رواية ساهر الفجر الفصل السابع عشر 17 - بقلم الكاتبة شمس السعدي

بارت مفاجى لعيونكم حبايب 😚ولاتنسون التصويت
//// البارت السابع عشـر ////
#ساهـر_الفجـر ..
#الكاتبـة_شمس ..

الليل كلة مانمت .. صلينا الوحشة اني والبنات كلنا بغرفتها ..
وبديت اقرأ قرآن .. اباوع الكل غفا ونام الا اني عيوني بيهن ملح مااگدر انام وجدتي خلص راحت وماعاد اشوفها تذكرت من حلمت بيها وهي دتبتعد عني ..
يعني كانت تنبهني انه هي خلص راح تروح ..

اوووف سودة عليه يبعد روحي انتي .. شگد اشتاقيتلج شلون راح اگدر على فرگاج ..

قريب الفجر صارت حركة بالبيت .  وبدأو يگعدون شلون نطاهم گلبهم عيونهم تغمض وجدتي راح نفسها من البيت .
اجت عمتي نعيمة .. گومن يله سون ريوگ الجنانيز تريد تروح ..
اني مااهتميت وبقيت مدنگه اقرا سورة يس الها ..

نعيمة .. وج ماتسمعين عساج بالطرش ..
بنين .. يمة هو منو اله نفس يتريگ تحجين صدگ انتي ..
نعيمة .. ع الاقل سون جاي يله راح يطلعون ورى الصلاة
كلها گعدت اني لبست جبة وشال ع راسي وطلعت للصاله ..
شفت عماتي گاعدات يونن .
گعدت يمهن وابجي ..
صاحوا يله اكو استاركس بالباب للنسوان . اصعدن قبل الزلم ميطلعون ..

گمت لزمتني نعيمة .. وين رايحة مو انتي الي موتيها خليج هنا بس الكبار يرحن ..

-تحلمون ابقى هنا . اذا مااودعها اموت ..
-وموتتهم .. عافتني وراحت ..
عاندت الا اروح لو شنو يصير ..
لبست حذائي وردت اطلع ..

عماتي واقاربنا من الانبار بس ساكنين حاليا ببغداد بعد الاحداث .. يصيرون اخوات جدتي من ابوها صعدن قبلي ..
ردت اطلع انسحبت من حجابي ..وانشمرت جوة بالمطبخ

-مو عبالج سكتت خلي تخلص فاتحة امي واحاسبج وحق الله الا اربيج من جديد ..

-عمو حباب سوي بيه الي تريده بس خليني اودعها الاخر مرة ..
-هي غضبانه عليج لان نزلتي راسها وضيعتي تعبها ..
-اني ممسويه شي وطلعت برايتي ولازم اگول الجدتي حتى ترتاح اريد اطمنها مااريدها تروح وهي عينها عليه صدگوني ماترتاح اذا ماتشوفني مرتاحة ..

باوع البنين ولينا بالمطبخ .. هاي اذا طلعت اكسرها الرجليجن .. اقفلن الباب يله ..

طلع واني بقيت بمكاني ابجي واون ..
وج بنين حبابه خابري ساهر ماهر خلي ياخذوني وياهم .

بنين .. ماسمعتي ابوي مايقبل . اتحملي ياعيني غير مرة تروحين ..
-لا الا هسا ..

ايات .. يمة شگد عنوديه ماترتاحين الا تخبصين الدنيا ..
فجر .. ايات خابري ساهر جهازي مابي شحن من البارحة وماادري بي ..
ايات .. اووي وشعليه . هو من البارحة عيونه تجدح نار ع جدته وطلع حرگته بيه .. وترديني اخابره هسا حتى يتخبل عليه واحصل حجاية منه عمودج ..
شيجيب الصبح واروح الاهلي مااتحمل هالوضع ..

رحت للغرفة ابجي واعيط بصوت عالي الى ان احس صوتي اختفى ..
البيت مليان نسوان .. واني اتهسترت واتخبلت .  او الاحرى فقدت .
طلعت قهر السنين والكبت الي بداخلي ..

ردت اعاقب نفسي بأي طريقه . جبت عمري كله يگلولي انتي الي قتلتي اهلج وكنت اتحمل واسكت لان جدتي تسكتهم ..
بس هسا مااتحمل احد يگلي انتي الي موتيها .. اني مالي ذنب . شنو ذنبي اذا وثقت بشخص خسيس سوه السالفه وگلبت عليه وع جدتي وهو انهزم الله اعلم وين .

من حرگة روحي گمت اضرب بلاوعي ع وجهي الى ان صار عندي انهيار عصبي وفقدت ..
جسمي كله سكن ومااگدر اتحرك ..

البنات تخبلن .. يضربن بخدي ويحاولن يصحني واسمع كلامهن وهن يگولن البنيه ماتت . مااتحملت بعد جدتي عنها ..

#بقلمي_الكاتبة_شمس
………………………
ساهر ..
مرض جدتي هد حيلي .. بقيت مگابلها ليل ونهار وخايف عليها .. لان هي الي ربتني واعزها واحبها يمكن اكثر من امي الي ولدتني ..
حتى فجر وشغلتها وي كيان ماشغلت بالي بگد جدتي ..
گلت خلي جدتي تگوم بالسلامة
وبعدين اتحاسب وي الدون الناقص ..
بس الاطباء مايبشرون بخير وخوفونا اكثر . وگالوا احتمال صار عندها نزيف داخلي بالدماغ ..
ولازمها عمليه باجر ..
بس جدتي ماطولت وبيومها توفت ..
ماطاولت يومين وراحت عنا .. الصدمة الي تعرضت الها قويه ومااتحملتها ..
لان كلشي يخص فجر كان بالنسبه الها خط احمر ..
كانت دوم توصيني بفجر وتگلي امانتي عندك فجر يساهر
فجر رغم حنقي عليها وع الي صار .. الا انها كسرت گلبي من شفتها تتوسل تشوف جدتي .
والكل رفض يجيبها للبيت . بس اني عاندت وجبتها حتى تشوفها وتودعها ..

صعدت بالليل سبحت وصليت الوحشة ..
وردت ارتاح بين ميصير الفجر ..
ونطلع للنجف ..

ايات .. ساهر اني اروح يم امي مااگدر ابقى هنا وفاتحة وتعب واني حامل ..
ساهر .. هاي بدل ماتگولين ابقى يم رجلي واواسيه .
ايات .. شاواسيك هو ادري بروحي ماراح اشوفك طول الفاتحة والمفروض انت تخاف عليه وتگلي روحي من وحدك ..
ساهر .. خلص ايات شتسوين سوي بس فوتي حالي .
ايات .. هذا اسلوبك وياي لو ذيج الساقطه جان هديتها وحجيت وياها بأسلوب حلو .
قبل شويه لازمها وتمسح دموعها رغم هي الي موتت جدتك ..

ساهر .. وج اذا ماتسكتين اندمج . واذا گلتي على فجر ساقطه ماتلومين الا نفسج .
ايات .. حجيت شي جذب . همزين شفتهم بيومها هي وكيان بوضع يخزي ورافع دشداشتها بس سكتت وماحجيت .
اريد اگلك كل الي حجاه كيان صحيح ✔..والا شمعرفه بمكان الحرگ ..
ساهر .. اتأدبي ولج الي ماتعرفيه عن فجر انتي وغيرج . من هي صغيرة تلبس ستريج او برموده جوة ملابسها حتى محد يشوف حرگها ..
ايات .. وانت شمدريك ..
ساهر .. اني الي ربيتها على ايدي .. واعرف كلشي عنها .
وجدتي هم طلبت مني نسويلها عمليه لان ماتنزع البرمودة او الستريج بسبب هالشي ..
وهسا لمي هدومج وروحي الاهلج مااريد اشوفج هنا واعلمج على هذا السانج الطويل ..
ايات .. اني رايحة باجرمن غير ماتگول مايعجبني هيج وضع ..

فورت دمي ايات ورحت نمت بالصاله الفوگ ..
او اخذت غفوة ونزلت اجو الجنانيز والتهيت بالزلم والناس وطلعنا بالطريق وذكرت فجر مااعرف اجت لو لا ..

اتصلت على بنين ..
وگالتلي ابوي ماخله فجر تروح وياكم واتهسترت وانهارت ووگعت ..
گلتلها عامر رجع الكم خابريه واخذوها للمستشفى ..

الطريق كله بالي يمها .. اعرف ابوي ماراح يرتاح اذا مايعذبها جدتي جانت واگفتله هسا شلون ..
واني اغلب الاحيان ماموجود ؟؟

وصلنا للنجف زورناها واحنه مغسليها من الليل . واخذناها دفناها ..
خلوها بالگبر واني احجي وياها واطمنها ..
لاتخافين جدة نامي مرتاحة فجر بامانتي وماراح اقصر وياها واحافظ عليها اكثر من نفسي .
وحقها تاخذة ثالث ومثلث ..

كملنا الدفنة ورجعنا ..
وصلنا البيتنا .. لگيت عمام عمي عمار كلهم جايين للفاتحة ..
او ماشفتهم .. گلتلهم احنه گوامة وياكم .. من تخلص الفاتحة ناخذ حقنا مربع .. وانتو ضيوفنا وعلى راسنا الى ان تخلص الفاتحة بعدها لحد يلومنا اذا مااجة حقنا النا .

واحد من عمام كيان .. خير وشنو الحق الي تاخذة مربع يساهر ..
ساهر .. حقنا عند كيان الي تسبب بموت جدتي وطعن بشرفنا . وهذا الحجي بالعشاير ماينسكت عليه ..
وحاظركم يعلم غايبكم . كيان لو يطير للمريخ اجيبه واخذ حقي منه ..

-گولوا يله يمعودين منا ناس واحنه اهل . تخلص الفاتحة والي تردوه يصير ..

تركتهم ودخلت ..
نسوان تارسة البيت ..
شفت لينا گبالي صحتها ..

لينا .. ها ساهر .
ساهر .. فجر شلونها .
لينا .. شلونها .. بعالم ثاني وما بحلگها بس كلمة جدة اخذيني وياج .. وبالگوة تطلعها لان صوتها رايح ..
ساهر .. اخذوها للمستشفى ؟؟.
لينا .. ماقبلت تروح وعاندت . بس جبنالها مضمد انطاها ابره مهدئة ونامت شويه ..

ساهر .. اخيج طول الفاتحة نسوان وهوسه مااگدر ادخل واطمان عليها ديرن بالجن عليها ..

لينا . من عيوني ..

دخل ماهر اني طلعت .. گتله لاتطول منا ناس لايشوفك واحد ..

ماهر .. صار هواي ماشايف لينا واشتاقيتلها وبعد الي صار اخوها منعها تجي لهنا ..
من شفتها واكفه وي ساهر فرفح گلبي عليها ..

شلونج يبعد الروح ..
هلو ماهر اني زينه بس فراگ جدتي موحش .. هي الي كانت واگفتلنا وعدنا امل بيها .. وخاصه بعد الي صار تتوقع راح ننجمع ..

ماهر .. والله لو تنطبگ الارض ع السما غصب عنهم ننجمع ..
وبس تهدأ الفاتحة اشوف ساهر شمقرر بخصوص كيان بان قبل شويه گاوم عمامج وطالبهم بگعدة عشاير ..

لينا .. عزاااا يعني انلاصت اكثر . متگلي ليش هيج حضنا كلما نقرب خطره نبعد الف ..

ماهر .. الله كريم . روحي انتي وبعدين نتخابر ..

فجر .. الفاتحة ثلاث ايام ماشفت شي منها . اسمع نعي المله وابجي وافرفح وياها بس ماطلعت ابد حتى لااكل ولاشرب ..
وعايشه ع المغذي ..
اشوف ساهر يجي يباوع ويروح من غير مايحجي اعرفه زعلان بس گلبه ماينطيه يتركني من يوم يومة هيج ..

ولو اني وصلت المرحلة كرهت كلشي بحياتي وماعاد احد يهمني بهالدنيا ..

عمي حمزة سمع واجو ثاني يوم الفاتحة وخطيه گام يتگلب بالگاع من البجي ..
وكالعاده مو سألهم عن السبب . گلوله فجر موتتها مثل ماموتت اهلها ..
ومشت عليه كلمة فگر بالبيت ..

خلصت الفاتحة والكل راح ع بيته . ورجع البيت موحش ومابي حس .
ساعات اتخيل حسها بالبيت وهي تنادي علينا .

عمي يدخل ويطلع يسمعني حجي ..
وعمتي نعيمة تطالبني بشغل وبيت واني مااگدر احس جسمي مايقاوم ..
ومن اتعب ادوخ ويغمى عليه ..
واتكررت هالحاله اكثر من مره ..

بنين حجت وي عمو .. يگلها هاي عيارة حتى مااحسابها ع السوته ..
رغم هو يعرف ببرائتي ..
وعمتي نعيمة اسمعها تگله زوجوها الكيان وخلصونا.  كانت جدتها حامله مسؤوليتها .
هسا راحت قابل نبتلي بيها ..
يحاولون بأي طريقه يخلصون مني .

حتى مدرسه فترة غايبه ومن اداوم .. اوگع هناك ويجيبوني للبيت ..
صرت جثة هامدة مابيها لاروح ولانفس ..

كلما اريد احجي وي ساهر يصدني ويطلع حجة الشغل
بعد الفاتحة الكل رجع الحياته الطبيعيه .
حتى مريم الي كانت تواسيني وتشجعني ..
رجعوا يكملون علاجهم ..
ورجعت بقيت الوحدي ..

ساهر .. كنت اراقب فجر من بعيد واحس بيها وبمشاعرها ..
بس مااگدر اتقرب منها واواسيها .. رغم معرفتي انه مالها ذنب بالي صار . والنذل استغل الفراغ الي عندها .
بس ياما حذرتها وماسمعتني وخلته يتمادى ويتجاسر ..

طلبت من عشيرته نسوي گعدة وناخذ حقنا .. وحددوا يوم الجمعه .. لان همة ببغداد وجيتهم صعبه بايام الدوام
شفت فجر عندها شي وتريد تحجيه بس اني كنت اتجنبها وطلبت من بنين تشوف شنو تريد ..

اجت بنين وگالت تريد تروح الجدتي اشتاقتلها وماراحت بالدفنه ماخلوها ..

ساهر .. گليلها خلي تتحمل يومين تخلص گعدة عشيرة كيان . وبعدين اخذلكم سيارة ونروح ..

امي كل يوم تزن عليه .. روح راضي مرتك وجيبها خطيه مريضه وداخله مستشفى..

ساهر .. يمة ايات هي الي رادت تروح وتجاسرت وطولت السانها تتحمل النتائج . تريد ترجع للبيت خلي ترجع بس مال اروح اجيبها مااروح للان محترمها وماغالط بحقها ..
بس فهميها اذا تبقى تسوي هيج تخسرني للابد ..
الي بيه مكفيني ومشكال الراسي وشغل ولازم التحق هواي اتعذرت واجلت وعيب شيگولون جبان وانهزم ..

نعيمة .. الله لاينطيها مشاكلنا وضيمنا كله منها ..
ساهر .. هسا عرفت ايات عليمن طالعه اروح احسن الي مامنج فايده يمة ولا راح تتغيرين ..
تركتها ورحت للمحل ..

صارت يوم الگعدة واجتمعت العشيرتين ..
وحجا شيخهم وگال ..
الي صار بالحجيه قضاء وقدر .. والي سواه كيان مامقصود وهو يگول البنيه مستعد يستر عليها ويتزوجها
وهيج تنحل المشكله ..

ساهر .. ياشيخ ابو المثل يگول اگعد عوج واحجي عدل .
لو ماافتراء ابنكم ماجدتي انجلطت وماتت ..
والشغله الثانيه اتهم بنتنا بشرفها . وبنتنا بريئة ومالامس شعرة منها ..

الشيخ .. عجل يگول هو لامسها ..
ساهر .. دجيبه يمي لألعن ابوه . يخسى اذا يمس شعرة منها غير اكسرها الايده . بنتنا ترباتنا وماتسوي العيبه .

ابوي .. بنتنا بعدهي عذراء والي گاله كيان يندان بي وحتى دمة انهدرة . وهذا تقرير يثبت هالشي من دكتورة البنيه باكر وهو افترى عليها حتى يجبرها ع الزواج وياخذ اموالها لان طمعان بحصتها من ورث ابوها ..

*من شفت التقرير بيد ابوي انشل عقلي وفار دمي بس ماگدرت احجي گدام الناس وسويت روحي عندي علم بالتقرير ..

شيخهم تعارك وي شخينا وبعد الحجي والعرك وردت الا شويه اضرب شيخهم .. بدوا يتنازلون النا وطاوعونا بشروطنا ..
وگالوا شنو الي تردوه گولوا واحنه نفصل ..

ساهر .. باعوا الي نريده سهل .. الي صار كله لان ردنا اخته الاخوي ماهر .. وهو ساومنا وراد وحدة بوحدة .
والي سواه مانريد منه لافصل ولاشي بس المرة الي ردناها الاخوي تصير اله ومن غير اعتراض ..

الشيخ .. هاهي احسبوا المرة الكم اذا هي موافقه عجل  مايصير نجبرها ..
وانتو انطوا البنيه الكيان حتى تصير راس براس ونفض السالفه ..

ساهر .. شنو راس براس شعدنا خروف .. احنه الي نطالبكم ديه . وديتنا مرة الماهر اخوي ..
اما بنتنا فما ننطيها .. لان ابن عمها ناهي عليها والنهوة عدنا مثل حد السيف مابيها رجعة ..
#بقلمي_الكاتبة_شمس
يتبع……………
شكرا حبيبتي R--o--n--a--k  ع التصميم ..