رواية ريحانة والشيطان .... الطاغية والبريئة الفصل الرابع عشر 14 - بقلم jolyjojo23

(الكاتبة ام جوليا)
#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية
#الجزء_الرابع_عشر
؛:::::::::::::::::::::::::::::::::::::::::::
::::::كل الأشياء تغيب، ويبقى الله معك.::::
...
دخلت البيت مصدوم ..
احجولي شنو صاير ...
يوم شبيها رنين ...
جيهان .. وينها رنين .. حاجيني شنو صار فهموني...
-ماتت ماتت ماتت .. رنين ..
لزمتها لجيهان لج احجي شلون ماتت اني اليوم متريك وياهم ومواعدهم اخذهم اطلعهم ..
احجي يوم ... منو موتها ...
امي تشهك وتمسح دموعها بالشيلة ...
-ماتت لكيناها غركانة بالمسبح ...
اخ يايمه ياوجدان ... شسويتي بنفسج ضيعتي نفسج وجهالج ...
..
-وينها هسه هيه خاف موميته ..وينها جيهان احجي .. ذ
-بالغرفة مال امي ...
دخلت للغرفة اباوع الها .. منيميها على الفراش ..
شفايفها زرك وجهها شاحب.. وجسمها بارد ثلج ..
لاربي ماعترض على حكمك بس لاتحاسب وجدان ب بتها ..
ياروح خالج اكعدي .. اني مقصر بحقكم .. صح حرمتكم من امكم وابوكم بس خفت عليكم لاتصيرون مثلهم موبالي اذي احد منكم ببالي اكبركم وافرح بيكم بزواجكم وتخرجكم ..
وامكم جنت ح ارجعها بس داربيها وادبها ..
ارجعيلي خالو واني ح ارجع الج امج ..
دخلت جيهان .. كافي احسان احنه مالنه ذنب بموتتها لاتعذب نفسك ..
-وين جنتو عنها .. شلون تغفلون عنها ..
كمت اصيح واكسر بالدنيا..
ولكم هذوله امانة الله عندي وماصنت الامانة اني..
-لايوم حبيبي والله انته صنتها وماقصرت بس قدر الله .. لااعتراض على حكمه ..
-وين اخوانها ..وريحانة .. وولد محمد ..
-اخذتهم مرت محمد يمها لان ريحانة مصدومة هي وحنين لان هنه شافنهاواجوي يصرخن ان رنين وكعت بالمي ..
-شوداها لحمام السباحة غير افتهم ..
-تكول ريحانه ....
-شتكول احجو شبيها ..
صيحو ريحانة تحجيلي ..
-لااحسان فدوة تره البنات ميتات خوف منريد نذكرهم يتعقدن والله..
-اريد افهم ... شوداها ..
-اني اكولك 😣 .. جانت تدور امها لان لان ..
-شنو تدور امها .. ولج جيهان ياامها هي موتدري امها ميته ..
- ماعرف بس هي كايله لريحانة ماما عايشة واني سمعت صوتها من اطلع بالحديقة اسمع صوتها وطالبة منهم يدورون عليها .. ووو..
-شنووو ..شنووو ... احجي .. وشوكعها ...
- وهي دتمشي عاثرة بالكاع وواكعة لعابتها بالمسبح رايدة تجيبها البنات يكولولها توكعين بس هي مدت ايديها تسحب اللعابة ووكعت ..
هن خافن معرفن شيسون ريحانة محاولة تساعدها بس معرفت وخافت توكع ..
وحنين اجتلي لما اجيناها وطلعناها لكيناها ميته ..
والله حاولت اخليها تتنفس بس ماصحت والله ..
-لج جيهان اذا طلع حرف موصحيح بلي حجيتيه البيت احركه ع روسكم وهاي الحيوانة وجدان .. ضيعت بتها بسوالفها ..
الله انتقم مني ومنها ب رنين ..
يارب ارحمها يارب
وارحمنا...
..... اجه سيف واخذناها للمستشفى حتى نطلع شهادة وفاة واني بعد مابيه روح ..
خايف الله يعاقبني ب جيهان بعد او ريحانة .. يارب رحمتك سبقت غصبك ..
ارحمنا يارب ..
كملت الاوراق  واخذنا رنين ندفنها .. ادفن الطفلة الي اني سميتها بيوم جابتها امها كله عمرها 6 سنوات وجنت اشوف طفولة وجدان بيها، شنو ذنبها هالبريئة ..
كملت الدفنة وكتله لسيف انته دبر امر الفاتحة خل اشوف شنو الصاير.. واتاكد من موتتها لرنين ..
دخلت .. لغرفتي الي بيها الكاميرات ..
فتحت الكاميرات ..
ماكو شي قبل يومين واليوم بديت اشوفه وانصدمت .. لا ياربي ...
دتتمشى رنين وتباوع لفوك لجهة وجدان كأنها دتحاجيها وتأشر ..
ركزت لكيت ايد ممدودة من شباك فوك هاي جيهان مادة ايديها ..
اني شسويت وهذي شسوت ب بتها وبنفسها ..
اباوع لرنين دتتمشى عثرت ووكعت لعابتها تريد تجيبها متكدر وريحانة وحنين يمها
وكعت وظلت تحاول تشهك مثل مكالت ريحانة بالضبط ..
وشهكت وشهكت لحد ماغركت ومحد يكدر يساعدها .. رحت ع فيديوات مال وجدان واكعة مغمى عليها ومدماية فتحت التسجيل من البداية لكيتها صاعدة ع طرف البانيو وتباوع من شباك ..
بعدين كامت تحجي رنين ماما حبيبتي دخلي جوه اني زينه مبيه شي اني عايشة وراجعة الكم بس صبرو عليه ..
لج رنين عوفيها للعابة خل تولي .. تصرخ وتصرخ ..
رنين لالا يمه .. ولكم لحكولي بنتي وكعت كامت تدك وتصرخ اكثر  ...ماتحملت اشوف بعد
..
ظليت اكسر بكلشي كدامي..
-صحت بعلو صوتي .. اااااخ شسويتي بينا ..
رحت لامي ...بغرفتها كاعدة لازمة ملابس رنين ..
مغطية وجهها وتبجي وتنحب .. دنكت حضنت راسها.. امي .. سامحيني على الي صار ..
كله مني...
تزيد بالبجي...يوم حاجيني اني السبب مو بموت رنين ...
بس والله جنت احبها ومافرق بمعاملتهم عن ريحانة ...
ضلت تبجي وتبجي لحد مختنكت .. لج يوم شبيج ..
امي تخربطت واغمى عليها ..
شلتها وركضت بيها للسيارة ع المستشفى ...
وامي ضربتها جلطة بسبب الي صار ...
وكله مني .. اني سبب خراب هالعائلة اني ووجدان هي دمرتني واني دمرتها ولاكاننا اخوان ..
بقت امي بالمستشفى .. سيف بقيته يمها ..لان لازم احضر الفاتحة وارجع لامي ..
اجتلي جيهان ..
-احسان لازم نصعد نشوف وجدان لان من بارحة مشفناها ..
جنت متوتر شلون اواجهها ماعرف برغم اني ماقصرت وي اطفالها بس احس اني السبب بموتت رنين .. يالله .. بس لازم اكون قوي رغم كلشي..
-جيبي وياج حبوب منومه .. من نصعد ..
-ليش شسوي بيها
-معليج جيبي من علاجج القوي الي ينيم وحضري الها اكل بس مواعين ستيل مثل مافهمتج وخاشوكه وبس..
-يلا كملت خل نصعد ..
صعدت لكيتها مغمى عليها..
-احسان الحكلي نبضها ضعيف .. تعال شوفها..
طبعا وجهها مورم ومكطعة نفسها وملابسها من البجي ..
اخذتها وي جيهان للحمام فتحنه المي عليها..
-اطلع احسان ..
-ماتركج خاف تأذيج ..
-كوتلك اطلع اريد اسبحها وانزعها .. الباب مينسد اني واكف بالباب..
-ورا عشر دقايق بدت تصحى ..
سمعت صريخ .. شكو.. جيهان..
..
وجدان تصرخ ...تركوني اموت وراها ..
شتردون مني ..
انتم موبشر ..
جيهان مبدله الها هدومها .. وهذي تجر بالهدوم تريد تكطعهم عليها..
دخلت سحلتها وكمت اضربها ..اششش صوتج مااسمعه انتي سبب موتتها ليش تحاجيها من فوك شكتلج اني..
ليش تأذينهم وياج .. ردت اربيهم بعيد عنج وعن سمج وخبثج ..
بس موتيها بغبائج ..
- مواني موتتها .. انته انته .. وامي ومرتك وبنتك ..
موتوني وموتوا رجلي وبنتي ... الله ينتقم منكم ..
الله ينتقم منكم..
مايبقى يوم واحد بعمري واخذ حقي وحق صادق وجهالي منكم كلكم واحد واحد..
اكتلني هسه احسنلك لان اذا بقيت عايشة ح اذيكم وانتقم منكم كولكم ... وماكون وجدان اذا مااذيتك باعز شي تملكه ..
كمت اضربها من عصبيتي فقدت ..
جيهان تصرخ كافي اتركها حرام .. دتحجي من حركة كلبها..
اخذت الحبوب من جيهان .. كتلها لوجدان شربي.. يلا..
-ماشرب ..
كفختها راجدي .. فتحت حلكها بايدي .. وشربتها الحبوب بالكوة ..
شوفي ولج ... صوتج مااسمعه بعد ..
وتحترمين نفسج ... لان عقابج ح يكون ازيد ..

جريت جيهان وطلعتها من الغرفة وقفلت عليها..
-احسان بس مااكلت خطية ..
-انجبي وسكتي ماناقصج اني ..
السم يمها من تجوع تاكل وماريد اسمع اي كلمة من اي احد..
امي اذا اجت وسألتج عنها تكولين الها بعدها فاقدة ماتحجي شي افتهمتي..
-ليش..
-بدون ليش جيهان ...
والاسبوع الجاي راح ننتقل للبيت الجديد .. جهزي نفسج ...
نزلنا ووكفت بالفاتحة .. وامي طلعت ثاني يوم على كرسي متحرك ... لان رجلها انشلت بسبب الجلطة والجزء الايمن من جسمها صعب تحركه وحتى حلكها بيه عوج شويه ..
بس طمنونا الاطباء كالو بالعلاج الطبيعي والمتابعة ترجع تتحسن ...
خلصت الفاتحة وحجيت وي زوجة محمد وفهمتها وضعنا وان لازم ننتقل واني راح اخلي سيارة بحرس خاص تاخذ اللكل لمدراسهم واني وياهم متاركهم بس هذا أمان اكثر الهم ..
طبعا هي متعودة على جو بغداد واهلها .. وابوها هم عضو كبيير بالحزب بس تقبل مني كلامي لان يحترمني .. وعرف بيه خايف على ولد اخوية واريدهم كدام امي شويه يعوضونها ...
انتقلنا للبيت  .. امي مكانت حابة تروح وتترك المكان بس اضطرت ...مساحة الارض الي اخذتها 2000 متر...
سويت اربع بيوت نظام غربي البيت على 250 متر .. وكلهم مرتبطين ببعض وهم مسوي حمام سباحة بس قررت هالمرة الكل يتدرب على السباحة اجيبلهم مدرب يدربهم ..
ونظام حراسة عالي ومشتمل خارجي للحرس..
اما وجدان فمكانها سويته ببيتي .
الها غرفة وحمام ومطبخ هم بس كله مرتبط ب باب  وهالباب ينطلع اله من غرفتي بس ..
لان غرفتي بيها منور خلفي .. خليت مكان وجدان هناك ..
بقيت مستمر وياها على الحبوب المنومة وجيهان وياها..
حاولت جيهان تقنعني ان اطلعها واعفو عنها لخاطر اطفالها مقبلت .. لان كنت حاس ان راح تجي منها اذية النه بعد..
ومراح نخلص من شرها...
كعدنا واستقرينا بالبيت وكلشي جان مرتب مثل مااني احب واريد ...
طبعا الاطفال ظلو يبجون فترة على رنين يردونها ويخافون من المي ..
بس جبت المدرب وكمت انزل وياهم اعلمهم واحد واحد ..
البيت داير مدايره زرع وخضرة يرد الروح ..
حسيت شويه بديت اسيطر على الوضع ..
امي بدت تستعيد عافيتها وقدرتها على الكلام ..
ووجدان رجعت لحالتها السابقة بس ساكتة وتباوعلي ومتنطق بشي ..
مابيدي شي عليها غير ان انتظر الزمن كفيل باصلاح كلشي والله اعلم شنو ضام النه القدر ..
....
سيف على تواصل ويايه والتحريات مستمرة على العصابة وكدرنا نقبض على اغلبهم بقت الروس الجبيرة اربعة منهم مدنعرف مكانهم ... دوخونا..
كان الكاع انشكت وبلعتهم ..
بس مراح اطمن الا الكاهم وزودت الضغط على الكل بالقسم حتى تزيد تحرياتهم اكثر..
بهالفترة صارت النزلة الاقتصاديه مال اسعار واتفاقية النفط مقابل الغذاء والدواء ..هم فادتني هالنزلة لان جنت ضام فلوسي مو بالبنك ..
فالحمدلله وضعنا صار احسن برغم دفعت سيولة هواية علمود هالبيت والبناء بس جنت بايع عمارتين ... وبفلوسهم  اشتريت وبنيت وبقت يمي فلوس والحمدلله الفلوس ورا هالنزلة اكدر اشتري بيها عمارتين ..
جنت فرحان باني تصرفت صحيح .. احنه حاليا هسه بسنة 98..
ووضعنا مثل مااني مخطط اله مشينا عليه والاطفال كبرو الكبار صارو شباب ..
ولد محمد وريحانة صار عمرها 9 سنوات بس متفوقة جدا بدراستها والكل بيهم متفوقين بس ريحانة وحنين جان الهم النصيب الاكبر بالدلال والمحبة ..
ولد محمد.. ضيعم وسنان وضياء ..
ضيغم وسنان توأم بالرابع اعدادي هالسنة ..
وضياء اول متوسط
ولد وجدان .. واحد ثالث متوسط .. ياسر..
عمار .. ثاني متوسط..
حنين سادس ابتدائي هي وريحانة لان اني مقدم عمرها لريحانة ودخلتها مدارس  قبل سنها القانوني..
فرحان بيهم احس عندي عزوة وهذوله كلهم اولادي..
وممقصر وياهم بشي ابد..
بس بدوا مرحلة مراهقة وبدت الشكوى منهم ومن مشاكلهم تزيد..
وجيهان ماعاد تتحمل هي ورغد (مرت محمد)لان المسؤولية صعبة عليهم وكل شويه رغد طالبتني بشي علمود ولدها ..

الا ان بيوم ااجه اتصال من ابو رغد طالب يشوفني..؟؟
استغربت اتصاله .. بس رحت ..
-سلام عليكم ..
شلونك عمي..
-وعليكم السلام ..
الحمدلله بخير بشوفتك ..
تفضل ابني ...
قدملي كهوة وضلينه نسولف شويه على الوضع الامني والسياسة وبعدين اجه الكلام على ولد محمد ورغد..
-شوف ابني الموضوع الي اريدك بيه وجبتك علموده هي رغد..
-شبيها رغد..
- رغد بعدها صغيرة وترملت وهي 22 سنة وتحملت هواية وهسه الولد كبرو وصارو يعاندوها وميسمعون كلامها ..ومتعبينها حيل ..
-بس ياعمي اني وياها متاركها ابد..
-بصفتك حماها ..وبس
-الولد يرادلهم اب يكون موجود بنصهم مو بس ع كد شلونكم شخباركم وتحل مشاكلهم من بعيد وبنتي صغيرة محتاجه لرجال بحياتها ..
واني من قبلت اكعدها يمكم فلخاطر والدتك ..
بس ياابني هم ميصير .. اظلمها لبنتي وتضحي اكثر بعمرها..
-مافهمت قصدك عمي .. شنو يعني المطلوب؟
-شوف ابني.. رغد هوايه تقدمولها ناس وكانت ترفض لخاطر اولادها ..
واني كنت مأيدها بالرفض ..
بس بعد اني كبرت واريد اطمن عليها .. ولدكم كبرو ويمكم همه .. واني اريد اخذ بنتي وازوجها ..وولدها يجون يمها ع الاقل يكونون يمي اكدر اسيطر عليهم اكثر ..
- لاعمي ..اعذرني ولد محمد ميطلعون من بيته ..
.. بس اريد اعرف رغد عدها علم بهالموضوع ..
-عدها او ماعدها هاي بنتي واني حر بيها..
وشوف ابني مدامك حريص على ولد اخوك .. وتريدهم يمك .. بايدك الحل ...
-شنو الحل ؟ الي بيدي..
- انته تتزوج رغد ..
-شنو؟
-ليش شبيها رغد ناقصها شي .. وهي كل هالسنين يمكم ربت عدكم .. واني راح اطمن اذا كانت بحمايتك ..'
- بس اني مزوج ورغد مرت اخويه ..
-ارملة اخوك من 6 سنوات ..
كافي ابني ... اني كتلك الي عندي .. تريد ولد محمد يمك فتتزوجها لرغد ..
اما اخذها هي وولدها يمي واني ازوجها لاحسن واحد...
ظليت اني ساكت كدامه .. ماعرف شأرد..

-فكر بالموضوع وانتظر ردك بنهاية الاسبوع ..
حتى اعرف ارد على المتقدم لرغد..
سلمت عليه ... واني اضرب اخماس باسداس ..
هذي شلون احلها ..
واني اعرف الحق وياه .. واله نفوذه يكدر يستخدمه وياخذها لرغد وولد محمد وياه ..
..... كعدت ع الكورنييش واني محتار ....
:
:
:

يتبع ........

شلونكم حبايبي ..
شخباركم ...
شنو رأيكم بالاحداث؟
وشنو تتوقعون راح يصرف احسان؟
لاتنسون التصويت بضغط النجمة والتعليقات الي تسعدني ..
احبكم ..
الكاتبة ام جوليا...