شفاه مخملية الفصل الرابع وأربعون 44 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية" 💋

بقلم: زهراء السلامي.

#موزين ⁧ الورد⁩
‏خلك طبع ⁧ عاكول⁩
‏⁧ يبز⁩ من ينسحك يعجبني ⁧ مايخضع⁩
‏ماينشم ⁧ بسيط⁩
‏المهم⁧ ما⁩ ينداس⁩
‏ولا يحتاج واحد ⁧ يحرث ويزرع⁩✋🏻🌵.

♛ ♛ ♛ ♛ ♛ ♛ ♛ ♛ ♛ ♛

"جواهر"
فتحنه عيونه وضربنه صدورنه وعميد الدين تخبل وظل يضرب بي ويعيط ويصيح...

-غضببب الله علييييك انتهيناااا رحنه بين رجلين العواذل

-مرتضى: عميد بشاربك انه شسوووي

-عميد الدين: يااا ساقططط انه چم مرة گايلللك لا تتگرب لخلفه مرواااان

-مرتضى: چا يعيّر بينه ويحچي بشرف رهف واعترف هو الي خذاهه وضيع شبابهه

سمعنه شهگه جايه من باب الغرفه، رفعنه عيونه نباوع واذا رهف واگفه وجاحظه عيونهه ومفتوح حلگهه، عميد تخبل وتگلبت عيونه ولزم مرتضى من خوانيگه وانطاه راشدي فر وجهه فررر..

بهالاثناء ونرجس گالت بصدمه...

-نرجس: رهف موش بت بيت؟

-عميد الدين: لطاااااااام بوجهكككك مرتضضضضضى عسااااك اشتعلتتت ويه مروان وخلفتتته

رهف لسه واگفه وخاله انتصار جرتهه لصدرهه حتى متثور لو يصيرلهه شي بَـس دفعت ايدهه وركضت لغرفتهه، عميد باوعلي واشر بعيونه افتهمت معناتهه روحي وراهه..

گمت اني ولحافي وركضت لغرفتهه وصدفه شفت هجران واگفه ؏ الدرج دتنزل..

-هجران: جواهر هاي شصاير شنو هالهوسه؟

-جواهر: ضيييم صاير هجران ضيييم

عفتهه ورحت لغرفه رهف چانت گاعده ؏ الچربايه ومكرفصه رجليهه لصدرهه وصافنه..

-رهوفه حبيبتي شبيچ؟؟

رفعت عيونهه تباوعلي ورجعت نزلتهن، دخلت هجران للغرفه مخطوف لونهه والصياح والعيطة البره لسه ما هدأ...

-هجران: جواهر هذا شديگول مرتضى؟؟ صدُك قاتل ستار؟؟

هزيتلهه براسي اي وعضيت ؏ شفتي حتى تسكت لان وضع رهف مخوفني، الغرفه صنننطه محد يحچي ورهف مستمرة سارحة بالفضاء اخيراً گالت...

-رهف: طلعو اريدن انام

-جواهر: رهف انام يمچ اني

-رهف: روحي لحجرتچ جواهر

-جواهر: لا ماريد اصلاً اني كلت لعميد انام بصف رهف اليوم

باوعتلي بنظرة عتاب طويييله وهمست ببحه...

-چنتي تعرفين؟

عرفت قصدهه ؏ سالفتهه وسكتت مجاوبت، نزلن دموعهه وغطت وجهها تبچي مثل الطفل وتهز براسهه وتگول...

-حرام عليكم حرااام

-جواهر: رهف ابوچ مراد يأذيچ لهيچ محچالچ

مستمره تبچي وضامه وجهها، سكتت لثواني وفجأه وگع راسهه ؏ المخده، شهگت هجران واجت تركض واني ارفع راسهه من المخده ويرجع يوگع..

فحصت نفسهه وچان مضطرب ودگات گلبهه بططييئه، صحت...

-هجرااان ركض صيحي لعميد الدين بسرررعه

**

"هجران"
نزلت جوه ؏ اثر صياح گلت بيني وبين نفسي ماهتم ولا انزل بَـس الاصوات علت والفضول اشتغل عندي، نزلت وشفت حالت جواهر ورهف وانوب تخربطت رهف وجواهر خايفه..

ركضت اصيح لعميد بَـس حالته متسر ابد گاعد ؏ الچربايه وحاط راسه بين ايده ومرتضى گاعد جوه رجليه وخاله انتصار تخرمش بخدودهه وبيبي عطيه ودلال كذلك اما غزاله فاتحة عيونهه ومتحچي شي، گلت بخوف..

-سيد هاي رهف تخربطت

رفع راسه وعيونه خابطه صايرات حمر، گال بحرگة "غضب الله عليك" وگام توجه لغرفه رهف..

رحت وراه وعمه دلال ويايه، شالهه ابوهه حطهه بحظنه ويدگ ؏ وجهها...

-عميد: جوهرة علاجهه بسااع

ركضت جواهر جابت علبه بيهه حب ابيض صغير، حطهه بحلگهه وظل يحركهه وجواهر تنفض مي بوجهها حتى تصحى..

شويه ورجعت لوعيهه وحظنت ابوهه وتبچي وانصدمت عميد صار يبچي وياهه ويگول بصوت مكسور...

-سوده عليه بعد ابوچ عسى المرض بيه وعسى الضيم كله عليّ ولا ينجرحلچ اصبع بنياتيي

-رهف: آآآه بابا

-عميد: عساهه بحظهم وبختهم بنيتي ولا تزعلين ولا تضوجين انتي تسوين اشرف بت اريدنچ گوية نفس ابوچ وماتنهزين يبعدهم

دافنه راسهه بصدره وتبچي وهوه يمسح ؏ راسهه ويبوس بي وجواهر تنزل دموعهه بهدووء وتباوعلهم..

غفت بحظنه وحطهه ؏ المخده وغطاهه، مسح دموعه وطلع من الغرفه وطلعنه وراه، رجع لغرفته ومرتضى ؏ حاله وخاله انتصار مملخه روحهه باللطم، جر عميد نفس عميق وحچة بصوت مُجلجل...

-عميد الدين: اتصلولي ؏ عُثمان بسااع

جابوله موبايله وهوه دگ وفتح مكبره، انتبهت ؏ رجفه ايده ووجهه عرگان واضح كُلش متوتر، جاوب عُثمان بصوت ناصي مبين چان نايم...

-الوو

-عميد: عُثمان اخيك محتاجك

-عُثمان: أمرني

-عميد: تگدر تجي هسّ؟

-عُثمان: هسة؟؟

-عميد: اغديلك فدوه عُثمان السالفه مليوصه عليّ وباچر عندي گعده ويه بت بحر

-عُثمان: مسافه الطريق

سد الموبايل وفتوح گالت...

-فتوح: شمالك ماحچيتله الجرى مني ذول بيت بحر!!

-عميد الدين: اييي حتى يتسوودن ويسوي حاادث بالطريچ عمه لخاطر الكعبه فكري شوووي

هاي اول مرة يحچي وياهه بهالطريقه وهيه انخلست من نبرة صوته العصبيه، طلعنه من الغرفه لان عميد راد يبقى وحده ويه مرتضى وبقن خاله انتصار وبيبي عطيه وياهم...

-هجران: جواهر راسي افتر شصاير؟

حچتلي مختصر وغزاله گامت لرهف تشوفهه ووجهها لسه اصفر..

-هجران: وهسه معناتهه اكيد يردون فصليه مو؟؟

-جواهر: يااا فصليه اكيد يردون دمم ماكو غيرهه

-هجران: عززا العزااني ومنو يروح بيهه؟؟؟

-جواهر: سووووده بوجهيييي هجرااان خاف يأذون عميدي

-لا لا لتخافين ان شالله خير

تبچي وترجف، رحت اجيبلهم مي لان كلهم يتراجفون والوجوه صفررره وعمه دلال تخربطت راسلت زيد حتى يجي لان بره وميعرف شكو واجه يحير بيهه...

رحت لغرفه رهف اشوفهه چانت نايمه وغزاله نايمه بصفهه وصوت نحيبهه وشهگاتهه عالي، انفطر گلبي وماگدرت احچي وياهه كلمه وحتى لو حچيت شنو اگول..

رجعت لجواهر لزمت ايدهه وافرك بيهه حتى ترتاح وهيه مستمره تبچي...

-هجران: جواهر اهدي اني متأكده رح يلگون حل

-يمعوده يا حَل خاف هذيچ المرة فلتنه منهه بفصل يكسر الظهر هسه اكيد يردون دم وماكو غير عميد يروح بيهه اني ادري

-لا ان شالله عُثمان يحلهه هوه ذكي

-اوووف هجران اوووف شسوي بروحي انييي يعني مكتوب عليه اتهجول ومارتاح

-كافي جواهر ذكري الله شبيچ

سكتت ومسحت دموعهه وحطيت ايدي ؏ صدرهه واقره سوره الانشراح بلكي تهدأ ويبرد صدرهه، للفجر وسمعنه باب الحوش تنرگع گلبي وگع وجواهر يبست وتباوعلي..

ركضت للغرفه دگيت الباب عليهم وبعدني دا احچي وياهم وطبو سلمان وشهد ملهوفين، جريت نفس معناتهه همه الي چانو بالباب..

دخل سلمان لغرفه عميد الدين وشهد اجت لجواهر تهدي بيهه وتحچي وياهه..

-جواهر: شجابكم بهالطريق بنص الليل شهد شبيچ!!

-شهد: والله معليه سلمان مقبل وگلب الدنيا حتى بالطريق طاير طيور يگول شلون الي گلب اني گاعد ببغداد ونايم ومرتاح واخواني هيچ حالتهم

-هجران: فدوا الله يديم خوتهم

-شهد: امين

عفتهن وصعدت لزنوبه اخاف گعدت وسمعت صوت طگطگة بالغرفه عرفت بكر هناك، دخلت ومحچيت شي رحت لزينب ووخرت الغطى عن وجهها خاف تختنگ وهوه گال..

-بكر: ليش تغطي وجهها من تنام؟

مجاوبته وتمددت بصفهه وانطيته ظهري، رجع گال...

-بكر: محتاجة شي انه طالع؟

ضحكت بگلبي يريد يطلع وولد عمه متصخمين هذا شنو من شي، ظليت ساكته وهم مجاوبت عاد سؤاله وهم لبسته، نتر بيه...

-بكر: انه وياامن!!

-بكرر صوتك شبيييك الطفله نايمة وثانياً روح كلشي ماريد منك

گلب وجهه وهمس..

-بكر: مو شكول رحمه انتي

اشتعلت متت من القهر بَـس ماگدر اجاوبه اخاف يسويلي شي، غفيت وحسيت بالتسعه الصبح ؏ بچي زنوبه، حاولت ارضعهه ومتقبل انطيتهه مميه شربتهه ورجعت نامت..

نزلت جوه بعدهم ؏ حالتهم خاله انتصار گاعده بالصاله وتولول وبيبي عطيه وياهه، گعدت بصفهن والدمعه حصرتني اني حال الضيم حالي انوب ينعون شلون بيه..

گمت للمطبخ گلت اسوي ريوگ خطيه خليهم ياكلون، طلعت البيض ووگفت اثرم طماطه واجت المتتسمه مرت بكر "نور" وگفت بصفي وگالت...

-صباح الخير

مجاوبتهه وصرت اتأفأف حتى تروح بَـس بقت واگفه بصفي، حچت بلطافه انصدمت منهه...

-نور: هجران اني ترا مالي ذنب والله

اللتفتت عليهه ونترت...

-مالچ ذنب وانتي ماخذه رجلي؟؟!

-نور: عمه فتوح گالت انتي عندچ علم وراضيه اني بعد شمعرفني

-ههههههه ضحكتيني هوااي لعد شلون اول مشفتيني تگولين قنعتي بكر حتى يخبرني بزواجه؟!

-نور: مو من تزوجنه ياله اكتشفت انتي متدرين هوه گالي هجران متعرف والله حتى اني تفاجأت

-اصلاً انتي شلون الچ نفس تاخذين واحد متزوج!!!

-نور: هجران اني يتيمه لا اب ولا ام وعايشه ؏ نفقة عمي وهواي دا اتأذه ببيته يعني تزوجت ردت اخلص

انقهرت عليهه بَـس مجاوبتهه، غيرت الموضوع وگلت بأستهزاء...

-هه وبكر عوضچ؟

فاجأتني من ابتسمت وهزت براسهه "اي" بكررر معوضهه الحنان الفقدته!! مستحيييل اصدگ...

-هجران: انتي صدُك تحچين؟؟؟

-نور: اي والله كلش خوش رجال بكر يحبني ومدللني وما فد يوم زعلني بحچايه

هزيتله براسي ودرت وجهي، نزلن دموعي مقهوورة ؏ حالتي وحظي لعد شمعنه ويايه هيچ قاسي لو لان نور حلوه عجبتك..

اخذت السچينه من ايدي ودفعتهه حتى تروح، كملت الريوگ وصحتلكم حتى ياكلون ومحد قبل ياكُل، گوووة جريت رهف وغزاله وسويت لفات للباقين بلكي ياكلون..

گعدت بالصاله وانفتحت باب المطبخ، عرفته عُثمان من طريقه فتحه للباب بهمجية.. اجه للصاله ووگف بمكانه من صارت عيني بعينه، ابتسمتله وهوه بادلني بنظرة ماعرفت افسرهه وتعداني وراح لغرفه عميد...

استمر نقاشهم تقريباً نص ساعه وطلعو من الغرفه وعُثمان عاط بـ مرتضى...

-عُثمان: خمممس دقايق مرتضى أنَا منتظرك

-سلمان: لا اگعد انته تعبان انه اخذه

-عميد الدين: حجزتله عُثمان؟؟

-عُثمان: كلشي جاهز اتصلت بصاحبي وگال ؏ طياره الاربعه العصر حجزولو

-عميد: اخيك مانسالك هالمعروف

-عُثمان: استحي ؏ دمك أنَا اخوك

هزو روسهم ومرتضى صعد فوگ وغزاله لحگته لان صاح بيهه تجي وراه..

**

"غزاله"
صعدت وره مرتضى وگلبي يدگ الليل كله مانمت من الخوف كل شوي اگول هسّ يهدون علينه مروان وخلفته بَـس الظاهر لسه مافتهمو بموتت ستار..

طبيت لحجرتي ومرتضى صاح بيه اجيبله جنطه سفر، انطيته وظل يطلع بملابسه ويذب بيهه وراح ؏ الميز طلع ظبة فلوس وحط، كمل كلشي بوقت ما تجاوز الخمس دقايق واندار عليه وگال...

-مرتضى: غزاله انه اروح فتره ويدزوچ الي ونعيش سوه هناك

-غزاله: انه ماروحن وياك

رفع راسه بعدما چان منزله يسد بالجنطه، چان مدهوش وفاتح عيونه...

-مرتضى: مافهمت شني؟ ليش ماتجين؟

-طلگني مرتضى

-غزززللل شني هالحچييي

نزلن دموعي وكررت...

-طلگني ماريدك

يباوعلي بعيون متوسله وانفاسه علت، تقرب عليّ وكظني من متوني وگال...

-مرتضى: والله اصير آدمي غزاله لا تعوفيني

-وخر مرتضى انه ماطايقتك

-ولچ لييييش غزززل اوعدچ والله اتغير والله

-غزاله: اييي مثل وعدك لعميد من گتله رح تتعالج وبطلت السوالف المكسره رووح مرتضى لا انه افيدك ولا انته تفيدني لان علاقتنه عقيييمه

-مستحيييل ماطلگچ ولچ اتسودن واموت من دونچ

-محد مات وره احد مرتضى عوووفني

-مااااعوفچ وگتلچ نسافر واتعالج ونفتح صفحه جديده غزل عليچ الله انطيني فرصه والعباس انه ماذبحت ستار عبطاً انه بَـس دافعت عن نفسي لان صارت عركة بيناتنه وخنگني وردت اموت لوما الله ينطيني القوه ودفعته عني وضربت راسه بطابوگه غزززل والعباااس ماردت اقتله!!!

-وخررر مرتضى انه ماحچي ؏ ستار لان ادري ما نيتك تذبحه انه احچي ؏ سوالفك الثانيه ومرضك!!!

-مرتضى: اتعالج والله انطيني اخر فرصه

كظني بقوه وحظني لصدره وصار يبچي مثل الجهال، انكسر گلبي بَـس مستحيل اتراجع خلص هواي صبرت وياه وهواي تنازلت بَـس هوه ظرب كل هذا بعرض الحايط واستمر بسوالفه السريريه والكتل بالحزام بالليل يموتني وانه عايشه..

دفعته عني وحچيت ناهيه الحديث...

-غزاله: الله وياك مرتضى رح ادعيلك بكل خطوه سلامه بَـس حررني منك وطلگني انه ماريدك

دفعني بقوه لدرجة انضربت بالحايط، مسح دموعه وگال بصوت مكسور...

-مرتضى: لو تموتييين ماطلگچ ما اتحمل اشوفچ بحظن غيري غززل حسي بيه اننه احبچ ولو تركتيني امووت وعلي ولچ شسوووي برووحي

اخذ الجنطه وطلع من الغرفه، رحت وراه اتوسل بي يطلگ وصار عميد بوجهنه، عاينلي ورجع يعاين لمرتضى وگال...

-عميد الدين: تأخرت وينك كملت؟

-مرتضى: اي اخيك ماعندي شي

-عميد: چا يله امشينا

-مرتضى: عميد اوصيك وانته ماتحتاج وصيه بَـس عينك ؏ غزاله هاي أمانتك عميد

هز براسه وباوعلي ومرتضى كمل...

-مرتضى: اذا صارلي شي ومارجعنه نلتم سوه...

-عميد: انطم مايصيرلك شي العار مايموت

ضحك مرتضى وكمل...

-مرتضى: حتى لو عميدي انته ابوي مو بَـس اخوي وانه خدام جوه رجليك بداعه خوتنه وعلاقتنه غزاله بعينك وعليك داحي الباب لا تنظرلهه بغير نظرة

-عميد: عمت عيني اذا اعاينلهه بغير نظرة الابو لبنيته روح حبيبي وادزهه الك ويوم النفرح بفروخكم

تحاظنو وانه ابچي كل بال عميد ابچي ؏ مرتضى لان اندار عليّ وگال...

-عميد الدين: لا تخافين كله چم يوم واسفرچ وراه

اخذه ونزلو ويه بعض متحاظنين وانه رديت لحجرتي وموتت روحي بالبچي مااريده لييش محد يحس بيه 3 سنين ونص ضيعت من حياتي لخاطر انسان ماحبه وصبرت وتحملت وبلعت موس وسكتت بَـس خاطر مايسموني مطلگه!!!

**

"هجران"
طلعو سلمان ومرتضى للمطار والوضع متكهرب هنا وعميد الدين صاير نااار ميتحچة حتى جواهر تخاف تحچي وياه، گعدت زنوبه وخبصتنه خبص بَـس تبچي ونور اخذتهه تلعبهه انصدمت بيهه شگد حبابه وابد مو نحسه ومُزعجة..

رحت اسأل عمه دلال شنسوي غده بَـس چانت نايمه وچنت متردده اسأله خاله انتصار لا تجيني بالنعال وهيه هيچ حالتهه فَـہ عفت الكل گاعد بالهول وحاط ايده ؏ خده ورحت من كيفي اسوي تبسي بالدجاج..

ثرمت البتيته والبيتنجان وغسلت الدجاجه ونزيت من انفتح باب المطبخ، ضحكت ودرت وجهي وگلت...

-هجران: عثمااان متجووز انته هههه

چان عاگد حاجبه ومبينه الطنگورة صاعده عنده، سألته بقلق...

-هجران: هم راسك يوجعك؟

مجاوبني وراح ؏ الثلاجة طلع الدولكة مال المي وشرب بيهه، شرب نص الدولكة هذا هيچ عطشان؟ رجعت سألته...

-اگولك انته مو گلت الدكتور گال احتمال شقيقه؟ شنو مالهه علاج؟

اللتفت عليه وخزرني بقوه، اردفت...

-هجران: اني عمتي هم راسهه يوجعهه وگالو علساس عدهه......

بعدني مكملت الحچايه وفزيت من شمر دولكه المي ؏ الحايط وتهشمت الى قطع، انخلست من عاط...

-عُثمان: ماعندييييي صخاااام

-هاا مادري بَـس اتذكر گلت...

-عُثمان: وانا اتذكررر گلتييييي انووو بكررر طلگِك!!!

نزلت راسي وظليت ساكته، تقرب عليه وانفاسه سريعه صار بوجهي وراسه منزله لمستوايه، رفعت عيوني اباوع بعيونه صايرات حمممر وعرگ گصته ناط، همس...

-عُثمان: يمته رجعتيلو؟

-هجران: البارحة

زمجر بوجهي...

-عُثمان: انتيي ماعندِك كراامه؟!!!

-شنو؟

-عُثمان: اننييي شلووون ترجعين لأنساان باعِك وهانِك ودااس عليكيي يولييي انتي شَنو من شيي بَـس فهمينييي

يحچي معصب وعيني بعينه لزگن مدا اگدر انزلهن من الصدمه، هذا مو عُثمان مچان هيچي ليش ديعيط بيه؟!

-عُثمان: ليشش ماتجاوبيين؟؟!!

تقوس حلگي ونزلت راسي وحچيت...

-هجران: اني اسفه

رجع عاط بصوت اعلى استغربت محد اجه لسه..

-عُثمان: يالحمزززة أنَا اسألهه وتتأسفلييي ؏ شَنوو تعتذرييين!!!

-هجران: مادري عُثمان ماادريي

بچيت وغطيت وجهي بأيدي، تقرب اكثر لدرجة اشم عطره، رجع گال بحرگة...

-عُثمان: ماا اصددگِك هجرااان يوليي لييش ليييش خربتي كلشيي لخاطر منووو

-لخاطر زنوبه

ضحك مستهزأ وگال...

-تردين تقنعيني رجعتييلو لخاطر زنايب؟؟

رفعت راسي ولسه ابچي...

-هجران: اي والله وداعت زينب ايي اني اصلاً ماريد بكر ولا الي علاقه بي بَـس لخاطر زينب حتى متتهجول وتعيش بين ناس ميهتمون وتعيش حياة تعيسه رجعتت لخاطرهه وبسسس

-عُثمان: امسحي دموعِك مو عليه هالافلام

-هاااي شبييييك انته ليييش متغير عليه مووو چنت تعتبرني مثل اختتتك هيچ الواحد يعامل اخته!!!

-عُثمان: لااااء مو نفس اختييي واسمعيني هجرااان بعد أنَا شحايتي بيكم (معليه بيكم) ولا تجيلي وتگوليلي بكر اذاااني بكر هاانني أنَا رجااال مااايهمني احددد زييييين مثل ما ماحترمتي رأيي ورجعتيلوو أنَا هم شلت ايدي منِك!!!

-هجران: عُثمان اني اسفه والله بَـس لخاطر زنوبه ماريدهه تربى بعيد عني انتو متحسوون بشعوري والله دا اتگطع تگططع من جوة واني عايشه ويه رجال ذلني وذل اهلي فدووه ماعندي غيرك انييي انته اخويه والله اخويه

زفر بقوه وابتعد عني، رجع للثلاجة وطلع منهه مي وهم شربه كله، حط الدولكة ؏ الميز ووگف تخصر ومنطيني ظهره، المطبخ هدووء وحتى الصاله هدوء ماكو صوت وكأن البيت فرغ وبس اني وياه هنا..

مسحت دموعي ورجعت اقطع الدجاج ويرجعن ينزلن، غوشت عيوني وگصيت اصبعي بالغلط بچيت بقوه وهوه اندارلي وصاح...

-عُثمان: اشتعلووو ول يُبا ؏ كيفِك شبيكي انتي

-عادي متعوده

غسلتهه ولفيتهه بكلينسه حتى يوگف الدم وبقيت واگفه منتظرته يگول شي معقوله رح يتركنه اني وزينب وميهتم بينه بعد؟ اذا هوه راح اني وين انطي وجهي حتى بابا وماما مزاعليني شلون بيه!!

اندار عليه وحچة بهدوء...

-عُثمان: انطيني شي تا اشيلو للچك (الدولكه) الكسرتو

رحت اجيب مكناسه ومكرافه واحيت ادنگ حتى اللمه ونزل للگاع بصفي وسحبهه مني وگال..

-عُثمان: لا تحدرين گدامي يولي

استحييت كُلش ووجهي بوخ مانتبهت ؏ روحي ودنگت گدامه يبوو يفشالتچ يهجران، لمه هوه من الگاع واني واگفه بصفه، همست بصوت غير مسموع..

-اجيبلك زنايب تشوفهه

توقعت مسمعني لان چنت اشاور روحي بَـس همه ماشالله لاقطه اذاناتهم، رفع راسه وابتسم وگال...

-راح اروح ادخن بره وجيبي هالصرگعانه

ضحكت فرحانه ورحت بسرعه اجيب زنوبه، دورت عليهه بالهول بَـس محد موجود ذوله وين راحو من جرمن ماسمعونه! صعدت فوگ لغرفه نور دگيت الباب ودخلت چانت زنوبه ؏ الچربايه وبحلگهه الملهي ونور تنظف بالغرفه من شافتني ابتسمت وگالت...

-نور: تنورت الغرفه بدخلتچ

ابتسمتلهه مجامله واخذت زينب ونزلت، رحنه للحديقه وزنوبه عيونهه تطاير منا ومناك، وديتهه لعثمان ذب جگارته واخذهه من ايدي، ضحك وگال...

-عُثمان: اسم الله بعدِك انتيشه وكسكيله

-هههه هااي شنوو هاي متأكد دتحچي عراقي؟؟!

ابتسم وگولب عيونه معاجبه، گعد ؏ المرجوحة وگال...

-عُثمان: گلت انو بعدهه صغيره وثگيله

-هاااا خو گول هيچ ليش تستخدم لغه ثانيه ههههه

-عُثمان: أنَا بالوقت الي كنت هينا تغير كلامي كثير بَـس من رجعت لخوالي حنيت ورجعت احكي نفسهم

-هجران: والله والله ومو مجامله حچيكم كُلش كُلش حلو يخلي الواحد بَـس يصفن من تحچون

غمز وحچة بخبث...

-عُثمان: يعني أنَا من احكي تصفنين؟

-هجران: هههه ايي والله

ضحك واللتفت لزينب يلعبهه ويناغيلهه وانوب نزلهه للگاع يغنيلهه وهيه ماصدگت صارت ترگص وتهز وهوه يشجعهه، سكتنه شويه وگال...

-أنَا اسف

-هجران: ماكو داعي تعتذر اصلاً مزعلت منك

-عُثمان: تا لو (حتى لو) مايصير اعيط عليكي مو من حقي بَـس والله....

-هجران(قاطعته): ادري عُثمان محروگ گلبك عليه وهسه خليني اگوم اكمل الغده لا انكتل من بيبي عطيه

عفتهم ورجعت جوة اكمل التبسي وحطيت بالفرن ورحت اشوف جواهر والبنات بَـس چانن كلهن نايمات خطيه اكيد الليل كله محد نام حتى عُثمان عيونه مطفيه ومبين عليه ضايج كُلش ؏ مرتضى وتعبان..

رجعت للحديقه چان دا يدخن وزينب تجرجر بلحيته لان طولانه، عدل گعدته من شافني وتدنه للطرف حتى اني اگعد، گعدت ؏ المرجوحه وصحت بزينب...

-ماما عيب عوفي لحيته هلستيهه

-عُثمان: عادي خليهه

-مو تتوجع

-عُثمان: عادي اكو شغلات تصهر الگلب اكثر منما طفله تجر بلحيتي

سكتت وهوه من جگارة لجگارة ويحرگ بيهن..

-هجران: تدري عميد الدين شُبه الي ترك يدخن كله لان جواهر متتحمل

ضحك وگال..

-عُثمان: ورنه (جبان)

-هجران: هههه لا لييش بَـس گول يحبهه ويخاف عليهه

هز راسه وجر نفس من جگارته وگال...

-عُثمان: اي ادري بَـس امزح وانا لو كنت بمكانو هم كان سويت هيك

-معقوووله عثماااان يتررك التدخين علمود مرة؟!!

ابتسم وهز راسه...

-عُثمان: اسوي اكثر من هيك لو تطلب الموضوع

-اويلييي هاي شنوو والله نيالهه رح احسدهه وهيه لسه ما اجت

-عُثمان: تجي وداعتِك تجي

-هجران: مبين اكو وحده ببالك؟

سألت وتندمت امداني اني يمته احچي وياه بهيچ مواضيع بَـس لاازم اچفص، هز راسه وظل ساكت شويه ورجع گال...

-عُثمان: هجران خربتي كلشي

-اووف عُثمان محد يحس بأحساسي

اندار عليه وگال...

-عُثمان: احسسس والحمزة احسس بَـس انتي استعجلتي أنَا كنت احكي ويه محامي تا ياخذ قضيتِك!

-عثماان اني گتلك بابا ميقبل ورح يزعل هواي

-عُثمان: يولي هوه شمعرفوو دحگي أنَا حاكيتو وگال الحضانه للام بَـس صارت سالفه خوالي واضطريت أأجل الموضوع وانتتي حظرتِك رجعتيلو للمايتسمى!!

-اووف شلون بيه متگوليي

-عُثمان: وداعت عيونِك اطلگِك منوو

نزلت راسي مستحية من كلامه، هاي اول مرة يحچي بهالطريقه وهوه چنه انتبه ؏ روحه وغير الموضوع بسرعه...

-عُثمان: هجران انتي تثقين بيه صح؟؟

-اكييد

-عجل لا تهتمين انتي بَـس اريدك تصبرين وتحاربين بكر هلكم يوم وتحملي بَـس اهم شي ماترجعين تضعفين وتخضعيلوو هجران اوعدينيي تتركين بكرر

-اتركه والله

-ما ترجعيلو ابدد؟؟ تا لو راضاكي؟؟

-ابدد والله مستحيييل اني ماريده بعد وگتلك رجعت لخاطر زنايب

هز براسه ورجع طلع جگارة ويحرك برجله ويعظ ؏ شفته السفليه مبين كُلش متوتر..

عفته ورجعت للبيت كمل الاكل وصبيت وفرشت السفره واجت رهف تساعدني تشيل المواعين..

-هجران: رهوفه شصار ويه مروان افتهمو؟

-رهف: ما اظن لان ابوي هادئ هسّ معناتهه محد افتهم بكتله ستار

-زين اگولچ يمكن ما مات؟ يعني جوز بَـس فقد الوعي

-رهف: لا عمو مرتضى أكد ان مات

-هجران: هسة انتي ليش هيچ زعلانه حبيبتي رهوفه ميلوگلچ الزعل

نزلت راسهه وظلت ترتب بالمواعين، رفعته وحچت بقهر...

-رهف: انه اكتشفت شي دمر حياتي كله بسبب انسان چلب حقير الله ينتقم منه وحسبي الله ونعم الوكيل بي

-هجران: كلشي اله حل صدگي

-اله هالشي هجراان انه ميته من البارحة لليوم صح تشوفيني نايمه بَـس انه ما نام اله من القهر وماريد افكر بالموضوع وانه اصلاً مزاعله ابوي چي ظم السالفه عني

-لااا رهف غللط شلون تزاعلين ابوچ ليش ابوچ انسان ينزعل منه!! حرام عليچ شوفي حالته تكسر الگلب انوب تزيديهه عليه وتزعلين

-اي لان ما حچالي

-شيحچيلچ يا عيني انتي تعرفين هالموضوع حساس وابوچ من خوفه وحرصه عليچ هيچ تصرف، تدرين اوقات افكر بيني وبين نفسي اگول عميد الدين شگد مُثقف وواعي ولا كأن جنوبي وعايش هنا

صاحت بوجهي...

-رهف: وشنييي هااي جنوووب جنووب جنوووب جنوووب شني اشايفينه ياهو الاجه واستهزأ انتم شرووگ ويعيرونه معداان احنه مثقفين ودارسين ومتعلمين لييش تعاينولنه بتك عيين

-هجران: لاا رهفف فهمتيني غلط والله اني ماقصد هالشي بَـس انتو عدكم عادات وتقاليد اكثر من عدنه وهالاشياء تحكمكم فَـہ ؏ هالاساس دا احچي منتبهه ابوچ ميهتم كُلش بالعادات والتقاليد وهذا الشي الي معجبني بَـس سالفه انتو جنوب والله تنحطون ؏ الراس بالغيره والكرم والشرف

هدأت شويه وراحت تجيب گلاصات، ضجت كُلش هاي شبيه اني ماعرف احچي واچفص ابد ماعنيت همه جهلاء لو انقص منهم، ماتحملت رحت عليهه حظنتهه وبوستهه وهيه گلبهه طيب نفس ابوهه وگالت اصلاً مازعلت واعتذرت لان صيحت بوجهي..

رحت للصاله وچانو الكل متجمعين اله عميد الدين ومن سألت جواهر گالت...

-ميقبل يآكُل موتني

-انتصار: حبوبه عوفي ؏ راحته لا نضغط عليه

-حجية عطيه: شني هاي لا نضغط عليه شكوو روحي ندهييله بساع

راحت جواهر ورجعت گالت ميقبل، اللتمينه حول السفره وزنوبه بحظن عُثمان يوكلهه وترست تراكه روبه وكل شويه لاطخته بشي واني ميته من الفشله بَـس هوه يضحك ويگول...

-عُثمان: واضح بابه مشتاقتلي شسويتي بيه صرگعانه

ضحكنه كلنه وزنوبه شافتنه نضحك تحمست وباسته ؏ خده وحلگهه كله احمر وروبه يبوووو شسوت..

كملنه غده وغسلت المواعين ونور وشهد ساعدني وخلص اليوم الاول ؏ خير...

**

"جواهر"
مرن يومين وماكو لا حس ولا خبر من مروان لو لأي واحد من خلفته وعميد متخبل ويلوب ليش ما هدوا علينه لسه ومعقوله مادرو بالسالفه...

-يا عمريي اهدأ كافي عميدي مو زين عليك صارلك يومين لا اكل ولا نوم كافي ارحم حالك

-عميد الدين: جوااهر رحمه لأبوچ سكتي راسي رح ينفجر

-اي ليش ينفجر غير متآكُل

زفر بقوه وگعد ؏ الچربايه وحط راسه بين ايديه، اندگت الباب دخلت رهوفه بَـس شافت ابوهه بچت يا ربييي يعني هوه حالته بالضبم انوب يشوف بنته تبچي شيصير بي..

اجت تگعد بحظنه وحاوطت رگبته وتبچي وهوه يهدأ بيهه، سوده عليه هيه هم صايرلهه يومين ممروده مرد لا اكل ولا شرب بَـس نايمه..

-رهف: بابا انه اسفه بَـس والله انه تعبانه

-عميد: عساهه بيه ولا بيچ يبعد ابوچ

-رهف: عمو مرتضى وصل؟

-عميد: اي بنيتي دزلي رساله وگال وصل

-چا مادگيت عليه؟

-عميد: مايگدر لان يشرج هواي عليه فَـہ گال بَـس يشتري شريحة يتصل بينه

-رهف: هااا، بابا حباب تعال اكل وياي

-لا بابه روحي انتي انه ماشتهي

-رهف: والعباس ازعل وماحاچيك طول عمري

-لا بله شني شو صايره تهددين انتي

-رهف: مو اخافن عليك

-عميد: اغدي فدوه للتخاف عليه

-رهف: يعني تگوم تآكل وياي مو؟

هز راسه وابتسملهه واني صحت...

-جواهر: عميييد لعد صارلي يومين اقنع بيك حچاايه وحده من رهف تگووم هااي شنوو

-رهف: هه هه ابوي يحبني اكثر منچ ام عيون

-جواهر: بسييطة ابو بريص اني اعلمچ

-رهف: خايبين انتي شريچتي (ضرتي) مو مرت ابوي

-جواهر: هه ضحكتيني

-رهف: شوف شوف بابا شلون انضغطت عليك الله بابا ياهي تحبهه اكثر انه لو جواهر؟

-عميد: بابه شني هالسؤال التافه اكيد انتي

-جواهر بشهگه: يعنييي هيچي عميدييي

غمزلي وضحك واني هم ضحكت، گمنه كلنه نتعشه وهوه بَـس نقش ورجع للغرفه حتى ينام..

دخلت لغرفته ونمت ؏ صدره ورفعت راسي يعني صرنه وجه بوجه...

-جواهر: حُبيي اريد انام بحظنك اليوم

-عميد بضحك: خايبين من اگلهه انتي صلفه تزعل شني ولچ تنامين بحظني

-يااا هاي شبييك اريد انام بصفك معليه

-اي حتى اموتن وما نام

-جواهر: وليش متنام؟

-يعني شتتوقعين من زلمه نايمه بحده حبيبته ومايگدر يسويلهه شي شني هالعذاب

ضحكت وحطيت ايدي ؏ صدره وهمست...

-جواهر: ومنو گلك لتسوي شي

-عميد: اييي هوااي انه اكظچ وصحتي عميد ابووي عمييد اخووي عمييد للعرس عمييد صخام بوجهي

-جواهر: چؤؤ غيرت رأيي

فتح عيونه وعدل گعدته، حرك راسه ممفتهم كلامي واني منين اجتني هالجرأة ماعرف بَـس يمكن لان شفته تعبان وحالته بالضيم اجت هالفكره ؏ بالي...

-جواهر: اي شبيك عادي نتزوج هسه بدون لا بدله عرس ولا زفه

-عميد: انتي من كل عگلچ؟

-يي اني أحبك وميهمني كل هالشكليات المهم احنه سوه ومن تفض سالفه مروان الله يلعنه نسوي عرس

-عميد: وابووچ؟؟!

-ماما دتقنع بي وچنه بده يقتنع

-عميد: وهسّ شني؟؟

-مادري انته شتگول؟

فاتح عيونه ممصدگ حرك راسه نافي وگال...

-عميد: بابه ترا احنه موش اتراك خاف هالمسلسلات مأثره عليچ

-حبيبي شعليهم الاتراك خلص اصلاً اني چنت خايفه ومتردده واجت منك السالفه يله تصبح ؏ خير

گمت من فراشه وجرني من خصري ونبمني ؏ الفراش، طبع قبلات ؏ وجهي وشفايفي نزولاً لرگبتي چان ملهوف لكن هادئ وكأن نستله هشة بين ايده ويخاف يأذيهه لو يخرب شكلهه الحلو، نزع قميصه و........

(طفو عيونكم شباب ويله نطلع بره🦦🚶🏼‍♀️)

حسيت الصبح ؏ شي يگرصني بوجهي ورگبتي، فتحت عيوني چان عميد ديبوس بيه، ضحكت وگلت..

-صباح الخير

-عميد: صباح الحُب والعشگ والهياام والجمال والرقة والترافه

-هااي شنو دتوصفني لو دتتمنيلي صباح خير

-عميد: بويه سودنتيني چنت انتظر يمته تصحين

-جواهر: وهسه گعدت يله اروح اسبح حتى نتريگ اليوم صباحيه عرسنه ترا هههه

-ولچ تعااي يا ريووگ يا دنيااا يا اثول يعوف هالكيك ويروح يآكل بيض

جرني مرة ثانيه و......

طلعنه من الغرفه وخاله انتصار هلهلت عززاا العزااانيييي انفضحتتت هاي شمعرفهه يبااوو يفضيحتچ بجوااهر، باركتلي وبوستني وكأن صدُك هسة تزوجت اجن باقي البنات وبوسني وشهد وهجران يغمزن ويلمزن..

-شهد: اتصلت بـ ماما وگلتلهه

-جواهر: صخاام وشگالت

-شهد: فرحت وگالت ؏ الخير وبَـس يرجعون تسويلچ احلى عرس

شگد فرحت من عرفت اهلي يدرون وچنت متأكده عميد الدين رح يگوللهم لان مستحيل يسوي شي بظهرهم..

**

"هجران"
البيت مخبوص هم سالفه مرتضى وهم سالفه جواهر وعميد الدين كُلش كُلش فرحت لجواهر والفرحة واضحة ؏ عيونهه وحتى عميد..

نظفت البيت ورحت فوگ اسبح ورتبت روحي، رجعت نزلت ويه زنوبه وچانو الكل ملتمين وديتناقشون شلون بيهم اذا مروان افتهم ورجع عميد الدين متوتر ويگول لازم دم واذا حنو عليهم ياخذون فصليه ومن سابع المستحيلات يقبل ينطي رهف فصليه ومستعد يضحي بروحه لخاطر بنته وخاله انتصار وبيبي عطيه متخبلات ويقنعن بي بلكي يقبل ينطي رهف ؏ الاقل احسن مما نخسر روح هذا من وجهة نظرهن..

قريب العصر واجه بكر باوعلي واشرلي حتى اصعد وراه، ردت اللبسه وماروح بَـس گلت يله هسة شراح يسوي قابل احسن مما يتخبل علينه والجو متكهرب..

دخلت لغرفتي وهوه چان هستوه طالع من الحمام ولاف المنشفه ؏ خصره، گال..

-بكر: هجران انه اليوم رايح لبغداد واخذ نور وياي انتي هم حظري غراضچ بساع حتى نطلع

-شنوو؟؟ وين اروح وياك؟؟ ماكو ماتحرك من هالبيت

-بكر: شني هوه بكيفچ جااي اگلچ شغليي كله ببغداد صار وزحمه عليّ الروحه والرده وجاي اتعاقد ؏ بيت اريد اشتري هناك

-ميهمني ماروح وياك لأي مكان، خاف انته نسيت اني هنا بَـس علمود زنايب مو لخاطرك ترا

-شنييي ولچ شو مستگووية انتييي!!! تحظرييين غريضاتچ لا والزهرة اتصرف بشي مايعجبچ

-هجران: معليه سوي التريده بَـس مال اروح وياك انسه اني ابقى هنا

صار يعيط ويشمر بالغراض يريد يخوفني اني صح متت من الخوف بَـس ما تنازلت وظليت مُصرة وهوه شاف ما مني رجه ولبس ملابسه وگال...

-بكر: الله يطيح حظچ يا ثووله عود ردت اسوي براسچ حظ واعدل بينچ وبين نور بَـس والعباس انتي موش شكول رحمه ظليي هنا خداامه وانه هناك اسرح وامرح

-هجران: ماظل هنا منو گال ابقى ارجع لأهلي واخذ زنوبه ويايه

-بكر: تحلميييين تعرفييين شني يعني تحلميييين امووووتچ اذا رحتي وروح امي هجران احرمچ من بنيتچ طووول عمرچ وماتشمين ريحتهه بعد مو انوب تردين تشوفيهه

-هجران. انتته شبيييك حراااام عليك مو متريدنييي خلص عوفنييي وخليني ارتاح اني وبنتي انته اصلاً رايح لبغداد معناتهه زينب متجي وياك ورح تفارگهه واوعدك شوكت ماردت تشوفهه والله اخليك وادزلكياهه يومين بالسبوع والله

-هه لا بله سمعي هجراان هالسالفه طلعيهه من راسچ تردين انتي تولين لبيت اهلچ الله ومحمد وعلي وياچ بَـس مال زينب تطلع لااااء

-وانته شمستفاد منهه وانته هناك وهيه هنا!!

-بكيييفييي المهم ما تربى يمكم وتظل يم اهل ابوهه وانه اظل كل اسبوع اجي اشوفهه لا لبالچ انساهه

گال هالكلام وطلع من الغرفه، اخذت زينب وردت ابچي وگلت لا ميسوه اذب دمعه عليه مثل ماگالو جواهر وعثمان..

لليل وگمت اساعدهم بالعشه گليت الكباب وبالي سارح، صبينه العشه واللتمينه كالعاده بَـس مو مثل قبل الكل حاط ايده ؏ گلبه وخايف، اتفرقنه وكلمن راح لغرفته وزنوبه چلبت بعثمان وگال بَـس انطي المميه مالتهه وينيمهه عنده..

انطيته كلشي يحتاجه وصعدت فوگ، نمت وحسيت ساعه بـ 2:00 بالليل حلمانه حلم موحلو وميته من العطش نزلت جوه اشرب مي واخاف زينب وعُثمان گاعدين، وگفت بباب غرفته اسمع خاف اكو صوت بَـس ماكو سنطه..

رحت للمطبخ وشربت مي واكلت نستله لان حسيت بجوع، واني واگفه نززني صوت عمرري وحياتي ما انسى، صوت فحولي قوي يصيح بنبره تخطت طبلة اذاني جاي من باب الحوش دخولاً للمطبخ...

-عميييييييد الديييييييين وييييينك يااااا عميييييد الديييييييين...

يتبع💋...

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق بين الفقرات حبايبي❤️.
+
بالنسبه للتعليقات اليگولون اختصري اعذروني مرح اختصر شي وسبق ونوهت بخصوص هالموضوع ورح اسرد القصه بتفاصيل وابينلكم احداثهه مثل ما عاشوهه الابطال🥰❤️.