رواية ريحانة والشيطان .... الطاغية والبريئة الفصل الثالث عشر 13 - بقلم jolyjojo23

(الكاتبة ام جوليا)
#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية
#الجزء_الثاني_عشر
:::::::::::::::::::::::::::::::::::::
‏" أنقُل قلباً مُتعباً تحت ثيابي ،
مُثقلاً ، مُنهكاً ، لكنه يُحبك ".
التمتع بكل دقيقة مع من نحب نعمة حافظوا عليها اظهرو مشاعركم لمن يستحقها لاتبخلوعلى انفسكم وعلى احبابكم ببضع كلمات تسعدهم وتجملوها بأفعال تستحق الذكرى فتجمل حياتكم وتمحو الاخطاء المتوقعة الحدوث ... لاتقفو عند حدث سيء في الحياة وتمحوكل شيءقبله وبعده ...
(فكل ابني ادم خطاء وخير الخطائين التوابون)...
:::::::::::::::::::::::::::::::::::::::::::::
رجعنا لبغداد وجانت الساعة 11 وهيج وقت الكل نايم بالبيت الحارس فتحلي الباب ...
دتنزل جيهان ... من السيارة
احسان : حبيبي انتظري هنا دقيقة دسوي شي وارجعلج بس شنو ماريدج تنزلين هسه ...اني اجي وانزلج ..
جيهان: خير حبيبي صاير شي
احسان: لا حبيبي بس عندي شي اسوي واجيج بس انتي لاتتحركين..
رحت فتحت البيبان .. دخلت لكيتهم نايمين مثل متوقعت ..
رحت لغرفتنا فتحتها.. شغلت الاضاءة الخفيفة الي مسويها بيها ورشيت بيها المعطر المفضل عند جيهان تحب ريحة الفل والياسمين ..
من كملت كلشي خلال ربع ساعة .. رجعت لجيهان .. هاحبيبي تأخرت عليج ..
جيهان : اي وهوايه هم غبت عني واني ماحب غيابك ..
احسان ؛ اويلي .. ليش اني اتحمل غيابج .. يلا ..
رادت تنزل شلتها ..
جيهان : شدسوي احسان لااحد يشوفنا ...
احسان : اولا الكل نايم .ثانيا: حتى اذا شافونا اني اريد الكل يشوف ملكتي شلون اشيلها وادللها .. وهي التي تسعدني بس..
جيهان رادت تحجي ... سكتتها بستها من شفتها وهي دتحجي ... لحد موصلنه الغرفه اني شفتي تداعب شفتها وهي تريد تبعد واني اسحبها عليه لحد مستسلمت الي .. وصلنه لغرفتنا وهي ممنتبه نزلتها ع سرير ..عود انتبهت ..
جيهان: هاي شنو احسان (وهي مصدومه)..
احسان: ها جنه ذوقي معجبج ياحلوه،.
جيهان: لاحياتي والله يجنن ذوقك ، بس شوكت غيرتها .. شوكت سويت كلشي..
احسان (كعدت يمها ع سرير واني افتح شالها اللابسته): هاي شوكت صاو وشسويت مسأليني عليها ابد... انتي بس تغمضين وتتمنين وشنو تتمنيه يصيرلج .. (جريت الشال وكع طلعت ركبتها شميتها وهنوب بيها شامة بركبتها وريحانة نفس الشامة عدها .. عبالك استنساخ من امها بكلشي..)
احسان ...همست باذنها:جوعان اني ..
جيهان : ياحبيبي هسه دقايق واجهزلك الاكل ، ادري بيك مأكلت زين .. ادخل اسبح وبدل وتلكى كلشي جاهز..
احسان: لج حبيبي اني جوعان الج اريد اكلج ..
من صدقة لهالركبة .. وظليت اشم بيها وهي ذابت انتهت بين ادية..
واني اموت عليها من احسها هيج مجرد همسه مني تذوب بعالمي .. تحسسني اني املكها كلها..
احلى مابجيهان ضعفها كدامي الي متكدر تخفيه ابد احسها مثل العجينة الي اشكلها مثل مااحب...
عيشتها احلى ليلة بعمرنا...مكنت اكدر اشبع منها ولااكدر اطفي ضمأي ابد..
جنت مشتاك لكل نفس بيها لكل حضنة لكل لمسة لكل نظرة لكل كلمة وحرف وابتسامة ..
محتاج اشبع بيها ... لان انحرمنا من بعض هواي ..
ومراح اخلي بعمري يوم مااعوضها واعوض نفسي عن الي صار ...
كعدتنا الصبح المزعجة ريحانة سوت النه طبل ع باب الغرفة...
ريحانة : بابا ، ماما ... كعدو يلا .. مشتاقتلكم وجوعانه..
احسان: جيهان كعدي بنتج فضحتنا تصيح جوعانه..
جيهان : اي على ابوها طالعة بالخبال 😅
احسان : لج ام لسان منو مخبل .. ولزمتها من حنجها ..
جيهان: ترمش بعيونها .. انته حبيبي اجمل مخبل بحياتي انته وبنتك
احسان : موهالمخبل ح ينتقم منج من الصبح ع لسانج وحركاتج هذي .. رح اخلي بنتج تصيح وماطلعج من الغرفة ..
جيهان: لالالا حبيبي توبة .. بس خل اشوف ريحانتي والله مشتاقتلها..
احسان: واني متشتاقيلي بس ريحانة .. مو
جيهان : واجت قربت نفسها ع نفسي ..تصدك اني وانته بحضني واشتاقلك واريد ادخل نص ضلوعك ومااطلع منهم ..
احسان : اويلي .. ويلوموني بيج ليش احبج هلكد..
ريحانة : ماما يلا وينج
جيهان: خل اكوم فضحتنا..
احسان : تره بنتج صايره مزعجة ..
جيهان : اكول الها عليك هيج تحجي..
احسان : لايمعودة بالگوة دافك العقد الي بيها .. هي اصعب منج والله .. شريرة هههههههه
جيهان : غير طالعة لابوها شريرة ههههههه
فتحت الباب ودخلت ريحانة مثل الاعصار..
ريحانة : عفية عليكم عفتوني يومين وخلصتوها طلعات  وهسه ادك الباب متردون (طبعا تحجي وعاكدة حواجبها وضايجه)...
احسان (سحبتها لحضني والعب بشعرها وابوس بيها...) : حبيبة ابوها ، والله رح اعوضج بطلعة تجنن هالاسبوع وعد مني اخذكم كلكم ونروح نتونس خميس وجمعة بعد شتردين ..
ريحانة : ما ما ما.. ماريد احد منهم مثل ماطلعت ماما تطلعني وحدي ..
طبعا اني وجيهان متنا ضحك ع سوالف الغيرة مالتها .. والله هالريحانة موسهلة ابد وماتترك حقها...
جيهان: ماماتي الطلعة متصير حلوة بدون مشاركة وي اطفال بعمرج .. نصعدكم العاب ونشتريلكم ونونسكم وي بعض وشنو تشتهون اكلات نسويها ..
ريحانة : لعد ليش مطلعتوني وياكم .. ووين رحتو اريد اعرف.. كلشي تحجيلي 😕
جيهان : تدلل حبيبتي الحلوة بس هسه بوسي بابا  وتصالحي وياه واني ح احجيلج حتى نطلعكم هالاسبوع مثل ماكال بابا
ريحانة:صار ماما ..
احبك باباهوايه (تبوس باحسان) بس بعد ماكو طلعة بدوني😅
احسان : تأمرين ريحانتي ...
ريحانة: ماما جوعانه
جيهان : صار حبيبتي هسه اجهزلكم الريوك.
.....
كان اليوم حلو حسينا بيه بجو الاسرة الي افتقدنا من زمن مضى ...
وعدا يومين اني كاعد بيها وياهم بالبيت حبيت اعوضهم عن فترة البعد .. بس لازم ارجع للدوام .. وطبعا جيهان مابطلت من سالفة تريد تشوف وجدان ... فرضخت للامر الواقع وقررت اخليها تشوفها ...
احسان : يلا جيهان جهزتي نفسج حتى اخذج لفوك ..
جيهان : اي اي جاهزه والله يلا..
احسان : امشي يلا
:::::
اخذتها واني عيني عليها وهي صاعدة الدرج حيل متوترة وخايفة واشوفها كلها تنتفض وترتعش
-جيهان شبيج اذا موكادرة مولازم تضغطين ع نفسج اني مصدكت رجعتيلي..
-لاحبيبي معليك بيه اني اريد والله بس لا تخلي بالك ويايه ،،.لخاطري خليني اسوي الي اريده انته وعدتني ،.
-انتي هم وعديني مدام هيج اي شي تشوفيه مراح يأثر عليج او على حياتنا..
-حبيبي والله ماكو شي ياثر ع حبي الك ولاعلى حياتنا .. اطمن ..
-مدام هيج يلا ادخلي ..
دخلتها واني عيني متركتها لحظه جانت تغمض عيونها وتفتحها كأن دتسترجع الاحداث الي جانت تصير هنا ..
صح خايف عليها بس اريد اعرف مدى حبها الي .. اني مجنون وطماع بيها .. هل عدها القوة ان تشوف هالاماكن الي دمرتها بيها وتبقى تحبني ؟
وصلنه يم الغرفة الي جنت حابسها بيها .. حضنت جيهان واني دافتح الباب وبست راسها
- اسف حبيبتي على كل شي والله احبج ومجنون بيج ..
غرغرت عيونها وهي تكلي : مسامحتك ع كلشي حتى لو تموتني فدوة الك اروح ..
فتحت الباب ودخلنه ..
جان منظر جيهان مرعب هو والغرفة ..
هي اني رابطها بسلسلة اخليها تكدر تروح الحمام وترجع مكانها ..
اثار تمليخ اظافرها بوجهها وشعرها بادي يطلع قصير ولادي ..
جسمها مبين من ملابسها لان جانت كلما اجيب الها ملابس اجي الكاهم مشككتهم ومنظرها مفزع مباوعت النه ولاتعرف احنه منو ..
هي تقريبا فقدت عقلها لان كل الي تسوي تهز براسها من شافتنا مثل الي تكول لالا .. بس متنطق بحرف ..
جيهان شافتها انصدمت ؛ عاطت بيه ليش احسان هيج مسوي بيها حرام عليك .. عيونها تجري دموعها لجيهان ..
-تره بس بالبداية صح عذبتها بس ورا ما مات زوجها هي فقدت وهيج صار بيها واي ملابس اجيبهم متقبل تلبسهم ولاتقبل تاكل ..
- اذا تحبني احسان ترجعها ويانا.،
-جيهان احبج واموت عليج ولو مالحرام اكلج اعبدج .. بس هذي متستاهل ذرة احترام وحب ..
مانسيت اذيتها النه ابد ولاانساها..
- بس اني نسيت كل اذية وسامحتها وسامحتك ..لخاطر بتنا الله يخليك..
-جيهان تره وجدان موضوعها منتهي انتي ردتي تشوفيها وهاي هيه بعد حتى مااخليج تشوفيها..
-لا الله يخليك .. احسان .. زين خليني اساعدها واعالجها..
-شلون تساعديها وتعالجيها.. هذي متستاهل نگسة ماريدج تلوثين ايديج بيها حبيبتي..
-حبيبي اذا مولخاطرها لخاطر ماما الله يخليك ...
-جيهان انتي واعية للي دسويه هذي اجرمت بحقج وهي سبب دمارنا جانت ..
-صح بس احنه كدرنه نرجع وي بعض بس هي فقدت زوجها ونفسها واطفالها وعقلها واحنه اذا مرحمناها لخاطرها فلخاطر ماما ولخاطر اطفالها نرحم من في الارض فيرحمنا من في السماء.
....
شفتها انفعلت حيل وتعصبت وجنت خايف عليها لاتتأذى بسبب وجدان مامستعد اخسرها بعد..
-خلص حبيبي لاضوجين نفسج الي تردينه راح يصير ،شلون تردين تساعديها ساعديها انتي غيرج ممنوع يعرف بوجودها او حالتها ابدا ..
فهمتي عليه ..
-صار حبيبي محد راح يعرف اني ح اساعدها بس ..
وهسه اريد انزل اجيب غراض الها ..
-شنو الغراض جيهان ..؟تره ديري بالج اي شي حاد ممكن تأذيج بيه ولعلمج مساعدتها تكون بوجودي وباشرافي ماعرف هذي لو بقيتي وحدج وياها ممكن تأذيج ..
-هاي هيه حبيبي الي تريده يصير..
نزلت جيهان واني بقيت اباوع لوجدان ، اختي من لحمي ودمي تغدرني ، هذي الي جانت العزيزة الغالية الي مجنت اجيب شي لجيهان او لريحانة بدون مااذكرها او اذكر اطفالها وكلشي تطلبه يوصلها.. بس كوله من صادق الحقير الي دمرها ودمرنه وهالعصابة اوصلها اوصلها
صعدت جيهان وبيدها شامبو وصابون وليف وملابس وغراض ..
-هاحبيبي شناوية تسوين ..؟
-تعال حبيبي ساعدني ادخلها الحمام اريد اسبحها واغير الها ملابسها ..
-بس مراح تقبل .. خاف..؟
-انته بس دخلها ويايه وافتح الزنجيل ومعليك ... هي فاقدة واريد تنزل تجيب الاكل علما اسبحها اني وصيت اجهز صينية ..
-انتي مخبلة .. بس راح اطابقج بخبالج واريد اشوف تاليها..
فتحت الزنجيل وسحبت ايد وجدان .. مشت ويانه محاسة بشي ..
..
-اني باقي برا لحد متكملين وازنجلها الا انزل .
-احسان روح خاف اتأخر ..
-حبيبي بدون نقاش منتظرج اني برا.. يلاكملي بسرعة ..
-صار..
....انتظرت نص ساعة ..وراها طلعت جيهان وطلعت وجدان وياها مسبحتها ومبدلة الها بملابس كيمونه وشي قصير ..
-هاي شملبستها ..ليش هيج ..
-روح اطلع برا .. اريد اعالجها من الاثار الي بيها.. مثل ماعالجني المعالج اعرف الطريقة وعندي الدهن ..
-اني كاعد بالصالة يلا كملي الها وح انزل اجيب الاكل واجي علما تكملين ..
نزلت جبت صينية الاكل وبقيت منتظر بره ورا عشر دقايق طلعت الي جيهان ..
-هاشسويتي ..
-تعال شوفها خطية ..
-ماريد اشوفها ..هاج اخذي الاكل .. هي قبلت تسويلها كلشي ..
-اي قبلت واحاجيها مترد، حتى عالجتها والعلاج يحرك اعرفه هي متوجعت ولاكالت اخ ..خل اخذ الاكل بلكي تاكل ..'
رحت كعدت كبالها.. صارت عيني بعينها .. باوعتلي فتحت عيونها كانها عرفتني .. جيهان جابتلها الاكل وبدت توكلها..
اكلت من ايد جيهان بس عينها بعيني ..
استغربت نظرتها حيل ... هي تايهه وبغير عالم بس ليش نظرتها الي صادمة احسها..تباوع بتركيز نظراتها باردة .. وكلشي تسويه الها جيهان هي مستسلمة الها ..
جنت خايف على جيهان منها وجان خوفي دائما بمحله واحساسي صح ....!!!!!
مرت الايام الي بعدها عادي جدا اني كنت دابني الكااع الي رتبتها اخذت مساحة جبيرة قريبة على بغداد وبنيتها مثل مااني حبيت ... ورا 3 اشهر كمل البيت الي اني سويته وبلغت جيهان تجهز نفسها ... للانتقال وخليت لكل عائلة سويت خاص بيهم نظام مشتملات بس كبيرة ومداخله ببعض حتى اسيطر ع الكل ...
وجدان اشوف وضعها تحسن برعاية جيهان واهتمامها بس بقت عايشة بغير عالم وجنت اخلي امي تشوفها بغرفتي بالتصوير وجنت اتابعها ماعدها شي غير تباوع ع الفراغ ..
ومن بدت تتحسن بدت تتأخر شويه بالحمام استغربت تأخيرها وميصير اخلي كاميرا بالحمام بس كنت خايف فلازم اخلي حتى لو اخلي امي تشوف تسجيلات الحمام ..حتى اطمن بس..
مرة مرتين سألت امي من جنت اراويها تكلي ماسوي شي وتاخذ الفيديو يمها تشوفه ..جان شريط فيديو تسجيل ..
بيوم من الايام اني بالمكتب اجالي اتصال من جيهان.. استغربت ...
-الو احسان الحكلي .. رنين راحت مني ...
فدوة الحك بسرعة تعالي ...
قفلت واني مصدوم ماحسيت بنفسي من سقت وشسويت وشلون وصلت وشلون دخلت البيت ...
ولكيت امي تصرخ وتبجي وجيهان تملخ بروحها...
اني صافن بوجووهم شصاير....؟؟؟؟

يتبع .....
شلونكم حبايبي شخباركم ؟
باجر الكم مني جزء هدية ....؟؟؟
لان هالجزء بيه تكملة خليتها الباجر..
لاتنسون التصويت بالنجمة والتعليقات...
ومنو هي رنين ؟