رواية سجينة الروح الفصل الحادي عشر 11 - بقلم ريام هادي

سجينة الروح
للكاتبة Reem
البارت العاشر

شفت شيب بشبابي من وكت ليش
وشفت حسره وشفت اه وشفت ويل
ما شايف شمس بس غيم دنياي
شوكت يطلع نهار ويرحل الليل؟
خلص عمري عذاب بوسط آهات
تعب حيلي وبعد ما بيه كل حيل

ودق : طلعت من البيت مردت اشوف امي تتزوج من حامد اختنكت وخفت اذا ابقى انهار وأذي ماما بكلامي طلعت اتمشى وامشي ورجلي اخذتني للشط اني مواصله لهذا المكان قبل اخاف اوصله بس من كثر ممخنوكه ومااعرف وين انطي وجهي مشيت لحد محسيت روحي واكفه على الشط جان الشهر الثامن اب 2006 والجو حار ورطوبه بس حطيت رجلي بالمي بيه بروده طيبه شفت حجاره جبيره قريبه من الجرف كعدت عليها ومددت رجلي ردت بس اهدأ اباوع على المي شون يمشي سريع وبارد واكول ليش محياتنا هيج تصير تمشي بدون مشاكل منو السبب بكل الي كاعد يصير هاي مو حياتنا المفروض هسه احنا بغداد مو هنا لا هاي حياتنا والناس الي هنا نتوالم وياهم

وماما الي ربطت روحها برجال متحبه واني وخواتي وتحكمهم بينا وصل مرحله حتى بمستقبلنا يتحكمون ليش وشنو ذنبنا كل هذا يصير بينا وخلصت الثالث شنو الي راح يصير بعدها يجوز ميخلونه نكمل دراسه كولشي اتوقع منهم بس ماما راح تقبل بهذا الشى
بقيت افكر ساعات واحس عقلي وكف من التفكير كل الاسئله الي بعقلي مالها جواب احس روحي بسجن ومفاتيح السجن بيد ناس مترحم وامي تنازلت وقبلت ننسجن كلنا وهي سلمت المفاتيح حريتنا لحامد وامه
باوعت الدنيا غربت والشمس بدت تنزل جان المنظر يجنن وبنفس الوقت احس حتى الجو حزين ويايه ومااشوف غير جنه ورايه

جنه : كاعده مهزومه لان امج اتزوجت ابويه
ودق : اهوو شجابج ورايه شتريدين
جنه : انتم الي شتريدون من عدنا شفتي شون امج باكت ابويه من امي
ودق : ليش احد كلج ابوج جنطه وتبوكها امي
جنه : احترمي نفسج ولو شون اطلعين محترمه اذا امج حراميه وبواكت زلم انتي شطلعين

ودق : وكفت على حيلي تعالي لج شو انتي متستحين جاي وتتهجمين على امي على شنو كله من وره ابوج هو الي حطها بهيج موقف ومكان متلومين امي وتتجاوزين روحي كولي لابوج الظالم الي ميخاف الله لتتزوج يمامه وعوفها بحالها ومن باجر نرجع لبغداد ونخلص من شكولكم
جنه : انتن گل البله بيجن حيايه صدگ وگالت امي حيايه وتلعبن على الزلم لعب وامج تحومي على ابوي حتى يتزوجها وفوكاها من وراها امي عافت البيت عافته للساقطات

ودق : لج گلبه من الساقط ياساقطه وكلمه مني وكلمه منها مااشوف غير تدفعني بالشط واني مااعرف اسبح فرفحت روحي واعيط اريد احد ينقذني كلت بهاي اللحظه انتهت حياتي وراها فتحت عيني لكيت مازن بوجهي والكل داير مدايري وبالكاع مدده

مازن : هاي الايام گلها مشغول منا شغلي بالمستشفى ومنا اريد اسوي عياده والوقت كله ممتواجد بالبيت ارجع لو المغرب لو بليل اكل وانام وارجع اطلع من الصبح
واليوم ردت ارجع من وكت علمود ابويه حامد لان اليوم زواجه من ام ودق وهم اخذني الشغل بس گلت لازم ارجع اوكت من كل يوم لخاطره رجعت وسألت عنه كالو ويه زوجته گلت خلي اشوف الغراض الي بالسياره وانزلهم شفت ايه طلعت من البيت

أيه : شونك دكتور
مازن : هلو ايوته وليش دكتور ليش مو مازن
أيه : غير ابن عمي واتباهه بيه دكتور واحلى دكتور
مازن : هههههه والله بس انتي رافعه معنوياتي
أيه : الله عليك سني يوجعني عود شوفه شبيه
مازن : واني اكول ليش هيج داكه ناعم ثاري وراج مصلحه
أيه : هههههه غير حتى تشوف سنوني وها ماانطيك ولا فلس
مازن : ههههه مااريد لان اكيد اني وراها الي راح انطي
أيه : ليش تنطي
مازن : اكيد راح ادزيني للاسواق اجيب حلويات والفلوس مني لان محد خرب سنونج غير الحلويات مالتي
أيه : شفت تعترف انت سبب ضياع سنوني الحلوات لازم انت تعالجهم واجبك هذا
مازن : تامرين ست ايه بس تعالي كوليلي انتي وين جنتي رايحه بهذا الوقت
أيه : كلت اشوف ودق وينها من الصبح مبينت
مازن : انتي صدوك تحجين شنو من الصبح مبينت وين ولت (راحت)
أيه : جانت حيل مقهوره لان ماما تزوجت وطلعت كالت راح اتمشى وهسه باوعت للوقت صار مغرب وهي ماكو كلت اطلع اشوف وينها

مازن : بله من كل عقلج طالعه وحدج ادورين عليها وهاي ام المصايب وين راحت من الصبح
أيه : ماادري اروح اشوفها واجي
مازن : وين شجنت احجي امشي رجعي واني ادور عليها
أيه : خلي اجي وياك عفيه ضجت من الغرفه وهم اندور عليها
مازن : امشينا
ونمشي وماكو بس فهميني اختج ليش موعليج فقيره وهادئه
أيه : كل واحد وطبعه بس والله ودق گلبها طيب بس هي عنوديه
مازن : اختج ابليس مو مثلها تموت على الخباثه وكحه نار
أيه : ههههههه والله ظالمها
وصلنا قريب الشط واحنا نسولف ونضحك ومنشوف من بعيد غير جنه تدفع ودق بالشط عطت ليش جنه
جنه : هي وكعت مو انه
مازن : دفعتها وجيتت وره ودق والروج قوي سحبنا سوه
أيه : اني شفت اختي راح تغرك وفوكاها مازن مكعد يكدر يلزمها تخبلت ركضت للبيت اصيحهم لازم ينقذوهم واعيط الحكوو

فضيلة : دخيلك ربي شبيج يمه ايه
أيه : ابجي واحجي عمه ودق غركت
فضيلة : يمه من صخام الصخمني شني غركت
أيه : عمه جنه دفعتها ومازن شمر نفسه وراها ويمكن اثنينهم غركو
فضيلة : يبووو راحو الوليدات وركضت على حامد كسرت الباب
حامد : من انعل اهلكم هذا وگتكم شبيكم فضيلة : الحك خويه ودق غركت وجنه الي دفعتها بالشط ومازن يحاول ينجدها (ينقذها) والروج خذاها وخذاه
يمامه : يمه بنتي وطفرت وجان يلزمني حامد
حامد : شنهي وين موليه
يمامه : عوفني اروح اشوف بنتي
حامد : لاطلعين هيچ استري روحچ
يمامه : لبست عبايه اسلاميه وشال وحامد ركض قبلي

مازن : كوه كدرت الزمها واسحبها وشلتها وطلعتها بس كميه الرعب الي عشته عجيب خفت لتموت واخسرها لأول مره اعرف اني احبها لودق وحب موو عادي شلتها وگلبي ينبض يمكن الف نبضه وهي بحضني ولا حس ولانفس نومتها بالكاع وخرت شعرها من وجهه واضرب على وجهه ماكو يارب دخيلك لتموتها مااكدر اخسرها ودق ودق

حامد : شنهي ولك شصار بويه
مازن : احجي وارجف من الخوف يابه غركت ومالها حس
يمامه : يمه بنتي راحت مني وكمت الطم وردت اجيت عليها لزمني حامد
حامد : وكفي خلي مازن يسعفها
يمامه : بنتي ماتت ماتت
حامد : اشوفن يمامه تعيط وتملخ بخدودها وانه تسودنت حسيت بلحظه راح تموت ويوكف گلبها بلا مااحس خذيتها لحضني ردت اهديها
اسكتي وليرحم والديج البت عايشه اصبري

يمامه : اشوف بنتي مدده بالكاع وماكو نفس بيها فقدت حسيت بلحظه راح اموت وراها وماادري شصار بيه بس ابجي واعيط فاقده
مازن : ماكو غير حل واني اباوع وارجف بس ماعندي غير حًل اذا ابقى متردد راح تموت لان شربت هوايه مي وجان انزل لحلكها واسوي قبلة الحياه بهاي اللحظه ردت بس انقذها واضرب على صدرها وماكو استجابه تخبلت كلت خسرتها
يمامه : ودق ماما لتموتيني عليج واملخ بروحي واكمز اريد بنتي تصحى كولشي ماكو لزمني حامد حيل وحضني واني عيني على بنتي واكمز واصيح ربي اخذني وعيشها كله ولا بناتي اموت اذا وحده بيها انمست بورده يارب بجاه حبيبك محمد اترجاك رجعلي بنتي لتختبر صبري بيها مااتحمل

مازن : بقيت اكرر قبله الحياه واضرب على صدرها لحد ماكحت وطلع المي من حلكها ورجعت تتنفس هنا رجعت ليوره وكعدت بالكاع من التعب والخوف والقلق الي عشته واني اشوف الانسانه الي احبها تموت كدامي باوعت للسما الحمدلله ربي الف الْحٍمَدٍ للـّہ والشكر رجعت
ودق : فتحت عيوني بس بتثاقل وجسمي وصدري يوجعوني حتى حجي مااكدر احجي
يمامه : ركضت على ودق وحضنتها وابجي
الحمدلله ربي رجعتلي بنتي الف الْحٍمَدٍ للـّہ وابجي
حامد : الحمدلله على سلامتج بنتي ودق
مازن : لازم ناخذها ترتاح وضعها بعده ممستقر

حامد : انه اشيلنها ماتكدر تمشي وشلتها وهي بس عيونها تتحرك
مازن : تمنيت اني اشيلها واحطها بصدري من كثر مخفت عليها وامشي وره ابويه حامد وعيوني عليها وهي بس ساكته كل شويه تفتح وتغمض عيونها واجه منير يركض
ولكم خير شبيها ودق
أيه : غركت ومازن نقذها
منير : ياستار ياربي وهسه شونها غزاله شونج احجي
مازن : غزاله شنو جوز منها وخلي البنيه تاخذ نفس
منير : شبيك مازن غير اشوفها شون صارت وانت هم الحمدلله على سلامتك روح بدل هدومك كلها مي
مازن : رايح وانت شويه ثگل
منير : هو اني شمسوي
الحجية جميله: يمه وليداتنا جان راحوا
فضيلة : لا يمه الْحٍمَدٍ للـّہ ربج ستر ودفع البلا
الحجية جميله: چا هيه شتسودن هناك بهاي المغربيه
فضيلة :يمه البت كاعده وساكته بس جنه وكعتها
الحجية جميله: جنه وينها انشديها ليه اريدن افتهم شجرالها

حامد : وصلت ودق لحجرتها اكعدي يمها واذا احتاجت دكتور صيحيلي حتى اوديها
يمامه : ماشي كمت بدلت الها وهي بس ساكته وكوه تحجي وابوس بيها يمه جان خسرتها لبنتي
همسه : ماما ليش ودق تلعب بالمي مو تتمرض

يمامه : ماما هموسه اخذي اللعابه مالتج وروحي اكعدي هناك والعبي اختج تعبانه مو وكتها
همسه : اني هم بعد العب بالمي حلو بارد
يمامه : اياج توصلين للشط اموتج افتهمتي
همسه : لعد بس ودق تلعب
يمامه : ودق لعبت وكعت بالشط وجان ماتت لان الشط يموت لتوصلين اله ديري بالج
همسه : لا مااريد اموت اروح العب ويه بنتي احسن
أيه : ماما ليش ودق ساكته متحجي
يمامه : ماما شويه تعبانه ليضل بالج
بدلت الها وباوعت على ايه احجيلي شصار
أيه : والله ماما ماادري بس جنا اني ومازن اندور عليها وصلنا قريب الشط ومنشوف غير جنه بنت عمو حامد تدفع ودق وكعت وركض مازن وجيت وراها واني من حلات روحي ركض واجيتكم

يمامه : صرت نار تعالي اكعدي يم اختج هسه اجه
وبوجهي ركض لحامد
حامد : هاا بويه بشري شون صارت البت
يمامه : بتي جان ماتت بسبب بتك شيخ واريد تاخذلي حقي
حامد : حسج يمامه
يمامه : ياصوت ياحس اليوم اگلب الدنيا عليها يعني متشوف لوما الله ومازن جان هسه ميته يعني الله يقبلها محمد يقبلها بنتي تموت بسبب غيره بنتك وكرهه لبنات عمها
حامد : انتي افتهمتي الشغله لو هيج بس تتهجمين

يمامه : لا اريد افهم ولا شى جنه وين اليوم اذا متاخذلي حق بنتي اني اخذه
حامد : حسج يمامه تره وصلت حدها وياج گتلج انه احجي ويه جنه روحي للبت
يمامه : كدامي تعاقبها ماارتاح ولا يبرد گلبي اله طيح حظها لجنه
الحجية جميله: حسج عالي يمرت الشيخ هاا شيخ ليش مريتك هيج حسها
يمامه : عمه بنتي رادت تموت وانتم حايرين بصوتي العالي

الحجية جميله: بتج عايشه لاتخربطين بالكلام وابو جنه هو الي يحجي وياها انتي روحي لحجرتج وحسج مااهيسه تره انه ساكته اليوم لان فضيله حاطه يمين علي واله جان بهاي العوجيه على راسج افتحن فتح شون حسج يعلى هنا بعدنا بسم الله بالطبك وحسج على چا اذ مر اسبوع الكاج لازم الفشك وتكتلين بينا

يمامه : فدوه عمه افهميني جنه رادت تموت بنتي شون تريدين اتعامل بهدوء يعني لو ودق هي الي مسويه هيج مجان الدنيا انكلبت يمكن حتى تعلكوها بالبنكه
حامد : چان علكتها لودق يوم معلى صوتها على جدتها تتذكرين لو نسيتي
يمامه : يعني شتقصد مراح تعاقب جنه
حامد : هذا شى راد الي انتي روحي للبت واهتمي بيها ومالج دخل بالباقي
يمامه : اني ادري تفرقون واعرف هي بنتك الوحيده بس صير حقاني

حامد :(بصوت عالي رج البيت رج ) ادخلي للبت وحيري بيها وكافي تخربطين بالكلام
يمامه : باوعت عليه صاك سنونه وعيونه نار منها وايده حاصره السبحه حيل ادري اذا احجي بعد كلمه يمكن يضربني عفته ومشيت واني مقهوره من التفرقه بنتي رادت تموت وهمه ولا يمهم

حامد : فضيله صيحيلي جنه
الحجية جميله: هاي ام الدگايك احليمه سودنت البت وربك حضرنه چا راحت البت بيها يحميد

حامد : اعرف يمه اعرف
الحجية جميله: تلاحگ لبتك يحميد لاتصير نسخه من احليمان
ام المصايب وبمچان ماعدنا فرد طرگاعه تصير طركاعتين
حامد : كله منچ يمه موهاي بت عمك شياله همك خوش شياله شالت شكو طرگاعه شكو طلابه وحطها على راسي وهاي تاليها سودنت البت وولت
الحجية جميله: چا شمالك عليه انه.شنهي انه قاريه الفنجان وعرفنهه اندري بيهه هيچ تطلع وتعال ليه انت ضبها شوي
حامد : شضب منها وهيه مخبله ولو اگطعها تگول بعد اسكتي يمه هاي احلام تجلط الميت
الحجية جميله: يمه على كيفك ويه نفسك توك عريس
حامد : ياعريس ضل عريس الليله تصخمت
الحجية جميله: موأكلك وجه البومه چا هي كوه

جنه : امر بويه
الحجية جميله: يمسودنه چا موتي البت وزينتي روسنه يالمصخمه لوصاير بيها شى ابوچ مايخلصج مني هذا شعرج احرگه گدامچ واگطع من لحمچ
جنه : جده شمالچ أوياي نسيتي انه حبيبتج جنه وادافعين لودق
الحجية جميله: حبتچ حٌٓــُــُّيٌـِهٌٓ من كون تگيرتي چاهي غير ابنية ابني مثلچ اشتعلت امهاتچن سممت روسچن وگمتن تكمزن مثل الشواذي ولا بيچن شوية عگل (عقل)
يله ولي ويه ابوچ يبعد امك جرها من شعرها وربيها لوبيه حيل چا كسرت العوچيه على راسها هذا المصفح
حامد : تعاي وراي
وخذيته لحجرتي

تعاي اگعدي واحچيلي شنهي الحصل
جنه : (تبچي من الخوف) بويه هي طاحت مو انه معليه انه
حامد : سمعيني يجنه انت بنيتي الوحيده وعزيزه گلبي ودوم اگلچ لاتمشين بشور امچ انه اعرفن هي امچ بس أمچ مسودنه مو عاگله انتي مو مثلها انتي شيخه بت شيوخ والعيبه مايصير تطلع منچ
جنه : امي مالها دخل هي غلطت علي وگالت عليك ظالم
حامد : شوداچ ليها البت گاعده على الشط
جنه : بويه انه اكرها امها خذتك مني ومن امي
حامد : هذا موحچيچ انه اعرفن هذا حچي احلام شوفي يجنه وحگ محبتج البگلبي اذا غلطتي بعد بيدي اعلگنچ انه ماكسرت بيچ گدامهم حتى لاتگولين ابوي تغير علي وذلاي يم مرته بس السويتيه تنگص بيها رگاب البت چا ماتت وين عگلج انه بتي هيچ تتسودن
جنه : بويه انه
حامد : حسج مااهيسه يجنه انه الانتظر يوم يوم تكبرين وتصيرين الشيخه جنه هيچ يطلع منچ ياعيبه العيبه كسرتيني وانه مامكسور بت الشيخ حامد تسوي هيچ
جنه : گمت ابچي بويه لاتزعل مني كلهم يهون زعلهم ولا انت تعرف بيه مااتحملن زعلك
حامد : انهراختاضيت منچ موچثير وعقابج مااريدن اشوف وجهچ لحد مايبرد گلبي منچ وامچ تحرم عليچ لحد ماتحطين عگلچ براسچ وتردين بنتي الثگيله الينحلف براسها وعگلها موانه ال انزل راسي والسبه بتي
جنه : بويه اطگني گطعني راضيه بس لاتحرمني منك
انه اگدر اكسر راسچ گدامهن بس مايطيني گلبي اكسر بتي واذلنها بس وحگ هو علي اذا عدتيهه ياجنه راح انسى انتي بتي وگدام الگل اطگچ وهسه تروحين وتطلبين السماح وتعتذرين للبت وامها گدامي يله

جنه : انه جنه بت الشيخ حامد وحيدته عمري هسه ١٥ سنه تربيت وابوي دوم يگلي انتي وحيدتي وجنتي والشيخه اللازم تصير بعد جميله ابوي اعتبرنه الهوا الاشمنه دوم اشوفنه زلمه معدل مايهاب احد (يخاف) والكل تحترمه وتقدره بس امي رغم حبي ليها بس هي تخبلني وتحچي براسي على ابوي ومن سمعت ابوي تزوج تخبلت وامي تگلي بعد مايحبچ ويحب بنات الحيه مرت عمي وانه تسودنت گلت خسرت ابوي وتخبلت على ودق بس من زعل ابوي حسيت الدنيا ظلمت مااريدن اخسرنه هذا رويحتي ودنياي ابوي كلش طيب وياي حيل ومايوم عز عليه شى دوم الاريدنه يصير
ومافرگ بيني وبين ولد عمي ودوم يگلي انتي مثل أولاد عمچ حزام وظهر ليه واليوم شفت بعينه شون اذيته تندمت ومااعرفن شون اراضي ابوي
انه شكلي عادي مابي شى مميز بت طويله طولي ١٦٩ ورشيقه شعري لونه تمري طويل دوم مسويته ضفيره وعيوني جوزيات وحنطيه معاني حلوه بس بنات عمي احلى مني انه من فتحت عيني وانه اشوفن مازن گدامي يرف گلبي عليه رغم تربى ويايه بس ماگدرت بيوم احسبنه اخوي احس گلبي ينفض من يشوفه بس رد لينا وهو متغير احس عيونه تدور على ودق انه احساسي مايخطي ابن عمي يحب ودق وهذا الشى دمرني ومحد يحس بيه ولا اگدر اگولن لأحد ماعدي اخت واشكيلها ولاعدي امي تسمعني امي ملتهيه بالطلايب وگالت فلانه وحچت علانه حتى من تروح لبيت جدي تسودن نسوان خوالي وتگلبها بيهن وماترد للدار اله والدنيا محروگه هناك شسوي هاي امي بعد

من تعاركت ويه ودق مقصدت ادفعها بس صارت بعد وخفت لاتموت وابتلي بيها من غيرتي وحبي لأبوي سويت هيچ وفقدت اعصابي ودفعتها ورادت تموت البت بس مازن تدخل وشفته شون يرجف عليها تأكدت يحبها وهنا انكسر گلبي واحس روحي خسرت گلشي حنان ابويه وحبي الوحيد وامي الي تركتني وراحت ضليت ابجي وانوح المن اشكي وشفت ابوي هسه زعل عليه وهذا اكبر عقاب اعتبره لان ابويه روحي وماارضى يزعل عليه

طلعت من حجرت ابوي ورحت لحجرت بنات عمي دگيت الباب
يمامه : تفضل
انتي شجابچ اطلعي بره
جنه : انه اجيت اعتذر لبت عمي واحبن على راسها
يمامه : لو صاير بيها شى بيدي اذبحچ
جنه : حگچ عليه مرت ابوي اعتذر
تقربت منها وبست راس ودق وكانت نايمه
يمامه : قبل مطلعين ابتعدي عن بناتي مااريدچ تتقربين منهن
جنه : تامرين
يمامه : اباوع على جنه هادئه وعيونها كلهن دموع شنو الي سواه الها حامد واجتي هيج مكسوره حتى مكدرت اقسى عليها بعد شگد جنت اتمنى الزمها اگطعها بس من شفتها هيج صفره وتبچي ومكسوره بردت منها
حضنت ودق وابوس بيها واحمد رِّبًـــ♡̨ـــٍْيٌٓ لان رجعتلي سالمه وجان ينفتح الباب جميله وماادراك ماجميله

الحجية جميله: شعدچ هنا يله ولي لحجرتچ زلمتچ ناطرچ
يمامه : عمه شون اعوف بنتي وهي تعبانه
الحجية جميله: شبيها جنها العافيه ردي لحجرتچ اليوم اول ليله الچ بنياتج حديثات ماعليهن شى
يمامه : فدوه عمه بس اليوم اقلها اطئمن عليها بعدها اخاف تصخن يصير بيها شى وماكو احد يمهن وايه وهمسه صغار ميفتهمن شى

الحجية جميله: انه اخلي فضيله تبات يمهن يله ردي لحامد ولاتعاندين لو اله اعلي حسي وماتعرفين شسوي بيج خليني ساكته من اشتعلت فضيله كله منها حطت اليمين مااحچي اليوم عليكم واله چا عرفت شعملت بيچ يله ردي ولاتخليني اتسودن عليچ
يمامه : كمت من ودق ورحت ودمعتي بعيني حتى بهاي تدخل شلون ضيم ياربي بست البنات وطلعت

حامد : تمددت على الچربايه وراسي يريد يطك وچان تدخل طيرتي
يمامه : دخلت للغرفه شفت حامد متمدد وحاط ايده على عيونه استحيت دخلت بدون ماادك الباب
وكتله
اعذرني دخلت بدون ماادك الباب عبالي بعدك بره
حامد : هههههههه
يمامه : ليش تضحك
حامد : چانسيتي انتي هسه مرتي
يمامه : هااا اي مرتك بس
حامد : لابس ولا مس تعاي ليه شبيج ليش هيچ وجهچ تعاي
يمامه : رحت اتمشى بهدوء وكعدت بصفه وهو متمدد وسألني بكل هدوء
حامد : شبيچ اسمعنچ
يمامه : عمه جميله
شبيها امي
حامد : گالت روحي لرجلچ ولتباتين يم البنات

حامد : وشنهي الغلط الگالته الحجيه غير مكانچ يمي
يمامه : انداريت عليه وكتله والدمعه بعيني مو ودق بعدها تعبانه شون اعوفها ومصار ساعه من الحادث متعرف لحد هسه ارجف وميته خوف عليها
حامد : وليش رديتي هنا
يمامه : مودااگولك عمه گامت تحجي عليه ولو باقيه معانده والله تضربني بالعوجيه
حامد : هههههه والله يايمه بعد بيتي غير تعرف وليدها مشعول شعل
يمامه : شون يعني
حامد : روحي لبنياتج بس الليله يمامه
يمامه : اي والله بس اليوم اطمن عليهن ومن باجر ارجع هنا انام
تعالي وسحبتها بهدوء وهي جمدت من حركتي وكظيت راسها وبستها من گصتها وغمضت عيني شميتها شم اوف ياريحتچ شگد تمنيت اشمج هيچ خلص عمري وانه انتظر المسنچ وانتي حلالي واشمنچ (احجيها بگلبي )وبستها

يمامه : تفاجات من حركته هذا الرجال راح يموتني مااعرفه مره قاسي مره حنين ردت الفعل الوحيده الي سويتها وره مباسني من گصتي وگفت على حيلي ومشيت وحتى منداريت وطلعت اركض لمحت الحجيه من بعيد طبيت ركض مره ثانيه للغرفه

حامد : هااا شنهي عجبتچ السالفه تعاي مستعد للصبح اشمنچ
يمامه : شگد خجلت من حچه هيچ وفوگاها يضحك
لا والله بس عمه اجتي وخفت تشوفني
حامد : ههههههه والله ياشيخه جميله صاگره الكل
يمامه : فدوه تعال ويايه انت گول الها بان قبلت انام يم بناتي
حامد : امشينا والله شكلچ يضحك جنچ طالبه مدرسه والحجيه المديره مالتچ وتتختلين منها
يمامه : والله ياشيخ مديره المدرسه متخوف بگد امك
حامد : هههههه يله امشينا

وطلعنا وجان تصير بوجهنا عمتي يبوو عليه
الحجية جميله: هااا يمه حميد شصابك تفتر
حامد : يمه انه شصابني لو انتي الي صايره مثل حارس الحدود محد يطلع ولا يطب اله ياخذ اذن منچ شنهي يايمه
الحجية جميله:يايايا من فلك صابها شگالتلك البومه عليه
يمامه : اني بومه
حامد : ههههههه شنهي تره البومه وجه يخبل لاتضوجين
يمامه : عمي بومه غراب بس خلي ابات يم بناتي
الحجية جميله: چا شنهي وتعوفين وليدي بليلة عرسه
حامد : يمه ياعرس واليرحم والديج عوفي البت تنام يم بنياتها روحي لحجرتهن ونامي تصبحين على خير

يمامه : اني بس هيچ كال حامد واني ركض لغرفه البنات وسديت الباب
الحجية جميله: ها يمه يحميد شنهي الجرالك
حامد : يمه والله كسرت گلبي حگها بتها چا راحت منها وشون اتگرب ليها وهي بهاي الحاله
الحجية جميله: يمه يمه من عياره النسوان شبيها وانت ضل گلبك رچيچ عليها (رقيق عليها) امده حظي
حامد : اروحن انام تعبت
الحجية جميله: من سوده بوجهچ يمامه كسرتي فرحت الوليد

حامد : يمه بسچ يرحم اهلچ هي على ذمتي هاي فرحتي وانه مرتاح بس لخاطر حميد ولدچ عوغچ منها لاتأذينها هاي رويحتي يمه
الحجية جميله: آخ منك يلساني اسكت احسن مااريد اكدرك بليل وانه محطوط علي يمين فضيله حلفتني بخوتك واله چا عرفت اردنك يبن بطني ياشيخ
حامد : هههه لازم احبن على راس فضيله من حطت اليمين عليچ چا شخلصنا
الحجية جميله: روح يمه نام ماضل شى ويأذن الفجر كلها چم ساعه ويخلص الحلفان وانه اعرف شحچي
حامد : ههههههه بست راسها تصبحين على خير يمه
الحجية جميله: يبعد امك وانت الخير گله

يمامه : دخلت بالغرفه ردت انزع موتتني الكلابيه ادور بالكنتور على الملابس ماكو ولا قطعه وين راحت ملابسي انداريت شفت ايه بعدها منايمه
ماما ايه مشفتي ملابسي شو ولا قطعه
أيه : ماما عمه فضيله اجتي لمت كل الملابس واخذتهم

يمامه : ماشي ماما نامي حبيبتي
طلعت ورحت لغرفه فضيله ودكيت الباب
فضيلة : تعالي خيه ادخلي تامرين محتاجه شى
يمامه : فدوه فضوله وين ملابسي ولاقطعه وايه كالت انتي شلتيهم كلهم
فضيلة : ياخيه مااعرفن شگلج الحجيه كالت اخذي ملابسها السود كلها وحرگيهن
يمامه : شنوو ليش
فضيلة : تخاف تردين تلبسيهن وهي ماتريد الاسود عليج تخاف على حامد عبن الاسود فگر ويجر وانتي صار سنين لابسته
چا مافكرتي تذبي

يمامه : والله الحجي بيني وبينج اني اصلاً ذابته بس من يجون ولدكم جنت البسه ومن اجيت هنا خفت اجي بملون وتكول امج ادور رجال وتستلمني
فضيلة : چا خيه اذا هيج ليش كلهن بس اسود چان جبتي كم گطعه ملونه
يمامه : ملحكت هلكدرت عليه جبته وعندي دشداشتين نوم بس جبتهم حتى من انام البسهم والباقي اسود
فضيلة : خيه بعد الحجيه كالت احركيهن وانه مااكدر ارد چلمتها
يمامه : الله يساعدج على امج بكولشي مدخله
فضيلة : ههههههه تره الحجيه طيبه بس صعبه وانتي اذا تريدين حياتج سهله كولي تامرين واسكتي تره تتعبين لاتعاندين
يمامه : اروح والله كريم احاول امشي وضعي والله يستر
يمامه : رجعت لغرفه البنات ولبست دشداشه لونها نيلي قصيره فوق الرگبه وكيمونه ونمت جنت حيل تعبانه يوم حيل متعب بكل تفاصيله

ودق : فتحت عيوني لكيت ماما حاضنتني يعني اني عايشه مميته كولشي مااذكر بس مازن وهو فوكايه وكله مي ومن شالني عمو حامد وحضن ماما ودموعها بستها من خدها وكمت على كيف
أيه : صباح الخير الحمدلله على سلامتج
ودق : الله يسلمج شصار البارحه
أيه : يووو اشكال الوان كولي شنو الي مصار
ودق : كولشي مااذكر

أيه : بس اهم حدث شفته واستفاديت منه هو قبله الحياة
ودق : شنوو
أيه : اني قريت بالعلوم عن قبله الحياه ومافهمت منها شى البارحه مازن سواها الج والله طلعت حلووه هههههه
ودق : عزه صدوك تحجين لو تتشاقين
أيه : هي مال شقه الولد انكطع نفسه وهو يسويلج وانتي مدده كل هذا ومحسيتي
ودق : ايا ناقص شون يلزم شفايفي
أيه : فوكاها فوك منقذج والله لو منه اله اعوفج غركانه واطوفين بالمي وياكلج السمج
ودق : أيه بداعت ماما صدوك سوالي قبله الحيااه

أيه : ههههههه شبعج قبل ابشرج يعني هسه شفايفج موو جدد مستخدمات
كمت وركعتها بالمخده وعطت طفرت ماما
يمامه : شكوو شكوو
ودق : ماما صدوك مازن سوالي قبله الحياه وباسني
يمامه : الحمدلله على سلامتج ماماتي تعالي بحضني
ودق : ماما فدوه احجي
أيه : كوليلها ماما مازن شبعها بوس
يمامه : أيه عيب هذا الحجي منين متعلمته متستحين
أيه : العفو ماما بس قابل دااكذب ههههه
ودق : ماما فدوه احجي

يمامه : ماماتي حبيبتي غير جان ينقذج انتي مشفتي وضعج لو ما الله ورحمته الواسعه ومازن واسعافاته جان هسه انتي ميته
ودق : خلي اموت بس ميلزمني مازن
أيه : يله على الجايات من تغركين اخلي يعوفج طايفه بالمي

ماما سكتي ايه فدووه
يمامه : ايوته روحي غسلي وكافي تحرگين گلب اختج بعدها تعبانه
أيه : اني شعليه احد كلها تغرك يله على الاقل استفاديت وشفت درس قبله الحياه عملي موبس نظري
ودق : ولج حقيره كافي
أيه : هههههه طالعه حياتي اروح اشوف ابن عمي الهمام بطل قبله الحياه اريده يفحص سني
ودق : عساه بالشلع وتضلين ولا سن
أيه : عادي اكوم اكول اريد بثبوثه(بسبوسه) ونثتله(نستله) حتى اصلاً النطق يصير احلى
ودق : هو هذا همج الاكل وبس
أيه : دلع كرشك وعيش حياتك هذا هدفي بالحياه ياام قبله
ودق : لج كاااااافي
أيه : ههههه خلي اروح لأبن عمي فديته

ودق : من احتركتي انتي وابن عمج
يمامه : ماما شبيج انتي ليش هيج عدائيه يعني الولد نقذج من الموت وتحجين عليه
ودق : مااحبهم مو بيدي والله وهذا مازن هو سبب كل الي صار لو ما هو حاجي على موضوع منتظر مجان هسه انتي متزوجه حامد وعايشين بهذا الجحيم

يمامه : استغفر الله زين والى متى تبقين هيج لازم تتقبلين الواقع بنتي
ودق : ماارتاح اله ارجع لبغداد ولحياتي القديمه مااريد ابقى هنا مخنوكه مدااتحمل الوضع

يمامه : كافي هسه ارتاحي وبعدين نسولف
ودق : اني رايحه اغسل
يمامه : ماما تره جنه اجتي واعتذرت وباستج وانتي نايمه
ودق : هاي بالذات حسابها بعدين ويايه
يمامه : ودق كافي لتخبليني وياج تره بديت اتعب من سوالفج
ودق : ليضل بالج خلي اكوم
وانتي ارجعي نامي اكيد تعبانه
يمامه : ميته تعب ونعسانه حيل بس لازم اكوم
ودق : نامي فد ساعه واني اكعدج
يمامه : اي والله لتعوفيني هوايه
ودق : لا ساعه واكعدج
تعالي بحضن امج افيييش ياگلبي شكد خفت عليج فدووه بداعتي ماما لتسوين مشاكل
ودق : الله كريم ماما نامي وبستها من خدها وطلعت

حامد : كعدت الصبح وسبحت ولبست دشداشتي والعكال وطلعت وعيوني تدور عليها ماكو
ودق : طلعت غسلت وشافتني عمه فضيله خطيه باستني كولش احبها فقيره وحبابه وبتها مالها صوت
وداامشي وجان يصير بوجهي حامد
حامد : هـاااا بويه ودق الحمدلله على سلامتج

ودق : الله يسلمك وباس راسي
حامد : شون صارت صحتج عساها بخير
ودق : الحمدلله من رخصتك
حامد : امج وينها
ودق : نايمه ليش
حامد : هـاااا لا ولاشى
عفته وطلعت بره يم عمه فضيله كعد تخبز وكعدت اكل خبز وجان تنجر الخبزه مني
منير : البارحه غركتي اليوم تاكلين خبز
ودق : هلو منير ليش اليغرك ويعيش لازم مياكل
منير : الحمدلله على سلامتج ضل بالي عليج
ودق : تسلم
منير : غزاله شونها صحتج
ودق : انت ليش متبطل تصيحلي غزاله
منير : لان انتي صدوك غزاله
ودق : هههه والله انت عليك سوالف

منير : تدرين حيل خفت عليج
ودق : ليش
منير : مااعرف من شفت عمي شايلج وكالو غركت انتهيت وتمنيت اني الي انقذج
ودق : ماشاء الله العائله كلها سوبر مان
منير : ليش
ودق : لا هيج المهم مشفت النتائج طلعت لا شو تأخرت مسمعت شى حتى اذا طلعت اخلي ماما تخابر بيت جدو ياخذون النتيجه مالتي
منير : اليوم مازن كال اروح لبغداد ويمر على مدرستي ومدرستج بلكت طالعه
ودق : اهووو هم مازن
منير : موزين منه لج انتي ليش هيج تكرهي
ودق : لان هو الي دمر حياتنا وجابنه لهنا بسببه
منير : والله عاشت ايده زين يسوي انتي شايفه الوضع هناك شون صاير كله قتل وتهجير وانتن اربع كيكات كاعدات بيت وحدچن شون تقبليها

ودق : بيت جدي يمنا
منير : يمعوده جدج رجال جبير وخالج براشدي يسلمجن للعصابه متسكتين
ودق : شوف هاي كلها حجج حتى تبررون جيتنا هنا اكبر غلط صار نقلتنا لهنا ولو يبقى اخر يوم بعمري اله ارجع لبغداد
منير : هسه اتزوجج واعيشج بغداد
ودق : بعد هذا مصدك روحه اتزوجه
منير : بنت عمي وانهي عليج وغصب اتزوجج واذا متقبلين اتزوج واعوفج بدون زواج هيج مزهريه

ودق : هلووو شوف منو الي راح يمشي بكلامكم
منير : نشوف يغزاله يله اكوم اروح لجماعتي محتاجه شى زوجتي المصون
ودق : ههههههه روح روح هم عاجبته نفسه
منير : يجي يوم وتصير بحضني غزال واشوفج شنوو منير باي يحلوه
ودق : ههههههه باي

حامد : كعدت اتريك والوب عليها
الحجية جميله: هااا يمه چنك مضيع وليدك شجرالك عيونك تطارد منا ومنا
حامد : لا يمه سلامتج
الحجية جميله: چا على امك اعرفنك ادور عليها كوم ليها واسحلها من شعرها كافي دلال مصختها خلي تكعد وتشتغل حالها حال نسوانه هيه بعد موخطار

حامد : يمه ردينا
الحجية جميله: اسمع يحامد انه دايره هذا البيت وماارضى مرتك ماتشتغل والكل يخدمها لازم تكوم تخدمك ومرتك حليمه اذا ردت مراح تسكت
حامد : يمه دخيلج لاتردين احلام هاي يرادلها حيل مامشيوف
الحجية جميله: لازم ترد يمه بيتها وبنيتها
حامد : صدگ يمه عينج على جنه اخافن هاي الايام التهي عليها وماريدن تشوف امها عقاب ليها على سوايتها
الحجية جميله: لاتخاف بنتك يمي وانه اعرف اربيها ليك
حامد : اكوم اروح للمضيف اشوف الوادم
الحجية جميله: روح يمه مودع بالله

حامد : وصلت قريب حجرت البنيات رف گلبي عليها ادري البنات كلهن بره وبس هي داخل فتحت الباب ردت بس اشوفنها وهي نايمه
ودخلت على كيفي وعساني ماداخل نار وشبت بيه بويه نايمه والرجل والزنود طالعه حركت جد جدي كمت ابلع بريكي ولج من اشتعل ابيج حارمتني منج وهذا كله حلالي وين اولي تقربت ليها وانه اباوع على جمالها اوف ياطيرتي لو تعرفين شگد اعشكنچ ردت اشمنها بس خفت تفز وباوعت ليها وسمعت صوت الصغيره تكعد خفت تشوفني وهي ماتفهم وتخترع تحركت على كيف وانه الماي يصب من راسي لجدمي ( لرجلي) شفتها حوريه ونايمه موو مره اويلي على حظك يحامد سنين اريدنها بالحلال وتالي حلالي ومااكدر المسه

طلعت وانه بالي مسطور شون اخليها تتقبل اتكرب ليها
يمامه : شميت عطر حامد فزيت ماكو احد بس شميته متأكده يجوز متوهمه
كعدت وكعدت همسه بدلت ولبست نفس الكلابيه غير عمتي الحبابه حاركه كل ملابسي
طلعت وشافتني الحجيه

الحجية جميله: تعاي ليه يمرت الشيخ
يمامه : صباح الخير عمه
الحجية جميله: سمعيني عاد من باجر تكعدين من الصبح زلمتج مايطلع اله وانتي مزهبه گلشي (مسويه) والشغل بينج وبين ضرتج حليمه ونوم بغرفة بنياتج تنسيها عندج رجل هسه اركدي شوي وكافي تدلعين لاتشوفي ساكتلج
يمامه : صار

الحجية جميله: جنه حچي ماعجبج
يمامه : لا عمه هذا هو الي تريدي يصير
مالي خلكها ابد يله على الشغل هم لازم اشتغل خطيه فضيله البيت كله عليها هي وبتها ميصير
طبيت للغرفه عدلتها وشلت غراض حامد فتحت الكنتور الجديد لكيت كم قطعه ملابس جدد هاي مال منو فتحتهم حطيتهم على جسمي ذني على كدي قياسي بالضبط ٣ دشاديش مستورات و٣ نفس الي جنت لابستها قصيره وكيمونه والوانهم حلووه
صحت فضيله وسألتها كالت الشيخ جابهم من راح اشتره الغرفه قبل ايام من بغداد واليوم الصبح من عرف بملابسج محروكات كال بلغيها اكو ملابس ليها بحجرتها
يمامه : بس هو منين عرف قياسي

فضيلة : والله ياخيه مااعرف وتفاجأت حامد عمره مايعرف يشتري قطعه ملابس مال نسوان حتى امي من يريد يشريلها ينطيني فلوس واروحن اشتري ليها
يمامه : خلف الله عليه اروح ابدل هاي الكلبيه ثگيله موتتني وحاره حيل

يمامه : سبحت وبدلت دشداشه مستوره وطلعت ويه فضيله اشتغل مره اليوم طبيعي اي شى ماكو بيه وبليل اجه حامد ويباوع علي احس عيونه تاكلني اكل

اتعشى وكمل هو والولد وصاحني
دخلت حسيت اليوم ناويها بس اني اتفقت ويااه ميلمسني اله برضاتي شو هذا ولا يمه
اول مدخلت للغرفه تقرب مني وهمس بأذني وانفاسه دافيه وكال ارحمي بحالي تره مااتحمل ياطيرتي

يمامه : شيخ موو
حامد : لاتكولين شيخ موحركتي حرك كولي اسمي حامد
يمامه : شتريد مني
حامد : اريدنج يمامه
يمامه : بس احنه اتفقنا اله برضاته
حامد : انتي بس اتركي نفسج ليه وانه اخليها برضاتج

يمامه : حاولت اضغط على نفسي وماارفضه لان اعرف الشغله ورايه ورايه
تقرب سحبني من ايدي بهدوء وتمدد وسحبني لحضنه فتح شعري ويشم بيه بكل حنان مثل الطفل المتعطش لريحه امه حسيت بشوق منه غريب وراها وخر شعري على صفحه وضل يشم برگبتي اول مره احس هيج احساس حسيت روحي ذابت غمضت مردت اتذكر اي شى ومحسيت غير بأيده تتلمس بجرأه
دفعتها
وجان يهمس بأذني لاترفضيني وحسي بيه
يمامه : عفته براحته وبديت اهدأ وبدا ينزعني بهدوء

حامد : ااااخ من فدوه لريحتج الي ترد روحي احس عضاي تطلع من جسمي وكوه لازم نفسي من عشكي ليها مااريدن أذيها هاي الليله انتظرتها عمري كله
وبديت اتقرب ليها بحب
يمامه : مغمضه وبديت اندمج ويااه ومااحس بروحي غير اكول عادل على كيفك
ومحسيت غير حامد ينفض بقوه مني فتحت عيوني وانتبهت شگلت ومااحس غير

يتبع ...
مووتنسون تصويتكم للقصه 🥰
احـٍُــبٌــ💘ـٍَــْگم