شفاه مخملية الفصل الخامس وثلاثون 35 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية" 💋

بقلم: زهراء السلامي.

عُثمان يگول:
#جمال الاهتمام باصغر الأشياء❤️..

♛ ♛ ♛ ♛ ♛ ♛ ♛ ♛ ♛ ♛

"هجران"
دخل عثمان يهرول لبيبي وشايل الديچ بيده ويكت دم، ركضت وراه وغزاله هم اجت واجتمعنا احنه الثلاثة بغرفه بيبي..

-عثمان: جددة شوفي شلگيت

فزت بيبي من الچربايه وركضت عليه، صفنت ؏ الديچ وعگدت حاجبهه مستغربه...

-حجية عطيه: هاي شني حبوبه؟

-عثمان: لگيتو مشمور بنهاية الحديقه، هذا النه؟؟

-حجية عطيه: لاا يوم شني منيلنه هيچ ديچ

فرك وجهه عثمان بتك ايد ولازم الديچ بالايد الثانيه، صاحت بيبي بغزاله تجيب طاسه لو شي حتى يشوفون شنو سالفه هالديچ، رجعت غزل شايله الطاسه وبيبي مقبلت تبقى گلتلهه طلعي واني عادي محچت ويايه مادري ليش..

-حجية عطيه: جيبه عثيمن خليني اشوفن شني هالطرگاعه

انطاهه الديچ وحطو بالطاسه وبيبي تگلب بي وشهگت...

-حجية عطيه: خايب هاذ شاگين بطنه

-عثمان: اي عجل منين يطلع الدم وهوه مخنوگ

-هجران: بيبي مفهمت شنو هذا؟

-حجية عطيه: اصبري خليني افتهم انه اول

تگلب بي ومدت ايدهه بنص بطنه وتبحوش، لعبت نفسي من المنظر لان طلع كووومة دم ومصارين، اللتفتلي عثمان وهمس...

-عثمان: اذا ماتتحملين طلعي

-هجران: لا لا اريد اشوف

الفضول اشتغل عندي ومستحيل افوت هيچي شي، ديچ مخنوگ ومشگوگة بطنه وموجود بخلفيه حديقتنه ليش؟.. راسي افتر واني افكر وبيبي لسه تطلع بالمصارين والاحشاء الداخليه مالت الديچ، شهگت وگالت...

-حجية عطيه: دهر صابچ يا عطياات خايب عثيمن تعال شوف يبعدي

تقدم عثمان واني تقدمت وياه اشوف شنو، طلعت مثل الشي مستطيل وملفوف بوصله ماگدرت اعرف لونهه من وره الدم متلوخة..

-عثمان: جدة شَنو هذا؟

-حجية عطيه: حبوبه هذا سحر موش صح؟

-عثمان: ماعرف أنَا مافهم بهالسوالف

-هجران: بيبي يمكن اي لان اتذكر عمتي هم سحروهه ولگينه هيچي شي مدفون بالگاع ببيتهم

بيبي ظلت صافنه وعاگده حاجبهه وبارزه شفتهه السفلية مبين گعد تفكر، گامت من مكانهه واخذت هالمستطيله وياهه وراحت للحمام وصاحتلي وصاحت لعثمان..

طبت للحمام وگالت...

-تعالو شمالكم تنحرتو

دخلنه وراهه للحمام وگالت سدوا الباب حتى محد يسمع، كُلش انحرجت وتمنيت اطلع بَـس اويلي ويه فضولي.. ظلينه احنه الثلاثه بالحمام زين كفانه لان الحمام چبير..

-حجية عطيه: تعالو حبوبه اريدكم ترددون شني اگوله خووش

هزينه بروسنه اي وواحد يباوع للثاني، بدت تقره ايات وشغلات وتنفخ وتتفل واحنه نردد وراهه، فتحت الوصله وطلعت بيهه ورقة صغيره وشعر وسوالف مقرفه اشمئزيت منهه وعثمان عنكش وجهه قرفان..

فتحت الورقه بيبي وبيهه هواي كلمات ممفهومة واحرف متشابكة بَـس من ركزنه النظر تفاجأنه من ميزنه مكتوب اسم "رهف" وجواه احرف مثل الطلاسم، شهگت بخوف وگلبي گام يوجعني، بيبي حچت...

-حجية عطيه: حبوبه هجران تعالي ليه اريدچ تقرين شني اگوله خووش انتي بنيه مؤمنه وحبابه بلچن ينفك هالسحر ويردلنه عمييّد وزيود

هزيتلهه براسي وهيه تقره وتفرق بالشعر المقزز الموجود وتتفل ؏ الورقه، اخير شي گالت...

-طلعو بره بعد خلص دوركم

طلعنه اني وعثمان واحس حغيب عن الوعي، ماعرف ليش بيبي طببتني وياهه وطلبت مساعدتي، عثمان انتبه ؏ وجهي اصفر حچة بصوت ناصي...

-عثمان: تعالي ارتاحي شوي اسويلِك عصير برتقال؟

-گلت بسرعه: لا لا ماكو داعي

رحت گعدت بالصاله چان قريب اذان المغرب، ضحكت من تذكرت گالي يسويلي عصير يربي هالرجال ميسخر احد ابددد يعني بكل بساطة يگدر يگول لغزل بَـس هوه بطبعه ميحب..

اجت خاله انتصار تسألني شنسوي عشه واني دايخة فد مرة، مابيه احچي شي هيه متدري بسالفه السحر والظاهر غزل محچت لأحد.. گلتلهه بكيفكم نسوي التحبو وهيه راحت للمطبخ تطلع شغلات..

طلعت بيبي من الحمام عيونهه حُمر، راحلهه عثمان الواگف يم الباب ملهوف..

-عثمان: هاا جدة بشري؟

-حجية عطيه: هذا هوه يبعد امك ان شالله خلص الموضوع

-عثمان: صدك والله يعني عميد رح يرجعلنه؟

-حجية عطيه: تعالو بالحجرة نسولف

راح وراهه واني هم رحت اريد اكمل السالفه وافتهم، گعدت ؏ الچربايه وحچت بفحيح...

-حجية عطيه: اسمعني عثيمن حبوبه من الفجر تطلع للنجف تروح لگبر شيلاء وتحفر شوي وتدور يجوز السحر مدفون بگبرهه

-عثمان: زين ليش شفنه اسم رهف مكتوب؟

جرت نفس عميق وهزت راسهه متوعدة...

-حجية عطيه: عرفت منهي السوا السحر ايا مشعولين الصفحة

-عثمان: جدة فهمينه شصاير؟

-حجية عطيه: تعال حدر يمي واسمع حنه ميزنه اسم رهف وجوز اسم عمييّد هم موجود بَـس ما فرزناه وگدرنه نقراه بَـس اسم رهيفه سهل وطاحت عيونه عليه هذا ظني الاول والظن الثاني جوز مسوين السحر لرهيفة وطاح بأبوهه

-هجران: بيبي احس گاعده بحلم شو كلشي مدا استوعب

-حجية عطيه: ولچ سلبوحة السحر عالم ثاني وانه ياما سوولي سحورة ويه منصور وحتى وليدي عباس سودة بوجهي عليه اكل سحورة يابو سحورة واجه الدور ؏ وليده

-هجران: وتالي شلون فكيتوهن؟

-حجية عطيه: علمتني حبوبتي الله يرحمهه نقره ايات مُعينه واخر شي اختمه بنجاسه انجس السحر وينفك بأذن الله

-هجران: زين وليش احتاجيتيني؟

-حجية عطيه: حبوبه انتي مسچينة ومن اهل الله وحنه متروسين ذنوب فَـہ احتاجيت نَفس طاهرة وياي وماشفت غيرچ

-هجران: وليش مو غزاله؟

-هاي جاهله واخافن تتسودن علينه من تشوف هيچي شي

-هاااا

سكتت وبيبي ظلت تحچي ويه عثمان بَـس لسه دايخة كُلش، انتبهت عليه وراحت طلعت عصير راني من كنتورهه وانطتنيا گالت شربي هذا اكيد ضغطچ هبط، اخذته منهه وشربته وعثمان سألهه..

-عثمان: جدة منو المسوي السحر انتي گلتي تعرفينو؟

هزت راسهه بـ اي..

-حجية عطيه: اي اظن عرفت ايا مشعول الصفحة انداريت ؏ سوالف النسوان

-عثمان: بَـس لا تگوليلي قصدِك مروان وخلفتو وبالاخص ابنو الكلب ستاار؟؟

-حجية عطيه: چا ياهو غيره يريد يأذي عميّيد ويريد يحرگ گليبه ؏ بنيته مثلما حرگو گلبه ؏ شيلاء

-عثمان: جدة بَـس هالحكي صارلو سنييين

-حجية عطيه: حبوبه اليعشگ ما ينسى معشوگته للموت ومروان من عشگ شيلاء الله يرحمهه وخذوهه منه وهدوهه لعباس كسرو وهانو رجولته وحار شسوه بعميد تتذكر لو ماتتذكر حبوبي

-عثمان: اتذكر

اسمعلهم واني راسي يفتر هاي شديحچون...

-هجران: بيبي مافهمت زوجة عميد چانت عدهه علاقه بمروان؟

-حجية عطيه: لا حبوبه هاي سالفتهم سالفه، مروان چان حاچي بشيلاء وطالبهه من ابوهه عشگهه وهيه جاهله بت السبع سنين وكبرت وكبر عشگه وياهه، چانو جوارين بعض ويشوفهه كل يوم تهوبز وتلعب جدام عينه، كبرت شيلاء وابوهه رجال فقير ؏ گد حاله وصارتله مشكله واجه نخه سيد عباس وليدي..

حلاهه عباس للمشكله وابو شيلاء من فرحته راد يجازي عباس ويهديله هديه وماعنده غير شيلاء لا ولد ولا تلد غيرهه راح وهده شيلاء لوليدي..

-هجران: بيبي لعد شلون تزوجت عميد الدين؟؟

-سلبوحة لا تگاطعيني خليني اكمل ولچ معثورة

-اي اسفه بيبي كملي

رفعت عيني ؏ عثمان حاط ايده ؏ حلگه مبين خافي ضحكته من شفته ضحكت لا ارادي وهوه هم ضحك، بيبي عاطت بينه...

-حجية عطيه: ولكم مگامييع شنهي تضحكون عليّ

-عثمان: لا جدة منو يضحك عليكي كملي حبيبتي

-حجية عطيه: اي المهم.. فَـہ من هدو شيلاء لعباس الخوثة انتصار زعلت ببيت اهلهه گبت الغيره شيلاء حلوة وصغيره كلهه عمرهه 13 سنه بَـس شني من طول وجسم عليهه وهذا عباس الاغم مايگدر ؏ زعل مريته راح وهداههه لعميد الدين وهذاك اتخبل عبالك هدوله سعلوه موش مرة

-عثمان: جدة انتي تعرفين عميد يكره هالسوالف مال هدية وماعرف شَنو

-حجية عطيه: لانه اغم وساغط (ساقط) ومايفتهم

-هجران: ههههه اي بيبي كملي

-حجية عطيه: اي وين چنه هاا اي زفوهه لعمييّد وهذاك مطنگر وگالب الوجي (الوجه) وره اسبوعين واجانه خبر موت ابو شيلاء كاتلي بَـس ياهو محد يعرف.. مشت الايام ومادري شصار بعد شنو نسيت ولك عثيمن شصار؟

ضحك عثمان وكمل عليهه...

-عثمان: مشت الايام والمرحومة حملت برهف ومروان الحقير يلوب تقرب لعميدي وصارو اعز اصحاب يرحون ويردون سوا وحتى ببيتو يعزمو واكثر من مرة مرتو لمروان تعزم شيلاء ويظلو ايام وليالي عدهم، اثاري مروان النگس كان يحارش شيلاء ويحاول وياهه وهيه ماتنطي مجال وكانت تخاف وماگالت لعميدي بَـس گالتلو ماحب اروح لبيتهم بعد وعميد احترمو لرأيهه..

قوت علاقه عميد ومروان اكثر واكثر كان صاحب وَفيّ وهنا محد يعرف انو مروان الي قُتل ابوا (ابوها) لشيلاء انتقام منّو وراد ينتقم من عميد بكل الطرق وفعلاً انتقم من عندو بطريقه بشعه وشنيعه وماراح اگولِك شنو صار احترام لعميد مايريد احد يعرف

-هجران: زين اذا شيلاء مچانت تحچي انتو شمعرفكم؟

-عثمان: گبل موتهه حكت لعميد كلشي ومنا بدت الحرب بيناتنه

-هجران: عزاا خطيه هاي شنوو شهالحقد!!

-حجية عطيه: اي وما اشكن ولو ثانيه موش مروان المسوي السحر والعباس ابو فاضل هوَ

-عثمان: أنَا الو هالحيوان

-حجية عطيه: ولك عثيمنن والزهرة اذا اندگيت بي لا يغدر بيك يبعد حبوبتك

-عثمان: وترديني اسكتلو ؏ عملتوو جدة شبيكي انتيييي

-حجية عطيه: يا والغسسل صارلك چم شهر يمنه ماتعلمت تحچي نفسنه ابو شبيكي

طگيت ضحك وعثمان عگد حاجبه وباوعلي، سكتت گوة وهوه جر نفس وزفره بقوه...

-عثمان: استغفرر الله جدة عوفِك من كلامي أنَا متعود هيك من صُغري وثانياً محد گاللكم تركوني ببيت خوالي وأنَا ابن الخمس سنوات

-حجية عطيه: سودة بوجهك خليل من يوم يومك موهدني وحقد عليه الوليد

-عثمان: جدة أنَا ماحاقد ؏ بشر بَـس ابويه اذاني كثير

-حجية عطيه: اهئ اهؤ اهئ تعال يبعد حبوبتك احبنك (ابوسك)

جرته تبوس بي وهوه يضحك عليهه، اخير شي ختمت سنفونيتهه بعطسه رجتني وخلتني اني وعثمان ثنينه نفطس من الضحك، شالت عوچيتهه ورادت تضربنه بيهه وعثمان شال العوچيه وشمرهه وگال..

-عثمان: عليكي الحمزة لا تضربيني بيهه والله لسه اثار بظهري

-حجية عطيه: تستاهللل لان ساغط

-عثمان بخبث: بَـس بكر انكتل اكثر مني

گالهه ويرفع وينزل بحواجبه بخبث، ضحكت ؏ حركاته وهوه انتبهلي وبطل الحركة بسرعه، ترخصت من بيبي ولحت علينه منگول لأحد ان مروان وره السحر حتى منرجع الحرب بيناتنه..

رحت للمطبخ وبديت اشتغل واسوي بالعشه وغزاله اكلت گلبي تريد تعرف الموضوع حچيتلهه مختصر بدون ماذكر سالفه مروان بَـس گلتلهه بيبي لگت السحر، كملنه عشه وخاله انتصار اخذت صينيه لعميد وعمه دلال اخذت لزيد وعمه فتوح من العصر طلعت گالت تبات ببيت عيالهه يله همزين خلصنه منهه..

اللتمينه حول السفره واكلنه بهدوء وبكر كل شويه ينافخ وضايج ماعرف شبي، كملنه ورحت گبل للغرفه بدون ماغسل مواعين اريد اشوفه شبي ظل بالي..

اول مطبينه للغرفه وراح تمدد ؏ الچربايه واني رحت گعدت يم رجليه...

-بكر شبيك ضايج؟

-بكر: لعبانه روحي

-من شنو؟

-بكر: من كلشي هجرااان ليش هاي هم عيشه عايشيهه حنه!!

-هجران: حبيبي گول الحمد لله اكو ناس ماعدهم لگمه تآكُل

-بَـس حنه مو ماعدنه لگمة نآكل چان عدنه خييير من الله بَـس ابوي فلفسه ؏ نسوانه واكثر وحده اكلت سليمه

-شنسوي بعد هذا ابوك

-اخخ اخخخخ لو بَـس عثمان الچلب يحن عليّ وينطيني شقه من شققه والله اعيش ملك

-شلون شقه يعني؟

عگد حاجبه وخزرني بغضب هذا شبي ميتحچة، زئر بعصبيه...

-بكر: ورث امييي هجرااان ورث امييي عمااارة وراحت ببطن عثمان الحيوااان وهوه استفااد منهه واجر الشقق واشتراله عمارة ثانيه وعنده خيييير من الله خييييير

-لعد انته ليش محصلت؟

صفن بوجهي وطنگر نام ؏ ظهره واتغطه وگلي طفي الضوه، سويت شنو يريد وسرعان ما نام واني ظليت وحدي اروح واجي بالغرفه..

دايخة وخايفه كُلش ماعرف شبيه اخاف هذا السحر من فكيته اليوم يضر بنتي لو يضرني، جفاني النوم والخوفه دتكبر بگلبي انوب گمت اتخيل تطلع جنية وتدخل بيه واصير نفس زيد لو عميد.. لا دخيلك ياربي شسويي!!

لبست شالي وطلعت من الغرفه دعيت ربي غزاله بعدهه جوة حتى شويه اسولف وياهه وتروح مني الخوفه، فتت من يم غرفتهم وسمعت صوت مرتضى عالي چان يضحك بسرعه تعديت استحيت اسمع اكثر..

نزلت الدرج واني ماكو ايه قرآنية ماقريتهه، فكرت اروح للمطبخ واغسل المواعين بلكي التهي.. سمعت صوت دندنة جايه من المطبخ گلبي زادت دگاته ورجليه رجفت، عدت ادراجي وگعدت بالصاله وطلعت سبحتي واسبح..

اباوع لباب غرفه عميد الدين واتمنى يطلع صاحي ومابي شي، واندار ؏ غرفه عمه دلال لان زيد ينام يمهه واتمنى نفس الامنيه..

تعبت وظهري گام يوجعني من الگعده، گلت بسم الله ورجعت بالمطبخ، اخترعت من شفته وصرخت...

-يمااا هذاا انتتته!!

رفع عيونه المركزات بالكتاب ونزل نظارته الطبيه ؏ خشمه، سد الكتاب وتنهد..

-عثمان: شنو سالفتكم كلما شفتوني واخترعتو!

-هجران: لأن انته تتسحب وهادئ كُلش وحركتك خفيفه

-عثمان: بَـس أنَا گاعد وماتسحبت ولا تحركت

-اقصد بالايام العاديه

-مممم

رجع عيونه ؏ الكتاب ويقره بي، دورت عيوني بالمطبخ چان نظيف ومابي ولا ماعون عدا الماعون المحطوط ؏ الطاوله بصف عثمان چانت بي برتقاله مگشره مبين ديآكُل بيهه، تحمحمت وحچيت...

-احم شنو دتقره روايه؟

رفع راسه عليه ورفع الكتاب البيده وگال...

-عثمان: عندي امتحان

-هااا اني هم عندي امتحان باچر

-موفقه

-شكراً

ظليت احوم وافكر بسالفه مروان وخلفته، شو مدا تدخل بعقلي يعني اول مرة اسمع رجال مشورب يسوي سحر لرجال ثاني اني سامعه السحورة بَـس للنسوان وهاي سوالف البعض، ماتحملت بعد وسألت..

-سيد يصير اسألك شي؟

سد الكتاب وركز نظره عليه واشرلي حتى احچي..

-هجران: احم شوف اني ماقصد اشكك بكلامك انته وبيبي بَـس احس سالفه مروان چذبه

-عثمان: كذبه!!

سألني متعجب، اردفت بسرعه...

-لا لا ماقصد انته تچذب بَـس احس بيهه مُبالغه

-عثمان: ابداً مابيهه

-شلون؟

-هجران انتي ماتعرفين مروان اديشو خسيس

هاي اول مرة يصيحلي بأسمي ابتسمت وجاوبته...

-ادري وسامعه هواي تشعلون بي بَـس يعني معقوله هالهوسه كلهه علمود مرة؟!

تنفس بعمق وزفره بهدوء، هز راسه وهوه يباوعلي..

-عثمان: الموضوع مايخص بَـس مرة الكره والضغينه الموجوده بقلبو لمروان كارثه اختصرلِك الموضوع انو هوه مريض نفسي

-لعد ليش صادقه عميد؟

-عثمان: مروان تقربلو تا (حتى) يوصل لشيلاء

-اسفه بَـس شي غريب شنو قحط نسوان

-ههههههه يُبا انتي ماتعرفين الزلم شيسوون اذا حبو اخوان يتعادون ويتذابحون لخاطر مرة

-معقووله؟!

-معقوله ونُص! انتي سامعة بمقوله وراء كل حرب امرأة؟

-هجران: لا اني سامعه وراء كل رجل عظيم امرأة

ابتسم وهز راسه، حط رجل ؏ رجل وحچة بهدوء...

-صح لكن هذي المقوله مو دائماً صحيحة لكن اجزملِك ان حرب كامله تقوم لخاطر امرأة، حطي ببالك بجوار الحُب والكبرياء ضلع ثالث مكون من خمس احرف وهية (امرأة) تلاحمو وصارو مثلث يحمل ؏ اضلعه كوارث الكون!

-هجران: عززا العزانه هاي عود صدُك؟؟!

قهقه بخفة ومسح شعره، استرسل...

-بأسم الحُب اشتعلت حرب دامت 10 سنوات، وفق الاساطير الاغريقية القديمة، سموهها "حرب طروادة" وحددو التاريخيين انو هذي الحرب ممكن تتصنف من اعظم الحروب التي وقعت من اجل الحُب، والي راح ضحيتهه عشرات الالاف بسبب حب امير طروادة ويسمو "باريس" لزوجة ملك اسبارطة "هيلين"

-هجران: وتالي شصار؟

-تالي صارت حرب من دم راحو بيهه ابرياء وناس مالهم ذنب بَـس تا يرضي غرورو ويمسحو عارو ويسترجع زوجتو وتقول الاساطير صارت مبادلة وخطفو اختو لـ "باريس" خاطر يتساوو ويه بعض

-هجران: عززا يعني هاي من قبل الفصليه موجوده؟!

-ههههه اي صحح موجوده واخذو اختهم ومارسو وياهه ابشع انواع التعذيب بحُجة الانتقام وعانت وتألمت كثير خاطر اخوها الي عشگ زوجة عدوينو وتزوجهه

-وهاي المسكينة الفصلية شصار بيهه؟

-هذي حباها عشيقهه الي اخذهه ورادهه زوجتو بَـس هيه مارضت ورجعت المعاناة ورجع العذاب والاهانة وماتنازلت هالبنت وكُبر حبها بقلب الرجال الخطفهه وملاحظه كان امير وتمناها من كل قلبو لان شافهه بنت مُصرة وقوية وما همها شي ولا همها العذاب ولا تنازلت..

-وماتزوجهه بالنهاية؟

-لا ماقبلت اگولِك عاندت وراسهه يابس هالبنت ههههه

-هههههه وبعدين شصار؟

-عادي وره العشر سنوات رجعو حبايب وره ما تلاطمو وراحو ضحايا بگد شعرو لراسي

-هجران: اويلي من عدنه هههههه

-عثمان: ههههه اي والحمزة اويلي منكم انتوو

گال هالجملة وگام من الكرسي وراح لباب المطبخ يريد يطلع، صدُك انتبهت عليه مبدل ملابس طلعة، من شافني صفنت ومبين عليه متسائله گال...

-عثمان: أنَا طالع للنجف اشوفو بقية السحر بلكي نتخلص من هالمصيبه

-هجران: مو بعدهه الدنيا ليل وباچر مو عندك امتحان لازم تنام حتى تركز

ابتسم وحچة بهدوء...

-عادي متعود

ودعني وطلع واني رجعت صعدت فوگ، حاولت انام والحمد لله غفيت، گعدت الصبح سبحت وبدلت ملابسي وبكر وصلني وگال بالرجعه ارجع ويه عُثمان...

-هجران: ليش ارجع ويه اخوك انته وين رايح؟

-بكر: مو گاعد بالديوان اليوم جايين خطار من العمارة

-ذوله صدُك يحچون!! المن جايين اذا عميد الدين مريض؟

-بكر: محد يهتم

گال هالكلمة وگلي نزلي، رحت لقسمي وامتحنت شلون مچان حتى مالي نفس بَـس شسوي خوما ارسب.. طلعت للنادي واكلت شويه وشفت ميس گاعده وحدهه، من شافتني اجتلي...

-ميس: هلوو هجران

-هـلا حبيبتي

-ميس: شو گاعده وحدچ؟ شنو وين صديقاتچ؟

-ماعندي

وابتسمت بخجل، هيه هزت راسهه وگعدت بصفي ؏ الطاوله..

-هجران: وانتي وين صديقاتچ؟

-ميس: ممداومات اليوم مع العلم عدنه امتحان ادب تاريخي بَـس ميهتمون

-هجران: اي مبين امتحانكم صعب عثمان البارحة لليل گاعد يقره

-ميس: اويلييي منه هالسچاااچ شوكت ماتصل بي يگولي دا اقره وماگدر اسولف

-ههههه اي شاطر البارحة حچالي عن حرب طروادة

-ميس: هاااا ههههه اي يريد يتفلسف براسچ ويطلع شطارته

لمحنه عثُمان من بعيد لازم الكتاب مبين ديشوف اجوبته، ميس ضحكت واشرت عليه وگالت...

-ميس: هاچ استلميي يخاف يحصل خطأ

ضحكنه سوا وهيه اشرتله حتى يجينه، باوع لجهتنه وابتسم وحط ايده ؏ عيونه... تقدم ناحيتنه وبعد السلام ميس حچت...

-ميس: هااا بشر مية موو

-عثمان: لااا عندي خطأه وحده من وره عينِك

-ميس: ههه عززاا اني شعليه

-عثمان: المهم هسة يله هجران نرجع؟

-هجران: اي ماعندي شي

-ميس بعبوس: عثماان ويين مسولفنه بشي

-عثمان: ميخالف هجران تعبانه وماتتحمل الانتظار

-هجران: لا لا والله انتو ظلو سوه اذا تحبون اني اروح اگعُد بالحديقه

غمزلي عثمان وحچة...

-عثمان: لا يله انتي مو زين عليكي

افتهمت ميريد يگعد وياهه انقهرت عليهه، گمت وياه واني ضايجة ؏ ميس ليش هيچ يعاملهه هه كلهممم نفس الاسلوب يلبسونه ولا يهتمون بينه، اول ماركبنه بالسيارة اللتفتلي وگال بأبتسامه...

-عثمان: ممنون ؏ الريوگ اليوم

-هاا يا ريوگ؟

ضحك ورفع تك حاجب..

-عثمان: البيض والچااي والخبز كلو محظرتو

ضحكت ونزلت راسي خجلانه، قبل لا اطلع سويت ريوگ اله ولبكر انقهرت عليه لان محد عنده احساس ويسأله جوعان لو اصبلك..

-عثمان: ما كان الو لزوم تتعبي نفسِك

-لا عادي اصلاً اني سويت لبكر والك يعني ماتعبت نفسي

-عثمان: عاشت ايدِك

-الف عافيه

حرك السيارة ومشينه وهوه يسمع الاخبار، وهم طلعت اغنيه وطفه المسجل.. ظليت احوس اريد اسأل شبي ويه ميس مبينه البنيه تحبه وملهوفة عليه وهوه لابسهه، واكيد فضولي ماگدر يتحمل اكثر وسألت...

-هجران: عثمان ممكن اسألك سؤال

اللتفت عليه يباوعلي وابتسم لان بطبعي كله اصيحله سيد بَـس شكو هوه بعد يصيحلي هجران اني شكو ابقى بهالرسميه، رجع وجهه يركز بالطريق..

-عثمان: تفضلي

-اني اسفه ؏ تدخلي واصلاً ادري مو من حقي اسأل واحس عيب و...

-قاطعني: سؤالِك يتعلق بـ ميس

-احم اي ترا خطيه

تنهد بعمق وهز راسه..

-عثمان: ادري خطيه بَـس گلبي ما هواها

-يعني چنتو بعلاقة؟

-عثمان: ابد بَـس زملاء وهيه حاولت تتقربلي اكثر من مرة وأَنا احاول اصدهه بَـس البنت ما گاعد تفهمني

-او يجوز لان تحبك

ظل ساكت ويسوق بهدوء واني محروگة عليهه يربي اني شعليه بَـس حسيتهه نفسي من احب بكر وهوه ميهتم..

-هجران: زين شوف صادقهه يمكن تحبهه بعدين

-عثمان: ههههههه ماعترف بصداقة الولد مع البنت

-ايي نفس عمييد

-أنَا الي علمتو لعميد ؏ هالمبدأ لان نادر تلگين اصدقاء وواحد منهم يحمل مشاعر بارده تجاه الاخر

-بَـس عادي يعني هاي وحده ويانه عدهه صديق

-ايي؟؟

-اي عادي يمشون ويطلعون سوه ويضحكون وعلاقتهم صداقه مو اكثر

-وانتي تعرفي شَنو بداخلو؟

-بَـس مبين عليه كُلش عادي

-عثمان: هجران اكو شي لازم انتو البنات تفهمو ممكن الرجال يبينلِك انو انتي اخر همو ومايهتم وكأنك نكرة گدامو او جوز يعتبرك صديقه لا اكثر وهوه من داخلو مشعول جد جدو وميت ؏ نظرة منِك

-ترا احنه البنات هم هيچي

-عثمان: ادري واعتقد هاي طبيعة البشر عدنه غرور وكبرياء رغم حبنه بَـس ندوس ؏ گلبنه ونتجاهل وأنَا ماريد اتقرب لـ ميس تا ما اوهمها ؏ شي مراح يصير وأنَا ادري بروحي ميس مو من النوع المُحبب الي من البنات

هزيت راسي وسُكتت كلامه منطقي وصريح وخالي من التعقيد بَـس سالفه ندوس ؏ گبنه ونتجاهل هاي بعيدة كل البُعد عني، عندي من احب انسان لو بيدي انطي روحي ومن عافيتي مثل ما دا اسوي لـ بكر..

وصلنه للبيت وچان هاادئ خالي من الهوسة اكيد يخلو منهه اذا فتوح ونرجس مو هنا لو تذبين ابرة تنسمع من الهدوء، رجعت رهوفة من المدرسة وراحت تبدل ملابسهه واني صبيتلهه غده..

-رهوفة حبيبتي تردين تمن احمر لو ابيض؟

-رهف: أي شي

-هجران: تعالي حُبي أُكلي..

-رهف: شكراً هجران (عافتني وراحت وانه گاعده اضرب صفنات وافكر بكلام الزلمة الحاچاني گبل لا ارد للبيت، اكلت بساع ولبست شالي وطلعت اتسحب حتى محد يحس عليّ..

رحت للبستان چان الفلاح يشتغل ويحرث بالگاع، ختلت وره نخلة حتى مايشوفني، عصرت دماغي اتذكر كلامه بالمضبوط وشلون چان زعلان عليّ ودار حديث بيناتنه كالتالي...

چنت طالعه من المدرسة انتظر السايق وصاير يتأخر كالعادة فَـہ تعبت وگعدت ؏ الرصيف انتظر ولمحت الزلمة صاحب ابوي اليوگفلي كل يوم، تقدم عليّ وسلم...

-شلونچ رهوفة

-رهف: زينه

-هاا شو گاعده هين وحيدچ

-رهف: اي جاي انتظر عمو السايق

-هم تأخر عليچ هاذ شماله

-رهف: مادري والله صدُك تعبني

-هاا زين گولي لأبوچ يغيره

-رهف: بابا مريض ومايسمعلي

گلتهه ونزلت راسي ودموعي من وحدهن گامن ينزلن من تذكرت حالته، الزلمة ظل يلوب من شافني ابچي..

-رهف ليش تبچين؟؟ شصاير؟؟

-رهف: ماكو شي عمو روح

-والعباس ماروحن لمچان لحدما اعرف شمالچ

ظليت ساكته وفاجأني من همس...

-زعلانه لان ابوچ مريض وماجاي تعرفون علته؟

رفعت راسي اباوعله وهزيته بقهر، ابتسم خفيف وتقرب عليّ اكثر...

-شوفي رهوفة انه اگدر اساعدچ بَـس توعيدني كله تصيحيلي بأسمي عليچ الله ميت اريدن اسمعه من حلگچ

-رهف: عمو گتلك استحي

-لا لا وخري المستحه حبوبه

هزيت راسي وسكتت، ضحك وحچة...

-هاا يعني ماسمع اسمي هسّ؟

-انته ليش تلح حتى اگولن اسمك؟

-مو احب اسمعه منچ

-وانته شوكت سامعه مني؟

-مو لان ما سامعه ملهوف اريد اشوفن هم يطلع حلو نفسچ

ضحكت بخجل وهمست...

-ستار ساعد بابا

ضحك بمرح وحرك بقبظة ايده متحمس، گال وعيونه تلمع...

-اشتعل ستاار وابو ستاار

-هههه يله ساعد بابا انته مو گلت

-والعباس اساعده چا بت نفسچ گالت اسمي وترديني اردهه

-شلون رح تساعدني؟

-ستار: سمعي راح اعلمچ بَـس ماتگولين لأحد ابد فهمتي

-اي اي يله گول

-ستار: رهف اعتمدت عليچ انتي چبيره وواعيه اذا گلتي لأحد ترا ابوچ يرجع يمرض

-لا لا اسم الله عليه ماگول والله

-ستار: ماشي ترحين لبستانكم جوة شجرة التين تحفرين شوي وتلگين حجاب ملفوف بوصله خضره تاخذيهه وركض ترحين لحبوتچ وتگليلهه لگيت هذا مشمور بحديقتنه

-هذا شني الحجاب؟

-ستار: ماعليچ رهف اغديلچ فدوه اسمعيلي انه ماريدچ تتأذين رهوفة انه خايف عليچ

-زين وبعدين بَـس اروح لحبوبتي وهاهيه؟

-ستار: لا اصبري هسّ ترحين لحديقتكم بالزاويه تدورين ؏ ديچ اسود تلگي مخنوگ مامذبوح ومشگوگة بطنه هم تصيحين لأي واحد چبير ويجي يشوفه زين!

-واذا ماصدگوني وسألوني منين عرفتي؟

-ستار: ماعليچ انتي گولي چنت اللعب ولگيتهن

-وانته شمعرفك بهذا الشي؟

ظل يبلعم وانخطف لونه، حرك راسه وحچة وعينه مركزهن بعيني...

-ستار: شفت واحد نذل يدفنهم

-وليش ماگلت لأبوي بساعتهه؟

-اوووف رهف ماگدرت خلص لا تسألين يا عيني هسّ روحي وسوي مثل ماگتلچ يومين وابوچ يرد نفس گبل

-زين وزيد هم يصير زين؟

عگد حاجبه مغضب ونتر...

-ستار: شيخصچ بزيد انتي؟؟؟

-مو خطيه هم مريض

-ستار: ماعليه بي واصلاً هذا الزلمه الدفن العمل مايخصه بـ زيد الاعرج

هزيتله براسي وما اجه ببالي ولا واحد بالميه ستار يصير ابن مروان الچبير واصلاً هوه بنفسه الدفن السحر لأبوي خاطر يأذي ويكسره..

راح الفلاح وانه اراقبه وركضت ؏ شجرة التين، حفرت هواي ولگيت الحجاب مثل ما گالي ستار، ركضت للبيت ادور بالحديقه ؏ الديچ بَـس ماله اثر دورت ودورت ودورت لحدما مليت واذن المغرب..

رجعت للبيت وحبوبه گاعده تقره قرآن اخذتلهه الحجاب وچذبت عليهه گلت لگيته بالحديقه صارت تهلهل وتهوس فرحانه..

اخذته مني وراحت للحمام نص ساعه وطلعت عيونهه حمر خابطة، همستلي..

-حجية عطيه: روحي گعدي ابوچ خلي يصلي

-حبوبه يصيح بيه مايرضى

-حجية عطيه: لا روحي وين الله وابو الحسن يرضى

رحت لبابا چان نايم، حاولت اگعده وصاح بيه حتى اوخر عنه، عفته ورحت لغرفتي ابچي ماصار شي ولا تغير ابوي نفسه وينه اليگول ينشل لساني لو صحت بيچ لو كسرت بخاطرچ شو كل يوم يصيح ويكسر يخاطري ويكسرني وياه...

مرت اربع تيام وردن جواهر وشهد شكثر حاولن وياي حتى اسولف وياهن وارد طبيعيه بَـس ماگدرت ابوي طاح واخذ حيلي وياه..

بهالايام اداوم واشوفن ستار من بعيد بَـس يبتسملي ومايتگرب يگول اخاف الناس تحچي عليچ.. رديت للبيت ونمت بملابسي من التعب حتى غده ماتغديت..

صحيت ؏ اثر واحد يمسح براسي ويهمس...

-رهوفتي حبيبتي يله گومي...

غطيت راسي تعبانه اريدن انام صحت...

-رهف: رووووح انته ياهووو

ضحك وگال...

-عميد الدين: ديلا تاج راسي لا تعبيني

من سمعت تاج راسي گمزت هذا ابوووي حظنته بكل قوتي وهوه بادلني الحظنه ويبوس بيه، بسته بوجهه وع خدوده وع راسه وايده وحتى رجله بستهه وهوه يضحك، بَـس مو نفس حيله الاولي ومبين بعده تعبان بَـس مايهمني اهم شي رد ليه ورد يحاچيني..

طلعنه من الحجرة وعافني وراح لحجرته رحت وراه شفته طلع سجادته وگعد يصلي، گمت ابچي من المنظر وركضت اصيحن حبوبه وبيبي انتصار وكل البنات صارن يضحك عليّ وگالن حتى صلاة الظهر گعد يصليهه وسأل عليّ..

طرت من الفرح وحتى ماخليته يگوم يصلي العشاء گعدت بحظنه وحاظنته وابچي وهوه يسكت بيه، اشم برگبته هذا ابووي ردلي ابووي حبيبي سَندي وتاج راسي..

-عميد الدين: شني بابه رهف ماترديني اصلي

-رهف: لا اريد اريد يله بابا وانه اجيبن مصلاتي واجي

-عميد الدين: عفيه برويحة ابوهه

ركضت اجيبهن وصلينه سوا وكل شوي اگطع صلاتي وابچي، كملت الصلاة ورحت لعمه دلال اسألهه ؏ زيد گالت بعده تعبان والشبخ لسه يجينه كل يوم ويقره عليه..

دعيت ربي يرجعلنه وترجع حياتنه نفس گبل، نمت بليلتهه مرتاااحة وانه بحجرة ابوي يسولفلي ويقرالي قصة نفس گبل صح تعبان وگوة يحچي بَـس ما خلاهه بنفسي وقرالي..

گعدت الصبح ورحت بوجهي لجواهر چانت جاي تبدل تريد تروح لدوامهه..

-ام عيون چتاله شني رح ترحين للدوام؟

-جواهر بضحك: اي ابو بريص رايحة وانتي؟

-رهف: شو مابيه اروحن وعلي تعبانه

-انچبي وترحين گدامي تبدلين وتروحين مثل الشاطره واموتچ اذا ماجاوبتي بأمتحان باچر

-رهف: اهوووو قرتني ورح تظل تعييّر بيه

-جواهر: لچ هوه منو يمچ بَـس گلت جاوبي عدل لا اجي اجعمر راسچ فوگما هوه مجعمر

-رهف: نننننن خلي مجعمر ولا عندي كفشه

-جواهر: يسمووو كيرليييي شعري كييييرليي يالكائنااات (طلعت من الغرفه ورهف ويايه تضحك وتگمز هالبنيه مستحيل يجي يوم تكبر وتعقل، رحت للمطبخ چانت هجران دتسوي ريوگ وعُثمان وبكر گاعدين ياكلون، من شفت بكر ردت اطلع وهجران صاحت...

-هجران: جواهر تعالي حُبي تريگي

-جواهر: لا اني اروح للغرفه اراجع

-هجران: عوفي المراجعه تعالي أُكلي هسه

هزتلي براسهه حتى اگعُد تفاجأت من حركتهه وبكر هم تفاجأ بَـس عُثمان عادي ممهتم، رحت لآخر كرسي گعدت وجابتلي بيضه ورشتلي فوگاهه جبن مثل ما احب اكلهه...

-جواهر بضحك: ولكم لو هيچ النسواان لو مينرادن هم حامل وهم نادرة وهم تنگط نزاكه

ابتسم عُثمان وهجران هم ضحكت خفيف بَـس بكر يباوعلي معاجبه، رفعتله تك حاجب بمعنى اكو شي وهوه هز راسه ونزله كمل اكل وگام...

-بكر: يله هجران انه طالع

-هجران: الله وياك حبيبي ديربالك من الطريق

-بكر: صار محتاجة شي؟

گالهه ودار وجهه عليه عود شوفيني شلون مهتملهه والله هالرجال يضحك، هجران گلتله سلامتك وطلع..

-جواهر: عُثمان انته توصلنه صح؟

-عُثمان: صح

-جواهر: لعد ديلا هحرانه حُبي كملتي؟

-هجران: اي

طلعنه سوه وشهد ما اجت لان اليوم عدهم أُوّف وظلت نايمه، وصلنه للجامعه وتفرقنه كلمن لقسمه، حظرت اول محاضرتين وبالثلاثة طلعت لحديقه القسم اراجع المحاضره واجتني بنيه تركض، چانت تلهث ووجهها صاير احمر، سألتني...

-انتي اخت هجران؟؟

-جواهر: اي اني اختهه شبيهه؟؟؟

-البت طاحت بالحمامات واظنهه جاي تنزف

شهگت وضربت صدري، عفت ملازمي بَـس اخذت جنطتي وركضت لقسم هجران، لكيتهم ملتمين عليهه وهيه تنوح وتبچي من الم ظهرهه رحت عليهه احاچيهه وتفاجأت من گامت تصرخ...

-لچ جوووااهررر لحگيليييي حمووووت

يتبع☘️...

♛ ♛ ♛ ♛ ♛ ♛ ♛ ♛ ♛ ♛
قفلة حلوة مو كُلش قويه والي يگول البارت صاير مُمل ومابي احداث ارجع واگول هيه حياة يومية مو فلم هندي وكل بارت لازم حَدث وعَركة 😅🔥.