رواية سجينة الروح الفصل الثالث 3 - بقلم ريام هادي

مساء الـ🌹ـورد متابعيني اعذروني على التأخير صار ظرف عندي وكان المفروض ماانزل بس محبيت اخلف وعدي وياكم وكتبت الكم بارت بس موطويل وان شاء إٱللـِْﷻـِْﮭﮧ اعوضه الكم باجر بارت طويل واحداث مفاجئه من قصة (سجينه الروح )
انتظروني
تحياتي

سجينة الروح
للكاتبه Reem
البارت الثالث

عاتبت الجرح بدموع العيون
رد جرحي يكَلي شذكرك بيه
كَتله جيت أشوفك واعرف البيك
يكَلي الونه ما تبقه خفيه
شجالك يا جرح كافي من الونين
يكَلي كل جرح طبعه الأذيه
كَتله آنه العمر خلصته جويات
وينطبكَن عليّ كلهن سويه
ما أعرف اجروحي وتاه الحساب
مو وصلن تعدن جزن ميه
ومرات اختنكَ خنكَة الغركَان
وشهكَات النفس زرفن الريه
أون ون العليل بوحشة الليل
واتمنه الجفن يغمض شويه
أشرب بالدمع ما ورج الناس
واتجرع حزن صبح ومسيه
بالصوره عدل وتشوفني الناس
لكن سكتاوي أنازع بالمنيه

يمامه : انداريت ورجلي ترجف ومابيه حتى اوكف شفت رجال جبير بالعمر ملثم من البرد
ها خويه انتي ياهي وين رايحه بنصاص الليال
يمامه : دخيلك عمو فدوه بس جاوبني منين الشارع العام
الحجي : انتي بت منو وجنج غريبه
يمامه : اي عمي غريبه واريد اروح لأهلي وبدت الالام تزيد ااااخ
الحجي : شمالج
يمامه : عمو فدوه يمكن دااجيب
الحجي : انه خوك تعاي بنيتي تعاي امشينا للحجيه
ومشيت وره الحجي واني حتى مااعرفه لان كميه الالم الي بيه تفوق كولشي بعقلي اصلاً مكعد افكر ولا بيه افكر اصلاً وبناتي كتلهن البرد يمكن غلطت من طلعت واني هيج حالي بس ميحس بيه بس الي عاش الرعب الي عشته وصلنا بيت صغير مثل الكوخ واستقبلتنا مره جبيره بالعمر وياها بنيه شابه
الحجيه : شنهي ياحجي تاخرت
الحجي : شوفي البت شمالها
الحجيه : صخام الصخمني هاي مرت ابن الشيخ راضي مرت عادل الصغير
يمامه : جمدت المره مباشره عرفتني نزلت ابوس ايدها دخيلج خاله لترجعوني ولا تبلغوهم بمكاني
الحجيه : يابنتي احنا ناس على باب الله واذا علم الشيخ والحجيه  راح اطين عيشتنا وانتي ماترضين لناس مثلنا البهذله
البنيه الشابه : يمه هاي البنت يمكن كاعد تولد شوفي حالها
الحجيه : تعاي يمه الله يستر على وليداتنا تعاي شوف شبيج
فحصتني يمكن المره تعرف بس بتها او قريبتها مبينه شاطره
خاله انتي ممرضه لو جده
الحجيه : يمه احنا هنا مومثلكم بغداد اهنا اكثر النسوان تولد وتعرف كلشي يله صبيحه استعجلي يمه مي الوليد نشف
اي يمه
كتلني الخوف والحجي خطيه اخذ البنات وكعدهن بالهول مالتهم واني بغرفه داخل البيت بدت الاوجاع ازيد واخذني العياط والصياح يمكن جانت اصعب ليله بحياتي حالي بمكان مااعرف منو اهله وبعز البرد واثنين بنات برگبتي غلطت صح من طلعت هيج وكت بس موبيدي ردت بس انهزم منهم خفت والخوف سيطر على عقلي وقراراتي
ضليت حدود ساعتين يحاولن يولدني وسمعت صوت البجي
ولد لو بنيه
الحجيه : بت تتربى بعزكم بنيتي
يمامه : حمدت رب العالمين يمكن لو ولد جان زاد خوفي لان اكيد ياخذوه مني بس البنيه وصارن ٣ بلكت ميردوهن بقيت متمسكه بأمل لان بنات يعوفوهن اليه بست بنتي وشلتها وكمت ابجي على حالي وحالها وشون ولدتها بأصعب الظروف من التعب نمت
خطيه منظفاتني ومنظفات الطفله وره مكعدت انطونياها ارضعها
الحجي : ها حجيه كواج الله ( الله يساعدج)
ويكويك شنهي الوجبه  شلون بينا وبحال البت الي داخل
الحجيه : دخلت دخيل عدنا وهاي حرمه ومانكدر نكسر بيها
الحجيه : چا تنكسر ركابنا بيدهم وليداتك يضعون والله شنهي دخيله عدنا

الحجيه : حسج مااسمعه خلي البت ترتاح واخذي الفروخ نوميهن خطيه يكسرن لبه الگلب
كعدت الصبح وشفت البنات متريكات وخطيه الحجيه والبنت الي اسمها صبيحه مريكات البنات وصبيحه مشطه الهن
الحجيه : صبحج الله بالخير بنيتي
صباح النور خاله مااعرف شون اشكركم على كل الي سويتوه اليه
الحجيه : سمعيني يمه انتي بحسبة بتي صبيحه واحنا ناس على كد حالنا ومانكدر للشيوخ وشيخ حامد مو شيخ عادي اذا علم انتي هنا يأگلبها عاليها سافلها
وانتي يابنتي ماترضين بحك شيباتنه هيج نتبهذل
يمامه : خاله فدوه مااريد شى منكم بس كم يوم يومين بس اوكف على رجلي واطلع منا وبعد متشوفوني
الحجيه : گليلي ليش شردتي
يمامه : بقيت حايره اكولها لا كلت خلي اكولها احسن متاخذ نظره موزينه عليه
وحجيت شى بسيط كتلها يردون يزوجوني لحمايه حامد سمعتهم وانهزمت

الحجيه : من فلك طرچ شنهي الي سويتيه هو اكو بنت بالديره گلها ماتتمنى طرف ثوب شيخ حامد
يمامه : خاله هذا حماي شون اتزوجه 
الحجيه : يمه هذا شرع الله چا حرمتي عليج
يمامه : خاله اني مااريد شى منكم بس اتحملوني يومين

حاولت اقنعها وبجيت وتوسلت وافقت الحمدلله وبقيت ٣ ايام يمهم والخوف مسيطر عليه اخاف الحجيه تروح تفتن عليه والحمدلله الله هداها عليه وعدت سلامات وثالث يوم اخذني الحجي اني الجهال وتبوشت وطلعنه من الصبح وتشكرت منهم وانطي للحجيه محبس ذهب والصبيحه تراجي بس مقبلو جانت عدهم عزه نفس حيل حبيتهم بس توسلت بصبيحه تاخذ التراجي وتعتبرهم هديه من اخت يله اخذتهم  وطلعنا اني والجهال ولفلفت بنتي الصغيره كولش زين حتى لتتمرض وصعدنا بسيارة الحجي  صح قديمه ومكسره بس توصلنا الطريق تعب بشكل متنا لحد موصلنا وصلت للفرع بجيت نزلت دموعي اتذكرت حالي قبل كم شهر شون جنت معززه مكرمه وكاعده بنص اهلي وبيتي شدعيلك عادل بهذلتني ولعبت بحالي وحال بناتك حسبي الله عليك
وصلت لبيت اهلي والبنات نزلو ركض
تفضل عمو

الحجي : لابنيتي وراي طريق طويل ولازم ارجع گبل المغرب
يمامه : اقلها غسل ارتاح اقوملك بالواجب انت نقذت حياتي وحياه جهالي لو اشيلك على راسي مااجازيك
الحجي : شنهي يابنيتي الدنيا ماتكاطعت وكلها عد ربج مسجله
يمامه : ونعمه بالله وبقيت اتوسل يطب وهو مقبل خطيه وحتى مقبل ياخذ ولا فلس مني الله ينطيه العافيه دزه رب العالمين نجده الي
دكيت الباب جان يفتحه بابا وممصدك من شافنه حضني ويبجي

حجي سلمان : كلت راح اموت ومااشوفج وينج يانظر عيني هيج عفتي ابوج وامك مفكرتي بينا وبحالنا
ابجي واحجي واعيط احس اريد اطلع ضيم وقهر الاشهر الي شفتهم هناك بحضن ابويه واجتي امي تركض من شافتني كامت تعيط وتبجي بنتي يمه دخيلك ربي رجعتها سالمه رحمتك بيه
وبقيت ابجي بحضن ابويه والطفله اخذتها امي مني هي والبنات
تعالي بابا احجي شصاير وين جنتي صار ٣ ايام
يمامه : باوعت على بابا شنو ٣ ايام
الاب : اجوي عيالج وهدوا علينا وصارت عركه شكبرها عبالهم انتي يمنا
يمامه : مداافهم

الحجيه جميله: الحك الحك شردت
حامد : شنهي شبيكم من صـباح الله اتصارخون
الحجية جميله: دهر وصابنا شردت البومه واخذت بنياتنا
حامد : نزلت اركض شنهي منهي الشردت  وشفت البيت مگلوب وكلها أتصارخ
الحجية جميله: المعجعجه خرابت  البيوت ولك طركاعة وطاحت على روسنا

حامد : وحك علي ابنابي طالب اليوم الدنيا أگلبها عاليها واطيها
الحجية جميله: لابد أترجع بنياتنا
حامد : لاتخافين يمه ماارد للبيت اله البنيات بيدي
طلعت كاب نار وماشوفن كدامي شون تكسر چلمتي وتطلع انه الج يمامه اله اكسر راسچ وراس گلمن يوكف وياج
جدامي ماشوفن من الاعصاب اذا اكضها اشرب من دمها خذيت جم زلمه حسان أخوي وابن عمي واغلى الوادم على گلبي واخوه محيسن وحمود وجمال ولد عمي جبار وضلينا نخم (ندور) بالديره كلها چنها فص ملح وذابت گلت ماكو غير اروحن البغداد واخذت الزلم والبغداد البيت ابوها طبيت ذيج الدربونه (الفرع) الماداخل اله من سنين وصلت البيتها ودكيت الباب طلع ابوها
ابو يمامه : تفضلو
حامد : بتك وين
ابو يمامه : بنتي منو وانتم منو
حامد : انه حامد اخو عادل رجل بتك
يااهلاً وسهلاً تفضلو تفضلو زارتنا البركه
حامد : كلي ابو نصار وين بتك
عمي انت مو كل فتره تخابرني وتكولي يمامه وعادل زٌِيــنين وبالبصره وميكدرون يتصلون لان ماعدهم ارضي بس من يجيكم عادل للعماره يطمنكم ومن عندك دااسمع اخبارهم شنو بعد جايني تسأل عن يمامه صاير شى وگعت گلبي
حامد : شوف ياابو نصار بتك شردت واخذت بنياتنا وياها الهه جم  يوم اذا مارجعتهن وحك من خضر العود ويبسه لااخلي الدم للرجاب (للرجلين )
شيخ فهمني شنو الي صار وداعت ولدي كولشي مداافهم عليك
وكعد يكولي عادل مات وهاي الفتره عدهم لازمه عده ومتكدر تحاجيك وهسه بنتي انهزمت تخبلت وكمت اعيط بس مابيدي شى اني رجال ماعندي عزوه مثلهم حتى اذا اتعارك وياه منو يوكف ويايه وهو شيخ والدنيا كلها تطلب رضاه سكتت وگلبي نار على بنتي
حامد : نار وشابه بيه وين الكاها وفوكاها مريضه وياها بناتها عرفت ابو يمامه مايجذب صادك بحجيه وهمه مو يمه بقيت بغداد گلت ماارجع اله مچانهن اعرفه

يمامه : يعني بابا جان يتصل بيكم حامد ويكولكم احنا بالبصره
ابويمامه : يابنتي وره مختفيتو بفتره ردت اجه ادور عليكم كلت لازم صار شى واله انتي شون تتوقعين مندور عليج وقررنا اني واخوج نروح للعماره ونسأل بس اجانه اتصال من حامد كال بيه بتكم بخير ويه اخويه راحوا للبصره لان عادل لكه شغل هناك مده ويرجعون بس لان ماعدهم تلفون راح يكون هو مصدر الاطمئنان النه
ويبلغنا كل فتره عن اخباركم ولج هو حتى مكلي اخوه مات اله قبل كم يوم من اجوني

يمامه : وانت شون تصدكه يابابا
ام يمامه : شون منصدك وهو يكون حماج واخو زوجج واحنا منعرف احد من اهل عادل غير من خطبوج غير حضرت جنابج دكيتي رجل اله اتزوجه حتى لو خلاف ويه اهله وبعد مشفناهم صار سنين

يمامه : اوف ياماما غلطت العمر وبعد متصلح
تعالي احجينا شصار وبديت احجي كولشي وكل مااتعمق بالتفاصيل يزداد البجي والالم

الام : سوده عليه الله لايوفقهم الظلام شنو تايهه ماعندج اهل ماعندج اب هي هيج صارت الناس ماعدها ذمه وضمير وتلعب بحياة غيرها وكأنها لعبه وانتي شون مطلعتي وعفتيهم
يمامه : داكولج يوم لزموني من ايدي التوجعني بناتي
الام : اعوف البنات وارجع وبعدين غصب عنهم بالقانون ناخذهن الحضانه الج
يمامه : هههه يادوله ياقانون ماما ذوله مو مثلنه هناك الحكم للعشاير واعرف لو عفت بناتي راح يلكون الف حجه وسبب

وميخلوني اشوفهن واحتمال حتى يطعنون بيه حتى مااخذهن شفت حالات بعيني من كميه الظلم مراح انساها لهذا ربت عقده بگلبي وخلتني ميته خوف ومتأكده جبروتهم ونفوذهم واصل لدرجه يكسبون القضيه واني اضيع واضيع بناتي

الاب : موبكيفهم خلي يجون اله اطيح حظهم شنو بنات الناس لعبه وفوكاها هو ابو الراهي عليه ويهدد اصلاً اخوج تخبل وبقى يدك على راسه يكول شون مطردته وبقيت تاخذ ونطي وياه بالحجي وتعرف بيه كذب علينا لعد لو يعرف شمسوين بيج اخوج يگلب الدنيا واحنا نحجي دخل نصار وخطيه جان ميت رعب عليه وضل يحضن بيه ويسألني اخاف بيه شى او صار شى وهم حجيت اله وبقى يعيط ويغلط ويهدد

والدي واخويه من النوع المسالمين الناس الي تخاف الله وتتجنب المشاكل ومتحب تدخل بعركات بس من شافوا حالتي والي صار بيه انتفضوا وارتاحيت من شفت موقفهم
وبيومها بقيت بحضن ابويه وامي وبدأ وضعي يستقر وخاصه اني نفسه مصار ٣ ايام من ولدت وبناتي من القلق والتعب الي عاشوه خلال هاي الايام اخذتهم امي سبحتهم وكلتهم ونومتهم ردت انام تعبت من التفكير والقلق وقله الحيله ورحت للفراش دخلت لغرفتي من جنت بنيه تمددت وردت انام ردت الكه الراحه الي فقدتها يوم معرفت بموت عادل وبعدها بخيانته الي لان لحد الان اجهل سببها ومتجرأت اسأل ولا ردت اسال لان مراح يغير شى هو مات واندفن ودفن حياتي وروحي وحبي وياه بس دفنه حقيره ختمها ويايه بخيانه

بقيت الليل كله افكر حامد شراح يسوي وخفت على بناتي ياترى راح يكدر ياخذهم مني لو ابويه واخويه يكدرون يوكفوه عند حده  بقيت ارضع بنتي الي لحد هسه مسميتها بقيت اباوع عليها تخبل بيضه مدبدبه وهادئه حتى البجي مالتها قليل قررت اسميها همسه حتى تكون همس حياتي الجايه ولان هي صدوك متبجي وهادئه ومن اول ٣ ايام من عمرها يمكن سمعت صوتها مرتين بس همسه انتي اسمج همسه بنتي ونظر عيني وكملت سبحه حياتي بناتي الثلاثه يارب لاتراويني مكروه بيهن واحفظهن وابعد عنهم بيت اهل ابوهن ذوله بلاء ومااريد يتأذن

من التعب والتفكير غفيت بعد منومت همسه نمت وكعدت ساعه ١٠ الصبح صوت عياط كمزت دخيلك ربي شكو حسيت بلحظه اني بيت اهل عادل نفس الهوسه والعياط كمت بسرعه ومديت راسي من المحجر اسمع شكو وجان امي تأشرلي معناه اهل زوجج هنا
اني من الخوف معدتي عصرتني ودموعي بسرعه نزلت شبسرعه عرفوا اني هنا ياربي وين انطي وجهي

اجتي ورد اختي هي جانت متزوجه وساكنه بمنطقه حي الجهاد وعدها اطفال ٣ جان زوجها هم يعرف بالعشاير واهله ناس معروفين واله تطلع بعادات وتقاليد المحافظات لهذا خطيه بابا مخابره من ساعه ٧ الصبح ومبلغه وهو ممقصر مخابر عمامه ٣ و٤ شيوخ معارفهم ومتواعدين يجون لاهلي وبابا متصل بعمي الوحيد الي عنده اثنين ولد الكبير جان اسمه خالد وهو جان يحبني وكتل نفسه مااتزوج عادل بس شون بعد يمامه ودكت رجل من ساعه السوده لو ماخذه خالد احسن اليه ولا هذا الي كعد يصير بيه والثاني انور ومتفقين يجون لأهلي لان بابا توقع دخول اهل عادل بأي لحظه وصدوك ساعه ١٠ اجوي علينه مثل ملك الموت وياها جبيره العصابه الحجيه جميله

وطبت تهز الكاع هز وحامد وحمود وحسان واخوه وياهم ١٥ رجال معكل حتى البيت مكفه كام بابا واتصل بعمي وزوج ورد واستعجلهم واجوي واني فوك الوب اروح واجي تخبلت صعدت ورد وحضنتها وابجي اصعب لحظات مرت عليه واشتغل الصياح والكلام الي هز البيت هز بحيث ميحتاج احط اذني الصوت للباب واصل

حامد : شوف حجي سلمان بتك كسرت وجهنا وطلعت من بيتنا بله ماتاخذ شورنا
وبليله ظلمه احنا ماعلينا بيها لان الچان رابطها بينا مات الله يرحمه احنا علينا ببنياتنا اجينا ناخذهن ونرد لديرتنا
حجي سلمان : شون حجي هذا الشيخ شون تقبل انطيك بناتها هي     امهم واولى بيهم وبتربيتهم
الحجية جميله: احنا مانامن على بنياتنا عد وحده مثلها
العفو حجيه وشبيها بنتي
الحجية جميله: التكسر چلمتنا وطلعت بنصاص الليل وبطنها لخشمها وماراعت حرمة الدار ولا حرمت وضعيتها هي عزبه وماخافت على بنياتها من ظلمه الليل وحوش الدرب هاي ساقطه وماتفيد تربي بنياتنا

لا حجيه مامرجيه منج ولوما انتي بيتي وضيفه جان عرفت شون اردج
حامد : زلمه وردها الأمي واخلي كل چلمه تطلع مقابيلها دم
لعد متشوف الحجيه شتحجي وتطعن بشرف بنتي مو هاي زوجه ابنكم شون ترضون تطعنون بشرفها
حامد : شرفها على راسنا بس السوته الذبح بيها اشويه مايبرد نار الگلب احنا النه سمعتنا واسمنا بين الوادم وصار سنين محافظين عليها وراحت زلم معكله بالتراب من وره چلمه تنكال بحكنا تجي بتك تشرد وتخلينا بحلوك الوادم

حجي سلمان : من الظلم الي شافته على ايدكم اصلاً انتم محقوقين الي زين انت تلوم بنتي لان طلعت وانهزمت من ظلمكم ومتلوم نفسك ياشيخ وجبيرهم من تكذب وتتصل بيه واني رجال بكد ابوك وتكولي بنتي مرتاحه ويه زوجها وضعها تمام يعني لو ادري  بيها اترملت تتوقع ابقيها لحظه يمكم
حامد : السويته من حگي ردت احافظ على بنات اخوي وگلت بس تفوت عدتها اگلك اقلها نضمن بنياتنا بينا واذا تريد بهذاك الوكت ترجع الكم جيبهه اكبالك واسألها گلها احنا مامنعناها ترجع بس متاخذ البنيات

بيا حق متاخذ بناتها وانتم منو حتى تحكمون عليها تعيش بدونهن
الحجية جميله: احنا اهلهن وعزوتهن وبنات المرحوم مايباتن ببيوت ناس غربه لحمنا مايطلع عتبت دارنا

يمامه : اسمع ام البلاوي والمصايب شون تحجي بنص الزلم وبقى النقاش بحدود الساعتين   ومحصلو نتيجه ناس تجر طول وناس عرض بهذا الوقت صارت الصلاه وصلو وامي ورد تركض منا ومنا علمود الغدا بس همه مقبلو ياكلون لان عدهم طلابه يمنا وطلعوا واتفقوا بعد ساعتين يرجعون
اني هنا قطره مي محاطه بحلكي وروحي تفرفح والبنات خافن من سمعوا اصوات العمام والحجيه
ودق : ماما دخيلج لتخليهم ياخذونا
يمامه : ماما محد ياخذكم مني لو الدنيا تحترك
ايه : ماما عمو حامد خاف يجوينا اذا مالحنا (رحنا)وياه
يمامه : محد يكدر يلمس شعره منكم حبايبي انزلو لخاله ورد وتريكو واصعدوا بسرعه يله

ومرت الساعات وكل ساعه تاخذ من حيلي شويه حتى احس حليبي نشف من القلق وكوه رضعت همسه
وصارت ساعه ٣ واجوي وهنا قطره دم ماكو بيه واشتغل الصياح وادخلو الشيوخ الي جايين ويه زوج اختي وخالد كلمه بكلمه ويه حامد تكول ديوجه واني امشي بالممر بالطابق الفوك واكل بأصابيعي وامشي وادعي على عادل من حركت گلبي هو الي ضيعني وضيع بناته

وبعد مناقشات طويله
حامد : ماطول السالفه عليكم كدام الوادم والشيوخ ماعدها ام ودق غير حليين
الاب : وشنو هنه

حامد : يااما تطينا بنياتنا وهذا حكنا احنا بعد مانأمن على بناتنا يمها ومانرضى يتربن بعيدات علينا وهذا حكنا والعرفنا من خلال حجيكم صارن ثلاث والصغيره تبقى عدها لحد ماتفطمها ونجي ناخذها

سلمان : مستحيل تقبل وحقها
حامد : جا ماعدها غير حل ترجع ويه بنياتها وتعيش يمنا وماتكسر كلامنا ابد وتعيش مثل مانحب ونريد  وتمشي طوع امرنا واحنا نحطها على راسنا ومانكصر وياها

خالد: وعلى اي اساس مره ارمله تعيش وياكم وانتم ناس غربه عنها شنو ماعندنا شرف اندز بنتنا بنص الغربه وفوكاها ارمله
حامد : انت مامرتاحلكً وكلبي يلعب منك ونظراتك ماحبيتهم واني مااخطي بالوادم ( احجي ويه نفسي)

تنحل سهله اكتب عليها وتصير حلالي وتعيش ويانه
خالد :شنو تتزوجها
الحجية جميله: ليش مايتزوج الشرع محلل اله اربع وهي مرية اخوه واحك واحد بيها وحريص على بنياتها ويكون حزام الها ولاتنسون هذا شيخ حامد بنات الديره كلهن يتمنن چلمه منه ولو ما البنيات مارضيت على هاي تصير مرت الجبير والشيخ

يمامه : واشتغل الصياح ورادت ناس تضرب ناس لوما الشيوخ الغربه الي كاعدين وكل شويه تحجي شى جميله تكبب الكعده والمصيبه محديكدر يكولها اطلعي انتي مره يعرفون قدرها وراها مااسمع غير شيخ من الشيوخ انطه الحق لحامد واهله ولازم البنات يرجعن وذوله شيوخ متمرسين على اللسان والطلايب والمصايب وسكتوا ابويه واخويه الي اصلاً طول الكعده مطلع حس اله يمكن من الخوف والرهبه الي شافها باهل عادل وخاصه حامد ابو لسان ياكل الواحد اكل بلسانه ويكدر يقنع اكبر واحد من شفت الوضع اتخربطت وحسيت راح افقد بناتي واهلي والي وياهم عجزوا يقنعون بقاءبناتي يمي كلت مابيها مجال عليه وعلى اعدائي

رحت للغرفه بدلت لبست عبايه اسلاميه وحطيت البوشيه على راسي ونزلت اركض وجان تلزمني امي
ولج يمعزايه وين داخله عليهم
عوفيني ماما مااخليهم ياخذون البنات لو على جثتي

اصبري يابنتي يجوز يحلوها
شيحلون منها صار اكثر من ٥ ساعات محلوها وبدو الشيوخ الي جايبيهم يقتنعون بكلام حامد وامه شنتظر لحد ميسحبوهن من ايدهن كدامي عوفيني وسحبت ايدي ودخلت للصاله والكل تفاجأه بدخولي وكف حامد على حيله وجان يعيط بصوت عالي
حجي سلمان كول لبنتك خلي تحترم نفسها وتطلع وماتدخل مجلس زلم والقرار الي نتخذه تسمعه منك واطبقه غصب عنها

كمت ابجي واحجي بصوت عالي فاقده ومأيسه من كولشي

يمامه : الي كاعد تسووه حرام يعني ليش تحكموني هيج حكم انتم شيوخ وبابه عرب واهل اصول شلون تجبروني على شى مااريده حطو إٱللـِْﷻـِْﮭﮧ بين عيونكم اني عندي يتيمات اريد اربيهن عوفوني بحالي والله مااريد شى منكم بس عوفولي بناتي

الحجيه جميله : انتي هسه مره عزبه والعالم تاگل وجوهنا  وهالتخربط مالج مايوچل خبز الي عدنا گلناه وجدام الشيوخ كلها الجاعده (الكاعده)
تسوين النكوله ورچلج فوك راسج ونجان مارضيتي ناخذ بنياتنا ونروح
وحمدي ربج راح نعوفلج الزغيره جم شهر واله حتى هاي حرامات تضل يمج
يمامه : انتي ام ترضين واحد ياخذ جهالج من حضنج

الحجية جميله: اني اخذوا وليداتي مني للتراب اگلها انتي بنياتج رايحات البيت ابوهن وبين عمومهن مو للتراب
يمامه : يعني اني شعليه قابل اني الي موتت ولدج سوء اعمالهم هي الي سوت بيهم هيج وبناتي شعليهن تقارنين بيهن ويه ولدج شنو هذا الظلم

حامد : حسج مااسمعه وصوتچ عالي لاتنسين نفسج وطلعي بره وابوج واخوج همه اليطونا جوابج قرارنا واحد مايتغير وكدام كل الشيوخ يااما ترجعين ويه بنياتج وانتي على ذمتي  او تطينهن هسه وخلي نفض كل السالفه
يمامه : لو اموت ماانطيهم الكم اذبحوني واخذوهن
حامد : تكربت يمها كلش وكتلها اذا توصل بي المواصيل مو بس اذبحج اشرب من دمج على السويتي
خالد : ليش منو يتجرأ يلزم شعره منها واني موجود

انداريت عليه والشرار ينط من عيني چلمه ثانيه وافرغ چيله براسه ( طلقه براسه ) وانته ياهو شنو تكربلها
مو كتلك ابن عمها
شوف ياابن عمها وشيال همها هاي بنت عمك كدامك اذا انت زلمه من ظهر زلمه وتكول انه ابن عمها جرب وحط راسك براسي وشوف شيخ حامد شون أيتجرأ يلمسها وعود بذاك الوكت خل اسمع حسك
اسمع موبس اتجرأ حتى بغداد احركها كلها عليك

وصار العياط وراد واحد يكتل الثاني وهذا حامد تخبل كلش وراح يسحب سلاحه كلت خوش راح يصير دم ويضيع الاول والتالي
الحجية جميله: يله حظري البنيات تأخرنا وكافي مسهبه ( صافنه ) ياام الطلايب
حامد : يله فضيها وروحي جيبهن
يمامه : شفت ابويه واخويه سكتو وخافوا وخاصه من طلع السلاح حامد على خالد وراد يكتله حسيت بيهم خافو صارت بيه حاله يأس ومااشوف روحي غير اركض بكل قوتي للكراج واجيب دبه مال نفط خمس لترات وبيدي شخاطه وطبيت عليهم ومفرفحه روحي

دفعت الباب وعطت والله اليوم اذا اخذتوا بناتي احرك روحي كدامكم وكمت ارش نفط عليه
حامد : ولج اشمالج تسودنتي عوفي البيدج
الحجية جميله: سوي التردينه علواه أنخلص منج طبج حريشي وجه  الططوه (الفگر ) هجامه البيوت
حامد : اعكلي ام ودق وهدي البيدج
يمامه : خليتو بيه عقل اذا حركت روحي خطيته برگبتكم
سلمان : بنتي دخيلج لتموتيني ولج انطيهم بناتهم والله بالقانون غصب عنهم ارجعهم الج

الحجية جميله: زوج الي ينطهن
يمامه : بابا انت متعرفهم بعد ميخلوني اشوفهن
خالد : قابل تايهه تشوفيهن وغصب عنهم
حامد : انت اسگت ولاتدخل ام ودق عوفي البيدج لاتطول ايدج وتحركين روحج

يمامه : خلي هي روحي اصلاً محروكه ليش من راح تاخذون بناتي مراح اموت محروكه من القهر اقلها مااشوفكم من ماخذيهن

حامد : شفتها شغلت الشخاط وروحي فرفحت

ماحسيت بروحي غير اسحب الشخاط حيل من ايدها اكعدي تسودنتي
يمامه : خافوا الله ولكم ذني يتيمات والله مسويت شى الكم ومااريد شى منكم بس عوفولي بناتي وكعدت بالكاع ابجي
الحجية جميله: عياره النسوان گومي جيبي البنيات بسرعه
يمامه : اخذوهن بس باجر تجون لفاتحتي احرك روحي هسه كدامكم واخذوهن امانه عدكم

حامد : باوعت عليها وكسرت نفسها كلت كدام الشيوخ كلها كومي ام ودق وعطت على امها تعالي حجيه كومي بنيتج وخلي تتعوذ من الشيطان
يمامه : دخيلك شيخ انت شيخ والدخيل عندك مترده واني كدام الشيوخ كلها دخيله عندك ومظلومه اريدك متظلمني

حجيه اخذي بنتج وغسليلها وخلي تجي عندي حجي وياها وكدام الوادم
يمامه : كومتني ماما وروحي مفرفحه واشوف ودق حاضنه اختها ايه وتبجي باوعت عليهن ومكدرت اتقرب كلي نفط
لتخافون ماما محد ياخذوكم مني
اشوف دموع بناتي عشره عشره اخذتني امي غسلت ولبست غير لبس بهذا الوقت هدأ والكل ساكت ينتظرون الشيخ شيقرر وطبيت وهم مبوشه
وكعدت بكرسي قريب الباب باوع عليه تنهد

سمعي ام ودق وكدام الوادم الخيره الي راح احجي مااثني غير هذا الحل ماعندي
يمامه : منزله راسي ودموعي تنزل بهدوء ومنتظره حكم اعدامي

حامد : البنيات راح يضلن يمج
الحجية جميله: شنهي صخام الصخمني شتحجي ياشيخ
حامد : حجيه على كيفج ويه نفسچ واشرتلها براسي يعني اسكتي
وهي شبت نار وسكتت ماتكدر تحجي بعد
البنيات يمج بس زواج ماكو
يمامه : رفعت راسي والله راضيه بحياتي مااتزوج
حامد : خلييني أكمل ولاتقاطعيني
يمامه : نزلت راسي وكلت العفو كمل
زواج ماكو واذا تزوجتي كدام الوادم كلها لحظه مايبقن يمج
والشرط الثاني اذا صارت شغيله بنات اخوي   وهذا عمر وذني بنيات وانتي تعرفين من يكبرن ويصيرن حديثات اي غلطه منهن تجين ليه وهنه وياج لديرتنا وغصب عنج وبيوم جيتج تلگين السيد ينتظر يعقدلي عليج وتصيرين مريتي ونفس السيد يعقد لبنات اخوي على ولد فاضل

يمامه : شنوووو وكفت على حيلي 
حامد : لاتحجين چلمه زايده اخذهن هسه واطلع لو مو تحرگين روحج اني انطيج الشخاط هذا چلمتي وانتي قرري والحين
يمامه : شغله مثل شنوو
حامد : باوعت عليها صفح وكتلها هنه راح يعيشن بغداد ومع احترامي للكاعدين عاداتهم تختلف عن عاداتنا والبنت من تصير حديثة تغلط وتحب وتتمعشك
يمامه : عرفته بسمار اليه يامنعول الوالدين شكد حاقد لعد
اذا شفت بنات اخوي غلطه وحده منهن ماتلومين اله نفسج وتچيبيهن ورچلج فوك راسج يله فضينا  شقررتي

يتبع ...