رواية سجينة الروح الفصل التاسع والعشرون 29 - بقلم ريام هادي

سجينة الروح
للكاتبة Reem
البارت الثامن والعشرون

اريد اكتب شعر واتغزل باسمك
لان اسمك جميل وجاي من رسمك
اذا مو الك اكتب المن لعد اختار
صدكني الكلب مشتاك يكتبلك
احتار القلم لمن جبت طاريك
يكلي الورق يخجل لو كتب اسمك
صفن بيدي القلم وصرت اني احاجيه
ويكلي بصراحة شراح اكتبلك
ضحكاتك غزل يا كامل الاوصاف
واشفافك عسل والورد من عطرك
وعيوني من تشوفك تبقى تحلم بيك
تحجيلك شعر والرمش يعزفلك
مو كافي وصف يل بيك حلو أطباع
بس شوصف بعد لو رايد اوصفلك
فداك العمر وحتى الكلب و الروح
ولك كلي فداك .... اتريد احلفلك

ودق : جفلت والخوف سيطر عليه واني اشوف الشارع كله رياجيل ملثمه وانواع الاسلحه بيدهم احس قطره دم ماكو بجسمي وين ننطي وجهنا الشارع من الجهتين مسدود وبس نسمع صوت طلقات يعني مابيها مجال رحنا بيها اني ومازن هو خطيه لزمني حيل من ايدي واكيد خايف مثلي ويجوز اكثر لان اني ويااه تأخرنا شجانا السوالف اخذتنا ومنتبهنا على الوقت

واحد من الملثمين : شسون هنا
مازن : جنا طالعين نتمشى وهسه نريد نرجع للبيت
زين انت متخاف وفوكاها ساحل بنيه وياك وين بيتكم
مازن : هنا بعد فرعين
الثاني من الملثمين :بله انت شكلت لنفسك وياك بنيه شابه وتفترون بشوارع هاي وحده موزينه موو
ودق : وجان يجيت مازن عليه بله هذا من كل عقله ذوله غير هسه يطحنونا اني كمت اصك بسنوني من الخوف والدمعه بعيوني ومازن يتعارك وياهم شنو اليوم مشبع عركات

مازن : احترم نفسك هاي خطيبتي وبت عمي وجنا طالعين خطار ورجعنا والوقت اخذنا
لك وخر ايدك لاارميك هم الك عين وتحجي
عوفه سيد وانت انطيني هويتك
مازن : هاك
حلوو وفوكاها طبيب روح اخويه منا هسه راح تعلك اكثر والله يستر على وليانه (اهلنا) ونصيحه مني لاتفتر بعرضك تالي الليل حتى لايصيرشى متحبه واذا متخاف على نفسك خاف على عرضك اخذها وروح تله كلها دقايق والمنطقه تصير بيها مواجهات يله
مازن : رحمه الله والديك يله امشي

ودق : ولزمني مازن ونمشي بنصهم واني رجلي كوه اجر بيها
مازن : شبيج ودق امشي
ودق : احجي واطك سن بسن
ودق : مازن اخاف نمشي سريع ويضربونا طلقات
مازن : ههههههه لا لتخافين ذوله من اهل المدينه عدهم هنا صيده ويرحون
ودق : شون يعني
مازن :مالج علاقه امشي بسرعه قبل متعلك
ودق : مازن
مازن : هاااا
ودق : خلي نركض
مازن : شبيج تخبلتي شعدنا راكضين
ودق : والله اذا متركض هسه ويايه اعوفك واركض ياروح مابعدج روح

مازن : صدوك تحجين
ودق : والله
مازن : ماكو شى وعافونا وهسه نتمشى ونوصل على شنو الركض
ودق : مالي علاقه راح اركض معاجبك انت امشي على كيفك

هو لازم ايدي ونمشي وحتى منتبهت بعدنا ايد بأيد وجان اركض واني لابسه ترانشوز من الخوف صرت عدائه طلقه اركض وهو يركض ويايه ويكولي ولج على كيفج واني ولا يمي طلقه بس التراب ورايه
مازن : ولج نفسي انكطع اوكفي
ودق : والله ولا اوكف وركض وجان نوصل للبيت فتحنا الباب وهو طب يلهث مدنج كوه يجر النفس واني سديت الباب حيل وخليت ظهري على الباب واتنفس بسرعه

مازن :الهث واحجي ولج شنو انتي شاده محركات برجلج اريد الحك بيج ماكو ولو ما لازم ايدج جان اصلاً مطبينا سوه
ودق : شسوي الروح عزيزه اركض بجلدي احسن نحجي واحنا بالكراج ونلهث وجان اضحك بصوت
مازن : صوتج شبيج تضحكين
ودق : ههههههه ههههههه مووو هههههه
مازن : ههههههه هسه اني اضحك على ضحكتج ليش وماادري شنًو السبب ولج فطيره فهميني قبل شويه جنتي تبجين وراها خفتي من المسلحين وهسه تبجين من الضحك شجاج
ودق : ههههههههه مووو والله
مازن : وجع غير تحجي
ودق : شوف لو اني رجلي خضره عليك بحيث كل متشوفني توكع بمصيبه لو انت رجلك خضره عليه كل مااشوفك تجيب المصيبه وتجيني هههههه
مازن : اياا خبله بس اكيد انتي الي رجلج خضره

ودق : لا والله انت ابو المصايب ماشفتك بيوم اذا مصارت مصيبه تكول ماخذ عقد حصري بكل مصيبه توكع بيها ودق لازم الدكتور مازن حاضر وبقوه
مازن : ههههههه همزين موجود اقلها اكو من ينقذج
ودق : انت بس ابتعد عني كل الخير اشوفه عمي انت رجلك خضره بس الكوارث
مازن : واذا وكعتي منو الج
ودق : لتخاف مااوكع واذا وكعت اكيد انت موجود غير سوبر مان صاير
جان يصفن عليه وتقدم بأتجاهي واني صفنت
مازن : تدرين ضحكتج حلوه وخاصه اذا من گلبچ
ودق : ارتبكت يحجي بهدوء ويباوع على عيوني بتمعن اول مره مازن يحجي هيج ويايه دوم من نلتقي لازم نتمالخ قبل شويه جان هادئ ورزن وكدر يحتوي تعبي والقهر الي عشته وامنت بيه وحجيت كولشي اله رغم هو اخر واحد اتوقع بيوم احجيله المي بس حجيت وهسه هذا هدوئه وكلامه خلاني متفاجأه منه
ودق : دنجت شكراً
مازن : والله ميلوكلج الخجل
ودق : هههههههه اي والله

وجان ماما تفتح باب الصاله
يمامه : هاي انتم هنا واني متت خوف عليكم فوكاها يامازن شون تنسى تلفونك هنا
مازن : والله عمه بعد صارت
ودق : باوعت على ماما
يمامه : يله ادخلو ارتاحو
دخلنا وماما عافتنا ودخلت لغرفتها
مازن : روحي وراها وكافي عناد ولتزعليها منج تره امج دره مال الله وتحبكم وكل الي تسوي لمصلحتكم خليها تعيش كم يوم لنفسها تره امج تستاهل واحد مثل حامد
ودق : منو يشهد للعريس
مازن : همزين اني مو امه
ودق : بس ابنه اوويلي منكم الرياجيل
مازن : واويلي منج ام لسان يله امشي كافي عناد واني راح اسبح وانام اليوم جان حافل بالمنجزات من وراج
ودق : حمام الهنا وتصبح على خير
مازن : وانتي من اهل الخير

رحت على ماما دكيت الباب وطبيت جانت كاعده تسبح بالسبحه ومتمدده على ظهرها
كعدت يمها واني مااعرف شون افتح الموضوع وياها
ماما
يمامه : هااا
ودق : اني اسفه والله موقصدي اتجاوز عليج
يمامه : ودق اني عمري معاملتج معامله طفله من انتي وصغيره اتعامل وياج بأحترام واعتبرج اختي وبنتي واعتمد عليج بكولشي هوايه تصرفات جنتي تسويها ومااحاسبج عليها اكول يجي يوم وتكبر وتعرف تتصرف بس الظاهر اني دللتج وانطيتج عين وصلتي مرحله عليه تتجاوزين وتعلين صوتج وتحاسبيني هاي بعدني بحيلي وهيج ماعندج احترام اليه من اكبر وحيلي يروح يجوز اتشمريني بالشارع

ودق : كمت ابجي لا ماما عفيه لتكولين هيج
يمامه : اليوم صدمتيني بقله احترامج اليه
ودق : احجي وابجي واشهك ماما اني خايفه والله خايفه
يمامه : من شنوو
ودق : مااريد ارجع للعماره مااريد امشي برأيهم تمنيت تبقين على رأيج وتسحبينا منهم بهذا الطفل رجعتينا لنقطه الصفر وبالعكس هلمره راح ننجبر للابد نبقى هناك بحجه ابوه واهله هناك
يمامه : منو الي كلج نرجع لعد الي سويته كله هذا شنو غير لمصلحتج ومصلحه خواتج
ودق : بالبدايه حاربتي بكل قوتج حتى ترجعينا هنا بس وراها ضعفتي وحبيتي عمو حامد ونسيتي بناتج وهدمتي كل الي جنتي تحاربين بيه لخاطرنا
يمامه : شون انساكم اني انسى روحي وماانساكم اصلاً بسببكم اني عايشه ودق ماما ليروح عقلج لغير مكان جيتي هنا لخاطركم
ودق : بس هذا الطفل راح يجبرج ترجعين الهم وبعد نبقى بسجنهم طول العمر
يمامه : زين انتي ليش تكرهيهم
ودق : انتي هم جنتي تكرهيهم وميته منهم بس بسبب حب عمو حامد كمتي تتقبلين العماره

يمامه : ماانكر اني حبيته لعمج بس هواي شغلات انتي متعرفيها ومااكدر احجي الج من تكبرين بعد اكثر يله اكولج
ودق : اني كولشي اعرف ماما مازن حجالي عن حب عمو الج
يمامه : شوكت كلچ
ودق : قبل شويه صحيح هو يحبج حب عظيم وانتي هم حبيتي بس هذا الشى راح يدمرنا ميريحنا
يمامه : ليش يدمركم ياامي
ودق : اني ردت ابتعد عن تحكمهم وسيطرتهم علينا ونبني حياتنا بعيد عنهم مكافي الشرط الي حاطي من نصير عمرنا ١٨ سنه لازم نتزوج واحد من ولد عمنا بله هذا حلال حرام على اي اساس يتحكمون بمستقبلنا شنو مجبوريتي اتزوج واحد مااحبه والله شنو عمي وبيبيتي هيج يردون

يمامه : اني كتلهم مااجبركم على شى انتم تختارون
ودق : بس خيار محدود لو مازن لو منير يعني لو الموت لو جهنم
يمامه : لهاي الدرجه كارهتهم
ودق : مو مبدأ كراهيه بس اني اريد ابني نفسي وحياتي واكمل دراستي واكون حره نفسي ممستعده اصير خدامه لرجال يتحكم بيه وبكولشي يخصني وتالي يخوني ولازم اكله خلف الله عليك لان متزوجني

يمامه : اشكرج ماما هاي اني
ودق : ماما افهميني اني مقصدتج الج اني اقصد نفسي اني مااريد اتزوج لا من مازن ولا من غيره ولا اتزوج اصلاً اريد اكون حره نفسي واصير شى بالمستقبل ورجوعنا للعماره راح يقيد حياتي ومستقبلي لهذا من سمعت بيج حامل حسيت مستقبلي كله انتهى وراح نرجع تحت سيطرتهم
يمامه : لتخافين ماارجعج للعماره
ودق : متكدرين يوم راح يجبروج مثل مجبروج ذيج المره وهلمره الحق اكبر وياهم لان الاب بالعماره شون الام بغداد صعبه واذا عمو صبر عليج شهر شهرين مراح يصبر العمر كله

يمامه : اووف يابنتي
ودق : حضنتها لتزعلين ماما اني يجوز انانيه بتفكيري بس والله من وره الي شفته اترجاج ماما افهميني
يمامه : والحل ماما
ودق : ماكو حل الي صار صار والله يكومج بالسلامه بس اريدج تنطيني وعد توكفين دوم بجانبي وتخليني احقق احلامي وطموحاتي ولتخليهم يجبروني على شى مااحبه ومااريده
يمامه : وياج اني ماما اهم شى راحتج وسعادتج لو اعرف احرك الدنيا كلها وادوس على گلبي المهم انتي وخواتج ترتاحون وتكونون اسعد البنات
ودق : حضنتها حيل وبستها انتي احسن ام بالدنيا ودنجت وبست بطنها وانت لك مدري لج اريدك لتعب ماما وتعال يله بسرعه تره ضايجين نريد نلعب بيك عطله وين نروح
يمامه : ههههههههه بستها من راسها اروح فدوه لبنتي واول فرحه عمري
ودق : نامي ماما وبعد صحتج مسؤوليتي وعطله اخلي خاله حنان تعلمني شويه شويه حتى اساعدج ومتعبين
يمامه : ان شاء الله حبيبة امها انتي
بست ماما وطلعت رحت لغرفتي واني احس حمل من گلبي وانشال

أيه : بدت الايام تمشي وضعي ويه الدكتوره زين جانت انسانه طيبه وحبابه وتعاملت بكل حب ويايه وشجعتني بأن ارجع للمدرسه رغم جنت رافضه بشكل كامل رجوعي صوتي بدا يطلع شويه شويه بكلمات مفرده استغنيت عن العكازه ورجعت مشيتي زينه اني حالياً غير ايه شكلي تغير ضعفت بشكل موطبيعي وبسبب الرياضه لان ماما جابت جهاز مال مشي علمود تتقوى عضلات رجلي كمت ادرب عليه بالساعات اقضي يومي بيه واصلاً اكلي من يوم الحادث قليل لان احس حتى طعم بالاكل فقدته نزل وزني وكل الي يشوفني صايره تخبلين ورشيقه ميدرون من الضيم والقهر وروحي المسلوبه الي دفعتهم ثمن لهذا شكلي الجديد

خلصت العطله واليوم اول ايام دوام المدرسه بنهايه شهر التاسع 2007 ماما بدايه شهر السادس بالحمل جسمها ثكل ودوم تلهث وتتعب واحنا نحاول نساعدها وعمو حامد كل شهر يجي يومين او ٣ ويروح
وصلت للمدرسه وارجف وخايفه بس ودق لازمتني عبالك نفس خوف اول يوم دراسه بالاول ابتدائي جان كلامي قليل واكو كلماات متطلع كامله بس ماما حجت ويه المديره وفهمتها وضعي بأن مسويه حادث سياره وبسبب الخوف والصدمه اخرسيت وحاليا بمرحله العلاج دخلت اباوع بالوجوه كلهم اصغر مني راحت مني سنه دراسيه رغم ميعرفون البنات وضعي بس ثقه بنفسي شبه معدومه واتلفت عبالك بيه جرب واخاف اعدي البنات جانت لحظات صعبه وعزله وخوف جنت قبل اعاني من العزله بسبب جسمي والسمن والكل تعيرني سمينه ودبه حميسه واكعد وحدي وهسه رغم شكلي تعدل وصرت حسب كلام الكل تخبلين هم بعزله بس هلمره بكسره نفس قبل اكو حل لوضعي هسه شون احل الي صار بيه واني احس روحي اختلف عن باقي البنات اكول ليش بس اني هيج صار بيه شسويت حتى يأذوني هيج

ودق : هاا ايوته شو كاعده وحدج
أيه : لعد وين اروح (احجي بطئ كولش والدكتوره كالت لازم استغنى عن الدفتر واحجي حتى لو بطئ حتى اكدر احجي مثل قبل )
ودق : اتعرفي على صديقات
أيه : مااريد احد
ودق : زين ليش مأجيتي عليه نكعد ناكل سوه بالفرصه
أيه : مااريد اخذج من صديقاتج واضوجج
ودق : شبيج ايوو ليش هيج وضعج ومن شوكت اني اضوج اذا اجيتي عليه نسيتي شكد جنت اكتل بنات علمودج
أيه : لا منسيت بس قبل تكتليهم لان سمينه هسه على شنوو تكتليهم لان ممصادقيني
ودق : وضعج معاجبني ايوو ميصير هيج تبقين بدون صديقات
أيه : اني اريد ابقى وحدي وعفيه عوفيني وروحي
ودق : شون اعوفج
أيه : كتلج عوفيني تره والله مااداوم بعد
ودق : مااشي بس لتضوجين
أيه : بقيت وحدي وبكل فرصه اكعد بنهايه الساحه وحدي الزم خشبه صغيره الكاها بالكاع وابقى ارسم بالتراب
رجعنا للبيت ودخلت ايه گبل للغرفه
يمامه : هلوو ماماتي بشرو شونكم اليوم
ودق : زٌِيـنين بس وضع ايه موزين ماما بس كاعده وحدها وحتى اني متقبل ابقى وياها
يمامه : عوفيها امي براحتها الدكتوره كالت لتضغطون عليها
ودق : خايفه حيل عليها
يمامه : موبكدي ياامي بس شنسوي بس انتي حطي عينج عليها حتى لو من بعيد
ودق : ان شاء الله
اندكت الباب فتحتها لكيت عمو حامد
هلو عمو الْحٍمَدٍ للـّہ على سلامتك

حامد : يبعد عمج شون كيفچ
ودق : الْحٍمَدٍ للـّہ
حامد : البنيات وين وامج وينها
ودق : جوه تفضل
يمامه : الله يساعدك
حامد : ويساعدج بويه
دوم من البنات موجودات اسلم عليه برسميه لان استحي كدامهن بس من وحدنا لا اكيد يختلف سلامنا كعد يم البنات وشويه وغمزلي
يله ماما اصعدو كافي روحو ارتاحو وراكم دراسه وخلو عمكم يرتاح
دخلنا بغرفتنا وجان يحضني حيل
يبعد حامد وهله شون كيفچ طيرتي
يمامه : الحمدلله حبيبي بالي يمك تأخرت هلمره
حامد : چا غير شغل عندي واله انه اتركنچ
يمامه : اشتاقيتلك حيل
حامد : الله اليعلم بشوگي تعالي ليه شنهي هاي
يمامه : شنوو
حامد : چا انتي دوم هيچ تحلوين تره حتى الله مايرضاها خفي على گلبي تره گلبي رچيچ عليج ومايتحمل
يمامه : هههههههه والله وكعت گلبي عبالي بيك شى وين شوف حالي شون صايره اخوف مدعبله وتعبانه
حامد : چا هو الگمر موش مدعبل وانتي احلى من الگمر ورب الخلقج احلى منه

يمامه : اوويلي على كلامك العسل ولا اكدرلك
حامد : گليلي صحتج شونها
يمامه : الحمدلله ليضل بالك
حامد : رحتي للدكتوره
يمامه : لا انتظرك حتى نروح سوه
حامد : اليوم نروح لان لزم باجر ارجع للعماره
يمامه : ليش ياعيني هو انت اليوم اجيت
حامد : الوادم عدها مشاكل هناك وانه لزم اكون موجود ارد لاتخافين گلها چم يوم وارد لطيرتي چا انه روحي مفرفحه عليها
يمامه : اروح فدووه لروحك يبعد روحي
حامد : اسكتي واستري على رويحتج وكضي لسانج انه ماتحمل تموعين علي وصحتج تعبانه وانه اسمع هيج چاارجف رجيف عليج واكضنج هسه ومااهدج لو مو تعبانه
يمامه : ههههههههه لا سكتت يله ننزل نتغدا

كملنا وتغدينا وبدلت ولبست فستان مال حوامل وهو طول ماابدل يباوع عليه ويكمز واني ميته ضحك بس من وصلت لمرحله الربطه مباشره عقج وجهه وكال شعرج لمي ولا شعره تطلع ولبستها مثل ميحبها مابيه حيل بالشارع وصاح شعرج لو عدلي الشيله

وصلنا للدكتوره ودخلت عليها
فدووه شوفيلي جنس الطفل ولد لو بنيه
ضلت تفحص ويه كل حركه منها گلبي يرجف
الدكتوره مبروك حامل ببنيه
يمامه : انقهرت كولش رغم شيجي من الله نعمه بس ردت ولد لخاطره الحمدلله
الدكتوره : انتي شكد عندج جهال
يمامه : ٣ بنات
والرابعه بالطريق
الدكتوره : لتضوجين تره غيرج يتمنى اضفر بنيه ومحرومين احمدي الله كله رزق
يمامه : صحيح الْحٍمَدٍ للـّہ على كولشي

طلعت وعيوني الدمعه بيها وارجف وخايفه من ردت فعله
يمامه : هاا بويه بشري ً
يمامه : خلي نطلع واكولك احس رجلي متشيلني من القهر
صعدنا بالسياره
حامد : يمامه انه گلبي لعب شنهي وجهج مايتفسر بيج شى صحتج بيها شى
يمامه : حطيت ايدي على وجهي وبجيت
حامد : احجي
يمامه : بيه بنيه
حامد : وتبجين لان بيج بنيه تسودنتي
يمامه : ردته ولد لخاطرك
حامد : هههههه بويه انه احلم اشوفن اظفر بت وانتي امها چا انه الدنيا ماحامله فرحتي جه انتي حبله
يمامه : مسحت دموعي يعني مزعلان
حامد : استغفري ربچ هذا رزق منه وگلشي من الله خير وبركه چا انه عندي جنه تصعد ويه النفس وتنزل وبنياتج رويحتي وهاي البت راح گلهن تدفرهن وتاخذ مچانهن وتصير دنيتي كلها چا هاي بت طيرتي وحگ تعبي وحبي وصبر السنين

يمامه : لزمت ايده اوف شكد حنين انت وطيب توقعت تنقهر او تعيط عليه ويمكن حتى متباوع بوجهي
حامد : ههههههه مسودنه چا انه شون اقهرنج هيج وانه فرحان وحگ هو علي لو ما العيبه من الوادم هسه احضنج بنص الشارع واكولن راح يصير عندي بت من الحبيبه مالتي
يمامه : الله يحفظك اليه
حامد : ويحفظچ يلغاليه يله امشينا نفرح البنيات اجتهن صگارتهن انه اريدن بنتي احلاهن گلهن اريدها تاخذ عيونج اهم شى هاي العيون الي ماخلتلي درب امشي واروحن وارد من العماره لبغداد والحجيه تكول مشموره صرتك بيها
يمامه : ههههههههه والله اشتاقيت الها وللغلط مالتها
حامد : سهله اخابرها واخليها تنطيج سيت مرت غلط چا هيه شيخيه بهيچ سوالف وخاصه اذا ليمامه
يمامه : قصدك البومه اوويلي من تكولها مدري اضحك مدري ازعل

حامد : هههههه لاتزعلين امي طيبه بس هذا طبعها
يمامه : لعيونك كولشي يهون
حامد : چا انتي ماناويه تكعدين عاقله وانه اليوم اتوبج
يمامه : ههههههه توبني براحتك
حامد : اروحن فدووه لضحكتج لاتزعلين مااريدن تكدرين اريدج فرحانه دوم
يمامه : اووف يحامد خليتني اتندم على كل يوم ابتعد بيها عنك
حامد : چا سهله وانه اعوضنج انتي بس اغمزيلي وعوفي الباقي علي
يمامه : هههههههه يله ابو غمزه تأخرنا

كدر يمتص كل الزعل الي بگلبي وحول الحزن الي فرح بكم كلمه ومن وصلنا للبيت جان الفريق برعايه ودق كلها منتظره ومن گلت بنيه ركضو وباسوني ومكيفات باوعت على عائلتي الصغيره ودعيت رب العالمين يحفظهم اليه

أيه :مرت الاشهر واحنا وضعنا هدوء نروح للمدرسه ونرجع وبديت اتأقلم على الوضع ولحد الان اي صديقة تتقرب مني مااقبل موبيدي احس اي وحدي راح تصادقني راح تعرف مصيبتي لهذا قررت ابتعد عن الكل وبقيت التزم بجلسات العلاج النفسي ويه الدكتوره نضال وماما مبقى شى وتجيب دخلنا انذار واولنا عمو حامد جنت اشوف بيه الخوف والحب عليها بشكل عجيب رغم مرات ميظهر هذا الشى بس روميو وجوليت حميد وطيرته مفضوحين

اليوم عندي جلسه واجت ويايه خاله حنان لان ماما متكدر تمشي تعبانه الاشهر الاخيره جنت اكعد ويه الدكتوره وحدنا واليوم قررت اطلب منها الي صار اشهر افكر بيه
ممكن اطلب منج شى دكتوره
نضال : انتي تعرفين معزتج عندي ايوته كوولي
أيه : اريد تكشفين عليه وتشوفين بعدني بنيه لو لا
نضال : شون يعني بعدج بنيه لو لا
أيه : اني بوقتها مو كتلج الدكتوره كالت لماما جيبيها لطبيبه حتى تكشف مدى الضرر سمعت هذا الشى وهيه تحجي ويه عمه فضيله من جنا بالعماره بس ماما مودتني ومجنت اعرف شنو قصدها
بس قبل مده اجتي بالي والي قوه الفكره بالي قبل ايام جنت كاعده بالساحه مثل كل مره وجان اكو بنات طالبات سادس ٣ بنات كاعدات ويسولفن صديقتهن اتزوجت وتكولهن شون اخذها وشون الطبيبه كشفت عليها لان تأذت

نضال : وانتي يابنتي شون تحطين اذنج ويه البنات لتنسين بعدج صغيره
أيه : صغيره بس الي صار بيه كبرتي ٢٠ سنه فوك عمرري
نضال : زين ليش مكلتي لأمج
اخاف مااكدر
نضال : اني دكتوره نفسيه مو نسائيه واكو فرق
أيه : لعد شوفيلي دكتوره تفحصني عفيه ماعندي غيرج
نضال : بنتي ايوته لازم امج تعرف ميصير اسوي هيج شى بدون علمها
أيه : كمت ابجي ولزمت ايدها اتوسل بيها والله مااكدر انام لهسه افكر بوضعي
نضال : بس امج حبابه وطيبه واكيد اذا عرفت تريدين هذا الفحص مراح تتردد
أيه : مااريدها تعرف اني اعرف بروحي مو بنيه بس اريد اشوف شصار بيه
نضال : الله كريم لتبجين كافي

يمامه : جنت كاعده وتعبانه والحمل أذاني واتصلت بيه الدكتوره نضال وكالت الي على طلب ايه الي جمدت من عرفته اني صح موديتها لان مردت اعيشها رعب لحظه الفحص وهيه بهذا العمر مكافي الي صار بيها
بس من شفتها مصره على هذا الشى كلت مابيها مجال اخذها تشكرت من الدكتوره وطلبت مني اجيها بطريقة بحيث مااحسسها بأن هي خابرتني حتى لتفقد الثقه بيها وبعد متحجي
تعالي ماما
أيه : صحتيني
يمامه : اي گلبي تعالي اكعدي يمي
شوفي ماما انتي هسه كبرتي وصرتي ماشاء الله مره وكامله احنا لازم نروح اني وياج للطبيبه
أيه : خابرتج الدكتوره نضال موو
يمامه : ليش تخابرني
أيه : اكيد كلتلج على طلبي
يمامه : ياطلب بنتي بس لا طلبتي هذا الشي منها ازعل منج اذا طالبه منها ومطلبتي مني
أيه : لعد شنو هاي الصدفه صار اكثر من سنه على حادثتي ليش هسه فكرتي توديني
يمامه : لان كلت اخاف يصير بيه شى واني اجيب منو الج ومنو يوديج
أيه : حضنت ماما وكمت ابجي لتحجين هيج فدوه
يمامه : يله امشي نروح اني وياج لدكتورتي خوش انسانه وحبابه جنت دوم اراجع عدها بهمسه بدايه حملي وره السقوط سافرت وعرفت بيها راجعه واليوم عندي موعد وياها وهم نشوف اختج شوكت تشرف للدنيا واحجز يمها للولاده لان ذيج الدكتوره مرتاحيت الها وهم نشوف وضعج
أيه : خايفه ماما
أيه : لتخافين ياروح امج شميكون تبقين عندي احلى واحسن البنات

أيه : جان هذا اليوم مرعب بالنسبه اليه كل خطوه اخطيها واني ادخل للعياده احس جزء من دمي ينشف حتى خفقان بيه دخلنا بعد ما ماما دخلت قبلي وفهمتها على الوضع صاحتني وبهاي اللحظه تندمت لان طلبت الفحص احس رجلي اشللت
يمامه : يله امشي تره الدكتوره عليها ازدحام واني هم لازم تفحصني وراج
أيه : صعدت على السديه واني اشوف اشكال الالات الحاده بصف الدكتوره ردت اخرب من الخوف
الدكتوره : شنو هذا الحسن والجمال شسمج
أيه : كوه يطلع صوتي من الرعب ايه
الدكتوره : عااشت الاسامي اسمج حلوو مثلج يله ايه الحلووه راح افحصج ولتخافين افتحي رجلج ماما وبدت تفحص ومن الخوف مااكدر افتح رجلي استحي وبنفس الوقت كمت ارجف واخاف
يمامه : بنتي اني يمج لتخافين خلي الدكتوره اتجيك وضعج
أيه : ابجي واحجي مااريد مااريد
الدكتوره : بقى شويه حبيبتي شويه بعد
غمضت عيووني وكدرت افتح رجلي واسترخي كملت الدكتوره الفحص واني دموعي موكفت

تعالي ماما البسي واكعدي
شوفي ام ودق بنتج ممأخوذه بشكل كامل
يمامه : وكف گلبي وانفاسي اسحبها بصعوبه
شون يعني وهي بقت تنزف
الدكتوره : بنتج بالحادثه اتوقع الي ميخاف الله تقرب منها بس مكدر يتمم كولشي للاخير والدم الي طلع جان جرح عدها حسب مكلتي بنتج جانت سمينه وهاي المنطقه ترفه ولهذا انجرحت بسهوله لكن صاب الغشاء لكن موو كله بمرور الوقت نوعاً ما التأم لان الممارسه مكانت كامله
يمامه : دكتوره يعني هسه بنتي شنوو بنيه لو لا تره كمت ماافكر

الدكتوره : بنتج بنيه مجرد جرح بسيط جداً بالغشاء وجرح قبل الغشاء هو الي سبب النزف وهي صغيره وبمرور السنين احتمال يلتأم بشكل كلي واذا ملتأم مراح يضر لان اذا تزوجت بليله الدخله راح اتم حالها حال اي بنيه مملموسه وهذا الشى من معجزات ربج لان نادراً ماكو وحده تتعرض للاغتصاب وتطلع منها هيج

أيه : طول حجي الدكتوره واني عيووني مترمش ومشاعر مضطربه الم على قهر على فرح ولحظات عدم فهم بس كل الي افتهمته بيه امل اعيش حالي حال البنات ولو بشى بسيط
ماما من الفرحه دموعها تصب وجان تعيط

اجتها الطلوكه وهمزين هيه الدكتوره نفسها الي تشرف على حالتها ونسيت حالتي وضعي وحرت بماما خفت عليها
يمامه : الفرحه الي صارت بگلبي متحملتها واجتني الطلوكه وجانت حيل صعبه اعيط واصيح الْحٍمَدٍ للـّہ علمود ايه لزمتها وكتلها خابري عمج بسرعه وحنان

اخذوني لمستشفى الجراح بالكراده واني ارجف اريد احد ويايه بس ايوته والله نص ساعه واشوف امي وحنان واختي ورد فوك راسي بس عيووني ادور عليه ردته يمي وقبل ماادخل العمليات كالت ايه كل شويه يدك ويرجف
طلبت من ورد تاخذ ايه للبيت اخاف عليها من المستشفيات وتبقي حنان وماما يمي وتبقى يم البنات اخذت التلفون

وخابرته الوو حامد
حامد : يبعد حامد وهله چايج انه بالطريق
يمامه : متلحك عليه راح يدخلوني
حامد : اااااخ لوانتي يمي چا انه هسه سوه بالمستشفى
يمامه : حبيبي لتسوق سريع على كيفك بكل الاحوال متلحك على ولادتي حامد وصيتك بناتي
حامد : لاتخبليني گلشي مابيج تردين لحضني كلها شوي واطلعين لحبيبج
يمامه : اني كولش احبك والله
حامد : وكفت السياره بعد مااكدر اسوق احس رجلي متعيني وعيوني ادمع گلبي رهيف عليها تمنيت كون يمها وانه وحگ علي احبنج واتنفسج
يمامه : ادعيلي ارجعلك وانتبه على نفسج
حامد : الله ومحمد وعلي وياج وگلبي وياهم

يمامه : دخلت للعمليات وسألوني عن اسمي وراها محسيت بشى
كعدت اون من الالم وحنان تبجي وامي واني عيوني مغوشه واصيح بنتي شونها طمنوني عليها
ام يمامه : يمه جبتي ولد مو بنيه
يمامه : اريد استوعب الي كالته امي مااكدر گلت يجوز السبب البنج
ورجعت صحت بنتي وين

حنان : كاعد تسمعين امج ولج جبتي ولد مو بنيه
يمامه : كوه احجي وابلع بريگي شون ولد
حنان : قدره ربج يمكن السونار غلط
يمامه : شون غلط
ام يمامه : الْحٍمَدٍ للـّہ الله جبرج يمه بولد يصير سند لخواته
يمامه : كمت ابجي بقوه يعني فرحتين بيوم واحد گلبي مديستوعبهن منا ايه وضعها ومنا جبت ولد غسلولي وجهي وكلت لحنان ترتبلي شعري اني طبعاً لا ايد ولا رجل بس غووه بعد من نريد شى لازم نسوي ردت حامد من يجي ويشوفني موو هذا حالي مر الوقت والساعات وحامد مبين گلبي نار صار ٥ ساعات ونص وهو ماكو وحتى الم زاد عندي ادك تلفونه مغلق
ولج حنان ميته رعب حامد مبين
حنان : ان شاء الله ماكو شى لتخافين
احس حتى الفرحه طفت بگلبي

وبدت الدموع تتجمع بعيوني وحتى الطفل كتلهم مااريد اشوفه اله هو يجي وصار ٦ ساعات ونص وهو ماكو يارب دخيلك ولزمت حنان ولج راح گلبي يوكف بس لا صار شى
حنان : لتتفاولين اصبري
يمامه : وجان يطب من فدووه اروحله بطوله وهيبته ودشداشه الزبده والعكال والبشت الي لابسه هيبته تجبر صدوك الواحد يباوع عليه وجان يطب اباوع عيونه تريد تبجي من كثر اللهفه بس امي وحنان موجودات استحى منهم اجه باس راسي

حامد : الْحٍمَدٍ للـّہ على سلامتج يلغاليه صحتج شونها
يمامه : الله يسلمك الْحٍمَدٍ للـّہ شو تأخرت
حامد : بالطريق ضربو رتل مال امريكان وكطعو الطريق وضلو حابسينا فوك الساعتين وانه الوبن عليج
يمامه : خوما بيك شى
حامد : لانخافين كدامج الْحٍمَدٍ للـّہ
وين بنيتي اريدن اشوفنها
يمامه : نزلت دموع الفرح كول ابنك مو بنتك
حامد : يعني شون
ام يمامه : اجاك ولد يتربى بعزك ودلالك وليدي
يمامه : الصدمه الي على وجهه حامد بعمري مشايفتها حسيت على لحظه گلبه يوكف وممصدك الي سمعه انه صار عندي ولد
يمامه : اي الْحٍمَدٍ للـّہ صار عدنا ولد حضني كدام اهلي وبهاي اللحظه البنات طلعن وعافونه وحدنا وهو يبوس براسي ممصدك انه عندي ولد ماسمعت غلط
يمامه : لا ياروح يمامه ماسمعت غلط وهسه ماما تجيبه الك
حامد : شفتي بعينج اخافن يكذبون
يمامه : مقبلت اشوفه الا انت موجود وتشيله حتى قبلي

دمعت عيونه واجتي امي وبيدها ابني وشاله وعيونه نزلت الدموع منها كل هاي القوه والهيبه من صار ابنه بحضنه متحمل ونزلت على خده اعلنت عدم قوتها لان الي صار فعلا هزنا واخذه وباسه وكبر بأذنه
حامد : انه مامصدك
يمامه : ولا اني والله
حامد : مو گالت الدكتوره بنيه
يمامه : تصير مرات غلط بالسونار ليش گتلك بوقتها مرتاحيت للطبيبه لازم ابدلها والحمدلله إٱللـِْﷻـِْﮭﮧ جبر خاطرنا
وطبنا السسترات يتحمدن بالسلامه ويردن حلاوه المولود ميدرون هذا الولد بالذات شكد جنا ننتظره سواء هو او اني واشوف حامد يطلع ضبه مال فلوس ويوزع بله وجع گلب مبقى واحد منطاه يمكن بيومها المستشفى كلها انطاها حتى الي ماله علاقه بوالدتي يمشي ويوزع وطاير طير
واخذ التلفون وخابر الحجيه وفاتح حاكيه واسمع كلامها

الحجية جميله: هاا يمه حميد چابت مريتك
حامد : يمه وليد چابت وليد
الحجية جميله: شنهي وليد
حامد : وروح ابوي وليد يمه صرت ابو علاوي يمه
الحجية جميله: كللللللللش يمه مبارك دخيلك ياداح باب خيبر ماكصرت كلللللللش
فضيلة : هااا يمه بشري
الحجية جميله: ولج فضيله اجانا الشيخ علي اخيك صار ابو علي
فضيلة : كللللللش مبارك خويه الحمدلله والشكر يتربى بعزك والحمدلله على سلامه يمامه
يمامه : اسمع الهلاهل مالتهم وماكو ثواني واسمع الطلق
هااا شنو
حامد : شنهي هذا الطلق
فضيلة : حمود هنا هو وحسان وسمعو بالخبر واخذو ا سلاحهم وحركو الجوو حرگ
حامد : اخوتي ويفرحولي
الحجية جميله: يمه جيب مريتك والفرخ ورد للعماره
يمامه : اني سمعت هيج انقبض گلبي
وطفت بسمتي اندار عليه حس بوضعي

حامد : لايمه هسه هيه تعبانه ونخاف على الوليد من البرد
الحجية جميله: چا شون مااشوفنه
حامد : تشوفي حجيه وينام بحضنج
الحجية جميله: هااك يمه هاي جنه تريدك
جنه : مبروك بويه
حامد : يبعد ابوج
جنه : فرحتلك والله الحمدلله
حامد : جنه انتي تبقين جنتي واول فرحتي
جنه : اعرف يابه والله فرحانه لايضل بالك چا هو غير اخوي وعزوتي
حامد : وانتي گلب حامد وجنته اريدن يصير مثلج سبع واخو خيته انه اعرفنج حنينه وطيبه وراح تحطي بعيونج
جنه : اكيد بويه وسلملي على عمه يمامه
يمامه : انقهرت على جنه اكيد مقهوره وهم تنقهرعلى امها ومانسمع غير صوت احلام تهلهل جفلت شنوو من مره هايه
احلام : بالخير والبركه يبن عمي
حامد : رحمه الله والديج بت عمي
احلام : يتربي بعزنا ودلالنا
حامد : احلام انه اشكرنجن على فرحتج
احلام : چا شون غير اخو بنيتي وحزام ظهرها وانت تستاهل يبن عمي ويمامه تستاهل كل خير
اشرت لحامد انطيني التلفون اخذته من ايده وكتلها والله انتي ذهب
احلام : هههههه چا انه من زمان ذهب ومحد يعرف مبارك خيه
يمامه : الله يبارك بيج والله كلها باركت بس مثل فرحتي بمباركتج ماكو مثلها
احلام : چا شون واركص هم هذا ابن الغالي
يمامه : الله يخليج احلام والله انتي ماكو مثلج
احلام : انه اريدن منج امانه تبوسيلي همسه اشتاقيت ليها
يمامه : من عيووني تدللين والله هيه هم كولش تحبج وتسأل عليج
احلام : اعوفنج ترتاحين
سلمت وانطيت التلفون لحامد جانت ليله صدوك من الليالي الي بعمري ماانساهم يوم مميز بكولشي يوم من بدايته لنهايته فرح

الحجية جميله: تعالي ليه احلام انه اعرفنج مسودنه چا شون هيج فرحانه انه گلت راح تحرك البيت علينا
احلام : لا عمه انه مااكلچ صدري هسه شون النار بيه بس من اصفن على حالي خلف الله عليه صبر عليه وماشمرني چا انه مسويه الهوايل ومتحملني
الحجية جميله: غصبن عليه چا غير بت عمه
احلام : عمه حامد خوش حامد وانه اعرفنه يحبها وربج ماكطع بيه انه خلفت هلوحيده وكعدت وسكتت چا زين ضل كل هاي السنين
الحجية جميله: الله يكملج بعقلچ يمه
احلام : اكلچ عمه بت حجي خلف مريتهم مرت حسين الصغير زعلانه ويه رجلها جي ماوداها لهلها و وانه گتلها روحي لهلج غصب عنه لاتردين اله يجي ويحب على راسچ وگلشي تريدي يسوي چا هسه سمعت طاكها (ضاربها ) جي طالعه غصب عنه وزعلانه مني چا انه شعليه انه گتله يطگها
الحجية جميله: من صخام الصخم وجهج چا متجوزين اله تهجمين بيوت الوادم
احلام : انه شنهي هيه بيها حكرص ماتكعد راحه وتعارك وياه وانه كتلها تكرصه حتى يتوب چا هذا اليسوي زين ينگلب شين
الحجية جميله: كومي لابارك الله بيج هدي من إٱللـِْﷻـِْﮭﮧ يهد حيلچ وانه اكولن عقلت المسودن يضل مسودن چا هيه كوه
احلام : اروحن اشوف بنيتي جنه
الحجية جميله: وحگ العباس گلها تعقل وهاي البت تضل مخبله وتحب الطلايب

صار ٤٠ ايام من جبت والكل مكابلني وكاعد واولهم حامد يروح كم يوم للعماره ويرد يرجع سواها باب الشرجي حتى مرات اخاف عليه من الطريق وهو ولا يمه يكول شوفتج عندي وشوفه علاوي تسوه الف طريق وتروح التعب مني
اجه اليوم النا واكيد طاير طير وحاير شيجيب عدا الذبايح الي ذبحهم هنا وهناك علمود سلامتي وسلامه الطفل صار الليل واجه يمي كعد شون كيفها لطيرتي
يمامه : بخير اذا انت بخير
حامد : يمامه
يمامه : عيونها
حامد : انه اريدنج تحضرين رويحتج
يمامه : ليش
حامد : راح تردين وياي للعماره
يمامه : شتكول حامد مستحيل ارجع احنا شكلنا
حامد : چا انه اضلن هيج يارايح ياراد من بغداد للعماره انه اريدن مريتي وابني بحضني هذا حالي بربچ
يمامه : شبيه حالنه اني من هيج خفت اخلف شفت
حامد : لاتعصبيني عليج انه حتى لو ماجاي الوليد هم اردج للعماره لا عبالج من جبتج هنا اعوفج دوم بغداد انه مشيت وياج عبن تهدين وحتى البنيات وخاصه أيه تحسن والحمدلله تحسنت البت وحتى لو ماحبلتي چان رديتكم لهناك شون توقعين اعوفنج العمر كله هنا
يمامه : يعني وجودي جان وقتي حتى لو مجبت علاوي
حامد : واخيرا فهمتيني وهسه ماظل عدكم كعده تردين وياي اذا حابه يخلصون البنيات مدرسه ولنص السنه نردهن
يمامه : وهاي يبقون هيج بناتي يومياً منقولات والله تبهذلن ويانه يعني والله حرام
حامد : انتي الي ردتيها انه مايصرفلي هذا الوضع اضل هيج وانتي بعيده عليه
يمامه : اروحلك فدوه مااريد ارجع والله مااتحمل لتأذيني وتأذي بناتي خليني مرتاحه وهنه هم مرتاحات
حامد : هذا الي عندي لا تصعبين الامور چا شون تردين اضل هيج وانتي بعيده
يمامه : كمت ابجي والله تعبت يوميه لارايحه للعماره ياراجعه لبغداد زين بداعتي اتحمل بس السنه الجايه
حامد : ليش
يمامه : ودق سادس راح تصير ومدرستها مال متميزين اريدها اطلع معدل وأيه هم بكلوريا فدوه بس السنه الجايه والله وراها نرجع بس خلي بنات يكملون بكلوريا بداعتي بداعت علاوي عندك اتحمل
حامد : استغفر الله امري لله بس تردين مالج عذر بعد
يمامه : ارجع وعيونك بس خلي السنه التجي تفض
حامد : هذا هو كافي لاتبجين انمرد گلبي عليج
يمامه : اروح فدوه لگلبك وجان يندك التلفون واسمع بجي
حامد : شنهي فضيله تهدي خلي اسمع زين
فضيلة : الحك خويه امك لو تلحك عليها لو لا

يتبع ....