رواية ريحانة والشيطان .... الطاغية والبريئة الفصل الثاني عشر 12 - بقلم jolyjojo23

(الكاتبة ام جوليا)
#ريحانه_والشيطان .... #الطاغية_والبريئة
#الكاتبة_ام_جوليا
#قصص_وروايات_عراقية
#الجزء_الثاني عشر.
:::::::::::::::::::::::::::::::::::::::
لماطلبت مني جيهان ان تشوف وجدان مكنت حاب هالشي لكن مكدرت اقاومها وارفض طلبها ..
صح اني مكنت اعذب وجدان هالفترة لكن حالتها كانت صعبة وخفت لاجيهان تتأثر من تشوفها بهالحالة فقررت ورا مترجعلي جيهان وانسيها شويه خوفها مني اخليها تشوف وجدان وهذا كان قراري ...
كعدت الصبح الساعة 6 .. سبحت وبدلت وكان يوم ثلاثاء..اندكت الباب عليه طبعا ممنوع احد يدخل غرقتي فاطلع واقفل الباب..
طلعت لكيت جيهان بوجهي ... صفنت عليها .
جيهان ( مدنكة ومستحية) : حبيبي جهزت الك الريوك دنتريك سوه حتى تاخذ ريحانة بطريقك للمدرسة مالتها مآأمن تروح وي السايق ..
احسان ( رفعت راسها من لزمتها من حنجها وغرگت بتفاصيلها ياربي مرسومة رسم .. وشكد مشتاق ومتلهف الها):لاتخافين حبيبتي كل الي بالبيت والي مخليهم ويايه واثق منهم فلاشيلين هم وهم حتى اريحج اني اخذ ريحانة واني اذا كدرت اجيبهامن المدرسة، بعد اكو شي بالج تريدينه ملكتي ..
جيهان : وعدتني اشوف وجدان .. اليوم تكدر تخليني اشوفها ...
احسان : حبيبتي واني عند وعدي ورح اخليج تشوفيها بس قبلها اريدج تنفذيلي وعدج الي وتكونين ملكتي الي اريد اعوضها عن كل تعب
( مقترب منها وانفاسي يم انفاسها .. اريد اشمها كلها .. بدت تذوب من قربي الها.. يالله ياجيهان شكد بريئة ملامحها ونفسها الي يصعد وينزل وترني كنت راح اخذها بحضني بس حاولت اظل متماسك اريدها هي الي تجيلي برغبتها اني بس انطيها دفعة صغيرة لان اعرفها شكد خجولة )
جيهان ( تباوعلي وخضار عيونها ضاربة عليه بداية طلوع الشمس وصارت لمعة عيونها تجنن): اني موافقة بس توعدني بداعة ريحانة متخلف وعدك الي اشوف وجدان .. الله يخليك احسان
احسان (بستها من ايديها ) : تأمر حبيبتي وتدلل بعد...
جيهان : بس الاول اروح لدكتورة حنان .
احسان: ليش انتي حاسة بتعب بيج شي جاوبيني
جيهان: لاحبيبي بس الدكتورة كالت الي لازم اسوي فحوصات قبل كلشي...
(دنكت مستحيه وفهمت قصدها )..
احسان : هاي هيه لعد اكمل كم شغلة عندي بالمقر واخذ اجازة واخابرج تجهزين حتى اخذج ويايه بس اهم شي مبيج شي يأذيج متأكده
جيهان ( تأشرلي براسها ): اي اي والله متأكدة
احسان ( بست راسها وحضنتها مو كانها حبيبتي لا حضنتها كأنها بنتي وخايف عليها لان هي صدك بنتي وربيتها على ايدي ): ربي يحفظكم الي ياعمري ..
يلا حبيبي ريحانة جاهزة حتى نروح ..
جيهان : اي جاهزة حضرت الريوك ع ميز الطعام
تعال اكلك شي ..
احسان : يلا روحي اني جاي وراج ..
ريحانة حبيبتي كاعدة وبعدها لهاللحظة تتجنبني...
اباوع لجيهان خزرت ريحانة.. ريحانة دنكت واجتلي باستني صباح الخير بابا...
-صباح الخير حبيبة بابا يلاكملي اكلج خل اوصلج للمدرسة
كملنا اكل وسلمت على جيهان واخذت ريحانة واحنه بالطريق اباوع لريحانة تحوص تريد تحجي بس تباوعلي وتدور وجهها ع الجامة وترجع تباوعلي وتغمض عيونها وتتنفس سريع وترجع تباوع ع الجامة قلقتني عليها ..
- ريحانتي باباتي بيج شي ، تعبانة مخنوكة شبيج ممرتاحة احجي خاف مريضة ...
-لابابا مو مريضة مبيه شي
-لعد شبيج ليش احسج مضايقة ببالج شي
-بابا انته تحب ماما
(باوعت الها ومندهش من كلامها لان نظرتها كلها حيرة وامل وتسآؤل .. )
-طبعا احبها واحبج الج هم واموت عليكم ...
والي صار قبل هذا انسيه حبيبتي كل اثنين مزوجين يصير بينهم خلافات ومشاكل لكن بحبهم يتغلبون عليه ..
-اذا كل المزوجين هيج يصير بينهم اني ماريد ازوج ابد من اكبر..
(كلامها صدمني .. لعد شكد متأثرة بلي صار اني شسويت بزوجتي وبنتي دمرتهم ..
بنتي تعقدت بحياتها ياربي ساعدني انسيها واعوضها..)
ضحكت بوجهها حتى اتفادى ارتباكي بكلامها..
-اميرة ابوها منو اصلا يجرأيفكر يزوجها ..
انتي الي تختارين وانتي الي تأمرين واحنه نفذ ..
(ضحكت ): صدك بابا يعني مازوج من اكبر
-اي حبيبتي الا انتي تجين وتكوليلي اريد ازوج ..
-ابد ابد مراح اكول اني ، بس بابا حبيبي ماما تحبك بعد لاتحبسها وتأذيها اذا صدك تحبنا
-وعد مني ياروح ابوج طول مااني عايش محد راح يأذيكم ابد وحتى اني تنكص ايدي بعد اذا انمدت عليكم ..
بس اهم شي اريدج تساعديني..
-بشنو اساعدك بابا؟
-اريدج تختارين ويايه هدايا ناخذها لماما نفرحها واليوم العصر اخذكم لمدينة الالعاب تلعبون وتتونسون شنو رأيج ؟
-بس اني وياك وماما..
-اي حبيبتي بس منكول لاحد وين احنه طالعين ..
وغير يوم راح اسوي سفرة جماعية للكل اخذكم تتونسون وي ولدعمج والبقية كلكم ..
(طفرت عليه حضنتني وتبوس بيه ): احبك بابا
-اموت عليج ريحانة قلبي .. يلااكعدي لااسوي حادث وتنلغي الروحه هههه
-لالالا كعدت ..
بستها بكصتها : ربي يحميج الي ياريحانتي ..
نزلتها للمدرسة وبلغت المديرة ان اني اتصل بيها الا تنطيها للسايق اذا مكدرت اجي واكدت عليها بهالشي وطلعت للمقر كملت شغلي واخذت موعد لجيهات يم دكتورة حنان وخابرت جيهان تتحضر
رحت الها للبيت ونزلت لبست مدني ..
-جيهان يلا اتأخرنا حبيبي ورا يوم طويل ...'
اجتي امي .. سلمت عليها بست راسها:
-هاابني رايحين للمستشفى ..تجون للغده لو لا..
-لا يوم .. ح امر ع ريحانة اخذها ويايه ونروح للدكتورة..
-بس ريحانة بملابس المدرسة وحتكون تعبانة يمكن ..
-ها هم صدك ح اروح اجيبها هسه بين متكمل جيهان تاكل وتنام وترتاح وبعدين امر عليها اطلعها ويانه..
-خوش ابني ..
-بلغي جيهان تجهز علما اجي ..
رحت جبت ريحانة وجانت طايرة من الفرح كوتلها ابقي نامي واكلي وبعدين اجيج اخذج نروح للمدينة مقبلت ..
-حبيبي بابا انزل ابدل بسرعه واغسل والله 10 دقايق ماطول واجيك ..(هو اني اشوف عيونها تلمع هي وامها واني افقد ماكدر ماوافق )..
-ديلا بسرعة.. امري لله بسرعة وكولي لماما خل تجي..
-حاضر بابا..
انتظرت صدوك عشر دقايق وعيني صارت ع الباب .. شفت اميرات قلبي جايات يتمشن مااحلاهم ...
(مرات الواحد ميحس بقيمة الاشياء الي عنده الا يفقدها بس الله يحبني ماخسرني جيهان.. زوجتي ملاك ويمشي ع الارض بفستانها الابيض الي بيه ورد وكان نفس الفستان لابسه مثله ريحانة .. لان جيهان هي تخيط ملابسها وملابس ريحانة تحب تصمم )
ضحكت بوجهم وهمه يصعدون وكلت الهم : الله لايحرمني منكم ..
جيهان باست ايدي ولايحرمني
منك يانبض قلبي ...

اخذتهم ووصلنه للمستشفى جيهان دخلت للدكتورة واني وريحانة انتظرنه برا.. علما يكملون..
طلعت واخيرا جيهان ورا فترة وكالت الي الدكتورة رايدتني وحدي ..
دخلت..
-السلام عليكم.. شلونج دكتورة
-وعليكم السلام والرحمة ..
اهلا استاذ احسان .. احنه بخير طالما انتم بخير
-دومكم يارب.. خير دكتورة قلقت من طلبتي تشوفيني وحدي..
-كل خير ان شاءالله ..بس حبيت اوضحلك كم نقطة حتى تعرف تتعامل وي جيهان ومتنتكس حالتها ..
-اي تفضلي..
-استاذ احسان احنه من اجتي جيهان وجان عدها اسقاط ونزيف .. وكان نزيفها غزير بسبب ان هي صاير عدها تهتك بالرحم والطفل متمزق ببطنها ومجلب بالرحم سويناالها عملية كرادش وهي عمليه تنظيف للرحم حتى دنزل بقية اعضاءه لكن رحمها ماتحمل لان اصلا هو متمزق وبالكوة كدرت اني والدكاترة ان نحاول نصلح ماافسد..
-طيب مافهمت دكتورة يعني هسه هيه طابت لولا.. لو شنو تردين توصلين اله..
-استاذ احسان الي اريد اوصله الك ان تعامل جيهان برقة ولطف لان هي مو متحملة بعد اي اذية نهائيا اي كانت نوع الاذية .. حتى وان كانت من حب ..
اعتقد فهمت قصدي ..
-وضح قصدج دكتورة .. وتمام اني ناوي انسيها كل الي فات
-وشغلة اهم احب انوه الها استاذ احسان.. جيهان بعد ميصير تصير حامل ..
بصدمة..وعيني بعينها.. : ليش دكتورة غير افهم شبيها زوجتي
-اني موكتلك رحمها كان متمزق اذا صارت حامل فهذا خطر على حياتها واصلا الحمل مارح يتم لان راح يموت بداخل الرحم لان مايتحمله .. وجيهان راح تتعرض لنزيف اقوى من السابق ..
فالافضل ان مايصير حمل..
..........
دنكت راسي (يعني بسببي حرمتها ان تكون ام للمرة الثانيه والثالثة بسبب غبائي وعدم ثقتي بيها )
طلعتني من صفنتي دكتورة حنان..
-احمد الله واشكره انت عندك ريحانة هذي تعوضك عن اطفال الدنيا..
-اني اصلا مكتفي بجيهان وريحانة بس كنت متمني ولد يكون عون لاخته وسند الها لان الزمن مايرحم النساء..
-صح كلامك كله.. بس هم الولد مامضمون يطلع حنين على اهله واخته وممكن يطلع عاق ويأذيهم فكلشي نخلي ورا رب العالمين واكيد الله اله حكمة بكلشي .. وانته ربي بنتك تكون قوية وواثقة بنفسها وماتنهز من اقل شي واني داشوفك مهتم بيها من هالناحية والبنت شهادتها سلاحها .. فانت ركز وياها على دراستها .. والتوفيق من الله
-ونعم بالله دكتورة ..زين جيهان تدري بحالتها هذي ..
-لا مابلغتها .. بس انطيتها حبوب منع حمل كوتلها استمري عليهم لمدة 6 اشهر وراها اشوف وضعج يسمح بالحمل لو لا.. هي تقبلت الموضوع ومكالت شي ..
-شكرا دكتورة ..
-هذا واجبي .. والله شاهد اني حبيتها لجيهان وهي اصلا انسانة طيبة ماكو منها فدير بالك عليها..
-اطمني بعيوني اخليها..
سلمت عليها وطلعت ... صح مقهور علمود جيهان والحمل وكلشي كان بسببي .. بس كلت الحمدلله ان رب العالمين نجاها الي من الموت واني كنت ناوي اموتها هي والي بطنها..
ظليت طول الطريق استغفر الله واحمده واشكره على ان وصلت للحقيقة وادعي الله ان يحفظهم الي .
وصلنه للمطعم ونزلتهم بارقى مطعم اغديهم ونزلت الهم كل الاصناف ..
-احسان شدعوة هالاكل كله اني متعرفني مااكل ..
-اكلي حبيبتي وربربي اريدج تكونين قوية وراج ملاحم وبطولات هههههههه
-احسان كافي لاتخجلني..
(بست ايديها اموت على الخجول اني ) : جيهان سامحيني انتي روحي انتي النفس الي اتنفسه.
-حبيبي موكتلك لاجيب سيرة اي موضوع سابق .. والله انقهر من تحجي هيج ..اني نسيت ماريدك تذكرني الله يخليك..
-لاهاي هيه حبيبتي مدام دتنسين بعد ماافتح اي موضوع ..دباعي ريحانة شلون جوعانه خطية وتاكل..😆
بابا علكيفج لاتغصين.. شويه شويه..
-بابا مو اني من افرح احب اكل واني هسه فرحانه حيل ..
(ضحكنا اثنينا ع الكارثة الي عدنه )
وجيهان توكلها وتاكل واني عيني عليهم .. حيل خايف عليهم .. ومجنون بيهم ..
لازم اصفي العصابة كلها حتى ارتاح واطمن عليهم ..
كملنه اكل وكتلهم يلا ... وغمزت لريحانة .. ضحكت وكامت تطفر من الفرح وجيهان متعرف ..
-حبيبي شبيكم شوغمرات اكوشي من ورايه مسوينه..
-لاحبيبي تعالي بس اكو مفاجأة الكم ..
صعدتهم السيارة واخذتهم للجزيرة السياحية .. جيهان حيل فرحت هي وريحانة واخذتهم لعبتهم مبقيت شي بنفسهم من لعبة الي لعبة واشتريت لجيهان باقة ورد لون احمر .. شفت ديبيعون وروود هناك سويتلي باقة واخذتها الها ..
بهاليوم شفت جيهان الطفلة هي وبنتها كانها موبنتها كانها صديقتها واثنينهم بعمر الخمس سنوات طايرات من الفرح ..
وعدت نفسي ان لازم اكون سبب هالفرحة ومااخلي عيونهم تبجي ابد...
رجعنا للبيت هلكانين وجان باجر الاربعاء .. جيهان اجتلي باستني وهي مستحية وتضحك :
احبك وربي ميحرمني منك ولامن حنيتك ..
(بستهامن راسها واني ذايب بيها بس اريد اخذها لحضني بس قويت نفسي ولسه ماجبت العلاج واريدها ع راحتها تكون مستعدة لوجودي يمها ) : حبيبي ربي يحفظج الي ياروحي ..
حظري نفسج باجر ح اخذج بمكان ..
-شنو هالمكان احسان
-مفاجأة حبيبتي ..
-صايره مفاجآتك هوايه وتجنن مثلك ..
-اي حبيبتي حياتج ويايه بعد كلها مفاجآت وجنة وحب وهيام وعشق وغرام..
-اموت عليك (باستني من شفتي .. كانها انطتني الضوء الاخضر .. حتى التهمها ..
وبديت اتفتن بيها وشفتي ع شفتها انطيها كل الحب الي بكلبي الها .. لحد ماذابت بين ايديه حسيت ع نفسي ح جرم بيها....، سحبت نفسي بهدوء .. كومي بنيتي لا انهيج هسه ..
جانت واكفه منتجيه ع الحايط مال الكليدور مال الاستقبال وذايبة ومليانة خجل عيونها وشوق ..
-حبيبي ...بس.....
-اويلي حبيبج يموت عليج .. ويدري بشوگج اله وهيامج .. بس اريدج عروستي مثل ماوعدتج يوم الخميس واني كلمتي وحده مو تعرفيني ..
(لزمتها من خشمها.. يلا روحي ارتاحي حبيبي نامي زين .. تصبحين ع خير)
-وانت من اهل الخير ياعمري..
راحت واخذت روحي وياها .. اني هايم بيها ومجنونها .. بس راح اصبر اريدها هي الي تشتاقلي اكثر وترغبني واريد اعوضها عن كل شي ..
سبحت ونمت وكعدت الصبح ...وديت ريحانة للمدرسة وهم كملت شغلي ورجعت ريحانة للبيت ولكيت جيهان جاهزه ..
-هاحبيبي جاهزة .. نروح..
-اي حبيبي جاهزة
اخذتها وطلعت بيها لصالون نسائي معروف .. ومشهور كنت حاجزلها ومفهم ام الصالون شراح تسويلها وشلون ترتبها ..
- يلا حبيبي وصلنا خل ننزل
-وين حبيبي وصلنا
-تعالي ومعليج هذا صالون نسائي متخصص بالعناية بالنساء وبس العوائل الراقية تدخل اله ..
ومتأمن وكلشي واطمني لاتخافين اني مفهمهم على كلشي واكو مجندات اثنين بالصالون مخليهم اني لحمايتج فاطمني كأني اني موجود..
-بس حبيبي اني والله موبحاجة لهالشي ..
-ادري كلش زين اميرتي وملكة قلبي مو بحاجه لاي شي بس اني كوتلج انتي عروستي وكل عروس لازم تروح للصالون صح لو اني غلطان ..
- (بحلكها ابتسامة تموتني) هههه صح حبيبي تأمر امر انته..
صحت ع ام الصالون .. يلا نجلاء هذي اميرتي دير بالج عليها ومثل ماوصيتج..
-تأمر استاذ اخليها بعيوني..
يلا اني رايح 3 ساعات وارجع
-الله وياك..(جيهان عينها عليه لحد مصعدت السيارة)
اتصلت بالعمال ورايه شغل هوايه بهل ال3 ساعات..
دخلت البيت لكيت الخدامة مفرغة الغرفة وجايين العمال شايلين غرفتنا القديمة اني وجيهان ودينصبون بغرفة جديدة اختاريتها لونها ابيض ومأطرة بنقش ذهبي .. كلش حلوه وهادئة ..
كملت بخلال ساعة وخليت الخدامة ترجع ترتب غراض جيهان مثل مجانت حاطتهم بهذيج الغرفة لان اعرفها شكد حريصة وتحب ترتب غراضها بطريقة متنسى بيها الاشياء ومعلمة الخدامة ع طريقتها..
ورا ساعة كملت الخدامة كلشي ..
دخلت للغرفة ارتاحيت وكلت يارب تكون بداية خير النه ..
قفلتها طلعت للفندق واتفقت وياهم ع كلشي ..
ورحت جبت الملابس الي موصي عليهم واخذتهم للبيت وقسم صعدته للفندق ..
رحت لجيهان ورا 3 ساعات طلعت اميرتي تجنن اباوع لكصة الشعر واللون منطيها جمال ونظارة وهي هم سمنانة وخدودها متفحة ...
وكبرانة بنيتي كمت اتلفت خايف لااحد يشوفها يمكن اقتله اذا احد لمحها بسرعة كتلها غطي شعرج بالشال جريتها ودخلتها بالسيارة ..
هي مثل الخافت مني ..
شبيج ياعمري ..
مابيه بس عبالي معجبك شعري حبيت اراويه الك ب باب الصالون ..
لاياعمري كلج تجننيني بس اني ماتحمل احد يشوفج ولهذا هيج سويت ..
والله اموت عليج اني ..
- اني الي اموت عليك حبيبي ..
فجأة باوعت للطريق .. احسان وين ماخذني مو منا البيت ..
-انسي البيت راح اخذج لمكان بس اني وياج بيه 😍
-صدوك حبيبي شنو هذا المكان ..
-هسه تشوفين
اباوعلها كانها طفلة ومنتظرة هديتها .. والله موتتني هالجيهان هذي خلتني اراهق عن كبر
دخلتها للفندق وهي مستغربة..
-شكو احسان وين جايبني
-لج شكد عجولة انتي ..
اصبري ملكتي لاتستعجلين .
... اخذت مفتاح السويت الي حاجزه وكتلها يلا ادخلي ح تلكين ملابس ع سرير لبسيها وتعالي😌 اني ح اجيج ورا نص ساعة قفلي الباب عليج ومتفتحيه ابد الا تسمعين صوتي وتشوفيني بالعين السحرية..
-حاضر حبيبي .. اموت عليك انته ومفاجآتك ..
دخلتها وبقيت لحد مقفلت الباب اطمنت رحت للغرفه الي بصفها ودخلت بدلت لبست قاط اسود ..وخليت عطر وطلعت انتظرها لحد مكملت النص ساعة دكيت عليها حاجيتها طلعت الي ملاكي ..

هذي صورة جيهان ورا مكصت شعرها وصبغته وهذا فستانها الي جابه الها احسان ..

لبسته وطلعت كأنها عارضة ازياء اجنبية ..
لدرجة اني اني ممصدك ان هذي الي ..
خليت الها شال ابيض ع راسها وسحبت ايدها وخليتها بايدي وكتلها يلا اميرتي..
-على وين احسان وين ماخذني والله استحي اطلع بهالثوب..
- انتي ويايه مشيلين هم اي شي تعالي بلا متعطلينه ماريد اضيع دقيقة من عمري مافرحج بيها..
اخذتها ويايه لقاعة اني حاجزها...
جنت موصي ان يخلون اغاني هادئة حيل ومضبطين القاعة والاضوية مالتها بشكل هادىء وميز طعام عليه انواع الاكل ..
اول مدخلتها لجيهان ... حبيبتي كل عام وانتي الي .. زوجتي وحبيبتي وصديقتي وبنتي وكل عمري فدوة الج ياروحي ❤️..
-اذكرتي اليوم شنو ...؟
-لامذكرت ...
-اليوم تاريخ زواجنا ياروحي ..
-هذي هديتج ...(طلعت الها علبه بيها كلادة على شكل فراشة وبالنص فص احمر وتراجي ومحبس نفس الموديل ..لبستهم الها)
انتِ فراشتي الي مزينة حياتي والي مااكدر اعيش بدونها ..( تعلكت بركبتي وحضنتني ..)
-ربي ميحرمني منك ياروحي
كان يوم خيالي عشت وياها بعالمنا الخاص نسينا كل الاحداث الي صارت النه ورجعت الي جيهان نورت حياتي وشفت الفرحة بعيونها وتشع من وجهها .. وعدتها ان كلما مابيه نفس ح يكون الها ولريحانة ولسعادتهم وحتى اعوضهم عن كل الي شافوه ... صارت الساعة 12 ... وصعدت وي حبيبتي للسويت الي حجزته النه وعشت وياها قسليلة من العمر ...
شفت ملاكي انثى متكاملة وحمدت الله وشكرته ان اي اثر مباقي بجسمها ..
كنت اتفحصها بعيون كلها خوف ووجل ان اكون شوهتها باعمالي بس الله يوفقه الي عالجها صدوك رجعلي حبيبتي كأنها طفلة لاول مره تدخل لعالمي ..
كل لمساتي الها عكستها الها بحب ورقة وحنية ..
هذي وردة قلبي رح اظل اسقيها حب لحد اخر يوم بعمري ..
كعدت الصبح على وجه حبيبتي الملائكي ..
يلا ي روحي مناوية تكعدين ..
فتحت عيونها الي منعسه طخت رموشها الصفرة بخدودي .. بست عيونها ..
حبيبة قلبي يلاورانا روحه..
-وين حبيبي منرجع اليوم للبيت ..
-رح نرجع حبيبي بس بالليل..كومي هسه
بدلنه واخذتها للحبانية لان حبانية بهالوكت تجنن ..
جبنا سمج وشوينا وظليت اشوفها شلون تلعب بالمي وفرحانة ...
لحد ماصار المغرب..
اجتي نامت ع رجليه ..
-هاحبيبي تعبتي...
-اي حبيبي حيل تعبت واشتاقيت لريحانة وماما ..خلي نرجع ..
-يلا حبيبي لمي الغراض خل دنرجع ...
- رجعت والطريق كله اباوع الها ومشغل اغاني هيثم يوسف لان اعرفها تحب تسمع اله واني اباوع الها واغنيلها

[There should be a GIF or video here. Update the app now to see it.]

كولي الك وابين ايديك ...
واضل اردد وياها ،... وهي تغنييلي
كولي الك وبين ايديك ....

........
بس ياترى هالفرح الي فرحوه راح يتم على خير تتوقعونه .....
بارت خليته كله فرح ورومانسية ...
لاحلى متابعات ...
لاتنسون حبايبي التصويت واريد اشوف تعليقاتكم الجميلة ❤️😍
الي تفرحني 😘😘😘😘