رواية سجينة الروح الفصل الثامن والعشرون 28 - بقلم ريام هادي

سجينة الروح
للكاتبة Reem
البارت السابع والعشرون

اسفه للتأخير لان جداً مريضه الله شاهد وردت ماانزل بارت من التعب بس محبيت ماالتزم وياكم اتأخر افضل مما ماانزل لهذا اتمنى تعذروني تحياتي
لًلًـّــ💎ــجٌٓمٍَُٓيِّعَْٓ

لاتفكر نسيتك من يمر فراگ
تره ساعة غيابك تنحسب عشره
ولاتفكر بعيد وما أحن عليك
عمت عين اليخون الزاد وإلعشره
اظل اشتاگلك مثل الگمر لّليل
يانجمة سهر تتسلى بألگمره
يا أجمل حلم يتوسد الجفنين
ياقصة عشگ يحتار من يقره
لاتظن فد يوم راح انساك
لأن نسيان حُبّك بألگلب جمره
صح مرات اعوفك وأبتعد ايام
لٰكن ساعات بُعدك ياترف مُرّه..!

حامد : حضري نفسج باجر الصبح احجزلج يم طبيبه زينه ترحين تنزلين الي بطنج
يمامه : نعم عيد شگلت
حامد : شنهي اطرشيتي
يمامه : انت كعد تعرف شحجيت ومو حرام وانت تستحرم متوقعت هيج تحجي والطفل الدوم تحجي اتمناه واتمناه وهسه من صار تكولي نزلي
حامد : مو احسن مااروحن وراها يخابرون علي الحك مريتك بالمستشفى تنزف وكاتله الطفل انه اجنبج گل هذا التعب ونروح لدكتوره زينه وتخلصين منه لان اعرفنج ماتريدين شى يربطج بيه
يمامه : لزمت بطني مستحيل اسقطه وارجف والدمعه بعيوني  صار عصبي ولزمني من جتفي حيل ويحجي ويهز بيه
حامد :چا ليش كتلتي ذاك بدم بارد

يمامه : بذاك الوقت جنت مااكدر اشيل طفل منك جنت خايفه وفاقده الامان منا وضعي ومنا ضغطكم عليه علمود البنات كلت اشيل هم ثاني وخاف جنت تهدد بناتي تصير تهدد بأبنك وهذا ابنك اكيد غير شى

حامد : وشنهي التغير
يمامه : بلعت ريك وكتله تعال نروح هنا لبيتنا ونسولف هسه احنا واكفين بالكراج وصوتنا للشارع
حامد : يمامه
يمامه : عيونها
حامد : تره انه مورث منج كافي تلعبين على اعصابي
يمامه : والله ماالعب بس امشي اترجاك عيب وكفتنا هنا
محجه شى بس حرك براسه يعني امشي ولازمه السبحه ويرجف والچكاره ماطفت ابد
دخلت للبيت اخذت جنطه مالتي وهو اخذ السويج مال السياره
حنان : على كيفج وتحملي لتصيرين ثوله وتضيعي منج
يمامه : لتخافين وديري بالج على امي
حنان : لتوصين حريص الله وياج
يمامه : طلعنا ثواني وصلنا للبيت لان نفس الفرع ودخل السياره بالكراج ونزل
نزلو البنات ودق وهمسه
ودق : هااا رجعتو
يمامه : بنتي اخذي اختج وروحي بغرفتكم
ودق : مااشي ماما يله هموسه
حامد : تحجي ليش ساكته

لزمته من ايده واخذته لغرفتنه واني اشوفه صاير نار تعال اكعد وكعد على الجربايه واني بصفه
انت سألتني سؤال وگلت شنو التغير
حامد : اي شنهي الصار وخلاج متمسكه بالجاهل وانتي تكولين فاكده الامان
يمامه :اهم شى بحياتي تغير هو انت
حامد : انه
يمامه : اي انت حامد اني احبك
هاي اول مره انطقها اله وهو عمره مسألني ولا طلبها مني ومن گلتها اعنيها من گل گلبي بحيث بهت وبقى صافن بوجهي
حامد : عيدي ماسمعت
يمامه : اني احبك حامد ولزمت ايده وحسيت برجفته وباقي فاتح عينه وبلع ريگه ليش ساكت

حامد : بويه انتي تحجين صگد (صدك)
يمامه : واكو واحد يتشاقه بهيج شغله
حامد : وشون وليش وشوكت
يمامه : حطيت ايدي على حلكه وكتله بصوت هادئ وناعم شون انت السبب حبك اليه ولهفتك وغزلك  خلاني احس من جديد وگلبي ينبض الك
ليش ماادري يمكن حنانك او يمكن خوفك عليه او يمكن حبك النادر اليه وشوكت صار قبل مده من بديت احس بغيره واني اشوفك ويه غيري خاصه ويه فرحه

حامد : ضليت صافن عليها وممصدك السمعته
يمامه : اعرف بيك ممتوقع مني هذا الشى بس صار بعد اني احبك حامد مو بس احبك اموت عليك
تقرب عليه وسحبني بحضنه وهذا الي جان كتله من نار من الاعصاب لو بيده يكطعني تحول كتله من العاطفه والحنان حامد الي اني هسه بحضنه عباره عن عاشق ولهان وجان يتنهد تنهيده شكت گلبه شك وبنفس الوقت شگت روحي وحاضني حيل ويحجي
ااااااه شكد انتظرت هاي الچلمه خلص عمري وانه انتظرها منچ هاي الچلمه احسنها گل عمري الي ضاع
عيديها يطيرتي
يمامه : احبك حامد والله احبك وخرت من حضنه ولازم ايدي ويحجي واحنا وجهه بوجهه وانفاسنا وحده

حامد : چا انه روحي معلكه بيج انتي الهوا الداخل بريتي انتي الطيره الخلصت عمري وانه انتظرها تحط بحضني اباوعن عليها وهيه طايره بالسما واكولن يجي يوم وتحط بين حضني بدون مااطلب منها يجي يوم وتحس بيه وتشوف شگد انه احبنها هم الله يكتبلي عمر واشوفنها تنطق وتكول احبنك يحامد وارجع انفض راسي واكولن مستحيل هاي طير البراري عنيد ماتنازل عن حريته

يمامه : لا تنازلت واني هسه اجي اگلك وبحضنك ومن گلبي احبنك يحامد
حامد : چا وحگ هو علي لو ما حبله لا اگلچ هسه
يمامه : ضحكت بصوت ودلع
حامد : اويلي على گلبك حميد يبت الناس على كيفج ويايه انه گلبي ضعيف لاتهزي كل شوي

يمامه : لزمته من وجهه سلامة گلبك ياگلبي انت جان يبوسني من راسي وكلي
حامد : مبروك يلغاليه وليدي امنه عندج
يمامه : هذا راح يصير قطعه من روحي من حبيبي تريده ولد لو بنيه
حامد : گلشي من ربج خير ونعمه
يمامه : بس اكيد انت تريد ولد بس اذا اجتي بنيه شون
حامد : چا تصير بت روحي چا هاي بت الغاليه هاي  حصاد  حبي ولوعه السنين وكسرت النفس هاي بت طيرتي احطنها بروحي
يمامه : حضنته وكتله حامد لتعوفني ابد واحجي بلهفه ويااه اول مره نتبادل للمشاعر بكل حب بدون مشاكل
حامد : چا مسودن واعوفنج
يمامه : ههههههه فدوه للي يكول چا تطلع تخبل من حلكك
حامد : عيديها
يمامه : شنو
حامد : احبنك
يمامه : هههههههه وحگ هو علي احبنك يحامد يبن جميله وعاط ومتت ضحك
حامد : دخيلك يــْـْا عَـلي مامصدك اذا حلم لاتصحيني منه

يمامه : لا مو حلم شوف وكمت ابوس بيه بهدوء من خده ونزلت على رگبته وهو ذاب ساح بيدي
حامد : اكعدي لاتلعبين بلنار
يمامه : احب النار واني اليوم اريد العب بيها
حامد :لاتسودنيني عليج وانت حبله اخافن ما تحملين
يمامه : اني شايله ابن حامد شون مااتحمل وبقيت ابوس بهدوء بيه وهو انتهى
حامد : چا انتي الجبتيها لروحج
يمامه : وهجم عليه بشوق وحب  وكل مايفقد يوعى على نفسه واني اهمسله لتخاف اني مرتاحه بحضنك نسيت الدنيا ونسيته كلشي صار بينا بيومها حتى مقبل نتعشى
مجعت حاضني حيل ويحجي
حامد : انه جوعان
يمامه : يله خلي نكوم نبدل وناخذ حمام ونتعشى
حامد : چا احد جاب طاري الاكل
يمامه : موكلت جوعان
حامد : انه جوعان اريدن اكلچ ماشبعت منج

يمامه : هههههههه كل هذا ومشبعت لا حباب كوم والله اني جعت وحتى البنات مشفتهن وشوف الساعه ب١١ بس نتعشى واطمن على البنات ونرجع نكمل الشوط الثاني ههههههه
حامد : چا انه اللعبه مالتي مابيها شوطين
يمامه : لعد شبيها هي كل اللعبات الي بالعالم شوطين واثنين قصار اضافيات
حامد : انه ١٠ اشواط ومن تخلص اللعبه اخذ ١٠ كصار چا الكاع كاعي والعب بيها بكيفي
يمامه : ههههههه يله كوم بداعتي وعوف اللعب شويه باس راسي
حامد : يله نروح نشوف البنيات ونرجع وراج ٩ اشواط
يمامه : هههههههه راضيه عمي بس خلي ناكل ونشوف البنات

حامد : بس انه ماجبت وياي ملابس شون هسه
يمامه : لتخاف اكو دشداشه نظيفه يمي ومكويه نسيتها من جنت هنا بأيام الفاتحه ومنطاني گلبي انطيها الك كلت خلي اله ملابس بلبيت حتى احسه موجود يمي
حامد : چا شبيج اذا هيچ تحبيني ساكته چنج خرسه
يمامه : هواي شغلات سكتتني هسه مو وكت العتاب عوفنا مرتاحين خلي اكوم اطلعلك الدشداشه والمنشفه وبين متسبح اشوف البنات واحضرلك الاكل
حامد : يابويه
يمامه : هااا خير
شوفي چم مكالمه محروك حرك وانه حاطه صامت الحجيله هسه تكمز
يمامه : شراح يخلصك من لسانها واكيد اول وحده تحجي عليها اني
حامد : چا انتي حبيبتها شون ماتحجي

رحت اشوف البنات لكيت ودق هسه كعد تنام هاا ماما عذريني بنتي بس جنت اسولف ويه عمج واخذنا الوقت
ودق : لا ماما عادي والبنات اكلو حميت الهم التمن مال الظهر ولبن
يمامه : ليش مااجيتي عليه
ودق : والله يوم همه رادو هيج لان تمن احمر مقبلو يتعشون كالو مشبعنه منه الظهر
يمامه : وانتي اكلتي وياهم

ودق : اي الحمدلله ونص البيتزا الي بالثلاجه هم حميتها واكلنا ليضل بالج
يمامه : همزين تعرفين تحمين الاكل
ودق : غير من وره الاستاذ مازن دوم يكول فاشله متعرفين تصبين لنفسج
وردت احترك بوكتها بس وراها تعلمت واريدج هم تعلميني اگلي حتى اغوره واكوله مو اني الفاشله
يمامه : ههههههه والله احسكم رويسيه بس تتعاركون
ودق : هو مينجرع شايف نفسه شوفه
يمامه : يله ماما نامي وبستها وبست البنات وغطيتهم زين وطفيت الضوه وطلعت

حامد : دكيت على الحجيه
فضيلة : هاا خويه وينك طگ گلبنا عليك بيك شى
حامد : لا خويه لايضل بالج انطيني الحجيه
فضيلة : يمه هذا حامد
الحجية جميله: الوو هاا حميد يمه
حامد : ها يمه شونج
الحجية جميله: شوني يمه بالضيم طگ چبدي يبعد امك وينك مابينت
حامد : انه بايت بغداد لايضل بالج حبيبه
الحجية جميله: يم البومه
حامد : ههههه اي يمه يمها
الحجية جميله: چا هذا الحصلته يامن تعب يامن شگه والبومه على الحاظر لكت
حامد : حجيه چا غير مريتي
الحجية جميله:وانه امك ماگلت هاي امي تخاف علي اطمنها انه خاتمه القران من وراك ارجف رجيف گلت وليدي ضاع مني تالي الكاه ضايع بحضنها من فلك طرها كون

حامد : يمه ليش عصبيه ماصار شى
الحجية جميله: چا شمالها وضال يمها كارصتها عگربه
حامد : يمه يمامه حامل
الحجية جميله: شنهي لاتجذب علي
حامد : وروح ابويه حامل يمه
الحجية جميله: كلللللش مبارك يمه چا غير تحجي
فضيلة : خير يمه شو تهلهلين
الحجية جميله: يمه البومه حبله
فضيلة : شنهي
الحجية جميله: شمالچ (شبيچ) تسهبتي (صفنتي) يمامه حبله
فضيلة :  الْحٍمَدٍ للـّہ بالخير خويه
حامد : خير الي يصبكم
الحجية جميله: يمه خلي تاكل هاي ثوله انه اريدن وليدك سبع عليك
حامد : ان شاء الله يمه
الحجية جميله: روح يمه مودع بالله وسلملي عليها وگلها مبارك
حامد : ههههههه چا اول ماخابرتج نزلتي عليها وهسه سلملي عليها
الحجية جميله: چا غير حبله بولدك وانه لخاطر ولدك اسلم عليها بس هاا تضل بومه وكرطه وگلبي موجر منها
حامد : ههههههه هسه صدوك الحجيه جميله
الحجية جميله: روح يبعد امك وضحكتك هاي ترد روحي ان شاء الله دوم مرتاح يمه
حامد : بوجودج

يمامه : هاا عيني شو بعدك مسابح
حامد : جنت احجي ويه الحجيه وبلغتها على حملج
يمامه : والله استحي لو محاجي
حامد : چا شنهي ليش مسويه شى بالحرام
يمامه : لا بس عيب وبهذا عمري
حامد : چا انه عندي انتي بت حديثه
يمامه : هههههه ياحديثه غير عمري ٣٥ سنه
حامد : جا انه اشوفنج بت ١٤ سنه الي بكصيبتها تمشي وتهز وتلعب بروحي ويه گل هزه وانه احسن كل عضاي تهتز وتاخذ من عمري وتعلك بيج
يمامه : تقربت عليه وكتله شكد تحبني
حامد : چا انه دوم اگلج احبج بكد رحمة ربچ
يمامه : اووف كلامك يجنن
حامد : وانتي عطرج يرجفني تعالي نخلص كم شوط
يمامه : حامد اكعد راحه واسبح ونازله اكمل الاكل
حامد : چا الاكل طاير
يمامه : واني هم مطايره يله كووم
دخل يسبح ويغني واني اضحك حتى نسى البنات هنا بس نايمات جنت احسه طاير طير ويغني اعزاز جوه الدوش بس والله صوته حلوو كملت الاكل وطلع
حمام الهنا
حامد : الله يهنيج يلغاليه
يمامه : سويت اكل بسيط
حامد : گلشي من ايدج طيب واموتن عليه
يمامه : ليش دوم اسمعك تغني بياس خضر
حامد : احبه چا هذا رفيق تعبي عليج
هاا شنهي مااكلتي

يمامه : مااكل هوايه بليل رايحه اخذ حمام
وسبحت ولكيته منتظرني بيومها بقيت الليل بحضنه وبس غزل وحب احس هاي الفرحه گلبي مديستوعبها يعني بعد تعب كل هاي السنين ارتاح وبحضن اكثر انسان يحبني ممصدكه نمت واني بحضنه ومرتاحه وادعي الله يديمها عليه
بقى حامد يومين وطول هليومين كوه اشلع نفسي من حضنه وراها ودعنا ورجع للعماره مكلت للبنات اني حامل استحي ومااعرف الوقت المناسب الي اكلهم عليه خجلانه من بناتي وبنفس الوقت خايفه من ردت فعلهن

اخذت ايوته للطبيبه النفسيه بدت ترتاح عليها وشوي شوي كامت نبرات خفيفه من صوتها تطلع  وكلمات صح غير مفهومه بس افضل من الاول
أيه : جانت الدكتوره نضال حبابه حيل ودوم تقويني وتحجيه ويايه تعاملت ويايه كصديقه مو طبيبه بالبدايه جنت خايفه منها بس هيه عرفت شون تكسب ثقتي بيها وبديت احجيلها شويه شويه وضعي وحركه ايدي احسن رجلي امشي بيها على عكاز وبلعلاج الطبيعي يوم بعد يوم تتحسن واليوم كملت العلاج الطبيعي واكدر امشي صح بخطوات ثقيله بس الحمدلله وين جنت وهسه وين رجعنا من العلاج الطبيعي واحس ماما تعبانه وتلهث
كتبتلها شبيج ماما
يمامه : مابيه حبيبتي
أيه : كتبت ليش احس صحتج مو تماما ودوم تعبين
يمامه : لتخافين ماما مابيه شى
أيه : ماما صدوك انتي حامل
يمامه : انتي منين عرفتي

أيه : كتبت سمعتج تحجين بلتفون ويه عمو حامد كتيله ابنك يسلم عليك وراها كتيله اخذت العلاج ليضل بالك
يمامه : دنجت مستحيه منها حضنتني
أيه : حضنتها وبستها ورجعت كتبت مبروك ماما واخيراً راح يجي اخ الي هلمره شدي حيلج نريده ولد
يمامه : دمعت عيني ان شاء الله ماما خوما زعلانه
أيه : كتبت اصلاً اني زعلت من ذبيتي اول واحد عمو حباب ويستاهل طفل منج
يمامه : فدوه لام العقل الجبير والفاهمه بس اني خايفه ودق تزعل
أيه : كتبت مااعتقد وحتى لو زعلت كم يوم وتفك ليضل بالج ماما
يمامه : الله كريم اعوفج ترتاحين
أيه : تمددت واني بالي شغله لازم اسويها بس خايفه وتاركتها للوقت خلي وضعي يستقر واسويها اريد ارتاح وهاي الطريقه الوحيده الي تريحني

ودق : امتحنت والحمدلله وضعي كولش زين وكدرت اثبت وجودي بالمدرسه واليوم اخر يوم امتحانات رجعت مكيفه فتحت الباب لكيت مازن كاعد
مازن : شونج
ودق : هلو مازن هاا شعجب اليوم يمنا
مازن : متردين اجي اروح
ودق : لا شبيك مباشره ضجت وعكدت حاجبك كعد اتشاقه شونك انت
مازن : الحمدلله شونج بالامتحانات
ودق : تماام
يمامه : ها ماما بشري
ودق : حضنتها وابوس بيها فول مارك (درجه كامله ) ماماتي
يمامه : عفيه بالسباعيه
مازن : عفيه شدي حيلج بلكت بالسادس اطلعين معدل زين
ودق : اطلع وهسه تشوف
مازن : اني اليوم عازمكم نطلع نغير جو شتكولون
ودق : اي عفيه طلعنا والله اختنكت من الامتحانات والضيم مالتها
يمامه : اني مابيه حيل والله تعبانه
ودق : شون ماما لعد حبابه والله ضايجين وخلصنا امتحانات

يمامه : مازن اخذ بنات عمك وطلعو
مازن : وانتي عمه
يمامه : اني تعبانه
ودق : شبيج ماما هاي الايام كلها احسج مو طبيعيه
يمامه : لا ماكو شى امي
مازن : يله اخذ البنات ونطلع ومااخرهن
يمامه : البنات امانه عندك
مازن : بعيني
ودق : على ياساعه نطلع
مازن : ساعه ٣ حتى نرجع قبل ممنوع التجوال
ودق : ماشي
يله ايوته حضري نفسج
أيه : كتبت مابيه حيل روحو انتم
ودق : اهووو ياهو الي تلزمها وصاحت مابيه حيل شبيجن
أيه : كتبت اليوم رجعت من الطبيبه ومالي خلك افتر

ودق : يعني بس اني وهمسه ومازن
أيه :كتبت قابل شكوو راح ياكلكم
ودق : مًو حتى اذا نتعارك انتي تفاككينا
أيه : لعد لطلعين اكعدي وسكتي اذا نيتج مشاكل
ودق : لا عيني اروح اتونس براسه يله اروح اسبح واحظر روحي
أيه : من هسه تحضرين بعد وكت
ودق : بابا هاي الطلعه الها طقوس خاصه
رحت بدلت بنطرون جينز وفوكاه بدي ابيض اللون بيه كتابه بالانكليزي وردي وسط طوله حتى ليحجي الاستاذ وضفرت شعري هنديه والجنطه وردي  صفح وترانشوز وردي  ونزلت
مازن : اباوع عليها طالعه كولش حلووه وكبرانه بله اني شحجاني هسه اخذها وافتر بيها هيج
ودق : خلصت
همسه : واني هم خلصت
مازن : ليش ملابسه ربطه
ودق : تعرف بيه مو محجبه واذا لبست الحجاب بالعماره بسببكم بس هنا نزعته

مازن : وشنو الغايه هسه من طلعتي شعرج
ودق : شوف مازن اذا ميعجبك تطلع ويايه هيج لتطلع بس لتتحجج بشغلات مراح نتفق عليها
مازن : وشبيه الحجاب انكرصتي منه
ودق : مااحبه وبكيفي عود من نروح يمكم البسه هسه ماالبسه واذا ميعجبك تروح ويايه هيج اروح لغرفتي احسن وانداريت وجان يكولي
مازن : امشي امري لله
يله ست همسه
طلعنا بلسياره نفتر وهو مشغل اغاني كاظم الساهر جان الجو حلوو كاعده بصفه
ودق : مازن خلي ننزل نتمشى حباب
مازن : لا نبقى بالسياره احسن
ودق : شنو هاي غير طلعه فاكسه
مازن : انتي ليش ماعندج اسلوب
همسه : عفيه لتتعاركون
ودق : لتخافين هموسه منتعارك
مازن : اني نار وشابه بگلبي شون انزلها هيج واخلي الشباب تباوع عليها لو بيدي ولا اطلعها احبسها بلبيت شجاني وعزمتهم شفتها گلبت وجهه مردت اكسر خاطرها وصلت للكراده يله امشي شويه نتمشى واذا محتاجه شى اشتري
ودق : ابتسمت اي حباب
طول ومااحنا نمشي ومازن بوضع الاستعداد تكول عنده حرب وكل شويه تعالي منا روحي يمنه تعالي يسره جان يوم خميس وازدحام نوعاً ما الكراده رغم الظروف التعبانه بس جانت الكراده بلخميس والجمعه تصير ازدحام واكو جهتين بالكراده وحده ازدحام حيل والثانيه اهون خفيف بيها الازدحام وهو يمشينا بالجهه الناس بيها قليل ضجت اريد ذيج الجهه

مازن : متشوفين شون مزدحمه بس نعبر الازدحام القوي اوديكم لذيج الجهه
ودق : اهووو هناك الغراض والمحلات احلى
مازن : ودق كعد تشوفين الشباب شكد
ودق : واني شعليه بيهم حباب والله عاجبني امشي بذيج الجهه يجوز الكه ملابس حلوه واشتري حباب دكيت رجل كوه اقتنع وعبرنا وصدوك صايره لحم وهو يمشي لزك بيه اخاف احد يطخني

دنمشي وجان يطخ بيه ولد بجتفي هو كعد يتحارش مو صدفه لو مو طخ وهذا مازن عيونه صارت براسه ولزملك الولد من ياخته
مازن : اثول غير تنتبه
الولد : منتبهت

وحجايه من مازن والثانيه من الولد والمصيبه الولد لسانه زفر ويحجي وعيونه عليه دلزمه واضربه بوجهه وذاك الولد تكوم بالكاع واجوي جماعته اثنين اني كمت ارجف واشوف الناس التمت لزمت همسه وارجف واصيح فدوه مازن كافي بالبدايه اذاهم مازن بس همه ٣ والكثره تغلب الشجاعه ضربوه على خشمه اذوه والناس كوه فكتهم لزم ايدي حيل وعبرنا الشارع وعيونه براسه ولازم خشمه كله دم دخلنا للكراج والطلعه سم طلعت علينا صعدنا للسياره وهو سحب كلينكس ويحاول يوكف نزف خشمه بس صعد بصفي عاط

مازن : شفتي هاي اخر عنادج گتلج منعبر هناك
ودق : واني شعليه قابل اني كتله تحارش
مازن : من وره لبسج ست
ودق : هلمره البس الصوج مجان عفته خلي يولي يحجي بعياط يريد يكطعني ولازم خشمه كله دم
مازن : احد گلچ انه كرن وماعندي شرف اشوف يتحارشون بيج واسكت
ودق : دمعت عيني
مازن : شكوو ليش تردين تبجين
ودق : اتأذيت

مازن : باوعت على عيونها مدمعه ومن كالت تأذيت وبحزن وهدوء احس حتى الم خشمي راح لا لتخافين مابيه شى
ودق : امشي نرجع للبيت وصلنا حتى تروح لطبيب يوكف نزيف خشمك
مازن : لتنسين اني طبيب
ودق : بس اسنان شله علاقه بالخشم
مازن : غير دارس جراحه
ودق : جريت كلينس مسحت من يم حنچه لان بيه دم
مازن : اويلي الله طختني اول مره بهذا القرب حسيت قربها يوترني جريت الكلينس منها ومسحت
رجعنا وبلطريق وكف اخذ عشا النا
ورجعنا للبيت طبيت اصيح ماما جان اسمعها تحجي ويه خاله حنان تكولها لازم تراجعين طبيب الحمل بدا يتعبج وبطنج بدت تكبر واني شطت طبيت ركض انتي حامل

يمامه : شبيج ماما شوكت اجيتو
ودق : انتي حامل
حنان : نصي صوتج ودق عيب منا ابن عمج
يمامه : اي حامل
ودق : وتحجيها ولا كأنه مسويه شى مستحيتي على هذا عمرج وتحبلين شتكول عليج العالم
يمامه : كمت وكفت انجبي واسكتي لتشوفيني محترمتج واتعامل وياج كشابه جبيره لتنسين اني امج وغصب عليج تحترميني
ودق : كمت ابجي ومنهاره هيج راح ترجعين عبده لحامد وتمشين وراه مكافي عادل دمرنا هلمره اتجبين طفل حتى يطيح حظنا بلزايد ويسحلنا ويرجعنا للعماره هيج انتي انانيه ومااحس غير راشدي فر وجهي فر من ماما
يمامه : حتى تتعلمين الاحترام
ركضت صار بوجهي مازن شبيج ودق
صعدت فوك تبجي وتعيط وتصيح اكرهكم كلكم
شكوو عمه شبيها
يمامه : ضربتها
مازن : ليش
يمامه : لان تجاوزت كتلها على الحمل وتخبلت
مازن : ليش هيه لحد هسه متدري ً
يمامه : لا متدري
مازن : من رخصتج اكدر اصعد الها
يمامه : اصعد ياريت بلكت تسكت گلبي انمرد عليها بس جان لازم اضربها حتى متتجاوز 

صعدت شفتها تبجي وايه واكفه يمها تحاول تسكتها من رخصتج ايه اكدر احجي وياها وحدنا اشرت براسها اي وباست اختها وطلعت
وداطلع بره مااريد اشوف احدبيكم اكرهكم كلكم
مازن : كومي ويايه
ودق : هد ايدي مااكوم
مازن : كتلج كومي ولتعاندين
ودق : عوفني فدوه واطلع بره
مازن : اذا مكمتي اشيلج وانزلج
ودق : ابجي واحجي اهوو لتلح
مازن : يله امشي
ودق : نزلت واني اشهك من البجي مااريد ماما تربط بيهم ونرجع لنفس المأساه
يمامه : وين رايحين مبقى شى على ممنوع التجوال
مازن : هنا عمه اكو حديقه قريبه نتمشى بيها ونرجع منتأخر
يمامه : ماشي انتبهو لنفسكم ولتتأخرون
ودق : مباوعت بوجهه ماما وطلعنا
مازن : امشي نتمشى مو بالسياره وبدينا نمشي وهي ساكته ودموعها بهدوء تنزل يله ست ودق احجي شبيج ليش ضايجه من امج واذا حامل متكيفين يصير عندج اخ
ودق : لا مااكيف ومااريد اصلاً يربطنا شى بيهم
مازن : مو بكيفج يبقون اهل ابوج
ودق : اصلاً هذا بالذات امنيتي اشطب اسمه من هويتي
مازن : تعالي كعدنا على مصطبه خشب بحديقه بين البيوت تصير هادئه ليش احسج تكرهين ابوج
ودق : شى خاص بيه
مازن : شوفي اني ماانكر دوم اني وياج عركات ومابيوم صفينا بس اليوم اعتبريني صديق واحجي اني حاس بيج هواي اكو شغلات بگلبج
ودق : مااحب احجي لأحد
مازن : ودق لازم تحجين ميصير تبقين ساكته شنو سبب كرهج احجي يجوز ترتاحين وهنا جان تنهار وتحجي وتبجي بحرگه گلب
ودق : شحجي اكولك ابويه شجان يسوي من ماما ماكو وشون يجيب بنات على فراشها
مازن : شنو

ودق : اني جان عمري ٦ سنوات ومااعرف شى وحايره العب واضحك واكمز واعتبر بابا احسن اب بالدنيا وبيوم ماما طالعه يم  خاله ورد تعبانه وتبات يمها لان مريضه ومااخذتنا وياها حتى لتصير هوسه وكالت لبابا يدير  باله علينا صار العصر واني العب بلحديقة وايه عمرها ٤ سنوات كاعده يمي طب بابا واخذني من ايدي اني وايوو ودخلنا للغرفه وقفل الباب وعافنا اليوم كله ومسأل علينا كتلنا الجوع والعطش احس گلبي يطلع من العطش جان الجو صيف بشهر السادس وعطشانه وهاي ايه جاعت وتعيط ادك الباب بابا افتح وهو ولا يمه وين بنص الليل فتح بعد ما اني وايو انتهينا من العطش جاب اكل ومي مثل الحيوانات ورجعت قفل الباب

مازن : اي كملي
ودق : بيومها دنجت واحجي انحصرت حمام اريد اطلع ماكو ادك الباب وهاي ايه نفس الشى كمت ابجي والوب بابا افتح ماكو تعرف شنًو شعوري واني اشوف اختي تبجي تريد تدخل حمام وتخاف تسويها على نفسها لان تعرف ماما تأذيها متحملنا وصخنا نفسنا واني ميته بجي

مازن : دنجت صدوك موقف صعب كملي ودق
ودق : انفتح الباب الصبح وحالي وحال اختي يبجي الكافر حتى نوم منايمين لان مكانا وصخ بابا شافنا هيج كوم وفوك ماهو الي حبسنا اكمش العوده وعلى رجلنا وايدنا شبعنا كتل بقينا اليوم كله نبجي والمصيبه خلاني انظف المكان واسبح ايه واسبح واني كل عمري ٦ سنوات تعرف شنو يعني انضف فضلاتنا واني بهيج عمر ويخابر ماما يكولها لتخافين البنات كلش زينات ابقي يم اختج ماكو شى

كرهته حيل وابجي اليوم كله وتكررت الحاله بس قبل ميقفل الباب توسلت بيه يبقي الباب ميقفله كال اذا طلعتو بره الغرفه اذبحجن بس للحمام وترجعون حتى للمطبخ متوصلون

وكتله والله منطلع بس اني كسرت الحلفان طفله وكولشي مااعرف اشوف ايه تبجي من الجوع لان هلمره حبسنا من الظهر وهاي بس تبجي دوعانه دوعانه (جوعانه) كتلها ابقي بمكانج اني اروح واجي طلعت على كيف امشي على اطراف اصابيعي واخاف يحس كمت دخلت للمطبخ لكيت دجاج وتمن مأكول منه والباقي محطوط بلثلاجه كيفت وركض اخذت الماعون لأيوو واكلنا بس هاي ايه متخلص طلباتها رادت مي كلت ماطول مشافني اروح اجيب مي واني مشيت سمعت صوت ضحك وحده كلت يمكن ماما اجتي وجان تنفتح الباب ختلت وره الطباخ بصف القنينه اكو مجال جنا دوم اني وايو من نلعب نختل هناك وماما تضربنا تخاف علينا ختلت خفت بابا يشوفني واشوف وحده غير ماما بس وسكتت

مازن : بس شنوو
ودق : بس بالملابس الداخليه وبابا هم ويمشي ويتلمس بيها ويسوي حركات قذره وياها جنت اشوفها تحجي وتون بس عبالي كعد يأذيها واني ارجف من الخوف بس من كبرت عرفت جان بابا يمتعها
مازن : استغفر الله وتالي
ودق : بقينا ٣ ايام على هذا الحال اروح ركض للمطبخ اجيب اكل ومرات اخذ ايوو للحمام وارجع وهو ولا حتى سأل عنا اكلنا شربنا لو جلاب عايف هم يتفقدهم بس يجي بليل جوعانين نكوله لا يكول نامن لعد
زاد كرهي اله لحد رابع يوم طلعت وهو هم طلع ويه صاحبته ولزمني شفتهم وعيونه صارت براسه وجان يجرني من شعري متت خوف

كمت ابجي حيييل واني اتذكر الموقف
مازن : على كيفج ودق اذا تعبتي من الحجي اسكتي
ودق : لا اريد احجي اريد
مازن : يله اذا ترتاحين احجي
ودق : لزمني من شعري وسحلني بلغرفه واني اشوف الساقطه نايمه على جربايه ماما واسمعها تكوله ولك هاي شافتنا هسه تكول لأمها واني جوه ايده ابجي واتوسل واكوله والله بابا مااحجي والله
لا تحجين اعرفج

والله مااحجي وجان يسحلني من شعري للمطبخ واني ابجي واتوسل بيه يعوفني كام وحمه سجينه على الطباخ وصارت حمره تعرف شنو شعوري واني عمري ست سنوات واشوف سجينه تتحول للون الاحمر من الحراره وادري بيها راح تنحط على جسمي
مازن : كافي ودق اسكتي

ودق : لا خلي اكمل حتى لتلومني من اكول اكرهكم لزمني بابا وجواني برجلي ودنجت ورفعت الجينز هااك شوف لهسه الاثر بقى بيه اثر حقير من وره نزواته
مازن : درت وجهي انمرد گلبي عليها وصرت نار
ودق : اسمع ضحكها الحقيره وتكوله توبها حتى لتحجي واني اتوسل فدوه بابا مااحجي واسد حلكي بأيدي واكوله التوبه بس لتجويني  وتالي ركع راسي بالكاونتر وكال اذا حجيتي شى لأمج بهاي السجينه ويأشر بيها عليه اكص لسانج

تالي رجع سحلني سحل من الطباخ لغرفه النوم من شعري من كصيبتي الي بيومها تمنيتها مكصوصه حتى ليسحلني منها من كثر مأذاني احس فروه راسي راح تنشلع وشمرني بلغرفه يم ايوو مكدرت اطلع صوت واصرخ لان نايمه خفت تكعد وتكول لماما ويكص لساني بقيت اباوع لرجلي شون فركست ونار وتحرك بيه واكمز على كيف من الحراره حتى متحس ايه وتحجي الليل كله حاضنه الدب مالتي وابجي وابجي من الحرك ومااعرف اتألم من رجلي المحروكه لو من راسي وشعري الي كطعه

مازن : عمه مشافت الحرك
ودق : شافته وتخبلت تدري شكلها
مازن : شگال
ودق : كال جويتها لان وصخت نفسها ومراحت للحمام وشجعت اختها تسوي مثلها ومكالت بابا محصوره حتى هم يخلص من ريحه الغرفه لان رغم نظفتها بقت ريحه طفله مااعرف انظف ونفسي تلعب وهم حتى خوش حجه حتى عود ديربيني وبيومها ماما كامت تبجي وحضنتني وكالت لتزعلين بابا يحبج لان سويتي غلط وانتي جبيره لازم يعلمج الصح مكدرت احجي اخاف يكص لساني ونظراته الي دوم تخوفني وبيها تهديد اياج تحجين

بعدها كام كل شهر او شهرين يجيب وحده ساعتين او ٣ ساعات بالزايد يبقى بيها على افراش ماما ويوديها ميكدر اكثر حتى اخاف من ترجع من بيت اختها او معزومه متحس جان ينتهز اي فرصه بيها طلعه لماما مطوله وهو ضامن مترجع لان جان شارط عليها عود يحبها اسم الله مترجع ويه اي احد اله هو يوديها ويجيبها وامي عبالها يحبها ويغار عليها متدري حتى يضمن متكشفه يكمل وصاخته ويعدل كولشي ويروح يجيبها

مازن : خاف اني جنت اكرهه لابوج هسه اتمنى عايش واشرب من دمه
زين ليش لعد من اجيتو يمنا جنتي تحسسين الكل بأن انتي تحبين ابوج ومتقبلين على زواج امج من ابويه حامد

ودق : لان كلت ماطول عادل هيج اخوه هم هيج جنت اسمعه يكول للموزينات مالته يكولهم امي دزتلي فلوس وينطيهن حتى يمتعهن وماادري بيبي تعرف بسوالفه لو لا لهذا كرهت كولشي يخصكم ومردت ابقى يمكم  ومن مات وكبرت عرفت البنات الي جان يجون شيسون وشمأزيت اكثر وكمت يوميه بقلبي العنه

مازن : شوفي ودق ماانكر الي صارلج شى جبير وخاصه على وحده بعمرج بس لتاخذين الكل بذنب عادل تره مثل ماانتي تأذيتي منه احنا هم تأذينا منه اني تيتمت من وره نزواته وانحرمت من امي من وراه ومن عائله مستقره جنت اتمنى عايش واقتله بيدي لان احنا مالنا ذنب بس ابويه حامد غير عادل وانتي شفتي شون يتعامل ويه الكل

ودق : اعرف وهذا الشى اكتشفته بالفترات الاخيره بس اني مااريد ارجع للعماره كل مااشوف تحكمكم بينا اتذكر تهديده اليه اني اجتي ايام ماانام مازن حتى بعد مامات اشوفه يجيني بلحلم وبيده سجينه يكص بيها بجسمي ويجويني  اني لهسه اشوفه يجي يأذيني دمرني ودمر طفولتي وفوكاها شفت عمو حامد شون يعامل ماما بدايه وفاته صارت الكوابيس اضعاف كلت ليش يحجون بالشرف والاخلاق وابنهم ذره اخلاق ماعنده ولا شرف لحد هذا اليوم واني مااكدر اكول لماما الي جنتي تحبي هيج جان يسوي على فراشج تمنيت ماما متحب عمو حامد حتى لتتأذه مثل مأذاها اخوه

مازن : ابويه حامد عاقل ويخاف الله لتقارنين ابد وراح احجيلج شى محد يعرفه بس لازم تعرفي انتي كبرتي ولازم تعرفين ابويه حامد شنوو وشكد يحب امج وبديت اسولف الها عن كل قصه حامد ويمامه وغدر عادل الهم
ودق : يحجي مازن واني مصدومه وابجي ابجي صدوك هيج عادل وهيج سوه وعمو حامد هيج يحب ماما بقيت جافله وممصدكه يحجي واني ارجف وابجي

مازن : هذا الحب العظيم لعمي ضحى بعمره كله وهو ينتظر طيرته لتخربين فرحته والله ميستاهل والله مو بس انتي تعذبتي من عادل كلنا اخذنا نصيب من العذاب بس كلمن وطريقته وبيبي مره صايمه مصليه صح تحجي وتغلط بس گلبها طيب وتموت علينا ومستحيل تدري وتساعده على الغلط اكيد جانت ادزله فلوس حتى ميحتاج احد ويعيشكم عيشه كريمه لتحكمين علينا غلط كلنا انظلمنا وهو هسه يم ربه يجازي على افعاله

ودق : كمت ابجي حيل انهاريت
مازن : لزمت ايدها كافي مو عيونج راحن
ودق : شسوي هسه كولي
مازن : امسحي عيونج الحلوات مااريد تبجين وروحي لأمج راضيها وفكري بكلامي
والله راح ترتاح نفسيتج
ودق : مسحت دموعي شكراً مازن
مازن : على شنو
ودق : لان ساعدتني احجي
مازن : اوو شكد حجيتي دوختيني وشوفي ساعه بيش ساعه ١٠ ونص يله خاتون امشي الشارع يصوصي
ودق : ههههه بس فدوه لتحجي لأحد على الي سمعته
مازن : لتخافين ولا كأنج حجيتي
ودق : شكراً
مازن : تره هوايه تلحين كافي شكر يله خاتون  امشينا وكعد نمشي وبديت اضحك وهو هم يضحكني وحسيت نفسيتي احسن وجان تصير مواجهات وطلقات  جفلت عبالك حرب لزمني مازن من ايدي وكال امشي يمكن علگت تأخرنا حيل بره وركضنا  ومنحس غير الشارع الي نمشي بيه الي يبعد ٣ فروع عن بيتنا اطوق من الجانبين ناس ملثمه مسلحه وتضرب طلقات وجان يلزمونا ويعيطون

يتبع ...

احـٍُــبٌــ💘ـٍَــْگُِم