رواية سجينة الروح الفصل الرابع عشر 14 - بقلم ريام هادي

سجينة الروح
للكاتبة Reem
البارت الثالث عشر

أذا جرحك نزف لا تشكي للغير
تره الشكوى لغير الله مذلـــه
وأذا واحد ينشدك عن جرح بيك
حط بي صم ملح بس لاتكلـــه
كص السان جرحك واخنك الآه
وشك زيج الوجع والآخ أحملـــه
جلب بالصبر لو جرحك اذاك
خل هوه اليملك لاتملـــــه
واخذ طبع الجبل لو وازته الريح
ماينزل يبوس اجفوف تلــــــه
لاتقبل عسل وبذله من الناس
المراره بعز طعمهه هواي احلــه
وميز بين ناسك واعرف الزينين
مو كلمن يمدلك جفه أتقبلــه.

حامد : اسوقن مثل المسودن مااحس روحي تنشاغ اريدن اوصل ليها وگلبي يوجعني ومقسوم نصين نص خايف عليها ونص ينزف دم منها ليش يايمامه شنهي القصرت بيه وياج چا گل هذا الحب والمداراه وماوكفت بعينج انه بشنو غلطت حتى تجازيني هيچ تعرفين بيه اتمنى يصير وليد ليه ومنج انتي چا هذا حلم عمري ويوم مايصير تضحين بيه لهاي الدرجه كارهتني

بعد ٣ ساعات وصلت بغداد وانه عقلي ماضل يودي ويجيب ساعه اريدن اموتها ومايبرد گلبي وساعه اكولن گلشي مااريد بس تطلع سالمه حتى الوليد فدوه الها وساعة اكولن مااحترمتني وسوت الي براسها وانه گلشي اسامح بيه اله المره الماتحترم چلمتي وطلعت حتى ماخذت راي ارضى لا سوايتها ماتسولف

دخلت للمستشفى وانه روحي مفرفحه واهلها واكفين بالممر
هاا بشرو شونها تفاجأو بجيتي
ابو يمامه :  هااا شيخ حامد الحمدلله على سلامتك
حامد : الله يسلمك حجي شونها يمامه
ابو يمامه الحمدلله والشكر الله رأف بحالنا وعدت سلامات بس انت منو كلك
حامد : صحتها شونها
الحمدلله بس بعدها مصحت ومنتظريها تكعد مكتلي منو بلغك بوضعها
حامد : عرفت وخلص
حامد : ردت اسال عن الحمل بس سكتت وروحي مفرفحه امها افتهمت وحجت
ام يمامه : يمه حامد كولشي قسمه وربك ماقسم الكم هذا الطفل ان شاء عمركم طويل ويرزقكم بالاحسن منه
حامد : حجيه حشه لله ربج عادل وكريم الله قسم النه بس عبده ظالم ودفر نعمة ربه

ام يمامه : يمه حقك شتكول بس صارت بعد ومراح يتغير شى على كيفك اني اعرف انت هسه مقهور وضايج ولتسوي شى وانت بقمه العصبيه
حامد : لا حجيه تتغير اشياء المهم هذا مو مكان نحجي بيه خلي تكوم بالسلامه والله كريم
اجه الطبيب ها دكتور بشر
الدكتور : انت زوجها
اي انه
الدكتور : المريضه تعرضت لنزيف قوي بسبب الاجهاض الخاطئ وسبب موت الجنين واضرار بالرحم بس  الْحٍمَدٍ للـّہ كدرنا نتلافه الاضرار بدون استأصاله بس هي عدها فقر دم حاد ولازم تلتزم بالاكل والعلاجات حتى تكدر توكف على رجلها وتراجع دكتوره نسائيه علمود وضعها
حامد : وهسه هيه زينه
الدكتور : وضعها افضل رغم نزفت هوايه واذا بقى هيج وضعها باجر اكتبلها على خروج الحمدلله على سلامتها
حامد : الله يسلمك بس اكدر ادخل اشوفها
بس لتتأخر
حامد : لا شوي واطلع
دخلت لغرفتها وصلت قريب ليها باوعت عليها الوجهه اصفر والشفه بيضه وحالتها حاله باوعت عليها اعضاي ترجف عليها ليش يايمامه ردت تموتين كله حتى لايصير عندج وليد مني چان گلتي والله مااريدن شى من الدنيا غيرج ردتج تحبيني وبس ماردت لا وليد ولا گلشي گضيت عمري انتظر منچ كلمه احبك چا هاي الكلمه تعادل عندي الف وليد بس انتي كسرتيني ومارحمتي بحالي ولا احترمتيني گل همچ شون تنزل الروح الي بطني مني اااااااه يانار گلبي چا گليلي شون اتعامل وياج وانه ساعه اكرهنج وساعه احبنج احجي وهيه نايمه صفنت عليها وضليت ساعه صافن واتذكر گلشي صار من يوم العرفتها بيه لحد ماودعتها ورحت للناصريه وهي غافلتني ونزلت وليدي عبن متريده لان ولدي بس وحگ حبي الج وحگ كل رجفه رجفتها عليج وحگ گل ذيج السنين الي انتظرتج بيها وانه الوعن عليج وانوح اله اندمج عل سوايتچ يايمامه

يمامه : فتحت عيني وكوه احجي احس ريگي ناشف وكوه ابلع اني وين
ام يمامه : الحمدلله على سلامتج ماما انتي بالمستشفى

يمامه : شصار ماما دااحس جسمي كله يوجعني
حنان : شصار ولج جان متي من النزف الله دفع عنج الف الحمدلله جان خسرناج
يمامه : والطفل
ام يمامه : انتي موردتي يوكع ارتاحي وكع
يمامه : جان لازم هيج يصير بس ليش صار النزف
حنان : انتي مو هذا المهم المصيبه رجلج بره
يمامه : شنو بعز المي وتعبي من كالت على حامد بره حسيت گلبي راد يوكف من الخوف
منو كله ليش حجيتو
حنان : والله مو احنا مشفناه غير داخل للمستشفى وعيونه براسه وكوه يحجي صاير بارود ويرجف حتى اخوج محجه شى كال مبين يريد يذب غضبه بواحد
يمامه : هسه يطيح حضي وكمت ابجي مردته يعرف
ام يمامه : هو هذا موضوع ينضم ليش هيج ماما لو ادري بيجن هيج راح تسون العب بيجن طوبه شتكولن لله وكتلتن روح بريئه مو حرام
حنان : والله عمه مالي علاقه وكتلها اكثر من مره بس بنتج متسمع الكلام
يمامه : هسه مو وكت اعتابكم شون بيه حامد مراح يرحمني
ام يمامه : اذا تعرفين يابنتي رجلج ميقبل شون تجازفين وتكتلين أبنه
يمامه : مكدرت استحيت من الناس وخفت على بناتي ليضوجون وهواي شغلات لو شكد مااحجيها الكم محد راح يفهمني
حنان : نفهمج او لا هذا الشى لايقدم ولا يأخر حيري بزوجج شون راح تقنعيه بمصيبتج
يمامه : بس لو اعرف منو كله
ودااحجي جان يدخل واباوع عليه يريد يطك
حامد : الحمدلله على سلامتج ام ودق
يمامه : عرفت بيه متحمل عليه واباوع على عيونه طك شرار منها نزلت عيوني مالي عين اباوعله طلعو ماما وحنان وعافونا وحدنا

حامد :  الْحٍمَدٍ للـّہ على سلامتج
يمامه : حامد اني
حامد : حسج مااهيسه يمامه كومي بالسلامه والنه كعده واحچي التريدي
يمامه : بس لازم افهمك
حامد : مااريدن افهم شى انه فاهمج صح لا تعبين روحج باجر تطلعين من المستشفى ونگعد نسولف الي تريدي

يمامه : شكد متألمه وضعي الصحي تعبان بس من شفت الالم بعيونه انقهرت ردت بس افهمه اني ليش هيج سويت منطاني مجال
صار الليل والكل راح بقت حنان يمي وهو بره كاعد
حنان :والله يايمامه رجلج ذهب صافي
يمامه : ليش
حنان : يعني غير واحد على سوايتج هايه ميباوع بوجهج هو حتى مقبل يروح يرتاح رغم عمي توسل بيه يروح وياه للبيت حتى يرتاح ومن الصبح يجيج مقبل حيل كبر بعيني هذا الرجال
يمامه : حامد يوم بعد يوم يثبتلي هو رجال بمعنى الكلمه
حنان :وانتي خوش جازيتي
يمامه : تره البيه كافيني مو تستلميني اسكتي فدوه مكافي الخوف الي بگلبي
حنان : من شنو شو الرجال وبره كاعد وساكت
يمامه : غلطانه حنان اني من خلال معاشرتي لحامد مستحيل الي صار يعبره بسهوله ومنتظره عقابي
حنان : عمي تتبلين على الرجال شوفي شحلاته كاعدوهادئ
يمامه : هذا الي يكولون عليه الهدوء الي قبل العاصفه

حنان :والله انتي اعرف بزوجج بس اني اكول كولشي ميسوي
يمامه : اووف ياريت معرفتي منو الي بلغه
حنان : لا والله معرفت بس اكيد وحده من بناتج لان ياهو اسأله يكول موو اني
يمامه : ودق مستحيل تتصل بيه اذا هي اسمه مطيقه موو عاد تتصل على الاكثر هاي ايه لان تحبه
حنان : موتعاقبيها
يمامه : لا شعاقب منها خلي احير بروحي هسه من عقاب حامد والله كريم بعدين

يمامه : ثاني اليوم الصبح اجه الطبيب وكتبلي الخروج وهو بس يباوع واخذ الراجيته مال الدوا وجاب العلاج اريده بس يحجي ماكو ساكت واجوي ماما وبابا وهو لزمني من ايدي تعالي هنا بالسياره مالتي اريح الج

من لزمني احسه حيل متحمل عليه ماالومه بس سكوته دمرني انتظر شوكت ينفجر ويحجي وطول الطريق ساكت وصلنا للبيت ودخلنا واجوي البنات بحضني يركضون

ودق : ماما حبيبتي  الْحٍمَدٍ للـّہ على سلامتج متنا خوف عليج
أيه : ماما حياتي شون صرتي
همسه : ماما ماما وين عفتيني
يمامه : اجيت ماما لتخافون ويضل بالكم مابيه شى
حامد : خلي امكم ترتاح وروحو حضرو ملابسكم ورانا طريق لازم نرجع اليوم

ودق : وين نرجع والطريق طويل وموزين على ماما هسه طلعت من المستشفى مكعد تشوفها
حامد : امكم هنا راح تبقى
يمامه : شنو وين ابقى ليش
حامد : انتي بعدج تعبانه ومتوجعه ابقي هنا ارتاحي والبنيات يردن وياي
ودق : مااعوف ماما وحدها مثل مااجينه سوه نرجع سوه
وجان يعيط بقوه يله بدون حجي زايد روحن حضرن نفسجن
أيه : تعالي ودق امشي نحضر ملابسنه
ودق : وين نروح ونعوف ماما شبيج
يمامه : بنات اخذو اختكم وادخلو جوه عندي حجي ويه عمكم يله بسرعه
ودق : بس ماما
يمامه : يله بسرعه دااكول
دخلت للصاله بيت اهلي ودخل حامد ورايه وسد الباب وكعد گبالي
حامد اني اعرف انت زعلان مني وحقك والله ماالومك بس انت هم اسمعني

حامد : احچي اسمعج
يمامه : اني كبرت وبناتي بطولي زحمه احبل وبطني كدامي شكول لبناتي شكول للعالم واني عندي بناتي وانت هم عندك بنتك جنه الله يحفظها يعني اثنينا منحتاج هذا الطفل وشكد بقى من عمرنا حتى ارجع اربي وانتظره يكبر مااكدر اتحمل مسؤوليه طفل رضيع واني بهذا العمر لهذا كلت انزله ونحاول المره جايه نكون حذرين اكثر ونعيش حياتنه بهدوء

حامد : خلصتي حجيج
يمامه : انت بس فكر بيه راح تشوفه منطقي اني هم من حقي اعيش حياتي بالطريقة الي اشوفها صح واني دااشوف حملي بهذا الوقت اكبر غلط
حامد : خلصتي حجيج
يمامه : اي
حامد : اسمعيني زين انه يايمامه يوم ماتزوجتج اخذت عهد على نفسي ماأذيج ولا اجيسج (اضربج) وگلت اخليج اميره والگل تحسدج على عيشتج وانه ماقصرت الي تكولي والي تريدي جنت اكولن تامرين حتى وانه ماقابل والشغله مو على هواي واكولن تدلل طيرتي حتى مريتي الاولى مارديتها حتى تكونين مرتاحه ردت اراويج انه شنهي ومااخليج تتندمين يوم على زواجج مني
بس اسألج سؤال ولو مااريدن انطقها بس حكولنها لو جنتي حامل من اخوي هم چان گتلتي لو چان گلتي اريدن وليد لبناتي وحتى افرح عادل

يمامه : والله جان هم سويت نفس الشى
حامد : اسگتي لاتكذبين
انه اگلچ جان طرتي من الفرح وماتكولين جبيره بذاك الوگت جان صرتي صغيره ومن حقج يكون عندج وليد يحمي خواته
انه ماأذيتج بس انتي كسرتيني تعرفين گلبي موجر نار منج موبس لان گتلتي ولدي الي انتظره سنين لا گسرتي چلمتي وطلعتي بدون شوري(اخذ رأي) وبكل عين وكحه ترحين لمكان ماتعرفين شنهي هناك ناس زٌِيـنين موزينين وماهتميتي لابيه ولا بسمعتي ولا بضوجتي وعبالج ترحين تسقطين وترجعين تنامين بحضني وجنج مامسويه شى چاهيج انتي ماعندج احترام اليه هاي تربيتج يابت الاصول تضربين زلمتچ وچلمته عرض الحايط

يمامه : لا العفو شون مااحترمك وجان يعيط بقوه وحتى فزيت من عيطته اشوف ايده مكوره ولازم السبحه بأعصاب شوي وتنكطع من ايده ويروح ويجي ويحجي واني كاعده ارجف وميته خوف احس على لحظه يلزمني من رگبتي ويخنكني نار ويمشي
وجان يدنج عليه وصاك سنونه ويحجي بكل عصبيه

حامد : لا مااحترمتيني وانه كله اسامح بيه بس مال مره تكسر چلمتي وماتحترم زلمتها انه ادوسنها لو روحي معلكه بيها
يمامه : وكفت على حيلي فدوه حامد على كيفك بس افهمني
حامد : لا فوك سوايتها بعدها تشوف نفسها ماسوت شى غلط لج انتي شنهي ماتحسين لهاي الدرجه معتبرتني موزلمه كدامج واصدگ حجيج
يمامه : لا والله انت على راسي بس اني هم من حقي اقبل احبل لو لا مكافي تزوجتني غصب وحتى الحباله هم غصب

هنا جمد وعيونه نطت ليبره ومااحس غير راشدي قوي فر وجهي فر
حامد : هذا حگ ماكتلتي ولدي وهو ماشاف الهوا وحگ دلالي الج الي جازيتي بقله احترام وحگ كل ليله عيشتها الج حب وانتي جرعتيني السم وبعده گلبج اسود علي وخوش ردتيلياها عاشت يدج
وانه اكدر اگتلج هسه  وماابقي عظمه صاحيه بيج وحگ هو علي اطلع حليب امچ من خشمج بس انتي عقابك مو الضرب عقابج عندي وانه اعرفن شون اخليج تتمنين الموت ولا عقابي

يمامه : كمت ابجي مو لان ضربني بس متوقعت منه يضربني وخفت من تهديده

حامد : ترحين للبنيات وتخليهن يحضرن غريضاتهن يرجعن ويايه للعماره
يمامه : لا فدوه عاقبني بگلشي ولا بنياتي
حامد : لا تخافين انه عقابي الج بعده مابدا راح اخذ البنيات لان وراهن مدارس وانتي تضلين هنا لحد ماطيبين والي شغل وياج بعدين
يمامه : فدوه حامد ارجع وياك حتى لو تعبانه
حامد : (بعياط) گتلچ تضلين هنا وماتردين لحد ماانه اگلچ شوكت تردين
يمامه : فدوه دخيلك والله راضيه بكولشي بس خليني ارجع ويه البنات
حامد : لاتخليني احلف يمين عليج تحرم عليج شوفت البنيات اسمعي الچلمه وحضري البنيات بسرعه

يمامه : كمت ابجي اخاف ياخذهن مني بس مابيدي شى لازم مااعاند اخاف ينفذ كلامه وصدوك يحرم البنات عليه طلعت منه واني جسمي يرجف ومااعرف شسوي

دخلت عليهن وشفتهن حاطات ايدهن على خدهن
يله حبايبي كومو حضروا غراضكم وملابسكم حتى ترجعون ويه عمكم للعماره
ودق : اني ماارجع اله انتي ويانه
يمامه : اسمعي الكلام بنتي ولتشلعين گلبي تره كوه واكفه على حيلي ومتأذايه

أيه : وشوكت ترجعين يمنا ماما
يمامه : كم يوم واجي انتم وراكم مدارس ومااريد الدروس تروح عليكم تنتبهون لدروسكم اريدكم ترفعون راسي وبناتي مثل كل سنه يطلعن الاوائل
ودق : وهمسه شون
همسه : اني ابقى ويه ماما

يمامه : لا حبيبتي ماكو عندج مدرسه وانت هلسنه صف ثالث ودروسج هوايه والست تزعل عليج اذا مداومين
همسه : منو يقريني
يمامه : ودق ماما امانتي اختج انتبهي عليها ودرسيها
ودق : ليش راح تتاخرين هوايه
يمامه : احاول مااتأخر بس عينج على خواتج انتي هسه بمكاني
ايوته ماما هموسه اسمعوا كلام اختكم ولتضوجوها ولتسون وكاحه مااريد ارجع واحد يشكي منكم ابد
أيه : حاظر ماما
ودق : شون راح اتحمل هناك وانتي ماكو
يمامه : بنتي اياج تسوين مشاكل صيري عاقله وكد المسؤوليه ويوميه اخابركم
بوست البنات وگلبي يبجي عدم عليهن بس مردت يتأذن وصعدوا الغراض واني الوب واهلي مدخلو لان بابا شاف الحق كله ويه حامد

حامد : اباوع عليها هين انه الج
هاچ
يمامه : شنو هذا
حامد : مصرفج
يمامه : عندي شكراً مااحتاج
حامد : هذا فلوس الدوا واخاف تحتاجين شى مااريدن اهلج يصرفون عليج
يمامه : عندي والله
حامد : گتلج هاج انه زلمه وماارضى مرتي ينصرف عليها حتى لو اهلها اخذي ولاتعاندين واذا رجلج عتبت باب الدار وحگ  كل لوعه بگلبي مايخلصج مني ملك الموت

يمامه : لا مااطلع والله
حامد : جربي وشوفي
يمامه : خله وصعد واباوع على البنات الدمعه بعيونهن واني كمت ابجي اول مره افاركهن راحوا ودخلت ابجي وماما حضنتني
ام يمامه : كافي ماما هنه وين راحن بيت جدهم مو غريب وكلها كم يوم وترحين وراهن
يمامه : ماما خايفه مااشوفهن بعد
ابو يمامه : لتخافين حامد رجال وكد كلمته وماطول كلج ترجعين يعني ترجعين
يمامه : ليش محجيت وادخلت بابا ليش ممنعته ياخذ البنات

ابو يمامه : اسألج وجاوبيني

حامد مأذيج فديوم ضاربج مجوعج ذالج
يمامه : لا بالعكس مدللني هنا بابا كال كلام ماانساه بعمري
يمامه بنتي الرجال كله ولا كرامته والي سويتيه جرح كرامة رجلج ماطول ممقصر وياج يحقج من السما للكاع وجان المفروض عليج تاخذين رأيه

يمامه : جان مراح يوافق بابا
ابو يمامه : بس على الاقل بلغتي احترمتي وجوده واحترمتي هو رجلج وراعي بيتج هذا الي سويتيه بحقه ميغتفر وغير رجال بلحظتها يطلكج واي شى يسويه مهما كان انتي السبب بيه انتي الي قسيتي رجلج عليج وتحملي نتيجه افعالج

يمامه : يعني يابابا موو من حقي مااخلف
ابو يمامه : بنتي رجلج الي وجعه مو خساره طفله بس لا هذا هين الي جرحه عدم احترامج اله وطلعتي ورحت عرضتي نفسج للخطر حتى بدون متستأذنين منه بله لو ميته لا سامح الله شيكول للعالم مرتك شموتها والله ماتت بعياده بمنطقه شعبيه ومجنت اعرف بيها من طلعت
يعني الي سويتيه اني ابوج لو بيدي اكطعج مو عاد هو رجلج والي حكم عليج اني معاتبتج لان اعرف صحتج وضعج ميسمح لهذا ساكت وكافي حامد عليج والي خبله بعدج مصره انتي صح ومغلطتي

يمامه : تعبت وحسيت بدوخه والم بطني اخذتني حنان للغرفه وبقيت بس ابجي حسيت بلحظه ضيعت كولشي مني

حامد : من نوصل اي احد يسألجن امجن وين تكولن وكعت وانكسرت رجلها وضلت بغداد لحد ماطيب وترد للعماره
ودق : وليش نكذب
أيه : اسكتي يمعوده
حامد : انه اكولن هيج لخاطر امجن تريدين تأذيها كولي الي سمعتي
أيه : لا عمو هذا هو ماما اتزحلكت وكعت ورجلها انكسرت وبقت حتى يداروها هناك
حامد : عفيه بنيتي واختج الصغيره لاتخلنها تحجي اي شى
ودق : صار اكو اوامر ثانيه عمو
حامد : اي شى تحتاجنه تجي ليه لا طلبن شى من احد
أيه : تسلم عمو متقصر
ودق : وماما شوكت ترجع للعماره
حامد : امچن مريضه تصير زينه وترد لاتوجعن راسي ولا تسألن شوكت ترد
ودق : غير امنا ونسال يعني تريد تبقيها مده طويله ومنسأل
أيه : غير تسكت ام لسان هذا هو عمو الي تريده
حامد : ودق خليني ساكت عليج لانخبليني وتخليني أذيج جري عدل ولاتعاندين ومااريدن اسمع حسچ
طول الطريق واني نار شون يعوف ماما

حامد : شتاكلن الطريق طويل واذن لازم تفطرن
أيه : عمو اي شى هلموجود
همسه : اني اريد همبركر وفنكر وعليه كچب
حامد : تامرين بويه سهله وانتي ودق
ودق : مجوعانه
حامد : بويه الطريق طويل وانتن صايمات ومافطرتن
أيه : عمو تلاثتنا نفس الطلب لدوخ نفسك
حامد : معاجبكم شى منا منا
همسه : اريد ببسي
حامد : اجيبلج الشرگه گلها تامرين بويه
أيه : هههههه همسه ابد مجوعانه
همسه : غير صمت وياكم
أيه : وين ولج للساعه ١٢ وفطرتي

ودق : انتن ضلن همجن على بطنجن وناسين ماما
أيه : شون ننساها بس مو هذا المكان الي نحجي بيه اكلي واسكتي ومن نوصل نسولف واحجي براحتج وتخبلي علينا هم براحتج
بقينا بالاستراحه بوحده من المطاعم على الطريق وكوه اكلت ودق اباوع على عمي محط لكمه بحلكه بس جگاير يطفي وحده يشغل الثانيه بس شرب استكان جاي
وراها رجع يسوق وبالطريق نمنا من التعب وصلنا بليل

دخلنا ومسلمت على احد مباشره اخذت الغراض ودخلت للغرفه اني ودق وهموسه
أيه : متكوليلي شبيج تخبلتي اني كلت على ساعه ويضربج شنو هذا اسلوبج لخاطر الله

ودق : انتي بالذات اسكتي شنو هذا البرود النازل عليج رجعنا بدون ماما وانتي ولا يمج وفوكاها تكوله هذا هو عمو الي تريده
أيه : اسمعي ودق ماطول كال عمو ترجع يعني ترجع لو مترجع ليش يكذب ممجبور قابل يخاف من ماما لو من عدنا
ودق : وليش يريدنا نكذب
أيه : والله اغبى منج ماشفت بس لسان عقل ماكو

اذا كلنا الصدوك بيبيتج جميله راح اطين عيشتنا والله تستلم منا يوميه تكرهه بعيشتها اصلاً عمو والي سواه كولش حبيته لان يخاف على ماما من بيبي ولسانها
ودق : وشبي مو رجال ميكدر يسكتها
أيه : انتي تكدرين هسه توكفين بوجه ماما
ودق : بس اني بنيه
أيه : هنا ماكو بنيه ولد هنا الام الكل يحترمها ويسمع كلامها وبيبي جميله اصلاً حاله استثنائيه عشيره بكاملها يخافون منها بس عمو ميخاف يحترمها واكو فرق ياثوله
وعمو يخاف على ماما لان اكثر الاوقات هو مو بالبيت يعني ميكدر بكل وقت يسكتها هاي عدا اذا عرفت نزلت الطفل يمكن تطرد ماما وتخليها تحلم تشوفنا استري علينا وكذبي صخمي المهم محد يعرف بلي سوته امنا

ودق : شون مااشوف انتي وره البليه انتي مبلغه عمو
أيه : هااااا اني شعليه اكيد خابروه من تعبت حيل لتذبين الصوج بيه وحيري شون راح نجاوب بيبي جميله الي المخابرات سي ان ان مو مثلها عدها اصلاً جهاز كشف الكذب بس تباوع مباشره تعرف دنكذب لو لا

ودق : اني لا اروح ولا اوصل يمها تردين انتي روحي
أيه : هو اكو غيري ماكلها روحي ايه وتعالي ايه سمعت عمه فضيله تصيح شفتي اول الناس تصيح

حامد : دخلت لحجرتنا واباوع عليها وعلى فرشتنا رديت بيها ومكانج فارغ شسوي لگلبي المقسوم ربي صبري على فراكها انه سنين صابر وعايش حياتي چا ليش هسه مااصبر وانه اشمن ريحتها بكل مكان

الحجية جميله: ها يمه رديت مسا العافيه يمه عليك
حامد : بست راسها للحجي وايدها تعاي يمه اگعدي
الحجية جميله: يمه شفت البنيات رادات وياك چا البومه وينها
حامد : يمه طاحت(وكعت ) وانكسرت رجلها وماتكدر ادوس عليها عفتها چم يوم يم اهلها تصيرزينه واردها

الحجية جميله: يمه حميد گلبي لعب يمه شصاير انته ماترد بليه طيرتك وهاي البومه وين ماتروح تركض وراها جنك جاهل ومعلك بثياب امه وانه ساكته واكولن محروم منها خلي المهم مرتاح چا هسه شجاك

حامد : يمه مابيه شى البت تعبانه وگلت اخليها ترتاح چا اجرمت ياحجيه
الحجية جميله: انه اعرفنك يبن بطني واعرفن وراك شغيله جبيره ومو انت التعوف طيرتك وحيدها بغداد

حامد : يمه واليرحم والديج بروح اخوتي لاتشلعين گلبي گتلج چم يوم واردها
الحجية جميله: اكومن انه لان اعرفنك مراح تبرد گلبي بس انه راح اعرف شصار بطريقتي
حامد : يمه دااحلفج بالغوالي اسكتي ولا تحومين على البت مريضه وگلشي ماكو
الحجية جميله: اروحن اصلي واقرا قران وانته ارتاح يمه ونام وانه اكعدنك على السحور
حامد : لاتكعديني يمه مااريدن اكل
الحجية جميله: چا والحمزه صايره طركاعه وماتگلي
حامد : الله اكبر چا واحد ماياكل ومجوعان اله عنده مصيبه
الحجية جميله: شوف حميد انه امك واعرفنك من ترمش مش من متكدر (ضايج او مغثوث) وهاي طيرتك طركاعه السوده عليها وعايفها بغداد چاتريدني اصدكن كلامك واسكت

حامد : يمه البت طاحت وتزحلكت وانكسرت رجلها واسكتي دااكلج رحمه لأبوي
الحجية جميله: الله يرحمه بهاي الليله براحتك وليدي

الحجية جميله: فضيله ولج فضيله
فضيلة : هاا يمه امري
الحجية جميله:ودي على ايه گليلها حبوبتج تريدنچ
فضيلة : شنهي يمه البت تعبانه الصبح اناديها
الحجية جميله: ولج فضيله تره اطلع حرگت گليبي بيج اندهي للبت
فضيلة : اوف يمه رايحه لاتصيحين
أيه : نعم عمه
فضيلة : تعالي يبعد عمتج حبوبتج جميله تريدج
أيه : يمه اجاك الموت ياتارك الصلاه

نعم بيبي
الحجية جميله: تعاي يمه يبعد رويحتي اكعدي يمي
أيه : كعدت شونج بيبي
الحجية جميله: بخير حبيبه دامج   بًخٌـًير گليلي حبيبه امج شجرالها وماجت
أيه : بيبي ماما اتزحلكت وكعت ورجلها انكسرت خطيه ومكدرت تجي
الحجية جميله: لا بنيتي سمعت غير هذا الحچي بس ردت من حبيبتي تگلي الصچ

أيه : لا بيبي هو هذا الصار
جان تلزمني من شعري ااااخ بيبي اااخ راح يتكطع بيدك شعري
الحجية جميله: چا تلعبين علي
فضيلة : يمه عوفي البت راح شعرها بيدج
الحجية جميله: چا لاحميد يبرد گلبي واعرفن شصار ولا هاي بنت البومه تگلي شصار وانه لزم اعرف البومه ليش ماردت ويه اخوج
أيه : هديت شعري كوه من ايدها وبستها بيبي حبيبتي لدوخين راسج كولشي ماكو كلها ايام وترجع ماما للبيت
الحجية جميله: عنها ماردت انه اريدن اعرف شصار
أيه : بيبي كومي صلي راح تروح منج صلاة الليل منو يفيدج لا عمو ولا ماما هاي الصلاه تفيدج لاخرتج

الحجية جميله: عسى اشوفن اخره امج واكعد على گبرها البومه لعبت بوليدي لعب
أيه : ههههههه اسم الله عليها وعليج يله حجيه جميله كولي ياالله وصلي وادعيلهم الله يهدي سرهم
الحجية جميله: هااا شفتي انه اعرفن اكو طركاعه طاحت على راس وليدي بس محد يريحني ويگلي
أيه : بيبي اروح انام تعبانه وباجر عندي دراسه بستها من راسها وافلت اذا ابقى شويه بعد تجر لساني ركض بس التراب ورايه

الحجية جميله: شفتي هاي تربيه البومه حتى البنيات عليها
فضيلة : يمه ارتاحي ولاادوخين راسج گلشي ماكو بس الخير
الحجية جميله: اكصن ايدي واذبنها للذيابه اذا ماهاي البومه سوت طلابه هلكبرها واخيج مكدر منها
فضيلة : ان شاء الله بس الخير يمه

يمامه : صار  اسبوع واني يوميه اخابر البنات وماكو اي حس وخبر من حامد مرت الايام صعبه عليه احس روحي مخنوكه اشتاقيتله كولش اول مره اعرف اني شكد طلعت متعلقه بحامد بليل ماانام ادور على دفو حضنه وانفاسه الدافيه لمسات ايده ولهفته عليه اشتاقيت لعيونه الي اشوف بيهم حنيه عجيبه احس روحي بارده گلبي يوجعني عليه شكد مشتاقه لبناتي بس مصبرني التلفون اقلهااتصل بيهن كل مااشتاق واسمع صوتهن ويحجن الي كولشي وكل مااسأل ايه شخبار عمج تكولي مكعد نشوفه يطلع من الصبح يرجع على الفطور وراها هم يطلع يرجع بليل
گلبي طك عليه شجاني ليش هيج كعد اشتاقله
حامد : انه ليلي انگلب اسود گاضيها بالضيف احس الدار بكبره يخنكني ادورن عليها بكل حايط بكل هوا اشمه حجرتي صارت گبري كل مااندار اشوفن غريضاتها عطرها احس روحي تايهه بلياها وگلبي ساعات يحومي عليها ويريدها ترد وساعات اكره اسمها من اتذكر الجرى

هجيت من الدنيا كلها
مابقى كلها يومين والعيد يهل تمنيت عيدالله واكبر وياها ويصير العيد عيدين ليه

يمامه : بعد مااتحمل صار اكثر من ١٥ يوم وهو حتى مكلف يشيل تلفون ويسأل عليه اعرف غلطت بس متوقعت راح يكدر بدونه
بابا اريد اروح للعماره
ابو يمامه : بنتي غير رجلج يجي ياخذج مثل مجابج ياخذج
يمامه : اذا ابقى عليه مراح يرجعني ويجوز يحرمني من البنات
فدوه بابا وديني طك گلبي على البنات
حنان : طگ گلبج على البنات او على عم البنات

يمامه : اسكتي انتي هاا بابا شكلت فدووه عكب باجر عيد واريد اعيد ويه بناتي اترجاك بابا
ابو يمامه : ماشي بنتي ولو يعز عليه ترحين بمصباح العيد بس ماامنعج المهم راحتج بنتي
يمامه : ثاني يوم دزيت على مره جوارينا تحفلي وترتبلي شعري لان مااكدر اطلع صات عندي خوفه احسه مراقبني ومردت اخابره واكوله اريد اروح للصالون اخاف يفشلني اتفقت ويه جيرانه خوش مره وانطيها ضعف المبلغ المهم ترتبني والله استلمتني من فوك ليجوه تكول عروس ردت ارجع لحامد ويشوفني حلووه ردت اشوف اللهفه الي بعينه واعجابه بأي شى اسوي احس بكامل انوثتي وياااه اهتمامي كله وعقلي بحامد اريد اصلح الي صار كملت للعصر وحضرت ملابسي وكولشي تمام

طلعنا من الصبح من ساعه ٦ والطريق كله اتخيل شون راح يشوفني يجوز يتفاجأ بس راح يحب جيتي اكيد راح اشوف لهفته ويجوز نتصالح ويرجع الوضع كما هو
وبعد ساعات طويله وصلت للعماره كتلني التعب بس لهفتي لحامد وبناتي نسوني كولشي

شفت سيارات بالباب اكيد اليوم اول يوم والكل مجتمع والله ودخلت واسمع هلاهل
جان تصير بوجهي احلام
هله والله واجيتي بوكتج بالخير خيه زواج زلمتج نزلت عليج مره كرت عينج ربج مايظلم مثل مانزلتي علي دزلج الي تكسرج وتنزل عليج

يمامه : شنوو حامد تزوج

يتبع .....
احـٍُــبٌــ💘ـٍَــْگُم