...

طلعت شفت حنان واختها كاعدات علئ الدرج ويبسبسن...

نظراتهن جانت حقيره...

احس نار جمر تسعر بصدري مااريد اضل بالبيت اريد اطلع انهزم ولا اضل دقيقه هنا...

دخلت لغرفة نيران

كلتلها بتعب...خلي مؤيد ياخذني لبيت عمي اريد اروح للعماره

هي محاجتني جابت كطن وديتول وكعدت تمسح بوجهي دفعت ايدها حيييل...

كلهم كرهتهم

كالت...شبيج منارس رجلج كتلج اني شعليه بعدين انتي الج فضل عليه من المنذر ضربني متركتيني...

وصار واجبي ارد الدين

مسحت دمعه يتيمه من خدي وهمست...كلكم متستاهلون تستهينون بيه وتكرهوني

شفتي تحبون الغريبه وانتم متعرفون عنها شئ واني بت عمكم شديتو وياي وصفيتو وياها...

هي جرت نفس كالت...لج بابا شبيج غير بعدها عروس مصارلها 15 يوم من تزوجت...

كتمت عبرتي وجاوبتها...انتي تعرفين شئ واني اعرف شئ

كالت..اهووو من كل عقلج تغارين من بشرئ لج بابا المنذر يحبج واذا ضحك وياهن ترئ هاي مو حاله تردينه بس الج

انتي حييل انانيه...

ضحكت بااستهزاء وبكاء...اي انانيه عبن شنهي حاطتكم علئ راسي

شكد تحجن شكد تقلدن علئ كلامي شكد تقلدن علئ لبسي مااحجي...

هو الوحيد الي ما يقلد ويكلي لا تتصنعين هيج حلوه...هو الوحيد اريدن احافظ عليه انتي ما تعرفين شلون يتلزكن بي...

جرت نفس وزفرته وردت...لج بابا غير نريدج تتعلمين يعني حجيج مال عجايز

وتنسيقج مو حلوو بالملابس...

انتي صح نضيفه ومعدله وقايمه بالواجب بس لازم تتعلمين صار الج اكثر من سنه ونص ببغداد ما تعلمتي...

رديت عليه باسئ...شنهي سبيتجن غلطت عليجن مااحترمتجن شبي كلامي موش حلووو

اذا علئ لهجتي صارلي سنين هناك وتعلمت من منطقتي...

ليش تهمكم المضاهر...

ميخالف هسه مصار شئ خلي يطلكني ويتزوج بشيره

عبن حلووه ومثقفه وتفيدجن...

هي حطت اديها علئ اجتافي كالت...اووف منج من كل عقلج منذر يطلكج لج والله يحبج

واحنه هم نحبج حتى امي تحبج بس امي ضاجت لان تدرسين...

جريت نفس...جااا تردوني اتثقف وما تردوني اطور نفسي

شسوي حتئ ترتاحون احرك روحي

مسحت علئ شعري وتنهدت واني نمت علئ الجربايه

جنت اشهك وابجي وجهي مااحس بي وايدي حسيتها انكسرت

جسمي كله يوجعني....

تذكرت غرومه من ضربها جدي ولزمها راسها وثاني يوم ماتت

حسيت راسي راح ينفجر من البجي ودخت من الراشديات...

معقوله منذر يضربني ولخاطر منوو

الخاطر بشيره ام عطووب...

والله لو ضاربني لخاطر روجين ولا لخاطر هاي...

اجت عمتي سويت روحي نايمه ولا كعدت...

هي دخلت عليه للغرفه وطلعت....

...........................

نيران ...

مااعرف شنو الصار وخله المنذر يتخبل علئ منارس حيل اذاها...

يضرب ويصيح وكسر الغرفه تكسر ...

حيل خفت منه معقوله لخاطر بشرئ....

رحت لميت الغرفه وهو كاعد علئ الجربايه ومنزل راسه ويدخن...

نفس الشئ الصار لمن ضربني نفس الكعده وحركان الدم...

محجيت كملت ورحت شلت الزباله...

رحت صبيت غده وبشرئ،اخذها مؤيد وراح وصلها للبيت...

رحت كعدت منارس تتغده مقبلت تاكل...

ومصخنه كابه نار خطيه قهرتني....

والمنذر صحته مقبل ياكل...

شويه واجت هاله سولفنه الها الصار...

كالت منارس غلطانه...ميصير هيج تتصرف وتغلط وبشرئ ضيفه عدنا

تغار على زوجها تحاسبه بالغرفه مو تفضحنه هييج..

وبعدين شدعوه علي منذر هيج يضربها مهما يكوون ميصير يضربها

قابل بشرئ احسن من منارس

هاي زوجته ميصير هيج ياذيها...

ولوو همه ثنينهم غلطانين....

وبعدها خلت وراحت المنارس....

صار دنيا ليل ومنارس لا كعدت ولا اكلت ومنذر طلع خارج البيت....

دخلت لكتها نايمه كعدت يمها وكعدتها....

جنت استدعي النوم موش نايمه لان ما غمضت الي عين...بعد الصار...

من شخص محترمج ومحترمته وتتفاجئين بي وبتصرفاته تتمنين الموت ولا يصير هيج...

كعدتني وضلت تلح

كعدت بعد ما رتبت شعري

هي باستني واني بجيت حييل

ضلت تطبطب علئ جتفي كالت...اووف شمسوي بوجهج

يالله حبيبتي ميخالف ترئ والله يحبج

جاوبته...مااحبنه ولا اريدنه انه اصلن وحده زماله تزوجت واحد مثله....

ابو النسوان...

شايب شكده شكبره وبس يشوفله وحده يضل يرجف....

ليش هيج يشوه وجهي شنهي لكاني ويه واحد شنهي ما حفضت شرفه

امشي بشارع واغمض عيوني عبن مااريدن اشوفن غييره...

اكرهنه مااريدنه يطلكني وكلمن يروح بحال سبيله

كالت..ادري شكلتيله وهيج انهار عليج

تنهدت ومسحت دموعي....هو شاف بشيره وتخبل تتدلع علي وهو يتمضحك...

وصعدها بسيارته وانه عافني ما كال مرتي خطيه شلون تروح الوحدها وانه اجيت وياه...

وكطعني تكطع الخاطرها...

هاله...انتي شنو كلتيله؟

منارس شكتله...انت ابو نسوان وحاط عينك حتئ علئ مرة مؤيد

هاله تخبلت حطت ايدها علئ حلكي كالت...ولج انلصمي تردين تكاتلين اخوتي...

لج شلون تحجين هيج حجي والله لو دافنج محد يلومه وج هاي مرة مؤيد شلون هيج تحجين

لو مؤيد يسمع عبالج يسكت

انوب يضل يشك بمرته ويه اخوو ويتكاتلون بالله هذا كلام ينگال...

مسحت دموعي وشهكت...والله تتدلع علي صدرها طالع وتندك كدامه

كالت...وهو يباوع عليها

رديت...ياله يدير وجه

بس هي تدنك وكدامه تكنس اكلها اكعدي وكنسي عيب تكول ...مالج شغل...

هاله ردت بحده...اشش اسكتي لا تحجين هذا الحجي لا تخلين نار الغيره تعميج

هزيت راسي ودموعي تتساقط بغزاره...موش غيره والله موش غيره بس انه حاسه بهذا الشئ...

صكت اسنانها وهمست...منارس لا تحجين هذا الحجي

سكتت محد يسمع مني

هي كالت كومي تعشي

جاوبتها...مااريدن ان شاء لله اموتن و ابو النسوان يشبع من النسوان...

هزت راسها باسئ وخلت وطلعت....

وانه رجعت نمت وكل شويه ابجي

.............

خليت وطلعت افور من كلام منارس

معقوله مرة مؤيد هيج تصرفاتها ويه المنذر

بس ليش والله مؤيد فقير ومن اهل الله ومؤدب

ليش يطيح بهيج شكولات علئ شنو يتعاقب...

منذر ابو النسوان ياخذ الشرف كله

ومؤيد الفقير يطيح بأسفل خلق الله

وين العداله ياربي.....

شفته فات للغرفه رحت وراه دخلت بعد ما سلمت علي...

تنهدت وحجيت بهدوء...ليش خوويه ليش هيج ويه مريتك

رد بعصبية...يطبها مرض تستاهل وحده السانها اطول منها...

جاوبته...ميخالف خوويه بعدها صغيره ومرتك تغار عليك...

كال...رحمه الابوي هاله اطلعي وخليني الوحده وروح ابووي روحي واصله للسما...

هاله...ميخالف خوويه ادري كلمتها جبيره وما ينسكت عنها بس هي تحبك وما تلكه مثلها

ومايصير تضربها هيج والله وجهها صاير خارطه..

تكسر باب الكلب...

جر نفس ورد بجمود....تستاهل والله ممقصر وياها واحاول بكل طاقتي اسعدها

بس هي حماره تجفص...وتدوس بالبطن

يا رجال يخلي مرته تدرس اميه

والله اجي تعبان من الدوام واخذها للمدرسه وارجع اجيبها

وشتريد اجيب الها العرس اخذتها الارقئ محل ملابس اشتريت الها...

اكول طفله وصغيره وتحبني مااقسئ وياها...

من تزوج مؤيد لحد الان وهي كالبه خلقتها....

يابه شبيج متحجي...

والله كل علاقاتي تركتهن لخاطر عيونها وخليتها تاج علئ راسهن...

حتئ روجين الجانت كل يوم كابه عركه من وراها تركتها لاجل عيونها...

خليتها نفس اتنفسه تاليها هيج تتهمني...

والله لو ما مؤيد سحبها من ايدي والله جا موتتها...

خلت عفاريت الجن والانس تتراكص فوك راسي...

هاله بحنيه...ميخالف خويه جان كعدت وياها وفهمتها مو هييج جارم بيها...

خطيه مصخنه وتلعي من راسها...

هو باوع عليه وعقد حواجبه....لا تخلينها وحدها شربيها خافض حراره وخليها تاكل...

وكليلها لا تبجي هو هم الله يساعده من كلامج

هاله...والله كلتلها وضليت احجي عليها مقبلت بكلامها...

وهي خطيه سكتت...

المنذر بجمود...ديري بالج عليها ادري قسيت وياها بس مو بيدي خبلتني من حجت هيج....

تنهدت وترجيته...خوويه فدوه روح راضيها وطيب خاطرها مسكينه والله

المنذر بحزم....لا خليها تتعلم بس اسكت الها تكبر المشاكل وتتماده اكثر...

هاله...دكول حتى بالعرس صعدهن واني عافني الوحدي

المنذر...اهووو هنه صعدن اطردهن

واني نزلت وحاجيت جدتي كلتلها منارس وين كالت انت اخذ الوادم وانه اجيب منارس وياي....

ترئ والله راح تخبلني شلون اطرد النسوان واصعدها

هاله...دكول ممهتم الي

المنذر بتنهيده....هاله رحمه لله اطلعي ترئ والله كوه علئ روحي متحمل....

هاله جريت نفس وطلعت ثنينهم قافلين وواحد اعند من الثاني

الله يهدي سرهم ويقنعهم ويحنن كلوبهم....

......................................

منارس فات يومين وانه لا احجي ويه نذري ولا هو يحجي وياي....

بشرئ من ذيج الساعه بعد مااجت...

وهو يطلع وياخذ خفاره حتئ ما يرجع للبيت

وانه مخلصته بجي ونحيب...

تلزمني نيران تشرح الي اسلاميه صف سادس وتنطيني مهمات اقراهن....

واني بالي مو يمها

بئ هي تصر أقره واني مااقبل أقره....

بس الزم الكتاب اضلن ابجي....

حيل مستغربه حالته كرهته حييييييييل

اتذكر من جان مدللني ويحبني

يكول احب كلامج ولهجتج

احبج من دكولين المنذر راحن انامن

واني اكلج بابا كولي انام شنو انامن...

وانتي اله تضيفين نون...

جاوبته عبن احبن حرف النون لان واحد من حروف اسمك....

وهو يحضني ويبوسني ومدللني...

بس اجن ذن السعالوو خبلنه عليه جان اذا ازعل يتخبل اليل كله يضل بس يراضيني....

هسه اكيد رجع الروجين بس انه هذا هو راح اتطلك مااضلن....

بدت الامتحانات...

وجهي مشوه حتئ استحي اروحن للمدرسه....

قررت ابطل ولا اداوم وكله بسببه...

شفته دخل جنت كاعده بالحديقه اقره

اول ما شفته شلت كتبي ورحت اركض...

بس هو جان اسرع مني احتضني من خصري وسحبني....

صفني علئ شجرة النبك وانه دفعته وابجي واضرب بي....

كال بحنين...حبيبي علئ كيفج خلينه نحجي

جاوبته ببكاء والم وانه اخفي ملامحي المشوهه من انضاره...ياله انه اكرهنك من اشوفنك اختنك انجلط

همس برومانسيه وذوبان...مدام تختنكين نسويلج تنفس اصطناعي يكلبي...

دفعته وحاولت اخلص روحي منه...

بجيت بصوت عالي...وخررر مااريدنك ان شاء لله اموتن واخلص منك وانت روح عيش حياتك

اتزوج التريدها

حضني حييل وباسني بخدي المجروح من اثر ضربته...خلينه نحجي

باوعتله لعناد و دموعي تجري...ياله مااحجي وياك

انه شايله بكلبي عليك ولا اقبل بصلح طلكني

انت ايدك والضربه....جنت احجي وابجي واشهك...

هو رجع حضني وجر نفس بس ما حجه ولا كلمه...

انه دفعته ووكعت الكتب من ايدي وخليت ودخلت جووه

ابو النسوان يريد يسويلي تنفس اصطناعي يريدني بس اموتن يخلص مني شكد ما يحبني بس يريد اتمرض....

عفته ونمت ضليت ابجي

دخلت نيران شايله الكتب رادت تشرح الي مقبلت عفتها....

وره كم يوم صار الامتحان...

المنذر بالداوم ومؤيد كل شويه واجه كال يالله منارس منذر وصاني اخذج...

بدلت بسرعه بااحسائ مجروح ورحت وياه للامتحان...

دخلنه القاعه الامتحانيه 

انطوني دفتر معرفت شلون استخدمه علمتني المعلمه...

كتبت اسمي والرقم الامتحاني اجتنه الاسئله

جانت صعبه ما عرفت احلها وبالي مشوش...

كتبت الحافضته وطلعت لكيت مؤيد منتظرني

كال ...هااا جاوبتي

جاوبته بحزن...ياله جايبيلنه سؤال ما هو نسب سعد ابن وقاص مدري شسمه

كلت للمعلمه تردلي شنهي ماردت كلتلها جاا  روحي انه شمدريني شنهي نسبه...جاي اطي مره...

مؤيد ضحك كال...ان شاء لله ينجحونج

كتله...ان شاء لله.....

رجعنه للبيت كالو جابتي كتلهم اي جاوبت....

رحت غسلت مواعين الغده ورحت نمت...

مااريدن اشوف نذري عبن زعلانه....

بعدين رحت كعدت سويت عشاء وكعدنه نتعشه

هو اجه كعد يتعشه ويانه انه ماانطيته اي اهتمام....

اجت حنان كعدت بصف المنذر واخذت كلاص البن كالت...اني اشك بروحي حامل لان دتلعب نفسي واشتهي اشياء مو طبيعيه

مؤيد تركها وكام وعمتي كالت...ياااا صلاوات

جان كالت...اي والله عمه يعني من اجه المنذر اشتميت بي ريحة عطر كووولش حبيتها

بس مؤيد محبيت عطره لعبت نفسي

مو يكولون التلعب نفسها من زوجها تحبل

كلتلها عمتي...حللي وشوفي

كالت بدلع...اي باجر اروح

باوعت للمنذر كلتله...عطرك يجنن شسمه اريد اجيب منه

سحبت الخاشوكه وجتفها طخ بصدره وابتعدت بسرعه

انه باوعتله بقهر وهو باوعلي بحييره....

كلها...اشوف اسمه واردلج جواب

تركنه وكام

واني تخبلت تركت الاكل ووكفت رحت للغرفه ضليت ابجي

لا يمكن اضل هنا

محد يحجي وياها....كلهم مقدسينها ويحبونها

صارت تقريبا ب 11 واني ابجي ومحترك كلبي....

انوب هسه تحبل تضل تتعيقل وتتدلع وكل شويه منذر مشتهيه هييج منذر مشتهيه بقلاوه....

لبست حجابي ولبست عباتي وكلت اروحن البيت عمي همه ياخذوني لاهلي

انه هنانه بس خدامه...

طلعت شفت باب غرفته مسدود والضوه مفتوح...

اي كاعد يخابر البيگ....

مكيف الغرفه فارغه عليه يخابر براحته....

مشيت على اطراف اصابعي وطلعت برره البيت

بدون علم احدد.....

نهاية البارت...يتبع

كونوا انتم كونوا بخير...احبكم

نور سمو العراق...💔

لا تنسو التصويت والمشاركه....

كتبته بسرعه لان حيخلص النت 😭