رواية مرسال كل حد الفصل الثاني عشر 12 - بقلم ايه سيد

بصلها وضحك: أنت مفيش حد يتوقعك يا مرسال أنا خلاص مش هستغرب أي حاجة منك بعد كدا, اركبي يلا خلينا نمشي. قال الأخيرة وهو بيركب، سألته باستغراب: هنروح فين؟ -هتعرفي لما نوصل.. قال الأخيرة بيسوق عربيته لحد ما وقف قدام مقهي كدا لا هو كافيه ولا هو مطعم بالمعنى الحرفي، كان المكان راقي وهادي.. سألته باستغراب: هو احنا فين؟ -دي مطعم للفطور بس. = فطور بس؟ يعني مش بيشتغل بعد 12 الضهر؟

ضحك وقال: وهو أنت مفكرة إن كل الناس زيك عندهم جامعة بيصحولها من خمسة الفجر؟ = أنت بتذلني طيب ولا بتنكد علي؟ ابتسم: ال2 عادي، اتقدم ناحية المطعم علي تربيزة علي ناصية الطريق تبع المطعم

وشد لها كرسي وهو بيقول: المكان بيبقي شغال طول اليوم عادي أصل الناس مواعيد صحيانها مختلفة يعني فيه الي زيك كدا زي الكتاكيت الصغيرة بيصحوا الفجر وبيناموا من المغرب وفيه الي بيصحي بعد الضهر وفيه الي يومه ملغبط نهاره ليله وليله نهاره، قعدت علي الكرسي اللي سحبه لها، فابتسملها وقال: دقايق وراجع.. وبعد مدة قصيرة حوالي 13 دقيقة جه وهو بيحط الأكل قدامها وعصير سميك القوام. سألت باسغراب وهي ماسكة العصير: وهو ده إيه؟

ابتسم: ده زبادي خلاط. سألته بتعجب: إيه ده؟ هو فيه حاجة فعلا اسمها كدا.. يعني الزبادي الخلاط ده حقيقة مش أسطورة مصرية؟ تتدرجت ضحكته من الابتسام للضحك: أسطورة مصرية؟! أمال إزاي كنتي بتطلبه طول الوقت؟ = لا عادي ده كان أفيه وأنت مبتفهميش في الأفهيات. ابتسم وكمل: اه فهمت عموما هو اسمه في مصر زبادي خلاط إنما اسمه الحقيقي سموزي (Smoothie) = بجد؟ اسمه شيك أوي.. سموزي، سموززي، سممووووزي. ضحك وهي بتحاول

تقوله بنبرات مختلفة وقال: شكلك منبهرة بالاسم. = لا أنت مش متخيل اسمه ابن ناس إزاي طب وعلي كدا بقي لبن العصفور اسمه الحقيقي إيه؟ -لبن العصفور؟ هو فيه حاجة اسمها لبن عصفور؟ = مش الزبادي خلاط طلع حقيقية يبقي أكيد فيه لبن العصفور ثم ليه مستغرب وفيه حاجة اسمها لسان عصفور؟ _معلش اعذري جهلي أصل كل اللي أعرفه إن العصفور بيبض مش بيولد فأول مرة أسمع إن له لبن.

وبكل ثقة ردت: لا عادي يا ابني مفيش حد بيتولد عالم يعني المهم إنك عرفت. _اممم.. الحمدلله..عرفت فعلا.. بس عندي سؤال أنت بتجيبي معلوماتك الجبارة دي منين؟ = لا دي استنتاجات من خبرة سنيني في الحياة. _ماشاء الله عالمة يعني؟ = قاموس علم ماشي على الأرض حضرتك. _لا ماهو واضح. قالت وهي بتأكل: على فكرة أنا عارفة إنك بتتريق بس هسامحك بس علشان الأكل طعمه حلو بس لاحظت إنك اللي دخلت وعملته، هو عادي كدا أي حد يدخل يعمل؟

_لا.. بس كنت شغال هنا قبل كدا ومرضتش حد من الاستف اللي جوه يعمله لاحسن تعيطي علشان الرومي طالعة بره الفينو ونسيوا يحطوا الخضار اللي بتحبيه والأهم من كل ده الزيتون الأسود. = قصدك إني عيوطة؟ _لا لا خالص.. أنت استرونج اندبنت ومان يا بنتي. = هو بعيداً عن التريقة دي بس الفضول هيموتني واعرف عرفت إزاي إني مبحبش الرومي طالعة بره الفينو دنا وماما بنخانق على الموضوع ده كتير. _علشان تعرفي إن سواقك هيما عارف كل حاجات البنات.

= أنا مش بهزر أنا بتكلم جد. وبنبرة ممزوج فيها الهدوء والبرود: مفيش حسيت بس إنك بتحبيه كدا. = إيه جو الأبيض والأسود ده أنا بدأت أخاف. ضحك وقال: بهزر.. بصي هو حقيقي علشان بحس إن فيك هرمونات من ستي. = نعم؟ أنا أسمع عن فيك شبه من ستي إنما هرمونات من ستي جديدة دي.

_لا حقيقي بحسكوا شبه بعض في الهرمونات جدا يعني حتى في الحاجات اللي بتحبوها ستي هي كمان كانت بتحب الرومي بس بتبقى محزنة لو كان طالع بره الفينو وإن جدي خلاص مبقاش مهتم بيها علشان كدا أي حاجة لستي جدي هو اللي كان بيعملها مش الخدم. = بس أنا معنديش خدم، يعني أنا الخدامة الوحيدة لإخواتي أوقات بحس إن الخدامة الفلبينية اللي جابهالهم بابا. ضحك جامد ومكنش عنده قدرة يرد فكملت: حد؟

أنت مكملش باباك ومامتك راحوا فين يعني قصدي كل المدعكة اللي حصلتلكوا دي ومحدش فيهم عرف عنها حاجة.

_من بعد ما انفصلوا وكل واحد منهم راح في طريق، بابا اتجوز وسافر انجلترا وماما نفس الأمر اتجوزت بس في القاهرة وبعدين سافرت هي كمان مع جوزها وأولادها ولما عرفوا بأمر إننا خسرنا كل حاجة، أمي عرضت عليا أجي أعيش معاها وطبعا ده معناه إني هسيب جدي كدا فرفضت وبابا قال لجدي إنه هيبعتلنا تذاكر طيران علشان نسافروله لأنه مش هيقدر ينزل بسبب شغله، بس جدي رفض، مش علشان هو كان خلاص كبر في السن ومعندوش قدرة يسافر بس علشان كان مرتبط أوي بالمكان في مصر ومش حابب يسافر ويتغرب في أيامه الأخيرة ويسيب ستي قمر لأنه ديما بيزورها ومن 15 سنة عدت لحد دلوقتي مفوتش ليها أي زيارة.

= تعرف أنا معجبة أوي بجدك ده حقيقي يعني بحسه وفي في زمن قل فيه الأوفياء والرجالة بجد يعني.. بعدين سكتت وسألته فجأة: هو أنت كلية إيه؟