رواية ساهر الفجر الفصل الحادي والعشرون 21 - بقلم الكاتبة شمس السعدي

//// البارت الحادي والعشرون ////
#ساهـر_الفجـر ..
#الكاتبـة_شمس ..

عندمـا تجد شخص كان في مامضى .. انسان قوي كثير الحديث ومرحا .. وفجأة اصبح صامتا .. كثير الغضب وقليل الحديث مع الناس ..
فأعلم انه قد كسر قلبه وكبريائه لدرجة فقد بها القدرة على الحديث 💔

هذا حال ساهر من يوم الي اجة للبيت .. انسان ثاني صامت قليل الكلام ..
لكن فجأة يثور ويغضب ع اتفه الاسباب ..

كانت عزة نفسة تمنعة انه يطلب اي شي من احد . حتى المي يموت عطش ومايگول الا اذا جبناله وي الاكل ..

خاصة اني كان تعامله جاف وحاد وياي ..
مرة من المرات شفته نايم ..
دخلت غطيته ..
وجبت بطل مي وشلمونة خليتهم يمة ع الطاوله حتى من يعطش مايتعب او يضطر يصيح احد ..

اول ماطلعت سمعت صوته يصيح .. ايااات وينج تعاي .
لان اني كنت قريبه يمة ..
اجيت اله .
فتحت الضوه لگيته يحاول يگعد ..
ركضت حتى اسندة ..
دفعني!!
-روحي انتي صيحي ايات ..
-ايات ماتگدر حامل خليني اسندك ..
-گتلج روحي مامحتاج احد يسندني اريدها عندي شغله وياها ..

طلعت لگيت عمتي بوجهي ..
شسويتيله شبي ..
-ماسويت شي . بس يريد ايات ..
-اي روحي صيحي مرته لاتضلين تحومين وراه ..

رحت الايات لگيتها نايمة ..
گلتلها ساهر يريدج ..
-شيريد
-ماادري ..
-اي روحي هسا اجي ..
نزلت الغرفة مريم لان احنه ننام يمها وعمو حمزة ينام يم ساهر خاف يحتاج شي ..

مريم .. شبيج فجر . ساهر سمعته يعيط ..
فجر .. مااعرف احسة جاف وياي وكلما اروح اساعدة يعيط عليه ..
-اصبري عليه ليش انتي متعرفين ساهر وعزت نفسة .
-بس مو هيج . اني جاي احاول افتح صفحة جديده واتقربله وهو ديبعدني ..

دخلت بنين .. اوووف طردونا من الاستقبال . اجو جماعة ساهر ومضمد يشوف جرحة ..

بقينا محبوسين بالغرفة .
شوي اجت عمتي لابسة عبايتها ..
تعاي بنين سوي جاي . هنا ام رعد ورعد اجو يشوفون ساهر ..

طلعت بنين ورى شويه اجت ترجف ..
-ولجن متت خجل. شايله الصينيه واركض بالجاي . وامي ماگالتلي الولد يم ساهر عبالي بالاستقبال .
ودخلت گبل وصار الولد بوجهي ياگاع انشگي وبلعيني .

مريم .. يله عادي مطالع شي منج . وهسا هو رعد قابل غريب . نسيتوا كلكم كنتوا تلعبون سويه وانتو صغار . ومعارك وبالطابوگ ..
بنين .. هي ذيج من كنا صغار بس هسا كبرنا وعقلنا .  بس تدرن متغير حيل ولحيته شطولها. .
مريم .. اي غير حزنان على زوجتة .. ولااتهنوا خطيه . او ماحملت انتكست وتخربطت ..
فجر .. هي بنت خالتة مو . اني شفتها تخبل .
مريم .. اي بنت خالته بالضبط مثل ايات وساهر ههههه

بنين .. لايمعودة . ساهر يگول مدللته دلال وهي مريضه وحامل وماتگدر .
واحته الاخت يگلها جيبي مي تگول حامل ..
حتى سودة عليه ساهر من اجة لسا ماگعدت يمه شافته ..

اجة ماهر . گال راحوا الخطار . گومن رتبن الاستقبال. 
طلعنا سمعنا عمو يسولف وي عمتي همزين عاد الله رزقه بطفل لان مانعرف اذا يطيب او لا . ع الاقل عندة طفل يشيل اسمه ..
وعمتي تبجي .. صدگ انقهرت عليه . ساهر من النوع الي يحب الاطفال .. وكان يتمنى يترس البيت ..

الحمد لله الي الله نطاه طفل .. لو اعيش هاي الاحداث كلها قبل كم شهر .. مااصدگ .
اجت المصايب وحدة فوگ اللخ ..

اجة ماهر سند ساهر وخلاه ع السرير ..
وساهر يگله دلكهن حيل بلكي يتحركن ..
رحت جبت مي دافي .وطشت ..
خليته الطشت جوة رجله .. هو كان مستغرب او مامتوقع وجبت المي الدافي .
خليت فوگ رجله .  اصب وادلگهن بلكي يرتخي اعصابه ويحس بيهن . كنت واني اسوي برجله اقرأ ايات وادعيه

باوعتله مغمض عيونه وقابض بأيديه البطانيه حيل ..
گال گومي فجر .
-ساهر ليش تعاملني هيج ..
-گتلج گومي لاتخليني اعصب. 
غمزلي ماهر . 
گمت . ردت اطلع صارت بوجهي ايات . صاحها .
-تعاي ايات شيلي الطشت .. 

تركته وطلعت ..
اعرفة يتحسس مني.  بس هو جاي يقسى هواي ..

خابرت عمتي ابتهال تسأل ع ساهر ..
گالت نريد نجيكم ..
گالتلها بنين . هلا بيج عمة تعالوا .

خبرت عمتي . عمتي لعبت جوله شنو بكيفج تتصرفين بعد كل الي سووه وموتو جدتج وتگليلهم تعاي ..
عاد عمو مااعرف شعجب .
گالها اختي وجاية ترديني اطردها ..
هي سكتت ..

لينا فرحت لان راح يجون اهلها بعد غياب . 
وبدت تسوي حلويات ومعجنات.  وطلعت الحجة السلامة ساهر لان عمتي متقبل نبذر بالاكل ..

عمتي بتول دايما تجينا ..
بس ماتدخل يم ساهر .
بس بالصاله تگعد ..
هاجر ماتحجي وياي من يوم الي صار . مع العلم هي الي غلطت بحقي واهانتني وتهمتني ..

فصدفه واحنه نسولف طلعت ايات من غرفة جدتي الي بيها ساهر ..
گالتلها عمتي .. وج ايات كم شهر عليج ..
ايات .. دخلت بالرابع ..
بتول .. ياولج شبسرعة .. وحتى بطن ماعندج شو .
ايات .. ها اي هو اني بطني صغيرة ..

نعيمة .. والله اريد افرغ واخذها للدكتورة تفحصها ونشوف الطفل جنسه شنو حتى نفرح ساهر ..

ايات .. اني اروح وي امي استحي اروح وي واحد .
نعيمة .. اي صدگ البنيه الا امها ..

لاحظت عمتي كانت هواي تتسامح وياها وتلبيلها طلباتها ويمكن لان حامل بالطفل الي راح يصبر ساهر ع الي صارله ..
#بقلمي_الكاتبة_شمس
……………………………… .
ثاني يوم اجت عمتي بتول وخالوا عمار وسما ومراد ووياهم رجال مااعرفه ..

من دخلت سلمت عليهم بس الرجال لفت انتباهي . احس نفسي شايفتة ومااعرف وين ..

صاح خالوا عمار .. تعاي سلمي على خالج زياد ..
هو گام . گال سبحان الله ازاد وگاعدة .
حضني حيل واول مرة احس بهيج دفوا ..
گال تعاي ياريحة الغاليه ..
كان يشبه امي حيل . بس بعيونه وبكلامة حنيه ماموجودة عند خالو عمار ..

گال تعاي هنا خالوا .. الف رحمة على روح عمتي فخرية من ردت اسافر مريت بيها وگلتلها انطيني بنت ازاد اسجلها بنفوسي واطلعها وي بناتي . ماقبلت .
وگالت بنت محمد تربى عندي ..
وفعلا ماراحت الا لمن كبرتج وربتج ..

من اول لحظة اتعلقت بخالو .  وحبيته .
كان جايبلنا هدايا وزعهن علينا .شخصيته حلوة وخله الكل يحبه من اول لحظة ..

هو متزوج ومهاجر للسويد وصارله هواي هناك . يجي بين فترات طويله يشوف اهله ويروح .
بس بعد الاحداث الاخيرة اجة يطمأن ع اهله وناسة .
وعباله يشوف جدتي بس مالحگ عليها ..

لليل ..
اخذني وگعدنا بالمرجوحة .. گال سمعت بلي سواه كيان انتي عندج مشاعر اتجاهه . اكو احد جبرج ع ساهر ..

گتله خالو .. الي صار صار ومانگدر نغيرة . حتى اذا انجبرت هالشي مايغير الي عشته ..
تحملت ذنب من صغري ومازلت اتعاقب عليه ..
والمشكله كلما اوثق بشخص يغدرني ..
والي احبهم يرحون ويبتعدون عني ..
اني عايشه على حافة الهاويه ..
وماعندي حق الاختيار ..

خالو .. فجر روحي وياي ..
باوعتله بسرعة .. شنو ؟ وين؟
-اني راح اگعد فترة بأربيل لان جبت البنات وامهم لهنا روحي اگعدي يمنا وهم عندج سادس اخليج بمعهد هناك ادرسي ..
وبعدها اشوف شلون ارهمها واخذج وياي للسويد ..

بدون تفكير .. گتله لاخالو مااگدر . وخاصة بهذا الوضع .
ساهر مريض ومااريد يحس انه بعد ماوگع انتركة كلنا .

-ساهر عندة اهله وزوجته . وانتي مايربطج بي بس عقد السيد . افسخي وابدي حياتج .
حرام تدفنين نفسج هنا . واني جاي اشوف المعامله والكلام الي يتوجهلج ..
مااريد احرضج بس انتي ماتعرفين معزة ازاد عندي ..

باوعتله .. لعد ليش تركتوها . ليش الكل تخلى عنها وعني واحنه بأمس الحاجة الكم ..
-اني مااتخليت ابد ولو هي عايشه كانت گالتلج ..
انتي يمكن ماتدرين . بس الخلافات كانت من زمن جدتج فخريه . يوم عاندت اهلها واخذت جدج ..
صار كره وحقد ..
ومن صارت خطبه ابوج وازاد .. شرط ابوي ناخذ ابتهال العمار . وعمار فرح لان جان هاويها ..
بس ابوي شرط شرط اخر .
بعد ماانطيناهم مرة واخذنا مرة . محد يسأل ع بنت الثاني .
يعني هاي تعتبر بمكان هاي . والي يطلع عن شوره يتبرئ منه ..
اني كنت ادرس ببغداد .
فأجي من بغداد الكم ومتلثم حتى عمامج مايشوفوني ويگولون الابوي وتصير مشاكل .
اشوف امج واطمأن عليها وارجع ..
يعني بحياتي ماتركتها . ومن توفت كرهت العراق كله وردت انهزم . وتالي هاجرت لان صارت المشاكل بين الطرفين اكبر واكثر واني بطبعي مسالم .

خالوا زياد من كان يحجي .. حسيت براحة نفسيه وياه.
گال يله خلينا ندخل عيب من الجماعه وعدنا كم يوم نسولف بيهن ونشبع ..

دخلنا لگيناهم يم ساهر .
خالو حاضني ودخلنا سويه ..
احس الدنيا اهدتلي هديه تعوضني من بعد هاي المعاناة كلما نضحك ونسولف احس ساهر يضوج اكثر . ويتأفأف
گال ماهر تعال گومني ..

عمو محمود .. يله خاف تعب خلونا نطلع عنه . طلعوا .
گال اوگفي ..
انتي تحاولين تقهرين وتحسسيني بعجزي ..

استغربت وگتله .. ليش شمسويتلك .
-مو عبالج مالاحظت تقربج من خالج وهو اليوم اجة اذا ناويه ع مصيبة ثانيه گولي من هسا .
ترى ماكو ساهر مثل قبل حتى يلحگ وينقذج ..

-لاتگول هيج اني ماعندي نيه الاي شي . وبعدين خالو زياد حباب وشفت تعامله شلون . ليش ماتخليني افرح ولو لمرة .

-اطلعي فجر مالي خلگج . صيحيلي ايات ..
-رايد شي گولي .
-منج لا . من مرتي اي . صحيها الي .

درت وجهي وطلعت .. گلتلها ايات ساهر يريدج .
ايات .. والله ظهري موتني كل ساعه طلباته ماتگضي وفوگاها بس يعيط مايعجبه ..
-اتحمليه شنسوي لان مقهور يذب حرگته بينا. 
-وانتي ماشاء،مستغله هالفرصة وكل ساعه رايحة تتلوگيله .
-لعد روحي اگعدي يمة ولبي طلباته احسن مما يحتاج غيرج .
-البيت مليان ناس . مامتوقف عليج تساعديه .لاتصيرن استغلاليه .
صاح .. اياااات وينج ..

ايات .. هففففف صبرني يربي ..
راحتله .. لكن مثل كل مرة. يعيط ويتحسس .

الولد يمة وماتاركيه وديسوون مناوبات اله بس هو مايتحمل ..

خالو بقى كم يوم وراح .. وقبل ميروح .. گال فجر فكري الي گتلج بي . ورقمي يمج اي شي تحتاجيه گولي .

فرحت لان اكو احد يهتم بيه بعد الي راحوا .
بيوم طلعت بالليل ..
سمعت ساهر يحجي .
عمي انطيني مي .
عمي ..
وعمو حمزة نايم ويشوخر تعبان هم خطيه .
اجيت ع كيفي ومن غير ماافتح الضوه بس اكو ضوة الصاله مفتوح ومضوي الغرفه قليل ..
صبيت بالگلاص ورفعت راسه يشرب ..
هو لزم ظهري بأيدة واني نصيت جسمي حيل حتى اسندة شرب مي .
وگال فجر .؟؟.
گتله اي .
قربني حيل بإيدة ويشم برگبتي . الى ان حسيته تعب حيل ..
اني مغمضه واول مرة احس بهيج شعور ..
تحولت لمساته ع ايدي وظهري وهمساته . الى عنف وغضب .
عصر ايدي حيل وگال اطلعي قربج يعذبني مااتحمل ارحميني ..

همستله .. ساهر خليني اطيب جروحك لاتصدني. خليني يمك ولاتبعدني. .
گال بهمس .. مامحتاج شفقتج . انتي الي صديتيني من كنت بقواي هسا لمن وگعت حنيتي عليه ..
روحي فجر . اني هم عاتقج والي دخل بيج لان حرام اظلمج وياي وهذا حالي. .

ردت احجي .  گال روحي لااتعصب ويگعد عمي . الخاطر الله روحي ..

طلعت واني مقهوره ودموعي بعيني . رجعت لفراشي ..
واتخيله شلون يهمس وشلون يشم بيه ويتقربلي ..
معقوله اني حبيتك يساهر ..
وليش هسا يله حسيت بحبك ..
اول مرة ارجف واخدر بلمساته وهمساته ..
ماحاولت امنعه وبقيت مسايرته ..
ردت يگلي شي اكثر من الهمس .
ولو ماصادني ومشتت مشاعري .
كان اني معترفتله بأحساسي اتجاهه ..

بقى يتجنب القرب مني لان يعرف مايگدر يقاومني ..
لكن اني رغم اسلوبه الجاف وتعامله . كنت مصرة اراعيه وارجعله جزء من افضاله عليه. 
مرت الايام . وساهر من طبيب الطبيب . والكل نفس الكلام . يحتاج عمليه دقيقه والافضل انه يسويها بالخارج .
فبدأ يبعثون تقاريره للهند حتى يشوفون اي دكتور يناسب حالته . والوسيط كان مترجم يعرفوه ..

اما عمتي وايات .. زادت مشاكلهم بسبب الطفل عمتي تعلقت بي وزاد اهتمامها وتحاول تعرف جنسه .
لكن ايات ماتقبل وتگول اريده مفاجأة لمن اجيب ..

وبيوم جاي ننضف ونغسل البيت ..
اول ماذبيت سطل المي بالگاع . مااعرف شلون ايات زلگت ووگعت ..
ماحسيت بس العياط ملئ البيت ..
اجن البنات وعمتي تركض .
وساهر مناك يصيح شكو . احجو شنو الي صار ..

ايات تبجي وتصيح .  فجر وفجر وگعتني فجر. خابرولي ماما تجي تاخذني ..

اني بقيت جامدة واحلف وربي ماادري شلون وگعت . بس عمتي هجمت عليه بأنواع الغلط والشتايم .
وتگلي اذا صار شي بأبن ساهر ماتلومين الانفسج .
هذا كان الامل الوحيد اله ..
مريم .. ام ساهر ترى اني گاعدة گبالها الگط تمن ماسوتلها شي .
هي نزلت من الدرج ولابسه نعال اسفنج . مو شافت البيت ينغسل المن نزلت .

نعيمة .. انتي اسكتي . لان من صنفج تدافعيلها ..

ساهر يعيط . وامة تگله فجر وگعت ايات وراح ناخذها للمستشفى خاف الطفل بي شي.

هو اتعصب وصاح ماهر تعال گومني ..
جايه ماهر بالكرسي وملهوف .. ايات شتحسين.
هي تبجي وهو لزم ايدها .
گولي يالله ان شاء الله مابي شي .
ماهر اخذهم بسرعة وروح ..

ايات .. اخذوني الامي ..
نعيمة .. اي هو هسا اخابرها ونمر ناخذها ..

راحوا للمستشفى واني مااعرف شنو اسوي بقبت بوضع لايحسد عليه ..
صارت عيني بعين ساهر ..
گتله .. والله… .. قاطعني ..
اششش لاتحجين .. تعاي بنين وديني للغرفه ..
نضراته عبالك يتهمني ومصدگ اني اسوي هيج.  حيل انقهرت . ماهمني اتهامات ايات وعمتي . بس نضرات ساهر مثل الخنجر وزرف گلبي… 
#بقلمي_الكاتبة_شمس
يتبع… ..
ملاحظة / بالنسبه لمسابقه اسوة .. صوتوا بالاستمارة الي باللون الازرق مو بالتعليقات ..
هلاو حبايب ..
اعرف راح تگلولي البارت قصير . بس هذا الي گدرت اكتبه لان اليوم عندي خطار ومالحگت ..

واكو شغله ثانيه .. احنه بالقصه ماننحاز الطرف ع حساب اخر ..
اني القصه دااسردها مثل ماوصلتني ..
تتصورون انه احنه مطلعين ايات ظالمة وانه ساهر منحاز الفجر .
لابلعكس .
اكو اشياء ساهر ماقبل يسردها بخصوص ايات لان ماراد يفضحها ..
ولان ايات تمادت وماتعرف تتصرف رغم هي معلمة وفجر مراهقة ..
بس ماگدرت تكسب گلب وحب ساهر . وصارت تتبع اساليب متخلفه وطفوليه ..
لهذا ارجوا عدم جرح الابطال وخلي تكون تعليقاتكم وانتقاداتكم معقوله ..
وهاي رد ساهر ع تعليق لفت انتباهة ..