شفاه مخملية الفصل الخامس وأربعون 45 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت طوييييل وموفاجئ لعيونكم الحلووة♥️.

"شفاه مخملية" 💋.

بقلم: زهراء السلامي.

‏‎#"دائمًا ما كنت أنا الذي أركض وأسعى للأشياء التي أرغب بها، والأشخاص الذين أودّهم، وعندما تعبت لم يركض ناحيتي سِوى هذا الكم من الخسارات"

ملاحظة: ذكرت قبل لا تستعجلون بالاحداث وتحكمون من البدايه وانتو متعرفون شنو حيصير! اتوقع تعلمتو ؏ طريقة سردي وبيهه طابع الغموض وبمرور الاحداث يتوضح كلشي، وبالنسبه للتعليقات السلبيه متهمني💋 اما الايجابيه فَـہ تسلمون حبايبي هذا كله يدل ؏ ذوقكم وجمال تفكيركم😍♥️.

متابعه مُمتعة💋👇🏻.

♛ ♛ ♛ ♛ ♛ ♛ ♛ ♛ ♛ ♛

"هجران"
جفلت من دخل زيد يصيح ويبچي، مالحگت اسأله لان شفت عُثمان وسلمان اجو طايرين للمطبخ...

-عُثمان: يووول شصااير؟؟؟

-زيد: اوووووف راااح خويييه رااااح

ثواني ودخل عميد الدين بعده ديلبس بالگلابيه وخاله انتصار وبيبي عطيه وكلهم طلعو من غرفهم..

-زيد: اللحگ اخوك سيد عميد الدين

عميد تصنم وعثمان وسلمان طلعو طايرين لباب الحوش، تبعهم عميد الدين بَـس يمشي بخطوات ثگيله اتفاجأت منهه..

خاله انتصار وعمه دلال وفتوح طلعن وراهم واني ركضت اشوف جواهر وينهه ليش لسه ما اجت، فتحت الباب بدون ما ادگهه ؏ وسعهه وهيه فوراً لفت اللحاف ؏ جسمهه وصاحت...

-جواهر: هاااييي شنوووو

-هجران: عززا اسفه اسفه

طلعت دقيقه وصاحتلي ادخل، طبيت عليهه وصاحت بلهفة...

-جواهر: هجراان شصاير؟؟

-هجران: ماعرف بَـس دخل زيد يعيط ويستنجد بـ عميد الدين

-عزا شكوو

تحچي ويايه وتلبس بالجبه، ذبت شال ؏ راسهه وطلعنه سوه نوگف بالمطبخ ننتظرهم ونسمع الهوسة والعياط وصوت خاله انتصار واضح، انداريت ؏ رهف وغزاله وحده لازگه باللخ ومبحلقات عيونهن من الخوف..

تذكرت زينب ورحت لغرفه عُثمان چانت نايمه همزين ماحست ؏ الصياح، بستهه وغطيتهه عدل لان الغرفه بارده كُلش من وره السبلت كُلش منصي فَـہ عليته شويه خفت تستبرد، طلعت من الغرفه وياريتني ماطلعت واني اسمع الصياح مال معزايات جاي من الطرمة مال الحديقه..

رحت گبل للحديقه وخاله انتصار وبيبي عطيه وعمه دلال مملخات روحهن باللطم والبچي، وخاله انتصار شاگه دشداشتهه من الصدر ومطلعه صدرهه وتلطم وتخرمش بي..

شهد چانت فاتحة عيونهه ممصدگة وجواهر بصفهه والبنات الباقيات هم، يربي شصاير هنا؟؟! لكن ماطول سؤالي ثواني ودخلو سلمان وعُثمان شايلين كأنما جثة بَـس مدا اميز شي من هول الصدمة..

رادو يدخلوهه جوة وخاله انتصار چلبت بيهه ووخرت الغطه عن الجثة، ماتحملت المنظر رحت گبل للمطبخ وتقيأت چان منظر مرعب الراس مفصول عن الجسم وطالع كل الشرايين والدمايه كل مكان..

رجعت يمهم بعدما ارتاحيت شويه وخاله انتصار صاحت بصوت خلت دموعي تهمل...

-انتصار: لك مرتتتتضىىى ويييين رحت وعفتنننييي يا بعد عينيييي

شهگت وكممت حلگي بأيدي وابچي بالسكته والبنات ويايه وغزاله ورهف لسه مصدومات حتى دمعه منزلت من عيونهن..

دقايق ودخلو عميد وعُثمان وسلمان وحتى احمد اجه هاي شوكت وشلحگ يجي، ركضو لداخل البيت وجوههم حمممرة والعيون خابطه وعميد الدين صاير كبرريت وحتى عروگ وجهه كلهن ناطات..

دخلو للبيت وركضت وراه جواهر چلبت بي وصدهه عنه، صعدو كلهم فوگ ونزلو شايلين اسلحة يممه هاي شكوو.. گلبي گام يدگ واحس أطرافي جمدن من جواهر لزمت عميد من دشداشته وحچت وعيونهه مليانه دموع...

-جواهر: عليييك الله لتطلع عميد الدين ابوووس ايدددك عليك الله لتتهوور

ماسمعلهه ولا اهتم دفعهه عنه وگعت بالگاع تبچي وتلطم ؏ وجهها، هذا عذا يصير واحسه حلم مرتضى شلون قتلو هوه مو مسافر صارله يومين!!

دخت من الهوسه وراسي رح يطگ وزينب گعدت تبچي، رحتلهه للغرفه وانطيتهه مميه بلكي ترجع تنام بَـس ماكو گعدت بعد وشينيمهه..

شلتهه وافتر واهز بيهه وابچي، اتذكر وجوههم ولطم وصراخ النسوان الله يساعدهن شنو من موقف..

اوشكت ؏ النوم زنوبه ورجعت فزت من سمعنه صوت رمي متواصل جاي من بعيد، ركضت بره اسألهم وخاله انتصار ؏ حالتهه وگابلتهه غزاله ورهف وعمه دلال وفتوح يلطمن ويصرخن ويملخن بشعرهن...

-هجران: شهد هذا شنو الرمي؟

-شهد: هدو ؏ مروان

-هجران: شنو؟؟ شلوون؟؟ وليش مروان هدو عليه؟؟

-شهد ببكاء: لعد منو مسوي هيچ بمرتضى غير مروان وخلفته اخذو ثار ستار ؏ السكيتي واني اكول لسلمان معقوله لسه محد افتهم بموتت ستار يگولي هوه واحد صايع وعربدي وابوه ميدري بخلفته وين ما وين اثاري مخططين لكلشي بَـس حتى يحرگون گلوبنه

-هجران: زين ليش هيچ الصوت عبالك بيتهم قريب؟

-شهد: غير بيت مروان بالفرع الورانه

هزيت راسي واسكت بزينب، استمرينه ؏ هالحال لحد الـ 11 الظهر والزلم ماكو وخاله والبنات ؏ نفس الحال ورهف تخربطت وحرنه بيهه وبيبي عطيه وگعت من طولهه والبيت مليوص والحاله حاله...

ظل بالي ؏ الزلم لسه ما رجعو وجوري اتصلت بيه گالت همه بالطريق جايين وبكر اكيد جاي وياهم..

شويه ودخلو الزلم وجوههم متتفسر وعميد الدين وجهه صاير ازرگ وشعره مخربط ودشداشته متربه من فوگ ليجوة، وسلمان گصته متعوره وينزف منهه دم وعُثمان لازم متنه وينزف، بيبي شهگت...

-حجية عطيه: يبوووو ويلادنه راحوو يبوووو

گابلتهه فتوح وعُثمان ماجاوبهن وراح لغرفته وماطلع منهه، محد قبل يحچي شي وسلمان بَـس يتعود ويفشر عليهم ويگول عنهم جبناء ومروان ما شافو بَـس ولده موجودين ورمو عليهم وعُثمان انضرب بزنده بَـس مو جرح عميق..

خاله انتصار تخبلت وصارت تضرب ؏ صدر عميد الدين وتلوم بي وحتى صارت تغلط عليه وع ابوه "سيد عباس" وتلعن بيهم وسلمان يجرهه وهيه فاقده، اما عميد الدين مستسلم جوة ايدهه وحتى ما دافع عن روحه ولا حاول يحچي شي..

للمغرب والحال نفسه والنسوان گامن يجن والجيران اللتمو وخاله انتصار تعبت وتخربطت اخذناهه للغرفه ترتاح ولليل هم گعدت تبچي وتلطم هبدت صدرهه من الدگ، اجت جوري ورجلهه وعمو خليل وعمه سلمى وبكر ونور..

وانعادت نفس الاحداث لطم وبچي وتملخ بالوجه، والزلم من المغرب طلعو ياخذو يغسلو ويدفنو بَـس الفاتحة متصير اله ياخذون بثاره..

-جوري: سوده بوجههم مروان وخلفته ذوله شنو هالحقد الشايلي فيصل يگول مبين معذبي بأبشع الطرق بعدين ذابحي ذبح

-هجران: ايي كشت روحي لچ جوري مشفتي شكله الله يرحمه مسكين انقتل بزهرة شبابه

-جوري: سوده عليه شوفي حاله غزاله ورهف يكسرن الگلب

-اوووف الله ينتقم منهم

رحنه للمطبخ نسوي العشه ونشتغل وشهد ويانه وجواهر بَـس تبچي وتگول مرتضى بعد مات الله يرحمه بَـس عميد الدين شلون حالته الله يساعده..

للفجر الكل گاعد والنسوان يطلعن ويجن غيرهن وثاني يوم اجت مُلا تريد تقره وبيبي عطيه طردتهه تگول ماكو فاتحة لحدما ناخذ بثاره..

مرت يومين والزلم ماشفناهم بالنجف يشيعون وظلو هناك لان عميد الدين راد يرجع ويهد ؏ مروان مرة ثانيه بَـس شيخ فهد تدخل وگال عساس عدهم گعده باچر ويفضوهه حتى يسوون الفاتحة، لليل واجو بَـس عُثمان واحمد من الباب سلم وطلع...

-هجران: الله يساعدك

-عُثمان: ويساعدِك

گوة يحچي صوته مبحوح ووجه ذبلان، راح لغرفته ومبين سبح لان رجع للمطبخ شعره مبلل، گال..

-عُثمان: هجران ولو ازحمِك تگدرين تسوين شي ياكلو عميدي لان صارلو يومين ما ماكل أنَا كان گلت لـ جواهر تسويلو بَـس مالگيتهه

-هجران: لا لا خطيه جواهر متخربطه اني اسويله

طلعت معلاگ من الثلاجة وقطعته وشيشته، اشتغل وعُثمان يباوعلي منتظرني اكمل، اجت جواهر گوة تمشي وجهه اصفرر كركم..

-جواهر: عثماان وينك ليش ادگ ؏ عميد الدين وميجاوبني!!

-عُثمان: هوه بيا حال جواهر ماشفتي ؏ گبر مرتضى شسوه

بچت جواهر وعُثمان دار وجهه ومسح عيونه..

-جواهر: سوده بوجهي زين هوه وينه اجه وياك؟؟

-عُثمان: ايي وصارت سالفه من اجبنه ورجع يريد ينهد ؏ مروان وسلمان ينحش بي والله لوما شيخ فهد وشيخ هاشم كان هم واحد راح من ايدينه

-جواهر: وينه شو مشفته دخل للبيت؟

-عُثمان: گاعد بالديوان ويه سلمان وبقيه الزلم

-جواهر: صيحله فدوه بَـس اشوفه اريد احچي وياه بالي يمه

-عُثمان: ما يرضى جواهر عوفي هو تعبان هسة

-جواهر: بَـس اني زوجته ولازم اوگف ويااه

-عُثمان: انتي ماتعرفين عميدي يستحي ومايحب احد يشوفو ضعيف

ظلت تتوسل بي وگال عود يحاچي وبلكي يقنعه، سألته عن زنده گال زين وميوجعه.. اخذ الاكل وطلع واني هم رجعت لغرفه خاله انتصار اخذت زينب من جوري ورحت لغرفه رهف انيمهه..

نمت وياهه بدون ماحس من التعب وگعدت ثاني يوم ؏ صوت صياح عادي اصلاً تعودت من يوم مرتضى قتل ستار ويوميه نگعد ؏ هوسه جديدة، طلعت من الغرفه وصارت بوجهي ماما وندى..

سلمت عليهن وگالن فاضل جابهن، حظنت امي وبچيت هواي وتعذرت منهه شلون طلعت من دون رضاتهه بَـس گالت عاذرتني وتعرف حرگة گلبي شلونهه..

عفتهم ورحت لغرفتي وسبحت وسبحت زنوبه ويايه ورجعت نزلت، ريگت زنايب ورحت للمطبخ چانن شهد وجواهر وجوري وندى گاعدات، سألت جواهر عن حالهه..

-جواهر: الحمد لله صرت احسن

-هجران: يمعوده شجاچ البارحة خربتي ووگعتي ؏ كيفچ ويه نفسچ

هزت راسهه ومسحت دموعهه ادري بيهه متبچي ؏ مرتضى وبالهه كله ويه رجلهه وتبچي ؏ حاله، سألتهه ؏ اخر الاحداث وگالت...

-جواهر: مادري خاله انتصار تگول تريد دم بداله وعُثمان ميقبل يگول معناهه مراح تخلص السالفه

-هجران: صدُك تحچي خاله انتصار يعني اله تروح كل زلمنه!!

-شهد: شمدريني متفكر بهالطريقه ومحروگ گلبهه هيه متدري اذا اخذو دم معناتهه رح يرجعون وهم ياخذون ولو عميد لو سلمان يرحون بيهه اسم الله عليهم

-هجران: وتالي شنو حيسوون؟

-جواهر: مادري صارلي 3 ايام مشايفه عميد وبالي كله يمه

قاطع حديثنه دخول الزلم للبيت وعميد اصلاً مباوع لجواهر وكأنها مموجوده خطيه شگد انقهرت هيه ملهوفه عليه ومنتظره جيته تالي هيچ يلبسهه!

دخلو لغرفه بيبي عطيه لان خاله انتصار هناك وقفلو الباب عليهم، النسوان الخطار گاعدات بالهول وحتى جماعه الانبار جايين يبچن ويلطمن مادري ؏ شنو هنه اصلاً شعليهن واكو منهن مشايفتهن من قبل ومملخات روحهن باللطم والزلغ..

وگفنه بباب غرفه بيبي نريد نسمع عليمن رح يدور الحديث بَـس منسمع شي، فجأة والبچي احتل الغرفه واصوات الزلم واضحة همه الي ديبچون وخاله انتصار تبچي ومبين دتلطم..

كلنه صرنه نبچي ؏ اصواتهم وخصوصاً عميد من گال بحرگة...

"اووف يوم انكسر ظهري"

وسلمان يجاوبه وعُثمان يحچي وفيصل و و و كلمن ظل يگول شي، فتح قفل الباب عُثمان واحنه البنات ابتعدنه حتى ميشوفونه دنتسنط عليهم..

فتح الباب ووجهه احمر وعيونه خابطات، عاف الباب مفتوح شويه وراح لغرفته، لمحت خاله انتصار لان گاعده بوجه الباب وعميد الدين راسه بحظن امه يعني ظام وجهه وامه تدگ ؏ راسه وتبچي وسلمان نايم ؏ چتفهه وهم يبچي..

ساعه ضبط ياله طلعو من الغرفه بدون ميگولون شي وگالو هسة رح تبدي الگعده ويشوفون شنو حيصير..

مرت ساعه وساعتين و3 ساعات وهمه ماكو وخاله تخربطت وعمه سلمى وفتوح وياهه..

مرت خمس ساعات وسمعنه العياط والرمي وصوت زلم هواي وخبصه منعرف شصار، اجنلي جوري وندى يرجفن...

-جوري: هجران اني خايفه احس السالفه مراح تفض ؏ خير

جواهر سمعتهه وصارت تبچي وتگول گلبهه يلعب ومتأكده حيصير شي مو زين وفعلاً كلامهن ساعه ودخلو عُثمان وبكر للبيت وعمه دلال ركضت عليهم تستفهم شنو حيصير، بكر گال بمكر وهوه يباوع لجواهر...

-بكر: فضت السالفه بفصل دفع دية القتيل وفوگاهه مبلغ مالي وفصليه!!!

شهگنه وبيبي عطيه تخبلت وصارت تسب بعميد وسلمان ليش ما اخذو دم بداله وشلون هللهم يروح دم اخوهم بفلوس وفصليه وشلون وشلون وشلون وشلون.... اخير شي بكر حچة بخبث...

-بكر: والله انه گلتلهم اخذو دم ولا تسكتون بَـس عميد الديييين (أكد ؏ الاسم) أصرّ اله فصليه!!!

ورجع يباوع لجواهر وضحك مستهزأ، الاصوات علت وتعاركو عُثمان وبكر وبيبي عطيه تلاسنت وياهم وخاله انتصار طلعت من غرفتهه معصبه راسهه بشيلتهه ونزلت فد نزلة ؏ عميد الدين كُلش استخطيته شگد حچو عليه وهوه حالته بالضيم ومحد يدافعله من الموجودين غير عُثمان...

-عُثمان: كاااافيييي كااااافي الرجاااال ماكلوو الضيييم وانتم تدعون علييييه شَنو من بشررر انتمممم

-انتصار: ااااخخخ يفااادي چا تظن انه اريدن ادعي ؏ وليددي بَـس انه گتله ما ارضى اله بدممم

-عُثمان: اييي عمه سويهه بحر من دممم احنه نذبحلهم واحد وهمه يرجعون يذبحون واحنه نرد ناخذو وهييييك لآخر العمر ولحدما نخلص انتمم ليش ماتفكروون ومايهمكم احددد

سكتت خاله انتصار وبيبي بعدهه تدردم سكتت من دخلو احمد وفيصل وگالو رح تجي الفصليه..

تفاجأت من ردة فعل جواهر وشهد لان كلمممة ماحچن وبس صافنات، جوري راحتلهن وعاطت...

-جوري: ولچنن صخااام هييييي رح تجيي فصليييه يعني واحد من رجولتچن رح يعقد عليهه!!!

-شهد بصياح: قسماً بالله اذا سلماان سواهه ما باوع بوجهه بعد

جواهر تبلع بريگهه وسكتت ماحچت شي، انتظرنه تجي وكلنه ملتمين بالصاله ودخلو عميد الدين وسلمان وبنيه شابه وياهم لابسه عبايه ومغشيه وجهها مگدرت اشوفهه عدل...

عاط سلمان بيهه...

-سلمان: امشييي وليييي ساااقطه رح يجي الشيخ ويعقد

دفعهه حيل لدرجة وگعت بالگاع واستلمتهه بيبي عطيه بالعوچيه تضرب بيهه مثل الحيوان والبنيه مسكينه تصرخ وتستنجد حتى احد يساعدهه، ركضت عليهه وجوري وجواهر ويايه ولزمني بكر من ايدي ونتر...

-بكر: ماعليچ هاي فصليه

-هجران: وخررر شنو حيوااانه هيييه

عُثمان راح لبيبي وجرهه عنهه واحنه البنات گومنه البنيه ودخلانهه لغرفه رهف، ذبت العبايه وتفاجأنه كلنه ؏ جمالهه بنيه حنطاويه وجهها شگد ترف ملامحهه مخرطه تخرط تطلع بگصه غزاله..

گوة هدأناهه من البچي وهيه مستمرة تغلط وتسب بأخوانهه، تعرفنه عليهه وگالت اسمهه "سُهى" وهيه بت مروان الوحيده وعمرهه 19 سنه.. شويه وصاحو اجه الشيخ رح يعقدون بَـس منو الي رح يعقد عليهه؟!

راحت سُهى وجوري صاحت لفيصل حتى يفهمنه شكو، والصدمه الي خلت جواهر توگع من طولهه من فيصل گال...

-فيصل: عميد الدين عقد عليهه

شهد صارت تبچي ؏ حظ اختهه الي ماتهنت بزواجهه واجتهه ضُرة واحنه كلنه ملتمات حواليهه نريد نصحيهه ورهف وغزاله تخبلن وزينب تبچي وتلوب بين رجليه ومتقبل تشيلهه ندى الي تريدني، يعني بين قوسين اتصخمنه وتعزينه!!

رجعو للصاله وسُهى تمشي بصف سلمان وهوه يغلط ويسب ويفشر عليهه وع اخوانهه وابوهه طبت لغرفه فتوح وبعد ماعرف شصار بيهه...

رجعت للغرفه واخيراً صحت جواهر وبس تبچي وتلطم ؏ وجهها، جوري لزمتهه من جهه وشهد من الجهه الثانيه وامي اجت بلكي تعالج الموضوع وجواهر مستمرة تصرخ وتبچي، اخير شي تفاجأت من صاحت...

-صيحووووو ويييينه ويييييينه الشييييخ ويييينه

دخلت بيبي تعيط عليهه لان النسوان البره افتهمن بالموضوع وصارن يحچن ليش هيچ تعيط...

-جواهر: ميهمنييييي وييييينه بيبي صيحيييي خليييي يطلگنيييييي

-حجية عطيه: اياا معزاايه يطلگچ وهوه هيچ حالته!!

-جواهر: لعددد يتزوووج عليه!!!!

استمر النقاش وبيبي طلعت وماما گعدت تحچي وياهه وهيه راكبه راسهه، حسيتهه مو جواهر الهادئه العاقله النعرفهه كأنما انگلبت غير وحدة..

صاحت بشهد تجيبلهه موبايلهه ودگت ؏ امهه تگوللهه وانوب تخبلت اكثر من افتهمت ابوهه بالانعاش وحالته خطرة وشهد هم تخبلت ويبووو شنو من يوم مشؤوم هذا!!

جريناهه نگعدهه حتى تهدأ وشهد گالت من ترجع لبيتهه تاخذ جواهر يمهه واستغربت من گالت...

-شهد: حسبي الله ونعم الوكيل بي وبأهلي ماكو واحد ينشد بي الظهر سوده بوجهي عليچ جواهر رح تظلين طول عمرچ ملطلطه

-جوري: انلصميي شهددد شهالحچييي اهدأو وخلونه نفتهم ليش هيچ سوه!!

-جواهر ببكاء: اخذ اليريده مني وذبنييي سوووده بوجهييي شلون سلمتله روووحي شلوووون

-شهد: انچبي مو زين الرجال انتظر كل هالمدة وامي تدلل بيچ

اللتفتت عليهه وفتحت عيونهه...

-جواهر: شنو تدلل بيه؟

-شهد: ترا عميد الدين مو من ذاته دُخل بيچ امي بسمرته حتى تزوجون سريع

-جواهر: لااااء مستحييييل امي متسويهه!!!!

شهد تبچي وتحچي..

-شهد: والله العظيم فردوس گلتلي بابا موات وامي وحلاوة يردون يستقرون هناك بالخارج وحتى عرس ميسوولچ واني كذبت عليچ من گتلچ ماما وعدتچ تسويلچ عرس چبير ماردتچ تحسين بنقص

-جواهر: مستحيييييل اصدگ شهددد مستحيييييل زين ليش عميد انتظر كل هالمدة وما خطه هيچ خطوه!! ومن اتصل بأمي تگول ابوچ ميقبل تزوجون اله تكملين؟؟!

-شهد: انتظر كل هالمدة لان انتي چنتي متقبلين تذكرين من تگوليلي يبوسني واحسه يفقد ويخدر وانتي تدفعيي يعني انتي الماسمحتيله وثانياً اي صح بابا ما قبل تزوجون بَـس من وگع امي گالت خليهم يفضوهه همه عايشين سوه اصلاً، امي ذبتنه عبالك مصدگت بابا يمرض وكأن بَـس تريد تتخلص من عدنه باعتنه لان عرضو عليهه وظيفه هنااك!! وحتى فردوس ذبتهه وحدهه تخيلييي فردوس التمووت عليهه طلگتهه من طلال وشمرتهه وحدهه ببغداد حايره وحلاوة وينه حلاوة عبالك مو خواته خوات الجيراان من تزوجت لسه ما رفع موبايله وسأل عنيي وكره عميد الدين لان رفض يزوجه رهفف!! ذوله الاهل التشدين ظهرچ بيهم!!!

تخبلت بالزايد وصارت تملخ بشعرهه عزاا شنو هالموقف، امي انصدمت من سمعت الكلام وسألتني وحچيتلهه ؏ اهل جواهر وان ابوهه ماله كلمة والشور كله بيد امهه وهيه التحل وتربط وكلشي بيدهه...

نامت من البچي وشهد وجوري ظلن يمهه واني وامي وندى صعدنه لغرفتي حتى يرتاحن..

-ندى: عزا ماما ذوله شنو من بشر خطيه شفتو حالة البنيه؟! والله اني بدال جواهر اگلب الدنيا ؏ راس عميدان

-صباح: شو دسكتي انتي راسي رح ينفجر

-هجران: ماما حبيبتي طبي سبحي حتى ترتاحين واني انزل اجيبلكم عشى

ابتسمت ماما وحظنتني، ضحكت وگلت...

-هجران: هاا هاي شنو چنچ مشتاقتلي

-صباح: اي والله ومشتاقه لحنيتچ هاي ندى لو اموت گدامهه متسوي شي

-ندى بتذمر: ماااامااا هاي شنوو

-صباح: دوليي ام گلب الثخين ابوهه بغرفه العمليات وهيه تكهكه ويه صديقاتهه ؏ الموبايل السفيهه

-هجران: ماما معليچ بيهه تعاي گوليلي بابا شلونه؟

استفسرت عن ابويه والحمد لله العمليه نجحت وبعد كم يوم يرجع من ايران علما يفك الخياطات..

نزلت جوه والاجواء نفسهه وحااارة مووت حتى بوخة صايره، رحت بوجهي للمطبخ چانن جوري ونور واگفات يغسلن مواعين من شافتني نور گالت...

-نور: هلوو هجران وينچ ماشفتچ اليوم؟

-هجران: موجوده

جاوبتهه بنفس بارده وهيه سكتت بعد ماحچت، صبيت عشى وجوري جابت علي وزينب چانو ويه نرجس صراحة انصدمت ان اهتمت بيهم وحتى عشتهم يله هم انعم الله..

صعدنه فوگ كلنه بغرفتي وجوريه فلت لسانهه وگالت لأمي نور زوجة بكر الثانيه وماما صارت بركااان...

-صباح: لللچ من كل عقلللچ هجراااان لييييش ما ادري بالموضوووع اني!!!!

-هجران: ماما لان چنتي زعلانه وادگ عليچ ومتقبلين تجاوبيني ووصيت جووووري (خزرتهه من گلتهه) وصيتهه متحچي شي اله افهمچ!

-جوري: دولييي البنيه حااامل

فتحت عيوني متعجبه وماما رجعت ترزل وطيحت حظ حظي بالغلط وزينب تسمعهه تصيح عليه وتبچي، ماتحملت الخبر نور حامللل وامي افتهمت ببكر متزوج عليه ودتعيرني بي لان اختاريت ارجع لخاطر بنتي..

نهت الرزايل وگالت غصباً ؏ راسي ارجع، عطت واني ابچي...

-والله ولا ارجعع اني مو خليتچ تزعلين ومن بابا يفتهم بيه راجعه هم يزعل ودست ؏ روحي وع كرامتي ورجلي اتزوج عليه ومافكيت حلگي وياه حتى ميهيني اكثر كله لخاطر بنتي ترديني اعوف كل هذا وارجع من دونهه والله لو اموووت

-صباح: لعد ظلي هيچ صايرتله مدمغه

-هجران: لا مو مدمغه لان بكر راح لبغداد واني معليه بي وعُثمان گال ياخذ حقي منه ويطلگني

-صباح: شوووف هاي البطراانه لچ ذوله ميهتموون بنسوانهم شوفي عميد الدين الي يزامطون بي ويدافع عن المرأة راح اخذ فصليه ؏ عروسته مصارلهم يومين متزوجين غير بطرانه

-ندى: ماما بَـس عُثمان حباب وواضح الرجال يريد يساعدنه

-صباح: ادري بي حبااب اني گلت عنه مو خوش قابل!! بَـس اذا ماصارت سالفه طلاگچ مرح يهمه شي ومحد ياكلهه غيرچ يا غبره

سكتت حتى مدافعت عن روحي مابيه احچي بعد وتعبت من كلشي، رحت ؏ الچربايه ومثلت النوم عسى يزورني الليله، جوري فرشت لماما وندى وهيه اجت تنام بصفي ؏ الچرابيه ونغزتني بظهري وهمست...

-جوري: ادري بيچ مو نايمة

اللتفتت عليهه ونزلن دموعي مرة ثانيه، همست...

-هجران: جوريه شسوي

-جوري بغمزة: تطلگي من بكر واخذي عُثمان

نترت بيهه...

-انچبييي ادبسززز

-جوري: ههه اتشاقه ولچ بَـس لا صدُك عُثمان خوش رجال اويلاه لو متزوجني بدال فيصل مو احسنلي

-لچ بايعه شلون تحچين هالشكل

-جوري: طگت روحي وبعد ماتحمل سليمه وهذا رجلي طرطور ويطبل وره امه بعد ماتحملهم واتمنى اتطلگ

-يااا صدُك تحچين انتي!! لعد والحب والغرام والرسائل بالختله الجانت بيناتكم شصار بيهه؟!

-جوري: انعل ابو الحب ميهمني كل هالخرط اتطلگ من فيصل واخذ عُثمان هههههه

تحچيهه وتحرك بحواجبهه بخباثه، ادري بيهه تتشاقه بَـس حسيت غلط تحچي بهالطريقه..

-هجران: عزا العزاچ تروحين وترجعين ؏ الرجال

-جوري: لچ حلوو حلووو خرب يومه ؏ هالخلقه تجذب العين طلته

-هجران: صراحة اي

-اييي يعني مو بَـس انييي اشوفه هيچ

ضحكت وهزيتلهه براسي "لا" وماحسيت اله ؏ وحدة چفتت ؏ الچربايه، نزينه ثنينه واذا طلعت ندى گاعده، طبت بنصنه وهمست...

-ندى: شگاعدات تحچن ولچن

-هجران: امشي ولي ميخصچ

-ندى: اييي بَـس يخصني انطمرتي وعفتي زنوبه ؏ گلبي گوة نيمتهه

درت وجهي اباوع لفراش زينب نايمه وعلاوي بصفهه، اگدر اشوف بوضوح لان فاتحة تبل لام حتى خاف زنايب تگعد لو تغطي وجهها اشوفهه..

-جوري: تعاي لچ ندى الزاحفة دنحچي ؏ الصرگعانه عُثمان

-ندى: احيييييي يا ويل گلبييي

-هجران: يبووو انوب هااي ولچن انتن منتبهات كلما انجمعنه ونحچي بعُثمان كاافي لخاطر الحمزة مو رح نحسد الرجال

-ندى: اهخخخ افقد من يگول وبسطالو للحمزة

-هجران: غير تستقر اليسمع هيه شايفته وثارده وياه للعچس

-جوري: ههههههههه غصييييت ولچن هسة امي تگوم وتلطمنه تگول الناس معزايه واحنه نضحك

-هجران: اي والله ماكو احساس گبر

-ندى: اگولچ هوووجران

-هجران: وجععع عود دتقلد شهد وجواهر خيه ميلوگلنه التماوع احنه

-ندى: اي والله المهم تعاي اريد اسأل اذا تطلگتي من بكر العكرة يصير تتزوجين عُثمان؟

-هجران: عزاااااااا

نزت ماما وجوري لطمتني ؏ راسي حتى اسكت، سوينه رواحنه نايمات وماما شالت راسهه تطقس الاجواء ورجعت غفت، امي بطبعهه نومهه ثگيل ومتحس اله تصير كُلش هوسة، ضربت ندى ؏ راسهه ونترت بهمس...

-هجران: ادبسززز شلون تگولين هيچ

-ندى: ياا شبيچ بَـس سؤال

-هجران: لا ميصير يتزوجني

-ندى: ليش عود عادي ترا

-جوري: غبيه ميصير عدهم عيب هنا

-ندى: انتو مو تگولون عميد الدين مُنفتح وعنده عادي

-هجران: خو افتهمنه مُنفتح ببعض الشغلات مو بهيچ سوالف هاي كل الجنوب عدهم عيب الاخو يتزوج مرت اخو اله لا سمح الله زوجهه يموت

-ندى: هااا حرمات والله شوف حتى بهاي حظچ ماگاعد

-هجران: شفتي بله

-جوري بشهگة: صخااام بعينچ يعني مفكره بالموضوع انتي؟!

انتبهت ؏ روحي اني شحچيت هسة عزا، گلت بسرعه...

-لا والله ابدد اصلاً مو ؏ بالي والله لاا

-ندى بغمزه: اممم علييينه

-هجران: والله العظيم مستحيل اصلاً ممفكره والله شبيچن

-جوري: سكتي خيه واضحه السالفه ماكو داعي تحچين

-هجران: وغلات زنوبه لاا بنات فدوه والله اني مو هيچ والله مافكر بي بهالطريقه شبيچن

-ندى: ههههههه شوف هاي الفطيره

-جوري: هههههه ثوله دنتشاقه هاي شبيهه گامت تبچي يعني من كل عقلچ نفكر بهالطريقه

-هجران: نذلات لتسون هيچي والله بعد ماحچي وياچن

-ندى: هههه مسحي دموعچ يله كافي بعد منداهرچ

مسحت دموعي ونمت واني زعلانه منهن، گعدنه الصبح الدنيا مگلوبه وجواهر محظره غراضهه وتريد تطلع ويه شهد وعمه دلال تقنع بيهه..

صياح وعياط وبچي وافتهمت عميد الدين ماخذ سُهى البارحة بدون علم جواهر ماعرف شصار بحالي كُلش انقهرت وانمرد گلبي عليهه..

-فتوح: گبرر طمچ ولچ عاييقه جواهر طلعيي من الدار مايريدچ الزلمه

-جواهر: طااالعه وعايفتله البيت لان اني هم ماريده!!

-نرجس: ايييي خفه ان شالله ونخلص منچ ومن اختچ الرعنه

-شهد: انچبييي نرجس ويله جواهر هسة اتصل بسلمان يجي حتى يودينه لبيتي

شالت جنطتهه وبيبي عطيه تصيح عليهه شلون يطلعن من دون علم عميد الدين وما تأخر ثواني وسمعنه زئيره طرش اذاناتنه...

-عميد الدين: جواااهر ورووح ابوووي اذا طلعتي من الدار مالچ رده

جواهر جاوبته بصياح ودموعهه تهمل...

-جواهر: اصلاااً ماريد ارجععع طلگني واخلص منيي

فار عميد واجو عُثمان وسلمان هم تدخلو وبكر واگف ؏ جهه حچايه ما حچة حتى حسيته متشمت بيهم..

عميد ماقبل جواهر تطلع وجرهه بقسوه لدرجة گلت انخلعت ايدهه وطببهه لغرفتهم وقفل الباب عليهم وبس نسمع العياطه والصريخ وفجأة خنسو وفتوح اشتغلت بالعد والصف...

-فتوح: عااارات گحـ*** ملفي عميد الدين وخذه جواهر الگحـ*** بت **** شلوون لافت عليه وخذته

-نرجس: ساحرته يوووم ساحرتته

-حجية عطيه: انطمممن سرسريااات ما خشو بعينچ ناس غُرب گاعدين بالهول امشن ولن للحجرة لا أييّ احوس بفادچن

ماسكتن وهجمن ؏ سُهى ملخنهه تملللخ ويجرن بشعرهه ويرفسن بيهه وبيبي عطيه شگد ما عصبت شالت عوچيتهه وساعه ضاربه نرجس وساعه سُهى وعُثمان وسلمان وفيصل يجرجرون بيهن وفصلوهن عن بعض..

سلمان عاط....

-امشششن ولللن لحجرتچننن شنهييي چلاااب خوب ما چلااب

دخلن كلمن لغرفتهه وسهى مستمرة دموعهه تجري وتبچي خطيه هيه چانت اصلاً دتكنس الگاع ومالهه علاقه، شگد عيب واهل الانبار هنا شلون فشله منهم..

رحت للمطبخ ونور چانت تمسح الارضيه وتلهث ماعرف منين اجتني الحقاره وحتى ما اخذته منهه تعديتهه وطلعت للطرمة اغسلهه واجتلي ندى حتى تساعدني..

كملت الغسل وسقيت الزرع ورجعت للبيت صبينه الغده والنسوان بدت تجي علمود الفاتحة، طلع عميد الدين من الغرفه وجواهر بقت جوه حيييل كل هالوقت همه جوه شعدهم وهمه متعاركين!

صعدت لغرفتي وبدلت دشداشتي وماما چانت تحچي ويه حيدر ؏ الموبايل، سدته وگالت...

-صباح: هاي فتوح بعدهه ؏ هالعرامه؟

-هجران: يااا ماما هاي لا شيء بالنسبه لكل يوم هسة عود تخاف گدام الزلم تحچي خليهم يطلعون وشوفي العياقه ؏ اصولهه

-صباح: گبوور من قبل چانت هيچ وتنگط سَم

-هجران: يعني چانت علاقتچ بيهه قويه؟

-صباح: اي چانت نوعاً ما آدميه بَـس من ابوچ خطبني صارت وحده ثانيه

-هجران: ليش عود؟

-صباح: من الغييرة ماتت من ابوچ خطبني وهيه بعدهه ممتزوجة ومن هاليوم وبدت عداوتنه وافترقت عنهه

-هجران: عزااا من جرمننن تموت من عنديي

-صباح: دختوللي وحده عينهه ضيگه

-هجران: يعني چانت تريد بابا؟

-صباح: لا يمته اصلاً متعرفه بَـس من حچو بمواصفاته تخبلت وهيه چبيره بالعمر رغم حلوة شوفيهه هسة شكبرهه وبعدهه حلوة

-اي ماما همه كلهم حلوين حتى عمه دلال

-صباح: اي صح

عفتهه ورحت اسبح ونزلت چانن النسوان جايات والمُلا هستوهه تريد تبدي واشتغل اللطم والزلغ الحقيقي وصوت الـ "يبو" تسمع لكربله وخاله انتصار تكسر الگلب تلطم وتملخ بشعرهه وتصيح وين رحت وعفتني..

لمحت جواهر وشهد گاعدات بطرف الهول ويبچن وبصفهن جوري وندى، رحت يمهن وكملت الفاتحة ؏ خير..

مرت 3 ايام الفاتحة وجواهر وشهد لسه هنا ما رجعن وسُهى خطيه كل شويه فتوح تجيلهه تكفخ بيهه لو تدفعهه لو تتعمد تذب چاي بالگاع وتگوللهه تعاي مسحي ومن نحچي وياهه تگول هاي فصليه موزين ما ذبحناهه..

انكسر گلبي عليهه وهيه سُهى لسانهه طويل وتلاسن وتتعارك بَـس من يجون الزلم تخنس وتگعد بالمطبخ..

طول هالثلاث ايام وعميد الدين ماكو منشوفه اصلاً بَـس بكر واخوانه يجون يبدلون ملابسهم ويرجعون يطلعون..

رحت بالغرفه اتمدد واشرب زنوبه مميه وجواهر چانت گاعده وايدهه ؏ خدهه صافنه...

-هجران: شبي الحلو سرحان؟

باوعتلي ورجعت عيونهه ليگدام وحچت ببرود...

-جواهر: دا انتظر سلمان حتى يوديني لبيتهم

-هجران: يعني هاهيه رح تتركين عميد الدين

هزت راسهه وبچت، عدلت گعدتي وهمست...

-احچيلي شصار بيناتكم؟

ظلت مدنگه راسهه وبدت تحچيلي...

-جواهر: قبل 3 ايام من اخذني للغرفه وقفلهه علينه ظليت اعيط واتصارع وياه بأيدي بَـس اكيد ماگدرله ولف ايديه ثنينهن ليوره وكمم حلگي وهمس بأذني بصوت مكسور...

-عميد الدين: جوهرة عليچ الحسين لا تكسريني اكثر

ردت احچي بَـس ميطلع صوتي وهوه اردف...

-انه ماردت اسوي هيچ وما يهون عليّ زعلچ وكل دمعه تنزل من عيونچ تزرف افادي وعلي.. بويه انه سويت هيچ لخاطر اخوي الراح من بين ايديه لا تزوديهه عليّ وتموتيني اكثر...

سكت شويه ودارني عليه بَـس لسه مكمم حلگي ولايف ايدي لوره ظهري، حاولت اتملص منه وماگدرت سفطني ؏ الحايط ورجع گال...

-فكرت اخذ دم بداله بَـس رح اجني ؏ الباقين وانه لليوم متندم والكوابيس تطاردني شلون ذبحت ثنين من ولده بدال شيلاء، مروان ما يهتم لو ذبحوهم كلهم جدام عيونه ما ينهز بَـس محد يكظ ستار لو نبراس لأنهم ولده الحقيقين والباقين ولد اخو الميتين وهوه متزوج نسوانهم وكل واحد عنده خمس ولد ويعتبرو ابوهم..

ذولاك حاطهم هيچ بَـس للخدمه والشغل والهيبه جدام الوادم، بَـس كلشي ولا واحد يندگ بولده الحقيقين وبنيته الوحيده، فكرت وگلت احرگ گلبه ؏ بنيته مثل ما حرگ گلبي ؏ رهف ودمر شبابهه، انگلب الديوان من طلبت فصليه وعرفت هذا الي حيصير وچان ظني بمحله، تعرفين شنو گال مروان النگس من گلت اخذ بنيته فصليه؟

ماجاوبته لان ماگدر طبعاً فَـہ هوه كمل...

-عميد الدين: گال ذوله ولدي جدامك اخذ اليعجبك بدال دم اخوك واكيد انه موش غبي وادري ما يهتم ولا تنهزله شعره فَـہ اصريت ؏ الفصليه وگلت بَـس اخلف منهه فريخ واردهه مكسوره لأبوهه

وخر ايده عن حلگي ورخه الشد عن ايدي واني دفعته عني بكل قوتي وعطت ببكاء...

-جواهر: حرااام علييييك حراااام انته شلون انسان تخاف الله وتصوم وتصلييي واخذت بنيه مالهه ذنب فصليه

-عميد الدين: كل الذنب عليهه لان مروان ابوهه

-هااا لعدد شمعنه منطيت رهف فصليه بوكت ما مرتضى الله يرحمه قتل ستار؟!

-هذا يفرق

-ماااكوو فررق ماااكووو بَـس هااي انتو حلااال ؏ بنات الناس وحرااام ؏ بناتكم!!! انتو الزلللم متهتمووون تدوسون علينه وتحرگون بگلوبنه ولازم ننچب ونسكت ونگول تمم وصاار المهم تجي تالي الليل تاخذ حاجتك منهه وتخدمك وبسسسس

فتح عيونه متعجب ونتر بغضب گوة كاتمه..

-عميد الدين: جوااهر انه اخذ حاجتي منچ غصب عنچ؟!!!

صرت ادگ ؏ وجهي وابچي...

-انييي غبيييه سلمتك نفسييي انييي ثووووله اووووف يا غبااائي وصلافتييي اني شنو من شيييي

-عميد الدين: بسچ دگ وبچي بسسچ مااتعبتيي

-جواهر: الله ياخذني شلوون سويتهه منين اجتني الجرأة!!!

گعدت ؏ الچربايه ابچي، اجه بصفي وظل واگف وغطى عيونه، استمر الهدوء لقريب العشر دقايق وگمت ؏ حيلي وصرخت بعتب...

-انته ليش اخذتني بفتره الخطوبه؟؟! ليش مگتلي ماما سامحتلك من قبل فترة ليش محچييت!!!

-عميد الدين: جواهر مو وكتهه صارت السالفه وبسس

-لاا مو صارت وخلصص انته تدري بأهلي مو كفوو وگلت يلااا جواهر منو الهه امهه وتدلل بيهه عليه خليني انتهز الفرصه واخذهه وارتااح

عاط بيه...

-عميد الدين: انننه ما خذيتچ من دوون علم هلچ ولا الشغله صارت بالاجباار وما بادرت بالسالفه لان عرفت انتي رح تطلبيهه

-يعنييي اني الصلللفه اييي اييي ادري اني صلفه وادبسز وساااقطه و...

هجم عليه وكمم حلگي ونتر بهمس...

-عميد الدين: روحي لبيت سلمان وشهد ارتاحي چم يوم ونسولف ؏ هداوة..

عافني وطلع حتى مگدرت احچي شي ثاني ورحت للحمام وموتت روحي من البچي واني اتخيله البارحة گظه الليل كله وياهه تمنيت روحي ماعرفه ولا حبيته ولا متزوجته ولا اهلي همه اهلي ولا الي وجود بهالحياة...

-هجران: جواهر صلي ؏ محمد يمعوده الرجال يحبچ وسوه هيچ من حرگة گلبه ؏ اخو

-جواهر: يسوي شي حتى يرضي كبريائه ؏ حسابي وحساب سعادتي الزوجيه؟!! لچ هجران 3 ايام گظيتهه ويااه واني زوجته چانت احلللى 3 ايام بحياااتي كل هذا راح برمشه عين واني نايمه ؏ صدره وهوه يلعب بشعري ويتغزل بيه واجانه صوت عياط زيد وجابلنه الخبر الطرگاعه..

-هجران: الله كريم بعد هذا حظنه

هزت راسهه ومسحت دموعهه وگامت تحظر غراضهه واني هم گمت انظف واعاون سُهى خطيه هلكت من الصببح يگعدوهه لحد نص الليل ياله يعتقوهه وطبعاً السب والفشاير عليهه تمطر..

مرت شهرين ماحب اذكر الصار لان ماكو شي غير البچي والنوح والعويل واللطم كل يوميه فاتحة عدنه وبيبي وخاله يتخربطن من اللطم وياخذوهن مستشفى والباقين كلمن رجع لبيته وحتى شهد وجواهر بعد ماشفتهن وعُثمان صارله اسبوعين بالانبار واليوم راجع علمود امتحانات الدور الثاني واني هم رح امتحن حتى اخلص وماعيد سنه كامله...

رحت للمطبخ وسُهى چانت تبچي ومفرقة اصابع ايدهه..

-هجران: يمه شبيچ تبچين؟!

-سُهى: فتوح الساقطه چوت ايدي متعمده

-هجران: عزا العزاهه شلون؟!!

-سُهى: بگدر المرگه جاي اخوطن بي وطببت اصابعي بيهه

فتحت عيوني متعجبه من القسوة والوحشيه معقوله اكو هيچ بشر همج!! رحت عليهه وجبت شاش ومرهم ودهنته الهه خطيه اصابعهه مبطبطه من الحرگ وتبچي وتلوع..

واني جاي اللف بيدهه ودخل عميد الدين هيه رأساً دفعتني ووگفت بمكانهه، تفاجأت من ردة فعلهه وحسيتهه خايفه منه بَـس ليش وهمه حتى مينامون بنفس الغرفه ولا يلتقون الا نادر؟!

سلم علينه ودخل جوه للصاله وصاح "چااي" ركضت سُهى حطت القوري ؏ النار وجابت الچاي والاستكان وطلعت كعك وحطتهن بالصينيه وهمستلي...

-سُهى: فدوه انتي اخذي اله

-هجران: ليش خو انتي؟

-سُهى: هااا لا مو انه اخافن منه

-عزااا تخافين من عميد الدين معقوله؟؟

هزت راسهه وهمست بصوت ضعيف...

-سُهى: انه البارحة طولت لساني وصرت اعيط واتعارك ويه فتوح واسب بيهه وبعشيرتهه وهوه طب للبيت فَـہ اخافن سمعني ويكتلني

-لاا يمعوده عميد كُلش حباب وميبسط ابد

-مو اخافن انه هجران فدوه انتي روحي

هزيت براسي واخذت الصينيه اله چان گاعد بالهول وبيده جگارة ومبينه اكثر من وحده شعل لان الهول صاير مدخنه، اباوعله شلون كبرااان ولحيته عاليه ولسه مانزع الاسود وحتى وجهه ذبلان اصلاً صاير غير واحد..

حطيتهه الصينيه گدامه وهوه همس..

-عميد الدين: صيحيلي ذيچ

رفعت عيوني وسويت روحي مافتهمت وهوه خزرني يممه متت من الخوف ركضت بره وصحت لـ سُهى خطيه رأساً گامت تبچي وتتوسل بيه ابقى بالباب خاف يعيط بيهه لو يكتلهه، انقهرت عليهه وگلت رح اوگف وره الباب حتى لو صار شي اني اتدخل هه من كل عقلي علساس رح اگدر اتدخل..

طبت عليه تتراجف وعدلت شالهه لسه متنزع حجابهه گدامه رغم ماخذهه هوه ومرته شرعاً، وگفت بالباب اسمعلهم هيه سلمت وهوه رد عليهه السلام وفوراً بده بالحديث...

-عميد الدين: سمعنه بيچ تسبين بعشيرتنه بت مروان

-سُهى: اءء... انه سيد.. انه والله...

-سمعي يا بت الاوادم انه موش ظالم وماريد اعذبچ واللوعچ كل ما بالموضوع ابوچ انسان ناكر الجميل وداس ؏ ممتلكاتي وخذه الناس الاحبهه وانتي رحتي ضحيه

جاوبته بصوت خايف..

-سُهى: رح تكتلني؟

-ترديني اكتلچ؟

-سُهى: لاء لاء التوبه بعد ماحچي والله

-اذاً ماكتلچ بَـس تصيرين حبوبه وخوش بت ولسانچ گصيي

-حاظر

سكتو شويه ماعرف شديسوون يمكن اخذولهم صفنه، وره قريب الدقيقتين ياله رجع حچة بصيغه امر...

-عميد الدين: اليوم تنامين بحجرتي

-ليش؟

جاوبهه بحدة..

-يعني لييش؟؟ انه جايبچ هين لسواد عيونچ وعيون ابوچ العار!!

زفر بقوه واستغفر بصوت عالي ورجع يحچي بهدوء...

-عميد الدين: انه سيق وذكرت انه موش ظالم وما جبتچ هين حتى اعذبچ وأأذيچ! انتي تدرين الفصليات شيسوون بيهن لو ماتدرين؟

-ادري

-چا شفتيني كتلتچ لو خذيتچ غصب؟

-بَـس انته خذيتني غصب اول ما اجيت لبيتك

-استغفففر الله چان فااير دميي وردت بَـس أأذي أي واحد يصير بوجهيي وانتي احچي ضميرچ انه عذبتح بيومهه لو لا؟؟

-لاء

-چا خلصص، اسمعيني انه متزوج واكيد شفتي مريتي جوهرة موش صح؟

-سُهى: اي تخبل

-عميد الدين: صلي ؏ محمد من تگوليهه

ضحكت بصوت ناصي وصليت ؏ محمد وياهم، رجع گال...

-انه دمرت حياتي وراحت مريتي زعلانه صارلي شهرين ماشايفهه ولا لامحهه وصابر ومستحمل وانتي اوعدچ اردچ لبيت ابوچ وره ما تخلفيلي فريخ

-خو جواهر تخلفلك؟

-منييين تخلفلييي من زرف الحاايط وهيه زعلاننه؟؟!!

سكتت سهى مجاوبت وهوه كمل...

-فهمتي عليّ؟؟ اذا صار عندچ حمل كلشي يرجع مثل اول واطلگچ وترد جوهرتي ليه

-يعني هيه گالت تردلك؟

-استغفففر الله ولچ گصييي لسانچ وماعليچ انتيي ويله وليي اريد اگعد وحيدي

طلعت سُهى واجتني بَـس حسيتهه فرحانه، ضحكت من گالت...

-سهى: اگلچ هجران خاف من انام يمه يگوم يحبني ومايطلگني؟

-ههههههه لا خيه لا لتخافين ميحبچ لچ عنده جواهر روحه من هالدنيا متشوفي متلوع عليهه وشلون متأذي

-حگه خيه شني من حسن شايله هالبت خوب ريحتهه تثول واحد يريد بَـس ياكلهه كثر ما طيبه وبشرتهه چن بشرة طفل ما لايحتهه شمسه ترفه ونديه وعيونهه....

-ياااا سُهىىى هاي شبيييچ كافي لتضربيهه عين

-سُهى: هاا هاا ي صح هيه بزر نستله مبينه وما تتحمل هههه

-هجران: ديلا امشي اساعدچ بالدولمه

لمعت عيونهه وحچت فرحانه..

-صگد تساعديني هجران؟!

-ايي شبيچ ما مصدگة هلكتي وحدچ، يله نروح

گعدنه ؏ ميز المطبخ وطلعنه مواد الدولمه وگعدنه نلف، قريب دا نخلص وانفتحت الباب بهمجيه من شافني ضحك وضرب گصته خفيف وگال...

-عُثمان: احييي نسيت والله نسيييت

-هجران: هههه عادي تعودت وحتى صايره ماخترع

-عُثمان: شلونكم بنوات؟

-سهى: الحمد لله سيد

گامت وطلعت من المطبخ كالت تروح تنظف الديوان فَـہ بقيت وحدي وعثمان شاف الدولمه وگال...

-عُثمان: اويلييي يُبا شَنو يمته هاي الدولمه تسووهه؟؟

-؏ العشه عمه دلال مشتهيتهه

-عُثمان: اووف هجران عليكي الحمزة سويهه حامضه حلوة

-شنو شلون هاي؟

-ماتعرفين تسويهه هيك؟

-لا اعرف بَـس الحامضه

-عُثمان: تمام ابدل ملابسي واسلم عليهم واسويلِك الخبطه مالتهه اعرفلهه متعلمهه من جديتي كثر ما اگابلهه واگعد من تطبخهه هههه

-ماشي

راح شويه ورجع خبط الخبطه وحطيتهه ؏ الگدر، لليل صبيتهه والريحة يبووو تجنن حتى خاله انتصار الي لازمة حداد ؏ مرتضى من يوم وفاته هم طلعت من الغرفه وگالت صبولي ماعون..

صبيت للكل واخذت لرهف وغزاله صارلهن شهرين معتفكات بغرفهن وميطلعن وغزاله بَـس تبچي سوده عليه تكسر الگلب..

اخذت صينيه ورحت فوگ وصحت لـ رهف وسُهى ياكلن ويانه وفتوح صاحت...

-فتوح: انتييي ام لساان تعاي نزلي نظفي حجرتي

جاوبتهه سُهى وخزرت عيونهه لان متگدر تحچي الزلم گاعدين..

-سُهى: عمه باچر والله تعبت اليوم

-فتوح: انطمي ونزلي

نزلت والدمعه بعيونهه ودتروح للغرفه وصاح عميد الدين وهاي اول مرة يتدخل..

-عميد: امشي ويه البنيات وباچر نظفي

ضحكت واجت ويانه واني ابتسمت وباوعت لـ عُثمان واشرلي بحواجبه عود شفتي شلون ميقبل، ضحكت وهزيتله براسي لان من اخذهه عميد فصليه سولفت اني وعُثمان وگتله عميد غلط السواه وهوه مو عساس ضد هالمبدأ گالي بالضبط...

"عُثمان: عميد ما جابهه هينا تا يعذبهه بَـس راد يكسرو لراس ابوا"

وفعلاً هسه ثبت هالشي، صعدنه وگظينه وكت ويه غزاله ورهف شويه حسيتهه صارت احسن وتسولف هيه وسُهى، كملنه عشه ورحت لغرفتي واخذت زنوبه انيمهه واتصلت بجوري اتطمن ؏ اخبارهه...

-جوري: زباااله عااايشه بنص الزباااله اني هجراان

-هجران: عزا بعينچ لچ ليش؟

-جوري: صخام سليمه موتتني موووتتني يعني اني اليوم من العصر رايحة سونار اشوف جنس الطفل ومناك فيصل گال نطلع نغير جو وهيه گلبتهه مناحة وتبچي وتريد تتبرى منه شلون متاخذني وياكم

-يبوووو شهاللزگه!! زين وتالي عرفتي بشنو حامل؟

-جوري: اي بيه بنيه

-اللله فدوووه شگد حلووو الله يگومچ بالسلامه عمرييي

-اميين يارب، تعاي شلونه بكر العكره؟

-هجران: كلشي ماعرف يتصل فيديو واديره ؏ زنايب يحچي وياهه شويه واسده

-وسالفه طلاگچ شصار عليهه مو عساس عُثمان يطلگچ منه؟

-اي صح بَـس راح للانبار وگال لازم يأجل الموضوع ذوله خواله متصاخمين متلاطمبن صارلهم شگد ويگول ماگدر اعوفهم وحدهم فشله

-اي هم صح يله ما بقه شي تطلگين من العُكرة وتاخذين الانباري الصاك ههه

-جورررري وتالي وياااچ انتيي استحي شويه استحييي

-جوري: هههه شبيچ احب اشاقيچ واحس الرجال يحبچ

-عزاا بعينييي لچ يمته وين اكو هيچ حچي!!

-اي لعد شكو يساعدچ دائماً؟

-يعني كل اليساعد معناهه يحبني لچ اني مرت اخووو!!!

-اهووو ادري ادري دا اتشاقه ديلا عود نظم السوالف بيوم اليعترفلچ بيهه

-عوووع الله ياخذچ شگد مقززه لچ حتى صايره احلم بالرجال يعترفلي والله دمرتينييي وتعبت نفسيتيي انتي شنو من شيي جوري ادري تشاقين بَـس حرام كلامچ والرجال كُلش محترم وماكو مره بينلي نيته مو صافيه!!

-استغفر الله اي يله باي

-عابت باي

سديت الخط منهه ونمت، حسيت بنص الليل ؏ باب غرفتي تنفتح ؏ كيييف وكأن احد جاي يتسحب ويريد يطب بدون ميگعدني، فزيت من مكاني مرعوبه واذا اشوف بكر بوجهي بَـس شكله مگلوب ومبين تعبان، همس...

-بكر: نور سقطت وانه تعبان واجيتچ

باوعتله مستغربه وهوه اجه شمر نفسه ؏ الچربايه وجرني عليه، صار فوگايه واني اصارعه حتى اگوم ماريده، دفعته بكل قوتي وگمت اوگف بعيد وعطت...

-هجران: بكررر انته شدتسوووي شتريد منييي

-بكر: تعاي هجران تعااي

يأشرلي حتى اروحله واني عفته وطلعت من الغرفه، مشيت الممر الفوگ اليفصل بين غرفتي والدرج وشفت عُثمان واگف ببدايه الدرج عبالك يريد يصعد، باوعلي وعگد حاجبه مافهمت نظرته وهم ردت اغلس بَـس تقدم ناحيتي ولزگ بيه لزگ، همس بصوت مسموع...

-عُثمان: بكر مايفيدِك هجران خلي واللتفتي للصدك يحبِك ويتمناكي

فتحت عيوني ممستوعبه كلامه ولا قربه عليه لدرجة انفاسه تضرب وجهي، درت وجهي من الجهه الثانيه من حسيت اكو احد اجه واذا اشوف بكر بوجهي وفاتح عيونه وكأن افتهم غير شي بحركة عُثمان!!...

يتبع💋...

♛ ♛ ♛ ♛ ♛ ♛ ♛ ♛ ♛ ♛
هذا اخر بارت نزلته لخاطركم واتوقف وبعد مانزل لحدما اكمل امتحانات ان شالله 🤓🦋
+
ماردت انزله بَـس هواي بنات گالو نزلي بارت واحد وبعد منريد وهذا يعادل بارتين للعلم 🌚❤️‍🔥.

ديلا لتنسون التصويت والتعليق بين الفقرات وروحو شوفو قصتي الجديده نزلت مقتطف اليوم اسمهه "جمال قاتم" ضيفوهه للمكتبه حتى يجيكم اشعار من ابدي انشر، قصه نااار وشراار😍.

احبكممم وايييد وااايد🤓🦋.