رواية رتبة و ظفيرة الفصل الثالث والأربعون 43 - بقلم رُسُـل فَهد 🤎

صفي نيتك والعبر بختة يطيح هاي من تالي لظنونك خيبت؟ حلفوني بعيني ما گلت الصحيح وحلفوني بعينك وما چذبت -سمير صبيح ياسمين: يمة شجابك؟ -نتحاسب حبيبتي. ياسمين: يعني أنتَ ما رحت وياهم؟ وعليمن نتحاسب؟ أرشد: شلون أروح وروحي هِنا؟ ضحكت وباوعت مستغربة، لازم القمچي ويجمّر بالفحم. -شوكت طبيت؟ منين جبت هاي النرجيلة؟ -هساع ما صار چثير، توني طبيت. سديت الباب وطبيت جوة أرتب بالبيت، أصلًا ما تلوكلي الندارة.

بس شسوي لازم أنظف، گعد هو بالاستقبال يدخن ويلعب بالتليفون. انترس البيت ريحة نرجيلة الله تجنن. أنظف بالصالة وأجر نفس قوي، أستنشق الريحة الطيبة، أخاف أگله أريد. سمعته صاح من الاستقبال. أرشد: دموتي بالله دموتي! شهگت وضحكت، أجيت يمه هو هم يضحك. ياسمين: شبيك عيني گحط؟ مد ايده بعلامة "تعالي شربي". ابتسمت وقربت حلگي عبالي يچذب، جريت نفس قوي گحيت. أرشد: ههههههه قرچ والله لو جارعتها چان فينت حظچ. ياسمين: يمة شنو هاي؟

لا عمي اني مستواي جگاير. أرشد: يالله ما خلصتي ندارة؟ -شتريد عيني مو دننظف؟ ترك القمچي على القنفة وگام، حاوط خصري وقرب خشمه على خشمي. أرشد: إخ يا طرگاعة التغنچ تعبني. اني وأنتِ مسترجلة، گوة كاضب روحي منچ. ياسمين: صدگ عليمن تحاسبني سيدي؟ -عيدي!! -هههههههه سيدي. -عيدي. -شنو شبيك مو گلت سيدي! -لا الضحكة. -بعد راحت سيدي راحت. حچيتها وتلمست شواربه. أرشد: صدگ وحضيت بيچ؟ آه يا عوض كل الخسارات.

ياسمين: أبو شاهين أنتَ الحبيب محد يستاهلني غيرك. -لج قرچ أنتِ منيلچ هاللسان الحلو؟ ما چنتي هيچ شسواچ چبيرة هيچ؟ -بعدك سيدي. أرشد: شعملتي بحال سيدچ أنتِ؟ -شعملت؟ -گصيتي روحو يا قرچ. -الظفيرة؟ أرشد: نقطة ضعف الزلم العاشگة شعر نسوانها. الگصيبة هاي إذا عندچ شيء عادي، واليدحك حبي إلها يگول يبالغ. لا يولي ما أبالغ أنا روحي معلقة بيها، لمن أدحكها تخط وراچ وأنتِ بعدچ جاهلة. وهي تجيب التايه، روحي تفور وما تطفى.

ومن طلگتچ وإدحكچ تفترين وحدچ تشوط الروح تشوط، بس أنتِ قرچ ما ينگدرلچ. وأنا ما أغصبلي بنوة على شيء، تركتچ. بس أنا واثق غيري ما يطب گلبچ بعد. دگ على صدره وأردف. أرشد: هذا تابوت التحط راسها عليه ما تطلع غير للگبر. ياسمين: و شكم وحدة حاطة راسها عليه عيني؟ -أنتِ ومسك. تغيرت ملامح وجهي، أنعصر گلبي وخزرته. -ميتة يولي ميتة، عجل لو أتزوج شتعملين؟ ياسمين: شأعمل؟ والله لو تگدر تتزوج غيري چان سويتها من زمان بس

أنتَ تدري مثلي إلك بهالدنيا ماكو، فما تتعب نفسك وتدور. أرشد: طرگاعة براسچ. تركته وكملت تنظيف بس حز بگلبي من ذكر اسمها. طلعت من الحمام وطبيت للغرفة، بعدت الخاولي أنشف بشعري. أباوع الباب انفتح، ما استغربت لأن متأكدة راح يجي، تقرب وهو مبتسم ويمسح بشواربه. أخذ المنشفة من أيدي وبدة هو ينشف شعري على كيف. أرشد: يعني أجذب وأگول بس أنتِ؟ هم أطلع چذاب وشيخلصني. ياسمين: لا عادي ترى ما مهتمة.

أرشد: آه آه يولي ميتة وهيچ تغارين، عجل لو... انداريت عليه وخليت ايدي على حلگه. -هااا هاااا شو أخذك الواهس؟ أرشد: ياسمين أنتِ من البشر محسوبة؟ أهجسچ ملاك، لأن ما دحكت بصفاتچ بنوة. ياسمين: بعد ما أدري والله يجوز أطلع ملاك، هي الدنيا صدمات. ابتسم وهز راسه وهو يرد: طرگاعة طرگاعة. بده يمشط بشعري القصير، هو صح شكلي بي طالع كلش حلو وطفولي أكثر. بس شيقنع أبو شارب الحلو؟

فوك ما هي ظفيرتي صرت اني أقنع بي هسة يطول وترجع مثل قبل. تمدد على الفراش الي أنام بي يومية وفتح ايده. -عيني أحنه مخطوبين روح لبيتكم مو عيب. أرشد: يا عيب يظل يم عيونچ؟ هو بدون شيء اني هايمة بي، مو النوب مستلمني غزل مدري شلون لازمة روحي. وما أروح اعضه من الفرح. نمت على ايده وانظافت هالليلة لأحلى الأيام بحياتي. گعدت الصبح كالعادة وهو ما موجود، ركضت على التليفون لگيته ناشر بحسابه القديم. صورته وهو واگف يم السيارة وبيده

السلاح وباقة الورد وكاتب: كافي انتظرتَه عمر هيچ أنتَ متساهل؟ گتلهم أبقى أنتظر مو طعمة بس يختلف (المنتظرة يستاهل) أقرة بالتعليقات وأطفر من الفرح. سحبت الصوندة من بيت درة وگعدت ارش بالكراج، ما أريد أتصل أريده هو يتصل. فتحت الباب وأرش الصبة مال الشارع، الحجية باب بيتها مفتوح. مدت راسها من المطبخ طلعت وهي مبتسمة. -ها يا حلوة، گرة عينچ بزلمتچ، الله يحفظه لشبابه يسوى كل الصبر والبچي. ياسمين: حياتي خالة شكرًا.

اجتي يمي وگفنه، ظلينه نسولف. ودخلت سيارة حلوة بالفرع، ظلينه واگفين اني وياها نباوع لحد ما تقربت وشفته هو گاعد بالصدر وأبو فزعة يسوق. نزل هو بملابس الدوام وأبو فزعة يضحك. وهو عاقد حواجبه، سلم على الحجية ومد ايده على ظهري دخلني للبيت. وسد الباب قوي. -شبيك؟ أرشد. أرشد: لا ماكو يابه، بس ناوشيني گرون من يمج إذا ما تصير زحمة. ياسمين: شتسوي بيهن؟ يعصر ايده ويضرب راسه. اه اه يا سهلة تعاليلي تعاي گعدي هينا ياسمين.

أشر على كرسي بالمطبخ، گعدت مستغربة. نزع بسطاله بالباب وأخذ القوري ترسه مي، يشغل بالجداحة ويحچي. أرشد: ياسمين دحكي، راح أحچي چم چلمة يتطبقن ما ينعادن، مفهوم؟ -شنو! أرشد: تتبع النساء أزواجها كيف ما كانوا إلا في طاعة الله مو صح؟ -أي أرشد: إني رجال عراقي والغيرة عندي مفَولة. كل الأيام الفاتت تنمسح. چنتي طفلة ومريضة وأني أعاملچ على هذا النطاق. بعدها طلّگتچ وحاولت أتخلص منچ، بس أنتِ اللي شئتِ أم أبيتِ لهينا تمام؟ -اممم

-هساع أنتِ مرتي قدام الدنيا كلها. تجين وياي تتسمين يا أم شاهين، يا مرت أبو شاهين. فـ مو من طبيعتي مرتي كلها تدحكها. أني من جهال فراس أغار. أني هساع ما أحجي وي جاهلة، أحچي ويَ مرة متزوجة أصيلة. ما تحب تجيب لرجلها حچاية ولا واحد يمس كرامته بشعرة. وأنتِ كرامته. ياسمين: يعني شسوي؟ أرشد: خلي أكمل، أنتِ لما تشترين لعبة حلوة تركچ من اللعبة، ذهبچ وين؟ -ضامته -ليش؟ ياسمين: لأن غالي وأخاف ليصير شيء أو يُنوخذ غير!

هو الذهب لازم ينضم. أرشد: وأنتِ الذهب نفسو. ابتسمت. -حبي الچ طاغي على كل العادات والتقاليد اللي ربيت عليها. بس هذا مو يعني الحبل ينفك! لا، بس الغلط عندي مو يتصحح. الغلط ينترك. أكثر من سنتين أنتِ يمنا دحكتي مرة بالشارع؟ -لا -دحكتي مرة تشتغل؟ تطلع بدون حجاب؟ تطلع وحدها؟ ذني كلهن وأنتِ تحت جناحي أريدهن يتنفذن. أني مو أغصبچ. بس أنتِ إذا تحبيني تحبين اللي يريحني. -بس أني تعودت هيچ.

أرشد: تتغيرين شوية شوية. ثقي كل اللي أريدهن الچ مو أمنعچ من اللي تردي. بس من خوفي وحرصي عليچ. إذا چان على الحجاب فـ هو فريضة غصباً ما على خَشمچ. ما دام أنتِ مسلمة وتقتدين بـ الأئمة دحكتي وحدة من نسوانهم بلاية حجاب؟ -لا -عَجـل بَعـد شنو؟ أرشد: كل الأشياء الحلوة والغالية تنضم، وأنتِ كلچ حلوة شلون أضمچ؟ ياسمين: جنت دگلي براحتچ. -لأن جنتي مراهقة وخلصتيها عليّ مريضة وحاير بعلاجچ. ما چان اكو وقت للنقاش وياچ من الأساس.

ياسمين: بس ما ألبس حجاب. -براحتچ، بس تندمين بعدين. ما جاوبته وبقيت صافنة وأفكـر. ترك القوري وراح للغرفة، شوية واجة بيده إحرام الصلاة، مد إيده إلي. -شسوي بي؟ -لبسي. أخذته من إيده ومستغربة لبسته وأريد أطلع للكراج أعدله بالمرايا. لزم إيدي واتجه للغرفة وگفني كبال المرايا وأردف. -تـاتشوفين الجمال؟ -حلوة بس مو كلش. أرشد: منو أكثر واحد بالدنيا تتمنين تطلعين قدامه حلوة؟ -أنتَ. -وأني لمن أدحكچ بهالهيئة أهجسچ أميرة.

الدنيا چم يوم وتخلص، دامني أگدر أغيرچ عش أخليچ تتحاسبين على كل شعرة طلعت منچ؟ أنتِ تخصيني. أني المسؤول عنچ. أريدچ تصيرين مثل سميحة. -سميحة خطية. -عَش خطيـة؟ تقربها لرب العالمين وإيمانها بي، تنحسد عليه. لأن مو أي أحد يوصل لهالمرحلة. سكتت وهو أردف. أرشد: الأسبوع الجاي ملچتها لـهيثم. فزيت بصدمة وانداريت عليه، لزمت ياخته والضحكة تارسة وجهي. -صدگ؟؟؟؟؟؟؟ -أي. -شلون؟ -دحكي أني سميحة مربيها على إيدي، وساعة اللي تسوي غلط.

من طريقة حچيها أعرفها، بس لأن أني أعرف شنو ربيت نـايم رَغـد. الگلب مو بالكيف يهوى، وأنا لو ما أدري بهيثم شنو ما أعطي سميحة. ياسمين: سميحة خطية والله هي تحبك ما غلطت بشيء. -تعبتني أنتِ وياها. ياسمين: شمسويلك يا عيني غير نحبك شمسوين أصلاً هيثم مبين خوش ولد. أرشد: صعبة يولي قسمتهم صعبة. ياسمين: لعد شلون؟ يعني أهلك لسه ما يقبلون؟ وأنتَ شلون قابل. أرشد: آه يـ الـعـد آه مرمرتنة.

بالوحدة لازم أروح للدوام. عود اجيت أنام بس وراج ماكو نوم. نزع البدلة وخلاها بأيدي. -غسليها وشريها بساع الشمس عالية حتى تنشف. ما انتبهت لكلامه بگد ما مصدومة بشكله، أول مرة أشوفه بهالمنظر. أرشد: يولي مرتي بعد صرتي مرتي. أخذت البدلة وطلعت فاتحة عيوني وأهتف. -ضباط آخر وكت يبقون بالشورتات والفالينات، أخ أخ منك أخ. وهو يضحك بصوت عالي يعني شلون يولي ما نلبس، طاح حظچ على هالتفكير. رحت لبيت أم درة، خليتها بالغسالة.

كالتلي رجلچ هنا، كتلها أي كالت عوفيها أني أغسلها، روحي يمة كيفت وطلعت للبيت. هو يخابر ويضحك بصوت عالي. طبيت أشرلي شبساع؟ -أم درة راح تغسلها. -يا حبيبي. باوعت للتليفون على الرقم اللي يتصل بي، چانت صورة أبو قيصر. اجة صوته وهو يسأله.. شلونها ياسمين؟ -هلاووووو عمو زينة، وانتوا؟ -الحمد لله يابة. إذا يضوجچ خابريني تا أتصرّف، بعد صرتي چنتنا. -عمو ينزع هدومه كدامي، بربك ترضاها؟

لحظة صَمت وصدمة معاني وجه أرشد وسكوت أبو قيصر واستيعابي للحچيته. حطيت إيدي على حلگي وأبو قيصر سد المكالمة من يمه. قام أرشد بسرعة متّجه عليّ، وأني من الصدمة بقيت واكفة بمكاني. رفع إيده بنفاذ صَبر: الله يفضحچ يا قرچ، الله يفضحچ. -يا والعباس بدون قصد. -والله لأخلي العباس يتشفعلچ اليوم، والله. ركضت للغرفة ولزم إيدي دخلني وسد الباب. ضربني على حلگي وباوعتله بعصبية. أرشد: إيمتى يبطل چفصات هاللسان الزفر؟

شلون أدحك بوجهه بعد هساع؟ شيگول ووين يشطح باله؟ ياسمين: ولتمد إيدك لا. -إي بالله شتسوين؟ شفت معاني وجهه مو مثل كل مرة، وصدگ مبين أعصاب. رفعت رجلي وطبعت بوسة بخده. -أبوسك يعني شسوي! تركني وطلع من الغرفة يهتف وإيده على گصته: شلون راح أخذچ للغربية؟ شلون؟ إلا تصيح الغوث منچ، الصبر يا صاحب الصبر. أباوع مبتسمة وما مستوعبة الجفصة الچافصتها. نام ولمن صارت بالواحدة اشتعل تليفونه مكالمات من أبو فزعة.

صاح جيبي البدلة. ردت أطلع وأني لابسة التراك، أشر: وين؟ لبسي الچادر. ما ردت أعاند، لأن من يكعد من النوم أعصابه مو تمام. لبسته ورحت لگيتها تكوي بيها. -شكرًا خالة تعبتچ. -أعرفجن أنتي وست درة، لا حظ ولا دبان، تعرفن بس السيابة وأكل ونوم. ضحكت وأخذتها منها وطلعت انطيتها إله. أخذها وهو عاقد حواجبه، يلبس ويستغفر. بعده يرتب بشعره ودگ هورن بره. طلع شوية وطب، خلى علاگة على الكرسي وراح.

أكلت وشوية ضميري يأنبني، يلا يلا من يجي يرضى. المغرب إجتي درة. وسولفتلها، لطمت وهي تضحك: بابا أنتي صدگ طركاعة. -ويريدني أتحجب. -عادي يعني، أنتي متزوجة واحد من الغربية، كل عاداتهم وتقاليدهم مو مثلنه. وحتى أني مفكرة ألتزم بالحجاب، صحيح لابسة بس مطلعة گذلتي، ويكولون حرام. فـ عليمن أخرب الحجاب ع هاي الشوية، أضمها ويا دار ما دخلچ شر. كعدت أسولفلها على سميحة وحبها لهيثم. درة: الله يعني دخل للإسلام علمودها؟

شنو هالحب الكارثي! ياسمين: من إجه خطبها وأني يمهم بنص الكراج كام يصيح: أشهد أن لا إله إلا الله. -منو معارض على زواجهم؟ -كل البيت، بس شوية أرشد قابل. درة: مادام هو قابل ها هي، أحمدي ربچ شوية رجلچ مثقف. ظلينا نسولف للتسعة. اندگ الباب، هي فتحت الباب وطلعت وهو دخل. باوعتله وأني رافعة حاجبي ومبتسمة، دليل على المصيبة المسويتها. باوعلي وهو يحاول يخفي ابتسامته، جايب وياه جنطته، أخذ ملابس وراح يسبح.

طلع وأني كاعدة بالصالة. هو راح للمطبخ يمكن يعمر النرگيلة. وفاتح أغنية "ون بوية ون". فتحت التليفون وأني أشاهد معلومات عن ظهور الإمام المهدي (عج) وشنو العلامات اللي تدل على الظهور إلى إن أجتني لحظة إدراك، صفنت والفيديو مشتغل والصوت عالي. إذا أني هلگد أحب الإمام المُنتظر والله غرس حبه بروحي. وأنتظر لقياه! بس أني ممطبقة كل الفرائض الإلهية، منو يگول راح يقبلني من ضمن أمتهِ وأنصاره؟

فعلاً كلام أرشد صحيح، محد من نسوان الأئمة مو محجبة. وأني المن مطلعة شعري؟ شو أني أحب أرشد وهو حلال عليه يشوف شعري. وأني ما أريد أعجب أحد بهالدنيا غيره. لو تحجبت راح أرضي ربي وصاحب العصر والزمان وأرشد. ولمن يرضون أني راح أكون فخورة وراضية على نفسي. رب العالمين رغم عدم التزامي بهواي أشياء. بس هو بأكثر الأوقات ينقذني وينجيني، والجبر اللي جبرني بي آخر مرة. خلاني أدرك كل مأزق ندخل بي هو امتحان. والناجحون يجازون عند ربهم.

أما في الدنيا أو بالآخرة. يجوز أني عوضني بالدنيا لأسباب لا يعلمها إلا هو. بس غيري يكون نصيب عوضهم بالآخرة. غمضت عيوني وخليت إيدي على كلبي، أقسم وعد وي الإمام المهدي. -السلام عليك يا سيدي ومولاي. سأتبع نَهجكم وأسير على مسيركم. أستعجل في ظهورك يا مولاي فالقلوب مُحتامة لرؤياك. كان كل كلامي والعبارات اللي أستخدمها نابعة من فطرة، ما أدري إذا كانت صح أو كانت غلط، لكن متأكدة هو يتفهم حبي إله.

بين ليلة ويوم انغرس حب هالامام بگلبي، رغم كل طفولتي ومراهقتي. محد تطرق بموضوع گدامي، لكن حبي للإمام العباس. خلاني أتعمق بقصصهم واحد واحد، واللي تعلقّت روحي بي أكثر هو. صاحب العصر والزمان المهدي عجل الله فرجه. (حبيته حب العاشق، يقرأ التاريخ وتعجبه شخصية بشر ما شافه) درت وجهي، جان هو كاعد بالمطبخ يدخن ومطفي الأغاني. رحت. للمطبخ أشرب مي لأن نعست. فتحلي إيده وهو كاعد على الكرسي.

تقربت عليه وحاوط خصري بإيد وحدة وكعدت على رجله. أرشد: ما عولت أحظى بيچ، النوب نگضيها زعل؟ -صح غلطت بس بدون قصد. أرشد: ميصير يا طركاعة ميصير حبيبتي. الأغلاط نتعلم منها، ما تنعاد. ومو كلشي يطلع من الحلگ نگدر نرجعه. عدو الإنسان لسانه. -راح أتحجب. -عفية بالحبيبة. ياسمين: بس مو علمودك. ضحك وأردف.. أدري يعني صدك سميحة راح تتزوج هيثم؟ شلون قبلت شو ما أصدق! أرشد: رب العالمين لمن خلى الرجال فوگ النساء

مو معناها تتحكم بيها وأنت الأمر الناهي. لا، بس لأن يعرف هـن كائنات عقليتها وبُنيتها بيها نوع من الضعف. ما أحجيلچ ضعف شخصية لا، بس مو كلشي بأيدها. ـ صحيح أي. فوگاچن حتى نحل الأمور الأكبر من سيطرتچن. فوگاچن حتى تحتمَن بينا، نوفر الچن سبل الراحة حتى متسلكن غير طريق. أني رجال مو معناها أني أحجي وأنتي تسمعين وراسچ يتكسر. والله شنو لأن الله مخليني فوگاچ، لا. سميحة تحب هيثم وكل هالسنين هي كاتمة بقلبها.

وسرها بس لرب العالمين، أول البارحة جنت أريد منها تسويلي چاي. سمعتها وهي تدعي ومن حرگة قلبها تحجي بصوت عالي، هساع هي حاطة كل ثقتها برب العالمين يجازي صبرها وأني أمرها بيدي. لو زوجتها لهيثم هاي الثقة راح تبقى ولو ما تزوجت هيثم. راح تخيب كل آمالها. يجوز سماعي لدعائها رسالة من رب العالمين وكلتك أمرها. فالقوة اللي منطيها للرجال حتى يحل بيها أمور بيته مو يخربها.

سميحة صبرت وحبت حب طاهر وكل فترة حبها شايلة همي أني من بعد رب العالمين. تستاهل أجازيها وهيثم أني متأكد منه يصونها ويخليها بعيونه. هي تستاهل واحد يحبها مثل هيثم. ياسمين: الله أرشد هنيال سميحة عندها أخ مثلك هيچ حلو أتمنى لو عندي أخ. أرشد: إني كل أهلچ. ابتسمت. أرشد: باچر تصيرين عندچ ولد ويكبرون وبنات. وتلتهين بيهـم وتسولفين انتظارچ الي وحُبي الچ يا بِت مريم. ـ أموت عليكم. ـ منو؟ ـ أنتَ وجهالي.

أرشد: أنعل والديهم غير بشرفي إذا تحبين ولدچ أكثر مني أفين حظچ وأشمرهم بالشارع. ـ لا والله ههههه لعد هم ولدي ولدك. أرشد: لا مو ولدي، متبري منهم خيولون. ضحكت وبسته. مشت الأيام يوم أحلى من الثاني، چانت معاملته غير صار يحسسني صدگ أني بديت أكبر ويعاملني مثل الكبار وكل يوم ينبهني على شغلة لمن نتزوج لتسويها. ويسويلي تشبيه يخليني أقتنع اللي دا أسويه غلط. اليوم أربعاء وهو نزل من الدوام وگال باچر نروح للغربية.

ـ لا أني ما أروح من نتزوج يالله. أرشد: لا ما أگدر تعاي وياي ضلي يم أمينة والبنات مو مشكلة. بس هينا لا ما أأمن. ـ ليش المكار وانسجن! -وإن؟ أنا حياتي خطرة، لأن فايت بالصعبات. وذراع السباع تنلوي بنسوانها. الاحتياط واجب. سكتت لأن ما أريد بُعده أولًا، ولأن هو يعرف أكثر مني. العصر جنت قاعدة بالكراج وألعب بالتليفون، وهو نايم. سمعت صوته وراي. -ترحين تشترين هدوم؟ -لا، عندي. -مو تحجبتي؟ عجل هو الحجاب بس شعر؟

ابتسمت ورحت لبيت دُرة، أخذت منها شال ورجعت أختار لبس مستور. ساعة ألف بالشال وأقول: "لا بهاي شو وجهي ما طالع حلو." من سمعته قال: "يلا"، خليت الدمبوس وطلعت. هو بأجمل قيافة. باوعلي وأردف بابتسامة: -صدقة لله وعطيته. قفل باب المطبخ وطلعنا. سيارة أبو فزعة الجديدة بالباب. صعدت وياه. فتح الجكمجة وطلع عطر، رش لروحه وخلالي بدون ما أقول له. ضحكت. الجام مفتوح وأنا قاعدة بالصدر والحلقة بيدي.

مد إيده على أيدي وتشابكت إيده الضخمة وأيدي الناعمة. بياضي وسماره، نعومتي وخشونته. دلالي ورزانته أهلكني حب رجال غرب العراق. صرت أحس بروحي من البنات وأخيرًا. أباوع للمرايا وأسناني طالعة من عمق الضحكة. أباوع لعيونه وابتسامته اللي ظاهرة الرصعات. أرشد: أعوضج كل دمعة نزلت عليّ، ما أدري هاي العيون الزرق مخلوقة حتى تبكيلي. ياسمين: دا أحس بروحي حمامة. -عجل هو أنتِ حمامة.

نزلت وياه لأماكن بغداد الحلوة اللي أول مرة أشوفها. وكل شيء تجي عيوني عليه يأخذه. يلزم الفستان من الكتف ويقيسه عليّ. صدق حسيت بروحي طفلة وهو أبويه، اللي من هاي الدنيا كلها ربحت بيه. وكل تصرف ينبع منه ينبهني هو شقد يحبني. أكثر من ما أنا تصورت، بس هو حبه مكتوم. تعشينا، ومن نريد نصعد أشرلي على النفاخات. ضحكت، أخذ وحدة وخلاها بأيدي. -مردتي قلبي ذيج من هديتيها.

رجعت وشايلة فرحة الطريق كله وياي. أرشد المعقد اللي ماخذهم هناك بالصياح. ما يدرون هو يمي شنو اللي جان يقول لي: "أنتِ مراهقة"، صار مراهق بحبي. اللي جان يقول لي: "حبج مفضوح"، صار هو مفضوح أكثر مني. صعد الجام وفتح الأغنية المعتادة. أنا بالطبيعة إذا سمعت أغنية أكثر من عشر مرات أملها، هو شلون ما يمل أبد أبد. سحب راسي وحطه على صدره. تذكرت أول الأيام اللي حبيته بيهن.

وأيام الإدمان وسمر من تسترله. حيل فرق عن هسة. أحس بروحي صرت أقدر أسيطر على مشاعري وتفكيري وكل شيء اختلف. قطع تفكيري وهو يغني: موعد وشاطي جفنها غارت الحورية منها. بيها أشكال الدلال. يا قمر يا أبو الليالي ودع النجمة وتعال. ارسم الفرحة بسمانة طيوف ونجوم وخيال. رجعت للبيت ورحت لدُرة أريد أقول لها، وهي قامت تبكي. -لا والله تعودت، عفية. -كل عشر أيام أجي مو بعد ما أجي. حتى من نتزوج أخليه يجيبني هنا من يداوم.

أنا أدري بيها خايفة عليّ أكثر. وقعدت تسولف لي اكو شخص يبعث لها هدايا ومن الغربية بس ما تعرف منو. رادتني أفكر وياها تالي دخت أكثر منها. وثاني يوم ودعتها وأخذت الربطة وياي لبيتها حتى تلفها لي عدل. جنت لابسة فستان محجبات بنفسجي والربطة بيضة. -حطي شوية مكياج، شحطي الجماعة هناك موتيهم. -لا ههههه، خاف ما يقبل. -دتعاي هو غير مخطوبة، عليمن بعد. قعدت وهي بدت تتملعب بوجهي.

صارت فاندام تخليلي أيلاينر ثلاث مرات تعيد وهو تك وتك تالي مسحته. -دولي خلي أخلي لج كحلة، شو هذا ما يضبط. خلصت وأباوع لوجهي وجمال المكياج الحجاب اللي مطلعني شكل ثاني. -يمه خففي خففي ما يقبل. -انجبي، صيري شخصية قوية. إذا حكى وياج قولي له: "غير رايحة لأهلك عروس." -ع الأساس أهله شلون يحبوني. -شوية قوي روحج، فوتي بزودج. اللي يحبج حبيه واللي ما يحبج بمية قندرة اركعي.

بس مو يعني صدق تاخذين كلامي وتركعيهم، بس يعني تجاهليهم هيج. ضحكنا وطلعت. وأشوف أبو فزعة واقف بالباب، أهوووو. أبو فزعة: هااااااي منو لبسج حجاب؟ فحل الغربية لا زين بعده رجال ومسيطر. -يلا صعدي شو تأخرتي. رفعت راسي، خزرني. باوعت له بطرف عيني، عض شفته وصعد بالصدر. صعدت وراه. أبو فزعة: أنا حاليًا بحالة صدمة، شنو هالادب والحجاب؟ سبحانك مغير الأحوال. ياسمين: أبو فزعة لا حجاب ولا بطيخ، اتركني لا تعرف شو أسوي.

أبو فزعة: أي تقولين طيط، جا أنتِ عندج غيرها. باوعلي أرشد بخزرة. -لعد خلي يعوفني كله. -اتركها أبو فزعة. عم الهدوء وأنا خايفة شلون أطب لهم. ظليت أباوع من الجامة. ولأن شبعانة نوم ما قدرت أنام، وكل ما أباوع للجامة اللي يم مكان الصدر ألقاه صافن عليّ لحد ما دق تليفونه ومن كلامه عرفتها سهلة. -أي جاي وجايب جنتج وياي.

وصلت للشارع اللي طلعت منه آخر مرة والرتبة بيدي لمعت عيوني. وهو كأنه حس بيّ. انمدت لي إيده من ورا الكشن لزمتها وباوعت للمرايا وهو ضحك. وصلنا للبيت وأرشد ساعة يقنع أبو فزعة ينزل يتغدى وهو ما يقبل تالي راح. مد إيده فتح الباب دخلت ودخل وراي. ما أكذب لو قلت ما خفت، لأن هالبيت صارت لي بيه هواي مواقف جردتني من الأمان. لكن هالمرة طبيت والأمان وياي. أباوع للجهال اجتي تركض يبوسون بإيده.

طلعت سهلة تهلهل تشبك بيه وتتغزل بطوله وجماله. سهلة: ولج سميحة وينجن؟ بنات سلطان وينجن؟ طلعت سميحة وبيدها طاسة. لمن تقربت طلعت حنة. مدت إيدها وحنت الباب. سهلة: ناذرة لو رد طولك يتمخطر بالغربية جفوف الحديثات تحني الباب. هو يضحك ويبوس راسها. مدت إيدها سميحة وحنت الباب وفرح وأسيل. سهلة: وأنتِ يا عروس. ضحكت وعلى واهسهن مديت إيدي وحنيت الباب. انطبعن أربع جفوف. لو بشروني بجيتك إلنا. ع البوب جفي يطبع الحنة.

يا أحلى وردة بكل خمائلنا. وسهلة مستمرة بالهلاهل. عمري ما شفت حب أم لابنها بهالحجم. طبقت المثل: الأم اللي تربي مو اللي تجيب. وسميحة تتغزل بشكلي بالحجاب. سلمت عليهن وصابرين تخوزر بيّ وأخزر بيها. وأمه سلمت عليها بس دارت وجهها. هو غمض لي عيونه بمعنى "أتحملي". والجهال يسألون بسهلة: "يلا شوكت العرس جدة مال عمي أرشد؟

شوية وبدوا يجون إخوته وأبوه. أنا قاعدة يم سهلة بغرفتها. سمعت صوت السلام مالتهم. وسهلة أخذتني للصالة وإيدها ورا ظهري. سهلة: جنتك الجبيرة هينا يا أبو أرشد. يباوعلي ويباوع لأرشد ويباوع للأم. قام وقربتني سهلة عليه. باس راسي ومد إيده بجيبه وطلع فلوس خلاهن بأيدي. أباوع لأرشد أشر: "أخذيهن". والقاع ما سايعته من الفرح. تركتنا وطبت لغرفتها أم أرشد. خلص الغدى وصار العصر وأنا قاعدة يم سهلة. لما أجه هو قال: "يلا." سهلة: وين؟

-يم أمينة أحسن من هنا. -زين تسوي، هي لو ضالة يم أمينة ما صار كل الصار. هز راسه وطلعنا بس رحنالها مشي. واستقريت يمهم يومين، هو يجي بالليل يسلم ويروح. ونتراسل هواي. أسمع طراطيش حكي بخصوص خطوبة سميحة، بس حتى أم قيصر معارضة. وسمر تعوج بحلقها. سمر: يمة شعليكم؟ قابل أنتو أحسن من خالي أرشد؟ قابل ينطي سميحة لواحد مو زين؟ أم قيصر: هو مو يدري ضرغام ابن خالتي يريدها، خليها يم أخواتي، شمعرفنا بالغربة؟

وهو ما عنده لا أصل ولا فصل، عجل بايعيها سميحة أحنا؟ ياسمين: لا يقول أرشد خوش ولد ويستاهلها. أم قيصر: مو أحسن من ضرغام؟ عش تضيعوه من إيدها؟ أصلاً خابرت خالتي هالساع راح تروح ترجع تخطبها. سمر تحكي بهمس: يعني تحبه ويحبها، هسة كوة أنتو شعليكم. .... سميحة:

بيوم رجعة أبو شاهين هو والطرگاعة، ثاني يوم عدنا تسليم، وأرشد دز على هيثم تا يروح وياه، وأبوي ما راضي، وإجا أرشد يسولف لأبوي لو ما هيثم اليوم چان خسرنا الوجبة كلها، وأبوي يسكت ما يحكي. أرشد: وعلى وگفته هديتي. -شهديته؟ -سميحة. چانت كلمة كفيلة تخلي كل الدنيا تصير بوجهه، ومحمدنا وعصام يدافعون ويحمدون بأخلاقه. تركت الهوسة وطبيت للغرفة سجدت. يارب يارب سهل أمري يا حبيبي. والله لو بس يوم انجمع بيه تحت شرعك قابلة.

يارب لو هو لو ما أخذ، ومعزتك بقلبي ما أتزوج غيره. سوي شيء واجبر خاطري، أني تعبت ياربي تعبت. وثاني يوم كل الوجوه متتحاچى، وصار المتوقع، أجوا خوالي وخالتي حتى يخطبوني لضرغام، وأني ضرغام من چنت صغيرة أضربه ويبچي. أني أريد هيثم. أبو لحية وشوارب شُگر. أش عيب سميحة، شو استخفيتي؟ وأبويه وأمي انطوا لخالتي الموافقة، وأسمع صوت الهلاهل بالهول وأني قلبي شايط، طلعت الهم أبچي، أبو شاهين ما موجود، وگفت أنتظره بالكراج.

تعاللنا بغيابك يولونا، طلعت خالتي وتبوس بيه، رجفت جسمي وهي دگلي: حضري روحچ الخميس نعقد قرانچ. أجيت لسهلة أبچي، وهي دگلي عجل شسوي؟ أمچ نقطة ضعفها أخواتها. دموعي تجري، والله لو يذبحوني ما أوافق وأغدره. خابرته وأني أبچي، وهو يبچي وياي ويگلي: عجل ربك ما يدحك حالنا؟ هيچ يجازي صبري كل هالسنين؟ سميحة: لا تخاف والله ما أوافق. -طلعيلي بالليل بداعة أبو شاهين، والله تعبت هالساع أني. شعامل فهميني؟

منتظرة أرشد يجي وأسولفله، هو گبل خابرها هاي خالتي وگاللها: ما عندچ مرة يمي. بس هن الطمع ماكلهن. بالليل دحكته طب وصعدتله والدمعة مالية عيني. أرشد: له له له، شبي مدمع الحلو؟ سميحة: اليوم أجت خالتي وأبويه انطاها الموافقة، والخميس يسوون الملچة، ومحد اعتبرني حتى ما سألوني، أني ما أريد أتزوج يابة، والله ما أريد أتزوج. أرشد: ليش متريدين تتزوجين؟ -عليك الله لا تصير وياهم، كل أملي بيك، أنا ما أريد أتزوج.

هيچ ثگيلة عليكم لقمتي؟ مو خلصت عمري أخدمكم؟ أرشد: هههههههه حقيرة، تعيرينا؟ شنو غصبًا على خشمچ غير أخوتچ أحنا؟ سميحة: بس أنتَ تستاهل يابة، بس أنتَ. -أي طبعًا أستاهل، أني لأني أدگ على الوتر نفسه. باوعتله باستغراب وهو يبدل. -روحي نامي، ما عليچ، وراچ أبو شاهين. حضنته وباس راسي وطلعت، قبل لا أسد الباب أسمعه يردد ويا نفسه: عجل مو بنوات غضب حتى گوا** اشتغلنا.

انتظرت كلهم يطبون، قفلت البيبان وتجولت بالبيت، فتحت الباب الخلفي على كيف، هو دام سحر مو هنا أني مرتاحة ما أنكضب. طلعت ودحكته گاعد بين الزرع. ومخلي إيده على راسه يمسد بيه، وصوت الأغنية تارس المكان. يا حبيبة عمري أنتِ بيچ يومية أني أحلم. نايمة ومرتاحة يمي، يالي دربي بدونچ أظلم. بالحلم شفتچ عروسة، وخدچ تمنيت أبوسه. أحلى أيام وليالي ضاعت بلا سبب منه. ما طلبنا هواي أحنا، بيت صغير يلمنا. سميحة: ها هيثم شبيك؟

هيثم: تعبوني أهلچ سميحة تعبوني. -شبيدي؟ الله كاتبلنا ندحك هذا كله. -هالساع أرشد والطرگاعة الغريبة رضوا بيها. عجل أنا ليش هالعداوة؟ يحرگون بقلبي. سميحة: ترى بس أرشد واگف وياك وهم لهالسبب گبوا. هيثم: سميحة لا تبيعيني، والله حبيتچ حب ما ينوصف. سميحة: شلون أبيعك هيثم؟ بس أنت إذا تعبت روح شوف حياتك. أني سالفتي طويلة. هيثم: أگلها أخلص الليل أتخيلچ نايمة بصفي وأسولف وياچ. سبع سنين شيعيدهن؟

وغيرچ لو اكو أگعد كل يوم بمزرعتكم هالشكل؟ هجست هالايام صدگ الصبر بده ينفذ من الطرفين. خصوصًا لكلمته أدحك كلها ضدك، ولا واحد يفتهم البيك. منو يفتهمچ يا سميحة وأنتِ شايلة هم كل الناس ومحد يعرف بالبيچ شنو. .... درة: وحشة كل المنطقة بدون ياستي، روحي بيها. مرت عليّ أشكال البنات والصديقات، بس مو مثلها، هي كل إنسان تدخل حياته. ميكدر يتخطاها لا تصرفاتها ولا سوالفها. بس رجلها خوش رجل. عدلت الشال وطلعت، لمن ردت أدخل شفت الي.

ضربتهم بالدراچة يباوعولي من بعيد، قلبي نغزني. طبيت للمستشفى خايفة، بيمن أنتخي؟ بس أگول لأمي وعمامي يبطلوني. ما أجا غير أستاذ منصور ببالي، رحت لغرفته گالوا قبل شوية طلع. ضليت لحد المغرب حاطة دمي بشيشة، بدن البنات يطلعن وأني أخاف أطلع. دزيتله رسالة: أستاذ موجود؟ ورا دقايق بعث: نعم. أتصلت جاوب وبديت أسولفله الموقف، صدمتني ردة فعله القوية. وهو مستلمني رزايل: منو ذولي وأنتِ ليش ما تحچين؟ ختمها أخيرًا: لا تطلعين جاي جاي.

نزلت بعد ما اتصل، صعدت وياه وهو يستجوب بيه عن أشكالهم ولون الدراچة والمكان الوگفوا بيه بالضبط، لحد ما تغيرت موجة صوته من گال: -وين مد إيده؟ مديت إيدي على ظهري وأسولفله شلون ضربته. منصور: تعيشين ممتاز. درة: أمي إذا درت تبطلني. -والله هو أنتِ وذيچ ما تتطلعن، بالله ذيچ صگارها موجود. -يا صگار؟ ترى هي تتحكم بيه. -بأرشد؟ هه لا غلطانة، بس هو حبه الها غير شخصيته گدامها بس. -أفتهم منك ما راح يخليها تداوم هالسنة؟

منصور: إذا تزوجوا متداوم، كل عقلك يخلي مرته تشتغل؟ -وعادي شنو يعني؟ أصلاً فخر. -ما عايزة حتى تشتغل، دامو يوفر الها كل شيء تريده. الخير چثير، شغلها مجرد تعب. زفرت نفس قوي، ميفيد أجادل وياه بالكلام وهو متربي على هالأساس. وصلنا للبيت، أردف: -بعد أني أجيچ وقت الدوام، وإذا ما أجيت يجيچ السايق. -لا ميحتاج. -سلامتچ مهمتي، لأن أنتِ ممرضة عندي. ابتسمت ودخلت للبيت.

أمي اسم الله، تقول منصور ابن عمها الربعي، بس أجيب طاريه تقعد تمدح بي وبأخلاقه. درة: تطلقي من عمي أزوجكم سوة. -خو أزوجچ إله ويصير نسيبي. درة: يا عيني حلو حلو مصممتلي مستقبل بدماغچ، ترى عمره إذا مو 39 أربعين. لأن هو ابن هم أرشد الجبير، وأرشد عمره 36، وهذا نفسه عنده أخو متزوج أصغر منه، بنته الجبيرة تخرجت من السادس وتخيلي. أم درة: شو ما مبين عليهم مدارين أرواحهم.

-إي طبعًا علمود النسوان، أنتِ شايفتة أستاذ منصور صايرة عليه دق ملاطم بالمستشفى. -حلوو عيني هوَ كشخته وشكله ولحيته وشواربه، أخلاق وبرز خير. لعد البنات شتريد بعد؟ درة: لا بشرفي إلا أخطبچ إله أبد يمة لا تحاولين. ياسمين يومين بـ بيت أبو قيصر وأستحي أسلم عليه من ورة الچفصة الچفصتها. سألت سمر على نيران، قالت موجودة تخدم بـ أمها بس لسه محد يعرف عايشة. يعني والله سالفتها تخلي العقل بالكف.

قاعدة أقلب بالتليفون وتجيني إشعارات، أباوع حساب بنية وأرشد وأبو فزعة من ضمن أصدقائها، مستمرة تدز وتكتب: -أنتِ خطيبة أرشد الأنباري مو؟ عساها بحضچ وبختچ إن شاء الله، حرقة قلبي هاي ولچ بانية آمال وآمال بلحظة تهدمين كل شيء، خلصت الزلم ورحتي له؟ والله حرقة قلبي هاي ما تتعداچ. رجفت إيدي من حچيها، أدري بس أني حبيت، الله وأكبر. شفت الكتابة ما تفيد، استعاريت البصمة المنقذة. -أي حبيبتي أني خطيبته ومرته ليش؟ تحبينه مو؟

آسفة بس هذا المنتج يحبني بس أني، وهاي الدعاوي مالتچ نقعيهن واشربي ميهن. وأنعل أبوچن لأبو الخلفوچن لأبو أرشد، أدري ابتليت حبيت، شطلعت هاي كلچن تردنه. المهم ردت أجرچ بزيج بس راح ألزم أخلاقي، لأن رايحة أصول عليه صولة الفرسان. بنات أبو قيصر ملتلمات فوقاي. أخذت التليفون مني سمر، شافت رسايلها رجعت دزت لها بصمة:

سمر: عيني شبيچن تموتن على هجمان البيوت، رجال خاطب متعوفنه براحته، ضالات تنبشن ورة الزلم، عادي روحي لمركز الشرطة اكو هواي يشبهونه أخذي لج واحد، إيع شلون بنات بلا كرامة. شافت البصمة وحضرتني. قعدت وأني أضغط بأيدي، يا حبيبي هاي بعدنا بالبداية. سمر أخذت التليفون وخابرت، أشرت لي اقعدي.

-ألوو هلو خالي شلونك، خالي ترى ميصير يعني. طبت وحدة معجبة بيك لياسمين، استلمتها دعاوي لأن أنت خطبتها، قلنا لياسمين جاوبيها وما قبلت حتى تجاوبها قاعدة تبچي... حضرتنا خالي حضرتنا حتى المحادثة اختفت، تعال لياسمين خطية. أني قاعدة، الرب منتظرته يجي، مرت ساعة وهو ماكو، صارن ساعتين وهو ماكو. أخذت التليفون اتصلت عليه. -أنتَ وين؟؟؟ تعال ليش خاتل إذا أنتَ رجال تعال. -انزلي انزلي افتحي الباب.

أباوع من الشباك، أجت سيارة من بعيد سودة، وقفت بالباب، نزلت بانتفاضة وسمر تنطيني نصائح: ابچي وسوي نفسچ فقيرة، مو تفشليني وأطلع جذابة. فتحت الباب، هو قفل السيارة وطب للاستقبال. مسوي روحه فقير، قعد وأني واقفة وأباوع رجليّهن من جوة الباب يتصنتن. ياسمين: إلى متى يعني إلى متى؟ إذا أنتَ هلقد يحبنك شكو خطبتني؟ يعني شنو أني تراسلني وحدة تدعي عليّ وتحكي بكل صلافة تحبك. شنو تريدني أتحمل؟ أني ما عندي إحساس؟ مشاعر ما عندي؟

فهمني فهمني؟ من سحر لصبورة للمحاميات أذكرك إذا ناسي، وهسه هاي وإحنا بالبداية بعدنا. لعد إذا تزوجت شلون!!! علمودك لزمت نفسي وما جاوبتها. رفع راسه يباوع لي عود مقهور عليّ ويهز براسه. تقدم باتجاهي ورجع شعري ورة أذني. أجه إشعار من تليفونه، يفتح الجهاز ويحكي. أرشد: يا حياتي أبد ولا مجاوبتها، شقد عقلچ چبير. خزرته. أرشد: ما فتحتهن البصمات، أريد أسمعهن وياچ. فتح التليفون مالته ودخل على الفيس، شغل فيديو بي المحادثة.

عضيت شفتي وهو مد إيده قعدني على القنفة وقعد يمي. فتح البصمة وأجه صوتي يلعلع، ما رفعت راسي أخاف من ردة فعله. كل البصمة بجهة وأتمنى من توصل للسبه يصير شيء ينقذني. أنا أغار، فليت الناس ما خلقوا. رسل فهد