رواية سجينة الروح الفصل الثاني عشر 12 - بقلم ريام هادي

سجينة الروح
للكاتبة Reem
البارت الحادي عشر

جنت اضحك واسولـــــــــف ويا هذا وذاك
على غفلة ولگيت الناس كلها تجــــــــور
طرت بجـــــــــناح واحد للفرح فد يـــــــوم
شو حتـــــــى الفرح ردني بجنح مكسور
ضيعت البـــــــــخت وانه الجنت محـــظوظ
حتى ويا العــــــشك ما عشت لحضة بنور
يا كلبي شكثر عذبــــــــــــتك انت ويــــــاي
احس كلبي على كلبي من الحزن مفطور💔

حامد : جنت ناسي الدنيا وياها مامصدك هي بحضني حلالي طيرتي ردت احسسها بحبي وبدت تذوب ويايه وروحي اطير بالسما ومااحسن غير تنطق اسم عادل جن جبل وطاح على راسي النار صعدت وجرت بروحي وحسيت نفس احساس من تزوجت عادل جن مر علي نفس العذاب بس هلنوبه (هلمره) اصعب جن حسيت جرحت رجولتي وانه تسودنت كمت مااشوفن كدامي موهينه علي وانه اسمع مرتي تنادي باسم واحد ثاني وحتى وان چان اخوي وداارجف عليها اذا الزمها اكتلها خلاص

يمامه : شفته كام مني ويرجف گلت اقل شى يخنكني لو يسحل بيه الغرفه لان وضعه صدوك يخوف لأول مره اخاف هيج منه وحجه بهدوء
كومي اطلعي بره
يمامه : فدوه اسمعني مخلاني اكمل كلامي وعاط عيطه رجت البيت رج

حامد : دأكلج كومي اطلعي بره لاتجبريني أذيج
يمامه : بس افهمني والله موقصدي كتلك لتجربني بعدني ممستعده تتقرب مني شون تتوقع ابادلك المشاعر ومصار يومين من اتزوجنا واني سنين متزوجه عادل
حامد : اسگتي لخاطر ربج كله مني گله انه الي حبيتج كله من هذا (واشر على گلبي) لوبيدي اطلعنه وادفنه واحطن بمجانه صخر جلن لايحبج ولايفكر بيچ
يمامه : جمدت ورجفت شنو يحبني هو هنا فاقد عياط وصياح ويلوب مديشوف كدامه
شنو تحبني
حامد : يمامه اطلعي بره واسلمي على روحج اذا بقيتي ماضمنلچ شسوي لاتوصلني اكتلنج خلاص واكتل روحي وراچ اطلعي بره
يمامه : شفت يرجف وفاقد اخذت دشداشتي لبستها وحطيت الشال وطلعت واني الدمعه بعيني وجهي اصفر وارجف بس سديت الباب وجان اسمع صوت التكسير
واجتي عمه وفضيله يركضون
الحجية جميله: شنهي شبيه حامد
يمامه : سكتت مكدرت احجي اي شى شكول الهم راد يتقرب مني واني ذكرت عادل اسكت احسن
ماادري هو عصبي وكلي اطلعي بره ماافتهمت شى منه
الحجية جميله: يمامه شبي حامد احجي لاتسودنيني وليدي شجراله
يمامه : عمه كتلج ماادري شبيه كلي اطلعي بره
فضيلة : يمه اخوي راح يطك ويموت كاعد تسمعين كسر الحجره كلها وجان نسمع صوت چام تكسر ولطمت على وجه راح اخوي
الحجية جميله: لك يمه حامد افتح ليه الباب يمه لاتوجع گلبي عليك
حامد : واليرحم والديج يمه اذهبي غاد مابيه شى
الحجية جميله: يمه افتح ليه لاتوجع گلبي امك ماتتحمل يصير بيك شى يمه اموتن وحگ علي
يمامه : امه وفضيله كسرو الباب يدكون وبس نسمع صوت تكسير واني ارجف وكمت ابجي كولش خفت نزل مازن ومنير يركضون
مازن : شبي ابوي
الحجية جميله: الحك ليه ابوك تسودن وكسر كلشي ومانعرف شبيه
مازن : يابه افتح الباب لتخوفنا تره جدتي راح توكع من طولها من الخوف عليك افتح يابه
حامد : من طلعت يمامه ماشفت كدامي شكو شى يمي كسرته انه طلعتها حتى لا اضربها وذبيت ضوجتي وكسرت نفسي وقهرتي بالغرفه كلها شكو شى كدامي كسرته واني اتذكر شون ذابت وصاحت بأسمه ومن عصبيتي ونار گلبي ضربت الجام مال سراحيه (ميز تواليت) بيدي وكسرت الجام وتملخت ايدي وضلت تجري دم ولزمت الكنتور هم بيه جام وكسرته وبنفس الايد لحد مايدي تملخت تمنيت گلبي يتملخ مثل يدي واتوبن من حبها

من سمعت امي ومازن وكال الحجيه توكع خفت عليها لاتتأذه بسببي كعدت شوي ردت اخذ نفس احس گلبي مجمر وحسيت على نفسي ونهضت وفتحت الباب ورجعت كعدت ودخلو يركضون واني منزل يدي وتنزف ومنزل راسي احسه راح يطك

يمامه : بس فتح الباب كلها طبت تركض ودخلت وراهم بخطوات ثقيله والدموع بعيوني شفت الغرفه مسويها طشار ولا جامه سليمه بيها والتاج مال الجربايه مفلشه شكد جانت الغرفه حلووه هسه مهجومه شكد لعد تأذه بسببي بس هو هم لازم يعذرني امه تحجي ومازن وفضيله حاطه الحجاب مالتها على وجهه وتبجي وترجف ويسألوه شبيك ساكت رفع راسه شافني واكفه بصف الباب باوع بنظره حزن ورجع نزلهم وجاوبهم وكال
حامد : تعبان عوفني وحيدي ولاتخافون مابي شى
الحجية جميله: سوده بوجهج جميله چا شون مابيك وانت ترجف واصفر وجهك وكسرت الحجره گلها يمه بروح ابيك گلي شجرالك انه امك يحميد لاتموتني خوف يمه
حامد : يمه دااگلج مابيه اذا تريدين راحتي عوفني ارتاح وحيدي
الحجية جميله: چا شون اعوفنك غير اموتن شوف يدك تجري دم
مازن : يابه خلي اداويها الك كعد تنزف ميصير هيج
منير : يابه ايدك منتهيه خلي يداويها مازن
حامد : هسه توكف لايضل بالكم
الحجية جميله: يحميد بسك عناد تعال مازن عالج يد ابوك وخلي اشوفن ياهي يعترض
حامد : ترتاحين وتجوزين مني اذا طيبها (عالجها)
الحجية جميله: يمه شون اجوزن منك وانت هيج حالتك ماشفتك هيج يمه صار سنين شنهي الجرا خبرني
حامد : مازن بويه عالج يدي وانتي فضيله
فضيلة : تامر خويه
حامد :أخذي امه لحجرتها وانطيها علاجها وخليها ترتاح وتنام
الحجية جميله: انه امك يحميد جان صغيره وتكودني وتنومني غصب
حامد : يمه دخيلج ابوسن يدج بطلي مني

الحجية جميله: هاي البومه سودنتك لاتكول لا اعرفنك مايهزك بس هاي مشعوله الصفحه
حامد : (بصوت عالي) يمه البت مالها ذنب انه اكو حسبه بالي مضيگه خلكي (مضوجتني) وكتلها اطلعي حتى لايصير بيها شى ومااريدن احد يمي البت ماخصها

يمامه : انقهرت اكثر مما اني مقهوره رغم كولشي منطه بيه كدامهم
حامد : يله بويه مازن داويها بساع
فضيلة : يله يمه تعالي ارتاحي
الحجية جميله: چا شون ارتاح وانه اشوفن اخيج متزوهر ويده متعوره وتعاي ليه انتي يمامه نضفي الغرفه وبدلي الفراش يله
يمامه : حاظر
حامد : لا يمه مو هسه روحي ام ودق لبنياتج باتي يمهن
يمامه : بس
حامد : دااكلج باتي هناك وانتي فضيله اخذي امي ترتاح وباجر نضفي الحجره الوكت تأخر يله الكل ينام وانت منير روح بويه نام
منير : ماعندك اله العافيه يابه وبست راسه وطلعت
يمامه : باوعت عليه مقهوره ردت بس افهمه منطاني مجال رحت امشي وتعبانه ومقهوره دخلت لكيت البنات كاعدات من الصوت بس خافن يطلعن بس شافني دخلت عليهن اجني ركض
ودق : ماما بيج شى اذاج ضربج
يمامه : شبيج ماما كولشي مابيه
أيه : شبي عمو حامد صوته يخوف وكسر الغرفه
يمامه : انتن شمدريجن
ودق : ميحتاج ندري الصوت عالي كولش وخفنا نطلع بس مديت راسي ردت اشوفج جوه يمه اذا يمه اطلع واگلب الدنيا لان اكيد ديضربج بس من شفتج واكفه بره ومابيج شى اطمنت
يمامه : مابيه شى ماما عمكم شويه تعبان وباجر يصير زين
ودق : ميهمني المهم انتي مسوالج شى
يمامه : مابيه شى تعالو يله نامو وارتاحوا

بقيت الليل كله اتگلب واكثر شى بهاي الليله دوخني كلامه مال حبيتج ويأشر على گلبه شنو قصده يحبني زين ومن شوكت وشون يحبني واني مرت اخوه لا اكيد ميسويها هو وين شايفني حتى يحبني شو سنين متزوجه اخوه ولا مره شفته غير بالمحكمه وراها ب٧ سنوات يله شفته يجوز بعد ما مات عادل
اووف دخت وعقلي يودي ويجيب وللفجر يله نمت

مازن : بويه جرحك قوي ولازم خياط
حامد : خيطه بويه اشتغل وانت ساكت تره راسي راح يطك
مازن : خيطت ايده وهو ولايمه بس مدنج اول مره احس بأبويه مكسور وتعبان رحت جبتله مسكن الالام هاك يابه اشرب
حامد : مااحبن الدوا
مازن : حتى يسكن الم ايدك وراسك
حامد : وهذا شيسكن الالامه واشر على گلبي
مازن : يابه احجيلي شبيك
حامد : نعسان انت
مازن : لا يابه مجايني نوم
حامد : خوش امشينا غاد
مازن : وين نروح بهليل
حامد : اريدن اطلع اختنك امشينا للشط نكعد هناك اريد اشتم هوا
مازن : يله ياريت المهم ترتاح

وطلعنا وطول الطريق ابويه ساكت وصلنا للشط ونزل كعد وبقى صافن مكدرت اسأله اي شى دااحسه مهموم وضايج بقى صافن على الشط
يابه ريحني وگلي شبيك عمري ماشفتك هيج
حامد : أنتي حـرّكتي البحرْ منْ بـَعَد سـكته،،

وإنتي حـَلـٌيتي السؤال الماعرفـته،،

وإنتي خـَلـٌيتي النجم بعيوني يلتم
والنجم مو هينـَـه لمتـَـه!!

إنتي رجـٌعتي النِفـَسْ
لِسنيــنْ ميتــَـه،،

وإنتي خـَلٌيتي الغصنْ
بالروح يثمرْ گـبلْ وكتــــه،،

وإنتي رجـٌعتي الحنينْ
ال بالصغر عند أمي شفتــه!

إنتي ربحي وعَوٌضتْ كلما خسرتـه،،

ياجميـله
بكل غصن وجهج رِسمتـــــه
وجه ورده
والنـِده إيغازلها جبتـــه،،

جـِيتْ أشوفج والكَمـر
ويــاي جبتـــــــه،

ويوم شافج أحله منــٌه
گَـالي خـَلـيها سكتــــه !!
هذا اول شعر كتبته ليها ودزيته برساله واكولن راح تحبني راح تتقبلني طيرتي انه الصبرت سنين واناطر على بابها
مازن : الشعر يخبل بس المن ومنو طيرتك
وبدا عمي يحجيلي قصه حبه لعمه يمامه وشون تعرف عليها جنت اشوف بوجه كل تعابير مره حب مره حزن اما تعابير القهر والالم تهز جبال شكد جنت اكره عمي عادل لان اكول هو السبب خلانه يتامى ومات ابونه بسببه بس بعد مسمعت قصه ابويه حامد كرهته اضعاف ورجفت حتى صرت اعصاب انمردت مرد عليه شنو ذنبه هيج ينطعن من اخوه وشون يحب عمه يمامه يساعد گلبه شتحمل
مازن : لو منك احط طلقه براسه شون هيج يغدرك
حامد : هذا اخوي شون اكتله علمود مره لا مايصير بس تحملت العذاب وسكتت وگلت الله يصبرني وانسانها وتالي ياوليدي مانسيتها والزمن رجعها ليه بس تكرهني

مازن : اكيد بعد كل الي صار وخاصه هي متعرف بحبك وبكل الشغلات الي صارت اكيد اكو مشاعر بداخلها محلوه بمرور الوقت تتغير واني اكول ابويه ليش حط هيج شرط حتى يتزوج مرت عمي ثاري واكع بالحب واني ماادري
حامد : اااااخ ياوليدي مشعول شعل ابيك بحبها
مازن : زين اليوم شبيك ليش هيج تعصبت وكسرت الغرفه والغراض وهيج وضعك هسه مو صارت زوجتك يعني المفروض ترتاح
حامد : المفروض بس حظي واعرفنه دوم وياها اعوج
مازن : يعني صار شى قوي
حامد : مو مهم يله بويه امشينا راح يصير الفجر واحنا هنا
مازن : والله يابه قصتك تخبل مال فلم رومانسي
حامد : اي وسمي الرجل الذي طاح حظه بالعشگ
مازن : ههههههههه حشاك يابه بس الصراحه خوش اسم
حامد : اضحك بويه انته شهامك
مازن : يابه وداعتك يجي يوم وتحبك طيرتك بس صبر يرادلها
حامد : چا شصبر هو شبقى من العمر خلصته گله صبر
مازن : الله يعينك والله موهين كل الي صار
حامد : يله بويه نرد

يمامه : كعدت من الصبح غسلت وحضرت الريوك ويه فضيله ردت اشوف حامد واطمن عليه اكيد تعبان من سالفه البارحه طلع من الغرفه وهو سابح ولابس دشداشته تلمع والسبحه الكهرب الي ابد متفاركه وايده الثانيه مشدوده كلها مبين الجرح جبير طلعت عمتي من غرفتها
حامد : صبحكم الله بالخير
الحجية جميله: هله يبعد امك ورويحتها ها يمه بشر شونه كيفك اليوم
حامد : بخير دامج بخير يلغاليه
الحجية جميله: چا انته وجه الخير تعالن يمه اكعد يمي اليوم اريدن تريك وياك
يمامه : قدمت الريوك وكلت صباح الخير رد ومرفع وجهه عليه
حامد : صباح النور
تريك وطلع رفعت الاكل ونظفت المطبخ وخطيه فضيله تمسح سريعه بالشغل واني وياها تريد تدخل لغرفتنا حتى تنظفها جان اكولها عوفيها فضيله اني انظفها
فضيلة : براحتج خيه
يمامه : دخلت للغرفه يبوو شمسوي بيها تكول حرب بيها كنستها وشلت كل الغراض المكسوره وراها مسحتها وغيرت الفرش وعطرتها صارت احسن ولو جمالها كله راح بس المهم تنظفت تعبت ساعتين اشتغل بيها لاعب لعب بيها طلعت شافتني عمتي

الحجية جميله: انه اعرفن انتي ساس البله بس ساكته عبن مااريدن حميد يزعل جري عدل يمامه ولاتخليني اتسودن عليج
يمامه : ممسويه شى عمه
الحجية جميله: دهر صابج چا الوليد مثل العافيه تخبل علينا وكسر گلشي هيج بدون سبب لاتقنعيني انه اعرفن انتي وراها اركدي شوي لا اسوي بيج الماسويته بعمري

يمامه : بله هاي شجاوبها بس كتلها صار مااريد ادخل بنقاش وياها مالي خلك حيل
طبيت سبحت وفضيله كملت الغدا واجه حامد وسلم وتغدا ودخل للغرفه دكيت الباب
حامد : تفضل
يمامه : اكدر ادخل
حامد : ادخلي محتاجه شى
يمامه : اريد احجي وياك
حامد : على شني
يمامه : علمود البارحه
حامد : ام ودق وراي شغل من ارد احجي الي تريدي
يمامه : عافني وطلع وحتى مباوع بوجهي انقهرت بس مابيدي شى لازم اسكت

للعصر ودخل مازن وبوجه ابتسامه عمه هاي نتيجه ودق
يمامه : صدوك شطلعت
مازن : ناجحه ومعدلها ٩٥
يمامه : ماشاء الله الحمدلله ربي مضيعت تعبها ماما ودق تعالي
ودق : طلعت على صوت ماما هااا يووم
يمامه : مبروك ماما نجحتي ومعدلج ٩٥
ودق : صدوك كيفت وكمت كمز وحضنت ماما الفرحه طيرتني وانتبهت مازن واكف ومبتسم
مازن : مبروك
ودق : شكراً
منو جاب النتيجه ماما
يمامه : ابن عمج مازن
ودق : شكراً مقصرت زين ومنير شطلع
مازن : ناجح ومعدله ٧٠
ودق : شو قليل معدله
مازن : موزين اصلاً طاير من الفرح ممصدك هو وحتى اني ممصدك لازم اوفي النذر مالتي واذبحله عجل لوجه الله
ودق : عجل لان جاب ٧٠ لو جايب ٩٠ شتذبح ثور
مازن : عدنا ٧٠ من منير عبالك جاب ١٠٠ اصلاً مأيسين منه يطلع من السادس
ودق : ههههههه لعد اذا هيج زين اذبح عجل
مازن : وانتي شحابه اجيبلج هديه نجاحج
ودق : مااريد شكراً
مازن : شون متريدين نجحتي وبتفوق
ودق : گلت مااريد
يمامه : شفتها انعقجت وتحجي بحديه ويه مازن غيرت الموضوع
فدوه مازن شوفلي اسنان ايه مو خبلتني
مازن : هااا اي عمه تدللين هي خطيه كالتلي وانطيتها كبسول حتى يخف الالم بين ميصير مجال واشوفهن بس التهيت عنها هي وينها
ماما ايه تعالي ابن عمج اجه واني هسه بس اشوف عمتك فضيله وارجع

أيه : هَــْـِْـْْـِلاّ بأبن عمي الهمام واباوع على ودق
ودق : شاورتهاعيونج لا افكسهن
أيه : شوف سنوني توجعني موت اريد اطيب حتى ارجع اكل
مازن : موانطيتج كبسول شون صارن
أيه : والله يادكتور كبسولك فاشوش طلع كولشي ماكو عبالي شاطر بالعلاج طلعت شاطر بس بقبله الحياه
ودق : شاورتها لأيه يابه وروح بابا بس يطلع مازن اله اكطع شعرج
مازن : عرفته بسمار من ايه لودق اشوف ودق راح اطك صارت دم وترجف ضحكت على شكلها وردت احرك گلبها بعد
شعبالج غير دكتور شسوي اذا ودق مكعدت اله سويتلها قبله الحياه
أيه : اي والله وحيل استفاديت منها يراد تصير مدرس احياء عوف مهنه طبيب الاسنان مابيها فائده
مازن : هههههههههه تدللين ست ايه
ودق : كافي وفضينا عاد
مازن : ليش تعيطين عليها
ودق : هذا شى خاص بيني وبين اختي انت شعليك
مازن : شعليه موو لو ما قبل يومين ناقذج من الموت وحتى شكراً مسمعتها منج
أيه : صوجك والله لو عايفها ياكلها السمج اقلها ياكل لسانها جان ارتاحينا
ودق : ولج ايه اني الج
مازن : ههههههه تعالي ايه افحص اسنانج وفحصتهم يله تسوس بسيط
أيه : يابسيط مدااكدر اكل
ودق : تعالي اكليني منو قبل شويه مخلص بلم مال تمن ولحم امي
أيه : قول اعوذ برب الفلق واني اكول ليش كل مااكل بطني توجعني اثاري عينج ورايه
ودق : قحط
أيه : عيني دكتورنا الهمام عالج سنوني حتى اكدر اكل زين عناد بودق
ودق : واني شعليه اكلي حتى تصيرين برميل اكثر
أيه : مماكله من جدرج
مازن : اصلاً ايوته تخبل
أيه : فديت ابن عمي شيال همي ورافع معنوياتي وطلعت لساني وعيبت على ودق
مازن : يله اروح اني محتاجين شى
أيه : بربك مازن اريد جبس وعصير وياك موطا ام الكاكاو
مازن : تدللين
ودق : متستحين اطلبين منه ماما مقصره وياج
مازن : لتدخلين ممكن براحتها تطلب الي تريده هي اختي وتمون عليه شلج علاقه انتي لو تغارين
ودق : يافدووه اغار على شنوو
مازن : انتي متريدين شى منا منا تره مني الفلوس مااخذ منج
ودق : مااريد والله ليعوزني عليك
مازن : فديوم الزم لسانج واكصه
ودق : باوعت صفح عليه وضحكت بأستهزاء
شحدك
مازن : تقربت منها وهي تفاجأت من حركتي وكتلها ايااج تتحديني واله وربج اكصه واكسر راسج هم
أيه : صلو على النبي يمعودين
ودق : موو كملت يله روح
مازن : ههههه اروح بالوقت الي يعجبني وهااا صيري عاقله وبطلي هاي الصلافه تره اذا احطج براسي اخليج مثل المخبله راسج من رجلج متندلي
ودق : شون اليوم منخلص
مازن : ههههههه لتخافين يجي يوم ونخلص
أيه : دكتورنا الموطا تناديك يله حباب
مازن : تدللين
بس طلع مازن استلمتني ودق دك على راسي وتجر بشعري
اليوم اله اطيح حظج انتي متجوزين
أيه : اااااخ ماما تعالي الحكي بنتج انگلبت عفريتون وتخبلت علينا
يمامه : شبيكم بنات عيب صوتكم طالع شجاكم
ودق : سكتي أيه لا والله اسحل البيت كله بيها
يمامه : وتالي وياجن شون يوميه مناكر وعركه تره مالي حيل صيرن عاقلات
أيه : والله يامامتي اني عاقله وحبابه بس اويلي على بنتج الجبيره الي طاك فيوز بيها
يمامه : كافي يله اسكتو مااريد اسمع صوتجن
ودق : اكولج ماما هسه اني استلمت النتيجه مالتي شون اكمل دراستي

يمامه : والله مااعرف شون اني هم محتاره وقلبي نار اخاف ميقبلون تكملون دراستكم
ودق : غير اگلب الدنيا على اي اساس ميقبلون
يمامه : صوتج عالي ليسمعون
ودق : وخلي يسمعون اني اريد اكمل دراستي شيريدون اصير فاشله واكعد بالبيت اطبخ واكنس وامسح
أيه : ليش هو كلمن كاعده بالبيت فاشله هواي بنات كعدن لان ظروفهم متسمح يكملون ليش تعتبرين الي كاعده بدون دراسه فاشله
ودق : اهووو حجت الفيلسوفه
أيه : انتي ميفيد الحجي وياج اصلاً اروح العب ويه همسه احسن اليه
يمامه : احجي ويه عمج واشوف بس صوتج مااسمعه وهذا الموضوع ابد لتدخلين بيه

ودق : اوووف امري لله اسكت المهم ماابطل واداوم هاي السنه
يمامه : مر اليوم وصار الليل وبقيت حايره وين انام ياربي شون بيه خلي اروح واذا طردني بعد ماانام هناك لو اموت دخلت للغرفه ملكيته وين راح

حامد : هاا يمه شون كيفج اخذتي علاجج
الحجية جميله: يبعد امك اخذت تعال اگعد عندي چلمه وياك
حامد : يمه اعرفن تلوبين اله تعرفين شجرى (شصار)
الحجية جميله: چا شنهي وليدي البارحه تخبل علينا وماتريدني اعرف
حامد : يمه چان خلكي ضيك (ضايج) لشغيله بالي وراحت
الحجية جميله: انه امك يحميد تقشموني
حامد : ههههه حشه يمه چا انه اكدر غير تلكفيها وهيه بعدها حتى ماطايره
الحجية جميله: انه اعرفن كله من راس الططوه يمامه بس گلي شعملت وانه اكسرها ليك عبن اعرفنك گلبك رچيج عليها وماتمد يدك عليها انه اربيها ليك
حامد : يمه گتلج البت ماخصها

الحجية جميله: احچي يحميد شجرالك تعال بحضن امك يبعد رويحتي
حامد : حطيت راسي بحضنها وهي تمسد براسي وتكصعلي (تفرك راسه بين اطراف الاصابع )
حامد : اووف يمه من احطن راسي بحضنك تمنى ارجع صغير ومااعرفن شى عن الدنيا ولا اشوف الاذيه ولا احمل حمل الوادم وهمومها ولا گلبي الملچوم ينلچم (ينجرح )
الحجية جميله: يمه انته سنين تنوح عليها وصارت حلالك ليش مامرتاح
حامد : يمه بعدها تذكره وتنطق بأسمه وهيه بحضني

الحجية جميله: يمه اسمعني تعرف بيه اكرهنها ولو بيدي ادفنها بمچانها بس يايمه انت هم اعذرها عبن البت بعدها مامتعوده عليك
حامد : بس يايمه موتنطك اسمه وهيه بحضني
الحجية جميله: يايمه البت فتحت عينها على اخيك وماتعرف غيره گل عمرها چا هيه هينه المره ماتنسى اول واحد لمسها واخيك وهي حديثه خلاها تحبه وماتعرف غيره وگضت ٧ سنين يمه شون تنسى وتصير بحضن اخو زلمتها وتنسى گلشي

حامد : يمه لاتشيطيني انه اريدن ارتاح وانتي تحركيني حرك
الحجية جميله:چا حچي الحگ هذا يايمه وانت لازم تعذرها وتصبر عليها
حامد : هو شخلص عمري غير الصبر
الحجية جميله: انت مسودن وجلبت بيها الف مره تتمناك وانته اله غراب البين
حامد : هههههه هلمره غراب مو بومه
الحجية جميله: چا هيه بومه وغراب وططوه وكلشي بيها

حامد : صارلچ ساعه تدافعين عليها ورجعتي تذميها
الحجية جميله: يمه الحگ حگ البت على كيفك وياها وانه اعرفن راح تحن عليك

ووليدي سبع وراح يخليها تعشكه انه اعرفنك ماتتنازل عن صيدتك وهاي طيرتك الي خلصت عمرك تنوح عليها لا تستعجل على رزقك يمه گلشي بلسان الحلو والطيب يلين والبت مجروحه من اخيك الله يرحمه صير دوا ليها وداوي جرحك وجرحها وخف عليها لاتخليها تنفر منك
حامد : شسويت انه ماضربتها حتى تنفر مني
الحجية جميله: چا والحجره الي سويتها تراب تخبلت بساعتها يمه المره ادور الصدر الحنين وانته عاشكها حسسها بعشكك ليها بس مو تصير لعبه بيدها
حامد : ههههههه والله يايمه الكعده وياج تروح الهم والغم

الحجية جميله: يابعد جبدي اضحك يمه ربك مع الصابرين وانه الها اله اكسرن العوجيه على راسها اذا كدرتك (ضوجتك)
حامد : هههههه گله ولا العوجيه البت تسكط تصير مو يمامه صكد تصير كطوه
الحجية جميله: هههههههه تستاهل الكطوه روح يمه ارتاح والله لايشوفك تعب وضيك بحگ حبيبه محمد
حامد : بست يدها وراسها امين يمه

طبيت لكيت يمامه رجفت عليها اوف يگلبي چا بس تكون گوي يمها اصيرن بخير
يمامه : ارتبكت من دخل وحجيت بهدوء الله يساعدك
حامد : ويساعدج
يمامه : اجيت اكولك وين انام
حامد : بالمچان الي يريحج
يمامه : راح انام هنا عادي لو اضوجك
حامد : براحتج
انداريت ونزعت دشداشتي
يمامه : استحيت لان نزع اول مره اشوفه ينزع كدامي وبقى بالداخليات ونام على الجربايه وانطاني ظهره وتغطى
رحت بهدوء فتحت الكنتور ولبست دشداشه ربع ردن وقصيره اني بطبعي ماانام اله افتح شعري لان النهار كله شايلته ولابسه الربطه من انام افتحه وافرشه على المخده هو موو حيل. طويل لنص ظهري بس ثخين وسرح فتحت القراصه ونثرت شعري على المخده وتمدده وانطيت ظهري اله وبديت اغفى

حامد : تمددت يمي واحس حراره جسمها يمي شون راح تكضى وانه كل اعضاي ترجف عليها احبنها ومااصبر مااكضها (المسها ) حسيت بصوت نفسها ثگل نامت غفت انداريت واشوفن شعرها منثور ولابسه ثوب (دشداشه) والزنود طالعه هاي ناويه تموتني وتحرك اهل اهلي تگربت ليها وشميت شعرها اوف يارويحتي عطرج يرد روحي تلمسته وحطيته على وجهي بدون ماتحس واكولن شيصير لو تحبيني ربع حبي الج مااريدن هواي ربع حبي محسيت بروحي غير انام على ريحتها وشعرها بوجهي

يمامه : كعدت الصبح حسيت بجسم قريب على جسمي انداريت بوجهي على كيف وشفت حامد شبه لازك بيه وشعري على وجهه سحبته بهدوء هو حس وفتح عيونه واندار
حامد : خجلت من شفتها كاعده وتنظر عليه وشعرها على وجهي انداريت حتى لاتحجي شى
يمامه : فتحت الكنتور ونزعت الدشداشه خفت ليندار ويشوفني انزع ركض لبست غيرها مستوره وحطيت شال على راسي وطلع اسوي ريوك هو هم طلع ورايه سبح وبدل وتريك بدون ميباوع بوجهي

بديت اشتغل ويه فضيله بكولشي واساعدها واجه الظهر تغدا وهم ميباوع بوجهي مااعرف ليش اضوج من احسه لابسني اجه مازن صاحني
مازن : عمه اذا مصارت زحمه عليج اريدج تغيرين الضماد مال ابويه لان عندي طلعه ومستعجل واتأخر
حامد : مازن مازن وينك بويه تعال ليه هذا توصخ وغيره ليه
مازن : بويه اعذرني مستعجل
حامد : ولك هي دقيقه بساع بساع غيره ليه وروح
مازن : هسه عمه تغيره الك
حامد : من اشتعلت صفحتك عرفت متكصد يمامه تتقرب مني چا انه اريدن ابعدها وهو يكرب النار مني
مااريدن انتظرك من ترجع
مازن : اتاخر اروح مناك لبغداد

طبعاً كذب بليل ارجع بس اريد يتقرب منها خطيه انتبهت عليها عيونها اطارده وين ميروح وهو ميباوع بوجهه واعرف ابويه اذا عاند كارثه بس اذا تقربت منه راح يضعف وبلكت يتصلح الوضع بينهم

يمامه : اني اغيره ليضل بالك روح الله وياك
دخل حامد للغرفه ودخلت وراه وبيدي الشاش والمعقم كاعد هو على الجربايه جبت كرسي وكعدت كباله وتقربت منه وهو منزل عيونه وميباوع عليه وبديت افتح الضماد واخترعت من شفت ايده مخيطه اكثر من ٥ خياطات وحيل متأذايه
حامد : من لمست ايدي احس روحي ذابت وانه بين ايدها وساكت واريدنها تفضها تعبت من كربها مدااتحمل اشتم ريحتها وتلمسني وماالمسها

يمامه : شنو هاي ايدك ليش هيج سويت
حامد : خلصي بساع وبلا چلمه زايده
يمامه : بديت اعقمها بهدوء وهمست واني حيل قريبه منه حتى دااشتم انفاسه وكتله اني اسفه موقصدي اجرحك
حامد : انه الي اعتذر مجان لازم اطخج واتكرب منج

يمامه : هذا حقك بس انت هم اعذرني طلعت بالغلط واني كتلك ممستعده والله افهمني صعب كل الي صار بهاي المده غير حياتي كلها
حامد : هذا هم ام ودق الي تريدي يجرالج ماالمسج بعد
يمامه : بس لتزعل مني
حامد : اشتعل الي خلفج تحجي بهمس وانه اذوبن من صوتها وانفاسها احس روحي تطير اليها عركت ردتها بس تفض غير تفضني موو شعلتني شعل
يمامه : كملت
حامد : عاشت ايدج
ممكن اطلب منك طلب
حامد : تامرين كولي
يمامه : ودق نجحت
حامد : هاا مبروك
يمامه : واريدها تكمل اعداديه البنيه شاطره والله متسوي شى اخلي ولد عمها يودوها ويجيبوها المهم تكمل متبطلوها
حامد : ليش تحسسيني احنا ناس مانفتهم
يمامه : لا العفو مو قصدي
حامد : ام ودق احنا عدنا البنيات يدرسن ويكملن والي تتزوج وماتريد تكمل براحتها الدنيا تغيرت وهسه البت تدرس وحتى عدنا طبيبات ومهندسات ومعلمات تره احنا مثل بغداد بناتنا يدرسن ويكملن والي ماتهوى العلام (الدراسه ) تكعد وانزوجها يعني لاتحسسيني احنا ناس مانحب نعلم بنياتنا وجاهلين

يمامه : لا والله موقصدي بس شفت جنه كاعده متدرس كلت اخاف انت مبطلها ومكدرت اسأل احد واستفسر
حامد : جنه بطلت لان ماتهوى العلام وكله من امها وانه كتلها هاي السنه ترد تدرس مااريدنها كلشي ماتفهم اريدنها شيخه بكلشي حتى بالعلم
يمامه : عااشت ايدك الْحٍمَدٍ للـّہ جنت خايفه خلي اروح ابشر ودق
حامد : گليلها عمج يكول شتامر بهديه حتى اوصيلها من بغداد
يمامه : تسلم متقصر
حامد : هاي لودق مو الج
يمامه : ههههه ماشي اكول الها
رحت بشرت ودق وكيفت ورجعت لكيت حامد نايم بدلت ونمت وتكررت الحاله هم لكيت شعري على وجهه من اكعد الصبح

مرت الايام واحنا على هذا الوضع هدوء بشكل موطبيعي كلام قليل بينا وبس بليل تعلمت دوم جسمه قريب مني مره تقصدت اسوي نفسي نايمه كلت خلي اشوف شيسوي وجان احس بيه يسحب خصل شعري ويشمهن جسمي كزبر ليش هيج يسوي وحطهن على وجهه وقرب وجهه ويشم برگبتي من مسافه قريبه حتى ليطخ بيه وراها بقى شعري على وجهه ونام شكد علاقتي بعادل وحب وعلاقه سنتين ولا مره هيج سوه ولامره شم شعري اصلاً جنا كل واحد ينام وينطي ظهره للثاني تعلمت على هاي حركته كل ليله ومن يطلع احس بفراغ بالبيت ومن يرجع عيوني ادور وراه ليش ماادري حتى من يباوع عليه عيونه كلهن حجي كمت اعتني بكولشي يخصه وهو قليل الكلام ويايه حتى من عمتي تبدع وتقسم ميخليها تأذيني يسكتها بضحكه بسالفه لايكسر بخاطرها ولا ينطي بيه وهذا الشى كبره بعيني
اشوف اهتمامه بنته جنه حلو وهو قريب من ايه كولش يحبها ودوم تكعد وياه هي وهمسه اله ودق بعيده كل البعد عنه وعن البيت والي بيه كله
وبيوم كاعدين وجان يتصل بابا عليه

جاوبته
هلو بابا شونك
ابويمامه : شنو سالفتج بابا موجنج طولتي هناك شوكت ترجعين
يمامه : هااا كم يوم وارجع
تره امج ضل بالها وحتى اني گلبي يلعب من شوكت وانتي تحبين العماره وتروحين وتاخذين البنات هناك ارجعي كافي تره مصخت حيل عندج يومين انتي هنا مأجيتي اني واخوج نجي ناخذج كافي بعد
يمامه : ماشي كم يوم وارجع
ماكو كم يوم كتلج يومين انتي هنا
يمامه : ان شاء الله وسديته
ورحت ركض لحامد
فدوه ابوجنه الحكلي
حامد : خيرج شجرى
يمامه : بابا كام يحجي لان بعدني بالعماره ولحد هسه متجرأت اكوله احنا متزوجين
حامد : ليش مابلغتي مايصير هيج
يمامه : جان بوقتها بالعمره ومردت اقلقه وكل فتره يخابر لحد مااليوم صاير عصبي وكال اذا مأجيتي خلال يومين نجيج اني ونصار
حامد : الي تريدي شنو
يمامه : نروح لبغداد وابلغهم بنفسي مااكدر بلتلفون لازم افهمهم
حامد : باجر من الصبح نطلع لبغدا بس على كيفج ويه نفسج لاترجفين
يمامه : اني اخاف بابا يزعل عليه ويصير اعصاب وهو مريض ميتحمل التعب
حامد : لانخافين انه احلها تعالي نامي حتى نطلع من وكت
يمامه : مااشي رحت بدلت وهو داير وجهه حس داابدل تعلمت ابدل وهو موجود لان ادري بيه من ابدل يدير وجهه وميباوع تمددت ونمت واثناء منايمه لا ارادياً تقربت منه ردت اشوف شيسوي وكأني اتحارش بيه ليش هيج سويت مااعرف حبيت اشوف ردت فعله وسويت نفسي نايمه

ومااحس غير ايده تحاوط خصري وجهه برگبتي وشمه اني هنا رجفت بس منداريت وعفته وبقى يشم بيها وغفى ياترى شنو وراك ياشيخ ليش احس وراك شى جبير مااعرفه
حامد : يوميه تشعلني شعل تعلمت مااكضها حتى انطيها فرصه تتعلم علي بس انه منتهي شسوي اصبر وبليله حسيتها تقصدت اطخني انه عرفت بيها مانايمه وتجرأت ولمستها ومارفضت ماردت ازيد وياها واعيدن الليله السوده اكتفيت بحضنها عندي يشوه الجنه المهم ماتنفر مني
وغفيت وانه مرتاح لان بحضني
يمامه : كعدت الصبح لكيت نفسي بحضن حامد خجلت اني شون هيج سويت عبالك دااكوله تعال اريدك شجاني استخفيت سحبت روحي بهدوء منه وحضرت كولشي وهو كعد وابتسامته على وجهه اني مباوعت خجلانه حيل وصيت فضيله على البنات تبقى يمهن مااخذتهن رغم كتلن نفسهن يروحن ويايه بس مقبلت لان اعرف راح تصير مشاكل وحجي ومردت يصير شى كدام البنات
وطلعنا لبغداد والطريق كله ساكتين بس هو مطلع اغاني ياس خضر ويسمع بيهن بس اكو اغنيه من طلعت كام وعلا الصوت حيل جانت اسمها اعزاز اول مره اسمعها اني مااسمع لياس خضر بس جانت كلماتها حلووه وهو يدندن ويه الاغنيه انطلق ابتسمت
حامد : هاا خير شو تضحكين
يمامه : هههه دااشوفك شون منطلق وتغني بيها هلكد تحبها الاغنيه
حامد : اااااه هاي الاغنيه بالذات اله ذكريات ويايه رفيجه سهري وعشگي
يمامه : ليش بمنو تذكرك
حامد : بطيرتي
يمامه : شنوو طيرتك شون دوم اسمع هذا الاسم منك حتى سمعت مره صحتني بيه
حامد : عوفج من الاسم الاغنيه حلوه خلي نسمعها
يمامه : بس لو افهم شكو عندك وشنو طيرتك جان ارتاح كلبي

وصلنا لبغداد واول مدخلنا تفاجأ بابا بجيتنا بس اني وحامد وكعدنا واجه نصار وماما هم كعدوا
ابو يمامه : وين البنات ليش وحدج
حامد : الله بالخير حجي
ابو يمامه : الله بالخير والعافيه
وبدا حامد يفهم بابا على زواجنا وابويه تخبل وكام يعيط شون تتزوجين من ورانا واحنا هو موبعينج گلب الدنيا ونصار هم يعيط احنا صوجنا انطيناج عين لهاي الدرجه ماعندج اعتبار النا
يمامه : كمت ابجي والله بابا مكتلك لان خفت عليك وانت نصار لان جنت مسافر
حامد : تهدى حجي كول ياالله البت تزوجت ومايفيد الحچي بعد
يمامه : اشتد الحجي وحاول حامد يفهمهم بس بابا طردني وهنا حامد تخبل وكال
حامد : موانه الي انطرد حجي انه جيتك لان قبل سنين كعدنا وانطيتكم شرطي وانتم وافقتو وماتعديت عليكم وصار الي صار انتم ماتحكوني بشى وهاي مامرجيه منك وبيتك يحرم علي وبعد ماتشوف يمامه طول ماطردتها
يمامه : فدوه ابوجنه على كيفك بابا ميقصد
ابو يمامه : اني بنتي ماتت من اليوم الي طلعت وتزوجت وبدون علمي
حامد : يله يمامه امشينا
يمامه : فدوه اوكف خلي افهمه
حامد : دااكلج امشينا
وسحبتها من ايدها وهي تبجي وابوها يصرخ عليها وامها تبجي وصعدتها بالسياره
يمامه : انهاريت وابجي
حامد : امشي بالسياره وهي تزيد بجي ومصارخ گطعت گلبي
بسچ مو راح تموتين
يمامه : ياريت اموت طبني مرض ولا اشوف ابويه هيج زعلان مني
حامد : وكفت السياره ماتحمل دموعها كافي يبت الناس بسچ
يمامه : فدوه رجعني الهم والله اني اقنعه فدوه بداعتي
حامد : هي گالت بداعتي لو خذت روحي
شوفي انه مااتراجع بچلمتي بس گلتي بداعتي وانه مااردنج راح نرجع بس انه ماادخل بيت ابوج يحرم علي
يمامه : لعد شون
حامد : نرجع لبيتج نبقى بيه الليله حتى ابوج يهدى والنفوس ترتاح وباجر من الصبح ترحين ليهم وانه انتظرج
يمامه : مسحت دموعي ياريت فدووه
وصدوك رجعنا لبيتي همزين جبت المفاتيح ويايه جان بالي ارجع للبيت اجيب كم ملابسي وملابس البنات الباقيه
دخلنا للبيت وهو راح يجيب اكل مسحته شون مجان بس اقلها مكان نظيف انام بيه وحضرت غرفة النوم وكمت اطلع بالملابس لميت ملابس البنات بالجنط وكم قطعه رادوها ورجعت للكنتور مالتي الم بيه طلعت ملابس عندي جدد وحلوات جنت ماالبسهم كلت خلي اخذهن واكو خانه حاطه بيهم غراض وصور اتذكرت ايه رادت صور صديقاتها مال مدرسه شبعتني بوس حتى اجيبهم وفتحت الكنتور وبديت اسحب بالصور وجان توكع رساله عادل اول رساله استلمتها منه

يمامه : قريت الرساله موبيدي اول رساله منه اقراها واكول ليش خنتني بعد كل هذا الحب ليش ونزلت دموعي ومااحس غير حامد يجرها من ايدي ويصيح هاي شنهي ويفتح عيونه قراها مصدوم وهي بيده

يتبع ..