رواية ساهر الفجر الفصل الثاني والعشرون 22 - بقلم الكاتبة شمس السعدي

اسعد الله مسائكم بكل خير احبتي 💕
//// البارت الثاني والعشرون ////
#ساهـر_الفجـر ..
#الكاتبـة_شمس ..

من الصعب ان توجه اليك اصابع الاتهام وانت بريئ مما افتروا ,,,,,,
والاصعـب .. أﻥ يخذلك من تحب معهم ﻓﻲ ﻧﻔﺲ ﺍﻟﻮﻗت
ﻭ ﻛﺄﻧﻬﻢ ﻛﺎﻧﻮﺍ ﻋﻠﻰ ﻣﻮﻋﺪ ..!!

كان شعور لايحسد عليه .. واني اشوف الكل عيونه تتهمني ..
براء تگلي .. معقوله توصل بيج الانانيه تتخلصين من الطفل الي هو الامل الوحيد الساهر .. الله العالم اذا يصير عندة بعد او لا .

تعجبت الكلامها .. وكأنه اني اغار من طفل بريئ لسا مااجة للدنيا ..

نزلن دموعي ..
مريم .. براء شنو هذا الحجي . وبعدين منو يگول الطفل بي شي . ليش مفاوله عليه .

اجت بنين .. فجر شلون وگعت ايات ..
فجر .. واني شدراني .. اصلا مو يمها . جاي اغسل بالصاله ودايرة وجهي انشف المي .
وهاي مريم غرفتها مفتوحة وگاعدة گبالي ..
اشو فجأة سمعت صوت وعياط .
ولگيتها نايمة ع الگاع وتگول فجر وگعتني . اصلا ماوصلت يمها ..
وحتى ماسمعت وگعتها .

بنين .. الله اليستر ومابيها شي .. والا حتى اذا مو انتي راح تفرها وتخليها براسج ..

اني من القهر والهبطه ماگدرت اكمل البيت .
بنين ولينا كملن تنضيف ورتبنه ..
اني گعدت يم مريم بالغرفه ..
واسمع ساهر يخابر بأمة .. ويعيط ..

لزمت گلبي وادعي ربي مابي شي . ربي لاتختبر صبري بهذا الشي ..
الخاطر ساهر ياالهي هذا الطفل امله الوحيد ..
بين دعوات وبواجي ..

دخلت عمتي تبجي ومبين معصبه حيل وضايجة ..
وطلعت هالضوجة بيه ..
الله لينطيج يالفگر من شفتج ماشفت الخير .. ولج ضيعتي فرحتنا وفرحة ساهر ..
منو يگول بعد يصير عنده .كل احنه متأملين بهالطفل ..

وتدگ وتلطم .. لمت البيت كله ..
ساهر بالغرفة .. صاح يممممة شكو.

راحتله تبجي وتگله راح ماكو طفل يشيل اسمك بعد وتبجي ..
اني من الصدمة بس دموعي تنزل ومااعرف شأسوي ..
براء .. الله ينتقم منج ان شاء الله.
الكل كانت نضراتها عليه ..
والكل مصدگ اني الي تعمدت وخليتها تتزحلگ .
بنين بس ساكته ومخليه اديها ع خدها وضايجة ..
محد بيهم دافع عني وگال مضلومـة ..
حتى وان ماحجوا بس نضراتهم وسكوتهم يعني انهم مصدگين بهذا الحجي ..

خلص كافي لازم احجي مااسكت خلصت عمري ساكته والكل ينهش بيه ..
ماهي جدتي الي تدافع عني .. تركتني بيد الي مايرحمون ..

دخلت شفت ساهر عيونه حمر ويضرب بإيده ع الحايط ..
ويگل الامة .. هي ثوله من شافتهم يغسلون البيت ليش نزلت ومانزلت على كيفها ..
عمتي .. والله تگول نزلت على كيف بس فجر شمرت السطل بي مي وزاهي جوه رجلي ونعالها اسفنج زلگت ..
فجر .. لا كذب مو هيج . اصلا اني جاي انشف بالمي بالماسحة وماشمرت لازاهي ولامي من نزلت واصلا ماشفتها من نزلت . كافي تفترون عليه .
خافوا الله ..
نعيمة .. ولج انتي تعلمينا نخاف الله . ماخفتيه من قتلتي طفل صغير . وماله ذنب .
ولو تعودتي تقتلين الناس وتبجين عليهم .
اهلج وجدتج وابن ساهر ..
شأتوقع منج بعد ..وجودج صار خطر علينا كلنا ..

تخبلت من گالت هيج وتهمتني بقتل اهلي وجدتي والطفل ..
اتهسترت وبلا وعي حجيت كل الي بگلبي ..

-انتي مرة شكبرج وتنافقين الله وتكذبين . تدرين مو اني الي سويت ذولي كلهم بس تتعمدين تحجين اعرفج تكرهيني بس مو الدرجة تلفقين عليه تهم ..وبعد مااسمحلج تحجين عليه بأي كلمة لاانتي ولاغيرج ..

ساهر .. فجر روحي ..كافي حجي .
فجر .. گدرتك عليه .. صار ساعه ماخلت شي ماحجته عني وتهمتني دافعه ايات وتدرون كلكم ايات ماتحبني ..الله يشهد شگد دعيت الطفل مابي شي . علمودك انت ردتك تشوفه وتفرح بي .
وتالي تسكتني وماتسكتهم من يحجون عليه .

ساهر .. فجر گتلج روحي طالعه ومالي خلگ سدن الموضوع واطلعن بره ..
فجر .. ججايه وحدة واطلع .. انت مصدگهم . مصدگ اني الي دفعت ايات ووگعت الطفل ..

ساهر .. الخاطر محمد كافي .. ولكم اني وين وانتن وين مافگرنا بس مشاكلجن ..
واذا ع الطفل الله ماقاسملي يصير عندي وهذا قضاء وقدر مااريد اي كلمة بعد ..
فجر .. جاوبني على سؤالي ساهر .. انت مقتنع اني الي دفعتها ..
ساهر .. فجر شتردين .. ماتحسين بيه . ارحميني عاد واطلعي مااتحمل گتلج ..
فجر .. خلص ساهر راح اطلع وارحمك .. بس يجي يوم الي تندمون كلكم ع الي سويتوه بيه ..

طلعت ودموعي بعيني .. هو سند وگام على ايدة يريد يتكة .. تعاي شنو قصدج تهدديني فجر وينج ..

خليته يعيط وتعصب وضرب الغراض اليمة .
ويمكن طلع القهر الي بداخله كله بذيج اللحظة ..
راح ماهر يركض اله ..

نعيمة .. الله لاينطج خبلتي الولد ..
قاطعتها .. ورفعت اصبعي . اشششش رحمة الأهلج ماكفاج ظلمج الي ارحميني عاد ..

اجة عمي من وراي ولزم اصبعي لواه حيل كتمت وجعي وصوتي وخليته بداخلي .
ماردت احد يشوف ضعفي وانكساري .
وهو لاوي اصبعي .. سحبني بالاستقبال ..
-ولج انتي المفروض ادفنج من زمان واخلص منج ..
بوكاحة عين ورافعه اصبعج وتهددين وانتي حرمتيني وحرمتي ساهر من ابنه . والله اليوم محد يخلص مني ..

لوى ايدي حيل حسيتها رادت تطگ ..
عطت صوت من الوجع يمكن الشارع كله سمعه ..
صحت اااااااخ يااااابة الحگني ..
#بقلمي_الكاتبة_شمس
................................. ..
البنات يدگن بالباب يردن يدخلن وهو قافلها ..
وي العيطة مالتي اغمى عليه من الالم ..

صحيت على لينا تگعد بيه .. ودموعها تنزل عليه ..
وماهر يگلها .. لبسيها اي شي خلي ناخذها للمستشفى .
گومني واني ابجي بلاصوت من الالم ماينحمل وايدي بسرعه ورمت .
صارت عيني بعين ساهر .. گال شلونج هسا ..
درت وجهي عنه ومشيت ..

بداخلي ( حتى انت الي ردتك اماني وسندي بعدتني عنك باول الم الك .. هجرك الي خلاهم يستقون عليه ويظلموني )

سمعتة وراي يعيط على ابوه وتعاركوا .. بس المي كان اقوى من تفكيري بي او بيهم ..

رحنا للمستشفى سوولي اشعة كال اصبع السبابة مكسور ويرادله تجبير ..

جبروا ايدي واني ابجي ..
كملوا گال ماهر . روحي انتي ولينا گدامي للسيارة هسا اجي ..
لزمتني لينا من ايدي وتمشي ..
گالت .. فجر انتي شنو الجابرج تتحملين هالضيم وهذا الوضع ..
ماعندج هنا اي احد جدتي وراحت . وساهر جاي تشوفين حالته الصحيه والنفسيه وماطايق اي احد ..
بعد ع شنو متأمله وباقية ..

ضحكت بأستهزاء .. ماتگليلي هو منو الي واروحله ..
لينا .. ليش تگولين هيج .. عمو زياد يحبج . وگلج روحي وياي .. وانتي عمرج 18 وتگدرين تعتمدين ع نفسج وتاخذين حصتج وتكملين دراسه وتطلعين وياهم للسويد.
اصلا البيت ماينطاق من المشاكل .. وحتى ماهر گال يشوفلنا بيت وننتقل البغداد لان دوامة هناك ومايريد يبقيني وحدي هنا ..
ومن نستقر تعالي عيشي ويانا اني وماهر ..
فجر .. لينا والله خيالج واسع .. اي حصة ترديني اطالب بيها .. كلشي مااريد منهم . ردت حبهم وحنانهم واسترخصوه عليه . بعد مااريد شي منهم ..
وصدگي بس اطالب بشي . عمو اهون عليه يدفني او يتهمني بشي ويضيعني ولاينطيني فلس ..
وانتو شوفوا حياتكم . وزين تسوين وترحون منا. لان فعلا البيت بعد جدتي ماينطاق ..

اجة ماهر سدينا الموضوع ..گال يله اصعدن ..
رجعنا للبيت وهو الطريق كله يهون بيه .. ويصبرني . بس هالمرة جرحي اكبر . تعبت وماعاد اتحمل ..
وكنت باقيه عمود ساهر ..
هسا ساهر استغنى عني وكبريائة يمنعه يتقرب مني ..
واكيد اهله كلهم يمة ومابحاجتي ..

رجعت مجبرين ايدي . تلگتني مريم وبنين بوسوني ..
بعدت عنهم وگلت المريم ..
اريد انام بغرفتج ..
گالت اي تعاي ..
دخلت نمت اجت بنين .. فجر شبيج اشو مثگله وجهج عليه ..
فجر .. بنين ماكو شي بس ايدي توجعني وتعبانه اريد انام ..
تركتني وطلعت ..
بيومها ماطلعت ابد . وحتى ساهر .. شگد تمنيت يسأل عليه لو يجي يشوفني .. لكن خيب امالي ..

بقيت اتگلب بمكاني ومااگدر انام . بس من واحد يدخل اسوي نفسي نايمة ..
سمعت عمو يخابر بعمتي بتول . ويگلها اخذيها فترة يمج مااتحمل اشوفها بالبيت ..
ويمكن كان متعمد يوگف يم الغرفه ويحجي حتى يسمعني .. قهرني حيل ..

طلعت موبايلي واتصلت على خالو زياد ..
-الو خالو اني فجر ..
-هلو خالو حبيبتي شلونج . صحتج شلونها .
-اني... . نزلت دموعي مااتحملت . گتله خالو مختنگة محتاجتك ..
-ليش تبجين خالو منو وياج احركو الي ينزل دموعج . يول كسرتي گلبي ..
-خالو انت موگلت تعالي وياي .. بعد تريدني او لا .
-اي خالو بأي وقت عيوني الج ..
-خالو هنا تعبت والكل مايريدني تعال اخذني ..
-صار تدللي باجر اني يمج ..
-لا مو باجر . خليها الجمعه تعال اخذني ..
-خلص خالو بعد يومين اني يمج ..

غلقت الموبايل وگمت ابجي بصوت ردت ارتاح .. اجة الوكت الي لازم اختار طريقي .. ماانكر مشاعري اتجهت الساهر وردت اتقرب اله واساندة .
بس هو بعدني عنه .. ومااتقبل وجودي وقربي اله ..

ماحسست احد انه اني راح اروح وي خالو ..
وتعاملي جاف مع الكل ..
حتى مااكل وياهم . مريم تجيب غدا ونتغدا سويه اني وياها ..
هاجر اجت تبجي يمكن امها گالتلها والله اعلم شنو وصلتلها ..
لان گاعد اتعشا ودخلت تعيط .
ياعار شوكت نرتاح من شكلج . شگد كنت استخطيج من انتي صغيرة واگول مضلومة بس طلعتي شيطانة ماادري ربينا حية ببيتنا ..
وج شنو ذنب اخوي يبقى بلا طفل . مو حرام عليج .
والله لو اعرف انطيه الطفل الي حامل بي ولااخليه بلانسل ..

هاجر حامل صارلها كم شهر ومخبيه حملها عن الكل حتى ماتسمع مريم وتحسدها .. هذي وصية امها ..
كنت احبها حيل . بس شويه شويه گمت اضوج منها وعلاقتنا خربت نهائي ..

گلتلها هاجر .. اطلعي منا .. روحي فرغي سمج بغير مكان ماناقصتج .. كافي الي سواه ابوج ورفعتلها ايدي .

ضحكت وگالت قليل عليج هذا .. وطلعت .
مريم .. گالت معليج بيها اسكتي ..
فجر .. هو شعندي غير كلمة اسكتي ..
بنين حست بروحها ظلمتني . وتحاول تحجي وتصحح خطأها ..
بس اني ماكنت بالمزاج الي يسمح احجي وي احد ..
بس اكتفيت بكلمة . بنين اني مااضوج من اي احد اذا اذاني ..
بس اضوج من الي احبهم ويحبوني .. لان نضرتهم تهمني اكثر من غيرهم ..
ثاني يوم ماالتقيت بساهر بس مرة وهو بالحديقه مخليه گال .. فجر شلونها ايدج ..
گتله زينه وتركته ودخلت .. ماردت اشوفه واضعف واتراجع ..
عمو حمزة وماهر راح ياخذون ساهر باجر البغداد الدكتور يشوف حالته ويسوي تقرير ويدزه الدكتور لاهند حتى يسافرون ..
لليل لميت غراضي كلها وملابسي ..
ودزيت رساله الخالو ماينسى باجر ..
وهو اكدلي انه راح يجي الصبح ..
#بقلمي_الكاتبة_شمس
..........................................
نمت واول مرة احلم بجدتي .. وهي تبتسملي گاعدة ع طرف السرير ..
طفرت وعيني ع المكان الي شفتها بي .
اااااه يبعد روحي ماشفتج ولااجيتي الي الا لمت قررت اروح ..

طلعت اشرب مي .. واخذتني رجلي الساهر ..
عمو نايم يمة ..
بقيت اتأمل ملامحة .. راح اشتاقلك ..
اتقربت . بست گصته وطلعت ..

ساهر .. اعرف ظلمت فجر . ولاول مرة احس روحي عاجز ومادافعت عنها . رغم ماعيطت وتعاركت وي ابوي لان كسر اصبعها ..
بس ابوي حس بعجزي .. وشبه عايرني . حير بنفسك ومعليك بهاي اني اربيها .. هنا حسيت بذله وانكسرت فعلا ..
يومين وفجر ماتحجي وياي ومن اسأل عليها ترد بثگل .
بس بالليل بين نايم وگاعد .. شميت بريحتها وهي واگفة وتتأملني ..
جسمي كله انتعش بنضراتها .. بس ماادري نضراتها حب لو شفقه ومكسور خاطرها عليه ..
اتقربت تكثر وطبعت شفايفها بگصتي وراحت ..
ردت الزمها واطبع حبي وانتضاري بشفافها .. بس عجزي منعني وبقيت امثل اني نايم .
طلعت عني وانقبصت روحي ببعدها ..
يمكن رادت تودعني لان راح اروح البغداد اكيد كبريائها يمنعها تسلم عليه وجها لوجه ..

فجر .. رجعت للغرفة ومنتظره الصبح يطلع ..
صار الفجر والكل گعد وبدأت هوستهم واني مسويه نفسي نايمة ..
كملوا وطلعوا عمو وساهر وماهر ..
ودعته بگلبي ودعيت اله ..
رجعت مريم .. گلتلها طلعوا .
-اي لعد اذا گاعده ماگمتي ودعتيهم ..
-لا هستوني گعدت ..

بقيت شويه اتگلب وكعدت وغسلت وتريكنا اني والبنات وعيني ع الساعة اشتغلن وكملن وماكو صوت الخالو ..
ضجت حيل وبداخلي اگول يمكن تراجع او زوجته ماقبلت خلي بعد مااخابره ولا احرجة . الظاهر مقسوملي اعيش بهذا الظيم ..

للظهر وي الغدا وعمو محمود هستوا اجة هو وعامر ..
اندگت الباب مااعرف ليش گلبي انقبض ..
اجة عامر . گال هذا خال فجر زياد ..

محمود .. اي خليه يجي اهلا وسهلا .. مااعرف ليش اول مرة عمو يحب شخص ..

دخلوه للاستقلال. باوعتلي لينا . هزيتلها براسي .
اشرتلي اگوم ..

دخلنا للغرفه ..
-معقوله فجر سوتيها صدگ . يعني راح ترحين .
-اي لينا خلص قررت . خليني اجرب ع الاقل . مومجبورة اخلص عمري كله هنا ..

اجت بنين گالت فجر ابوي يريدج ..
رحت للاستقبال سلمت. ع خالوا ..
عمو وعمتي بعيونهم فرحة ويمكن اعرف سببها ..

محمود .. عمو فجر خالج يريد ياخذج يمة ويگول مستعد اتكفل بيها شتگولين انتي ..

بسهوله ومن غير تفكير .. گتله اي اروح واني الي گلت الخالو ياخذني ..

من غير ماتنتظر اي كلمة منه ولو اعرف مايطلع منه كلام حلو ..
گتله خالو لحظة بس ابدل وتجيب جنطي واجي وياك ..

بنين لزمتني وتتوسل .. لا فجر . لاتسويها . ساهر يموت ولج فكري بي . وج الي مصبرة ع مصيبتة وجودج يمه . حرام عليج تغدريه هالشكل وترحين ..

فجر .. ومو حرام حياتي وطفولتي الي خلصتها يمكم بالظلم والضرب والخوف ..
ليش لازم فجر تفكر بالكل ومحد يفكر بيه ..
لاتخافين ساهر هو يريد بعدي والدليل من اتقربت اله ابتعد وصدني ..
هيج احسن للكل .. عندة اهله وزوجته مابحاجتي ..
خلوني اشوف مستقبلي وحياتي ..

نعيمة .. خليها ولج واخيرا حست على روحها وتفكنا من فالها الفگر ..

مااهميت الها . رحت بدلت وودعت مريم ولينا وبنين واخذت غراضي .
واجة خالو ساعدني لان مااگدر من ايدي ..

طلعت وعيني ع البيت .. مع السلامة جدة . انتي احلى ذكرياتي بهذا البيت وبعدج ماعاد يهمني ..
ساهر سامحني وربي يعوضك بالاحسن ويشفيك ربي .

ركبت يم خالو بالسيارة .. بعد ماخله الغراض بالجنطة .
عمو وعامر واكفين بالباب .
دگ عامر الشباك فتحتها .. گال ديري بالج ع نفسج وهنا هم بيتج واحنه اخوتج اي شي تحتاجيه گولي .
هزيت راسي وگتله شكرا ..
صارت عيني بعين عمو... ردت اي اشارة حزن او ندم لكن لاحياة لمن تنادي ..
رفعت الشباك .. وصعد خالو ومشينا .. ومن غير ماالتفت الورى ..
اعتبرتها صفحة وانطوت من حياتي ..
ولازم اباوع المستقبلي ودراستي ..واخلق فجر جديده خاليه من الضعف والانكسار ..
#بقلمي_الكاتبة_شمس
يتبع.......