شفاه مخملية الفصل السادس والعشرون 26 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طويل لعيونكم♥️.

"شفاه مخملية"

بقلم: زهراء السلامي.

#مرات تحصـل بالصدف نَظـرات بيني وبينـه
وأصفن وأحير وأرتبك يا لون هـذا بعينـه !؟♥️

♛ ♛ ♛ ♛ ♛ ♛ ♛ ♛ ♛ ♛

"جواهر"
نزلت كلني لهفة والشوق ذابحني، لو اشوفه گدامي يمكن ماسيطر ؏ روحي واحظنه ههههه، فتحت باب المطبخ ؏ كيفي بدون ماطلع صوت واتفاجأت من شفت فردوس تطلع من باب الاستقبال وتتقدم ؏ عميد، صفنت عليه من وره شويه وچيتت حظنته

المنظر صعقني، جمدت رجليه بعد ماگدرت اتحرك، الي رجعني لوعيي نفضت عميد، انتفض بحركة سريعه من مكانه ودفعهه عنه، تقدمت شوية عليهم بدون ميشوفوني اريد اشوف واسمع ردة فعله شنو حتكون، فردوس گالت بمياعتهه الماصخة

-اووي اسفه تيهت

-عميد: انتي شمالچ شني هالحركات السخيفه!!

گلبت شعرهه القصير بدلال وگالت

-شبيك بيبي ليش هيچ تعرقت، لا يكون حبيت حظنتي تعال نكمل اذا تحب (وغمزت)

-انتي صگد وحده بايعه روحي غاد لا تحدرين صوبي

-هههههههه شبييييك گتلك بالغلططط

-هاي كلاواتچ ماتمشي عليَّ مشيهن ؏ بكر واخوانه اما انه مستحيل

-شنو هالخشم اليابس العندك ليش متتنازل

لزم رگبتهه بحركة مفاجئة عبالك يريد يخنگهه، ركضت عليه ودحست روحي صرت بيناتهم، حاولت ادفعه من صدره بَـس لازم فردوس، نتر بيه

-وخري جوااهر

-جواهر: لا فدووه لخاطري عميد فدووه وخر عنهه

-عميد: هيَّ ماتستحي

-ايي ادري حباب ابوس ايدك هدهه

حررهه من قبظت ايده ودفعهه عنه، بَـس چنه مچان لازمهه حيل لان فردوس ماختنگت ولا تأثرت يعني واضحة السالفه بَـس مال تهديد

-عميد: سمعي ولچ ماريد اشوف چهرتچ فهمتي لو لاا

-فردوس: اويلي ترا سحت كاافي

تفاجأت من ردهه، وگالتهه بصوت خدران عزا العزاني، اردفت بغمزة وبنفس نبره الصوت

-اموت ؏ الزلم العنيفه

(شگد تنرفزت🤮💔)

غطيت بهدومي وعميد صار نااار وعيونه تجدح، رفع نبرة صوته شويه ونتر بغضت گوة لازمة

-وللللچ صللللفه ترحين عن چهرتي لا بالحسين الشهيد اربيچ من اول وجديييد روووحي لزلمتچ الديووث خلي يكظچ!!!

-فردوس: اووي اييع انته گلتهه ديوث وميعجبني اني اريد رجال

هجم عليهه للمرة الثانيه ودفعته من صدره ؏ كيف، صارت ايديه ؏ صدره ومكمشه بدشداشته قوي، همست

-عليك الله بداعت رهف عوفهه فردوس مريضه نفسياً عميد شبييك متعرفهه انتته

نزل عيونه يباوعلي ونتر

-ليش تحليفيني برهففف

-حباب ماعرف شنو اگولك بعد بَـس فدووه لا تطول بالكلام وياهه ختولي

قطع كلامي فردوس، فتحت الروب الاحمر اللابسته وطلعت جواه دشداشه قصيره فوگ الفخذ تخزززي وصدرهه نصه طالع، غمزتلي وگالت

-جواهر تاخذي انتي لو اني يله خلصيني

تيبست بمكاني وعيون عميد حفرت وجهي من ذهوله، نتر بيه

-شني گالت؟!!

-جواهر: مادري والله ماادري ونبي محمد لحظه دقيقه بَـس انطيني مجاال احاچيهه لتروح لمكان

رحت لفردوس وجريتهه من ايدهه، اجت ويايه وهيه تضحك بأستهزاء.. درت وجهي اباوع لعميد وگلت بترجي

-عليك الله برووح ابوك لتروح لمكان هسه راجعه حبباب متروح صحح؟؟؟

هز راسه وبقى ساكت، واكيد فردوس ماسكتت ولازم تختم حديثهه بقنبله قويه

-فردوس: لحظه لحظه اريد اگول شي لعميدي الصاك بيبي ترا اخوك واحد ادبسز وتحارش بيه كذا مرة

-عميد: انتي لو وحده مربايه ما يعاين لوجهچ

-فردوس: ههههههههه لا مو بَـس تحارش سوه شي

-شسوه؟؟!

-لعَب لعب، وترا خوش يشتغلل هههه

ما چان عنده أي ردة فعل غير فتحت عيونه القويه، ردت اجرهه وهيه عيونهه عليه ومبتسمه بمكر، گوه سحبتهه وردت اخذهه ويايه بَـس وگفنه صوته

-جواهر عيفيهه اريد احاچيهه

-جواهر: بَـس عميد...

-فردوس: يووووه روحييي عوفينه وحدنه شنو مو عيب عليچ تردين تشهدين الفلم الرومانسي

-عميد: فردووووووس!!! ابقي جواهر لا تروحين وانتي تعاي احجي يمته صارت هالسالفه؟!

-امممم مادري هههههههه

-ولچ احچييييي لا اتصرف غير تصرررف!!! سوه هيچ گبل ما نهى ؏ غزاله لو بعدهه؟؟

خزمت عيونهه مبين جاي تتذكر شوكت، هزت راسهه بمرات متتاليه وگالت بأستهزاء

-مادري مادري بَـس ترا هوه ادبسز ويزحف عليه

جسمي يرجف ويكت عرگ من الخجل، ماعرف اروح لو ابقى واگفه، بَـس مستحيل اروح واعوفهم سوا ما أمن بهاي الحقيرة واعرف بالضبط ليش هيچ دتسوي، عميد حك رقبته وباوعلي بنظرة مفهمتهه، دار وجهه عنه وراح بعيد

ضحكت بمياعه وعافته بحيرته، ركضت وراهه للبيت وجريتهه من ايدهه بقوة

-انتييييي لييييش نذللللللة شنو هالتصرفااااات

-فردوس ببرود: ترا هذا صوتچ رح يگعد النايمين

-وللچ شبيچ وياه؟!

-حتى بعد متتحديني يحلووة، گتلچ جواهر اوديچ وره الشمس وانام ويه حبيبچ والله!!!

-ليييييش مامكفيچ الزلم الباقيه التقضين وقتچ وياهم؟!!!

-شوفي همه صح مكفيني بَـس يختي حبيبچ خشمه يااابس ومو سهل عكس ولد عمه واخو بَـس لتخافين مرة مرتين احاول وياه يلين يبقى رجال وشهوته تتغلب عليه، والصراحة ابد مرسمت عليه لانه خوش رجال ومحترم ومافد يوم ضوجني بَـس سوايتچ گتلچ اندمچ عليهه!!

-ومالگيتي تعاقيبني اله بعميد الدين!!! عوفي بحاااله فردووس عليچ الله ماسوي شي بعد والله حتى ماگول لـ طلال ولبابا ؏ هذاك اليوم والله بَـس لا تتدنين لعميد احلفچ بولدچ

-اوووي حلفتيني بالعزاز ديلا راح اعوفه بَـس هاااا اذا حاولتي تلعبين منا لو مناك والله اطيح حظچ مو بَـس انام وياه احبل منه هممم لان مبين عليه فدشييي اويلييي يمممة

-نترت بقهر: فردووووس شبيچ!!!!

-ههههههاايي والله افضحه واشهرهه واگول للعالم اغتصبني وغصباً ما ؏ راسه يطلگني من طلال ويتزوجني وانيييي اصير الشيخة فَـہ لاااا تتحديني اوكي بيبي؟

(كرهت كلمة بيبي بعد ماگولهه✋🏻🙂)

هزيت راسي بالموافقة بَـس اريدهه تروح وتفكني من شرهه، ركضت بره خاف عميد دخل جوة بَـس چان گاعد ؏ الدچة وراسه بين ايديه، تقربت عليه وحمحمت، رفع راسه يباوعلي وجهه عرگان وصاير اصفر، خفت عليه كُلش، گعدت بصفه وگلت بلهفة

-عميد شبييك؟؟!!

هز راسه بحيره وضرب فخذه

-ولچ شأسووي سمعتييي اختچ؟!! جوااهر راح اتسودن وعلي

-اسم الله عليك، معليك بفردوس اكيد تكذب

-لا لا هاي اختچ وحده مع احترامي الچ خبرة وملتحة ولا تخاف من احد

-عميدي ؏ كيفك ويه روحك فدوة لخاطري، لتفكر زايد يعني شتسويله شنو بيدك انته

-بسسس اريد افهم غزاله شمالهه ويخونهه ويه هااي؟!!! شمالهه شناااگصهه؟!!

-هسة احنه مندري سوه هيچ قبل خطوبته من غزل لو وراهه، بَـس هم خيولي وهدده گوله اذا عادهه تطرده من البيت اكيد يخاف

منزل راسه وصافن بالگاع، بحركة لا اراديه تقربت يمه وجريت ايده بين ايديه، رفع راسه يباوعلي واني بادلته النظره

-عميد ترا فردوس تريد توگعني واني والله العظيم وغلاوة شهد عندي مو نيتي سوء وولا نيتي اسوي شي من الگالته

هز راسه ونزله بَـس لسه ايدي بأيده، گال بهدوء

-جاي تعلميني بيچ جواهر انه اعرف شنهي معدنچ وانتي شني من بت بَـس اختچ الله يهديهه ويثبتهه مامنهه رجه

-اي صح بَـس شنو بيدي اني؟!!

سحب ايده مني وابتعد شويه، زفر نفس عميق وگال

-انه اله مرتضى، وهسَّ گولي انتي شمالچ وشمالهه اختچ المسودنه؟

نزلت راسي خجلانه ماعرف شنو اگول؟، اگوله الحقيقه لو اكذب لو شنو اسوي؟ عيونه تتابعني واني منزلة راسي، همست بصوت ناصي

-هددتني

-ليش؟

-لان.. لان احم شسمه اءء

-احچي

-اني اندگيت بيهه وگلتلهه افتن عليچ لبابا وزوجهه طلال

-؏ سوالفهه المكسره؟

اشرت براسي "اي"

-بويه مو گتلچ عوفيهه ولا تتدنين صوبهه!! شمالچ انتي اله تسويلچ مصيبه؟!

-عميييد متحملت شسووي گامت تجيب زلم للبيت هناااا

تحولت ملامح وجهه من الهادئه والمحتارة الى المتفاجأة والمصعوقه

-شني شنييي؟؟؟ تجيب زللم للداار؟؟؟؟!

دموعي گامت تنزل من تذكرت هذاك اليوم المشؤوم من امي چانت طالعة وشهد بالناصريه لان اول اسبوع دوام، البيت فارغ بَـس فردوس جايه زعلانه من طلال، چنت نايمة بغرفتي وسمعت الباب يندگ، گمت من فراشي بكسل وصحت من الدرج بيهه حتى تفتح الباب

بَـس تفاجأت من سمعت صوت زلم ثنين، توقعتهم بابا وطلال او عمي وحلاوة، مديت راسي من الدرج واذا اشوف واحد منهم نزع فردوس تيشيرتهه وبده يبوسهه بطريقه همجية، والثاني حاوطهه من وره وراسه برگبتهه، انرعبت من المنظر وجسمي يرعش

دخلت لغرفتي وقفلت الباب قفلتين، من خوفي ماعرفت شنو اسوي ودگيت ؏ بابا بَـس ميجاوب، اتصلت بأمي وگلتلهه ترجع للبيت بسرعه، گالت راح تتأخر توسلت بيهه ترجع وكذبت عليهه گلتلهه تخربطت بَـس حتى تجي وفعلاً نص ساعه واندگت الباب، ركضت امد راسي من الدرج وچانت فردوس بمنظر لسه ميروح من بالي

گمزت من مكانهه ودفعت الرياجيل عنهه، وگالت بصوت مستعجل "بسرعه طلعو من الباب الخارجي يمكن بابا اجه" سووا مثل متريد وطلعو ولبست ملابسهه وهيه تتأفأف، اجت امي ولا كأنه هسه چانت تمارس الزنا ويه واحد والثاني يمارس اللواط ويه الاول

حسيت بأحساس مقزز واريد اتقيأ، رجعت لغرفتي وبالصدُك بهاليوم تخربطت ووگعت، ومن فاتحت فردوس بالموضوع وهددتهه اگول لبابا گالت رح تندمني اذا حچيت

سولفت لعميد مختصر واني سايحة بملابسي وهوه وجهه انگلب من الاصفر للاحمر، ورزلني

-اننننه چمممم مرة گتللللچ عيفيييهه ولا تندگيييين بيهه!!!!

-عميد صوتك فدووه وخفت والله معرفت شنو اسوي

ابتعد عني وراح بنهايه الحديقه، خبرين مثل ذني بنفس الساعه الله يساعده، رحت وراه ومحچيت شي، باوعلي وتقرب عليه، مد اصبعه گدامي بتحذير

-سمعيني جوااهر واريدچ تحطين هالچلام ببالچ وماتنسي!! أي شي تشوفي ؏ فردوس ماااتدخلييين ولا تحچين ولا تنطين رأيچ ابدددد وحتى لا تگولين لأمچ ولا لأبوچ فهمتينييي

-مو اخااف

-واااننه اخااف علييييچ، ولچ هاااي مسودنه وعگلهه مو براسهه!!! الي تخون زلمتهه كل يوم ويه زلمه شني تترجين منهه!!! الي حبلت گبل زواجهه شني تفكرين بيهه؟!! ولچ اختچ مو طبيعيه جوااااهر وانه اخاف عليچ تسويلچ مصيبه لو تأذيچ بشي عزيز عليچ!!

خفت من حچايته واجت براسي تجيب واحد يغتصبني وياخذ شرفي وحسيت هيچ چان معنى كلام عميد الدين، عيونه بعيوني وينگطن اهتمام وخوف، رغم اني خايفه بَـس تحول خوفي للأطمئنان والامان واني اشوف لهفته وتحذيراته الي، دار عيونه عني من شافني صفنت، ختم حديثه بـ..

-راح تردين ويانه لبيتنه هناك

-شنوو؟؟!

-مثل ماسمعتي!! اولاً ماصارت سالفه نقلتچ، ثانياً اختچ ماطول تجرأت وجابت زلام للبيت راح تسويهه مرة وثنين وعشره وعشرين وهلچ الله يسلمهم ولا چن عدهم بنيات ويخافون عليهن وع سمعتهن ماااتگوليليي اذا باچر عگبه واحد من جيرانكم گال شفنه زلم تدش لداركم شنو حيكون موقفكم؟!!

-لاا فردوس ذكية وتعرف تتصرف، ومن خطت هالخطوة وگامت تجيب حبايبهه للبيت معناهه ماخذه كل احتياطاتهه

-حتى لوو بله واحد منهم لگفچ وطمع بيچ!!! ولچ اخاف يصيبچ شي!!

-زين اذا ارجع لبيتكم وبكررر!!! شلون بيه وياه؟!!

-اااخخخخخ اخخخخخ من بكررر هو ياهو المرمرني غيره!!

-عميد اني مارجع وياكم هناك لان مراح يعوفني بحالي اني ادري

-يخسيييي بعلي لو تدنالچ بَـس گليلي امصع رگبته مثل البهايم

ضحكت ؏ حچايته، وهوه هم ابتسم بَـس سرعان ماغابت ابتسامته وگال

-تدرين محد ماكل خباله غير مريته بعلي ينكسر خاطري عليهه

-وانته ليش تفكر بيهه هالگد؟!!

-شمالچ تصيحين! يعني من كسر ظهر بت وهو ادبسز وطايح حظ عينه المال فگس ؏ بت ثانيه شتسميهه؟!!

-و.. وانته احم تفكر بهجران؟

-اكيد جواهر هاي امانه عدنه!! بعلي چم مرة حاچيته وحتى عرك عاركته اذا مايريد البت بويه يطلگ شنهي يظل يعاملهه هيچ!! كللللما اطب واطلع للدار اشوفهه تشتغل وتكرف شنييي جايبيهه خدامه!!!

-خو حاچي خاله انتصار وگوللهه

-حاچيتهه تگول هيَّ البت ماتگعد نادره وماتعرف تهيد

-اني ضايجة عليهه واحس دا اخونهه عميييد شسووي؟!!

-شني وليش تخونيهه؟

-لعد بكر كل مرة يجي لبيتنه ويريد يشوفني شنو تسمي هذا؟!

-وانتي تطلعيله؟

-لا وراس بابا صارلي اشهررر مشايفته حتى حرگ التلفون حرگ عليه وما اجاوبه

-اكييييد؟؟؟؟

-اي والله عميد شبيك انته متعرفنييي اني ماحب بكر!!!

-ادري بيچ، وانتي مو بيدچ شي اذا هو چان سگط ويخون مريته! اذا مايخونهه وياچ يخونهه ويه غيرچ

-اوووف والله مسكينه هجران

-اي بعلي

-وانته شبييك محرروگ گلبك عليهه

-چا البت حبله وزلمتهه ساقط ويخون بيهه شنييي لازم اهلهل؟

-گلت بخوف: واذا بكر طلگهه بعدين انته شتسوي؟

-شسوي؟؟

-تتزوجهه؟؟؟

**

"غزل"
عيوني ماظاگت طعم النوم وانه افكر، شون بيه عرسي الخميس وانه لسه مرتضى ماگدر اعاين لوجهه، گلبي يوجعني من اتذكره يحاچي عميد ويگله متلهف يريد يتزوجني، گعدت ؏ صلاة الفجر وچانت جواهر هستوهه جاي تطب للبيت

ماحچت شي صعدت فوگ وطبگت باب غرفتهه، توضيت ولبست حجابي حتى اصلي بالصاله، دعيب من الله يبرد گلبي تجاه عميد ويطلع نار حبه من گلبي واخلص من قهري واعيش حياة سعيده ويه مرتضى

لميت السجادة وشلت التربه جاي ارجعهن للبوفيه ونزيت من انفتحت باب غرفه الولد النايمين بيهه، طلع مرتضى يفرك بعيونه

-هااا شو گاعده؟!

-اي صحيت اصلي

-ابتسم: عفيه بمريتي المتدينة

ماعلقت ؏ حچايته وضميت السجادة، عيونه تراقبني وسوه الشي الچنت متوقعته، سحبني من ايدي وسفط ظهري ؏ البوفيه

تگرب عليّ وباسني من رگبتي تكزبر جلدي من لحيته، ماقاومته عكس كل مرة من يحاول يتگربلي، لان وضحت نهايتنه شنهي والخميس انه نايمه بحظنه مابيهه مجال

رفع راسه من بعد ما شفطني شفط وهوه يشم بيه ويگول بصوت خادر "بويه بحياتي ماشميت ريحة الجنه بَـس متأكد هاي ريحتهه" عاين بعيوني وهمس

-احبچ

اكتفيت بأبتسامه وهوه گرص خدي وعيونه معلگة بعيوني، رجع گال

-اتمنى اسمعهه منچ اوووف صارت حسرة بگلبي هاي

-كلشي بوكته حلو

-ويمته يجي وكتهه؟؟ اريدچ تحبيني وماتنفرين مني حتى بيوم العرس بادليني بكلشي حسسيني انه مريود

وجهي اشتعل وانفاسي بدت تضطرب، ابتسم من شافني هيچ خجلانه وگال

-افقد ؏ حيائچ احبچ وحگ بسطال الحمزة ؏ حجاية اخيچ عثمان

-هههههه اييي

-وانتي هم راح تحبيني اوعدچ

هزيت راسي وابتسمت، رجع يبوسني بنفس الطريقه وصعد يبوسني بحنچي وشفايفي واني صاااكة بمكاني اخاف احد يطلع وننفضح وننشهر بَـس همزين البيت هدوء والكل نايم، ضحكت من گام يحك لحيته برگبتي ويگول

-خايبه شني سرچ؟ ليش من دون الردتهن حتى من تجفين احبچ!

-گلت بثقه: لان انه غزاله

-اويلييي من اشتعلو مروان وخلفته بنار ونفط ؏ غزاله

-يله انه ننعست اريدن انام

-لاااا مو جاي نسولف حلوو

-باچر نشبع سوالف يله تصبح ؏ خير

-وانتي من هلي يبعد هلي

رجعت للغرفه ونمت، گعدنه الصبح وتريگنه بسفرة وحده ورهف تگمز ؏ ابوهه تريد تطلع هسَّ للسوگ، وگفتنه حبوبه عطية تدردم وتنگ

-ولللچن يالسلبوحات شنيي وين موليات؟!

-رهف: حبوبه باباتي راح ياخذنه للمول

-حجية عطيه: شنهييي؟ موال شني هذا بويه لك عمييّد وصلت بيك تجر مواويل للبنيات وانه حبوبتك كلشي ماحصل!

-عميد: ههههه حجية شني موال انتي ويين راح بالچ، هذا مول يعني شون سوگ الناصريه الچبير

-هاا هااا اي چا شمالني ماتاخذوني شني اگرص

-عميد: حبوبه اخذچ بعيني بَـس مابيچ تمشين

-فتوح: انه هم اريدن اروح وياكم شني وحددد

-سلمى: فتووح وين تجين ويانه هيه طلعت بنات

-فتوح: چا انه شنهي زلممة!! ولچ سليمه شني تگصدي؟؟

-حجية عطيه: انطمننن محد تروح بسچن

-عميد: لا اشو اله اخذكم كلكم هو كل يوم جايين لبغداد حنه

عمه فتوح گامت تهلهل وتهوس وعمه دلال هم تهوس بشيلتهه مكيفات، گامت حبوبه گوة من مچانهه وعدلت نفسهه ولبست عباتهه وتعطرت تگولون رايحة لموعد غرامي

طلعنه وتوزعنه بالسيارات حنه البنات كلنه ويه عميد والكبار ويه مرتضى، امي لحت عليّ اركب وياهم بَـس مستحيل افوت الركبه ويه عميدي

جواهر وشهد لبسن ربطات لان عميد مايقبل يطلعن سافرات وياه، گعدت بصف هجران بالسيارة حسيتهه ضايجة وسألتني..

-هجران: غزاله بكر شوكت يجي؟

-غزل: ما راح يجي يگول عنده شغل

-شغليش؟

-عميدي مگعده بالديوان بمچانه لان مايصير يفرغ

-هجران: هااا (ارتاحيت من غزل گالت بكر مراح يجي لان گلبي ممرتاح من فردوس وخفت يجي لبغداد ويروح لبيت حجي اسماعيل وفردوس وامهه بقن بالبيت وحدهن ما اجن ويانه، الطريق كله عميد عالگ اغنيه ويدندن وياهه كُلش حبيتهه وكلماتهه حلوة، سألت غزاله

-شنو اسم هالاغنيه حبيتهه؟

-رهف جاوبت: "هيه عيوني هيه" هاي اغنيه ابووي يعشگهه

-شهد: حتى اني حبيتهه شگد مسمعتهه

عله الصوت والبنات گامن يغنن وياهه ويصفگن ؏ كيف، دگ موبايل عميد وصاح

-اسسس هذا عثمان.. هاا ولك وينك؟؟ يمته تجي؟؟ .. ولك شني بيوم العرس تجي! عثماان لا تكدرنييي انته مو گلت اليوم جاي؟؟ ديلا يلا ولي يله لا تلح ولك ساقط.. هههههه انعل يوم الجابتك امك.. ابن ال... لا تخليني اغلط ولك هههه انچعم ديله هلووو

سد الخط وياه وگظاهه بَـس يضحك ويغلط، غزاله صاحت

-باباتي شوكت يجي عثمان؟

-عميد: بيوم عرسچ، شكثر گتله تعال ما يرضى يشوف بكر

-هجران: ليش ميقبل يشوف بكر؟

ضحك عميد وباوعلي من المرايه، هز راسه بقله حيله وگال بضحكة

-ثنينهم عارات

البنات كلهن ضحكن ؏ حچايته اله اني لان مافهمت قصده، يعني اني ادري ببكر ميحب عثمان بَـس ماتوقعت حتى عثمان ميطيقه!! همه مو اخوان من نفس الام والاب لو شنو؟؟

وصلنه لمول بغداد وعمتي تخبلت هناك كلللشي اشترت لغزاله ومرتضى ماگال لا، يجييب ويحط بالغراض، حتى البدله اله اغلى بدله اشترالهه والاحذية والجنط والملابس، صفنت ؏ السوالف والاكسسوارات وتذكرت اريد اشتري نفس عطر جواهر، سألتهه..

-جواهر حبابه شنو اسم العطر التحطين منه دائماً؟

-جواهر: Reaction

-تعاي ويايه لهذا المحل خلينه نشتري منه

-المن تردي؟

-الي كُلش حبيته

تگلبت ملامحهه وگالت بجمود

-لا لا ميفيدچ اشتري غيره

-ليييش مو حبيته!!

-لااا هجراان گتلچ مطيب ومتأكده بكر ماراح يحبه صدگيني

-هااا

سكتت ومالحيت عليهه لان حسيت بيهه متريدني اشتري نفس عطرهه، وخاف عبالهه اريد اقلدهه فَـہ گلت اشتري غير عطر اكو مية واحد اطيب منه

كملنه سوالفنه ورهف كلش تعبت تريد تگعد فَـہ عميد گال نگعد بمطعم نتغده بجناح عائلي خاص، طلبنه اكل وسوالف وضحك نسيت كلشي وتونست كُلش خصوصاً من رهف وجواهر بدن يعيبن ؏ الاكل

-جواهر: لوو بَـس افتهممم عميد شبييك ويه الكباب شنو ماعندك غيره؟!!

-عميد: شني غير افقد ؏ الكباب وعلي انه صرت گصاب لان اعشگ شي اسمه لحم

-رهف: عوووع عوووووع بابا شني هاي وين البستييج

-عميد: بستيج شني بويه؟

-جواهر: خرب عقلچ رهف راحت هيبتنه گدام ابووچ مو گتلچ اسمه برستييييج

الكل طگ ضحك ورهف ساحت من الخجل وطنگرت وطلبت اله تريد بيتزا

-باباتي انه اريدن بيتزا

-عميد: شني هاي بيتزا شو اول مرة اسمع بيهه

-رهف: ههههه بااباااا تعرفههه ودائماً تشتريلي منهه

-لا بويه انه شروگي شعرفني بالبيتزا مادري شنهي

-رهف: ماااا اريييد

-عميد: زين گليلي شلون تنوكل بالخبز ويه التمن؟

-جواهر: هههههههه حرااام عليك اشتريلهه بيتزا شبيييك

-عميد: هههه چا غير تدلل بنيتيي

كملنه غدانه ورحعنه للبيت، عميد چان كلشش مستعجل وگال اليوم لازم نرجع للناصريه لان جايينه شيوخ وعدهم طلابه، ركض ركض حظرنه غراضنه وطلعنه، ودعتنه جواهر وگالت راح تجينه الاربعاء وتبقى لان رح ترجع لجامعتهه، كُلش فرحت وبوستهه وطلعنه

وصلنه للناصريه وچانت ماما ماخذه جوري وراجعين لكربلاء، شگدد ضجتتت وگمت ابچي لان متأملة اشوفهن واراويهن البدله الشتريتهه لعرس غزاله والمكياجات والعطور

من ضوجتي گبل رحت انام وحسيت ؏ باب غرفتي ينفتح چان بكر، سلم وراح للحمام يسبح لان سمعت صوت الدوش، طلع لاف المنشفه ؏ خصره وراح للميز يمشط شعره، گال

-تونستي ببغداد؟

درت وجهي من الجهه الثانيه بعدني مزاعلته رغم كلبي نار عليه وميته من الشوق واريد بَـس اشم ريحته بَـس لا كافي هواي مصخهه ويايه، اجه تمدد بصفي وجرني لحظنه واني لسه دايره وجهي عنه

گلبني وصرت گباله بَـس مغمضه عيوني، ضحك وگال

-صاير عندچ كرش ولچ هاي بنيتي اكيد سمينه

سكتت وماجاوبته

-بكر: مادري بيچ هيچ عنوديه شني ماشتاگيتيلي؟

-لاااع

-چذااابه

-روح بكر اني مزاعلتك

-ايي فهمت گلتيهه مليون مرة

-ديله خوش روح

-اششش اريدن انام

جرني اكثر عليه وحظني، وجهي صار ؏ صدره العاري واستنشقت عطره اليموتني، ظل ؏ هالحال وايده تلعب بشعري، همس

-مشتاگ ابوسچ من شفايفچ الحلوة

-ماااا

-ههههههه ولچ بَـس بوسه وحده والله

-ماااا وخرررر

دفعته عني وهوه ضاج وگام، لبس قميصه وطلع من الغرفه، متت من البچي اني ليش عوبه مو چان يريد يصالحني يعني لشوكت ابقه مزاعلته؟!! وره قريب النص ساعه واني صايره شحالني من البچي وعيوني مورمة وحمرة هم انفتحت باب الغرفه چان هوه

تنهد بعميق ورجع تمدد بصفي، باسني من چتفي وهمس بأذني

-اسف، ادري هواي أذيتچ وكسرتچ بَـس شأسوي هجران انه غادي ناار وگلبي مفرفح وعلي

درت وجهي عليه صرنه وجه بوجه

-من شنو مفرفح؟

-اوووف اتمنى اگلچ واشكيلچ بَـس اكيد ماراح تتفهمين الموضوع وراح تزعلين وانه ماريد ازعلچ لانچ حامل

-يعني من كتلتني ماگلت متريد تزعلني؟

-اييي صارلي شكثر احاول اراضيچ وانتي معنده

-شووكت بكرر شوووكت حاولت تراضينيي؟؟؟

-اهووو انه هيچ وماعرف شلون اراضي البت كله عنيف واتعارك

-لازم تغير طبعك! رح يجينه طفل ولازم تلزم اعصابك

-ان شالله، وهسّ هااا رضيتي؟؟

سكتت للحظه افكر، اذا زعلت هسة ورحت لبيت اهلي شنو رح يتغير؟ خليني اخذ بنصيحة امي من گالتلي قبل الزواج "المرة بَـس تطلع من بيت رجلهه مرة يتعود الرجال ؏ زعلهه وبعد ميهمه" فَـہ خليني گاعده وماطوله اعتذر واحس شويه رجعتلي كرامتي احسن

ابتسمتله وهوه ماصدگ حظني وشمني وبده يبوس بيه، موتني بليلتهه ضحكت هالگد هذا مشتاقلي؟ ايي واني هم مشتاقتله مووت

گعدت الصبح وسبحت وتجهزت لحنه غزاله اليوم بالليل، نركض منا ومنا والمعازيم الزلم بدوا يجون وكل شويه يصيحون يردون چايات ومايات وحلويات و و و... غزاله ماقبلت تسوي حنه تگول فرد مرة عرس وتلبس بدلاتهه بي

گظه يوم الحنه بسلام وبالليل اجت جواهر وامهه وشهد بَـس فردوس ماجت وياهن ومن سألناهه گالن هيه ماقبلت تجي، ثاني يوم گعدنه مخبوصين اكثر من يوم الحنه

اجتنه صالون للبيت ووياهه مساعداتهه، مرتضى موصيهن حتى عود غزل متتعب، بدت تشتغللهه بالمكياج طلعت تجننن مكياجهه هادئ ترابي كُلش لاگلهه وسحبت عيونهه بآيلاينر كبرتهن اكثر من ما هنه كبار طلعن خيااال

واني هم تمكيجت مكياج بسيط وحلوو، لبست بدلتي النيليه بدون ردان وبيهه شغل ذهبي من الصدر، باوعت لروحي بالمرايه فدووه طالعه اموت ههههه، اتصلت بجوري وخطيه حسيتهه ضايجة لان مراح تجي بعدهه نفسه وعدهم هنا ميصير النفسه تجي لا تچبس العروسه وميصير عدهه خلفه

ماعرف منين هالعادات بَـس ماما گالت صح حتى اكو بيوتات بكربلا عدهم نفس الشي خصوصاً العايشين بالاحياء البعيده عن الولاية

عفت شعري الطويل مفتوح وحطيت شكاله صغيره بگدلتي، دار اروح لغرفتي اجهز اخر شي واللبس الحذاء لان المعازيم بدت توصل، شفت جواهر بوجهي

-اووووويليييي شنوووو هاااي ولچ غطيييتي ؏ غزاله ميصير هييييچ

فرت ؏ نفسهه وضحكت بدلال

-جواهر: صدُك هيچ حلوة طالعه؟؟

-اييي شنو هالمكياج واللبس والشعر ترا والله اني بنيه ودخت وتسرسحت

ضحكت ورغم حاطه مكياج وجهها صار احمر من الخجل، چانت لابسه بدله صماگية ربع ردن وتجي مخصره ليجوة وفوگاهه تول مشبچ اسود وبي نمنم ناعم، ومكياجهه سموكي ناري وحمرتهه حمرة بارزه شفايفهه الكرزية وشعرهه الاشقر فاتحته ومسرحته شويه ويوصل لركبهه

تجهزت وتعطرت ونزلت جوة استقبل المعازيم وجواهر واگفه بصفي، ضجت واني اشوف النسوان يباوعنلنه وحسيتهن يقارنن بيناتنه ويسألن وينهه مرت بكر ومن يجن يشوفني اشوف الصدمة بعيونهن بَـس ميحچن

واكيد كل شويه وحده جارة ام جواهر وتخطبهه لو تخطب شهد وحتى كم وحده اجت تسألني هالبنيه متزوجة؟؟ قصدهم ؏ جواهر واني اگلهم محجوزه لان هيه گايلتلي هيچ اگول حتى ميجن عليهه

گعدنه غزل بالكوشه مثل العصفوره طالعه ببدلتهه البيضه المنفوشه وتسريحتهه العاليه، سحبو شعرهه كله ورفعو بتسريحة عاليه لان شعرهه قصير، چانت مبتسمه خفيف بَـس واضح حزن بعيونهه ماعرف شنو سببه؟

گومناهه رگصناهه واحنه البنات حواليهه وعلگو اغنيه "انا وياچ يم شامة" البنات طگن من الضحك وغزل گالت

-جواااهر اجه دورچ يلللله

-جواهر: لا لا لا انتو دتشجعوني ؏ الفحشاء والمنكر

خربنه ضحك عليهه وگوة ندفع بيهه حتى ترگص وماقبلت اله اني وشهد ندخل وياهه، وگفنه بنص صالتهم كُلش چبيرة وبدن البنات يرگصن ؏ الخفيف وجواهر تروووح بعييد وتجي عليه تهز بخصرهه ؏ كيف وتتماوع وتذب روحهه عليه واني ادفع بيهه واضحك

النسوان گامن يهلهلن ويصفگن حيل من گومنة غزل مرة ثانيه ووگفن هيه ورهوفه يرگصن منظرهن يجنن وهنه طوال ورشيقات وحلوات العيون تتطاير وحتى رهف كم وحده خطبتهه وعمه انتصار تگول ابوهه مينطيهه

شويه وصاحت عمه سلمى راح يدخل العريس، ركض رحت لبست جبه اسلاميه وشال وجواهر بصفي بَـس لبست ستره فوگ بدلتهه وظلت مفرعة، دخل مرتضى بهيبته وطوله وعطره سبقه والنسوان يهلهلن ويطشن چكليت وهوه الفرحة واضحة بعيونه عبالك مامصدگ

دار عيونه يباوع لغزاله وفك حلگه عليهه، فطسنه من الضحك من صاح

-خااايبين شني هالكيييك هذا كله ليه؟!!

امه ضحكت وگالتله اي يمه الك چا المن، رگصهه شويه بيده ويهوس بيهه فدوه شگد لايگين لبعض، صاحو رح يدخلون ابوهه وعميد الدين

جبتلهه كبوسهه چان ابيض وبي لمع بسيط، لبستهه وغطيت صدرهه بَـس عفت قرص وجهه طالع، دخل عمو خليل ولبسهه ست معاضد بيدهه ومحبس چبير وعمتي سلمى تهوس وتهلهل وفتوح ودلال وياهه يصيحن

-نتشكر من عمهه وابوهه نتشكر من گال اخذوهه

-دلال: بت الشيخ لابن الشيخ جبناهه

وره شويه سمعنه حمحمت عميد الخشنه، صاح " يا الله" ودخل راح لغزل وباس راسهه وغزاله رأساً نزلت دموعهه

چنت واگفه بصفهه فَـہ اسمع ؏ شنو دار حديثهم، مسح دموعهه بأبهام ايده وهمس

-بويه لا توجرين افادي وتبچين غزل انتي بنيتي وراح تظلين بنيتي ومايتغير شي

گالت بصوت مبحوح ودموعهه تنزل

-احلف تظل تعاملني مثل رهف وماتفرگ بيناتنه

-وروح ابوي وغلاوة رهف انتي بنيتي الاولى ورهف الثانيه

رجع باس راسهه وصاح لأمه حتى تجيب هديتهه، جابت صندوگ احمر چبير شلون صندوگ التخم مال الاعراس وطلع منهه گلاده كُلش چبيره يسموهه هنا "سلاح" مستحيل تقل عن الخمسطعش مثقال، لبسهه ولبسهه چف بيأيدهه حلو ونازك وانطه لمرتضى يلبسهه زنادي ؏ زندهه مرصع بحجر احمر كُلش حلو

عمة سلمى تخبلت ؏ هدية عميد الدين وهواي تشكرت منه وگالت خجلتنه هوه ابوهه الحقيقي ماجابلهه هيچ، وهوه ردهه

-عميد: افااا حجية انه گايل غزاله بنيتي حالهه من حال رهف واذا رهوفه تزوجت هم نفس الشي اهديهه

تشكرت منه وغزاله ماتت من البچي، كمشت بأيده وهمستله

-حباااب احظر الزفه فدووه

-عميد: اكيد اجي واشيل اخوي ؏ چتافي انه ناذر

ابتسم مرتضى ؏ كلام عميد وصاحو تحظروا للزفه، استغربت ان اخوانهه مادخلو وسلمو عليهه وانطوهه هديتهه يعني اني من تزوجت فاضل وحيدر ثنينهم دخلو وسلمو عليه وع جوري وهدونه هدياتنه

طلعنه والامه العربيه هنا يمكن الناصريه كلهه حظرت عرس مرتضى والطلقات يبووو حرگو الجو حرگ وكل شويه وحده تنز وعمه دلال تصيح "لا تخافن بنيات لا تصيرلنه مصيبه"

گعدنه بسيارة احمد (اخو بكر) وهوه ساق بينه الزفه والهلاهل والهوسات وكل شويه يوگفون يدبچون ويرگصون وعميد شال مرتضى ؏ چتافه وگام يهوسله، المنظر يجنن والاجواء حلوة

تعدت سياره حمرة رياضيه من يمنه صوت اغانيهه عالي كُلش ومطلع ايده من جامته المظلله ورافع مسدس بالهوه ومتحظر يضرب، البنات صاحن

-هذااا عثمااااان

(زين اني ليش تحمست وياهن🥲؟)

جواهر گالت بحماس

-هسة شوفوو عثمان رح يحرگ الجو بَـس اصبرووو

وصدُك نزل من سيارته بَـس ماگدرت اشوف وجهه چان منطينه ظهره، انتبهت لابس دشداشه زبديه ولاف الشماغ لفه اماراتيه وشايل رشاشه بيده وبده يضرب طلقات وحده وره الثانيه والكل تحمس ونزلو بنص الشارع سدوا سد وحتى الشرطه ماتدخلت وظلو واگفين ويتفرجون عليهم ويسلمون ؏ عميد الدين ويباركوله، اكيد اني ماگدر اسمع بَـس واضح لان يحط ايديه ؏ راسه مبين ديگول ممنون

صوت الاغاني عالي وهمه يدبچون ويرگصون ويگولون گولات ماعرف منين يجيبوهه وكلمات غير مفهومة اصلاً

مرت فوگ الساعه ونص وتعبت كُلش ونفسي گامت تلعب لان صارت بوخة وريحة البارود قويه گامت تگلب معدتي، كلت لـ احمد يرجعنه للبيت بَـس البنات نقهرن رادن يبقن فَـہ گلتله من يلوفون ويرجعون ؏ البيت مرة ثانيه ينزلني بباب البيت ويلحگهم

وصدُك هيچ سوه نزلوني وراحو، دخلت للبيت استقبلتني مرجانه بالباب تصيح "ميييع" گمت اضحك عليهه ودخلت جوة چان فارغ بَـس اني، استاحشت وصعدت لغرفتي بدلت ملابسي، ولبست دشداشه قصيره توصل للركبه وبقيت بمكياجي وشعري ماشلته بقيته هيچ حتى يشوفني بكر مرتبه لان لسه ماشافني من الصبح لسه

تمددت ؏ الچربايه وتلمست بطني صايره تظهر ومبين عليه حامل يممماي فديتهه بنيتي ياارب تطلع بنيه يييارب، عطشت مي وگلت انزل اجيبلي وهم احظر حبشكلات حتى من يجي بكر نلتهي بيهن ونسهر سوه

لبست جبه اسلاميه وعفتهه مفتوحة وشال شمرته ؏ راسي بعشوائيه، نزلت الدرج چان البيت هادئ بَـس جايه طگطگة من المطبخ، معقوله رجعو؟؟

مديت راسي اشوف منو واذا اتفاجئ من اشوف رجال لابس سروال وفانيله داخليه وگاعد يبحوش بالكاونترات، گلبي گام يدگ وماعرف شنو اسوي، ردت اطفر وارجع لغرفتي بدون ميحس عليه بَـس چنه سمع صوت خطواتي، صاح

-ويييينك؟؟؟

حسيت الروح انسحبت مني، صحت بصوت مرعوب

-حراااااميييييييي لحگووووونييييييي

وبعد غوشت عيوني وماشفت شي غير سواد بسواد...

يتبع☘️...

♛ ♛ ♛ ♛ ♛ ♛ ♛ ♛ ♛ ♛
هااا شتگووولون منو هالرجاال وشيريد؟
وشنو چان رد عميد الدين لجواهر من گلتله تتزوج هجران؟؟
هالمرة قفلتين تعويض عن البارت السابق😁 شوفوني تفاعلكم وتعليقاتكم الحلوة ولتنسوووون التصويت يحلوين🙂💘.

ولهنا وخلص الجزء الاول من "شفاه مخملية" نلتقيكم قريباً ان شالله وبأحداث اقوى بالجزء الثاني🔥.