رواية ساهر الفجر الفصل العشرون 20 - بقلم الكاتبة شمس السعدي

بارت مفاجى لعيونكم حبايب 😚ولتنسون التصويت
//// البارت عشرون ////
#ساهـر_الفجـر ..
#الكاتبـة_شمس ..

ساهر ..
من اتصلت عليه فجر . احس الدنيا ماسايعتني وخاصه من بشرتني بنجاحها ..
حبيبتي كبرت ومابقالها شي وتدخل الجامعة ..
شلون بيك يساهر . تشد حراسة عليها هناك من العيون لو تگابلها وتگعد ..

مسلم .. ساهر وين صافن صار ساعه احجي وياك ورنا كمين ومانعرف مصيرنا وانت تتبسم .
عمي هنيالك اكو من يضحكك هيج ..

ساهر .. هههههه ديله گوم حاسدني ع الضحكة ..
مسلم .. لاعمي الله يسعدك ..

اخذنا عتادنا .. وطلعنا كمين ع المكان الي بي عناصر من الحشد محجوزين ..
صار اشتباك بينا وبين داعش .. استمر بالساعات ..

هدأ الوضع وقتلنا اغلبهم والبقيه انهزموا ..
دخلنا بهدوء وناس تحمي ناس ..

بس وگعنا بفخ من قناص داعش ..
بالقناص يضرب بصورة عشوائيه ..

شفت مسلم من بعيد تصوب ركضت بأتجاههة ..
لگيته بالگوة يسحب النفس. .
سحبتة من ايديه حتى اخذة المكان امن .
صحت ولد ويانا يساعدني .
بس شلت ظهري .
حسيت برودة بظهري ثلجت بالاول وبعدها نار سعرت بيه جمر ..
اريد اخذ نفس مااگدر ..

احس وگعت فوگ مسلم وهو سابح بدمة ويصيح ساهر .
اولادي ساهر لاتعوفهم ..

اريد اگدر احجي او اگوم مااگدر بس عيوني تباوع ومغوشه ..
الى ان اغمى عليه وماادري شنو الي صار ..

فجر ..
بقينا الليل كلة سهرانين .. والاتصالات جاريه ..
ماهر من جهة ورعد اجة يمهم وعمامي كلهم وخوال ساهر .
البيت مگلوب ..
الي طمنا انه مموجود اسمة وي الشهداء .. واحتمال وي الجرحى .
وهذا كان امل بصيص بالنسبه النا ..
الصبح الضحى .. انفتح جهاز ساهر ..
صاح ماهر . دگ جهازة دگ ..

جاوبه وبقى يحجي وياه ..
اي
وين
بيا مستشفى..

سد الجهاز وكلنا نباوع الحلگ ماهر نريده بس ينطق ..
گال ..
ساهر متصوب وناقليهم البغداد  ..
خلونا نروح ..
نعيمة .. اني وياكم رجلي على رجلكم ..
محمود .. ابقي هنا انتي تشدهينا وان شاء الله مابي شي ونجيبه ونرجع ..

نعيمة .. والله ماابقى الا وياكم اروح ..
جهزوا وطلعوا وكلنا نبجي وندعي الله يگومة بالسلامة .
للظهر .
سمعنا عياط  .. شفنا ايات دخلت..
ساهر بعد روحي وينك .. ليش عفتني ابنك منو اله. 

كلنا گاعدين ومتفاجأين بكلامها ..
بنين .. بيش مفاولتله ساهر عايش وان شاء الله يرجع .
ايات .. شمدريني خالتي خابرت بالليل وگالت مختفي وصاير اشتباك واحتمال مستشهد .
وادگ عليها من الصبح لسا ماكو .
براء . ماخابرتي علينا كلنا گاعدين ماغمضت عينا . وخوالي هنا هم جان خابرتيهم .
ايات . . شبيجن حاميات عليه . شمدريني اني .قابل انتن احن مني هذا زوجي وابو ابني بلياه اني اموت واتيه .
بنين .. رحمة لهلج ايات . اگعدي وادعي وانتضري حالج حالنا. مالنا خلگ مشاكل ..

لينا .. خابرت ماما .. راح يرحون مناك يشوفوه هي وبابا على ما يوصلون ماهر وخوالي ..
مريم .. ان شاء الله مابي شي بحق محمد .
فجر .. امين يارب.  يرجعه النا بالسلامة ..
ايات .. اي والله يرجعه الابنه والي ان شاء الله
بنين .. استغفر الله . راح اگوم اصلي اي خبر گللي .

گامت ايات تدور بالمطبخ ورجعت ..
-ماطابخات شي شناكل ..
مريم .. وينه وين الاكل هو احنه من البارحة شايفين دربنا .  سوي اي شي واكلي ..

لينا .. گومي فجر خلينا نطلع كبه نگلي وزلاطة سوي وياي . خطيه مريم من البارحة بلا اكل .
مريم .. اگعدن مااشتهي هو بعد خبر ساهر النا نفس للاكل. .
فجر .. مايصير لازم تاكلين شويه عمود الطفل خطيه .
ايات .. ترى اني هم حامل ومن گلتلجن على غدا گلبتن الدنيا عليه .. وهسا تفكرن بمريم لان حامل ..
براء .. صدگ ايات شو ماشفتج سلمتي على مريم لو باركتيلها . غير اجت من ايران وحامل وهاي لينا هم جانوا بايران شهر عسل ورجعوا ..
ايات .. ادري شمالي سوتيني كلشي . بس غير شغله ساهر لهتني ..
والله اكلتني بكشوري من اجيت لسا . 
اصعد الغرفتي احسن ..

فجر .. سوينا كبة وزلاطة .. خلينا الصينيه بالصاله. محد تقبل تاكل .
بس بنين گالت .
-لازم تاكلن الي بينا مكفينا خو مانحير بيجن كلساع وحدة واگعة علينا . وانتي براء .
جيبي صينيه واخذي الايات غدا . هسا تگول محد قدرتني وجابتلي اكل ..

اكلنا كل وحدة لفه وگمنا لمينا المواعين .
سمعنا  لينا عاطت وتبجي ..
خوفتنا ..
احس رجلي ماتشيلني . وصار ببالي ساهر خلص راح وتركني مثله مثل غيره

بنين .. احجي شبيج گولي ..
نزلت ايات ع العياط ومريم خطيه وجهها اصفر .
واني احس راح يغمى عليه من الخوف ..

سدت الموبايل .. ولجن ساهر ..
كلنا بصوت .. شبيه ..
-ساهر احتمال انشل .  الضربه بضهرة ومايحرك اطرافه .
اني من سمعت ماحسيت على روحي اغمى عليه ..
گعدت البنات داير مدايري يبجن ..
ودموعي تنزل عشره عشره .
ولجن مااتخيل ساهر يوگع. 
ساهر ابو الطول الحلو . الي مايعرف يخلي رجله بالگاع اذا مايطلع ويفتر يتخبل ..
ولجن شلون راح يعيش . شلون راح يتحمل .
كلنا اتهسترنا ونبجي بيومها ..
ياربي طلبته منك سالم . وفرحت من سمعت بي عايش .
بس مااتوقعت يرجعلنا مايتحرك ..

لينا كل ساعه تخابر ماهر الى ان عاط بيها . وگالها احنه ملتهين وانتن توترنا لاتخابرن بعد .

اجت عمتي بتول وهاجر يعيطن ويبجن . جانوا بالزيارة مايدرن .
البيت صار عبارة عن حداد ..
لان ساهر كان عمود هذا البيت .
واذا وگع معناها البيت كله يوگع ..
#بقلمي_الكاتبة_شمس
………………………………
دخلت للغرفه . وگعدت الطم واندب حظي .
اوووف ياجدة فراگج بعدة اخضر ودمعي مانشف عليج .
دور صواب ساهر الي زاد المي وقهري ودموعي ..
اتمنيت الزمن يرجع لورى ..
واصحح كل اخطائي . 
كان ماعرفت ولاحبيت كيان . ولارفضت ساهر وحبه .
ولا ماتت جدتي ..
وكان هسا ماعايشين كل هذا الالم ..

ساهر .. صحيت بالمستشفى لافين جسمي كله ونايم ع الجانب . يمكن مسويلي عمليه ..
حلگي ناشف اريد مي ..
اجة ممرض يبدل المغذي .
گتله صديقي مسلم تصوب بعدة عايش ..
گال ماادري مااجانا واحد بهيج اسم . 

بقيت ادور بعيوني على واحد من اهلي جماعتي . 
اريد احرك جسمي مااگدر تگول رجلي طابوگة .
لعنت الشيطان ..
لا ياالهي دوم مؤمن بقدرك وقضائك . ولو ماخذ روحي مااعترض .
بس كلشي ولاتخليني عاله على احد ..
حسيت بألم قوي ..
گال الممرض ها متوجع . ضربتك ابرة مسكن هسا تطيب.
المشكله ماحسيت بالابرة من انضربت ..

شويه شفت عمتي وعمي عمار ..
گابلتني عمتي وتبجي .
گلتلها اهلي وين ..
-جايين بالطريق ..
اجة مراد ..
گتله مراد تعال اسندني اريد اگوم .
اجة حاول ماگدر .
گتله صيحلي دكتور لو اي احد .. بسرعة گمت اصيح بعلو صوتي ..
اجة دكتور مقيم ..
گتله بدون لف ودوران اشرحلي شنو بيه ليش مااگدراتحرك.
-شي طبيعي لان الضربه بضهرك ويمكن واصله للحبل الشوكي . فأحتمال بمرور الزمن يله تگدر تمشي وبالعلاج الطبيعي ..

اتخبلت من گال هيج .. لا يساهر ماتلوگلك هيج نومة . تنشل وتطلب مساعدة الناس الحاجتك وگومتك ..

صحت بعمتي .. خابري ابوي بسرعه وين صاروا .
وانت مراد شوفلي دكتور اخصائي اريد احجي وياه .

ساعة واجو اهلي ..
گابلتني امي تبجي والتموا عليه .
طردتها .. يمة اطلعي برة لاتبجين على راسي ..
مااريد احد يشفق عليه .
كرهت روحي والناس وكلها ..
اريد انام واگعد ويطلع كله حلم .
ياليت الرصاصة استقرت بگلبي لو راسي وميت ومرتاح ..

انهاريت واعصابي تلفت.
ومااعرف لاكبير ولاصغير الكل عطت بي وطردته .
اجة دكتور اختصاص وحاول يهدأني ..
گتله بس حجايه وحدة .
الي اني بي اله علاج لو لا ..

الدكتور .. خلي ايمانك بالله قوي واسمعني ..
احنه طلعنا الرصاصه من ظهرك بس بعد لازم علاج وعمليه ثانيه .
سوينالك اشعة ورنين ..
اكو كسر بالفقرة اثر الرصاصة گدرنا نعالجة .. واحتمال اكو ضغط او تلف بالحبل الشوكي .
راح ننطيك حزام طبي لمدة شهرين الى ان يطيب جرحك ونسويلك علاج طبيعي ..
واذا ماكو نتيجة نسويلك عمليه جراحيه ثانيه ..
او نستبدل الفقرات المكسوره اذا ماالتحمت ..
بس الاهم لازم تلتلزم بالعلاج ..
واي مشقه وتعب ماكو .
حركة زايدة مانريد .

الدكتور يحجي واني بعالم ثاني .. هاي شغله الاطباء ماتاكل وياي ..
اعرفهم ماينطون نتيجة واضحة او ثابته ..

بقوا يحجون وي الدكتور واني غمضت عيني وگمت اتمنى الموت بعيني ..
مو ضعف او خوف بس مااريد احد يشفق على ساهر ..
مااريد احد يراعيني بعد ماكنت مراعي البيت كله وشايله على راسي ..

طلبت من اهلي كلهم يتركوني. 
مااريد ابري الي يلوم بيه ويگلي شوداك وليش رحت .
وامي الي تنعى وتبجي على راسي وتزيد همي ..
خليت بس عمي حمزة وماهر ..
والبقية گلتلهم رحوا لاتبقون يمي ..
او بالاحرى طردتهم ..

مر عشر ايام واني بالمستشفى وتأذيت حيل من عرفت مسلم استشهد .. اتأذيت وبجيت عليه .
كانت اخر كلماته اولادي لاتعوفهم .
ومن وجع اصابتي ماگدرت اجاوبه واطمنه .. ماگدرت اودعة او انقذة ..
ااااااه يابه شگد الانسان ضعيف . 
يمشي ع طوله ويگول اني . وتالي بلحضة يصير حاله حال اي اثاث لايتحرك ولايمشي ..

كنت استثقل نفسي من اريد اگوم او اتحرك ويشيلوني عمي وماهر .. ورعد الي ترك دوامة واخذ اجازة علمودي .
لان ماهر يداوم ويجي ممتواجد دووم ..
نضرتهم وشفقتهم الي مااتحملها . وساعات اعصب واگلهم عوفوني ..
جا اذا رحت للبيت شلون اتحمل نضرة النسوان الي وخاصه فجر ..
الي كنت اني سندهن وادگلهن صدر.  هسا بياوجه بعد احجي وازامط ..

سولنا خروج للبيت .. وشرط انه مانترك مراجعه والعلاج الطبيعي بعد مااطيب ..

گتله ماهر اني ماابقى هنا . بس يطيب جرحي اريدك تشوفلي دكتور زين . بالهند بإيران بأي مكان وتدزله اوراقي والاشعه والرنين ..
ماابقى هنا واسگط روحي ..

لمينا غراضنا وورجعنا للبيت ..
الطريق كلة مخليني بالكشن الورى . والتفكير اكل راسي شلون راح اطب للبيت واني بهذي الحاله وعلى كرسي گاعد ..
شلون تتمنى تصيرلك مرة وانت مو گادر تشيل روحك .
هي كانت رافضتك لان اكبر منها .
اذا شافتك هسا مقعد وماتتحرك بعد تباوع الوجهك ..

فجر .. من سمعت راح يخرجون ساهر ..
عمي گال حظروا غرفة جدتكم اله وسريرها .
نضفتها ورتبتها . شلت الاشياء الزايدة ومانحتاجها .اني وبنين ولينا ..
طلعت فرشة حلوة وفرشتها ..
خليت يمة طاوله صغيرة . والتاب والشاحن.
حضرت كلشي يحتاجة حتى ميضوج ..

وبيومها كلنا گعدنا من الصبح وحضرنا الاكلات الي يحبها ..وجهزنا البيت ..
وعمو حظر طلي السلامته ..
اول مرة اشوف البيت متفاهم ومتفق وواحد يساعد اللاخ مرض ساهر خلانا مانهتم المشاكلنا بدل راحته ورضاته .
صارت كل اولوياتنا الة ..

واول مااجة . ذبح عمو الطلي جو رجله .
احنه ماطلعنا ..
لان جماعته اجو كلهم يستقبلوه ..
ودخلوه للاستقبال ..
عمو حمزة .. گال يله حضرن الغدا بسرعه .
صبينا واخذوا السفرة واتغدوا وشربوا جاي .
ل3 واحنه ع نار نريد نشوف ساهر ..
الى ان طلعوا ..

واجة عمو . گال سون طريق ولاتبجن ولاتخنگنه بسوالغجن . تعبان ونريده ينام .

عمو يسولف وانتبهت .. ع ماهر يدفع بالعربانه وهو گاعد ومنصي راسه ..
تلگته عمتي واخواته بوسنا وكلها سلمت عليه والدمعه حابسيها بالگوة ..
اجت ايات حضنته وتبجي . 
واني كانت امنيتي احضنه بس ماگدرت اختنگت من شفت وضعه ..
مو انت الي تنزل راسك هيج .. ماتلوگلك هاي الگعد يازينة الرجال انت ..
ارفع راسك يابطل الي فخر انت ابن عمي وسندي ..

اتقربت منه وكلي يرجف ومااعرف بأي كلمة اواسيه ..
هو شافني بقت عيونه بعيوني ..
اتقربت اكثر وبست گصته .. واحس دمعتي نزلت ع وجهة وماصبرت ..
صاح ماهر .. اخذني للغرفة بسرعة ..
دخلوه للغرفة والكل وراه ..
صاح بنبرة مخنوگة وعاليه .  اول مرة اسمعها ..
خلوني انام .. لاتضلون مگابليني لاتقيدوني خلوني اخذ راحتي اطلعوا ..

عرفته مايتحمل .. ساهر مامتعود يتقيد ويگعد والناس تراعيه .. ساهر مايحب يعتمد على احد . شلون راح يصبر ويتحمل ..
ربي خذ من عافيتي واعطي له .. فهو كل ما لدي ولاعافيه لي بعده…… .
#بقلمي_الكاتبة_شمس
يتبع……….

ها حبايبي ..
وعدتكم انزل بارت مفاجئ حتى اطمنكم على ساهر ..
والمفروض انه انتو تتوقعون انه عايش .
لان هو الي ديسردها ..
اتمنى ماتطالبوني ببارت ثاني اليوم لان فعلا ايدي تعبت واني اكتبلكم سريع حتى انزله بسرعه ..
متابعه ممتعه حبايبي ..