رواية سجينة الروح الفصل السادس عشر 16 - بقلم ريام هادي

سجينة الروح
للكاتبة Reem
البارت السادس عشر

من اسولف ضیم هجرک للعصافیر
تحط یم بابــنه وما تقبل اتطــــــــیر
صار اســــنین حلمک ساکن العین
اجیب منین یوسف ینطي تفسیـــــر
نهر شوگــــک یبس ما ظل اثر بي
وماتت بالهجر کل النواعـیــــــــــــــر
عســــــــاها ابَخت کلمن گلک اتروح
وعســــاها اتصیبه دعوات المکاسیر
مو ایـــــــــــوب طبعي واصبر ابهاي
صرت شجره وعلي فزعت مناشیر
تفرهد کلشي بیه الحــیل والحـــــال
ابشرک ثمر زرعي ابلا نواطـــــــــیر
تعال و شـــــوف حالي ایبچي جلمود
مــثل ام الغریق وتشکــــــــي للبیر
مثل ضـــــایع ابوادي وکومة اذیاب
وین ایروح گلـــــــي ابیا جهه ایسیر؟
الصارن بیـــــک کلهن صارن اویاي
بس البیــــــــه ما ظن عندک ایصیر💔

يمامه : جنت واكفه وبيدي الكارتونه والرساله واحجي وارجف هذا خطك انتي الي كتبت الرساله

حامد : تفاجأت بيها تخربطت احوالي ماتوقعت تقارن بالخطوط حاولت ابين كدامها گلشي ماكو والوضع طبيعي وحچيت بهدوء
وشنهي اليفرق انه لو عادل وانتي شهامج
يمامه : حامد اني من زمان حاسه اكو شى موطبيعي واغالط روحي
حامد : شنهي الموطبيعي اخوي واجه وگال اكتبلي رساله چي خطي حلوو گفر خو ما گفر الزلمه 
يمامه : تقربت منه واني كله هزه بيه تهز الدنيا كلها ممصدكه كلامه حاسته يكذب ومرتبك وعيونه مديحطهم بعيوني وصلت يمه وكتله حامد انت كاتب الرساله مو

حامد : شنهي تسودنتي گتلج انه خطي حلو وكتبتها شتريدين
يمامه : ليش من شفت الرساله عندي مكتلي وليش تفاجأت بيها وليش اصريت تعرف شون تعرف عادل عليه اذا انت تعرف بعلاقتنا بحيث انت كاتب اول رساله اله ليش كتلي تعالي احجيلي كولشي وبالتفاصيل وجنت كل مااتعمق بالكلام تزيد عصبيتك

حامد : متوهمه ماكوو هيچ شى
يمامه : شون متوهمه واذا بيومها حتى ضغطك صعد لتخبلني
حامد : حسج يمامه بدا يعلى مااريدن ادخل بنقاش وياج ادخلي لحجرتج واكسري الشر
يمامه : اوووف الصبر منك يارب اترجاك احجي اكو شى ضامه عليه وعادل دوم جان يكولي اهلي ميقبلون على علاقتي بيج وخاصه اخويه الجبير  شون متقبل وشون تكتبله اول رساله

حامد : شبيج يابنت الناس تفورين شنهي قابل ضام وانه صّـْْ(☑)ـْْحّ اعرفن بعلاقتكم بس ماتوقعت يتزوجج
يمامه : ليش دوم احس اكو شى جبير بگلبك ليش دوم تحسسني تعرفني من زمان عوفك من الرساله هاي شسوي عندك رفعت ايدي وبيها صوره صغيره

حامد : هاي شجابها يمج ليش تدورين بغراضي منو سمحلج
يمامه : من جنت ادور على الرساله لكيت صوره قديمه اليه بغراضك شسوي بغراضك صورتي اني الي خبلني موبس الشبه بالخط اني الي خبلني صورتي شسوي عندك هاي الصوره كولش قديمه بالثمانينات من جنت صغيره شسوي عندك احجي لتخبلني مو وكت منو سمحلي او مسمحلي شسوي صورتي عندك ديحجي قاطعته وهاا شراح ادور عذر مراح اصدكك لان اكو شى واني مااعرفه
حامد : اروحن انام احسن ماعندي جواب ليها حسيت بلحظة رجعت ٢٠ سنه لوره وهذا الموقف ماحسبت حساب اله گل عمري (احجي بداخلي)

يمامه : لزمته من ايده حامد ابوس ايدك احجي شنو الضامه بروح ابوك واخوتك اني گلبي من زمان حاس اكو شى زواجك مني اصرارك بكل الطرق حتى احبك ماكو رجال بشهر ونص يتقرب من مرت اخوه وهيج يعاملها
حامد : شنهي قصدج
يمامه : من اول ليله لمستني بيها حسيتك تحبني حسيت بيك طاير بيه حسيت بمشاعر غريبه منك مستحيل هاي المشاعر تجي من الرغبه الجسديه اني موصغيره واعرف اميز بين المشاعر من الگلب ومشاعر الي تمثل الغريزه وانت بليلتها ومو بس بليلتها كل ليله من جنت تلمسني تحسسني بحب وحنان وكأني شى مستحيل وصار الك وحاولت انتبه عليك بكل حركه بكل نظره وكل مره اشوف بيك شغله شكل وكله بجفه والالغاز مالتك بجفه ثانيه دوم تصيحلي طيرتي لو لوعة گلبي وغيرها من المواقف الي ماالكه اي تفسير الهم بس اليوم مااعوفك اله اعرف كولشي
حامد : شتريدين تعرفين

يمامه : گولشي حامد من اول يوم اجاني عادل وبيده الرساله مالته لليوم شنو الي صار وصورتي شوصلها الك كولشي حلفتك بروح ابوك واخوتك لتكذب ولا تضم

حامد :  تنهدت شگول شحجي ضليت بحيره واحسن الي سنين دافنه بصدري خلص وكت الدفن روحي استري نفسج البسي شى وتعاي وراي
يمامه : رحت ركضت ولبست عبايتي الاسلاميه وشمرت الكارتونه لأيه هاج ماما
أيه : وين رايحه ماما
يمامه : مرايحه انتبهو لختكم واكعدو اقروا شويه واجي رايحه ويه عمكم ما اتأخر
همسه : جيبيلي نستله وجبس وياج ماما
يمامه : اكعدي اقري وبالمجر عندج نستله يله ماما حبابه مااتأخر

وطلعت اركض لكيته يروح ويرجع باب البيت والجكاره بيده والسبحه بالايد الثانيه واني بيدي صورتي والرساله
واشرلي يعني امشي ورايه واني امشي ويه گل خطوه تخطيهارجليه يخطيها گلبي شنو المضموم عليه وصلنا للشط شو هنا جان شهر ١١ ساعه ٨ بليل وظلمه والجو بارد طيب ويم الشط
اگعدي
كعدت وهو كعد بصفي
حامد : انه طول حياتي ماتوقعت بيوم انحط بهيج موقف لو ما الصوره مجان حجيت
انه جبت هنا لان هذا المچان الوحيد الي دوم اشگيله هذا المچان لو عنده لسان ويحس چان بجى على حالي
يمامه : ليش شنو الصار
حامد : راح اگلج گلشي ولا تقاطعيني
انه يوم ماشفتج جنت هايم امشي ادور شقه لأخوي اخوي الصغير الي جنت اعتبره ابني وحزام ظهري وحاير بيه جنت من خوفي عليه وحبي حتى مااخلن اخوتي ولا ابوي يحجون ويااه رغم كل المشاكل الي چان يوگعنا بيها واكولن صغير يكبر ويعقل وكبر اخوي بس ماعرفت راح يكبر حتى على اخيه الرباه

واني امشي بشارعكم لمحت طيره تمشي وضحكتها تهز گلبي هز وبدون مااحسن مشيت وراج ليش انتي من دون بنات الدنيا گلها چا العماره وبغداد كلها نسوان ماهزن شعره مني وانتي ضحكتج هزتني هز ومااحسن غير رجولي تاخذني بدربج واندل بيتج شفتج وانتي حديثة بت ١٤ سنه والكصيبه تلعب بظهرج وبگلبي

يمامه : حامد يحجي واني ويه كل كلمه ارجف
حامد : عشگتج  عشگ  بس رب العرش يعرفه همت بيج وانتي ماتعرفين صوتج حتى اسمعنه تختل بين الشجر واسمع كلامج ويه صديقاتج ويه كل حرف انه اتعلق بيج ومرت السنين وانه اراقبج من بعيد

يمامه : ليش من بعيد ليش محاولت تتقرب مني ليش محسستني بوجودك
حامد : انه ابن عشاير وعدنا عيب الزلمه يطخن مره مو بالحلال انه مااندك بعرض غيري واعتبرتج عرضي وماردت اكضنج وانتي مو حلالي وتقدمت وخطبتج

يمامه : شنو خطبتني
حامد : دزيت صديق الي يعرف ابوج وابوج مافتح الموضوع سده وماكلف نفسه حتى يعرف العريس منين من ياعمام رد بس ماازوج البت عبن صغيره وانه گلت انتظرج لحد ماتكبرين المهم تطمنت ابوج مايزوجج
وجرت السنين وانه اشوفن طيرتي تكبر وتحلى كدام عيني ويوم بعد يوم اعشكج اكثر لحدما گمتي تمشين بدمي

يمامه :كمل فدووه
حامد : وبيوم قررت تقرب منج خفت لاتروحين مني كتبت الرساله وضليت الوبن تقربت منج بس انه جنت من اشوفنج اموعن گلبي مايضل بمجانه يطير وانه ابن شيوخ وتربات الديوان والمضايف يمج اصيرن طفل چلمه ماادبر احجي تدوهنت ورجعت مادبرتها انطيج الرساله ومن رجعت شافني عادل الوبن
وبديت احجي گلشي الها لحد يوم جيه عادل من غلط ويه البت بالحرام

يمامه : يحجي واني گلبي يعتصر والقهر سيطر عليه وخانتني دموعي وهو مستمر يباوع على الشط وبيده الجكاره مطفاها تخلص وحده يورث الثانيه قبل متخلص الاولى ويه كل نفس يحرك صدره بيها واني ويه گل كلمه طالعه منه تحرك صدري روحي احتركت مثل الجگاره الي بيده مدري انقهر على حالي وشون انخدعت كل هاي السنين مدري انقهر على حامد وكسرته من اخوه وطعنته اله مدري اتعصب على عادل الي طلع واحد بلاذمه وضمير حسيت بلحظه اريد اكوله كافي اسكت مكعد اتحمل اريد املخ روحي حتى الهوا الطيب الي جنت اشمه من الشط انكلب هو كله غدر وخيانه وخداع وسنين ضاعت كلها جذب بجذب اباوع على حامد من يحجي حاله مو احسن من حالي يمكن هو اسوأ لان من ديحجي يغمض شوي ويفتح وكأن الشريط كدامه ينعاد اثنينا بموقف صعب اني الي مكعد اكدر استوعب كل الي صار وشون واحد مثل حامد يحبني كل هاي السنين وكاتم بگلبه وشون اني عايشه ويه واحد كل الشغلات الطايح حظها مسويها واني نايمه ورجلي بالشمس وماادري

احجي بخنكه وبشهكه گلب مجروح ويااه
وصورتي منين حصلتها

حامد : من المدرسه جان عدكم فراشه انطيها كم فلس واخذت صورتج من فايل المدرسه ردت شى يصبرني بعدج وهاي الصوره خذيتها من جنتي سادس وانه استلمت الشيخه وماكدر كل شوي انزل لبغداد جان تصبرني على بعدج وضميتها كل هاي السنين ومن تزوجتي عادل ضميتها عبن حرمتي علي مااكدر انظرلج بالحرام وصرتي عرض اخوي وحرمته وقبل مااتزوجج بسنه مره طگ گلبي عليج اريدن اشوفنج ماشفت روحي غير مطلعها وحاطها بغريضاتي وماتوقعت تلكيها

زين مره ولد تحرش بيه بالسادس وجان ابن حزبي جبير هاي الحادثه عمري ماانساها وضايقني حيل وصل مرحله يريد يلمس جسمي وركضت من الخوف للبيت اجتي بنيهرمنرطرف الولد ثاني يوم بعدني ممكمله جان يقاطعني حامد

حامد : انه اي انه الضربته بيومها عگل ماضل براسي وانه اشوفنه تحارش بيج چا انه يتحارشون بطيرته ويسگت جنت موجود وردت ادخل بأخر لحظه حتى لو تشوفيني المهم مايلمس شعره منج بس انتي سباعيه ركضتي ودخلتي للبيت انه من حرگت گلبي وكفته بنص الشارع وجنزته تجنز (موته گتل) مابقيت بوجه مچان ولا بجسمه جن حاول يكضج
يمامه : تدري ليش منسيت هاي الحادثه لان الولد ثاني يوم دزلي بنيه وكال كوليلها عود انتي سباعيه ودازتلي ولد طويل وضخم ومكيفه عود قوي اله اكسره الج
اني تفاجأت منو هذا الطويل ومن طلعت من المدرسه شفته للولد وجهه خريطه اني من الخوف ركضت للبيت وبلغت بابا وراح ابويه على عمه جان جوارينه وسدوا الشغله
وره مده من اجه عادل وكتله كال هاي اني ضربته كيفت گلت شون يحبني ويخاف عليه بس بقت كلمه الولد من كال طويل وضخم باوعت على عادل موطويل مربوع طوله وسط ولا ضخم اخويه نصار كصير كلت يجوز شاف عادل طويل بس الولد اصلاً اطول من عادل وبقيت ايام افكر لحد مصدكت بأن هو صدوك عادل الي ضربه

حامد : لا انه الضربته
يمامه : ليش عفتني اله ليش مگلبت الدنيا ليش محاربت علمود حبك
حامد : انه ماعرفت انتي حبيبته اله بيوم المحكمه من اگلج انتي لوعه گلبي حتى تصدكيني
يمامه : كمت ابجي ليش هيج صار ليش
حامد : هذا قدر ومكتوب يمامه انه مااريدن تفكرين بكل كلامي انسي والتريديه يجرالج
يمامه : وعمري الي ضاع ويه واحد كضاها جذب بجذب
بس فهمني البنيه الي حبلت منه وينها
حامد : البت كتلوها هلها قبل ساعات من كتلت عادل ليش احنه تسودنا جه خذو منا فلوس وعقد عليها وانتهى كلشي وتولونا غدر
يمامه : وهاي اول مره يخوني بيها لو اكو قبلها
لتسكت احجي حامد هاي اول مره لو اكو قبلها
حامد : سكتت چا شگلها جان كل شهر شهرين ويه وحده اشكال بنات ليل مصاحب
يمامه : عرفت من سكوتك هاي مو اول وحده الله لايرحمه عسااه بنار جهنم
حامد : لاتدعين هو ميت ماتجوز اله الرحمه عليه ولاتنسي هو اخوي
يمامه : وكفت على حيلي وصرت اعصاب وابجي اذا هو اخوك اني زوجته والمفروض اول حب بعمره اخذ عمري ودمرني انت شلون الك عين وادافع اله هذا غدرك اخذني منك
حامد : حسج يمامه لاتنسين نفسج احنا بره والوادم لاتسمعنا
يمامه : شيسمعون خلي يسمعون وانت هم مااريد اشوف وجهك انت هم مثله شون تحبني ٢٠ سنه وميت عليه وتتزوج عليه كلكم جذابين الله ياخذكم اكرهكم وعفته وركضت للبيت واني لو بيدي احركه واحرك روحي واحرك كولشي كدامي

حامد : عفتها حگها الي سمعته چبير مايحمله گلب خليها تبرد شوي رجعت بمجاني وانه احس حمل وانزاح من صدري وبقيت للفجر كاعد مااريد اردن للبيت واشوفنها اخاف اضعف واضغط عليها بس مابيدي شى رجعت ودخلت يم احلام

يمامه : دخلت للبيت واني ابجي
أيه : ماما بيج شى
يمامه : ايه روحي مني مااريد اشوف احد كملو دراستكم ونامو وراكم مدرسه باجر يله
أيه : عفيه ماما شبيج
يمامه : لتعاندين يله بسرعه
بقيت الوب نار وشابه بيه ثاني يوم حتى مطلعت ولا شفت احد اسمع الحجيه تحجي  ولا اهتميت اني البيه كافيني وخطيه فضيله مكمله الشغل وصار الليل واااااااه يااليل على المجروح چنه ملح يذب على جروحه

محتملت ورحت ركض اريد شى يطفي ناري
مازن : نايم واندكت الباب كمت لبست لان نايم بالداخليات وفتحت الباب واشوف عمه يمامه كدامي والوجه اصفر وحيل مبين التعب عليها خير عمه بيج شى البنات بيهن شى
يمامه : مازن اريدك توديني للنجف
مازن : عمه صاير شى تعبانه متخربطه نروح للمستشفى
يمامه : اكولك للنجف دكول مستشفى
مازن : وضعج موطبيعي وشمعنه للنجف
يمامه : اريد اروح اشوف عمك عادل
مازن : هااااا وشذكرج بيه
يمامه : توديني هسه لو لا اذا متكدر اني اروح وحدي
مازن : اوديج على كيفج اعصابج تدللين بس ابويه حامد يدري
يمامه : لا مكلت اله
مازن : لازم نستأذن منه مترهم عمه
يمامه : عفيه تكدر انت تكوله
مازن : ماشي رايح استأذن زين اذا مقبل
يمامه : كوله يمامه تكول لازم اروح وهو راح يفهم
مازن : ماشي روحي حضري نفسج بين ماابدل واروح ابلغ ابويه وارجع هسه بيش الساعه
يمامه : اربعه الصبح
مازن : والله اذا دكيت الباب عليه هسه يتخبل عباله احد بالبيت صار بيه شى
يمامه : اذا مرحت هسه للنجف اني الي راح يصير بيه شى
مازن : لا اسم الله دقايق ابدل واروح ابلغه انتظريني جوه
رحت دكيت الباب واني ابلع ريك والله راح يهبط بله شجاها وتذكرت عادل فتح الباب وهو مخترع

حامد : شنهي بوي بيك شى الحجيه بيها شى
مازن : لا يابه لتخاف كلها زينه
حامد : چامكعدني ساعه اربعه الفجر شتريد وليدي حتى الصلاه بعدها
مازن : اجتني عمه يمامه وتريد اوديها للنجف تزور وسكتت بله شكله تزور زوجها السابق
حامد : تزور عادل
مازن : هي كالت اذا مقبل كوله يمامه تكول لازم اروح
حامد : روح بويه اخذها وعينك عليها لاتغفل لحظه منها ورد بسرعه لاتتأخرون
مازن : لا لتخاف وياها
حامد : بويه مازن امانتك يمامه تردها سالمه ليه

مازن : بعيني يابه لاتخاف ومنتأخر ان شاء الله
طلعت بره لكيتها واكفه بصف السياره وتلوب وبيدها عبايتها يله عمي امشي كملتي كلشي
يمامه : وافق حامد
مازن : اي بس منتأخر
يمامه : ان شاء الله منتأخر يله ابني امشي

صعدنا شكد الطريق طويل محسيت بيه بس احس بالنار الي بصدري واحس روحي تريد تطلع من الخنكه ليش كل هذا يصير بيه وصلنا بعد اكثر من اربع ساعات طبيت للمقبره وامشي بين المقابر وعيوني ادور عليه لحد موصله لكبره انداريت على مازن
عفيه ممكن تعوفني وحدي
مازن : عمه شون اعوفج تشوفين ماكو احد صنطه وتخوف
يمامه : اوكف بعيد لعد عفيه
مازن : ماشي راح اوكف بعيد ومااخليج تحسين بيه اخذي راحتج
وكفت مسافه عنها بالبدايه مااسمع شتكول تقربت شويه كتلني الفضول شجابها وهيج مفرفحه روحها على عمي عادل حتى نسيت ازور ابويه ردت بس افهم شكوو وسمعت كلامها

يمامه : وكفت گبال كبر عادل وصفنت على صورته الي حاطيها على الگبر ونزلت كعدت بصف الكبر وبديت احجي بحركه گلب وبچي ليش هيج بشنو اذيتك شنو الي سويته وتگلب حياتي كلها يعني انت شنو ماعندك ضمير هيج انت انسان متخاف الله اذيتني من كولشي شون كدرت تنسب شى مو الك شون كدرت تاخذني من اخوك من اخذت الرساله منه شون انطاك گلبك وتكولي منك بيومها من رجعت وكفت كدام اخوك شنو من قابليه وكفت كباله وعينك بعينه وكتله شككت الرساله ورافضتك والله شنو عجبتك زين واني مفكرت بيه مكلت اخاف يجي يوم وتعرف شون اباوع بعيونها

عوفك من كل هذا نكول لحظه شيطان وصارت زين من تشوف اخوك سنين يسأل عني متحركت الغيره بداخلك مكلت هاي حبيبتي ابتعد عنها فوكاها تكوله زينه وتنطيه اخباري حتى يوم متوقعت انت الي دافعت عني وضربت الي تحارش بيه طلعت مو انت وبكل عين صلفه تكولي شنو يتحارش بحبيبتي الي يطخج اكطعه واندمه على اليوم الي اتحارش بيج شنو من بشر انت عقلي راح يوكف مدااستوعب لهاي الدرجه جنت مخدوعه بيك عيونك شون جانت تباوع عليه من تغازلني متكول هاي حبيبه اخويه زين من تحضني وتنام متكول اخويه عايش بنار هسه شنو من ضمير شايل وفوك كل هذا تكولي اخذو ورثي وطردوني اخويه حامد ظالم ميخاف الله شوهت صورته بداخلي مكافي انت طاعنه بظهره تشوه سمعته ياكل حرام مأذينا لاعب طوبه بينا حتى امي تشكي منه ومن ظلمه وغيره وغير من الحچي

جنت كل مااسألك متشتاق لأهلك متصالحهم بناتك كبرن لازم يعرفن منو اهل ابوهن تكولي ماعندي اهل الي ياكل حقي ويطردني مااعتبره اخويه وصلتني مرحله اكره اسم اخوك من اسمعه وفوك الضيم يطلع البيت والمحل من الفلوس الي ادزهن امك وبعلم اخوك يعني حتى معاقبك وجوعك وانت بكل نذاله تطعن بيه

وره كل هذا تخوني وتصادق اشكال البنات مكفاك طعنتك لأخوك اجيت اتكمل عليه انت هسه بالكبر بس ربك مستحيل يرحمك اذيت اخوك الي مأذاك بيوم وطعنت زوجتك وزنيت واذيت الكل وتريد يرحمك حشى لله ميقبل على الظلم تدري هسه لو يمي وعايش واعرف بكل الي سويته يمكن لو احركك ميبرد گلبي لك ليش متكولي وكمت اضرب على الكبر بكل قوتي احس روحي طير مذبوح ويصارع حتى يعيش كمت اكسر بالكبر مالته مثل المخبله لك الله لاينطيك ولا يرحمك انت احقر انسان شفته بحياتي دمرتني ودمرت اخوك وبناتك واعيط واحفر بداير مداير الكبر مثل المخبله اريد اطلعه من الكبر اريد أذي مثل مأذاني

مازن : سمعت كلامها ومتت قهر عليها يعني واخيراً عرفت كولشي شفتها انهارت عفتها كلت خلي يبرد نار گلبها بس من حسيتها فقدت عياط وتكسر بطابوك الكبر ركضت عليها ولزمتها عمه على كيفج اذكري الله ميجوز على الميت غير الرحمه
يمامه : يارحمه مازن هذا الي كعد تشوفه دمرني ودمر اخوه وبناته وموت ابوك وناس كومه راحت بسبب حقارته ونزواته هذا خله حياتي جحيم اكبر جذاب وماعنده ذمه وضمير الحقاره بدمه باع الدنيا لخاطر نفسه ماهمه احد
مازن : الي صار صار ياعمه ومراح يتغير شى وهو راح لربه وهو يجازيه وميصير تسوين هيج كله قدر ومكتوب بعد مابيدج شى تغيري لتأذين نفسج

يمامه : شأذي نفسي اني اصلاً ميته اني انسانه مدمره داخلي رماد هذا حرگني وراح وعافني اتلوع بوحدي بهاي الدنيا الطايح حظها فوك مصخمني وخاني طلع طاعن اخوه وماخذني منه لو شكد مااحجيلك على النار الي بيه مراح تستوعب كلامي گضيت مراهقتي وشبابي واحلى سنين عمري ويه واحد جذاب حقير عايش ويايه ويجذب عيني عينك ويخون ويوميه شكل ويه وحده جابها ويايه احبج وضحيت بأهلي علمودج ولو تعرفين شسويت لخاطر اخذج حسسني بايع الدنيا حتى يتزوجني خلاني العمر كله انام واني ممنونه منه على تضحيته لان اتمسك بيه وعاف حتى ورثه لخاطري لان گلي اخويه ساومني لو انتي لو الورث واختاريتج انتي واني امشي واكول خطيه انحرم من فلوسه وحقه علمودي بشنو اجازيه بقيت مثل النعال برجله هو يمشيني هو يتحكم حتى بالهوا الي اشمه لخاطر شنو اكول لان يحبني ليش مااسوي مثله واريحه حتى من اضوج ما احسسه حتى صحتي من اتعب اخلي اهلي يودوني ويحيرون بيه اكول خطيه تعبان مااتعبه ويايه صرت اله مثل المي بالصينيه شيكول اكوله حاظر وتدلل ومن عيوني وحافظت على بيته وكفت وياه بكل ضروفه صرت اله ام واخت وصديقة انطيته حياتي كلها والله شنو اني الغبيه عبالي يحبني ومشتريني طلع بايعني وبايع اخوه وحتى بناته ومشتري راحته ونزواته

مازن : حشاج عمه وحقج والله ماالومج بس مراح يتغير شى هسه كسرتي الكبر عطيتي وغلطتي ودعيتي شنو الي راح يصير لاهو راح يعيش ويرجع وتاخذين حقج منه ولا الي عشتي مراح تعيشيه فوضي امرج لله انتي مره مؤمنه بقضاء الله وقدره كولي ياالله وكومي اوديج للامام روحي هناك ابجي عيطي شسوين سوي واشمري حمولج على الله ماخاب من استعان بالله كل الي كعد تسوي ماله نتيجه بس تأذين روحج بالزايد

يمامه : مسحت دموعي واني اشهك من البجي انت تعرف كولشي مو حسيتك متفاجأت
مازن : اي اعرف بالقصه كلها
يمامه : وليش محجيت ليش مكتلي حامد ليش سكت يعني لوما الخط عرفته من الرساله ابقى العمر كله مخدوعه ليش ولا واحد منكم رحمني وگلي
مازن : ياعمه شنكولج ليش هو الي سواه عمي عادل يتسولف اصلاً بيوم محجالي ابويه تخبلت بقيت افور الله يساعد گلبه هو شون تحمل وهم مالي حق احجي اذا هم ابو الانه محجه اجي اني احچي مترهم

يمامه : اخذني للامام تعبت مااريد ابقى هنا اذا ابقى يمكن ماابقي طابوگه بالكبر وحتى انبشه نبش طلعني منا رحمه لأبوك
مازن : يله امشي المهم على كيفج ويه نفسج لتتخربطين وجهج اصفر وكوه واكفه
يمامه : امشي نروح
رحنا للامام علي  ﴿ عـِـًِـًِـًِﻟــيِـًـًِـًِﮧ آإآﻟــًـًـًﺴـًـًـًلآﻤ ﴾ واول مدخلت لحضرت اباالحسنين كمت امشي والدموع تصب تكول مخزنه الضيم الي بگلبي على كل دموع ابجي وامشي
مازن : عمه روحي زوري واني هم اروح ونلتقي هنا يم هذا الباب وعلى راحتج زوري وصلي كل الوقت الج تلكيني كاعد انتظرج كولشي محجت بس الدموع تصب وتحرك براسها صدوك انقهرت عليها وامشوفها تمشي وتباوع على المناره لحد مدخلت للضريح
يمامه : جيتك ياابوالحسنين بجاهك عند ربك لاتردني خايبه اني جار الزمن عليه واذاني انسلبت راحتي وضيعت كولشي سوه بيه الميتسوه اذاني واذه كل قريب منه مااكول خير حسبي الله ونعم الوكيل عليه هو يم ربه ياخذ حقي منه بس اني شون بيه واني مثل السمجه المزوهره ضيعت نفسي وخايفه اضيع بناتي شون واني حتى الانسان الوحيد الي طلع يحبني خذلته واذيته شون ارجع كولشي واني مضيعه نفسي حتى مالي نفس اعيش كارهه روحي وعمري وكولشي المن اشكي والشكووه بس الك رِّبًـــ♡̨ـــٍْيٌٓ انت اعلم بحالي مره مكسوره اجبر خاطري يـِْ♡̨ـِْا رَبّ بجاه حبيبك محمد واهل البيت بجاه الامير علي عندك تعبت والدنيا ضاكت بعيني وماعندي ملجأ غيرك ساعدني يـِْ♡̨ـِْا رَبّ
بقيت اصلي وابجي واقرا دعاء الزياره وضعي احسن بس بعدني تعبانه بعدني الوب وبديت احس روحي صعد ضغطي خفت مثل ذيج المره اطك اذني دم كملت ورحت لمازن

مازن : جنت انتظرها واجتي من بعيد واشوفها تترنح بمشيتها ركضت الها هاي عمه شبيج
يمامه : فدوه مازن عيوني مغوشه وصداع موطبيعي
مازن : اكيد لان منايمه ومماكله وبجيتي هوايه شتريدين
يمامه : وديني للسياره وامشي نرجع للبيت
مازن : ماارجع اذا متاكلين راح توكعين والطريق طويل متتحملي
يمامه : فدوه مازن لتعاند والله مااكدر احط لكمه بحلكي
مازن : وروح ابويه ماارجع اله تاكلين
اخذتها وبقيت الح عليها اكلت شويه وشربتها نومي بصره حتى ضغطها ينزل وجهه صار احسن ورجعنا وهي خطيه من التعب نامت اباوع عليها الله يعين گلبها وصلت للعماره وهي حتى محست من وكفت السياره لعد شكد تعبانه
نزلت وجان يصير ابويه كبالي
هاا بويه ضل بالي تأخرتو
مازن : لا والله متأخرنا بس الطريق وبين مزرنا
حامد : وينها
مازن : بالسياره نايمه اجيت اصيح ودق تكعدها وتلزمها اخاف بعدها دايخه
حامد : بيها شى تعبانه وانه وصيتك عليها عود
مازن : يابه مابيها شى بس ضغطها صعد
حامد : انه اكعدنها
رحت للسياره وصلت وشفتها نايمه اوف ياطيرتي تضلين لجمه گلبي دنجت عليها يمامه اكعدي
يمامه : فتحت عيني وصار حامد بوجهي فزيت اني وين
حامد : لاتخافين انتي بالبيت وصلتي
تعالي اسندج اخاف تعبانه
يمامه : لا اني اكوم مابيه شى بس شويه من رخصتك انطيني مجال

يمامه : بس كمت وكفت داامشي حسيت الدنيا افترت بيه لزمني حامد
حامد : الله الله شكد عنوديه انطيني يدج لو اشيلنج احسن
يمامه : لالا شتشيل الزم ايدي بس ومشيت وياه وصلني للغرفه وجان البيت هدوء همزين مردت اشوف احد تعبانه
حامد : تمددي ارتاحي انزعج ملابسج
يمامه : لا شكراً اني انزعهم تكدر تاخذ راحتك مابيه شى
حامد : تحبين اجيبلج شى محتاجه شى
يمامه : لا تسلم بس هسه اسبح راح ارتاح
حامد : انه بره اندهي علي اذا احتاجيتي شى
يمامه : متقصر تسلم
احجي ويااه برسميه لان اثنينا نحس وضعنا مو مثل قبل كلام بحذر منعرف شنو الي راح
يصير

حامد : طلعت ردت ترتاح مااريدن اضغط عليها تعال بويه احجيلي شصار
مازن : وحجيت كولشي وحتى الي سمعته
حامد : حگها الي عرفته مش هين ماالومنها بس خايف عليها مااريدنها تتمرض وتتعب
مازن : والله هي تعبانه وضغطها ديصعد بشكل رهيب لازم ترتاح ولو هلكم يوم
حامد : انه راح اوصي الگل محد يگرب عليها حتى ترتاح
مازن : وانت يابه مراح توكف بجانبها
حامد : اي تصرف مني راح تفهمه غلط هيه هسه گلشي تعرف وهيه التحدد الجاي انه حجيت گلشي حتى احطن النگط على الحروف كافي تعبت وانه احاول اكسب گلبها وهي قافله گلشي هسه بينا جامد لا هي تكدر تگرب ولا انه اعوفنها ترتاح والله كريم

يمامه :

بقيت يومين بس بالغرفه بين الحمام والغرفه حتى البنات مشفتهم ولا وصلولي بس فضيله تدخل تنطيني الاكل وتطمن عليه وتروح واني كوه احط لكمه مااريد اتمرض وره اليومين طلعت اتمشى من الصبح ساعه ٦ جان الجو يخبل نهايه شهر ١١ وبارد لكيت مازن كاعد بالحديقة
صباح الخير
مازن : هله بعمه صباح الانوار بشري شون صرتي
يمامه :  الْحٍمَدٍ للـّہ احسن انت شخبارك
مازن : الحمدلله
يمامه : شعجب شو هنا
مازن : احب بهيج وقت اكعد بالحديقة وراها اتريك واروح للدوام
يمامه : مازن الي صار قبل يومين مااريد احد يعرف بيه
مازن : ميحتاج توصين حريص اطمني بس الصراحه ابويه سألني وكولشي حجيتله
يمامه : اعرف انت متضم عليه واكيد راح يسألك بس قصدي عمتك او بيبيتك
مازن : لا ملكيتي غير الحجيه اكول الها غير تشرني على الحبل شيخلصني منها
يمامه : ههههههه والله الحجيه اني مااكرهه بس مااعرف ليش متحبني ولو ماالومها اكيد تكرهني بسبب عادل شوف شمبدع ومخبل المره عليه
مازن : الله كريم ان شاء الله يتصلح كولشي
اروح اتريك مضل وكت لازم احظر نفسي للدوام
يمامه : روح الله يوفقك وتسلم تعبتك ويايه
مازن : تدللين ماكو اي تعب

يمامه : مرت الايام واني مثل الميته اشتغل ساكته وحتى من اشوف حامد ادير وجهي عبالك دااعاقبه بذنب اخوه احس هو السبب لو موكف عادل عند حده مجان عشت كل هذا الالم حملته ذنب وهو مو ذنبه بس موبيدي من وره كميه القهر والالم الي عشته حسيت الكل كذابيين كلهم سبب تعاستي حتى بناتي حملتهم ذنب ابوهم كولشي كارهه بروحي

حامد : ابتعدت عنها اريدنها تفكر صح ورجعت بيوم للبيت صعدت يم فرحه ردت ماابين شى حتى لحد يحس بان انه مبتعد عنها دخلت ليها واشوفن البت لابسه ثوب مدلع وحاطه بوجهه الاحمر والاخضر درت وجهي منها
السلام عليكم بنيتي
فرحه : وعليكم السلام ابو جنه
متعشي لو اسويلك عشا
حامد : لا خلف الله عليج مااريدن متعشي
فرحه : زين چاي يعدل راسك
حامد : اي والله بوي ياريت
فرحه : من عيوني
حامد : تعالي ليه بويه هاي شلابسه وطالعه هيج
فرحه : لبست روب فوك ملابسي
حامد : بنتي البيت بيه ولد شاب استري روحج حتى حرام
فرحه : تدلل المهم متزعل من عيووني
حامد : مو قصد الزعل لازم تراعين الدار مو انتي وحدج بيها ودوم بيها ولدنا لازم تنتبهين ولاتنسين انتي كدام الگل مرتي چا شون مرت الشيخ محمره ومكحله وتفتر
فرحه : تقربت حيل عليه حقك والله بعد مااسويها
حامد : البت تدلع وتتموع وانه موبحالها
روحي جيبي الچاي بسرعه
فرحه : من عيووني لبست دشداشه مستوره ونزلت وجان تصير احلام گبالي
اووف والله تعبت يعني الشيخ حامد عليه سوالف
احلام : اي والله يوميه چايبلنا الزبل وملفيهم بالبيت

فرحه : شنو قصدج خاله
احلام : وخلخاله ماتجوزين اله بيوم اكضن  لسانج واكصه
فرحه : اني قصدت متعبني بس يدلع عليه واني اموت بالدلع مالته شسوي رغم دلعه صعب بس احبه
احلام : والغسل كون اركدي واثگلي لابيوم تنزلين من فوك تدعبلين وصگد بذاك الوكت تدلعين وفوگ طيحتج بعوجيه عمتي اكسرج
فرحه : خاله شبيج ويايه والله اني احبج
احلام : وانه من الله مااحبنج هنا توكفين بالزردوم ومااهضمج هي كوه
يمامه : طلعت واشوف احلام وفرحه واكفات والله خوش شكلنا مثل نسوان الحجي متولي لامهن كلهن بيت واحد والله شكلنا يضحك وفوكاها يكولي احبج من سنين شتحب وانت متزوج عليه لو متحبني شسوي

عفتهن ومشيت جان اسمع فرحه شتكول
فرحه : من رخصتج خاله اروح اسوي جاي لحمودي ينتظرني
احلام : هذا ياهو حمودي اخوج الصغير
يمامه : لا ابنها بزر الكعده ههههههه
احلام : لاتنسين خيه الممه وياج عندنا حليبات بالثلاجه اخافن يجوع بليل ومابيج حيل ترضعي
يمامه : هههههههه لتخافين ست فرحه كدها وكدود

الحجية جميله: ها ولجن شصخم وجهج وملتمات
فرحه : والله يمه جنت نازله اسوي جاي لأبو جنه وخالاتي حبن يشاقن ويايه
احلام : چا هسه صار ابو جنه مو قبل شوي حمودي اوف ياعياره النسوان وشنهي خالاتج عوذه منج انه اصيرن خالتج چا اطمن روحي احسن

الحجية جميله: روحي يمه زلمتج ينتظرج ذني مابيهن نفع ولا دفع لو بيهن خير چان خلفن فريخ لزلمتهن
يمامه : دخلت اذا ابقى ابتلي بفرحه والحجيه
حامد : صعدت وبيدها الجاي وتدنج علي وصدرها كله كدامي واديرن وجهي واتعوذ من الشيطان
فرحه : مشيت ردت بس الفت انتباهه ماكو حرت شسويت صار ايام مبقيت شى وهو ولا يمه لحد مسويت نفسي انطخيت برگبي وعطت ااااااخ

حامد : كمزت شبيج بويه شنهي جرالج
فرحه : عفيه ابو جنه رگبي راحت ااااخ يمه
حامد : اصيحن فضيله تشوفج
فرحه : لا عفيه استحي منها اااااخ يمه تموتني
حامد : چا شون نعرف شبيها
فرحه : انت شوفها عفيه ومسويه نفسي ابجي
حامد : انه هاااا لا اصيحن فضيله احسن
فرحه : لا فدووه دخيلك بس شوفه نار وگبت بيها اخاف انكسرت لو صار شى شوفها وبديت ارفع دشداشتي لنهايه رگبي متقصده اغري بلكت يحس ويتقرب مني
حامد : اباوع على جسمها البت حليوه وصغيره وهي تغريني حسيت بروحي انثاريت وانه اشوفن مفاتنها وهي تتقصد تسوي حركات اطخني بيها مااحسن روحي غير

متكرب عليها وبدت هي تبوس بيه بهدوء وتثير بيه وانه زلمه وصار فتره مامتقرب احلام مريضه ويمامه هاجرتني وشوقي الها معذبني محسيت بروحي غير تخيلها يمامه وبحضني وانه مثل المغيب تقربت عليها وصار شعرها ورگبتها بوجهي وبلحضتها شميتها وجن واحد وضربني على راسي هاي مو ريحه طيرتي مو يمامه دفعتها وضربتها راشدي جن احاسب روحي بيها لان ردت اكسر وعدي
كتلج لاتعيديها انتي بنيتي ليش تكربين للنار
فرحه : حامد اني احبك والله احبك شوكت تحس بيه اريدك انت زوجي من حقي مثلهن وكمت ابجي
حامد : انه من الاول كتلج انه متزوج وهي فتره وتولين لهلج لاتلعبين بروحج
فرحه : بس اني مااريد اروح لأهلي اريد ابقى على ذمتك
حامد : وانه مااكسر چلمتي كلها كم يوم وتولين اخوك مابقى غير اسبوعين ويطلع والكعده مال عمامج سبوع الجاي اخلص يعني كلها اگل الشهر وبعد مالج مچان يمنا

فرحه : ليش والله احبك والله اخليك اسعد رجال بس انطيني فرصه
حامد : راح يجي اليوم التحبين شاب بعمرج وتكولين رحمه والديه لحامد من ماكضني وكسرني بعدج ماتفتهمين الدنيا وماخذتج حجي امي وغيرها صيري عاقله وفكري زين انتي هنا دخيله والدخيل عندي اشيلنه على راسي اله الامان والاچل والراحه غيرها الج ماعندي وحگ ايام ويصير بيدج استري على روحج
وعفتها واطلعت وانه احمدالله ماضعفت وتقربت ليها جان مااكدر بعد اطلكها
فرحه : طلع وعافني بعيني ياشيخ هاي الاسبوعين انت تشوفهن قليلات بس اني اعرف شسوي واخليك بنفسك تجي وتاخذني وتسويني مرتك

يمامه : طلعت من الغرفه للحمام واشوف حامد نازل زهكان بس لا تعارك ويه ام حمودي باوع عليه ودار وجهه عادي اصلاً من يوم الي اعترفلي بكولشي واني بعيده عنه رجعت نمت ومثل كل يوم رحت كعدت البنات ولبستهم وراحو للمدرسه

حامد : يمه واليرحم والديج بطلي من البت لاتلعبين بعقلها
الحجية جميله: يمه هاي حلالك شون بيك مو راح اموتن من وراك
حامد : وحگ علي اذا البت لعبتي بعقلها مره ثانيه اله اطلكها حتى لو بعدني مامرجع حلالهم
ومااحس غير يمامه اطب تركض وتعيط الحك حامد
حامد : شنهي شجرى
يمامه : أيه بنتي ماكو اجتي ودق هسه تكول راح تشتري من ابو الدكان انتظرتها ماكو راحت وراها كال ابو الدكان مااچتني
حامد : شنهي أيه
يمامه : كمت ادك والطم على وجهي بنتي راحت ياناس بنتي ضاعت كلب الدنيا حامد مازن والولد كل واحد بصفحه المنطقه گلبوها وسلاح بيدهم ويفترون واني حتى شعري ملخته راحت بنتي والكل يبجي على حالي ومااحس وره ساعتين تدخل ايه وكلها دم وتنزف من كل جهه باوعت على رجلها تنزف من جوه لطمت دخيلك رِّبًـــ♡̨ـــٍْيٌٓ بنتي

يتبع ..