مكتبة الروايات العربية

رواية ﮼صفقة ﮼عشك الفصل الحادي وثلاثون 31 - بقلم ﮼الاميره،الموسويه 👑

رواية ﮼صفقة ﮼عشك — الفصل 31 — بقلم ﮼الاميره،الموسويه 👑

بقلمي الاميره الموسويه 👑

مااحلل لاي شخص ياخذ كتاباتي وينشرهم (ذمه)

ترى مو كل الحجي تنطقه الـ ألسن

بروحي الك ذاك الحجي

الما ينحجي الا بـ حظن!

سدن .. صعدنا للغرفه ايدي بأيده بس اني كولشي بيه منتفض .. حاولت اسيطر ع الخوف الي بداخلي وما ابين انو اني مرعوبه من فكره ينقفل علينا اني ويا باب .. بس خوفي كان اكبر مني بدا جسمي يرجف بهدوء رغم كتمي لهذا الفزع.

فتح باب الغرفه كدامي وأشرلي بأيده بمعنى ادخلي ..!

مشيت بخطوات مذعوره ومرتبكه .. دخلت و وكفت بنص الغرفه اتجمدت بمكاني ما التفت ولا باوعتله كنت احس نفسي داامر بمراحل بتجاه الظلام وكل ما اعبر مرحله من هذا الطريق اخاف من المرحله الي بعدها .. شنو حيصير وشنو التالي؟!!

حواسي كولها كانت بحالة انذار اي خطوه او حركه يخطيها تثير بداخلي فزع .. حتى جسمي كان خارج ارادتي حركتي ثقلت اشبه بـ الحديد بصعوبه احركه .. نززني صوت الباب وهو يسده التفتت لكيته مرتكي ع الباب متكتف ايديه ع صدره ، يباوعلي بنظرات سوداويه .. وابتسامته مرسومه ع وجهه بمكر!

بلعت الخوف الي بحنجرتي وبقيت صافنه عليه مااعرف شنو اسوي .. اشرد واخلص من هذا الكابوس ... لو ابقى بمكاني واقبل مصيري؟!

نورالدين .. بصوت هادئ ونبره حاده .. قبل ليصير اي شي بينه اريد اتأكد انتي موافقه عليه وبكامل رغبتج حيصير.

سدن .. بقيت ابلعم من سمعت كلماته الي كانت عباره عن خوف يتغلغل لـ روحي .. بصوت مرتبك

_شنو .. شنو هو الي حيصير؟!!

نورالدين .. اتصالحيني غير.

سدن .. يعني اشون اصالحك مكلتلي شنو اسوي ؟!

نورالدين .. لتسوين شي فقط سلميني نفسج ونفذي الي اكوله وبس .

سدن .. بقيت صافنه بوجهه مااعرف شنو اجاوبه .. اكوله موافقه وانطي الي يريده .. لو ارفض وانهزم بحياتي !!

نورالدين .. بحده مبتسم ونظره ماكره .. اريد رد.

سدن .. مااخذت وقت بالتفكير هذا اخر شي بقالي واذا كانت حياتي ويا متوقفه ع هذا الشي فأني مستعده اضحي وانفذ رغباته .. بالاول والاخير هو زوجي وهذا الشي بكل الاحوال راح يصير يعني هسه او بعدين متفرق ..... الفرق الوحيد انو اذا صار هسه راح يسامحني وينسى الي كلته اله.

قرار مصيري اخذته باقل الدقيقه يمكن هذا اسرع قرار اتخذته بحياتي .. بثواني معدوده كنت اني بين احظانه .. بلا اي اعتراض سلمته نفسي وبدا يصير بينا الي لازم يصير بين اي زوجين .. ......!

عقلي اخذ القرار بس جسمي رفض ينفذ ... اقترب مني بهدوء .. رجعت ليورا بخوف !

ظهري انظرب بالسرير بعد ماكو مهرب!

وكفت وهو كدامي ميفصلنا شي .. كنت احس بأنفاسه الحاره وهي تضرب وجهي بسرعه .. دنكت راسي ما اكدر اباوع بعيونه نظراته ترعبني واني تشرح الي يدور بباله شنو ......!

قرب وجهه لأذني وهمس بحده ونبره هادئه ........

نورالدين .. لتخافين .

سدن .. كلامه ينشر الخوف بداخلي اكثر شنو قصده لتخافين ... لويش لازم اخاف اصلا هو شنو الي حيصير؟!!

نورالدين .. مشيت اصابعي بهدوء ع كتفهاااا الى ان وصلت لكفها خليت ايدها بين اديه واخذتها للسرير ......

سدن .. واني بوسط هذي العلاقه واحس بألي ديصير جسمي بدا ينتفض رجفه قويه دبت بكل ذره من جسمي .. ماادري شصارلي...فقدت.

نورالدين .. لما اتقربتلها بالبدايه استجابت الي بلا اي اعتراض بس بوسط الي ديصير بدت ترجف حيل مثل السعفه الي بريح عاصف!!

اول شي اتجاهلت الموضوع كلت يمكن خافت لانها اول مره وهذا شي طبيع .. بس بعدين الموضوع زاد عن حده ا !!

باوعت عليها وجها احمر مثل الطماطه وبس ترجف .. حاجيتها بهدوء ..

_سدن اشبيج.

سدن .. ماكو رد

نورالدين .. ابتعدت عنها بسرعه وكعدتها بهدوء مرفعت نفسها الا اني كومتها!!

لاااا حالتها مو طبيعيه خفت اكون اذيتها بلا ما احس لكونها صغيره بالنسبه الي وصارلها شي .. اكيد بيها شيييي احجي وياها متحجي بس اتباوع بعيوني صافنه وترجف !!

قربتها بحظني وبأديه بديت افرك ظهرها واكتافها اريدها بس تتحرك تحجي ماكو .. ترجف بكل قوتها بحيث اني حاظنها وهزتني وياها ...!

باعدت بينا وباوعت بوجها .. كانت متعرقه حيل عباره عن كتله مي!!

وجها جسمها شعرها كولشي بيها ينضح مي وترجف .. مسحت وجها رفعت شعرها عن وجها وحجيت وياها ..

_سدن حبيبي بس حاجيني ... بس فهميني اشبيج ... سدن شنو الي يوجعج ... سددددددددن !!

سدن .. ماكو منها اي رد فعل ع رجفتها.

نورالدين .. خفت من حالتها لان بديت افقد السيطره عليها و حتى مترد عليه .. بعدتها واريد اكوم اصيح واحد يجيبلي مي ، يتصل بالاسعاف .. لان اني ما الي قدره اخذها للمستشفى لو اسوق سياره ودااشوفها بهالوضع دتموت.

بعدتها ودااكوم جان تلزمني من ملابسي ... باوعتلها وجها احمر دم وعيونها مليانه دموع حجت بصوت يرتجف وكلمات متقطعه

سدن .. لـ.. لتعـ... لتعوفنـ..ـيي.

نورالدين .. كلمه وحده كالتها حسيتها سحبت روحي من عندي بيها .. اشكد كنت غاضب منها ، كنت ناوي بكل ذره بيه اجرحها ، ادمرها واذلها بعد مااخذ الي اريده منها بس من شفتها بهذي الحاله كل هذا اتلاشى .. اتمنيت اني بمكانها .. اتمنيت ممتقربلها .. كل هذا بسببي اني الي سويت بيها هيج.

رجعت كعدت يمها هي بلا اي مقدمات سحبت نفسها وارتمت بحظني!!

ضمت وجها بصدري .. انفاسها عباره عن نار تحركني .. حظنتني بقوه بحيث حسيت اصابعها اخترقت جلدي بس محسيت بوجع ولا اتأذيت غير لما ... سمعت شهكتها ...... بجت ........ حركتلي الي بقى بيه من روحي!!!!!!!!

سدن .. رغم هو مأذاني ولا ضربني بس جسمي ماادري شصارله انتفض وبدا يرجف .. رجفه مو طبيعيه انتقلت لروحي لعقلي لگلبي ... يمكن حموت هالمره!!

مااعرف اذا كنت فاقده الوعي لو صاحيه لاني كنت اشوف كولشي بس مااحس بشي!

كنت بس اريد اسيطر ع نفسي مااكدر احس مثل الي مخلين مشاعره وحواسه بخلاط ومشغلي بأعلى سرعه .. ماافهم شنو هذا الي دااعيشه .. شنو هذي الدوامات الي دتسحبني لداخلها بقوه!

سمعته يحجي وياي ويمسح ع وجهي وظهري بس ماافهم شنو ديكول صوت بعقلي قويييييييي شتتلي ذهني .. لما راد يعوفني ويروح محسيت غير بالخوف لدرجه مرعبه .. هيج فكره ماادري اشون اتكونت ببالي انو اذا عافني وطلع حموت .. ايييي اكيد بس يتركني لحالي هشكل حموت ..... اصغر ذرة قوه باقيه بيه استعانيت بيها لان كنت منتهيه بكل معنى الكلمه .. استجمعتها بكل ما املك من روح ولحد هذي اللحظه مدااستوعب اشون كدرت احرك نفسي وقتها اشون كدرت الزمه وانطق هذي الكلمه!!!

يكولون الانسان من يواجه الموت عقله يتصرف بلا ارادته!!

بلا ادراك مني لزمت ايده مااعرف شنو كلتله بالضبط لان كنت تقريباً شبه واعيه .. باوعلي بنظره مفهمتها نظره غريبه اول مره اشوفها بعينه ورجع حظني!

ارتميت لصدره بقوه لحظتها شي بداخلي انكسر .. ومثل ما كانت مشاعري خارج ارادتي ... دموعي كذلك نزلت بلا ما اطلبها ....... بجيييييييت بحرگه .

اشويه بديت استعيد تحكمي بنفسي طوقته بثنين اديه مثل الي متمسك بشي متوقفه حياته عليه .. كل تصرفاتي كانت بلا وعي مني اتصرف بلا تفكير بلا اي محسوبيه للي دااسوي .. كنت اريد بس شخص اتمسك بي وابجي .!

شخص يحظني يحتويني يحسسني انو اني مو وحدي .. رغم انه ما غصبني ع شي ولا اذاني بشي بس اني كنت بحاله انهيار .. اتهسترت لدرجه وصلتني الموت ... والغريبه مو هو السبب ..... لا اني!!!!

حظنته بقوه وبقيت ابجي اشهك وابجي .. حسيت بأيده دتطوقني وسحبني اله اكثر!!

حظني وبدا يمسح ع شعري بهدوء .. صوته لما حجه وياي كان عباره عن سكينه نزلت بروحي ..

نورالدين .. تمام تمام مااروح بس اهدي ..... اهدي .. مااروح اني يمج ولا حتقربلج بعد .. بس لتبجين اشششششششششش.

سدن .. هو يحجي واني ابجي .... كل مره اريد اسكت شي بداخلي يدفعني للبجي اكثر .. بس ويا كل دمعه تنزل يخف الشعور الي احسه .. كأنو العبئ بداخلي كاتم ع انفاسي .. ومن ابجي ينزل ويا دموعي .. بصوت همس ومخنوك بعبرتي ...

_انت هم حتروح مثلهم .. انت هم حتعوفني مثل ماما .. هم حتبيعني مثل بسام وبابا .. كلهم عافوني وانت هم حتسوي مثلهم ....!

نورالدين .. اششششششش .. حبيبي لتحجين شي ... يا روحي بس ارتاحي هسه وبعدين نحجي ... وغلاتج الي تردي يصير بس اهدي ولتبجين .. اشششش .. اشش

سدن .. من بين ادموعها وحسرتها .. شنو سويتلهم اني والله مسويت شي ولا أذيتهم .. حتى بسام اشكد اذاني وحرمني من كولشي كنت احبه ولا يوم أذيته .. لويش يكرهوني لويش ميردوني لويش لويش لويييييش!

بابا هو الحب الوحيد الي عرفته .. ولا مره زعلته مني ابد ، حاولت بكل الطرق اخلي يفتخر بيه وارفع راسه .. لويش باعني لويش انطاني لبسام حتى يبعني الك لويش .

شنو غلطي وياهم ....شنو الي غلطت بي شنوو .. شنووو .. شنوو .

نورالدين .. بصوت مخنوك ونبره متوسله .. اششششششش لتحجين كاااااافي سدن اسكتي عوفي الكلام هسه ، اني هنا اني يمج و اعوضج عنهم كلهم صدكي اخليهم يندمون ع الساعه الي جرحوج بيها .. بس اهدي هسه وبعدين كلشي يتصلح ...

سدن .. كنت احجي بلا وعي فاقده ع الاخير .. مثل المخبله ادموعي تجري ع خدي واحجي .. بس كلامه صحى جرح بيه ... بعدت عنه بتعب ودفعته .. انت؟!!!!!!!

انت نفسهم متختلف عنهم بشي ...لا انت اسوء منهم .. اشتريتني بفلوسك واتزوجتني غصباً عني .. اصلاً كل الي اني بي بسببك ..... اي انت السبب .. انت ضحكت ع بسام وخليته يبعني الك مثل الجاريه .. انت الي ضيعتلي اهلي وخليتهم ينسوني انت ... كل هذا بسببك .. يا ريتني مشفتك .. يا ريتني معرفتك .. يا ريتني ما ... سكتت والغصه اتجمعت بحنجرتي .... ياريتني ما حبيتك انت دمرت حياتي انت .

نورالدين .. شفتها كم مره تبجي .. اتعصب .. تضحك .. اتخاف .. تعاند .. بس اول مره اشوفها بهذي الحاله من الانهيار .... تبجي بحركه خبلتي جريتها الي بقوه اريد اسكتها اهديها لان اذا بقت ع هالحال راح ترجع تفقد مره ثانيه بس هالمره اكيد اتموت .. منهاره تماماً .. جريتها الي رادت تدفعني عنها مكدرت .. بقت تضرب ع صدري ضربات متعبه بوهن !!

ضرباتها ما أذتني بكد ما اذتني كلماتها .. معقوله اني ظلمتها ...؟!

زين والي سوته هي ؟!

اااااااااووووووووووووف سدن ..

بقت تتصارع وياي حتى اتركها بس اني كنت اقوى منها بهواي حظنتها الى ان هدأت .. عفتها تحجي كل الي بداخلها وتبجي مقاطعتها ولا حاجيتها .. حظنتها وبس..... الى ان غفت!!

نامت وانفاسها بدت تنتظم .. الرجفه خفت منها الى ان اتلاشت !

نيمتها ع السرير غطيتها وكمت من يمها ..

طلعت من الغرفه مخنوك لدرجه روحي اتريد تطلع .. نزلت بسرعه اريد اهج من كلامها .. من البيت من الدنيا كلها .. لكيت يمان ومرته ديدخلون من الباب !!

سلم عليه مجاوبته اتجاهلته ومشيت اريد اطلع ... جان يوكف كدامي مخلاني امر!!

يمان .. اشبيك نور شصاير ليش معصب؟!

نورالدين .. وخر عن طريقي يمان .

يمان .. ماشي اوخر بس غير تفهمني شصاير شنو الي زاعجك لهدرجه؟!

نورالدين .. انت بالذات لتحجي وياي .. شكو جبتني من الفندق وينه خطارك المهم الي صحتني علموده؟!

يمان .. هو هذا الي زاعجك ؟!

يا اخي صارلك شهر مختفي و زوجتك خطيه وحدها كاعده حتى اتصال متتصل بيها كسرت خاطري كلت اخليك تجي حتى اتشوفك.

نورالدين .. محد طلب منك اتفكر بيها وتشيل همها انت ميخصك بمرتي وحياتي خليك بحالك فهمت لو لا .. سدن لتتدخل بيها نهائياً حتى اسمها لتجيبه ع اللسانك والا متلوم غير نفسك.

يمان .. نور اشبيك شنو هالكلام ترى سدن مثل اختي وانـ..

نورالدين .. دفعته وطلعت حتى قبل ليكمل كلامه .. كالعاده تهت بالطرق امشي ماادري وين اروح لمنووو احجي شنو اسوييييي .. !!

كنت اسوق السياره بلا وجهه ..... منظرها ورجفتها ملازمين عقلي مسويت شي يستدعي يصير بيها كل هذا..!

شنو السبب الي خلاها تنهار هشكل .. معقوله لهدرجه كارهه اتقربلها؟!

وكفت السياره ع جانب الشارع ونزلت ... كنت احس نفسي تعبان وماادري شنو السبب !

نحول بكل جسمي وثقل على صدري كاتم انفاسي .

صفنت والافكار كانت تدور براسي ... معقوله اني شخص سئ لهذي الدرجه بحيث قربي يدمرها؟!

كنت واكف بهدوء اتأمل بالسيارات الي دتخطف بسرعه كدامي .. كمية السكون الي كانت باديه عليه ابد متعكس الي ديصير بداخلي البراكين الي دتغلي ، الالم الي ديكطع روحي ، والحزن ......... الحزن الي بگلبي.

شنو الحل نورالدين؟!!

شنو الحل ؟!

شنو ..... الحل؟

اتركها؟!

اشلون واحد يترك روحه؟!

واذا روحك متريدك؟!

غصب عنها تحبني.

جربت تغصبها وشفت الي صار ...!

مااتقربلها بعد .. يكفي انو اشوفها هذا بس الي اريده اي شي ثاني مااريد .. ما المسها اصلاً بس تبقى الي .

بس هي مو الك لازم تتقبل الحقيقه .. المفروض من البدايه اول مرفضتك تتركها.

مستحيل.... مااعيش بدونها.

بس انت عشت قبلها!!

بس بعدها مستحيل.

يعني تبقى وياها؟!

لا ... متريدني.

والحل؟!!

الحل.......!!

واحد ماكو غيره.

لا .. لا .. الموت مو حل .. الي ينتحر جبان وانت مو جبان .

حياة بدونها موت بالنسبه الي ......... اتخذت القرار ...

كنت احجي ويا نفسي مثل المجانين .. جزء يواجه .. وجزء يبرر!!

خطوه خطوتين شفت ضوه السياره القوي بعيني ... اصوات هورنات وناس اتصيح .. محسيت حالي الا بنص الشارع والسياره بعد امتار عني ........!

سدن .. فزيت من نومي مرعوبه !!

حلكي يابس وعركانه .. الغرفه فارغه !

شنو الي صار ، اني اشوكت نمت ، لويش محد كعدني؟!

استرجعت الاحداث كولها ، اتذكرت الي صار .. واخر شي كان لما حظني بقوه واني اضرب بي التفتت ع السرير مكانه فارغ وين راح ؟!

راسي كان مصدع حيل ويأذيني جسمي نحلان ع بالك كنت اركض كمت ع كيف للحمام دخلت سبحت وطلعت بدلت ملابسي ونزلت اريد اشوفه واحجي ويا ..!

لازم يفهم انو الي صار قبل كم ساعه مو بأرادتي وحتى مكنت حاسه ع نفسي شدااسوي .. اي ع الاقل اعتذر منه ع الكلام الي كلته لانه ميستحق الي دااسوي بي رغم كل الي صار وغلطي بحقه هو سامحني .. طلعت من غرفتي سمعت صوت ادم ديبجي!!

رحت بوجهي لغرفة لارين دكيت الباب .. اجاني صوته بهدوء ادخل!!

دخلت لكيتها شايلته اتسكت بي بجزع وهو يبجي ، من شافتني صفنت بوجهي الظاهر شافت عيوني ورمانه!

سلمت عليها وكأنو مصاير شي واتجاهلت النظرات الي ترمقني بيها .. كلتلها انطينيا اني اسكته ، اخذته منها بقى يبجي بالزايد هزيته بهدوء وفركت ظهره بدا يهدأ اشويه!

سألتني هي ...

لارين .. اكول سدن صاير شي بينج انتي ونورالدين؟!

سدن .. ها .. لا .. لويش نور كاللكم متعاركين؟!

لارين .. لاا مكال شي بس بصراحه اليوم لما رجعنا كان معصب حيل حتى صيح ع يمان وراد يتعاركون.

سدن .. هااا .. !!

لارين .. ع بالي تعرفين اشبي كلت افهم منج لانو يمان خطيه ضايج حتى متعشى وقلقان عليه ، نور لحد الان مرجع .

سدن .. معرفت شنو اجاوبها بس كلامها قلقني ، اتحججت بأبنها وسكتتها.. ادم نام خلي بسريره.

لارين .. واخيييراً صارلي ساعتين احاول انيمه ماكو .. تسلمي عيوني .

سدن .. لا مسويت شي من رخصتج.

انطيتهيا وطلعت بوجهي نزلت ليجوه اريد اشوف يمان وافهم نور شنو كاله ولويش لحد الان مرجع وين راح؟!

دورت بالطابق الارضي ماكوو وبغرفته ماكو لان اني كنت يم لارين مشفته!

مبقى غير المكتب رحت للمكتب دكيت الباب رد عليه صوت يمان ادخل!!

دخلت لكيته ديتصل و ملامحه متطمن !!

من شافني حسيته عصب او انزعج .. بقيت واكفه يم الباب وانتظره ينهي الاتصال!

من خلال كلامه واضح انو ديحجي ويا زيد لو واحد من الحرس بخصوص نور لانه يكوله طلع معصب واخاف صايرله شي.

بمجرد ما سمعت هذي الجمله گلبي كام يدك سريع .. اسم الله ، الله ليكولها.

خلص يمان مكالمته وسألني بحده ..

يمان .. خير سدن رايده شي؟!

سدن .. اشبي نور؟!

يمان .. والله مااعرف المفروض انتي تجاوبيني ع هذا السؤال.

سدن .. مفهمت .. شقصدك؟؟

يمان .. قصدي انو انتي من يوم الي دخلتي لحياة نورالدين دمرتيها .. خليتي ضايع وميعرف يتصرف اصلاً.

خليتي على طول سرحان ويفكر ، معصب ومزعوج ، غيرتي سويتي انسان ظالم ميرحم احد .

مااعرف شنو الغلط الي ارتكبه بحقج نور حتى تسوين بي هيج ، كل غلطه وذنبه حبج لا اكثر!

اتصدكين قبل لا يعرفج نور ما كان يؤمن بشي اسمه حب رغم الاف البنات كانو يتمنون نظره منه وما كان يعبرهم ، يعصب عليه لما اكله متعرف ع وحده لو يشوفني احجي ويا بنات .. كان دائماً يكولي لتحجي ويا بنت وتكسر گلبها لان الله اكيد راح يكسر گلبك !

يمكن لهذا السبب ما فكر يحب حتى ليكسر گلب الي يحبها.. بس للاسف صار العكس وهو الي انكسر.

اعتقد اكثر من مره فهمج وشرحلج سبب انسحابه من حياتج لما اتقدمتلج اني .. وحاول بأكثر من طريقه يعوضج عن الي صار ، واني من كد ما كنت اشوفه اشلون كان يعاني بسبب هذا الشي .. اشفقت على حاله .

ولمصلحة اخويه راح اسمح لنفسي اخذ قرار بدل عنه واكلج والاخر مره كااااافي اذا متحبي اتركي الي سويتي بي اكبر من اي انتقام ممكن ينتقمه شخص .. كافي اطلعي من حياته وخلي يعيشها.

سدن .. شي بداخلي كان يعرف انو يمان ديكول الحقيقه وكان يصارع حتى يبررله انو انيييي مااقصد يصير كل هذا ...!

بس الكلام رفض يطلع .. اللساني رفض يدافع عني .. دااحس حتى روحي دتتخلى عني.

سكتت لان كل الي كاله صحيح اني ابد مقدرت مشاعره تجاهي !

ولا مره حسسته بحبي غير لما اعترفتله بمشاعري .. وبعدها سديت كل البيبان بوجهه !

انطاني هواي فرص واني بكل مره يطلب مني السماح اخذله!

بس رغم كل هذا اني احبه .. والله احبه .. وصادقه بحبي اله .. بس حظي هو الي دائماً يضيع كولشي حلو بحياتي.

ادموعي جرت يا يريتها كانت لسان حالي كدام يمان وتشرحله انو اني احب اخوو واتعذبت اكثر منه.

درت وجهي وطلعت بلا ما ارد عليه بحرف واحد .. لان ماكو رد ممكن اكوله ويبرر حقيقتي.

طلعت من المكتب الدموع مغوركه عيني بحيث مااكدر حتى اركز بطريقي ...!

اتوجهت للدرج دااصعد چان اسمع الباب دينفتح!!

التفتت لكيته واكف كدامي بحاله ....... اقل ما يقال عنها يرثى لها...!!

نورالدين .. كنت على بعد لحظات من الموت .. ثواني وكان كل هذا العذاب والشعور اتلاشى!!

غمضت عيوني واستسلمت للموت حتى يخطفني .... بس الله سبحانه وتعالى الظاهر يريد يستمرعذابي الدنيوي.

صاحب السياره وبقدرة قادر كدر يغيبر مساره وميصدمني .. فتحت عيوني ع صوت الناس الي اتجمعت يمي وسحبتني من الشارع .. !

واحد يصيح اشبيك اعمى!

ابو السياره يصيح اتريد تبليني الله ياخذك!

وصوت يصيح لااا هذولي شغلتهم هاي يشمرون روحهم كدام السيارات حتى ياخذون فلوس!!!

اصوات واصوات واصوااااااااات .. اسمعها تدخل لراسي بس اني ميطلع صوتي!!

الللللللللله يا نورالدين .. زمان الي خلى صوتك عاجز عن الرد !

اخذت جاكيتي من الكاع وطلعت من بين الجموع الي محاوطيني .. صعدت سيارتي ورجعت للبيت ....!

بطريق الرجعه راجعت كل الي صار .. كل الي عشته .. من اول يوم شفتها الى اخر لحظات الها بين اديه واتهاماتها الي وجهتها الي .. حالتي واني كاعد بالشارع مثل العاجز كل هذي الافكار والصور خلتني اشفق على روحي !

خلص نورالدين انت على ما يبدو منخلقت حتى تحب .. او بالاحرى الحب منوجد الامثالك.

شنو الحياة الي تترجى تعيشها ويا انسانه غصبتها ترتبط بيك؟!

لهنا ولازم تنهي هالمهزله .. هي اتريد حريتها وانت اذا اتحبها لازم تنطيهيا.............!

بأقصى سرعه رجعت للبيت ركنت السياره ونزلت اجر اذيال الخيبه مثل ميعبرون عن الي مثل حالتي !

دخلت البيت ولكيتها واكفه كدامي .. شكلها استعادت وعيها وحالتها اتحسنت .

اعتقد الاحساس الي احسه بروحي قبل لا ادخل واشوفها مثل احساس واحد شامري من ناطحة سحاب ومرتطم بالارض بكل قوته .. بحيث خطواتي كانت تهتز مثل السكران بس مو جسدياً لااا روحياً فكرياً كأني ثمل بس بوعيي!!

فكرة انو اتركها واكمل حياتي بلاها تستنزف كل ذرة عقل بيه .. تسحب روحي من جسمي !

بس كل هذا اختفى لما شفتها .. ماادري اذا الي احسه تجاها يتسمى حب .. مااعرف الاحساس الي يكتسحني لما المحها شنو .. مااعتقد مشاعري تجاها مجرد حب وبس ... مستحيل !!

حتى العاشق حتى المغرم حتى المتيم ميحس الي احسه .. ميعيش الجنون الي يصيبي لمجرد فكره اخسرها....!

باوعتلها بنظره الي ديباوع لروحه واكفه كدامه ... شافتني ملامحها ظهر عليها الاستغراب .. اهاااا الظاهر مو بس گلبي الي يرثى له حتى شكلي !!

باوعتلي بنظرة تساؤل وقبل لا احجي الي عندي حجت هي ..

سدن .. نور لويش هيج شكلك .. شصايرلك؟!

نورالدين .. مشيت خطوات بتجاها وكفت كدامها حسيت انفاسها ارتبكت .. بصوت هادئ همس ...

_ليش نزلتي؟!

سدن .. كعدت ملكيتك ونزلت ادور عليك .. وين رحت؟!

نورالدين .. خفتي عليه؟!

سدن .. بأرتباك .. ها .. اني .. هذا .. لا بس اني ..

نورالدين .. تمام .. ارجعي لغرفتج ارتاحي ولتنزلين .. اذا ردت شي الشغاله تجيج.

سدن .. نور .. اريد احجي وياك بخصوص الي صار اليو ...

نورالدين .. اقتربت منها اكثر خليت اصبعي ع حلكها .. اششششششش لتحجين شي ... روحي ارتاحي وباجر نحجي اني هم اريد اكلج شي.

سدن .. شكله كان تعبان وحتى كلامه يطلع من عنده بصعوبه .. اول مره اشوفه منهار هشكل؟!!

وكل هذا بسببي .. كلام يمان صحيح اني سبب عذابه ودماره .....!

محجيت درت وجهي وصعدت .... ليلتها مكدرت انام ولا غمضت عيني ..!

لما طلعت الشمس عيني غصباً عني غفت .... فزيت لكيته كاعد ع التخم كدام السرير !!

ملامحه كان واضح عليها السهر .. هالات سوده جوه عيونه .. وجهه تعبان وابتسامه هادئه ع وجهه!!

من شفته كعدت بسرعه عدلت نفسي واتغطيت ... حجيت بأستغراب ..

_نور ؟!!

نورالدين .. بأبتسامه هادئه وصوت خالي من اي مشاعر ..

_ سدن انتي طالق......!

للحكايه بقيه 💔

هلاوو اشونكم

هذا البارت مثل ما وعدتكم ولحد اتكوووول قصير لان ٤ الاف كلمه يعني يعادل بارتين

وباجر ينزل اخر بااااااااارت 💔😭

رأيكم بالاحداث وتوقعاتكم للنهايه شنو حتكون سعيده لو حزينه😕

لتنسووووووووووون التصوووووووييييييييت 🙋🏻‍♀️🚶🏻‍♀️

رواية ﮼صفقة ﮼عشك الفصل الثاني وثلاثون 32 - بقلم ﮼الاميره،الموسويه 👑

رواية ﮼صفقة ﮼عشك — الفصل 32 — بقلم ﮼الاميره،الموسويه 👑

بقلمي الاميره الموسويه👑

ما احلل لاي شخص ياخذ كتاباتي وينشرهم (ذمه)

ما كان البعد زهداً بيننا

وكيف ازهدُ بك وانت انا

لكنها الاقدار خطت امرنا

فضاق على وسع الزمان لقاؤنا

نورالدين .. كلتلها اصعدي ارتاحي صعدت واني دخلت الغرفتي بملابسي شمرت روحي ع السرير ونمت مثل الجثه الخامده!

يمكن هذا اطول يوم مر عليه بحياتي ... دااحس بثقل الدنيا كلها ع اكتافي مفكرت ولا خططت لاي شي لان القرار اتخذته وبشكل نهائي .. نمت بغرفة الضيوف مرحت لغرفتنا بعد .. فزيت الصبح ألم بكل جسمي!

راسي مااكدر اشيله حتى گلبي يأذيني مااعرف شنو السبب .. دخلت الحمام سبحت وبدلت كان عندي اجتماع كلش مهم بيومها ويا تاجر اسلحه كبير شغله كله ويا المافيات ومااكدر الغي لانه مو شخص عادي ومو بعيده يسويلي مشكله وبكل سهوله يلبسها براسي شخص اقرب للمجرم والمصيبه يشغل مركز مهم بالدوله!

بالعاده مااتعامل ويا هالفئه من الناس مو خوفاً وانما مااحب الحراميه واصحاب الجرائم .. بس شغلي يحتم عليه اصادف هيج ناس واشتغل وياهم ..!

المهم كلت انهي الموضوع وياها وبعدها اروح للشركه احضر الاجتماع

بدلت وطلعت لغرفتها .. طرقت الباب ماكو ود!!

الظاهر بعدها نايمه فتحته ودخلت بهدوء الغرفه دافيه وظلمه .. بوسط السرير نايمه بطريقه مبعثره ، شعرها منشور ع وسادتها .. نايمه وكأنو سكون العالم كله متجمع بيها

اقتربت منها بهدوء فتحت الضوه الي بصف السرير وكعدت ع الكرسي مقابيلها اتأملها وكأني اشوفها لاخر مره .. عيوني متبتعد ولا لحظه عنها كنت هايم بيها وهي غافيه!!

اذا عيني لحظه متبعد عنها لما المحها اشلون راح اصبر بلا مااشوفها نهائياً؟!!

بس ما خطرت هذي الفكره ببالي اختنكت !

خلص نور قرارك نهائي و بعد ماكو رجعه

الدقيقه اتحولت دقايق وبعدها ساعات .. نسيت نفسي .. نسيت الشركه والاجتماع!!!

واني بحظرت وجودها انسى العالم انسى حتى نفسي مو بس الدوام.

بعد ساعتين تقريباً بدت تصحى!!

كعدت بهدوء جمعت شعرها وبعدتهزعن وجهه .. اني كنت ضايع بيها محركت ساكن ولا حسستها بوجودي بالغرفه اصلا .. التفت شافتني!!

استغراب ع وجهها ونطقت اسمي!!

ابتسمت بوجها وبصوت هادئ..

_صباح الخير.

سدن .. صبـ.. صباح.. الخير.

نورالدين .. اشلونج اليوم؟!

سدن .. زينه .

نورالدين .. متأكده ؟!

يعني محاسه بوجع او شي؟!

سدن .. لا مبيه شي وماكو شي يأذيني ، لويش دتسأل؟؟

نورالدين .. تمام .. عندي كلام وياج فأذا بعدج تعبانه نأجله لغير وقت.

سدن .. لا متعبانه واساساً اني اريد احجي وياك من البارحا بس انت أصريت انام .

نورالدين .. معناها اسمعي الي راح اكوله واعتبري اخر كلام بينا.

سدن .. شنو ... شتقصـ....

نورالدين .. اسمعيني ولتقاطعين ..

سدن .. من نبرة صوته الي اتغيرت وملامحه الي انشدت واضح انو الكلام الي حيكوله ميبشر بخير ... سكتت واستمعتله بهدوء.....!

نورالدين .. اني حجيت وياج كثير وبررتلج كثير ومااريد اعيد الي كلته ولا اريد افتح مواضيع انتهت .. بس الي راح اكوله هسه ما منه رجعه ولا ينعاد بعد.

غلطت وياج صح وحاولت اصلح غلطي وعلاقتي بيج بكل الطرق واعوضج ع الي سويته من يوم الي عرفتيني لليوم مااعتقد شفتي مني اي تقصير ، مخليت شي مسويته حتى احافظ عليج لكن مافاد!

فخلص صار لازم اخلي حد لهذي العلاقه ..بس قبلها لازم تعرفين انتي شنو بالنسبه الي.. حتى لتظنين انو اني لما اتزوجتج كنت ناوي اكسر بيج لو انتقم منج لا...

لان انتي مو مجرد حب عابر ولا صفقه مثل متتصورين ولا حتى شعور عادي .

انتي الاحساس الحقيقي و الوحيد الي عشته بحياتي ، انتي الرجفه الاولى لگلبي ، انتي النفس الي ما اعيش بلا ، انتي هذا الكون كله بالنسبه الي ، انتي الوجود الي انتمي له ، انتي الدم الي يمشي بأوردتي ، انتي الهوا الي يدخل الصدري .. انتي ... انتي .. انتي .......... انتي روحي الي عايش بيها.

انتي وجع گلبي ، انتي عذابي ، انتي قهري ، انتي نقطة ضعفي.

هذا الي كلته كله نقطه ببحر من الي بداخلي الج .. بس!!!!!

انتي متستاهلين هذا الحب .. ولا تستحقينه .

ما اريد ارجع للماضي بس لازم تعرفين شي .. اني شخص انحرم من الحب وهو طفل !

معرفت شنو حب شنو مشاعر شنو حنان .. كل الي عشته ألم ، خوف وقسوه.

هذا الشي استنزف عواطفي كلها لدرجه نسيت اني بشر حالي حال الناس ومن حقي اعيش هيج شي.

مشاعري وعواطفي كتمتهم بأعمق عتمه بداخلي ونسيتهم .. الى ان اجيتي انتي!

كنت اظنج الانسانه الي تستحق ارجع اظهرهم للنور .. المخلوقه الوحيده الي راح تحتويني .. صديتيني هواي وعذرتج لعدة اسباب اولهم فرق العمر الي بينا...

واخرهم خوفج مني وعدم معرفتج بيه.

صبرت عليج ، اتحملت ، سامحتج وغفرتلج غلطات لو غيرج يسويهم ميكفيني غير اطلع بروحه .

بس ضاع كل هذا بيج .. اليوم وللمره الاولى اكولها الج .. انتي مو اهل لهذا الحب الي قدمته الج ، وخساره بيج كل شعور حسيته اتجاهج.

ما راح ادعي انو اني ما احبج او راح يجي يوم واترك حبج لان كل هذا كذب

حتى وان كنت من اعماق روحي اريد انساج واطلعج من گلبي .. بس الحقيقه المره اني احبج وراح ابقى طول عمري احبج ومستحيل تاخذ حبج اي مخلوقه على وجه الارض ... لكن لهنا وننتهي اني وياج ... بعد مااريدج بحياتي.

ما انكر اني غلطت بحقج وما انكر اني اذيتج بس بكل مره خذلتج بيهاا كنت اعترف بذنبي بعدها واثبتتلج اشكد اني نادم واطلب منج العفو.

لكن لكل شي حد وهذا حدي وياج ... ما مستعد انطي شعور لانسانه قربي منها تكرهه .. لمستي الها تمرضها .. حبي الها يعذبها .. ولا مستعد اخلص عمري ويا شخص بايعني.

من هذي اللحظه تنسين شخص اسمه نورالدين.

اخذت حريتج منج .. راح تسترديها مني ومستعد اسوي الي تطلبي تعويضاً الج عن هذا الزواج.

مصار بينا شي (للتوضيح العلاقه مصارت بينهم فقط شي سطحي 😬😑) وعقد محكمه ماكوو .. لا انكتب اسمي بظهر جنسيتج ولا شلتي ابني ببطنج .....واصلاً محد يعرف بهذا الزواج غير اهلج واهلي يعني انتي كدام العالم كله بعدج بنت وممتزوجه اعتقد مخسرتي شي ومع ذلك الي تردي ثمن لهذي الغلطه اني مستعد ادفعه.

سدن .. كان يحجي بحركة گلب .. كنت اشوف بعيونه ويا كل كلمه ينطقها ألم وخذلان ... كل الي كاله صح وكل الحق اله .. اجه الوقت الي لازم ادفع ثمن كل اخطائي بحقه ... بهدوء بجيت ع كل حرف نطقه .. حسيت نفسي اقل واذل من انو يحبني شخص مثل نور.

بعلت الغصه الي بحنجرتي وبصوت متقطع ومخنوك ...

_ اني راضيه بحكمك عليه بس اتوسلك نور واترجاااااااك لتعوفني ....!!!!

نورالدين .. من اليوم ورايح ماكو شي يربطج بيه ...

_انتي طالق.

كلمتين من 8 حروف طلعو من اللساني .. ويا كل حرف طلع جزء من روحي ... ويا كل كلمه مات جزء من گلبي.

اني راح احجي ويا والدج وافهمه انو عندي ظرف ولازم تبقين يمهم هالفتره حتى يبقون مفكرين انتي ع ذمتي ومحد يغثج بتصرف او كلام ، اخوج اعرف اشون اسكته ومراح اخلي يفتح حلكه بحرف وياج .

انتي بنظرهم زوجتي الى ان تتخرجين وتعتمدين ع نفسج وقتها نعلن الانفصال ، دوامج راح ارتبه الج وترجعين اتكملين دراستج .. وبعد متتخرجين وظيفتج جاهزه .. اعتبري غلطة زواجي منج بالغصب دين الج عليه ودااسدده .

حضري روحج والحرس ياخذج لبيتكم .. ارجع ما الكاج هنا.

سدن .. ما الومه .. ولا الي اي حق ادافع عن نفسي ..... دااحس رب العالمين ديكولي فرصج خلصو سدن .. احصدي ثمار خيبتج.

عافني وطلع ... عيوني بقت مشبوحه عليه .. نظراتي بقت عالقه بظهره ... ودموعي غركت غطاي!!!!

بجيت وبجيت وبجييييييييت .. شنو يغير البجي .. شنو الفايده الي اجنيها من البجي؟

صارت الدنيا الظهر لبست التراك الي اجيت بي من بيت اهلي ونعالي .. مأخذت منه ولا شي ..

نزلت جوه سمعت صوت ادم يبجي گلبي حن اشوفه قبل لا اروح .. هذي اخر مره ع الاقل اودعه!!

بس لااا مااريد احد يشوفني خلي هو يكوللهم قراره الي اتخذه .. اني ممسموحلي احجي عن لسانه.

طلعت للباب الدنيا بارده حيل واني بطرگ التراك .. بـ الباب الخارجي السياره واكفه والحارس الي شفته اول مره لما اجانه للبيت وتعاركت ويا .. شفته !!!!!!

حسيت نفسي البارحا عشت هذيج اللحظات .. ادموعي تجري وابتسمت ، الشخص الي كان سبب انزعاجي وعصبيتي اول ما شفته خلاني ابتسم واني بعز حزني !

صعدت السياره واخذني للبيت ذبني وراح .. الله بيتنا ؟!!!

واخيراً رجعتلك ... رجعت؟؟؟

اي مو هو هذا الي ردتي؟!

بخطوات متردده وروح مكسوره دكيت بابنا طلعتلي مريه كبيره بالعمر!!

شافت حالي وملابسي الظاهر ظنتني مگديه .. كالتلي لحظه انتظريني هنا.. راح وعافتني اني فتحت الباب ودخلت للبيت اجتي هي تركض ومعصبه ..

_شكو دخلتي مو كلتلج انتظري بالباب.

سدن .. انتي منو؟!!

المريه .. وانتي شعليج اتسألين اتفضلي اطلعي بره .

سدن .. بسام وين؟!!

المريه .. شتردين منه؟!

سدن .. درت وجهي عنها وصحت بصوت عالي .. بسام .. بساااام .. بسااااااااااام.

نزل بسام يركض من الدرج من شكله واضح كان نايم .. من شافني اتفاجئ

بسام .. سدن اشوكت اجيتي؟!

سدن .. بصوت حاد ونبره غاضبه .. منو هذي؟!

بسام .. هذي خيريه شغاله تجي تنظف البيت وتروح .. خيريه هذي سدن اختي.

خيريه .. ياا اهلاً وسهلاً ست سدن اني اسفه اعذريني والله ماعرفتج اسفه اسفه مو قصدي .

بسام .. خلص خيريه روحي انتي .

التفت ع سدن .. اشلونج سدن شخبارج طبعاً متدرين اشكد مشتاقلج اتكولين صارلج سنه متزوجه مو شهر ، واني اسف مسألت عليج بس والله الشركه كلها واكعه براسي وانتي تعرفين الشغل وتعب.

سدن .. راحت المنظفه وبقينا اني واخويه العزيز .. اتخيلو يسألني عن احوالي ويبررلي عدم سؤاله عليه .. لا ويكولي مشتاقلج؟!!!!

شهر كامل واسبوع ونص يوم انخطفت من بيته ميعرف اني وين ما وين .. شصارلي مصار ..

الاخ الي باعني علمود صفقه ...!

الاخ الي اتفق ويا شخص غريب ع اخته..!

الاخ الي وافق انخطف واتزوج غصب..!

واكف بكل حقارت ديسألني اشلوني؟!!!!!!

اكو العن من هيج بشر ؟؟

اكو اقسى واجحد من هيج اخ ؟!!

ااااااااااااااووووووووووف يا گلبي مااعرف ابجي ع يا جرح وانسى يا وجع.

مجاوبته بس باوعتله من فوك ليجوه بنظره احتقار، درت وجهي ومشيت صعدت لغرفتي ..؟

يا ترى غرفتي بعدها موجوده لو شمرها مثل ما شمرني من البيت؟!

گلبي كان مكسور وروحي مكسوره .. الشي الوحيد السليم بيه جسمي .. مع ذلك كنت اجر بي جر.

رحت الغرفتي لكيتها ع حطتها مثل ما عفتها بس نظيفه .. دخلت وسديت الباب!!

وكفت بنص الغرفه وصفنت ع فراشي .. فراشي الي كان دائماً ملجأي وحظن الام بالنسبه الي .. بلا اي ردة تفكير مشيت بخطوات مهزوزه مددت ع فراشي ونمت ................

ماادري اشكد الوقت الي نمته لان مشفت الساعه لما نمت بس تقريباً بالوحده او الثنتين الظهر .. فزيت الساعه ب10 بالليل!!

الالم زايد جسمي .. راسي بي قنبله على وشك الانفجار وعيوني تحرگني!

كمت للحمام فتحت المي دافي ع حراره اشويه ووكفت جوا .. بقى يصب ع راسي واني واكفه مااحرك ساكن اريد الالم الي ديلتهمني يخف الوجع الي بگلبي يختفي ..

ماكو اي نتيجه نفس حالتي .. غسلت وطلعت بدلت ملابسي ونزلت جوه اشوفلي حبايه علاج للوجع الي دااحسه.

البيت هدووووء محد بي رحت للمطبخ كل الاغراض مكانهم متغير .. شكلها المنظفه الجديده ممخليه شي ع حاله!

رحت لغرفة بابا الي ينام بيها من يجينا دورت بالمجرات لكيت علاج مسكن الآام اخذته وطلعت .. واني دااطلع شفت اوراق ع الميز !

گلبت بيهم لكيت من ظمنهم عقد زواج!!!

بأسم الزوج كريم الاحمد .. والزوجه نهاد سامي!!!!!!!!!

ههههههههههههه متزوج ابويه؟؟؟؟؟؟؟

ممعقوله هذولي يكونون اهلي .. مستحيل اني بنتهم ... باعوني بكل سهوله ويكملون حياتهم ولا كأني كنت في يوم من الايام موجوده ولا كأني دمهم ولحمهم شهالقسوه ؟؟

شمرت العقد بالكاع وطلعت رحت للمطبخ شربت الحبايه وصعدت الغرفتي ماادري شسوي يعني اخاف كنت عايزه نار تحركني اكثر ، كملتها بخبر الزواج هذا؟!

لازم احجي ويا ع الاقل اباركله لسيد كريم المحترم .. اتذكرت موبايلي !!!

كلبت الغرفه گلب واني ادور ع الموبايل ماكو .. دنكت جوه السرير لكيته واكع بالكاع..!

جريته من جوه وفتحته مبي شحن طافي .. خليته ع الشحن وكعدت انتظر الى ان اشتغل

اول مفتحته استلمتني المسجات طوط وطووط .. اغلب المسجات من صديقتي براء وبنات وياي بالجامعه

ومحمود راسلي مسجات يسأل ع احوالي .. وليش مدااداوم!

هذي التجربه الي عشتها اثبتتلي انو الغريب ارحم واحسن من اهلك دمك ولحمك.

الباقي من الشركه ومسج واحد من بابا !!

عباره عن اشعار مكالمه فائته !!

مكلف روحه والله .. يا ترى لويش اتصل بيه .. يريد يتطمن عليه اشلوني بعد الاختطاف لو يمكن بالغلط اتصل؟!

اتجاهلت الكل وطلعت قائمة الاسماء دورت ع اسمه .... بابا حبيبي!

صفنت عليه ... اشون ابدي بالكلام؟!

شنو اكوله ؟!

حيباركلي ع زواجي لو ياخذ خاطري بطلاكي؟؟

بعد حسره و وجع فضيعين ضغط ع اتصال .. رنه رنتين جاوبني!!

اجاني صوته المستغرب .. او بالاحرى مصدوم اكيد ممتوقع يشوف رقمي مره ثانيه بما انه يعرف كولش زين اني وين وشصارلي!

بقيت ساكته محجيت شي بس اسمع صوته وهو يكول .. الوو بابا سدن خذي انتي؟!!!!!!!!!!!!!

بابا..!

اول مره احس هذي الكلمه متخصني .. وهذا الشخص مو اب الي!

نزلت دمعتي وسديت الخط مكدرت احجي روحي خذلتني وضعفت.. رغم كل الغضب الي بداخلي تجاهه منطقت بحرف واحد.

رجعت دخلت بنوبة بكاء بس هذي المره اتعس من سابقاتها .. كلمة بابا صحت بيه ذكريات حاولت بكل الطرق انساها من اول يوم عرف انهم باعوني .

مأكلت شي رجعت نمت .. النوم كان ملاذي الوحيد الي اهرب له كل مره.

كعدت الصبح سمعت صوت جوه وبالبيت وحركه .. بخطوات بطيئه ونحول عظيم نزلت .. لكيت بسام كاعد يتريك ويخابر والمنظفه دتشتغل يمه.

نزلت بوجهي للمطبخ هو شافني كال

بسام ..صباح الخير سدن!!

سدن .. اتجاهلته تماماً وكملت طريقي .. اجتي ورايه خيريه كالت اسويلج ريوك !!

كلتلها اني اسوي شكراً.

سويتلي كلاص حليب بالجاي شربته وصعدت اتصلت ببراء!!

مصدكت من سمعت صوتي ع بالها صايرلي شي لو ميته .. مليون سؤال سألتني كلتلها الحجي مو بالتلفون اشوفج وتعرفين كولشي.. انتي وين؟!

براء .. اني بالدوام تعالي هنا ونطلع بمكان لحالنا ونحجي ع راحتنا.

سدن .. ماشي مسافة الطريق واكون يمج .

براء .. هاا .. يعني صدوك حتجين؟!!!

سدن .. اي حجي اشبيج مستغربه؟!!

براء .. لاا بس ممتوقعه اتوافقين مباشره بالعاده اتكولين بسام ولازم اذن من بسام واخرها متجين.

سدن .. روحي خلي ابدل هم يلا الحك قبل ليخلص الدوام.

سديته وحضرت روحي بدلت وجهزت .. اتصلت بمحمود مطولت ويا بالكلام كلتله تجيني لبيتنا ضروري هسه وسديت الخط.

نزلت بوجهي للباب شافني بسام دااطلع صاح بيه ..

بسام .. بصوت حاد ... سدن ؟!

سدن .. ملتفتت له ع وكفتي جاوبته .. نعم؟!!

بسام .. وين رايحه والمن كلتي قبل لتطلعين؟!!

سدن .. التفتت له بعدم اهتمام .. وبنظرة استهزاء جاوبته .. رايحه لدوامي وبصفتك شنو استأذن منك قبل لا اطلع؟!!

بسام .. احترمي نفسج واحجي عدل .. اني اخوج.

سدن .. هههههههه .. اخويه؟!!

صح النوم عزيزي .. اختك روح شوف وين والمن ، بعتها اني ماعندي لا اخ ولا اهل.

اخويه واحد عار ومات واهلي صارت عدهم ازمه فلوس وباعوني .. واني اشتريت حريتي بنفسي محد اله سلطه عليه.

بسام .. . لا السانج طولان ع بالي نورالدين يأدبج بس الظاهر طلع عينج بالزايد . .. لج اليوم راسج اكسره واعلمج منو العار.

سدن .. .. اجه بتجاهي بغضب راد يضربني .. اني بسرعه جريت الموبايل وطلعت رقم نورالدين رفعت الموبايل كدامه .. بمجرد ما شاف الاسم وكف بمكانه.

هه جبان اسم يخوفه .. بصوت حاد .. كلمه وحده ما الك عليه عندي رجال وهو يحاسبني .. واذا فكرت مجرد تفكير تتدخل بحياتي صدكني اخلي يخفيك من الوجود وميرفلي جفن عليك.

بسام .. ماشي سدن ما راح احاجيج هسه بس اني اعرف اشلون احجي ويا زوجج واخلي يأدبج.

سدن .. هه اشك راح تحجي ويا .. لانو انت اسمه يرعبك.

طلعت وسديت الباب .. كنت مرعوبه وخايفه من بسام ، ممستوعبه اشون حجيت ويا بهالطريقه .. رغم كل الي صار ما انسى شنو بسام .

اجه محمود كلتله اخذني للكليه .. بالطريق حاول يعتذر مني ع الي سوا لما انطى الموبايل النور وخلا يتصل منه!

وكال انو هو ماكان يعرف حيسوي هشكل او يصير الي صار.

محجيت ويا .. ولا لمته لان اعرف خوفه من نورالدين .. حاله حال الكل واولهم اخويه العار.

وصلت للكليه لكيت براء تنتظرني حظنتني وبقت تبجي .. اني هم بجيت وارتاحيت من شفتها .. الصديقه مرات تكون اخت.

بعد سلام طويل مليان اشتياق ودموع .. كعدنا انسولف !

حجيتلها كولشي صار وسط صدمتها ودهشتها من الي دتسمعه مني .. حتى حسيتها مدااتصدك الي دااكوله.

مر الوقت بسرعه كالتلي امشي انروح للقسم وانشوف دوامج اشون .. يخلوج ترجعين لا؟!

اخذتها ورحنا لكيت كولشي مرتب ومحلول .. منطيني اجازه مرضيه لمدة شهر واسبوع!

كالولي ماكو اي مشكله وتكدرين من باجر اتداومين!!

ارتاحيت حيل وفرحت .. خسرت كولشي ع الاقل اربح شهادتي واعتمد ع نفسي .

خلص الدوام ورجعت للبيت .. ملكيت احد البيت فارغ كالعاده .. صعدت بدلت واتغديت ... اني ماخذه المحاضرات من براء كعدت اقرا.

حاولت اركز بدراستي واقرا مااكدر .. بالي كان ميفكر غير بي!

جبرت نفسي اتناسى واقرا .. افكاري نزلت ع شكل ادموع بللت كتبي!

الى متى ابقى ابجي ...!

شمرت الكتب ونمت .. شردت للنوم من الافكار الي دتاكل براسي .. بقيت ع هالحال اشهر بحالها .. مرت عليه سنين!

كل يوم اكعد ابجي .. كل يوم يزيد الندم .. كل يوم اشتاقله اكثر من اليوم الي قبله!

بسام بعد اخر نقاش بينا محجه وياي ابد .. مااعرف اذا كان سبب سكوته نور الدين لو الحاله الي ديشوفني بيها .. مرات احسه ينقهر عليه لان كلما يشوفني ابجي اشوف بعيونه دموع!

رغم كنت اتحاشى ابجي وهو موجود بس مرات تصدف يجي ويلكاني ابجي!

مكان يسألني ولا يحاول يعرف شنو الي يبجيني او لويش داابجي .. لان اني قطعت كل كلام ويا من اخر كلام بينا.

اجه اليوم الي گلبي طك من صبره .. متحملت بعد جريت الموبايل ورسلتله مسج .. كتبتله بي اريد اشوفك مااتحمل بعد.

رسلته وبقيت انتظر رد .. بس ماكووو .. حتى تقرير تسليم موصلني!

كلت يمكن مغلق جهازه ومشافها .. انتظرت وانتظرت وانتظرت .. بس ماكو اي رد.

مره ثانيه انهاريت وصلت لمرحله حتى الهوا يصعب عليه اتنفسه .. بلا تفكير اتصلت بي!

طلعلي الرقم المطلوب غير داخل بالخدمه!!

رجعت حاولت اكثر من مليون مره اتصل بي .. وبكل مره كانت النتيجه وحده.

مع هذا ما بطلت ولا كطعت الامل .. بقيت كل يوم اتصل كل يوم ..

ع هالحال مرت 8 اشهر .. تعبت حيل حتى شكلي اتغير !

براء كانت تحجي عليه وتلومني ع الي دااسوي بنفسي .. بس مكنت اسمعلها ولا حتى اهتم بكلامها .. اكوللها مبيه شي وحتحسن .. بس ماكو شي يتغير لان الي بداخلي دياكل بيه بهدوء بلا مااحد يعرف!

بابا اجه مرتين للبيت حاول يلتقي بيه ويحاجيني اكثر من مره .. بس اني رفضت حتى اشوفه.

بعد عدة محاولات ياأسه حاولها .. استسلم ورجع سافر .. بس هالمره بلا رجعه لان ما اجه بعد.

اخر فتره ضعفت حيل بحيث حتى اعظام جسمي برزت من كد النحول الي صابني!

بدت اتصير عندي حالات اغماء يعني واني واكفه افقد الوعي واوكع!

مراجعت ولا رحت دكتور غير مره بالكليه اتخربطت وبراء اخذتني للمستشفى !

كالولي حالتي كولش تعبانه لازمني تغذيه وراحه...!

ضربت كلام الدكتور بالحايط وبقيت ع نفس وضعي .. الى ان فد يوم فقدت كل ذرة عقل بيه .. وصلت لمرحله اشوف صورته بوجوه الناس .. كل ما يمر من يمي شخص المحه هو!!

خلص يمكن انجنيت رسمي .. هذا مو حب هذا وسواس ... طلعت للدوام الصبح وصلني محمود وراح .. رحت البراء كلتلها اني رايحه اشوف نور!!

براء .. سدن انتي اكيد اتخبلتي وين ترحين بهذا وضعج وشكو رايحتله اصلاً؟!

سدن .. مااكدر بعد براء فدوه افهمي .. دااموت بدونه والله دااموت ومحد يدري بيه.

براء .. سد انتي الي دتدمرين حالج لما متأمله يرجعلج .. نورالدين ميريدج خلص انسي طلعي من حياتج وعيشي.

سدن .. ظلت براء تحجي عليه وتقنعني انسى واشيل هذي السالفه من بالي .. كلتلها لتعبين اني مجايه اخذ رأيج اجيت حتى خاف اتأخر وبسام يتصل بيج كوليله راحت لزوجها لان اني حاظره رقمه.

عفتها تحجي وطلعت .. اخذت سياره من يم الجامعه ورحت للشركه مالته!!

وصلت خاويه بس جسد هزيل يمشي بخطوات مهزوزه .. دخلت للرسيبشن سألت عنه .. كالولي مموجود وروحي .. بين قوسين طردوني.

طلعت كعدت بالباب .. ساعات مرت عليه واني انتظره .. صارت الدنيا العصر وهو ماكووو .... كطعت الامل انو اشوفه .. بس متحركت من مكاني گلبي بقى مصر انو انتظره....!

خليت راسي بين رجليه وكعدت ... ما احس الا واحد واكف ع راسي ويحاجيني!!

رفعت راسي لكيته رجال عمره يجي بالـ30 تقريباً ضخم وملامحه تخوف .. باوعتله بأستغراب ومحجيت !

الشخص .. انتي سدن ؟!

سدن .. اتفاجأت من وين يعرف اسمي هذا .. أومأتله براسي بمعنى اي .. وبصوت متعب همس سألته ..

_منو انت ومن وين تعرف اسمي؟!

الشخص .. اني حرس الباشا ودزني حتى اخذج اله يريد يشوفج.

سدن .. مثل المختنك وانطو جرعة اوكسجين .. فزيت من مكاني بلا تفكير معقوله .. نورالدين دزك الي ؟!!

الشخص .. اي نعم واذا تسمحين تتفضلين ويايه ع السريع لان الباشا طلب منتأخر.

سدن .. اي اي امشينا يلا .. اخذت جنطتي ومااعرف من وين اجاني الحماس والقوه .. مشيت ويا بلا تفكير بمجرد مسمعت اسمه انعمى گلبي ونسيت كولشي.. اخذني لسياره مظلله واكفه ع الشارع صعدني واتحركت السياره ......!

نورالدين .. بعد كلامي وياها طلعت .. للشركه لكيت الاجتماع مفضوض ، اصحاب الشركات ديطلعون وعلامات الانزعاج واضحه ع ملامحهم ....!

مكنت بحاله تسمحلي اهتم لأنزعاج احد ، براكين العالم كلها دتغلي بداخلي .. اتجاهلتهم بلا اي توضيح ورحت المكتبي .. واني داامشي وكف كدامي صاحب الصفقه الي كلتلكم عليه من قبل اسمه مالك رشيد !!!!!!

باوعتله بنفاذ صبر ..

مالك .. سيد نورالدين انت تعرف وقتي اشكد ثمين بس ضيعته وحضرت للاجتماع .. حضرتك اشلون تتجرأ ومتحضر؟!

نورالدين .. بعدم اهتمام .. احضر او ما احضر شي ميخصك.

مالك .. اهاا .. انت كد كلامك هذا؟!

نورالدين .. الاجتماع انلغى والصفقه هم اعتبرها ملغيه.

مالك .. بغضب .. مو بكيفك تنلغي و انتبه لكلامك لا اخليك تندم عليه .

نورالدين .. بهدوء .. اطلع بره.

مالك .. ماشي بس و اذا ما هدمت شركتك هذي ع راسك ونهيتك ما اكون مالك رشيد.

نورالدين .. البراكين الي بداخلي كالت هذا حدي .. انفجرت بوجهه بلمح البصر سددتله ضربه ع وجهه وكعت اسنونه بحلكه.

جريته وسددت الثانيه والثالثه .. وكع بالكاع وانهاليت عليه ضرب طلعت حرگة گلبي انتقمت بي .. اجو الحرس مالته يركضون والحرس مالتي خلصو مني بقدرة قادر.

كلتلهم تاخذون جلبكم وتنگلعون واذا عتب واحد منكم لهنا ادفنه بأرضه .. كل هذا يصير كدام انظار الجميع موظفين ، رجال اعمال ، حرس .

اخذو وراحو .. بس اني واثق مراح يعدي الي صار ع خير .. مالك رشيد عباره عن مجرم ميهمه اي شي ... !

ولا اني يهمني شي شنو ممكن يسوي يقتلني؟!!

يا ريييييييت ع الاقل يخلصني من العذاب الي دااعيشه .

دخلت الشركه غسلت وطلعت .. تعبان من كل شي بالدنيا .. تعبان حتى من روحي .

كنت محتاج ارتاح .. محتاج انام .. بس مااكدر ارجع للبيت .. خفت اروح واشوفها دتطلع من حياتي واضعف!

او يمكن اموت .. اي لان الروح من اتغادر جسدها يموت .

ركبت سيارتي وطلعت لبيت رشا بوجهي .. وصلتلها الدنيا الظهر صعدت لشقتها دكيت الباب طلعتلي!!

اتفاجأت من شافتني خليت ايدي ع حلكي بمعنى اشش .. كلتلها اريد بس انام !

رشا اهلها بالخارج عايشي وهي تشتغل هنا لذلك هي عايشه لحالها .

هي هم محجت شي راحت كدامي فتحتلي باب الغرفه ، شمرت روحي ع فراشها ونمت.

اول مخليت راسي ع المخده بدت الاحداث والافكار تهجم ع عقلي .. جسمي كان محتاج انام ارتاح .. بس عقلي رفض الراحه .. كنت احس جزء مني راح .. گلبي مينبض .. حاولت اهدأ بكل الطرق .. بقيت اتگلب وابعد الافكار بس ابت الا ان تغلبني ... كتمت انفاسي بالمخده بلكي اموت بلكي تطلع روحي واخلص .. غضبي وقهري وكل الي احس بي اتجمع بعيوني !!

نزلت من الفراش الكاع خليت راسي و ........... بجيت.

كرهت نفسي لعنت گلبي الي ديضعفني .. بجيت بحركه ....!

(عندما يبكي الرجال فأعلم ان الهموم فاقت الجبال)

ما كنت ادري بنفسي دااصيح بصوت عالي الا لما فتحت الباب رشا ودخلت ..!

اجتي كعدت يمي وبدت اتهديني .. اتقربت مني رادت تحضني دفعتها بقوه .. ما كنت حاس ع روحي !

ع الاغلب اتأذت لما دفعتها بس مع ذلك مبينت مهتميت الها لان كنت فاقد اعصابي .. حاولت تتقربلي مره ثانيه اتظاهرت بالقوه وبصوت هادئ كلتلها .. اطلعي .

استسهلت هدوئي ومطلعت .. صحت بيها بصوت عالي .. اطلعيييييييي برررررررره.

ارتعبت من عندي لدرجه قبل لا اكمل جملتي انهزمت.

ساعات مرت كنت بحالة انهيار تام نايم ع الكاع والحزن اتمكن مني .. الشخص الي يكتم بداخله وميبين ضعفه بسهوله لما ينهار يطلع كل الي كاتمه الى ان ينتهي.

احساس بالفراغ اتداخل ويا احساس بالارهاق .. رفعت نفسي عن الكاع بصعوبه ارتكيت ع السرير!

راسي يريد ينفجر وروحي تنازع حتى تتركني وتهرب من الالم الي ديحرك كل ذره بيه.

نمت بقهري .. مااعرف اشكد نمت بس الدنيا بعدها نهار ..

اخذت الجاكيت وطلعت من الغرفه لكيت رشا نايمه ع التخم بالصاله مالتها ..

مكعدتها كافي الي اتحملته مني وهي ما الها ذنب ولا مجبوره تتحمل اكثر .. طلعت بوجهي للبيت ملكيت احد بس سمعت ابن يمان يبجي وصوت امه تسكت بي!

دخلت الغرفتي ملكيتها .......!

وكفت اتخيل حركاتها ، نومتها ، مشيتها ، .. عطرها ؟!

اخذتني رجليه للمكان الي كانت تنام بي ع التخم .. جريت غطاها خليته ع وجهي عطرها بعده بي .... بمجرد شميت ريحتها غفيت.

مرت حياتي بدونها جحيم .. بس ما كنت ابين اي شي لاحد .. اواجه الناس بوجه مرتاح وهادئ ولما اختلي بروحي انهار.

يمان الوحيد الي يعرف كلشي عن الي صار ، وهو الوحيد الي وكف وياي وحاول يطلعني من الي اني بي.

كنت اخلص النهار اركض .. سفر اجتماعات ، طلعات ، الهي نفسي بأي شي وبالليل ع فراشي اصارع ذكراها حتى انام.

مشاكل الشغل زادت خصوصاً مالك الي بدا يحاربني من صدك ، اتعرضت لحوادث كثير واعرف هو كان سببهم .. بس كنت اطلع سالم منها كل مره !

يمكن لان كنت اتمنى اموت واخلص من عذابي الموت ما اخذني .. بس لما اتمسكت بالحياه .... !

المهم ..

مرت الاشهر عليه دهووور .. هي مكنت اشوفها بس اخبارها تجيني كل يوم بيوم

وين راحت شنو سوت وين طلعت اشوكت رجعت .. كنت مراقبها خوفاً عليها ، لان مالك خلاني ادخل حالة انذار اهلي ميطلعون الا حرس وحمايه ، شخص مجرم و واصل محد يكدرله.

مكنت خايف منه شخصياً لان ادري بي جبان بس كنت خايف من غدره لانه معروف شخص نذل وغدار.. اذا يعادي شخص الت ينهي يلا يرتاح!

واني لانو كنت قوي بالسوك مكدر يدمرني من هذا الجانب فأختار طريق الانتقام .. يحرگلي گلبي .

لذلك حمايتها دخلت ضمن اولوياتي .. صح محد يعرف اني متزوج بس مالك ميخفى عليه شي ، عاجلاً او اجلاً راح يكتشف الموضوع وبما انو هي بعيده عني مو تحت حمايتي راح تكون طعم سهل بالنسبه اله.

بيوم من الايام كاعد بالبيت داانتعشى ورن موبايلي .. باوعت للاسم بسام!!

غريبه شعنده هذا يتصل بيه؟!

سويته سايلنت وعفته يرن .. بس بقى يلح بأتصاله قلقني!

جاوبته ...

بسام .. بصوت قلق .. مرحبا باشا اسف ع الازعاج بس اريد اسأل ع سدن اليوم تجي للبيت لو تبات يمك حتى اذا ترجع للبيت ما اطلع.

نورالدين .. بصوت حاد .. ليش هي وين ؟!

بسام .. غير يمكم؟!!!

نورالدين .. شدتحجي انت؟!!!!!

شنووو يمنا منو كالك يمنا ، من اشوكت هذا الحجي؟!

بسام .. بأرتباك .. والله باشا اليوم راحت للدوام ومرجعت اتصلت عليها مغلق ، فخابرت ع صديقتها كالتلي انو هي رايحتلك للشركه.

نورالدين .. احس اعصابي كلها ارتخت .. ما خطر ببالي غير مالك الگلب.

سديت الموبايل وطلعت بسرعه .. اجه وراي يمان يركض يريد يفهم شنو السالفه!!

كلتله ماعندي وقت لازم اطلع هسه .. كال مااعوفك اجي وياك .. مخليته لان محد يبقى بالبيت والدنيا الليل كلتله ابقى يم ابنك ومرتك واني شنو يصير انطيك خبر.

طلعت بوجهي للشركه خابرت ع زيد كلتله اتجيب زلمك وتجيني للشركه هسه .. وخابرلي فلان وفلان .. كم واحد مقربين من مالك.

وصلت للشركه الساعه ب11 بالليل لكيت زيد والزلم ينتظروني .. فهمتم الموضوع وكل واحد دزيته لجهه .. شركات مالك بيته .. مخازنه اي شي اي شي يخصه اريدها تتراقب ، النمله اذت دخلت لو طلعت تنطوني خبر.

واتفقت ويا معارفه المقربين يسحبو من خلال الكلام ويعرفون اذا سدن عنده لو لا!

الكل راح لواجبه وبقيت اني الوب .. دمي احسه يغلي .. والافكار غزتني .. ها اذاها .. ها ضربها .. ها اتقربلها .. ها لمسها ..!

ويا كل فكره تخطر ببالي اخسر من عمري عمر...

بقيت للصبح اتصل واجمع المعلومات والاخبار .. منمت كاعد بالمكتب وبس ادخن !

احس روحي عاجز مااكدر اسوي شي ... الساعه بال7 الصبح رن موبايلي رقم غريب!!

ع بالي واحد من الحرس عرف شي .. ريت بسرعه واذا بصوت خطف روحيييييي حاجاني!!!!!!!!!!

هذا صوت سدن تبجي!!!

كل ذره بروحي صارت جمر .. اغلي غليان وگلبي يرجف خوف عليها .. ردت احجي وياها ، اهديها .. بس صوتها اختفى بسرعه واجاني صوت اللعين مالك...

مالك .. بنبره ساخره .. اشلونه الباشا ان شاء الله زين!!

نورالدين .. بصوت غاضب .. لك شسويتلها ليش تبجي شسويتلهااااااا ؟؟

مالك .. على كيفك باشتنا ترى احنا نكرم الضيف لتخاف لحد الان ممسوي شي بس ما اوعدك راح اكدر الزم نفسي اكثر كدام جمالها .

نورالدين .. بصوت اشبه الرعد .. والخلقك اذا لمست شعره وحده منها دمك اشربه وانت تعرفني زين.

مالك .. هاهاها .. هديلي حالك واسمعني زين .. اذا حاب اترك الحلوه اتروح لحال سبيلها وما اقطع انفاسها للابد سوي الي اكلك عليه وبلا اي نقاش.

نورالدين ..كتمت غضبي وبصوت حاد من بين اسناني .. احسابك وياي تاخذه مني هي ما الها ذنب والي اتريده اسوي حتى لو تاخذ روحي بالمقابل اني موافق.

مالك .. وهو كذلك .. اني اريد روحك .

نورالدين .. تمام روحي الك بس اتركها.

مالك .. راح ادزلك العنوان ربع ساعه انت يمي ، دقيقه وحده اذا تأخرت ... اعتبرها ودعت.

ولتحاول تتذاكى وتخبر الشرطه لو تجيب واحد وياك .. اقل خطأ راح يكلفك حياتها.

نورالدين .. تمام .. تمام اجي الحالي .. دز العنوان واني جايك.

اخذت السويج وطلعت حتى مسدسي ما اخذته .. صعدت السياره وصلني مسج بالعنوان طلعت بوجهي ومكلت الاحد ..... بكل سرعتي اسوق بس اريد اوصل الثواني الي اتمر دقايق بالنسبه الي سنين !

اقل من الربع ساعه وصلت للمكان .. عباره عن مخازن مهجوره وظلمه .. نزلت من السياره لكيت اثنين واكفين كدامي .. كالو امشي ويانا ناخذك للريس!!

مكنت خايف من الموت ولا خايف ع نفسي .. كل خوفي كان عليها لا يسوولها شي .

فتشوني ورحت وياهم دخلنا المخزن كبير عباره عن قاعه فارغه .. بوسطها كرسي كاعده عليه سدن!!!!!!!!!

اول ما لمحتها .. اول ما عيني وكعت عليها .. حسيت انفاسي اختفت .. گلبي بعد مينبض!!

عيونها كانت معصوبه ومدنكه راسها بهدوء .. بصوت خافت ونبره متلاشيه رددت اسمها بهمس ... س .. د .. ن.........

ردت اركض بتجاها واذا بمسدس اتخلى براسي!!

التفتت لكيته مالك ..

واكف بكشخته وجكارته بأيده .. ملامح انتصار ع وجهه ومبتسم!

مالك .. بصوت واثق .. كلتلك راح ادفع ثمن فعلتك وضربتك الي.

نورالدين .. بحده .. سويت الي اتريده واجيت .. اطلق سراحها خليها تروح!!

مالك .. واني عند كلمتي .. راح اطلق سراحها بس بعد ما تشوفك وانت دتموت كدامها...!

نورالدين .. اتحركت بتجاهه بغضب ردت اضربه بس الاثنين الي واكفين ورايه لزموني ... بقيت اصارعهم بس مكدرت افلت من قبضتهم.

مالك .. هههه .. لطالما كنت معجب بشخصيتك وذكائك .. بس هالمره اثبتتلي انك غبي لما صدكت حتركها اتروح بسهوله.

نورالدين .. بغضب ... ماااااالكككككك ... خليها اتروح احسنلك .. واتذكر كلامي الي كلته الك.

مالك .. اي كلام ؟!

قصدك بخصوص انك تشرب من دمي اذا لمستها .....؟!!

هههههههه ليش انت تعتقد راح تطلع حي منا؟!

ثمن الضربه الي سددتها الي وجرأتك الزايده راح تدفع ثمنها روحك .. حتى تصير عبره لكل الي يفكر يتحدى مالك رشيد لو يعصيني!

نورالدين .. بأبتسامه غاضبه ونظره مظلمه .. نصيحه الم تنهزم من هسه وتنقذ روحك لان اذا اذا لزمتك محد راح يخلصك مني .. غير الموت.

مالك .. بهذا وضعك وتهدد .. يلا اني واكف كدامك اقتلني .. يلا شوفني شجاعتك ...

نورالدين .. صفنت بوجهه ... وفكرت ... اذا اتهورت هسه وتصرفت اي تصرف راح اخسر روحي!!

لان مستحيل اطلع منا سالم .. اذا مو هو يقتلني الحرس مالته يفرغون اسلحتهم بجسمي ...!

مو مهم اني خليني اموت .. بس هي اشلون تطلع منا اذا متت .. اخاف يقتلوها؟!

ااااااااه يا ربي الروح روحك وانت الي تاخذها .. ما معترض اخذ روحي بس خلي سدن تعيش.

يا ربي ارجووووووووك اعتبر روحي مقابل لروحها .. بأسمك العظيم يا رب ساعدني ..!

غمضت عيني وققرت اسوي الي ابالي .. سمعت صوت حركه ورايه والباب انفتح بقوه!!

هم اندارو يشوفون شنو الي ديصير واني استغليت الوضع ضربت الي بصفي بقوه ع خاصرته وسحبت المسدس من حزام الثاني ... بكل سرعتي وكل ما املك من قوه .. ركضت بتجاه مالك خليت المسدس براسه وضغطت الزناد!!!!!!!!!!!

وكع مالك كدامي بالكاع غركان بدمه ... هذا كل الي شفته قبل لا اوكع ع راسي و ادخل بظلام دامس .... بس قبلها صوت الطلق حرك سمعي حرك!!!!!!!!!!!

سدن .. صعدت بالسياره شفت اثنين كاعدين كدامي شكلهم ميطمن!!

هذولي منو اني شايفه الحرس والموظفين كلهم مالت نور .. هذولي اول مره اشوفهم!!

بدا الشك يدخل لگلبي .. قررت انزل .. اتظاهرت انو واكع مني شي!!

كلتله اوكف عفيه نسيت الهويه مالتي بمكاني يمكن وكعت مني بلا ماادري.

خزرني بنظره اتخوف .. وكالي اسكتي ما اريد اي صوت ولتتحركين.

هنا اني اتأكدت هذولي مو من طرف نورالدين .. وديكذبون عليه!!

دفعتهم وكمت اصيح .. صيحت بعلو صوتي .. ما حسيت غير بضربه ع راسي فقدتني الوعي!

كعدت بعدها لكيت نفسي بمكان مهجور .. ما بي ضوه غير گلوب خافت و واحد كاعد كدامي ع كرسي!!

من وجهه مبين مو ادمي ولا وحقير!

ايديه ورجليناتي مربوطه مكدرت احركهم .. راسي يوجعني من الضربه الي اكلتها عليه .. مااكدر اسوي شي سكتت وانتظرت الي كدامي يحجي .. وفعلاً نطق !

كالي انو هو ميريد مني شي وانو اني مجرد طعم لا اكثر وبس تجي الفريسه راح يخلي سبيلي بس لازم اسوي الي يكولي عليه؟؟

مفهمت من كلامه شي ، شنو طعم شنو فريسه .. ومنو هذا الي لازم يجي يلا يتركوني اروح؟!

معقوله يقصد بسام؟؟؟؟

اييي اكيد بسام مسويله مصيبه من مصايبه .. بس لا اشون يجي اخاف يموتوو لا يا ربي لا تخلي يجي اني مااريد حياتي خليني اموت بس بسام خطيه يا ربي اترجااااك كون ميجي.

بقيت ابجي كل ظني المقصود بسام وحيموت كدامي .. بس لما اتصل هذا الشخص بالموبايل وفتح السبيكر!!!!

سمعت صوت خلا روحي تشتعل نار .. خلا گلبي يرجف مثل السعفه .. حسيت نفسي دااحترك.

نورالدين!!!!!!!!!!!!!!

صوتي وكلامي طلع على شكل دموع وشهكات بجي ... معقوله بعد كل هذا العذاب والبعد اشوفه ميت كدامي!

بجيت بجيت ردت اكوله لتجي اصيح واحذره ليجي ..... بس الايد الي كانت ع حلكي كتمت كلماتي!

بعد ما سمعت كلامه وانه حيدفع روحه بس حتى ينقذني اتهسترت .. فقدت العقل من صدوك .. كمت اصيح مثل المخابيل لتجييييييي .. لتجييييييي... هذا الي كان يخابر اتوجه ناحيتي بغضب وضربني راشدي بقوه محسيت بشي بعد.

لما صحيت مره ثانيه .. كنت نايمه بغرفة نور الدين!!!!!!!!!!!!!!!!!!!!!!!!!!!!!

معقوله هذا الي دااشوفه .. اكيد اني متت وهذي الجنه!

رفعت روحي بصعوبه .. ونزلت من الفراش دخت واختل توازني ... ردت اوكع!!!

مااحسيت غير ايد لزمتني وشخص حظني بخفه ... !

غمضت بقوه اريد بس اتأكد انو الي دااشوفه مووووو حلم!!!

فتحت عيوني بهدوء و باوعتله .........واذا بي الكون كوله واكف كدامي!!!!!!!!!!!!!!!!!!!

مدااستوعب الي ديصير .. الكلام اختفى ولساني امعقد من شفته ... محجيت شي كل الي سويته ثبتت نظري عليه وسكتت.

نورالدين .. بعد ما وكعت بالكاع مدريت شصار غير لما حسيت بأيد دتصحي بيه بقوه وصوت بعيد ينده بأسمي!!!

اشويه شويه بديت اصحى ... شفت بس صوره سمعي كان مشوش ... وكنت اردد بصوت شبه مختفي ... سدن .. سدن .. هذي الكلمه الوحيده الي شغلتلي بالي!!

ركزت نظري ع الشخص الي كدامي كان يمان!!!

يمان كاعد يم راسي ويصحي بيه .. فزيت من غيبوبتي لكيت نفسي امدد بصالة بيتنا .. ويمي يمان ومحمود ... بسام و زيد!!

كنت بعدني ممستعيد تركيزي .. ردت اكوم مخلوني .. كالو ابقى لتتحرك كو زين عليك!

ألم فضيع بخاصرتي .. باوعت لبطني مضمده .. وقميصي مشكوك ..!

عفت كل هذا وأول شي سألتهم عنه بخوف ... سدن وين؟!!

يمان .. سدن ما بيها شيييي لتخاف .. بس هي نايمه لان الدكتورمن فحصها كال لازم تبقى نايمه لانها مرهقه ومتتحمل تحتاج راحه لذلك انطاها مهدئ حتى تنام .. اطمئن كلشي ما بيها .

نورالدين .. ميخالف لازم اكوم اشوفها ... رفعت نفسي دااكوم صار ضغط ع بطني وكعت ع القنفه ..!

زيد .. بابا لتكوم مو زين عليك .. جرحك بعده جديد ..

نورالدين .. شنو هذا الجرح اشوكت انضربت اخر شي اتذكره من وكعت مبيه شي.

يمان .. هو انت انضربت وبعدها وكعت بس لانك فقدت الوعي محسيت بشي .. والحمدلله الدكتور شافه وكال انه سطحي خيطه وكال كم يوم وتصير زين.

نورالدين .. زين انتو اشلون عرفتو اني وين وشلون اندليتو المكان؟!

يمان .. اني منطاني گلبي اعوفك وحدك فمن طلعت انت اتصلت بمحمود ولحكتك ، بقينا واكفين يم الشركه ننتظرك وين تروح ولما طلعت لحكناك ومن شفنا زلم مالك اخذوك اتصلت بزيد والحرس لحكونا ... وبعدين هجمنا عليهم ومن حسن حظنا مالك ما كان ويا هواي حرس بس هو و اربعه الظاهر كان معتبرك صيد سهل.

نورالدين .. انت ليش غبي اني مو كلتلك ابقى بالبيت لو صاير عليك شي شنو اسوي بيها حياتي؟!

يمان .. هاي بدال متكول شكراً اخويه البطل نقذت حياتي ، اكلي غبي!!

يلا عاذرك هسه عود من اتطيب نتفاهم.

بسام .. يلا اني صار اترخص .. الحمدلله ع سلامتك باشا.

محمود .. واني هم اترخص ومشافى باشا.

زيد .. اخذوني وياكم اني هم عندي شغل .

نورالدين .. مشكورين شباب تعبناكم ويانه.

_لا باشا انت تأمر واحنا بالخدمه.

نورالدين .. اريد اصعد لغرفتي انام ارتاح.

يمان .. هاا .. اي .. ايي امشي اصعدك.

نورالدين .. لك شنو اتساعدني طفل كدامك .. اخاف مصدك روحك نقذتني وصرت بطل.

يمان .. ههههههه مقبوله منك ابو النور ، بس اني بطل غصباً عليك.

نورالدين .. ولي من وجهي لي ... عفته وصعدت الغرفتي ع كيف الجرح مثل الوخز احس بي يحركني .. فتحت الباب واذا الكاها كداميييييييي!!!!!

راح الألم راح الوجع .. راح التعب .. طار النوم !

هدووووووووووء اتغلغل لأعماق روحي واثلج گلبي .. كانت مثل الدايخه مشت خطوتين و رادت توكع .. اتجاهلت اصابتي ورحتلها بسرعه حظنتها .. !

من شافتني ع بالك شبح كدامها صفنت بوجهي مثل الهايمه بشي ساحرها!!

اتأملت وجهها بهدووء عيونها التعبانه .. شفايفها الذبلانه .. بلا اي مقدمات اخذت منها بوسه!!!

هنا هي عاد فزت من سرحانها ورجعت للواقع!

سدن .. باسني واني كل جسمي حسيته كزبر .. بالبدايه استسلمت لشعوري بس بعدين اتذكرت هو طلكني!!

بعدته عنه بخفه و وخرت عنه .. بهدوء كلتله .. شنو هاي؟!

نورالدين .. بوسه شنو يعني.

سدن .. واشون اتبوسني .

نورالدين .. وليش ما ابوسج انتي زوجتي.

سدن .. احنا متطلكين.

نورالدين .. اتقربت منها بهدووووء هي رجعت ليورا الى ان وصلت يمها ميفصلنا شي ... بصوت هادئ وابتسامه كلتلها ..

_كلمة طالق وحدها متكفي انو تبعدني عنج .. انتي الي.

سدن .. هذا ميغير انو احنا متطلكييييين.

نورالدين .. لا ممتطلكين الطلاك اله شروط واحكام .. واذا كل رجال يكول المرته طالك معناها طلكها بعد محد يبقى متزوج.

سدن .. يعني شنوو .. اني بعدني ع ذمتك؟!!

نورالدين .. اييي بعدج ع ذمتي وام جهالي .

سدن .. هم وينهم جهالك؟!!

نورالدين .. هسه راح انسويهم ........... اتقربت منها وصار الي صار (اطلعو بره عوفوهم وحدهم 😂 🙈)

اكتمل زواجنا بهذاك اليوم .. رغم جرحه والالم الي كان يحس بي بس اصر انو نسوي اطفالنا بهذا اليوم ... ههههههه مجنون.

حياتي ويا نور ما بدت من اليوم الي شفته بي .... لا من اليوم الي رجعنا بي من الموت!

انولد حبنا من جديد ... بعدها بأسبوع سوالي عرس اقل ما يقال عنه اسطوري ... سافرنا شهر عسل الاماكن بحياتي ممتصوره اشوفها ... يمان اخذ مرته وسافرو الامريكا ...

بابا ملتقيت بي غير لما اجه بعرسي اضطريت اسلم عليه .. رغم كولشي يبقى هو ابويه!

بسام اتزوج وحده مثله وكل يوم مشاكله وياها من ورا سوالفه المكسره .. واني قررت ابعدهم عن حياتي علاقتي بيهم اقتصرت ع المناسبات .. لان بصراحا ثقتي بيهم انعدمت .

كملت دراستي وصرت محاميه الحمدللله حالياً اني المحامي الرسمي لمجموعه شركات نورالدين ..

حبيبي عوضني عن كولشي بالدنيا ... اليوم مرت السنه الاولى ع زواجنا .... وكانت مفاجئتي لنور انو حيجينا نونو بالطريق!!!!!!

مااحجيلكم الفرحه الي فرحها لان صارلنا سنه من اتزوجنا وماكوو اطفال .. خفت اكو خلل بالموضوع بس الحمدلله الله فرحني ولما عرفت مكلتله الا بيوم عيد زواجنا.

لهنا تنتهي قصتي بالنسبه الكم ... بس بالنسبه الي استوها ابدت ❤️

انتي كلج مالتي مو مال ابوج

وامج اصلاً جابتج لكليبي 💜

انتهت قصة نور وسدن ... اتمنى اتكون عجبتكم وتركت بيكم ولو شي بسيط استفدتو منه.

اسفه ع التأخير واسفه ع الانتظار بس انتوو تعرفون الظرووووف

تحياتي الكم وخالص شكري على دعمكم وكلامكم الطيب ❤️

انتظروني بقصه جديده بس بعد ما انزلها الا لما اكملها

حبي واحترامي للجميييييييييع 💜🙏🏻

الاميره الموسويه👑

رواية ﮼صفقة ﮼عشك الفصل الثالث وثلاثون 33 - بقلم ﮼الاميره،الموسويه 👑

رواية ﮼صفقة ﮼عشك — الفصل 33 — بقلم ﮼الاميره،الموسويه 👑

مرحبا حبابي الحلويييين اشونكم مشتاقوووون كووومه 🤗

عندي خبر البعض يعرفه والبعض جديد عليه

قبل فتره كولش طويله نزلت قصه اسمها (انا قبل ان التقيك) وبالغلط انحذف منها كم بارت واضطريت االغي نشرها .

فأني عدلت عليها ، ضفت بعض الاضافات و كتبت البارتات النقص يعني كملتها الحمدلله وقررت ارجع انزلها

هي كامله وكل يوم حنزل بارت منها فألي حابه تقراها اتضيفها بالمكتبه وان شاء الله تعجبكم

ملاحظه (القصه حقيقيه ) 😍🙋🏻‍♀️

هذي صورة القصه 👇🏻👇🏻😻

واريد تشجيييييع ع البارت الاول 🙏🏻 يعني صوتوو حبابات حتى يصيرلي واهس يمكن انزللكم القصه كولها 😅🤭

﮼صفقة ﮼عشك الفصل الرابع وثلاثون 34 - بقلم ﮼الاميره،الموسويه

رواية ﮼صفقة ﮼عشك — الفصل 34 — بقلم ﮼الاميره،الموسويه 👑