رواية ساهر الفجر الفصل الثالث والعشرون 23 - بقلم الكاتبة شمس السعدي

بمناسبة وصول الرواية للمرتبة الاولى .. شكرا لكم احبتي لدعمكم ومساندتكم ..
//// البارت الثالث والعشرون ////
#ساهـر_الفجـر ..
#الكاتبـة_شمس ..

طول الطريق مابطلت تفكير .. ماانكر القرار الي اخدته صعب عليه ومايهون عليه اترك ساهر بهيج ضرف ..
بس تعبت واني اصبر نفسي واقنعها بان يجي يوم ويتغيرون عليه ويحنون ..

ياترى غيابي راح يأثر عليهم .. او يفتقدون وجودي وساهر شنو راح يكون ردة فعله اذا عرف ..
راح يقدر وضعي لو راح يحكم عليه وينسى العذاب والظلم الي تعرضلته ..

ساهر ..
بقينا اليوم كله ببغداد ..
لان طولنا فحوصات وتحاليل ورنين ..
والعصر رجعنا للعيادة ..
لهذا اضطرينا نبات بالفندق ..
ثاني من الصبح رجعنا .. وراح نبقى وي الدكتور على تواصل ..

دخلت للبيت تعبان .. اهلي كلهم تلگوني وامي تگلهم اخذوه للغرفه خلي يرتاح ..
بس عيوني كانت تدور فجر ..
اشتاقيت لعيونها ..
ريحتها بخشمي لسا من تقربت عليه وباست گصتي ..
اتمنيت احضنها واشمها ..

ساعدوني عمي وماهر ..
باوعت البنين .. گلتلها فجر وين نايمة بعدهي ؟؟

بنين بتوتر .. هااا فجر ..
-شنو ها .. فجر وينها شبيها گولي ..
باوع عمي حمزة وگال ..
شبيجن. ماتحجن ..

اجت امي تركض .. يمة فجر ورى ماطلعتوا لگينا خالها جاي فجأة وگال تريد اخذ فجر وهي لامة غراضها وطلعت متفقه وياه ومن غير ماتاخذ رأي واحد راحت وياه ..

ساهر بأستغراب .. ياخالها ووين راحت .
نعيمة .. خالها زياد هذا الاجة من الخارج . يمكن لعب بعقلها وهي ماصدگت لمت غراضها وراحت ..

-يمة لاتخبليني .. شسويتوا وراحت البنيه فجر لو تموت ماتطلع منا ..
احجي بنين فجر ليش راحت وانتي تدرين ..

بنين .. لا والله خويه ماادري هم تفاجأت بس هي من يوم وگعت ايات وابوي كسر ايدها . ابتعدت عنا وماتحجي وي واحد وعازله روحها .. والصراحة حقها

ساهر .. ولج شنو حقها واني شنو هنا گاعد شلون تطلع بلا اذني وابوي وين عنها ..

نعيمة .. يايمة ابوك صاحها للاستقبال وراد يقنعها واعتذر منها بس هي قافله الا اروح وي خالي وماسمعت من واحد بعد شنسوي ..

-اااااه يفجر ..حتى انتي ليش ليش .. وضربت على رجلي معقوله عجزي السبب . هيج ملت مني وانهزمت .
ماگدرت تنتضرني اطيب ونبدي حياتنا من جديد .
ليش ماعندي حظ وي النسوان ليش ياالهي ..
ذيج بقت تلعب وتدور حيل لمن وگعت الطفل وراحت الاهلها وعافتني ..
والثانيه بنت عمي والي ربيتها على ايدي ماصبرت عليه وراحت ..
ليش ياالهي بعلو صوتي ..

ماهر حظر السيارة وشوف مرتك تجيبلي عنوان زياد وين ..
ماهر .. ساهر تحجي صدگ اعقل . نسيت الدكتور يگول مايصير طريق طويل وسفر وانت البغداد تعبت وتخربطت .
ساهر .. ولك شلون تريدني اعوفها هناك مادامها على ذمتي حتى لو بس ع الورق ماتطلع الا بشوري ..

نعيمة .. يمة شمالك تركض ورى زعطوطه . هي لان تدري ماتتحمل عليها هيج تسوي وتدلل . حير بروحك وعلاجك وهي اول وتالي ترجع منو يتحملها ..
شفت ذاك خالها شلون جان طمعان بيها هو وابنه وبعدين تخلوا عنها ..

-يمة ماناقصج اطلعي الخاطر ربج . محد شردها غيرج ..
-اي هاي البقت تتهمني دور . اذا هي ماكو احد يردها اني شعليه بيها . لاابو ولااخو بكيفها تروح وترجع .
خليها عند خالها وخلي تشوف عازتنا شلون ..

مااهتميت الحجي امي .. گلت البنين . خابريها وانطيني الموبايل ..

بنين .. دگيت شگد عليها ماكو مغلق..
صحت ليناااا ..
اجت تركض .. خابري عمج وانطيني الموبايل ..
خابرت وانطتني الموبايل ..
گتله اني ساهر .
ولو اني مالي حجي وياك .. لان اجيت واخذت مرتي من غير علمي وشجعتها حتى تطلع من البيت ..
انطيني فجر اريد احجي وياها ..
زياد .. فجر ماهي طلعت وي البنات يتسوگون ..
ساهر .. بس تجي خلي تخابرني ولو ادري بيها يمك بس گللها خلي تخايرني احسن الها ..
وسديته ..

صرت اعصاب وگمت اعيط ..
يمة خابري ايات خلي تجي ..
بسرعة مو تتماوع وتبقى شهر عند امها .
خلي تجي .. كافي تساهل .
بعد مااتساهل وي اي احد ..
واطلعوا عني ..

بنين .. خويه اهدأ فجر بس ترتاح كم يوم وترجع ..
ساهر .. اطلعي بنين .. اني هم الي مايريدني مااريده بعد . خلصت عمري اركض وراها واطلب رضاها شحصلت منها غير الجفا والهجر ..
#بقلمي_الكاتبة_شمس
……………………………… .
فجر ..
من وصلنا البيت خالو كنت متردده ومااعرف اذا راح يستقبلوني او لا ..
ياترى هم راح اعاني مثل ماعانيت من مرت عمي وبناتها..

نزلنا يم شقة ارضية حلوه واصلا اربيل كلها تخبل وتفتح النفس لدرجة حتى هواها يرد الروح ..

فتحت الباب ودخل الجنط .. تعالي بابا فجر ادخلي ..
وصاح البنات . مايا نتاليا ازاد يول وينكم ..

من سمعت ازاد استغربت ..
زياد .. ازاد انولدت بعد وفاة امج .. من سمعت بوفاتها مااتحملت من القهر .
وشيلان زوجتي كانت حامل .. قررنا نسمي البنت على اسمها ..
ابتسمت .. شخصيه خالو زياد مختلفه تماما عن خالو عمار ..
ولاعبالك اخوان ..
اجو بنات واعمارهم اصغر مني بسنة او سنتين ماعدا ازاد كان عمرها 12او13 سنة .. بس همة طوال وحلوين  ..
واجت زوجته تخبل وبعدهي صغيره . هي كرديه بس تحجي عربي ..

زياد .. هاي فجر بنت اختي ازاد الي كنت احجيلكم عنها ..
مايا .. ياي تشبه عمتو .. تعجبت وين شايفه امي ..
ازاد .. اوووه بابا عندو البوم كلو صور العمتو ..
ابتسمت ..
گتله صدگ خالو اني ماعندي هواي صور الها ..بس مال زواجهم ..
زياد . من ترتاحين اخليج تشوفيهم ..
شيلان .. اهلا حبيبتي تعالي ارتاحي ..
يله بنات اخذوا جنط فجر للغرفه ..

زياد .. ها شيلان شنو رأيج بفجر ..
شيلان .. جوان زور !!

بقيت صافنه ومبتسمة ..
زياد .. هههههه معناها حلوة كثير ..

كانت عائله مرحة وماتحس نفسك متضايق او محرج معاهم ..

دخلوني للغرفة لگيتهم مفرغين جهة من الكنتور الي .
رتبت اني وياهم الملابس ..

صاح خالو .. يله بنات .. تعالوا اتعشوا ..
استغربت لان الوقت متاخر ..
فجر .. لسا ماتعشيتوا ..
مايا .. من شروط ماما منتعشا الا بوجود بابا بس احيانا نسوي تصبيره وناكل ..

طلعنا للمطبخ وي زوجة خالي ..
كانت الابتسامة متفارگ وجهها مو مثل مرت عمي الي بحياتها ماابتسمتلي ..
رتبنا وياها الطاوله ..
بس ماخلوني لان ايدي مجبريها ..

ازاد .. شلون انكسرت ايدج .. ماعرفت شنو ارد ..
خالوا رد .. بابا ازاد تدحرجت من الدرج وتعورت ..
ازاد .. اووووه بالسلامة ..

كنت بالبدايه متوترة لكن شويه شويه ازالوا التوتر مني ..
واحنة گاعدين ع الطاوله ..
ساعات يتكلمون بلهجة غريبه وماافهم احس نفسي مثل الاطرش بالزفه ..

خالو نبههم .. بابا فجر متعرف لغتكم لهذا احجو عربي ميصير تحجون بغير لغة وهي موجودة ..

فجر .. لاخالو عادي ع راحتهم ..
شيلان .. لاحبيبتي هو هذا الصح . مايصح احد يتكلم بلهجة مختلفه عن المقابل ..

كملنا عشا گال خالو روحي ارتاحي وباجر اطلعج واونسج ..

دخلت للغرفة البنات نطوني سرير منهم وگالوا باجر بابا يشتري سرير لاخ ..
اني ماقبلت واصريت افرش بالگاع ..

تركوني وطلعوا .. بدلت وبقيت بالفراش اتامل حياتي وشلون انقلبت راسا على عقب .
منو كان يتوقع اترك محافضتنا واعيش هنا بأربيل .
الي كانت امنيتي اشوفها ..
فتحت جهازي شفت بس بنين متصله .. معناها ساهر ماهمة غيابي .. معقوله لسا ماعرف ..
غلقت جهازي ونمت من التعب ..

ثاني يوم گعدت ع صوت البنات فاتحين نغمة اعتقد كرديه طلعت لگيتهم ديحضرون ريوگ وي امهم ..

گلتلهم صباح الخير ..
ردوا صباح النور ..
شيلان .. شلونك اليوم احسن گدرتي تنامي ..
فجر .. اي نمت مرتاحة ..

اجة خالو جايب صمون حار ..
صاح .. هلا ببناتي . كانوا عندي ثلاث ورود وهسا صاروا اربعه ..

يله خالو خلونا ناكل بسرعة حتى نطلع اليوم اخذكم وين متردون .
تريگنا وكملنا ..
گالت زوجة خالو .. فجر ملابسك ليش كلهم اسود .. ماتلبسي الوان ..
فجر .. لا لان حزينه ع جدتي مااگدر ..
شيلان .. لكن الحزن بالقلب ليش تظلموا حياتكم بالاسود ..
زياد .. عمتي فخريه هي الي ربتها ومثل امها . حقها تحزن عليها خلو فجر مرتاحة لاتضايقوها ..

حبيت اهتمامهم ..وحرصهم ع راحتي ..
اول مكملنا ريوگ . ردت اگوم ابدل ..
دگ موبايل خالو ..
گال هذي لينا ..
تراجعت .يمكن عندها اخبار عن ساهر ولان جهازي مغلق يمكن اتصلت ع خالو ..

سمعت خالو گال اهلا ساهر ..احس گلبي وگف وانخطف لوني ..شگد اشتاقيت الصوته .. بس سمعت خالو يحجي ويبرر وصوت ساهر اسمعه من الموبايل معصب .. عرفته ضايج خالو اشرلي يريد يحجي وياي ..
گتله لا ..
اتعذر وگال فجر وي البنات ماهي ..
اعرف ساهر معصب ومايتفاهم واحتمال اجرحة او يجرحني بالكلام لهذا ماردت احجي وياه ..

خالو من كمل .. گال خالو شلون كنتي متحمله العيشة وياهم .. يعصبو ويغلطو ع اتفه الاسباب ..

ضجت ودخلت للغرفه ..
اجت مايا يمي ..
فجر .. بابا گال ع كولشي صار وياج .. انتي انسانه قويه لانك تحملتي كثير وصبرتي ..وانا متأكدة ايدك هم الي كسروها وماتدحرجتي من الدرج ..

فجر .. لا مو هيج .. كانت جدتي ماتخلي احد يمس شعرة متي وتدافع عني .. وابن عمي هم هو الي رباني ..
مايا .. قصدك خطيبك ..
فجر .. اي .. بس حاليا مريض والي بي يكفيه ماردت احملو فوق طاقتة .. لهذا قررت ابتعد ..
مايا .. لاتفكري بأحد فكري بنفسك وعيشي حياتك . اطلعي تونسي ادرسي واعملي ..
هسا تشوفيني اني ..
بالسويد .. ادرس واشتغل بمكتبه .. بابا متمكن وعندو بس احب اعتمد على نفسي هيج تصير عدنا ثقه ومانعتمد ع احد ..
فجر .. حلو كلامج وينطي ثقه وقوة ..
مايا .. اي هيج صيري .. سمعت انتي تحضري للسادس شو رأيج نشوفلج مدرسين عرب يساعدوج بالدراسة وادرسي وكملي واشتغلي هم ..
فجر .. ان شاء الله..

طلعت مايا .. واني رجع تفكير بساهر .  فتحت موبايلي واتصلت بلينا ..
رن هواي يله ردت ..

الو لينا ..
هلو فجر شلونج . صعدت الغرفتي مااگدر احجي البيت مگلوب وساهر اتعصب وكسر كلشي ..
وماشاء الله عمتي ماقصرت انطته جرعه من الغضب ..

فجر .. لينا هيج احسن . ساهر ماشاف مني بس التعب لازم ابعد عنه حتى يطيب ويتعالج ويشوف حياته وي زوجته وبيته .. وجودي من الاساس غلط بحياته .
وماكان لازم اوافق يعقد عليه ..
وبس يطيب اطلب منه يفسخ العقد وهيج كل واحد يروح الحاله ..

لينا .. فجر انتي تحبيه؟؟
فجر .. مااگدر اطول اكثر بس خلو بالكم عليه ولاتگولين اني اتصلت وبين فترة وفترة اتصل اخذ اخبارة ..
لينا .. اوك خلي بالج ع نفسج وتواصلي وياي ..

اوووف يافجر بعد سمنتضرج بهاي الدنيا ..
#بقلمي_الكاتبة_شمس
………………………
بدلنا وطلعنا .. اني لبست تنوره بينصل وقميص اسود ولفيت الشال ..
والبنات كانو مامحجبات ولابسين جينز وقميص طويل ..
حسيت نفسي نشاز بينهم ..
بس عادي كل واحد وعاداته وتقاليدة ..
مايا طلبت البس بنطرون وي القميص .
ماقبلت لان القميص قصير لو طويل كان لبست ..
واذا شافني ساهر غير يموتني ..
اتذكر من نطلع بمكان ..
مايباوع بس عليه .. ويگلي شعرج طالع . ليش مالابسه جواريب ..
تنورتج ضيگة .. كنت اضوج واتذمر واگول ليش ميحاسب اخواته وبس اني يتحكم بيه ..
بس ماكنت افهم بوقتها هو يغار عليه ويخاف احد يشوفني ..
ماحسيت بي الا بعد فوات الاوان ..

طلعنا للشلالات واماكن سياحيه هواي ..
ورحنا مجمعات ملابس ..
والبنات گامو ينسقون قميص او يلگ وبدي وبنطرون ع ذوقهم ..
عرفوا لبسي شلون فكانو يختارولي لبس محتشم ونازك بنفس الوقت ..

وحتى نضارات واحذيه رياضيه واكسسوارات اشتروا ..
حرجوني حيل ..
بس من رغم كل هذا مااعرف ليش اكو غصة بداخلي موجودة ..

ساهر .. بقيت اليوم كله متوتر .. الى ان اجة ابوي ..
سمعت صوته صحته ..

يابه تعال هنا ..
ها ساهر ..
شلون تخلي فجر .. غير هي بأمانتك بعدي ..
-وانت المن حارگ روحك خلي تولي اذا رادت تروح اجلب بيها لو اتوسل ..
مااحترمتني من وگفت گبالي وگالت اريد اروح وي خالي -بويه تحجي صدگ جان ختبرتني .. فجر مرتي وعاقد عليها وماتطلع من هذا البيت مادام اني عايش ..

-لامو مرتك .. انت غلطت من عقدت عليها .. وهسا هي ولت لاتجيبها ولاتعب روحك مااريدها بعد ببيتي ..

-هذا بيتها مثل ماهو بيتك وبيت عمي مو بكيفكم ..
-لا متوهم .. اذا على حصة ابوها فدفعتها للبيت الي احترگ وماله حق عدنا ..
وكافي صعدتوها على راسي .. المحلات والبيت وكلشي من تعبنا محمد جاب عمرة كله مدلل ويدرس ..

ساهر .. الي ماتعرفة انت وغيرك .. نص هذا البيت بأسم فجر ..
محمود .. شنو .. انت شبيك الظاهر الطلقه صابت راسك مو ظهرك ..
ساهر .. لايابه اني صاحي وجدتي جانت حاسبه هاليوم ولهذا سجلت حصتها بأسم فجر ..
يعني انتم گاعدين بحصتها وبنص بيتها ..

ابوي ماتحمل واختنگ وبقى يعيط ويگول لا مستحيل امي ماتظلمنا ماتسويها اكيد انت الي لعبت بعقلها ..
من كثر ماعصب وعيط ارتفع ضغطه ووگع ..
وتلاحگوه عمي وماهر وعامر واخذوه للمستشفى ..
وجانت بس امي الشاهدة ع الحديث ..
وبعد ماراح ابوي
گعدت تتحقق وتخبلت من اكدت الها الحجي ..
وگالت حاول بأي طريقه ورجع البيت . ابوك يموت اذا فجر بيوم طالبت بحصتها لو باعته وشمرتنا بالشارع ..

وجانت تحجي بهمس حتى محد يسمعها ..
وكانه خايفه احد يوصل حجي الفجر .. وفجر ترجع تاخذ حصتها وتشمرهم بالشارع ..

مرت ايام وكنت كل يوم اگل البنين تخابر بس موبايل فجر مغلق ..
ماردت احجي وياها اني ..
ومرات بنين تجيبلي اخبار عنها من لينا.. وتگول مرتاحة هناك وخالها جايبلها مدرسين عرب يدرسوها ودا تحظر للسادس ..
معناها بس اني افكر بيها وشايل همها وهي مامهتمة الي والا مايوم شفتها ذكرتني لو گالت شلونه وشصار بحالته ..
وبيوم اني بين نايم وبين گاعد ..
سمعت لينا تحجي وي ماهر ..
وتگله خلينا نروح الاربيل كم يوم هنا اهلي واخواني راح يرحون عزمنا عمو ..
هم نتونس وهم اشوف اهلي وفجر اشتاقيتلهم ..
من سمعت اهلها يرحون تخبلت ..
فتحت عيني گلتلها منو من اهلج يروح ..
گالت كلهم ..
-واخوانج..
-اي اثنينهم .. وسكتت لان خزرها ماهر ..

گلتلها خابريها الي بسرعة ..
لينا .. بس
ساهر .. لابس ولاشي بسرعه خابريها ..
خابرت لينا البنات عمها مااعرف منو ..
وگالتلها انطيني فجر ..
بس گالت الو ..
اشرتلها تنطيني الموبايل ..

-گلتلها اسمعي .. طلعتي من غير اذني وعاندتي ماترجعين خليتج على راحتج . لان بعد مابيه اركض وراج وانتي تنهزمين . اعرف طبعج الجفا والهجر ..
بس اذا وصل بيج الغدر ماارحمج فاهمة ..
ابن خالج الدون اذا سولفتي وياه ادمركم بعلي ..
مو حبا بيج لا…
بس كرامتي اهم منكم ومادامج على ذمتي مااسمحلج توسخين اسمي ..
جنت معصب وطافرة روحي فطلعت كل غيرتي وقهري بيها ..
هي بدون حجي غلقت الموبايل ..
اخذت لينا الموبايل وطلعت ..
اجت بنين سمعت تص الحجي .
گالت مو هيج ساهر .. فجر تحبك وانت ظلمتها .. انتو اثنينكم انخلق حبكم بضروف صعبه وهواي امور بعدتكم بس هسا انت ضيعت فجر من ايدك ..

ساهر .. هي ضاعت من زمان .. من اختارت البعد وتركتني .. روحي بنين اريد انام وصيحي ايات ..
بنين .. ايات بالحمام بس تطلع اصيحها ..

بنين .. صعدت ردت اشوفها كملت لو لا ..
سمعتها تتعارك وي امي ..
وامي تگلها مو عبالج سكتت بس لان امج حلفتني .. والا سوايتج ماينسكت عليها ..
ومااريد احد يلومني ويگول انتي جبتيها .. فأمشي عدل واسمعي كلامي ولاتعاندين ..
ماعندج ظهر بعد . لاطفل ولانعيمة .. بأي لحظة تطيرين منا ..

استغربت من كلام امي ولهجتها وي ايات ..
وهي كانت تدافعلها وتسندها بكلشي .. لازم ايات سوت شي كبير وخلت امي تتغير هيج عليها ..

دگيت الباب وفتحتها .. لونهن انخطف .. وامي گالت شرايده ..
گلتلها ساهر يريد ايات ..
ايات .. اي هسا نازله ..

نزلت واني بحيره من امرهن واسرارهن اكيد وراهن بلوه وبس الله يعلم شنو ..

فجر ..
كنت اني والبنات انحظر اكلات وحلويات . لان راح يجون بيت خالو عمار .. مع العلم ضجت حيل من سمعت راح يجون كلهم ووياهم كيان ..
ومااعرف شلون راح اتحمل تواجدة هنا ..
بس خالو زياد .. گال الشقه مالتنا صغيره . لهذا راح اجهزلهم الملحق الي برة .. يگعدون بي ..
شويه ارتاحيت لان وجودة يمي يضايقني واني اصلا اريد ارتاح من كل شي كان بحياتي ..

اجت مايا جابت موبايلها وگالت هاي لينا تريدج ..
بس گلت الو ..
وسمعت صوته احس گلبي يدگ حيل وتوترت .. ااااه شگد اشتاقيت الهاي النبرة ..
بس كلامة طير فرحتي بصوته وصدمني كانت كلمة منه مثل الخنجر تطعن بيه ..
معناها بعد ماواثق بيه .. ومتوقع انه ممكن اخونه واني ع ذمته ..
مايدري حتى لو ماكنت ع ذمته كيان غلطة وانتهت وماعاد اله وجود بحياتي ..
ساهر بكلامة هذا قطع كل امل بيني وبينه وسد الطريق عنا من قبل مايبدي ..
مابقى شي يربطني بي بس ذكريات بسيطة جمعتنا بلحظة من اللحظات .. وهدمها بتجريحة واتهامة الي ..
#بقلمي_الكاتبة_شمس
يتبع…… .