رواية ساهر الفجر الفصل التاسع عشر 19 - بقلم الكاتبة شمس السعدي

مساء العسل لعيونكم حبايب… .
//// البارت التاسع عشـر ////
#ساهـر_الفجـر ..
#الكاتبـة_شمس ..

رفقاً ياليل بآهاتـي .. رفقاً بخاطري رفقاً بي ..
كم انت يالليل وحيدا ويتيما وحزين !!
فلما لاترفق بوحدتـي وبحزنـي وبالاشلاء الممزقـة داخلـي ..

آآآه ياجدتي وين انتي عني حتى الدنيا احسها غريبة دونج
بعد مارجعنا من النجف وصارت هوسة ايات .
رحت نمت وماگعدت للعصر ..

ردت اطلع شفت نسوان جايات ..
سلمت وردت اروح للمطبخ صاحت عمتي نعيمة ..
وج اوكفي روحي سويلنا جاي مو بس نايمة ليل ونهار .

باوعت للنسوان يباوعلي بنضرة ماتتفسر ..
الله اعلم شنو مسولفتلهن عني ..

دخلت المطبخ شفت بنين دتسوي جاي ..
گلتلها عمتي تريد جاي ..
بنين .. اي گالتلي وهسا اوديه ..

گعدت ع الكرسي يمها .. بين ماتودي الجاي وتجي
اجت ايات .. صح النوم يالعروس الفگر ..
اصلا هيج انقهرت منج وضجت..سهوري فهمني ع الموضوع كله . واخذج حتى يستر عليج وماننفضح .
وگال شلون تتوقعين اخذ مرة لامسها واحد غيري . بس اني سويت هيج حتى مايضيع تعب السنين ..

التفتت عليها .. ياتعب . اصلا ساهر مستحيل يگول هيج .
ايات .. ههههه ياغبيه انتي ماسألتي نفسج هو ليش ماانطاج الكيان وسوه هالمشاكل كلها ..

فجر .. گمت عنها لان مالي خلگ سوالفها ..
بس هي كملت كلامها وصدمتني ..

-مرة سمعته يحجي وي جدتج ويگلها الفلوس الي تعبت بيها والمحلات الكبرتها مستحيل تصير الكيان ..
واذا لزم الامر انهي عليها واگعدها هنا ولااخلي فلس واحد يروح للغريب ..

فتحت عيوني ع كبرهن .. انتي شنو هالكذب العندج . ماشفت انسانه تلفق وتحب المشاكل مثلج ..
مو عبالج مااعرف الي سوتيه ومنو الي اتفق وي كيان ..

هي ارتبكت بالبدايه ونكرت ومن مكرها گلبت الموضوع
-اي حقج عيني ماتصدگين وتشكين بالكل لان كيان خذلج   ولان ماتفهمين وبعدج صغيرة .دوووم ينضحك عليج ..
بس فكري بيها شويه . كم مشكلة صارت علمود سالفه الورث ومن خالج طلب حصتج شنو سوو عمامج وساهر .
انتي من كل عقلج يفرطون بالفلوس وينطوج الكيان .

فرت راسي بكلامها ودخت .. عمي اعرفه طماع ومايحبني بس ساهر لا مستحيل. 
ومن اتذكر الي سواه الافكار تشتتني وتاخذني الغير عالم ..

اجت بنين .. فجر فجر شبيج ..
-هاااا مابيه . ايات گامت .
-شگالتلج ايات وهيج گلبت وجهج .
-معليج منها هاي تدور مشاكل ..

تركت بنين ورحت للحديقه اشم هوا ..
وينج جدة مو راح اطگ وانفجر من قهري ..
ليش مااخذتيني وياج .
المن خلتيني هنا ..

طلع ساهر من المطبخ .. شافني .
ها فجر شنو هاي الدموع مو جدتي تتعذب هيج .
ادعيلها واقرأي قرآن الها بدل الي تسويه ..

مااهتميت الكلامة وهو يحجي ..
-فجر مو احجي وياج شبيج ..
-مابيه بس احس راسي يدور .. خليني ادخل .

ردت اگوم حسيت الگاع تفتر بيه ودخت . لزمني بسرعه ساهر ..
-شتحسين گولي ..
-ماادري يمكن هبوط عندي لان من گعدت هيج دايخة ..
-گومي خلي اخذج للمستشفى..
-ماكو داعي مابيه شي .
تركته ومشيت .. لزمني من ايدي وگال اوگفي هنا هسا اجي ..

بقيت منتضرة . دخل ورجع بيه عبايه اسلاميه .
هاج البسيها ع جسمج وخلينا نطلع ..

-وين؟؟ مااريد عندي دراسة وهواي فاتني ..
-مرة وحدة گوليلي اي من غير نقاش . يله ياعيني اني هم ضايج والبيت ماودي ادخله بعد جدتي . خلينا نغير جو ونرجع ..

كنت محتاجة اطلع واشم هوى .
باوعت الرجلي لابسه نعال ابو الاصبع ..
-گتله . باوع ملابسه حذاء . خليني البس.
-لا خليج هيج اصلا ماننزل من السيارة ..

رحت وياه ومحد يدري بينا بس بنين لان هي الي ناطيته العبايه ..
طلعنا ع طريق خارجي واني فاتحة الشباك واشم هوى اريد اشبع ريتي بالهوى احس روحي مخنوگة ..

ساهر .. اقفلي الجامة خلي اشغلج تبريد.
فجر .. لا الجو حلو واني اريد اشم هوى ..

واحنه نمشي خطر ببالي كلام ايات ..
ضجت حيل . اباوعله وهو يسوق كان عيونه تضحك قبل وجهه معقوله ساهر هيج لا مااعتقد .
ساهر اخر همة الفلوس . ايات ماتعرفة بگد مااني اعرفة ..

افترينا شويه واخذني المحل ملابس سود اخذلي دشاديش وتراكات وقمصان وتنورة وشال گال ملاحظ تلبسين دشاديش من بنين لان عريضه عليج .. بعدها رحنا اشترينا موطه . اكلنا ورجعنا . بالطريق
اتصل صديقة رعد ..
سولف وياه شويه وغلقه ..
ساهر .. رعد مرتة تعبانه حيل وبالمستشفى . 
شتگولين امر اشوفه ونرجع للبيت . مادام المستسفى بطريقنا وهم اجيك ضغطج ..

فجر .. بكيفك .بس شلون وهذا حالي .
ساهر .. مابيج شي تخبلين .
رحنا للمستشفى .. زوجة رعد مخليها بالطوارئ ..
دخلنا سلمت على رعد
وگتله .. حمدا لله ع سلامتها .
رعد .. شكرا خويه رحم الله والديج ..
خطيه رعد عيونه حمر يمكن الوضع مايطمن .
سبق وان سمعت من جدتي گالت مرت رعد عندها قلب .لان بيت رعد كانوا جيران بيت جدي وعلاقتهم قويه حتى من شالوا ماقطعوا تواصلهم ويانا وخاصه رعد وساهر مثل الاخوة ..

دخلت يم زوجة رعد .. مخليلها جهاز مال قلب وجهاز تنفس ..
خطيه بعدهي صغيرة وناعمة .. قهرتني .
تذكرت جدتي وبجيت مااتحملت .
اجت ام رعد طبطبت ع ظهري وتبجي وياي ..
وج يمة متت من سمعت الحجية ام محمود توفت . جانت خوش مرة ومعدله ..
انتي فجر الي ربتج هي مو ..

هزيت راسي اي .
-سودة عليه دوم وانتي صغيرة تگول اريد الله ماياخذ امانتي الا لمن تكبر فجر وتتزوج . تلگيها راحت وعينها عليج ..

مااتحملت منا البنيه حالتها حاله وامها تبجي عليها .
ومنا ام رعد تقلب بمواجعي وتذكرني بجدتي ..
طلعت شفت ساهر يم الباب .  گتله خلينا نروح .

سلم على رعد وطلعنا .  الطريق كله ابجي ماگدرت اسكت وساهر يگلي شبيج .
-مااتحملت من شفت البنيه خطيه بعدهي صغيرة .
-الله يشافيها خطيه رعد متدمر ..
#بقلمي_الكاتبة_شمس
………………………
وصلنا للبيت بعد المغرب ..
دخلت اني بالاول . شفت عمتي نعيمة مخليه اديها ع خصرها ..
-ولج يامامرباية . ماصدگتي عقد عليج وماخذته وتفرين بي . وين رحتي اخذج البيت الشقه. طبعا گمتي تحوسين شلون مااخذج رسمي تردين تبركسين براسة طفل حتى يتزوجج من صدگ . 
مو عبالج الوضع مثل قبل . جدتج وراحت خلصت عمري ساكته ومتحملتج من وراها .

اني صافنة ع كلامها الي ماشايفه اخسى منه . حتى فشار فشرت. 
وبنين تسكتها وهي تزيد .
الى ان دخل ساهر ..

-عفية بأم ساهر والنعم ماقصرتي . عندح بعد غلط وفشار گوليه مدامني واگف ..
خلينا نگول فجر ماتعرفيها وماربت ويانا هنا ..
اني ابن بطنج معقوله ماتعرفيني . لو اريد اتزوجها خايف من واحد.  من باجر اعلن زوجنا واخذها .
مامنتظر اتختل بيها وهي على ذمتي ..
كافي يمة ترى مليت . بعلي كرهت البيت من المشاكل .
جدتي ماصارلها اسبوع توفت . وانتي حايرة بالمشاكل .
هاي اني هنا هيج تسوين .
اذا التحقت بعد يومين شلون ..

روحي فجر الغرفتج .. واسمعوا كلكم .
منا وجاي فجر حالها حالجن . وحتى ايات وياجن .
تقسمن الشغل بينجن . وتخلنها تنتبه الدراستها لان هواي فاتها .
ايات .. يا اني وين اگدر حامل ..
ساهر .. امي حامل بينا كلنا وتشيل الزوالي وتفرش شو كلشي ماصار بينا .
ماگتلج شيلي ونضفي . ع الاقل اطبخي .

نعيمة .. اي الشغل مايتعب بس هي خطيه .. عود خليج بس الغدا اطبخيه لو اغسلي مواعين .وانتي واگفة .
وفجر عليها العشا ومواعينه ..
فجر ..خليتها تقسم بالشغل ورحت .. مايهمني كلشي بس يخلوني مرتاحة . دخلت للغرفه .

طلعت كتبي وگعدت اقرأ . لازم انجح هاي السنه . مابقى شي ع الامتحانات..

بقى الوضع مثل ماهو .. كل يوم عرك ومشاكل ..
وخاصه من يلتحق ساهر ..
احس الدنيا تضيگ عليه والكل ينهش بيه .
كنت اشتغل النهار كله حتى اخلص من الحجي وبالليل اقرأ ..
اروح للامتحان بالگوة افتح عيوني من النعاس .
كل هذا ومحد راضي عليه ..

صدگ كنت مدللة بحياة جدتي .. ااااه يمة كان محد يتجرأ يمس فجرج بكلمة . هسا بالثانيه اسمع الف كلمة ..

صار اربعين جدتي ورحنا زرناها .. نمت بحضنها وبجيت بس اريدها تگلي سامحتج وراضيه عنج .
حتى بأحلامي مانجيني .
اخر مرة اجتني قبل لتموت .. وبعد ماشفتها ..

من رجعنا من النجف بالطريق . عمتي ابتهال گالت . كيان شافلنا بيت ببغداد وراح نشيل لهناك .
فأذا تردون عجلوا بزواج لينا وماهر . لان اخاف نروح لهناك وكيان يعاند . هو من سمع لعب جوله وراد يجي لوما ابوه قنعه ..

فمن رجعنا للبيت عمتي نعيمة قلبت الحجي .. وگالت ابتهال تگول راح نشيل ونروح البغداد وكيان مايقبل ينطيها اللينا ..

فار دم عمي وماهر يتعود الى ان فهمتهم بنين وشرحتلهم الي گالته عمتي ..

ساهر .. خلص انطي خبر العمتي الاسبوع الجاي نسوي تتزوجون بسكته وترحون لايران يم عمي محمد ومريم .
اخذولكم عشرة ايام وارجعوا ..

ماهر .. مالحگ لازم التحق واخذ اجازة بدون راتب لان اكيد ماينطوني وماصار هواي من اتعينت . واسوي الجوازات ونفيز .هواي شغل
ساهر .. رهمها واخلصوا بسرعه اذا طالت مو حلوه .
واذا ع الجوازات هينه اني عندي معارف ونخلصها بسرعه

ماهر .. بنين هاج هاي الفلوس.  وروحي انتي وامي البيت عمتي انطيهن اللينا وخليها تشتري ذهب واحتياجاتها .

ساهر .. بس گليلها تستعجل لان وراهم سفر .وانت ماهر روحوا اعقدوا باجر وسوو الجوازات فد مرة .

خلال فترة قصيرة ماهر ولينا كملوا شغلهم كله ..
وساهر التحق مااجة الا قبل زواجهم بيوم .
ماسوينا حفله ولازفه ..
بس اخذناهم للفندق ..وثاني يوم طلعوا الايران .
فرحتلهم من گلبي .
الكل نزع الاسود بعد الاربعين . الا اني . مستحيل انزع حزني وحدادي على من ربتني وتعبت عليه ..

بعد زواج ماهر بيوم .. اجة ساهر يركض بدل ونزل ..
گالها يمة . رعد زوجته توفت اخذي البنات وعماتي وروحي اني راح امشي وياهم للنجف ..

انقهرت حيل وخلصتها بجي .. لو ادري ماشايفتها.  لسا صورتها ببالي وشلون نايمة وخصله من شعرها طالعه .وهي بيضه . اوووف متت قهر عليها .
ومن عرفت ولدت ابنها وتوفت . اتهسترت اكثر .
مقسوم اله يعيش يتيم ويضوگ لوعة اليتم والناس الماترحم ..

گمت ادعي ليل نهار الله يحنن الگلوب عليه ومايصير بي مثلي ..

بنين .. الى متى تبقين هيج فجر .كل الميت تبجين عليه ..
فجر .. وج بنين لو شايفتها تخبل . ودور خلت ابنها بلا ام شراح يصير بي هسا منو يربيه ..

بنين .. اي من رحت وي امي شفته جدته مخليته بحضنها يخبل وبس يبجي عبالك گلبه حاس امة ميته ..

فجر .. وتلوميني لان حزنانة لسا ع جدتي . وهو طفل مايفهم وحزنان ويبجي على امة ..

بنين ..  الحزن مو بالاسود فجر انتي حتى الاكل گطعتيه  وضعفانه وين جنتي شحلاتج .  والامتحانات دمرتج هم .

فجر .. المن اعيش والمن اسمن واكل متشوفين ماالي احد وجاي واضحك واسولف ومستمرة بالتمثيل حتى اگدر اعيش بيها .

بنين .. لاتحجين هيج . بله باعي . اني وساهر ولينا راح تنظم الفريقنا . ومريم هم راح يرجعون .
ودور يكبر حزبنا هههههه بعد شتردين ..

ضحكتني من گالت يكبر حزبنا ..
فعلا البيت صاير عبارة عن احزاب . وخاصة بعد وفاة جدتي ..
راح يصيرلها شهرين واني احسها سنتين ..غيابها مااثر يمكن بس عليه ..

ساهر بين الشغل والداوم .. مانشوفه هواي .
ومن يجي يمي او يسأل عليه لازم تصير مشكله ويترك البيت ويطلع ..
يروح يم رعد .. خاصة بعد وفاة مرته ساهر يخلص اغلب الاحيان يمة لان رعد بحالة صدمة ومتأذي حيل ..

مرات ياخذنا يم ام رعد اني وبنين وعمتي نعيمة . الطفل يخبل وصغير حيل . لو ماعيب اگلهم نطونيا اني اربيه ..

استلمت النتيجة ناجحة ويمكن هذا الشي الوحيد الي فرحني ..
اول مرة اتصل على ساهر وابشرة ..
من رد عليه متفاجأ ..

-فجر ؟؟ خير بيج شي .
-ههههه شبيك مايصير اخابر يعني .
-لا بس فاجأتيني مو من عوايدج ..
-اي ردت اگلك نجحت لان ماعندي احد يفرح النجاحي ..
-عليج الله . احلى خبر.  والله هسا احنه راح نروح الكمين ومتحضرين . والعمليه صعبه لان اكو مجموعه من الحشد محصورين يم داعش ولازم نحررهم .
بس اتصالج فرحني ونجاحج فرحني اكثر ..
-شكرا دير بالك على روحك ..
-اني الي لازم اشكرج لان سمعتيني صوتج قبل مانروح نهجم ..
خجلني لهذا سكتت .
صاح فجر ..
گتله .. ها.
-ادعيلي واتذكريني دوووم لان من تذكريني احس بداخلي وارتاح ..
سلمت عليه وغلقته .. قلقني من نبرة كلامة .. وخفت عليه ولاول مرة افكر بساهر هيج .
طول الليل مانمت . صليتله وقريت قرآن اله ..واندعيت .
من ماتت جدتي مابطلت صلاة الليل لان كانت تصليها دايما ..

اتصلت عليه مغلق .. اووووف ماگتله من يرجع يطمني .
نمت للصبح سمعت اصوات وهوسه .
فزيت مرعوبه .
صار ببالي ساهر . خفت صار بي شي.

ركضت للصاله شفت ماهر ولينا وعمو حمزة ومريم جايين والتحاليل ايجابيه وفرحانين لان مريم حامل ..

ركضت حضنتها وابجي. 
فرحانه الخبر حملها .
وفرحانه لان كنت متوقعه ساهر بي شي .وهمزين ماصار الي خايفه منه .

لينا .. واني ست فجر مااشتاقيتي الي . حضنتها وبيومها صدگ ارتاحيت.
اجتمعنا وسوالف وضحك .
وساعة مريم تتذكر جدتي وتبجي لان كانت تحبها .
الدكتور مانعها تصعد لفوگ الى ان تخلص الاشهر الاولى من الحمل ..
لهذا حولوا غرفة عمو محمود لفوگ .
ونزلت مريم وعمو حمزة بالغرفه الي يمنا .
يعني راح ارتاح من عمتي نعيمة الي كل شويه داخله وتحجي علينا .

طبعا هي بالگوة قبلت يصعدون غرفتها فوگ . بين الهوسة واليوم كله نرتب بغرفة مريم .
وانشغلنا بعروستنا لينا والخطار الي يجي .
نسيت ساهر . ومااتصلت عليه ..

لليل ذكرت .. واني گاعده يم مريم ويمنا بنين جاي تسولفلنا ع ايران والعلاج مالتها .

اما ماهر وزوجته من المغرب صعدوا هههههه .

مريم .. وج شعندج بالموبايل . صار ساعه نسولف وانتي مو يمنا ..
فجر .. جاي اتصل بساهر مااحصله ..
بنين .. اوي عيني شنو غمزت السنارة والگلب رف.
فجر .. لا هاي شبيج.  بس البارحة گال راح نطلع الكمين وگال ادعيلي وبقى بالي يمة .
وكلما اتصل عليه مغلق ..

بنين .. وليش ماگلتي .
فجر . شمعرفني هو مو كل مرة يگول سوينا كمين وهجمنا وكذا والحمد لله ماكو شي .
بس هالمرة ماادري ليش مامرتاحة ..

بنين .. اووووف خليني اروح الماهر يخابر رعد ويشوفه . مريم . وج ماهر خطيه هو ومرته هسا وجاين من السفر تعبانين .
بنين .. جا شأسوي قابل اگعد ابوي وهو نايم حتى يوگف كلبه .

خابرنا ماهر گلناله انزل ..
نزل وخبرناه عن ساهر تخبل وبقى يحجي عليه لان سكتت . اعرف كل سالفه لازم توگع براسي ..

ماهر اتصل على رعد .  گاله هسا اشوف وارجعلكم هبر .
وماهر ماسكت هم اتصل على جماعته ببغداد يستفسرون اجة عمو حمزة شافنا مخبوصين .
گلناله ساهر مختفي وجهازة مغلق تخبل .
البيت انگلب .
حتى عمو وعمتي نزلوا ..
ايات همزين مموجودة عند اهلها . جان هسا خلت الذنب كله على راسي ..

بيومها مانمنا والكل يدعي . رحت صليت وادعي وابجي .
ربي بقى بس ساهر سندي لاتحرمني منه .
رجعه بالسلامة ياالهي .
ماعندي غيرة ..

گمت اتذكر كلامة وشقاه لو من كنت صغيرة شلون كان يشيلني ع ظهرة من تمطر ويركض بيه.
هواي اشياء اجت على بالي ..
ااااه يساهر . شلون اوفي حقك واني الي خذلتك . مشيت ورى گلبي الي وگعني بمصايب .
بينما كانت اكو جوهرة گبال عيني ماشفتها ..
او گلبي عماني عنها ..

النص الليل اجه اتصال الماهر گلب الموازين وخلة بيتنا انگلب عزاااا .

صاير اشتباكات بين الحشد وداعش واكثر من 33قتيل وجريح من الحشد ..
عمتي بقت تعيط وتبجي ..
وعمي وگع واتخربط ..
والولد بقوا ع الاتصالات مايعرفون وين يرحون والمن يسئلون ..
ساعتها عرفت انه اني منحوسة من صغري ..
ليش الحياة ضدي وتحب تاخذ كل عزيز وغالي عندي ..
اهلي وجدتي وهسا ساهر ..
ليش مامقسوملي ارتاح واستقر واعيش حالي حال الناس ..

رفقا بي ايها البعيد ..
فأرجوك لاتطل الفراق ..
فبعد غيابك اصبحت بلا قلب.. بلا اسم.. بلا عنوان..
فأين اجد من يحبني مثلك
وأين اجد من يرسمني مثلك
فأنت كنت في الدنيا املي الوحيد
فأرجوك لاتطل المغيب .. وعد الى قلبي حبيب ..
#بقلمي_الكاتبة_شمس
يتبع……… .

االفيديو. كالعادة للمصممة المبدعة R--o--n--a--k