شفاه مخملية الفصل الرابع والعشرون 24 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طويل تعويض لعيونكم♥️.

"شفاه مخملية"

بقلم: زهراء السلامي.

هجران تگول:
#دِ نطيني مَجـال أتفاهم ويـ النـاس
كُـل ما أريد أسولف تِنزل الدَمعَـة !

♛ ♛ ♛ ♛ ♛ ♛ ♛ ♛ ♛ ♛

"هجران"
سديت الصونده وگمت ادخل جوة، انفتحت باب الحوش بطريقه وحشيه، درت وجهي اشوف هاي منو يفتحهه هيچ، تفاجأت من شفته يدخل وجهه ميتفسر ومدمى عبالك مكتول، شعره مخربط وملابسه مشگوگة، تقدم ناحيتي وگال وهوه يلهث

-وين الزلم؟؟

-شنوو هالحاله؟؟ هاي شصاير؟؟

-هجران بسااع وينهم بكر، عميد الدين وينهم؟؟

-جوه بالصاله، فيصل فدوه فهمني شبيك ليش هيچ حالتك؟

ماحچة شي عافني ودخل جوه يركض، رحت وراه واني الف سؤال يدور براسي، چانو عميد وبكر وبيبي عطيه وعمه دلال گاعدين بالصاله يشربون چاي من شافو حاله فيصل گمزو

-بكر: فيصللل شمالك ياخووي؟؟؟

-فيصل: عميد اللحگ مرتضى تلاسن ويه ستار وگبت بينهم

ركض عميد وبكر وراه وبيبي عطيه گامت تدگ وتلطم وتصيح "اشتعلو خلفتك يمروان ناوي اله تموت كل فريخاتنه" طلعن انتصار وسلمى ؏ صوت بيبي وخاله انتصار تخبلت من عرفت مرتضى جاي يتعارك

-انتصار: يمممه وليييدي يااا بوويه لا يرووح وليددي ولككككك عمييييد اللحگ اخووووك لا يرووح مثل رضااا

تصيح وتخرمش بخدودهه وتصيح بأسم عميد، واضح من الصدمة والخوفه العايشتهه مانتبهت عميد اصلاً مو بالبيت وطلع، نزلت جوريه من فوگ وگوة تمشي لازمة راسهه من الدوخة نساتهه كُلش متعبتهه ودايخة اربعه وعشرين ساعه

-جوري: هاي شبيكم شصااير؟؟ هجراان شكوو؟؟؟

-هجران: مادري بَـس يگولون صايره عركة وفيصل اجه مدمى

-جوري: صخااام الصخمنييي فييصل شبييي؟؟؟ ولچ احچيييي شبيييي

-ماعرف جوري والله اجه للبيت وحالته حالة

ركضت بره تشوفه وجريتهه خفت تطلع هيچ وهيه ملابسه حجاب ولبسهه ضيگ وتصير الطلابه طلابتين

خاله انتصار وعمه دلال لبسن عبيهن وطلعن يشوفن شكو، بيبي رزلتهن حتى يگعدن بَـس انتصار گامت تصرخ وتضرب ؏ وجهها وتصيح

-انتصار: عمممه هذا مروووان ناوي علينه وعليييي انه حاسه حيصير شي هاليومين وگليبي ناغزني ارييدن ولددددي وينهمم ولديييي

عافت بيبي تعيط وطلعت بره، ركضت للحديقه اشوف شكو وغزل بصفي وجهها مبلوع صاير اصفر وترجف، همزين رهف نايمه متدري شكو چان انخبصنه اكثر

-هجران: غزاله هاي شكو منو ذوله؟

-غزاله: هذا مروان النذل الله يستر شني راح يسوي

ماعلقت ؏ كلامهه، طلعت بالحديقه واسمع العياط مال الزلم ماله والي، وصوت عميد الدين ظاهر اكثر شي، ماطولت السالفه نص ساعه ورجعو للبيت مرتضى منتهي ينگط دم من فوگ ليجوة وفيصل هم حالته مو احسن منه

دخلو جوه ورحنه وراهم وخاله انتصار تبچي وتونون، جوري ركضت تحظن فيصل وهوه حاوطهه بأيده ويهدأ بيهه، اما بكر وعميد لسه مارجعو، ظل بالي عليهم خاف صار شي هناك؟

-حجية عطيه: ولك يالمسلوووع مرتضى شمصخممم ولك؟؟

-مرتضى: حبووبه وحگ ابو فاضل اوصل الدم للرچاب اليوووم

-حجية عطيه: انطممم طمك الله شني للرچاب مادري شنهي ولك انت اله تموت اخيّك!!

-انتصار: يمه مرتضى بعد امك شصار؟؟

قطع سؤالهه دخول بكر وعميد صاير بركاااان، عاط بصوت خله گلبي يوگع ببطني من الخوف حسيته جاي عليه يرزلني لان مرتضى واگف بصفي

-ولكككككك مرررررتضى!!!!!

-مرتضى: خوية اسمعني السالفه...

-عميد: وللللكككك تكسررر چلمتتتتيييي!!!!!

-مرتضى: چا تريده يهينييي واظل ساكت!!!

-عميد: شني يهينكككك وللكك اذا انته المتلاسن وحاچي ؏ عرضه!!! ادعي ربك يمشوهه النه وماا يردون فصللل

-مرتضى: خلييي يرووووح يريد فصل وعلي املص رگبه

عميد هجم عليه وشاله من خوانيگه، بكر حاول يتدخل بَـس عميد عاط

-عميد: والچفل زينب اذا احد كظني اطلع حليب امه من خشمه!!!

ابتعد الكل ومرتضى منزل راسه گدامه، عاط بي

-ولكككك ارفععععع رااااسك زمااال

رفع راسه ؏ كيف بَـس عيونه بالفضاء وميباوعله، عميد ضاعط ؏ سنونه قوي ونتر بصوت وگف شعري راسي

-عميد: ولككك نذلللل انننه يعيروووني بمرررريتي اننننه يحچووون بعرضيييي!!!!!

-مرتضى: خوية انه..

-انچببببب وعلي حسسسسك اذا هسته (صوتك اذا سمعته) اعتبر روحك تبات بوادي السلام اليووم!!!

دفعه بقوه خلاه ينرگع بمحجر الدرج وطلع من البيت، راح وراه بكر اكيد حتى يهدأه، الصاله صارت صنننطة حس مابيهه، لحدما سمعنه صوت رگع الباب القويه معناهه طلع عميد، قطع الصمت بيبي عطيه من گالت والحيرة واضحة ؏ وجهها

-ولللك مررررتضى دهر فرك شصااااار ولك؟؟؟؟

-مرتضى: ستار عايرني بشيلاء

لطمن عمه انتصار وبيبي ؏ صدورهن، وانتصار رجعت تخرمش بوجهها حتى اثر صار بخدودهه

-انتصار: انفضحننننه اتخزييييينه يااا بوووويه ويييينك يعبااااس وينك يبعلي (زوجي) يبووووو

-دلال: ولكم شنييي شمالكم؟؟ ياهو النفضح؟؟ شمالكم تحچون بالمرحومة؟

-حجية عطيه: ولكككك مرتضىىى گدااامن حچه؟!!! ياهو السمعه؟؟؟ ولككككك احچييييي لا بعلي اكسر هاذ ؏ ظهرك (رفعت العوچيه)

-مرتضى: حبوبه شني يعني انه شعليّ، حچاهه مرة جدامي ومن اجه عميد لمح للسالفه بَـس اكيد محد افتهم

رجعت بيبي تعيط عليه ورزلته رزاله غسل ولبس، راسي صار طبل كلشي مدا افهم احس روحي بنص متاهه، وواضح هالشي محد يدري بي لان من سألت غزل تگول اكو سالفه بشيلاء محد يعرفهه غير عميد وبكر ومرتضى وبيبي وانتصار

سكتت ومالحيت بأسألتي لان وضع البيت متكهرب كُلش وابد مو مال اشبع فضولي هسة، لليل ورجع بكر ومن سألته خاله انتصار ؏ عميد گال گاعد بالديوانيه ميريد يدخل للبيت، حظرت ملابسه بينما يكمل سبح وگعدت ؏ الكرسي انتضره، طلع لاف المنشفه ؏ خصره وتوجه لميز التواليت يمشط شعره

كمل سوالفه وبدل ملابسه واني حمووت اريد اعرف شسالفه وليش هيچ عميد معصب وواضخ لسه ضايج الي حتى مارجع للبيت، حظرت ماعون فواكه وگشرت برتقال وقطعت تفاحة وانطيتهه لبكر وهوه متمدد ؏ الچربايه مجرد من القميص وحاط وحده من ايده جوه راسه

-بكر اريد اسألك سؤال

-امممم

-اگولك شصار اليوم؟ ليش هيچ سيد عميد عصب؟

باوعلي بنظره غريبه ودار عيونه

-بكر: بعدين مو وكتهه نسولف

-ليش يعني اني ماعندي شي ولا انته عندك خلينه نحچي بهالموضوع

-لا عدنه سوالف اهم، تعاي اگلچ شسمه شو بعد ماتحچين بجواهر شني تزاعلتن؟

-گلت بحزن: لاء بَـس مادري شو هيه متتصل بيه ابد

-وانتي؟

-اني هم استحي اتصل اخاف ازعجهه

-لا شني تزعجيهه هيه مو صديقتچ يله حبي گومي اتصلي عليهه لو راسليهه تطمني ؏ اخبارهه

-هاااا هيچ برأيك؟

-اكيييد چا انه واحد من اصحابي يختفي وما اسأل عنه شني من صاحب اكون

-يي صح كلامك بَـس اخاف تفشلني

-ليييش؟؟ صاير شي؟ شوفي انه حاس اكو سالفه غريبه لان حتى انه ما تجاوب عليّ!

-انته؟؟ ليش تتصل عليهه اصلاً؟

-هاااا لا هيچ يعني مرة ردت اسألهه ؏ فد دوه وگلت اكيد هيه تفتهم وعدهه خبرة

-هاا ماشي لعد يله اني رح ادزلهه رساله ونشوف تجاوبني لو لا

گمت اجيب موبايلي ورجعت اريد اگعد بمكاني وجرني بكر گعدني بحظنه

-هههه حبيبي شبييك اريد اراسل البنيه

-ايي عادي راسليهه وانتي بحظني مشتاگلچ

-يروحيي فديتك

طلعت اسمهه وكتبت "هلوو جواهر" ظليت انتضر رد منهه وبكر احسه عيونه ؏ موبايلي، اللتفتت عليه

-بكر شبيك؟

-شني شمالني؟

-مادري شو عينك ؏ موبايلي خيرك (غمزتله)

-شني حرام اعاينله

-هههه لااء بسـ...

قطعت كلامي من اجاني اشعار چان من جواهر، عزززااا طاااار گلبيي من الفرح من شفتهه كاتبه "هلوو حُبي" گمت اگمز بمكاني من الفرحة وبكر هم تحمس وگام يضحك عليه، ماتحملت رأساً دگيت عليهه، جاوبتني

-هلوو

-هلووو جواهر شلووونچ؟؟؟

-جواهر: زينه وانتي؟

-مو زينه والله

-اسم الله شبيچ؟

-والله مشتاقتلچ هواااي ليش متتصلين عليه؟

-والله هجران عذريني بَـس نفسيتي تعبت هالكم شهر ومو مال احچي ويه احد

-هااا لعد خاف ازعجتچ اني اسفه

-لا حبي انتي اختي شلون انزعج منچ

-ياعمري والله البيت مينحمل من دون حسچ وحس شهد

حچيت وياهه شويه بَـس خطيه گوة تحچي مبين عليهه تعبانه، بكر چان متفاعل ويايه وعيونه ؏ شفايفي منتبه شنو يگولن ومن ردت اسد الموبايل گال لو محاچيتهه اكثر اكيد اشتاقيتيلهه

-يي والله حبيبي كُلش مشتاقتلهه بَـس لا خطيه انته گاعد وحدك

ابتسم وظل يلعب بشواربه، ادري بي هاي حركته يسويهه معناهه ديفكر بشي، بشي كُلش عميق، تمددت ؏ الفراش وهوه بصفي بَـس احس بلعبان نفس قوي، غمضت عيوني اريد اغفى بلكي اصير احسن بَـس ماتحملت وگمزت للحمام تقيأت كلشي تعشيته

ثواني وشفت بكر ؏ راسي

-شني شمالچ؟

-مادري بكر بَـس كُلش تعبانه

حچيتله شلون تلعب نفسي واتقيأ وگال ياخذني باچر للدكتور يشوف شبيه، گعدت الصبح ومارست يومي الطبيعي، تنظيف ومسح وكنس وغسل الگاع وره ما اجو الزلم، قريب العصريه گال بكر بدلي نروح للطبيبه، بدلت ملابسي وطلعت وياه، دخلت للدكتوره وحچيتلهه حالتي، طلبت مني تحاليل وگالت يجوز حامل

-بَـس دكتوره اني مسويه تحليل ويطلع نيگتيف (سلبي)

-الدكتوره: تحليل وين؟

-تيست بالييت

-لا هذا مو دائماً يضبط روحي سوي تحليل دم

رحت للمختبر وبكر ويايه، سألني شگالت الدكتوره بَـس ماگتله ؏ كلامهه ان ممكن اني حامل ماريد افرحه ويجوز يطلع ماكو هيچ شي

كملت التحاليل وگعدت ؏ الكراسي البره وهوه واگف يلعب بشواربه ومنزل راسه گدامي، اوووف لو بَـس اعرف بشنو دتفكر؟! شويه وصاحو اسمي اخذ التحليل منهم وطلعت المحلله مبتسمه

-مبروك انتي حامل

فتحت عيوني بدهشه وفوراً درت وجهي اباوعله اريد اشوف ردة فعله، چان واضح عليه مصدوم من الخبر بَـس فوراً تغيرت ملامح وجهه للفرح

-بكر: صگددد؟؟

-المحلله: اي استاذ تفضل هذا التحليل

اخذنه التحليل واني الگاع مسايعتني من الفرح لو بيدي احظن المحلله وابوسهه، گلت لبكر ارجع للدكتوره حتى اشوف شگد صارلي حامل واحسب وياهه، والصدمة من حسبت گالت تقريباً صارلي تلاث اشهر واسبوع

وحتى الدكتوره تفاجأت لان محسيت ؏ روحي، هوه اني حسيت اكيد وسويت تحليل بَـس ماطلع شي واني بطبعي العاده تتأخر ياله تجيني كل شهرين واوقات تلاث اشهر ياله تزورني فَـہ ماهتميت للسالفه

رجعنه للبيت وبكر طاااير من الوناسه وحتى اغاني فتح بالسياره ومنسجم يغني وياه، چان فاتح اغنيه لـ ياس خضر ومتفاعل كُلش، عيوني عليه واشوفه شلون يهز براسه مطروب ويه الاغنيه، دار وجهه عليه وگال..

-گولي دللي شني مشتهيه؟

-ههههه حبيبي ممشتهيه شي

-لا لا اكيد اكو شي بخاطرچ يله گولي؟ تردين موطه، لفه، اءء ازبري، لو...

-هههههه بكر صدگني مامشتهيه بَـس اذا انته مصرّ تصرف اووّك اقبل تشتريلي موطه

-چا غير تدللييين

ابتسمتله وهوه اصرّ ننزل ناكل بالكوفي، نزلت وياه ولزم ايدي يعبرني الشارع اوييلي شگد احساس حلو شلون خايف عليه، گعدنه بطاوله ثنائيه واحد گبال الثاني وهوه عيونه اكلتني حتى خجلت من نظراته

-بكر: هجران تدرين انه شكثر فرحان؟؟

-الله يديم فرحتك عمريي

-بكر: بعلي ظنيت ما راح يصير عدنه خلفه

-لا بكر اسم الله ليش هيچ تگول

-لان تأخرنه يعني انه ماعرف وحده تأخرت بحبلهه انتي اول وحده

-ترا صارلنه كم شهر من متزوجين وين التأخير؟

-بكر: ادري بويه بَـس امي الله يرحمهه ونسوان ابوي من اول شهر حبلن فَـہ ظنيت هالظن

-هسة الحمد لله اني حامل صارلي 3 اشهر

-اي الف الحمد لله، زين ماگالتلچ بشني حامل؟ وليد لو بت؟

-لا بعد مو هسة يبين، زين انته شتريد يجينه ولد لو بنوته؟

-كلشي من الله حلو

-لا لا ادري بهالشي بَـس اكو ناس تميل لفد جنس معين انته شنو؟

-انه احب البنات واتمنى بچري تجي بت واسميهه زينب ؏ اسم امي الله يرحمهه

-ان شالله حبيبي ولو اني مفكره اسميهه معصومة بَـس يله ؏ البنيه الثانيه مو مشكله، زين واذا ولد شتريد تسمي؟

-اسمي جمال

-اممم حلو، زين شمعنه؟

-لان اكيد راح يطلع حلو عليّ (وضحك قوي)

-هههههههههه اويلي من غرورك، تدري اتمنى حتى او تجينه بنيه تطلع تشبهك

هز راسه وابتسم، كملنه اكل ورجعنه وره صلاة المغرب للبيت من بعدما افترينه واشترينه عشه وحلويات للبيت كلهم گال بكر هاي بشاره حملي

وصلنه للبيت وچانو الكل گاعدين بالصاله يسمعون بيبي عطيه تحچي سوالف اهل قبل، الكل هنا عدى عميد گالو بالديوانيه عنده خطار، بكر گاللهم ؏ حملي وبدت بيبي عطيه تبوس بيه شلعت خدودي وعمه انتصار ودلال وسلمى همات باركنلي، خو جوري طااارت من الفرح يمكن فرحانه اكثر مني، اله فتوح ونرجس گالبات وجوههن حتى كلمه مبروك ماسمعتهه منهن

حطينه العشه وسوالف وضحك ورهف تگمز يم جوريه تريد تحس بالطفل يتحرك لو لا، غزاله چانت ساكته طول الوقت وحتى عشه ماتعشت تگول تعبانه

ترخصت منهم وصعدت لغرفتي ارتاح واجاني بكر گال بحماس

-انه هسَّ ارد اروح ابشر عميد الدين ماشفته اليوم

هزيتله براسي بالموافقه وراح، بَـس تأخر ياله رجع واني استغليت الفرصه واول وحده بشرتهه جواهر مادري ليش اجت اول شي ؏ بالي حتى قبل امي وابويه

گلتلهه وهيه ماقصرت گامت تعيط من الفرح واسمع هلاهل وهوسات شهد موتتني من الضحك، اخذت الموبايل من جواهر وگامت تسويلي هوسات واسمع صوت دبچهه هاي البنيه اكثر وحده متأثره ببيئتهم هنا

تفاجأت من ردة فعل الكل لان جوري هم حامل واصلاً دخلت بالسادس وحامل بولد بَـس مافرحولهه نفس مافرحولي

تمددت ؏ چربايتي واني افكر بمعامله بكر الحلوة، دعيت من ربي هذا الطفل يجيلنه ويقربنه من بعض ويعوضني عن كل الايام العشتهه وياه، مشكلتي احبه لا مو بَـس احبه اعشقه وماگدر افكر بيوم من الايام اتركه لو ابتعد عنه، حتى اهلي صايره ماريد اروحلهم لان ماتحمل بُعده، وبالايام اليروح بيهه لبغداد لو لغير محافظه ماظوگ طعم النوم واني افكر بي

هستوهه شكلت عيني دا اريد اغفى وسمعت باب غرفتي ينفتح، بقيت ؏ نومتي واجه بكر تمدد بصفي، درت وجهي اباوعله چان نايم ؏ ظهره وسرحان، ماحچيت شي ماعرف ليش لسه اخاف منه، اخاف اگول شي وازعله لو اضوجه وينفر مني، اني مصدگت ؏ الله يصير زين ويايه من بعد شهور من الاهمال والمعانات

عيوني عليه تتابع تفاصيل وجهه وهوه سرحان، اتمنى من كل گلبي يطلع طفلي يشبهله بالشكل لان ماريدهم يعيشون نفس معاناتي وثقتهم تنهز بسبب قبح وجههم وحتى رأيهم يتخوفون يطرحو خوفاً من احد يجرحهم او يهينهم، كلما اتذكر حياتي التعيسه من چنت ببيت اهلي ونظرات الشفقه من امي بسبب خطوبه الناس لجوري ومحد يهتملي چنت اكره روحي مية مرة، واوقات ادعي ؏ روحي اموت

بشاعتي خلتني اتمنى الزواج واني بعمر صغير، اخاف ابقى وع حچاية نسوان قبل ابور ؏ گلب اهلي واني ادري بيهم حالتهم الماديه كلما جايهه تسوء وابويه صحته تتدهور واخاف اخواني يتزوجون ويهملوني وميبقالي سند بهالدنيا، چنت اتخيل يجي فارس الاحلام ويتقبلني مثل ما اني ويحبني ويدللني ويگول عني جميله واحلى البنات ومناقصني شي

تنهدت بعمق وسألت بكر سؤال يتردد ببالي وخايفه من جوابه

-بكر اني حلوة؟

دار وجهه يباوعلي بأستغراب، هز راسه بمعني "شنو"، عدت سؤالي

-تشوفني حلوة؟

-بكر: شطاري عليچ تسألين؟

-مادري بَـس سؤال يتردد ببالي

-چا شبيچ

-ابتسمت: يعني تشوفني حلوة؟

تنهد وحسيته حار بالجواب، حصرتني غصه ببلعومي ودموعي شويه وينزلن، لا هجران تمالكي نفسچ وانتظري جوابه، يمكن يكون منقذ الچ ويطلعچ من دوامة التفكير اللا نهائي، هز راسه وابتسم

-بكر: اي هجران انتي حلوة

-صدُك والله؟

-گلبچ حلو وهذا اهم شي

-تدري شگد هسه فرحتني

سكت وماجاوب، دار وجهه من الجهة الثانيه ودقايق وحسيت بنفسه يثگل يعني نام، گمت عنه ولبست جبتي وشالي ونزلت جوه اشوف غزاله احسهه مو طبيعيه وضايجة

نزلت الدرج واول وجه شفته گدامي عميد الدين، تمنيت ماشوفه ولا اصادفه اني مصدگت انسى سالفته مال خطبتي، ابتسم خفيف وگال بصوته الهادئ

-مبروك علويه

نزلت عيوني ورديتله المباركة، ومشيت سريع اريد ابتعد عنه، حسيت عيونه تلاحقني واني امشي، اللتفتت اباوعله وهوه بدوره سريعه دار وجهه وصعد فوگ، شعنده فوگ؟ هوه غرفته جوة؟

ماهتميت صراحة ورحت اشوف غزاله، دگيت باب غرفتهه اجه صوتهه ضعيف مبحوح، سمحتلي بالدخول..

-غزاله الحلوة شو مختفيه اليوم؟

مسحت دموعهه وظلت ساكته، گعدت بصفهه ؏ الچربايه وعيوني تتابعهه، توگع دموعهه مثل الليلو الصافي ؏ خدودهه البيضه، شايله شعرهه البني بطريقه تشبه الكبه بَـس مشيول ؏ النص لان شعرهه يوصل لچتافهه قصير، گرصت خدودهه الحلوة ؏ كيفي وابتسمت

-شبيچ حبي احچيلي

مثل الماصدگت، انفجرت بالبچي وتبچي بلوعه وحركة گلب، تريد تحجي متكدر حتى نفسهه انگطع

-غزل ؏ كيفچ اهدي جري نفس واحچي حبيبتي اسمعچ

گالت بصوت مبحوح من البچي

-زفتي بعيد ضحية

ورجعت تبچي بقوه، سكتت ماعرف شنو اكول، يعني عرسهه بعد اقل من شهر واني اعرف علاقتهه ويه مرتضى مو شي ودائماً بعيده عنه ومتحچي بي نهايئاً، تحچي بعميد الدين اكثر منه

-گلبي هسة انتي ليش زعلانه؟

-هجراااان شني ليش زعلانه!! انه ماااريدن مرتضى مااااريده ما احبنه شسوي بروحي هسة انه؟؟

-يعني انتي متحبي من قبل لا ينهي عليچ لو كرهتي من نهى؟

-انننه اكرهه من يوم يومي مرتضى واحد صايع سربووت

-عزااا غزل شبيچ تحچين ؏ الرجال هيچ!

-لان هذا الصگد!! هجران انتي ماتعرفين شني بهالبيت

-ولچ صارلي ثمن اشهر متزوجة مشفت شي موحلو غير من فتوح ونرجس

-غزل بأستهزاء: هههه وداعتچ الكل عنده خياسات بَـس من جوا الجوا يشتغلون

-شلون يعني؟

حسيتهه ارتبكت ورادت تغير الموضوع، بَـس مستحيل اسكت لان صراحة خوفني كلامهه

-هجران: زين احچيلي مرتضى شبي؟

-گولي شني الي ما بي!! لسانه والكفر بالله ومن مرة لمرة لو تشوفين صاحباته بكثر شعر راسي وعلي

-لااا مستحييل مامبين عليه ابد!!!

-مو اگلچ مبرگعيين!! حتى عميدي يجوز مايدري بي

-يعني ميسمع اخو يكفر؟!

-لا مايسوي شي جدامه يصير چنه فريخة دجاج ماينسمع حسه

-خو ليش متگوليله انتي؟!

-اوووف يالقهرر ماگدر احچي لان ماعندي دليل قااطع عنه!!

-بَـس غزل شوفي اذا هذا چان ماضيه مالچ حق تدخلين بي!

-ولچ يا ماضييي مصخممم لسه هو هيچ!! بعلي هذاك اليوم سمعته يسولف ويه وحده بالنقال ويحچي حچي وصخخخ لاعت چبدي منه

-يا يمممة!!! اني بدالچ اللگف أي شي عليه واگول لعميد او لأبوج او حتى لو لأمچ

-خايبه انتي شتحچين!! امي طلع بلسانهه شعر وهي تگول لأبوي مرتضى موش خوش زلمه بَـس مايقتنع يگول وليد عمهه ويحافظ عليهه من صچيچه لحظي الطايح كووون

-اويلي عليچ شلون بيچ انتي!!

-خليهه لربچ مالي غيره، حتى عميد حسيته جر نفسه وملّ من عندي وحتى لو احچيله ؏ سوالف مرتضى ويصدگني مرتضى ملتح ويلفهه ويودورهه لو يگول اتوب وماعيدهه وهو اكيد راح يگلي مثل كل مرة انطي فرصه ومن هالحچي

-شنو بيده يا عمريي اذا هوه ناهي عليچ وميقبل يفك النهوة يعني شيسويله؟! غير ديصبرچ هوه!

-ادري بي وعلي ادري

تمددت حسيتهه تريد تنام لان حتى عيونهه گوة فاتحتهن، ترخصت منهه وصعدت لغرفتي، سمعت صوت عميد الدين جاي من غرفه مرتضى لان غرفته بصفنه، اييي وين الله واهل البيت ديحچي وياه حتى يترك غزل

دخلت لغرفتي وسديت الباب ورحت للفراش افكر بكلام غزل، يعني صدُك مرتضى مو زين ويصاحب ويكفر (استغفر الله) اوووف الله يساعدچ غزاله شلون بيچ

گعدت الصبح ومارست بقية ايامي طبيعي، اجت شهد من دون جواهر لبيتنه وگعدت بغرفتهن لان بده الدوام وهيه هالسنه تطبيق مرحله اخيرة، شگد حاولت اقنع جواهر تجي بَـس متقبل وتگول من صالحي ولان تحبني ومتريد تضرني مترجع، بالبدايه مافهمت كلامهه بَـس بالايام الجاية فهمت كلشي وتوضحتلي اشياء دمرتني ودمرت نفسيتي

چنت گاعده اتابع مسلس تركي وغزل ورهف ويايه گاعدات بغرفتي، غزاله كلشي ماحضرت لعرسهه تگول مالهه واهس شي بَـس عميد گال اسبوع الجاي ياخذنه كلنه لبغداد ونتجهز ونشتري شنو النريده مناك

فرحت كُلش لان گالو رح نروح ببيت حجي اسماعيل ونبقى كم يوم، هم فرصه اشوف جواهر وبلكي اقنعهه ترجع لان ماصارت سالفة نقلتهه وگالو اذا تريد جامعة بغداد لازم ترجع للمرحلة الاولى وتعيد صيدله، ماعرف شنو هالنظام الغريب بَـس گالو جامعة بغداد ميعترفون بجامعة ذي قار وجامعة سامراء ثنينهن فَـہ يتبعون هالنظام وياهن

خلص المسلسل والبنات گامن كل وحده لشغلهه، رحت اشوف جوريه واسولف وياهه مشتاقتلهه احسنه كُلش ابتعدنه من تزوجنه لسه، ولا عبالك عايشات نفس البيت، دگيت باب غرفتهه وفتحلي فيصل گال عنهه نايمة وتعبانه، راد يگعدهه بَـس گتله عوفهه براحتهه

نزلت جوة آكلي فد شي ميته جوع، هذا حملي اكل مناا اذب مناك وبشرتي كُلش تعبت يعني فوگ ظيمي شكلي صار يلعب النفس اكثر، شفت فتوح گاعده بالصاله وبيدهه الرموت مال التلفزيون جاي تگلب، بَـس شافتني گامت تنافخ وتزفر مثل الظب

-فتوح: اويلييي عليك بچررر مگابل هالچهرة (الوجه) وگاعد

لبستهه ورحت للمطبخ مابيه حيل احچي وياهه، صبيت تمن ومسوين بانية احبهه اني وصبيتلي گلاص لبن، گعدت ؏ الميز الي بالمطبخ آكُل بلكي الله ما اتقيأ واتحمل، بعدني بنص الماعون واجتني عمه سلمى (ام فيصل)

-سلمى: هجران گومي غسلي ارضيه المطبخ بسرعه

-عمه الظهر غسلتهه ليش اغسلهه مرة لخ؟

-سلمى: مو اجه مرتضى ودخل بحذائه وتنگست مرة ثانية

-عمه والله ظهري يوجعني خلي جورية تغسلهه

فتحت عيونهه ولطمت صدرهه

-سلمى: هييييچ هجرااان تذبين شغللچ ؏ بت عمتچ الحااامل؟!!!

-عمه جوري مو بت عمتي جوري اختي واني هم حامل ترا وتعبانه

-فوگاااهه ترااادد ولچ منين طلعلچ لسااان انتي؟!!! اكيد من هالمسلسلات السخيفه التتابعيهن!! هييييچ مرت بكر فاهية وغبررره

-عمه اني مو فاهيه بَـس والله....

-قاطعتني: هههههههه فوگاهه يگولون هجران هب ريح وحايفه البيت حوووف

سكتت ومالاسنتهه، اصلاً هيه وين تعرف شكو ماكو بالبيت شو يوميه لابسه عبايبتهه ورايحة لبغداد ماخذه عمو خليل وتروح هناك يم بيت اختهه حتى صاير ميگعد بالديوان وكل الطلايب والفصوله ؏ راس عميد الدين، گمت غسلت ماعوني وهيه واگفه متخوصرة گدامي، نهيت الحديث وياهه

-عمه هسة بعيني اغسلهه

فرت بأيدهه ونترت وهيه مكشوله وجهها

-سلمى: الله يساعدك بكر

وطلعت برا واني دموعي گامت تصب، شلت نجانه وترستهه مي وگمت اذبه بالگاع، عيوني تغوش من الدموع ماگدر اشوف عدل، رحت للحمام اجيب معطرات ومنظفات حتى تروح ريحة زفرة الدم بَـس چان اكو احد بالحمام فَـہ وگفت قريب الباب انتظره يطلع

لهناك وسمعت صوت عياط عميد الدين بالمطبخ، ركضت اشوف شكو، وگفت قريب الباب ومديت راسي اباوعله بَـس هوه ميگدر يشوفني، وجهه صاير دممم وعروگه ناطه يا ستار، عاط بعلو صوته

-يممممممممااااااا هاااااي ياااااهو چاب الماااااي بالگاااااع!!!!

گمت ابلع بريگي من الخوف، دخلت للمطبخ والدموع گامت تنزل مثل السباق من عيوني

-ءءء اني.. ءء سسـ.. سيد هاي.. هاي اني ذابته

من شاف حالتي هدأ وفرك وجهه، زفر نفس قوي ورجع لنبرة صوته الهادئة

-وليش چابه الماي هيچ؟ زلگت والله ستر ماتكسرت

-اعتذر العفو والله اني اسفه.. اسفه والله بَـس.. بَـس چنت شسمه هاي اسوي، اسوي الگاع لان دم بيهه.. بيهه واني رحت...

من شاف توترتي وخوفي ابتسم، وقاطعني

-مو مشكله انه رايح

كمل خطواته بحذر خوفاً يوگع وتعداني وطلع من المطبخ، سمعت امه تحاچي وعفتهم ورجعت اكمل، الرجفة بجسمي واحس ريگي يبس من الهبطة، گعدت اللقط انفاسي ورجعت فتوح عليه

-فتوح: يممممه الفهاااوة والعيااارة تتماوين يم عميدي مووو انه الچ اله اگول لبچر يچسر عظامچ يالساغطة (ساقطة)

-انتفضت من مكاني: عمممه شدتگولين انتيييي كلشي ماسويت والله

-فتوح: انچعميي چعمچ الله انه الچ بت صباح الگحـ**

انهضمت من حچيهه ورجعت ابچي، عافتني وطلعت واني گعدت اجلف بالگاع لان موگعين مرگة وفدشي اسود ولازگ بالگاع، حسيت روحي اختنگت من الحر رغم احنه بنهاية شهر التاسع، ومن گلت لأمي تگول من وره الحمل حتى حب گام يطلع بوجهي من الحرارة

كملت كلشي ونشفت الگاع وغسلت وجهي حتى ميشوفون وجهي احمر من البچي، عدلت شالي وطلعت للصاله، چانو عمه انتصار وعميد وبكر وبيبي عطيه گاعدين يسولفون وچنهم ديحچون بسالفه زواج عميد الي تأجل لظروف غريبه ومحد يدري بيهه

-انتصار: يووم طب وتخيّر البت التعجبك بَـس گول ياهي تريدهه؟!

-حجية عطيه: اي يبعد حيي، عاين انه اگولن بت شيخ فهد مثل ريشة الحمام من البياض والنظافة والترافه حبوبه اخطبلكياهه؟!

يحچون وياه وعبالك منطيهم اذن الطرشه ميجاوب احد، بيده استكان الچاي والچكارة بالايد الثانيه ومبين عليه سرحان وجاي يفكر بشي، قطع سرحته من امه گالت

-انتصار: حبوبي شني رآيك اخطبلك شهد بت حجي اسماعيل؟

دار وجهه ؏ امه وصفن بوجهها، بكر أيد كلامهه

-بكر: اي عميدي حلوة شهد ومربايه شمالهه شناگصهه؟

ماتحملت اسكت، گمزت وماعرف شلون تدخلت وطلعت الحچاية من حلگي

-هجران: لااا سيد اخطب جووواهر

بكر دار وجهه عليه وخزرني خزره حسيت بؤبؤ عينه رح يطلع، گلت بصوت ناصي بَـس مسموع

-هجران: اسفه لان تدخلت بَـس جواهر حبابه وخوش بنيه وحلوة كُلش تجنن ليش ميخطبهه السيد؟

درت وجهي اباوع لـ عميد چان صافن عليه وفاتح عيونه عبالك متفاجئ من تدخلي، واني لو اطم روحي هسة هم مو كافي حتى امحي الموقف البايخ، بكر نتر

-بكر: گووومي جدااامي

-بَـس بكر....

-بكر: گووووووومييييييي

گمت واني ارجف مثل السعفه، مبين اليوم نهايتي ؏ ايده لان وجهه ابد ميبشر بخير ومطعون احمر من العصبيه، وگفني صوت عميد من اشر بأيده وگال بهدوء

-عميد: بكر يواشك وياهه

-بكر: امشييييييي لييييش واااااگفة!!!!!

ركضت ركض الدرج گمت اصعده كل بايتين سوه، طبيت للغرفه وفكرت اقفل الباب بَـس لااا يمه غير يموتني، گعدت ؏ السرير وقريت فاتحة لأم البنين تسهيل امر يااارب دخيلك، بعدني مامكمله سورة الحمدو ودخل بكر للغرفه، ينفخ نااار ووجهه ماعرف شلون افسره؟ معصب ؏ متوتر ؏ راح يموتني ؏ راح يذبحني ماعرف شنو بالضبط، اجه طاااير عليه ولزمني من شعري قوي

-انتييييييي شنيييييي تگليله اخطب جواااااهر هاااااااا؟؟؟؟!!!!

(مراح اگلكم لزمو اعصابكم هالمرة لان اني تعبت نفسيتي منه🥲💔🔪)

-هجران: بكر.. اسمعني.. بكر ااه شعري بكر فدووه بَـس اسمعني والله ماقصدت شي اني..

-شنييييي الماگصدتيييي؟؟؟ جاي تحلين البتتتت بعيوووونه ولچ اننننه الچ اليييوووم اعيد ربايتچ من جديدددد!!!!!

-گامت تنزل دموعي: والله مو قصدي بَـس البنيه خطيه حبابه وجميله وتستاهل واحد زين مثل سيد عميد والله، وكلُلش لايگين لبعض ليش يخطب اختهه وميتزوج جواهر؟!

ماحسيت اله ؏ راشدي قوي شعل خدي نار

-بكر: همممممم گاااااالت جوووووواهررر ولللللچ تردييييين تموتيييين انتي اليييييوم؟!!!!!

-اسف اسفه والله ماتدخل بعد اسففففه والله اني اعتذر وهسه انزل للسيد وهم اعتذر

-ولچ ترديييين تخبلليييينيييييي شني تنزلييييييله ولچ سااااااقطه!!!!!

ورجع ضربني ؏ الخد الثاني وهلس شعري تهلس بأيده وهوه يجر بيه، عيوني حسيتهه انسطرن وگلبي يدگ، اووف راح اتقيأ واذا اتقيأ عليه ميرحمني يلزمني ويكمل عليه، دفعني حيل وگعت بالگاع، ابتعد يلقط انفاسه واني حالتي بالضيم لازمة خدي وابچي

-بكر: اكسسسسسر رجليناتچ اذا نزلتي جوووه اليوم كلللله فهمتتتتتي!!!!

اشرت براسي بالموافقه بَـس خلي يروح، طلع وطبگ الباب وراه بقوه واني ركضت للحمام اتقيأ وابچي بهستيريه، كرهت روحي وكرهت الموقف اننني ثوووله ليش اتدخلللل!!!

اووووف الله ياخذچ هجراااان طول عمرچ مشلوعة گلب ومحد يتقبل أي شي منچ، اكو الم ببطني خفت ؏ طفلي وحظنت بطني بقوه اخاف عليه يوگع، لا يارب كلشي ولا يروح هالطفل اشوف بي الدنيا واحسه هوه الراح يغير حياتي

گظيت بقية اليوم بالغرفة ونمت واني محاسه ؏ روحي، گعدت الصبح بثمانيه بكر ماموجود وچنه اصلاً ما اجه ولا نام هنا، تذكرت الم بطني البارحة وركضت للحمام اشوف خاف واگع عليه دم لو فدشي، قريت فاتحة لأم البنين تسهيل امر ان ماكو شي وفعلاً الحمد لله مانازل عليه

غسلت ولميت شعري المنفوش اثر جرة بكر اله، وگعدت ارتب الافكار ببالي، يا ترى هم اتصل بأهلي واگوللهم؟ اي لازم اگوللهم ويجون ياخذوني هواي كسرني واذاني، بَـس اخاف احصل رزاله من ابويه لان اني المتدخله واني الغلطانه وياه؟ اوووووف راسي رح ينفجر

طلعت لجوري اسألهه وافضفضلهه اكيد هيه عدهه الحل وتساعدني، دگيت باب غرفتهه بَـس ما اجاني صوتهه الطبيعي، لا اجاني صوت عياط وبچي، فتحت الباب ؏ وسعهه وطبيت عليهه، نايمة بفراشهه شعرهه منفوش وكحلتهه سايحة ووجهها صاير خريطه، تعيط وتلوب

-جوووورية شبييييچ؟؟؟؟!

يتبع☘️...

♛ ♛ ♛ ♛ ♛ ♛ ♛ ♛ ♛ ♛
منو احترگ دمه مثلي وانرفع ضغطه من بكر يرفع ايده🥲، المهم انطوني توقعاتكم ولا تنسون التصويت يرووح ئلبي🫂🫀.