شفاه مخملية الفصل السادس وأربعون 46 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

ما هان عليه مانطيكم عيديه🙈 وهذا بارت طويل لعيونكم♥️.

"شفاه مخملية" 💋

بقلم: زهراء السلامي.

#تغلبت على كل شيء ... إلا الذات
ولست أدري لماذا الذات بالذات ؟

♛ ♛ ♛ ♛ ♛ ♛ ♛ ♛ ♛ ♛

-هاا شلونِك بالامتحان؟

رفعت راسي اباوعله ورجعت نزلته ؏ الملزمة البيدي...

-هجران: جاي اتأكد من اجوبتي

-عُثمان: مممم

گعد ؏ الكرسي المقابيلي وطلع موبايله يگلب بي، رفعت راسي اخطف نظره منه وراسي يفتر، الليل كله منمت بسبب الارق والتفكير.. هالكوابيس مدا تعوفني وآخر حلم كأنما چان حقيقه كلشي چان حقيقي لدرجة من صحيت من النوم مفزوعه چان عطر عُثمان بخشمي عبالك چان بصفي!!

گام جابلنه عصاير ورجع مدلي كروسونه وفتحلي بطل العصير وحطلي كلينسه ؏ الميز وقصبه فوگاهه، رجعت اباوعله وهوه ابتسم وگال...

-عُثمان: اعرف انتم البنات نازكات وماتگدرون تشربون بدون القصبه

-هجران: هههه لا اني عادي

هز راسه وبقه ؏ ابتسامته، نزل عيونه لملزمته ولبس مناظره الطبيه الي يكرهن وميلبسهن اله من يقره يگول شگد ما اقره راحت عيوني..

-احم عُثمان يصير اسألك سؤال؟

-عُثمان: ممم

لسه منزل عيونه وگعد يقره واني سألت...

-انته مثقف واحس رح تعرف تجاوبني

رفع راسه وضحك ظل يباوعلي حتى احچي..

-هجران: شوف اني صار فتره احلم بنفس الشخص وصراحة الاحلام غريبه وكأنها واقع يعني احس بي وبأنفاسه وبعطره وكلشي يدل ؏ انُ واقع هذا شنو تفسيره؟

صفن بيه عبالك ديفكر بَـس استحيت من نظراته لان ركزهه بوجهي واني نزلت راسي..

-عُثمان: هاي الهه تفاسير كثيره ومو شرط كلهن صحيحة واصلاً مو شرط تكون وحده منهم صحيحة لكن هذا الشي مراح نگدر نجزمو

-اي افتهم بَـس كـ تفسير اولي نگدر نگول

-عُثمان: اول شي الشخص تعرفينو؟

-اي

-ممم دحگي أنَا من الناس احلم كثير واحلامي اوقات تكون مخربطه واضغاث احلام واوقات لا طبيعيه فَـہ اتذكر من كنت صغير احلم بأمي كثير وسألت جديتي هالسؤال وسويت بحوثات لان الشي زاد عن حدو

-اييي نفسي والله يعني لو تشوف احس اكو شي مو طبيعي

هز راسه وابتسم وگال وهوه لسه مركز بوجهي..

-عُثمان: بطلي تفكرين بهالشخص

-هجران: شنووو؟؟

-عُثمان: هذا الشخص كثير تفكرين بي ومحتل تفكيرِك

-عزاا يمه لا والله ابد اني ماحبه

-عُثمان: أنَا ماگلت تحبينو يعني شَنو كل شخص نفكر بي معناتهه عدنه مشاعر تجاهو هذا مو منطق!!

-هجران: هااا اي هم صح

-عُثمان: هذا واحد من الاحتمالات، الاحتمال الثاني حسب ميگولون علماء النفس انو يكون هالشخص متعلق بيكي ويفكر بيكي كثير

فتحت عيوني متفاجأة، بلعت ريگي وسألت...

-ليش يفكر بيه؟

-عُثمان: الله اعلم

صفنت بي وهوه سكت، سألته متردده..

-هجران: يعني شسمه مثلاً يكون عنده مشاعر تجاهي؟

-هههه لاا يُبا انتي شبيكي ويه المشاعر ممكن اكو شي يربطكم وع هالاساس يفكر بيكي

-هااا اي صدُك هاي خوش وجهة نظر وبعد اكو غير شي؟

-عُثمان: أنَا ماعرف انتي تشوفين ذكر لو انثى بالحلم لان هذا يغير كثير

-اءء هوه رجال

هز راسه وحك ارنبه خشمه وتقرب ؏ الميز وصار شويه قريب، همس...

-عُثمان: تحلمين بـ بكر صح؟

-هااا اءء ليش تسأل؟؟؟

-عُثمان: لان التفسير واضح هجران

-الي هوه؟

-عُثمان: اكو مشاعر متبادله بيناتكم وهذا الرأي ارجحو اكثر شي انو انتي تحبينو وتفكرين بي كثير ؏ مدار اليوم او خصوصاً قبل لا تنامين يجي ؏ بالِك وهذا الشي واضح من احلامك المتكررة وهوه هم يبادلِك التفكير

-وانته شمعرفك بكل هالمعلومات؟

-نسيتي أنَا مثقف

گالهه وابتسم واني اخذتلي صفنه افكر بكلامه، هاي اكيد كله من وره جوري وسوالفهه السخيفه خلتني افكر بالرجال بطريقه محلوة حسبي الله شنو من بنيه هاااي..

انتظرته علما كمل امتحانه وطلعنه سوه من الجامعه، گعدنه بالسيارة وكالعادة كلما تطلع اغنيه رومانسيه يطفي الراديو، احب احترامه الي وهالشي مفتقدته ويه الباقين عبالك مالي وجود وماحس بقيمتي بَـس من اكون ويه عُثمان وجواهر يحسسوني الي اهمية..

بالطريق واجه ؏ بالي السؤال الي صارله شگد يتردد بذهني واخاف اسأل وانصدم بالحقيقه بَـس لازم اسأل حتى اعرف اوادمي شنو...

-هجران: عُثمان يصير اسألك سؤال؟

-عُثمان: تفضلي

-هجران: اءء شوف هوه السؤال شويه حساس و.. ماريدك تزعل واذا محبيت تجاوب...

-عُثمان: اختصري ماحب هالحكي يوترني

-اووّك شوف مرة بكر گال فدشي صفني وحسيته غلط لان مستحيل انته تسويهه

-الي هوه؟

-بخصوص امك ممم بكر يگول....

قاطعني وگال بنبرة جامدة...

-عُثمان: أنَا السبب بموتت امي؟

-اي وشوف اني متأكده اكو شي.....

-عُثمان: لا لتتأكدين لان فعلاً أنَا السبب بموتت امي واساساً هذا الي يخلي بكر يكرهني هالكثر

-شنووو؟؟ شلون يعنيي؟؟؟

جر نفس عميق وزفره وظل ساكت ماجاوب، ظليت اباوعله وهوه وجهه مستقيم يباوع للطريق، حسيته مراح يحچي لان استمر صامت واني هم سكتت ومحچيت شي اله من گال...

-عُثمان: امي غرگت بسببي وخانهه النفس وراحت من ايدينا وحرمت ابوي وبكر وخوالي منهه

سكت ثواني ومسح عيونه اكيد مسح دموعه الخانته، حمحم حتى يعدل صوته المبحوح وكمل...

-كان عمري خمس سنوات وبكر سبعه كنه اقرب اصدقاء، نلعب ونتمازح ونحب بعض كأي اخوان طبيعين الى ان اجه يوم وابوي گال نررح للـ**** (اسم المنطقه) نغير جو وهم حتى نسبح، اجو خوالي ويانه وكان صنفته احلى يوم بحياتي لوما أنَا وبكر وابن خالي ثامر رحنه نسبح..

سكت شويه وهم كمل...

-تونسنه ولعبنه بالماي بَـس الماي شويه عميق، بكر راح واجت امي تلعب وياي وتشجعني حتى اسبح تصفگ وتهوسلي وفرحانه وهيه تشوفني وانا اخذني الحماس ورحت زايد...

حسيت انو الوضع صار خطير لان الموجات اخذتني وحسيت بشي يسحبني من جوة وظليت اعيط لأمي واستنجد بيهه واكيد گلب أُم ماگدرت تشوفني هيك وماتساعد ابنهه..

طفرت ورايه وثامر لسه واگف اخذتو الجمدة وماتحرك من مكانو، لو رايح وصايحلهم كانو لحگو عليهه بَـس ساعة غباء صابتو.. ظلت امي تعالج ويايه تريد تسحبني ومثل ما يگولو الغرگان يتعلگ بگشايه، لفيت ايدي حول رگبتهه واصعد ؏ جسمهه اريد انجي روحي....

رجع سكت وسحب كلينسه ومسح عيونه، وگف السيارة ؏ جهه ونزل، باوعتله من الجامه طلع جگارة ودخنهه وعيونه معلگه بالفضاء، رجع للسيارة ورش عطر ؏ نفسه وبالسيارة حتى يخفي ريحة الدخان..

ظليت ساكته بَـس كُلش انقهرت عليه وماگدرت اسكت..

-هجران: بَـس هذا مو ذنبك انته شعليك

-عُثمان: ذنبي ونص

-لا عُثمان هالشي غلط انته اولاً غرگت واكيد امك مراح تعوفك بهالحال اني چان سويت نفسهه و....

كال بصوت ضعيف حزين حسيته طفل..

-عُثمان: بَـس ابوي وبكر من يومهه يلوموني ويكرهوني

-شنو اليثبتلهم انته السبب؟

-عُثمان: حكيتلهم الصار وطلعو امي من الماي مگطوعه النفس ابوي بيومهه انجن وكتلني كتلل بحياتي ما انسى، زورگ جسمي بالحزام يضربني من غير رحمه وبكر واگف ؏ جهة حتى ما دافع عني وانا كنت طفل وبنية جسمي ناعمة كثير، ظليت استنجد واصيح بأمي وهو يسمع هيك ويزيد بالضرب ويصيح كتلت امك انته هم الك عين وتصيحلهه...

سكت وبچه بصوت مسموع وحط الكلينسه ؏ وجهه، بچيت وياه وحسيت گلبي انكسر، جر نفس وكمل...

-عُثمان: ذبني ؏ خوالي وسنييين أنَا ما شايفو واشتغل عبد عند خوالي ونسوانهم، كنت اطلع من سته الصبح مارجع اله نص الليل تا اشتغل، مافد يوم احد انطاني اكل لو گال عُثمان طبخنالك ويانه لو اشتهيتلك هالأكله، ايام وايام ارجع هلكان من الشغل وانام جوعان، جديتي عيشه كانت تهتملي بَـس من يوم يومهه مريضه وماتكدر تشتغل ومو دائماً عشت وياهه اتنقل بين البيوت..

نسوان خوالي كانو يأذوني ويسبون بأمي يغارون منهه وخوالي يطبلون وره نسوانهم ويهجمون ؏ فريسه ضعيفه الي هوه أنَا وكنت كلما يكتلوني انام احاول انسى..

ابوي ذلني عدهم ومافد يوم سأل عني عمي عباس كان يجي هوه وعميدي يشوفوني كل فتره وفتره وينطيني فلوس بَـس مارضى اخذهم كنت استحي منو بَـس يجبرني تا اخذ منو تا ما اعتاز من خوالي..

رغم أنَا اگلك خوالي يحبوني خصوصاً خالي الكبير وانا احبهم كثير بَـس نسوانهم كانو يحشون براسهم حكي عني وتهموني تهايم باطله وكان خالي الكبير يوگف وياي ويدافعلي لهيك احبو وواگفلو طول بطلابتو

-هجران: اويلي عليك هاي شنو هالعيشه!! زين لعد شعجب هالفتره كلهه گاظيهه هنا؟

-عُثمان: تركت الانبار بسبب عركة صارت بيني وبين ابن خالي وصادف عرس غزاله وظليت بالناصريه ووره فتره خوالي دزوا عليه وصالحونه أنَا وثامر..

-هجران: افف عُثمان شگد اتأذيت حرام والله

-عُثمان: هاي الدنيا هجران

-زين اريد اسألك ؏ موضوع...

-اسألي كل البالِك بعد شفتيني ابكي وهالشي كبير عندي

ضحك ضحكة حزينه واني ابتسمت..

-هجران: ورث امك بكر يگول اكلته عليه

-مستحيييييل خوالي وزعولنه الورث بعد ما عبر عمرنه الـ 18 سنه لان عدنه اوراق رسميه وهذا السبب الي خله نسوانهم يحنون عليه شوي

-لعد بكر يگول هوه كلشي ماحصل؟

-عُثمان: قصدك أنَا ماكلو عليه؟؟!

-لا لا اني معليه بَـس هالشي ببالي من زمان

-دحگي هجران ورث امي كان عمارة وصارت نص بالنص الي ولبكر

-لعد شلون يگول هيچ؟!

-كل ما بالموضوع من كبرت شويه وجمعت مصروفي وفلوس عمي عباس الي كان ينطيني كنت ماصرف ولا ربع دينار واشتغل ليل نهار واجمع والله باركلي بفلوسي واشتريت حصة بكر

-عززاا هوه يگول اكلته عليه!!

-لااا شحدو يحكي هيك خلي يجي يگولو هالحكي بوجهي أنَا كلشي السويتو بحياتي وكل شي حصلتو وكل نجاح حققتو من تعبي وجهدي الخاص واكيد بمساعده خالي وعمي عباس

-يا ربيي لعد بكر شسوه بالفلوس؟

-اتذكر گال حطهم ببورصه مادري شغلهم ماعرف بالضبط شَنو بَـس المهم خسر بيهم وراحو عليه

هزيت براسي وسكتنه بقيه الطريق، وصلنه للبيت وگلي يريد ياخذ زينب يشتريلهه، نزلت جبتهه چانت يم غزاله تشتغل وعينهه ؏ زنوبه، رجعتهه للسيارة وگتله اروح وياهم حتى اشتري كم شغله..

نزلنه للمحل وزنوبه بيد عُثمان واني بصفه امشي وهيه شنو تأشر عليه ياخذلهه وصايره تحچي شويه وشنو تگول عُثمان يتخبل ممصدگ تحچي وياه واني اخرب ضحك عليه..

-هجران: زينبب ماماا كاافي عيييب هاي شنو

-عُثمان: شحايتك منهه خليهه

-هجران: لا عُثمان ميصير تتعلم بعد ومتقنع بشي بسيط

باوعلهه وحچة وياهه عبالك بنيه چبيره ضحكني...

-عُثمان: بابه دحگي امِك ماتقبل اشتريلِك كلشي فَـہ گولي شَنو اكثر شي مشتهيتو

زينب صفنت عليه وباوعتلي عرفتهه افتهمت عليه ضحكت وگلت...

-هجران: اي زنوبه شي واحد بَـس

-زينب: الليد هلاوة (اريد حلاوة)

-عُثمان: قربااانوو أنَا هجرااان رح اكلهه والحمززة

ضحكت عليه ونزلهه للگاع حتى تختار نوع النستله التريدهه، شو هاي شالت 3 واجتنه، صحت بيهه...

-هجران: زينبب اني شگلتت!!

فتحت عيونهه الكبار ؏ وسعهن تباوع لـ عُثمان، گالت گوة...

-زينب: ئداله ولهف (غزاله ورهف)

-عُثمان: احيييي يا ويل حاليي يُبا انتي شَنووو

اخذ النساتل منهه واصرّ تشتري بعد اليعجبهه مكافأة لكرمهه وگلتلهه تشتري لـ سُهى هم خطيه محد يتذكرهه بشي..

صعدنه السيارة وعثمان فتح اغنيه وزنوبه تگمز بحظني مكيفه، فرنه شويه بالسيارة وكل شويه يجر ايدين زنايب ويبوس ويشمهه ويحكهه بلحيته وهيه تضحك..

وصلنه للبيت وشفت سيارة بكر سافطه بباب البيت، اخذت زينب وفتت بسرعه بَـس سلمت وحتى مباوعت منو گاعد بالصاله ورحت ركض فوگ..

بدلت ملابسي وهستوني نزعت وطلع بكر من حمام الغرفه صفنت هذا شجابه هنا!! باوعلي ويباوع لجسمي ويتقرب عليه...

-هجران: هاي شوكت اجيت؟

-بكر: من ساع

-هجران: هاا.. هاي شبيك؟ ياا هاي شكووو

حظني وحط وجهه برگبتي يستنشق عطري واحس رجفة بعظامي، همس يم اذني...

-ريحتچ تدوخ

دفعته عني ورحت اوگف بنهاية الغرفه...

-هجران: بكر روح ماريدك ودانتظر طلاگي منك

-خاف ماترضين

-لا اقبل واصلاً ماحبك بعد

ضحك بخبث ورفع تك حاجب وگال...

-شو عيونچ تحچي غير هالشي

-هجران: بكر بلا مراوغ بالحچي گتلك ماريدك وبسسس

خزرني بقوه مهتميتله، لبست ملابسي سريع واخذت زينب وطلعت من الغرفه، ركضت جوه وشفت سُهى دتمسح الارضيه من شافت زنوبه ضحكت وگالت...

-سُهى: زنايب وينچ وليييچ اشتاگيتلچ ماشفتچ اليوم

زنوبه اشرت فوگ وحچت بطفوليه...

-زينب: ئزاله (غزاله)

-سُهى: ايي ادري چنتي يم غزاله بَـس مادري شمالهه ماتحبني ولا تخليني اطب بحجرتهه

-هجران: لا حبي بَـس غزل شويه تعبانه ؏ موتت مرتضى ومتحب تحچي ويه احد هالفترة

-سُهى: اي صح الله يساعدهه يله چا انه اروح اشوفن السيد اكيد يريد غده

-هجران: منو السيد؟

صفنت بوجهي وضحكت خجلانه..

-سُهى: سيد عميد الدين استحي اندهله (اصيحله) بأسمه

-هجران: هااا

عافتني وراحت لغرفه عميد بَـس تفاجأت من دگت الباب قبل لتدخل، ذوله شنو سالفتهم؟ غلست ورحت للمطبخ اصبلي غده وغديت زنوبه واخيييراً شرفت الست غزاله وشفنه طولهه...

-هجران: ياا هلااا نور الطابق الجوة بطلتچ ست غزل هههه

مجاوبتني، اكتفت بأبتسامه حزينه وراحت للگدر تصبلهه اكل..

-هجران: غزاله خلينه نآكُل سوه والله مشتاقتلچ اني

-غزاله: زين

گعدت گبالي ؏ الميز وتآكُل بهدوء، كسرت الهدوء زينب..

-زينب: ئداله الليد مي (غزاله اريد مي)

-غزاله: انطيچ ماي عيني يبعد عيني

ابتسمت ؏ ردهه وگامت تجيب مي وشربتهه، تفاجأت من زينب گالت "حُتين" من كملت شرب المي، غزاله باوعتلي وگالت...

-غزاله: انه هم انصدمت بَـس رهف تگول عميدي معلمهه من تشرب ماي تگول يا حسين وهيه ماتعرف تگول غير "حتين"

-هجران: بَـس هاي اول مرة اسمعهه تگولهه

-غزاله: من يعجبهه تگول

ضحكت وبستهه وكملت اوكلهه، كملت غداهه وراحت جابت النساتل وانطت ثنين لغزاله عود هاي الهه ولرهف لانهه نايمه ووحده عافتهه لـ سُهى..

راحت تلعب بالحديقه واني گعدت اسولف ويه غزل...

-هجران: غزل مو زين هيچ يا عيني

-غزاله: ليش انه شمسويه

-هجران: هاي العزله العايشتهه ومتحچين ويه احد وتبچين بالسكته ادري بيچ زعلانه ؏ فراگة بَـس والله هذا كله يضره مينفعه

نزلت راسهه ونزلن دموعهه وياهه، هزت راسهه وگامت تغسل المواعين واني گمت ارتب المطبخ واجتنه سُهى..

-سُهى: خيات جواهر يمته ترد؟

-هجران: شنو؟

-سُهى: خايبه هاي ليش راسهه يابس مو الزلمة گظه

غزاله حچت مبسمرة سُهى...

-غزاله: والله جواهر ماترد ؏ شريچة هه وشلون شريچة خلفة مروان النگس

-سُهى: غزل انه مالي ذنب كل الصار ذنب ابوي واني رحت ضحية

-غزاله: ولي عن وجهي مابيه احجي ويه ساقطات وخطافات زلم

عافتنه وراحت وسُهى سكتت مجاوبت، انداريت عليه وهمست بغضب...

-سُهى: وعلي لوما السيد هنا چا علمتهه ياهي الساقطه

-هجران: اششش كافي سُهى معليچ بيهه هسة تعاي گولي شكو تسألين ؏ جواهر؟

-سُهى: چا غير ترد لزلمتهه شني مو كافي زعل

-لا مو كافي جواهر نفسهه عزيزه وكرامتهه فوگ كلشي! تخيلي مرة ببداية زواجي فتوح تعاركت وياهه علساس هيه بايگة ذهبهه وحواهر سوت ذيچ الهوسة وراحت لأهلهه زعلانه ومارجعت لحدما خاله انتصار بنفسهه راحتلهه لبغداد واعتذرت منهه ودزتلهه كلام من عميد الدين يگوللهه مسحيهه بلحيتي!

-فلك طرهه ؏ هالگووة خايبه شني لو هيچ النسوان لو ما ينرادن

-ايي ولچ قويه حييل بَـس قوتهه حلوة واتمنى اصير نفسهه

-سهى: ايي وعلي

صبتلهه غده وگعدت تآكُل واني عفتهه ورحت اگعد بالهول انيم زنوبه، ماريد اصعد فوگ واشوف بكر وتصير مشاحنات بيناتنه، مادري لشوكت اظل هيچ وحتى بابا لسه مزاعلني وميجاوب ؏ اتصالاتي وماما هلكت وهيه تقنع بي حتى يسامحني وهوه مطنگر..

**

"عميد الدين"
غمضت عيوني اريد راسي يهيد، افكر شلون اردچ جوهرتي شون اقنعچ وتردين ليه اووف يمرتضى هم كسرت ظهري من رحت وعفتني وكسرتني من خذيت فصليه وراحت جوهرة من بين اديه وانه مامتهني وياهه..

انفتحت باب حجرتي وطبت سُهى، صحت بيهه...

-وتاالي ويااچ شني بويه انتي ماتفهمييين

طلعت بساع وهيه تتعذر مني، لبست هدومي لان چنت بَـس بالبجامه وصحت حتى تطب..

-سُهى: سيد انه اسفه والله نسيت

-خلص انسي شكو صاير شي؟

-سُهى: لا بَـس شني ما تآكل انته حتى ما متريگ

-وانتي شيخصچ؟! انه مو گلت ماتدخلين بسوالف ماتعنيچ!! وتره انه بعدني ما عاقبتچ ؏ سالفه البارحة

-سُهى: والعباس خفت تكتلني

طفرت روحي منهه ومن خوفهه وعطت...

-عميد الدين: شنيي ولچ اشايفتني!! كلما حچيتي وتكتلني فد يوم شفتيني كاتل رهف وغزاله؟!!

-لاء

-چا خللص انه مو گلت انتي بحسبه رهف وغزاله ومثل بنيتي من نكون وحيدنه لو لاا!!!

-اي گلت

-چا شكو بعد تلغين لغوة زايده؟!!

-سيد اعذرني انه گلت لهجران امس توگف بالباب وتسنط علينه بَـس لان چنت خايفه من ردت فعلك

-خلص سدي الساالفه وانسي حچي امس ماكو هيچ شي مال تخلفيلي واردچ

-مو انته كلت

-اويلييي عليك عميداان خايبه فتحيي عگلچ شوي واستوعبي

-سُهى: هاا اي فتحته

-احنه مااامتزوجييين يعني بَـس جدام هلي نگول هيچ بيناتنه نبقى ؏ نفس الاتفاق تنامين بحجرتي ؏ القريوله وانه تفرشيلي انام ؏ الگاع وامس من حچيت بَـس جدام هجران لان چانت واگفه تسمعلنه

-صخاام بوجهي شمعرفك؟؟

-حسچ يسمع الجيران وانتي تتوسلين بيهه!!

-هااا زين بَـس سيد انه استحي انامن هنا

-لا تستحين ماعاينلچ عود اوووف لوما حچي اميي چان ماخطيت هالخطوه

-مو عمتي ماتدري انته مامتزوجني

گالتهه ونزلت راسهه مستحية، استغفر الله هالبت جاهله كللش وكلشي ماتفتهم مادري شلون تگول عمرهه 19 سنه فوگاهه امي تگول خلف منهه وعلي حتى نفسي ماتتقبل اتدنى لبت بكبر رهف..

-عميد الدين: يله روحي بره

-اءء سيد اگدر اگولن شي بَـس لا تعيط عليّ

-گولي

-شوف انه اتصل بجوهرة واسولفلهه انته حباب وياي وانه مريتك بَـس هيچ جدام هلك وماكو شي بيناتنه

-اموووتچ فهمتييي مايخصچ تتدخلين بهالسوالف

-مو انته خطيه زعلان عليهه

-ماعليچ انه احلهه

-چا خوش انه اروحن محتاج شي؟

-طلعي وسدي الباب

طلعت بره ورجع راسي يفتر، بزعت من التفكير وطلعت اشوفن ضلعي بلچن ارتاح من اسولف وياه..

طلعت للحديقه اكيد گاعد هناك مثل عادته ويدخن، شفته ؏ المرجوحة الچبيرة وبيده الجگارة...

-عُثمان: ها يول

-عميد: هـلا

-عُثمان: شبيك عاگد الحاجب ومدلغم

-عميد: من السعادة

-هههه ول والله انته ماعرف شنو نيتك وشنو البراسك

-انه مادري شنهي براسي

-عُثمان: احيييي عليه يُبا خلص الي صار صار وانتهى الموضوع

-عميد: ومريتي شلون؟

-ترجعلك البنت تحبك وماتگدر ؏ فراگك

-هه ماتگدر ؏ فراگي ايي صح ماتگدر وهيه كلما اتصل حتى اتطمن عليهه تفصله وماتجاوب وتدزلي رساله مكتوب بيهه "عميد الدين طلگني"

-هههههههه اخخ بطنييي هههههههه

-وجع شكو كل هالضحك انته ماتستحي!!

-عُثمان: استغفرر الله شبيك انته تاكلو لراسي كلما ضحكت

-لانك ارعن

-دطير يُبا ما صوچك صوچي أنَا المضيع وقتي وياك

جريته من ايده لان گام يريد يروح..

-عميد: عليك ابو فاضل لا تروح انه ياهو عندي غيرك

-عُثمان بخبث: يله يله لا تبكي رح اظل

-انعل يومك نذل

-ههههه يله تعال هسة گولي صدك تنتظر مرتك الثانيه تخلفلك وترجعهه؟

-مادري

-ممممممم

يعاينلي بنظرات خبث ومكر هذا الملتح اكيد مفتهم شي وماتعبر عليه كلاوات انه ماخذ سُهى، من شافني ساكت طگهه بوجهي...

-عُثمان: وبسطاالوو للحمزة عرفتتتت عرفتتتتت ورووح امي شكيت بالموووضووع ول يُبا انته شَنووووو

-هذا شماله شعرفت ولك؟

-الي بالي بالك

يغمز ويحرك بحواجبه..

-عميد: عدل چهرتك لا اسمطك بستة واربعين انطم ولا تحچي

-اويلاااه ول يُبا أنَا ذكييي هيه گوووة

-انچعم

-مستحييل دحگ أنَا شكيت انو ماتنامو بنفس الغرفة بَـس ليش ماحكيتلي

-مابيه اسولف ويه احد

-عُثمان: زين وجواهر؟ ليش ماحكيتلهه؟

-منتظر يبدي دوامهه حتى غصباً عليهه ترد هين واحاچيهه واگلهه انه مامتزوج سُهى يعني بَـس عقد سيد وماكو شي ثاني والبت نفس رهف ومالي نية اتدنالهه ابد وكل الحچي الحچيته بَـس خاطر اسكت حبوبه وامي وما يشنن حرب

-والله يا عميدي شكثر كبرت بعيني يوول الشي السويتو يدل ؏ رجوليتك

-عميد: عُثمان انه الاريده واضح وماريد غيرهه ولو تجي الف حرمة جدامي ما تهز شعره مني وماگدر اجازف بيهه بهالطريچة لخاطر مروان الخر** ما احطم حياتي وحياة البت الصارلي سنييين اتمناهه بشي غبي وساذج وعادات تعبانه تدل ؏ الجهل!! انته اكثر انسان يعرف انه ضد هالعادات والتقاليد بَـس ردت اوگف بحر الدم الي رح يندلع واخذ فصليه واسد حلوچ الكل وهم اكسر مروان ببنيته!

-خير ماسويت يخوي وحسب مافتهمت ماتريد تگول لجواهر حالياً حتى امك ما تشك بشي صح؟

-بالضبطط لان الكل يعرف جواهر كرامتهه فوگ كلشي ومستحيل تقنع وترد هيچ من ذاتهه اله اذا چان اكو شي يجبرهه ؏ الرده وهيه دراستهه وبعدين لكل حادثٍ حديث

-صححح خوش فكرة خلص ما بقه شي ؏ السنة الجديده تحمل هالشهر وان شالله خير

-ان شالله

-عُثمان: عميد رح اسألك سؤال

-گول

-شكثر تحبهه؟

ابتسمت وانه اتذكرهه واتذكر ملامح وجهها ومن تندهلي "ميدو" هههه هالبت شيطانه ووكحة وگوية ما تخاف ولا ترتعب من احد وما تتنازل بسهوله وهذا الشي چنت افتقده بشيلاء هواااي..

-عميد الدين: اعشگهه بطريچة يعجز لساني ؏ تعبيرهه

-عُثمان: العشگ حلو صح؟

-حلو بَـس يتعب

-اكيد ماكو شي مايتعب

-عميد: ان شالله تعيشه وتحس بي وتكون نهايتك مُرضيه

-امين

-شو احسك جاي تجر لساني

-عُثمان: شنو تقصد؟

-خاف عاشگ ولك؟

-عُثمان: لا يُبا لااا أنَا بعيد عن هالسوالف هوه صح اجت فتره حسيت بشي غريب بَـس الحمد لله عالجت الموضوع وتخلصت من هالمشاعر الغريبه

-وليش تخلصت منهم وما نميتهم؟

-لان السالفه معقده وماردت اتعمق بيهه لان مجرد التفكير بيهه ينرفز ويخليني اعصب

-عميد: احس الموضوع چبير

-عُثمان: كان كبير صح واجت ايام حسيت حالي انجرفت وگعد ارتكب جريمه بحق نفسي وشي كثير كبير عند الله وللعلم حاكيت مرتك بالموضوع

-شنيي ولككك هاي يمتتته بيناتكم اسرارر؟؟

-ههههه وشبيك غرت وعصبت يُبا هاي گبل لا تنخطبون سولفتلهه

-اي سولفلي هاي يمته تحاچي النسوان وتعوفني

-لا ماگدر احكيلك لان لو گايلك تعلگني من رجليناتي بالباب

-بوووويه لهدرجة الموضوع غلط؟؟

-كثييير غلط بَـس گتلك سيطرت ؏ الموضوع وكلشي تمام هسه ولا الي نية مو حلوة ويه البنت بالعكس احترمهه واتمنالهه كل خير

-واضح بيناتكم علاقه گويه؟

-اي صح لان صراحة البنت حنونه لدرجة تخليك غصب تنجذبلهه وتتمنى تتزوج بنت نفسهه بَـس يبقى الشي مستحيل واساساً كل هالمشاعر تأكدت منهه وما كانت حُب ممكن كان عطف او رد جميل لا اكثر لان البنت هواي مفضله عليه وحبيت اساعدهه

-عميد الدين: خير ان شالله

**

"هجران"
گعدت ؏ صوت رجال يضحك، فتحت عيوني اباوع اني وين؟ انتبهت بعدني بالهول وواضح غفيت، فركت عيوني وباوعت ليگدام چان بكر گاعد وزنوبه بحظنه يلعبهه..

-بكر: انه شسمي؟

-زينب: بابه

-بكر: ووو بعد؟؟

-زينب: هههه هبيبي (حبيبي)

-بووويه اغدي فدوه للي ماتگول الحاء

ظليت متمدده واباوعلهم، اللتفت عليه واشر وسأل زنوبة...

-بكر: وهاي ياهي؟

-زينب: ماما

-بكر: عفييه بعد ابوچ

گمت من مكاني ولبست شالي وتوجهت للباب حتى اطلع..

-بكر: هجران چاي

مجاوبته ورحت بالصاله اگعد بدون ماسويله چاي، شويه وطلع بيده زينب، گال...

-ها صار؟

-هجران: مسويت

-بكر: هاي شكوو ولييش؟؟

حچاهه بنتر، سكتت مجاوبته وهوه راح للمطبخ واسمع صوت تطگطگ مواعين مبين هوه رح يسويله، رجع للصاله وگعد بصفي..

-بكر: طالعه عينچ ولچ

-هجران: استغفر الله

-بكر: هجراان سلمي ؏ رويحتچ ولا تظلين تأفأفين وتستغفرين

-شتريد بكر؟

-بكر: ماريدن شي

الصمت چان سيد الموقف وبس صوت زينب طالع تلعب وتفتر حول نفسهه وتضحك من تشوف فستانهه ينفخ، دقايق ودخل عميد الدين سلم وطب للغرفه ودقايق ورحع طلع بدون ميحچي شي..

-بكر: تذكرين من چنه بأيران شگتلچ؟

-ماتذكر شي

باوعلي وخزر، درت وجهي وهوه كمل...

-گتلچ لو الدنيا كلهه تروح ولا عميد يصيبه شي وهسّ اگولن جعل حوبتي ماتتعداهم ويوم الاشوفه باللحد (بالقبر)

عصبت من كلامه ونترت بهمس...

-هجران: حراام عليك ليش تدعي ؏ الرجاال هوه شمسوي؟؟؟

-ابدد بَـس خاني وطعني بضهري وخذه محبوبتي

-اولاً هوه ماطعنك بضهرك عميد محذرك لو تدني لجواهر وتأذيهه يعقد عليهه!! ليش مگتلي بهالشي

-الله ينتقم منه كسر ظهري وهسّ هيه حامل

فتحت عيوني متفاجأة...

-جوااهر حاملل؟؟؟

هز راسه ورص ؏ اسنانه حيل وگال بعصبيه...

-بكر: بيهه توم

-صدُك تحچي انته؟؟؟! وشمعرفك؟؟؟

-اعرف وبس

-وعميد الدين يعرف؟؟

-لو يعرف تظنين يخليهه مچنگلة ببغداد

-هجران: مصدومة اني لان كم مرة اتصلت بيهه مذكرت موضوع حملهه واصلاً شعجب حملت بتوم؟

-وين العجب

-يعني مادري بَـس...

قاطعني...

-بكر: عدهم وراثه بالتوأم ابوهه توم ويه عمهه وعدهه عمات ثنين هم توم وماتن بالصغر وهيه وشهد توم فَـہ طبيعي لو حبلت بتوم

-هااا ولا ادريي

ظل ساكت مجاوب بَـس وجهه مطعون احمر وگوة چان يحچي، نتر بهمس...

-يمته خذاهه وليش ما سوالهه عرس؟؟

-هجران: وانته شعليك

-الله ياخذهممم

-استغفررر الله كاافي مو زين تدعي ؏ العاالم

-انلصميي ماعليچ

-اي هوه معليه وانته بالاساس ماهتملك بعد

باوعلي وخزر قوي واني ظليت اباوع بعيونه لأول مرة رغم حسيت الدم يبس بجسمي من الخوف بَـس قاومت وهوه تخبل...

-بكر: ولچ صاايره جسرررة

-هجران: بكر صوتك لتصيح حباب

-انعل والديچ لو خزرتي بعد بت الفگر

صعد الدم لراسي وماتحملت گمت ابچي واعيط عليه...

-حرااام علييك تعيرني لان بابا فقييير متخاف الله يعاقبككك

-بكر: بت النعااال صووتچ

-والله ولا اسكتت وهسه اروح لبيت اهلي واخذ زينب

-لو تموتييييين تعرفين شني يعني تموتيين يعني لو هين متمدده جدامي وگالو علاجهه زينب تروح وياهه هم ماخليهه تروح

-والله اله اگول لعمو خليل

اخذت موبايلي ودگيت ؏ عمو خليل وبكر يباوعلي ورافع تك حاجب، انصدمت من عمو گال..

-خليل: البت ماتطلع من بيت ابوهه

-هجران: بَـس عمو شلون ارجع من دونهه!!!

-خليل: هذا العدنه بيچ خير اخذيهه وروحي ونشوف يا زلمة يخليچ تشوفيهه بعد

انصعقت من كلامه هاي اول مرة يحچي ويايه بهالطريقه، ظليت ساكته ومكممه حلگي وابچي وهوه رجع گال..

-خليل: بويه هجران انه يشهد الله احبچ نفس غزاله بَـس البت ماتطلع من بيت ابوهه وسدي السالفه ولا تعيديهه بعد

طبگ التلفون بوجهي واني انهاريت بالبچي وع اثر صوتي طلعن البنات وعمه دلال وفتوح وبكر لسه واگف يباوعلي، رفعت راسي وحچيت بحرگة..

-حسبيي الله ونعم الوكيل بيكمم انته مو تگوول ان شالله حوبتك متتعده عميد وجواهر جعل حوبتيي انييي متتعداااك يا بكررر

گلت هالحچي بگلب ملچوم وحسيت بگلبي يوجعني گلبي الاغبررر الي ماعرف شلون لسه يحب هالكائن الوحشي الواگف گدامي ومانهزتله شعره، حضنتني غزاله من جهة وسُهى من الجهة الثانيه حتى يسكتوني واجت بيبي عطيه...

-حجية عطيه: هاي شني شمالكمم

-هجران: بيبي حموووت اريد اتطلگ خلي يعوفني واروح لبيت اهلي فدووه

-حجية عطيه: احااا افادي شني ولچ شكو تطلگين

-غزاله: بكر عليك العباس خليهه تروح ترتاح چم يوم وترد

-بكر: هيه تروح اي انه ما كاظهه بَـس زينب ماتطلع من الدار

تعالت الاصوات وبيبي عطيه تدخلت شگد فرحت من شفتهه واگفه لجانبي ورزلت بكر وحتى رادت تكتله بالعوچية وهوه تخبل وظل يعيط وبهالاثناء دخل عُثمان مادري وين چان...

-عُثمان: هاي شصاير؟؟

حسيته الگشايه الي رح اتعلگ بيهه، صحت بلهفة...

-هجران: بروح امك عُثمان ساعدني خليني اخذ زنوبة واروح لأهلي حبااب

صفن بيه وباوع لغزاله وسُهى واندار لـ بكر...

-عُثمان: خليهه تروح لأهلهه بكر

-بكر: انته مايخصك ولا تدخل

-عُثمان: دحگ البنت ماتريدك ليش گاظبهه من ايدهه التوجعهه

-بكر: وانه ماريدهه بَـس بنيتي ماتطلع من الداار

-عُثمان: اييي مو ادحگلك الاب الحنوون الطيب الخايف ؏ بنتوو ول انته لو تجي بالشهر مره لو ماتجيي

-بكر: مااااايخصكككك

گال هالكلمة وچيت ؏ عُثمان وصار ممالخ واحد فوگ الثاني والضرب بفلس، زينب تبچي ورهف ركضت تتصل بعميد الدين وبيبي تصيح وتدگ ؏ راسهه..

-حجية عطيه: يبااووو ولك بچررر هد اخووووك

گاعد ؏ صدر عُثمان ويريد يخنگه وعُثمان يعالج بأيده حتى يوخره عنه واخيراً گدر يگلبه وصار فوگاه، بكر يغلط ويسب وانصدمت صار يبچي...

-بكر: اللله يااااخذك عثماااان وخرررر ولككك هدنيييي اكرررهكك واكررره الكل الي بهالبيييت اكرهكممم خذيتوو كلشي منييي امييي وحبيبتييي وهسة تردون تاخذون بنيتييي وعلي اثرد بدمممك لو خذيتهه

عُثمان بقه گاعد ؏ صدره ومثبت ايدي فوگ وعاط...

-غبيييي أنَا ماريد بنتك ولا اريد احرمك منهه بَـس خليهه ويه امهه هيه اولى بيهه وانا اوعدك كلما ردت تشتاقلهه أنَا بنفسي اجيبهه الك بَـس طلگ خلي البنت ترتاااح حرام علييك

-ماااطلگ حتى طلااااگ مااااطلگهه وديلاااا

دفع عُثمان عنه وگام وطلع بره البيت، واني وگعت بالگاع من البچي وصرت املخ بروحي واعيط..

-عُثمان: أنَا گلتلللك تطلگي منووو وارجعلِك بنتِك!!!

-هجران: ماسمعتت عمو خليييل شگاال ناوي يسويهه دماايه لو اخذتهه ويحرمني منهه طول عمرري

-عُثمان: ااخخخ منِك هجراااان اخخخخخ

راح لغرفته والبنات اخذني لغرفة رهف اگعد هناك، الليل كله گظيته بچي ماعرف وين انطي وجهي، اتصلت بأمي ابچي وانوح وتفاجأت من كلتلي كلمة حسيتهه اجت طلقة بنص صدري گالت "من ايدچ" متت من القهر وزاد ضيمي ودعيت ربي ولأول مرة ادعي ؏ بكر وبگلب محروگ ونفس ممرودة..

گظت الايام الباقيه سم عليه گوووة امتحنت وماعرف شنو اجاوب ماجاوب، بكر بعد مارجع للبيت من ذاك اليوم واني اكل روحي بروحي شگد هانني وداس ؏ كرامتي گدام اهله حتى احس روحي بكبر الدوده من الفشله..

بدة العام الدراسي الجديد واني هسة مرحلة ثالثه، جواهر رجعت هنا شلون مادري وحتى مالي نفس اسألهه بَـس الاعرفه عميد الدين ميجي للبيت وواضح يسوي هيچ لخاطرهه لان بعدهه زعلانه منه، بَـس اجت هنا حتى متروح للأقسام خصوصاً بعدما افتهم هيه حامل..

-هجران: جواهر احمد واگفلنه بره منتظرنه

-جواهر: يله امشي

طلعنه بباب الجامعه وركبنه ويه احمد الي صار السايق مالتنه بعدما عُثمان رجع للانبار وصارلنه شگد مشايفي ولا نعرف اخباره..

الطريق چان مُمل كالعادة احمد فاتح اخبار ومعليهن كُلش وساكت ميحچي كلمة وجواهر مارجعت مثل قبل دائماً سارحة وبالهه شارد، همست...

-جوهرتي شنو رأيچ اليوم نطلع

اللتفت عليه وعگدت حاجبهه...

-وين؟

-هجران: مادري يعني شويه نغير جو ترا ضوجة والبيت كآبة مينحمل وحتى قبل چانو عميد الدين وعثمان بالليل يسوون جو ونراگيل وحب وسوالف من موتت مرتضى لسه احنه محرومين من الوناسه

-جواهر: اطلع بَـس عميد ماريد اشوفه

-حرام عليچ الرجال حتى طلع من البيت لخاطرچ بعد شتريدين يسويلچ حتى يثبتلچ هوه يحبچ

-ميهمني اصلاً دا انتظر اخلص هالسنه واذب جهاله عليه واتطلگ

-مستحيييييل تسويهه اني اعرفچ متتحملين

نزلت راسهه وبچت، لزمت ايدهه اصبرهه...

-هجران: جواهر عميد الدين يحبچ صدگيني يا رجال يعوف بيته ويتهجول وحده كله علمود مرته متروح اقسام وتتعب

-أدري

-ما دامچ تدرين حافظي ؏ هيچ رجال ولتدفرين نعمتچ برجليچ

باوعتلي بنظرة مطوله وهمست...

-جواهر: تدرين عميد الدين مماخذ سُهى

-چذااابه شلوون

احمد باوعلي من المرايه لان صوتي عالي، وجواهر همست..

-جواهر: صوتچ هجران، واي سُهى گلتلي اول مرحت زعلانه لبغداد بَـس وعدتهه ماگول لعميد اني ادري حتى ميكتلهه

-لعد انتي ليش بقيتي هناك زعلانه؟

-شي واضح!! لان كسرني وهم تزوج عليه وهم گال گدام اهله هوه ماخذهه

-بَـس اهم شي انتي تعرفين مماخذهه

-لااا هجران لااا مو اني اليجنلي فتوح ونرجس يعيّرن بيه والله امسح بيهن الگاع، واني من رجعني للبيت براس مرفوع هوه بنفسه گال گدام اهله جوهرة زعلانه واني اطلع من البيت لخاطرهه

-عزاا ايي شفتي فتوح شلون ماتت وظلت تسوي ساحرته ومادري شنو

-اي داده ذني وين متعلمات ؏ الرجال يحترم مرته ويدور راحتهه ذني يردن تكفخ وسب

-هجران: اي صح، زين وصدُك رح تطلگين؟

-مادري عود افكر

-لا جوااهر شبيج انتي!!

-شوفي اني شرطي واضح شوكت ما يرجع سُهى لأهلهه اني ارجعله

-وشلون يسوي هيج؟

-مادري يلگه حل لازم

-هجران: زين هوه ليش من الاساس ما زوجهه لعثمان هوه مو عزابي؟

-؏ كلام سلمان يگول عيبه بحقهم هاي مرتضى عنده اخوان فَـہ لازم واحد منهم ياخذهه واذا ما اخذوهه يصير عليهم حچي

-عزاا هاي شنو هالسوالف

-عادات تعبانه وداعتچ

-اي والله

وصلنه للبيت وهالفترة كلهه اني ملتهية ويه زنوبه صايره نحسه وبس تبچي وتتنعوص وميعجبهه العجب..

وبيوم اني فوگ دا انيم زينب العصريه وسمعت العياط والصريخ ماله والي، نزلت ركض اشوف شبيهم واذا اشوف خاله انتصار وفتوح ونرجس لازمات سُهى ومملخاتهه تملخ والدمايه تطلع من خشمهه وحلگهه ودشداشتهه مشگوگة..

بيبي عطيه تصيح حتى يوخرن وعمه دلال واگفه بعيد تخاف تجيهه ضربه وجواهر وغزاله ورهف يفاككن، منظر مرعب خاله انتصار تسحلهه من شعرهه وتعيط...

-انتصار: معزااية طلعتي ما تخلفييين وعلييي اليوم اذبحچ

-فتوح: چا منين تخلف وزلمتهه ما ينام وياهه وطالع بره البيت!!!!!

يسحلن بيهه ويدفرن وهيه سوده عليه فحطانه من البچي، ركضت رهف تتصل بأبوهه يجي، دقايق ودخل للبيت وعاط...

-هاااي شكوووو

-انتصار: اليووووم اموتهه وعليييي اذبحههه ماريدههه ماريد اشوفن چهرتهه

ركض ؏ امه وجرهه وانوب فتوح مستمرة وجواهر گعدت ؏ القنفه متوجعه لان اجتهه دفره ببطنهه..

-عميد: عمممممة هدي البتتتتت حتمووووت

بعد صوت صوتين وعافنهه فتوح ونرجس واگعه بالگاع لا حس يطلع منهه ولا نفس، ركضنه عليهه چانت مدمايه وصدرهه مشگوگ ومخرمش ووجهها لاعبين بي طوبه، انتصار رجعت عاطت...

-انتصار: عميد الدين اذا ماخذيت الفصليه وياااك لدارك لا انه امك ولا اعرفككك

-عميد: يوم شمالچ انتيي

-انتصار: مثل ما سمعتت تاخذهه وتطلع من البيت ماريدن اعاينلكم

فتحنه عيونه مصدومين من كلامهه وعميد اخذله صفنه يستوعب..

-انتصار: سمعتنيييي تاااخذهه وتخلف منهه فريييخ وتردهه لأهلهه ماريدهه

-عميد: يمه وانه! انه وليدچ!

-انتصار: تظل وليدي بَـس تبرد گلبي بمروان من تكسره ببنيته وتخلف منهه فريخ وتشمرهه عليه

صياح وعراك وتقنيعات وتواسيل وخاله انتصار راكبه راسهه تگله اذا متاخذهه وياك اذبحهه هنا وابرد گلبي وهنا عميد احتار اذا ياخذ سُهى تزعل جواهر واذا بقاهه هنا امه تزعل وتأذي البنيه، الي نهى الموضوع والعركة من جواهر گالت...

-جواهر: عميد اخذههه لبيتك الثاني

-عميد: جواهر لخاطر الكعبه اسكتيي ولا تزيديهه

-جواهر: شبيك مازعل اخذهه

-عميد: ما اخذهه

-جواهر: اخذهه متخاف الله البنيه حتموووت

تحول لبركان وظل يعيط ويتعارك ويه جواهر وهيه صدمني برودهه واستفزازهه...

-عميد: ولچ انتي ماااتغاارييين شلووون تگليلي اخذهه لبيتتتك

-جواهر: لا ما اغار

-عميد: جواااهرررر لا تسودنينيييي

-جواهر: عميد اخذهه وخلص

گالت هالجملة وطبت للغرفه وهوه استمر بالرعيد والصياح، گام يگمز من وره برودهه وشلون ماهتمت اووف شنو هالبرود الشايلته جواهر شلون ميحترگ گلبهه!!

طلع من البيت واخذ سُهى ورهف وياه واني رحت لجواهر اسألهه...

-لچ شنو هالگلببب شلون مهتميتيي!!

-جواهر: مهتميت لان ادري ميسويلهه شي

-وبله سوالهه؟!!!

-ميسوي

-اويلي ؏ الثقه لچ انتي صدُك غبيه

-جواهر: هذا الموقف رح يثبتلي عميد صدُك يحبني ويريدنه نكمل سوا لو ياخذ سُهى ويتنازل ويجيب منهه طفل

-بَـس انتي الخسرانه بالطريقين!!

-لاا رح اكون خسرانه وممسوحة الكرامه اذا ابقى وياه وهوه بايعني هجراان

حسيت هالكلام موجه الي، عفتهه وطلعت من الغرفه وگلبي مشعوط من القهر ومن حرگتي ظليت اعيط بزنوبه حتى تنام اريد اخلص واتمنى انطمر وماگوم بعد!!

وره اسبوعين وگالو يرحون للنجف يزورون موتاهم والبيت كله راح وجواهر راحت لشهد ترتاح وحسب مافتهمت عميد الدين مماخذ سُهى لسه لان البنيه هاي ميظل بلسانهه حچي كلشي تگول وتفاجأت من عرفت علاقتهه بجواهر قويه ويسولفن ويه بعض وهذيچ سُهى تتوسل بجواهر ترجع لعميد تگول عنه انتهى من الفراگ..

البيت فارغ ماكو احد غيري وغير زينب ماقبلت اروح وياهم وهمه ما لحو ماعرف ليش، كُلش استاحشت واتصلت بجوري وامي وهم الوقت ميمشي ولأول مرة من فترة قريب الشهرين دگيت ؏ عُثمان وماعرف ليش دگيت بَـس يمكن اشتاقيت لسوالفه ويه زنايب، جاوبني...

-الو

-هلوو عُثمان شلونك

-عُثمان: منو وياي؟

-هاي شنو شبيك اني هجران!!

-هااا يا هـلا هجران اسف بَـس غيرتو لموبايلي صارلو يومين والارقام نمسحو من عندي، المهم شلونِك وشلونهه زنايب

-زينه تسأل عنك خابصتني وينه بابه ووينه عتمان (عُثمان)

-ههههه حبيبة ابوا

سولفنه شويه وفتحتله كامرا يشوف زينب وسديت الخط، گمت سويتلي عشه وعشيت زينب ونيمتهه واني ما اجاني نوم ماعرف ليش اجه ببالي اتمكيج خبال تالي الليل..

حطيت مكياج ولبست دشداشه ورديه خفيفه رغم الجو بارد بَـس ماتحمل شي ثخين اختنگ واني نازعه الاسود من اكون وحدي، عدلت شعري وطبيت للحمام، واني بالحمام وسمعت صوت طگطگة بالغرفه، حسيت انبلع لساني من الخوف، فتحت الباب ؏ كيييفي ومديت راسي اشوف واذا اتفاجأ من اشوف بكر گاعد ؏ السرير وبيده موبايلي..

طلعت من الحمام وسألته...

-هاي شوكت اجيت؟

رفع راسه يباوعلي وعگد حاجبه..

-شكو متمكيجة؟؟

-عجبني

ظل گاعد وبيده الموبايل مادري شديسوي

-شدتسوي؟

-اشششش

-هاي شبيك ليش تفتش بالموبايل!

ماهتملي وبقه يباوع بي ومبين ديفتح برامج ويطلع منهن شنو بباله مادري، اخير شي رفع راسه وگال...

-تعااي

-وين؟

-بكر: تعااي گ****

-هاااي شبيك بكررر ليش تفشرر

-اششششش انتي اصلاً گحـ*** وبت ****

-مووو عيييب عللييك تحچي عليه هيييچ

ماهتملي وگام سحبني من ايدي حيل واني فلتت منه واخذت موبايلي لان شمره ؏ الفراش، ردت ادگ ؏ واحد من اخواني يجولي مادري ليش خفت من بكر اليوم وحسيته مو طبيعي بَـس مالحگت لان اخذه من ايدي وشمره ؏ الحايط فلشه وعاط...

-گحـ*** سااقطه متمكيييجة لـ گو*** ومنتظرته يجيييييچ

-شنووو بكرر انته شبيييك

-سر*** انه شاااك بيچ تخونيني وبعد ماتردينييي

-هاي شبيـ....

ملحگت اكمل الحچايه ولطمني ؏ خدي لطمة حسيتهه طفت عيني، جرني من شعري من وره ودفعني ؏ الحايط بقوه، دفرني برجليه ببطني واني اصرخ وابچي من الالم..

رجع جرني من شعري وذبني ؏ الفراش وراد ينزعني الدشادشه بَـس بقيت مكمشه بيهه، نزع وحلدني جلدتين بالحزام ويفشر عليه كأني ساقطة وبت ليل، اتوسل بي يعوفني ومياخذني غصب، من حلاة روحي ومن الوجع صرت اصيح...

-بكررر عليك الله عوفنييي بكررررر آآآه بكررررررر

مستمر يسب بيه وبأهلي وموتنييي بالكتل، يهلس بشعري ويضربني بالحزام ويدفر ببطني واسمع صوت صرخات زينب تبچي، گعدت من النوم مفزوعه وتزيد كلما تسمعني اصيح من الالم...

-بكر: ما يطلع اسمييي بكر لوما ربيتچ من اول وجدييد ووراچ يلحگوچ جواااهر وعميد الدين وعُثمان اااخخخخ عثماااان بوويه عسى بمرض ما يصحى منه!!!

يصيح ويحچي ويضرب بيه، اخير شي تعب لبس ملابسه بعدما كمل من اغتصابي وعذابي ورجع شال الحزام من الگاع وجلدني بي للمرة المادري شگد، انگطع نفسي من الوجع وعافني وراح للحمام بعدما تفل عليه وسبني وسب تربيتي، اسمع صوت قطرات المي الدتتساقط من الدوش ديسبح ولا كأن هستوه عذب زوجته لحد الموت..

خفت يطلع ويعيد الكره وماعرف منين اجتني الجرأة واخذت عباتي المعلگتهه وره الباب وطلعت اركض من البيت، نسيت كلشي حتى حجاب ملبست ولا حذاء، زينب عفتهه لان ماعرف شنو حيواجهني هناك لو شنو رح اعيش..

اركض واوگع وصلت لنص الفرع وحسيت بواحد حظني من وره ودارني عليه، شهگت من شفته ولا ارادي بچيت....

يتبع💋...

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق بين الفقرات حبايبي❤️.