شفاه مخملية الفصل الثامن وأربعون 48 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

بارت موفاجئ وطوييل لعيونكم الحلووة🙈♥️

"شفاه مخملية" 💋

بقلم: زهراء السلامي.

#‏ أما عَن وَجْههِا فَهو
أسمرٌ،
أسمرٌ،
أسمر،
كـَ لوحةٍ خطّتها الشمس🖤..

♛ ♛ ♛ ♛ ♛ ♛ ♛ ♛ ♛ ♛

-زنايب ماما يله تأخرنه

اجت تركض وجنطتهه شايلتهه ؏ ظهرهه فرحانه اليوم اول يوم تروح روضه هيه تشبه الحضانه، رغم عمرهه بعده صغير بَـس قبلوهه لان كُلش شاطره وبابا حچه ويه المديره طلع يعرفهه..

لزمتهه من ايدهه الصغيرونه واشوف لمعه الفرح بعيونهه، نزلت لمستواهه وحچيت محذره...

-ماما زنايب تسمعين الكلام ومتعاندين المعلمة وسمعتي شنو گال خالو فاضل يشتريلچ حلاوة اذا صرتي حبابه

هزت راسهه موافقه وطلعت بيهه، تمشينه ؏ كيفنه وهيه تگمز ممصدگة..

-بنتي ؏ كيفچ ترا جدو يضوج وبعد ميخلينه نطلع وحدنه ويجي خالو حيدر ويانه

-زينب: ايييع هيدل (حيدر) ماهبه ماما (ماحبه ماما)

-لچ عيييب هسة اگول لجدو يچويچ

گلبت وجهها مطنگره، وصلنه للروضه هيه قريبه ؏ بيتنه فَـہ ابويه ممانع اني اوصلهه، دخلتهه للصف مالتهه وبوستهه ووصيت المعلمة عليهه..

طلعت متوجهة لبيتنه بَـس قبلهه رحت اشتري كم شغله لماما وصتني عليهن، كملت كلشي ورجعت للبيت انظف وانوب رحت اطبخ الغده..

صفيت التمن وبالي سارح، اليوم صار ست شهور ؏ وفاة بكر الله يرحمه احس حياتي انگلبت بهالفترة وكأن صرت انسانه ثانيه، ماتحمل أي كلمه ونظرات الشفقه الي دا اشوفهه تنبع من عيون اهلي وگرايبي تموتني واحس روحي منبوذه اكثر من قبل بَـس رغم هذا دا اتشجع واللزم دمعتي، اخر مرة اتذكر بچيت بيوم الي سألتني زنوبه عن ابوهه واضطريت احچيلهه مات..

بيومهه بچت هواي هيه صح متفتهم شنو الموت بالضبط بَـس تعرف ان معناته شي مو زين ويعني مراح تشوفه بعد، رجعت لوعيي ؏ صوت نداوي..

-هجران اكولج عندي موضوع وياچ

درت وجهي اباوعلهه چانت لابسه ملابس الدوام هستوهه راجعه اليوم حظرت بَـس محاضره وحده ورجعت...

-هجران: بَـس لتگوليلي تردين تغيرين قسمچ

-ندى: لا لا احبه وعاجبني الموضوع ميخص الدراسه

-خير لعد يخص شنو؟

تلعب بأصابيع ايدهه ومتوتره وتبلع بريگهه، بزعت وصحت...

-لچ احچي شكوو

جرت نفس وگالت خجلانه...

-هذا شوفي.. هذا واحد بقسم هندسة الكهرباء اءء شوفي هوه...

-شبي ندى؟؟؟

-خطبني

فتحت عيوني متفاجأة وفوراً اجه ببالي عدهه علاقه وياه بَـس قطعت الشك الجتاحني من گالت...

-ترا اني ماعرفه ابد ولا حاچيه وياه من قبل بَـس هوه مراقبني صارله فتره وحاسه بي يباوعلي واكثر من مرة تجيني بنيه تسألني اذا چنت مخطوبه لو مرتبطه وانتبه هوه ديباوعلنه لحدما قبل كم يوم اجه وگالهه هيچ بوجهي "يا بت الناس اريد اخطبچ"

-هههههههه هيچ گالهه بهالسرعه!!

-اييي ولچ صفنت عليه هذا شبي لا سلم لا گال رأساً چطهه بالوجه ونزل يعرف عن نفسه گال هوه مرحلة اخيره ويشتغل بمصنع حلويات وعنده مشتمل ببيت اهله ومواليد 92

-ههههه اويلييي كل هذا گاله

-اي والله شبيچ

-وانتي شگلتيله؟

-محچيت يعني بقيت منزله راسي خجلانه منه

-مممم

-بَـس هجران هوه مو صاك

گالتهه وبرطمت شفايفهه ليگدام، ضحكت ؏ حركتهه وگلت واني اگلب التمن..

-شوفي خيه ترا الشكل مو كلشي يعني اهم شي اهتمي بأخلاقه ومخافته من ربه لان لو چان الرجال ميخاف الله مراح يخاف الله بيچ

-هاي شنووو شو صايره حكيمه

جريت حسرة وكملت..

-نداوي اني شفت الضيم ويه رجال صاك ؏ گولتچ، چنت اشوفه احلى شي بحياتي بَـس هالرجال دمر حياتي وماطلعت بشي منه غير زنايب

-ندى: اي هم صح

راحت للصاله واني كملت الغده ورحت تسطحت وفتحت التلفزيون اتفرج، اگلب بالقنوات ماكو شي يعجبني عاد شفت مسلسله هندي گعدت اتابعهه، وره شويه اندگت باب البيت ورحت افتحهه لان امي مو هنا واخواني وبابا بدواماتهم، صحت...

-منووو؟؟؟

اجاني صوتهه صرت اگمز بمكاني من الفرحة، فتحت الباب وصحت...

-جوووررريييه

ضحكت وحضنتني حيل صارلي فوگ الـ 8 اشهر مشايفتهه وبس نحچي ؏ الموبايل، دخلتهه جوه وفيصل سلم من الباب وگال يروح للحظرة..

-جوري: لچ هجراان شگد مشتاقتلچ مطيه

-هجران: اني اكثر والله تعااي يمايييي حبيب گلبيييي

اخذت علاوي ابوس بي وجوري گوة تمشي دخلت بشهرهه..

طبينه للبيت وركضت اسويلهه عصير برتقال وجبت لعلاوي الي ندى استلمته بوس وعظ بكل مكان بجسمه..

-جوريه هاچ حبي اكيد فحطانه من الحر

-جوري: اي لچ يبووو الحر مينحمل

-الله يساعدچ

-جوري: اگولچ وين امي شو مشفتهه؟

-هجران: گالت تروح للامام الحسين تاخذ درس

-هاا بعدهه تروح لذني دروس القرآن؟

-اي، وانتي رجلچ شو بسرعه طلع؟

-اي گال يزور ومناك يشوف صديقه

گالتهه وعوجت بحلگهه، باوعتلهه بشك وهيه تگولب بعيونهه ونزعت شالهه تهفي وجهها بيدهه...

-جوري: لتباوعيلي هيچ فحطني والله

-بعدهه عمه سلمى وياچ؟

-لا لچ رجعت للناصريه من زمااااان

-يااااا هاي صدُك عوود شرجعهه؟؟

-ياا متدرين استقرو هناك واحنه لاحگيهم

-لااا ولا ادري شو مگلتيلي

-جوري: اي مو من مات بكر الله يرحمه..

سكتت واني هم سكتت حسيت گلبي انعصر صارلي شهور احاول ماتذكره ولا اجيب طاري بَـس بالليل من ادعيله الله يرحمه واهديله قرآن ماعرف ليش گلبي ينمرد عليه واتأذه شگد چنت اكابر واگول حاقده عليه بَـس ميهم هذا الدعاء والقرآن كله مرجوعه الي..

-هجران: اي وشتغير من مات بكر اني ماعندي تواصل ويه أي واحد منهم حتى جواهر ماجاوبهه لان اخاف تحچي بي بَـس غزل تحچي ويايه شويه

-جوري: هواي شغلات تغيرن عمي تخبل حرفياً هجران الرجال صاير طگه ونص وبس يتعارك وميت ميقبل يبقى ببغداد يگول اتذكره

-لعد من يرجع هناك ميتذكره

-شمدريني مو اگولچ متخبل الرجال

-اي واخبار الباقين شنو؟

-جوري: ماكو شي كلهم نفس العيشه كلمن بمكان عُثمان دائماً بالانبار تگول جواهر يجي اسبوع ويرجع شهر وهيچ مگظيهه

-هاا

-ليش انتي ماعندج تواصل وياه

گالتهه وغمزتلي..

-هجران: لا طبعاً اصلاً الرجال حتى ميدگ عليه ابد ولا مرة وحتى من يريد يحچي ويه زنوبه من بابا لو فاضل يدگ عليهم وياخذوهه تسولف وياه

-وانتي مضايجة من بروده؟

-ياااء وشكو اضوج شنو خاف اخوية الحقيقي واني مادري

ضربت گصتهه قوي وصاحت...

-جوري: لكم اني هاااي شسويلههه هااااي

-اسكتي جوري اسكتييي

-جوري: هههههه بشريني لسه تحلمين بي؟

-لاااء

چذبت عليهه لان لسه احلم بي واحلام مخربطططه لدرجة وتزعجني كُلش فَـہ احاول ماتذكرهن..

-هجران: شخبار جواهر وعميد؟

-ياااا ذوله يموتون من الضحك هههههههه

-ليش شكو؟

-شهد تسولفلي جواهر مدمرررته دماااار لعميد الدين اذا يكون بالبيت متطلع من غرفتهه وخطيه كله گاظيهه ببيته الثاني ويه سُهى

-ولسه ما تدنالهه؟

ضربت فخذهه قوي وحچت بحماس..

-عزااا لچ لااا لسه بعدهممم عجيييب هالرجال شنو هالقابليه والوفاااء يابه لو هيچ الرجال لو مينراد انوب ذيچ سُهى فاهيه ومتسوي شي وشلون تحب جواهر وتدافعلهه لچ خيه والله الدنيا حظوظ

-يبووو جوري عوفيهم بحالهم

-لچ شبيچ اتشاقه

هزيت راسي يأسانه منهه وگمت اللبس حتى اجيب زنوبه، طلعت بسرعه ووصلت للروضه مالتهه لگيتهه واگفتلي بالباب ومطارتهه المي معلگتهه برگبتهه ومچتفه ايدهه وعاگده الحاجب..

-هلوو ماماتي زنايب هاي شوكت طلعتي؟

باوعتلي بنظره حاده ومعصبه خلتني اضحك لا ارادي، گالت بعصبيه اطفال...

-زينب: اصلاً صارلي شگد

-يا عمرييي اسفه بَـس خاله جوريه يمنه واللتهيت وياهه

نزلت ايدهه وگالت مبرطمه شفايفهه..

-زينب: ئلاوي جاي؟

-ههههه اي علاوي جاي يله امشي حتى تلحگين تلعبين وياه

اخذت ايدهه واجت ويايه متحمسه، سألتهه شلون چان يومهه وجاوبتني بكل برائه...

-زينب: ماما المس انطتني هلاوة

-چكليته؟

-اي

-اكلتيهه؟

-لا گلت بالبيت آتُلهه

-ماشي لعد يله

-زينب: مو شلون ئلاوي مائنده (ماعنده)

-هجران: ميخالف اني انطي عندي وحده بالبيت

-ماما هبابه اني هم اليد

-ماكو تردين لعد هاي البيدچ شنوو

-اليد بئد (اريد بعد)

-ماكو

ضحكت ؏ سوالفهه ولسه چم حرف متعرف تنطقهن وصايره تنگرط وشلون تطنگر نسخة من طنگورة ابوهه، وصلنه للبيت ولگيت امي راجعه صبينه الغده وتغدينه كلنه ونيمنه الجهال نومة الظهر وگعدنه نسولف للمغرب، صلينه وبدينه بالعشه واثناء ما اني دا اگلي واشوف جوري تلوب...

-شبييچ بَـس لا رح تجيبين علينه ههههه

-جوري: لچ لااا هجران رح امووت

ذبيت الشوكه من ايدي واللتفتت بكل جسمي عليهه..

-شكو شصاير؟

تنهدت بعمق وبدت تسولفلي...

"جوري"
مرت كم سنه ؏ زواجي من فيصل وعشت وياه عيشة حلوة كلهه طبات وطلعات وونسه وحُب وغرام بَـس كل هذا تغير فجأة من صار يشتغل ببغداد، شكيت بي وگلت خاف عنده سالفه هناك واخذت غراضي وشلت وياه وعشنه ببيت حلو وچبير بَـس الي واله وعلاوي..

اخذتلي شهرين متونسه كُلش وفيصل تعامله يجنن ويايه الا باليوم الي گال يريد يروح لبيت خالته (ام جواهر) مامانعت وگتله يله نروح، عزمونه ؏ عشه ورحنه نأدي الواجب، طبيت لبيتهم الخلاب وگعدت بي واكلت وياهم وچانت ام جواهر كُلش مُرحبة بيه وتسولف وتضحك بَـس حسيتهه مغروره وشايفه روحهه لدرجة عافتنه وطلعت بَـس لان گالو عدهم شغل بالمستشفى..

طلعت ام جواهر وگلت لفيصل نطلع وراهه شعدنه ببيتهه بَـس گال بعد وكت خلينه نتونس هنا، اني كيفت لان هاي فردوس هواي تتفيك وشايفه روحهه وتحچي برجلهه گدام فيصل سوته نبي استغفر الله..

واني هم اخذتني الحماوة وبديت احچي بفيصل وهيه بَـس مبتسمه، گظت الليله حلوه وتونست بيهه وطلعنه من بيتهم، الطريق كله فيصل باله شارد ومو وياي شگد حچيت وياه وهوه يتصفن ومفهي، الى ان بزعت وعطت...

-هاي شبيييك مو داحچي وين بالك فييصل

-فيصل: شگلتي؟

-بالك ويامن؟؟!

-وياچ شمالچ بَـس سرحت شوي

رجع يباوع للطريق ووصلنه للبيت، مرت فتره لا بأس بها واجت عمتي تعيش ويانه وماحچيلكم ؏ الاذيه التأذيتهه، فد انسانه نحسسسه ولئيمه وحقووده وعينهه عليه وشنو يجيبلي فيصل لازم يجيبلهه..

وبيوم من الايام چنت بغرفتي گاعده اتمكيج علما يرجع فيصل من الشغل وسمعت صوت بنيه جوه بالصاله، ركضت ومديت راسي واذا اشوفهه فردوس گاعده تدگ فچ وياه!! هذا مو چان بالدوام شجابه؟؟! وهاي شجابهه هناا؟؟

نزلت اركض وسلمت عليهه وانتبهت لنظراتهه عليه وشلون تباوعلي لان چنت لابسه برموده وكيمونه، ومن سألتهه شوكت اجيتي ضحكت مجامله بوجهي وگالت...

-فردوس: بيبي هستوني فيسل جابني

شگد تنرفزززت من گال "فيسل" عود شوفوني اني كيووت اخخخ موتتني بيومهه ولازگه لزگ بي ويضحكون ويبسبسون وحدهم واني بالعمدني اروح اگعد بنصهم من اشوفهم يسولفون..

وكثرت جيات فردوس بحجة تشوف عمتي وتطلگت من طلال وزادت الطين بله وفيصل اشوفه متعلق بيهه بشكل مو طبيعي بَـس ما لازمه عليه شي يعني تعامله زين ويايه نفس قبل وممقصر ويايه بَـس احس اكو سالفه وتحوس بگلبي، ومن رحت احچي لعمتي تگولي...

-سلمى: هاااي شبييچ اصلاً فيصل وفردوس اخووان وماكو شي من الي ببالچ؟

-جوري: يعني اخوان بالرضاعه همه؟

-سلمى: لچ لااا بَـس تربو سوه وقريبين ؏ بعض من قبل

انغاضيت منهه وكبر الشك بگلبي من اشوفه يتختل ويحچي بالموبايل واليذبح دائماً افتشه من دون علمه بَـس ما اللگه شي مادري هوه يمسح مادري اني دا اظلمه..

عمتي زادت بالضغط عليه من حملت ببنتي وظلت تحوم تحوم ميته قهر لان غزاله لسه ماحملت وتذب بالبسامير عليه واني ابلع واسكت واوقات ماتحمل اردهه خصوصاً من اشوفهه تشجع فيصل يوصل فردوس لبيتهه ويجيبلهه غراضهه من اهلهه سافرو وكلما احچي وياهه تگول شبيچ همه اخوان وعادي هاي بيناتهم وطبعاً فردوس طبعهه سزز تظل تتلمس بأيد فيصل وتتنعوص عليه لو بيدي امردهه مرد بَـس ماگدر احچي عمتي تموت عليهه...

-هجران: عزااا لچ هاي شننوو

-جوري: مصخمه والله مو اگولج طايح حظي

-هجران: بَـس اهم شي فيصل مامتغير عليج صح؟

-لااا هوه هنا اليموتتي كله حبي وحياتي وگلبي واحبچ بَـس ممرتاحة هجران حمووت صارلي شگد حابسه هالحچي ورح انفجررر

-الله يساعدچ اووف احترگ گلبييي

-اسكتي لعد اني شأكول

-هجران: لا خيه ؏ الاقل انتي شاطره وتلگفين السالفه مو مثلي ثوله وعوبه اوووف الحسره لسه بگلبي والله

-خلص هجور انسي الله يرحمه راح لدار حقه

هزيتلهه براسي وكملت العشه وبالي يسرح كالعاده احس حتى دا اتعب من وره التفكير..

گظن ليلتين جوريه عدنه بايته ونفس سوالفهه وتحشيشاتهه ولأول مره نتصل اتصال جماعي اني وجوري وشهد وجواهر من طلعت من بيت الگصاب لليوم اني محاچيه وياهن..

سولفنه هواااي وضحك ووناسه وجواهر احسهه مرتاحة وجوري سألتهه...

-جوري: لچ جواهر شو منشنه انتي شكو ولا عبالك زعلانه من رجلچ حيصيرلچ شگد

-جواهر: ههههه لچ اووييي فديته لو تشوفي ميت ؏ شوفتي واني اعاند وادخل للغرفه وهوه يظل يگمز ويدزلي رهف تسألني اتفه الاسأله واني اتعمد احچي بصوت عالي حتى يسمعني

-جوري: هههههه خرب يووومچ لچ لينجلط الرجال

-جواهر: مينجلط لتخافين

-هجران: جواهر خاف يبزع وانوب يضعف گدام سُهى تره البنيه حلوة وصغيره خاف تغري

-جواهر: لاااء معليچن اني دا اعلمه درس وماتنازل بسهوله حتى ميشوفني سهله وتعجبه السالفه ويظل يعيدهه وترا اعرف عميدي شنو وعينه مليانه متغره طفله بعمر رهف

-شهد: ايي وهواي يتعارك وياهه ترا

-جواهر: هههههههههه ولچن چذاااب يسوي هيچ بالعمدنييي سُهى ورهف يگولنلي ؏ ساعه وشاط وحده وصار يكسر الدنيا ويتعارك ويه سُهى من لا شيء ويظل يصيح اله اطلع من البيت واعوفه الچن كل هذا حتى يجي ويشوفني مره سمعته يحچي بصوت عالي مادري ويامن لان چان واگف بباب الغرفه مالتي عود يسمّعني ويگول المهم ننام جوه سگف واحد ونتنفس نفس الهوا هذا كافي عندي

-هجران: يماااا لچ شنو هالرومانسيييه

-جواهر: خرب عقلچن ولچن ملتح وعنده سوالف تصفنن عليهه ههههه

-شهد: ههههههه خرب بيچ جواهر مخبله الرجال

-جوري: كفووو منهه قويييه اي الزلم مو مال وحده سهله وفاهيه

-جواهر: صحيح بَـس تكون قويه بشخصيتهه مو بلسانهه يعني اني كومة اشوف نسوان حتى غلط يغلطن ؏ رجولتهن وهذا الشي غلط هنا مراح يگول عنهه قويه رح يگول ممتربايه

-هجران: اييي عزا هاي عمتي هيچ لچ جوري ذاك اليوم اسمعهه تغلط عليه وتگله احترگو اهلك وانته وياهم وهوه شاط ويغلط عليهه ويبوو گبت عركة بنص بيتنه

-جوري: صخااام هاي شوكت؟؟

سولفتلهن وكملنه المكالمه وكُلش فرحت وغيرت جو وياهن، ثاني يوم گعدنه كلنه ؏ الريوگ ومارست نفس الروتين وديت زينب للروضه ورجعت اسوي غده بَـس هالمره ماما مطلعت بقت بالبيت تشتغل وبينما اني وجوري واگفات نسولف وحده تنظف الخضره والثانيه تسوي التمن اندگت الباب..

فتحتهه امي لان چانت بالطرمة جاي تغسلهه وسمعت صوت زلم بالباب..

-جوري: ذوله منو؟

-هجران: شمدريني خاف اصدقاء ابويه

ماهتميت واستمرينه نشتغل، دخلت ماما للبيت بسرعه بدون متحچي شي وركضت لبست عبايه وراحت تفتح باب الاستقبال وطببت الزلم الي لسه مشفت شكلهم..

ثواني ورجعتلنه ملهوفه...

-صباح: بناات هذا سيد خليل وولده جايين

فتحنه عيونه متفاجئين وگلبي صار يدگ خفت يصير البالي، رجعت ماما للاستقبال ووگفنه اني وجوري بالباب نتسمع شيحچون وشمينه عطورهم الثگيله للصاله واصله الريحة يتميزون بيت الگصاب بعطورهم الطيبه وبطبعهم يسبحون بالعطر الچان عميد الدين لو عُثمان لو عمي وحتى بكر الله يرحمه هيچي چان..

چانو يسولفون سوالف عاديه بَـس مميزت اصوات الوياه بَـس انتبهت لصوت عميد الدين لان مميز بخشونته، طلعت ماما وركضت للغرفه تروح منا وتجي منا ماعرف شبيهه، صاحت بينه نسوي چاي واني احس الرجفه بعظامي مابيه اتحرك فَـہ جوري راحت واني رحت وره امي...

-ماما هاي شكو شجابهم؟

-صباح: مادري مادري هسه يجي ابوچ ونفتهم

صدُك ربع ساعه واجه بابا، طب للاستقبال وبده الحديث المرتقب والي خايفه منه من يوم ما بكر توفى لحد هاي اللحظه، اسمع عمو خليل بگول...

-سيد فارس بعد اخوك انه حفيدتي اريدهه جاري وتربى جوه جناحي

-فارس: سيد شنو السالفه يعني شلون الطفله تاخذوهه من امهه؟!

-خليل: اي خويه چا هذا المعروف وهاي عاداتنه ماعدنه فريخات يتربون ببيت موش بيت ابوهم

-فارس: ؏ بختك سيد ابوهم توفى ومنو يربيهه عمامهه لو عمتهه؟؟

-خليل: خوية هذا الموجود احنه نريد الفريخه ترد لينه

"جوري"
اشتد النقاش وسمعت صوت بيبي عطيه تگول..

-حجية عطيه: خايبين شمالكم شنهي شنهييي يرادلهه كل هالمعمعه البت ترد لبيت ابوهه سيد فارس وهاي المعروفه روح اسأل أي بيت بسلفنه رح يگلولك نفس حچايتي

-فارس: حجية ؏ راسي بَـس القانون يگول الحضانه للام

-خليل: ماكوو قانون احنه عشايير مانعترف بالقانوون نگدر ناخذهه بالگوه وغصباً ؏ اكبر شارب

-فارس: سيييد شنو هالحچييي البنيه تيتمت من ابوهه صارله سبه تشهر وعايشه هناا ويه امهه واحنه ممقصرين وياهه بشيي ليش تريدوهه تتبهذل وتربى بحضن غير حضن امهه!!

صار حچي هوااي وحتى عياط صار يعيط عمو خليل وهجران وجهها صار ينطي اللوان وعيونهه مغورگه بالدموع، الباقين ساكتين بَـس عميد الدين تدخل وصار يهدي بيناتهم...

-عميد الدين: صلو ؏ محمد ساده انتم وع راسي اسمعوني، بويه البت مردودهه لبيت ابوهه وهاي معروفه عدنه واگدر اجزملك اغلب اهلنه يمشون بهالعادات وعمي الله يحفظه خايف ؏ علويه زينب ويريد يأمن عليهه جوه عينه

-فارس: يعني احنه شنو شراح نسويلهه؟!!

-عميد الدين: سيد موش هنا چلامنه احنه نگول باچر عگبه علويه هجران تتزوج خوب ما تظل طول العمر معزبه خوب ما يصلح البت صغيره واكيد تريد تعيش حياتهه واحنه مانريد بنيتنه تطلع بره دارنه وتطب لدار غريب مانعرف شنهي الي رح تواجهه وانته اكيد اعرف بهالسوالف فريختنه بت ومن واجبنه نخاف عليهه، الله يحفظ بنياتنه بَـس هواي صايره مشاكل بخصوص زواج الام ومحد يطيح بيهه غير الفروخ

هجران تخبلت وصارت تبچي وتشهگ بصوت عالي وتصيح من الباب بدون متطب لان ملابسه حجاب...

-هجران: ماتزوووج والله والله ماتزووج سيد عميد الدين ماتزوووج والله اظل هيچ اصلاً ماريد فدوووه لتحرموني منهه عليكم الله

تبچي وتحچي مردت گلبي، سكتت تسحب نفس وحچة عمو خليل...

-خليل: بويه هجران احنه نحبچ ونريدچ ومانريد نحرمچ من بنيتچ بَـس البت تبقى النه وبنيتنه واگدر اسويهه عشاير وكل الشيوخ رح يوگفون لجانبي

-فارس: والقانووون؟؟؟

-خليل: طُززز بالقانوووون خويه مااعلينه بييي ماعلينه

رجعت هجران تبچي وتخرمش بوجهها وذوله راكبين روسهم ميقبلون، طلعت امي ووياهه بيبي عطيه النه بالصاله وجرت هجران حضنتهه وتمسح ؏ راسهه وهجران تبچي بگلب محروگ وتگول...

-بيبي حرااام والله شفت الضيييم من ابنكم حرااام تاخذون بنتي حرااام اني امهه واولى بيهه بيبي ابوس ايدچ ابوس رجلچ

نزلت ؏ ايدهه باستهه وانوب رادت تنزل ؏ رجلهه ولزمتهه حيل وحچت بصوت واثق...

-حجية عطيه: بنيتي لو تموتبن روحچ خليل مايتنازل انه اعرفه واعرفه شكثر يحب بچر ومايرضى ؏ بنيته التعب والبهذله

-هجران: والله ممتبهذله والله اصلاً مرتاحة وحتى دتروح روضه ومتونسه والله ممقصره وياهه بشي وحتى بابا واخواني يحبوهه وهيه تحبهم فدووه بيبي لتحرموني من بنتييي عليچ الله انتي امم اكيد تحسين بحرگة گلبي

ظمت وجهها بأيدهه وتنشر من البچي، اما بيبي ظلت تباوعلهه بنظران واثقه وجرتهه ؏ صفحه وركضت وراهم وامي ويايه..

-حجية عطيه: هجرانه عاينيلي.. شو علينيلي ولچ سلبوحه

رفعت راسهه تباوعلهه وعيونهه خابطه صايرات حمر..

-حجية عطيه: شوفي بنيتي احنه عدنه عادات واكيد سامعه بيهه وهيه من يموت زلمت الحُرمة تاخذ حماهه خاطر تظل ويه فريخاتهه

فتحنه عيونه مصدومين وهجران فوراً وجهها انگلب لونه، وهيه كملت...

-ترضين انتي تزوجين حماچ؟

-هجران: بيبيي انتي شدتگولييين شلووون.....

-حجية عطيه: اشششش لا تحچين فكري عدل خايبه انتي مبخوته النسوان يتلاطمن عليه شفايتلچ وشفايت لأي بت تاخذ عُثمان

فكينه حلوگنه من المفاجأة عثمااان!!! هجرااان تزوج عثمااان؟؟!!

-هجران: صخااام الصخمم وجهيييي اذا اخذه لطااام الطمنييي شلووون الي نفس اخذ اخو رجلي صخااام هوووه شلون اله نفسسس بيه بيبي انتي شتحچييين

-حجية عطيه: انچعمي وسمعيني ترا عمچ يريدچ لـ غيث الساغط وعرضچ عليه ورضى وعلساس نخطبچ اله وتعقدون بَـس عُثمان وعميد واحمد تلاثتهم مارضو بالسالفه واحمد اقترح عُثمان يعقد عليچ لان عزابي والف بت تتمنى يعني لا عبالچ الزلمه يريدچ يشهد الله ما فك حلچه وگال بَـس مارضى غيث ياخذچ واكيد تعرفين السبب

-جوري: لان يخاف الله وميريد ينعاد عذابهه

-حجية عطيه: انلصمي انتي واي هجران حبوبه فكري خايبه والعباس لو أي وحده عاگله تنتهز الفرصه چا يمعثوره ياهي يصحلهه زلمه نفس عُثمان وتدفر النعمه برجليهه من فلك فلكچ اذا ترفضين وتظلين عايشه هنا وبنيتچ ياخذوهه منچ وظلي نوحي عليهه

توقعت امي رح تدخل وتگول شي بَـس عجبتني ظلت ساكته طول ما بيبي عطيه تحچي، رجعت هجران تبچي بَـس وجهها انبلع من الموقف...

-هجران: بيبي ماگدر يبووو يحظچ يهجرااان مااريد اتزوووج ماررريد رجااال مااريد عوفوني وعوفو بنتي بحالنه والله ماتزوج طول عمري اصلاً ما افكر اعيد هالتجربه

-حجية عطيه: سمعيني يمسلوعه ترا الزلمه مشكل گوة مقنعي والعباس هسّ يهج وگتلچ لا لبالچ كاتل روحه ترا هوه هم مايريد وگال مايگدر ياخذ مريت اخو بَـس بعد الظروف حكمت فَـہ لا تظلين تهوبزين وتشوفين رويحتچ عليه وتتوهمين لبالچ انتي نانسي عجرم

اتبسمرت هجران بمكانهه وظلت مبحلقه عيونهه بوجه بيبي بَـس واااضح ؏ وجهها الحيره والحزن والقهر، عافتنه وطلعت من الصاله وجهها اصففففر وراحت گبل للغرفه تمددت وتغطت باللحاف، رحت وراهه وصاحت بيه حتى اطلع...

بيبي عطيه لزمت امي وتحچي براسهه وامي تگوللهه صعبه ومن هالحچي وبيبي حچت ناهيه الحديث...

-حجية عطيه: سمعيني ام فاضل وخلي بنيتچ تحط هالچلام ترچيه بأذانهه لو تلف الدنيا كلهه بشرقهه وغربهه ما تلگه نفس عُثمان ولا نفس حنية عُثمان ولا نفس شكل عُثمان هذا وليدنه مزيون الله يحفظه والعيون تطاير عليه كلهه تريده لبنياتهه وترا الوليد يريد بت خاله وعساس نروح نحچي بيهه اول متطلع سنويه بچر الله يرحمه وصارت هالسالفه وبعد خرب كلشي فَـہ بنيتچ لو عگلهه يشتغل وبيهه حظ تچلب بأديهه ورجليهه بي لان گتلچ اذا رفضت هم تخسر بنيتهه وهم تخسر زلمه ذهب نفسه

اني سمعت هالحچي وركضت لهجران بالغرفه، چانت بعدهه نايمه ؏ الچربايه ومغطيه وجهها وبس صوت شهگاتهه تنسمع، خفت عليهه تختنگ بهالحر وحتى بنكه مافاتحة ومتغطيه كلهه، شلت الغطه عنهه وصحت...

-لچ مخبله رح تختنگين وتموتين من الحررر

-هجران: معليييچ طلعييي بررره اريد اموووت طلعي بررره

-انچبيي هجران وبطلي هالدراما غبييه انتي اذا متقبلين بي

-لچ طلعييي بررره طلعيييي

-تنچبين وتسمعيني افتهمتي لو لاا لچ يردون ياخذون زناايب شلوون تقبليهه شلووون

-اسكتي جوري بابا يحلهه

-ميحلهه سمعتي الحچي يعني السالفه چبيره ورح يسوون گعده وتكسرين بابا بيناتهم حرام عليچ

گمزت من مكانهه وعاطت..

-لعددد اتزوج حمااايه!!!!

-وشنو يعنييي ترا الرجااال ينحط ؏ الجرح يطيب شبيچ انتييي

-صخااام لطااام بوجهييي فوگما هوه مصخمم اسكتييي اسكتييي ماگدر استوعب روحي اتزوج عُثمان ماااگدر

-اي لييييش

-لان اشوفه نفس فاااضل عرفتي ليييش

-انچبي وبطلي هالكلاوات مال تشوفي نفس اخوچ وهالخرطط الزااايد

صحت بيهه بعلو صوتي وهيه خنست ورجعت تگعد ؏ الچربايه وكرفصت رجليهه لصدرهه وتبچي بالسكته، تقربت عليهه وجريت نفس عميق اريد افتهم سالفتهه...

-جوري: احچي الصدُك ليش متردين عُثمان؟

رفعت عيونهه المليانه دموع وحچت بغصه...

-لان احسه يريدني

-شنووو؟؟؟

هزت راسهه وكملت...

-حسيت بهالشي من اهتمامه وشلون يداريني ويخاف عليه يعني چان يسوي شغلات اكثر من بكر وشلون يهتم لمشاعري ويحچي ويايه ويشجعني وهواااي شغلات ثبتتلي هالشي

-لچ غبيه وشنو يعني اهتملچ ترا عادي!!

-لا اني حاسه بهالموضوع خصوصاً بفترة عرس شهد حتى صار يتهرب مني واني شكيت بَـس غلست وهوه بهالفترة اختفى ورجع للانبار واني متأكده من ورايه

-لچ انتي ثوله هوه عميد الدين وسويتي يباوعلچ ويريدچ

-لااا عميد الدين گتلكم وگلت لجواهر چان بَـس يباوعلي بغرابه بَـس ابد محسسني بشي ثاني بَـس عُثمان غير

-اييي هالشي زين لعد معناتهه الرجال يريدچ ليش تدفرين النعمه

-لاا اني ماريده شلون اله نفس يحط عينه ؏ مرت اخوو

-ليش انتي هم معتبره بكر چان رجال؟!!

-انچبي جوري الله يرحمه لتحچين عليه بعد

-استغفر الله اي الله يرحمه بَـس جوز عُثمان مچان يحبچ يمكن يطلع غير شي

-شي مثل شنو؟

-مادري يمكن حب اهتمامچ اله!

-اي هوه گال هيچ

-اي بعد شكوو!! ترا انتي الخسرانه وياخذون زنايب وهسه يردوهه

بچت بقوه وغطت وجهها وهزت راسهه وحچت مكسوره...

-هجران: خليهم ياخذوهه تعبت منهم ومراح يخلونه بحالنه ويأذون بابا واخواني ؏ الاقل بنتي تعيش حياه حلوة وكريمه بين عمامهه وغزاله متقصر وياهه

**

"عُثمان"
السلام عليكم أنَا عُثمان خليل منصور الگصاب، من مواليد 1983 عزابي ووحداني من صغري لحد هذا يومي..

ماعندي اخو يسندني ولا صديق يوگف وياي غير عميد الدين هوه ابوي واخوي وابن عمي وصاحبي وروحي وراحتي..

فقدت امي بعمر صغير وبدت معاناتي، كنت طفل كتوم ضعيف البُنية هادئ من يومي وماحب المشاكل.. كبرت واستمريت ؏ هالطبع اغلب الناس يگولون عني غريب اطوار بسبب هدوئي وغرابتي المُريبه وهوسي بالنظام والتنظيف..

ورغم هذا ماخليتو شي يأثر عليه لان كان عندي عميدي يدفعني في حينه ويسندني في حينه اخرى..

ماتذكر شي بحياتي غير التعب، التعب والظلم والنُبذ خوالي الي همه خوالي كانو مايريدوني ويذبون اللوم عليه ويحكون حكي جارح يخصني..

تحملت كثير وتعبت كثير وانا يتيم الام والاب اي نعم يتيم الاب هم لان ماتذكر أي ذكرى حلوة تخصني أنَا وابوي، محد من خوالي وگف وياي واحتضنني غير خالي كساب الله يحفظو ويديمو الي..

مرت السنين وانا اشتغل مثل الصبي عندهم وكانو نسوان خوالي يكرهوني لاني متفوق بدراستي وشاغول وماتذمر عكس اولادهم وانا كان صرت نفسهم لولا حكايه عمي عباس الله يرحمو من گال "عُثمان انته وحداني وكل عمرك رح تبقى هيك اذا ما بنيت نفسك بنفسك وكسبت احترام الناس الك من تعبك وعرق جبينك، كون من الناس الي يفضل ؏ البشر مو المُعتمد عليهم"

هالكلمات صاحبتني طول فتره حياتي وحتى ايام تجيني اجزع وامل واوصل ابكي مثل الاطفال اريد امي وماتحمل العذاب والاذية اكثر بَـس من استرجع هالكلمات براسي ارجع اقوى لحدما بنيت نفسي والحمد لله كملت دراستي واشتريتلي بيت وعندي شغل محترم وخير من الله...

رجعت للناصريه بعرس اختي غزاله، العرس الي ماوافقت عليه وعارضتو وحاكيت ابوي بَـس كالعاده مايهمو رأيي فَـہ سكتت وماتدخلت..

رجعت من العرس هلكان جوع وتعب كنت اول من رجع من بيناتهم لان الطريق تعبني وكل هالردح والدبك اخذ من حيلي..

رجعت ادور بخزازين البيت اريد اكل شي اسد جوعي وسمعت صوت احد بالصاله، شفت بنت مدت راسهه من باب المطبخ وضحلي من ملامحهه انها كثير انتيشه (صغيرة او ناعمه) توقعتهه طفله فَـہ صحتهه اسألهه وهذي البنت انجنت وصارت تصيح "حرامي"..

صفنت عليهه لثواني وماشوفهه غير وگعت ؏ الارض غشيانه، حرت شَنو اسوي وشلون لازم اتصرف وانا اشوف جبتهه مفتوحه ورجليهه طالعه وشعرهه هم..

درت وجهي عنهه وانطيتهه ظهري بَـس حسيت هالبنت لو ترجع لوعيهه وتشوف حالهه هيك يمكن تنجن فَـہ ماعرف شصارلي وسديت سحاب الجبه وشديت ربطتهه حتى تصحى تشوف حالهه مستوره..

وگفت ادحگلهه انتظرهه تصحى واخيراً گعدت ؏ حيلهه ورجعت تصيح، فكرت بيني وبين نفسي وگلت شَنو هالغبااء يعني حرامي يلبس هيك شبيهه هاي ماتفكر لكن الحمد لله من طخت براسهه واستفهمت مني...

سألتهه من تكون وصدمتني من گالت انها مرت بكر احيييي يبكر لو يعرف صاير هيك موقف يمكن يكفر بيه أنَا اعرفو عدل، عافتني وراحت.. ومرت الايام وانا اتحاشاها ماحبيت هالبنت ونبذتهه مثل ما وعدت روحي انبذ اخوي..

ولكن كل هذا تغير من اول مرة تعرض عليه تصبلي غده، صفنت بوجهها مستغرب ادري تتسائلون ليش استغرب بَـس مراح اكذب عليكم هاي اول مره احد يعرض عليه يسويلي شي غير جديتي عيشه وغزاله واوقات عمتي دلال..

بيومهه ماجاوبتهه وعفتهه ورحت لغرفتي ماهتميت، ثواني ودگتو الباب عليه رهف تگول غداي بالمطبخ مصبوب، توقعتهه هيه الصبتو فَـہ ما سألت..

وتكررت هالشغله اكثر من مرة والبنت استمرت تسألني وانا اجاوبهه ببرود مصحوبه بأبتسامه ابرد بَـس هالبنت غيير توقعتهه رح تضوج لو تزعل بَـس كانت حنينه وطيبه وكانت تبادلني بأبتسامه مُشرقه وتهز براسهه متفهمه ان ماريدهه تصبلي اكل..

مرت الايام وهالبنت اشوفهه هب ريح تروح وتجي وتشتغل وانصدمت من عرفتهه حامل ابد مامبين عليهه لانها كثير ضعيفه..

جمعتني وياهه مواقف كثيره وحسيت روحي اميل الهه وحبيت حنيتهه عليه وصرت قريب عليهه واسولف وياهه واخذهه للجامعه وارجع بدون ملل وانا اسمعهه تسولف عن يومهه وشَنو صار..

حسيتهه صارت جزء من يومي ومايكمل يومي اذا ماشوفهه وتسولف وياي، حسيت بيهه حنية وطيبة أُم تجاهي وهذا الشي علقني بيهه وتمنيتهه اختي وصرت اشاركهه تا بشغلات تخصني وكنت دائماً اگول بيني وبين نفسي يا حظو العندو بنت او اخت او حتى زوجة نفسهه..

الى ان تغيرت كل هالمشاعر وصرت اغار عليهه بشكل مُفرط واضوج اذا احد ضوجهه واعصب عليهه من تحكيلي بكر شگد يأذيهه ومعلعلهه ولسه باقيه وياه..

حسيت روحي انجرفت وعرفت كُبر هالخطأ وعالجته بالابتعاد وفعلاً اخذتلي كم شهر أنَا بعيد ومن رجعت لگيت كل هالمشاعر متبخره من گلبي وبالي وحمدت ربي الف مرة ؏ هالشي وعرفت انو كان مجرد نگدر نگولو اعجاب بيهه مو حُب الي كنت خايف منو..

فرحت من گالت رح تطلگ من بكر وگلت خليهه تشوف حياتهه لان تستاهل تعيش بكرامه وبعيد عن الذل، كنت احسد بكر ؏ مرة نفسها وكنت دائماً اگول عنو غبي وساذج ومايقدر النعمه البين ايدو..

صارت مشاكل كثيره بينهم وكنت اوگف لجانبهه واجه اليوم وافتهمت بيهه تطلگت بيومهه فرحتي كبرت وصار عندي امل بشي صح مستحيل وبعيد عن عاداتنه بَـس مايهم الاحلام ما تضر اهم شي ما تأذي احد بَـس رجعت اندگرت من شفتهه راجعتلو قبل يومين من موتت مرتضى..

كرهتهاا بالمعنى الحرفي تمنيت اموتهه بأيدي ردت اكتلهه واتعارك شلون تشكيلي منّو وانا وعدتهه ارجعلهه بنتهه وهيه ضربت كله هذا بعرض الحايط ورجعتلو..

گوة گظبت روحي وهديت بالي وگلت خلص انتهى الموضوع أنَا الغلطان من البدايه عشمت روحي بوهم وردت اساعد انسانه ماتريد تساعد نفسهه..

قررت انسى كلشي لان رجعت لأخوي وانساهه وابتعد وارجع رجال غريب بالنسبه الهه وهم رجعت للانبار وخالي عرض عليه بنتو "هاديه" وگلتلو انو أنَا مامستعد للزواج بالوقت الحالي وهو اتفهم الموضوع..

رجعت غريب مثل ما اجيت تا اكمل امتحاناتي بَـس هجران عذبتني هواي كانت كل صغيره وكبيره تجي تگولي وانا اتغاضى عنهه واتحاشاها ماريد اعيد نفس الغلط وهيه مرتو لأخوي..

صارت مواقف ثبتتلي هيه لسه تريدو لبكر واكبر دليل باليوم الگالتي تحلم بي ضجت كثير لان اعرف مشاعر بكر تجاهها واكثر من مرة يگولهه بوجهي انو مايريدهه مايتشرف بمره نفسها وحاطهه عندو بَـس تا تربي بنتو ويلعب وباهه بوكت ضوجتو..

تعاركت وياه كم مرة وهوه يتعمد يحكي عليهه گدامي وگدامو لعميد الدين حتى يحرگ دمنه ويخلينه نتعارك وياه، بكر من قبل كنت اگولهه انو مريض نفسي وهوايته بالحياة اللعب والاستهتار واكثر من مرة اگولهه بوجهو ويأيد كلامي ولا كأن هنتو..

من مات تأذيت كثير وتندمت ؏ خلافنه احنه اخوه وعمرو الاظفر مايطلع من اللحم، ونويت اعوضو واهديلو هواي اشياء اسويهه نيابه عن روحو عسى ربي يسامحو..

وره ما مات بكر بفتره مو قليله وسمعت ابوي يريد ياخذ زينب والطامه العظمى يريد يزوج هجران لـ غيث وعرضها عليه ووافق..

كانت صدمة حيااتي تهسترت وصيحت وتعاركت شلوون يريد يزوجها لأنسان نفس غيث شنو هالظلم بحقها هالبنت شگد حظهه نحسس ومعثور، عميد الدين تدخل وعرفتو مراح يرضى بهيك موضوع ووگف ابوي عند حدو وگال أي واحد ثاني يعقد عليهه والصدمه من احمد أشر عليّ وگال...

-احمد: بويه عُثمان ياخذهه هو عزابي وماعنده مره ولا فريخات ويكدر يشيل مسؤلية بنيت بكر ومريته

اللتفتو يدحگولي وغيث صاح...

-هاااي شمالكممم مو ابوووي عرضهه علييييّ

-خليل: انطمم انته اوگفو خلونه نفتهم عُثمان انته ماتعارض تتزوج مرت اخوك؟

-غيث: بوووويه واااانه شنهييي

-خليل: انطم طمك الله انته بيك خييير حافظ ؏ نسوانك الطلگتهن ويوميه من بت لبت ثانيه

-عميد الدين: چا عمي شكو من الاول تسأله اذا تعرفه موش كفو

-خليل: غير انتمم كلمن صااح مو انه اخذهه وعثمان عبالي مايرضى يتزوج وادري بي خاطب بت خاله

-عميد الدين: بَـس لسه ما حچة بيهه لو حچيت بيهه عُثمان؟؟

-عُثمان: لاء

-عميد الدين: هااا اهااا خوي ترضى تعقد ؏ البنت؟؟

اخذتني الجمدة ماعرف شصابني، لثواني فكرت أنَا اگدر اتزوج هجران؟ ايي أنَا مو اتمنى مرة نفسها وفرحت من تطلگت من بكر ليش هسة احس روحي متردد وماريد اتزوجها؟؟

-غيث: عاينوله ساااكت يعني مايريد يتزوج

-حجية عطيه: انطممم گال ابوووك حسك لا نهيسه

-خليل: عُثمان هااا بويه شتگول؟؟

-عُثمان: مادري انطوني مجال افكر بالموضوع

-خليل: بويه هيه شيرادلهه شنهي هسّ شكو

-حجية عطيه: بسك خليل لا توهدن الوليد روح يمه عثيمن فكر ودوشمهه بعگلك واذا ماردتهه مو بلازم عميّيد ياخذهه

فتح عيونو عميد الدين وراد يحكي وجده صاحت...

-حجية عطيه: اسسس انته هم يله چا شنهي هيه حُرمة يرادلهه كل هذا من فلك فلكم

ضحكت عليه وع عيونو وخزرني بقوه بمعنى تزوجهه غصباً عليك، اخذتلي عشرين يوم افكر وجده تنوح ؏ راسي تريد تزوجهه لعميد الدين وخلت جواهر تتخبل وحتى بكي بكت بَـس طمنتهه انو عميد مايتزوج عليهه لو يعدمو لان رح يتخبل من البُعد..

وبيوم أنَا نايم واجت جدة ؏ راسي..

-حجية عطيه: حبوبه عثيمن اصحى ولك اصحىى دهر صابك

-عُثمان: ها جده صحيت شَنو صايرلِك شي؟

-حجية عطيه: ولك معثور شنهي انته ماتريد تزوج هجران ولك يمه وين تلگه نفس طينتهه خاب البت ذهب مصفي وابو فاضل لو ماتزوجتهه انته اثول

-جده أنَا مو ماريد البنت بَـس الموضوع احسو غريب وبيني وبينِك أنَا من قبل اتمنى اتزوج بنت نفس هجران ونفس طيبة گلبهه

-چا شكو بعد يله امشي نروح نحچي بيهه

-جدة شبيكي ؏ كيفِك شَنو هسة نروح؟

-اييي ولك گووم فتيت افادي

خلتني اگوم وابدل وراحت صاحت لأبوي وعميد الدين وطلعنه لكربلاء بَـس عندي شك انو هجران رح ترفضني ومو بَـس شك وانما يقين انو رح ترفض..

وصلنه لبيتهم وصار مصايح وانا ماحكيت كلمه لان الي گعد يسوو احسو اكبر غلط واجانه الخبر انو هجران تنازلت عن زنايب وهينا كانت المفاجئه، ابد ما شكيت انو تتنازل بهالسهوله..

طلعنه نجيبهه من الروضه واجت ويانه والطريق كلو تسأل ؏ امهه وصارت تبكي تريدهه، كسرتو لگلبي وهيه تنوح وتگول..

-زينب: بابه الليد ماما وينهه هجلان

-عُثمان: بابه ميخالف بعدين نشوفهه حبيبتي

-زينب: اليدهه اني الليدهه

ورجعت تبكي بصوت عالي، حاولت اسكتهه وانطيتهه حلاوة وماترضى تريد امهه واستمر الحال كل يوم تسأل عن امهه ومن تتصل بيهه تگظي الاتصال كلو بكي هيه من صوب وامهه من الصوب الثاني..

ومر شهر ضبط زنايب بعيده عن هجران وتخايلت رح احب الوضع انو زينب تعيش عدنه بَـس كرهتو وحياتي صارت سوده وانا اشوف هالطفله تبكي ليل نهار ومانست امهه ولا شوي، رغم صغرهه ظنينه يوم يومين وتنساهه بَـس ظلت مُصرة تريدهه..

شيبتو لگلبي وهيه تنوح ومن القهر تا صارت غزاله تبكي وياهه ؏ حياتهه التعيسه، استقريت هنيك ببيت عميدي لخاطر زنايب وبنهار من النهارات أنَا وزينب طالعين اشتريلهه موطه واجاني اتصال..

رفعت موبايلي اشوفو واذا كانت هجران، جاوبتهه بسرعه واجاني صوت البكي مالتهه تبكي بحرگه وتشاهگ، صحت...

-هجران شبيكييي تبكييين شصااير؟؟؟

جاوبتني بجواب ماتوقعت رح يجي يوم وتگولو لو تطلبو مني بهالطريقه، گالت بالضبط وهيه لسه تشهگ...

-هجران: عُثمان اني موافقه

♛ ♛ ♛ ♛ ♛ ♛ ♛ ♛ ♛ ♛
لتنسون التعليق بين الفقرات والتصوييييت🙈💘.
شباباتي بالنسبه لحسابي الانستا شفت كومة تعليقات يردو لان انزل تغشوشات هناك😉
الرابط بصفحتي وهذا اليوزر اذا تحبون zllp.y

احبكم وااايد واايد💘.