رواية سجينة الروح الفصل الثالث عشر 13 - بقلم ريام هادي

سجينة الروح
للكاتبة Reem
البارت الثاني عشر

كلشي بغيبتك ضل ينتهي شويه 
مرات ارد اشم الهوه ومابيـــــه

الناس دكول عنك تضحك ومرتاح
واني امسح دمعتي وكلت شعليه

بس بداخلي كلشي نقســــم نصين
نص مارايدك ! نص يبجي عالجيه!

اصعب شي اتوب روحك من شوك
بحيث تخلي گلبك دكته موهيــــــه

بحيث تخلي روحك تشتهي الشمات
وتفكد بيهم المامــــار يوميـــــــــه

تعيش انت بشعور تحاجي روحك دوم
الكلمه دكولها تحس بيها محجيـــــه

ساعه تموت شوك ! وساعه بيها دكول!
ليـــــــــش اشتاك للماعنده حنيـــــــــه

شكد عندك وفاء بمسأله الجروح 
بحيث تعـــــــودت تلجمها ليليه.   

اني البايعك؟ لو انت؟ يله تهون
الحق مكروه ليش نجيب طاريه

يمامه : قريت الرساله موبيدي اول رساله منه اقراها واكول ليش خنتني بعد كل هذا الحب ليش ونزلت دموعي ومااحس غير حامد يجرها من ايدي ويصيح هاي شنهي ويفتح عيونه قراها مصدوم وهي بيده

حامد : وصلت وبيدي الاكل للبيت دخلت وندهت (صحت) يمامه يمامه ماكو رد
صعدت واشوفنها واكفه وتبجي وبيدها ورقه جريتها شنهي هاي واشوفنها رسالتي الي گلي عليها عادل شكتها وذبتها چا شون يمها ااااااخ بيه صرخه تهز السما ربي رحمتك انه مابيه حيل اصبر بعد وباوعت عليها وتمسح بدموعها وسألتها شنهي هاي
يمامه : هاي اول رساله من عادل اليه جانت اول تعارفنا
حامد : رجفت وسيطرت على اعصابي ردت افتهمن شون تعرف عليها انه گل هاي السنين ومااعرف شون خذاها مني وصكد هي تعرف انه احبنها ورفضتني تعالي اگعدي وسولفيلي شون تعرفتي عليه

يمامه : هااا لا خليها غير وقت مردت احجيله معودت هدأ الوضع بينا خفت احجي وهم يتعصب
حامد : اسمعج احچي لاتخافي بس ردت اعرف اخوي  شون عرفج
يمامه : وبديت احجيله من البدايه من انطاني الرساله ومن جان ينتظرني بس من كعد احجي انتبهت ايده بدت ترجف ولزم الرساله مردها بأيده لابيدي اسحبها منه مردت يشكها مهما كان الي ذكرى بيها شافني ركزت عيوني على ايده

حامد : تحچي وگل چلمه منها نار وتنزل بصدري هيه تحجي وانه اشوفن غدر خوي خطوه خطوه وشون خلاها تحبه وگلها الرساله منه ليش يعادل هذا حگ الخوه هذا حگ الدم الي بينا يبن امي وابوي امنتك عليها تاخذها مني ليش حسيت بروحي دخت وراسي راح يطگ وارجف وعيوني غوشت انه اعرفن اخوي طعني بس من تسمع شعمل حتى ياخذها مني احس روحي تلوب وشون الرساله خذاها وفهمها هيه مالته انه صوجي امنت بيه بس انه شدراني هذا اخوي اذا الاخ يطعن بأخوه المن نأمن بعد ااااااه يانار گلبي وصدري هيجت گل المواجع

يمامه : شفته يرجف وموطبيعي بين وضعه تخربط ابو جنه بيك شى
حامد : لا
يمامه : شون لا وانت كوه كاعد وعيونك صارو دم اخاف صعد ضغطك
حامد : انه ماعندي ضغط
يمامه : اوكف عندي جهاز قياس ضغط اروح اجيبه واجي من جوه
نزلت ركض وجبت الجهاز
حامد : فتحت الرساله ااااه شعملتي بيه من ساعده السوده من كتبتها ودزيتها شون بيه خذيتي عمري شون اردنه
حطيتها بجيبي
يمامه : دخلت شفته حط الرساله بجيبه سكتت مو وكت الحجي وضعه مخربط تقدمت منه وحطيت الجهاز وقسته ولكيته ١٨ على ١٢ تخبلت صاعد حيل
حامد :چا زين صعدالضغط چاشتريدين يبقى ساكت ودمي محروك
يمامه : عفيه لازم نروح للمستشفى وضعك خطر وماعندي دوا بالبيت
حامد : لا ميحتاج بس سويلي حامض (نومي حامض) وهسه يكفخه للضغط
يمامه : هي مال حامض اكوله الضغط صاعد ميصير هيج
حامد : مااحبن المستشفيات يضيق نفسي منها
يمامه : شون بيه كون الحجيه جميله هنا بس هي تكدر تقنعك
حامد : هههههه لو امي هنا چا هسه شفتيها تفتر وتاگل راسي
يمامه : كوم رحمه لأهلك موزين الضغط حيل صاعد
حامد : اسمعي چلمتي وهاي اخر مره اكولنها
يمامه : اسمعك

حامد : هاي اخر مره اشوفج تبجين على عادل وتجيبين بسيرته صح هو اخوي وجان زلمتج بس هسه انه زلمتج والي حگ عليج واقل حگ تحترمين وجودي وماتذكري والي صار قبل ايام ماينعاد انه خليتچ تحجين اليوم حتى يكون اخر يوم تحجين بيه كدامي انه موضد ان تذكري او تقريله الفاتحه هذا اخوي ويبقى بس كمره ورجال مايذكر بينا ابد

يمامه : لعبالك من جنت ابجي لان احبه واشتاقيتله لا ابو جنه اني جنت ابجي على سنيني الي ضاعت وياه على تعبي وسهري ومداراتي اله وحبي الي داسه برجليه وخاني اني انكسر گلبي يوم معرفت هو خايني وحبه انتهى من گلبي الي سواه عادل دمرني ودمر بناتي وضيع هواي ناس مالهم ذنب بسبب نزوه ومفكر لا بيه ولا بناته ولا بسمعتنا وسمعتكم لتتوقع بعد كل هذا اشتاقله وبعدني احبه واذا صار موقف قبل كم يوم بسبب متعوده على اسمه لتنسى هو اول رجال بحياتي
حامد : انه گتلچ مااريدن بعد يتكرر الصار
يمامه : ان شاء الله ميتكرر

يله گومي ناگل برد الاگل
يمامه : مااكل لكمه اله نروح للمستشفى
حامد : لاتعاندين مابي شى
يمامه : لابيك وتعبان كولش
حامد : يبنت الناس تعالي ناگل واسگتي لاتوجعين راسي
يمامه : لزمت ايده وكفت فدوه كوم خلي نروح للمستشفى
حامد : چاهيه لزمت يدي وتتوسل لو انه مثل الطفل تحرگت وياها نسيت گلشي بس حبيت خوفها علي انه ارضى بلقليل منها العافيه تداريج

يمامه : لبست ودااطلع وياه جان يكولي
حامد : شنهي اللابسته
يمامه : شبيه لبسي بنطرون وقميص طويل كولش مستور
حامد : چا شبقى انزعي الشيله وطلعي شعرج للوادم وامشينا
يمامه : والله لبسي مستور مابيه شى والعبايه الاسلاميه مالتي توصخت وغسلتها على السريع وشريتها بعدها منكعه
حامد : مااروحن للمستشفى اضل مابيه شى
يمامه : فدوه ابو جنه امشي مو وقت عنادك ولبسي مستور
حامد : ضلي هنا ماطلعين هيج اروحن وحيدي وارد
يمامه : يبوو عليه شنو هذا العناد شون اعوفك وحدك تخربطت بالطريق
حامد : چا طبني طوب ولا اطلع بيج هيچ
يمامه : شبيهم والله مستورات
حامد : شوفي لو مااروحن للمستشفى واگعد واسكت او ترحين تنزعين الي لابسته ولبسي عبا ماطلعين هيج
يمامه : حامد فدوه مو وقت عناد نروح ونرجع بسرعه
حامد : شنهي شگلتي
يمامه : شگلت فدوه مو وقت عناد
حامد : لا صحتي بأسمي
يمامه : خجلت حيل واني اشوفه يريد ياكلني بعيونه
حامد : اسمعها منج
يمامه : ونروح للمستشفى
حامد : نروح للگمر بس انطقي
يمامه : حامد
حامد : اويلي عليك حميد من اشتعل گلبك
يمامه : هههههههههه ضحكت بصوت على سوالفه اول مره اشوفه هيج
حامد : بويه لاتضحكين هيچ تهزيني هز
يمامه : يله فدوه امشي
حامد : اوف منچ يله امشينا بس هاي اخر مره لاتعيديها
يمامه : ميخالف بس امشي فدوه
والطريق كله يسمع ياس ويغني ومنطلق وصلنا للمستشفى وهو محاوطني بكل حركه وتعالي منا وروحي منا شجاه
حامد : انه صوجي طلعتج هيچ
يمامه : والله مابي شى لبسي
حامد : امشي نكمل الطرگاعه ونرد مو جدي احترك من وراج
قاس الضغط وانطوه علاج وانتظرنا ساعه لحد منزل ضغطه وضعه استقر بس هو يلوب بس يفوت واحد يبقى گالب وجهه عبالك يرد يدخل بعركه اعصاب صايره وكل شويه يكول صوجي رضيت وطلعتج هيج ورجعنا للبيت والطريق كتله
ممكن سؤال وتجاوبني
حامد : شنهي احچي
يمامه : ليش احسك مهموم دوم وحتى ضحكتك حزينه احس شايل هموم الدنيا كلها فوك راسك
حامد : انه هيچ شايل هموم الوادم وهلي والديره گلها على راسي نسيتي انه الشيخ
يمامه : بس ليش دوم عيونك حزينه
حامد :شدراچ بعيوني
يمامه : اني احب اقره لغه العيون
حامد : بس انتي فاشله بيهم
يمامه : لا عيني ماكو احسن مني بيهم
حامد : لو تعرفين بيهم چاعرفتي شجرالي وشحس
يمامه : عيونك صعبه مره احسهم حنينات ومره قاسيات احتار من اقراهم
حامد : لاتعبين نفسج طيرتي ماتعرفين تقريهم
يمامه : وهاي سالفه طيرتي هم مدوختني
حامد : لاتدوخين يجي يوم وتعرفيها يله  وصلنا خلي ندخل نرتاح

يمامه : دخلنا للبيت ورجعت حميت الاكل لان صار بارد  واكلنه وهادئين بشكل غريب وراها سويتله جاي وشربه واتصل على الحجيه وبلغها نبات وبعدها دخل للحمام سبح وطلع وتمدد على الجربايه
اني اتصلت على فضيله وصيتها على البنات
رجعت سبحت ولبست دشداشه قصيره اجيت دخلت للغرفه لكيته نايم يمكن العلاج اخذ مفعوله مشطت شعري ورحت لغرفه البنات كملت تحضير غراضهم كم قطعه بقت ورجعت تمددت بصفه وانطيته ظهري حسيته يتحرك كل شويه يتگلب مره يمنه ومره يسره كتله بعدك منايم
حامد : لا نمت شوي وفزيت
يمامه : درت وجهي علي بيك شى اكو شى يوجعك
حامد : اي بيه
يمامه : اسم الله نروح للمستشفى
حامد : اريدن شى منج
يمامه : شنو
حامد : تعالي هنا واشرت على حضني
يمامه : رجفت ماادري خوف رهبه رغبه مشاعر مختلطه هوايه مردت اكسر بخاطره لان لحد اليوم احس بتأنيب الضمير بسبب ذيج الليله وتقربت بهدوء وهو فتح ايدي واتقربت بكل هدوء ودخلت بحضنه هو ضخم وطويل حسيت روحي عصفوره بحضنه حضني بشوق عجيب اني بالبدايه جنت منزله ايدي وبيه خوفه بسيطه ورجفه لان اول مره اجي بحضنه وبرغبتي بقيت هادئه بس محسيت بروحي غير مبادلته الحضن

حامد : جنت نايم وحسيت عليها من دخلت فتحت عيوني وانه اشوفنها تفتر وتمشط شعرها موبيدي من گثر حبي ليها دااتسودن وانه اشوفنها يمي وما اكضها حاولت ارجع انام مافاد مابقيت ايه قرانيه تعتب عليه حتى اهدا وانام واعوفن البت وهم مافاد تالي تمددت يمي وانه روحي فرفحت ردت بس اشمنها وتانيتها تنام ماتنام تالي حست علي وماتحملت وطلبت ليها تجي بحضني ردت احسن برويحتي بحضني ردت اطفي نار شوگي ليها بس اشمنها واحضنها وانامن ومارفضت وهذا الشى ريحني واجت بحضني ااااااااه ياطيرتي لوتعرفين شگد احبنج (اسولف بگلبي) وحاضنها وجني خايف لاتطير مني ومااحس غير حضنتني بوياي  شعلت اهلي اويلي دخيلك يــْـْا عَـلي شون اصبر وبقت ساكته باوعت ليها ورفعت وجهه بيدي وصارت انفاسنا وحده وهمست ليها اريدنج يمامه بس مااجبرنچ على شى اذا ماتريدين اكضج ابقي بحضني هيچ للصبح

يمامه : رغم شى غريب عليه بس تقبلت حضنه جان حاضني بطريقة حنينه كولش حبيت دفو حضنه وهدوئه وانفاسه اما گلبه اسمع دكاته وعبالك يريد يطلع من ضلوعه بهاي الايام كلها حسيت روحي تقبلت حامد وتعلمت عليه انسان غريب لحظات قاسي كولشي احسه ولحظات ماكو بحنيته احتاريت بيه جان الجو هادئ وحدنا بالبيت والغرفه بارده مشتغل سبلت بيها جان شهر التاسع ٢٠٠٦ وبس انفاسنا نسمعها جان يباوع عليه بكل حب وحنينه قررت اسلمه نفسي واحاول ابدي ويااه من جديد لان الى متى ابقى اتهرب منه ابقى زوجته وحلاله وياخذني برضاتي احسن ميطك گلبه وياخذني غصب وأذي وأذي روحي  وهو من يوم متزوجنا ابد مأذاني ردت اتقرب منه واشوف نفسي اكدر اتقبل هذا الشى ويااه لو لا

همست اله بس اذا مكدرت تبتعد مني
حامد : مجاوبتها بس حرگت براسي وبديت اتقرب منها بكل هدوء وحب وحذر حتى لاتنفر ولا ينعادالي صار  ااااااااااااه ياطيرتي واخيراً صرتي حلالي ومالتي الي

يمامه : بدا يبوس بيه بلهفه وشوق احسه مثل  الانسان العطشان صار ايام مشارب مي وجابوله مي بارد بعز الحر والعطش وبدا يشرب بس كل حركاته بهدوء وحاسته بحذر بديت انسجم وياااه وهو بطريقتة وهدوئه خلاني ابد ماافكر بشى غير اني بحضنه وهمس بأذني انه منو
حامد
حامد: يابعد رويحة حامد

كدر الشيخ حامد يلمسني ويعيشني احلى ليله بكل تفاصيلها ويااه لكيت نوع ثاني من الانسجام والالفه والرومانسيه تختلف اختلاف كلي عن ماجنت ويه عادل اصلاً حتى خلاني انسى نفسي
واليوم وبهاي الليله صرت زوجته فعلي وامتلك جسمي بكل حب

حامد : كعدت الصبح ممصدك طيرتي بحضني لوبيدي مااخليها تنهض منه حتى للصلاه مكعدت من كثر ممرتاح ويااها ونسيت الدنيا احس روحي انولدت من جديد ومن همست بأذنها ردت اشوفنها وياي لو نفس ذيچ النوبه ومن عرفت وياي بكلشي حسستها بحبي ولهفتي ليها وصارت مريتي
باوعت عليها نايمه جنها العافيه بحضني اااخ لو اكلنچ ومااشبع منچ بست راسها
يمامه : فتحت عيوني صباح الخير
حامد : صباح العافيه
يمامه : باوعت بعيونه اتذكرت البارحه خجلت شون صار ضغطك
حامد : ضغط ٢٠٠
يمامه : وين اكو ٢٠٠
حامد : چاغير انتي بحضني يصير ١٠٠٠ مو بس ٢٠٠
يمامه : ههههههههه والله عليك سوالف شيخ
حامد : من انه وياج وحيدنا لاتكولي شيخ كولي اسمي احبنه بصوتج وبشفايفج
يمامه : حامد
حامد : اويلي عليك حميد وينج جميله تعالي ليه وشوفي وليدج شون مرتاح
يمامه : صدوك مرتاح لهاي الدرجه جنت راغبني
حامد : يمامه انه ماارغب لجسمج بكثر ماارغب لهذا واشرت على گلبها هذا اريدنه ليه
يمامه : شون تريده
حامد : اريدن تحبيني بكثر ماانه وسكتت
يمامه : شو سكتت ليش دوم تسكت تحجي شغلات مبهمه ماافهمها ومن اسألك تتهزم مني بالكلام

حامد : گلشي بوكته حلو يبنت الناس يله اليوم ماناويه تريكينا
يمامه : تدلل بس لازم تروح تجيب ريوك كولشي ماعدنا
حامد : چا سهله تامرين والي يحبه گلبج بس كومي خلي نسبح ونصلي من وراچ اول مره من سنين اصلي قضى
يمامه : ههههههه اني شعليه انت مكعدت
حامد : چا غير انتي بحضني لو ابوي يجي من كبره مااكومن
يمامه : ههههههههه يله ياشيخ
حامد : هااا
يمامه : يله حامد كوم نسبح ونصلي
حامد : من فدوه للحلك الي يطلع اسمي منه
يمامه : من يحجي عبالك واحد يعشقني روحه بيه كميه مشاعر وحب بكلامه كارثه بحيث من يحجي لاارادياً اضحك واركز بكل كلمه يكولها وكان اكتشف انسان ثاني بداخله مو هذا الشيخ حامد القوي الشخصيه الي الكل تخاف منه وتحسبله الف حساب الي كلامه بالمثاقيل وقليل الضحك جبل ويمشي اليوم حسيته شاب مراهق ورجل عاشق بس شوكت لحك يحبني اوف اسأله اشكال بعقلي وماالها اجابه

 
يمامه : كملنا الريوك ولبست عبايتي وصلني حامد لباب بيت اهلي ومقبل يدخل
دخلت شافتني امي حضنتني
بنتي حبيبتي عبالي بعد مااشوفج
يمامه : لا ماما شون اروح بدون مااراضيكم
والله يابنتي ابوج البارحه تخربط وره مطلعتي انتهى خطيه

يمامه : سوده عليه وهسه شونه فدوه
لا  الْحٍمَدٍ للـّہ نصار اخذه للمضمد وانطاه ابره نزل ضغطه وكعدت الليل كله احجي وياه واكوله موبيدها واحاول افهمه الوضع بس العتب مو عليج العتب على الشيخ الي حاسب روحه شيخ ويعرف بالاصول شون مبلغنا

يمامه : والله ماما صوجي اني كتله لتبلغهم رغم مرتين گلي وكتله اني ابلغهم لان انتم بالعمره ومردت بابا يتعب وعاف الموضوع عليه بحيث استغرب من كتله لحد هسه اهلي ميدرون

ام يمامه : شون كدرتي تعيشين هناك موانهزمتي بليله ظلمه شونها حياتج اكيد موتيج والشيخ مو من ثوبج ولا طبعج باعي حالج عبايه وربطه انتي مال هيج سوالف
يمامه : لتخافين يوم اهم شى بناتي بحضني وهمه مقصرين بشى ويايه وحامد خوش انسان واهم كولشي بناتي يكملن دراستهن واني بديت اتعلم على الوضع
ام يمامه : والله يابنتي گلبنا نار عليج وعلى بناتج الله يستر
لا لتخافين وين بابا
ادخليله بالغرفه

دكيت الباب ودخلت صباح الخير بابا
مجاوبني ودار وجهه كعدت يمه وهو متمدد على الجربايه ادري بيك زعلان وحقك ماالومك بس والله من خوفي عليك
ابو يمامه : لا انتي ممسويتلي اعتبار عبالج ضعيف مااكدر احميج او احمي بناتج عبالج كبرت وخرفيت

يمامه : العفو بابا والله انت تاج راسي بس انت هم فكر بيها بابا حبيبي الدنيا هسه تغيرت وصارت للقوي والي عنده نفوذ وعشيره وسلاح صارت غابه الي مثلنا منكدر نواجههم
ابو يمامه : شبينا ماعدنا لسان احنه صاحبين حق شنو يجبرج تتزوجيه بالقانون اگلب الدنيا على راسهم

يمامه : ياقانون بابا القانون الي بكم ورقه يخلي القاضي يحكم للظالم بالحق نفس القانون الي تكول عليه يكدرون يشتروه بكم ورقه وبعلاقاتهم ويخلوني احلم اشوف بناتي انت اب وتعرف شنو معزه الابن وبناتي نقطه ضعفي وبعزه روحي ومكدرت اجازف وادخل وياهم بمشاكل واثنينا نعرف بالتالي همه الربحانين وياخذون البنات وكدام عيني بس بذاك الوقت راح اخسر حتى شوفتهم

ابو يمامه : يعني زواجج من حامد هو الحل وعيشتج وبهذلتج بالعماره حل
يمامه : اي واحسن حل بناتي بحضني وكدام عيني وحامد زين والله رغم كولشي وممقصر على بناتي بأي شى ويعاملهن عبالك بناته والبنات بدوا يتعلمون اله ودق شالعه گلبي وبمرور الوقت تتعلم بابا اني عايشه بهاي الدنيا والله ساتر عليه وعلى بناتي بسبب دعوتك انت وماما لتغضب عليه وتصير حياتي جحيم اترجاك سامحني وافهمني بديت ابوس بيد ابويه

ابو يمامه : استغفر الله تعالي لتبجين
وشمرت نفسي بحضن ابويه وراضيته والحمدلله وراضيت نصار وبسته من راسه
وعرفو بايتين بالبيت اجوي ويايه ودخلنا للبيت وحامد تفاجأ بجيه ابويه
ابو يمامه : ابو جنه احسبها عليه موقصدي اطردك تعرف لحظة صعبيه وصارت وانتم هم غلطانين اجيتك واعذرني

حامد : حجي جيتك على راسي وانته مثل ابوي وماكو وليد يزعل من ابوه
ابو يمامه : والنعم منك ولدي ومثل نصار امانتك يمامه هاي الغاليه
حامد : بعيوني تآمر المهم ماتزعل منها مااريدنها تنقهر
ابو يمامه : شعندي غيرها
حامد : چا هو ابوها وحضنها وانه نار وشبت بيه چا شبيه تسودنت غير ابوها اغار عليها من روحي مااريدن احد يلمسها غيري

يمامه : ارتاحيت من راضيت اهلي كولش وراها عزمونه على الغدا بس حامد جان حالف ميطب وطب وخطيه انطه كفاره قسم وجان يوم حيل مميز

اجتي ورد اختي صار مده مشايفتها ونزلت مرت نصار حنان هم حبابه وكعدو يسألوني جانت علاقتي بزوجة اخويه طيبه لان هي حبابه ومسالمه وتحب اهلي ومداريتهم وبديت احجيلهم من اول يوم رجعت للعماره
ورد : وتالي ولج البارحه يله لمسج
اي البارحه يله
حنان: واني اكول وجهج مورد
يمامه : هههههههههه ايا سخيفه احد كلج وجهي اصفر وهسه ورد
حنان : لا عيني الشيخ مأثر بركاتك ياشيخ
يمامه : هههههه بس هم خايفه
ورد : يبووو موتينا جبتي عمرج كله خايفه شكوو هسه
يمامه : زوجته احلام اذا رجعت شون
حنان : وانتي شلج علاقه بيها انتي مكان وهي بمكان
يمامه : هاي وحده شرانيه مراح تجوز مني اعرفها
حنان : ولج اخاف تغارين على الشيخ احجي الصدوك

ورد : غير زوجها شون متغار
يمامه : لا والله مااغار تره اني صح تقبلته كزوج اليه واحترمه واقدره بس ماكو حب خاص بگلبي اله
حنان : خلي ترجع ضرتج وتشوفي ينام بحضنها وشوف منو الميغار
يمامه : هااااا ينام بحضنها
حنان : لا ينام بحضن امه طبعاً ينام بحضنه
ورد : شوفي الوجه انگلب وتكول مااغار كومي لج شوفي وجهج
حنان : وبعد وبعد اله تكومين تكمزين من الغيره وانتي تشوفي تالي الليل يدخل يمها
يمامه : كافي اسكتوو

حنان : ههههههه هااا عيني شو غرتي
يمامه : انتن ناصبات عليه اكوم اروح اشوف ماما شكعد تسوي وراها اروح لحامد لازم نرجع مبقى وكت راح يصير الغروب
ورد : افلت روحي عيني ام مااغار
يمامه : ليش رجفت معقوله اغار عليه لا مااتوقع بس حركه لا ارادياً تصير اوو هسه ليش افكر واتعب راسي خليني مرتاحه هسه والله كريم من الجاي

وراها ودعت اهلي ورجعنا للعماره طول الطريق وهو لازم ايدي ومن التعب غفيت
حامد : اباوع عليها  شون غافيه اوف تمنيت هاي السنين گلها الراحت انتي بحضني وكضج غيري ولا انه تزوجت غيرج
وصلنا للعماره يمامه وصلنا
يمامه : واخيراً الطريق شطوله
حامد : چا انه اجت سنين هذا الطريق اروحن وارد كل شهر مرتين ثلاث خلصت سنين بهذا الطريق
يمامه : متعب حيل
حامد : ادخلي للدار وانه عندي شغيله اخلصها وارد
يمامه : لتتأخر
حامد : من عيوني بسرعه ارد

يمامه : دخلت للبيت استقبلتني عمتي
الحجية جميله: رديتو وينه وليدي
يمامه : هسه يجي كال عندي شغله وارجع
الحجية جميله: وشتبين من هلج (شصار من اهلج)
يمامه : كل الخير الحمدلله فضت
الحجية جميله: وانتي وحامد
يمامه : شبينا
الحجية جميله: شنهي وضعكم
يمامه : عزه مو عمه بلوه بكولشي تريد تعرف
ماكو شى عمه ليضل بالج
الحجية جميله: يمامه والسماج يمامه اذا ماجريتي عدل ويه وليدي لاتشوفين مني ايام سوده مصخمه
يمامه : لتخافين عمه كولشي تمام
وطب حامد سلم على امه واني رحت للبنات
اول مدخلت ركضو لحضني اوف ياريحتجن اشتاقيتلكم حبيباتي
ودق : ليش تأخرتي ماما كلتي بليل ارجع
يمامه : جدج زعل وبين مراضيته شسوي ياقلبي
أيه : وبيبي شونها وخالو نصار وخاله حنان وجدو
كلهم زٌِيــنين حبايبي تعالو اخذو هاي غراضكم رتبوها يله

الحجية جميله: تعال يمه گلبي طك عليك بشرني شنهي وضعك ويه البومه
حامد : ههههه يمه وتالي وياج ماتغيرين اسمها
الحجية جميله: چا هيه مواسمها يمامه واليمام من الطيور والبوم من الطيوم گلها طيور يمه لادوخ روحك
حامد : هههههه والله يايمه مادامج سميتيها هذا الاسم مايتغير لو تشعلج العشره شمع
الحجية جميله: لا تشعل بس كون اداريك تره اشعل صفحه اهلها اذا كدرتك
حامد : لا يمه البت صارت مرتي حلالي
الحجية جميله: مبارك يمه طيرتك ردت اليك كون الله ينطيني عمر واشوفن وليدك
حامد : الله كريم يمه اروح ارتاح
الحجية جميله: يبعد امك روح تشوف راحه بكل ايامك

حامد : دخلت للغرفه ومتلهف على طيرتي هي ربع ساعه عفتها اشتاقيت ليها باوعت عليها تعالي ليه
يمامه : حامد والله تعبانه
حامد : بس تعالي بحضني ارتاح لا تفاركي بيوم
يمامه : شفارگ
حامد : حضني تره تعلم عليج
يمامه : هي ليله وحده نمت بحضنك شبسرعه تعلمت
حامد : غلطانه سنين وانتي بحضني
يمامه : فدوه لتحجي بالالغاز والله نص كلامك يدوخني وابقى افكر بيه
حامد : تعالي طيرتي واخذتها وحطيتها بحضني ونامت اوف ياريحتج ترد العافيه بيه

يمامه : مشت الايام وضعي ويه حامد يخبل صدوك اكتشفته انسان ثاني من هو ويايه معيشني بدلال موطبيعي بدا گلبي يدور عليه ويشتاقله ومن يتأخر اقلق عليه
اليوم اول ايام رمضان
حامد : چا ما يتأجل رمضان
يمامه : ههههههه شون يتأجل
حامد : اسمعي يمامه واليرحم والديچ النهار كله ولحدمايصبح الله اكبر مااريدن اشوف وجهج
يمامه : يااا ليش عود
حامد : چا غير افطر استري عليه يبنت الناس انه گلبي رجيج عليج من اشوفنج ارجف ومااسيطر على رويحتي مااريدن رمضان يروح مني
يمامه : ههههههههههه
حامد : هاي وحده من المفطرات لاتضحكين موتشعليني شعل بويه مااريدن اشوفج لما يأذن
يمامه : تقربت منه وحضنته تتحمل متشوفني كد كلمتك
حامد : بوياي من احترگت عشيرتك عبيس
يمامه : عبيس منو
حامد : هذا عدنا طلابه وياه
يمامه : هههههه هسه كد كلمتك
حامد : بويه انه شيخ وچلمتي سيف على رگبتي اله وياج ولا چلمه تصير
يمامه : وبديت اشم برگبته وهو سلمها واني ميته ضحك عليه بس اتقرب منه يذوب ينتهي مرات احب اداهره اتحارش بيه وانهزم وهو يبقى يعد ويقسم اموت ضحك على سوالفه بديت اتعلق بيه حيل بحنيته واحترامه وكلامه الحلوو بده گلبي يتعلق

مازن : جنت راجع للبيت وشفت ابوي حامد كاعد بمكانه على الشط رحت يمه احب اكعد ويااه سلمت عليه ها بويه الماخذ عقلك
حامد : چا اكو غيرها
مازن : جنها طيرتك وكعت ياصياد
حامد : ههههه انه ابوك يمازن چاشنهي شون مااصيدنها
مازن : كفو منك والنعم بس ليش احس اكو شى بگلبك وبعدك ممرتاح جان يطلع ورقه من جيبه

مازن : شنو هاي يابه
حامد : افتحها واقراها
مازن : هاي رساله بس هذا خطك لاتكول هاي الرساله الي انطيتها لعمو عادل
حامد : اي هيه الرساله
مازن : وشون وصلت ليمك مو على اساس شكتها وشمرتها
حامد : لكيتها عدها ضامتها واخوي حزام الظهر جذب علي
مازن : والله ماادري شكول اخاف احجي على عمو عادل وتزعل وشمااحجي قليل بحقه شنو كميه
حامد : اسگت لا تحجي الميت ماتجوز عليه اله الرحمه
مازن : يارحمه يابه وهو مارحمك ولا رحم الخوه البينكم زين وعمه درت هاي الرساله منك مو منها
حامد : لا ما حچيت
مازن : والله راح تخبلني يابه ليش ساكت
حامد : مااريدن منها شفقه وتكول مسكين وتنقهر علي اريدنها تحبني هيج بدون ماتكول خطيه حبني وخلي شويه اراعي مشاعره مو انه لأحطن نفسي بهيج وضع اريدن گلبها ليه بدون گلشي لا رساله ولا ماضي
مازن : اقلها خلي تعرف عمي شون قشمرها

حامد : چا هو ناقص اصيرن مثله واطعن بيه وهو ميت
مازن : مااعرف بس اشوف لو تحجيلها اكيد هواي امور راح تتغير
حامد : بويه الحب اذا مايجي من الگلب وينخر اعضاك نخر مايتسمى حب وانه اريدنها تحبني بدون تأثير من اي شى الي راح مايرد ولايرجع سنيني الضاعت ولا يغير الصار خليني هيچ لحد ماربك يرحم بحالي لو ياخذ عمري لو تحبني
مازن : اوف يابويه حبك ماكو مثله لو بعد ١٠٠٠ سنه
حامد : لاتحبن مثلي بويه تره العشگ يحرك بس صاحبه لاتحترك بيه يبعد ابوك
مازن : والله يابويه الي مثلك قليل يحب هيج وان شاء الله مااحترك
حامد : امشينا نرد للمضيف عندي فصل جبير والناس جايه تعال احضر وياي حتى تسمع وتنطيني رايك
مازن : تامر شيخ

ودق : داومت مرحله رابعه صح المدرسه محبيتها ولا البنات الي بيها بس اقلها اكمل دراستي ويايه ايه مرحله ثاني متوسط نروح ونرجع سوه
منير :  هااا غزاله شونج
ودق : هلو منير بشر شونها الكليه  رحت قدمت وشوكت اداوم بخت خلصت من الاعداديه وبلاويها
منير : والله تخبل كلها بنات اشكال والوان
ودق : وانت كل همك البنات زين والدراسه
منير : قابل طايره انلحك ندرس وهم نصادق
شونج ايوته ولج انتي كل مااشوفج تسمنين بالزايد

أيه : مماكله من جدرك
منير : تعالي اكليني بعد
أيه : احد حاجي وياك انت مو كعد تحجي ويه ودق حير بروحك
ودق : شعجب انت اليوم اجبيت تاخذنه من المدرسه مو مازن
منير : ليش مبينه تردين مازن يوصلج
ودق : لا والله ياريت انت هسه لو ابراهيم هنا موجود هم اهون
أيه : خطيه ابراهيم ملتهي بالشغل والكاع كل الشغل على راسه وناس بكيفها اطب وتطلع وتخيط وتخربط وناس تشتغل
منير : مبين هذا بسمار اليه
أيه : احد حاجي وياك دااحجي ويه اختي
منير : لج انتي ليش هيج لسانج سم ويايه
أيه : من يصير لسانك حلو ويايه عود افكر احجي عدل وياك
منير : ليش اني شمسوي
أيه : لا كولشي ممسوي خطيه فقير كافي كل متشوفني شسمنج وشسمنج تكول عبالك تصرف من جيبك عليه
منير : لج بابا اني علمودج بعدج صغيره وجنج برميل طرشي من تكبرين شصيرين
أيه : اصير دبه غاز
منير : هههههه والله انتي كارثه
أيه : مالك علاقه بيه عسى لو يصير وزني ٥٠٠ انت لتدخل
منير : العفو ست
هااا اجه ابراهيم
ابراهيم : شونكم
أيه : انت شونك الله يساعدك
ابراهيم :ويساعدج بطه شخبار دراستج
منير : عمي يابطه كول فيل
أبراهيم : بطه واحلى بطه
أيه : فدوه لگلبك يارافع معنوياتي
منير : والله محد قشمرج غير ابراهيم وخلاج تسمنين
ودق : يله ايه ندخل وانتم ضلو حيروا بالبطه والفيل
ابراهيم : ليش هيج تحجي وياها وتجرحها خطيه
منير : دااشاقه وياها وشكو بيها هي شكتلك
ابراهيم : موشغله شگتلي بس احسها تنقهر بس تكابر ومتبين خف عليها يبن خالي البت صغيره وتنقهر
منير : هااا ولك جنك عينك منها
ابراهيم : انت ضل ضل ياهو اليحجي وكال عينك منها غير بنت خالي وعرضي واخافن عليها
منير : شوف اني ماعندي وقت لازم اروح اشتري ملابس من رخصتك
ابراهيم : روح هو هذا الفالح بيه ملابس ونسوان
يمامه : شبيج ماما ايه ليش مدلغمه وضايجه
أيه : ماما منير كل ميشوفني يكولي سمينه وبرميل طرشي
يمامه : يشاقه وياج حبيبتي
أيه : كولش داانقهر منه
ودق : وشصار والله ماما يشاقى وتعالي كوليلي قابل هو كذب شوفي حالج يوم بعد يوم تسمنين بطلي اكل مكافي متعبتي متنقهرين من تشوفين كل صديقاتج ضعاف اله انتي شسمنج
يمامه : ودق كافي اسكتي على كيفج ويه اختج
ودق : ماما ميصير لازم تضعف اقلها علمو صحتها متشوفيها من تمشي تلهث
أيه : مالكم علاقه بيه وركضت ابجي
يمامه : طلعت اركض وراها ماما ايوته
حامد : شنهي حسج واصل ليغاد مااريدن يطلع حسج والوادم تسمعه
يمامه : حامد هاي ايه طلعت تبجي مقهوره
حامد : انه اروحن وراها لايضل بالج وانتي غطي شعرج زين چا موصايمه اله تفطرينا بيج
يمامه : حامد روح وره البنيه مو وكت سوالفك ههههه
حامد : اللهم اني صائم اروحن وره البت واسترعلى صيامي

أيه : جنت حيل انقهر من واحد يحجي عليه اني اريداضعف بس مدااكدر ومنير بالذات اكثر واحد يجرحني بالكلام كعدت على الشط من يوم غرگت ودق وهو صار مكاني المفضل من اشوف مابيه احد اكعد وجان اسمع صوت عمي حامد
حامد : هاا بويه ليش وحيدج
أيه : هلو عمو شونك
حامد : نحمدالله شبيها بنيتي
أيه : كعد يمي من كال شبيها بنيتي تمنيت بابا يكولها اليه بجيت
حامد : لا لا بنيتي الجماره تبجي لا ماارضاها
أيه : عمو بس يعيبون عليه سمينه وسمينه
حامد : ويامنعول الصفحه عيب على بنيتي
منير كل ميشوفني
حامد : چا هو منير حلو جنه عوده مال مطيرجيه
أيه : ضحكت والدموع بعيوني صدوك يشبه العوده
حامد : اضحكي يبعد عمج مااريدن اشوفن دموعج انتي غاليه وحسبت بنتي
أيه : اعرف والله واني هم كولش احبك
حامد : اريدن بنيتي گويه وتدخل بعين اكبر واحد ولاتخلين احد يذمج جاوبي لاتسگتين عن حگج
أيه : لا مااسكت
حامد : عفيه ببنيتي يله كومي ارتاحي واريدن اشوف ضحكتج
عمو حامد كلش احبه حيل حنون ويايه اتمنى اصيحله بابا مثل مااسمع الكل يصيحوله بس استحي

يمامه : احنا هسه بشهر رمضان جان الجو كولش حلو احلى مابيه الحجيه معتكفه وبس اتصلي وتقرأ قران ومتطلع من الغرفه واحنا براحتنا شنسوي نسوي
وره الفطور الولد يرحون للمضيف ومن يرجعون الكل يلتم الي ياكل حلويات والي يشرب جاي اله حامد شياكل شيشرب عينه عليه طول هاي المده وهو حتى محاول يرجع مرته واني هم مفتحت الموضوع ابد بنته جنه صارت صديقة ايه حيل ودوم كاعدات وياهن بشرى بنت فضيله ويسولفن وهموسه تكمز هنا وهنا واكثر وقتها يم عمتها فضيله اله ودق دوم وحدها لو بالغرفه كاعده تتفرج تلفزيون يا تقرا مالها علاقه بأي احد
طلبت من حامد يوديني يوم لبغداد اريد اروح اشوف اهلي واخذ البنات بوقتها قبل وكال متباتين مااكدر انام بلياج كوه قنعته وهمزين بوقتها جان عنده شغل هوايه وكال اعرفج ٣ ايام لازم كتله ياريت لان ميكدر يرجع عدهم شغله فصل بالناصريه ولازم يروح
والله وداني بس اني صحتي موطبيعيه مدري شبيه احس روحي دايخه تعبانه كولش نحول والشهريه مبينت القلق سيطر عليه بس لا حامل حسبت صار اكثر من ٢٠ يوم فايتتني مااريد اكول لاحد من اروح لبغداد اخذ حنان واروح افحص بدون محد يعرف

والله وصلنا لبغداد
حامد : يمامه دير بالج على نفسج وعلى البنيات
يمامه : شنًو السالفه لتحسسني رايحين حرب
حامد : چا غير راح تباتين بره حضني وانه موصيج ماتنامين اله بحضني
يمامه : فدوه لتضوج ولتنسى انت هم راح تبات بالناصريه يعني بكل الاحوال مراح تنام بحضني
حامد : چاهاي الطلابه حسيتها علي موش على الوادم چنها حرمتني منچ
يمامه : هههههه كلها كم يوم وارجع انام بحضنك
حامد : انتبهي لنفسج طيرتي
يمامه : وانت هم انتبه لنفسك الله وياك
حامد : گلبي انقبض مااريدن ابتعد عنها لوبيدي مااعوفنها ثلث تيام بس انه هم اروحن للناصريه وكلت هذا رمضان ولازم تشوف اهلها  رحت وعيونها عليها وروحي يمها
دخلنا للبيت اني والبنات طارن من الفرح
وصلنا العصر فطرنا والوضع تمام بليل لزمت حنان وحجيت الها على وضعي

حنان : ولج بس لا حامل
يمامه : صخام لاعفيه لتكوليها
حنان : وليش صخام ياستار بالعكس اصلاً راح تصيرين الكل بالكل همه يتمنون طفل اله بس بنيه عنده
يمامه : لا عيني هو اني مال حباله بناتي بطولي حتى استحي
حنان : ليش تحسسيني داخله بالعمرين كله عمرج ٣٤ سنه واكو بكدج ممزوجات واتزوجن وخلفن
اكولها بناتي بطولي استحي بابا
حنان : هسه خلي نروح والله كريم

يمامه : ثاني يوم رحنا للتحليل وطلعت حامل متت كمت ارجف
حنان : مبروك والج الشيخ هسه اذا عرف يطير طير
يمامه : حنان الطفل لازم انزله
حنان : شنوو لا اكيد تخبلتي
يمامه : دااكولج مااريد
حنان : امشي نروح هسه للبيت ومو مال بالشارع نسولف
وصلنا للبيت خابرت ورد اختي تعرف دكتوره شاطره بهيج سوالف اجتني تركض
ورد : لا يمامه اكيد انتي موطبيعيه
يمامه : انتم ليش مكعد تفهموني اكلهم بناتي بطولي وعلى ابواب زواج شنو بطني كدامي وامشي شكول للعالم
حنان : ليش محسستني انتي مسويه جريمه لو هذا ابن حرام
يمامه : بناتي شكول الهن مااكدر مااريد طفل بناتي عندي كولش كافي
ورد : وهو شنو ذنبه اكيد يتمنى يصير عنده ولد
يمامه : عنده بنته وكافي
حنان : لتعمين على نفسج واكعدي واسكتي اذا عرف يطين عيشتج والله
يمامه : مااريده وباجر رايحه اسقطه وانتهى الموضوع ومااكول لأي احد
أيه : جنت اسمع كلام ماما وخالاتي وانقهرت حيل ليش خطيه عمو اكيد يريد يصير عنده اخ لجنه واني هم اتمنى يصير عندي اخ مثل صديقاتي

يمامه : رحنا ثاني يوم للدكتوره ودخلت لعيادتها وارجف اول مره اسوي هيج شى ردت اوكعه ومحد يعرف واستخدم مانع وانتهى الموضوع بس حظي اجه عكس وكولشي انگلب على راسي

أيه : جنت كاعده العب ويه همسه ودك تلفون ماما باوعت عمو حامد جاوبته كتله ماما طالعه ويه خاله
حامد : چا شون تطلع ولا تگلي
أيه : هااا والله ماادري عمو
حامد : بويه من تجي خلي تخابرني
أيه : مااشي عمو
وره شويه دك تلفون بيبي اسمعها تعيط وتكول يمه بنتي راح تموت من صخام لصخمجن شسويتن وسدت التلفون وترجف وصلت قريب منها وجان اسمعها تخابر خالو نصار وتكوله الحك اختك يمامه اجاها نزيف لان رادت تسقط وحالتها خطره وكلتله تعال عليه نقلوها للمستشفى وتلطم وتبجي

أيه : اني من خوفي على ماما كمت ابجي ومشفت روحي غير الزم الموبايل واخابر عمو حامد
أُلؤْؤٌ📞ؤًِّؤٌٍٓ عموووو
حامد : شبيج تبجين شصار بويه احجي امج بيها شى
أيه : ماما بالمستشفى
حامد : شنهي لاتخبليني واسكتي وفهميني
أيه : ماما حامل وراح تسقط الطفل وصار نزيف عدها وحالتها خطره
حامد : حامل وتسقطه رجفت والنار صعدت براسي وعفت الوادم وركضت وخذت السياره ولبغداد بكل سرعتي
لايمامه لاتكسريني
يتبع .....

شكراً لكل تعليقاتكم الرائعه وتفاعلكم الي يًـجّـِ😍ـُننٌٓ على القصه كل التعليقات اقراهم واعتذر لان مااكدر اجاوب الكل لكن للامانه كل التعليقات اقراهم شكراً لكم من قلبي
انتظروني يوم الاربعاء وبارت جديد ونعرف بيه شراح يسوي الشيخ حامد ليمامه
تحياتي لًلًـّــ💎ــجٌٓمٍَُٓيِّعَْٓ