رواية سجينة،الظلم والانتقام الفصل الخامس والعشرون 25 - بقلم Renad.m

#سجينة_الظلم_والانتقام 🍂🥀

#البارت الرابع والخمسون

#الكاتبة : سارة الشمري✍🏻

لا تكسر أبدآ كل الجسور مع من تحب , فربما شاءت الأقدار لكما يومآ لقاء آخرا يعيد ما مضى ويوصل ما انقطع فإذا كان العمرالجميل قد رحل , فمن يدري فربما ينتظرك عمر أجمل .

نورة : مرحبا ..
الولد رفع راسة : اهلا اختي .. تفضلي محتاجة شي ..
نورة بأبتسامة خبث .. : اي ..

.......... مشت نورة وعافت الولد مصدوم من كلامهة .. هز ايدة بسخرية وكام دخل لمكتب غزوان ..
: دكتور اكدر ادخل احجي وياك ..
غزوان ابتسملة : تعال ياسين .. تفضل ..
كعد ياسين وهو يباوع لغزوان كالعادة انطاه الموجز  : دكتور هاي الي هسة طلعت من يمك انطتني شيشة عطر ووياهة فلوس ..
غزوان بأبتسامة : خوش والله بالعافية ياسين ..
ياسين وهو يحط العطر عالميز : لا دكتور مو انت ما فهمت .. هي انطتني شيشة العطر وطلبت مني كل يوم قبل لا تطلع ارش منهة على سترتك .. والعطر امبين نسائي ومو رجالي ..
غزوان شم العطر وفعلا كان نسائي جذاب ..
ياسين حط الفلوس يم العطر : وانطتني هذني الفلوس وكالت انطيك بعد اكثر منهن اذا نفذت الي اريدة وخليت مرتة تعوفة ..
غزوان عصب : ايا بنت اللذينة .. تريد ميامين تعوفني مو .. بس هذا العطر شعلي ...
ياسين : شيخ افهمهة .. يعني من تدخل على زوجتك جاي من الشغل وانت ملابسك بيهة عطر نسائي ومو عطرهة .. والله لو اكبر ثقة بيك هم من تشم العطر راح تغار وتبقى تسأل وين جنت ويم منو وشنو هذا العطر البيك ...
غزوان ابتسم عالفكرة وهو يتخيل شكل ميامين وهي تغار وتسألة عن العطر .. نجرب ليش لا ..
ياسين : دكتور وين صفنت ..
غزوان ابتسم : ياسين هاي ما انساهة الك .. شكرا الك لان اجيت واطيتني الاخبار الي .. وهالشي يبين احترامك لشغلك ..
ياسين : دكتور انت افضالك مغركتني .. يعني رجعتني للمدرسة وفوك هالشي مخليني اشتغل هنا وتطيني يوميتي اكثر من اللازم ..
غزوان : ياسين انت بركبتك عائلة وايتام من بعد ما توفى ابوك .. وانت جاي تتعب واني اشوف هالشي .. يعني الصبح تشتغل بالمستشفى ودوامك مسائي .. وانت تستاهل اكثر من هاليومية اصلا ..
ياسين : الله يفتحهة بوجهك انشالله وييسر امورك وينولك اليتمناه كلبك ..
غزوان تنهد من كلبة : اميين يارب ..
طلع ياسين .. غزوان سحب العطر .. خل نختبرج شوية يا امنيتي ..

//////////////////////////////

بيت غزوان الساعة ١٠ بليل .. دخلت ميامين للغرفة طبعا كالعادة رغم هي علاقتهة مو زينة وية غزوان بس ابداً ما تقصر بواجباتة ..
غزوان يدري بيهة اليوم كلة مشغولة وية البنات .. حط من العطر الي جابتة نورة بالسيارة ونزل للبيت ..
ما لكاهة موجودة .. ذب السترة مالتة عالجرباية بشكل مخربط لان يدري بيهة هسة تجي وتشيلهة ..
هي متعودة كل يوم تعزل ملابسة وتغسلهن وتكويهن وحتى من يريد يسبح تحضرهن الة حتى من يطلع يبدل ... غزوان كل ما يدخل للغرفة يبتسم لان يشوفهة مرتبة ونضيفة ومعطرة .. لان ميامين ما تحب الفوضى وتحب كلشي يكون بمكانة ..
بدل ملابسة ولبس تراك البيت وتمدد عالجرباية وكعد يشتغل عالابتوب ..
صارت الساعة ١٠ دخلت ميامين للغرفة شافتة كاعد يشتغل عاللابتوب ..
شالت ملابسة المرمية بالكاع وعدلتهن وحطتهن عالجرباية حتى تغسلهن .. رتبت غراضة يم راسة السويج والمحفضة والسبحة والساعة ومحبس ابوه ..
شالت السترة حتى تعلكهة .. استغربت العطر البيهة .. قربتهة من خشمهة وشمتهة ..
غزوان يباوعلهة من المراية بدون ما تنتبه لان معكوسة صورتهة عليهة ...
تقلصت ابتسامتة وهو يشوفهة تشيل السترة بدون اهتمام وتدخلهة لغرفة التبديل حتى تعلكهة ..
غزوان تأفف بقهر .. ماكو احساس ابد .. دعصبي صيحي كسري ضربي .. حتى ما سألت منين هاي الريحة ..
ميامين تدور بجيوب السترة خاف بيهة شي حتى تطلعة وتعلكهة ... استغربت وهي تطلعة من جيب السترة .. حجت وهي عاقدة حواجبهة : غزوان ما يستخدمة .. شجابة لجيبة ..
فتحتهة وارتخت عقدة حواجبهة ...

غزوان شافهة طلعت حتى بدون ما تهمتم الة سبحت ولان تعبانة نامت مباشرةً ..

£££££££££££

باجر هو موعد زواج جوري ومؤيد وبسمة وحسنين
... طبعا مؤيد عقد على جوري بدون هوسة او شي وبس هو اخذ الشيخ واهلة وراح ...
اليوم يوم الحنة .. حنة الشباب ابيت ابو غزوان وحنة البنات ابيت اهلهن طبعاً ....
جوري البارحة الليل كلة ما نامت وبس تبجي ما تدري ليش حاسة بضيقة وتحس ان دا تخون وعدهة لنفسهة ان متحب غير فارس من راح تتزوج مؤيد ...
بسمة جان التوتر فول وكل ساعة اتكول بطلت ماريد اتزوج ..

مها وخاتون جانن بغرفة ميامين يتجهزن يمهة ويجهزنهة حتى يرحن لحفلة الحنة ..
طبعا خاتون استاذة المكياج سوتلهن كل وحدة مكياج خفيف ويلوكلهن ..
مها وهي تدور بفساتين ميامين : يا فستان حتلبسين ...
ميامين وهي تسوي شعرهة : مادري بعدني ما شفت يا واحد ..
مها بصدمة : شنووووو .. صدك ثولة ..
صارت تدورلهة بين الفساتين .. طلعت واحد وكالتلهة : هذا يجنن البسي ..
ميامين التفتت وبلعت ريكهة : لا طلعي غير واحد .. ماريد البس هذا ..
مها : ليش شبي والله يجنن احلا من الباقيات ..
خاتون وهي تسحبة منهة :  راح تلبسة غصباً عليهة ..
تأففت ميامين وهي تتأمل الفستان الاحمر الي جابة غزوان من تركيا .. طلعتهة مها شال احمر حرير وية الفستان ...
خلصت شعرهة ومها سوتلهة كذلتهة نازلة على وجهة وحطتهة صفة وصارت كولش حلوة ..
خاتون اخذت كلينس : بما ان الفستان احمر .. يعني لازم نغير لون الحمرة .. جيبي لون احمر ..
ميامين : لااا .. ماحب الاحمر حيل ..
خاتون وهي تاخذ الحمرة : مو شغلج .. هي تطلع حلوة ..
حطتلهة الحمرة وصارت بعد احلا ..
مها : جنج ياسمين صبري .. طلعتي تخبلين ..
خاتون : يلة كومي البسي الفستان حتى ننزل جوة ..

دخلت ميامين لغرفة التبديل ولبست الفستان ...
صاحت بصوت عالي : خاتون تعالي سويلي السحابة لان ما الوحهة ..
خاتون بنفس علو الصوت : ثواني بس .. انتي لهسة ما تعلمتي شلون تسدين السحابة .. والله فاهية ..
دخل غزوان للغرفة وسمع اخر كلام لخاتون ..
ميامين : هسة ابدال ما ترزليني تعاي سويلياهة حتى هم اطلعلي حذاء فد مرة ..
خاتون : ماشي جاية ..
غزوان اشر لخاتون ان تطلع هي مها .. ابتسمن هنة وطلعن ..
ميامين وهي مدنكة على الرف مال الاحذية وتختار واحد وضهرهة كلة طالع ..: تعاي بسرعة لا يجي اخوج .. لان هو مو شاطر غير يجي بس من تكون سحابة فستاني مفتوحة ..
التفتت بعصبية : وييينـ....
انصدمت وهي تشوفة كدامهة ومبتسم على كلامهة ... جان لابس قاط اسود لان الكل موجودين جوة علمود الحنة ...
بلعت ريكهة بصعوبة وهي جانت مقررة تنزل قبل لا يجي حتى لا يشوفهة بالفستان ..
غزوان ابتسم من شافهة لابسة الفستان الي هوة جابة الهة .. جمالهة بكل مرة يسحرة ويخلي يذوب بكل حركاتهة ..
تقدم منهة ودار ضهرهة الة .. حرك ضهر اصابعة على كتفهة وضهرهة برقة وهو يتلمس نعومة بشرتهة .. صلبت ضهرهة وبلعت ريكهة وكالت : استعجل .. اريد اروح ..
نزل ايدة للسحابة وصار يسحبهة بهدووء وعبالك ما يريدهة تخلص ... سد السحابة وحاوط خصرهة بأيدي ..
صار ضهرهة ملاصق لصدرة ... قرب شفايفة منهة باسهة على كتفهة العاري بوسة طويلة ..
همس يم اذنهة وهو مغمض عيونة : مو كافي .. ما خلص حقدج .. ما ارتاح كلبج وانتي كل يوم تعذبيني ببرودج وياي ..
ميامين : لا ما خلص .. وخر عني خل انزل ..
غزوان وخر عنهة بضيق ...
عافتة وتريد تطلع بس رجع صاحهة : انتضري ..
التفتت علي بأستغراب ..
غزوان سحبهة من ايدهة واخذهة لغرفتهم ..
فتح الكنتور مالتة وطلع علبة زغيرة ..
فتحهة وطلع منهة الكلادة ...
سحبهة ووكفة كدام مراية طويلة وصار يبين كل طولهم ..
صار وراهة ولبسهة الكلادة وهي رفعت شعرهة ومستغربة منة .. : شوكت جبت هاي الكلادة ..
غزوان بأبتسامة : جبتهة وية هذا الفستان ...
ميامين بأستغراب : وليش هسة يلة انطيتنياهة ..
غزوان : تتذكرين اول مرة لبستي هذا الفستان ..
ميامين دارت عيونهة ببرود : اي اتذكر ..
غزوان : اني بوقتهة جنت جاي حتى اطيج الكلادة .. بس من شفتج تيهت دربي وحتى نسيت ليش اجيتج ...
غزوان هو يأشر عالكلادة : تعرفين شنو معناهة هاي الكلادة ...
ميامين بفضول : شنو ..
غزوان : يعني ان اي شخص قاسي وأسود من برة .. ممكن يكون من داخلة ناعم وابيض ويحب الرقة مثل الورد الاحمر ..
ميامين انتبهت على كلامة يقصدهة .. عافتة وراح للباب حتى تتهرب منة ..
غزوان : انتضري ..
ميامين : شكو بعد ..
غزوان سحب الشال الي عالجرباية وتوجه الهة .. : تردين تطلعين هيج ...
لف الشال على كتفهة ... قرب وباسهة على خدهة وطلع ...
ميامين تلزم وجهة الحار ... ضربت الكاع برجلهة بقهر ..: اووووف ...

&&&&&&&&&&

حنة البنات ...
جوري طلعت تخبل طبعاً لبست بدلة لونهة وردي وسوت تسريحة مرفوعة ...
بسمة هم طلعت حلوة ولبست بدلة لونهة ماروني وسوت تسريحة نص شعرهة مفتوح على اكتافهة ...
ابتدت الحفلة والبنات ذبن لحم بالركص ع اساس اخوات العريس .. حنو البنات ورجعن للبيت لان باجر وراهن زفة وشغل ..
طبعا من التعب الكل نامو ...

££££££££££££££

يوم الزفة .. طبعاً البنات كلهن لبسن لبس طويل ومستور وسون فيكات بالحجابات لان راح يطلعون بالزفة زلم ونسوان ..
صارت الساعة ١١ تقريباً .. توجهت سيارات الزفة كلهة لبيت ابو احمد (حافظ)...

العرايس طبعا جانن كل وحدة تكول اني احلا من الثانية .. تسريحاتهن كانت عكس الحنة ..
جوري سوت تسريحة بشعر مفتوح ومزينتة طرحة طويلة تقريبا بطول البدلة ...  بدلتهة البيضة جان يزينهة شريط احمر من النص ...
بسمة تسريحتهة كانت مرفوعة بشكل نازك وكيوت وطرحتهة كانت واصلة لخصرهة تقريباً ..
وصلت الزفة وابتدت الهوسات والركص والخبال ...

اجة موعد ان كل وحدة تتوجه لسيارة عريسهة ...
حسنين جانت الفرحة واضحة بوجهة .. لزم ايدهة بس ما شاف من وجهة شي لان جانو مغطينهة كولش .. طلعهة لسيارتة ومنتضرين مؤيد يطلع جوري حتى ينطلقون لبيت ابو غزوان  وبليل يزفونهم للفندق الي حجز الهم غزوان على حسابة ك هدية للعرسان ...
دخل مؤيد على صوت الهلاهل والهوسات والجكليت الي يجي من كل صفحة ..
لزم ايد جوري الي جانت مثل الثلج بعكس ايدة الي جانت دافية ..
طلعهة للسيارة وكعد بصفهة .. توجهة السيارات لبيت ابو غزوان ...
طبعا سيارة غزوان جانت بيهة البنات ..
ميامين كاعدة بصف غزوان .. وورة كاعدات مها وخاتون والطريق كلة يصفكن ويهوسن ...
غزوان اول مرة يشوف ميامين هيج فرحانة ...
كلساع تهلهل وتصفك .. مشغلات المسجل ويركصن ..

وصلت الزفة لبيت ابو غزوان ونزلو العرايس وراحو برة ..
ابتدا الركص للبنات والهوسات ..
ميامين كاعدة عالقنفة لان تعبت من كثر الركص ..
اجت نورة وهي تكعد يمهة .. : هلاو ميامين ..
ميامين تأففت بكلبهة بس ردت بأبتسامة ترحيب : هلاو نورة تفضلي ..
نورة برفعة حاجب : والله توقعت تطرديني .. بس شكلج راضية بالامر الواقع ..
ميامين بأبتسامة : هه ليش عن اي واقع تحجين .. بس لا عن الي جاي تدزينهم الي ..
نورة انقهرت من برودهة : اي .. اني دزيتهم الج حتى تكونين على علم بألي جاي يصير بيناتنة اني وغزوان ..
ميامين ضحكت بسخرية وهي تتذكر من شافت الكلينس بجيب غزوان وهي تدري بي ما يحب يستخدمة لان يعتبرة مو نضيف ما يستخدم غير الجفيات الي هي تحضرهن الة وتعطرهن وتحطهن وية اغراضة وهالشي تعود علي حتى من قبل لا تروح لاهلهة .. لهالسبب استغربت من شافت الكلينس بجيبة .. فتحتة وانصدمت من وجود طبع حمرة على الكلينس وخصلة شهر زغيرة ملفوفة بالكلينس عرفت هالخصلة لنورة فوراً لان شعرهة مميز ان كيرلي وصابغتة احمر .. بقت مصدمة شجاب هذني لجيب غزوان .. وثاني يوم بقت نورة تدزلهة رسائل وتكوللهة ان بينهة وبين غزوان شي وتدزلهة الصور الي اخذتهن بمكتبة ..
رجعت للواقع وهي تباوع بسخرية لنورة : والله تقهريني عليج تدرين .. جاي تتعبين نفسج عالخالي بلاش .. ترة ما هميتيني والله ..
نورة بقهر واضح : خليج لا تهتمين .. وابقي تفقدي جيوب زوجج لحد ما تتأكدين ..
ميامين دارت وجهة ببرود عنهة ونورة كامت بقهر ..

اجة وقت الزفة وطبعاً ميامين غزوان منعهة ان تروح وهي ما عارضت لان مابيهة حيل وبس تريد تنام ..
طلعت الزفة للفندق وميامين بقت تعزل بالبيت ورة الهوسة والناس بدت تروح ويفرغ البيت ..
صعدت لغرفة مؤيد وتأكدت ان كلشي مرتب حتى باجر من يجون ما يكون اكو نقص ..
صارت الساعة ١٢ هي راحت لبيتهة ..
مباشرة دخلت للحمام وسبحت وطلعت بدلت ملابسهة ولبست تراك بجامتة طويلة والبدي ضيق ..
غزوان دخل للغرفة تعبان من بعد يوم طويل وزفة وعالم .. منع ميامين تروح لان يعرف اغلب الشباب راح يرحون بزفة مؤيد ...
دخل للغرفة وهو يدور بجيبة على المحبس مالتة الي انطاه الة ابوه .. وين راح هذا ..
صار يدور بمجرات الغرفة وجوة الجرباية ..
ميامين ... سمعت صوت بالغرفة اكيد اجة .. نشفت شعرهة وطلعت وشافتة لازم سترتة مال البارحة وبيدة كلينس ويباوعلة وهو مستغرب لان بي حمرة مثل المرة الي قبلهة ..
غزوان ... ادور عالمحبس وماكو .. شفت السترة مالتي الي لبستهة البارحة بالحنة مايمين بعدهة ما شايلتهة لان البارحة خطية تعبت ونامت مباشرةً ..
دورت بالسترة بس استغربت وجود كلينس بجيبي .. اني بالعادة ما استخدمة .. فتحتة وشفت بداخلة لون احمر مطبوعة بشفايف ..
شفت ميامين طلعت من غرفة الملابس ..
ميامين : على شنو تدور ..
غزوان : المحبس مالتي ماكو ..
ميامين طلعت المحبس من الكنتور وحطتة الة عالمجر ..: جنت ناسي اليوم الصبح بالحمام ...
ما اهتميت للمحبس باوعتلهة بأستغراب : هاي الج ؟..
ميامين تنهدت ببرود : لا .. اكيد اليوم ورة ما حجت وياي اجت حطتهة عبالهة تضوجني ..
غزوان عقد حواجبة : منو هاي التريد تضوجج ..
ميامين وهي مشط شعرهة عالمراية وحجت بدون اهتمام ..: نورة بت عمتك .. صارلهة كم يوم تحط كلينس بجيبك وبي حمرة وبي من شعرهة وتحط لملابسك عطر نسائي وتدزلي رسائل ان انت عندك علاقة بيهة ..
غزوان عصب وشمر الكلينس بالكاع بقرف وراح سحبهة من ايدهة وطبكهة عالحايط ..
حجة بعصبية وهو عاصر على زندهة حيل : وانتي هيج ما هامج الموضوع .. ما حسيتي بالغيرة لو شوية ..
ميامين بألم : غزوان فك ايدي الموضوع ما يستاهل تعصب هيج ..
غزوان بعصبية اكبر : شنو ما يستاهل .. يمتة يصير عندج احساس وتبطلين هالبرود البيج .. انتي حتى ما اجيتي وسألتيني شنو هاي ولو كلامهة صح لو غلط ..
ميامين بعصبية : ........

الكاتبة : سارة الشمري ✍🏻

اتمنى عجبكم البارت وحبيتو حبايبي 😘 حبايبي اريد تفاعلكم للقصة وشجعوني حتى اكمل 😘