رواية سجينة الروح الفصل الخامس عشر 15 - بقلم ريام هادي

اسفه جداً والله نزلت البارت ساعه ١٠ نفس التوقيت وهسه اجيت اقرأ تعليقاتكم لكيته معلق وممنشور ومكتوب مسوده متت قهر 😔 اصلاً انزله الكم قبل البيج دوم اعذروني والله صار خطأ بالنشر

سجينة الروح
للكاتبة Reem
البارت الرابع عشر

عشكًناكًــم عشك مجنون دومه يمرعـــد هدومه
عشكًناكًــم عشك سكران يشوف الدنيا مكلوبه
عشكًناكــم عشك مسلم حبكم اول ذنوبه
عشكًناكــم عشك كافر مات وفاتته التوبه
عشكًناكًــم عشك غركًان بس الجرف مطلوبه
عشكًناكــم عشك مظلوم بوحشه ورحل محبوبه
عشكًناكــم عشك خمــار مات وبيدة مشروبه
عشكًناكــم عشك مسجون يمه احلامه منصوبه
عشكًناكــم الف ياحيـــــــــــــف حبكم بيًن إكــــذوبة

الرجوع قبل 5 ايام من الزواج

حسان : هاا خويه شنهي كاعد وعايف الوادم وحيدها تعال عدنا فصل لازم تفضه
حامد : الشيخ صبري موجود هو يفضه انه مالي خلك خويه عوفني بدردي (بهمي)
حسان : چا بعدك ياخوي چاانته ماتكدر بلياها ردها ليك وانسى الجرى
حامد : شنسى وهيه گتلت ولدي وبدم بارد ومارفلها جفن چا هيه هينه ياخوي انه اسنين انوحن عليها ويوم ماحصليتها وربك يرزگني منها الوليد الي انتظره هيج تكتله ولا فوكاها تخش بعيني ولا جنها مسويه شى

حسان : خويه ليش نغالط رواحنا البت انجبرت على الزواج وتخاف يربطها وليد بيك على كيفك وياها چا طيرتي وطيرتي وماتحملت منها الزله
حامد : يازله حسان هاي كسرت چلمتي وگتلت روح مالها ذنب چا هيه هيج كالوها انه احبنها اي بس تكسرني ماعاش المره الي تكسر حامد

حسان : والنعم منك خويه بس لشوكت تبقى هيج شايل هموم الدنيا على ظهرك چا انه گلت راح ترتاح تطينت بالزايد
حامد : انه اريدن اربيها واخليها تتوب تكسر چلمتي
حسان : خويه انت عاقل وحكيم وسنين تحل بمصايب الوادم والكل تشهدلك چا هاي الشغيله البسيطه ماتعرف تحلها
حامد : چا هاي البسيطه التكولن عليها كاسره ظهري جي احبنها وروحي معلكه بيها وهذا الگلب الطيح حظي وسنين خلاني اعيشن بسجنها چا كلي شوكت اتحرر منه واعوفنها وانساها
حسان : وحگ ابوفاضل انت ماتنساها لو يطلع الحمزه چا ماتسكت انساها هذا الشط لو يحجي چان طلع لسانه علينا وطردنا ونعل ابهاتنا من كثر مانحجي بيها كضينا سنين هنا ماعدنا حجايه اله الطيره بالنص چا هي الوادم عالكه وطلايب ودم وصاح اشتاكيت لطيرتي لو الوادم تفصل وهذا يوكع وهذا يرفع وانت تصيح وينها اشتاكيت لعيونها خليني ساكت لا اذبن روحي بالشط وابليك بيها واخذ فصل منك كياعينك (الاراضي) گلها واخليك صگد تنوح

حامد : هههههههه والله ياحسان گل كياعيني فدوه لترابك انت خويه وحزام ظهري وشيال همي
حسان : چا من ساعه السوده الشلت همك چا هو هم واحد وصار سنين نحچي بيه من الهم الاكشر عمي انه اروحن عليها واكلن الها تعالي خويه هذا مدوهن بحبج وانتي بت ١٤ سنه خويه خلص عمره گله يصيحن طيرتي رحمه لذاك الاب الطيب ماتحبينه وتكسبين اجر بيه مو بيه حتى اخلصن من دوخته وشكوته چا تنلام بيك جموله من تكولن تسودنت من وره البومه چا حگها گلشي وصحت طيرتي

حامد : ههههههه چا غير احبنها
حسان : وانه اكرهنك بس فضنا لو تردها ليك لو تتركها لحالها تعيش بنياتها چا غير تفك ياخه عنها

حامد : چا الدنيا أگلبها عاليها سافلها ومااعوفنها
حسان : خوش چا شون لشوكت البت صارها ايام وانته ماتعرف شى عنها
حامد : انه اعرفن شوكت الوكت المناسب لايضل بالك اردها واربيها
حسان : الله يعينك ياخوي ويعيني عليك
حامد : كوم انشوف الوادم شحصل بالفصل

ودق : صار ايام واحنا بدون ماما احس روحي تايهه بلياها شكد احبها لماما بس من ابتعدت عنها تعبت وحسيت بقيمتها صدوك محد يحس بقيمه الام بس الي يبتعد عنها واني گلبي نار عليها واحس روحي غريبه وخايفه وحتى احس روحي اني الام ومسؤوله عن خواتي بس تعبت من الترقب والانتظار شوكت يرجعها اووف

أيه : شبيج صافنه ليش متقرين موباجر عندج امتحان
ودق : اشتاقيت لماما حييل
أيه : اني هم والله بس اليوم مو حجيتي وياها
ودق : اي بس اريدها يمي ويانه هاي همسه هم تدلع شلعت قلبي وبليل تضوجنا يله تنام وكل متحجي شوكت تجي ماما واني هم دااتعب بلياها حيل وهذا عمج عافها ودار وجهه وراح وكال كم يوم وترجع وين صار اكثر من ١٠ ايام
أيه : والله اني هم مشتاقتلها وحتى من دااخابرها حسيتها حيل زعلانه وتعبانه يمكن اروح لعمو حامد اكله رجع ماما كافي
ودق : اياج هيج تسوين هسه عباله ماما طلبت هذا الشى اكعدي واسكتي مالنا علاقه بلكت يمل ويطلكها ونرجع انعيش بغداد
أيه : انتي من كل عقلج عمو حامد وبيبي جميله تعوفنا لماما اذا صار هذا الشى اصلاً ياخذونا ويخلونا نحلم نشوفها
ودق : اوف والله تعبت من هذا الوضع اني راح اطلع اتمشى بره
أيه : لتتأخرين عفيه هاي همه عدها باجر امتحان املاء وشلعت قلبي كوه تحفظ
ودق : بس اتنفس شويه واغير جو وارجع ليضل بالج
جنت اتمشى وجان اشوف منير
منير : هَــْـِْـْْـِلاّ بالغزاله وين رايحه
ودق : هلو منير اتمشى شويه ضجت من القرايه انت وين رايح
منير : للبيت اريد ابدل معزوم على فطور ويه اصدقائي
ودق : بخت تكدر تطلع براحتك وين متريد واحنا محبوسين هنا
منير : لعد شتريدين عيني تفترين براحتج واطبين واطلعين
ودق : هاي انتم كلكم نفس الطبيعه والعقل
منير : انتو ليش الي يخاف عليكم تكول عليه عقل متخلف
ودق : مو متخلف بس الدنيا اطورت ليش تعتبرون المره عدكم خدامه بس للطبخ والكنس والمسح وممنوع اطب وتطلع
ومن ابسط حقوقها تحرموها
منير : يعني اله ديحن بالشوارع يله بهذا الشى نعجب
ودق : وشجاب الدياحه بالنص اني قصدي اطب اطلع براحتي اذا اريد اسوي شى لو بنصكم اسوي يعني البنيه ميمنعها عن الغلط غير اخلاقها وتربيتها تره الحبسه مالتكم مابيها كل منعه اصلا. تخبلنا عليكم بالزايد

منير : انتي مشايفه الوضع شونه الشوارع شونها بابا الخطف صاير بالجمله همه ولد يطلعون لو يرجعون لو لا احنا صح الْحٍمَدٍ للـّہ هنا بالعماره ماكو بس بغداد صايره كلها مافيات سرقه وقتل بالجمله
ودق : شوف لو احجي منا لباجر مراح تفهمني ولا اني راح افهمك لاا دوخني ولا ادوخك

منير : تعالي اكولج شو انتي كعد تحلوين
ودق : ههههههه والله انت موطبيعي هسه جنت گالب عيونك وتحجي بجديه شغيرك
منير : هو الي يشوف هذا الحسن كله ميتغير
ودق : منير لتاكل بعقلي بهذا كلامك اني مو مثل صديقاتك وتلعب عليهن بالكلام ولتنسى اني بنت عمك
منير : والنعم اني شحاجي غير انتي محلوه وابدي اعجابي بيج احجي صدوك مااعجبج اشاقه مااعجبك احرك روحي وانورلج يله ترتاحين واصير احلى گلوب محترك الج
ودق : هههههههه دااتخيل شكلك محروك وتفتر تنور الدنيا
منير : وتجي الحجيله جميله ودك بالعوجيه على راسج لان راح تكول من وراج ابن ابني اشتعل
ودق : هههههههه هاي بيبيتك كارثه من الله ادور الزله علينا وخاصه اني
منير : انتي تعشقج من جوه روحها لو بيدها سم تحطلج وتشدج على ظهر العجل وتفر بيج كل الديره ودك بالعوجيه هم تموتين مسمومه وهم متكسره وهم ميبرد نارها منج
ودق : ههههههه عساااه مابرد هههههه
ودااضحك واسمع عيطه ورايه

مازن : بعد صوت ضحكتج واصل لبغداد
ودق : اهووو هم انت (احجي بگلبي)
حتى الضحكه هنا حرام بكولشي مدخل روحك

منير : هااا الله يساعدك شوكت رجعت من الدوام
مازن : وانت شعندك هنا ويه ودق مو كلت عندي شغله وراها اروح معزوم
ودق : وانت شعليك لو حتى بهاي تدخل
مازن : الحجي مموجه الج لمنير انتي اسمج منير
ودق : بس منير واكف ويايه لو حتى بهاي لازم ناخذ اذنك ونشوفك تقبل لو لا
مازن : صوتج نصي ولا والله افرك حلكج واخليج شهر متكدرين تفكي
ودق : اي مو تايهه الك
مازن : حابه تجربين وشوفي منو يطلع وراج

ودق : يله
منير : يمعودين اذكرو الله شبيكم جنكم ديوجه هراتيه وتتعاركون وتره ودق واكفه يمي مصار شى ليش عصبي
مازن : منير روح للبيت يله
ودق : خلي اني اروح عكرت مزاجي وجان يسحبني من ايدي حيل اوكفي
مازن : اوكفي روح منير
منير : على كيفك وياها مازن صدوك كذب مكعد تشوفني دااكولك واكفه يمي مطالعه وحدها حتى تتخبل هيج

مازن : روح منير يله بسرعه
ودق : وهذا الجبان منير بعيطه من مازن خله وراح هد ايدي شتريد
مازن : تعالي وسحبتها من ايدها
ودق : ااااخ ايدي عوفني
مازن : اكعدي
ودق : مااكعد وعوفني اروح لو اعيط واگلب الدنيا والله واكول لعمو حامد عليك جان يسحبني حيل وكعدني على المصطبه الدوم اكعد عليها بالحديقة
شتريد يله فضني
مازن : لج بابا انتي ليش هيج شنو هذا اسلوبج وهمجيتج
ودق : خليت الاسلوب الحلو الك
مازن : ودق لتنسين اني ابن عمج واكبر منج ب٨ سنوات يعني احترميني ولتخليني اعلمج شون يصير الاحترام

ودق : انت شتريد مني حصره وكفت ويه احد عطت حصره ضحكت عطت حصره اطلع تتخبل شتريد مني شيلني من عقلك يااخي تره والله مصختها
مازن : ليش هي تصرفاتج مال وحده عاقله تكمزين وصوتج عالي واي واحد يحجي وياج تاكلي وتشربي بالكلام يعني هذا الاسلوب مال وحده متربايه
ودق : متربايه غصب عنك وعن اهلك افتهمت

مازن : صرت نار ولزمت ايدها حيل ولويتها بقوه
اسمعي لج مبين انتي متجين بالحسنا والهدوء من اليوم اذا اسمعلج صوت عالي او اطلعين بكيفج او تتجاوزين على احد والكعبه المشرفه اكطعج تكطع واخليج تندمين على الساعه الي فكرتي بيها تتجاوزين او تكسرين كلامي كافي سكتتلج هوايه شنو ماكو واحد يوكفج عند حدج بعدج بكد القندره ولسانج شطوله واي سلوب ماعندج من تكبيرين بعد شسوين اذا امج انطتج عين اني مو امج اني مازن وجري عدل واله اشوفج مازن شيسوي

ودق : اااااخ عوف ايدي راح تكسرها كامت توجعني عوفها
مازن : هاي كرصه خفيفه مره ثانيه ماالويها اكسرها وروح ابويه واكسر راسج هم سمعتي لو لا جري عدل
ودق : عوفني وكمت ابجي لاول مره اخاف من مازن جان عصبي حيل نار وايده حيل قويه بس لوه ايدي احسها راح تنكسر بيده واني وحدي ويااه وفوكاها ماما ماكو حسيت بالضعف والخوف
مازن : لتبجين اسمعي كلام وماأذيج
ودق : هاي لان يتيمه هيج تسوي بيه تعرف ماكو اب يطلعلك ويوكفك عند حدك اعرف ماعندي احد بس ماما وماما هم ماكو وكمت اشهك

مازن : عفت ايدها ماله علاقه اليتم بهذا الشى لتنسين اني هم يتيم لترمين اخطائج واسلوبج التعبان بهذا العذر تعرفين احنا بظهرج ومااخلي بشر يمس شعره منج لو على كص رگبتي بس ياودق عيب انتي بنيه ومحسوبه علينا
ودق : اني شسويت مو كاعده بالغرفه ومااندك بأحد
مازن : وصوتج العالي وضحكج وعركاتج بالمدرسه
ودق : هااا ياعركات
مازن : لعبالج ماكو واحد وراج يسأل تره النفس الي كاعد تاخذي اني مراقبه

ودق : وانت منو سمحلك تراقب ابويه اخوبه مالك حق
مازن : ولج صوتج نصي مو هسه رادت ايدج تنكسر بأيدي وبعدج على نفس الاسلوب هااا عاجبج اكسرهن الج حتى تصيرلج عبره
ودق : لا لا عفيه نصيت صوتي
مازن : شون متريدين نسأل قابل نعوفج براحتج كتلك النفس الي تاخذي مراقبه صيري عاقله وكبري وكافي الشمخره الزايده وصيري بسيطه ومتواضعه وحبي الناس حتى الناس تحبج وهذا لسانج الي جنه رشاش ضبي شويه واحترمي نفسج حتى المقابيل يحترمج افتهمتي لو اعيد

ودق : افتهمت ودنجت
مازن : عفيه بالسباعيه يله كومي اقري
كمت من يمه ومشيت من حسيت روحي امنت جان اعيط واطلع لساني لو تموت مااعقل وعناد بيك وكمت اعيط هييييي واضحك بصوت عالي وركضت وجان يركض ورايه واني افلت والله صرت عدائه ههههههه ودخلت للغرفه وقفلت الباب
جان يدكه

مازن : عبالج تفلتين كلهن ضامهن الج
ودق : شسوي سوي ميهمني
أيه : شكوو شبيكم
ودق : هذا ابن عمج الشفيه صاير رجال براسي
أيه : ولج عيب هو رجال وغصب عني وعنج وغير ابن عمنا ويخاف علينا
ودق : بله مطيرين والله اله اجلطه اني اله
أيه : إٱللـِْﷻـِْﮭﮧ يهديج والله انتي اجلطين اكبر واحد وكدها

مازن : من شفتها ويه منير كولش ضجت حسيت بغيره وبقيت الوب وضغطت عليها لان هي حيل متمرده اريدها تصير هادئه وعاقله بس هي وكحه نار ومن عاطت وركضت لو لازمها اله اسحلها بس بعدين ضحكت على سوالفها اني الج ياودق اذا مااروضج وبقيت امشي وابتسم على شكلها من تكمز وتضحك وتهز بشعرها مثل الطفله العنوديه بعيني وراج وراج اذا مااخليج انعم من الدخن مااسمى مازن

أيه : عمه فضيله
فضيلة : يبعد عمتج ورويحتها
أيه : تسلم روحج عمه ابراهيم وين
فضيلة : يشتغل يمه ليش محتاجه شى هسه انه اجيبنه الج
أيه : لا عمه ممحتاجه متقصرين بس هيج سألت على ابراهيم لان دوم اشوفه ماكو وكل مااسأله يشتغل ميتعب ليش بس هو يشتغل بالكاع
فضيلة : يمه ايه الوليد كبر ولازم يلم نفسه چا منو يعينه لو طاح غير جيبه ووليدي ماعنده اخو صچ خاله حامد موجود ومايگصر و وليدات خاله موجودين الله يحفظهم بس كلمن حاير بدرده (بحياته) وانه اخافن على وليدي من العوز مااريدن بيوم يمد ايده للغريب ويطلب

أيه : ليش مو عنده الكاع الي يشتغل بيها
فضيلة : لا يمه هاي الكاع مال عمج حامد ومشكور وماكصر خلاها بيد ابراهيم حتى يزرعها ويلم نفسة چاانه اخوي حامد مش اخ هذا اب للگل والنعم منه بس لازم اعود وليدي مايحتاج احد احنه يمه مادايمين الكم لجن لازم نحسب للبعيد
أيه : الله يقويه ويرزقه
فضيلة : تسلمين يايمه ماجعتي
أيه : اي والله عمه فدماعون فاصولياء من ايدج الحلوه شميت ريحتها زرفت خشمي زرف

فضيلة : من عيني بنيتي
أيه : تسلم عينج عمه
جنه : هااا ولج ام بطن جعتي
أيه : اي والله اذا عمتج تسوي اكل تخلي الشبعان يجوع
جنه : هههههه اي والله عمه فضيله طيب أكلها تعالي ليه ماكملتي ضايجه اگعدي يمي نسولف
أيه : بس اخلص عندي درس احياء ونكعد
جنه : اكلچ ايه شبيه مازن ويه ودق
أيه : خبله ودق تعانده وشالعه گلبه وحصره يحجي وياها تتخبل الناس كلها بجفه وعدها مازن بجفه ثانيه تموت منه
جنه : عسااها تكرهه دوم
أيه : شنوو شكلتي
جنه : هااا لا حبيبه ماگلت شى روحي كملي ونسولف بعدين

فضيلة : يمه اكو مريه اجت تسأل عليج
الحجية جميله: منهي هاي وشتريد
فضيلة : والله يايمه مااعرف وياها بت مبوشه وسألت على الشيخ حامد وانه كتلها بالمضيف وكالت شغله حياه وموت ومن شفتها هيچ ترجف وتريدن الشيخ كتلها اصبري لمن يرجع گالت اريدن الحجيه هيه تحلها ليه
الحجية جميله: چا يمه اذا مره فقيره ساعديها ولا تأخريها
فضيلة : لا يمه مبينه شغيلتها صعبه
الحجية جميله: ودخلت مره جبيره معصبه وكوه تمشي وحانيه الظهر اكعدي خيه

المريه :حجيه انه كاصده على الله وعليج واحلفنج بوليداتج لاترديني
الحجية جميله: هله بيج خيه چا لو اكدر تاخذين التريدي من عيني
المريه : سالمه عينج شيخه والنعم منچ ومن اصلچ
الحجية جميله: احجي خيه
المريه : انه ام صابر جنت عايشه بالناصريه اتزوجت من ولد عمي خوش زلمه ويخاف الله بيه سنين وماصارلنا ضنه (طفل) واتسميت ام صابر وضليت صابره والزلمه گلها تحومي علي تزوج مامش ضنى من مرتك شوفلك غيرها وهوه يابعد رويحتي ضل مارضى لحد ماربنا جبرنا وصار عدنا صابر بعد ٨ سنين وچان هو الهوا لينه وربج ماقصر وحملت وره صابر ٣ سنين واجتني عطيه الله بنيتي فرحه وسميناها فرحه چي هي فرحتنا وعلى وجهه شفنا گل الخير وربج رزگنا بكاع والكاع صارت اثنين وخير من الله

بس الخير وبحسدالوادم مايدوم والزلمه طاح بيها عركه بين عشيرتين واجت چيله بالغلط بيه وتوفى وانه من يومها تسودنت الدنيا بعيني وانه يتيمه ابوي وامي انطوج عمرهم محد ليه غير عمي وهذا لايحل ولا يربط
الحجية جميله: الله يصبرج خيه ويرحم زلمتج برحمته
ام صابر : ويرحم موتاج شيخه تجيج السالفه
انه ضليت بس الله وهلوليدات لزمت الكاع ويايه صابر وانكسر ظهرنا عليها والوليد جان عمره ١٠ سنين سوده عليه جان ينام مهدود حيله گله علمود كاع ابوه ماتروح
وتالي بيوم وبليله ظلمه اجوي اعمام ابو صابر يردون فصل من الوادم الكتلت انه تسودنت چا انتم سنين ماتعرفون بيه اچل شرب وتالي من مات صار عزيز وانه مريه بطولي ومالي حد حجيت ومحد سمعلي خذو الفصل من الوادم وكفيلج ابوفاضل ولا دينار شفنه منه گلت يروح مااگل واوكل الوليدات بفلوس من دم ابوهم رضيت بگلشي وراحو العمام وراها بسنه اجونه وهنا وكفو لينا على الكاع چا انه كله ولا كاع ابوصابر هاي تعبه وكسرت ظهره وهددوني بوليداتي وانه وحيده وبس الله الي وهليتامه برگبتي وشردت بيهم بليله ظلمه چن رادو ياخذون البت مني وهي عمرها ٨ سنين ومن تبلغ يزوجوها لودهم انه تسودنت وشردت بيهم (هربت) ورحت للديوانيه وعفت گلشي بيتي وكاعي وگلشي اخذت الوليدات ذوله تعب السنين وصبرهم وشتغلت عند الوادم الخيره لا خيرهم عليج وشوي شوي جمعت الفلس على الفلس واشتريت مكينه واخيط للوادم وتحسنت حالتنا الوليد رجعته للمدرسه يدرس ويشتغل عامل فيتر والبت تدرس وتشتغل وياي بالخبز والخياطه ومرت سنينه بتعب بس ربج ساترنا وماردينا للناصريه

وبليله الله لايرضى عليهم اجه عم ابو صابر الي اخذ الكاع وشون توصل لمجانه مااعرف سنين يدور لحد مالكانه واجه تعذر وكال الكاع اردها ليكم چا انه طرت من الفرح خيرنا وردلينا بس گال ماارد الكاع اله انطيهم البت انه تخبلت وطرته چان يريد بتي حتى يكسرها گله حتى يرجع گاعنا وهي حكنا

ماطول السالفه عليج حجيه الوليد تخبل وراح سأل على ابنه الي يريد يزوجه بتي طلع سكير وكله طلايب واحد ميخالف الله ولا يراعي حرمته انه قفلت حتى الكاع مااريدنها تولي
بس حظي ماتركني الميخالف من إٱللـِْﷻـِْﮭﮧ وليدي صابر تعارك وياهم وذبو بهبيه (مصيبه) وكسروني بولدي واخر صبري والوليد انحكم ٣ سنين ومايقبلون يتنازلون اله انطيهم البت
الحجية جميله: من اشتعل شيب الخلفوهم وليش يردون البت
ام صابر :جيف الكاع الها حصه بيها وبتي حليوه ونادره چا وين يلكون هيج هم حليوه وصغيره وفوكاها فلوس وكاع ومكطوعه يتيمه ماكو الي يطلع وراها اذا اذوها

الحجية جميله: الله اكبر وادم ماتعرف الله كملي خيه
ام صابر : رحت للوليد وكتله انطيهم بنتي حتى اطلع وليدي لان اجوني اخر مره كالو نگتله لصابر بالسجن اذا ماتنطينا وهو صابر تخبل وحلفني بروح ابوه ماانطيها وذوله ماتركًوني واذونا تالي صابر گلي ترحين لشيخ حامد بالعماره تسألين هناك گلها تعرفه
الحجية جميله: والوليد منين يعرف الشيخ
ام صابر :صارت طلابه بديرتنا والطلابه جبيره ومحد حلها غير الشيخ وصار صيته الوادم گلها تعرفه وصابر وليدي من يومها ويصيح بأسم الشيخ وگلي ترحين لشيخ حامد هو راح يحمينا وگلي شغيله ثانيه اريدن چدامه اكله

الحجية جميله: فضيله
فضيلة : امري يمه
انشدي على مازن وكليله الحجيه تكول تعال لينا شغيله مهمه
حامد : امري يمه السلام عليكم مااعرفن عندج ضيوف
الحجية جميله: تعال يمه الحجيه ام صابر طالبتك لاتردها
حامد : بعون الله مااردها
تحجي حجيه والي تريدي تامرين بيه
ام صابر : يبعد امك مايامر عليك ظالم
وبدت تسولف الحجيه

حامد : والمطلوب شنهي اساعد صابر لو اردلج كاعج
ام صابر : تتزوج بتي فرحه
حامد : شنهي اتزوج منهي
ام صابر : انه جايتك اليوم وابني صابر يهديلك اخته ولاترده هاي يتيمه ومااريدن اكسرها
حامد : حجيه انه متزوج اثنين نسوان
ام صابر : راضين يمه وتصير الثالثه وخدامه ليك ولنسوانك بس استر على بتي ذوله الوادم اذا خذوها يكسروها ويكسرون اخوها ويشمروها انه اعرفهم
الحجية جميله: يمه حامد هذا حلال الله والحجيه ولدها هدوها ليك لاترد هديتهم

حامد : يمه على العين والراس بس البت صغيره شكد عمرها
ام صابر : ١٩ سنه
حامد : واليرحم والديكم هاي البت شوي اكبر من بتي شون اتزوجها وانه اصلاً متزوج ومامحتاج مره ليش اظلمها للبت واكسر بختها وهي صغيره
ام صابر : وليدي ماينكسر بختها وهي بيت الشيوخ وتصير حرمت الشيخ حامد بس ينكسر بختها اذا خذاها السكير والميخاف الله والطمعان بكاع ابوها
الحجية جميله: چا هيه وينها فرحه بس نسمع بسمها
ام صابر : تعالي يمه ارفعي النگاب عنج (النقاب)
حامد : دخلت بت طويله ومنگبه وشالت النقاب واشوفن بت سبحان الخالقها مرسومه رسم حليوه بيضه والعين سود سواد الليل جنها عيون الغزال گبار والوجهه مرسوم گلشي بيها مرسوم نظرت اليها ونزلت عيني

الحجية جميله: اللهم صلِ على محمد وال محمد چايمه تعالي جنچ العافيه عيني بارده عليج حكها الوادم تتذابح عليج
حامد : حجيه بنتج الله يحميها بأمانتي بس انه ماتزوج وهديتكم على راسي
الحجية جميله: شيخ حامد الوادم تعبانين وضيوف يرتاحون ونحجي يمه
حامد : تاخذون حك ضيافتكم وانه الي عندي گلته انتي ووليداتج امانه برگبتي بس زواج ماتزوج

الحجية جميله: يمه فضيله اخذي الحجيه وفرحه وضيفيهم وان شاء الله ماتردين واله خاطرج طيب
ام صابر : بيت العامر شيخه

الحجية جميله: اسمع يمه حميد هاي البت تاخذها تاخذها
حامد : چا هي كاع واخذها يمه هاي مكسوره ويتيمه والزمن چار عليها اجي انه اكسرها حتى إٱللـِْﷻـِْﮭﮧ مايرضى
الحجية جميله: حميد انه اعرفنك ماتريدها عبن البومه ماخذه عقلك
حامد : چا اذا تعرفين هيج ليش تلحين سنين ماتزوجت وانه اعرفن مايصير عندي ضنه غير جنه وماسويتها اجي هسه اسويها
الحجية جميله: يمه البت حديثه وحليوه وتخلفلك وليد يفرحك ويفرحنا انه اريدن اشوفن وليدك گبل مااموتن
حامد : عمرج طويل حجيه انه العندي حجيته وهذا الموضوع ماينفتح انه اقدملهم الي يردوه وبحمايتي غير هذا ماعندي
الحجية جميله: گله منها البومه وجرت گلبي لاخلصت منها گبل ورجع دولبني الزمن وردها ليه چا ماتموت واخلص منها ضاله على افادي (صدري) وكرت عيني خذت الشيخ وادولب بيه

حامد : يمه بسچ زواج على يمامه مااتزوج
الحجية جميله: عساها بطركاعه ماتكوم منها خذت عقلك وراح تاخذ عمري ومااخلصن منها
مر يوم كامل والحجيه اكلت راسي هجيت من الدار گلها ومافاد ردت وراي للمضيف والدنيا ليل وكاعد وحيدي هاا يمه چا شون اهج من العماره گلها يله تركدين

الحجية جميله: تعاي ام صابر اكعدي وانتي فرحه وليدي هاي البنت دخيله عليك وانت ماترد الدخيل
حامد : حجيه انتي ماترضين بتج تنكسر وانه عندي تنكسر انه مااريدن مره متزوج اثنين وهاي حسبت بتي اعرفن بروحي ماتدنى نفسي عليها
كامت تبجي اشوف الصوت منين جن البت تبجي
فرحه : عفيه عمو انت اتزوجني لتخليهم ياخذوني ذولاك ميخافون الله اذا اني بس كتله مااتزوجك ضربني وسحلني من شعري بالبيت كله لو اتزوجه شون ونزلت ابوس ايده

حامد : استغفر الله كومي بنتي كومي
عوفني افكر وارد ليكم الخبر
ام صابر : دخيلك شيخ لاتتأخر وليدي ينتظرني واخافن يأذوه
حامد : لاتخافين انتم بحمايتي
الحجية جميله: يله امشينا نرد للدار ونعوف الشيخ يرتاح ويفكر

حسان : شونج حجيه
الحجية جميله: هله يمه حسان روحن لخيك وخلي يعگل
حسان : ياستار اروحن حجيه تامرين
هاا خويه شفت الشيخه يمك لاتكلي جنها درت بطيرتك وراح تحرك الدنيا
حامد : لا تعال ليه وبالمصايب النازله براسي وماراضيه تحل عني وحجيت گلشي لحسان
حسان : انه اخوك شراح يخلصك من جميله ماتركد اله تشوفها بفرشتك

حامد : تحرم عليه مره غير يمامه چاانت مسودن هاي حركت گلبي ولوعه روحي اجيبن مره فوكاها
حسان : چا البت حليوه تكول وصغيره وحلالك ليش ماتسويها وحكك الي سوته ام ودق مايتسولف ياخوي وهي ماتريد ضنه چا تلاحك لعمرك وشوفلك وليد يفيدك بكبرتك
حامد : انه عندي وليد لاتنسى واثنين مو واحد مازن ومنير
حسان : لاتجذب على روحك ذوله ولد فاضل مش ولدك
حامد : انه ابوهم وانه الربيت والتعبت وذوله ظهري بكبرتي انتجي عليهم

حسان : والله انه مااعرفن انت حيرتني چا من باب تريد تربيها وتكسرها ومن باب ماتزوج عليها چا بيش تكسرها بشيشه دبس

حامد : حسان خويه ولي مني انه روحي طالعه وانت تضحك
حسان : اروحن احسن وانت ضل اكسر وكلشي ماكو
حامد : كعدت وسحبت الجگاير وحيدي بالمضيف وكعدت بابه وشغلت ياس واسمعن اغنيه جذاب واحش بالجگاير واحرك بصدري كون يحترك گلبي العشكچ
اااااه يايمامه مشتاك لريحتچ وبقيت للفجر وسمعت مازن يصيح ليه على السحور طفيت الجگاير وانه قررت لازم اكسرنج يايمامه وماتكسر المره اله المره

وثاني يوم كعدت ويه الحجيه
تعالي يمه وانتي اكعدي حجيه ام صابر واسمعي فرحه الكلام الكم
اسمعوني زين
انه راح اتزوج فرحه
الحجية جميله: يبعد رويحتي يمه ريحتني
حامد : اسمعيني حجيه
البت تحرم علي
الحجية جميله: سوده بوجهج جميله چاشون تحرم
حامد : البت اتزوجها انه مااكدر ابقيها هنا وهي مو حرمتي عبن عندي اثنين شباب بالبيت وتحل عليهم راح اتزوجها وتبقى دخيله عندي حد مااشوفن صابر وشغلته واطلعنه من السجن واحلن شغلتكم ومن يكمل گلشي البت اطلكها وترد لهلها سالمه وهيج لا انه كسرتها ورجعت حقوقها مااريد ادخل بخطيتها انه اعرفن روحي ماتصلحلي مره بكد بتي ماارضاها لروحي

ام صابر : والوادم شون شيخ
الوادم يمي وهذا اتفاقنا ميدري بيه مخلوق لحد ماينحل گلشي ويرد حگگم وصابر يطلع ويشيل مسؤوليتكم
فرحه : شكد كبر بعيني هذا شنو من شيخ هم حلوو وهم هيبه وهم شخصيه وحقاني بالعافيه على نسوانك الله يجبر بخاطره مثل مجبر خاطري ومكسر بختي

حامد : حجيه ام صابر ردي للبيت انتي وفرحه وانه اگلج شوكت الزواج
ام صابر : انه لازم اردن لولدي تاخرت عليه
حامد : لانخافين باجر زلمه مني يروح ليه ويبلغه ويحط عيونه عليه لحد ماتفض الشغله ولدج امانه يمي
وجان تنزل الحجيه تريد تبوس ايدي
استغفر الله يمه انتي حسبت امي ولدج اعتبرهم وليداتي المهم ترتاحين انتي جنج تعبانه
ام صابر : والله يايمه ماضايكه طعم النوم الف رحمه على ابيك وعلى تربيته شيخ والنعم منك ومنه والف رحمه على الحليب الرضعته مشكوره شيخه ماقصرتي
الحجية جميله: اخذي البت ام صابر وردي للدار وانه جاي وراج

يله يمه فرحه امشينا
الحجية جميله: هاا يحميد چا هذا حجي مال شيوخ تزوج وماتكرب ليها چا وين صايره انه اعرفن هاي البومه سودنتك چا موهيج تاخذ بت حديثة وحليوه وماتكرب عليها
حامد : انه ماتدنى نفسي عليها وانه عندي مره واحبنها شلي بت الوادم وهي بعمر بنتي شون تقبليها يمه انه من شفتها شفت جنه چا هو الفقير من ينكسر وينظلم انزيد عليه المن شيوخ ونفض طلايب العالم واحنا ظالمين الوادم

الحجية جميله: چا غير حلال لاتخليني احرك روحي اگله حلالك مريتيك شون ماتكرب عليها
حامد : انه اعرفنج تريدين تكسرين يمامه وانه انولها الج مراح تعرف بلي صار وكدامها البت مرتي حلالي ارتاحي
الحجية جميله: اهااااا احتاريت بيك يحميد شنهي الجرى وشنهي الي بالك انه توكعت لخاطر البومه ماتكرب على البت وحتى لاتتكدر چا هيه راح تموت وتتكدر شنهي بعد اكرب ليها وفضها
حامد : مااردن بكلمتي والي بالي اسوي حجيه گل الصار والجرى مااريدن بشر يعرف بيه وحتى اختي فضيله الكل كدامهم هاي مرتي
الحجية جميله: انه اول مره مااعرفن وليدي شنهي بعقله بس العرفنه چاي تلعب بلنار يبن بطني
حامد : خليها على الله يمه وهااا ردي احلام للبيت اريدنها موجوده
الحجية جميله: خوش يبن راضي ثلاث نسوان ولا وليد كره عيني
حامد : هههههه شفتي ثلاث جناين واكعدي لعبي عليهن لعب انه اعرف تاليتي المجن بالمضيف واحل طلايبجن

الحجية جميله: انه امك يحميد اكضهن من شعرهن واسحلهن وبالعوجيه وهاي طيرتك اذا ماتصير دچاچه مااتسمى جميله
حامد : ههههههه عايفه كل نسواني وحاير بيمامه انه اكلج ايدج الچ سوي التريدي
الحجية جميله: اكص ايدي اذا موالبومه كاسره گليبك وليدي مايقسى على بومته اله شى جبير
حامد : اروحن اصلي احسن وانتي حجي عينج عليهم ومن اگلج شوكت العرس تحضريها بساعتها هسه مااريد احد يعرف
الحجية جميله: اوف يشالع چبدي شوكت ارتاح واشوفنك مرتاح مااعرف
حامد : الله كريم يمه گلشي هين گله بيد ربج ساعه من ساعه فرج

ومر كم يوم والگل يسأل هاي البت شسوي عدنا
أيه : عمووو عموو
حامد : يبعد عمج
أيه : ماما راح تجي باجر
حامد : شنهي امج وشدراج
أيه : سمعتها تحجي ويه ودق وكالت باجر تجي عمو فدوه مو تطردها لو تأذيها حباب
حامد : لابويه امج عزيزه شون اطردها وهذا دارها لاتخافين بس مااريد احد يعرف انتي كلتيلي على چيه امج
أيه : ماشي عمو وبسته اني كولش احبه احسه بابا لان حنين

حامد : أجيتي برجلج يطيره
دخلت على امي
يمه باجر اعقد على فرحه حضريها ودزي على احلام مصباح العيد كلها اريدنها هنا
الحجية جميله: يمه چا حبها ولبط انتظر خلي نشوف الوادم وباجر مصباح العيد كلها تجي
باجر يعني باجر واله اصرف النظر عن كلشي
الحجية جميله: لا يحميد التريده باجر باجر

شفت سيارات بالباب اكيد اليوم اول يوم والكل مجتمع والله ودخلت واسمع هلاهل
جان تصير بوجهي احلام
هله والله واجيتي بوكتج بالخير خيه زواج زلمتج نزلت عليج مره (شريجه) كرت عينج ربج مايظلم مثل مانزلتي علي دزلج الي تكسرج وتنزل عليج

يمامه : شنوو حامد تزوج
احلام : چا ماتدرين عبالي چايه تباركين خيه ادخلي ادخلي انتي موغريبه
يمامه : احس جسمي ثلج وروحي انسحبت مني لا اكيد احلم مو حلم هذا كابوس يعني هذا عقابك اليه تتزوج عليه بقيت شبه فاقده ومااحس بلي داير مدايري لحد مركضو البنات لحضني ويعيطون اجتي ماما
ردت استوعب الي كعد يصير مدااكدر بناتي يحضنون ويبوسون بيه واني بس فاتحه عيوني ليش هيج حامد هيج تعاقبني وجان ودق تكولي
ماما حبيبتي لتضوجين واذا تزوج بلكت يطلكج ونخلص ونرجع لبغداد ونخلص منهم كلهم
أيه : مو وكتج هسه مكعد تشوفين ماما شكد تعبانه

فضيلة : هله خيه يمامه والله تفاجأت من شفتج عيدج مبارك حبيبه
يمامه : فضيله صدوك حامد اتزوج
فضيلة : هااا چا ارتاحي خيه مو وكتها
يمامه : احجي صح موو اتزوج عليه
فضيلة : والله ياخيتي گلشي مااعرف انه اعرفن صار ٥ ايام خطار عدنا چا البارحه بليل كالت الحجيه عرس اخوج حامد باجر حظري گلشي اريدن اعرف شنهي ماشنهي گلشي ماعرفت بس عرفت العروس هي فرحه وشنهي الصار مااعرفن
يمامه : بديت اهتز والدنيا تفتر داير مدايري وجان يصير حامد گبالي كميه الم وقهر منه مو طبيعي

حامد : هاا رديتي منو جابج انه مو كايل ماتطلعين عتبت الدار انتي ماتجوزين وتكسرين چلمتي
يمامه : كوه فتحت حلكي جسمي كله يرجف صدمه عمري مااكدر استوعبها حتى لو عندي مشاعر بسيطه اتجاهه حتى لو المره متحب رجلها بس من يتزوج عليها صدوك يكسرها واني عود هسه بديت احس روحي تعلقت بحامد تالي هيج يكسرني
مبروك يارجلي وابو بيتي
حامد : الله يبارك بيج ادخلي مااريدن اكدر خاطري واليوم عرسي وحسابچ بعدين

يمامه : تعال اريد احجي وياك
حامد : ماعندي وقت الوادم منتظريني يباركولي
يمامه : دقايق مااكدر احجي هنا ودخلنا بغرفتنا اباوع عليها مثل معفتها وريحته بيها

انداريت علي وحجيت
لهاي الدرجه انت قاسي
هاي عقوبتك تتزوج عليه تكسرني
حامد : بعدج ماشفتي شى انتي البديتي والبادي اظلم
يمامه : متوقعتك هيج ظالم وتأذيني
حامد : انه ماظلمتج انتي ظلمتي نفسج وتحملي گلشي يصير بيج
يمامه : ممجبوره اتحمل طلكني
حامد : هههههه انت من كل عقلج اطلكج واريحج اله اخليج هيچ معلكه لا طايله سما ولا كاع
يمامه : حامد طلكني مااتحمل الوضع هذا
حامد : چا ليش مو انتي تزوجتي غصب وحبلتي غصب چا بقت على هاي تحملي غصب

يمامه : لهاي الدرجه حاقد عليه حتى كلامي حافظه
حامد : ماشفتي شى يمامه وحگ لوعه گلبي اله الوعن گلبج ولي لحجرتج ومااريدن اشوف جهرتج بنياتج يمج وكلشي موجود عندج هاي الايام لاتشوفيني روحج مااريدن ادوخ راسي بيج انه عريس جديد واريدن ارتاح ويه مريتي
يمامه : عساك مشفت الراحه ولا تهنيت چان يلزم ايدي حيل اسمعي لج لسانج ضبي تره ماتعرفين بيه من اتخبل خاف لهسه ماكسرتلج راسج ومتحمل على سوايتج گله ولا تتجاوزين
يمامه : كمت ابجي احس نار بقلبي شون يتزوج الغيره اكلتني منا احلام ومنا اتزوج عليه حتى نفس كوه اجر
حامد : هاي دموع التماسيح خليها ماتهزني وصيري عاقله انتي مو صغيره بناتج بطولج انتي مو كتلتي الوليد وتصيحين انه مو صغيره وبناتي بطوله خلي عقلج هم بطولج ومااريدن مشاكل انتي حالج حال نسواني هاي الايام كلها للعروس الجديده وبعدها اقسم الايام بينجن

يمامه : لتجي ولا تتقرب مني خلي الايام لنسوانك ذنيج اني تحرم عليه ولو تنگلب الدنيا مااخليك تلمسني وجان يتقرب حيل عليه وجرني من العبايه الاسلاميه من يمي صدري حيل وسبحني علي بقوه وقسوه
حسج مااهيسه وصبري بدا يخلص واذا اريدن المسج لاانتي ولا اي واحديمنعني وتنطيني وانتي الممنونه موانه التمنعيني وخاف گبل گتلج گلشي برضاتج ذيج الايام ولت وماترد گلشي الاريده اخذه وغصب عنج ودفعتها حيل

يمامه : من دفعني وكعت وتأذيت هو عافني وطلع تهسترت اعصابي وكمت ابجي واعيط انهاريت واني احس بقهر وذل متوقعت راح يسوي هيج بيه خاصه الايام الي عشتها ويااه جان حيل مدللني عقابك قاسي

حامد : طلعت للمضيف والوادم تبارك وتهني وتهدي الهدايا وانه گله بالي يمها اخاف تأذت وارجع اضرب على صدري وگلبي واگله اركد عساك ياگلب متت ماحييت كافي ترجف عليها
والليل كله مادخلت للدار والوبن عليها اخاف ادخل وانسى گلشي واخذها بحضني واشمنها مشتاك اشمها من شعرها ومن گل مسامه بيها وارد اصفن على حالي هاا يحميد حنيت لا وحك لوعه گلبي اله الوع روحج هين يطيرتي

مر العيد زهر عليه واني حابسه روحي بالغرفه وبس اشوف بناتي وهاي العجوز تفتر بالبيت وكل شويه تكول حضرن الغرفه للشيخ الدخله بعد چم يوم وتسمعني واني اشيل روحي واركعها شسوي نار وتاكل بيه

اليوم بعد العيد بيومين اخر يوم بعطله العيد كعدت من الصبح على الهلاهل وكل هلهوله تنزل بصدري نار
طلعت وجان تصير بنيه بكصه ودق شويه اكبر حلوه وبيضه وجذاب شكله حيل انتي منو
فرحه : اني زوجة الشيخ حامد
يمامه : هي كالت هيج لو بيدي الزمها واحركها هي وحامد والبيت گله عزه هاي زوجته غير اطك واموت
انتي شكد عمرج
فرحه :١٩ سنه وانتي منو خاله

يمامه : وخلخاله بضلوعج (احجي بگلبي )
اني زوجتة الثانيه
فرحه : انتي خاله يمامه ام البنات
يمامه : لا والله مبين خوش منطيج السيفي مالتي
فرحه : لا بس الحجيه عرفتني على خاله احلام وكالت هم عليج
يمامه : اكيد ذكرتني بالخير لان هي حيل تحبني
فرحه : اي اكيد من رخصتج خاله لازم اكمل واجهز نفسي اليوم العرس مالتي يوم ان شاء إٱللـِْﷻـِْﮭﮧ لبناتج

يمامه : اوويلي الله اريد اعيط اريد املخ روحي شون بيه بقيت الوب انتهيت متحملت احس حتى جسمي صعدت الحراره بيه واني اتخيل الي يسويه وياايه يسوي وياها اخذت الملابس وطبيت سبحت وطلعت شويه ارتاحيت وعدلت نفسي على شنو اكسر نفسي لا والله اني الك حامد
اني متحلفه اله اشيطه بعيني لبست دشداشه طويله بس كيمونه ومكيجيت ورتبت روحي وجان يطب اني متأكده يجي لان فتحت الكنتور ملابسه كلهن هنا مناقلهن لأي مكان لازم يجي يبدل

حامد : دخلت وشفتها من اشتعل ابيج على حركت نار گلبي رجفت والعباس آحـسن روحي ذابت بس وجهي عليه الضوجه بس گلبي مفرفح عليها واني اشوفنها بطه وتمشي وشعرها راحتي يفتر وراها قويت نفسي واخذت غريضاتي وسبحت ردت ماادخل للحجره حتى مااضعف واصيح احلام لو فضيله تجيب ملابسي بس گلبي ركض گبل جدمي (رجلي) دخلت وهي كاعده على الجربايه
بدلت وهي تباوع علي

يمامه : اشوفه شون يحضر روحه الها واني اكمز شكد حاولت ابين قويه مكدرت شنو هذا الضعف الي فجأه صار بيه ليش احس هو مالتي ملكي وراح تاخذه خاصه من شفت البنيه حلووه وصغيره يعني بعد حتى ميگلبني بلحظتها حسيت بحجم مصيبتي وديطلع كمت اركض مااريده يروحلها مااتحمل موبيدي جان الزمه لتروح حامد لتتقرب منها اترجاك

يتبع ....

هذا حال حامد بليالي بدون يمامه والاغنيه من حامد ليمامه 💔

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

ممكن تصويتكم للقصه 🥰
احـٍُــبٌــ💘ـٍَــْگُم