شفاه مخملية الفصل الرابع وثلاثون 34 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طويل تعويض♥️+ هالبارت ممكن الي يقراه يحسه مُبالغه لكن هذا الصار وعن لسان كم بطله..

"شفاه مخملية" 💋

بقلم: زهراء السلامي.

#ربما لم أتكيف مع العالم حتى الآن..
لا أعرف،أشعر وكأن هذا العالم ليس بالعالم الحقيقي..
الناس..المشهد..لا يبدون لي حقيقيين..

تصميم يجنن من ايدين سروو srosh116 👇🏻

♛ ♛ ♛ ♛ ♛ ♛ ♛ ♛ ♛ ♛

"هجران"
لبست شالي سريع وجبه فوگ ملابس النوم وطلعت گبل انزل جوه اشوف شصاير، نزلت اول كم درجة واذا رجليه تجمد بمكانهه چانت رهف گاعده ؏ عتبه الدرج تبچي فحطانه ووجها احمر، شفت منظر خله شعر راسي يوگف وصابتني قشعريرة قويه واني اباوع لوجوههم وحالتهم...

-بكر: ولكم كظوووو هاي شماااله

-مرتضى: ااخخخخ ولك انطفت عينييي

-عميد: زيييد زيييد تسمعننني لك بوويه تسمعنييي شو عاينلي عااااين

-عثمان: يولوو مگعد يثبتتت

-رهف ببكاء: باابااا زيد حيموووت؟؟!!

عاط بيهه عميد الدين حتى تدخل لغرفة جواهر واني لسه واگفه ؏ الدرج مدهوشة من المنظر الدا اشوفه، اربعتهم محاوطين زيد يردون ينهضو من الگاع ومديگدرون يتصارع وياهم وعيونه مگلبه طالع بَـس البياض، لطم مرتضى ؏ وجهه لطمه طفت عينه وفيصل واگف گدامهم حاير وعميد وعثمان واحد يريد يشيله من رجله والثاني من يم ايده وبكر يم راسه..

اليشوفهم يگولون ديشليون طن حديد ومديگدروله، عمه دلال تدگ وتلطم وتصيح "وليدي راح وليدي" وانتصار وفتوح محاوطيهه حتى لا تروحله وبيبي شايله قرآن وتقره وتنفخ..

موقف يخوف حسيت روحي وكأن عايشه بفلم رعب ومدا اگدر اطلع منه..

ختم ارتجاجه ورعشته الغريبه كأنه بي صرع بـ همشه قويه لأيدين عميد الدين لدرجة نزفت دم، يصدر من زيد صوت غريب يشبه انين موجوع، صحيت من هول الموقف ؏ صوت عثمان عاط بيه...

-عثمان: علووويه روحي للغررفه لا تخترعييين

مدا اگدر اتحرك وبس ابلع بريگي، بكر اجه طاير عليه جرني من ايدي بقوه ودخلني لغرفه جواهر وطبگ الباب علينه وأكد علينه منطلع منهه...

اللتفتت ؏ البنات شهد وغزاله وجوري مصفصفات ومبلوعه وجوههن وجواهر حاظنه رهف الي لسه تصرخ مفزوعه وتبچي، اني اول من نطقت...

-بنااات هاي شصاااير؟؟؟

شهد رفعت كتافهه خايفه وحچت بصوت ناصي...

-شهد: منعرف والله گعدنه ؏ صريخة رهف خليهه هيه تحچيلنه

اللتفتنه ؏ رهف ترجف لدرجة تطگ سن بسن، جواهر مسحت ؏ راسهه وهمست...

-جواهر: رهوفه شصار؟

**

"رهف"
مرحبا انه رهف، مرينه بهواي احداث سوه وحچيتلكم كم موقف بَـس ماحچيت عن نفسي بطريقه تشبع فضولكم..

عمري قريب الـ 16 سنه، بنت يتيمة الام من عمر الست سنوات، مدللة ابوهه من الصغر لدرجة مايحسسني انه كبرت ويعاملني مثل الجهال ويخاف عليّ ويرجف لو صحت ااخ، اوقات احسه يعاملني هيچ لاني مريضه بگلبي وماتحمل تعب بَـس بيبي انتصار تگول ابوچ يحبچ ومايتحمل زعلچ وصيري حبابه وياه بَـس انه لساني طويل وهواي ازعله مني نتعارك ونرجع وره نص ساعه نتراضى عبالك ماصار شي..

ابوي سَندي وقوتي، هيبتي بين الناس وتچايتي، ما ازعل ولا اتحسس من البنات يحچن ؏ امهاتهن ولا احس عندي نقص لان ابوي مكفي وموفي صايرلي أُم وأب وصديق وحبيب..

توفت ماما بسبب نزيف حاد اثر ولادتهه بأخوي "هاني" الله يرحمهم ثنينهم، او يجوز هاي چذبه من ابوي حتى ماعرف سبب وفاة امي الحقيقي الي دمره، سنيين هوه مو ؏ بعضه ويآكل بروحه واوقات اسمعه يبچي بالليل من اكون نايمه، يمسد ؏ شعري ويتعذر مني ويحچي حچي ما افهمه بَـس يفرحني من يگول ماخلي احد يجيس شعره منچ وانتي بنيتي وكلشي املكه بهالدنيا..

واوقات اسمعه يحاچي ماما وكأنما گاعده وياه ويقرالهه قرآن ويصليلهه ويدعيلهه ويسويلهه ثوابات بَـس ما يرضى يزور گبرهه اله نادر..

ماتذكر هواي من امي لسبب صار بيه حادث سيارة وع اثره فقدت الذاكرة وابوي شوي شوي يذكرني بيهه ويحچيلي ؏ جمالهه واخلاقهه العاليه..

بَـس چان دائماً يگول امچ عشگتني اكثر مما انه عشگتهه والسبب رح اخلي هوه يحچيلكم من يكون مستعد..

رحت ؏ الحاسبه افتح اغاني لان جفاني النوم وچنه ما ناوي يزورني الليله، حطيت الفلاش بالحاسبه وحطيت سماعات بأذني خاف بابا يحس خطيه خلي نايم..

انتظرت هواي حتى يشتغل الفلاش بَـس ماكو چنه ضارب، انقهرت كللش وضجت واجت ببالي اراسل زيد ماكو غيره يگدر يساعدني بهالسوالف..

اخذت موبايل ابوي ودزيتله رساله وبساع جاوبني..

-💬زيد گاعد؟

-💬زيد: اي سيد أأمُرني؟

-💬رهف: هههه انه رهف

-💬زيد: يا هـلا برهوفة خير عيوني اگدر اساعدچ بشي؟

-💬رهف: اي زيود حباب هذا الفلاش مال الاغاني مادري شماله مايشتغل شسويله؟

-💬زيد: خاف مامشكلته عدل؟

-💬رهف: لا اسوي نفس كل مرة

-💬زيد: ماشي اني رح اجي للمطبخ وانتي جيبي الحاسبه اشوفهه يمكن بيهه مشكله

-💬خاف ابوي ما يرضى

-💬زيد: لا لا انتي متبقين يمي بَـس جيبيلياهه ومن اكمل اراسلچ تجين تلگيهه بالمطبخ

-💬خوش جايه

مسحت محادثتنه خاف بابا يزعل عليّ لان منبهني ما احاچي، طلعت من الحجرة اتسحب ادري الجاي اسوي غلط واذا ابوي صحى يمكن تصير مشكله بَـس گلت ما أطول بَـس احطهه وارد للحجرة..

رحت للمطبخ شفته واگف ومبتسملي، سلمت عليه وهوه بادلني بأبتسامه حلوه، تقدم عليّ واجه ياخذ الحاسبه من ايدي ومانشوف غير بزون اسود طلع من الحار مال المطبخ وطفر ؏ زيد بحركة سريعه ومفاجأة..

خفت كللش وابتعدت عنه وزيد شال البسه وشمرهه ؏ الحايط، وگف بمكانه وعيونه انطفت بساع، حط ايده ؏ راسه وظل يضغط عليه بحركة عجيبة..

گلبي گام يدگ من الخوف ورحت عليه اشوف شماله وماحسيته اله مدلي ايده عبالك يريدني اساعده وجر بلوزي وشگه من الياخه ووگع بالگاع، ظل ينتفض بطريقه غريبه جسمه ثابت بَـس رجليه تختض..

ماعرفت شني اسوي وشلون اعالج الموقف، اجه ببالي اروح لعمه دلال واصحيهه، ركضت عليهه وهيه وحبوبه عطيه گامن مثل المخبلات، طفرن للمطبخ وعمه دلال تدگ وتلطم وانه انهاريت وانه اشوف حاله وعيونه تگلبن ورجله تختض...

ثواني وعمو عثمان ؏ روسنه وركض يصحي ابوي، حاولو يشيلوه بَـس يگولون رجليه ثگال ومجاي يگدروله.. صاحو بيه اصيح لعمو مرتضى وفيصل، اجوي وكلهم تگابلو عليه وماجاي يگدروله محد يعرف السبب..

اتصل فيصل ؏ عمو بكر واجه طاير وانگلب البيت والكل صحى وناس تصرخ وعمو مرتضى تخبل من شاف زيد بهالحاله وعمه دلال تون ؏ وليدهه وعمه فتوح تدگ وتلطم ونرجس وياهه وانه مثل التايهه بَـس دموعي تصب ورحت گبل اگعد بحاشيه الدرج خايفه..

ابوي انتبه عليّ وصاح بيه اروح لجواهر يخاف لا يوگف گلبي من الخوف وانه صدگ اظنه راح يوگف لان جاي ينبض ببطئ تعبني..

-جواهر: جري نفس رهف حبيبتي باعيلي جري نفس ؏ كيفچ لچ رهف ؏ كيييفچ

-رهف (تحچي وتبچي): حيمووت والله حيموووت

-هجران: رهوفه حبيبتي لتخافين ان شالله ماكو شي

متسمعلنه بَـس تبچي وتوّن جواهر وجهها انخطف صار اصفر همستلي...

-جواهر: هجران لازم نسكتهه هسه يوگف گلبهه

-هجران: شنو بيدنه شنسويي؟؟

-شهد: نصيح لأبوهه

جوري ايدتهه وغزاله متحچي شي متصنمه بمكانهه وعيونهه تزرزر، راحت جواهر ؏ عميد الدين بعدما هدأت الصاله جوز دخلو لوحده من الغرف..

شويه واجه ملهوف يدور عليهه بعيونه، طار عليهه وگعد ؏ ركباته گدامهه وهيه گاعده ؏ چربايه جواهر...

-عميد: باباتي رهفف بنيتي اخذي نفس حبيبتي بابه سمعيني رهففف

-جواهر: عميد وجهها صاار احممر وگوة تجر النفس

احتار بيهه وصاح بجواهر تلبسهه شي حتى ياخذوهه للمستشفى، لبست جواهر وگالت تروح وياهه..

طلعو من البيت وخاله انتصار اكيد همات راحت وبقينه احنه البنات بالغرفه، للاربعه الفجر ومحد اله صوت بَـس نسمع انين عالي وصوت تجويد قرآن شهد گالت هذا صوت عثمان ديقره..

مرت ساعه ورجعو عميد وجواهر وبيدهم رهف شكلهم شگد حلو عبالك امهه وابوهه وجواهر شلون خايفه ؏ رهف عبالك بنتهه صح الفرق بيناتهن مو هواي بَـس شايله حنية والده عليهه..

نيمهه عميد الدين ؏ چربايه جواهر وهيه بسرعه غفت، ترخص من عدنه وطلع من الغرفه، سألنه جواهر گالت حطولهه اوكسجين وضربوهه ابره بالمغذي وماعرف شنو..

اذن الفجر وبيبي عطية اصرت الكل يصلي سوه خصوصاً زيد هدأ ونام، فرشنه سجاداتنه وعميد ترأسنه صلينه جماعه وعمه دلال كل شويه تگطع الصلاة وتبچي..

للصبح محد نام وثاني يوم محد راح لدوامه بعدنه مصدومين وحايرين شنو المضوع، اقترح عثمان ياخذو للطبيب احتمال عنده صرع ومندري رغم عمه دلال گالت ماعنده بَـس گالو ؏ الاحوط ياخذو..

مر اسبوع وهمه من طبيب لطبيب وتحاليله كلهن نظيفه والحمد لله بهالاسبوع مصارله شي بَـس باليوم الثامن تكررت هالحاله بأذان المغرب، ينتفض ووجهه ازرگ، تخبلو ؏ حالته وبيبي عطيه گالت لازم شيخ يشوفه يجوز صارله شي الولد..

بهالفتره زيد ينام جوه ويانه بالبيت يعني ميطلع لغرفته نهائياً ومتعوفه عمه دلال وتتناوب خاله انتصار وفتوح وياهه، اما عمه سلمى مرضت كُلش وراحت لبغداد ويه عمو خليل گالت تحس روحهه رح تتخبل من الديصير بالبيت..

گعدت ثاني يوم الصبح الارق ماخذ من حيلي ومدا اگدر انام بسبب زنوبة هواي تتحرك واغلب حركتهه بالليل تصير مبينه وكحة بنيتي ههههه، بدلت ملابسي ونزلت جوه اشوف بكر لان صارله كم يوم يگعد قبلي يگول هم ميگدر ينام لان اتگلب هواي..

نزلت ادور عليه صار بوجهي مرتضى..

-صباح الخير وينه بكر شفته؟

-مرتضى: صباح النور اي الصبح طلع من الغبشه لبغداد

-ياا شعنده ببغداد؟

-مرتضى: عميد گاله يروح يشوف المحلات شصار بحالهن ويجوز هالسبوع كله يظل هناك ويه العمال

-لعد واني منو ياخذني للدوام؟؟

-مرتضى: وصاني انه اوصلچ

-ها ماشي يله اجيب جنطتي واجي

-مرتضى: منتظرچ

صعدت فوگ وجبت جنطتي وملازمي وطلعت ويه مرتضى، روتين عادي ماكو تغيير اغلب الاوقات وحدي لان جواهر ديصير عليهه لود بالمحاضرات ومدا تگدر تجي تشوفني واني مكونت صداقات لان استحي احچي ويه أي بنيه..

داومت تلث تيام ومرتضى يجيبني ويوديني، باليوم الرابع وصلني حضرت محاضراتي ورحت بالنادي انتظره لان اخر محاضره ما اخذنه الدكتور، طلبت اكل وگعدت آكُل يبووو عليه شگد صايره آكُل چني مشوهه..

اكلت اول لگمة وشفت عثمان يجي بأتجاهي، تجاهلته لان هوه دائماً هيچي يسوي من تصير عيني بعينه حتى ميسلم گلت يجوز يتفشل مني گدام جماعته وهوه عيني شلون ولد وبنات يگفون بصفه والتماوع يصير بفلس، هوه اني ماسمع لحديثهم بَـس صوت ضحكهن يوصل لقاعتي شگد ما عايقات..

وگف گدامي وايده بجيب بنطرونه، ابتسم وگال...

-سلام علويه

رفعت عيوني وجاوبته ببرود..

-عليكم السلام

-عثمان: أنَا اوصلك اليوم لان مرتضى مايگدر يجي

-هجران: لييش؟

عگد حاجبه وحچة بأستهزاء..

-عثمان: لان مايگدر يجي!!!

-هاا ماشي يله هسه اگوم

لفيت اللفه بچيسهه وردت اگوم وهوه گال...

-عثمان: لا لا كملي اكل لان أنَا هم جوعان اريد اطلب

-هجران: مو شسمه خاف عيب

-عثمان: قصدِك لان گاعدين وحدنه؟

-اي

-عثمان: صح كلامِك لحظه هسة ارجعلِك

طلع من النادي واني رجعت اكمل اللفه، رجع ووياه بنيه اويلي مو بنيه طرگاعه عزا العزاهه ؏ هالخلقه والجسم مقسم.. ابتسم وگال...

-عثمان: علويه هذي ميس زميلتي بالبحث

-هجران: اهلاً وسهلاً

مديتلهه ايدي وهيه ابتسمت وصافحتني، ضحكت بدلال وحچت...

-ميس: عثمان عزمني اتمنى ما ازعجكم

غمزتله بآخر كلمه، وجهي اشتعل نار من الخجل بَـس بسرعه عثمان تلافى الموقف وحچة بجمود..

-عثمان: علويه هجران تصير مرتو لأخوية الكبير

-ميس: اهاااا فهمتتت

سألهه عثمان شنو تحب تآكُل وهيه جاوبته بَـس هواي تتماوع وصراحة يلوگلهه ومبينه من لهجتهه مو منا يعني تحچي مثلي، سألتهه...

-ميس انتي منا؟

-ميس: لا حُبي اني من بغداد وصارلنه سنتين انتقلنه هنا

-هااا

-ميس: اي، هسه يعني عثمان حماچ؟

-بالضبط

-ميس: مممم

حسيتهه تلوب وتريد تسأل ؏ فد شي واني غلست لان مبيه حيل آخذ وانطي عيوني رح ينطبگن من النعاس..

رجع عثمان شايل اكلهم، أكلو بكل هدوء وميس كل شويه تسرق نظرات من عنده ومن تلتقي نظراتهم يبتسملهه وهيه تبادله ابتسامة حياء، ضحكت ؏ سوالفهم لان واضح ميس غرگانه مو بَـس معجبة وعيونهه تحچي اللهفه الشايلتهه اله...

كملو اكل وميس ترخصت من عدنه وراحت واني وعثمان مشينه لبوابه الجامعه بدون منحچي شي، فتحت الباب الخلفي وردت اگعد بَـس حسيته ضاج خصوصاً من گال...

-علويه ممكن تگعدي بالصدر بلا أمر عليكي

هزيتله براسي وصعدت ليگدام، ماتقيدت لان سيارته عريضه ومسافه چبيره بين الكرسيين.. علگ مسجل وچان مركز يستمع للاخبار..

خلصت النشرة وطلعت اغنيه مال حسام الرسام ماتذكرهه شنو بالضبط لان چانت نازلة بالجديد.. طفه المسجل بسرعه لان چانت اغنيه رومانسيه ومبين استحى يسمع هيچي شي واني وياه..

دگ مويايله ولان چان رابطه ويه السيارة گدرت اسمع الاتصال كامل، چانت شهد، جاوبهه...

-هاا يوليي شكوو

-شهد: عوثمااااان

-عثمان: والحمزة اسمعِك ليش تصرخيي

-شهد: عوثمااان حبااااب

-عثمان: غير تحكي صرگعتنيي

-شهد: مو استحييييي

-عثمان: احيييي انتي تستحي وبسطال الحمزة ما صايره اصلاً أنَا اگول هالبنت ماعندهه احساس

-شهد: ليش عينييي عفنه الاحساس الك

-هههههه احكي خلصيني

-شهد: اوووي زين يله اريد دفتر بياني وقلم جاف احمر واخضر واسود سوفت

-عثمان: صار وغيرو؟

-شهد: اممممم واريد بعد اللوان تخطيط

-غيرو؟

-شهد: وجواهر تريد ككو

ضحك وهز براسه واني هم ضحكت من سمعت جواهر تعيط عليهه وتگول..

-جواهر: ادبسززز شنو يشتغل عدنه وتگوليله جواهر تريد ككو.. عثمان اسفه هاي شهد متستحي لا اني ماريد ككو

-عثمان: لا تدللي أنَا اصلاً ردت اشتري لرهوفة هم وصتني

-جواهر: عزااا عثمان ختوليي مو زين عليهه الدكتور گال ميصير تآكُل سكريات

-عثمان: ادري بَـس خطيه كثير مشتهيتو وأنَا حاكيت عميدي وگال عادي جيبلهه بَـس مو كثير

-جواهر: هاا لعد اووّك ماطول ابوهه يعرف هذا هوه

-يله محتاجه شي ثاني؟

-جواهر: سلامتك دير بالك بالطريق

-عثمان: بعيني يله مع السلامه..

سد الخط ويضحك ويهز براسه، اخير شي همس بصوت ناصي...

-عثمان: والله صرگعانه هاي شهد

ابتسمت وحچيت...

-هجران: شنو يعني صرگعانه؟ هواي تگولهه؟

اللتفت عليه ورجع يباوع للطريق، گال بأبتسامه خفيفه...

-صرگعانه يعني مصيبة

-هاااا فهمتتت

-اي

-هجران: زين يصير اسألك سؤال

-تفضلي

جاوبني ووجهه مستقيم وايديه ثنينهن مثبتات ؏ الستيرن...

-هجران: شعجب داومت بجامعه ذي قار؟

-عثمان: لان قدمت هينا

-ادري بَـس ليش؟

اللتفت يباوعلي وخفف من السرعه لان گدامنه صار ازدحام، ثبت وحده من ايده ؏ الفاصله الموجوده بيناتنه والثانيه ؏ الستيرن وحچة...

-عثمان: أنَا اصلاً خريج جامعه بغداد وردتو اقدم عليهه خاطر اكمل ماستر (ماجستير) بَـس عميدي كثير تعب بآخر فترة واحتاجني عندو وقنعني اقدم هينا وبعد صارت

-هااا زين شعجب اصلاً ردت تكمل دراسات؟ انته مو گصاب نفسهم؟

-عثمان: اي گصاب بَـس بطبعي احب الدراسه وكثير شاطر فَـہ فضلت الدراسه ؏ الشغل وبما أنو صارلي سنين اشتغل وكونت نفسي گلت ارجع ادرس

-هاا بالتوفيق

-تسلمي

-زين ولو ضوحتك بَـس ممكن سؤال ثاني اسألك

ابتسم ابتسامه برزت سنونه وهز راسه بـ "اي"

-هجران: انته مو تگول شاطر شعجب رحت تربيه تاريخ؟

-لان أحبو

-يعني رغبه رحت؟

-اي وأنَا من الاساس طالب ادبي ومعدلي اجه كثير عالي وخوالي قنعوني اقدم قانون بَـس ماحبو فَـہ عمي عباس الله يرحمو گال روح لوين ماتريد وقدمت ؏ التاريخ وانقبلت وطلعت الاول ؏ دفعتي لمدة اربع سنوات متتالية

-الللله صدُك والله؟!!!

ابتسم وحط ايده ؏ شواربه بطريقه تدل ؏ الثقه وهز راسه، ابتسمت ورجعت وجهي ليگدام..

وصلنه للبيت وسلمت وبوجهي لغرفتي نمت بملابسي من التعب، حسيت ؏ طرقات خفيفه ؏ الباب صحت بتعب...

-منووو

انفتحت الباب ؏ كيف واسمع طگطگة، فتحت تك عين اخترعت من شفت جوري بوجهي، نهضت روحي من الفراش وسألت بتردد..

-جورية شبيچ؟؟

-جوري: لشوكت رح تظلين نايمه يله اريد اسولف وياچ

-هستوني نمت ولچ

-جوري: لا بله تدرين ساعه بيش هسه؟!!

-لاء

-ساعه بالسته المغرب

-عزااا واني لحد هذا الوقت ناايمة!! بَـس شو بعدني نعسانه

-جوري بضحك: هوه انتي صايره بَـس اكل ونوم هههه

مطيت جسمي بتعب وتثاوبت، جريت اللحاف اتغطه..

-هجران: جورية والله تعبانه حبابه روحي بعدين نسولف

-جوري: شبيچ گعدي اريد اشبع منچ

-ياا وشكو شبعي مني بالليل

-جوري: مو باچر رح اروح لبغداد وجوز مارجع هنا بعد

گعدت ؏ حيلي مثل المخروعه..

-هجران: شنوو؟؟ مافهمت شنو مترجعين بعد؟؟!

-جوري: فيصل صار شغله هناك ورح يستلم ادارة قسم من المحلات

-يااا هااي شوووكت صارت؟!!!

-جوري: البارحة فاتحني بالموضوع وگال هاي فرصة مستحيل تتفوت وحتى نضمن مستقبل علاوي خصوصاً عميد انطاه جزء چبير من ارباح محلات بغداد

-ايي؟؟؟

-اي واني وافقت گتله اذا أمنتلي بيت مرتب واثاث وكلشي ميخالف اروح وياك بَـس المشكله حتى عمتي رح تجي ويانه

-لا بشرفچ

-جوري: والقرآن لعد اني شمضوجني غير هالشي والطامة الاكبر عمو خليل هم راح يستقر ويانه

-لاااا مستحييل ويعوف الناصريه وبيبي عطيه!!!

-شوف هااي اذا سليمه فكت حلگهه منو يگدرلهه وانتي تدرين عمو يعبدهه عباده اتوقع ساحرته

-ههههه لا ولچ مو لهدرجة بَـس هوه يحبهه هواي

-جوري: اي المهم فَـہ هسة اجيت احچيلچ، رح اشتاقلچ هوااي

دمعت عيوني وردت ابچي، حظنتني بقوه وصارت تدغدغ بيه حتى اضحك..

-هجران: هههه جورية هههههه كافييي مراح ابچي هههههه والله ااخخخ بطني ولچ هههههه

-جوري: ههههه يله المهم راحت البچية

-اي

-جوري: هجران ماوصيچ ؏ نفسچ بعد اني مو يمچ وادافعلچ من نرجسو وفتحو يحچن عليچ

-جورية والله رح ابچي

-لا حُبي ماريدچ تبچين بَـس قوي گلبچ ولاسنيهن شويه ذني گدرتهن بَـس ؏ الفقيره القويه ميگدرن يندگن بيهه

-عوفچ مني وهسه انتي مرتاحة بهذا قرارچ

تنهدت بعمق وهزت راسهه بـ "لا"

-جوري: اچذب عليچ اذا اگولچ مرتاحة گلبي ناغزني هجران

-لعد لتروحين

-جوري: وفيصل يظل هناك وحده؟؟ ما أمن خليني ساتره ؏ بيتي وابني واتحمل كم شهر واتعود

-ديربالچ ؏ نفسچ جورية

-بعيني

حطت راسهه بحظني بَـس احس اختي مو طبيعيه، هذا طبع جورية حتى من تكون ضايجة لو زعلانه متشكي وتحچي لأحد..

شويه وگمنه نزلنه جوة، فرشنه سجاداتنه وصلينه كلنه بالصاله صارلنه فتره نصلي جماعه من صارت سالفه زيد لسه، كَبَر عميد الدين وكبرنه وراه، كمل صلاة المغرب وگام يريد يصلي العشاء وبالركعة الثانيه قطع صلاته وصار يتقيأ ؏ السجادة..

بعد منعرف شلون نكمل صلاتنه وهوه مستمر يتقيأ وحتى مراح للحمام ظل بمكانه ولازم راسه، اول وحده كملت بيبي ركضت عليه تريد تهدأه وهوه بَـس دموع تصب من عيونه ومستمر يتهوع..

راحت عليه خاله انتصار وعثمان وجواهر ورهف كلهم حواليه، عثمان سنده ؏ كتفه واخذه للحمام ونسمعه يتهوع ويگح بصوت عالي واحنه واگفات حايرات شنسوي وخاله انتصار مدهوشة ممستوعبه الديصير..

بيبي عطيه صفگت ايد بأيد وجزمت الموضوع وگالت...

-حجية عطيه: خلصص انه چنت شاكه بَـس هسّ تأكدت السالفه بيهه سحر خايبات ساحرين ويلادنه

لطمن خاله انتصار وعمه دلال ؏ صدورهن وفتوح بدت بعياقتهه ولواگتهه تصيح وتلطم ؏ وجهها..

وهاي الفتره من حياتي اگدر اگول ان اكثر فتره تهجولت وتبهذلت بيهه، البيت لا يُطاق جورية راحت لبغداد وعمه سلمى وعمو خليل هم وياهه، واني اداوم بَـس بدون نفس بدت امتحانات نصف السنه وامتحنت شلون مچان اروح وارجع تعبانه وهوااي هواااي انام بطريقه غريبه عجيبه..

بدت العطله ورحت لأهلي ازورهم ماطولت هواي لان دينتقلون لغير بيت بابا أجر وعرض بيتنه للبيع علمود يقسمون الورث، عشرة تيام ورجعت لعيالي والهوسة نفسهه وحاله عميد بالاسوء صايره وزيد شبه الي تخبل والبيت مخبوص وياهم..

بكر واخو احمد يرحون ويردون لبغداد علمود يبقون ويه فيصل وميخلو وحده، وعثمان مرابط عميد الدين الي صار واحد ثاني وبس يعصب ويتعارك واوقات يگعد من النوم مثل المجنون ويصيح حلمت ببزونه سوده تعظني لو تعظ عثمان لو بكر لو لو لو...

دخلت بشهري وثگلت كُلش وع ساعه اجيب، وفد يوم بوقت المغربيه چنه گاعدين بالصاله ودرته ؏ قناة كربلاء لان قرب وقت اذان المغرب وچان طالع قرآن، عميد نتر بيه...

-طفيييي

-هجران: بَـس سيد رح يأذن

عاط بيه صووت خلسني ورجف جسمي، ؏ اثره اجه عثمان طاير..

-عميد: گتلللللللچ طفييييي الصخاااااام

-عثمان: شصاير؟؟؟

ركضت اطفي التلفزيون وعميد لزم راسه ويصيح، جواهر طلعت من الغرفه وراحت عليه، لزمت ايده ودموعهه تجري ؏ حالته...

-جواهر: عميد شبيك؟

-عميد: ولكممم راااسي راااااسي

-جواهر: سودة بوجهي شسويلك عميدي باوعلي شنو اسوي

-عميد: وخرووو عنيييييي ولك عثمااااااان عثماااااان

يصيح عثمان وهوه واگف بصفه وعبالك ميشوفه ولا يسمعله، بهالفترة انگلبت حياتنه ومنعرف شنسوي او شنو نتصرف وزيد نفس الحاله يعيط ويصيح ويرعش جسمه من وحده وناس حايرين بزيد وناس بعميد الدين..

اكثر من مرة جابو شيخ وواحد منهم أكد گال هذا لو حسد لو سحر وانطانه اعمال نسويهه گال كل اهل البيت يشتركون بيهه حتى نطرد هالشي..

وكلما نفتح قرآن بالبيت زيد يتخبل ويظل يصرخ بعلو صوته ويضرب براسه ونتخبل وياه، وبيوم من الايام وهاي اني صارلي 18 يوم داخله بشهري وصبحت عندي الم من الصبح، رحت للمطبخ اسوي اكل لرهوفة لان من يوم ابوهه صارله هيچ وهيه لا نوم ولا اكل بَـس گاعده وتسرح بالفضاء...

وديتلهه الاكل بالهول لان چانو عثمان وشهد گاعدين يشجعوهه حتى تدرس، نزلت الصينيه للگاع وگعدت وياهم وفزينه ؏ صوت عميد الدين يصيح...

-عميد: لااااا ولكم لااااااا

گمنه مثل المخابيل نشوف شكو شصاير ونشوف جواهر گاعده يم رجليه وتبچي....

**

"جواهر"
يوم بعد يوم حالة عميدي تتأزم واني ميته جسد بلا روح اموت الف موته واني اشوف حالته حتى ماعنده حيل يطلع بالديوان وعمو خليل رجع للناصريه واستلم مكان عميد ومرتضى وغيث وياه...

وين چاان وشلون صاار ومن سألنه الشيخ گال الحسد او السحر من الممكن يقتل الانسان مو بَـس ياخذ من عافيته..

واني هاي الفتره كلهه وياه وياه اخاف اعوفه ويروح من ايدينه وهوه حسيته كُلش تعلق بيه مثل الطفل واوقات ميطيق احد وميقبل يباوعلي، اجت ايام يگعد طبيعي ولا كأن بي شي ويضحك ويتشاقه ويايه ونسولف واوقات نظل الليل كله گاعدين بالهول ورهف ويانه ونسولف مثل قبل..

چان نايم بغرفته وخاله انتصار گالت بَـس تروح تسويله كمادات لان ارتفعت حرارته، فَـہ اني مطلعت بقيت واگفه واباوعله، ضعفان لدرجة عيونه انطمت وهالة من السواد محاوطتهن وصدره وبطنه مخسوفات خسف وايده اليسره ؏ ساعه ترجف من وحدهه..

اباوعله وابچي شسوي لو بيدي انطي من عافيتي ولا يظل بهالحال، گعدت ؏ الكرسي ولزمت موبايلي ودگيت ؏ ماما حاچيتهه شويه ولحت عليه ارجع لبغداد يوم الجمعه گلتلهه اشوف واردلچ خبر لان عطله نص السنه كلهه گظيتهه هنا واهلي اخذوهه فرصه وسافروا..

سديت الخط منهه وحلاوة اتصل بيه يسألني شصاير مصاير حچيتله شويه وگطعت الاتصال من عميد صحة من النوم يصرخ...

ركضت عليه واجوي عثمان والباقين ورهف تبجي وواگفه بزاويه الغرفه متعرف شتسوي..

-جواهر: عميد شبييك شبييك؟؟؟

-عميد: ولچ وينهممم رادو ياخذوووهه ياااخذووهه

-عثمان: منوو ذوله؟؟

ظل فاتح عيونه ؏ وسعهن ويباوع ليگدام اشر براسه وهمس...

-عميد: شتريد مني

صفنه واحد بوجه الثاني وهوه مستمر يباوع وكأن اكو احد گدامه وديحچي وياه حسيته نايم وديحلم مثل كل يوم، خاله انتصار تبچي وتخرمش وجهها وبيبي عطيه نفس الحاله خو عمه دلال منتهيه ع زيد وفتوح نفس الشي، گلبي گام يدگ واني اتلفت اباوع ماكو شي، اخير شي حرك راسه نافي ويصيح...

-ماااتاخذهه اخذنييي انه ماااتاخذذهه

-عثمان: المن ياااخذو عمييد بشرفك ردلنه باوعلييي عميدييي

يهزه قوي وهوه فاصل لغير عالم گلنه تخبل الرجال، ماتحملت اسكت هزيته بكل قوتي واصرخ بوجهه وابچي...

-جواهر: اصحححححى اصححححى عمييييد باااوع منااا كل اهلك ينتظرون ترجعلنننه عمييييد فدوووه ارجععلللي ارجعلييييي تعبتتتت

"هجران"
جواهر تضرب ؏ صدره وتبچي فقدت، جريتهه عنه واخذت رهف وطلعنه بره الغرفه.. گعدتهن بالهول وگلت لشهد متخليهن يطلعن حتى متسوء حالتهن اكثر، اما غزاله ماعرف وينهه اصلاً من يوم الصارت حاله عميد هيچ وهيه گاعده بغرفتهه وتقره قرآن وتبچي..

رحت للمطبخ اسوي اكل لان الكل ؏ لحم بطنه من الصبح، رجعت صارت عندي لوية ببطني گلت يمكن مستبرده، اجه عثمان للمطبخ وسألني...

-علويه اساعدِك بشي؟

-هجران: لا سيد تسلم

عكمشت ملامح وجهي من گلتهه لان رجعتلي الكرفه، حچة بقلق..

-عثمان: وجهِك اصفر روحي ارتاحي وأنَا اجيب اكل من بره

-هجران: لا بيبي گالت ممنوع نآكُل شي من بره بهالفترة ماعرف ليش

-عثمان: خلص أنَا اسوي اكل روحي ارتاحي

-سيد والله عادي شبيك متعوده اني

وگف بصفي بدون ميحچي شي، اخذ البتيته الي حاطتهه بالطاسه وجاب سچينه وگشرهه بيهه...

-هجران: سيد شدتسوي روح يم عميد الدين

-عثمان: نام هسة

جاوبني بدون ميباوع لوجهي، استحيت يعني كومة نسوان ولا وحده بيهه خير وتجي تساعد ولو ما اللومهم حالتهم بالضيم الكل متأثر ؏ عميد وكأن عبالك البيت انهدم من يوم مرضته لسه..

-هجران: رح اصيح لشهد تساعدني

-عثمان: شهد ويه رهف گعد تدرسهه

-زين جواهر نرجس غزاله أي وحده

دار وجهها عليه وحچة بأنزعاج...

-عثمان: علويه بَـس خليني اشوفو لشغلي

سكتت وبعد محچيت شي، وگف بصفي وبده يقطع بالبتيته واني عجنت الكباب وبالي شارد وافكر شلون ورطه هاي وشلون رح نطلع منهه وعميد معقوله تظل حالته هيچ؟؟

-عثمان: اريد اخذو للامام الحُسين شتگولين؟

-هااا وياي؟

عينه ؏ التخته والسچينه ويثرم، جاوبني...

-عثمان: اكو غيرِك بالمطبخ

-هجران: لا احم مادري بكيفك بَـس مو اخذته قبل كم يوم للامام علي

-عثمان: ميخالف بلكي الله يتحسن

-ان شالله، وزيد هم تاخذو؟

-عثمان: اكيييد عجل شلون

-خير ان شالله

هز راسه واللتهى يساعدني، حركته خفيفه صح بطيء بَـس ميشلع الگلب ويسمع كلشي اگوله واوجهه عليه، اجت فتوح للمطبخ تباوعلنه ومظيگة عيونههه...

-فتوح: هاي شني تشتغلون سوووا

-عثمان بجمود: عجل اذا أنَا ماشتغلت تبقى وحدهه وهيه حامل

-فتوح: هااااا

گلت بگلبي وجعاا نظراتهه شگد خبيثه ومو راحة، كملنه العشه وگلت بحياء...

-عاشت ايدك سيد

جاوبني بدون ميباوعلي...

-عثمان: ماسويتو شي

طلع من المطبخ واني فرشت السفره وگوة ادنگ الالم ديزيد، شافني واجه بسرعه اخذ السفره مني وگال...

-عثمان: لا تدنگين

هوه گال هيچ واشتغل المهامز واللملامز مال فتوح، هاي شبيهه مريضه نفسياً!! وشنو يعني هيچ گلي اصلاً احنه من البدايه مندنگ گدام زلم لان عميد ميقبل هففف شگد انزعجت منهه..

عفتهم وصعدت اشوف غزاله چانت نايمه ودموعهه المالحه ناشفه ؏ وجناتهه، طفيت الضوة وطلعت رحت سبحت ؏ السريع وبدلت دشداشتي لان صرت كلني ريحة تگلاه، نزلت الدرج ونرجس شافتني غمزتلي وحچت...

-نرجس: هااا شكو سبحتيي

-لان انترست ريحة طبخ

-نرجس: هههههههههههههههههههههههه هاي احچيهه للدبه حُب

-شبيچ انتي؟؟

فرت بيدهه وتقربت عليه وهمست...

-نرجس: حظ الگحـ*** گاعد

مافتهمت شتقصد غلست عليهه ورحت للسفره اگعد چانو عثمان واحمد هم جاي هستوه ديجيبون بالمواعين وشهد تناوشهم، سألت ؏ رهف وحواهر گالو نامن من التعب من الخمسه الصبح گاعدات..

اكلت بهدوء وفتوح تباوعلي وتنافخ، گالت بخبث...

-فتوح: راح اتصل ببچر واگله يرد هين

رفعت عيني اباوعلهه وگلت بيني وبين نفسي علساس هيچ رح يهتم ويرجع، ردت گالت...

-فتوح: اييي مو مال واحد يهيت نسوان ويظلن يلعبن وحيدهن

نرجس ردت...

-نرجس: شفتييي يوووم من تعاينيلهه تگولين هالبت شكثر بريئة ومسكينه وهيه من جوة الجوة بَـس شنگووول حظ الزررررگة

تيفنت ديحچن عليه، رفعت راسي وهاي اول مرة اجاوبهن...

-هجران: انتن شنو سالفتچن؟؟!

-نرجس: هيهيهيهيهي خايبه انتي شني سالفتج ويه الاحممم

دارت عيونهه ؏ المطبخ انوب حيرتني هاي شبيهه خاف لان عثمان ساعدني هيچ مضغوطات، تصنعت اللا مبالاة واني بداخلي ناار تسعر..

-هجران: ؏ الاقل الاحممم ؏ گولتچ عنده احسساس احسن منچ ومن امچ..

گلت هالكلمتين وگمت رحت لغرفتي واسمع لاصواتهن ترعد بالصاله وحدهن چنهن مخبلات، متت بليلتهه آكُل روحي بروحي شجاااني وخليته يساعدنيي ياما اشتغلت وحدي والوب من الوجع ليش ضعفت اليوم وقبلت يساعدني، مانمت الليل كله اخاف بكر يفتهم ويسويلي هوسة خصوصاً هوه باچر راجع..

گعدت الصبح وكالعادة مرتضى ياخذني للدوام ويرجعني، اول ماطبيت للبيت وصار بوجهي بكر رحت عليه وحظنته بكل قوتي شگد مشتاقتله وصاير ميجي هواي اكثر الوقت ببغداد ببيت جورية..

ضحك وگال...

-بكر: هاا ولچ هاي شني هيچ مشتاگة

-اييي والله وغرفتنه متنطب من دونك

-بكر: ههههههه اليسمع مگابلچ وگاعد

-حبيبييي امشي فوگ نسولف هاي اكو ناااس عيونهم صلفه ودتباوعلنه

تقصدت احچي هيچ لان نرجس چانت گاعده وتقصدت احظن بكر گدامهه حتى تعرف اني وياه ممتعاركين وعلاقتنه حلوة خاف تفربك قصص علينه، ماعرف منين اجتني الجرأة بَـس مستحيل اسمح تصير نقطة سودة عليه..

صعدنه للغرفه واني اللوب كل شويه تجيني كرفه ببطني، سألني بكر ؏ حال عميد الدين وزيد وحچيتله مختصر لان تعبانه ومابيه احچي..

للعصر اشتد الوجع عليه وگلت هاهيه يمكن رح اجيب، اخذني بكر للطبيبه وگالت بعد بيه مو هسة وگالت يجوز اسبوع ابقى ؏ هالحاله..

ثاني يوم ماداومت لان بكر بقى بالبيت تعبان وگال يريد يرتاح، سولفنه ويه بعض وحچالي ؏ شغلهم هناك وشگد عميد عنده خير من الله وديستثمر فلوسه بطريقه عبقرية..

ثالث يوم طلع للديوان وگعد بي اليوم كله رجع هلكان گال كل اليجي يسأل ؏ عميد الدين ويچذبون عليهم ويگولون مريض ومسافر، ماعرف ليش مگلولهم مسحور بَـس الظاهر ميردون احد يتشمت بي..

گظيت اليوم الوراه كله بغرفتي ماطلعت اله قريب العصريه گلت اسوي كيكة حتى نغير جو وبلكت الله ماطول عميد هسه هادئ وننجمع كلنه ونسولف يرجع نفس قبل..

انطتني ماما جدول امشي عليه اقره المعوذات واية الكرسي وبعد ايات اقراهن كل يوم الي يواضب عليهن ميمسه السحر وميأثر بي..

(قال لهم موسى ألقوا ما أنتم ملقون * فلما ألقوا قال موسى ما جئتم به السحر إن الله سيبطله إن الله لا يصلح عمل المفسدين* وبحق الله الحق بكلماته ولو كره المجرمون)

( وقدمنا إلى ما عملوا من عمل فجعلناه هباء منثورا )

( بل نقذف بالحق على الباطل فيدمغه فإذا هو زاهق ولكم الويل مما تصفون )

چنت اسوي بالكيكة واقراهن، حطيتهه بالفرن وطلعت بالحديقه اشتم هوا، لزمت سبحتي واسبح وانفخ ؏ البيت كلشي يجي ببالي اگوله كله ذكر الله ويطهر بيتنه..

اباوع للسما قربت تظلم الدنيا والسما خابطة اللوانهه تأسر العين وتهدأ النفس، والهوا عليل يلامس بشرتي ويدغدغهه بطريقه حلوه، ابتسمت من وصلت يم شجرة النارنج العدهم بالحديقه، قطفت وحده واشتهيت اكلهه، گشرتهه بيدي واكلت شيف صح حامض بَـس اعشق الحوامض وماهتم..

آكُل ومستمتعه بالاجواء ودعيت ربي يرجعهم لعافيتهم ويتشافون ونطلع من الكآبة الي دنعيش بيهه، رجعت للمطبخ استوت الكيكة انتظرتهه تبرد وطلعتهه وطلعت ببسي من الثلاجة وحظرت الگلاصات ورحت للصاله، صحت لخاله انتصار وگالت عميد ديبدل يكمل ويجي..

اللتمينه بالصاله كلنه شويه وطلع عميد لازمته رهف وامه من الجهة الثانيه، گعد ؏ القنفة وراحتله رهف وگعدت بحظنه وبيبي عاطت بيهه...

-حجية عطيه: ولچ سلبوووحة حنه شگلنه مو ماتگعدين بحظن ابوچ بعد

-رهف: حبوبه شمالچ انتي ليش تغارين مني

-حجية عطيه: دهرر ولچ ياهي التغار منچ چنچ سنجاب

-رهف: ايي اييي واضح ما تغارين وانتي كلما اصيحن لأبوي باباتي وحبيبي وگلبي انتي تعوجين بحلگچ وتغارين

ضحكنه ؏ سوالفهن عبالك ضراير وشگد يتناگرن وعميد مبتسم ويسمعلهن وحده تصد والثانيه ترد..

-عميد: وين غزاله؟

-هجران: بغرفتهه گالت شويه وتنزل

ثواني ونزلت من الدرج راحت طايره عليه باست ايده وحظنته وبچت، تفاجأت من حركتهه وشلون تحظنه بهالشكل وهوه حاوطهه ؏ الخفيف ويطبطب ؏ ظهره ويحچي بتعب...

-عميد: اششش بابا ليش تبچين حبيبتي بسچ غزاله لا تعبيني

رفعت راسهه الغايص بصدره وباوعتله بعيون دامعه..

-غزاله: صرت زين موو؟؟؟

-عميد: بفضل دعواتچ

-غزاله: والله عميدي ماطلعت من الحجرة بَـس ادعيلك واقرالك قرآن

عگد حاجبه وسكت ودار وجهه عنهه، صفننه ؏ حركته بَـس محد حچة، صبيتلهم واكلو وسوالف وضحك انتعش البيت شوية بَـس عميد كل شويه يسرح ويصفن..

مكان جواهر وشهد خالي صارلهن كم يوم ببغداد لان ابوهن تمرض وراد يشوفهن..

بَـس خطيه ماخليهه بنفس جواهر اتصلت عليهه كامرا وسولفت وياهه وصورتلهه عميد الدين من چان يضحك ويسولف ويه غزاله ورهف، خطيه گامت تبچي وتگول الحمد لله مبين زين..

-هجران: اي هواي تحسن من البارحة وحتى وجهه رد لونه

-جواهر: ياارب والله گلت لماما ورحت لموسى ابن جعفر قاصدته حتى يرجع مثل قبل

خالة انتصار سمعتهه بچت واخذت الموبايل تحچي وياهه، ثنينهن يبچن ويواسن بعض، انتصار گالت...

-انتصار: جوهرة شوكت تردين هاي رهف مشتاگتلچ

-جواهر: ان شالله حبيبتي الاحد اجي

-انتصار: هـلا بيچ يبعدي

خالة انتصار هواااي هوااااي تحب جواهر وتعاملهه كُلش حلو وياهه وتداريهه وتداري شهد ومتقبل تتعبهن ويشتغلن أي شي تگول انتن نخيتن عميد الدين وهوه موصي بيچن..

سدينه الخط وياهه واخذت المواعين واجت غزاله ويايه نغسلهن، مبينه مرتاحة وفرحانه من شافت عميد عجييب شگد متعلقة بي، سولفت وياهه شويه وقطع سوالفنه دخلة عثمان شلع الباب شلع گلت هاهيه انكسرت، چان يلهث ووجهه عرگان ومخطوف لونه، شايل ديچ اسود من رجليه رجف گلبي من منظره، صاح...

-عثمان: وينهي جده عطياات؟؟؟

يتبع☘️...

♛ ♛ ♛ ♛ ♛ ♛ ♛ ♛ ♛ ♛
حبايبي ما اقصد اخوفكم بَـس تعرفون وانعياذ بالله السحر والحَسد موجود ويدمر البشر واني ماتعمقت بالموضوع ومظهرتلكم الحالات الي اجتاحت عميد الدين وزيد بالتفصيل اختصرت الموضوع بكلام هجران فقط، الله يجيرنا ويجيركم من هالبلاء..
+
عذروني هالفتره اذا اتأخر عليكم بالنشر لان صحتي مو كُلش تمام ادعولي حبايب ولتنسون التصويت يعيونيي🦋.