شفاه مخملية الفصل السادس وثلاثون 36 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت موفاجئ🙈 وترا كُلش طويل يعادل بارتين مگدرت اقسمه، راووني تفاعلكم الحلو♥️.

"شفاه مخملية" 💋

بقلم: زهراء السلامي.

جواهر تكول لعميد:
يلبيك هيبه تختلف
هيبه مضيف بنص السلف
يامحبسك ماجن عقيق اخضر جن سحر وبيك ذوبني اكثر
وياسبحتك سوادها من المرجان غرت منها لان غافيه بين اصابيعك وشبعانه حنان
هاك عيني وشوف نفسك شوف حقي لو كلت كل الدنيا ترخصلك ياشيخ كلبي وآمني وامان.. ♥️

♛ ♛ ♛ ♛ ♛ ♛ ♛ ♛ ♛ ♛

بعد مرور سنه...

-هجران: بكر بَـس اگعُد هنا

-بكر: يله تحظرو خلصونه

-شهد: يلللله واااحددد ثنيييين....

-عثمان: يولي اصبري، يول عميد خلصنه

-عميد الدين: ولكم اجيت اجيت

-حجية عطيه: ولچ فتوووح تعاي لا أيي (اجي) احوس بفادچ

اجت فتوح واجت نرجس وتحظرنه كلنه وحلاوة ركب الكامرة واخذنه الصورة وبنص الصورة زنوبة تقيأت ؏ بكر وصاح...

-بكر: اشتعلوو اهلچ بابه ماحلالچ تزوعين اله عليّ

-زينب: ماااماااااا

انفجرت بالبچي وعميد عاط ببكر لان صاح بيهه وبيبي شالت عوچيتهه وضربتهه ؏ رجلين بكر محد يرضى ؏ زنوبة حبيبة امهه، اخذتهه منه اغسللهه واسكت بيهه...

-هجران: ماماتي اششش زنوبتي اشش حبيبتي لچ ماما انتي شگد عايقه هههه

متسكت ادري بنتي حياله طالعه ؏ خالتهه جوري تريد طلعه واكيد ماكو غير...

-هجران: بابا عثمان تاخذ زنوبتك تطلعهه

-عثمان: يولي اذا أنَا ماخذهاا منو ياخذ بنيتي

اخذهه من ايدي وهيه چلبت برگبته حيل...

-دلال بضحك: اويلييي منچن شگداتچن وتموتن ؏ التخايم

-هجران: شفتي حظي عمه متنام اله عمهه يفرهه بالسيارة ويرجعهه

-عثمان: غير تدلل الحلووة قبانوو لهلوجه أنَا

-هجران: عثماان كله من وراك علمتهه ؏ الدياحة كله عمرهه سنة وتفتهم من نطلعهه

-عثمان: أنَا شدخلني هذا عميدي علمهه

-عميد الدين: خايبين وشكوو خلوهه تتونس الفريخة

ضحكنة وعثمان اخذ زنوبتي وطلع بيهه، هههه كالعادة يعلگلهه اغاني ردح بالسيارة وترجعلنه تهز..

اليوم عيد ميلاد زنوبة الاول والعائله كلهه منجمعه لان احتفلنه بي، وشهدتو شنو صار من اخذنه الصورة الجماعيه..

رحت للمطبخ ارتب العشه وانظمه واجتنه شهد رافعه طرف فستانهه وكافه ردانهه...

-هجران: لا لا روحي اگعدي انتي خطار اني اشتغل

-شهد: يااااا خاف عبالچ جاية اشتغووول لا داده لاا المختوبات ميشتغلن

-جواهر: گبرر اليسمع اول وحدة تنخطب ممصدگة

-شهد: مذغوووته (مضغوطه)

تسوي بيدهه حميصه وتضحك، ضحكنه ؏ تصرفاتهه وصحنه اني وغزاله وجواهر...

-الله يساعدك سلمااان

-شهد: شفااايتله اخذ مهنددسة نفسي هم جمال هم اخلاق هم رزانه وهم ثكلللل

-جواهر: شنو شنو شنو شنووو رزانه وثگللل؟؟؟ قصدچ رعونية وهيلگة

-غزاله: هههههه وانه اشهد

-شهد بضحك: روحو روحوو مذغوتييين

عافتنه وراحت وجواهر تحشش عليهه، اي اي لتنصدمون خلال هالسنه مصار شي مهم غير خطبة شهد لسلمان والصدمة چانت سلمان اخو عميد الدين الچبير!! اي صح ادري صدمة لان اني هم مچنت اعرف خاله انتصار (ام عميد) متزوجة وعدهه ولد قبل لا يتزوجهه سيد عباس..

چانت حامل بسلمان وتوفه ابوه وتزوجت وراه ابو عميد لان چانو يعشقون بعض وكم مرة راد يخطبهه ونهى عليهه ابن عمهه الي هوه ابو سلمان وتزوجهه بَـس ابو عميد عاند مياخذ غيرهه وسبحان الله مات ابو سلمان وتزوجهه وربى ابنهه سلمان واتخذه ابن اله...

الفرق بين عميد وسلمان سنة وشويه والحلوو طلع سلمان حاط عينه ؏ شهد وداخل وياهه بعلاقه لمدة اربع سنوات ومحد يعرف بالموضوع وانصدمو من راح وخطبهه من ابوهه وعرسهه الخميس الجاي وخابصتنه ختيبي وختيبي ههههه خبله هالبنيه...

رجع عُثمان شايل زنوبه تضحك وتلعب بشواربه...

-عُثمان: هجران عليكي الحمزة هاي منين متعلمه تجر بالشوارب واللحيه؟؟

-هجران: يااا هاي متعرف انته لعد منو هلس لحية ابوهه وشالهه من وراهه

-عُثمان: يولي صرگعانه اخخخ يولي لاااء

تجر بشواربه وتضحك، اخذتهه منه ونزلتهه بالگاع بعدهه هستوهه تتخطه وهيه قزومة وشويه دبدوبه تخبل..

سمعنه علگو اغنيه بالصاله وهيه واگفه بالمطبخ واشتغل الهز مالتهه...

-عُثمان: يُبا شَنو مكوكة بنتِك حصرة نعلگ شي لوما رگصت

-هجران: عزا بعيني شسووي غير انتتته عالگلهه اغنيه خالي وترگصهه عليهه

-عُثمان: اهووو كلشي وصحتوو عثماان الفسدهه

-جواهر: هههههه يمعود يله اني الفسدتهه

-غزاله بضحك: وانه اشهددد

-هجران: شو دروحي انتي حاظرتلي بَـس تشهدين ههههه

طلعو للصاله واني كملت ترتيب العشه ورحت لجورية البارحة اجت من بغداد وخطيه تخربطت بالطريق وتصيح راسي ودايخة، چانت متمدده ؏ فراش بيبي ورحت عليهه شايله گلاص نومي حامض..

-هاچ جوريتي گومي شربي هذا

رفعت عيونهه تباوعلي وابتسمت، اخذت الگلاص من ايدي وشربت العصير..

-جوري: الله هجراان شگد مشتاقه لدلالچ

-هجران: هههه يله بهالكم يوم اشبعچ دلال

-جوري: اووف راسي لچ حيطگ شبيه اني

ضيگت عيوني واباوعلهه حتى مجاي تگدر تسند نفسهه من الدوخة وابنهه يبچي بالصاله سطرنه...

-هجران: جورية خاف حامل

انتفضت وصاحت...

-فاااال الله ولا فااالچ اني علاوي وگوة متحمله

-هجران: لعد شنو سبب هالدوخة واللعبان نفس من البارحة لليوم؟

-جوري: لچ صارلي اسبوع هيچ

دخلن جواهر وحلا (اخت عميد) وحلاوي هلهلت...

-حلا: چا حاامل يبعد خيتچ

-جوري: اسم الله اسم الله

-جواهر: يااااي حيصير عدنه بيبي جدييد

-هجران: الله امووت ؏ الجهال الصغاار يله جورية حيبيلنه نونو جديد

-جوري: ولچن يباااووو وخرن عنييي

گامت تركض بره صارلهه سنه نفس حياتهه عايشة ببغداد هيه وفيصل وعمتي وعمي، متغير شي او يجوز احنه منعرف التغييّر وهيه حابه تسولفلكم شصار وياهه او شنو حيصير..

طلعت للصاله چانت زنوبة بحظن عميد وتهز وحدهه يربي هالبنيه فضحتني الي يشوفهه يگول النهار كله شاده وصله ؏ خصري وارگص وتعلمت مني، ماتحملت المنظر وتنرفزت حيل صحت بيهه...

-ولچ زييينببب اني شگلتتت

باوعلي عميد مستغرب ونزل عيونه ؏ زنوبه الي برطمت وع ساعه تنفتح اذاعتهه...

-عميد الدين: هجران شمالج ويه البت؟

-هجران: فضحتني شوفهه شلون ترگصص

-عميد: واذا بعدهه صغيره تكبر وتفتهم وتبطل

-لا عيب شلون خاف تظل هيچي!!!

ضحك وصاح...

-عميد الدين: يوووم.. يمممةة تعاي وينچ

اجت خاله انتصار تركض..

-انتصار: ها حبوبي

-عميد بغمزة: شلون چانت رهوفة بعمر زينب

ضحكت خاله وحطت ايدهه ؏ حلگهه...

-انتصار: خاب چانت شعّارة بنيتك ههههههه

ضحك وياهه واني صافنه شنو يعني شعارة؟ چنه افتهم عليه لان اندار عليه وگال...

-عميد: رهوفه چانت ما تهيد صبح ومسى ترگص حتى ماتخلينه ننام وامهه چانت نفسسچ بالضبط تدگ وتلطم تخاف الوادم يحچون عليهه

-هجران: بَـس صحح يحچون علينه احنه لان الطفله مگظية النهار كله ويانه

-عميد: صح بَـس شنسوي رهف حتى كتل امهه تكتلهه بغيابي ومايفيد وياهه

هزيت راسي يأسآنه يعني هاي رح تظل هيچ يربي، صبينه العشه واللتمينه كلنه حول السفره وضحك وسوالف وزيد وحلاوة واحد يصد والثاني يرد، الحمد لله زيد رجعتله عافيته وره ست اشهر من العلاج الروحاني ويه شيخ ووره ما عمه دلال نگظت تعب وصايره حتى مابيهه تمشي عبالك كبرت عشر سنوات...

-زيد: محمد عليك الله باچر نروح نحظر اللعبه انتو تباتون هنا صح؟؟

اندار يباوع لجواهر وشهد..

-شهد: اني ماعندي مشكله واخذ اجازه من شغلي اذا تحبون نبقى بعد كم يوم نغير جو

-جواهر: لا اني ارجع للاقسام

رهف انتفضت..

-رهف: جوااهرر انتي مو گلتي ارد لبيتكم يلله رديي شني هاي بآخر سنتين من دراستچ وطلعتي اقسام

جواهر مدنگة راسهه وتآكُل بهدوء، رفعت كتافهه وگالت...

-جواهر: هذا الموجود رهوفة

-رهف: ماااا مارضى بااباا گللهه تردلنه

عميد عظ ؏ شفته حتى تسكت رهف لان جواهر حسيناهه كُلش مخنوگة وع ساعه تگوم تبچي، وصدُك گامت من السفرة وطلعت للحديقه ردت اگوم وراهه بَـس اللتهيت ويه زنوبه الي لوخت عثمان بالروبه...

**

"جواهر"
صارلي اربع اشهر عايشة بالاقسام الداخليه، لا نومة بيهه خير لا اكله بيهه خير لا نظافه لا ترتيب يعني كشكل عام عايشه بنص الضيم.. كل هذا يهون ولا ارجع لبيت اهلي يم طلال الچلب الي رجع يحارشني ويتقرب مني..

بالعطة الصيفيه من نجحت للرابعه رجعت لبيت اهلي وياريتني مارجعت، كلما ماما وبابا خفارة طلال يرابط باب غرفتي ويسمعني اشكال حچي غزلي مُقزز اتوقع يسمعو لبنات الليل وفردوس كالعادة متعرف وحتى لو عرفت ماتوقع تهتم، چانت اسوء شهرين ونص بحياتي كرهت اهلي وحقدت ؏ ماما وبابا لان عايفينه ويه وحوش ولا اهتمولنه...

طلعت بالحديقه اشتم هوا واحرر دموعي اريد ابچي اريد اصرخ اريد اطلع البداخلي متت احس روحي انتهيت والدنيا ظلمت بعيوني..

گعدت ؏ المرجوحة وبچيت بحرگة، بقهر، بحسرة.. اريد أمآن اريد احط راسي ؏ المخده واحس اكو انسان يريدني ويحتظني ويكون بجانبي مليت من الوحدة ومن البهذله، غسلت ايدي من عميد الدين لان لو چان يريدني چان تقدم بخطوة تجاهي لو ؏ الاقل يوضحلي، غمضت عيوني وافكر بالخاطب الجديد الجايني..

هه هاي تاليتي اروح لأخو طلال النگس واليذبح اكثر ماما وبابا راضين بَـس لأنه دكتور ويگولون كبرتي وع ساعه واحد بينه يودع منو الچ بهالدنيا...

تچيت ظهري ؏ المرجوحة واباوع للسما واستمع لصوت اوراق الشجر يتراطم ويه بعض، جريت نفس عميييق وغمضت عيوني، فتحتهن ؏ صوت مميز ابتسمت لا ارادي من سمعته...

-ترضين اگعد بحدچ؟

هزيتله براسي اي واجه بصفي بيناتنه يكفي نفر، سحب نفس عميق وهمس ووجهه لسه مستقيم..

-ليش تبچين؟

-مبچيت

-واضح

دار وجهه يباوعلي ورافع تك حاجب، ضحكت ؏ حركته وحچيت...

-يمته باچيه هاي شبييك

-عميد: ابد والخشم كرزه من الحمار والخدود تفاحات

-ههههه لا صدگ مبيه شي

-عميد: خوش عود نحاول نصدگ

-ههههه بكيفك

هز راسه وسكت لدقائق، رجع گال..

-عميد: الجو برد صح؟

-جواهر: المفروض يحتر يا شييخ مو يبرد

-هههه شمالچ اريد اخلق حديث

ضحكت بخفيه..

-خلقه بشي منطقي

-عميد: دهرر لسانچ لساانچ ماگدرلچ

-اووي شبي لساني حبيبي

ضحك وفرك وجهه، تچة ظهره وطلع جگارة وصحت...

-لاااا حبااب لتدخن يمي والله ماتحمل

-عميد: چا وين ادخن

-عوف هالسم عووفه والله يأذيك

-مايهمني

سكتت وهوه رجعهه بجيبه، اخيراً نطق بالمفيد...

-عميد: ما ناويه ترديلنه؟

-چؤ (لا)

-عميد: ليش؟

-جواهر: لان كافي

-كافي؟؟

سألني مستغرب وعاگد حاجبه، انداريت عليه وكملت....

-جواهر: اي كافي شنو معناتهه عايشه ببيت رجال غريب، اوكي قبل گاعده هنا لان خالة سلمى عايشه وياكم بَـس هسة طلعت واني عيب ابقى اكثر

-وياهو گال عيب؟

-الكللل يگول عمييد حتى هجران وعمه دلال وبيبي اشوفهه بعيونهن ؏ أي اساس اگعد ببيت ناس غُربة؟!!

-هاااا هسّ صرنه غربه وسفه والله

-مقصدتهه بهالشكل بَـس ماريد اسبب احراجات اكثر الك والي ولهجران

-عميد: انتي تدورين تدورين وتردين ؏ هجران بويه هيه شيخصهه؟!!

-يخصهه لان زوجهه مو راحة

بلع ريگه وزفر قوي...

-عميد: من يوم سالفه فردوس من چنه ببيتكم انه مو دگيت ؏ صدري وكتلچ ما يندگ بيچ؟! گلت لو ماگلت؟؟

نزلت راسي..

-جواهر: گلت

-وبكر جاسچ؟؟؟ سمعچ حچي يغث؟؟

-لاء

-حلفي

-وغلاة شهودة

-خلص انتهى الموضوع ليش جاي تأذين روحچ ونفسيتچ وگاعده بنص الزبل خاطر واحد نكرة

-شنو يا زبل؟

-الاقسااام جواهر الاقسااام انه عشت بيهن شهررر وماتحملت وانه زلمه شلون لو انتن البنيات ومتعلمات ؏ الترتيب والنزاكة والعيشه الحلوة الكريمة

-عادي اتعود

-اي واضح تعودتي شوفي شكلچ شلون ذبلانه!!

سكتت ما جادلته ردت اغير الموضوع بلكي يهدأ، گلت بغصه...

-شوكت عرسك؟

شو هذا ثار عليه وانگلب بُركان، عاط بوجهي...

-عميد: مارااح اصخممم

-شبيك تصرخ عليه

-عميد: لان انه وين وانتي وين ومليت ياهو كظني وگال شوكت عرسسك عميييد خلينه نفرح بييك عميّيد نريد نشوف وليدك من انعل ابو وليدي زيييين

گام وعافني ياا هذا شبي تخبل عليه يرادلهه كل هالعصبيه هسة اني شگلت..

گمت ورحت للبيت للغرفه القديمة الچنت انام بيهه اني وشهد چانت متمدده ؏ الفراش وتحاچي سلمان كالعادة ارببعه وعشرررين ساااعه التلفون بأذنهه ويحچون ويه بعض!!

-جواهر: شهد نصي صوتچ اريد انام

-شهد: متنامين منو لازمچ

-جواهر: صووتچ عاالي

-شهد: اهووو جواهر شبيچ انتي دا احچي ويه ختيبي

-طاح حظچ وحظ.....

سكتت لان صوتي چان عالي ومبين سلمان سمعه لان شهد فتحت مكبرة الصوت ووصلني كلامه...

-سلمان: هااا هااا جواهر طاح حظي موو وسفه عليچ مارجيتهه منچ

صحت بصوت عالي حتى يسمع..

-اسفه سلمان بَـس خطيبتك لعبت نفسي

-سلمان: لاه لاه شهدي شني ليش تضوجين صاكة البنات

-شهد: سلماااان اني اعلمممك تزحف ؏ اختييي

-سلمان: هههههه خايبه اتشاقه شني حرام نضحك وياچ

-شهد: اكرررهك تدرييي

-سلمان: هيهيهي وره اكرهك الف كلمة احبك تدريين

-شهد: هه منو يگول

-سلمان بثقه: عضيدي يگول

-شهد: اييي هوه عميد صاير معلمكم شنو يگوللكم تسووا

-سلمان: چا ليش مانسوي اذا خوش زلمة وفاهم الدنيا صح شني غلط اذا مشينه بنصايحه وثانياً ماسمحلچ تحچين عليه هذا الروح والريه عميد الدين

-شهد: والله اغار منه شگدما تحبه وتحب عُثمان

-سلمان: اويلييي عُثمان الساقط مشتاگله وعلي يله مابقه شي ونتشاوف ونرد مثل گبل الضلوع الثلاثه

ظلو يسولفون وهاي اختي العوبه متقبل تسد المكبرة علبو تعبت واذني حمت، استغفرت وقريت السور القرآنية الي عميد علمني عليهن "القلاقل الاربعه" (التوحيد والفلق والناس والكافرون) الي يقراهن قبل النوم ميمسه انس ولا جن بضرر وعلمني اقره سورة "التكاثر" تخفف من ضغطه القبر وعلمني استغفر كم مرة حتى تنزاح الذنوب الي ؏ صدري...

عميد الدين بالنسبة الي بحر من العلم والمعرفه عنده ثقافة دينية وثقافه عامة يفتهم بهواااي شغلات والسبب يرجع لأبو الله يرحمه چان يعلمه ؏ كلشي وهوه علمني وعلم شهد ورهوفه وغزاله..

گعدت الصبح ورحت گبل للمطبخ چان عُثمان ديتريگ وهجران واگفه تغسل مواعين وخاله انتصار گعد تعجن، اخذت مكان عمه دلال من مرضت وكلشي تسوي بدالهه..

-جواهر: صباح الخير

ردولي الصباحية وهجران حچت بحماس...

-حوهرة گُعدي اسويلچ ريوگ

-جواهر: لا حُبي اني اسوي شبيه

-هجران: هههههه لچ انتي چاي متعرفين تسوين

-جواهر: هففف هجراان ليش تفضحيني گدام عثماان

-عُثمان بضحك: لا لا ماسمعت كنت ساد اذاناتي

-جواهر: استغفرر الله ضجتت

-هجران: يبووو شگد تتنعوص هالبنيه تعااي ولچ اني هم متريگت خلينه نآكُل سوه

گعدت ؏ الميز وهجران طلعت اجبان وبيض وگعدنه احنه الثلاثي نآكُل وعثمان كل شويه يسأل ؏ زنوبة وهجران تگوله نايمة اخر شي بزعت وحچت بضحك...

-هجران: عُثمان والله ناايمة ناااايمة من تگعُد اذبهه ؏ گلبك انته تهتم بيهه زييين

-عُثمان: ههههه ماشي يولي اشتاقيتلهه هالصرگعانه

-هجران: ههههه هيه هم تشتاقلك وتريدك

ابتسم وظل ساكت، ماطولنه دقايق نآكُل واجت لأمهه فاتحة اذاعتهه تبچي وعيونهه حمر صايرات، گامت هجران..

-هجران: يممة سوده بوجهي ماما شلون نزلتي الدرج

زنوبة تأشر ؏ الصاله مدينه روسنه شفنه غزل جاية بأتجاهنه يعني هيه النزلتهه..

-غزاله: سمعتهه تبچي وجبتهه

-هجران: عااشت ايدچ

-غزاله: چا غير هاي توأمي

ضحكنه لان فعلاً بت هجران نسسسسخة مُصغرة من غزاله اليشوفهه يگول بت غزاله مماخذه أي شي من امهه، نفس الشعر الناعم الكستنائي والعيون الوساع السود وخشمهه دگمة بَـس حلگهه يشبه حلگ ابوهه وحنطاويه ؏ بكر..

اخذهه عُثمان من امهه وطلع بيهه كالعادة يفرفرهه بالسيارة ويشتريلهه نميات ويرجعون، هجران تگول كللل يوم يطلعهه ولا يمل ولا يحزع من بچيهه واصلاً حتى زنوبة متعلقة بي كُلش وصايره تشوفه اكثر من ابوهه لان بكر دائماً ببغداد استلم الادارة وية فيصل ومن هجران گلتله تروح وياه مقبل وگال تبقى هنا حتى يلملم روحه ويشتري بيت ويستقرون سوه...

غسلت المواعين وخاله انتصار طلعت تنظف الديوان وهجران وغزاله گعدن يشربن چاي واجت جوري هم طلعتلهه اجبان وگعدت تآكُل، حياة حلوة وبسيطة والموجودين بالمطبخ كلنه نحب بعض ونريد الخير لبعض الااا شخصصص وهالشخص هستوه دخل وصاحت بعرامة...

-فتوح: هااا خايباات شنهييي شو ماگلتن نسوي لعمتنه ريوگ

-غزاله: تدللين عمه هسّ اسويلچ

-فتوح: اييي عفيه ببنيتي الحلووة احسن من السـ*** الگاعدات هين يآكلن ويمسحن ايدهن بالحايط

بهاي جملتهه ودخل عثمان للمطبخ من شافته صارت تبلعم وعبالك انبلع لسانهه وهوه چنه ماسمعهه لان دخل يضحك وزنوبة تجرجر وتكفش بشعره..

نزلهه بالگاع وراحت لأمهه واخذتهه وصعدت بيهه فوگ وهوه هم طلع من البيت وغزاله وجوري كلمن راحت مكان بقيت ويه فتوح العرمة وحدنه، تقربت عليه وتحچي بخبث...

-فتوح: هاا ولچ شو رديتيلنه لو ماشبعتي من حظن الزلم الي بالاقسام وتردين زلامنه

-جواهر: مممم لا والله بَـس عميدييي يريدني ارجع هنااا ؏ گلب بعض الناااس

-فتوح: هيهيهيهي شني شنيي تردين هين خايبه انتي ماتستحين ولو ادري بيچ گحـ** نفس اخيتچ وطحتي بفاد عميد الدين

-جواهر: والله گعدت ؏ گلبه لو لا انتي ليش مضغوطة؟

-فتوح: مامضغوطة ياهو گال ولچ نرجسسس تعاي سمعي الساقطة شتگووول

ثواني واجت نرجس تركض تكيّف ؏ هالسوالف، صفت بصف امهه واندارت عليه...

-نرجس: يوووم عوفيهه هاي متعلمة من اختهه الگحـ** وجايه ؏ زلامنه تريد تفرگ بينهم وبين نسوانهم مثل ما اختهه شهد خذت سلمان ولافت عليه

-جواهر: حتمووتن من القهر لان شهودة انخطبت لدكتووور جراح وميتاات چانت عيونچن عليه وتحومن حواليه شفتن فلستن من عميد وانداريتن ؏ سلمان

-نرجس: ولچ سااااقطة والزهرررة اليوم انعل **** ؏ ***** من يوم ***** بت ال**** يا ******

نزلت اشكال مسبات واهاين وتحچي عليه وع شرفي، لأول مرة بحياتي حسيت بضعف وحتى مالي طاقه اجاوبهه، اجن هجران وجوري وشهد وصارت عركة چبيرة وبيبي عطيه تدخلت وناس تصد وناس ترد بَـس اني واگفه محچيت شي انجرحت كُلش من كلامهه وفعلاً ماحچت غلط صدوك اختي ساقطه ومن رجال لرجال ونهايتي مبينه نفسهه...

**

"هجران"
بحياتي ماشفت هيچ عرامة ووكاحة، نريد نسكت فتوح ونرجس وهنه مستمرات انوب گامن يفشرن فشاير بحياتي مسامعتهن ولا ادري الهن وجود، تفاجأت من ردة فعل جواهر لان كلللشي محچت ظلت ساكته وعيونهه مدمعه، ماتحملت الموقف ولا جوري تحملت وصاحت بيهن...

-جوري: كاااافي لا والله اروح اتصل بفيصل يگول لعميد الدين ويلعب بيچن طووبة تدرررن هوه ميقبل ؏ جواهر وشهد لانهن دخيلات عنده

وحچي مني ومن جوري ومن نرجس وبيبي عطية ختمت العركة من صاحت بعلو صوتهه ورادت تضرب نرجس بعوچيتهه ؏ ظهرهه وتفلت عليهه وسبتهه وسبت تربيتهه السز،، جرينه حواهر واخذناهه للغرفه وحاولنه نحچي وياهه وهيه ساكته محچت شي غير...

-بنات اني تعبانه اريد انام

-جوري: حُبي جواهر لتهتمين الهن ذني الادبسزيات خيولن بايعات المستحة

-جواهر: لا خيولن معليه بيهن بَـس تعبت واريد ارتاح شويه

سوينه مثل متريد وطلعنه من الغرفه وراحت جوريه تمدد وترضع ابنهه واني هم اخذت زنوبة ووكلتهه سيريلاك ومتقبل اله تريد ترضع، صعدت لغرفتي وافكر شلون بيهه هالبنيه والله ممروده مرد عليهه..

نامت زنوبة وغطيتهه وعفت باب الغرفه مفتوح حتى اسمعهه خاف تگعد ووصيت غزاله عليهه لانهه دتنظف الفوگ..

نزلت سويت غده وجوري وخاله انتصار عاونني وكملنه بسرعه، اجو الزلم وغسلت الارضيه وراهم، تغدو ومحد حچة بشي وكأن مو قبل شويه صارت عركة شكبرهه، اتصلت ببكر گال هستوه دخل بغداد ورايح گبل لبيت جوري يرتاح، صعدت فوگ ووكلت زنوبه شوربتهه وسبحتهه واجاني اشعار من عُثمان كاتبلي...

-💬عُثمان: زنوبة نايمه؟

جاوبته..

-لا هسة ادزهه

دزلي ايموجي اوكي (👍🏻) نزلتهه اله وچان بغرفته والباب شويه مفتوح واني الثواله نزلت عليه وفتحت الباب ؏ وسعهه وصحت...

-عثمان حباب خلصني......

سكتت لان چان جاحظ عيونه وواگف گدامي مجرد من القميص بَـس لابس بجامه، من التوتر والخزي ماعرف شلون اطلع وانضرب اصبع رجلي الصغير بالباب حتى ماهتميت للوجع ذبيت زنوبة بالگاع حتى خاف يتصل بيه اجيبهه اله مالي عين اجاوبه، ركضت فوگ لغرفتي اللطم...

صخااام بوجهييي شلوون افتح البااب هيچيي انييي هاي اوول مرة اتجرأ وافتح باب غرفتته سوودة بوجهي ؏ هالفشلله هسة شيگول علييه..

نمت ؏ فراشي ومن القهر غفيت گعدت بالخمسه العصر، دورت بالغرفه زينب مالهه اثر بالغرفه، كتبت لبكر رساله وصلتله بَـس مشافهه..

نزلت جوة ونسيت الفشله مآل عُثمان فَـہ ماخليت ببالي، سمعت صوت زنوبة جاي من غرفه بيبي اكيد عمه دلال دتلعبهه، استغليت الوقت ورحت للمطبخ اسوي كيكة ضايجة واريد نگعد لمت بنات ونآكُل سوه..

حطيت الكيكة بالفرن وبيدي ملزمتي اقره بيهه عندي امتحان وحايره بي كُلش صعب، طلعت الكيكة وحظرت ببسي ورحت لغرفه جواهر توقعت البنات ملتمات بيهه بَـس طلعت نايمة، عفتهه ورحت لغرفه بيبي چانن گاعدات هناك وعمه دلال بحظنهه زنوبة وخاله انتصار تكرز حب، غزاله وشهد يحششن ؏ جوري وهيه معانده متقبل تسوي تحليل حمل تخاف تنصدم بالحقيقه...

گعدت وياهن بَـس احس روحي مو تمام وبطني توجعني كُلش يمكن استبردت، سولفنه وبيبي تسولف وساعه تبسمر بينه، فجأة وشفنه مرجانه طبت علينه، شهگنه من شفناهه وبيبي عاطت...

-حجية عطيه: يا والغسسسل سلبوحات شني بعدچن تخافن منهه

-هجران: لا بيبي بَـس اخترعنه شلون طبت هيچ

-دلال بضحك: چا عادي هاي من اهل البيت

-انتصار: عمه مو اخاف رهف تخترع منهه ويصيرلهه شي

-حجية عطيه: لا ماتخترع شحدهه

ضحكنه وعفناهه تصفگ لمرجانه وتغنيلهه، اوقات احس بيبي اكو شي بعقلهه لان حاطه بالهه وبال مرجانه بَـس عمه دلال گالت من قبل چانت هيچي ومرجانه تصير بت صخلتهه الاولى وذيچ ماتت ولزمت عليهه حداد..

اندگت باب الغرفه واجوي الولد (عميد الدين، مرتضى، عثمان، فيصل) تسالمو وعميد تخبل من شاف مرجانه وبيبي بعد متعرف وين تظمهه گامت تلطم ؏ وجهها وتصيح...

-حجية عطيه: يباااااووو يفاادي يبااااو يعباااس يبنييي ابنك يريد يذبح مريانتي

-عميد: حبوبه انه ما مانعچ تشوفينهه بَـس هالصخلة ماتطب للدار

-حجية عطيه: يباااوو عثيمن حاچي قنعه يروح حبوبتك

-عثمان: جده طلعيهه وماعليچ أنَا اقنعو لعميدان

-عميد: شني تقنعني ولك انه حالف اذبحهه

رجعت تلطم واني گوة لزمت روحي من الضحك، گمت اجيب الكيك للولد ومرجانه طلعت ويايه تركض خرب يومهه حتى الطريق تندله، طلعت ببسي وكيك ووديته للغرفه بعدني موصلت الهم وشفت جواهر تطلع من غرفتهه تفرك بعيونهه ضحكت وگلت...

-صح النووم يحلوة

-جواهر: صح بدنچ

-هجران: تعاي ويايه اودي عصرونيه للزلم

-جواهر: يله

حسيتهه ضايجة وردتهه تغير جو لان سوالف الزلم حلوة ويضحكون ويحششون من يگعدون ويه بعض خصوصاً عميد وعثمان يصنفون ويضحكون ويحچون بمواقف تفطسنه من الضحك..

حطيت الصينيه گدامهم وحسيت عُثمان مو طبيعي اصلااً راح من بالي طبيت عليه اليوم وهوه چنه عباله اني منحرجة منه واني الثوولة ولا يمي السالفه اهمداااچ هجرااان..

-عميد: عاشت ايدچن بنيات

وجه كلامه الي ولجواهر..

-جواهر: بالعافيه بَـس كُله هجران سوته مو اني

ابتسم وهز راسه، اندار ؏ عثمان وخاله انتصار يحچون بداعش وبالانفجارات الدتصير والاغتيالات وشلون عبوة انفجرت بكربلاء قبل كم يوم واغتالو شيخ عشيره يمنه وصايره ملحمه، عميد مچلب بعثمان ميخلي يرجع للانبار يخاف عليه..

ماحب اتعمق بهالموضوع لان من راحو مرتضى وعثمان وفيصل واحمد تطوعو بيبي عطيه تخربطت ووگعت من طولهه وحلفت تغضب عليهم اذا راحو فَـہ اضطرو يرجعون بَـس يلوبون ويردون يرحون يجاهدون...

غيرو الموضوع بسرعه لان احنه البنات نخاف خصوصاً اني كلما يذكرون كلمه "داعش" گلبي يرجف ويگوم يوجعني خصوصاً من اتذكر اخوية فاضل متطوع وخايفه عليه بَـس الحمد لله يمه أمان وماكو شي..

عميد شال الماعون البي كيك اكل منه شويه ورفع تك حاجب وحچة...

-عميد: ناقص هالكيك چاي

-هجران: هذا ببسي اصبلك؟

-عميد: لا لا اريدن چاي ومن ايدين جوهرة

فتحت جواهر حلگهه وهوه لسه رافع حاجبه ومبتسم بمكر، بلعت ريگهه وحچت...

-جواهر: مو شسمه لا الببسي اطيب ويه الكيك

-عميد: لا لا الچاي غير لو شتگول عثمان

ضحك عثمان وغمزلنه...

-عُثمان: عجل شلون طعمو غيير خصوصاً اذا كان من ايدين جواهر

جواهر تباوعله مغضبه شويه وتطگ، خرررب شگد خبييث سمعنه اليوم من گلنه جواهر متعرف تسوي چاي وگعد يحرجهه، رغم هذا وجواهر گالت...

-ايي وشكو اسويلك چاي بَـس شسمه ترا شسمه

-عميد: خرب حظي ردينه للشسمه

-جواهر: هفففف الچاي مالتي ثگيييل كوولش

-عميد: لو گير هم اشربه

گوة كاتمه ضحكتي عليهم ذوله الثنين عجيبيين بالمداهر، باوعتله بنظره تحدي وراحت للمطبخ، شويه واجتني رساله منهه بعدني مقاريتهه وعميد حچة بمكر...

-عميد: هاي جوهرة؟

-هجران: هااا مادري لا يجوز بكر

گمت من مكاني لان قريت كاتبه هجران لحگيلي، رحتلهه للمطبخ وهيه حايره صحت بيهه...

-لچ صدُك چذب تحچين انتي شهالفهاوة چاااي ومتعرفين تسوين؟؟ لعد شلون عايشه بالاقسام؟

-جواهر: اسكتييي عايشه ؏ الاندومي والچبوسه

-يااا لچ مخبلله واحنه نگول شبيهه هاي ذبلانه وضعفانه

-جواهر: هجراان فدوه هسة تساعدينييي ماريده يضحك عليه

-تدللين اساعدچ شعندي غيرچ...

وبهالاثناء دخل عميد شايل گلاص ببسي، قدمه لجواهر وگال بنفس النبرة الماكرة...

-عميد: عااشت ايدچ جوهرة الببسي فد شي كلش طيب اكيد انتي فتحتي البطل صح؟؟

-جواهر: هااا مو دا اسويلك چااي

-عميد: لاه لاه ماكو لزوم شربت ببسي بعد هجران لا تعبين نفسچ وتسويلي چاي

دار عيونه يباوعلي واني ميته من الضحك ؏ سوالفه وجواهر مطنگره وتباوعله مضيگة عيونهه...

-جواهر: عمييد جوز منييي اي ماعرف اطبخ وماعرف اسوي چاي وماعرف أي شي اني فاشله وغبيه وساذجة وعوبه و.....

انفجرت تحچي وتبچي صفنه عليهه وعميد بهتت ملامح وجهه، حچة بسرعه مقاطعهه...

-عميد: جواهر شمالچ چنت اشاقيچ شني جديده عليچ

-جواهر: لااء وخر حباب اريد اتعده

تعدت من يمه وهوه فاتح عيونه ممصدگ هاي معقوله نفسهه جواهر الحبابه المليانه نزاكة واخلاق، هز راسه متحسف وطلع من البيت واني غسلت المواعين وفكرت اروحلهه لو اخليهه وحدهه...

كملت المطبخ وبدينه بالعشه والبنات كلهن حواليه ورهف تشتغل ؏ الخفيف لان تتعب ومتتحمل اما جواهر بغرفتهه مطلعت منهه ولا شفناهه بعد ومن سألنه شهد گالت عنهه تعبانه وتگول تريد تنام...

تعشينه وكملنه وزيد وحلاوة طلعو يشوفون اللعبه اما باقي الزلم گعدو بالبيت يشوفوهه، واحنه البنات وگفنه نشتغل بالمطبخ، لمت شهد السفره وانطتنياهه اذبهه بالحديقه بصف باب الحوش حتى يشوفوها الولد ويذبوهه من يطلعون...

وصلت للباب ولمحت ضوه احمر صغير ينفتح وينطفي مشمور بزاويه الحديقه ؏ الجزء الزرع، ركزت نظري عليه واني افكر شنو هذا الشي؟ المشكله بعيد وماگدر اشوفه عدل صاير بين الحشيش والحشيش عالي ما مقلمي، والحديقه ضواهه مخنفس..

تقربت شويه وجفلت من سمعت صوت ونّه اجت منه، والضوه مستمر ينطفي ويعتلگ، ابتعدت وگلبي بده يدگ سريع وانفاسي متطلع منتظمه، طبيت للبيت ارجف واسناني تسطك، جوري شافت حالتي وحچت مستغربه...

-جوري: هجران شبيچ؟

گمت ابلع بريگي واختنگت، حركت راسي بكل الاتجاهات وكأنه دا ادور ؏ كلام يوصف الشفته، گلت بصوت گوة طلع..

-بنات اكو عبوة ناسفه بالحديقه..

البنات صفنن عليه وصاحن مستحيل، طلعن غزاله وجوري يركضن يشوفن وغزاله گامت تدگ ؏ وجهها وركضت تگول للولد، طلعو للحديقه وعميد عاط بيهم يرجعون وميتقربون يمهه، عثمان صاح...

-عثمان: امشوو الكللل يطلع من البيت بسرررعه

انسبينه سبي وعميد گام يعيط بينه حتى نطلع، ذبيت زنوبة ؏ عثمان وركضت جوه اصيح للباقين سمعت صوت جاي من الحمام دگيت الباب قوي، انفتحت الباب چانت جواهر هستوه دتفرش اسنانهه بعده المعجون بحلگهه متدري شكو، صحت ببهه..

-جواااهررر امشي نطلعععع بسرعه

فهت بوجهي مافهمت شنو اقصد، جريتهه من ايدهه وطلعتهه ويايه للحديقه وفرچة اسنانهه بيدهه، طلعنه بره بالشارع الصاير گبال بيتنه والكل وگف بعيد، خو فتوح اخذت نرجس وشلعت بيهه مادري وين..

تذكرت اكو شغلات مهمه عندي وذهبي وكلشي بالبيت، ركضت جوة وصار بوجهي عثمان مبحلق عيونه عليه ونتر...

-عُثمان: وين رايحة؟؟

-هجران: وييين زينببب مو عفتهه يمك؟؟

-عثمان: انطيتهه لجوري

عفته وركضت جوه وهوه اجه ورايه ويعيط، صعدت الدرج وحسيت بيده تسحبني، جرني عليه وعاط بوجهي...

-عثمان: انتيي مجنووونة يولييي البيت رح ينفجررر امشييي نطلععع

-هجران: عثمان شبييك ليش لازمني هيچي!!

انتبه ؏ نفسه وابتعد، چان لازگني بي يبو شلون موقف يخزي، صاح بأستعجال...

-عُثمان: هجراان لا تعبينيي امشي نطلععع يللله

هزيتله براسي وعفت كلشي وطلعت، چانن جواهر وشهد واگفات بعيد وحده حاظنه الثانيه ويرجفن من البرد بالليل الدنيا باردة كُلش ، افتهمت ان مرتضى راح يبلغ المركز الاستخباراتي اليبعد فوگ النص ساعه عن بيتنه لان عميد الدين واگف ويدگ عليهم ومحد يشيله، صاح بعجز...

-عميد الدين: ولد الـ**** ايا **** لو الدنيا تصخم تحترگ وذوله ال**** مايجوون انعل ***** من ******

عزا نزل انواع الغلط والمسبات والفشاير، اول مرة اشوفه هيچي، فرك وجهه وعثمان راح يحچي وياه وعيونه ؏ البيت، ميعرف شيتصرف، يخاف يگول للجيران ويطلع ماكو شي وينفضحون ويخاف يسكت ويخش بخطية العالم..

نهى تفكيره وسخر فيصل..

-عميد: فيصل بسااع تروح تدگ باب باب وتگللهم يطلعون من بيوتهم بساااع

-فيصل: واذا سألوني اگلهم اكو مفخخه؟

-عثمان: لااا اصحك يول لا تصيرو علكة بحلوگهم

-عميد: انعل شرفك مروااان عساك اشتعلت بهالليله بجاه ابو فاضل

مافتهمت شي اجت جواهر بصفي وگالت...

-جواهر: هجران ليش شفايفچ زرگ ووجهچ باهت؟

-مادري مادري خايفه

-جواهر: ؏ كيفچ ويه روحچ حُبي

هزيتلهه براسي وجوري اجت بصفي تهدي بيه وبيدهه زينب وعلاوي بيد فيصل، صار الم قوي ببطني الم مينحمل وكأنه دتطلع روحي هااي شبييه، صحت واني اعظ ؏ ردن الجبه مالتي..

-اااه جوري بطنييي

-حوري: عزا العزاني شبيييچ ولچ

-هجران: آآآآييي ولچ رح اموووت

الالم ديزيد وحتى وگفه ماگدر اوگف حسيت رجعت اللام من جبت زنوبه شلون حسيت، اللتفت عمو خليل الواگف وماطلع هس منه من بدت السالفه لسه، تقرب عليه وصاح لعمه سلمى ودلال..

-خليل: تعالن شوفن شمالهه

-سلمى: عيااارة صارلچ شكد كلشي مابيچ من شفتي الزلم مخبوصين گمتي تصيحين

جوري تلاسنت وياهه وغزاله تبچي وتعاركت ويه امهه علمودي واني دموعي عشره عشره، گامت الناس تطلع من بيوتهه وانخبصت المنطقه ولسه الشرطه ما شرفوا واجو.. گعدتني جوري ؏ الرصيف بعيد عن البيت وشهد بصفي من الجهة الثانيه ورهف وغزاله گدامي..

شويه واجه فيصل جوري گلتله گام يصيح ويگول هسة وكتهه، حزت بخاطري وگمت أون ؏ كيفي.. غزاله شايله زنوبه وتلوع بيدهه، دنگت راسي اريد اهدأ روحي بلكي يروح الوجع، اجاني صوت جواهر ملهوفة...

-جواهر: هاااي شبيچ هجراان شنو يوجعچ؟؟؟

-هجران: عززا جواهر حموووت احس حجارة ببطني

-جواهر: هاي جوز القولون مالتچ تحتاجين مستشفى اوگفي اصيح لواحد من الولد

راحت وره شويه اجانه عثمان مستغرب...

-عثمان: بنوات شبيكم؟ هجران ليش تبكي؟

-جوري(حچيت بحرگة): دتتوجع ومحد عنده مروة وياخذهه للمستشفى

-عثمان: افااا صدگ تحكون!! اوگفو رح افتحو لباب السيارة وانتم دخلوها، وأنَا اروح اگول لأبويه اخاف يحتاجني واردلكم

هزت براسهه والبنات ساندني وخاله انتصار هم اجت ويايه، نفسي انگطع ودموعي تنزل.. تمنيت بابا واخواني موجودين چان مانذليت هيچي..

ركبني السيارة ونفسي بدت تلعب وع ساعه اتقيأ، ماگدرت اللزم نفسي وتقيأت ؏ الكرسي الوره وجوري گامت تدگ ؏ وجهها ؏ كيف وتصيح بهمس...

-جوري: عزززاا يبووو تخزينه يبووو سيارة جديده مبينه وانعدمت

-شهد: فوگاهه هستوه مبدل سيارته يبووو

رجع عثمان وجوري تجر بالكلينكس وتظمظم بالمكان التوسخ وتمسح عرگ گصتهه من التوتر، دخل السيارة واني اللوب اشيل روحي وارگعهه..

طلعنه للمستشفى وبعدنه ببدايه الطريق وراح الوجع، صفنت ومن الفشله ماعرف شنو اگول، بَـس خاله انتصار انتبهت عليه بعد ماصيح وابچي، اللتفتت عليه وگالت بضحكة...

-انتصار: هاا هجرانه شني شصار؟

نصيت راسي مفتشله وجوري وشهد طگن من الضحك، عثمان هم گام يضحك ويهز براسه ويستغفر بهمس.. حچة وعيونه تباوعلي من المراية الاماميه...

-عُثمان: اخذِك للمستشفى؟

هزيت راسي بـ "لا" وهمست..

-هجران: شو صرت زينة

غمض عيونه وضحك خفيف، اندار بالسيارة ورجعنه للمكان الچنه واگفين بي، صاير بعيد عن البيت حتى خاف لا سمح الله انفجرت العبوه منتأثر.. قبل لا ننزل همست لجوري..

-اگولچ نگوله ؏ سيارته تدمرت؟

-جوري: ماعرف والله

-شهد بهمس: لا خلونه نغلس

-هجران: مو خاف يعصب لو يضوج؟

-شهد: مادري معليه جوري انتي احچي

-جوري: يباااوو انچبن منحچي ميهمني اني خاف تجيني رزاله طايره مناا منااك

سكتنه وولا وحده حچت، نزلنه من السيارة والحظ المصخم الملطم رجع فتح الباب الوره چنه يريد يطلع شي وتفاجأ من شاف المكان، طلع راسه الي چان بنص السيارة واندار يباوعلي لان صايره وراه، يا يممة صرت بنص هدومي ورأساً دموعي شكلن بطرف عيني..

اشرلي براسه وأشر ؏ المكان بمعنى "شنو هذا" هيچي فسرتهه، بلعت ريگ ونصيت راسي مستحية، تأفأف بصوت عالي واستغفر وطبگ الباب قوي، تقدم ناحيتي ونتر بهمس...

-لو گايلين كان نظفتو بسرعه وما ظل اثرو

-همست: مو خفت تعصب

فتح عيونه متعجب من حچايتي، ضرب گصته ؏ كيف وهمس...

-عُثمان: اعصب ؏ هيك شي تافه!!

عافني وراح يحچي ويه الشرطه الي هستوهم وصلو، بعد وكت حيصيرلنه فوگ الـ 45 دقيقه واگفين هنا.. دخلو للبيت جماعه مسلحين ولابسين دروع وخوّذ وراحو يشوفون العبوة..

**

"جواهر"
من شفت حالة هجران من تخربطت وفيصل وعمو خليل شلون حچو وياهه متت من القهر وگلت لازم اگول لواحد من ذوله الثنين لو عميد لو عثمان لانهم الوحيدين عدهم مروه وضمير..

ركضتلهم وتفاجأت واني اشوف عميد يطب للبيت، ركضت وراه اشوف شعنده، وگفوني ولد ماعرفهم بَـس ماهتميت وعثمان مانتبه عليه من طبيت لان راح لهجران، صحت...

-عمييد وين رايح؟؟

اللتفت عليه وچان مرتبك، صاح بيه...

-عميد: جوهررة شجابچ هيين ردي برا بساع

-جواهر: زين وانته شعندك؟

-روحي بابه عندي شي اجيبه وارد

-لا لاا عميد خطره تروح تعاال نطلع

-ولچ روحيي لا تأخريني

-مااا ماااا تعااال حباااب

تخيلت تنفجر العبوه بي وهوه وحده بالبيت وگمت ابچي، مسح وجهه ونتر بيه...

-عميد: جووواهر ردييي ولچ ماطووول والعباس

-زين اجي وياااك

-دهررر ولچ روحححي

گمت اشهگ وابچي وطبعاً هذا كله صار بالحديقه واگفين، لزمت زنده حيل وعطت بوجهه..

-جواهر: تريد تمووت روحك صححح والله ماخليك والله اموت ويااك والله

-ولچ شني هالخرط شكو اموت روحي

-مادري مادري معليه اجي وياك والله اذا صارلك شي اموت اني

مجادلني هز راسه ودخلنه للبيت واني مچلبه بردنه.. راح للغرفه ويدور وينبش بيهه گلبهه گلاب واني لازگة بي، من كل عقلي اگول اذا صار شي ولا سمح الله انفجرت ؏ الاقل ثنينه نتأذه نفس الشي واذا متنه نموت سوا..

ظل يدور ومرتبك مبين شي كُلش مهم بَـس ما سألته، اندار عليه وعاط بأستعجال...

-عميد: جواهر طلعي بره عليچ الحسين

-ماااطلع گلتتت

-ولچ مسووودنه طلعيييي

-مااااااا

رجعت لزمت بي حيل وانفتگت بالخرط، گلت هوه احنه ميتين ميتين دخليني ارتاح واحچي من لطام بوجهي..

-جواهر: عميييد لا تأذينييي ليش هيچي تسووي حرام عليك

-عميد: ولچ شمصخم انه

-انته متهتم ولا تگول هاي البنيه تحبني وروحهه معلگه بيه ولك احببك وامووت عليك ليييش متفكر بيه!! تريد تموت وتخليني!!!

فاتح عيونه متفاجئ من كلامي، وقطرات العرق تنزل من جبينه، عينه بعيني والموقف حمه زايد ماعرف شصار بيه وشنو هالكُتلة من المشاعر الجتاحتني وحچيت...

-جواهر: اسمعني تمووت اموت وياك ايي مو عبالك تروح وتعوفني ترا اني مخبله لتخبلني زايد!!

مدهوش حتى مدا يرمش ماعرف شبي اخذته الجمدة واني منين اجاني الحماس وحسيت روحي بمسلسله تركيه وهوه مصحاني ظل صافن، دموعي من وحدهن گامن ينزلن وكملت...

-عميدي انته بطلي الاوحد وحبيبي الاول، فرحتي وألم يدگ بصدري، خليلي وفارسي وشمسي، عميد گلبي حبيب العُمر وحلم السنين، احبك بكلشي املكه وما املك شي غير حُبك...

انگلبت شاعره بنص هالزلگ والثواله اخذتني وماعرف منين اجتني الجرأة والصلافة وجريت وجهه وبسته ؏ خده ومحسيت اله......

يتبع☘️...

♛ ♛ ♛ ♛ ♛ ♛ ♛ ♛ ♛ ♛
ياخي انتو منتبهين ليش تصير المواقف المحرجة والاعترافات كلهه بأوقات غير مناسبه🙂😂❤️‍🩹 المهم يله شنو تتوقعون حيصير🙈؟

احبكم وااايد وااايد🥺🧿❤️‍🩹.