تحميل رواية «﮼صفقة ﮼عشك» PDF

السلام عليكم ..

اشونكم حبايبي الحلوييييين مشتاقتلكم 😍

اكيد البعض حيستغرب من الاشعار الي وصله بس حبيت انزللكم اعلان لقصتي الجديده ❤️🤗

والي حتكون مختلفه نوعاً ماااا عن السابقه ومثل ما عودتكم حتكون غير مألوفه وافكار جديده ان شاء الله تعجبكم

الي يحب يحفظها عنده بالمكتبه على ما اكمل البارتات الاوليه حتى النشر يصير سريييييع

وسلامتكم 💜🤗

بقلمي (هدى الموسوي ) الاميره الموسويه👑

ما احلل لاي احد ياخذ كتاباتي وينشرهم (ذمه)

بوسط قاعة مكتب كبير .. بهدوء واكف ورا المكتب الضخم ، منطي ظهره للي واكف ورا ويحجي بعدم اهتمام ...  ايديناته بداخل جيب البنطرون

بكل جبروت وغرور .. بصوت حاد ومليان ثقه ... بثبات مثل الجبل و بصوت اشبه بزئير اسد ...

نور الدين .. اسمعني زين وهذا اخر كلام عندي اذا تريد هذي الصفقه فـأنت تعرف شنو المقابل.

بسام .. بصوت متردد اشبه بالتوسل .. صدكني لو بيدي هسه اكبعها واجيبها الك بس البنيه رافضه الزواج اصلاً يعني شسو...

نور الدين .. قاطعه بصوته الحاد ... الي عندي كلته .

عافه كاعد وطلع بدون اي اهتمام حتى ما انتظر يسمع رد بسام ...........

طلع بسام من مكتب نورالدين والغضب متملكه .. مستحيل اخلي هذي الصفقه اتضيع من اديه ؟!

جر الموبايل واتصل بأبو ... بعد عدة مكالمات اخيراً رد ..

الاب .. شصاير من الصبح ؟!

بسام .. صاير كارثه بابا .. تعبنا كله راح يضيع بسبب بنتك .

الاب .. اهدأ وفهمني شكوو ، شسوت سدن ؟!

بسام .. يعني متعرف شمسويه .. اكثر من مره كلتلك نورالدين مراح ينطينا الصفقه اذا متوافق بنتك ع الشرط الي يريده!

الاب .. وانت محجيت ويا اختك؟!

بسام .. حجيت وميفيد الحجي وياها جربت كل الطرق وبعدها راكبه راسها ومعانده يعني شنو مصيرنا كله متوقف بيد وحده طفله مثل سدن !

كافي لازم نتصرف وننهي هالموضوع ، غصباً عليها تسمع الكلام وتوافق .

الاب .. بسام هذي الصفقه كل املاكنه متوقفه عليها واذا راحت من ادينا ميبقى شي حتى اسمنا بالسوك يضيع.

بسام .. لعد اني شدااحجي من الصبح؟!

الاب .. والحل اذا اختك معانده؟!

بسام .. انت بس انطيني الضوء الاخضر ومعليك بالباقي اني اعرف اشلون اخليها اتوافق .

الاب .. ماشي انت اتصرف بس على كيفك وياها.

بسام . تمام.

نهى المكالمه و راح بوجه لبيتهم دخل ملگه احد...!

بقى يصيح بصوته الغاضب ... سدن .. سدن ...لج سدننننن!!

دور بالبيت ماكو ملكاها .

اتصل عليها تنطي رفض!!

استغفر الله اني شلوووون ويا هاي الصلفه حتى ع المكالمه مترد!

اني اعلمج بس تعالي وشوفي شراح اسوي بيج.

بعد نص ساعه كان بسام كاعد ع جمر ينتظر اخته ترجع من الدوام .... والغضب يتطاير من عيونه !

سمع صوت الباب انفتح .. كام بسرعه شافها بالباب دتدخل .. مشى بتجاها وسحبها من ايدها بقوه!!

سدن .. اخ اخ بسام ايدي دتأذيني اشبييك .. بسام ايدي اااااخ  ...

بسام .. دفعها بقوه ع الكرسي .. وبصوت عصبي .. وين چنتي؟؟

سدن .. وهي تفرك ايدها بألم .. مجاوبته!

بسام .. صاح بيها .. دااحجي وياج جاوبيني.

سدن .. رفعت راسها بغضب .. انت شنو مشكلتك؟!

هاااا .. كولي شنو مشكلتك وياي .. مو تعرف اني بالدوام لويش دتصيح وتضرب هشكل؟!

بسام .. ليش متردين ع موبايلج .. الف مره اتصلت بيج ليش متجاوبين؟!

سدن .. مسمعته .

بسام .. اهاااا مسمعتي .. مسمعتي لو ميعجبج اتردين؟!

سدن .. بسام كلتلك مسمعته وهذي اخر مره تعاملني هشكل والنبي اخابر بابا واكوله ع هذا اسلوبك وهو يعرف اشون يتصرف وياك.

بسام .. اسمعيني زيييييين لج هواي صبرت عليج وهواي سايستج ع بالي يفيد بيج وتتغيرين بس الظاهر انتي محد يهمج غير نفسج!

سدن .. اهاااااا ... هسه عرفت سبب العصبيه هذي والغضب .. تريد ترجع للموضوع القديم!

وانت اسمعني زين بسام هذا الموضوع انسى احسنلك لانوووووو مستحيل يصير فلتعب نفسك مو زين عليك.

بسام .. راح يصير وغصباً عنج ..

سدن .. بصوت عالي واني ابجي .. لو تموتني سمعتنييييي لووووو تموتني بساااااام ..مااتزوجه لو تموتني!

بسام .. مو بكيفج اني نطيت كلمه للرجال وانتهى الموضوع.

سدن .. جريت الموبايل .. هسه اتصل ببابا واخلي يتفاهم وياك لان الظاهر انت انجنيت.

بسام .. ههههه هذا القرار قرار ابوج واليوم اخذت موافقته.

سدن .. بعصبيه وانفعال ..  انت دتكذب بابا مستحيل يوافق ع هيج شي .

بسام .. ماشي اتصلي بي واسمعي الرد بنفسج.

سدن .. اتصلت ببابا واني مدااستوعب الي دااسمعه .. اكثر من خمس مرات اتصل يرن وميرد عليه!!

اخر مره اتصلت طلع مغلق!!

بسام .. هااا .. اعتقد الرد واضح ميحتاج تحاولين بعد.

سدن .. شي بداخلي كان خايف ليكون كلامه صحيح وعدم رد بابا اكد هذا الخوف!!

بس مبينت هذا الشي كدام بسام حتى ليفكرني ضعفت ويسوي الي يريده!

محجيت ويا اي كلمه اخذت غراضي وكبل لغرفتي دخلت وسديت الباب ....!

كعدت ع السرير واني صافنه بغير عالم احس ألم بمعدتي فضيع ..

بقيت اباوع ع الموبايل طلعت رقم بابا وصفنت ... بس گلبي احسه ديرجف

يمكن عدم رد بابا خوفني وفكرة انو يوافق ع هذا الشي خوفتني اكثر بس قراري مستحيل يتغير سواء وافق العالم بأكمله اني مستحيل اسوي الي يردو

كافي الي سوو بيه من ماتت ماما لليوم .. بسام يتحكم بكولشي بحياتي .. حتى صديقات ماعندي بسببه.

اووووووف اشون راح اخلص من بسام  .. يااا ربي حتى نسيت اعرفكم بيه!

اني سدن اسمي غريب اعرف  ، بس معنى حلوو .. حسب كلام دادا حليمه (غطاء الكعبه)

عمري 18 سنه طالبه صف سادس ادبي نجحت هذي السنه الحمدلله وطلعت معدل كولش زين وحدخل كلية القانون واحقق حلمي اخيراً

شكلي اعتبره طبيعي مبيه شي خارق الجمال  يعني احس نفسي عاديه ما عدا عيوني الشي الوحيد الي احسه حلو بشكلي واحبه  .. لانو بابا يكولي عيونج اتذكرني بأمج!

عيوني واسعات ولونهم نرجسي فاتح كولش ع صفار ، رموشي كثيفات .. بشرتي عاديه مو حيل بيضه ولا سمره شعري قصير لانو اني دائماً اكصه مااحب الشعر الطويل

طولي 160 جسمي مو مليان ضعيفه اشويه لانو اني احب الرشاقه اكره الجسم المليان!

هذا اختصار لشكلي ..

اما حياتي .... فهذي المشكله العظيمه !

اني عايشه ويا اخويه الوحيد  بسام ، ماما بعد ما ولدتني بكم يوم صار عدها مضاعفات وماتت .. راحت وعافتني طفله عمري ايام !

بعد وفاة ماما بفتره كولش قصيره بابا سافر وعافنا اني وبسام يم دادا حليمه الي هي والدة ماما يعني ( بيبيتنا )

بابا وماما اتزوجو عن حب لذلك بابا متحمل فكرة موتها فترك كولشي وسافر دادا حليمه هي الي اعتنت بينا وربتنا الى ان كبرنا ، طبعاً بسام اكبر مني بـ 7 سنوات لانو ماما كانت عدها مشكله بالحمل اول ما ولدت بسام هم صار عدها مضاعفات بالولاده وكالولها الاطباء بعد ميصير تحملين لانو مو زين على صحتج!

وفعلاً بابا منعها انو تحمل مره ثانيه لانو كان يحبها !

فحاولت بكل الطرق تقنع بابا يتزوج مره ثانيه حتى يصير عنده اطفال خصوصاً بابا وحيد ما عنده اخوان فرادت يكون عنده اطفال حتى يكونون سند اله حسب تفكيرها طبعاً!

المهم بعد ما رفض بابا فكرة الزواج نهائياً ماما اخذت قرار لحالها وحملت مره ثانيه!

ونتيجه هذا القرار الي اخذته ماما اجيت اني ع الدنيا ..... وهي ماتت!

صح اني انحرمت من ماما وموعيت عليها ولا شفتها بس موتها تأثيره عليه كان اقل من بسام اخويه!

لانه كان متعلق بماما كولش ولهذا السبب لما ماتت حملني اني مسؤولية موتها .

فمن طفولتي الى ان كبرت علاقتي بي كانت سطحيه ومعاملته وياي قاسيه حيل حتى مرات احسه يكرهني!

بس دادا حليمه كانت دائماً تفهمني عكس هذا الشي وتكولي لتفكرين هيج هذا اخوج الوحيد وسندج ماعندج غيره.... وووو من هذا الكلام!

طبعاً اني من نوع بارده حيل وهادئه ونادراً ما اعصب رغم معاملة بسام القاسيه وياي بس اني احبه ولا مره بحياتي راددته او تجاوزت عليه!

صح بداخلي انقهر وابجي من تصرفاته وكلامه بس لما اشوفه اضحك بوجهه ولا كأنو صاير شي!

بابا يجي كل نهاية شهر يبقى ويانا كم يوم ويروح ..

كنت افرح من يجي بابا لانو احبه كولش ودائماً لما يجي ينيمني بحضنه ويحجيلي عن ماما ويكولي اشون اني اشبها .. والسبب الثاني انو بسام  اشويه يتغير من يشوفه .. يكوم يضحك ويسولف !

حتى معاملته وياي تتحسن مااعرف اذا كان هذا شي بالفطره عنده لانو شاف بابا وفرح!

او هو يمثل كدام بابا حتى ليعرف اسلوبه وتصرفاته الي يعاملني بيها...!

المهم ..

مرت السنين وكبرت لما صار عمري 15 سنه دادا حليمه اتوفت يعني قبل 3 سنوات واني حيل اتأذيت بموتها ولانو اني بفترة مراهقه فهذا الحدث اثر عليه لدرجه سيئه بحيث شخصيتي الهادئه والطفوليه  اتحولت الى شخصيه قاسيه وعصبيه .. متهتم بأحد ولا اسمع كلام احد .. كل الي اشوفه احاول اغيره بطريقتي واعاند هوايه .. وهذا الشي شعل حرب خلافات ومشاكل بيني وبين بسام !

صرت من يحجي وياي شي ارد عليه ضعف وما اهتم لكلامه واتجاهله وهو يتخبل من هذي التصرفات فتصير عركه تنتهي بأشهر من الزعل!

بابا بعد ما اتوفت دادا حليمه رجع يمنا بقى كم شهر وبعدها سافر لان الشركه مالته الي بالخارج اتخربطت اوضاعها بسبب غيابه!

فأضطر يتركنا مره ثانيه .. وهذي المره طولت غيبته بحيث كام ميجي نهائياً بس يتصل كل يوم يطمن علينا .. والاتصالات اتحولت من كل يوم الى كل اسبوع .. وبعدها كل شهر ... طبعاً هذا بالنسبه الي .. اما ويا بسام فأتصالاته ويا ع طول لانو شغلهم واحد!

الحاصل ..

اني هم اتأقلمت مع حياة الوحده اعتمدت ع نفسي بكولشي خصوصاً بعد وفاة دادا حليمه وتقريباً اتخطيت كل مشاكلي الشخصيه من خجل وخوف وتردد .. بس المشكله الوحيده الي مكدرت اتخطاها هي تحكمات بسام بحياتي!

ع كولشي يحاسبني ومن كولشي يمنعني .. وكأني لعبه بأيده وبابا ميدري بشي حتى صديقاتي بعد ميحجن وياي من اسلوبه وتصرفاته الهمجيه .. !

اكيد البعض حيفكر انو هذا خوف منه عليه!!

بس لاا بسام ديسوي هشكل حتى ينتقم مني ع الي صار بماما ديدمر حياتي ويكرهني بي مو اكثر!

هذا الجزء من حياتي كان عادي ومألوف .. والتغيير الحقيقي صار قبل سنتين تحديداً لما كنت بصف الخامس اعدادي!

فد يوم كعدت الصبح بدلت ودااطلع لدوامي الصباحي كالعاده !

لبست زي المدرسه قميص ابيض وصدريه اسود تقريباً تشبه التنوره بس قصيره وبيها لاصقيات كتف من الامام قماش ع شكل مربع والظهر مكشوف .. يعني يطلع القميص كوله !

وحذاء ابيض رياضي وجنطتي ع الكتف .. شعري كنت رافعته ولفاف ع رگبتي لانو الجو كان بارد!

المهم ...

طلعت من البيت الصبح وچان اشوف واحد واكف بالباب مالتنه !!

بالبدايه اترددت اطلع لانو بالعاده محد يجينا الا نادراً .. اقارب ماعدنا مقربيين علينا لانو بابا الوحيد الاهله وماما ما عدها بس اخت وحده ومسافره من زمان والباقي اهل ماما وبابا ميتين الي اخرهم كانت دادا حليمه!

يعني الي يجونا محدودين واعرفهم يأما موظفين من الشركه او السايق محمود مالتنا .. !

بس هذا الشخص شكله غريب وضخم رغم اني كنت بعيده عنه ، بيتنا كبير حيل و المسافه من باب البيت الداخلي لباب الشارع بعيده!

البيت هذا الي كاعدين بي بيت العائله من لما كانت ماما عايشه بابا اشترى وسجله بأسمها اول ما اتزوجها .. فمن ماتت مكدر يبيعه لانه يعتبر ذكرى منها وايضاً مكدر يبقى بي لانه يذكره بيها .. فبقينا اني وبسام بي.

الحاصل ..

من شفت هذا الواكف بالباب خفت منه بس بعدين كلت خلي اشوفه شيريد اكيد غلطان بالعنوان لان منطقتنا كلها بيوت مسؤولين ورجال اعمال يعني مؤمنه ومحد يدخللها اذا ميعرفو منو!

فمشيت للباب الخارجي طبعاً الباب الرئيسي حديد واتشوف الي واكف ورا.

فتحته وطلعت لكيت هذا الشخص اصلع ، ضخم كولش ، بشرته سمرا حيل ولابس بدله اسود ونظاره سوده و ورى سياره سوده مظلله !

شكله يخوف حيل بدا الخوف يسيطر عليه .. اني شطلعني!!

بس بقيت ملامحي هادئه .. بصوت حاد

سدن .. نعم؟!

الرجل .. هذا بيت السيد بسام؟

سدن .. حجيت بداخلي .. هههه كل هذي ضخامتك ع بالك فيل وشكلك المرعب وتكول لبسام الجربوع سيد بسام !!

مجاوبته بقيت اضحك بداخلي

الرجل .. بصوت اكثر حده .. هذا بيت السيد بسام؟!!

سدن .. صوته فززني ... باوعتله بس اني حاصرتني الضحكه من الكلام الي ابالي

جاوبته بصوت حاد .. نعم هذا بيت بسام منو حضرتك؟!

الرجل .. امشي صيحي كليله الباشا دينتظره بالسياره خلي يجي بسرعه!

سدن .. اسلوبه بالكلامه ونبرة الامر معجبتني ابد .. هذا اشايف نفسه ويتأمر عليه!!

رفعت حاجبي باوعت ع السياره مظلله كولشي ممبين .. بعدن رجعت باوعت عليه من فوك ليجوه وبصوت حاد كلتله ..

_اذا تريد بسام هذا الباب وروح صيحه بنفسك اني مااشتغل عندك .. عفته ودرت وجهي دااريد اروح للدوام ... ما احس الا هذا لزمني من ايدي !!!!!!!!

الرجل .. جر سدن من ايدها وبصوت عالي .. انتيييي هيييي وين رايحه دااكلج الباشا بنفسه جاي عليه امشي صيحي خلي يجي !

سدن ..هنا اني كل خبالاتي طفرن ... جريت ايدي من عنده ودفعته كل قوتي .. وكمت اصيح بوجهه .. انت اشون تتجرأ وتلزمني اليوم اشهرك شهيره حيوان حقير .. شفتني صغيره ع بالك تكدرلي .. لااااا انت متعرف منو سدن اليوم محد يخلصك من!

بقيت اصيح بس اني كل ذره بيه ترجف خوف وغضب .. بيدي كان كتاب وقلم جريت القلم وبقيت ادفع بي بالقلم بس حيل لان مااريد الزمه .. هو ع بالك حايط وواكف ولا اتزحزح واني العوبه ادفعه بالقلم!! (اتخيلو الغباء)

وخرت عنه وبقيت اضرب بالجامه مالت السياره .. وبصوت عالي ...

_وينه الباشا الحقير مالتك خلي يطلع يشوف چلابه اشون اتعامل الناس .. بس الي يشغل هيج ناس عنده اكيد واحد همجي وحيوان .. لو بيك خير اطلع مو خاتل وهاد چلابك ع الناس... اضرب ع السياره واصيح بعلو صوتي .. اجه الحارس يريد يوخرني .. مااحس الا صوت بسام ورايه!!

درت وجهي لكيت بسام بس بالشورت طالع !!!

و وجهه اصفر ع بالك شاف شبح!!

اني فكرته خاف عليه من شافني دااصيح وهذا الفيل واكف يمي ... شو هذا اجه يركض جرني من ايدي حيل ودفعني للحديقه!!!

هنيالي هذا الي ردته عون ع اساس .. ولو اني شتوقع منه مو جديد عليه!

دفعني للحديقه بس هو يرجف مااعرف اشبي ..

بسام .. لج انتي تخبلتي ... شسويتي الله ياخذج شسويتييييييييي!

سدن .. اريد اجر ايدي منه مااكدر لازمني بقوه .. بقيت اتوجع واباوعله .. بصوت يرجف ألم ... ايديييي دتأذينيييي عوف ايدي!

بسام .. بوجهج گبل للدوام ومن تجين اني اعلمج!

سدن .. سحبت ايدي منه بقوه بس محجيت اي كلمه لان منظر بسام و الرعب الي بوجهه من صدوك خوفني اول مره اخاف من بسام لهدرجه!!

دنكت اخذت كتابي من الكاع وبوجهييييي للمدرسه بس قبل لا اروح مريت من يم السياره المظلله بقيت اباوع من ورا الجامه بس بغضب ع الحقير الي كاعد بداخلها ورغم كل الي صار ما نزل!!!!

بعد هذا اليوم كولشي بحياتي اتغير!!!!

وحتعرفون الباقيييي بعدين 💔

للحكايه بقيه🤗

اول بارت دائماً يكون ممل وغير مفهوم بس حتتوضح التفاصيل ع البارت الثاني يعني طولو بالكم😅

انتظر رأيكم بالبارت وتوقعاتكم للشخصيات ☺️

ولتنسون التصوييييييييت حتى انزل البارت الثاني 💜

بقلمي (هدى الموسوي) الاميره الموسويه👑

ما احلل لاي شخص ياخذ كتاباتي وينشرهم(ذمه)

سدن .. بعد الموقف الي صار الصبح ومنظر بسام المرعوب لما شافني دااصيح ع هذا الي بالسياره خلصت الدوام بس صفنات!

افكر شراح يخلصني من بسام اذا رجعت!

راح يظل يغلط ويصيح وخو بعيده يبطلني من المدرسه!

شنووو لاااا .. ياربي غير اموت اذا صدوك بطلني .. هي المدرسه المكان الوحيد الي انفه بي عن الخنگه والسجن الي معيشنيا...!

يا ربي اترجاك لتخلي يبطلني من دوامي واني اوعدك وعد بعد لو اشوف طنطل گدامي ما احاجي ، اعوفه واروح ولا اصيح على احد ابد .. ولو هذا الفيل المحترك يستاهل الي سويته بي لان انت تعرف اشسوه بيه الحيوان الحقير الگلب الحمار .. بس اوعدك بعد مااصيح ع احد بس اهدي بسام وخلي يسكت عني !

بقيت الدوام كوله صافنه وافكر كل اشويه فكره اتعس من القبل اتمر ابالي .. كل مره مااخاف من بسام لما تصير مشكله .. بس هذي المره من صدوك انرعبت من النظره المخيفه الي كانت مرسومه ع وجهه  .. شنو السبب مااعرف!

معقوله يخاف من هذا الي اسمه الباشا مدري شنو؟!!

اوووووف شيخلص الدوام وارجع للبيت .. بس لااا يا ربي لتخلص الدوام مااريد ارجع واشوف بسام!

خليت راسي ع الرحله وعقلي الف فكره اتدور بي  .. چان اسم صوت كائن مسموم يحاجيني  ..!

اقدملكم الحيه الصفراء صابرين !!

طبعاً اني سبق وكلتلكم ماعندي ولا صديقه بسبب بسام وتصرفاته السز!

بس هذي صابرين الوحيده الي بقت وياي وطبعاً مو حباً بيه لاااا .. بس الحقيره كانت تحب بسام وميته عليه!

لذلك هي الوحيده الي تحجي وياي وتجيني للبيت .. رغم اني اعرف نواياها وحقارتها وسمها بس ساكته ومتحملتها لان ماعندي غيرها صديقات ، مرات احتاجها لما اغيب اخذ منها الدروس او لما ماافهم شي هي تشرحلي وكذا .. للعلم بسام اصلاً ممعبرها ولا يعرف وين الله خالقها بس هي مستقتله عليه .. !

المهم قاطعت صفنتي وحجت ..

صابرين .. اشبي الحلو صافن؟!

سدن .. لا ماكو شي سلامتج.

صابرين .. عليه؟!!

شنو ماكوو شي اصلاً مبين عندج سالفه كبيره شالغه بالج .. احجيلي شكو؟!!

سدن .. بداخلي .. ههه هي هاي العايزه بعد احجيلج مشاكلي .. حبي مبيه شي صدكيني بس محتاره بأمتحان باجر ومقاريه شي.

صابرين .. يبووو عابتلج خوفتيني ع بالي الحب بي شي .

سدن .. بداخلي .. اي مو ادري بيج انتي افعى مصلحجيه ، بسخريه كلتلها ..

_يا حب هذا؟!

صابرين .. يبووو انتي اليوم مطفيه من الرئيسي خلي اكوم من يمج كأبتيني .. باي.

سدن .. اشون ع اساس حضوج اذا رحتي .. دكومي كامت روحج.

ولت من يمي واني بقيت نايمه ع الرحله حتى بالدروس مرفعت راسي كلت للمدرسات مريضه ، عافني نايمه حتى بالدروس ، بس اني بداخلي قلق وخوف فضيعات اذا رجعت للبيت شحيصير!

بعد ساعات وساعات خلص الدوام .... وصار لازم ارجع للبيت!!

اخذت جنطتي وطلعت بوجهي للبيت بس اني خطوه اخطيها وخطوتين ارجعهم!

وصلت للبيت و وكفت .. مااكدر ادخل .. بعد تفكير وصفنه طويله قررت ادخل والي يصير يصير .. يعني قابل شنو يريد يسويلي؟!

اني اصلاً مغلطت بشي وهي المفروض اخويه اشون يقبل واحد يلزمني واسكت!!

بقيت ابرر لروحي واهديها .. فتحت الباب ودخلت لكيت البيت فارغ!!

اووووووووف جريت نفس وركض لغرفتي دخلت وسديت الباب .. شمرت نفسي ع السرير ونمت بملابس .. حتى الحذاء منزعته!

اني بيه حاله من اخاف لو انقهر بس انام حتى لو هسه كاعده من النوم بس يصير عندي مشكله اركض للفراش انام!

فخليت راسي ونمت .. ما كعدت غير الدنيا العصر.. اتصورت بسام يجي ويكسر الباب عليه .. بس كعدت كولشي ماكوو والبيت هدوء!!

فتحت الباب وطلعت ع كيف خطوه خطوه .. رحت لغرفته خليت اذني ع الباب ماكو صوت!!

فتحت الباب ع كيفي كلت خاف نايم .. لكيت الغرفه فارغه!!

معقوله بعده مجاي؟!!

مو من عوايده يتأخر .. نزلت جوه البيت فارغ .. الظاهر بعده مجاي حيطول هذا العذاب اشوكت يجي واخلص!

رجعت لغرفتي سبحت ، بدلت ونزلت رحت للمطبخ طلعت اندومي خليته بالمايكرووف وكعدت انتظره يكمل واكله لان ميته من الجوع .. كعدت ع الكرسي مالت الطعام وصفنت فززني صوت المايكرو يصفر .. اخذت الصحن وكعدت دااريد اكُل .. چان يدخل بسام!!!!!!!!!!!!

گلبي كام يرجف والخاشوكه وكعت من ايدي بلا وعي .. بقيت جامده .. انتظر الكارثه تحل عليه !!

بس الي صار صدمني صدمة عمري ... بسام دخل مبتسم!!!!!!!!!!

واكفه بمكاني مثل التمثال واباع عليه ..

بسام .. باوع شاف الاندومي ع الميز ..

_هلاو اشونج .. تعالي اتعشي اليوم جبتلج اكل من بره الي تحبيهم .. بيتزا وبركر!

سدن .. مااكدر احجي اسكتوو عني .. خلي استوعب الي ديصير!

بسام .. الووو شنوو متسمعين؟!!

سدن .. بلعت ريگي وبصوت متلعثم .. انت منو؟!!

بسام .. ههههههههه اشكد غبيه .. امشي جيبي صحن وتعالي ليبرد الاكل!

سدن .. لااااا ويضحك!!!!!

يا جماعه احد يضربني راشدي ، يدفرني خلي اصحى اكيد دااحلم اني .. لو هذا مو بسام !!

اييي اخاف هذا فضائي ومتنكر بصورة اخويه .. اييي لان مستحيل هذا الكائن يكون نفسه بسام!!

بسام .. يمعووووده اليوم  اشبيج بس تصفنين ويامن احجي؟!

سدن .. هااا .. اييي .. اي .. حروح اجيب الصحن واجي...!

درت وجهي ورحت للمطبخ بس اني عقلي بغير عالم خايفه من هذا الكائن الغريب الي ديحجي وياي .. جبت الصحن وكعدت يمه ع الميز هو غسل واجه طلع الاكل وبدينا ناكل .. رغم كل الخوف الي بيه والصدمه الي عايشتها بس من شفت البيتزا نسيت اسمي !

اكلت اكلت لحد ما بطني انملت ..

بسام .. ها اشلونه العشه؟!

سدن .. طيب يسلموو .. بس عندي سؤال !

بسام .. شنو؟!

سدن .. شصايرلك اليوم .. شنو شفت حلم انك راح تموت ودتسوي عمل زين قبل لتودع!

بسام .. طاح حظج لج اكو وحده اتكول لاخوها الچبير هالكلام؟!

سدن .. والله اني شاكه انت مو بسام اخويه !

بسام .. هههه ثول لج اليوم اشبيج؟!

سدن .. شنو اشبيج دتشوف نفسك لو لا؟!

تحجي بهدوء ، جايبلي عشه ودتاكل وياي .. لا والصدمه دتضحك!!!!

بسام .. اممممم ماشي راح اكلج شنو سبب هذا كله!

هذا كله لانج اليوم الصبح تصرفتي خوش تصرف و رفعتي راسي كدام الباشا.

سدن .. شنووووو؟!!

الصبح اتصرفت تصرف زين؟!!!

بسام .. اي.

سدن .. بس الصبح ما كان هذا رأيك لما جريتني من ايدي وتهديدك الي كلتلي من تجين حسابج عندي!

بسام .. اني كنت فاهم الموضوع غلط ، عموماً سدي السالفه وكملي عشاج.

سدن .. مو كلتلكم هذا مو اخويه بسام؟!

الصبح نظرة موت بعيونه من الغضب وهسه يمدحني!!

بس لا تنگلب الدنيا واني بعدني مشفت شي بحياتي .. كملت اكل ، نظفت المطبخ وكعدت بالصاله .. بسام راح نام بغرفته لان كال تعبان من الشغل واني لزمت كتابي وقريت لامتحان باجر الى ان نعست وصعدت نمت .. لصبح كعدت بدلت ونزلت.. بسام كان نايم الظاهر ماعنده دوام اليوم!

اخذت جنطتي وطلعت الشارع فارغ محد بي .. لان الدنيا الصبح

طبعاً احنا عدنا سايق بس اني بالدوام الصباحي احب اتمشى للمدرسه لانو الجو شتا والشوارع تجنن اعشق هيج اجواء احس نفسي متحرر من قفص بسام!

فطلعت الصبح كالعاده اتمشى وصلت النص الطريق حسيت اكو شي ديمشي ورايه!!

التفتت لكيت الشارع فارغ وبس سياره وحده واكفه!!

سياره رياضيه سوده تلمع اول مره اشوفها بالشارع اصلاً!

بس جامها مظلل مشفت الي بداخلها .. صفنت عليها اشويه شكلها يجنن بعدين رجعت كملت طريقي بس مشيت اسرع لانو السياره غريبه!

ابتعدت مسافه عنها وملتفتت ابد سويت روحي دااقرا ، وصلت لراس الشارع شفت اكو كم واحد ديمشون اطمئنيت اشويه لان اكو عالم بالشارع وصلت مسافه قريبه ع المدرسه اجوي اثنين ولد يمشون بصفي اني صرت بنصهم .. طبعاً اني حسيت بيهم وشفت رجليهم ديمشون بصفي ، بس سويت نفسي ممنتبه كلت ماارفع راسي لا ع بالهم داانطيهم مجال لو من هذولي البنات الي يكيفون ع هذي الحركات !

بقيت مدنكه وامشي بس بسرعه .. عاد هم كامو يحجون اثنينهم بس الكلام عليه .. واحد يتغزل والثاني يرد عليه!

اني گلبي كام يرجف من الخوف يا ربي هذولي من وين طلعولي .. شسوي هسه؟!

بقيت ع مشيتي محركت ساكن ولا كأنو اسمع .. الطريق احسه صار عليه شطوله اريد بس اوصل ماكوو .. كلامهم بدا يصير منحط حيل بحيث ما اكدر اسكت بعد .. اني صح كنت خايفه و وحدي بس اني مو جبانه ومااسكت بهيج مواقف ابد .. وكلامهم حيل قذر .. من غصباً عليه رفعت راسي وحجيت ويا هذا الي يمشي قريب عليه ..

سدن .. بصوت حاد ومليان غضب ..

_احترم نفسك و ولي من يمي احسنلك!

الولد ..واذا مرحت شتسوين؟!!

سدن .. انزع حذائي و ع راسك المعفن هذا بلكي يطلعلك عقل.

الولد .. اووويلي اموت ع الحلو لما يعصب .

سدن .. انت الظاهر حيوان متفهم لغة البشر .. درت وجهي عنه واريد امشي چان العار الثاني مد ايده ولزمني من ايدي يريد يجرني عليه ...!!!!!

اني مكدرت اسوي شي لانو الحيوان فجأه لزمني وممتوقعه توصل بي السفاله لهدرجه .. بعدني دااحاول استوعب الي ديصير .. ما احس الا شي ضخم مشفت بس ظهره جر الولد من يمي مثل الي يسحب شعره من عجينه .. فره عليه وانطى كله ع وجهه خلا الولد يفقد وعيه مااعرف مات وبس شفته وكع بالكاع والدم مغطي!!!!

اني بقيت مثل الثوله مااعرف شنو ديصير .. ولا اعرف هذا الوحش من وين طلع وشبسرعه ضرب الولد وموته!

الولد الثاني من شاف صديقه وكع انهزم وهذا بقى مدد بالشارع والعالم اتجمعت .. اني بدون اي تفكير مني اخذت جنطتي وركض للمدرسه موكفت غير يم باب قاعتي دخلت للصف رجليه احسها ترجف .. شمرت نفسي ع الرحله بس اني المنظر الي صار والولد الي سبح بدمه اشوفه كدامي !

شافتني صابرين ..!

صابرين .. سدن اشبيج شصاير ليش وجهج اصفر؟!

سدن .. ماكو رد بس ترجف!

صابرين .. ولج سدن مو دااحجي وياج اشبيج احجي خوفتيني شصاير؟!

سدن .. اخذت جنطتي وطلعت من الصف رحت للحمامات دخلت طلعت موبايل وخابرت ع حميد السايق مالتنا ...

كلتله هسه تجي للمدرسه تاخذني للبيت .. مخليته يحجي وقبل لا اسمع رده سديت الخط وبقيت كاعده بالحمام .. صافنه واعيد المشهد بعقلي .. بعد ربع ساعه طلعت من الصفنه والتفكير طلعت لكيت الطلاب داخلين للصفوف وبس اني بالساحه!

سحبت نفسي بسرعه وطلعت لكيت الحارس بالباب .. كالي ممنوع اتطلعين!

بعده يحجي عفته وطلعت .. بقى يصيح ورايه ولا كأني اسمع .. اول ما طلعت من باب المدرسه شفت نفس السياره الي شفتها الصبح واكفه كدامي!!!!!!!

مااعرف لويش دب الرعب بداخلي من شفتها .. دااحس اكو ربط بينها وبين الي صار!

قررت ارجع للمدرسه حتى اذا اتعرض للعقاب بس مااطلع وهاي السياره واكفه .. رجعت خطوتين ليورا .. چان اشوف محمود اجه بالسياره .. اول ما وكف ركضت وكض دخلت للسياره وسديت الباب!

هو من شافني بهالحاله استغرب!

محمود .. عمو سدن اشبيج صاير شي؟

سدن .. وديني للبيت بسرعه .. بسرعه محمود الله يخليك.

محمود .. حاضر .. حاضر .. بدون اي كلام ثاني اخذني للبيت اول ما وصلنا نزلت بسرعه التفتت وچان الكى نفس السياره و رانا من وكفنا وكفت!!

لاااااااا هذي مو صدفه .. اكيد هذي السياره مراقبتني ... ركضت للبيت دخلت بوجهي شفت بسام ديتريك بالمطبخ!

من شافني الهث و وجهي مخطوف اجاني بسرعه..

بسام .. اشبيج .. شصاير؟!

سدن .. بسام عفيه اطلع شوف هذي السياره البره المن الله يخليك.

بسام .. لج يا سياره .. سدن اشبيج ؟!!

سدن .. مااعرف ما اعرف بس اطلع شوفها الله يخليك شوفه شيريد مني؟!!

عافني بسام وطلع ركض اني بقيت واكفه وجسمي احس بي رجفه غريبه ما اعرف سببها اول مره هيج يصير بيه ... اشويه ورجع بسام ...

بسام .. ماكو اي سياره بس محمود بالشارع .. !

سدن .. شنووو ماكو سياره .. هسه كانت واكفه ورانا.

بسام .. دااكلج ماكو اي احد بالشارع .. بعدين واذا سياره واكفه وراكم شنو يعني ليش هالكد خايفه؟!!!!

سدن .. انت متعرف شصار ... حجيتله كولشي بس بالكوه كدرت احجي الي صار احس نفسي دينكطع من اتذكر!

بسام .. تمام اهدي هسه اهدي.. واني اشوف شنو سالفة هاي السياره .

سدن .. صعدت الغرفتي گبل لفراشي .. ملاذي الوحيد والامان الابدي .. خليت راسي ونمت .. من هذاك اليوم مرحت للمدرسه اولاً لان خايفه من الي صار .. وثانياً المديره دزتلي ورقة فصل لمدة اسبوع لان طلعت من الدوام !

بسام كال اني احل سالفة المدرسه لتخافين وانتي هاليومين لتداومين .. الى انت ترتاح نفسيتج ونحل موضوع السياره!

بقيت اسبوع بالبيت .. اشويه نسيت الي صار .. الكعده بالبيت خنكتني .. وصابرين خابرتني كالت باجر عدنا امتحان ضروري ولازم تجين لان مدرسة الماده كالت بعد مااعيده .. قررت اداوم !

كلت البسام اني حداوم .. كال براحتج بس خلي محمود هو ياخذج ويجيبج !

كلتله اوك ..

صدك بدلت وطلعت انتظر محمود ... دقيقه .. 5 دقايق ... 10 دقايق ... ومحمود افندي ماكوو!!!

اتصل عليه ماكو .. زين اشون اتأخرت والامتحان اول درس!!

بعد تفكير طويل ... كلت خلي اروح اكيد الي صار سوء شي عابر كل يوم يصير بكل مكان .. ومراح يتكرر بعد!

سميت بسم الله ومشيت للمدرسه وحدي ... وصلت لشارع ... چان توكف يمي سياره سوده مظلله ... بلمح البصر انفتح الباب و واحد خلت ايده ع حلكي وسحبني لداخلها ... ...... بعدها مشفت شييي غير السواد !!!!

للحكايه بقيه!!

اسفه جداً ع التإخيييير المفروض انشر البارت من الظهر بس والنبي كنت طالعه ومكدرت اكملها 😓

رأيكم بالاحداث وتوقعاتكم للبارت القادم!

*ملاحظه النشر بين يوم ويوم يعني كل يومين بارت واذا اذاااااا صار عارض ومكدرت انشر راح ابلغكم ع الانستا مالتي انشر بالستوري في حال صار تغيير ...

لتنسوووووون التصويييييييت لانووو البارت الاول ميشجع ابداً 😒

واشويه طولوو بالكم وياي ع الاحداث ☺️ ان شاء الله تصدمكم 💔

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

سدن .. دخلوني للسياره وخلو شي ع خشمي مااعرفه شنو .. اني بسرعه نمت ماادري فقدت الوعي .. المهم مدريت بشي؟!

فتحت عيوني بالكوه راسي احسه ثگيل ومصدع .. اول مفتحت الضوه صار بعيني بسرعه غمضت!

كعدت بصعوبه واني لازمه راسي .. اشويه اشويه فتحت عيوني .. شفت المكان كبير حيل واشبه بالمكتب .. او قاعة اجتماعات .. هيج شي!

طاوله كولش كبيره وكراسي داير مدايرها كومه .. الغرفه عباره عن شبابيك  ع طولها والضوه ماليها .. اتقربت من الشباك حديقه اتجنن وكبيره كولها اشجار مزينه و ورد .. المنظر يجنن والجو كولش حلووو .. المنظر يسحر رحت لغير عالم .. نسيت اني مخطوفه!!

بعدني دااتأمل هذا الجمال .. فجأه سمعت الباب انفتح .. التفتت شفت  واحد دخل وديسد بالباب شفت بس ضهره!!!!!

مر ع بالي مثل الخيال انو هذي الهيئة ، الضخامه و الظهر شايفتهم .. بس وين؟!!

رأساً كلبي انقبض بقوه والخوف اتملكني .. رجعت للواقع والاحداث الي صارت الصبح .. بلا تفكير رجعت خطوتين ليوره .. هو سد الباب والتفت عليه!!!

طبعاً بهذاك الوقت مكدرت اركز بشكله وملامحه لانو الخوف كان لاعب دور ..!

بس الي حكوله هسه .. هو بعد ما الموقف انتهى والوضع اتغير وهدء كولشي نوعاً ما بديت انتبه واركز بهذا الكائن الي كدامي!

وعليه حوصفلكم شكله ..

هو يعتبر طبيعي ما بي شي مميز .. اسمر اشويه .. شعره كان حالقه خفيف .. ملامحه حاده حيل عيونه بني .. بس احلى شي بي لحيته وشواربه فد شي يسحر!!

اضخم مني بهواي جسمه مشدود اني عفت كولشي وركزت ع كرشه ... اعرف هسه حتضحكون اتكولون انتي بيا حال ؟!!!

بس اني عندي حاله من اشوف شخص عيوني لا ارادي تروح ع بطنه .. وهذا الي صار كالعاده .. والصدمه عنده كرش "

يعني كرش طبيعي مو من هذولي الي واصل لخشمهم .. مو نشاز شي مرتب .. رغم اني مااشوف بالكرش شي حلو بس هذا الكائن كولشي بي لايق عليه وتحس بفخامه من تشوفه!

اذا سألتوني عن رأيي بي ... فهو مو جميل لااااا وانما وسيم اكيد تعرفون الوسامه شنو؟!!

يعني شي من تشوفه تنسحر رغم هو كولشي بي عادي ..!

اعتقد وصلتكم الفكره اكثر من هذا مااكدر اوضح بعد لانو من ادقق بي افكاري تتخربط .... مااعرف لويش !

كان لابس قميص اسود اول دكمتين فاتحهم ورافع ارداناته .. وبنطرون هم اسود

.......

شفته التفت عليه .. اني رجعت خطوتين ليوره ، وكدامي مزهريه بيها ورد جريتها بسرعه ورفعتها بأيدي!

هو من شافني هشكل وكف بمكانه وابتسم ... بصوت هادئ وضخم تماماً ملائم الهيئه الي كدامي ...

_ اشلون صرتي؟!

سدن .. هذا من كل عقله يحجيييي .. مخطوفه و يسألني اشونج ...!!

..

اول رد فعل الي صحت بي بصوت عالي .... انت منووو .. اني وين ... شتريد مني ... بقيت اسأله واصيح بشكل هستيري .. وهو مثل جبل الجليد واكف كدامي .. وبصوت هاااااادئ وكل برود يحجي ...

_اهدي واتفضلي اكعدي وراح تفهمين كلشي ماكو داعي لا للخوف ولا للصياح.

سدن .. هدوئه والثقه الي يحجي بيها خوفني اكثر .. عليت صوتي اكثر .. كلت بلكي يخاف من الصياح ويعوفني اروح ..

_ما اهدأ ولا اكعد اذا مااعرف منووو انت وشتريد مني واني وين؟!!

_امممممم ماشي لتهدئين ولا تكعدين براحتج ، بس ع الاقل اسمعيني حتى اعرفج بنفسي يمكن تتوضح الصوره اكثر.

سدن .. بقيت واكفه والمزهريه بأيدي .. احجي دااسمعك .. انت منو وشرايد مني؟!

بخطوات واثقه بكل هدوووء وابتسامه هادئه ع وجهه .. مد ايده الي

_اقدملج نفسي نور دين حازم وهذا مكتبي الي انتي حالياً بي!

سدن .. وشكوو خاطفني شتريد مني ؟!!

نور الدين .. هههه خاطفج؟!!

اكو واحد يخطف شخص يخلي بمكتبه!!

لا ويعرفه بنفسه؟!

كنت مفكرج ذكيه .. معقوله لهدرجه تفكيرج محدود!

سدن .. تفكيري محدود؟!

لما حضرتك دتمشي بالشارع ويجي واحد يخدرك وياخذك بسياره مظلله هذا شنو تسمي جنابك نزهه صباحيه؟!

وبعدين انت من وين تعرفني اصلاً حتى تفكرني ذكيه ؟!!

نور الدين .. بهذي حقج .. واني جداً اعتذر ع الطريقه الي جابوج بيها الحيوانات هذولي بس صدكيني عقابهم راح يكون جداً عسير لان سببولج هذا الرعب واتمنى تقبلين اعتذاري.

سدن .. اول مره اشوف خاطف عنده اخلاق!

نور الدين .. نعم؟!

سدن .. شرايد مني ؟!

نور الدين .. سلامتج مرايد شي بس صارلج فتره ممداومه فقلقت عليج لذلك بيت اطمئن مو اكثر بس الكلاب الي دزيتهم قلقوني اكثر عليج .

سدن .. قلقت .. وتتطمن عليه؟!!

انت منوووو وشنووو قصتك .. ومن وين تعرفني ؟!

نور الدين .. صار كم دقيقه دنحجي وانت ع هذا الوضع متعبتي .. ع الاقل نزلي المزهريه من ايدج ترى ما اكل اني صدكيني.

سدن .. باوعت ع المزهريه وبعدين عليه .. معليك بأيديه وجاوبني ع سؤال!!

نور الدين .. دار وجهه عنها بدون اي اهتمام .. راح للمكتب طلع جكاره ودخنها بعدين ضغط ع دكمه يمه .. اشويه واجتي بنيه نازكه ومرتبه ..

السكرتيره .. دخلت شافت سدن والمزهريه بأيدها .. انصدمت من المنظر ومن نور الدين الي واكف بكل هدوء .. بصوت متلعثم نعم باشا تأمر بشي؟!

نور الدين .. عصير للانسه سدن وبلغيهم يحضرون السياره راح اطلع.

السكرتيره .. تمام باشا .. عافتهم وراحت.

سدن .. باشا ......؟!!!!!!

اهاااااااا هسه عرفت منووو انت ... نفسك الي اجيت قبل فتره والحيوان مالتك حاول يلزمني مو؟!

وميحتاج اتجاوب ع سؤال عرفت شنو رايد مني .. اتريد تنتقم لكرامة حضرتك الي هنتها ذاك اليوم مو.

بس انت غلطان اذا تعتقد تكدر تمس شعره من عندي لان بسام وبابا ينهوك خلاص.

نور الدين .. هههه انتي هواي خيالج واسع تنفعين تصيرين كاتبه.

سدن .. وخر عن طريقي وخليني اروح احسنلك .. بعد ساعه اذا مرجعت للبيت بسام يكلب الدنيا ع راسك.

نور الدين .. كعد بهدوء ع الكرسي كدامها وبقى يباوع عليها بتركيز .. وكأنه ديتفحص شي ثمين كدامه  .. بصوت هادئ وابتسامه متفارك وجهه ...

_انتي هواي حلوه

سدن .. بصوت عالي وبنفاذ صبر .. وانت قليل ادب ومو صاحي .. خليني اروح دااكولك.

نور الدين .. ابتسم اكثر لدرجه بانت اسنانه.. ومن تعصبين تحلوين اكثر.

سدن .. لا اله الا الله .. انت الظاهر مو بس مخبل واطرش هم..

شمرت المزهريه بالكاع و ركضت دتريد تطلع من الباب مرت من يمه هو كام بسرعه ولزمها من ايدها .. جرها حيل صارت كدامها عينها بعينه ميفصلهم غير كم انش ... بقى صافن بعيونها وهي الغضب والصدمه من تصرفه ونظراته يتطاير منها ..

نور الدين .. بصوت همس .. وعيونج اتدوخ!

سدن .. هذا مستحيل يكون طبيعي .. يباوعلي بنطرات غريبه .. وكلامه هز كياني .. بقيت مصدومه مااعرف شأسوي .. بهذي اللحظه فتحت السكرتيره الباب .. اني بسرعه دفعته عني وابتعدت...!

السكرتيره .. العصير باشا.

نور الدين .. بدون ميلتفت عليها بقى مركز بسدن .. عوفي يمج .

السكرتيره .. والسياره جاهزه حضرتك.

نور الدين .. تمام .. واشرلها بأيده بمعنى روحي.

طلعت السكرتيره وبقى هو وياها وحدهم من جديد ..

سدن ابتعدت عنه رحت وكفت يم الشباك بس اني احس جسمي كوله يرجف من الموقف الي صار .. قربه مني وكلامه مااعرف شسوو بيه ..

نور الدين .. اخذت العصير ، وكفت وراها ومديتلها ايدي .. اتفضلي اشربي.

سدن .. التفت لكيته ورايه ..والعصير بأيده!!

بصوت حاد مليان غضب .. مااشرب شي وما اريد شي خليني اطلع منا وبس.

نور الدين .. ماشي اشربي هذا العصير وكلام رجل اخليج ترحين .

سدن .. هه انت ع بالك غبيه اني جايبلي عصير مااعرف شنو مخلي بي ، مخدر لو منوم وتريدني اشربه؟!

نور الدين ... امممم تمام وياج حق .. خلص امشي اخذج للبيت.

سدن .. شكراً الك اني اروح بس طلعني منا.

نور الدين .. قبل كم دقيقه كنتي فاقده الوعي وتحت تأثير المخدر .. يعني يحتاجلج وقت يلا تصحصحين وطالما متقبلين تشربين شي ولا تنتظرين لحد متتحسنين فمستحيل اخليج تروحين لوحدج اني بأيدي اوصلج وكلام رجل اخذج البيتج گبل.

سدن .. كان واضح عليه انه صادق بكلامه .. بس مع ذلك گلبي ممتطمن له .. ماشي اروح وياك بس رجعلي موبايلي خلي اتصل ببسام واكوله اني وين .

نور الدين .. ماشي انطيج الموبايل بس متتصلين لانو بسام اذا عرف بيج وياي فأنتي الي راح تتأذين لان اخوج اعرفه كلش زين واني مااسمح بهذا الشي .

سدن .. كلامه صحيح .. بسام اذا عرف اني مو بالمدرسه لو بشنو احلف ميصدك وخصوصاً اذا شاف هذا وياي يذبحني لان هو ذاك اليوم بس حجيت وجهه صار اصفر اشون اذا شافنا سوه؟!!

وحتى اذا حلفلته وقنعته انو مو بأرادتي اجيت فاول شي يسوي يبطلني من المدرسه .. هاي اذا ما ذبحني اكيد!!

زين اشون اروح ويا هذا ؟!!

بقيت ساكته مااعرف شنو احجي!!

نور الدين .. انطيتج كلام رجل اخذج لبيتكم .. جربيني.

سدن .. اوك.

نور الدين .. اخذ سترته ، فتحلها الباب ومد ايده بمعنى اتفضلي...!

سدن .. دنكت اخذت جنطتي من التخم وطلعت بس اني عين عليه وعين ع الطريق .. طلعت من الباب ما اوصفلكم البنايه الي كنت بيها فد شييي راقي كولها ابيض واضويه تعمي العين!

وصلنا للحديقه اتجنننن من الخارج احلى بهواي من ما شفتها من الغرفه .. طلعنا للشارع ... شفت السياره الرياضيه الي كانت مراقبتني قبل كم يوم!!!!

باوعت عليها بصدمه ورجعت باوعت عليه..!

هو من شاف ملامح الصدمه على وجهي ابتسم ...!

نور الدين .. فتحلها باب السياره و وكف مبتسم .. اتفضلي

سدن .. مشيت من يمه بسرعه وصعدت بس اني مليون حيره وسؤال اتدور ابالي .. احاول اربط شي بشي ومدافهم اصلاً الي ديصير..!

صعد هو وياي وطلعنا بالسياره طول الطريق اني ساكته بس بداخلي خوف مو طبيعي مينوصف .. هذي اول مره بحياتي اصعد بسياره واحد مااعرفه ... و وحدنا !!

مشينا بطريق مشايفته اول مره اشوف هيج اماكن .. تعرفون مخلصه حياتي بالحبس .. مسافه وحسيت السياره دتدور بيه .. ونفسي دتلعب ... بدون وعي كلتله اوكف اوكف ...

نور الدين .. بقلق .. بشنو حاسه ، بيج شي؟!

سدن .. معدتي گلبت عفيه نزل الجامه اريد هوى..

نور الدين .. بسرعه نزل من السياره وراح فتح الباب مالتها .. كعد ع رجليه ع الرصيف .. بصوت هادئ .. ليش مشربتي العصير .. وتردين ترحين لوحدج؟!!

سدن .. كوله من وراك لو ما انت والحيوانات الي خطفوني مصار بيه كل هذا .. الله ينتقم منك ومنهم.

نور الدين .. صح كل بسببي واسف بس اهدي واخذي نفس هسه .. حاولي تهدئين.

سدن .. لا هذا من صدوك مو صاحي وربي .. اني ادعي عليه وهو خايف عليه!!

بقيت ساكته واجر نفس طويييل كل اشويه !

حسيت معدتي هدت ونفسي انتظم .. صرت احسن بس بعدني حاسه بدوخه بسيطه.

نور الدين .. صرتي احسن؟!

سدن .. اي بس اشويه دايخه.

نور الدين .. تمام انتظري هنا هسه اجيج .. لتطلعين من السياره.

سدن .. وين رايح وعايفني هنا .. ؟

نور الدين .. ثواني و ارجع لتخافين.

سدن .. لا لتروح عفيه وديني لبيتنا .

نور الدين .. تمام اوديج بس انتظري على ماارجع.

سدن .. عافني وراح لبنايه كبيره مطعم مااعرف فندق .. اني دخلت للسياره وسديت الباب عليه.

صدوك دقيقه يمكن ورجع !!!

نور الدين .. فتح الباب .. يلا انزلي.

سدن .. وين؟!!

نور الدين .. انزلي للمطعم اكلي شي انتي دايخه ولازم تاكلين.

سدن .. شنوو شنوو .. شدتحجي انت؟!

ادخل مطعم .. و وياك؟!

من كل عقلك اتريد واحد يشوفنا ويكول لبسام حتى يذبحني!

نور الدين .. لتخافين محد يشوفج بي اني وانتي صدكي ومحد يعرفج اصلاً.

سدن .. بعصبيه ما انزل .. ومااريد شييي بس وديني للبيـ.. آآخ راسي.

نور الدين .. تمام لتنزلين ابقي هنا هسه اجي.

سدن .. ويـ..ن .. بعدني دااحجي عافني وراح .. بس هالمره اتأخر .. رجع ولما رجع بيده علاكه كبيره!!

دخل للسياره وخلا العلاكه يمي ..

نور الدين .. اخذيها.

سدن .. شنو هذا ؟!!

نور الدين .. اكل .. بما انو مقبلتي تنزلين تاكلين الاكل اجه الج بنفسه.

سدن .. يا ربييي مااعرف اخاف لو اطيير من كلامه؟!

بقيت متردده اخاف الاكل بي شي .. صفنت ع الاكل وسكتت!

نور الدين .. كدامج الاكل اخذته من المطعم .. واذا تردين تتأكدين انطيني لفه اكلها كدامج حتى تصدكين مبي لا مخدر ولا شي.

سدن .. هااا .. اوك .. مديت ايدي فتحت العلاكه .. ما اكوللكم شنوو من اكل بداخلها .. حتى الي طالع من العمليات هستوه تنفتح نفسه ع الاكل .. واني تعرفوني مااحب اكل!!

اخذت لفه واكلت .. بس مكثرت لان هو كاعد يمي عيب هسه يكول هذي مشايفه!

اكلت لفه وعصير وعفت الباقي .. هو يسوق بهدوء ولا حجه كلمه حتى مباوعلي .. وصلنا نص الطريق جان يرن الموبايل!!!

طلعت الموبايل من جنطتي ... بسام يتصل بك!!!!!

گلبي يمكن وگف عن الحركه وقتها .. ع بالك بسام طلع كدامي مو اسمه بالموبايل!!

هو التفت شافني الظاهر الخوف كان واضح ع ملامحي .. لدرجه خلا يحجي ..!

نور الدين .. لتخافين .. جاوبي.

سدن .. شنـ..ـوو.. لا..اا .. ما اا جاوو ..ب

نور الدين .. كلتلج لتخافين كوليله اني بالمدرسه .

سدن .. بصوت مرتبك .. لا .. اخاف يعرف؟!!

نور الدين .. بس لتخافين وسوي الي اكلج عليه!

سدن .. بگلب يرجف ونفس مگطوع .. رديت ...

_ااا.. اللوو!

بسام .. انتي وين؟!

سدن .. ها .. بـ..ااا .. بـالمدر..سسـ..ـه.

بسام .. منو اخذج .. محمود يكول ما اخذج ويامن رحتي لعد؟!!

سدن .. هاا .. اايي .. مو ..مو محمود هذا .. شسمه ..!

بسام .. سدن اشبيج .. وانتي وييييين؟!!!!

سدن .. بلعت ريكها واستجمعت نفسها .. بالمدرسه .. اني بالمدرسه بسام .. كلتلك.

بسام .. منو اخذج اذا محمود مموصلج؟!

سدن .. رحت لوحدي .. لان محمود اتأخر .. واني عندي امتحان فأضطريت اروح.

بسام .. ماشي اني جايج للمدرسه حتى ارجعج .. اطلعيلي.

سدن .. بصدمه وخوف .. باوعت لنور الدين .. لكته صافن عليها بنظره هادئه وابتسامه .. شنووو ... تجيني ... هسه؟!!!!!!

بقيت صافنه بوجهه انتطر منه حل للمصيبه الي حتصير ..!

نور الدين .. هز راسه بهدوء بمعنى خلي يروح للمدرسه!

سدن .. الصدمه والرعب مااوصفه الكم لان مينوصف .. والاعظم من هذا كوله الكائن الثلجي الي كاعد يمي وبكل برود يكولي خلي يروح!!

بلا وعي طلع مني الكلام ..

_اوك تعال حطلع.

سد بسام الخط واني دخل اتنفست .. بس احس روحي حموت .. گلبي يدك بكل سرعته ..

التفت عليه ومااعرف شنو احجي!

نور الدين .. اهدي .. كلشي مراح يصير وبسام راح ياخذج من المدرسه.

سدن .. انت شدتحجي .. احنا وين والمدرسه وييين شيوصلنا قبله ومدرستي خطوتين عن بيتنا !!!

نور الدين .. بس اهدي واتركي كلشي عليه.

سدن .. صفنت بوجهه .. نبرة الثقه الي بكلامه وملامحه الهادئه حتخبلني .. جر الموبايل واتصل..!

نور الدين .. الوو انت وين؟!

سدن .. مااعرف شنو حجه ويا هذا الي اتصل بي .. بس سمعته هو .. يحجي بهدوئه المعتاد..!

نور الدين .. هسه تتصلي بـ بسام الاحمد وتكله يروح للشركه حالاً.

_وانت تروح تستقبله على ما اجي.

_تمام.

سدن .. سد الموبايل وكمل سياقه .. اني الصدمه والذهول والخوف والقلق كولهم متلبسين بيه .. بقيت ساكته الى ان وصلنا للمدرسه .. كلتله نزلني بعيد عن المدرسه ليشوفني احد وياك.

نور الدين .. تمام.

سدن .. هذا الكائن هواي يصرف تمام !!

يلا هسه شعليه بي اني .. اخذت جنطتي ودااريد انزل چان يحجي...!

نور الدين .. اذا حابه اتكولين لاخوج ع الي صار ماكو مشكله .. لكن خوفاً عليج ماانصحج بهذا الشي .. وانتي حره.

سدن .. حتى اذا مكلت البسام اساساً حيعرف كولشي .. اذا مو مني من المدرسه حيجي يسأل عني ويتأكد بنفسه .

نور الدين .. لتخافين اعتبري موضوع المدرسه منتهي مراح يعرف غير من عندج.

سدن .. اشون ميعرف شقصدك؟!

نور الدين .. اني راح اتصرف بهذا الخصوص .. ومحد راح يحجي شي عن غيابج لا لاخوج ولا الغيره.

سدن .. يا ربييي هذا فضيييع معقوله لهدرجه يكدر يسوي هيج!!!

والله مااعتقد يكدر يسكت ست سعديه هذي فضيحه.

نور الدين .. ها شقررتي ؟!!

سدن .. هاا .. اوك مراح اكول شي .. بس لتفكر تعيد الي سويته اليوم وتدز چلابك تخطفني مره ثانيه.

نور الدين .. ميتكرر ابد واتمنى تتقبلين أعتذاري .. او ع الاقل فكري بي.

سدن .. يااااي گلبي حيطير يا جماعه .. سبحانه مغيير الاحوال من خوف ورعب الى فرح وأطمئنان .. اوك حفكر .. بس عندي طلب اذا ممكن.

نور الدين .. وهو؟!

سدن .. تكدر تخليهم يعيدولي الامتحان لانو ضاع بسببك اصلاً.

نور الدين .. بأبتسامه .. ههه تمام .

سدن .. شنو يعني؟!!

نور الدين .. يعني اعتبري تم.

سدن .. گلبي كان ديطير من السعاده بس ملامحي بقت ممهتمه .. اوك شكراً.

نور الدين .. تمام .

سدن .. نزلت من السياره بس اني الكاع مسايعتني من الفرحه .. لان خلصت من تحقيق بسام .. ومن مشكلة الامتحان .. يا ربي شكراً الك .. اكيد انت دتكافأني لانو وعدتك بعد مااطول اللساني ولا اغلط .

نزلت من السياره وبنفس اللحظه طلعو الطلاب من المدرسه .. ركضت بسرعه دخلت بنصهم ... و وكفت ع الرصيف انتظر بسام .. چان يجي محمود بسيارتنا..!

رحت اني صعدت بالسياره ولا كأنو شي صاير ..

سدن .. اليوم الصبح لويش مأجيت محمود .. اشكد اتصلت عليك؟!

تعرف من وراك بسام سوالي قصه مالها اول من تالي!!

محمود .. اني اسف بنيتي بس الجهاز لاعبين بي الجهال ومسوي صامت ما سمعته الله شاهد واخذتني نومه .. اسف وحجيت ويا استاذ بسام وفهمته ع كلشي كلتله انتي ما الج علاقه .

سدن .. ايي كولش حيسكت بسام .. ع اساس متعرفه انت .. المهم لويش ما اجه هو مو كالي حيجي ياخذني هو؟!

محمود .. ماادري اتصلو بي من الشركه وراح .. كالي اني اوصلج.

سدن .. تمام .!

وصلت للبيت لكيت بسام ماكوو .. بدلت ونمت راسي حيل مصدع .. كعدت العصر ع صوت موبايلي .. صابرين دتتصل!!

حجيت وياها .. اول ما بدت اسألتها وتفاهتها ع الي صار الصبح وحبها الكبير وخوفها عليه ليكون صارلي شي !!

كلتلها انو كنت خايفه من الامتحان واتصلت ع بسام اجه اخذني.

طبعاً هي من سمعت بسام جاي للمدرسه وهي متدري... مو بس انجلطت صار بيها صرع .. بعد لغوه طووووويله .. كالتلي انو ست سعديه كالت مراح تعيد الامتحان بعد لو انموت!

كلتلها عادي مو مشكله !!

كالعاده اول ما خلص استحوابها بخصوص بسام .. سدت الخط وولت

اني بعد منمت نزلت جوه .. جان يجي بسام!!

بسام .. هلاو اجاج محمود اليوم؟!

سدن .. اي اجه .. لعد انت مو كلتلي حجيج لويش دزيت محمود؟!!

بسام .. صارتلي شغله ومكدرت .

سدن .. كنت اتحاشى اباوع لبسام من احجي ويا .. وخوف بداخلي مينوصف منه .. لان بحياتي ممكذبه عليه ولا طالعه بدون علمه .. لذلك كنت اخاف بس يباوع بعيوني انفضح وينكشف كولشي .. اوك.

بسام .. ليش رحتي للمدرسه اليوم وحدج اني شحجيت؟!

سدن .. كلتلك الي صار يا بسام .. واضطرييييت اروح.

بسام .. بعد لتكرريها .. واذا مااجه محمود كليلي واني اوديج.

سدن .. اوك.

كالعاده خلص اليوم .. ونمت الصبح رحت للدوام اخذني بسام .. اول مطلعت من البيت شفت سيارته واكفه براس الفرع!!

گلبي كام يدك سريع من شفتها .. بس سويت روحي عادي .. وصلت للمدرسه من شافني دخلت راح!

دخلت للصف وبدا الدرس والمفاجأه صارت... ست سعديه كالتلي سدن حظري نفسج الدرس الثاني تمتحنين!!!!!!!

طبعاً ما احجيلكم الصدمه الي كانت ع وجه صابرين .... نظرة الشماته الي بعيونها كوني بعد ماامتحن وحرسب بلحظه اتبخرت!

الصف كوله اتفاجأ اشون ست سعديه تعيد الامتحان!!!!!

هذي ست سعديه اقل اقل اقل ما يقال عنها حقنه .. واذا كالت ع شي لو يجي وزير التربيه بنفسه متغيره .. زين شنو الي صار هسه!!!!

اني بكل ثقه الغرور صار عندي مليون مو الف .. الدرس الثاني امتحنت .. وجاوبت الحمدلله من السعاده والراحه الي حاستها .

يمكن هذا احلى يوم بحياتي لحد الان .. بالنسبه الي معجزه ست سعديه تعيدلي الامتحان .... البنات كولها تتسائل اشون وليش!

كنت فرحانه فرحه من داخلي دتطلع احسها ... بس كل هذا اتبخر من رجعت للبيت.

خلص الدوام طلعت ، هم شفت سيارته واكفه يم المدرسه بقى ورانا من دخلت للبيت راح ..

دخلت البيت فارغ .. صعدت لغرفتي سبحت وبدلت .. چان اسمع صوت بسام يصيح!!!!

نزلت ركض .. لكيت بسام واكف والغضب يطلع نار من عيونه .. وصابرين واكفه بصفه والسم يتطاير من ضحكتها الخبيثه!!!!!!

بسام .. بصوت عالي مليان غضب ... وين كنتي البارحه وليش بالمدرسه غايبه؟!!!!!

للحكايه بقيه😍

للي يسألون عن سبب التأخير مو اختلاف بموعد النشر ولا عدم انتظام بمواعيدي لااا .. بس التفاعل ميشجع وما الي واهس اكملها ، اعرف حتكولون القصه بعدها بالبدايه وممفهومه لذلك التفاعل قليل وحقكم اكييد بهذا الشي بس اني طبيعتي هشكل اذا شي ميشجع يخرب واهسي بي 😪اعتذر منكم واحاول اشجع نفسي بنفسي😂

رأيكم بالاحداث وتوقعاتكم للبارت القادم 🤗

والي يكولون لويش نور الدين ميحجي هو عن نفسه اصبروو اشويه بعده ممعرفكم ع حاله ☺️

اشويه صبر حبايبي وجزيل الشكر لكل الي يعلقووون تعليقات حلوه مثل روحهم وكل الي يصوتووون 😘😙💜🙏🏻

بقلمي (هدى الموسوي) الاميره الموسويه👑

ما احلل لاي شخص ياخذ كتاباتي وينشرهم (ذمه)

كل الي تعرفو عني لحد الان هو اسمي وبس (نور الدين) .

وبعض الاشياء السطحيه الي نقلتها الكم بطلة قصتنا .. هي نفسكم هم مكانت تعرف عني شي لذلك موصلت الكم الصوره كامله عني!

بعضكم عجبته شخصيتي وبعضكم حس انو شخصيتي مهزوزه وضعيفه خصوصاً من تعاملي ويا بطلتكم وبرودي تجاه تصرفاتها..!

هذا شي طبيعي و وارد جداً دائما حكم البعض ع الاشياء يسبق معرفتهم بجوهرها ...!

فعليهِ .... راح احجيلكم شي بسيط عني ومتأكد كثير منكم مراح يحبني .. وهم عادي .. بصراحه اني مو هواي اهتم برأي الاخرين بيه .. اهم شي اني اكون راضي عن نفسي .. وهذا كان مبدأي بالحياة .. بس بعدين دخل شخص بحياتي خلاني اغير هذي الفكره او المبدأ .. واعيش حتى ارضي هو وبس.

نور الدين اسم جدي (جد والدي) يعني ابو ابو لابويه .. اعرف دختو بس هذي اول مره احجي شي يخصني واشرحه للناس .. لذلك حاولو تطولون بالكم وياي!

جدي هذا هو الي ربه ابويه من طفولته وكبره لذلك ابويه كان يحبه هوااي فسماني على اسمه .

اني يتيم الام والاب وماعندي غير اخ واحد .. اسمه يمان اصغر مني ب5 سنوات .. من اني عمري 12 سنه ماتو اهلي بحريق .. بالصيف كانو نايمين الظهر وصار الحريق بسبب تماس كهربائي حسب ما كالولنا.. وتعرفون بالصيف بسبب الحراره كلها تكعد ببيوتها العالم محد يطلع .. فمن صار الحريق محد دره عنه الى ان فحمو ابويه وامي 💔

ومحد كدر ينقذهم اصلاً لان بيتنا كان صغير حيل وقديم .. فبسرعه بسرعه انتشرت النار و وكع البيت عليهم .. اني و يمان بالمدرسه .. من رجعنا عرفنا الي صار .. يمان كان عمره 7 سنوات بوقتها !

من عرفنا بالي صار اتدمرت حياتنا وتغيرت للابد .. صح احنا كنا على كد حالنه وابويه يلا يلا يحصل كم فلس حتى يوكلنا .. بس وجودهم بحياتنا كان يعادل ملك الدنيا وما بيها!

فوك موتتهم حتى بيتنا راح .. صفينا اني ويمان بالشارع .. رحنا كعدنا ببيت ابن عم ابويه .. لان ابويه كان وحيد اهله ماعنده لا اخ ولا اخت!

فأخذنا ابن عمه كونه مقرب من ابويه مثل الاخوه واكثر .. واحنا ماعدنا احد .. اضطرينا انروح ويا عشنا عنده .. اول ايام كانو زينين ويانا بمعاملتهم .. بس بمرور الوضع اتغيرت هذي الطيبه اتحولت الى ضرب وتعذيب ، غلط واهانات !

بطلنا من المدرسه ، مرت عمي شغلتني عدها خادم .. جيب هاي .. سوي هاي!

شفت الويل منها واذا مااسوي الي تريده يشتغل عليه الضرب

بحيث مره من المرات كنت تعبان حيل خلتني اجيب تراب من الشارع العام لبيتها حتى تزرع الحديقه .. وفعلا نقلتلها اكثر من 15 گونيه ع ظهري لحد ما رجليه انتهت!

تعبت حيل ودخلت للبيت اريد اكل لكمه ، اسبح ، ابدل ملابسي!

كالتلي ماكو اكل ومتدخل البيت اذا متوزع التراب بالحديقه وتسويها ، تزرعها وبعدين تنظفها!!!

اني كنت حيييل تعبان بكل ما للكلمه من معنى .. انفجرت بيها كلتلها مااسويها وادخل غصباً عنج .. يمكن كان عمري بوقتها 14 سنه على مااذكر!

الحاصل ..

عاندتها ودخلت .. هي سكتت محجت شي بس منطتني غده ولا خلتني ابدل .. رحت دخلت للغرفه الي كعدتنا بيها اني ويمان والي هي عباره عن مخزن متروك .

من التعب خليت راسي ونمت .. ماكعدت غير ع صوت الصياح .. فتحت عيني شفت عمي واكف ع راسي يصيح وبيده حزام!!!

اني فزيت من مكاني .. اشو هذا وكعلي ضرب وضرب .. ملخني تملخ بالحزام!

وسحلني طلعني بره .. شمرني الظهر بعز الحر بالشارع .. بدون مااعرف شنو السبب اصلاً!!

شافتني العالم التمو عليه .. دخلت البيت الجيران غسلت وجهي واديه كلها دم من السحل الي سحلنيا .. وطلعت ماادري وين اروح!

طبعاً اخويه يمان بقى يمهم

هو من ماتو اهلي صارت عنده مثل الصدمه ميحجي ويا احد بس وياي وقليل .. وباقي الوقت كله لو صافن لو نايم!

وكان يسمع كلام مرت عمي شنو تكول يسوي .. لان يخاف هواي .. اما اني كنت العكس اعاند ومااسوي الي تريده لذلك كنت انضرب وانهان ع طول..!

المهم..

بقى يمان يمهم لان مستفاده منه اما اني فنطردت بقيت بالشارع افتر ماادري وين اروح'

مشيت لحد ما وصلت يم بانزين خانه

كعدت ع الرصيف مالتها وصفنت .. ماادري وين انطي وجهي واني بعدني كلشي ماافتهم ، والاهم من كل هذا اخويه يمان اشلون اعوفه هناك وحده؟!

يم هاي المترحم .. واشلون اخذه منهم .. واذا اخذته وين انعيش؟!

هو اني محتار بروحي؟!!

صفنه وحيره ، جوع وحر .. تعب ونعاس .. وجع وألم بكل جسمي وروحي .. !

ما اطول عليكم .. ابو البانزين خانه شافني من الظهر لليل كاعد بالباب ع باله احد دازني لو اريد اسويلي شي !

بالليل نايم ع الرصيف .. نمت ع لحم بطني و وجع جسمي .. مااحس الا واحد يجر بيه !!

كعدت شفت كدامي اثنين واكفين .. سحلوني من ملابسي ودخلوني بالبانزين خانه!!

دخلت لكيت رجال مرتب كاعد ع مكتب داخل البنايه الي بالبانزين خانه!

سألني وبقى يحقق وياي شعندك هنا .. ومنو دازك!!

من هذا الحجي...!

اني حجيتله عن وضعي واشلون انطردت .. وشوصلني لهنا!

بالبدايه مصدكني بس مااعرف شنو الي خلت يغير رأيه ويصدك بيه .. يمكن لمس الصدق بعيوني .. يمكن وضعي والحاله الي اني بيها خلته يقتنع!

المهم ..

كعدني وكال للي سحلوني من بره انو يجيبولي عشه!!

كلتله مااريد مو جوعان!

كال ميصير انت من الصبح حسب متكول مماكل شي اشلون تبقى ع لحم بطنك!

كلتله ما اخلي شي بحلكي مو من تعبي .. مااخذ صدقات واني مو مجدي!

الظاهر اصراري عجبه او أثر عليه!

فأقترح عليه انو اشتغل عنده بالبانزين خانه!!

ما اوصفلكم الفرحه الي حسيتها بهذيج اللحظه رغم الحاله الي كنت بيها .. بس اول مره بعد وفاة اهلي حسيت بالفرحه لامست گلبي!

كلتله موافق .

كالي بس بدون راتب لمده كم يوم الى ان اتأكد منك ومن كلامك .. و اشوف شغلك اذا عجبتني تبقى معجبتني تنطرد!!

كلتله هم موافق .. وحتى لو متنطيني ابد فلوس بس مكان انام بي واكل هذا كافي!

ع هذا الاتفاق .. نمت ... والصبح كعدت يوم جديد بحياتي .. احس كل الوجع والتعب اختفو"

شديت حيلي واشتغلت .. اول اسبوع ما اخذت اي فلس من صاحب المحطه .

بس بعدها من وثق بيه وشاف شغلي حسبلي راتب كل يوم 5الاف!!!

متصدكون الشعور الي اعتراني واني استلم يوميتي .. اول فلوس اخذها بتعبي!

اتكول 5 ملايين مو خمس الاف ..!

بقيت بالمحطه لمدة سنه .. بالنهار اغسل سيارات وبالليل انظفها وانام ..!

لميتلي كم فلس كنت مااصرف ولا درهم .. ومن السواق احصلي اكراميات هم اضمهن .. اكلي ع صاحب المحطه .. بس ملابس كل شهر اشتريلي هدمه!

سنه كامله ماادري عن يمان شي!

طكت روحي .. استأذنت من صاحب المحطه ورحت لبيت عمي وكفت بالركن بعيد عن البيت .. وبقيت انتظر بلكي يدزو واشوفه!

بلكي ينفتح الباب واشوفه!

ساعه بعد ساعه بالحر واكف .. محد طلع!!

الى ان أيست وتعبت من الشمس والوكفه .. استسلمت وقررت ارجع .. درت وجهي وچان اشوف يمان واكف كدامي!!!!!!!!!

شايل غراض وعلاليك !!

مو هذاك يمان الي عفته قبل سنه .. ضعفان صاير عوده .. و وجهه اسود!!

هو شافني والغراض وكعن من ايده .. بس ما اجاني بقى واكف بمكانه!!!!

حسيت الزمن توقف لحظتها .. رجليه من الصدمه متحركن!

الى ان حجه يمان ...

يمان .. اخويه ؟!!!!

نور الدين .. كل ذره بروحي انهارت ادموعي جرت .. ورجليه ركضت .. حظنته وبقيت ابجي .. ابجي .. وهو يبجي !!

مااعرف اشكد بقينا نبجي .. ساعه .. يوم  .. سنه .. ماادري ماادري .. يمكن الزمن صدك وكف بهذاك اليوم!

بلا اي كلام مسحت دموع يمان وكلتله يلا امشي وياي.

يمان .. وين؟!!

نور الدين .. تجي وياي بعد متبقى هنا .

يمان .. وين نروح؟!!

نور الدين .. معليك انت امشي بسرعه قبل ليطلع واحد ويشوفنا .

يمان .. لا نور الدين اني اخاف .. خليني ارجع لا يدورون علينه ويلكونه .. ايي واذا لكونه يمكن يموتونه!

نور الدين .. خليت تديه ولزمت  يمان من وجهه .. بصوت حاد ونبره هادئه ..

_انت تثق بيه لو لا؟!!

يمان .. بقى صافن بوجه اخو.

نور الدين .. يمان؟!!!!!

يمان .. هز راسه بخفه بمعنى .. اي اثق بيك!

نور الدين .. اذا تثق بيه معناها لتخاف ، لان محد يمس شعره منك واني عايش.

يمان .. حظن اخوو بقوه وكأنه يتشبث بطوق نجاته!

نور الدين .. اخذت يمان من يمهم وركضنا ... ركض ركض ... لحد المحطه!!

اخذت يمان بغرفتي الي انام بيها داخل المحطه .. كعدته وكعدت يمه اريد اسئله اشلون طلع كدامي هيج!

چان يندك الباب!!!!

فتحته طلع ولد صديقي اسمه منير .. كالي انو صاحب المحطه ابو فاطمه يريدك!!

كلت ليمان ابقى هنا ولتتحرك ابد على ما ارجعلك .. عفته وطلعت !

رحت الابو فاطمه لكيته معصب وشكله مزعوج حيل!!

بلا مقدمات اول ما شافني عاط بيه ...

ابو فاطمه .. منو هذا الجايبه وياك للمحطه؟!!

نور الدين .. هذا اخويه يما..

ابو فاطمه .. وشنو فاتح فندق اني كل يوم جايبلي واحد وياك ؟!

اسمع ابني اني وكفت وياك لانك كنت محتاج بس مال تجيب واحد ثاني وياك لا متصير هاي السالفه .. يأما تشوفلك حل وتطرده او انت تاخذه وتروحون اثنينكم اني ما اريد دوخة راس ومشاكل هنا.

نور الدين .. مااعرف ليش ابو فاطمه هيج انزعج من وجود يمان وياي رغم الغرفه كبيره ومحد وياي بس اني ابات هنا يعني وين المشاكل بالموضوع؟!!

محجيت ويا ولا كلمه عفته وطلعت .. جمعت غراضي والفلوس الي لامهن وطلعنا اني ويمان!

اباوع لاخويه الدمعه بعينه .. حسيت عيونه  تكول ها اشو صفينا بالشارع .. لعد وين الثقه!!

اخذته ورحت لفندق قريب من المحطه ورخيص يعني مناسب لوضعنا .. اجرت غرفه لمدة اسبوع كعدت يمان بيها واني كل يوم اطلع من الصبح ادور على شغل!

الى ان لكيت واحد بنچرچي (مصلح سيارات)

وكعت بعينه شغلني بالگوه .. اشتغلت عنده والحمدلله حسبلي يوميه كلش زينه !

الرجال كان وحيد وماعنده لا اقارب ولا ولد يعني ماعنده خلفه .. لذلك من شافني وشاف شغلي وأمانتي سلمني المحل بيدي .. بقيت ويا تقريباً 6 سنوات !

صار عمري 19 سنه .. حالتي اتتحسنت هوايه .. اجرت بيت .. ويمان رجعته للمدرسه .. طبعاً حتى يرجع اخويه للمدرسه كان يحتاجلنا جناسي ومستمسكات .. واني كنت ملتهي يادوب الحك ع الشغل!

فكلفت ابو المحل الي اشتغل بي هو عنده صديق بالحكومه ضابط ماادري شنو يعرفه عن طريق المحل يجون يصلحون عنده .. وفعلاً كاله خلي يجيب اخو ويجيني!

اخذت يمان ورحت بعد معاناة ومراجعاة للنفوس ودائرة الاحوال المدنيه ... روحه وجيه .... طلعولنا اني ويمان جناسي .. بس بشق الانفس !

المهم ..

رجع يمان واني بقيت اشتغل .. من صار عمري 20 سنه اتوفى صاحب المحل!!

ماعنده بس زوجته مره كبيره بالعمر .. كالتلي اشتغل بالمحل بس اريد تنطيني منه مصرف .. اشلون الراتب يعني!!

اني وافقت لان الحلال حلالها يعتبر واني اشتغل عدهم!

فعلا استمريت ع هالحال .. الى ان فد يوم اجاني واحد صاحب معارض!!

هو زبون عندي واني ويا صحبه!

كالي ليش متدخل بشغلة المعارض والسيارات .. بيها ارباح هواي وترفعك من الارض للسماء!!

بالبدايه ضحكت عليه لان اني ويني وين هاي السوالف .. صح اني ذكي وشاطر بشغلي بس مو مال هيج مخاطر والحلال اصلاً مو ملكي حتى اتاجر بي!

رفضت الفكره كدامه بس بقت ابالي .. لما رحت لبيت الحجيه انطيها الرابت راس الشهر .. حجيتلها الموضوع!

اتوقعتها تعترض وحتى تاخذ مني مفتاح المحل وتطردني .. طبعاً المحل الي اشتغل بي مو صغير لااا سلسلة محلات اني الي طورتها ووصلتها لهذي المرحله !

فتحت محل غسيل ومحلات هواي كلها تخص السيارات وتصليحها .. يعني راس المال صار كلش ضخم .. يعني بالقليل كل شهر كنت اخذ للحجيه مليونين!

فمن كلتلها الفكره كنت مأيس من المووضوع .. بس جوابها صدمني!!

كالت الحلال حلالك والحجي كان مأمنك على روحه وميخاف ، فأني مثل زوجي مأمنه بيك .. واذا صارلي شي هذا كله راح يكون الك محالل ومواهب .. بس لتنسانه لا اني ولا الحجي .. تسويلنه ثواب صوم صلاة وتذكرنه !

كلامها جداً فاجأني!!

طلعت من عدها اتصلت بصديقي صاحب المعارض .. كلتله موافق!

ذبيت راس المال كله بهاي الشغله .. وكلت اذا راحن العوض من الله والمحلات موجودات عندي حتى لو ابدي من الصفر .. واذا ربحت التجاره بعد خير وبركه من الله!

اتوكلت على الله والي يتوكل على ربه ميخيب ابد .. فتحت معرض صغير بي كم سياره !

والحمدلله نجحت عندي اول صفقه وبعت السيارات ال4 الي اشتريتهن .. زاد عندي راس المال!

رجعت فتحت المحلات وشغلتهم لان اني وقفتهن من اخذت راس المال .. بس من نجح الشغل رجعت شغلتهن وكبرت المعرض .. اتوسعت شغلتي وصرت تاجر سيارات ... بعدها فتحت افرع لتجميع السيارات وصرت موزع رئيسي بالبلد!

حالتي اتغيرت جذرياً .. اشتريت بيت وسياره الي وليمان .. اشتريت عقارات شركات مقاولات عامه .. يمان اتخرج مهندس معماري .. فتحتله مشروع

مخليته يحتاج شي حتى لو بكد الذره ابد .. كرست كل حياتي لاخويه .. ردت اعوضه عن الظيم الي عشنا .. والحمدلله الله فتحها بوجهي .. صرت معروف على مستوى البلد وحتى للخارج سافرت وفتحت افرع لشركاتي .. حققت حلمي صرت رجل اعمال كبير ... كبر اسمي والعمو هم كبر ... محسيت غير اني عمري 38 سنه!!

خلال هذي الفتره شفت وعرفت  هوااااي بنات من كل الاصناف .. الحلوه ، الكبيره ، الصغيره ، الغنيه ، الفقيره .. الشريفه .. المنحطه .. المستوره .. السافره .. بس ماكو وحده دخلت ابالي .. وبحياتي ممارست الحرام ابد .. حتى علاقات عاطفيه مسويت ، اشكد حاولن وياي .. بس ابد ابد ما احس بالحب تجاه اي وحده!

واشكد حاولت احب واعيش قصة حب تنتهي بالزواج واستقر مكدرت  .. كل وحده تتقربلي ابعدها عني ، عكس اخويه يمان الي كل يوم حاب وحده وعلاقاته من كل الانواع .. عاطفيه ، غراميه .. وحتى جسديه!

الى ان فد يوم اخذتني الصدفه لبيت شريكي .. كنت داخل صفقه حيل مهمه وهذا الشخص هو الطرف الثاني بالصفقه .. اني مو من عوايدي اروح الاحد حتى اذا حياتي بأيده هم هو يجيني !

بس هذاك اليوم مااعرف شنو الي خلاني اروح .. شي سحبني واخذني لبيته لدرجة حتى اني استغربت من نفسي بالبدايه ... بس بعدين من شفتها .... عرفت السبب!

كنت طالع من البيت  رايح للشركه الصبح والطريق كان ازدحام لذلك اضطر السايق يدخل بطرق فرعيه حتى يختصر الازدحام .. واحنا دنمر من احد الشوارع كالي السايق .. باشا هذا بيت بسام الاحمد !!

صاحب الصفقه الي كلتلكم عليها .. اني كانت عندي اوراق الصفقه وعقودها بالسياره .. مااعرف شنو الي خلاني اكول للسايق ينزل يصيحه الي!

نزل السايق .. اني كنت دااتصفح باللابتوب .. وسمعت هوسه خارج السياره!!

رفعت راسي وشفت وحده واكفه تصيح وتتعارك ويا الحارس!

بالبدايه  ع بالي زوجته لبسام الاحمد .. بس شكلها كان ناعم وطفولي مو مال متزوجه!

اول مشفتها ماادري شصارلي انثولت ..

ملامح ناعمه .. شعر قصير رافعته بشكل جذاب .. خشمها احمر من البرد .. ملابسها زي المدرسه يسحر عليها .. ما ادري ولا اعرف شصارلي انسطرت .. بقيت اراقب حركاتها وعصبيتها ع الحارس .. الى ان حاول يلزمها ... وهنا هي انتفضت!!!!

ردة فعلها حييييل عجبتني بحيث ابتسمت لا ارادي .. بالمناسبه ..

اني انسان صعب جداً .. صح بالي طويل وهادئ جداً بس من اعصب ادمر كلشي .. عصبيتي انتقام!

اكتم الشي اكتمه ومن انفجر ما ارحم احد!

هواي ناس غلطو بحقي وحاولو يدمروني او ياخذون اشياء تخصني ودمرتهم يعني توصل لدرجة الموت !

اكدر انهي حياتهم وبسهوله هم .. ايدي واصله لاعلى مكان واكبر مركز بالدوله .. هسه البعض يكول مبالغه وماكو هيج شي!!

لا غلطانين واكوو هيج واكثر .. اذا عندك فلوس تكدر تشتري ارواح ناس وتبيعها بسهوله ماكوو شي يصعب عليك بس اذا عندك فلوس .. كلها تركع تحت رجلك .. واني مو بس متمكن لااا اني قادر ، وفوك المتمكن زياده!

صح أذيت و دمرت ناس .. نهيت اسمائهم وامحيهم من مراكزهم وجودهم .. بس مو ظلم !

ابد ما اظلم احد ، غير حقي ما اخذ .. والي يعاديني يا ويله .. كتبت اسمي بدمي ووصلت لهذا المستوى الي وصلته بجهدي وتعبي .. محد نصفني ولا احد رحمني .. ومع ذلك اني ساعدت ورحمت هواااي ناس.

فالفكره من هذا انو اني شخص بارد جداً ميجذبني الشي بسهوله .. ولا شخص بسهوله يكدر يخليني اهتم بي !

بس هذي المخلوقه من شفتها انسطرت .. احسها مدت ايدها وحركت گلبي .. شكلها وحركاتها وعصبيتها بقت مطبوعه بعقلي متروح ابد .. حتى من اتجاوزت عليه وبقت تضرب بالسياره محسيت بغضب ولا انزعجت .. شنو السبب ماادري!

هذي الحاله مو طبيعيه واول مره تصير .. الظاهر يحتاجلي ازور طبيب اخاف دااعاني من شي !

اخوها من شافها تصيح مااعرف شنو كاللها بس واضح انو هي تخاف منه هواي لانو نظرة الخوف الي انرسمت ع ملامحها اكدت هذا الشي!

اخوها اني ماارتاحله ولا اطيقه .. انسان سطحي وبس يلغي ماكو افعال .. واني اكره هيج نوع من البشر!

فمن شفتها خافت منه وراحت بسرعه .. شي بداخلي خلاني امدحها كدامه واثني ع تصرفها .. رغم اني مو بحاجه لهذا الشي ولا يهمني اصلاً "

بس الشعور الي حسيته تلقائياً اترجم على شكل كلام لاخوها.

مر اليوم وحاولت بكل الطرق ابعد صورتها من كدامي مكدرت .. ممعقوله الي ديصير .. اني سامع حب من اول نظره وهذا الشي مستحيل يصير وياي بالذات .. بس تفكير من اول نظره هذا الي مسامع بي ابد !!

ثاني يوم من الصبح طلعت بسيارتي مااخذت السايق .. لا ارادي رحت لبيتهم ..

شفتها رايحه للمدرسه واتحرشو بيها اثثنين .. فقدت اعصابي وقتها .. نزلت ركض خلصتها منهم !

وهذا الشي بدل ميطمنها خوفها بالاكثر!!

بعد هذا الحادث مشفتها اختفت عدة ايام .. مكامت تداوم فدزيت عليها الحرس كل يوم يشوفوها مردت اروح بنفسي وتشوفني اكيد راح تخاف مني واني اخر شي اريده انو تخاف مني!

دزيت الحرس يطمنوني عليها بس الاغبياء خطفوها .. لان احنا عدنا كلمة سر لما نريد انجيب واحد انكول اتطمنلي عليه!!

فهم فهمو كلامي غلط راحو خطفوها الكلاب!

والباقي تعرفوو ... اكيد هي كالت الكم كلشي لان اعرفها متكدر اتسد حلكها .

المهم بعد ما رجعتها لبيتها اتصلت بالمساعد مالتي الي هو ايدي اليمين تقريباً اعمالي نصها هو يديره كونه محامي واثق بي اكثر من نفسي .. اتصلت بي وكلتله يهتم بموضوع طلعتها من المدرسه بحيث محد يدري بيها .. وفعلاً هو رتب كلشي!

اني هم اطمئنيت عليها وقررت بعد ما اروح عليها ولا اتدخل بيها ، بعد موضوع الخطف لان مااريد سمعتها تتشوه على انو انخطفت !

والي تنخطف سمعتها تروح بالرجلين بمجتمعنا لذلك قررت اشيلها من تفكيري وانسى موضوعها .

بس رحت شفتها اخر مره كانت راجعه للبيت من مدرستها وطلعت بوجهي للمكتب

للعصر كنت كاعد بالمكتب اشتغل عندي كم مناقصه دااراجعهم وتواقيع مطلوبه مني ... چان يرن موبايلي!!!

رقم غريب!

هذا موبايل الشغل ما ارد عليه الا نادراً وبس من الاسماء الي اعرفها ومهمه بشغلي!

فمن شفته غريب عفته يرن ويسكت .. مره مرتين مجاوبت .. بالثالثه جريته ردت اغلق الجهاز فد مره چان تجيني رساله من نفس الرقم!!!

فتحتها وهنا الصدمه.....

_(اني سدن جاوب ضروري)!!!!!!!!

للحكايه بقيه😊

اعرف طولت عليكم بس عيد وانتووو تعرفون الخطار وهوسته 😅

ونشرت ع الانستا كلت بعد العيد ينزل البارت يعني مخليتكم تنتظرون ، المهم البارت كولش طويل وتعبني يمكن بي اشويه ملل وروتين بس هذا جزء من القصه وحتى تتعرفون ع شخصية البطل 😍

فاذا اكو اي اشكال باجر الصبح اعدله او اوضحه لانووو نعست ماادري اشون كملت البارت 😴😪

رأيكم بالاحداث وتوقعاتكم للبارت القادم 🤗💜

ولتنسوووووووووون التصوووووووووييييت حتى يتزل البارت القادم بسرعه 😘

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

سدن .. صحيت ع صوت بسام يصيح عليه .. ماادري شصاير !

اني كنت متطمنه انو مستحيل يعرف شي لان نور الدين كالي حرتب كولشي وفعلاً الامتحان انعاد وهذي معجزه بالنسبه الي .. معناها هذا مو بس كلام .. زين بسام شكو ديصيح؟!!

عفت افكاري بفراشي وركضت اشوف شصاير جوه .. نزلت لكيت بسام واكف وعيونه تريد تطلع من الغضب!!

احسه بالكوه واكف كدامي .. بصفه واكفه صابرين !!!!!!!

وابتسامه مسمومه على وجها.....!!

ميحتاج بعد احد يشرحلي بسام لويش معصب .. ولا يحتاج اعرف سبب جيتها لهنا اصلاً.

مشيت بتجاها واتجاهلت بسام تماماً مباوعتله ، لان نظرات الغضب بعيونه ترعبني ، باوعتلها هي بهدوء .. الاستغراب والخوف اختفو من وجهي من شفتها اتحولو لغضب وكالعاده خيبه!

ابتسمت بوجها وسكتت بس بداخلي بركان يغلي .. بصوت هادئ

_هلاو صابرين شجابج لهنا مو اليوم احنا بالمدرسه؟!!

صابرين .. هلاو بيج حبي .. هاا .. ايي .. بس .. اني .. هذا .. حبيت اجي اتطمن عليج اشلون صرتي بعد ذاك اليوم!

وهم اخذ الاسئله مال امتحانج الي أجلتي ع اليوم من غبتي اول البارحه !

بسام .. بعصبيه وغضب .. غايبه؟!!

سدن .. انفضحت بعد ميفيد التلزيك .. بس مع ذلك ما انطي فرصه لهذي الحيوانه تتشمت بيه ، حتى اذا موتني بسام عادي بس مو كدام هالعقربه .. جريت صابرين من ايدها وبصوت حاد وثابت حتى ما ابين مرعوبه وخايفه ..

_صابرين عيني استريحي هنا واني هسه ارجعلج .. عفتها ومشيت .. بسام تلقائياً اجه ورايه .. اول ما سديت باب الصاله لزمني من ايدي بقوه راد يخلعها ..

بسام .. شنو هذا الي دتكوله صديقتج؟!!

شنو غايبه شنوو امتحان .. شنو جايه تتطمن عليج؟!

سدن .. بصوت خافت همس .. آإآإخ بساااام ايدي .. بس اهدأ خليها تروح واني افهمك كولشي.

بسام .. هسه تفهميني وكدامها هم.

سدن .. جرني راد يدخلني للصاله .. لزمت ايده وعيوني دمعت .. بصوت مخنوك

_بسااام الله يخليك لتبهذلني كدامها .. خليها تروح وصدكني اكولك كولشي وانت بنفسك روح للمدرسه واتأكد من كلامي.

بسام .. دفع سدن وبصوت حاد .. بسرعه ادخلي اطرديها .. وتعاليلي انتظرج .

سدن .. ماشي .. ماشي .. رايحه بس اطلعها واجي والنبي.

رجعت دخلت لكيت صابرين كاعده رجل ع رجل .. ومطلعه المرايه وتلبخ بوجها...!!

ماادري اضحك ع هذي الغبيه الي عايشه اللحظه لو  ابجي ع الي ع الورطه الي وكعتني بيها ، بصوت حاد كلتلها ..

_صابرين شعندج جايه ؟!!

صابرين .. تركت الي بأيدها وباوعت لسدن بخبث .. يعني اكيد مجايه اشوف خلقتج الكئيبه !

اتعرفين ع شنو اجيت .

سدن .. انتي من صدوك متستحين كاعده ببيتي وتتجاوزين عليه؟!

اتفضلي اطلعي بره.

صابرين .. ببتسامه متصنعه .. ياا حبيبتي اشبيج سدونه .. هاي صدوك تحجين ترى دااتشاقه وياج عابت اشبيج بسرعه تصدكين .. موكلتلج اجيت ع الاسئله اخذها منج.

سدن .. ماشي روحي هسه واني ارسلهم الج ع الواتس.

صابرين .. لويش ترسليهم هياتني اجيت اخذهم واروح  .

سدن .. اوووف يا ربي .. دااكولج روحي واني ارسلهم الج .. كافي المشكله الي سويتيها .

صابرين .. على كيفج يمعوده ويا مشكله هاي عيني .. هو انتي كنتي غايبه واني كلت الحقيقه .. بعدين بسام ليش يشك بيج !!

شنو قابل غبتي وطلعتي من ورا  ؟!!

سدن .. اطلع ما اطلع مو شغلج هذا ولا يخصج .. الباب تندلي من وين واتفضلي.

عفتها و طلعت من الصاله .. ع بالي بسام دينتظرني الخوف يقرا مليون عندي ، طلعت ملكيته !!

صعدت الغرفتي بسرعه وسديت الباب بس اني مليون فكره ومصيبه تدور براسي

اشون حقنع بسام ، وشنو اكوله اصلاً؟!!

سمعت صوت بسام يصيح .. خليت ايدي ع گلبي بأنفاس شبه مخنوكه .. اويلي يا ربي خلصني  دخيلك.

بسام .. دفع الباب ودخل بعصبيه وكل غضب الدنيا بعيونه .. بصوت عالي ..

_وين چنتي اول البارحه وليش غايبه من المدرسه؟!!

سدن .. بصوت يرجف .. ونبره مرعوبه ..

_بـ..سـسسا..م .. قبل لتعصب .. اسمع.. اسمعني ..خلي .. خليني افهمـ.. افهمك.

بسام .. احجي اسمعج!

سدن .. حجيت ويا بس الخوف ما بقى قطرة دم بيه .. وحتى الكلام مااعرف اشون صفطته هشكل .. من صدوك الخوف يخلي الواحد يصدم نفسه بالقدرات الي يمتلكها ..حاولت اتماسك نفسي واحجي ..

_قبل فتره كلتلك سياره تراقبني .. تتذكر؟!

بسام .. اي ؟!!

سدن .. اي .. اني من يومها صارت عندي خوفه .. وبيوم الامتحان محمود مثل متعرف ما اجاني فأني من رحت لوحدي للمدرسه حسيت اكو واحد ديراقبني .. فركضت كل سرعتي للمدرسه من الخوف .. فمن وصلت للمدرسه شافتني المديره ع بالها صاير بيه شي فأخذتني لغرفتها وبقيت هناك  لحد ما انتهى الدوام وطلعت للبيت.

كلت كل هذا الكلام جره وحده وبدون انقطاع .. مااعرف من وين اجاني هالتأليف واشون رتبت هالكذبه هذي!!

بسام .. وهاي صديقتج مو وياج بالمدرسه اشلون اتكول غائبه؟!!

سدن .. صابرين تعرف بيه مداومه بس هي تسوي حجه حتى تجي لهنا علمود ....

بسام .. علمود شنو؟!!!

سدن .. علمود اتشوفك!

بسام .. اتشوفني؟!!

سدن .. اييي .. هي معجبه بيك و ع بالها انت راح تحبها.

بسام .. اني مو اتصلت بيج بيومها .. ليش مكلتيلي اني متخربطه ، وليش متصلتي بيه من صار هيج حتى اجي واخذج؟!!

سدن .. ها .. موو .. اني .. هذا .. ادري بيك انت بالدوام ، ومردت اقلقك عليه بلا سبب !

بسام .. من رجعتي ليش مكلتيلي؟!!!

سدن .. بسام انت قبل يومين من كلتلك ع السياره الي تراقبني غيبتني اسبوع كامل عن المدرسه .. فبصراحه اني خفت لا اكولك واتبطلني من دراستي.

بسام .. مدااقتنع بكل الي اتكولي!!

سدن .. صدكني هذا الي صار .. !

بسام .. ماشي اني باجر اروح بنفسي للمدرسه واتأكد اذا كلامج صحيح او لا ، بس اذا طلعتي دتكذبين عليه يا ويلج من سدن ادفنج وانتي عدله وروح امي.

سدن .. هاااا .. اتروو..ح .. للـ.. للمدرسـ..ـه!!

بسام .. اي اروح ليش خايفه اعرف شي؟!!

سدن .. لاا ..اا .. من شنوو اخاف قابل .. روح واتأكد ماكو مشكله.

بسام .. ماشي باجر انشوف .. امشي ولي من وجهي

سدن .. اوك .. بس وين اولي هذي غرفتي!!

بسام .. الله ياخذج انتي وصديقتج نسيتني حتى مكاني.

سدن .. طلع بسام من الغرفه واني دخل الهوى الصدري ... هوووووف يا ربي مدااصدك خلصت من ورطه دخلت بالاكبر منها .. اذا راح للمدرسه اشووون بيه ؟!!!

شسوي .. شسوي يا ربي دخيلك وين اروح .. هذا اذا عرف بالحقيقه يموتني حتى بابا ميلحك على جنازتي!

بقيت افتر بالغرفه اروح واجي .. بس الدنيا احسها اظلمت بعيني .. شايفين لما تحس نفسك محبوس بقفص ، وكل اشويه يضيق عليك!!

اني كنت احس نفسي الماع دتضيق عليه ويا كل ساعه تمر .. لا اكدر اكعد .. لا اكدر اهدأ .. حتى نوم متغمض عيني من الخوف!

اوووووف كوله من ورا هذا الي ميتسمى هو الي ورطني .. هسه اذا اكول لبسام خطفني يصدكني؟!!

والله لو اموت ميصدك ولا يقنع .. وانوب منووو الباشا مالته .. هلاو هلاو .. يذبحني ع قبلة الكفار غير.

بهذي اللحظه خطرت ع بالي الفكره الي نقذتني ......!!!!!!!

هوو .. ايييي .. هو ماكو غيره !

محد يكدر يخلصني من هالمصيبه غيره!

بس اشون اوصله؟!

لا اكدر اطلع .. ولا اكدر اتصل بي ، حتى رقمه ماعندي!!

رقمه!!!!!!!!

ماكووو غير بسام .. اكيد عنده رقمه .. اييي هوكالي اني شريك اخوج .. يعني اكيد بسام عنده رقمه!

زين اشون اخذه من بسام؟!!

نيالي ... اطلع من بلوه ادخل بالاتعس منها .

بعد تفكير طويل قررت اروح لغرفة بسام واخذ الرقم من موبايله .. اني بكل الاحوال ميته ميته .. اذا ما لزمني بسام واني اخذ الفون ، فأكيد باجر حيعرف كولشي من المديره ويموتني .. يعني ماكو شي اخسره!

انتظرت بسام لحد ما نام .. واتأكدت منه .. رحت لغرفته بهدوء فتحت الباب ودخلت .. لكيت الفون ع الميز يم راسه وهو نايم ع وجهه حتى ميدري بالدنيا .

بسرعه اخذت الفون وطلعت من الغرفه .. فتحت الموبايل مالت بسام

طبعاً الرمز السري مالته اعرفه مخلي ( اسم ماما واخر رقمين من ميلادها)

هو دائماً يفتحه كدامي لانو يعرف بيه ما اتقرب الاغراضه ابد اولاً لان مو طبيعتي اتدخل بخصوصيات غيري وثانيا لانو اعرف عواقب هيج تصرف!

فمتطمن من هذي الناحيه ..

الحاصل ..

فتحت الفون ودورت بالاسماء ع نورالدين ملكيته هيج اسم!

دورت ع شريكي!

هم ملكيت ...!

بعدين اتذكرت لقبه الشهير .!!

اول مكتبته طلعلي اسمه يضوي .. الباشا "

نقلت الرقم بسرعه الي ورجعت فون بسام .. رحت الغرفتي وسديت الباب .. بس اني خايفه اشون اتصل بي!

وشنو اكوله؟!

سدن كافي تبقين جبانه اتصلي بي هذا حلج الوحيد .. بتردد .. خوف .. واضطراب .. طلعت الرقم ودست ع اتصال.......

رن !!

لحد ما انفصل الخط مجاوبني!

هاي لويش ميرد؟!

رجعت اتصلت مره ثانيه .. هم دك لحد ما انفصل ماكوو رد!

يا ربي شنووو هالحظ الفاين هذا .. بسرعه كتبت مسج ودزيته اله (اني سدن جاوبني)!

اول ما وصل تقرير التوصيل .. طلعت رقمه دااريد اتصل بي .. جان يتصل هو عليه!!!!

ما احجيلكم الشعور الي انتابني وقتها .. معدتي احسها گلبت .. بطني صارت بيها لويه فضيعه!

فتحت خط ومحجيت شي ..

نور الدين .. الو؟!

سدن .. گلبي حرفياً اتوقف من سمعت صوته .. حتى صوتي ميطلع !

نور الدين .. متحجين؟!!

سدن .. من كال متحجين .. اتذكرت بسام .. بسرعه رديت عليه وبدون اي انقطاع بالكلام لحد مانفسي انگطع

_انت لازم اتساعدني كل الي صار بيه بسببك ، كلتلي محد حيعرف واني من غبائي وثقت بيك .. وتاليها بسام عرف وسوالي مصيبه اشكبرها راد يموتني ، واني من خوفي كذبت كذبه اكبر من عندي وباجر حيروح لمدرستي ويتأكد من كذبتي وحيعرف الحقيقه ويجي ينهيني .. وكل هذا بسبب منوو بسببك انت الي خطفتني ، انت الي ورطتني هالورطه .. الله لا يسامحك لا انت ولا الي دزيتهم .. هسه اني شسوي يا ربي .. وين اروح .. اشون اخلص من بسام باجر حيموتني ..

نور الدين .. بصوت جامد ونبره ابرد من الجليد .. اهدي .

سدن .. اهدأ؟!!

كل هذي البلاوي والكوارث الي حجيتهم واتكولي اهدأ؟!!

بداخلي .. يا ربييييييي لو احجي ويا حايط كان اتحرك.

نور الدين .. اولا لازم تهدين حتى افهم شنو الموضوع!

ثانياً مااريد اتخافين .. محد راح يمس شعره منج

اما بالنسبه لوعدي فأني وفيت بي وانتهى بس انتي كليلي منو الي كال الاخوج ع الموضوغ واني اتصرف.

سدن .. اني براكين الدنيا كولها مشتعله بداخلي وهو يكولي اهدي ولا كانو صوتي يصرخ من الخوف.

حاولت اهدي نفسي واحجي بهدوء ع الاقل على ما احل مصيبتي ..

_الله يخليك خلصني بسام حيموتني اذا عرف اني طالعه من ورا وحتى لو احلفله ميصدك انت خطفتني ومو بأرادتي طلعت.

نور الدين .. تمام .. بس فهميني شنو كلتي الاخوج حتى اني ع هالاساس اتصرف.

سدن .. كلتله انو اني كنت بالاداره لانو تخربطت ومن انتهى الدوام رجعت للبيت.

نور الدين .. تمام خلي اخوج باجر يروح يسأل ، لتمنعي ولتحجين اي شي واني احل الموضوع.

سدن .. واذا عرف اشون؟!!!

نور الدين .. كلت لتخافين.

سدن .. ماشي .. الله يستر.

نور الدين .. اخوج من وين  عرف بالموضوع ؟!

سدن .. وحده من صديقاتي اجتي تاخذ مني اسئله ومتدري كالت لبسام.

نور الدين .. متأكده متدري؟!

سدن .. بيني وبين نفسي .. والله هي حيه ومتعمده اتورطني بس هسه خلي اخلص من هذي مشكلتي واني اعرف اشون اربيها.

نور الدين .. الوو؟!!

سدن .. الوو .. وياك .. اي .. اي بالغلط كالتله متقصد.

نور الدين .. تمام اعتبري كلشي انحل ولتفكرين بشي.

سدن .. اوك يلا اني لازم اروح .

نور الدين .. لحظه.

سدن .. ها؟!!

نور الدين .. راح احل الموضوع من اساسه وانهي .. بس بشرط!

سدن .. شرط؟!!!

شنوو حضرتك لازم مقابل يلا تخلصني من ورطه انت سببتها؟!!

نور الدين .. اعتبري طلب مو شرط.

سدن .. اوك شنو هو؟!!

نور الدين .. مو هسه اريده لما يجي وقته اكلج.

سدن .. شنو هو الي مو وقته ، اشون اوافق ع شي مااعرفه شنو؟!

نور الدين .. لتخافين طلب جداً بسيط ميحتاجله تنفعلين لهدرجه.

سدن .. اي حتى لو مااوافق الا اعرف شنو!!

نور الدين .. افهم من كلامج انو متردين احل موضوع اخوج؟!!

سدن .. شنوو صار الا مقابل؟!

نور الدين .. كلتلج اكو شرط !

سدن .. يا ربييي هذا اخاف اكوله  مموافقه ع شرطك وميساعدني باجر ويذبحني بسام!!

واخاف اوافق واني مااعرف شنو طلبه اصلاً واتورط بعدين؟!!

شسوييي يا الهييييي ارجووووك خلصني من هالورط.

نور الدين .. السكوت معنى موافقه.

سدن .. ها .. لا .. مموافقه!

نور الدين .. تمام .

سدن .. شنو تمام يعني متساعدني؟!!

نور الدين .. هذا الشي بأيدج.

سدن .. اوك موافقه .. بس يكون بعلمك اذا شي حرام لو يشوه سمعتي مستحيل اسوي لو اعرف اموت.

نور الدين .. اطلق ضحكه هادئه .. هههه لتخافين وخلي تفكيرج نظيف.

سدن .. اوك معناها متفقين.

نور الدين .. هذا رقمج؟!

سدن .. اي .

نور الدين .. تمام

سدن .. باي.

سديت الفون وشمرته ع السرير مثل الي ديشمر ذنب من عليه!

گلبي يدك يدك بكل قوته حسيته حيطلع من صدري .. اديه باردات ثلج !

ياربي اني شصايرلي؟!!

كمل باقي اليوم بشكل عادي ، مشفت بسام بعدها لانو من كعد طلع ورجع بالليل اني كنت نايمه بغرفتي!

الصبح بدلت دااريد اروح للدوام طلعت من غرفتي شفت بسام دينزل من الدرج من شافني وكف.

بسام .. وين؟!!

سدن .. صباح النور .. وين يعني للدوام غير.

بسام .. ماكو دوام ولا امو طلعه من الباب اذا ما اتأكد من كلام صديقتج.

سدن .. بسام انـ..

بسام .. قاطعها بحده .. لا بسام ولا علام .. طلعه ماكو وتنتظريني هناا اني رايح لمدرستج اتأكد واجي.

سدن .. كالي هالكلمتين وطلع .. مو هو الي طلع روحي طلعت ويا .. خوف خوف رهييب سكن كل ذره بيه !

الافكار السوده الي ملت عقلي مااكدر اوصفها الكم .. مااعرف لويش لما يصير شي اتخاف منه ومتعرف شنو نتيجيته عقلك يخلق افكار غريبه عجيبه بحيث حتى ترتكب جرائم بعقلك وانت كاعد بمكانك!

المهم ..

بعد نص ساعه تقريباً او ساعه الا ثلث .... شفت سيارة بسام دخلت للكراج!!

اني بقيت بمكاني كاعده ع الدرج متحركت بس احس نفسي صرت رماد يعني اقل نفخه تطيرني.

دخل بسام على وجهه ماكو اي تعبير .. وهو هذا الي خوفني بسام من يصير وجهه هشكل ميبشر بخير ابد.

بسام .. بصوت هادئ .. اخذتلج اليوم اجازه .. باجر اتكدرين اتداومين عادي.

سدن .. كنت اموت واسمع كلمه منه حتى روحي تهدأ .. والحمدلله نطق ورجعت انفاسي انتظمت

_ها هسه اتأكدت؟!

بسام .. اسمعيني زين سدن مره لخ لما يصير شي تتصلين بيه مباشرتاً ، وصديقتج هذي مااريدها تجي للبيت بعد ولا اريدج احجين وياها.

سدن .. رخيص والطلب هم رخيص.

بسام .. شنو؟!!

سدن .. دااكول اوك مراح تجي بعد.

بسام .. اوك يلا اني رايح للشركه وحضري نفسج يمكن هاليومين يجي ابويه.

سدن .. صدوووك .. بابا حيجي؟!!

بسام .. اي اليوم خابرني ، يلا اني طالع واذا حتاجيتي شي اتصلي بيه.

سدن .. ما احجيلكم شعور التعب الي احسه بروحي .. مثل الي كان شايل جبل ووكع من عليه!

اول ما طلع بسام ركض صعدت لغرفتي .. فتحت الفون واتصلت بي.

نور الدين .. من شفت المسج منها مصدكت لان كنت مستبعدها تتصل عليه .. اتصلت بيها وفهمت سبب اتصالها شنو!

كلتلها لتخافين اني احل الموضوع وعرفت انو هذا رقمها .. من نهيت المكالمه منها اتصلت بالمساعد مالتي زيد .. ورزلته كلتله اني شفهمتك؟!

كالي انو هو اتصل بالمديره بنفسها ورتب وياها كلشي ، ومستحيل احد من المدرسه يكون كال الاخوها الا اذا شخص يريد يسوي مشكله ومو من الاداره.

كلتله اتحلي الموضوع اليوم وباجر اريد كلشي منتهي!

اتفقت ويا وفعلاً هو رتب الموضوع .. اني مسألته بعد ولا اتأكدت منه مره ثانيه لان ثقتي بي فوق العمياء!

سكتت عن الموضوع وثاني يوم الصبح من ضوت شاشة موبايلي برقمها عرفت انو كلشي تمام.

_صباح الخير.

سدن .. ويييي يا ربي لويش ينعكد اللساني من اسمع صوته؟!

_بتردد وخجل .. هلاو

نور الدين .. اشلونج اليوم؟!

سدن .. زينه ، اتصلت حتى اشكرك بسام راح للمدرسه ومعرف شي.

نور الدين .. ماكو داعي تشكريني اني الي خليتج بهذا الموقف واني الي لازم اخلصج منه.

سدن .. اي صحيح ، بس هم شكراً.

نور الدين .. هسه نجي للاتفاق.

سدن .. هااا..!!

نور الدين .. شنو نسيتي؟!

سدن .. هستوك دتكول اني الي خليتج بهذا الموقف و واجبك اتخلصني منه يعني ماله لزوم هذا الاتفاق.

نور الدين .. صحيح ، بس انتي وافقتي بعد يعني ميحقلج تتراجعين.

سدن .. واذا تراجعت شنو تسوي؟!

نور الدين .. براحتج ، مع السلامه.

سدن .. لحظه!

نور الدين .. نعم؟!

سدن .. شنو طلبك؟

نور الدين .. بالبدايه لازم اتوافقين وبرغبتج ممجبوره .

سدن .. اخذت نفس طويييييل .. رغم الخوف الي بداخلي بس الفضول كان اكبر ، اريد اعرف شنو الي ممكن يطلبه مني؟!!

_اوك موافقه.

نور الدين .. اريد اعزمج ع غده.

سدن .. ههههههههه ضحكت ضحكه من اعماق گلبي طلعت ... شنو؟!!

نور الدين .. ليش الضحك؟!

سدن .. بصراحه طلبك ضحكني.

نور الدين .. شنو الي يضحك بي؟!

سدن .. اني اتصلت بيك حتى اتخلصني من كارثه سببها طلعتي وغصباً عني وهسه اتريد اعيد نفس الكارثه وبرضاتي؟!!

نور الدين .. اسمعي الي صار اول مره هذا خطأ ومراح اسمح يتكرر نهائياً ، اما الي دااطلبه هسه فيختلف كلياً عن السابق وبرضاتج.

سدن .. شنو الاختلاف؟!

هم راح اعوف الدوام ، وهم راح اطلع بلا علم بسام ، وهم حيعرف بسام ويموتني .. شنو الفرق؟!!

نور الدين .. الفرق انو مراح تعوفين الدوام بعد دوامج حاخذج ، وبالنسبه الاخوج فأتركي الموضوع عليه ومراح يعرف نهائياً .

سدن .. حتى لو اني مااكدر اطلع بلا علم اخويه نهائياً خصوصاً ويا واحد مااعرفه.

نور الدين .. تمام براحتج.

سدن .. بهذا يكون الاتفاق خلص مو!

نور الدين .. انتي شنو تشوفين؟!

سدن .. انطيني وقت افكر وارجعلك خبر

نور الدين .. تمام كدامج ساعه فكري وانتظر ردج.

سدن .. ساعه؟!!

نور الدين .. هواي مو؟!

سدن .. ههههه صدوك تحجي؟!

نور الدين .. بالمناسبه ضحكتج جداً جميله.

سدن .. ها؟!!

نور الدين .. انتظر ردج بعد ساعه .. مع السلامه.

سدن .. سد الفون وراح .. واني بقيت صافنه بالجملة الي كالها .. ضحكتج حلوه!!!!!

صفنت بغير عالم مااعرف اشبيه مثل الي انثولت .. طلبه كان شبه مستحيل بالنسبه الي لانوووو مجرد ما انذكر بسام شي بداخلي ينرعب .. فكرة انو اطلع بموعد بلا علم بسام و ويا واحد لحالنه !!!!

مااكدر احجي شعور الخوف بداخلي .. بس بنفس الوقت شي ثاني يصرخ وافقي!!!

اي وافقي انتي محرومه من كولشي لا ام لا اخت حتى صديقه بيها خير ماكوو ، وبسام معيشني بسجن مع العلم هو عايش حياته يسرح ويمرح ، لويش بس اني مدمر حياتي ، شنو يصير اذا عشت يوم حلو ؟!!

بين رفض عقلي وبين توسلات گلبي ....وقبل لتنتهي الساعه اخذت الفون وكتبت رساله .....

_موافقه!

اجاني الرد منه بلمح البصر .. شكله كان دينتظرني ...

نور الدين .. تمام .. باجر من يخلص الدوام انتظريني بنفس المكان الي نزلتج بي.

سدن .. ثاني يوم الصبح لبست ملابس المدرسه العاديه ونزلت لاكيت بسام واني دااطلع كلتله وصلني للمدرسه!

بسام .. يلا بسرعه اصعدي

سدن .. اخذني للمدرسه من وصلنه سألته اشوكت حتجي تاخذني؟!!

بسام .. اليوم اني ماارجعج لان احتمال اسافر لغير محافظه عندي شغل وبالليل يلا ارجع ، فراح اوصي محمود يجي ياخذج!

سدن .. اوك .. داانزل من السياره چان يحجي بسام ..

بسام .. اوووو نسيت .. محمود مال السياره عاطله وراح ياخذها للمصلح اشلون يجيج؟!

سدن .. مو مشكله اني ارجع بسيارة المدرسه اخليهم يوصلوني.

بسام .. ماشي يلا اني اتأخرت .. باي.

سدن .. راح بسام واني دخلت للمدرسه .. دوام ودروس عاديه .. بس كولشي مفتهمت ولا عرفت شنو انطونه وشنو درسنا .. لان عقلي للاسف كان بغير كوكب!!

اي شعور بداخلي ماكو غير الخوف والقلق .. قلق قلق نهش كل ذره بعقلي!

بعد ما خلص الدوام طلعت و رحت لنفس المكان الي اتفقنا عليه !!

لكيت سياره واكفه نفس سيارة محمود السايق مالتنه .. اول ما وصلت الها نزل واحد لابس بدله سوده بس مو ضخم مثل الي شفته المره السابقه .. واحد غيره وشكله بشوش اشويه!

فتحلي الباب!!!!!!!

سدن .. وين نور الدين؟!!

السايق .. الباشا هو الي دزني حتى اخذ حضرتج منا.

سدن .. مااروح لاي مكان اني متفقت ويا هشكل.

السايق .. ماشي لحظه اتصل بالباشا واحجي ويا.

اتصل بي وانطاني الفون .. اخذته منه

سدن .. شنو هذا الي دتسوي؟!!

نور الدين .. تعالي ويا ولتخافين .

سدن .. ما اجي ويا اي احد واني راجعه للبيت باي.

سديت الفون انطيت الجهاز للحارس ودرت وجهي رجعت للبيت .. مشيت وقبل لا اوصل للبيت لكيت سيارته الرياضي واكفه كدامي!!

من شافني نزل ..

نور الدين .. دزيت الحارس يجيبها بسيارة تشبه سيارتهم الخاصه حتى محد يشك بيها من تصعدها لانو تشبه سيارتهم واني انتظرتها بالشارع قريب ع البيت مالتهم من تجي اخذها .. بس هالمخلوقه كتله مال عناد !

من وصلت شافتني بقت واكفه بمكانها .. اني نزلت وفتحتلها باب السياره!

سدن .. بصوت حاد .. انت شدتلعب من لعبه؟!!

نور الدين .. لتضيعين الوقت ، اصعدي.

سدن .. ما اروح خلص.

نور الدين .. بأبتسامه بارده .. ههه منو الي ديلعب هسه؟!!

سدن .. حضرتك الي دتلعب .. شنو تكولي اخذج وشنو اتدزلي واحد ثاني ؟!!

نور الدين .. اصعدي وراح تفهمين كلشي ، مااريد احد يمر منا ويشوفج واكفه تحجين وياي.

سدن .. كلامه حسسني بالامان ، حسيت بي شي من خوف اخويه بسام .. بسام!!!!

يا ربيييي والله لو يعرف شدااسوي يذبحني .. من اتذكرته ركضت بسرعه صعدت بالسياره!

هو مااعرف شنو حجه ويا السايق الي بالسياره الثانيه واجه صعد يمي .. حرك السياره ومشينا ..... اماكن اتجنن من شكلها تحسها فخمه!

واني مثل المفجوعه اباوع ، ع بالك مسجون صارله سنين وطلع من الحبس!

وصلنا البنايه كبيره شكلها فندق او هيج شي ..  وكف يمها وكالي انزلي!!

سدن .. وين؟!!

نور الدين .. امممم شوفي اني مااحب الاسئله الكثيره .. بس راح اكلج شي وثقي مااخلف كلمه منه نهائياً

مستحيل اسوي شي يضرج او يزعجج او مو برضاتج!

فأرتاحي ولتخافين.. هذا كل الي اريده ترتاحين .. ولتخافين

سدن .. مااسوي شي اذا مااعرفه شنووو ، واذا اسئلتي مضوجتك رجعني.

نور الدين .. ههه تمام .. هذا فندق.

سدن .. وانت شكو جايبني لفندق؟!!!!

نور الدين .. كلتلج لتخافين.

سدن .. انت كلتلي حتعزمني ع غده وعلى هذا الاساس اني وافقت .. اتجيبني الفندق لويش؟؟

نور الدين .. هو راح نتغده هنا.

سدن .. هههههه شنو شايفني غبيه كدامك .. وين اكو واحد يتغده بفندق.

نور الدين .. لعد شنو يسوون بالفندق ؟!!

سدن .. ينامون بي.

نور الدين .. هههه انتي شنو بحياتج مداخله فندق؟ ؟

سدن .. مو هذا موضوعنه ، واذا تسمح رجعني للبيت.

نور الدين .. تمام .. هسه نتأكد .. طلعت الموبايل اتصلت بموظف من الفندق كلتله تصورلي الطاوله الي حجزتها والمطعم كله وتجيب الفيديو يسجل للسياره اني بالكراج لتطفي ابد لحد متنطينيا بأيدي!

سدن .. اتصل بواحد وكاله تصورلي مااعرف شنو وتجي للسياره بالبدايه اني مفهمت شي بس من اجه هذا الشخص وبيده الموبايل يصور انطانيا..!

_شنو هذا؟!

نور الدين .. وكفي التصوير !

سدن .. اوك.

نور الدين .. هسه روحي للاستديو وشغلي من جديد.

سدن .. فتحت التصوير شفت طاوله فخمه وعليها ورد مرتبه بشكل حلوو ، وبعدين مطعم بي ناس كومه كاعدين .. بعدين تصوير طريق لحد السياره الي كاعدين بيها واني صورتي هم!!!!

محجيت شي بس باوعت بوجهه ..

نور الدين .. اعتقد هذا يوضح انو الفنادق مو بس للنوم!

سدن .. سكتت محجيت شي.

نور الدين .. بأبتسامه هادئه .. يلا ننزل ضيعتي كل الوقت.

سدن .. نزلت بس اني متردده اخاف واحد يشوفني ، اخاف واحد يعرفني .. وصلت الباب الفندق الرئيسي وكفت!!

نور الدين .. ليش وكفتي؟!!

سدن .. مااكدر اخاف!

نور الدين .. من شنو ؟!

سدن .. ليشوفني احد يعرفني ويروح يكول لبسام لو لبابا .. عفيه مااكدر.

نور الدين .. تمام .. هاج هذي النظاره البسيها ودنكي راسج لترفعي ابد!

سدن .. واشون امشي لعد؟!!

نور الدين .. الزمي ايدي!

سدن .. هههه شنو عميه؟!!

نور الدين .. لا اكيد عيونج ماكو احلى منهم!

سدن .. شنو؟!

نور الدين .. سوي الي كلتلج عليه ولتخافين محد راح يعرفج.

سدن .. هسه اني كل اشويه اكوله رجعني ما طلع غده هذا سويته عليه زقوم!

اخذت نفس وكلتله اوك!

لبست النظاره و وكفت بصفه ، لزمت ايده مو من الكف لا من الساعد من فوك ملابسه .. دنكت راسي ومشينا الى ان وصلنا لمكان بس هواي طاولات و كولش كبير بس هو فارغ محد بي!!

اني تركت ايده من شفت محد بالمكان .. وباوعت بوجهه بنظره متسائله ؟!!

نور الدين .. حجزت هذا الجناح حتى محد يشوفنا وحتى لتظلين قلقانه وخايفه ليشوفج احد.

سدن .. اففففف جريت نفس بس الخوف من الكعده ويا الحالنه خوفني اكثر!

اجه هذا النادل راد يجرلي الكرسي حتى اكعد .. بس هو باوعله بنظره خلته يتراجع خطوات ليوره ويختفي بسرعه!

نظراته هذي مااشوفهه وياي ابد بس ويا الناس .. نظرات غريبه ومخيفه نوعاً ما .. الي يشوفها يحس كمية غضب بعيونه مو طبيعيه!

اجه هو سحب الكرسي واني كعدت بهدوء .

نور الدين .. انزعي النظاره بعد ماكو داعي تظمين عيونج الحلوه.

سدن .. يبووو هذا لويش يحجي هشكل ، بطني اتكوم توجعني من يحجي هذا الكلام.

_ ها .. اي  نسيت

نزعت النظاره و دنكت مباوعت بوجهه بعد .. هو طلب الاكل كالي شنو تردين كلتله بيتزا 😅!

نور الدين .. بس؟!

سدن .. اي وعصير اوغاريت بالخوخ .

نورالدين .. تمام.

سدن .. جابو الاكل واني حاولت قدر الامكان اكل بهدوء و على كيفي مو مثل المفجوعين ، تعرفون صارلي 3 ايام الخوف نخر معدتي نخر فمتت جوع!

اكلنا وكملنا .. كلتله يلا صار لازم ارجع للبيت!

نور الدين .. بعدنا محجينا شي!

سدن .. مااريد اتأخر ليرجع بسام وميلكاني.

نور الدين .. لتخافين بسام ميجي هسه .

سدن .. شعرفك؟!

نور الدين .. اني دزيته بشغله.

سدن .. اهاا .. يعني كنت مخطط لكولشي!!

نور الدين .. لتضيعين الوقت بهذي المواضيع .. خلي نحجي بشي مهم.

سدن .. مثل شنو؟!

نور الدين .. اكيد انتي تتسائلين ليش اني طلبت منج هذا الموعد ، وشنو غايتي منه!

سدن .. اي ؟!!

نور الدين .. اني انسان مااحب اللف والدوران .. لذلك راح احجي بصراحه .

سدن .. اي؟!!!

نور الدين .. اني..

بعده ديحجي چان يجي النادل ..

_باشا اكو شخص طلب يشوفك ضروري

نور الدين .. بنبرة غضب وصوت عالي ..  اني مو كلت مااريد احد يعرف اني هنا ، ولا يقاطعني احد؟!

النادل .. باشا  اني سويت الي كلتلي عليه بس هذا الشخص كال انو لازم يشوفك ضروري مسألة حياة او موت.

نور الدين .. شنو اسمه ؟!!

النادل .. بسام الاحمد .

سدن .. منوووووووو؟!!!!

للحكايه بقيه ❤️

رأيكم بالاحداث وتوقعاتكم للبارت القادم 🙂

لتنسوووووون التصوييييييييييت حتى ينزل البارت السادس بسرعه 🤗

عفيه بنات يا ريت تدعولي الله يقضي حاجتي عندي شغله حييييل مهمه اريدها تصير وخايفه منها ويكولون دعوه الغريب مجابه بلكي الله وتصير انزللكم بارتين 😂 وعد هذا بس ادعولي الله يسهل امري 🙏🏻💜

بقلمي (هدى الموسوي) الاميره الموسويه 👑

ما احلل لاي احد ياخذ كتاباتي وينشرهم (ذمه)

سدن .. النادل كال بسام الاحمد هنا .. واني الكاع احسها ضاقت بيه!

بدون شعوركمزت من مكاني ... شنوووو!!

بسام هنا؟؟

انت شنو كلتلي؟!!

شجابه بسام لهنا.. ؟!!

نور الدين .. سمعت بأسم اخوها وجها صار اصفر وملامحها ارتعبت .. مثل الي سمع بالموت راح ياخذه!

عجيب وضعها اشلون انكلب بلحظه بس سمعت بأسمه معقوله لهدرجه اتخاف منه!!

حسيت شعور بالانزعاج بداخلي وشي عصبني حيل من شفتها خايفه واني موجود !

كلت للنادل روح ضيفه واني  جاي .

التفتت عليها وبصوت هادئ .. لتخافين ، عفتها وكمت ...!

سدن .. بيني وبين الموت حايط بس الي يمنع بسام يشوفني .. وهذا البارد يكولي لتخافين!!

حقه ميعرف شنو طينة بسام .. من صدوك لحظتها كرهت البرود الي عايش بي هذا الكائن وبنفس الوقت حسدته على بروده لان الرعب الي بداخلي والخوف ما اتمنى لاي احد يجربه.

كال هالكلمتين وكام !!

اني بسرعه شمرت نفسي ع الميز ولزمت ايده بأثنين اديه ،

لزمته بكل قوه بحيث اظافري تركت اثر بي ، كنت خايفه يعوفني ويروح .. بصوت مرعوب ونظرات مفزوعه

_لتروح .. وين رايح وعايفني ..!!

نور الدين .. من لزمت اديه اعصابي كلها اتشنجت وجسمي قشعر.. بقيت محافظ على هدوئي وابتسمت بوجهها .. تمام مااروح بس اهدي .

سدن .. بقيت ع نفس وضعي واديه المتشبثه بي .. الكلام يطلع مني ع شكل كلمات متقطعه .. بسام .. يموتني .. تعرف شنو يموتني .. اذا شافني.

نور الدين .. لتخافين .. واسمعيني محد راح يشوفج لا بسام ولا غيره بس اهدي خليني اتصرف.

جريت الموبايل واتصلت بأخوها .. اول رنه .. رد

بسام .. اهلا باشا .. اني جداً اسف اعرف عندك اجتماع خاص بس والله مجبور وظرف طارئ الي جبرني اقاطعك واجي لهنا.

نور الدين .. حسب مسمعت الموضوع شغلة حياة او موت .. شصاير؟!!

بسام .. هاا .. ايي .. اي .. ههه يعني مو لهدرجه .. بس كنت مضطر اكول هيج.

نور الدين .. شنو يعني؟!

بسام .. والله باشا الوالد اليوم راجع من السفر بعد غياب طويل وماعندي احد يستقبله تعرف بس اني ، وهسه خابرني كال الطياره نزلت والمطار بعيد عن البيت فمكدرت اروح للاجتماع الي اتفقنا عليه واضطريت ارجع .

نور الدين .. افهم من كلامك قاطعت خصوصتي وكذبت بس لهذا السبب!!

بسام .. مجبور باشا  وابويه اهم من شغل العالم كله .

نور الدين .. تمام تكدر اتروح بس اعتبر الصفقه الي بيناتنه لاغيه.

قبل لا يسمع الرد من بسام سد الفون بوجهه.

سدن .. بملامح مصدومه وانفاس مكتومه حتى لا يسمعها بسام .. سحبت ايدي منه .. وبصوت حاد ..  انت شسويت؟!!!!!!

نور الدين .. كومي اوصلج للبيت.

سدن .. انت شدتحجي ، اشون اطلع وبسام كاعد بره؟!!

نور الدين .. بسام طلع راح لابوج ياخذه من المطار لبيتكم ، وانتي راح توصلين للبيت قبلهم لتخافين

سدن .. هااا .. بابا .. اييي .. صح بسام كالي حيجي من السفر بس مكال اليوم !

كمت بسرعه واخذت جنطتي .. بسرعه .. بسرعه خلي انروح .. مشى كدامي واني ورا .. اشويه و وكفت!!

التفت هو عليه .. كلتله .. شعرفك بسام راح للمطار اخاف رجع للبيت ؟!!

نور الدين .. لا راح للمطار واذا راح تبقين تحجين راح يوصلون للبيت وانتي بعدج هنا.

سدن .. بما انو كال راح للمطار معناها متأكد من كلامه .. بسرعه طلعنا من الفندق

نور الدين .. اخذتها وطلعنا بس هالمره من الباب الخلفي للفندق بسبب خوفها  وشكها انو بسام بعده بالفندق .. وصلنا للسياره ومحد شافها حسيتها هدأت اشويه من طلعنا من الفندق و صعدنا السياره .. شغلت وطلعت كبل البيتهم .. طول الطريق هي ساكته محجت شي وياي بس اسمعها تبسبس بينها وبين نفسها مااعرف شتحجي!

قبل لا اوصل لبيتهم بخطوات اتصل عليه الحرس الي كلفته يراقب سيارة بسام ويبلغني وين وصل حتى اذا وصلو قبلي يأخرونهم لحد ما توصل هي للبيت!

اتصل بيه كالي بسام وصل للمنطقه مالتهم يعني دقيقه دقيقتين هم بالبيت!!

اني بسرعه وكفت ببابهم ونزلت فتحت بابها  كلتلها انزلي!

هي رادت تحجي بس اني قاطعتها بصوت حاد .. ولا حرف وركض للبيت.

سدن .. طول الطريق اني بس ادعي الله يوصلني قبل لا بسام يوصل وميلكاني .. ادعي واغلط ع نفسي اشون ورطت روحي بهالورطه .. اشون صدكت بي!

محسيت بالطريق ولا حسيت وصلنا غير لما نزل بسرعه وفتحلي الباب!!

ردت اسأله اخاف بسام وبابا بالبيت لانو اكيد يعرف بيهم وصلو او لا .. اشو هذا صاح عليه بصوته المرعب مخلاني احجي وكالي روحي للبيت!

اتفاجأت من تصرفه لانو اني ما الي اي ذنب بألي صار .. كل الي صار بسببه والمشكله كولها حتوكع براسي اذا اهلي عرفو .. زين من طلعنا من الفندق هو مبي شي كان هادئ و لما اجا اتصال انزعج!

المهم ..

اني محجيت ولا حرف مثل ما كال بس احس شي بگلبي وجعني من اسلوبه .. بسرعه دخلت للبيت حتى مشفته اذا راح او بعده بالباب .. بوجهي لغرفتي .. شمرت روحي ع السرير .. وبجيت!!!!

اول مره احس نفسي ابجي بلا سبب!!

مااعرف شنو الي خلاني ابجي بس كنت حاسه نفسي مختنكه .. يمكن الخوف الي عشته والقلق اتحولو لدموع .. بجيت اشويه ونمت كالعاده .. اتعرفون بيه لما اضوج او اخاف انام رأساً.. نمت بملابسي حتى الحذاء منزعته ..

مااعرف اشكد مر وقت سمعت بسام يصيح ع راسي .. سدن .. سدن .. كومي بسرعه!!

كعدت مفزوعه .. كلت اكيد عرف .. باوعت البسام نظرات الانزعاج بعينه يا ربي دخيلك كون موتي اتكون رحيمه وسريعه !

بسام .. ليش نايمه بملابس المدرسه .. !

سدن .. هاا .. اني .. ااا ..

بسام .. انتي منا على ما تصحصحين يرادلج سنه وخلك واني ما الي خلكج .. كومي ابوج يصيحج.

سدن .. يا الله شكلها عدت على سلام ومعرف شي .. زين هذا اشبي خلقته مگلوبه!!

بسام .. الوووو دااحجي وياج!!

سدن .. هااا ...  شنووو .. بابا .. بابا اجه !!

كمت من مكاني بسرعه ونزلت ركض .. لكيت بابا كاعد بالصاله من شافني ابتسم وفتح اديناته .. اني ركضت لحظنه حظنته بقوه وبقيت ابجي .. بابا استغرب من شافني ابجي

بعدني عنه و رفع راسي ..

الاب .. هاي شنوو بابا ليش البجي؟!!

سدن .. اشتاقيتلك بابا.

الاب .. لا هذي مو دموع اشتياق اني دائماً اتأخر متبجين .. اخاف بسام مأذيج!!

سدن .. لا بابا صدكني ماكو شي بس اشتاقيتلك هالمره طولت انت بالسفر.

الاب .. هههه هذا اني يمج بعد ليش تبجين .. وانتي تعرفين الشغل ممنطيني مجال ، بس اوعدج بعد ما اغيب عنكم هواي.

سدن .. رجعت حظنته مره ثانيه بس هالمره بلا دموع .. بابا هو الوحيد الي من احظنه احس بالامان صحيح هو بعيد عني ومااشوفه ع طول بس من ياخذني الحظنه احس نفسي املك الدنيا .

كعدنا سولفنا اني وبابا وانطاني الهدايا الي مشتريهم الي .. حبيبي بابا كولما يجي يجيبلي كومة هدايا كولها ماركات واني افقد عقلي ع الهدايا حتى بابا يكولي انتي مميته عليه منتظره الهدايا هههه

طول الوقت بسام كان كالب خلقته وميحجي ، حسيت اكو شي معصبه او زاعجه!

بالعاده من يجي بابا هو يضحك ويسولف بس هالمره غير .. احسه ممرتاح !

اني محجيت شي لان كنت خايفه لا شاف نور الدين ولهذا السبب معصب!

بس لا لو عرف شي كان بابا هم عصب .. !

كل عقلي وتفكيري كان يم بسام وشنو الي معكر مزاجه هشكل

بابا يحجي وياي واني عقلي بغير عالم .. بس اريد اعرف شكو ..  الى ان حجه بابا وقتل الفضول الي بداخلي ..

الاب .. ابني لتضل اتفكر بالشغل .. كلتلك اني احجي ويا الباشا واخلي يغير رأيه.

سدن .. يمه گلبي وگف ... الباشا...عزا العزاج سدن اكيد عرف السالفه!!!

بسام .. بابا انت شنو متعرف لهذا نور الدين اذا كال شي مستحيل يرجع بكلامه.

الاب .. معليك انت اترك الموضوع عليه ، وبعدين هو انطانه كلمه كال اجي يعني باجر انشوفه ونتفاهم.

سدن .. گلبي احسه حيطلع من صدري .. باشا .. ويجي!!

بلا تفكير طلع الكلام من عندي ...

_منو الي حيجينا بابا ..؟!!

الاب .. محد يجي بنتي هذا موضوع بينا اني واخوج متعرفي.

بسام .. انتي شكو حاشره روحج بكلشي؟!

الاب .. اهدأ ابني اختك مكالت شي .. ماكو داعي تصيح عليها .. وكلتلك اني اتصرف لتظل كالب خلقتك.

سدن .. بسام هذا اكره من الكريه لازم يفشلني ، بس هسه مو وقتها خلي اعرف شنو السالفه واني الك بسام اذا ما ابرد گلبي بيك ، بابا واجه بعد من منو اخاف.

غير بابا الموضوع وبسام طلبلنا اكل من بره اتعشينا ، اتشاقينا وضحكنا .. بسام اشويه طلع من المود الغاضب الي كان بي قبل اشويه كام يضحك ويسولف ، بس اني ممرتاحه من ذكرو اسمه معدتي كامت تگلب وعقلي الف فكره بي.

بقينا بيومها لوقت متأخر كاعدين ونسولف .. الى ان نعست كمت نمت وهم هم راحو نامو .. كعدت الصبح اباوع لفوني ماكو اي مكالمه!!

ما اعرف لويش كعدت ادور بموبايلي عن شي منه .. شنو هالاحساس الغريب هذا!

ولويش حتى يرسلي شي او انتظر منه شي اصلاً!

شمرت فوني غسلت ونزلت لكيت بابا كاعد وبسام ديحضر بالريوك!

سلمت عليهم وساعدت بسام بالاكل نقلته للسفره .. اجواء شتويه اتجنن والريوك حار والاهم من هذا بابا موجود ويانا .. بس اني ي بداخلي كان مزعوج مااعرف شنو السبب!

اتريكنا وكمت اني نظفت السفره والمطبخ .. كلتلهم اشتردون اليوم غده!!

بسام قاتل المواهب كالعاده كام يضحك ويستهزأ ..

بسام .. هههههههههاي انتي اتسوين الغده!!!

معناها اليوم محد ياكل لو بقسم الطوارئ انبات.

سدن .. هه هو الي يسمع كلامك هذا يتعلم شي بس تستهزء وتقلد وانت بيضه متعرف اتسوي.

بسام .. هو انتي غير لو بيج فايده حتى اشجعج اغبى من الاثول .. بس فاكه حلكج وتضحين هذا الفالحه بي.

سدن .. لتكول ثوله رجاءاً اصبرلي بس هذي السنه وحصير احسن محاميه بالعالم عود وقتها انشوف منو الغبي.

بسام .. بعصبيه .. شقصدج ولج؟!!!

الاب .. كااااافي انتو متجوزون من هاي الحاله كل واحد اشكبره وتتعاركون مثل الجهال .. وانت بسام خلص سد حلكك اختك محجت شي انت الي بديت.

بسام .. بابا متشوفـ...

الاب .. كلت خلص ولا كلمه .

سدن .. حل يستاهل خلي يتعلم يلصم حلكه .. بابا حبيبي شنو اتريد اسويلك غده اليوم ، انت بس كولي وشوف اشون حيعجبك الاكل.

الاب .. اي شي من ايدج حلو بابا.

سدن .. فدوه لعمرك بابا .

بسام .. اني رايح لتحسبون حسابي ع الغده بعدني مشفت شي من حياتي.. بابا اتريد شي قبل لا اطلع؟!!

سدن .. هها هسه شنو نضحك !

الاب .. وين رايح شنو حجيت وياك البارحه ؟!!

بسام .. ع شنو ؟ !

الاب .. لك انت صدك ماعندك كلمه ، شبسرعه نسيت !

بسام .. اهووو .. والله نسيت بابا ، اللسان بنتك طير ذاكرتي .

الاب .. بسااااام.

بسام .. خلص خلص مراح احجي شي .

سدن .. من الصبح اتفاقات الظاهر اليوم حتغدى وحدي.

الاب .. لاا بابا طبعاً نتغده سوه ، بس اخوج بسام مسويلج مفاجأه وراح نتعشى اليوم بره.

سدن .. شنووو ... بسام يسويلي مفاجأه ..... !!!!!

هههههههههههههه بابا حبيبي لتتشاقه هشكل لينجلط بسام.

بسام .. بعصبيه .. ها بابا شكلتلك اني ، شوف اللسانها هاي ابد مو مال احترام .

الاب .. اختك دتتشاقه لا كل كلمه وسويتلك مشكله .. وبعدين حقها تتفاجأ انت ماعندك اسلوب وياها ولا عمرك مطلعها فمصدكت من كلتلها .

سدن .. وجه بسام صار برتقالي من الغضب والعصبيه ع الرزاله الي حصلها احسه يريد ياكلني ، اما اني متت ضحك بداخلي بالكوه لازمه نفسي هههه

_اي والنبي بابا من صدوك تفاجأت مو قصدي اعصب اخويه العزيز.

الاب .. مصار شي بابا يلا كملي شغلج وجهزي نفسج خلي نتغده حتى نطلع ..

سدن .. يااااي بابا حبيبي الله يخليك الي ولا يحرمني منك .. حضنت بابا بقيت ابوس بي وهو هم حظني امام انظار بسام المشتعله غضب ..

بسامووو عافنه وطلع كال عندي شغله اكملها واجي .. وبابا كعد بمكتبه يراجع شغله كملت تنظيف المطبخ .. وسويت غده النا اني وبابا .. مخليت شي اعرفه مسويته والحمدلله الگوگل مقصر وياي !

سويت اكلات اتجنن كولهم من النت نزلتهم وعجبو بابا الحمدلله .. حرامات بسامو مموجود كان شاف اشون اطبخ اكل يجنن .. اتغدينا اني وبابا سويتله جاي وبقينا انسولف للعصر

اني صعدت لغرفتي حضرت نفسي .. تعرفون البنات اشكد يطولون بهذي السوالف خصوصاً اذا طلعه مثل هذي متصير غير مره بعمري بسبب الحبس الي عايشته.

طلعت الفستان الي جابليا بابا وكان يجنن وكعت بغرامه من اول نظره ..

شكله كولش حلو طويل ومخصر ع الجسم ، لونه اسود قماشه ناعم شتائي يجنن هو كولش حلو بس اني كنت متردده البسه!

لان شكله مو مال طلعات عاديه وعشه لا مال حفالات ومناسبات .. بس بابا اصر الا البسه ما اعرف لويش .. واني مردت اخرب اجواء الطلعه واعاند بابا ، لبسته رغم ابد محابه اروح بي.

شعري سويته كيرلي خفيف مو من هذا السبرنكات .. لا هيج شي قليل كولش بس الاطراف مالته لانو هو قصير ميحتاجله تعب شلت خصلتين من كدام وخليت بيهم فراشات ذهبيه ناعمات من ورا طلع شكلهم يجنن فد شي نازك وكولش لائمو الفستان

مخليت ميكب قوي شي خفيف وايلاينر .. لانو اعرف بسام يبقى يلغي ويخرب ام الطلعه

واصلاً الطلعه عائليه ميحتاج مكياج اوفر وكذا .. حذاء وجنطه ذهبي عندي لبستهم ونزلت لكيت بابا متحضر ومنتظرني اشويه و واجه الافندي بسام .. اخذنا بسيارته وطلعنا طبعاً اول مره بسام يشوف ملابسي وميحجي !!

استغربت مو من عادته يسد حلكه خصوصاً واني لابسه هذا اللبس!

الله يستر بس لا ماخذيني لمثواي الاخير ع كولتهم💔

وصلنا لمكان كولش راقي مطعم اول مره اشوفه .. من شكله الخارجي مبين فخم وغالي!

السعاده الي دااحسها متنوصف اول مره اطلع ويا بابا وبسام واعيش هيج اجواء العائله .. نزلت لازمه ايد بابا ودخلت ، بسام ورانا يمشي .. كعدنا بمكان بسام حاجزه بي بس عوائل وناس مبين من شكلهم طبقات راقيه وكذا

هسه البعض يستغرب من كلامي لويش دااحجي هشكل مثل الي مشايفه!!

حكوولكم لويش ..

صح اني عايشه عيشه ملوك واهلي الحمدلله حالتهم الماديه فوك العاليه .. بس اني محبوسه ، حياتي كولها عباره عن مدرسه وبيت مااطلع ولا اشوف هيج اماكن ، لذلك لما اشوف شي ابقى منبهره بي.

المهم .. طلبنا العشه واتعشينا الحمدلله الاكل ما احجيلكم عليه فد شييييي بحيث حتى الكشخه والبرستيج اتمرغلو من شفت الاكل .. مبقيت شي مأكلته !

الحمدلله المكان مكان بي هواي ناس بس احنا وكم عائله .. اكلت لحد ما انملت بطني.

كملنا العشه و ع اساس نطلع غير !

اشو هذولي بقوا ماعدين .. وبينهم حركات واشارات مفهمتها ..!!

طول الوقت هشكل مااعرف اشبيهم وبسام كل اشويه يكوم مااعرف وين يروح ويرجع!!

محجيت شي اني لانو كالعاده بسام حيكولي معليج ولتتدخلين وتصير مشكله فسكتت وبقيت اراقب الوضع!

الى ان انتهى العشه .. چان تنطفي الكهرباء بالمطعم!!!!!

شنو القصه معقوله مطعم بهالفخامه والرقي تنطفي بي الكهرباء!!!

بصراحا گلبي ابد ممتطمن لديصير لذلك خفت .. بس هم محجيت شي لانو بابا وبسام يمي شكو اخاف!

بعد مرور ثواني اشتغلت موسيقى مالت عيد ميلاد (happy birthday to you ) !!!

واجو ناس شايلين بيدهم شي وعليه ضوه مثل الشمعه متوهج خلوها كدامي!!

بعدين انفتحت الاضويه .. والكل كام يغني ويا الموسيقى ويصفكون .. الكل يباوعلي ومبتسم واني مثل الاطرش بالزفه!!

باوعت لبابا بصدمه .. ابتسم بوجهي وكالي كل عام و انتي بألف خير باباتي.

ما احجيلكم الفرحه شنوووو الشعور الي حسيته شنووو .. لدرجه بجيت من الفرحه !

كام بابا حظني وبسام هم باسني بكصتي وحظني .. الناس بدت تهنيني طبعاًمااعرفهم بس اغلبهم طلعو من اصدقاء بابا وبسام هم وعوائلهم جايين ... احتفلنا بأجواء اقل ما يقال عنها خورافيه هههه.

اتجمعو الكل دنطفي الشموع انطفت الاضويه مره ثانيه .. يلا سدن اتمني امنيه وطفي الشموع........!

غمضت عيوني واتمنيت شو واحد ... مااعرف اذا الاماني تتحقق او لا بس اني اتمنيته ع كل حال.

فتحت عيوني واذا بالامنيه اتحولت الى كابوس ......!

بدله سوده .. بشره سمره .. اكتاف عريضه .. وطوله الي يخطف الانفاس ... واكف كدامي بكل ثقه وابتسامته المعتاده ع وجهه!!!!!!!!!!!!!!!

داحلم اني مو؟!!

اكيد دااحلم .. شجابه هذا هنا .. بسام .. بسام وين بس لا يشوفه .. والله يموتني!

كنت حاسه انو الفرحه هذي محتدوم والسعاده الي عشتها اليوم نهايتها موتي.

بلحظه وحده كل الفرحه اتحولت الي قلق ، خوف ، وسعاده!

اي سعاده شي بداخلي احسه ديطير من الفرحه وبنفس الوقت خوف مااعرف شنو هالمشاعر المتناقضه حنجن.

كل ظني كان جاي عليه .. حيحجي وياي .. ومن اول نظره منه حيبين كولشي وانفضح.

بقيت واكفه مثل التمثال وصافنه بوجهه .. مااعرف شنو اسوي .. وهنا صوت بابا فززني.

الاب .. يا اهلاً وسهلاً بالباشا .. معقوله قبلت الدعوه واجيت!

نور الدين .. بعد ما وصلتها لبيتها هذاك اليوم هي دخلت واني رجعت للسياره واذا ببسام وابوها كدامي بسيارتهم!

اول ما شافوني نزلو بسرعه ممصدكين .. شدااسوي يم بيتهم واني الصبح سديت الخط بوجهه لبسام ولغيت الشغل ويا؟!

سلمت على ابوها سيد كريم انسان جداً محترم ومشتغل ويا هواي قبل بس من استلم ابنه الشغل قل تعاملي ويا شركته.

المهم..

سألني اخوها بأستغراب شجابني لهنا؟!

محجيت ويا لان كارهه لدرجه متنوصف بسبب كذبه والموعد الي كنت انتظره دقيقه دقيقه بسببه خرب كلشي.

نور الدين .. الحقيقه سيد كريم اني اجيت بنفسي حتى اللغي الشغل الي بين شركتي وشركة حظرتك.

ابو بسام .. تلغي الشغل؟!!

ليش شنو السبب!!

نور الدين .. اسأل ابنك وتعرف السبب بنفسك ، واني اترخص صار لازم اروح.

ابو بسام .. لحظه سيد نور الدين خلي افتهم شنو الموضوع وبعدها الي تريده يصير.

نور الدين .. سيد كريم انت متعامل وياي من قبل وتعرف كلش زين انو اني مااتراجع بكلامي ولو ما احترمك ما اجي بنفسي لبيتك بس الي سوا ابنك اني مااسامح بي .

ابو بسام .. شسوع بسام غير اعرف؟!

التفت ع بسام .. شنو الي سويته بسام احجي ..

بسام .. بابا مصار غير الي كلته الك بالطريق اني اضطريت اتحجج بعذر حتى اقابل الباشا وهو اخذ الموضوغ على انه كذب .. هذا كل الي صار.

ابو بسام .. سيد نور الدين اني بمقام ابوك وغير هذا انت تعرفني كلش زين شغلي قبل كلشي والي صار سوء تفاهم وبسام كالي ع الي صار فأتمنى تغفرله غلطته هالمره لخاطري اني واواعدك بعد ميتكرر الي صار .

نور الدين .. اني حالياً لازم اروح ويصير خير .

ابو بسام .. لا وين تروح ماكو روحه الا تدخل وانضيفك معقوله توصل لباب بيتنا ومتدخل .. لا يمكن .

نور الدين .. واصلع ضيافتك ابو بسام وان شاء الله غير مره لانو عندي شغله ضروريه ولازم اروح.

ابو بسام .. ماشي لعد ما أأخرك بس باجر عدنا مناسبه صغيره واتمنى تقبل دعوتي وتجي.

نور الدين .. اعتبر عزيمتك واصله واعذرني مااكدر اجي جداً مشغول.

بسام .. بابا الباشا ميحب الهوسه والحفلات خليها بعد عيد ميلاد سدن انعزمه.

نور الدين .. عيد ميلادها .... اشلون مااعرف اني؟!

صار لازم اروح من رخصتك سيد كريم.

عفتهم ورجعت للمكتب بالطريق اتصلت بزيد كلتله تعرفلي باجر وين عدهم حفله بيت الاحمد اريد المكان والوقت.

بالطريق نزلت يم محل اشتريتلها هديه بسيطه .. وصلت للمكتب لكيت زيد كدامي كالي باجر الحفله وعرفت المكان بس متتخيل وين!

نورالدين .. زيد احجي بلا اللغازك السخيفه.

زيد .. ههه بالمطعم الي اشتريته حضرتك قبل شهر !

نور الدين .. حلو .. اتأكدلي من الوقت واللغي مواعيد باجر كلها.

زيد .. شنو هالاهتمام المفاجئ بعائلة الاحمد!

نور الدين .. مو شغلك سوي الي كلتلك عليه زيد .. اني رايح للبيت يمان ماادري شعنده خبلني بس يتصل .

زيد .. تمام باشا.

نور الدين .. رجعت للبيت لكيت يمان منتظرني

يمان .. واخيراً اجيت يمعود وين جنت.

نور الدين .. شكو احجي ترى تعبان واريد انام.

يمان .. شنو سالفتك نور اشو طولت بموضوعي؟!

نور الدين .. يا موضوع؟!

يمان .. اهووو هاي انت ناسيني اصلاً .. موضوع السياره اشبيك .

نور الدين .. هم رجعت لهذي السالفه  .. يمان كلتلك موضوع السياره انسى انت غبي وبلا عقل اعرفك من السوق تنسى نفسك والسياره هذي خطره اتروح تسوي حادث وتموت.

انسى هذا الموضوع اذا تريد افتحلك مشروع يفيدك ما عندي مانع  او شوفلك بنت حلال اتزوج واستقر يا اخي احسنلك من هالسوالف التعبانه .

يمان .. اهوووووو هم رجع لسالفة العرس يمعود هسه انت مو اكبر مني ليش متتزوج شعليك بيه اني ويني وين الزواج لخاطر الله خليني اعيش حياتي.

نور الدين .. يا حياة هاي عباره عن بنات و عربده وسوالف مكسره ، خصم الكلام سياره ماكو لو تموت ولتفتح هذا الوضوع مره ثانيه.

و ولي عن وجهي اريد انام دااكلك تعبان.

صعدت الغرفتي نمت كعدت الظهر تقريباً الساعه ب١٢ فتحت الموبايل طلعت رسالتها الي رسلتها الي اول مره .. بقيت اقرا بيها .. واقرا واقرا .. ردت ارسللها رساله اهنيها بميلادها ..!

بس لا اليوم راح اشوفها.. خليها تتفاجأ

كالعاده الروتين اليومي .. ركضت اشويه ورياضه .. حمام وريوك ..

كعدت بالمكتب كملت كم شغله اتغديت ورجعت نمت لحد الليل بدلت وطلعت مريت ع الشركه شفت كلشي تمام والشغل كله تمام وقعت كم ورقه شغلات مكتبيه ، بعدها طلعت للمكان الي ابالي .. و صلت متأخر يمكن لكيتهم يردون يطفون الشموع!

بقيت اراقبها من بعيد طالعه اية جمال !

المكان شبه اظلم بس ضوه الشموع عاكس عليه لوحه ناقصها بس رسام!

والرسام كان عيوني الي رسمتها بخيالي .. غمضت وطفت الشمعات .. يا ترى شنو اتمنت؟!!!!

اول مفتحو الضوه شافتني كدامها .. كالعاده لونها انخطف وملامحها ارتعبت ع بالك شافت شبح!

اكيد ع بالها اجيت اسوي مشكله او شي لانو الصدمه الي ع وجها حجت كلشي!

كنت واكف مقابيلها ميفصلنا غير الميز الي عليه الاكل .. بس حسيت المكان فارغ بس هي كدامي .. بصوت هادئ ابتسمت و كلتلها

_(كل عام وانتي بخير)

محجت شي ابوها الي حجه ..

ابو بسام .. سيد نور الدين!!!!!!!!!

بسام .. الباشا!!!!

نور الدين .. مساء الخير سيد كريم كل عام وبنت حضرتك بخير .

ابو بسام .. الله يسلمك ، شنوهالمفاجأه متوقعتك تقبل الدعوه وتجي .. نورتنا .

نور الدين .. انتو الي منورينه.

ابو بسام .. تسلم ولو ما فهمت قصدك.

بسام .. بابا الباشا هو صاحب هذا المكان .

ابو بسام .. اهااااا مكنت اعرف اعتذر منك سيد نور الدين.

نور الدين .. اعتبر المكان مكانك ومرحب بيكم بأي وقت .. بس معرفتونا بصاحبة الميلاد وينها؟!

ابو بسام ..ايي اخذني الكلام ونسيت اعرفك .. هذي بنتي سدن ، بابا سدن هذا السيد نور الدين من اصدقائي المخلصين وشريك اخوج بسام حالياً.

سدن .. لازم احجي .. لازم احجي .. لج سدن افتحي حلكج واحجي حتخليهم يشكون بيج.

ما اكدر احس الكلام اتبخر.

نور الدين .. عجيبه هالمخلوقه بمجرد متشوفني تجمد الي يشوفها ميكول اتعاركت ويا الحارس قبل شهر ورادت اتضربه .. مديت ايدي الها ..

_اهلا وسهلاً انسه سدن.

سدن .. رفعت ايدي بكل طاقتي وخليتها بأيده .. سلمت عليه والكلمات بالكوه طلعت .. اهلا بيك.

بسام .. بابا رايدك بكلمتين .

ابو بسام .. اي ابني .

راح بسام يحجي ويا بابا مااعرف ع شنو بس الي متأكده منه انو موضوع يخص الصفقه الي لغاها نور الدين .. راحو بقيت اني ع وكفتي .. بس درت وجهي عنه لان عيونه اكلتني بنظراتها .. حاولت اشغل نفسي بأي شي في سبيل مااباوعله ولا احاجي .. محسيت بي غير واكف بصفي!!!

رفعت راسي عيني صارت بعينه !!

نور الدين .. طالعه ملاك اليوم .. جداً جميله.

سدن .. بعدت نظري عنه وبعدم اهتمام جاوبته .. وين اكو ملاك لابس اسود!!

نور الدين .. اكو انتي.

سدن .. كلماته احسها لامست گلبي .. لكيت نفسي اضحك بلا اي مقدمات .. شكراً ع المجامله كولك ذوق.

نورالدين .. مااحب اجامل ابد.

سدن .. اممم هم شكراً

نور الدين .. على شنو؟!

سدن .. ع كلامك.

نور الدين .. لا شكراً الج لان خليتي عيوني اتشوف بشي حلو.

سدن .. دااضحك يا جماعه ميته فرح بداخلي .. شنو من بشر هذا بلحظه وحده يغير مزاجي وشعوري من خوف لفرح .. من قلق لاستمتاع!!

محجيت شي بس ابتسمت بوجهه .. بهذي الاثناء اجه بابا وبسام .. وكفو وبقو يحجون ومثل متوقعت ع الشغل الي انلغى بسببي .. والله لو يعرف بسام اني السبب يذبحني ع قبلة اليهود.

نور الدين .. سيد كريم انت تعرف اهم شي عندي المصداقيه بالكلام .. وابنك كذب ولاجل شي تافه .

ابو بسام .. بالضبط شي تافه انت دتكول تافه يعني ماكو داعي تلغي الشغل بسبب هيج شي .. وبسام مو قصده يقاطع اجتماعك بس اني الي اتصلت بي وهو سوه هيج.

نورالدين .. فعلا ابنك قاطع اهم اجتماع بحياتي .. بس خلص راح اتناسى الموضوع لانه جمعني بنفس الشخص.

سدن .. حرفياً گلبي وكف من كال هالكلام .. انتهيتي سدن الله يرحمج.

بسام .. شنو يعني ما فهمت يا شخص تقصد!!

نورالدين .. اختك.

للحكايه بقيه 💔

السلام عليكم اسفه طولت عليكم بس كلتلكم بظرفي اتمنى اتقدرون

وبالنسبه للبارت القادم حينزل بعد وفاة الامام احتراماً لهذي المناسبه حتوقف كم يوم

رأيكم بالاحداث وتوقعاتكم للبارت القادم

لتنسووووووووووون التصوييييييييت وشكراً جزيلاً ع دعواتكم وكلامكم الجميل 💜

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

هالمره حكتب الملاحظه بالبدايه بلكي تقروها

بالنسبه للتأخير فاللمره المليوووووووون اكولها القصه احداثها مو روتينيه فصليه ومدري شنو!

يعني لازم وقت على ما اسلسل الافكار وارتبها وهذا الشي ياخذ وقت فالخاطر النبي الي ماعدها صبر لتقرالها ولتابعني رجااااااءاً مالها داعي المذمه والحجي الزايد بالتعليقات الي ديكتبنها ومدااحجي ع الكل حتى لتجيني وحده اتكول نقد وميصير اتجمعين الكل وهالسوالف ترى ملييييييت من الكلام الفارغ (للبعض) يعني القصه من بدايتها تصويت واحد ممصوته ومن اتأخر تجي تحجي عليه وتذم يلا يمعوده واذا مو كدها لويش تنشرين ؟!

ترى مااشتغل عند احد ولا مستفاده شي من احد ومن الاخير عزيزتي مكاتبتها الج ولا عاتبه عليج تقريها انفلو وفضيها .

الي معاجبها كلامي لتابعني لان والله ديجفصن ابطني وساكته على شنو مااعرف.

بسام .. نظراته السدن عباره عن رعب .. ما فهمت شنو اختك؟!!

سدن .. ادعولي بالرحمه عفيه .. وسوولي ثواب مو تنسون لان احب الاكل.

نور الدين .. بأبتسامه هادئه .. اختك اليوم عيد ميلادها وهذا مو مكان ولا وقت شغل حتى اناقشك بهذي المواضيع.

التفتت ع ابوها ..

اترخص سيد كريم صار لازم اروح .. والعمر كله انسه سدن .. طلعت.

سدن .. لا لا مدااصدك .. گلبي ما احس بي .. لا ويكولي العمر كوله .. هو انت طيرت نص عمري قبل كم دقيقه.

بسام .. ها بابا اني شكلتلك؟!

مو كلتلك هذا مستحيل يتراجع بكلمته مصدكتني .. راحت الصفقه وكل التعب ضاع.

الاب .. ما ضاع شي  ، اهدأ ولتكعد تندب مثل الارامل والصفقه هذي متصير الغيرك عوف الموضوع هذا عليه.

بسام .. ماشي راح اسكت واشوف تاليها.

الاب .. سدن بنتي روحي كملي حفلتج لتضوجين من الي صار اخوج بسام مو قصده يعكر الاجواء.

سدن .. جامده بمكاني مااحس بشي .

الاب .. سدن!!!!!

سدن .. ها .. هاا بابا دتحجي وياي؟!!

بسام .. لا ويا الطاوله مو يمج الموضوع.

سدن .. اااخ لو بيدي هسه اركع هذا الكرسي براسك واخلص منك ومن خوفي .

بلعت الرعب الي بحنجرتي وبصوت حاد .. رجعوني للبيت.

الاب .. بعد وكت بابا بعدنا محتفلنه بيج.

سدن .. مجاوبتهم ولا كلمه اخذت جنطتي وطلعت مااشوف كدامي ركض للسياره.

الناس بقت اتباوع عليه هاي اشبيها اتخبلت فجأه .. حقهم ميعروفون كان بيني وبين الموت كلمه .

والي موتني من صدوك اشون يخاطر بيه بهالسهوله!!

وصلت للسياره الباب مقفول وبسام وبابا بعدهم مطالعين وكفت يم السياره بس اني ارجف ارجف من القهر احس نفسي مختنكه .. انتظرت يطلعون ماكو غير شافوني طلعت يجون ورايه!!

بقيت واكفه والجو بارد ، اني لابسه بس الفستان .. البرد دخل لعظمي وجهي احسه جمد.

صافنه وافكر بألي صار قبل اشويه .. من كال اختك .. ونظرات بسام المميته..  قاطع شرودي صوت سمعته ورايه!!!!!

التفتت لكيته واكف بكل هدوء وابتسامته السخيفه ع وجهه ولا كأنه مسوي شي!!

بسرعه درت وجهي لباب المطعم .. خفت يطلعون بابا وبسام ويشوفوني .. ملكيت احد .. رجعت باوعتله ونظرات الغضب اتحولو الارتباك وخوف .. بصوت حاد

..

_شدتسوي هنا؟!!!

نور الدين .. انتظرج.

سدن .. شتنتظر انت اكيد مو بعقلك تعرف اذا شافك بسام هسه شحيسوي ؟!!

نور الدين .. لتخافين ميطلعون هسه.

سدن .. شتقصد!!

نور الدين .. بسخريه .. انتي ليش هالكد اتخافين من اخوج هذا؟!

سدن .. معليك بيه وجاوبني بابا وبسام لويش اتأخرو شسويتلهم؟!!

نور الدين .. شسويتلهم!!!!

سدن .. اي لعد اشعرفك حيتأخرون؟!!

نور الدين .. انتي شنو مفكرتني مجرم لو عصابجي لو شنو؟!!

سدن .. ميهمني اعرف شي .. بس كولي بسام وبابا وين؟!

نور الدين .. ميهمج!!

تمام .. ماكو شي يستدعي كل هالخوف والكلام الزايد  اخوج وابوج عدهم شغل جوه وراح يتأخرون .. يعني لتخافين ما قتلتهم ولا خطفتهم.

سدن .. هذا اكيد ديكذب بابا مستحيل يعوفني وحدي بالشارع .. اكيد صاير شي!!

نور الدين .. اكيد دتتسائلين اشلون عافوج وحدج هنا!

هذا سويج السياره دزه بيد الحارس حتى تبقين بيها وهم كاعدين يعقدون صفقات بالداخل.

هاا واخوج كال للنادل هالكلام بالحرف ( تبقين بالسياره الى ان يجون ممنوع اتفتحين حتى الجامه )

سدن .. عيوني دمعت مااعرف من كلامه لو من البرد  .. احس اكو شي بعيوني من كال هالكلام .. بقيت اتظاهر بأنو الي سمعته عادي وانو الي سوا ابويه وبسام مجرحني واتفهمت الموضوع .. كتمت خنكتي وبستهزاء ..

_و شكو اجيت بنفسك .. ليكون انت النادل !

نور الدين .. شفت عيونها دمعت من كلتلتها كلام اخوها فحاولت الطف الجو حتى تبتسم .. ضحكت بصوت عالي رغم ردها  زعجني .. هههههه .. لخاطر هذي العيون الحلوه اصير نادل مو مشكله وحارس هم اذا تردين وسايق حتى شيف هم اصير اعرف اتحبين الاكل  .

سدن .. كنت مقهوره، مخنوكه  ومعصبه من كلامه ومن بابا ومن بسام والدنيا كولها كارهتها .. اشون خلوني بهالموقف حقير ، معقوله مفكرو بيه وحدي بالشارع!!

لهدرجه بابا عنده الشغل اهم مني!!

بس من كال هالكلام غبصاً عني ابتسمت .. ابتسمت والدمعه الي كاتمتها بعيني نزلت.

نور الدين .. اتفاجأت من شفت دمعتها نزلت رغم انو شكلها صار يموت ابتسامه ودمعه!!!

بس ما كنت اتمنى اشوف بعيونها دمعه كدامي!

مشيت بتجاها الى ان صرت قريب عليها .. بصوت هادئ

_اسف .

سدن .. مسحت الدمعه بسرعه .. وبصوت حاد ع شنو؟!

نور الدين .. ع الدمعه الي نزلت.

سدن .. وانت شنو علاقتك حتى تعتذر .. الهوا بارد دخل بعيني .

نورالدين .. بأبتسامه هادئه .. تمام ادخلي للسياره الجو بارد لتتمرضين.

سدن .. مرتاحه هشكل شكراً.

نورالدين .. ليش اسلوبج حاد تجاهي ممكن اعرف السبب؟!

سدن .. باوعت عليه بحده .. سؤاله نرفزني وكأنه ممسوي شي .. بعدم اهتمام جاوبته ..

_يتهيألك  ؟!

نور الدين .. لا  تصرفاتج وكلامج اكبر دليل.

سدن .. احتمال لانو كنت حتسويلي كارثه قبل كم دقيقه .. او يمكن لان حضرتك اتحب اتشوف الناس مرعوبه وخايفه بسببك .. او يمكن لانك شايف نفسك زياده عن اللزوم .

نور الدين .. لحظه لحظه ع كيفج .. شنو قصدج بالكارثه الي سويتها؟!

سدن .. هذا اكيد يستهبل .. ماكو شي انسى .

نور الدين .. رجاءاً لما تحجين شي كملي للاخير لتخليني محتار بقصدج ، جداً اكره هذا الاسلوب .

سدن .. التفتت عليه بعصبيه .. انت شنو غشيم لو اتغشم نفسك ؟!

قبل اشويه لما شنو كلت البسام؟!

حاول تسترجع كلامك وتعرف عن اي كارثه احجي.

نورالدين .. ماكو داعي استرجع اني متأكد مكلت شي خطأ ، انتي كولي شنو الي ضايقج وخلص هي مو حزوره.

سدن .. ممضايقني شي سلامتك.

نورالدين .. بنفاذ صبر .. انتي ليش تستفزين المقابل شنو هالتصرفات ؟!

كلتلج اكره هذا الاسلوب ليش اتصرين عليه؟!!

سدن .. ماشي راح اقنع نفسي واصدكك  ، لما سألك بسام منو الشخص الي قاطع اجتماعك ويا شنو كلتله؟!

نور الدين .. اهااا قصدج لانو كلتله اختك؟!!

سدن .. هياتها ذاكرتك سليمه شكو دتسوي حالك متعرف شي.

نورالدين .. كلامي هذا مو كارثه ولا مشكله لذلك ممخلي ابالي انو هالكلمه ممكن اتزعجج ، اني داسترسل بالكلام وكلتله اختك يعني بعدني مكملت كلامي وقاطعني

بعدين هو اصلاً ميعرف شي انتي بخوفج دتشككي ماكو داعي اتكبرين الموضوع.

سدن .. صح هو ميدري بس اني اعرف شتقصد وافهم عن شنو دتحجي .. مفكرت بردة  فعلي من ذكرتني بالكلام؟!

متتخيل الرعب النفسي الي عشته هذيج اللحظه بسببك انت وثقتك الزايده.

نور الدين .. اول مره شفتيني شنو كلتلج ؟!

راح اوضحلج وبالمختصر .. اني بحياتي ناس لو اخلي حبل الاعدام ع رگبتهم هم ميخافون والسبب ثقتهم بيه ، يعني خوفج هذا والقلق الي عشتي انتي تتحملي لانج من البدايه مثقيتي بيه .. راح اتكولين مااعرفك وشلون اثق بشخص مااعرفه وهالكلام ... ؟!

راح اكلج حقج بس المعرفه مو شرط للثقه والعكس صحيح؟!!

والدليل ابوج واخوج مااعتقد اتعرفين احد اكثر منهم .. او اتثقين بشخص اكثر منهم !

بس الي متعرفي انو كل هذا الاحتفال وعيد ميلادج والجو الي عشتي عباره عن لعبه !

اخوج سوه كل هذا بس حتى يعقد صفقه اتكدرين اتكولين عنها مشبوهه نوعاً ما وحفلة ميلادج كانت مجرد غطاء.

سدن .. بأستهزاء .. ههه انت شكلك متعرف شدتحجي.

نور الدين .. اني بالذات لتكليلي مااعرف شنو احجي ، لانو الاشياء الي اعرفها ممكن تصدمج.

سدن .. بعصبيه .. انت شرايد هااا .. شرايد؟!

نورالدين .. ليش عصبيتي؟!!

سدن .. كل الي حجيته والبلاوي الي دتكولها ومستغرب لويش اعصب؟!

صارلك ساعه اتحاول بكل الطرق اتشوه سمعة بابا واخويه وصلت بيك تتهمهم بصفقات مشبوهه ، اسمعني زين اذا عندك مشكله ويا واحد منهم روح حلها بينك وبينهم رجال لرجال لتجي اتطلع بطولاتك عليه وتستخدم طرق حقيره مثل الي دتسوي هسه.

نور الدين .. عصبتني حيل كل كلمه اكولها اتكذبها ، ولسانها اطول منها.

صح مااعصب بسهوله بس لما شخص يكذب كلامي يطير عقلي .. كتمت غضبي واتظاهرت بالعكس .. ابتسمت بوجها ..

_هذا كلامج لو من شخص ثاني كان عرفت اشلون اتعامل ويا بس  كل الي كلتي راح اتغضى عنه لاسباب متعرفيها حالياً

سدن .. لتتغاضى عن شي ومااخاف لا منك ولا من اي واحد ، وكل الي يشوه سمعت اهلي هذا حيكون ردي .

نورالدين .. تمام اني مااريدج اتخافين مني بس لتتجاوزين بكلامج لان صدكيني من افقد اعصابي متتخيلين شنو اسوي!

فرجاءاً لتتمادين بالكلام

واما بالنسبه لكلامي عن ابوج واخوج راح اثبتلج بالدليل صحة كلامي.. سحبت الموبايل واتصلت .. بعد ثواني

_ افتح الصوت الي بغرفة اجتماع كريم الاحمد وابنه ...!

سدن .. كنت معصبه منه ، احجي بكل ثقه وادافع عن بابا وبسام لانو مستحيل اشك مجرد شك بابا يسوي شي غير اخلاقي او غير قانوني ...... بس الي سمعته صدمني ، خلاني احس انو اني ثوله كولشي مااعرف عن اقرب الناس الي !

فتح الموبايل وسمعت كلام مثل التسجيل مااعرف فيديو .. اشخاص هواي ديحجون و ومن ضمنهم صوت بابا وبسام .. كلام واضح .. كل الي يحجو مو قانوني ويودي بستين داهيه رغم اني ماافهم بشغلهم  ... بس الي سمعته وكف عقلي يحجون عن مناقصات وهميه وعقود كولها مزوره

سكتت منطقت ولا كلمه بس كرامة اهلي احسها انسحلت كدامي !

نورالدين .. هذا كافي لو تردين اتشوفين بعينج بعد؟!!

سدن .. دنكت راسي ومحجيت شي.

نورالدين .. ارفعي راسج هذا مو غلطج.

سدن .. رجاءاً عوفني بحالي؟!!

نورالدين .. اذا تردين انهي الموضوع.

سدن .. شقصدك؟!!

نورالدين .. هذي اول صفقه الهم يعني اكدر احل الموضوع بسهوله واتلافى الاضرار قبل لتكبر ، واخوج هو الي ديجر والدج لهذي الاشياء لانو اني اعرفه من زمان انسان نزيه وما اله بالحرام بس اخوج ديورطه .

سدن .. اي وهو هذا الي داكوله الك بابا مستحيل يسوي هشكل .. كل المصايب بسبب بسام الي حيضيع نفسه ويضيع بابا ويا.

نورالدين .. افهم من كلامج ترديني اتدخل بالموضوع؟!

سدن .. اذا هذا الشي حيساعد بابا وينقذه من المشاكل فأترجاك رجاء تتدخل وتخلصهم قبل ليتورطون اكثر.

نور الدين .. تمام .

سدن .. اشكرك .

نورالدين .. ماكو داعي للشكر بس كالعاده عندي طلب بالمقابل

خصوصاً انو الي ديسوي اخوج ممكن ايورطني ويا اذا اتدخلت بالموضوع وسمعتي راح تنضر.

سدن .. مفهمت شنو هي مقايضه!!

نورالدين .. كلت طلب مو شرط.

سدن .. انزعجت من كلامه حسيت نفسي تحت رحمته .. وشنو هذا المقابل بلا؟!

نورالدين .. اممم ... مو هسه تعرفي بعد مااحل موضوع اخوج نتفاهم.

سدن .. كلتلك من قبل ما اوافق على شي مااعرفه ، واذا مساعدتك اعرف شنو حيكون ثمنها ، فشكراً اني حل الموضوع ويا بابا واعرف اشون اخلي يترك هذي الشغله.

نورالدين .. انتي ليش دائماً نظرتج سلبيه وافكارج جامحه هيج ؟!!

سدن .. مو نظره سلبيه بس شنو الي عندي ممكن اقدمه غير شي واحد .. واني مو طفله اعرف شنو الي اتريده.

نورالدين .. ضحك بصوت عالي هههه للمره الثانيه تفكيرج ياخذ منحى غلط .. كلتلج قبل انتي تنفعين تصيرين كاتبه ع خيالج الواسع هذا .

سدن .. مو خيال هذي الحقيقه وتصرفاتك واهتمامك من اول مشفتني اتدل ع صحة كلامي.

نورالدين .. تمام اتركي الخيال وخلينا نحجي جد.

ومن الاخير المقابل هو انتي.

سدن .. اشكد صلف وميستحي لا ويكولها بوجهي .. شفت خيالي مو واسع وانما تفكيرك القذر.

نورالدين .. بصوت حاد انتبهي الالفاظج.

الي اقصده اني رايدج على سنة الله ورسوله مو مثل ممفكره .

سدن .. شنو ؟!!

نورالدين .. الي سمعتي.

سدن .. يا كاع انشكي وبلعيني للمره الثانيه ع التوالي غبائي يفضحني .. من صدوك اني الي تفكيرها قذر .. والمصيبه من كال اتزوجج كمت اخربط مااعرف شنو احجي .. ولويش تتزوج؟!!

نورالدين .. وشنو اليمنع انو اتزوج ؟!

سدن .. لا .. قصدي لويش اني بالذات .. انت انسان معروف ومتمكن تكدر تتزوج اي وحده اتعجبك لويش دتخاطر بسمعتك لما حتساعد بابا وبسام بس حتى تتزوجني !

نورالدين .. انتي جاوبتي ع سؤالج بنفسج.

سدن .. مفهمت؟!!

نورالدين .. اختار الي تعجبني .. وهذا الجواب .. انتي الي عاجبتني.

سدن .. يا ربي هذا ولا يستحي .. حسيت وجهي صار احمر وبنفس الوقت عصبت منه لانه ديستغل وضع بابا ويحجي وياي بهالطريقه.

نورالدين .. اعتبر سكوتج موافقه؟!

سدن .. لا طبعاً .

نورالدين .. تمام .. اكدر اعرف شنو سبب الرفض؟!

سدن .. السبب اني مو سلعة وتقايض عليها .. ولا لعبه عندك حتى تستغلني هشكل .

نورالدين .. لو معتبرج سلعه كان ممكن اروح لاخوج واطلبج منه مقابل صفقه من صفقاتنا واني متأكد كلش زين اخوج بدون تفكير راح يوافق ع الموضوع وبشروطي هم.

سدن .. كلامه صحيح بسام العار كولشي يسوي .. بس اني ما لازم ابينله هذا الشي ع الاقل كدامه اتظاهر بالعكس .. انت غلطان بسام لا يمكن يفرط بيه مثل ممفكر حضرتك صح هو عصبي وقاسي وياي بس مو معناها يشمرني مقابل صفقه لواحد مثلك.

نورالدين .. واحد مثلي؟!

سدن .. اي انسان استغلالي وشايف نفسه .

نورالدين .. اممم صار لازم اروح .. فكري وانتظر جوابج.

سدن .. لتنتظر شي وهذا الموضوع انسى اصلاً .

نورالدين .. تصبحين ع خير.

سدن .. عافني وراح ولا كأنو ديسمع شنو كلتله .. اول مطلع بسيارته بابا وبسام طلعو !!

الغضب الي كنت احسه فضيع منهم اثنينهم .. بلا بسام كولشي اتوقع منه بس بابا صدمني بحقيقته .. اشون يمشي ورا بسام بهذا الطريق ويضيع سمعته .. اجه بابا باسني براسي واعتذرلي لانو اتأخرو عليه .. بسام كانت السعاده مرسومه ع وجهه شكلها صفقته تمت!

محجيت وياهم .. ولا نطقت بحرف احس الدنيا كولها سوده بعيني والافكار الي اتدور بعقلي طول الطريق بسام وبابا يحجون ويتناقشون بصفقتهم الجديده اني بس اسمع وگلبي مرعوب منهم احس نفسي مااعرفهم.

وصلنا للبيت صعدت الغرفتي گبل .. دخلت للحمام سبحت وطلعت داانشف شعري سمعت صوت الفون!

فتحته مسج من رقم غريب .. (كل عام وانتي بخير للمره المليون وهديتج جوه مخدتج)

شنو هذا المسج الغريب .. يا هديه هذي معقوله بسام هذا لو بابا ؟!

رحت بسرعه رفعت المخده لكيت جواها شي مربع صغير ومغلف بشكل كولش حلو!!!

فتحته بسرعه لكيت بداخله (قلاده) ذهبيه ع شكل ملاك صغير واجناحاته شذر اسود!!

شكلها يجنننننن شي نازك وفخم بنفس الوقت.. كولش عجبتني وفرحت بداخلي اول مره شخص يجيبلي هديه بعيد ميلادي غير بابا وبسام .. بس السؤال هذي من وين؟!

معقوله من......!!!!!!

زين شوصلها لغرفتي وجوه مخدتي!!!!!

بالرغم من شكلها الي بهرني وفرحتي بيها بس بنفس الوقت خفت .. خفت من جرأته وقدرته انو يوصل لحد فراشي بدون اي مشكله .. هذا الشي حيل خوفني منه!

بداخل العلبه ورقه صغيره فتحتها

(ملاك كي يحرسكِ لكني لا اظن انه يمكن لملاك ان يحرس اخر)

هسه شسوي اني اخاف افرح .. اضحك ابجي؟!!

يا ربي شهالكلام هذا !

گلبي دكاته صارت اسرع ، مااعرف اوصف شعوري رغم كل العصبيه الي كنت حاستها بس هذا الشعور اجتاحني اتجنن شكلها يخبل ..

رجعت الورقه والمداليه للعلبه وضميتها بين الغراض ليشوفها احد .. اخذت الموبايل ورسلتله..

(حضرتك هواي اتماديت)

نورالدين .. من اجاني منها المسج اتصلت عليها .. بعد كم رنة ردت عليه .. اتمنى عجبتج الهديه.

سدن .. هديتك حترجعلك ممحتاجه ملائكه تحرسني.

نورالدين ..اكيد بس مترجعيها.

سدن .. ولويش ماارجعها؟!

نورالدين .. لانها هديه وميصير ترجعيها راح اتكون قلة ذوق من عندج.

سدن .. اهااا يعني تعرف شنو الذوق؟!

زين والاخلاق واحترام خصوصية الغير مسامع بيهم؟!

نورالدين .. سلوبها حيل جارح ومتختار غير الكلمات المزعجه .. صح اني اتماديت من وصلت الهديه بهالطريقه بس كنت حاب افاجأها مو اكثر.

ليش شنو الي سويته واتضحلج انو اني مااحترم خصوصية الاخرين؟!

سدن .. انت اتسوي نفسك غشيم شنو؟!!

نورالدين .. بلا هالكلمات واحجي بوضوح .

سدن .. اشون تسمح لنفسك تدخل لبيتنا بدون علمنا لا وتوصل لغرفتي ولفراشي.

نورالدين .. منو كالج هذا الكلام؟!

سدن .. لعد منو الي وصل العلبه جوه مخدتي .. ليكون ملاكك الحارس!!

نورالدين .. امممم مااعرف اذا عندي ملاك حارس لان اني من صغري اعتمدت ع نفسي بكلشي .. بس يمكن قريباً راح يكون اكو ملاك بحياتي .

اما بالنسبه للهديه فكل الي كلتي وافكارج الجامحه كالعاده غلط!

اني صح اشتريتها يعني ذوقي بس مو اني الي وصلتها لفراشج ولا اي مخلوق دخل لبيتكم بدون اذن!

وانما طلبت من المحل نفسه الي اشتريتها منه انو يدز بنت بعمرج لبيتكم تسلم الهديه الوالدج واكله انو هي صديقتج وهذي الهديه مفاجأه وليكلج عليها .. صح اتوقعت ابوج يدقق ويسأل بالموضوع بس بصراحه اتفاجأت لما اخذها بسهوله واقتنع!

هذا كل الي صار وتكدرين تتأكدين من والدج اذا تحبين.

سدن .. بابا كل يوم داانصدم بي اكثر واكثر .. يعني مفكر حتى يكولي او يتأكد من البنيه؟!!

وهذا الثاني كل دقيقه يثبتلي اشكد اني ثوله ومتسرعه ، يمكن صدوك اني خيالي جامح مثل مكال.

نورالدين .. بما انو سمعت صوتج اكو شي اريد اكوله الج .

سدن .. اذا حتحجي بموضوع الصفقه والزواج فأنسى الموضوع لانه مستحيييييييل يصير.

نورالدين .. هو صح بهذا الخصوص بس خليني اكمل للاخير رجاءاً .. اني غلطت اليوم لما طلبت هذا الطلب منج يمكن اتسرعت بكلامي فأتمنى تنسين الي كلته وبالنسبه لموضوع مساعدتي لاهلج اعتبري تم.

سدن .. هذا اكيد مفصوم .. بسام يكول كلمته متصير اثنين وهذي ثاني مره يتراجع بقرارته وياي!!

لو بسام غبي لو هذا يتصنع بشخصيته.

نورالدين .. وياي؟!!

سدن .. هاا .. اي .. اي دااسمعك .

نورالدين .. تكدرين تاخذين راحتج .

سدن .. اوك باي.

سديت الفون بس احس گلبي حيوكف من الفرحه .. وعقلي ممصدك الي سمعته!

حيساعدني بدون مقابل!!!!!

اشكد كنت ضايجه منه وكارهته .. بس بعد كلامه وياي حيييييل كبر بعيني!

ويمكن متصدكون اذا كلتلكم انعجبت بي اكثر !

مر كم يوم ع هذي المكالمه وكل شي كان طبيعي حياتي مدرسه وبيت ماكو شي جديد بسام كان مشغول بصفقته المهمه بحيث مااشوفه الا الصبح من اطلع للدوام .. وبابا هم كان ويا بس يجي للبيت واشوفه بس مااكعد اني ويا مجرد روتين .. احس شي بداخلي اتغير ناحيته .. يمكن ثقتي انعدمت بي .. او صورة الاب المثاليه الي راسمتها بعقلي انحذفت !

كل الي بينا كلام سطحي ...

(اشونج بابا .. زينه الحمدلله .. تعالي اكعد يمي .. لا عندي دراسه من رخصتك.)

فد يوم كاعده اقرا بالصاله وبابا كاعد ديتفرج ع التلفزون يمي .. دخل بسام معصب ووجه مخطوف!!!!

بابا من شافه ارتبك!

اخذه ودخلو للمكتب .. مااعرف شنو القصه بس اسمع بسام يصيح!

(ضاع كولشي .. الصفقه خربت بابا)

سمعت بابا يحجي ويا ويكوله ميخالف اهم شي انت طلعت منها سالم

بساموو معصب ويصيح ورغم اعتراضات بسام بابا كاله هذي اخر مره بعد مندخل بهيج صفقات من البدايه كنت متردد ولما انت مااتورط ويا هذولي الناس

فخلي ابالك اذا اتعاملت وياهم مره ثانيه اسحب كل الشغل من ايدك فهمت لو لا .. الله ستر ونقذك منهم كان رحت بيها .

منو هم مااعرف!

من شنو بسام الله خلصه .. مااعرف!

وشنو الي غير رأي بابا هشكل هم مااعرف.

اوووووووووووف مااحجيلكم شعوري وقتها كنت طايره من الفرحه واخيراً اتحقق الي ردته وبسام الحيوان اندكر واخيراً .

بعد هذي الاحداث بيومين بابا رجع سافر .. ورجعت الاوضاع مثل قبل .. اني انشغلت بدراستي والامتحانات وبسام معظم وقته يخلصه بالبيت لان بابا كاله اختفي فتره من الشغل !

مااعرف شنو السبب .. الله يعلم بشنو ورط روحه بساموو؟

خلال هذي الفتره اني كان شي واحد شاغل بالي .. ومضيعلي كل تركيزي!

حتى امتحاناتي مدااجاوب بيهم بسببه

اكيد عرفتوو منو .. !

مااعرف شنو الي خلاني افكر بي هالكد .. بحيث اخلص اغلب وقتي اتأمل بهديته الي صارت متفارك رگبتي ابداً.

الى ان فد يوم متحملت اكثر لازم احجي ويا .. طلعت الرقم دااريد اتصل بي ............ غيرت رأي وسديت الفون!

كعدت الصبح رحت للدوام .. بالرجعه داامشي ممنتبهه وجان اسمع صوت سياره طوووووطططط ما طووووططط !

التفتت لكيت واحد مطلع راسه من السياره ويصيح عليه ..

_اشبيج عميه متشوفين!!

هو اني العميه لو انت وجه القوري .. فوكاها يصيح .. بس الفشله كدام العالم مااحجيلكم!

صعدت ويا محمود وكبل للبيت بس اني ارجف من الخوف بيني وبين الدعمه شعرايه !

وصلت للبيت كالعاده فارغ صعدت الغرفتي داابدل ورن موبايلي!

فتحته مسج من رقم غريب...

(الحمدلله ع السلامه خو ما اتأذيتي)؟!!

هنا اني نسيت الحادث وابو الحادث .. بلا تفكير الغبيه اتصلت عليه .. بس ماكو رد!!

شمرت الفون بعصبيه اشكد ثوله اشبيج مصدكتي .. كملت تبديل ملابسي ونمت .... كعدت العصر فتحت الفون مسج ومكالمه لم يرد عليها من نفس الرقم!!

فتحت المسج

( كنت بأجتماع ومرديت عليج ، اذا تكدرين تحجين ابعثيلي مسج واتصل)

سدن .. اخذت نفس كبيييييير ورسلتله مسج

(بالغلط sorry )

تركت الفون وكمت داانزل جان يرن!!!!!

ركض رجعت شفته هو ديتصل!!!

جاوبته بهدوء ... نعم؟!

نورالدين .. مساء الخير .. اشلونج؟!

سدن .. بخير شكراً.

نورالدين .. خوما اتأذيتي اليوم؟!!

سدن .. لاا الحمداللـ ..... لحظه لحظه انت شعرفك بالي صار اليوم؟!

نورالدين .. مو مهم عرفت وخلص .. المهم انتي متأذيتي ؟!

سدن .. لويش دتراقبني؟!

نورالدين .. منو كال مراقبج؟!

سدن .. لعد اشون عرفت بالي صارلي؟!

نورالدين .. بشنو زاعجج اذا عرفت؟!

سدن .. مزاعجني شي بس اريد اعرف السبب الي يخليك اتراقبني شينو ؟!

نورالدين .. اعتقد سبق وحجينا بهذا الموضوع وكلتلج شنو السبب بس انتي رفضتي هذا الشي واني احترمت رغبتج.

سدن .. محترم رغبتي وتراقبني؟!!

نورالدين .. تمام من اليوم عهد ماراح اتدخل بيج نهائياً ولا اراقبج هم .. اتأمرين بشي ثاني؟!

سدن .. لاا شكراً.

نورالدين .. تمام اخذي راحتج.

سدن .. هااا .. لحظه !

نورالدين .. نعم ؟!

سدن .. شكراً !

نورالدين .. على؟!!

سدن .. ع الي سويته بموضوع الصفقه.

نورالدين .. ماكو داعي شي بسيط.

سدن .. انت لويش شايف نفسك وممصدك .. دااتشكر منك شكو دتحجي وياي من ورا خشمك؟!

بس مو صوجك صوجي اني .. باي.

سديت الفون بوجهه وحذفت رقمه نهائياً .. صح هو مغلط وياي لا بكلامه ولا كال شي غلط .. بس ردوده الباره وانسحابه السريع من حياتي زعجني !

حتكولون مفصومه مو؟!!

اعرف .. بس اني نفسي مااعرف شنو السبب لهذا تصرفي!

عدا كم يوم ع الي صار .. نسيته نهائياً هسه هو شنو هذا ومهتمه بي

بيوم كانت جمعه بقيت نايمه لانو الامتحانات هلكتني وتعبت .. كعدت الظهر تقريباً ب١٢ !

بالبيجامه وكفشتي واني .. داانزل الدرج سمعت بسام ديحجي ويا واحد مااعرفه منو؟!

اني ع بالي محمود لان محد يجينا مثل متعرفون ... دااكلب بالفون ونزلت من الدرج ... سمعت بسام يكح بصوت عالي .. ويكول احم احم!!!

رفعت راسي ولكيت صدمة عمري كاعد كدامي!!!!!!!

ماادري شسوي هسه ارجع لو انزل؟!!

ابتسامته البارده ع وجهه كالعاده وكاعد يتأمل كفشتي وملامحي المتلخبطه من الصبح!!!!

بسام .. بصوت جامد .. تعالي سدن سلمي ع ضيفنا الباشا نور الدين!

سدن .. اباوع ع بسام وارجع اباوع عليه مثل المسطوره .. نزلت بخطوات متردده ..

_صباح الخير.

نورالدين .. صباح الخيرات.

بسام .. اكيد تعرفها اختي سدن الي حضرت بعيد ميلادها قبل فتره.

نورالدين .. بصراحه مااتذكر لان هواي احضر مثل هيج مناسبات .. عموماً نتعرف من جديد مو مشكله.

سدن .. يسوي نفسه ميعرفني!!!

ماشي اصبرلي هسه اذكرك ... اهلا وسهلاً عمو زارتنا البركه.

بسام .. سدن!!!

نور الدين .. بأبتسامه ساخره .. شكراً.

بسام .. راح للمطبخ يجيب عصير وصاح ع سدن .. تعالي اتريكي محمود هسه جاب الريوك بعده حار.

سدن .. باوعت ع الافندي الي كاعد كدامي ومبتسم ابتسامه سخيفه مثله .. بصوت حاد .. مااريد انسدت نفسي من الصبح.

نورالدين .. الريوك مفيد لخلايا الدماغ .. هذا في حال عندج اكيد!

سدن .. ردت احجي ارد عليه بس بساموو اجه .. عفتهم وصعدت .. بس اني اريد انفجر من قهري اشون يحجي وياي هشكل؟!!!!

سبحت بدلت ملابسي ونزلت .. لكيت بسام كاعد وحده!

شافني كالعاده بقى يلغي اشون احجي هيج ويا الباشا مالته .. واشلون اكوله عمو ... من هاللغوه !

اني لبسته ولا كأنو اسمع .. كلتله ياخذني اروح اشتري ملازم ودفاتر محتاجتهم!

كالي خابري محمود ياخذج العصر اني عندي شغل!

فعلاً خابرت محمود واجاني العصر .. رحت للمكتبه اشتريت كم شغله محتاجتها وملازم .. واني دااطلع لكيت محمود ماكو!!!

اتصلت عليه .. لحد ما مليت ميرد!!

اخر شي جاوبني ...

سدن .. انت وينك صارلي ساعه اتصل عليك اشون اتعوفني واتروح اتخبلت انته؟!!!!!

محمود .. اعذريني ست سدن بس اضطريت اروح لان اخو حضرتج استاد بسام متعرض لحادث واتصلو عليه!

سدن .. شنوووووو؟!!!

رأيكم بالاحداث وتوقعاتكم للبارت القادم🤔

لتنسووووووون التصوووووووويييييييييت حتى ينزل البارت بسرعه 💔

بقلمي (هدى الموسوي) الاميره الموسويه 👑

ما احلل لاي شخص ياخذ كتاباتي وينشرهم (ذمه)

سدن .. شنو من حادث ، بسام بي شي؟!

محمود .. مااعرف شنو الحادث بس الي سمعته انو متعرضيله بالطريق ناس ورامين ع سيارته وهو هسه بغرفة العمليات بعده مطالع.

سدن .. شنووو غرفة العمليات!!

يا ربي دخيلك .. يعني حالته خطره؟

يعني بسام حيموت ... يا ربييي .. محمود بسرعه هسه تجي  تاخذني اشوف اخويه الله يخليك.

محمود .. ست سدن صدكيني ما بي شي اخوج مجرد جروح يعالجوها ويطلع من العمليات اني هسه حجيت ويا الدكتور وكال ماكو شي خطر.

سدن ..  اشون مبي شي وهو بالعمليات !

محمود شدتحجي انت .. وحتى لو زين ومبي شي اني لازم اشوفه وتطمن عليه بنفسي هذا اخويه وما اله احد غيري تعرف شنو اخويه !!

محمود .. ست سدن مااكدر اجيج لان كل اشويه طالبين شي ساعه دم ساعه ابر ساعه علاج ولازم احد يبقى اشلون اعوفه ، انتي ارجعي للبيت واني ان شاء الله اطمنج على استاد بسام.

سدن .. من كل عقلك دتحجي اشون ارجع  للبيت و وحدي اشبيك اتخبلت؟!

البيت بعيد وسياره وحدي مستحيل اصعد اشون ارجع فهمني؟!!

محمود .. ماشي هسه اتصل بالشركه يدزون واحد لحضرتج يوصلج للبيت.

سدن .. لا مو للبيت كللهم ياخذوني للمستشفى لازم اشوف بسام وبسرعه وحدي واكفه والشارع فارغ.

محمود .. ان شاء الله دقايق وياخذوج.

سدن .. سديت الخط واني بس الدموع تجري مااعرف ابجي ع بسام لو ابجي من الخوف واكفه وحدي واني ارتعب من ظلي .. اووووف بسام هذي تالي صفقاتك المشبوهه ضيعت نفسك وحتضيعنا وياك.

احس گلبي انمرد عليه رغم كل الاذيه الي شفتها منه بس الدم ميتبره من اللحم مااعرف اشون (المهم الفكره)

بقيت انتظر يم المحل والجو بارد كالعاده ثلجت .. محمود اتأخر عليه ومرجع اتصل عليه ميرد خوفي زاد اكثر...!

فجأه طلعت سياره كدامي .. سياره اعرفها كولش زين .. وكفت بصفي ... ونزل منها خوف عمري كوله وأمانه!!

كنت خايفه ، بردانه ، قلقانه ع بسام ، مرعوبه وبردانه!

من شفته حسيت بأمان وبنفس اللحظه خفت

الدنيا تقريباً شبه ليل الجو بارد ومظلم والشارع محد بي بس اني وابو المحل الي واكفه يم محله كان كاعد جوه كالي ادخلي بس اني خفت ابقى ويا واحد غريب لوحدي مااعرفه ولا اعرف شيصير ميصير لو يدخل واحد ويلكلني بس اني وابو المحل .. اتحملت البرد والخوف في سبيل مااجيب كلمه مو زينه لنفسي

رجليه ترجف من البرد مااادري من الخوف واسناني اتطكطك .. نزل هو كالعاده بهيبته الي تخطف الانفاس لابس اسود وجاكيت طويل رافع ياخته ع رگبته .. شكله ع بالك ابطال الافلام الي انشوفهم بالتلفزون!

بهدوء مشى بتجاهي وكف كدامي بعد عني كم متر .. وبصوته الرجولي ..

نور الدين .. اتأخرت عليج اسف بس الطريق ازدحام.

سدن .. بقيت مثل الثوله هذا شديحجي .. بصوت حاد ... عفواً انت منو الي دز عليك وشعرفك اني هنا .. وشكو اجيت اصلاً؟!!'

نورالدين .. مو وقتها هسه اصعدي بالسياره وافهمج كلشي.

سدن .. مااتحرك منا ولا اصعد اي سياره .. تكدر تتفضل حضرتك اني داانتظر ...

نور الدين .. قاطعها بصوت حاد .. تنتظرين محمود!!

مراح يكدر يجي .

سدن .. شعرفك انت؟!!

نورالدين .. لان اني كلتله ميجي.

سدن .. وانت منو حتى اتكوله ميجي!!

شنو يشتغل عندك هو لو عدنا؟!!!!!

نور الدين .. الجو بارد امشي اوصلج للبيت وبعدها تعرفين الي تردي.

سدن .. ما اروووح كلتلـ.....

نور الدين .. بعدها دتحجي مشيت بتجاها شلتها وصعدتها بالسياره ... هي بقت اتصيح وكلبت الدينا .. ابو المحل الي واكفه يمه سمع صياحها طلع يركض .. ع باله خطفتها ... بعدني دااسد باب السياره چان واحد يلزمني من ورا وجرني حيل!!

درت وجهي لكيته ولد متوسط العمر يطلع اكبر مني بكم سنه .. الظاهر هو صاحب المحل .. باوعت عليه محجيت شي بس خزرته .. هو عاد كام يصيح

ابو المحل .. عوف البنيه احسنلك .. وبدا يغلط ويسب !

نور الدين .. جريت ملابسي من ايده ودفعته بس مو حيل لان استخطيته اضعف مني وهو غيرته شالته عليها .. يعني ميستحق يدفع ثمن غيرته وشجاعته

ابو المحل .. لك اليوم ادفنك هنا .. اصبرلي .. ركض للمحل جاب سلاح واجه يركض!!!!

سدن .. هي هاي العايزه صارت اسلحه!!!

شفت ابو المحل لازم سلاحه وموجهه ع نورالدين وهو واكف مثل الجبل ولا اهتز بكد الشعره!

اني الي المسدس مموجهي عليه خفت وهو ولا ع بالك .. بلا اي تفكير فتحت الباب ونزلت .. ركضت وكفت كدام نور الدين .. وواجهت ابو المحل السلاح صار متوجه عليه!!

بصوت مرعوب ويرجف ... حجيت ويا ابو المحل مااعرف من وين اجتني كل هذي الشجاعه بحيث واجهت شخص مسلح واني من الصرصر اخاف ..

_لا عفيه لترمي الله يخليك!!

ابو المحل .. انتي تعرفي لهذا الحقير؟!

سدن .. اي اي اعرفه .

ابو المحل .. شيصير منج احجي لتخافين .. اذا خايفه يسويلج شي كولي هسه ادفنه هنا.

سدن .. لا عفيه .. اعرفه والنبي اعرفه .. هذا .. هذا ...

ابو المحل .. وخري عنه ومعليج هسه اسلمه للشرطه وهم يتصرفون ويا اني شفته ديخطفج لتخافين بس وخري عنه.

سدن .. انت فاهم الموضوع غلط فدوه اسمعني اني اعرفه لهذا الشخص .. هو خطيبي.

نورالدين .. صدمتني جرأتها بس اخر كلمه كالتها صدمتني لابعد حد .. مكنت متوقعها منها.....!

ابو المحل .. اذا خطيبج ليش ما رحتي ويا انتي مو كنتي تنتظرين اهلج يجون ياخدوج .. وليش يصعدج ويا غصب عنج ؟!!

سدن .. مو انـ..

نورالدين .. اتحملت صاحب المحل ونعثلته وتجاوزه لانو عجبني بي غيرته ع بنيه ميعرفها .. بس من بقى يسأل ويحجي وياها حيل انزعجت .. وخرتها عني ورحتله .. طبعاً هو بقى موجه السلاح عليه من شافني اتجهت عليه كام اشو يرجف !

وكفت كدامه .. لزمته من كتفه وحجيت ويا بهدوء ..

_ نشكر غيرتك وموقفك البطولي هذا .. اعتقد بلسانها كالتلك خطيبها كافي لغوه واتوكل ع شغلك.

ابو المحل .. مااتحرك منا اذا متجي الشرطه وتتأكد من كلامك و..

نور الدين .. بدون مقدمات انطيته بوكسي ع وجهه وكع بالكاع .. درت وجهي صعدتها بالسياره وطلعت  .. هي بقت متفاجأه من الي سويته واشلون ضربت الرجال احس عيونها صارن بالطول و الدهشه  انرسمت ع وجها بحيث محجت ولا كلمه طول الطريق .. طلعت لبيتهم گبل هي ساكته حتى مسألتني وين رايحين .. قبل لا نوصل لبيتهم اني ضحكت ....

سدن .. ما احجيلكم اشون ضرب ابو المحل المسكين ع وجهه وكومه بالكاع ع بالك ضرب طفل مو رجال شكبره وشعرضه !

(خطيه يمكن فقد الذاكره)

من الخوف معترضت لما سحبني للسياره مره ثانيه خفت لا تجيني ضربه مثل ابو المحل .. وافارق الحياة

بقيت ساكته محجيت شي وهو هم محجه  ولا كلمه الى دخلنا لمنطقتنا ... اشو هذا كام يضحك!!!

لا هذا المخلوق مو طبيعي ابد .. بلحظه يتعارك وبالثانيه يضحك!

لو مخبل لو يريد يخبلني .. التفتت عليه وباوعتله بنظرة استغراب!!!

نورالدين .. بقت صافنه عليه ليش دااضحك والفضول يقرا مليون بوجها .. بقيت ع وضعي مباوعتلها بصوت هادئ واني مبتسم ..

_بيج شي ؟!

سدن .. اني الي بيه شي!!

نورالدين .. اهاا اكيد استغربتي لان ضحكت.

سدن .. لا لويش استغرب عادي .. تضرب الناس بالشارع وتعوفهم وتمشي وتضحك و لا كأنو صاير شي .. عادي لويش الاستغراب.

نور الدين .. مردت اضربه هو اضطرني لهذا الشي .. ولتخافين كم دقيقه ويرجع لوعيه مأذيته ولا سببتله عاهه مجرد ضربه بسيطه.

سدن .. يحجي بكل هدوء ع بالك الي ضربه دجاجه مو بشر .. بقيت صافنه عليه مااعرف شنو احجي.

نورالدين .. بالمناسبه اشعجب منطيتيني خبر من انخطبنا .. شنو اني اخر من يعلم عندي خطيبه !!

هههههه

سدن .. بغضب وصوت حاد .. يا خطوبه يا خبر .... شدتحجي انت؟!

نورالدين .. ههه شبسرعه نسيتي!!

عموماً هو هذا سبب ضحكتي الي ثارت استغرابج .

سدن .. اذا قصدك ع الكلام الي كلته للرجال .. فبدون وعي كلته لانو كنت خايفه ومااعرف شكنت احجي.

نورالدين .. امممم خفتي عليه!!

سدن .. لا .. اكيد مخفت عليك ، خفت من السلاح الي موجهه كدامي.

نورالدين .. بس هو ما وجهه عليج انتي الي وكفتي كدامي .. يعني خفتي عليه.

سدن .. كلتلك مخفت عليك وبوقتها مكنت اعرف اشون اتصرف من الخوف .. درت وجهي وهمست .. اني صوجي لو عايفته يموتك واخلص منك.

نورالدين .. مسمعت؟!!

سدن .. مدااحجي وياك.

نور الدين .. بس حلوه منج كلمه خطيبي  بس المره الثانيه كولي زوجي احلى .

سدن .. باوعتله بنظرة غضب ودرت وجهي ..  ما الي خلك احاجي الي مريت بي اليوم مكفيني .. وهذا شكله شاخط ميعرف شديحجي!

وصلني لبيتنا انتبهت هذا وين جابني!!

بصوت حاد كلتله ...

_شكو جبتني لهنا؟!!!!

نورالدين .. اعتقد هذا بيتكم!

سدن .. اعرف بيتنا بس اني اريد اروح لاخويه اشوفه .. اها انت الظاهر متعرف شي بسا...

نورالدين .. بسام ما بي شي قبل لا اجي اخذج كنت يمه بالمستشفى شفته وحجيت ويا ، وكالو الاطباء حالته زينه وماكو شي يخوف باجر الصبح اخذج اتشوفي .. ادخلي هسه للبيت تامي وارتاحي والصبح امرلج.

سدن .. انت دتكذب بسام بالعمليات اشون حجيت ويا وهو فاقد الوعي؟!

دتضحك عليه بس للتعب نفسك ما ادخل ومااروح لاي مكان غير البسام .. واذا ما اخذتني هسه اخابر ويجون ياخذوني ممحتاجتلك اصلاً.

نورالدين .. بصوت جامد .. منو هذا الي تخابري؟!!!

سدن .. معليك انت .

نورالدين .. بغضب مشيت لزمتها من ايدها بقوه وخليتها تباوعلي عينها بعيني ...... الكلام يطلع من بين اسنانه بغضب

_ منو الي اتخابري وصدكيني ما راح اعيد الكلام.

سدن .. نظراته وصوته وشكله كلهم اتغيروا فجأه .. معرفته حسيت الي كدامي شخص ثاني عباره عن بركان مو جبل الجليد الي كنت مفكرته!!

الدنيا الليل وهذا لازمني بنص الشارع الي يطلع ويشوفنا شيكول!!

بلا اي وعي حجيت ..

_محمـ.. محموو..د .. اخابر محمود.

اول مكلتله هذا اسم محمود احس اصابعه الي ضاغطه ع ايدي بقوه ارتخت .. سحبت ايدي منه بسرعه.

نورالدين .. بحده وانزعاج .. ادخلي للبيت وباجر تشوفين اخوج.

سدن .. قبل ليكمل الجمله دخلت للبيت ركض .. ملامحه الغاضبه ونظراته المظلمه بقت مطبوعه بخيالي .. لاول مره اخاف من واحد غير اخويه بسام لهدرجه.

زين هو لويش عصب هشكل شنو الغلط الي سويته اني وشنو علاقته بيه اخابر اطلع اروح هو شكوووو بيه؟!!!!!

دخلت البيت وقفلت الباب .. صعدت غرفتي بدلت واتصلت ع محمود ..

سألته ع بسام كالي طلع من العمليات وحالته كولش زينه اكل وحجه ورجع نام

كلتله لويش مأجيتني ؟!!

كالي انو مكدر يعوف بسام وانو الباشا جاي للمستشفى وحاجي ويا بسام وكايله هو الي حيتكفل برعايتج الى ان يطلع اخوج !

وبسام موافق انو ابقى ببيت الباشا الى ان يطلع من المستشفى لانو ماكو احد ثاني لا اهل ولا اقارب اروح يمهم حتى صديقات مثل البشر ماكو .. بس صابرين وهذي عار .

نهيت المكالمه ويا محمود بعد ما طمني انو بسام كولش زين وباجر اجي واشوفه !

الحمدلله ع الاقل انطمنت ع اخويه .. زين وبابا؟!!

لازم اتصل ببابا ويعرف بألي صار ع الاقل يجي يمي هنا مستحيل ابقى ويا هذا المرعب ..

زين هو مو كال لبسام ياخذني لبيته لويش ما اخذني وجابني لبيتنا ؟!

طاح حظك بسام اشون تخليني ببيت واحد متعرفه حتى وانت بهالوضع حقير  .. اوووف ... واني هيج غبيه اروح ويا والله لو اعرف اموت مااروح ويا .

بس عيب عليه يكذب .. اشون يعوفني وحدي وبسام امنه عليه !!

ع الاقل جيب اختك امك بقيهم يمي شمرتني ورحت .. هاااا .. يعني هسه اني وحدي بالبيت!!!

يااااا ربي .. يا ربي .. اني اشون منتبهت هذا عافني وحدي وراح!!

الخوف سيطر عليه مااعرف شسوي نسيت بسام ونسيت الي صار كل الي افكر بي الاشباح الي مراقبتني وحتهجم عليه !!

اخذت لحافي لفيته عليه ونزلت ركض للصاله .. فتحت الاضويه وفتحت التلفزون عليته كل حيله وبقيت متلفلفه بجامده بمكاني .. مااحس غير الباب ديندك!!!!!

هي هاي الي ناقصه .. يا ربي منو هذا الي اجانا بهالليل .. معقوله حرامي؟!

وج سدن يا حرامي وين اكو حرامي يدك الباب شهالغباء ..!

اووووف من الخوف مااعرف اشون افكر حتى عقلي اتلخبط ..

زادت الدكات ع الباب .. رحت للمطبخ اخذت طاوه عدنا كبيره وبيها يده .. اخذتها ورحت للباب ..

بصوت يرجف خوف ..

_منو؟!!!!

نور الدين .. هذا اني افتحي الباب.

سدن .. هذا شرجعه ؟!!

_شكو رجعت و شرايد ؟!

نورالدين .. افتحي الباب كلت .

سدن .. ماافتحه من ورا الباب واحجي اسمعك .

نورالدين .. تمام .. ليش التيلفزون عالي مو كلتلج نامي ؟!!

سدن .. وانت شعليك .. بعدين شكو باقي هنا متروح لبيتك .. شنو ماعندك بيت؟!

نورالدين .. طفي التيلفزون وروحي نامي .. الدنيا الليل والناس نايمه.

سدن .. هذا شنو شايف نفسه ويحاسبني هشكل؟!

زين هسه شنو اكوله اخاف من الاشباح؟!!

اووووف يا بسام شدعي عليك ، هو الي بيك مكفيك بعد شكول .. من عرفت هو موجود بره ومرايح حسيت اشويه بأمان والخوف قل .. رحت نصيت التيلفزون بس بقيته مفتوح هو والاضويه .. الجو بارد حيل والدنيا مغيمه وظلمه .. فتحت الدفايات وكعدت ع التخم اقرا

عدت كم ساعه .. سمعت صوت مطر خفيف .. زين هذا اشو ماكو معقوله راح وعافني؟!!

كمت باوعت من البرده ملكيت احد بس سيارته موجوده!!

شنو الفلم هذا وينه؟!

لبست الجاكيت مالتي وطلعت اريد اشوفه وين راح ... فتحت الباب واباوع ع سيارته اريد اشوفه اكيد كاعد بيها بس لانو ظلمه ممبين .. طلعت الطرمه مالت الباب الداخلي .. جان صوته من ورايه يفززني!!!!

نورالدين .. وين؟!!!

سدن .. التفتت ورايه بفزع وخوف لكيته واكف كالعاده بكل هدوء .. خليت ايدي ع گلبي ، اخذت نفس ومحجيت شي .

نورالدين .. بحده .. وين تردين؟!!

سدن .. خوفتني .

نورالدين .. مو قصدي وانتي شكو طلعتي؟!

سدن .. ها .. مو .. هذا .... اني هذا .. ع بالي احد دك الباب.

نورالدين .. اني واكف هنا صار ساعه محد اجه ولا احد دك الباب .

سدن .. هاا .. مااعرف .. يمكن سمعت غلط.

نورالدين .. تمام ارجعي ولتطلعين بعد.

سدن .. حتبقى هنا؟!

نورالدين .. اي ليش؟!

سدن .. لا هيج .. بس دا أسأل.

نورالدين .. محتاجه شي؟!

سدن .. لا شكراً.

نورالدين .. تمام .. تصبحين ع خير.

سدن .. دخلت للبيت وهو بقى بالباب رحت سويت كافيه بالحليب حاره احبها بهيج جو انتظرتها كملت ورجعت كعدت بمكاني سمعت المطر صار قوي !!

وهو واكف بره بهالبرد !

صح هو جبل ثلج ومرعب بس خطيه الدنيا بارده ودتمطر!!

زين اشون ادخله للبيت واني وحدي؟!

واشون احجي ويا وهو كالي روحي نامي ليروح يعصب مثل بعدين !!

بقيت افكر اشون واشون .... الى ان اجتني الفكره!!

رحت للمطبخ صبيت كوب كافيه خليته بصحن لبست جاكيتي وطلعت باوعت لمكانه الي كان كاعد بي قبل اشويه ماكو .. معقوله راح؟!!

باوعت للسياره مالته شفته نزل ..!

بقيت لازمه الكوب و واكفه بس اديه احس بيها رجفه خفيفه وگلبي يدك سريع يمكن من البرد.

اجه يمشي بتجاهي بسرعه الظاهر ع باله بيه شي .. صار قريب عليه لاحظت بأيده جكاره !

اهااا طلع يدخن وييييع اشكد اكره الجكاير .

نورالدين .. رايده شي؟!!

سدن .. ها .. اي .. قصدي لا ..

نورالدين .. شنو اشصاير .. ليش دترجفين؟!

سدن .. هاا .. لا لا مداارجف بس هذا من البرد .

نورالدين .. اي شكو طلعتي لعد ادخلي جوه بارده عليج.

سدن .. اي حدخل .. درت وجهي دااريد ادخل للبيت شفت الكوب بأيدي .. اشكد ثوله اني لعد شكو طلعت اصلاً ؟!!

التفتت عليه وقدمت الكوب اله .. بصوت هادئ اتفضل.

نورالدين .. شنو هذا؟!!

سدن .. هذي كافيه بالحليب دافيه سويتها الك اشربها الجو بارد.

نورالدين .. بأبتسامه هادئه .. شكراً ليش تعبتي نفسج.

سدن .. لا ماكو اي تعب كنت مشتهيته وسويتلك وياي.

نورالدين .. امممم واني ع بالي سويتيها مخصوص الي!

بس يلا ماكو فرق الج او الي.

سدن .. اني صار لازم ادخل .. تصبح ع خير.

نورالدين .. انتي الخير.

سدن .. دخلت بسرعه وسديت الباب بقيت مرتكيه ع الباب وايدي ع گلبي احسه يدك سرييييع مااعرف شصارلي.

بقيت واكفه بمكاني وافكر بنظراته وكلامه .. لويش يحجي وياي هشكل؟!

لويش دائماً هادئ وميعصب؟!

لويش اسلوبه وياي يختلف عن اسلوبه وكلامه ويا بسام وبابا ؟!

حتى ابو المحل الي ضربه مكال شي وعصب منه!!

اوووو هسه اني بيا حال شهالافكار الغبيه.

رجعت للصاله مددت ع التخم وغفيت .. الجو كان بارد بره والفراش دافي .. شعووور يجنن لدرجة بسرعه نمت .

مصحيت غير ع صوت غريب فوك بالطابق الثاني!!!!!!

يا ربيييي شنو هذي الطكطكه منو فوك؟!!!

بعدين سمعت الباب مالت الغرفه ينسد وينفتح!!

هنا اني بلا اي تفكير ركضت بسرعه للباب فتحته وطلعت بالبيجامه مالت النوم حتى جاكيتي ملبسته .. طلعت ركض لسيارته فتحتها ودخلت .. هو من شافني انتفض!!!

نورالدين .. لما رحت لاخوها بالمستشفى كان شبه واعي .. ومااعرف شنو يحجي شكله يهذي كان .. بس من كلامه وصاني بأخته كالي انو ماعندهم احد .. واني مثل اخو ، واخذها لبيتك !

مااعرف اذا يعني الي كاله او كان مو بوعيه .. بكل الحالات اني مستحيل اعوفها وحدها خصوصاً ابوها مموجود مسافر .. السايق مالتهم اعرفه من طلعت سمعته يخابر ويتلاوم ويا روحه شافني سلم عليه .. سألته اشبيك كالي انو سدن بالشارع تركها واجه لما اتصلو بي المستشفى!

اخذت منه عنوان مكانها وطلعت بوجهي الها .. صار الي صار ويا ابو المحل

بعدين اخذتها لبيتهم لانو مااكدر اخذها لبيتي .. اولاً البنيه تعتبر غريبه وبيتي محد بي غير اني ويمان واحنا معروفين عزابيه اثنينه .. يعني وجود بنت بالبيت ويانا راح يأثر ع سمعتها .

صح كلام الناس بالنسبه الي ولا شي حجو او لا بس هي تختلف بنيه وسمعتها تتأثر بسهوله.

اما السبب الثاني و المهم انو اني ما اثق بيمان!

اخويه طايش وعايش بالمراهقه اشكد ميكبر يبقى مثل الزعطوط !

وعنده البنات لعبه من وحده لوحده ، لو يشوفها بالبيت و ع باله وحده من بنات الشارع فما أأمن بي عادي عنده يسوي بيها شي ولا يهمه اصلاً.

لذلك ما اخذتها لبيتنا وديتها لبيتهم وبقيت بالباب اني بنفسي احرسها .. حتى مطلبت حرس يجون اني ردت احافظ ع سلامتها بنفسي.

طلعت مره وكلتلها روحي نامي .. واني لما مطرت الدنيا وصار الجو بارد حيل صعدت السيارتي .. هم رجعت طلعت بس هالمره شايله بأيدها شي !

طلع شراب دافي مسويته الي .. اخذته منها كان دافي شربته طعمه يجنن الظاهر عدها مواهب ثانيه غير طولة اللسان والعناد.

اخذته منها ورجعت للسياره .. مااعرف اشكد مر وقت واني كاعد بالسياره .. الى ان شفتها طلعت تركض!!

كلبي فز من مكانه .. ردت انزل بس هي سبقتني صعدت بسرعه وسدت الباب!!

كانت ترجف بشكل مو طبيعي وتلهث ، مااعرف اشبيها ؟؟

رغم خوفي عليها وقلقي حاولت احافظ ع الهدوء حتى ما ارعبها اكثر وافهم منها شصاير وليش تركض هدأتها بالبدايه لحد مسكتت ورجع نفسها طبيعي

سألتها بهدوء ...

_شنو الي صار؟!

سدن .. اريد احجي مااكدر هو بقى يسكت بيه .. اهدي ولتخافين اني يمج .. بس سكت بيه واني مثل الثوله ع بالك واحد يركض ورايه .

بعد مرور كم دقيقه هدأت .. وحجيتله الي صار..

نورالدين .. يعني شفتي احد لو بس سمعتي صوت؟!!

سدن .. لا مشفت شي اني بس سمعت الصوت انهزمت ، بس اكيد هذا حرامي .

اي حرامي لو مجرم كان حيموتني هم زين شردت قبل ليشوفني.

نورالدين .. تمام ابقي هنا واني رايح اشوف شكو وارجعلج.

سدن .. هااا .. لا لا وين اتروح ؟!

خليني ابقى هنا للصبح يكون راح الي بالبيت وارجع عفيه الله يخليك .

نورالدين .. وين تبقين هنا؟!

السياره بارده اولاً وثانياً ميصير تباتين بالشارع .. ابقي هنا واني مااطول اشوف شكو وارجع.

سدن .. اروح وياك لعد لتعوفني هنا.

نورالدين .. مترحين لاي مكان الى ان اتأكد منو الي بالبيت ابقي هنا ولتعاندين .

عفتها ونزلت من السياره رحت للبيت الاضويه كانت مفتوحه والباب هم عايفته مفتوح

دخلت البيت كان دافي ونظيف شعور يخليك اتنام بلا اراده واني ميت برد بره ... اريد اروح اشوف شكو واذا بحركه ورايه؟؟

التفتت لكيتها هي واكفه!!!!!!!

شعرها مبلل من المطر ونازل ع وجها ، ملابسها خفيفه وشبه مبلله ..

بحده سألتها..

_اني شكلت؟!!

سدن .. كلتلك اخاف لويش متصدك.

نورالدين .. انتي كتله مال عناد .. انتظري هنا خلي اشوف شكو لتتحركين وهالمره راح يكون الي غير تصرف اذا كسرتي الكلام.

سدن .. شكله عصب لانو اجيت !

زين شسوي غير اخاف عايفني بالسياره هو اني شارده من البيت يعوفني بنص الشارع بهالليل شديحس هذا.

محجيت شي بس أومأتله براسي بمعنى اوك مااتحرك.

هو راح يفتر بالبيت بقيت جامده مثل الصنم الى ان نزل كالعاده هو وابتسامته العريضه ع بالك ديشوف فلم كوميدي.

نورالدين .. فتشت الطابق الارضي ملكيت شي صعدت للطابق الثاني هم ملكيت شي بس شباك مالت غرفه من الغرف مفتوح والهوه يحرك بالباب!

الظاهر هو هذا الي خوفها ههه ، البنات اشكد فطيرات يردون حجه ع الخوف ويگلبوها فلم رعب .

نزلت لكيتها واكفه بمكانها والقلق مااعرف الخوف يقرا الف ع وجهها اول مشافتني حجت.

سدن .. ها لكيت الحرامي المجرم ؟!!

نورالدين .. اي لكيت.

سدن .. بخوف .. هااا .. وييييين .. منو .. شنو .. وينه؟!

نورالدين .. ههههه اخذي نفس واهدي .. لكيت الشباك مفتوح وديحرك الباب ماكو لا حرامي ولا مجرم .

سدن .. بعصبيه هو هذا وقت شقه وانت تتمازح حضرتك؟!

نورالدين .. بهدوء .. الشباك سديته والبيت كل ابوابه مسدوده لتخافين محد يوصلج روحي نامي واني بره اذا ردتي شي لتطلعين اتصلي واني اجيج بلا ميشوفج احد طالعه بالليل.

سدن .. ها .. اي .. لا لا.

نورالدين .. باوعتلها بحيره شدتقصد ؟!!

سدن .. يعني اقصد .. اني ما ابقى هنا بعد اخاف.

نورالدين .. بأستهزاء .. ابقى يمج يعني؟!!

سدن .. شنوو تبقى يمي؟!

اكيد لا .

نورالدين .. تمام انتي حليها الي تردي شنو؟!!

سدن .. مااعرف عفيه الله يخليك اني بحياتي منايمه بالبيت وحدي واخاف خصوصاً بعد مسمعت هذي الاصوات مااكدر والنبي اخاف دااحجي من صدوك .

نورالدين .. تمام .

سدن .. باوعتله بريبه .. مفهمت شنو يعني؟!!

نورالدين .. جيبي فراشج وتعالي.

سدن .. شنو تسوي بي ؟!

حتنيمني بالشارع؟!!

نورالدين .. رجاءاً سوي الي دااكوله الج وبلا اسئله .

سدن .. هذا اشبي صاير بسرعه يعصب والله يا الله هسه اني شكلتله غير افهم شنو يسوي بفراشي!

رحت جبت فراش وغطى اخذهم مني وفرشهم يم باب المدخل مال البيت جوه.

نورالدين .. نامي هنا واني راح ابقى يم الباب اذا سمعتي شي كليلي غير هذا مااكدر اسوي شي.

سدن .. باوعت بحيره وتردد .. بس ماعندي غير حل ع الاقل اكو واحد يمي قريب .

اني نمت هو طلع وسد الباب بقيت اتگلب بفراشي مااكدر انام لانو مكاني متغير!

بحركه غبيه مني بدون قصد خليت ايدي ع الباب وصار صوت.

نورالدين .. بصوت حاد .. رايده شي؟!

سدن .. نزيت من سمعت صوته المرعب وصل لاذني .. بصوت مرتبك

_ لا مرايده شي بالغلط ايدي اجتي ع الباب ... اسفه.

كلت هالكلام ومسمعت منه اي رد ... غير بعد تقريباً 5 دقايق .

نورالدين .. بحده ... لتكوليها بعد.

سدن .. بأستغراب .. شنو؟!!

نورالدين .. اسفه لتكوليها بعد.

سدن .. لويش؟!

نورالدين .. مااحب اسمعها .

سدن .. ولويش متحب تسمعها اعتقد الي يغلط يعتذر!!

بس طبيعي الي مثلك شايف روحه ميعتذر بسهوله اكيد متحب تسمعها .

نورالدين .. ههه انتي ليش دائماً اتحللين الامور بكيفج؟!

اولاً مو هذا قصدي ، شوفي اني مو ملاك بس مااحب اسمع كلمه اسف لانو انجبرت هواي مرات اعتذر ع اشياء مااقصدها يمكن وقتها حسيت بذل لذلك مااريد اي شخص يتأسف او يتذلل ويعتذرلي خصوصاً ع شي بسيط ميسوى صح الاعتذار يرفع من مكانة الشخص احياناً لما يعترف بخطأه بس اني بشكل عام مااريد احد يشعر بالاسف.

سدن .. بس انت هواي تتأسف .

نورالدين .. غلطانه.

سدن .. لا مغلطانه اكثر من مره تأسفتلي .

نورالدين .. الج اي .. انتي غير.

سدن .. مفهمت !!

نورالدين .. قصدي انه ما اتأسف لاي شخص

سدن .. امممم زين واذا شخص اساء الك وغلط بحقك غلط كبير او جرحك هم متريده يعتذر!!

نورالدين .. لا .

سدن .. لويش ؟!

نورالدين .. لانو بهيج حاله مااسامح وعقابي حيكون قاسي مينفع ويا اعتذار.

سدن .. اها.

كلامه فاجأني وخوفني بنفس الوقت مااعرف شنو السبب بس كلماته كانت حازمه وصادقه مو مجرد كلام عابر.

بعد صمت عدة دقايق ... حجيت ..

_ممكن سؤال؟!!

نورالدين .. اكيد .

سدن .. انت لويش هشكل مغرور واتخوف.

نورالدين .. هههههه شنو هالسؤال الغريب هذا.

سدن .. لتكولي اني اول وحده اتلاحظ هالصفات بيك.

نورالدين .. مو مهم الي يلاحظه الناس لان ميهمني رأي احد بيه.

سدن .. شوف هذا يسمووو غرور وهو هذا الي دااحجي عنه.

نورالدين .. ليش متكولين اني واثق بنفسي وميهمني كلام احد.

سدن .. هااا .. بيها وجهة نظر.

نورالدين .. ههه هسه يصير اني أسأل؟!

سدن .. ها؟!!

نورالدين .. اذا متحبين انسي الموضوع.

سدن .. لا عادي اسأل.

نورالدين .. اشلونج؟!!

سدن .. هههههههههه

نورالدين .. ضحكتج حلوه.

سدن .. بخجل شكراً .

نورالدين .. حقيقه مو مجامله.

سدن .. هم شكراً.

نورالدين .. نامي ارتاحي.

سدن .. منعسانه.

نورالدين .. تمام.

سدن .. عندك اخوات؟!!

نورالدين .. لا .

سدن .. اخوان؟!

نورالدين .. اخ واحد.

سدن .. عايش ويا اهلك؟!

نورالدين .. ههه هذا تعارف لو شنو ؟؟

سدن .. شنو تعارف شنو هالكلام ، مجايني نوم كلت نحجي بس مو صوجك .

نورالدين .. داامزح ليش عصبتي .. عموماً اهلي متوفين عايش اني واخويه .

سدن .. اهااا الله يرحمهم .

نورالدين .. ويرحم والدتج.

سدن .. شكراً .. بس شعرفك ماما متوفيه؟!

نورالدين .. كلتلج اذا تسمعين الاشياء الي اني اعرفها راح تنصدمين.

سدن .. انت شنو تشتغل بالمخابرات؟!

نورالدين .. هههه لا.

سدن .. لعد شنو تشتغل انت؟!

ماكو شي متعرفه .

نورالدين .. تمام هالمره خلي اسألج سؤال وجاوبي بصراحه.

سدن .. اوك.

نورالدين .. شنو الانطباع او الفكره الي ماخذته عني من اول مره شفتيني لحد الان ، سواء سلبي او ايجابي.

سدن .. كلتلك مغرور .

نورالدين .. بس!!

سدن .. حكولك الصراحا بس مو تعصب وتعوفني لحالي وتروح.

نورالدين .. هههه لا ما اعصب من الصراحه احجي براحتج .

سدن .. اوك..

اولاً انت متكبر وشايف نفسك ،اتحب تبين للناس انو انت غامض وتخلي الكل يخاف منك

مكروه احياناً ومتسلط والي تريده تسوي اناني ومتفكر غير بحالك تعصب بلا سبب وتضحك بلا سبب

بس اعتقد اكو بداخلك اشويه طيبه نوعاً ما.

نورالدين .. هذولي كلهم عادي واتقبلهم الا مكروه هذي لا .

سدن .. مو ع اساس متهتم لرأي الناس بيك اذا مكروه او لا لويش دتهتم ؟!

نورالدين .. اكيد وفعلا ميهمني احد بس انتي لا مااريد يصير بينا كره.

سدن .. شنو يعني بينا شقصدك؟!!

نورالدين .. اسمعي يا بنت الحلال اني ما مار بهيج حاله من قبل ، يعني اعرف اتصرف بكل الظروف واحل اصعب العقد ومن اي نوع مااخاف ولا اتلكأ

والحقيقه كان عندي علاقات ويا بنات هواي ،عرفت وحجيت هم ويا هواي بنات بس انتي تختلفين.

صح ما بينا علاقه ولا يربطنا شي بس من احجي وياج انتي الوحيده ارتبك ومااعرف اشلون اتصرف.

احس نفسي مرات ضعيف ، مهزوز ، حتى قراراتي وياج اتراجع بيهم وهذي تعتبر سابقه بحياتي !

لانو الي يصيرلي وياج ما صاير ويا اي كائن غيرج .

سدن .. اسكتو لتحجون ولحد يسألني شدااحس .

نورالدين .. نمتي؟!!

سدن .. لتكون اتحبني ومتدري بنفسك.

كالعاده الثول ارتفع عندي وحجيت هذي الكلمتين مااعرف اشون طفرو من اللساني .. حجيتهم وخليت ايدي ع حلكي سديته بسرعه والندم مااعرف الفشله غطوني.

نورالدين .. لا اعرف.

سدن .. يا ربيييييي شحجيت .. الله ياخذج سدن الله ياخذ اللسانج وافتك منج .. وج اشون اتكوليله هشكل؟!

هسه شنو يكول عليه .. يا ربي لويش دتخليني بهذي الموافق لويش داافضح نفسي وافشلها.

نورالدين .. اعرف شي ميدخل العقل ومن حقج متصدكين .. بس وروح امي وابويه شعوري تجاهج صادق وحقيقي وماحاسه تجاه اي وحده غيرج انتي الاولى الي احجي وياها هالكلام.

سدن .. تصبح على خير.

نورالدين .. تمام.

سدن .. گلبي حيطلع من مكانه .. معقوله جبل الجليد عنده مشاعر!!

لا وكل هذا كلامه الدافي وشعوره الصادق تجاهي اني !!

زين شنو الي شافه بيه؟!

اكيد ديضحك عليه؟!

ممعقوله كل هالمركز والشخصيه والهيبه والجمال والحظور يحبني اني!!!!!!

مدااصدك!

الكلام اتلاشى ومعرفت شنو اجاوبه غير (تصبح ع خير) الجمله الي نهت كولشي قبل ليبدي.

بيومها منمت للصبح بقيت اتكلب بمكاني واحس شي بداخلي دافي .. شي اول مره احسه.

لا هو خوف ، لا هو قلق ، لا هو وجع ، لا هو فرح ، لا هو حزن .. شعور متشتت ومينفهم.

الساعه ب 5 الصبح تقريبا مطرت الدنيا مطر قوي .. سمعت القطرات ع بالك دتكسر الشبابيك فزيت افكر بي !

نايم بره والدنيا مطر !

دكيت ع الباب بخفه .. هو بسرعه جاوبني الظاهر كاعد.

نورالدين .. تردين شي؟!

سدن .. الدنيا دتمطر .. روح للسياره حكوم انام بفراشي اني ماكو داعي تبقى هنا.

نورالدين .. ماكو اي رد.

سدن .. احجي ويا مجاوبني!

معقوله يكون زعل؟!

وشسويله خلي يزعل شنو يعني ع باله اني طفله اصدك هالكلام الفارغ لا ويكولي عندي علاقات مفتخر حضرت جنابه.

شلت فراشي وكمت نمت بالصاله ع التخم اشويه اخذت عيني نوم ، كعدت الصبح كلت اكيد راح ميبقى لهسه خصوصاً هو رجل اعمال حضرته خوما يبقى يحرسني بعد الي ردي اله البارحه.

رحت لشباك رفعت البرده بهدوء .. باوعت سيارته موجوده بس فارغه محد بيها.

شنو القصه هذا وينه؟!

رحت للباب فتحته ودا اريد اطلع چان اشوفه كاعد بصف الباب نفس مكانه البارحه الي كنت احجي ويا منه كاعد وراسه مرتكي ع الحايط يباوع كدامه.

لما شافني ابتسم.

نورالدين .. صباح الخير.

سدن .. من شفته انصدمت .. معقوله بقى للصبح جوه المطر!!

ومبتسم ولا كأنو صاير شي ولا كأنو قاطعت كلامه البارحه ومجاوبته !

اتوقعت مثل ما اسمع من بنات المدرسه ومغامراتهم العاطفيه اشون الي متنطي مجال يلبسوها ويحتقروها .

هذا غير عن كلامهن !

بقيت صافنه بوجهه وافكاري اخذتني لغير عالم.. فززني صوته الرجولي المرعب ..

نورالدين .. حظري نفسج محمود راح يجي ياخذج للمستشفى حتى تشوفين اخوج.

سدن .. اوك.

سديت الباب رحت للمطبخ غسلت ، سويتلي حليب دافي وهو سويتله ريوك وجاي حار رتبت الصينيه واخذتها داانطيها اله يعني تعبيراً عن شكري للي سوا البارحه طلعت لكيته ديصعد بسيارته ومحمود ديدخل للبيت.

شغل السياره وراح.

بقيت اني مثل الصنم صافنه واراقبه ديروح.

محمود .. صباح الخير ست سدن .

سدن .. اا.. هــ.. هلاو محمود صباح النور ..

محمود .. اجيت حتى اخذج اتشوفين استاد بسام.

سدن .. اي .. ااي .. هسه دقايق ابدل واجي.

محمود .. ماشي اني راح انتظر بالسياره.

سدن .. تمام.

اخذت الصينيه وذبيتها بس احس نفسي مقهوره مااعرف منه مقهوره لو عليه.

بدلت واخذني محمود للمستشفى .. شفت بسام الحمدلله صحته زينه ومبي شي خطر بس ايده كالو بيها عصب مااعرف شنو مقطوع مسويله عمليه وناجحه.

سلمت عليه وكعدنا نسولف اني ويا ومحمود .. وبعدين اجه بابا .. طبعاً كانت مفاجأه الي انو اشوف بابا ويجي بهالسرعه خصوصاً اني اتصلت بي وميرد.

بنفس اليوم العصر طلعنا بسام ورجعنا للبيت مر كم يوم طبيعي بوجود العائله الكريمه والي مااحس بوجودهم اصلاً حتى لما اكعد وياهم مااحجي ولا اسولف مثل قبل بسبب الي عرفته عنهم وعن صفقتهم الاخيره

هو معرفت عنه شي ولا اجه للبيت حتى يشوف بسام ولا بسام اصلاً ذكرلي موضوع انو موصي يدير باله عليه وهالكلام..

كولشي عنه انقطع بس اني من بعد هذيج الليله شي بداخلي اتغير احساس غريب ينتابني من اتذكره

الى ان فد يوم كاعده يمهم وصافنه .. واذا بجملة طيرت كل عقلي ...

بسام .. بابا هسه اشكلت انروح لخطوبة الباشا لو لا؟ !!!

للحكايه بقيه💔

هلاو حبايبي اعرف اتأخرت عليكم بس دننتقل واتعرفون البيت الجديد اشكد يتعب ترتيبه بيت كامل لا غرفه ولا غرفتين.

اتمنى الاحداث تعجبكم

اريد رأيكم بيها وتوقعاتكم للبارت القادم🤗

لتنسووووووووون التصوووووويييييييت حتى انزل البارت بسرعه.

بقلمي (هدى الموسوي) الاميره الموسويه 👑

ما احلل لاي احد ياخذ كتاباتي وينشرهم (ذمه)

ابو بسام .. اكيد نروح هذا الباشا اشلون منحضر خطوبته.

بسام .. اي طبعاً بس اني قصدي انروح اني وياك لو بس انت تروح وحدك.

ابو بسام .. انروح كلنا اني وياك وسدن.

بسام .. شكو ماخذيها ويانا؟

الاب .. الدعوه اجت للعائله يعني المناسبه عائليه شنو المانع متروح ويانا ، بعدين خلي اختك اتغير جو بدل حبسة البيت هاي.

بسام .. ماشي براحتك.

الاب .. بابا سدن حظري نفسج باجر معزومين على خطوبة وانتي ويانا.

سدن .. انتو عن يا باشا دتحجون؟!

هو نفسه الي حضر ميلادي قبل فتره؟!

بسام .. شكو دتسألين حضري نفسج وخلص شي ميخصج لتتدخلين بي.

سدن .. دااحجي ويا بابا انت الي لتتدخل.

بسام .. هاي عليمن لج ..

الاب .. بساااام ... ضب نفسك ماكو دااعي للعصبيه اختك سألت سؤال ميستدعي تسووها عركه اشوكت اتكبرون!

سدن .. اني مااروح خلي استاذ بسام يرتاح.

الاب .. كلت ترحين يعني ترحين ، مااريد اي نقاش بعد.

سدن .. صعدت الغرفتي بس احس توازني مختل .. اكيد اكو غلط بالموضوع!

مصارله كم يوم من حجه وياي انو اني غير و عنده شعور مختلف عن الباقيات تجاهي !!

واليوم انعزم على خطوبته!!!!!!

لعد اشكد عار وحقير ..

ع باله يضحك عليه النذل لا ويحجيلي بالاخلاق والمشاعر .. واني اكول اشون واحد مثله بارد يحس اصلاً!

الحمدلله منطيته مجال الله يعلم كان شسوه بيومها ، بس العتب ع اخويه الغبي يوصي واحد مثل هذا بلا شرف عليه.

يخطب يموت طبه طوب شكو زاعجه نفسي وداافكر بي ، بس بسيطه شوف اشون حاخذ حق الكذب الي كذبته عليه الا افضحك واحركها لروحك بس اصبرلي.

طول الليل منمت من التفكير .. حاولت بكل الطرق ما اهتم واتناسى الموضوع .

بس شي بداخلي كان يغلي غضب وحقد عليه مااعرف لويش.

كعدت الصبح ما الي واهس بأي شي حتى شعري ما الي خلك المه طبعاً بيومها كان جمعه وماكو دوام

نزلت واني ع الدرج سمعت صوت بابا يحجي بالفون مااعرف ويا منو من شافني سد الفون !!

اني هم سويت نفسي طبيعي سلمت ورحت سويت ريوك بساموو كان طالع مدري وين مولي كالعاده.

اتريكت وكعدت بالصاله اكلب بالفون .. بابا كان كاعد يمي و والفون بأيده ويتبسم كل اشويه!!!!

شنو القصه؟!

حتى مشافني من اجيت كعدت .. بالعاده يسألني عن الدوام عن ملابسي الي حروح بيهم للحفله كذا!

بس هالمره احسه مختلف شي بي متغير .

قاطعت ابتسامته بسؤال ..

_الساعه اشكد انروح؟!!

الاب .. ها بابا ردتي شي؟!

سدن .. لاااا السالفه ابد مو خاليه .. الاخ حتى باله مو هنا ..

دأا أسألك عن موعد الحفله اشوكت حنروح حتى اجهز نفسي.

الاب .. هااا .. اي الحفله .. والله مااعرف بسام كال اني امر اخذكم.

سدن .. اعرف بسام حياخذنا  بس شنو انروح بهدوم البيت؟!

غير انبدل!

احنا اصلا منعرف اشوكت حيشرف الافندي لعد اشوكت حنجهز نفسنا؟!

الاب .. اولاً هذا اخوج الكبير ومن تحجين عنه احجي بأحترام مو شفتيني ماانطي بيج كدامه معناها اقبل تحجين عليه!

وثانياً هسه الساعه ب11 وانتي هستوج كعدتي من النوم يعني بكل الاحوال بسام ما اله علاقه انتي اصلاً متأخره.

واذا ع الوقت هسه اتصل بأخوج ونعرف اشوكت يجي حتى تحضرين نفسج ع راحتج سدن خانم.

سدن .. بسم الله هسه اني شحجيت قابل سبيت العنب .. والله يا الله.

محجيت شي وهو اتصل ببسام كاله ب1 امر اخذكم .. !

كمت اني لغرفتي محتاره شنو البس اكيد خطيبته حتكون موجوده ويتباهى بيها .. بس اليوم اخلي الكل يحتار بجمالي اصبرولي جايتكم.

بعد وكفه طوووووووويييييييييييله كدام المرايه مخليت شي مجربته .. والغرفه انكلبت رأساً على عقب اختاريت شنو حلبس....!

فستان قصير بس جوه الركبه اوفوايت (طبعاً هذا اللون من اقتراح صديقتي خبصتني خبص بي 😂

اوفوايت واوفوايت وتالي طلع حليبي مدري بيجي 😪)

المهم..

قماشه مخمل شتائي مخصر ع الجسم واكمام طويله شعري رفعته ليفوك كوله مسحوب ليوره وبف خفيف تسريحه كولش نازكه

وخليت ميكب اسود للعيون بحيث عيوني طلعو غير شكل يجننون حتى اني انصدمت بالنتيجه والباقي كوله خفيف .

حذاء نفس اللون عالي وجنطه ذهبيه ع شكل جزدان كولش نازكه

حضرت نفسي ونزلت لكيت بابا دينتظرني .. وبسام ماكو!

سألته كالي بسام صارله شغل يكمله وييجي ورانه

بعد احسن خلصت منه ومن تعليقاته السخيفه شنو لابسه ولويش مخليه.

اخذنا محمود بسيارتنا لبيت السيد العريس.

بعد تقريباً نص ساعه او اكثر وصلنا لبيت الافندي!!!!!

مثل متوقعت البيت كولش كبير و واضح كمية الترف والتبذير الي عايشه جبل الجليد.

اصلاً المفروض يشمرو بالقطب الجنوبي هناك مكانه الاصلي.

نزلنا اني وبابا ومحمود راح كله بابا لتجي نرجع ويا بسام .. حرس وحمايات اشكال وانواع واكفين ع طول الطريق حسيت نفسي معزومه ببيت ترامب مو هذا البارد.

دخلنا من كم باب الى ان وصلنا لقاعه كولش كبيره ومليانه ناس من كل الطبقات .. اختنكت من كم العالم الموجوده شنو القصه حتى امير بريطانيا هاري معزم هالكد.

سلام ع هذا واحضان لهذاك ناس مااعرفهم ولا بحياتي ملتقيه بيهم بس اكلوني بالسلام لانو يعرفون بابا اصدقاء وشركاء عمل ومن هالقبيل .. لحد الان نجم الحفله ما طل علينا ولا شفنا.

رغم الحقد والكره الي حاسته تجاهه .... بس احس عيوني تدور عليه !

ملهوفه اشوفه .. اتأمل هذاك الحضور ، الشخصيه والرجوله الطاغيه.

بابا كان مشغول يحجي ويا اصدقائه واني كنت شارده بغير عالم بعدني ممستوعبه الفكره .

حسيت شخص يهمس بأذني من ورا!!!

_(انتي امج اكيد نحله)

التفتت عليه بأستغراب وعصبيه من كلامه .. شاب مرتب طويل وشكله حلو !!

بصوت حاد ...

_ شنو قصدك؟!!

الشاب .. بصراحه ماكو غير النحله تجيب هيج عسل.

سدن .. انت متستحي وقليل ادب.

الشاب .. هو الي يشوف هيج جمال حتى عقل ميبقى براسه .. مو انوب ادب.

سدن .. لااا انت زودتها خلي اصيح بابا يتفاهم وياك يا ادبسز.

التفتت دااريد اصيح بابا واذا اتفاجأه ببابا دياخذ هذا الشخص بالاحضان !!!!!

بقيت صافنه مااعرف شنو احجي .. اشون اشتكي لبابا وهو حاضنه ويسلم عليه!

اكيد يعرفه؟!

درت وجهي عنهم بس كلام هذا الحقير حيل غثني .. جان اسمع بابا يصيحني ..

الاب .. بابا سدن تعالي سلمي ع استاذ يمان !

سدن .. يمان منو هذا انوب؟!

خلصنا من الباشا طلعلنا يمان الي بلا اخلاق.

بصوت جامد وبعدم اهتمام ... اهلاً.

يمان .. اهاااا انتي بنت السيد كريم!!

اني اعتذر ترى مكنت اعرف .. اتمنى تقبلين اعتذاري اخاف كلامي ازعجج.

الاب .. بنتي هذا يمان يكون اخو للباشا نور الدين صاحب المناسبه والدعوه اكيد .. الله يتمم على خير ان شاء الله وانشوفه عريس.

يمان .. الله يخليك ابو بسام .. زين واني متريد اتشوفني عريس !!

الاب .. ههههه اكيد انت هم تتزوج ونحضر عرسك بس كون تعزمنا ها.

يمان .. ههههه اذا انت ما اعزمك لعد منو الي يجي.

سدن .. اشكد قبيح وبلا اخلاق هذا اشون يباوعلي ويحجي ولا ع بالك بابا واكف .

معقوله هذا اخو جبل الجليد!!

صح هذاك بارد وكذاب بس ع الاقل عنده اخلاق مو مثل هذا الحقير.

بقيت واكفه يمهم بس على اعصابي متحمله نظرات وكلام هذا المليق بعدين استأذن من عدنا وراح عاد هنا البابا بدا يذكر بطولات هذا الكائن وانجازاته واملاكه وشهاداته ووووو لحد ما انثولت اتمنيت صاعقه تضربني واخلص من هالهوسه الي ورطت نفس بيها واجيت .. كل الي موجودين حقنه ومتصنعين .

بعد دقايق واخيراً طل علينا نجم الحفله وصاحب الاضواء لهذي الليله (عريس الغفله)

ميحتاج احجيلكم ولا يحتاج اوصفلكم شكله وهندامه لانو بصراحه اتلعثم من اشوفه

وكف بوسط القاعه بطوله المهيب وابتسامته الهادئه .. بصوت رجولي .. رحب بالكل وشكر حضورهم !

حاولت قدر المستطاع اتجنبه وما اباوعله رغم عيوني كانت غصب عني تسترق النظر له.

نورالدين .. طبعاً ممنون من الكل واشكر حضوركم حتى تشاركوني فرحتي بهذي المناسبه..

واكيد الكل يتسائل وين العروس!!

بصراحا هذي الحفله كانت حتى اعلن خطبتي على البنت الي اختاريتها او الاصح الي اختارها گلبي .. ودعيتكم على هذا الاساس ، كنت ناوي اطلب ايد البنت من اهلها مباشرة كون هذي هي العادات المتعارف عليها .. بس بعدين فكرت اخذ رأيها قبل لا اخطو هذي الخطوه الكبيره والمهمه بحياتي وحياتها !

والحقيقه ردها هو الي خلاني اتراجع عن هذا القرار وأجل الموضوع.

اكيد الكل راح يستغرب انسحابي بسهوله خصوصاً انو المعروف عن نورالدين ماكو شي يصعب عليه ولا اكو شخص يفكر يرفضله طلب مو يرفضه شخصياً..!

لو كان الموضوع صفقه او شراكه او عمل كنت اخذته غصباً عن اكبر راس وما انكر اخذت اشياء رغماً عن اصحابها بس لانها تخدم مصلحتي وافتخر بهذا الشي لكوني انسان عصامي كونت نفسي بنفسي و وصلت للي اريده واكثر.

بس الارتباط شي ثاني الزواج الي ينبني ع اجبار وغصب مستحيل يستمر اني اريد اختار زوجه الي اتشاركني حياتي تتحملني ع الحلوه والمره بالصحه والمرض مو جاريه تخدمني وتربي جهالي.

لذلك قررت انطيها حريتها حتى لو كنت اكن لها مشاعر ..... راح انتظرها الى انت تتخذ القرار بنفسها .

واني كدام الكل اعترفلها بمشاعري اكيد هي راح تسمع الي كلته ويوصلها كلامي سواء كانت موجوده او لا .

والحقيقه هذا الكلام كله الي كلته بس حتى هي تسمعه مع احترامي للجميع بس هي الشخص الوحيد الي يهمني تعرف هذا الكلام لذلك صرحت بي .

بالنهايه اتمنى تاخذون راحتكم وتتونسون كأن الحفله تمت .

سدن .. معقوووووووووووووووله !!

الي كان يحجي كدام كل هالناس ويبوح بمشاعره كدام هالجمع الغفير .... هو نفسه الباشا المتسلط المرعب!!!!!!

لا مدااصدك!

تعرفون ... اكبر غلطه سويتها بحياتي خليت ميكب عيون اسود.

حنفضح .. مااكدر اتحمل كل هذا الي سمعته .. اكيد ديقصدني بهذا الكلام.

اهم شي مخاطب ولا اكو خطوبه ... هفففففففف

استأذنت بابا ورحت للحمامات .. المشكله البيت كبير ومااندل اصلاً وين الحمام!!

امشي واتعثر بالناس مثل الضايعه .. طلعت من الصاله الكبيره سألت واحد من هذولي الي ديضيفون الناس دلاني بالحمام من وين !

مشيت بسرعه للحمام اباوع ع وجهي الحمدلله مسايله الماسكارا .. بعد كوله اشتري منها خوش ماركه مو غش.

عدلت نفسي وطلعت اريد ارجع للقاعه .. واذا الكى واكف كبالي!!!!!!!!

نورالدين .. مساء الخير.

سدن .. صافنه بوجهه ومرتبكه مدري شجاني .. !

نورالدين .. بيج شي؟!!

سدن .. ها .. لا .. هلاو .. مساء .. الخير.

نورالدين .. متوقعت تجين.

سدن .. حاولت اتلافى النظر بوجهه .. ولويش ما اجي؟

نورالدين .. مجرد اعتقاد مو اكثر.

سدن .. هو اني دائما اخالف التوقعات.

نورالدين .. امممم حلو.

سدن .. بالمناسبه عندك اخ قليل ادب يا ريت اتكوله اكو يحترم نفسه.

نورالدين ..  بعصبيه .. يمان؟!!

اشبي .. شسوالج؟!

زعجج بشي؟!

غلط وياج بشي؟!

سدن .. بأستغراب .. مسوه شي بس الظاهر اللسانه متبري منه.

نورالدين .. شنو كالج؟!!

سدن .. ولا شي انسى .. عفته ودااروح جان يلزمني من ايدي !!!

نورالدين .. بصوت حاد ونظره مظلمه .. من بين اسنانه طلع الكلام بغضب ...

_شنو .. ك ا ل ج؟!!!!!!

سدن .. باوعت بوجهه نظراته غريبه عيونه عباره عن ظلام وملامحه اتخوف .. اتشاقه وياي بكلام تافه و اترك ايدي دتأذيني.

نورالدين .. تركت ايدها بهدوء .. اسف.

سدن .. عفته بسرعه ورحت لبابا ردت اكوله نرجع للبيت واذا بسام يدخل من الباب!!

اهوووو كملت هسه .

وكفت يمهم كل الي بالحفل يتسائلون ويحجون بموضوع الخطوبه ومنو هذي سعيدة الحظ الي وكع بحبها الباشا..

حتى بابا لما كال لبسام بقو يحجون ويعددون اكيد فلانه وهذا يكول علانه!

مااعرف لويش حسيت بغيره وانزعاج واني دااسمعهم.

مرت كم دقيقه بعدها اجه يمان سلم ع بسام والصدفه العجيبه طلعو الاثنين اصدقاء مقربين!

مااستغرب لانو واضح انو يمان وبسام نفس الطينه.

وكف يمنا يحجي ويا بابا وبسام وعينه الصلفه منزلت من عليه .. فجأه وبلا اي مقدمات طلع نورالدين مااعرف من وين !

وكف وياهم وعيونه اتراقب حركات اخو ونظراته .. مااعرف لويش حسيته مزعوج ومعصب!

بعدين همس بأذن اخو كلام مااعرف شنو خلا يستأذن  بسرعه ويروح!!

بقو يحجون بالشغل والصفقات .. الى ان سأله بابا سؤال ... جوابه وگف گلبي

ابو بسام .. اي باشا مكلتلنا منو هذي المحظوظه الي خطفت گلبك لهذي الدرجه؟!!

نورالدين .. باوع لسدن ... وبصوت هادئ ... اسألها بنفسك.

للحكايه بقيه❤️

اعرف البارت مبي هواي احداث وقصير بس انتو متقبلون ع التأخير لذلك حنزل بارتات قصيره والتزم وياكم بالموعد بين يوم ويوم بارت

رأيكم بالاحداث وتوقعاتكم للبارت القادم 🤗

لتنسووووووون التصووووووويييييييييت حتى ينزل البارت بسرعه اذا مثل تصويت البارت الـ8 محنزل 😒