رواية #رواية...انا هي نساؤك.. الفصل الثلاثون 30 - بقلم الكاتبه سمو العراق

البارت السادس والعشرون
رواية...انا هي جميع نساؤك
بقلمي..نور سمو العراق

💔💔💔💔💔💔💔💔

أنتَ تشبه المطر جداً .. تشبهه بقسوته وبهجره الطويل .. تأتي فجأه لتخلق في قلبي فرحاً وأملاً وأتفاجأ بعد قليل برحيلك .. أنتَ كالمطر تأتي بلا موعد، وترحل بلا وداع.

...............................

همست بخوف وبكاء جاوبته...فاروق

عمر عقد حواجبه وكال ...شبي فاروق

بلعت ريكي وجريت نفس يرجف..اء هو هو السبب

عمر بهدوء عكس تيارات القهر الي بداخله...شلوون؟

كعدت علئ الجربايه وهو واكف تكلمت بصوت يرجف ...اءء ااا اني مااعرف شلون احجي ولا اعرف شلون ابدي

بس ياعمر لو ما الانتحار حرام والله جان انتحرت وخلصت من هاي العيشه...

صحيح غلطت بس والله ندمت...

كال...اريد المهم

جان الكلام كوه يطلع مني جاوبته...فاروق صار اكثر من موقف وياه وهمني بحبه

جان انسان محترم ويايه امنت بي وكلامها حلوو غزله محترم مطلب مني شئ

علاقة استمرت اكثر من اربعة اشهر مخابره وكلام عادي

جنت احجي وابجي وعمر صافن بجمود بوجهي وملامحه جامده ما تعبر عن اي شئ...

رجعت كملت بعد ما بلعت ريكي...طلب منه نطلع لمطعم واني ترددت بس هو بااسلوبه قنعني...

المهم رحت وياه وتفاجئت بأن هاي شقة دعاره

اعتقلوني وهو ما حرك ساكن...

وهددني بتصوير مااعرف شنو  وكال منارس ترجع الوثاب

جنت احجي بس مستغربه الجمود والهدوء الي هو بي

باوعتله بخوف وارجف ...هذا الصار

هو ضل مركز عليه رغم ما يحجي بس يخووف

بطني تلويني واحساس دمرني بداخلي

هو تركني وراح للكنتور

طلع بنطرون وقميص راح لبسهن ورجع

رجع فتح الكنتور طلع المسدس واني متت من الخوف والرجفه اعتلت اطرافي

ركضت لزمته من صدره وتوسلته بنحيب...فدووه عمر وين رايح

ضحك بااستهزاء كال...انتي دورج خلص

وبعد ما يفيد بيج اي شئ واخذتي عقابج

بعد ذاك العار اله اخلي يمشي صفح...

لزمته برعب وبست ايده بتوسل...عووفه عمر لا تسوي مشاكل تعرف اذا وصلت السالفه الصلف والله ياخذني منك ويذبحني

مو مثل المنذر ومؤيد متفهم تصير معركه والله

باوعلي بااستهزاء ودفعني وراح...

ضليت الزم بيه واتوسل وهو ولا كأن تركني وراح

رجعت للغرفه واني ابجي والطم كلت اخابر منذر وهو يلحك عليه...

اتصلت اتصلت ماكوو

ضليت ادعي وابجي منا لمن حسيت نشفت دموعي...

................... .............
صحيت علئ بوساته وهمساته

دفنت وجهي بالمخده ومنعته من تقبيلي

بس هو موش اسد والاسد اله يهجم علئ غزالته

رجع رفع راسي وباسني

دفعته بدلع كتله...اممم شنهي بعدني حتئ ما مغسله

كال..اووف عسل بكل حالاتج...

ضميت وجهي بصدره همست...كافي

هو رد بحب...شكد خبيثه وگطعيه كل ما ابوسج وكلتي كافي

يابه مناري ترئ هذا رزقي مو من حقج تحرميني من رزقي

بالدين يكولون قطع الاعناق ولا قطع الارزاق

ضحكت بهدوء...يمممه منك موش رجال فارس فارس جاا اذا هيج بوساتي ابيعهن بفلوس عبن اريد اترزق

كال...هااا تردين تستربحين مني لان تعرفيني باليوم اخذ اكثر من عشرين بوسه

جاوبته...اي جااا شنهي انت تزترزق وانه ياله...

وهاا ترئ فلوسي ما تروح للغرب عبن اريدن المنهن واشتريلك ساعه هديه موش صرت نقيب يبعد كلبي

كال...محتاجه فلوس

جاوبته...ياله عبن شنهي روبت جدر روبه ومن ارجع احطن بطووس وابيعن روبه والم فلوسهن واجيب هديه

هو تخبل حجه بعصبية كال...والله بس تسويها اغطج بجدر الروبه انوب مرتي تبيع روبه

بعدت ايده من خصري جاوبته...ياله ليش هيج دكول ترة الشغل موش عيب

هو رد بهدوء...لا عيب تدرين ليش لان اني الله امكني ورازقني...مااخليج تعتازين شئ وهذا واجبي تجاهج

اذا محتاجه كليلي واني مااقصر وياج

جريت نفس بخجل...انه استحي اطلب منك لازم انته تحس بهذا الشئ

كال...وليش تكابرين الكبرياء محلوو احنه اكبر من هيج حبيبي

جاوبته...موش اكابر بس استحي اطلب منك

رد بهدوء...لعد مدام هيج راح امشيلج مصرف وعوفي جدر الروبه لا تفكيرين هيج ولا تستحين

كنتوري موجود وفلوسي موجوده محولله وموهبه اخذي شكد ما تردين مااحاسبج مفهووم

رديت ...ياله مااخذ انته انطيني

ابتسم وباس خدي كال...ميخالف ادللي هسه اريد خمس بوسات ابيش

جاوبته...يااا عزلنه تعال باجر ههههههههههه

هو ضحك وضمني الصدره كال...هنيالي

بعدها كال ..يالله حظري نفسج خلينه نروح المنتجع الحبانيه نتونس

انه بسرعه رحت بدلت لبست تنوره وقميص وحجاب وحذاء ناصيه

طلعنه انه والمنذر للبحيره بالحبانيه

المنذر كال هناك منتجع حلوو خلي نروح اله رحنه تونسنه حييل جانت من احلئ لحضات العمر

ركبنه عباره وجانو اكو سواح عرب

جنت اباوع عليهم تمنيت اشوف بطل مسلسل مسكيكي بس ماكوو

بس عرب....

شفت الحياة غير شئ موش مثل يم جدي صلف بس هوش وغنم وشط...

ونذري جان مدللني ويعاين لحلكي شكد حلووو

خلصنه يومنه نضحك ونتشاقه وانه اجفص

وهاا اغارن اعين عليه خاف يعاين علئ وحده

وبس عينه تزيغ كله ..نذري فدوه اروحلك عيونك عيونك

هو يخزني حييل ويعاتبني بعيونه

انه اضحك واغير السالفه اكللها...ياله قصدي عيونك حلووه

خطيه ضل يضحك وهز ايده يعرفني جذابه...

لزمت ايده بفرح عبالك ابووي وضليت امشي بهدوء وياه....

............................

عمر

جان كلام نيران مثل التيزاب نزل علئ صدري...

تستخدمت الهدوء والمباغته وياها

ما حبيت اكول للمنذر لان فعلا يكتله وينسجن ويخسر وضيفته اعرفه متهور...

بس اني حبيت اعاقبه وانهي من الحياة بطريقتي

شفته طلع من الامن العامه بجبروته وخشمه العالي

قررت اكسره

نذل هوواي انطه ضحايا وكل يوم يترفع

طلعت السلاح جنت راكب بسيارة صديقي

وجهت المسدس عليه ماكدرت ااصوبه...

لان جان وياه ضباط وشرطه...

ابتعدت هوواي ورحت لبيتهم...

شويه وهو وصل نزل من سيارته

واني سحبت المسدس...

وأتذكر كلام نيران ودموعها

صح مااثرن بيه لان غلطانه بس تضل انثئ مكسوره مخدووعه ....

وتهديده الها جان اكبر لكمه خبيثه يوجهها الها

اطلقت طلقه

ما سمعت بس صرخته ووكع علئ الارض وهو ينزف

رجعت سقت بسرعه

اذا انلزمت ارووح بيها اعدام...

رحت سلمت السياره بعد ما خليت هل كلب يشحط بدمه....

جان عندي رغبه بالرجوع للبيت

بس وجود نيران يوترني مااريد اشوفها...

ولا اريد اضعف الها...

اريدها تتعلم من خطأها وهمين حابها تأمن بيه وتحجي الي الصار ومتضم عليه

لذالك مجانت الي اي ردة فعل اتجاها...

خطيه شبعت كتل

ذاك اليوم انتبهت علئ اعلئ كتفها العاري مجروح من اثار الضرب...

ضليت افتر رحت للمركز

طولت حييل

طلعت دوريه سالتهم شكوو...

كالوو..واحد بالامن العام اغتالوو

توترت حييل لازم ارجع للبيت بس وجودي بالمركز اله حدث خاص

حتئ محد يشك بيه....

كملت شغلي واثبتت وجودي

اجت الدوريه كالوو..متصوب وشالو نص البنكرياس وحالته خطره

سكتت محجيت شئ جان الغموض مطوقني...

رجعت للبيت تلكتني نيران بالهفه رادت تسال حطيت ايدي علئ شفايفي كلتلها...اششش تعبان اريد انام

من رجع حسيت فرحت تلكيته ردت اساله اتطمن علي ما انطاني مجال...

وسكتي

شمر روحه علئ الجربايه وبسرعه غط بنوم عميق

..........................

بعد ما رجعنه من الحبانيه...

رجعت لنفس الحاله كراب وتنصيف والمسعده اجت...

مدده وانه انضف...

ضلت تدردم وتحجي شنو المنذر يعوفنه واحنه منتظرينه ميصير عيب ومدري شنهي...

انه خليتها مثل الجلب تحجي وحدها

ما تحجي كدام نذري عبن تخاف مشوف هو لسان دلاله

يضل يحجي عليها....

،بعدها سويت غده

صبيت واجه المنذر ومؤيد اكلوو وعمتي والسعدانه

سخيفه كل شويه وعدلت ثوبها من صدرها

وصدرها طالع رجلها ما يكلها عيب

ملتهي ياكل...

اندك الباب طبعا شئ اكييد محد يفتحه غيري...عبن انه اصغر القوم

واكوو مثل يكول اصغر القوم خادمهم

كمت رحت افتح الباب كلت...ياهوووو

ردت عليه بصوت انثووي مايع...اني

رمشت بعيوني ..ياهوو هاي اعرف صوتها منهي يربي

افتح الباب واشوفن منهي بس اكيد موش حيحو

فتحت الباب وتفاجئت ياله وروح ابوووي انصدمت

روجين ام سيقان بنفس التنوره

عدلت شعرها بدلع كالت...المنذر موجود عندي موضوع مهم وياها

كلتلها...ياله راح لمكه  يدعي عليج بعد ما يشوفج

كالت...اممم رحت للمركز ملكيته كالو هسه رجع للبيت

روحي صيحي حبي لا تكونين متطفله

رديت عليها باانزعاج...خايبه ولي ما بقه عليه بس وصخ رجليه

موش هنا موش هنا لزمه هج منجن شنهي ما تستحن ترئ متزوج

ويموت عليه

سحبت خصلة شعرها وخلتها وره اذانها كالت...اسم الرب عليه فدوه الگلبه ما يموت وره واحد

رديت عليها بعناد...عبنه اسسسد

يالله روحي لا اكلن الجدي صلف وحگ ابو فاضل يجسرج تجسر

ياله يمكن ما يجسرج يتزوجج

هيج وجدي يزوجج وتصيرن مرت جدي بعد ما جنتي مرت رجلي

ههههههههههه بوياي تصير مسلسل مسكيكي حلوو

مااشوف اله المنذر وراي تخبلت

هي ضحكت كلتله...هلاوو منذر شلونك مشتاقلك رحت لدوامك ماكوو

عندي موضوع وياك

جاوبتها...هووي هووي علئ كيفج اكلتي الرجال حاصل فاصل

تسألين وتجاوبين شنهي ما عده مره تردج

هو باوع عليه كال...منارس ادخلي جوه

باوعتله بحزن...ليش؟

كال..ادخلي بعدين افهمج

عفته ودخلت وهو دخلها بالاستقبال

انه يمااااي راحت روحه ابدي احرك البيت عليهم

افورن افورن متت من القهر

هو تقريبا نص ساعه وطلع

بسرعه دخل للغرفه وبعدها رجع للاستقبال وشايل ضرف صغير بيده

انه شعوري مااكدر اوصفه قهر وحزن وخيانه

دخلت الغرفتي وشبعت بجي

شنهي انه جدر روبه محمض وما معترف بيه

ولا جني زوجته

كرهته بعد ما احبنه يطلك يطلك....

رجعت للاستقبال واشوفن طلعت بتنورتها شايله الضرف وتمشي بدلع وتطك بكعبها

وتلعب بشعرها....

وهو يباوع عليها بجمود

رجع للاستقبال ولا كان صاير شئ

عمتي ما حجت من سالته جاوبها ماعرفت شنهي بعد ما حجت....

مؤيد كال...راح اروح للعماره اشوف صلف واجيبهم

اريدهم تباركولي بحمل مرتي...

صدك حظر روحه لزكت وياه مقبل المنذر اروح توسلت ردت ما قبل

وخله وطلع كال اذا رحتي احركج انتي وصلف

المهم راح مؤيد وانه ضليت ابجي

صار دنيا ليل والمنذى ماكو

سويت عشا وتعشينه غسلت المواعين وهو ماكوو

خليت ورحت الغرفتي نمت....

تراودني احلام تخووف موش حلوه...

نسيت عمي ابو جاسم كال فاروق خطر بالمستشفئ

اغتالوو محد راح اله...

وهمه هم ما رادوو واحد يعرف يخافون نتشمت بيهم

كلنه يمكن عداوه...شعلينه بيهم الله يشافي

كعدت من النوع ب 11 ونص والمنذر ماكوو

طلعت بره الغرفه جان الجوو مضلم والكلوبات مطفيه...

رحت العمتي لكيتها نايمه...

رجعت الغرفتي

اثار انتباهي صوت من غرفة مرة مؤيد

تضحك بدلع وهي دكله....اموووت عليك اغار من اشووفك ويه مرتك صح تفكيري غلط وحرام بس الحب وما قتل شسووي اتحمل الخاطرك

بلعت ريكي محد بالبيت معقوله ويه المنذر ياله ياربي ياله موش مصدكه...

نهاية البارت...يتبع

صح البارت قصير بس بي احداث...ميخالف تحملوني....

كونوا انتم كونوا بخير...احبكم 💔

نور سمو العراق.....

تابعوو هاي الكاتبات فضلا وليس امرا

Shahoda_ShoShoLahn_ALnoorAlhse4