شفاه مخملية الفصل الخامس والعشرون 25 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية"

بقلم: زهراء السلامي.

#جواهر تگول:
ياريت آصير سوار بيده
وكَلاده ليلو فـــوك جيده
بيّه ونين يكَـــــول آريده
مشــتاك والســجه بعيده

♛ ♛ ♛ ♛ ♛ ♛ ♛ ♛ ♛ ♛

"هجران"
طلعت لجوري اسألهه وافضفضلهه اكيد هيه عدهه الحل وتساعدني، دگيت باب غرفتهه بَـس ما اجاني صوتهه الطبيعي، لا اجاني صوت عياط وبچي، فتحت الباب ؏ وسعهه وطبيت عليهه، نايمة بفراشهه شعرهه منفوش وكحلتهه سايحة ووجهها صاير خريطه، تعيط وتلوب

-جوووورية شبييييچ؟؟؟؟!

-جوري: ااه هجران رح امووووت

ركضت عليهه اشوف شبيهه، نهضتهه ؏ ايدي وهيه تلوب وتجر بشعرهه من الوجع، صرت ابچي ؏ حالتهه

-لچ شبييچ يعمريي سوده بوجهي شصار بيچ جوري؟!!

متجاوب، مستمرة تعض باللحاف وتبچي، عفتهه ورحت اركض لعمة سلمى چانت نايمة، دگيت الباب عليهه وحاولت قدر المستطاع ما اخوفهه بَـس گعدت مخروعه، گالت بهلع

-هاااا شبيييچ تدگين الباب هيييچ؟!!!

-عمه جورية تبچي وتلوب ماعرف شبيهه

لطمت صدرهه وصاحت "يمة راح الولد" دفعتني حيل وصعدت الدرج مثل المخبله واني وراهه، راحت لجوري وانوب عبالي تهديهه گامت تدگ وتلطم ؏ وجهه وتصيح "مات الولد، مات ابن فيصل" تخبلت من شفتهه هيچ صحت بعصبيه

-عمممممه شبييييچ امشييي ناخذهه للمستشفى!!!!

هزت راسهه بمرات متتاليه وطلعت من الغرفه واني جريت جوري لحظني اهدي بيهه، دقايق ورجعتلنه عمه گالت لبسي جوري حجاب رح يجي فيصل، جوري صاحت بجزع ودموعهه تسري

-جوري: ابنيي حيمووت ابني

رديتهه اهدأهه

-اسم الله حبيبتي لتگولين هيچ

ماطول فيصل عشر دقايق واجه طاير، رغم اني اشوفهه قصير وناعم بَـس گدر يشيل جوري ونزل بيهه الدرج، خفت عليهم يوگعون لان مبين مترنح بمشيته بَـس والله دبرهه

صعدنه بالسيارة واني لابسه بَـس شال ذابته بعشوائيه وعبايه ؏ راسي، سندو جوري عليه وهيه مستمرة تبچي وتصيح تخاف ابنهه يموت، حاولت احچي وياهه واهدأ بيهه بَـس متتقبل أي شي بَـس تعيط

بالشافعات وصلنه للمستشفى من بعدما ردنه ندعم كم مرة من وره خوف فيصل عليهه، حبيت من گام يصيح

-طززز بكلشي جوووري يروح ولد يجون عشره غيره المهم انتي زينه!!

دخلنه للمستشفى ونيموا جوري ؏ سديه ونقلوهه لصالة الولادة، دخلوهه لوحده من الغرف واحنه وگفنه ننتظر شيصير، طولت جوه وهمه يفحصوهه ويحاولون يوگفون النزيف، تذكرت امي وگلت اتصل عليهه اگولهه اخاف يصير شي واني ماعرف شتصرف

اخذت موبايل عمة سلمى واتصلت خطيه صارت تبچي وتصيح "جوري زينه؟" ماعرفت شجاوبهه فَـہ گلتلهه تعالو للناصريه خاف كلشي يصير اني ماعرف شسوي وحدي، سديت الخط منهه وطلع الدكتور، گال بأستعجال

-وينه زوجهه؟؟

-فيصل: انه اانه زلمتهه دكتور

-الدكتور: تحتاج عمليه قيصريه حالاً لان الطفل بي نفس ومحتمل نگدر نلحگ عليه

-سلمى: ايي اييي يله بسرعه سووا العمليه!!

فيصل أيدهه واني تدخلت

-هجران: لحظه هاي شبيكم، خاف العمليه الهه ضرر ؏ جوري!! دكتور شتگول جوري رح تكون زينه؟

-ان شالله لتخافون، هيه من بعد الفحص توضح هيه حامل بنص السابع والجنين شبه اكتمل بَـس يحتاج خدج

-سلمى: لاا هيه حامل بنص السادس!

توضح جوري مخربطه بالحساب والف الحمد لله الطفل زين وان شالله رح تولد، بَـس مراح تگدر تجيب طبيعي تحتاج عمليه، ميخالف المهم تگوم بالسلامة..

راح فيصل يوقع ؏ اوراق وماعرف شنو بعد واني وعمه سلمى گاعدات ننتظر، شويه واجو عمه دلال وانتصار وزيد وياهن، طولت عمليتهه بالساعتين وطلع الدكتور طمنه ان جابت ولد، عمه سامى من الفرحة گامت تهلهل وعمه دلال ماصدگت هم صارت تهلهل وياهه، انسبت المستشفى والناس گامو يباوعولنه، وفيصل من فرحته وزع كله حمرات (خمسه وعشرين الف دينار) ؏ الممرضات الچانن وياهه بالعمليه

ردنه نشوف الطفل بَـس گالو رح يسووله فحوصات ويحتاج خدج، ركضت ادخل ؏ جوري بالغرفه ناقليهه بغرفه خاصه لان فيصل گاللهم ودفع زيادة، سوده عليه وجهها اصفر وذبلانه، بدلتلهه ملابسهه ونامت حتى ماسألت ؏ ابنهه من التعب

للعصر واجه بكر واحمد وغيث يتحمدولهه ؏ السلامة، وباركو لفيصل بجية علاوي، سموا "علي" لان طلبته من الرضا سلام الله عليه ونذرت تسمي علي

طول الوقت اني گاعده وبكر يباوعلي، بَـس هالمرة ماتنازلت ولا حاچيته ولا تقربتله، همست لعمة سلمى اروح احچي ويه الممرضة الاجت غيرت مغذي جوري ؏ فد شغله، طلعت وگام بكر ويايه، تجاهلته ورحت اسألهه واستفسرت ؏ الي شاغل بالي، خفت صار شي لأبني اثر ضرب بكر البارحة، بَـس طمنتني وكالت ماطول مانزل شي معناهه الطفل زين وماكو خوف

ترخصت منهه ودرت وجهي چان بكر واگف قريب مبين چان يسمعني اسألهه، تقرب عليه وهمس

-الحمد لله

ماحچيت شي رجعت للغرفه وگعدت بمكاني وهوه اجه بصفي، احس بلسانه حچي يريد يگوله واني صح زعلانه عليه بَـس الفضول كتلني اعرف شيريد، تدنه عليه وهمس بصوت ناصي

-شلونچ؟

-بنعمة

-احم شو طلعتي من البيت ومانطيتيني خبر؟

درت وجهي اباوعله متفاجأة!! يعني اختي بهالحال ومخبوصات خبيصه وياهه ويريدني اتصل بي استأذن، سكتت وماجاوبت ماعندي طاقه احچي من البارحة بدون عشه ماگدرت آكُل شي وفرغت معدتي شگد ما تقيأت

حس بيه مزاعلته وگام من يمي، سولف ويه فيصل شويه وطلع، حزت بخاطري ان حتى ما حاول ويايه ولا اعتذر، صح الاعتذار مراح يسوي شي بَـس ؏ الاقل يرجعلي كرامتي

طلعو بقيه الولد وبقينه اني وعمه وفيصل وجوري لسه نايمه، قريب العشرين دقيقه ورجع شايل علاگة بيهه لفات وقواطي ببسي، ريحة الكباب تسطر واني جوعانه متت عليه بَـس ماتنازلت وگتله انطيني لفه

انطه اربع لفات لفيصل ولفتين لعمه سلمى واجه ناحيتي مدلي لفه، غلست وسويت روحي كأنما مجاي يحاچيني، من شافني ساكته رجع گعد بصفي وحركني من چتفي ؏ كيف، گال بصوت ناصي

-اكلي هجران مو زين عليچ

دموعي بدت تتجمع بعيوني، لسه بعدني مهضومة من البارحة وگلبي صاير نار، رجع همس

-لخاطري اكلي شوي

درت وجهي عليه اباوع لوجهه، چانت عيونه بيهن هواي حچي بَـس ماعرف شنو تفسيره، اشوف بيهن خوف ؏ انكسار ؏ تعب، اشرلي براسه يشجعني اخذ اللفه بَـس ماسكتت گلت بصوت مهزوز

-انته البارحة ضربتني وهنتني وجاي اليوم تگولي اكلي لخاطري؟!

-هجران چنت معصب انتي ماعرفتي طبعي!

-يعني كلما رح تعصب تكتلني بهالطريقه؟

-ان شالله ما تنعاد، يله صارلي شكثر ماد النعمة مايصير بويه حرام

استسلمت لبطني وجوعي واخذت اللفه من ايده، فتحلي قوطيه ببسي وانطانياهه، اني اعترف هوه حنين بَـس من يعصب ميعرف امه من ابو

دگ موبايل عمة سلمى چان المتصل امي، گالو وصلو للسيطرة ماظل شي ويجون، همست بصوت ناصي

-بكر اريد ارجع ويه اهلي من ياخذون جوري

دار وجهه عليه متفاجأ

-ليش!!

-تعبانه واريد ارتاح

-ليش مامرتاحة ببيتچ؟!

-يا بيت هذا؟؟؟ صدك اريد اسألك ليش الكل گاعد بهالبيت؟ اني سألت مرة غزل گالت هذا بيت ابوك وهوه ميقبل احد يطلع بَـس من اجيت توضحلي هذا بيت سيد عباس وورثه عميد الدين!!

-اي ابوي ماعنده مُلك

-ليش؟

-مفلفس فلوسه ؏ سلمه يشتريلهه بهالذهب والاثاث ويرد ليوره

ماعلقت ؏ كلامه ورجعت لموضوعنه الاصلي

-هسه گتلك اريد اروح لأهلي

-صبري مو هسَّ ترحين

-ليش عود؟!

-لان هسَّ افتهمت اختچ راح تروح ومايصير ثنينچن تطلعن من البيت سوه! بله احد سأل عنچن ما يستغرب الچناين ثنينهن ببيت اهلهن؟

-وليش يستغربون؟ عادي اريد اروح لأهلي

-هجراان بسچ گتلچ مو هسَّ روحي وره زفة غزل وانه اخذچ بيدي

-وعد؟

-والعباس اخذچ

-بَـس تره بعدني زعلانه منك وما احاچيك

ضحك ؏ كلامي وهز راسه

-خوش مثل ماتردين

سكتنه وانتظرنه يجون اهلي، ما تأخرو اقل الساعه وانخبصت غرفه جوري خبص، جايه ماما وبابا وفاضل وياهم، سلمت ؏ امي وحظنتهه بكل قوتي ولا ارادي نزلت دموعي، استغربت منهن واشرتلي براسهه شكو، جاوبتهه اطمنهه

-ولشي ماما بَـس خفت ؏ جوري

-صباح: لااا شوفيهه شحلاتهه يممه اللهم صلِّ ؏ محمد وال محمد، يممه ام علاوي بعد گلبي بنيتي

وجرتهه وبوستهه وتشمشم بيهه، اللتهيت وياهن نسولف شويه وبكر گال يرجعني للبيت حتى ارتاح، شگد توسلت بأمي تقنعه يخليني ابات وياهم بَـس ماما ماقبلت تگول خاف اوگع هنا من الارهاق

رجعت للبيت ومشت 3ايام طبيعيه مخبوصين ويه جوري واني انشغلت اشتغل واكرف واطبخ واغسل وما ملحگة، لان اخذت شغل جوري هم، لان نرجس گامت تدردم وغزل معتكفة بغرفتهه متقبل تطلع واصلاً حلا مو بالبيت لان صارلهه شهرين متزوجة بَـس ماحظرت عرسهه چنت رايحة زيارة لبيت اهلي بوكتهه

بقت ماما يمنه بالبيت بَـس حاسه اكو فجوة بيني وبين بكر وسألتني كذا مرة بَـس ماحچيت شي، واني وياه منحچي وحتى بالغرفه افرشله بالگاع ينام، وهوه هم ماحاول يراضيني لو يحاچيني چان دائماً معصب

چنت واگفه بصف الكنتور ارتب غراضي علمود روحة بغداد اليوم راح نروح العصر، واجتني جوري گوة تمشي

-جوري: حرامات ردت اجي وياكم

-يله عمريي ان شالله ؏ الجايات

-ان شالله، اگولچ شنو سالفتچ ويه بكر؟ صاير شي بيناتكم؟

-هاااا لا ماكو شي

-اكيييد؟؟

-اي حبي شكو قابل

هزت راسهه وعافتني، ماردت احچيلهه شي خاف تزعل وتضوج وموزين عليهه لان ترضع وخاف ينضر ابنهه وامي هم ملتهيه وياهه وخاف تصير مشكله وتتعقد الامور فَـہ اللتزمت بالصمت حالياً

سمعت صوت عميد الدين جوة يصيح حتى نطلع واني كملت كلشي ونزلت طايره من الدرج وطُبببب زلگت بجواريبي ووگعت بآخر درجة، مچان اكو احد بالصاله غير بيبي عطيه وعميد الدين، اجو يركضون عليه وعميد انخبص ظل يصيح

-الله الله الله الله علوويه تأذيتي بوويه؟؟؟ اخذچ للمستشفى؟؟

-حجية عطيه: شمالچ حبوبه ثوله شمالچ تهوبزين موش انتي حبله يالسلبوحة

-عميد: هجران انتي زينه؟؟؟ شمالچ ماتجاوبين؟؟

من الفشله انبلع لساني ووجهي انطعن احمر، هزيت راسي بـ "لا ماتأذيت" لان صدُك الوگعة مچانت قويه وقريبه ؏ الدرجة الاخيرة

-لا لا سيد ماتوجعت

-عميد: الحمد لله، چا يله البنيات ينتظرنچ بالسيارة

طلعت گدامهم واني اركض وعميد طلع ورايه، گال بصوت ناصي

-بهيده بهيده علويه يواشچ بويه ماطايرين

ما اللتفتت اصلاً اريد بَـس افضهه وادخل السيارة، طلعنه سيارتين واليسوق مرتضى وعميد، بكر ما اجه ويانه لان گال عنده شغل ويجوز يلحگنه ويجي باچر

اني گعدت بسيارة مرتضى ويه غزل وعمتي وعمة دلال، وبالسيارة الثانيه عمه انتصار ورهف وبيبي عطيه وفتوح ونرجس ويه عميد الدين ركبو، الطريق چان طوويل وممل بَـس بداخلي متحمسه لان رح اشوف صديقاتي "جواهر وشهد" وبالاخص جواهر صارلي شگد مشايفتهه ومشتاقتلهه كُلش

گظيت الطريق بَـس اتقيأ، وعمة سلمى ملت وگالت بجزع "نامي وخلصينه" حزت بخاطري هالكلمة رغم غزاله وعمه دلال اشرنلهه حتى تسكت وهيه ولا اهتمت

سندت راسي ؏ الشباك وجريتهه نومة لحدما حسيت بغزل تحركني ؏ كيف

-غزل: هجرانه وصلنه

گمزت من مكاني وتوترت حالتي حاله وريحتي اكيد مو طيبه من الاستفراغ خوما يشوفوني هيچ الناس، انطتني غزاله بطل مي وغسلت ورشيت عطر وحطيت من حمرتي المخملية بَـس ماطوختهه سويتهه خفيف

دگينه الباب عليهم وطلعلنه حجي اسماعيل وحلاوة وبعد رجال وياهم، تسالمو بحرارة ودخلونه للبيت، بباب المطبخ چانن جواهر وشهد واگفات جرني حيل وحظنني وشهد راحت ؏ غزاله وبقيه البنات واني وجواهر لسه واگفات نتسالم

بعدتني عن حظنهه وگالت وعيونهه الزمردية تلمع

-جواهر: لچ مشتاااقتلچ كوووومة

-والله اني اكثر بقاطااات

ضحكت بدلال وراحت تسلم ؏ الباقين واني گعدت بكرسي موجود بالمطبخ، دورت عيوني بمطبخهم شكبره وكوانتراتهم والترتيب والرقاوة صفنت عليهه، اني ادري بأهل جواهر كُلش متمكنين وزناگين لان ابوهه وامهه ثنينهم اطباء

راحو النسوان الكبار جوه يسولفن واني بقيت ؏ گعدتي اباوع لجواهر تروح وتجي ترتب بالاكل والمواعين

تمايزتهه شلون صايره حلوة اكثر من قبل، عود هاي نفسيتهه تعبانه واني نفسيتي تعبانه اهمداني شگد مرعبله، سمنانه بَـس جسمهه صاير بعد احلى وخصرهه كُلش برز وهيه لابسه بنطرون جينز وقميص بنفسجي وذيل حصانهه يلعب واصل جوة وركهه وگاصه كدله كُلش لايگتلهه، كمت من مكاني ورحت گرصتهه من زندهه وهمست

-انطييييني السرررر بسرررعه شمسووويه وهيچ حليانه وسمنانه؟!!

گالت بقهر

-يا سر يمعوده غير بَـس آكُل من الضوجة والقهر

-لچ يا قهر دباعي الجسم منحوت والشعر يخبل وبشرتچ اصفى وابيض من حياتي يمممه قل اعوذ برب الفلق خاف احسدچ

ضحكت قوي وضربتني ؏ راسي بخفه، بادلتهه الضحكة ودخلنه جوه للنسوان، تضايقت من نظرات ام جواهر چانت تباوعلي بنظرات غريبه، ومن تدنت عليه وهمستلي

-هجران ليش هيچ متغير شكلچ؟

حصرتني الدمعه وردت اطم روحي، طبعاً تشوفني جگمة وهيه تشوف نفسهه وبناتهه وحده احلى من الثانيه، انتبهت لجواهر غمزتلهه وگالت بضحكة

-يااا ماما صدُك كذب ترا البنيه حامل وهذا طبيعي يتغير شكلهه ههههه تذكرين فردوس شلون تصير من تحبل

ابتسمتلهه امهه وسكتت، نزلت بنيه شابه من الدرج لا ارادياً تعلگت عيوني عليهه، لابسه بنطرون ابيض حصر وكيمونه وردي فاتح، شعرهه واصل لچتافهه اشقر من النوع الغجري مثل جواهر، وعيونهه هم خضر كُلش تشبه جواهر تگولون هيه التوأم مالتهه بَـس هاي شكلهه اكبر، وگفت بأول الدرج وصاحت بصوت ناعم يا الله حتى صوتهه يشبه جواهر

-هلووووز

الكل دار عيونه يباوعلهه، سلمى فتحت ايديهه وصاحت

-فردووووس يااا روحييي هاااي شنو انتي هناااا

-فردوس بدلال: لا خالتو بعدني ببيتي

-سلمى: اويلي منچ ام لسان هوه جواهر ماخذه منچ اللسان هههههه

ضحك الكل ونزلت البنيه الي صاحولهه "فردوس" وسلمت عليهم وشلون تباوسهن عبالك گوة وعيون فتوح گصتهه گص ونرجس گلبت وجهها، وصلتلي وگمت ابتسمت بوجهها، جواهر گالت

-فردوس هذي هجران صديقتي

ابتسمتلي مجامله واشرتلي بيدهه هلوو، ماعرفت شلون اجاوبهه يعني اني هم اسوي هالحركة لو شنو بالضبط؟ عافتني وراحت گعدت ؏ التخم وعيونهه ؏ اظافيرهه، تقربت لجواهر وهمست

-اختچ كُلللللش حلوووة

-ضحكت: بَـس مو احلى مني

-ههههه اكيييد

گامن البنات يجيبن المواعين مال العشه وفرشوا سفره وحده مثل منسوي ببيتنه بالناصريه، جابن الاكل واني ردت اگوم اساعدهن بَـس شهد ماقبلت وگالت روحي ارتاحي واذا اريد اغسل هم الحمام موجود بآخر البيت، صدُك اريد اغسل وارتب نفسي اخزي بيناتهن وهنه عطورهن تفوح ومكياجهن شلونه

ماندليت يا باب ادخللهه فَـہ لا ارادياً فتحت اول باب صارت بوجهي، همزين طلع الحمام بَـس چانت فردوس واگفه تعدل بشعرهه گدام المرايه، تعذرت منهه وردت اطلع، بَـس وگفني سؤالهه

-انتي زوجة بكر صح؟

-اي

باوعتلي من فووگ ليجوة وهزت براسهه

-اممم فرصه سعيده بيبي وسلميلي ؏ بكوري گوليله فردوس كُلش مشتاقه

فتحت عيوني واني متفاجأة، وهيه بادلتني بضحكة

-هههه شبيچ بيب ترا بكر صديقي من قبل لا يصير زوجچ

-هاااا؟؟

-دائماً يجي لبيتنه وعلاقتنه كُلش قويه وياه

-هاا مادري اني

-وهسه دريتي يله چاووو

عافتني وراحت واني ظليت بحيرتي، بكر وين يجيهم هنا؟ زين جواهر ليش ابد مذاكره هيچ موضوع من قبل؟؟ قررت اتناسى الموضوع حالياً واسأل جواهر من تفرغ حتى افتهم اكثر

غسلت وجهي وانتهت طالعه حبايه جديده بخدي اووووف يالقهرر هااي شوكت طلعت!!! همزين جايبه خافي عيوب حطيت عليهه شويه خف الاثر يله احسن من مبينه شكبرهه

طلعت من الحمام وچان الكل گاعد بالصاله حتى الزلم، والسفره مفروشه والاكل مصبوب، اشرنلي جواهر وشهد اگعد بصفهن واني رحتلهن

اكلت شويه بَـس نفسي چانت تلعب واللم بظهري موتني، جواهر همستلي

-شبيچ حُبي؟

-لا ولشي بَـس شويه تعبانه

-تردين ترتاحين بالغرفه واجيبلچ عشه هناك؟

-ابتسمتلهه: لا يروحي لا تعبين نفسچ

-والله شبيچ ابد مابيهه تعب، وهم فرصه اني اجي واگعد وياچ لان ماريد اگعد ويه عميد بنفس السفره

-يااااء صدُك تحچين لييش ولچ الرجال كلشي ماسوه!

-ادري وولا رح يسوي بَـس اني مماخذه راحتي هنا

-يله ماشي براحتچ

دلتني ؏ غرفتهه صايره بالطابق الثاني وصعدت تحت انظار الكل مستغربين، كُلش خجلت بَـس شهد گالت بصوت مسموع

-ولللچننننن رح ترحن وحدچنننن وتعوفني هنااا

-جواهر: اشش انتي گعدي وسكتي اريد اسولف ويه هجران

-شهد: اني الچن بَـس اصبرلي

ضحكت ومديتلهه لساني اغورهه، صعدت فوگ وميختلف عن جمال الجوة، صايره صاله بالوسط والغرف محاوطيهه، الحايط كله زغارف وتخم ضخم منصوب بيهه لونه شذري، والتحفيات والبوفيه والترتيبات والسوالف شگد عجبني، حسيت شويه مبالغه بَـس اذا واحد عنده فلوس والله منعم عليه ليش ميمهل روحه

دخلت لاول غرفه لان جواهر گالت هاي غرفتهه، منصوبه غرفه اخشاب تركية ذني النازلات بالجديد لان اني من تزوجت چان اكثر شي عراقي لو ماليزي، التاج مالتهه ماروني مقدف واللحاف هم ماروني وابيض، عبالك غرفه عروسه

گعدت ؏ چربايتهه العاليه واستنشقت عطر الغرفه، هذا عطر جواهر الي دائماً تحط منه كُلش احبه وهمزين تذكرت اريد اگولهه تنطيني اسمه اشتري نفسه

انفتحت باب الغرفه ودخلت شايله صينيه بيهه اشكااال اكل وزلاطات ومشروبات، گلتلهه شدعوه جايبه هالگد جاوبتني بضحك

-دخلينه ناكُل ونشبع كروشنه وننسه الزلم وهم الزلم

-ههههه ؏ گولتچ

سولفنه بعدة مواضيع واني لسه حچاية فردوس تحوس ببالي، ماتحملت اسكت اكثر وسألتهه

-جواهر بكر صدُك دائماً يجيكم للبيت؟

حسيتهه تفاجأت من السؤال لان گامت تگح وسحبت گلاص مي شربته كله، مسحت حلگهه وگالت

-منو گال؟

-فردوس گلتلي هيه وبكر كُلش اصدقاء

-هجران ترا فردوس متزوجة

-ادري اتذكر گايلتلي من قبل

-اي لعد ليش احسچ خايفه؟

-لا مخايفه بَـس متفاجأة مچنت ادري بي يجيكم هنا ودائماااً!!!

-اي هوه يجي عادي يعني من يجون فيصل وغزل وعمه سلمى

-وكل اخوانه الباقين يجون؟

-اي بَـس غيث ميجي

-شمعنه؟

-لان هوه واحد صايع وحتى عميد الدين طارده من البيت متشوفين ميجي لبيتكم ابد!

-اي منتبهه بَـس مخاطر ببالي اسأل عنه، زين هوه كُلش موزين يعني؟ هوه مو متزوج واتذكر شايفه مرته؟!

-اي متزوج بَـس كُلش ادبسززز لدرجة حتى يكفر ويشرب وعنده سوالف مكسره

-يممممه شو من بابا سأل عن بيت الگصاب من خطبوني وخطبو جوري حمدو بيهم كُلش وگالو گبع وانطي

-داده الناس مبرگعين

-انتن شبييچن انتي وغزل كلما حچيتن مبركعين وماعرف شنوو!!!

-وانتي ليش عصبتي؟

-لان احس روحي عايشه بمتاهه جواهر!! گلبي خلصان وبكر مموتني ومجاي افهمه ولا افهم شيريد بالضبط!! صارلي ثمن تشهر متزوجة وماعرف شبي!!! ولا اعرف شنو يحب وشنو يكرره ماصدگ نتصالح ونطلع من مشكله تنخلقلنه مشكله جديده ونتعارك ونظل ايام منحجي ويه بعض!!

احچي ودموعي تصب، حسيت احتاج احد افضفضله واجيت للانسانه الصح، تبدلت ملامح وجهها للحزن ومبين عليهه كُلش انقهرت من كلامي، تنهدت بعمق وگالت بحسرة

-هجران عبالچ بَـس انتي عايشه بمتاهه؟! لا وداعتچ شوفي حالي!! والله بالضيم وماعندي غير الله وعميد الدين اشكيله وهسه عميد راح وبقيت وحدي ماعندي سند كلهم يكسرون الظهر!

-ماتوقع توصلين لربع عيشتي وأذيتي جواهر

-لچ آآآه آآه شحچي وشگول خليهه سكته خية

حسيتهه كُلش مهمومة ومحتاجة احد يوگف وياهه ويخليهه تفضفض

-هجران: هاي حالتچ بسبب عميد؟ والخبر الصدمچ صح؟

هزت راسهه بـ "لا" وجاوبت

-لا والله، صح كُلش تأذيت ولسه احس اكو چوية بروحي وكلما اتذكر انحرمت منه ومراح اشوفه بعد ومنرجع مثل قبل اموت بالزايد بَـس لا هاي لا شيء بالنسبه الدا اعيشه اني

-ليش شصاير؟

-گولي شنو ماصاير!!

نزلت دموعهه العزيزه عليهه، دائماً تگول دمعتي عزيزه ومتذكر شي يوم بچت ؏ احد غير عميد من يزعلهه لو تتعارك وياه، اردفت وصوتهه گوة يطلع

-هجران اني وحيده ماعندي احد!

فتحت عيوني متفاجأة

-انتيييي وحييييده؟؟!!!! كل هالجمااال والحسن والفلوس وماعندچ صديقات؟!!

-مقصدتهه بهالطريقه، عندي صديقات وهواااي بَـس ماعتبرهن صديقات عمر، يردن مصلحة ويتكشخن وبسس، اني وحيده وعميدي چان الوحيد التارس حياتي.. يسولف ويايه ويحس بيه من اكون زعلانه عكس الكللل واعرف مديدور مصلحة، يسويهه يجوز حُباً بيه او شفقة وعطف لان يعرف حياتي وبشنو مريت، هوه الانسان الوحيد الفتحتله گلبي وحچيتله ادق تفاصيل عني، چان يستمعلي ويصبرني واستشيره بحلول، نبهني ؏ هواي شغلات بطريقه غير مباشره اني چنت غافله عنهن لان ماعندي احد يوجهني ويگولي هذا الشي عيب وهذا حرام!!

(احس كل بنيه تحتاج واحد مثل عميد الدين🥲♥️)

-سألتهه بحيرة: ليش امچ وابوچ وين؟؟؟

-امي تهتم بَـس بشغلهه وطلعاتهه وونساتهه وبابا نفس الشي! واخت اوووف منهه فردوس كسرتني وكسرت شهد، دمرتنه ورح تدمر نفسهه ومحاسه ؏ روحهه!!!

-وحلاوة وينه؟

-محمد وييين حاير بطلعاته وطباته وكشخاته ويه اصدقاءه، هوه صح حنين ويسأل علينه دائماً بَـس اغلب الوقت بره البيت حتى نادر يبات هنا! هجران مو بَـس انتي حياتچ تحسيهه تعيسه اني حيااتي بالاساس تعيسه!!

-اويلي عليچ ولا ادري هيچ حياتچ

-لان بطبعي ما اشكي لياهو الچان لان اكو شمات واولهم فتحو ونرجس!! بَـس حچيتلچ لان اعرف انتي شنو وماتوقع رح يجي يوم وتشمتين بيه

-زين فتحيلي گلبچ واحچيلي

مسحت دموعهه بأيديهه الناعمة المصبغه اظافرهه بصبغ اسود وابتسمت خفيف

-عوفي الموضوع هواي حچي وهواي مواقف وماريد نزيد ضوجتنه خلينه متونسات

-براحتچ، بَـس اريد اسألچ سؤال وتجاوبيني بصراحة

-سألي

-بعدچ تحبين وتشتاقين لعميد؟

ضحكت بقوه لدرجة دمعت عيونهه، مسحت عيونهه ورأساً صارت تبچي وغطت وجهها، تفاجأت من حالتهه اني اعرف بـ جواهر قويه حيل وميهزهه هيچ شي

-جواهر شبيچ؟!

-لنجيب طاري هالموضوع بعد حبابه

-لا نجيبه!! اني مدا افهم ليش متروحين وتواجهي!! گوليله اني احبك واريدك ليش هيچ خايفه؟!

-ماحب افرض نفسي ؏ احد، اذا ما هوه اجاني وگالي هالحچي مستحيل اني الابادر

-وليش عووود!!!

-لان رح يعطف عليه ويجوز يدخل ويايه بعلاقة نگدر نكول من وره خشمه وبگلبه وحده ثانيه

گالت هالجملة وسكتت وعيونهه تتمايز اظافرهه

-هجران: انتي گلتيلي انتو اصدقاء صح؟

اشرت براسهه "اي"، اردفت

-لعد حافظي ؏ هالعلاقة الحلوة ولا تخليهه تتأثر بشي! هم انتي ترتاحين وترجعين تشكيله ويساعدچ مثل قبل وهم يجوز بمرور الوقت يتغير وياچ

صفنت بوجهي عبالك نبهتهه ؏ شي هيه غافله عنه، لمعت عيونهه وابتسامه نرسمت ؏ ثغرهه، گالت بحماس

-صحححح اني ليش غبييييه واشرد منه اووووف شگد ثووووله انييي حتى رهف ابتعدت عنهه رغم امووت عليهه صح مصارلي هواي من ملتقيه بيهه بَـس نگعت بگلبي ومن وره ابوهه گلت اريد اقطع علاقتي بي، ورهف رح ترجع تربطنه وچنت اتحاشى اتصالاتهه ورسائلهه لان ادري تتصل من رقم ابوهه وماردت شي يوم يغلط وهوه يجاوب لان قررت انساه بَـس چنت اتأذه وانقهر ؏ رهفف

-ايي شفتيهه اليوم خطيه شلون سلمت عليچ ولازگة بيچ! ولچ احس عبالك امهه

-ههههههه لا ماصير امهه الفرق بيناتنه قليل، بَـس رهف تحتاج بنيه تعلمهه وترشدهه وغزل صغيره وحلا حايره بروحهه فَـہ اني احتظنتهه من الصغر وصادقتهه ودللتهه، هههههه چنه ثنينه نتحالف ؏ ابوهه من يضوجهه بشي واني من كل عقلي اطنگر واتعارك وياه لخاطرهه وهوه يضحك ويگول عنه مخبلات

-ههههه حلووو لعد رجعو هيچ مو اله حُب وغرام ترا الصداقه حلووة

-صح اتفق وياچ

رجع الدم لوجهها ورجعت تضحك وتشاقه ووره شويه لزمت موبايلهه وبدت تطگطگ بي، چانت متردده وخايفه تدزله رساله وتگوله تريد تحاچي بره بالليل من الكل ينام بَـس اني شجعتهه وگلتلهه تفهمه ؏ كلشي يجوز الرجال منفقين عليه حچي ومتهمي بشي هوه ماله أي علاقه بي

عبرت الساعه 12 بالليل والكل بده ينام واني جواهر گلتلي انام بغرفتهه وتواعدت ويه عميد بالوحده بالليل يوگفلهه بالحديقه حتى يسولفون براحتهم

ركضت ؏ المرايه ترتب نفسهه ورشت عطر وتكحلت من جديد، وخيرتني تعوف شعرهه مرفوع لو تذبه وفضلت تعوفه مرفوع حتى ميحس كاشخة علموده، طلعت تسّحب وتنزل الدرج ؏ كيييف متت ضحك عليهه، واني عفتهه وركضت للشباك لان يطل ؏ الحديقه، اريد اشوف شنو يصير وتفاجأت وحسيت شلون الراشدي فر وجهي فررر من شفت عميد گاعد ؏ وحده من الدرجات ويدخن واجت بنيه من وره ظهره وحظنته من رگبته وباسته ؏ خده مادري همست بأذنه!!

فتحت عيوني بدهشة واني مامصدگة الي دا اشوفه!!! هاي شديصير هنااا هاااي شلون تسوي هيچ وعبالك اجت تلتقي بحبيبهه؟!! هاااي مو فردوووس اخت جواااهر؟!!!! شلووون بَـس هيه متزوووجة؟!! يعني تخون زوجهه ويه عميد الدين!!!!

يتبع☘️...

هجران تگول لـ بكر👇🏻

[ينبغي أن يكون هناك GIF أو فيديو هنا. قم بتحديث التطبيق الآن لتشاهد المحتوى.]

♛ ♛ ♛ ♛ ♛ ♛ ♛ ♛ ♛ ♛
حبيت قفلة اليوم وشفتهه حلوة وخفيفه ولطيفه🌚♥️، دكتبولي توقعاتكم وسوالفكم، ورجااءاً لحد يگول ماكو احداث بالبارت وماعرف شنو خوما كل بارت احداث تشل شنو وين گاعدين بفلم أجنبي ترا هيه حياة واقعيه طبيعيه حالهه من حال حياتنه🙂♥️..
المهم جايتنه الاحداث شويييه شويييه لا نستعجل🔥+ لتنسون التصويت حبايبي.