شفاه مخملية الفصل السابع وأربعون 47 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

"شفاه مخملية" 💋

بقلم: زهراء السلامي.

#بين الخان والما خان
وبين الملگه حار وبين ارد فشلان
يعتني الشوگ واتعناك
يوصل چفي بابك وألعن الشيطان.
•

لتقصرون بالتفاعل حبايبي خلي يرجعلي الواهس بالكتابه♥️.

♛ ♛ ♛ ♛ ♛ ♛ ♛ ♛ ♛ ♛

اركض واوگع وصلت لنص الفرع وحسيت بواحد حظني من وره ودارني عليه، شهگت من شفته ولا ارادي بچيت...

-غيث عليك الله هذا بكر... بكر بكررر يريد يقتلنيي

احچي واشهگ وهوه صافن يباوعلي بعيون مطفية، ضحك بطريقه مستفزه ولزمني من ايده، گال بلسان ثگيل...

-غيث: تعاي وياي وعوفي بكر العار گتلچ مايفيدچ

جرني يريد ياخذني، عرفت بي سكران لان ريحته واسلوبه واضح عليه، دفعته عني وركضت اريد اللحگ ع روحي لا اروح بين الرجلين، يركض ورايه بخطوات بطيئة ومبين تعب وبعد ما لحگني...

وصلت للشارع العام يربي هاي شبيه طلعت من البيت اركض مثل التايهه، اباوع للطريق اريد سيارة أي احد ماكو، الشارع يصفر..

گلبي يدگ وانفاسي مجاي اگدر اسيطر عليهه اللهث واحس بلعومي محترگ يطلع ناار.. دليل ؏ برودة الجو، دشداشتي تصل عليه وطالعة بطرگ العباية..

الم فضيع ببطني الوب من الوجع، بَـس لا ماكو وقت اهتم للوجع اهم شي اهرب من عنده.. طعم دم بحلگي لعبت نفسي ظليت اذب من راسي.. انتبهت لدشداشتي الوردية عبارة عن دم، اركض والدم ينزل مني شديصير ليش انزف!!

گلبي يوجعني عليه بَـس خلص ماكدر اتحمل اكثر العذاب والاهانة والاذية العايشتهه وياه.. موبايلي نسيته بالبيت ماكدر اتصل بأهلي..

وگفت اللتقط انفاسي.. وگعت ؏ ركبتي اشهگ وادعي، انخي ام البنين تخلصني من مصيبتي.. سمعت صوت هز كياني گلبي زادت دگاته، گمت بصعوبة اتلفت هذا الصوت مو غريب عليه.. هذا صوته هوه!! صوت الرجال الأسر گلبي ومجاي اگدر اطلع من حبه..

لا لا.. ميصير اضعف مثل كل مرة لازم اهرب لا يا رب يارب ميلگاني يمه شسويت بروحي اني شسوييييت عساني ميته ولا هاليوم شلون اذا لگاني والله ميرحمني شلووون اطلع من البيت هيييچ.. اسمع صوته الرجولي القوي يصيحلي..

-هجران وينچ هجراااان تعااالي ما أأذيچ تعاااالي هجراااان

اركض بهستيرية ماريده يشوفني لو حتى يلمحني ماكدر اتحمل قسوته وهمجيته بعد.. نبرة صوته احتدت مبين عصب وگفت وره نخلة غليظة اتحامى بيهه من نظراته القوية الشرسه..

بقيت ؏ هالحال وهوه يحوم قريب عليه ويصيحلي، مكممة حلگي بأيدي اخاف يسمع شهگاتي.. لفلفت العباية بين رجليه اريد يوگف الدم..

اخيراً راح.. راقبته من بعيد الحمد لله ابتعد عني.. الله لطف بحالي وتعدت سيارة يسوقهه رجال.. مجاي اكدر اشوف شكله لو اميز عمره..

وكفته وركضتله چان شاب يطلع بنهاية العشرينات وبصفه گاعد صديقه بنفس العمر تقريباً.. صفنوا بوجهي من شافوني، گال الشاب بأستغراب...

-خير وردة محتاجة شي؟

صديقه گال بضحك...

-هههه طبعاً محتاجة چا شكو وگفتك

الشاب غمز لصديقه وعض ع شفته السفلية، خفت من نظراتهم تغشيت بالعباية احمي نفسي من نظراتهم الحارقة الچووني بيهه، گلت بصوت يرجف...

-خوية تطلع لكربله؟

-هاااا خوووية ههههههه

بقيت منزلة راسي، چان يضحك ؏ حچاية "خوية" ، نزل صديقه من السيارة وگال بخبث...

-خير حبي شبيچ؟

رفعت راسي اباوعله بخوف ذولة خاف عبالهم اني بت ليل، گلت بسرعة...

-لا تسلم اخويه اني اروح

-لا لا وين رايحة تعاي نوصلج لكربله تعاي يحلوة

عفتهم ورحت اركض، صديقه گام يركض وراي شوية وتعب عافني وراح.. گعدت ؏ ثيله اندب حظي وابچي.. وره شوية تعدت تريله اخاف اروح واجازف بروحي..

قريت فاتحة لأم البدور الاربعه ام البنين تسهيل امر ورحت.. وگف ونزل من السيارة، نظراته هادئه تدل ؏ السكينه والوقار.. من شفته حسيت بالامان ينطي شبه لأخويه فاضل..

ماتحملت نظراته المصدومة گمت ابچي بقوة.. وگعت العباية عن راسي طلع شعري الاسود الفحمي، الولد رأساً دار وجهه من الجهة الثانية، گال بصوت رجولي خشن...

-عسى خير خيتي اكدر اساعدج

ارتاحيت من كال خيتي، كلت بصوتي المبحوح...

-خوية تطلع لكربله؟

-اي بعد اخوج طالع لمعمل النورة، خير اكدر افيدج؟

-رحتلك فدوة ركبني وياك

ظل يباوعلي واني دموعي تكت، بلع ريگ ودار وجهه عني...

-خوية اسف ماكدر اخذج، ما عايز مشاكل

-ابوس ايدك اخذني فدوة رحتلك الله يوفقك ويحفظك لشبابك اخويه انته

هز راسه بحزن وگال...

-خوية وين اهلچ؟ منو مسوي بيچ هالحال؟

-اهلي بكربله واريد اروحلهم

-چا شمالهم ما يجوچ همه ليش انتي ترحين؟

-خوية قصتي طويله هسة تاخذني لكربله؟

-مو اخافن تطلعين بت شيخ عشيرة ويمرعوني وعلي طالع ؏ باب الله عندي يتيمات اريد اوكلهن اشربهن

-لا لتخاف مو بت شيخ عشيرة حباب الله يوفقك ويحفظلك بناتك اخذني لكربله والله ماعندي شي بَـس احتاج احد يوصلني

فرك وجهه بقوة وزفر، باوعلي وگال بصوت ناصي...

-خيتي جاي تنزفين تعاي اوديج للمستشفى

-لا لا خوية ماريد فدوة اخذني لكربلا بسرعة

اخيراً اقتنع يوصلني.. وگف ورايه حتى خاف اوگع واني اصعد بالتريلة، بعدني ؏ الارض وحسيت بأيد تجرني قوي.. انطاني راشدي شعل خدي، دفرني بخاصرتي وگعني بالگاع.. اندار ؏ هالرجال الراد يوصلني دگ بوكسيات ؏ دفرات كسره تكسرر بُنية جسمه الضخمة وقسوة ايده اعرفهه عدل ومن يريد يكتل ميرحم احد لو چان يعشق الگباله ينسى روحه ويطلع حرگة گلبه وسواد عيشته بي..

عاف الرجال ممطول ومدمى، توجه عليه سحبني من شعري بقوة، يتمايز شكلي واني ابچي بحرگة وبگلب ملچوم.. انفاسه الحارة تلفح وجهي، نتر بين اسنانه...

-تردين تعوفيني وتهربين ويه الگ*** مالچ!!!!

-لا بكر حباب لا والله

دفرني للمرة المادري شگد وعاط...

-بكر: ساااقطة گحـ*** رااايحتله مووو والعباااس افنيكم ثنينكمم

ماعرف عليمن ديحچي لو شنو ديگول اذني بيهه طنة قويه واحس بأطرافي خدرن، جرني من زندي من الگاع ووگعت ماگدر امشي من العذاب والهلاك الوكلنيا بالبيت واجه هنا كمل عليه..

شالني وشمرني شمر بالسيارة ليوره كأني حيوان ويريد يودي للمسلخ يسلخه، ابچي وعيوني تغوش واتوسل بي يطلعني وهوه يسوق سريع..

-بكر: انه شاااك بيچ من اول يوم جيت وردت اتگربلچ ومارضيتيي هه طبعااً شابع بيچ الگو**

-شدتگول

ميطلع صوتي واتوقع ماسمعني، يعيط ويضرب ؏ الستيرن وكل شويه يدير وجهه يتفل عليه ويغلط واني منتهية، الدمايه لوخت السيارة والالم ديزيد بأسفل بطني..

-بكر: اخخخخ ااخخخ متزووج گحـ*** اخخخخ وعلي انه الچ بت النعال هاملتنيي ولا فد يوم شالت موبايل تسأل لاا غارت من تزوجت عليهه لا صخمت لا لطمتت طبعاً اذا عندچ گو** شتسوين بيه بعد

غمضت عيوني وتشاهدت حسيت روحي جاي تنسحب مني، وگف بنص الطريق وجرني من السيارة وحاول يوگفني، ماعندي توازن وگعت وعافني بالگاع وظل يحوم يروح ويحي ويحچي وحده...

-بكر: بَـس خليني اعرفه واكظه والعباس ابو فاضل اطبره واذبحه تالي احرگه وانتي تلحگي، سافله اكيد تدرين چنت اخونچ مووو؟؟؟ اروح لبغداد وانتي ساكته لان ماهمچ شابع *** ويه فردوس وانتي ولا يمچ السااالفه هم گولي ماچنتي تدرييين گوليهه!!!

احس نبض يدگ براسي، استمر ؏ هالحال والحچي الحچاه خلاني اكره روحي واشمأز من نفسي.. استوعب كل الي ديگوله بَـس ماگدر اجاوبه، ابد مشكيت عنده علاقه ويه فردوس لو ويه أي مرة ثانيه بَـس اني غبييييه اعترف بغبائي وحُبي اله الي عمى عيوني عن الحقيقه..

صفن بالگاع عبالك ديفكر ورجع باوعلي ورجع غلط وسب وگام يسب ببابا واهلي كلهم الله ياخذني كله بسببي كله من ايدي خليته يتجاوز اول مرة ورجعتله مثل الحيوانه وماوگفته عند حده..

احس بلساني نشل وعيوني غوشن وصوره بكر واگف گدامي يعيط چانت اخر شي اشوفه لليوم...

رجعت لوعيي وحسيت ؏ صوت هوسة وعياط زلم واكثر صوت مميز چان صوت عميد الدين الخشن، فتحت عيوني والصورة مو واضحة گبالي بَـس حسيت روحي عطشانه كُلش، بلعت ريگي نااشف ولساني كأن خشبه، اخيراً وضحت الصورة الگدامي وميزت بنيه واگفة گبالي چنهه ندى، گلت بصوت مبحوح...

-نداوي؟

اللتفتت تباوعلي وشمرت نفسهه عليه، تحضن وتبوس بيه..

-ندى: الحمد لله ؏ سلامتچ حُبي، ماامااا مااامااا هجران صحت

دخلت ماما عليه ملهوفة، حظنتني لصدرهه وتبوس بيه وتبچي، دورت عيوني الغرفه اريد اشوف اني وين، انتبهت اكو بطل مغذي مشكل بأيدي عرفت اني بالمستشفى بَـس منو جابني هنا؟

-هجران: ماما زنوبة وين؟

-صباح: بره ويه غزاله هسة انتي ارتاحي امي لتفكرين بشي ابوچ رح يحلهه وياهم ويطيح حظهم هسة ديحچي ويه عميد الدين

سكتت محچيت شي وغمضت عيوني، رجعت غفيت وحسيت مرة ثانيه ؏ ضوة الشمس بعيني، مددت اطرافي بتعب والالم الي بأسفل بطني خف شويه، فتحت عيوني چانت ندى گاعده بمقابيلي ومبحلقة عيونهه عليه...

-آآه ساعه بيش؟

-ندى: بالتسعه الصبح

-جيبيلي زنايب

-اخذوهه وياهم

نهضت روحي مفزوعه...

-شنوو لييش؟؟؟

-ندى: ؏ كيفچ يمعوده شبيچ عادي اخذوهه لان نامت وماما گالت تتبهذل هنا بالمستشفى

-ممم

دخلت الدكتوره ووياهه ممرضه تغيرلي بطل المغذي وماما وياهن، وگفت گدامي بوجه مبتسم وهمست...

-الدكتوره: شلون صرتي هجران؟

هزيتلهه براسي زينه، اللتفتت تباوع لأمي ورجعت تباوعلي..

-الدكتوره: هجران انتي واضح متعرضه لأعتداء جسدي وهسة شويه ويدخل الضابط ياخذ اقوالچ

فتحت عيوني مصدومة وباوعت لأمي، اما ماما بادلتني بنظره حاده مع رفعة حاجب وگالت بصوت متوعد هامس...

-صباح: النذل مغتصبچ؟!

سكتت مجاوبتهه وطلعت الدكتوره ووياهه الممرضه، امي رجعت نترت بهمس...

-قسماً بالله هجران اذا ماحچيتي للضابط كلشي والله لا اني امچ ولا اعرفچ بعد

بچيت ؏ كلامهه وحسيت الالم رجع بأسفل بطني من اتذكر الصار البارحة، تقربت امي عليه ومسحت دموعي وباست راسي، حچت بغصه...

-بنتي احنه وياچ لتخافين

-هجران: ماما دا اتوجع

بچت ؏ حالتي وع الضيم الي عاشته بتهه..

-صباح: عساهه بحظه وبحياته عسى ما تهنه بجاه كلمن اله جاه جدار الرحم مالتچ كُلش متضرر من قسوته تگول الدكتوره وهذا سبب النزيف الحاد الصارلچ

غمضت عيوني اريد ارتاح وانسى، دقايق ودگو الباب علينه ودخل الضابط ووياه بابا واخويه فاضل، حچة ويايه الضابط ومگدرت احچيله من الفشله والمستحه فَـہ بابا وفاضل طلعو وبقت امي ويايه...

-الضابط: هجران فارس انتي متعرضه لأعتداء من قبل زوجچ؟

هزيت راسي بـ "اي"، رجع گال...

-من شوكت وانتي تتعرضين لو بالجديد هالحاله؟

سكتت ومجاوبت وامي تگرص بأيدي حتى احچي بَـس ماگدر اگول احس بغصه والدنيا سودت بعيني، گووة بالشافعات حچيتله شلون بكر اعترف بلسانه هوه يخوني وشلون چان يكتلني وحتى من يمارس حقوقه ويايه يأذيني ويطلع روحي لدرجة اوقات اصير ابچي من الوجع و و و و...

تشجعت وحچيت كلشي بدون اختصار وحتى تهديده الي مال يحرمني من بنتي وميقبل يطلقني، تمنيت بَـس اخلص منه ومن عذابه وماريد اشوف وجهه مرة ثانيه!!

طلع الضابط واستفهمت من امي شلون عرفو بيه هنا ومنو جابني للمستشفى، جاوبتني...

-صباح: طالعين بالزيارة اني وابوچ وهستونه جاي نقره زيارة ابو الفضل العباس سلام الله عليه واتصل بينه احمد اخو بكر وحچالنه بكر ناقلچ هنا

-هجران: وشفتو؟

-لاا الحقير منعرف وينه عميد الدين گلب الدنيا وحرگ الموبايل عليه ويگول يطلع خارج منطقه الخدمه

-وين راح؟

-عسى لا رجع بجاه السيدة زينب! واحنه رح نرفع دعوه بالمحكمة نطلگچ منه وتاخذين الحضانه ابوچ يگول لو تطلب الامر ابيع كلية من كلياتي واشوفلهه محامي شاطر ولا اشوف بنيتي هيچ متأذية

بچيت ؏ كلامهه وگوة سكتتني، بتت ليلتين بالمستشفى بعد طلب من ابويه حتى يتأكد ان اني صرت بخير، وخلال هاليومين زنوبه بقت ببيت جدهه وبكر لسه مختفي محد يعرف هوه وين..

ثالث يوم ماما راحت لبيت عيالي وجابت غراضي كلهن وجابت زينب وطلعنه من المستشفى..

بالباب وصارو بوجهي عُثمان وعميد الدين، سلمو عليه وتحمدولي ؏ السلامه بَـس حسيتهم كُلش خجلانين من سواية بكر، ماطولت وياهم ورحت للسيارة وتوجهنه لكربلاء...

الطريق كله استرجع ذاكرتي بكلشي مريت بي بفترة زواجي المشؤوم ، اي زواج مشؤوم ماشفت بي غير شلاع الگلب والاذيه ورغم كل هذا چنت راضيه وقانعه صدُك لو گالو الحُب يذل بَـس والله لا حُب ولا غرام كلشي ماريد بَـس بنتي تكون يمي واسترجع كرامتي الي داسهه بكر واعيش بسلام..

وصلنه للبيت ودا اروح للغرفه حتى اتمدد واجه اتصال لـ بابا، بحياتي وعمري ما انسى هالاتصال ولا ردة فعله ولا انسى جحظة عيونه من صاح...

-فارس: شلوون؟؟؟؟ هااي شوكتت؟؟ يمته هااي؟؟ صدُك جذبب لا اله الا الله.. لا حول الله.. الله يغفرله خلص سيد هذا هوه استغفر الله العلي العظيم من كل ذنب عظيم استغفر الله.. مع السلامة الله وياكم

سد الموبايل وماما گمزت عليه...

-صباح: فارس هاي شصاير؟؟

هز راسه بيأس ونزله، جر نفس عميق وگال كلمات حسيتهه زرفن طبلة اذني...

-فارس: لگو بكر رايح لبغداد علمود مرته الثانيه واگعه من الدرج والطفل طلع ميت ببطنهه ويردون يسوولهه عملية وهوه بالطريق و....

جر حسرة طريله وكمل...

-استغفر الله.. چانت اكو شاحنه بالطريق وهوه اكيد من هول الموقف ومتوتر وطاب بنص الشاحنه و..

سكت واحنه نستمع لكلامه، نهى كلامه بـ...

-انا لله وانا اليه راحعون

ماما شهگت واني اخذتني الصفنة، ماعرفت شنو اگول لو شنو هالمشاعر الصارت بداخلي حسيت توقف الوقت وصابتني رجفة قويه بجسمي لدرجة حسيت بطگه سنوني، ماصحاني غير صيحت ندى من گالت بحرگة...

-ندى: هاااي حوبة هجرراان والله حوبة هجرااان شوف شلوون الله عاقبه هم ابنه ماات ببطن امه وهم هوه لحگه حسبي الله ونعم الوكيل ؏ الظااللم

-فارس: ندى بااابا حراام تحچين ؏ رجااال مااات خللص الرجال گالو منتهي محروگ جسمه حرگ والگزاز ماكل جسمه اكل

-فاضل بعصبيه: استغفر الله هسة ميصير نحچي بَـس والله يا بابا احس هاي عقوبة اللهية ليش قليل سوا بهالمسكينه

گالهه واشر عليه واني لسه صافنه، اجتني امي حظنتني وهمست بأذني..

-صباح: لتزعلين ماما اصلاً ميستاهل دمعه تنزل من عيونچ عليه

بَـس ماعرف شبيه حتى ماحس اكو حزن بگلبي مادري ليش ولأول مرة اگولهه احس روحي مرتاحة رغم متأذية ؏ نور وابنهه بَـس بكر ماهزني خبر موته ولا شويه..

عفتهم ورحت للغرفه امدد، جابتلي ماما عصير برتقال وگعدت تريد تحچي ويايه..

-صباح: هجران ماما سمعيني بكر مو من الزلم الي نزعل عليهم لاا بنتي هذا الله نجاچ منه هذا... چؤؤ استغفر الله ربي بَـس هذا يا ماما چان الچ بلاء وحبچ اله هم بلاء

هزيت راسي وظليت ساكته، گامت وطلعت من الغرفه وعافتني وحدي، مددت اطرافي بتعب وزنوبه اجت تنام بصفي، باوعتلهه وهيه رفعت عيونهه تباوعلي وضحكت چنهه وصواصه، ابتسمت بوجهها واجت باستني ؏ خدي واندحست بحضني، دفنت راسهه بصدري وحسيتهه غفت..

من غفت من وحدهن دموعي صارن ينزلن، ينزلن ؏ كل يوم اسود عشته وياه ؏ كل لحظة مُرة وكل اسلوب بارد وجارح چان يعامله ويايه، اني جبت كل هذا الشي لروحي وماعرف ليش حقد گلبي عليه ومدا اگدر احزن وهذني الدموع اذبهن ؏ عمري وع هالكم سنه العشتهه وياه..

عجيب الانسان شلون تتغير مشاعره تجاه انسان ثاني بهالسرعه، خلال كم يوم كرهته وحقدت عليه خصوصاً من اعترف يروح لبغداد يخوني حسيته جرحني لدرجة خبر موته مازعلني وحقدت عليه اكثر من عرفت مات كله علمود نور ومن خوفه عليهه ماشاف دربه وسوه الحادث..

**

"غزاله"
اجالنه الخبر مثل الصاروخ وهدم روسنه، ابوي وگع من طوله وتسودن صار يدگ ؏ راسه ويبچي وينده بأسم "بكر" اخواني يبچون وانه لسه الصدمة محتلتني، بعده ماصارله مرتضى چم شهر من رايح انوب لحگه بكر؟!

نزلت دموعي بحرگة وانگلبت حياتنه للسواد خلال فترة موته، الحزن حاوطنه من كل جانب واللطم والبچي من كل صوب..

هجران ماحضرت الفاتحة بَـس ابوهه اجه وعميد الدين هواي تشكر من عنده وگال عنه ابن أصول وماهتم للخلاف البيناتهم واجه..

طلعت للطرمة اشتم هوا وازيح هالافكار والذكريات السوده من راسي واجتلي جواهر، بطنهه شكبرهه صايره وگوة تمشي...

-جواهر: غزل عفيه گلتي لـ عُثمان يجيبلي ككو بالطريق؟

-غزاله: اي

-جواهر: زين اگولچ هاي اني رح اتمدد شويه وانظف المطبخ بعدين

-غزاله: لا روحي انه اسوي

-جواهر: لااا اني انظفه بَـس گتلچ حتى متمدين ايدچ ؏ شي

هزيتلهه براسي ميخالف وراحت، لسه هيه وعميد الدين ما يتحاچون وحيصير شگددد ما شايفته لان مايجي للبيت بَـس من يتعارك ويه سُهى ينام بالديوان حتى يخلص..

البيت فرغ من حسه وحس رهف لان راحت ويه ابوهه وانه عايشه هنا وحيدي مگابله نرجس النگاگه وگاعده..

رحت للحمام اغسل هدوم وسمعت حس عُثمان، رحت اركض عليه..

-اخيييراً اجيت هاي ويينك مختفييي اشتاگيتلك

ابتسم وحظني لصدره وباس راسي، چان شايل علاگتين بأيده مدلي وحده وگال هاي لـ جواهر والثانيه الي..

-غزاله: ههههه جايبلي ككو

-عُثمان: لا يولي هاي مشتريلِك شغلات "هاديه" اخترتهم

-هااا شو چن علاقتك ويه هاديه قوية صايره

ضحك وجر خشمي وهمس "صرگعانه" راح لحجرته وبدل ورد للمطبخ، صبيتله غده وگعد ياكل ؏ الميز وانه گعدت جدامه اعاينله..

-عُثمان: هاا شكو تدحگين مبين بلسانِك حكي؟

-غزاله: ههه لا والله بَـس مشتاگتلك ومشتاگه لبكر

گلتهه ونزلت راسي وبچيت وهوه ذب الخاشوگه من ايده ومسح عيونه، رغم شكثر عداوة بيناتهم بَـس من مات بكر عُثمان اكثر واحد تأثر وانصدمت ؏ الحُب الشايله بگلبه تجاهه..

مسحت دموعي وهوه راد يگوم من الاكل وصحت...

-عليك العباس لا تگوم كمل اكلك

-ماريد شبعتو

-لا حباب لخاطري كمل انه ماقصد اجيب طاري بكر بَـس والله موته چانت فاجعة بالنسبه النه وشي لا ؏ البال ولا ؏ الخاطر

-عُثمان: صحيح

-يعني والعباس اوقات اصفن اگولن وين چان بهالايام وشلون سوه حادث وشلون وطلعو جثته محروگه حرگ سوده بوجهي

-عُثمان: اكيد كان يسوق سريع من عرف مرتو الثانيه گعد تسقط وظل بالو عدهه وصار الي صار

-غزاله: چا هجران شماله ما يحبهه ومعذبهه ولا اهتملهه، مبارك بَـس وداهه للمستشفى واتصل بـ احمد يروح يشوفهه شمالهه هالبت حظهه معثور

-عُثمان: خلص غزل الرجال راح عند ربو الله يغفرلو

-وانته مسامحه؟

صفن بيه ثواني وهز راسه..

-عُثمان: مسامحو ؏ كلشي ومادعيلو غير بالرحمة والمغفرة

-عليك الله سويله ثوابات لا تنساه

-الله شاهد ما ناسي بكلشي حتى من اقره قرآن اهديلو واتبرعلو ثوابات بين فترة وفتره

-بعد روحي

هز راسه وكمل ياكل وانه رحت لحجرة جواهر، دگيت الباب وطبيت..

-غزاله: هاي العلاگه مالتچ

-جواهر: فدييت يروحي تعاي غزاله اگولچ شي

طبيت ملهوفة لان چانت مبينه فرحانه، ردت اسمع خبر يفرحني شوي ويطلعني من الكآبة الجاي اعيشهه..

-جواهر: مممم شسمه

-غزاله: گوللي

-جواهر: شوفي اني مو قبل كم يوم رحت اسوي سونار حتى اعرف جنس الطفل شنو

-ايييي

غطت وجهها وضحكت فرحانه، فتحت عيوني انتظرهه تحچي وگالت بحماس..

-حامل بتوم بنات

-غزاله: ثنينهن؟؟؟

-جواهر: اييي

-غزاله: مبرووك وعميدي يدري؟

-لااا ابدد غزاله محد يدري غيرچ حبابه ماريده يعرف

-اي لييش تحرمينه من هيچ خبر حلوو

-جواهر: لحدما يرجع سُهى لذاك الوقت ارجع وياه واصالحه

-جواهر شمالچ وين اكو هيچ سالفه مال يرد فصليه

-لا اكو سلمان يگول عادي صايره هواي ماطول يتنازل طرف منهم

-بَـس عميدي يريد يأدب مروان ويكسره بشي غالي

-لااا عميد صاير قاسي مچان هيچ الحقد الشايله ؏ مروان ديغيره يعني لو يحط مكانه بدال مروان والله يموت اذا تزوجت رهف مو انوب ياخذوهه فصليه

هزيت راسي محتارة وگمت اطلع من حجرتهه، رحت لحجرتي انظفهه وفتحت الكنتور وصار بوجهي ملابس مرتضى لسه معلگات، دمعت عيوني وانه اعاينلهن رغم چم سنه انه متزوجته بَـس ما اشتاگله، مرتضى الله يرحمه ما عافلي ذكرى حلوة وياه..

عذبني هواااي هواااي وانه چنت اصبر واستحمل، ظم عليّ هوه ما يخلف وافتهمت من رهف سامعه ابوهه يحاچي واجت تگلي عبالهه انه ادري، ما عدى اذيته ومرضه الوهواس والغيره رغم يعشگني موت بَـس گظيت سنيني وياه اشك بي يخوني وبعد الله اعلم.. الله يرحمه ويغفرله ما دعيله غير بهالدعاء..

طلعت ملابسه وحطيتهن بجنطة چبيره وكترتهن بزاوية الغرفه عسى ذكرى ينمسح من بالي وما اذكره چان زلمتي اريد تكون الذكرى بيني وبينه چان ابن عمي وبس!!

مرت الايام وتحسنت الاحوال وبردت النفوس ؏ موت بكر وانه كل يوم اتصل بهجران واسمع اخبارهه مبين عليهه مرتاحة وحسيتهه مو كلش متأذيه ؏ فراگ بكر والله حگهه هذا وما اللومهه لان العاشته وياه مو قليل..

نزلت جوه انظف وشفت رهف جايه، ركضت عليهه وحضنتهه بكل قوتي..

-رهف: هههههه هاي شني ولچ هيچ مشتاگتلي

-غزاله: حيوانه بعد ولا سألتي عليّ عبالك ماصدگت تطلع من هالبيت

-رهف: لا والله بَـس سادس وحايره بالمحاضرات واخاف ماطلع معدل والعباس ابوي يگطعني

-تطلعين معدل لا تخافين

-اي ان شالله واريد اكسر خشم ام عيون چتاله ههههاااييي

-غزاله: جوااهرر؟؟؟

-رهف: اييي انه من زمان گلتلهه اله اطلع طبيه واكسر خشمچ واخافن الله يعاقبني وماطلع

-لا ان شالله تطلعين انتي شاطره وهواي تقرين

-رهف بحماس: تدرين ابوي گال اذا اجيب معدل عالي يوديني لجامعه بغداد ويخلبني اعيش ببيت عمو سلمان

-ياااا هاي شعجبببب

-رهف: هههههه طبعاااً خيه تزووج جوهرة شيسوي برهف بعد يريد يخلص مني

-انچبي ابوچ مو هيچ بَـس يريدلچ شهادة ترفع راسچ وراسه

-اممم تدرين هوه انه الي جاي انگن براسه اريدن جامعه بغداد وهوه گال اذا جبت معدل طبيه يوديني

-گبررر چا شمالچ تحچين عليه

غمتني وگالت وهيه گالبه وجهها...

-رهف: بعدچ تفكرين بي يا عوبه

-انچبي رهف مايخصچ انتي

-رهف: ديلا اولي اشوف ام عيون

عافتني وراحت لغرفه جواهر وبس اسمع العياط جاي من الغرفه هه هاي هنه كلما يلتقن يتخبلن چن مسودنات يضحكن بهستيريه ويتشاقن ووحده تداهر اللخ علاقتهن حيل حلوة..

كملت شغلي وطلعت بالحديقه اسگي (اسقي) الزرع وشفت زيد، تقدم عليّ وگال...

-شلونچ غزاله؟ اگولج رهوفه هنا سمعت صوتهه؟

-غزاله: ياااء هاي شلون سمعت صوتهه؟!!

ابتسم وحك شعره من وره، صفنت عليه هذا شماله ساكت، عفته ورحت اكمل سگي وهوه ظل گاعد بالحديقه يعاينلي، اللتفتت اعاين عليه چانت عيونه ؏ باب المطبخ چن واحد منتظر احد يطلع منهه وصدگ طلع منتظر احد ولهفة عيونه وشلون طفر من مچانه من اجت ناحيته وگالت وهيه منزله راسهه..

-هلوو زيود

-زيد: شلونچ رهف يا بويه شگد مشتاق لترافتچ

ظلت مبتسمه ومدنگه راسهه وانه واگفه چني طرن ما افهم شجاي يصير، رجع گال بصوت راهي...

-زيد: رهف مشتاقلچ هواااي

-رهف: تشتاقلك السعادة

-زيد: ردت ابشرچ طلع تعييّني والفضل لأبوچ هوه حاچه صديقه ورح اشتغل عنده بالمكتب

-رهف: ؏ الخير

-خير اليصيبچ، وانتي شلونچ بالدراسه بَـس لا دتعبين روحچ؟

-لا زينه

-عفيه اريدچ ترفعين راس ابوچ خطيه تعب وياچ هواي والمدرسين الحطهم الچ ومصاريف الخط والروحة والرده هذا كله اريدچ تحطي بين عيونچ وتطلعين معدل حلو وتفرحي لخاطره يستاهل السيد

هزت راسهه وبقت ؏ ابتسامتهه، ترخص من عدهه وطلع من باب الحوش وانه ركضت عليهه..

-ولييييچ هذا شماله سايح من يحاچيچ

ضحكت بغنج وعدلت شالهه..

-رهف: انتي شيخصچ

-غزاله: عليچ الله هاي شكو بيناتكم صفنت الزلمة ميت وهوه يعاينلچ وشني هاي السالفه الجديده مال مشتاگ لترافتچ وابو فاضل لو يشوف جبار الي بداخلچ يتراجع عن هالچلمه

-رهف: اهووو غزاله شمالچ تغارين

-گبر طمچ انه اغار وين اكو بَـس الفضول يذبح خيه

ضحكت وغطت وجهها، فرقت اصابعهه وحچت خجلانه...

-رهف: زيودي يحبني

-لاااا بشرررفچ

-وغلاة ابوي هوه گالي انه عاشگچ وهالحچي صارله هوااااي

-ملعووونه ليش ماسولفتيلي

ذبلت ملامح وجهها ونزلت راسهه..

-واذا اگلچ شني اليتغير

-كلشي يتغير ولچ يعني جاي تعيشون قصة حُب؟؟!

-لا ولچ يا صخام واحنه كل واحد ببيت وموبايلي ابوي ماخذه مني خاطر اقره

-چا ميخالف كملي سادس وخلي يخطبچ

دمعن عيونهه واحتقن وجهها، ضربت برجلهه الگاع قوي ونترت بخزره...

-رهف: شنييي يخطبنيي ترديني انفضح جداامه

-ولچ ليش تنفضحينن؟؟

-اخخخ غزاله اااخخخ شلون اتزوج وانه هيچ

حچتهه وبچت، تگربت عليهه اهديهه وهمست...

-حبيبتي رهوفه چنتي صغيره وانه متأكدة ما صابچ شي

هزت راسهه نافيه وتشهگ بالبچي..

-رهف: گبل 3 اشهر رحت ويه جواهر للطبيبه وخليتهه تفحصني وگالت ماعندي

رجعت تنحب بصوت عالي، حضنتهه لصدري وفكرت ابوهه عنده علم ان راحت تفحص، وخرتهه عني وهمست...

-ابوچ يدري؟

هزت راسهه بـ "اي" ورجعت غطت وجهها، انمرد گلبي ؏ هالطفله شني ذنبهه تدمر حياتهه خاطر غلطه هيه مالهه ذنب بيهه، حسبي الله ونعم الوكيل بمروان وخلفته..

غسلتلهه وجهها وطلعت عصرونيه النه نآكل بالحديقه عسى تغير جو وتهدأ، گعدنه ؏ الفراش بالگاع واكلنه كيك وشربنه چاي وطلعت نرجس العرمة تلغي بلغوه فارغه وطبت جوه من شافت جواهر طلعت واجت جارنه..

-جواهر: رهفتي اليوم عندچ محاضره مو؟

-رهف: اي هسّ ابوي يجيني

-جواهر: هاا شوكت يجي؟

-رهف: هسّ بالخمسه گال

باوعت لشاشه تلفونهه وعضت ؏ شفتهه السفليه وگالت..

-جواهر: يعني هسة مبقه شي

-رهف: اي تردين شي منه؟

-جواهر: هااا لا شسوي يعني شسمه شريد قابل

ضحكت رهف وگالت بخبث..

-رهف: ابوي مشتاگلچ كلش ويگول يمته يحنون الغوالي

ضحكت جواهر وجرت خصله من شعرهه وگالت بمياعتهه المتعودين عليهه...

-جواهر: مممم بوسي ابوچ عود خطيه

-رهف: ههههههه يعني ابوسه نيابة عنچ

-جواهر: لاا انچبي ادبسز مو هيچ

-رهف: ههههاااييي ايييي صاار جوهرت ابوي وغيره؟

ابتسمت وگالت بهمس...

-جواهر: گوليله احبك

-احااا اي اي اگله جوهرة تحبك

-لااااا انتييي تحبييي لچ فتحي عقلچ لا بالشحاطه ؏ راسچ

-رهف: ههههههههه ديلاا وغيره؟

-ممممم گوليله ان انتي تحبي هواي وتموتيييين عليه بَـس خلي يلين راسه شويه ويبطل عناد ويرجعلي اءء اقصد يرجعلچ

-رهف: صااار

-جواهر: اي وگتلچ دائماً گوليله انتي تحبي وابد لتضوجي زين بيبي وخليچ حبابه وگوليله انتي مزعلانه عليه بَـس الظروف جبرتكم تعيشون هيچ

ضحكت رهف قوي لدرجة غصت بالچاي، دگيت ؏ ظهرهه حيل ردت اخسفه، راحت جواهر جوه وشويه واجه عميد الدين بَـس ماشفته لان ماطب للبيت ظل بره..

ثاني يوم چنت جاي اسبح وكملت، نزلت جوة انطي العلاج لحبوبه عطيه وسمعت حس ابوي يرعد يمته اجوي؟؟ نزلت ملهوفة سلمت عليه وبست ايده بَـس چان معصب وصاير احمر انداريت ؏ امي مطنگرة وگالبه وجهها، همست..

-ماما شني شو ماگلتيلي رح تجون؟

-سلمى: غير ابوچ موتني من يوم ممات بكر وهوه متخبل وميقبل نگعد ببغداد واجينه رح نرجع هنا

-صدك تحچوون؟؟؟

-سلمى: لعد اكذب عليچ لچ ابوچ خبلني والله

-يوم شمالچ وياه چا غير وليده راح من ايده وانتي تعرفين شكثر يحب بكر ويعزه

-اي بعد راح الله يرحمه لچ ابوچ لو يگولوله يموتون ولدك الاربعه الباقين بَـس يرجع بكر هم يقبل

-يووم اسم الله شمالچ انتييي

-استغفرر الله گوة تحچينييي لچ جنني يريد ياخذ زنوبه ويجيبهه احنه نربيهه

فتحت عيوني مصدومة واستفسرت منهه اكثر...

-غزاله: ماما مستحيل لييش يريد يحرم البت من امهه

-اوووف غزل موتني مو اگولچ والله تعبت واني اقنع بي وهوه راكب راسه ميقتنع

انمرد گلبي من سمعت هالچلام وگمت اسوي الغده، اطبخ وافكر بحال هجران لو خذو منهه زنايب شيصير بيهه هاي روحهه معلگه ببنيتهه..

فرشت السفرة وتغدينه ورحت اسوي الچاي، اتصلت بـ عُثمان اتطمن ؏ اخباره صارله چم يوم من راد للانبار وبالي يمه الوضع يخوف يمهم ويوميه مغتالين واحد د..اعش الله ينتقم منهم فرهدونه..

رغم الحرب واحتلو الانبار بَـس خواله ما طلعو من بيتهم وعثمان استمر يروح ويردلهم وما يهتم خصوصاً بهالفترة صادف مرض خاله چساب وعثمان روحه معلگه بي وما عافه ابد..

سولفت وياه شوي وگال هوه بالطريق جاي النه، رحت للهول كلهم گاعدين ماعدى امي وجواهر، اخوي احمد هم جاي اليوم ومبين السالفه الجاي يحچون بيهه حاميه خصوصاً عميد الدين من گال...

-عمي فدوه اغديلك خطيه نحرم بت من امهه

-خليل: چا شنهي نخلي بنيتنه يربوهه الغُرب

-احمد: بويه انه اشوفنهه صعبه ومن اول بكر من راد يطلگ مريته انه مارضيت ياخذ زينب من امهه لان السالفه مو صحيحة والحضانه لأمهه

ابوي صار چبريت وعصب وحلف يسويهه عشاير اذا مانطوهه وكلنه نعرف العشاير شتسوي لو يتدخل اكبر واحد ما يهتموله ويسوون البراسهم، عميد الدين احتار ومبين عليه اتكدر من حچي ابوي وحاول يجادله بَـس هذا هوه ابوي قافل ؏ السالفه وحبوبه عطيه ساكته وبس تسمع..

-خليل: باچر عگبه امهه تزوجت شنهي انه اخلي بنيت بكر يربيهه زلمه غريب؟!!!

-عميد الدين: عمي بَـس هذا موش حَل

-خليل: حل ونص عميد الدين حط بنيتك بمچان بنيت بكر ترضاهه يربيهه زلمه غريب عليك وماتعرف شنهي يسوي مايسوي خاب هذا عرضككك؟؟

-عميد: عمي الله لا يحطني بهيچ موقف بَـس انه اگول صعبه البت تعيش بعيد عن امهه شلون بيهه هاي تتيتم من امهه وابوهه بنفس الوكت وهيه فريخة اذا تريد اشرط عليهه اذا تريد بنيتهه تبقه جارهه ماتتزوج وتظل عزبه

-خليل: اييي وتظل طول العمر عزبه مو؟؟ شيخ انه كله چم يوم ومودع وانه ادري انتم رح تنسون السالفه وتخلون امهه تتزوج ومايرفلكم جفن ؏ بنيت بكر انه ادري انتم ماتحبو خصوصاً عُثمان

-عميد الدين: عمي شني هالحچي ياهو گال مانحبه هوه ابن عمي حاله من حال بقيه اخوانه ومعزته بگلبي والله يرحمه!

استمر النقاش بيناتهم وقاطع الموضوع حبوبه عطيه من گالت بثقه وهيه متچيه حنچهه ؏ العوچيه...

-حجية عطيه: هذا هوه سهله نجيب امهه تعيش وياهه هين

-عميد الدين: مستحيل يرضون اهلهه انه اعرفهم

-خليل: مايهمنييي مايهمنييي فهمتووو والعباسس اله اجيب زينب

-حجية عطيه: استچنو ولا تهوبزون السالفه ما ينرادلهه فهم من گلت نجيبهه هين اقصد نحلهه بزواج نزوجهه لواحد منكم وتفض

فتحو عيونهم مصدومين وابوي عاط بمچانه...

-خليل: احمد بويه انته اعقد ؏ البت!!

-احمد: لا بويه انه مايخصني تروح تزعل هدى وتسويلي عرس

اندار ابوي ؏ عميد الدين وحچه بحماس..

-چا انته شيخ اخذهه بعد عمك

-عميد الدين: وابو فااضل ماتزوج شنهي چا هيه وليه

وظلينه هيچ ناس تجيب منااا وناس تخوط هناااك لحدما ابوي شال الموبايل واتصل ؏ واحد وحچه وياه...

-خليل: ها وينك؟ يله يمته توصل؟؟ هاا خوش ديلا تعال بوجهك لدار سيد عميد الدين لا تروح لمچان ثاني

سد الاتصال وياه ورجعو يتناقشون، دقايق واندگت الباب راح عميد الدين يفتحهه وطب وياه، سلم وگعد ؏ القنفه...

-احمد: شلونك؟

-بنعمه وانته....

قاطع چلامه ابوي من گال...

-خليل: هسّ مو وكتهه، اسمع جاي نتناقش بسالفه زنايب احنه ناخذهه نربيهه واذا امهه عارضت جاي نتدانش ياهو يعقد عليهه حتى تصير حليلته جاوبني انته ترضى تزوج مرت اخوك؟؟

صفن ثواني وچن الي انصدم، رخه عضلات وجهه وعدل گعدته، تچه ظهره ؏ تاج القنفه وگال...

-اي راضي

يتبع☘️...

♛ ♛ ♛ ♛ ♛ ♛ ♛ ♛ ♛ ♛
توقعاتكممم🦦؟؟؟ لتنسون التصويت والتعليق بين الفقرات💕 شباباتي سبب انقطاعي والقصه توقفت لان ذكرت عندي امتحانات بَـس هسة ان شالله نرجع نفس نظام قبل بالنشر بين يوم ويوم💋.