رواية ساهر الفجر الفصل الثامن عشر 18 - بقلم الكاتبة شمس السعدي

مساء الورد لاجمل متابعين وقرآء 💕
//// البارت الثامن عشـر ////
#ساهـر_الفجـر ..
#الكاتبـة_شمس ..

الشيخ .. هاهي احسبوا المرة الكم اذا هي موافقه عجل مايصير نجبرها ..
وانتو انطوا البنيه الكيان حتى تصير راس براس ونفض السالفه ..

ساهر .. شنو راس براس شعدنا خروف .. احنه الي نطالبكم ديه . وديتنا مرة الماهر اخوي ..
اما بنتنا فما ننطيها .. لان ابن عمها ناهي عليها والنهوة عدنا مثل حد السيف مابيها رجعة ..

ابوي باوعلي ومستغرب ..
عامر خزرني وترك الگعدة وراح ..
الوجوه كلها ماتتفسر ومتفاجأين .. بس ماهر الي حسته مرتاح ويبتسم ..

بداخلي اگله .. أفة عليك ياخوي اني اخليك مشلوع گلب مثل اخوك . الماحصلة اخوك حصلة انت ..

فضوا الگعدة بأنه كيان مايعتب الشارع ويوصل لهنا ..
ونعقد الماهر ولينا باجر بأي امام لان حزنانين على جدتي ومانريد هوسه .

دخلت للبيت لگيتة مگلوب گلاب ..
ساهر .. شكووو شبيكم ..
عامر .. انت بكيفك تحجي تريد تحط فجر براسي بعدني ببدايه حياتي اريد اطلع اتونس اتزوج الي احبها واريدها مو كلكم تخنارون بكيفكم واني تجبروني ..

باوعت الفجر منصية راسها وماشالته ابد عرفتها انكسرت من سمعت خبر نهوتها ..

عمتي بتول گاعده هي واولادها وزوجها واغلب اقاربنا ..
امي مناك تطفر وتحجي ..
-هي بكيفك انطوها الابن خالها وفضوها . مااخذ فجر الواحد من ولدي لو تنگلب الدنيا . وهاي اخوك مارايدها شنو هي جبر ..
تلعب بكيفها وانتو تستروها..

ساهر .. تسكتون لو اطلع .. غير تسمعون مني يالله شبيكم خبصتوا الجو ..
وانت عامر اني جبت اسمك بالنهوة گلت عامر ناهي عليها ..

عامر .. اي مو گلت ابن عمها ناهي عليها . وهو ماكو بس اني . لان انت متزوج وماهر اخذتوله لينا بعد منو ..

ساهر .. اني ..

الكل صفن وامي گامت تلطم على خدها ..
فجر بسرعه رفعت وجهها عليه ونزلن دموعها ..
گامت للغرفة ركض ..

ساهر .. حجايه زايده مااريد اني الي نهيت على فجر ومحد ياخذها غيري ..

بتول .. يمة ومرتك حرام وخطيه حامل ..
ساهر .. واني ماظالمها .. بس بنت عمي ووصية جدتي لازم احافظ عليهم ..
وهذا اخر كلام عندي ..

ابوي گام يحجي .. مو بكيفك زودتها تاخذ قرارات من غير ماتحترم رأينا ووووووو .
قاطعتها ..
حاسبتوني خلصتوا .. هسا اجة وكت حسابي ..
منين جبت التقرير يابه وشلون ؟؟

ابوي .. اني خليت عمتك تاخذها للدكتورة وتفحصها حتى اتأكد اذا حجي كيان صدگ . قابل تريدني اضلمها من غير مااعرف الحقيقه ..

ساهر .. وعساس انتو ماضلمتوها مووو .. كلكم شكيتوا بيها وصدگتو واحد دون بلا غيرة ..
ومن غير ماتاخذون رأيي وجدتي بالانعاش وانتو تفكرون بشرفكم الي ضيعته فجر ..
ولكم لو اني عندي شك واحد بالميه بيها جان اني اتصرفت وياها مو انتو. .
والحساب بعدة ماانتهى .. لازم اعرف منو الي حرض كيان وگاله على مكان حرگ فجر ..

امي .. ليش هو سر ومحد يعرف مكانه ..
ساهر .. يمة الكل مايتذكر ومحد واعي على حرگتها وبس جدتي واني وانتي الي كنا ننضف الجرح ونعقمة .
والحد ماكبرت فجر ماتظهرة وتلبس برمودة او ستريج جوة ملابسها ..

امي .. يايعني قصدك اني . اي كلشي اتوقع منك عمتك فجر ونسيت اهلك وابنك ومرتك وبعد وبعد لمن تطيح حظك ..

ساهر .. هالمرة سويتوها وحتى انتي عمة عندج بيت واولاد اتدخلي بيهم مو من حق اي واحد يتدخل بعائلتنا تقبلين اني اتدخل بشؤون بيتج ..
ومن هذا اليوم فجر مسؤوله مني ومحد يتدخل بيها ..

تركتهم يتطالبون وطلعت
ركبت سيارتي ورحت ..

خابرت رعد .. الو وينك ..
رعد .. ياهلا والله هسا ردت اخابرك . شنو هذا الخبر السمعته ..
ساهر .. شبسرعة وصل الخبر ..
رعد .. ولك الشارع كله سمع بالنهوة ..
ساهر .. ههههه عليه هالحجي ..
رعد .. لا والله اتصل عليك ماترد وبقى بالي يمك . تالي خابرت على ماهر وسولفلي ..
ساهر .. اي الملعون ورى الگعده وفص ملح وذاب ماشفته بعد ..
رعد .. من فرحته غير .. بس انت مااتوقعت تطلع منك سالفه النهوة شناوي يساهر ..
ساهر .. كل خير لاتخاف على اخوك ..
رعد .. يعني كنت مخطط الهاي الشغله ..
ساهر .. ردت انهي عليها من جدتي عايشه حتى احافظ عليها من ذاك الطمع . بس بعد الي صار يحلم انطيه شعره منها ..
رعد .. والبنيه شنو رأيها لاتجبرها على شي ..
ساهر .. مااجبرها لاتخاف ولاراح اطالبها بشي . الى ان يجي اليوم الي هي تختارني من كيفها ومن غير ضغط .
لاتخاف هالنهوة شغله روتينيه بس ساعة الي اشوفها صارت ناضجة وفهمت الحياة زين واختارت الي يناسبها ماراح اوگف بطريقها واسحب نهوتي ..

رحت للمحل بقيت لليل ورجعت ..
شفت ايات گبالي اول ماشافتني تلگتني ..
-شنو هالحجي السمعته . صدگ نهيت على فجر واني وابنك الي ببطني ..
-ايات تعبان .. مافكرتي بيه من رحتي وماسألتي عليه ولااجيتي .. هسا جايه تحاسبيني ..
-كله مو هاي الحيه اكيد استغلت غيابي ولافت عليك شسوتلك وخلتك توافق نامت وياك مثل مانامت وي كيان
بلاوعي ضربتها راشدي .. وهاي كانت اول مرة امد ايدي على مرة . مو من طبعي ولابيوم مفكر اسويها .
بس كلام ايات استفزني وطلعني عن طوري ..

تركتها وصعدت وهي بقت تعيط .. اني اعلمها الهاي المشوهة الا ابهذلها واخلي الناس كلها تحجي بسيرتها .

صعدت بدلت ونزلت .
گلتلها بنين سويلي عشا ..
ايات صعدت الغرفتها وقفلت الباب ..

تعشيت بالمطبخ لان لاابوي ولاامي يحجون وياي ..
كملت عشا واني ماشفت فجر ابد ..

رحت للغرفه دگيت الباب ..
گالت ادخل ..
شفتها حاطه القرآن وتقرأ ..
من شافتني طبگته وباسته ..

-اتقبل الله .
-شكرا اريد الحگ اختم كم ختمة الجدتي ..
-ودوامج ليش ماتداومين ..
-بعد موت جدتي كلشي مات عندي ..
-بس جدتي امنيتها تكملين ..
-الله كريم . اذا عمو خلاني .
-معليج بأبوي اني احجي وياه ..

كانت مدنگة راسها وتحجي وماباوعت بوجهي ابد ..

گلتلها فجر .. بخصوص النهوة ..
رفعت راسها وعيونها مليانه دموع ..
-وجاي تاخذ رأي هسا .. اصلا ماتفرق عندي اي شي بعد الي تردوه سووه . حياتي صارت مربوطه بإيدكم .
تهمتوني بشرفي وجرجرتوني للدكتورة وفضحتوني .. شايف نضرات السكرتيرة من عمتي همستلها ع شنو احنة جايين ..
اتمنيت الموت بذيج اللحظة بس صبرت الاجل جدتي حتى يگلولها بريئة وترجعلي .. وتالي مارجعت ..

-انتي افهمي يله تحكمين . اني ماادري وحق الله لو ادري اگلب عاليها واطيها ..
شتتوقعين اني اشك ييج . رغم عنادج ورفضتيني علمود كيان بس ماشكيت بيج ..

-وهسا جاي تگلي الصوج بيج وتلومني مثلهم مو .. ولازم ارضخ واقبل نتيجة اخطائي ..

-وج بس لا بعد الي سواه وموت جدتي رايدته لسا ..
-لا ابد . ومستحيل اقبل بي بعد ماشوه سمعتي. حتى لو جدتي ماميته اني هم مااقبل بكيان .
بس مو معناها تقررون عني حياتي وتربطني بيك واني ماهاويتك . وفوگاها متزوج بأيات الي راح تطين عيشتي اكثر من قبل ..
-الي سويته المصلحتج وبعدين تعرفين هالشي ..
واذا تردين مااعقد ولااربطج بيه . هي مجرد نهوة .
-مايفرق اي شي عندي . الي تريدة سويه . بس لاتطالبني بأكثر من هيج ..
يعني لو بقيت العمر كله ع ذمتك لاتصدگ اصيرلك غير هيج لان سبق وگتلك انت شنو بالنسبه الي ..
#بقلمي_الكاتبة_شمس
.................................... ..
ساهر .. كافي خلص لاتكملين ..
دخلت امي ..
ولك انت صدگ ماتستحي .. تارك مرتك حامل وزعلانه وحاير بهاي الشيطانه عرفت شلون تلوف عقلك وتاخذك .

باوعتلي فجر وعيونها حمر وگالت ..
هاك هاي اول حرب شنيتها عليه بعد قرارك .. منو الي راح يخلصني من ظلمهم بعد ..

ساهر .. روحي يمة هسا جاي ..
گمت وهمستلها .. انتي بس گولي اي والله اذا صرتي على ذمتي بعد محد يتجرأ يحجي عليج . همة يحاربوج حتى تتراجعين فكري زين وقرري .
ماتردين تبقى النهوة بس حجي ..

بيومها مارجعت للبيت بقيت عند رعد لان زوجتة عند اهلها مريضه ..

ثاني يوم اتفقنا اني وماهر ناخذ سيارة للنجف نزور جدتي ومناك نروح للامام نعقدلهم ..

اتصلت على عمتي وانطيتها خبر ..
اتصلت وگالت عمار مايقبل يگول هي شروة لو فصليه يجون حالهم حال الناس يطلبوها يله ..

خابرت على شيخهم وگلتله اني طلبتها منك وانطيتها النا بگعدة زلم بعد ع المشيه المن ..

گال روح وانطيك خبر شويه بعد ..
للعصر خابرت عمتي وگالت اني وياها نروح بس ابوها يگول لااحظر عقد ولازواج ..

اجرت استاركس العماتي واخواتي وفجر رغم عمتي بتول زعلانة . بس راحت لان عمتي ابتهال اترجتها ..
واني والولد وابوي بسيارتي .
يس ايات ماراحت بقت بالبيت . گلتلها انتي حامل وهي ماتحب روحة المگابر ..

وصلنا الفجر يم جدتي زرناها ..
وفجر بالگوة گامت منها . نامت ع التراب .
قهرتني وزرفت گلبي من تگلها ..
اگعدي يمة مو انذليت بعدج وصرت يتيمة من صدگ ..

مااعاش الي يذلج وساهر موجود ( احجي بداخلي )

رحنا للامام دخلنا مطعم تريگنا كلنا وطلعنا نزور ..
هناك دخلنا نعقد الماهر ولينا بعد مازرنا ..

امي وابوي على عيونهم واگفين .. لان ماراضين ع الخطبه من اولها وصارت غصب عنهم ..

اني اشتريت الحلقات هديه مني الماهر .
عقدلهم وكمل .. لبسوا الحلقات . وسلموا علينا .

اشرت الفجر اجت تمشي بطيئ سحبتها من ايدها وگتله سيد اجة دورنا ..

امي التفتت وفتحت عيونها .. وراحت تصيح ابوي لان طلع بسرعه قبل ميلبس ماهر الحلقات ..
احس ادين فجر ثلجن بإيدي وترجف ..
عصرت اديها حيل وهمستلها ..
لاتخافين اني يمج ..

عماتي والكل جامد . ماعدا بنين لان كانت تدري راح اعقد عليها ..
حتى ماهر ضحك بأستغراب وعباله اشاقه ..

بدأ السيد يعقد النا .. واحنه نردد وراه .
دخل ابوي وگال ساهر بحياتي ماارضى عليك ..

گتله يابه رضى الله اهم عندي .. كمل سيدنا .
السيد كمل وابوي اختفى هو وامي ..

بعدها عماتي واخواتي باركولنا ..
وطلعنا ..
دورنا على اهلي ماكو ..
اتصل ماهر ..
گال راحوا للكراج مايرجعون ويانا ..

گلتلهم يله خلونا نرجع ..
باوعت الفجر ماتباوع بوجهي ومنصيه راسها ..

گلتلها ارجعي وياي انتي ولينا بالسيارة .
صعدنا اني وياها وماهر ولينا والبقية راحوا گدامنا .

ماهر صرعنا هو ولينا وممصدگ وكل شويه يگلها مرتي شلونج .. ضحكنا ..
بس فجر قافله وعينه ع الشارع من الشباك وعبالك بعالم ثاني ..

فجر .. بعد ماسمعت بأمر النهوة .. گلبي نغزني وعرفت راح يحطمون حياتي ..
واجة عامر مقهور . متت قهر تالي عمري انجبر اتزوج شخص مثل اخويه وهو اصلا ماراغبني ولايريدني ..

احس گلبي يتگطع وي كل كلمة يگولها . مااخذها لو تنطبگ السما ع الگاع ..
#بقلمي_الكاتبة_شمس
.................................
من اجة ساهر وگال اني الي نهيت عليها .
ضجت اكثر لان سبق وان رفضته وهو متزوج . وياما حذرني من كيان واني ماسمعت .

للحظة حسيت هذي النهوة كسرت خشم الي او يحاول ينتقم مني ..
لان هو حتى ماسأل او استفسر عن موضوع كيان .

ضجت ودخلت للغرفه . وكالعادة الدموع كانت السبيل الوحيد الي حتى ارتاح ..
بس استغربت من سمعت عيط عليهم وماقبل ع روحة الدكتورة . معناها مايدري ..

اجة بعدها وحجا وياي وگال الي اسويه الحمايتج وانتي حرة اذا توافقين او لا .
وراد مني رد ع طلبه ..

بعد ماطلع اجت امة وايات وبهذلوني وسمعوني اشكال كلام وفشار ..
وحتى تهديد هددوني ..
بقيت بالغرفه ابجي ومالي لا حول ولاقوة ..

اجت بنين .. وگالت ..
فجر . رغم اني كنت ضد ساهر بكل خطوه ومشاعرة اتجاهج . وكنت اتصورها نزوة وانتي مراهقه ماتتراهم مشاعركم ..
بس حاليا وبهذا الوضع مايحميج الا ساهر ..

اقبلي بساهر وبشروطج .. اذا تحبين ع الورق بس .
لان محد يرحمج من اهلي . وباجر عگبه مااستبعد ايات تذب عليج تهمة اكبر من الي قبلها ..

فجر .. شتقصدين ..
بنين .. الحجي بينا لان مااريد ساهر يدري اخاف يطلگها وهي عندها طفل خطيه ..
فجر .. شنو احجي .
بنين .. اوعديني ماتحجين . ترى شفت كيان متصل على ايات بيوم الي صارت الهوسة وجدتي اخذوها للمستشفى ..
واستغربت ومن سألتها گالت متوهمة ومنين اعرف رقمة رغم هي كاتبه عليه كيان .
بس يمكن حذفت كلشي . واذا اواجهها مااحصل شي منها . بس اكيد هي الي گالت الكيان وهي الي خططت حتى تخلص منج ..
وحدة مثل هاي عندها استعداد كلشي تسوي . خلي ظهرج قوي واسنديه بساهر . والله محد يفيدج غيرة .

بقيت الليل كله افكر بكلام بنين .. وانتضرت ساهر يجي مااجة تالي دزيتله رساله بالليل وگتله .

(ساهر اني موافقه ع كلشي بس تحميني منهم . وتخليني اكمل وماتطالبني بأي شي يبقى كلشي ع الورق وبس) ..

رجعلي الرساله ..( كلشي يصير مثل ماتردين حظري نفسج باجر نروح نعقد الماهر واعقد عليج هم بس هالشي خليه بينا )

بس طلع ساهر مخبر بنين واجت بنين حضنتني وگالت عين العقل الي سويتيه .
ادري بيج ماتحبيه .
بس كانت جدتي الله يرحمها .. اخذي الي يحبج مو الي تحبيه لان راح يسعدج ويدور رضاج )

ورحنا للنجف وعقدنا وصرت مرت انسان في يوم ما كنت اعتبرة اخ او اب الي ..

واخذت عهد على نفسي يبقى مثل ماهو . ودراستي تكون سلاحي الى ان اتخرج واتعيين واگدر اعتمد على نفسي وماتحتاج احد ..

من رجعنا للبيت اول منزلت ..
هجمت عليه ايات وسحلتني من شعري ولاعبالك حامل .
بالگوة اجة ساهر يركض واخذها مني ..

سحبها من ايدها وصعدها لفوگ وهي تعيط العاهرة اني الج اراويج من ايات ..
نعيمة .. الله لاينطيج يالفگر . خربتي بيت ابني ..
باوعت البنين . اشرتلي اسكتي ..

سكتت ودخلت ..
براء .. والله ولعبتيها صح . طلعتي افهم منا كلنا .
فجر .. شنو لعبه اني وساهر مستحيل نكون البعض افهموا عاد . لو مانهوة ساهر. جان مااضطريت اوافق .
ولو جدتي عايشه هم مااوافق .
كل هذا حبر على ورق افتهمتي ..

بنين .. براء كافي اسكتي .. وولي منا .
براء .. طالعة بس خليها ببالج هاي البدايه . لاعبالج امي وايات يقدملج ساهر على صحن من ذهب .

فعلا كلامها صحيح ✔ بس شأسوي هذا حظي وهاي قسمتي ولازم اتحمل ..

كم من الاوجاع تصدمنا .. وكم من الحنين يكوينـا ..
وكم من الاشياء كانت من نصيبنـا ..
ولكنهـا ليسـت من اختيارنـا ..

ساهر .. عرفت امي خبرت ايات .. اول مانزلنا .
سمعت عياط . انطيت السويج الماهر .
وركضت .
شفت ايات ساحله فجر وتغلط عليها .
سحبتها واخذتها للغرفه ..

-انتي شبيج تخبلتي ..
-اي تخبلت بسببك . تروح تعقد عليها يساهر . تجيبها ضرة عليه .. هاي الماتسوة فلس الي باعت روحها تفضلها عليه ..
-ايات اني عاذرج لان حامل والا اذا سمعت تمسين فجر بشرفها ماتلومين روحج ورقتج اخليها بيدج والله .. وج شفتيني دخلت عليها هو كله عقد على ورق .
-وليش عقدت عليها اذا ماتريدها ..
-حتى احميها ومااخلي الناس تستعلها وتطمع بيها .
-والى متى ..
-ماادري .. بس هذا الشي ماراح يعلن ويبقى بين اهلنا

ايات .. اوعدني ماتتقربلها ولاتوصل يمها ..
ساهر .. اگلج ايات انتي تعرفين ساهر اذا گال حجايه مايتراجع عنها .
ومادام فجر مارايدتني مستحيل اتقربلها لو اجبرها عليه .
-ها يعني اذا رادتك تروحلها . مو اني اعرفها . صدگ لو گالو لاتقرب النار يم البانزين ..
هاي تاليتها يساهر تقشمرني وتضحك عليه ..
-اني ماضحكت عليج وتعرفين كلشي من الاول ووافقتي عليه . ولاعبالج رضيت عنج بعد كلامج الاخير وزعلج وروحة اهلج . بس عبرتها بمزاجي ..
انتي مرتي وام ابني والج مكانة عندي . فأهتمي بالطفل وبنفسج وبيه ولاتخلين غير امور تشغلج عن زواجنا وحياتنا ..
-ايات .. اووووف يريدني اتحمل واسكت وهاي ع ذمته . اطلع لاانجلط احسن الي ..
ساهر .. والله اعرف ماتصيرلج جارة بس شأسوي اتأمل خير ..
تذكرت فجر ضحكت ..ونمت ع الجربايه ..
ااااه يافجر ساهر .. واخيرا صرتي على ذمتي ومحد ياخذج مني ..
لااريد شي اخر .. فيكفي انكي معي ياوتيني ..
#بقلمي_الكاتبة_شمس
يتبع...... .
...........................