شفاه مخملية الفصل التاسع وأربعون 49 - بقلم 𝐙 𝐇 𝐑 𝐀

♛ ♛ ♛ ♛ ♛ ♛ ♛ ♛ ♛ ♛

اسفه ؏ التأخير شبابات، جماعة الانستا يعرفون ظروفي وحچيتلهم♥️.

"شفاه مخملية" 💋

بقلم: زهراء السلامي.

#‏سَواد عَيونِج اليَگتل جَرة كحلِتج بَلوة
دَخيل الله شَگثِر حَلوة ؟

♛ ♛ ♛ ♛ ♛ ♛ ♛ ♛ ♛ ♛

-هجران كافي بچي لخاطر الله ماتعبتي صارلچ شهر تدگين وتلطمين عليهه

جاوبتني وهيه تمسح دموعهه بردن الدشداشه..

-اسكتي جوري

-جوري: عبالي رح تفرحيلي من اجيب ونتونس سوه بَـس شو گظيتي الايام كلهه بچي

-شلون تردين اتونس وبنتي بعيده عني سوده بوجهي ؏ هالعمله شلون انطيهه هيچ لچ اني شنو من ام لخاطر الله

-انتي من احسن الامهات تدرين!! اني لو بمكانچ وفيصل يعاملني نفس ما بكر يعاملچ چان من زمااان هجيت

-لا جوري متهجبن وتتحملين لخاطر جهالچ، چؤؤ كاافيي ماتحمل بعد اسمع شي

غطت وجهها بثنين ايديهه ونزلت راسهه، مبين عليهه داخت من البچي ولا اكل ولا شرب، وخرت بنتي مريم من صدري ماصارلي عشرين يوم من جبت وگظيت هالايام كلهه ويه هجران وهيه بالضيم سوده عليه..

گمت اسويلهه عصير وندى ماقبلت اخذت المعصارة من ايدي ورجعتلهه للغرفه..

-هجران شنو هبوط عندچ صار؟

هزت راسهه بـ "اي" وظلت مدنگه، جابت ندى العصير وگعدت ويانه واجت امي..

-صباح: بنتي كافي مو زين هيچ ابوچ مو گال لتسوين شي انتي متردي ويحاول يرجع زينب

-هجران: ميرجعوهه والله اعرفهم

-ندى: هجران ترى عُثمان خوش رجال متأكدة رح تنسعدين وياه

رفعت راسهه تباوعلنه ورجعت دنگت وصفنت بالگاع، مبين الحيره والتيه عليهه احسهه متعرف شتسوي ومن گد ما طگت روحهه اتصلت بعثمان وگلتله موافقه وهوه گللهه يومين ويجي حتى يعقدون..

ثاني يوم گظته هجران وجهها اصفر وتتراجف عبالك ماخذيهه للموت..

-جوري: هجور امشي للصالون

خزرتني بقوه ونترت..

-شصخم بالصاالوون

-ندى: لعد ترحين هيچ للرجاال تخرعين لا حفافه لا ترتيب انتي شبييچ من اول يوم تردين تهججي

-هجران: ميهمني هوه الخطبني ولازم يتحمل

-جوري: تنچبين وتجين للصالون ويايه لو اطيح حظچ!! مسويه منيه ؏ الرجااال لچ هااي اول فرحته هوه عزاابي بعني انتي اول مرة بحياته يا عووبه فتحي دماغچ وفكري عددل لاازم تكسبي من اول يوم حتى يظل الچ ذخر وسندد

-هجران: الله وبابا واخواني سندي ماحتاج غيرهم

-ندى: ولكم اني هاي اريد ارفس ببطنهه والله

-جوري: معليچ بيهه ختولي غصباً ما ؏ راسهه ناخذهه

گووة بطلاع الروح وبچي ومعانده ولوما امي صايحه بيهه چان ما اجتي، اخذتهه للصالون وحفولهه وسوولهه تنظيف بشره وگلتلهه تغير لون شعرهه بَـس مقبلت..

طلعنه وبوجهنه للسناتر امي اخذتنه حتى تشتريلهه كم قطعه، تروح ؏ وين ماكو اسود تاخذه وامي تصيح بيهه..

-هجران: بعدهه ماطلعت سنوية بكر مااماا شبيكمم

-جوري: هسة شلون تخليني احچي حچايه شكبرهه

-صباح: خلص عوفيهه ؏ راحتهه بَـس اخذي فد شي مرتب مو خرگ

-هجران: خووووش

-ندى: وهووش يثرد بمصارينچ ان شالله گبووور مو شكول يخطبهه رجال معدل وبي خير تركض وره الساقطين والسرسريه

خزرتهه قوي وماما گرصت ندى حتى تسكت، اشترينالهه كم قطعه مرتبه واكيد كله اسود بَـس الربطات اخذتلهه اسود وبيهن لون ثاني..

رجعنه للبيت واستلمناهه ننظف بجسمهه وماسكات وسوالف وهيه بَـس تبچي طگ گلبي والله..

-جوري: كاااافييييي بَـس تبچين كااافيييي

-هجران: ماگدر اتخيل جوري احس نفسي تگلب كلما اتخيل عُثمان يتقربلي

-ندى بشهگة: تلعبببب نفسسسچ من عثمااااااان

-هجران: لا يا عوبه وشكو تلعب نفسي بَـس الفكرة تخوف هوه حمايه وچنت اشوفه مثل فاضل يعني كـ اخ

-جوري: بَـس طلعي هالفكرة من بالچ وحاولي تتقبلي وع كيفچ ويه روحچ كافي تعبتي وحتى وجهچ انلعب بي طوبه من القهر والحزن

مسحت دموعهه وسكتت، ثاني يوم گعدنه ؏ صياح امي..

-صباح: ولچننن گوووومن الزلممم بالطرييييق جايين حتى نروح للعباس تعقدووون

طفرت هجران من الفراش وظلت واگفه وصاكة بمكانهه، وجهها صار اخضر مو اصفر من الخوف والقلق..

اخذتلهه صفنه خمس دقايق وبعدين راحت تسبح وبدلت ملابسهه وگوة حصرتهه وحطيتلهه مكياج خفيف، ادري رح تمسحه من توصل للامام لان ممنوع وحده متمكيجة هناك بَـس ؏ الاقل يشوفهه حلوة..

كملت كلشي ولبستهه الربطه ؏ الطريقه التركيه فدووه شگد طلعت حلووة وهيه بَـس تعيب ومعاجبهه شي..

بعدنه بالغرفه وانفتحت الباب علينه وچانت زنوبه، ماده راسهه من الباب وتضحك، هجران دفعتني حيل وركضت عليهه تحضن وتبوس وتبچي وتشهگ وانوب زينب شافتهه هيچ واتخبلت الطفله، بطلاع الروح سكتتهه وكملت لبسهه وطلعنه كلنه للصاله..

چانو سيد خليل وعثمان واحمد وحجية عطية جايين بَـس عميد الدين ماكو، سلمت عليهم بَـس هجران طبت ساكته وعيونهه بالگاع، جاوب السلام عُثمان بعدما خطف نظره منهه وگام وگال...

-عُثمان: يله نتوكل؟

-سيد فارس: يله يا الله

طلعنه كلنه وعفنه الجهال ويه ندى همزين مريم بعدهه نايمه رضعتهه وحظرت المميه مالتهه وگلت لحيدر هم يبقه وياهم خاف متگدر ندى وحدهه، اسحل بهجران سحل والدمعه شويه وتطفر من عينهه، وصلنه لأبو فاضل سلام الله عليه وطببونه بغرفه صايره بنص اللواوين..

چان اكو شيخ گاعد ووياه رجال لازم دفتر بيده وقلم، اول ما طبينه وسأل ؏ اسمائهم وگال تفضلو..

بدو عقد القران وهجران ايدهه مدا تثبت من الرجيف وعثمان هم مبين عليه متوتر ويتصبب عرق من گصته، سأل الشيخ هجران وجاوبته بصوت يرجف مبين گوة حاصره الدمعه لدرجة خلت الشيخ يرفع راسه يشوف شنو السالفه، انوب اندار ؏ عُثمان وهم سأله وتم عقدهم بسلام..

باركتلهه وبوستهه وهيه وجهها ميگصه الطبر مطنگرة ومتتحچة وباركنه لعثمان وهوه يجاوبنه بأبتسامه عذبه تبرز نصاعه اسنانه..

زرنه وصلينه الظهر بالعباس وطلعنه، بابا سأل ؏ عميد الدين بَـس گالو عنده گعدة كُلش مهمة بالنجف وراد يعوفهه ويحظر العقد بَـس عُثمان ماقبل..

رجعنه للبيت وحظرنه الغده وهجران حاطه زنوبه بحضنهه ويسولفن، ماكو شي ماسألت زنايب حتى شوكت تنام وشوكت تگعد وشتآكل ومنو يغسللهه كله تسأل وزينب تجاوب بكل برائه..

گعدنه حول السفره نآكُل وانتبهت عُثمان عيونه بالماعون الگدامه ما شالهن بَـس انتبهت ؏ اختي الشيطانه تباوعله كل شويه، ضحكت بخبث ونغزتهه بعكسي...

-جوري: عيوونچ اكلت الرجاال

باوعتلي بنظرة جامده وهمست..

-هجران: تحسي معاجبه صح؟؟

-جوري: لا ليش هيچ تگولين؟

-هجران: دباوعي ساكت وميحچي

-جوري: هوه من اول هادئ

هزت راسهه وسكتت، كملنه الغده ورحنه نغسل مواعين وبعدين سوينه الچاي وگعدت اسولف وياهه اني وندى...

-ندى: هجران اليووم ترحعين ويه عُثمان للناصريه؟

حركت چتافهه بمعنى ماعرف..

-جوري: اكييد لعد شلون مو رجلهه لازم ترجع وياه

استمر حديثنه لحدما أذن المغرب، گمنه نصلي وانوب سوينه العشى ومشى الوقت ومحسينه بشي لحدما اجتنه زينب تگول سيد خليل يريد يرجع..

-هجران: يمممممه لاا فدووه لااا جووري ساعديني شسووي

-جوري: صخاام شتسوين رجعي وياه واوصلو لبيتكم ولغرفتكم بدلي ملابسچ ولبسي فد سيت نرم مرتب واهم شي مشلتح بعدين تنزعـ....

-هجران بعيطه: ووجععععع اقصد ماريد ارجعع اليووم

-ندى: هلووو مو هوه بكيفچ

-هجران: لا حبابات لاا اوگفو احچي ويه عُثمان

گعدت بالگاع وتربعت وجرت موبايلهه، بعدهه ما دگت واجت ماما تگوللهه تتحظر انوب صارت تبچي هاي الثوله..

-ندى: امداني اني يزفوني لهيچ رجال وابچي طاح حظي اي والله

خزرتهه حتى تسكت، ادري صعبه وادري مو سهل تتقبل الموضوع والله يساعدهه بَـس احسن مما تظل مكسورة الجناح ومحد يهتملهه، عسى ربي يلين گلب عُثمان عليهه ويگوم يحبهه ويتمناهه ياارب هالبنيه تعبت ومابيهه كسرات وطعنات بعد..

دگت عليه وهيه لسه تبچي، مبين جاوبهه لان حچت ملهوفة بصوت مبحوح مصحوب برجفة..

-هجران: عُثمان حَ نرجع؟

سكتت شويه وگالت ببچي...

-لا حباب عليك الله مو اليوم ارجع حبااب عُثمان شوف.. هااا؟؟ اي خوش ايي اقبل ايي ايي حبااب الله يوفقك ويحفظك ايي ماشي يله باي

سدت الخط والابتسامه مرسومه ؏ وجهها وتمسح بدموعهه بأصابيع ايدهه، اللتمينه حواليهه وامي سألت...

-ها شگال؟

رفعت راسهه وباوعتلنه بقلق ممزوج بفرحة...

-گال اذا اريد منرجع اليوم ونبات بفندق بَـس شسوي يعني رح نظل وحدنه بالفندق مو؟؟

-ندى: لااا خلي امي تجي وياچ تنام بنصكم حتى اذا راد يسوي شي مناا لو منااك امي تكسر ايده

تحچي وتغمز وتضحك، هجران گلبت وجهها ورجعت گعدت ؏ الچربايه وصفنت...

-جوري: شوكت گال ترحون؟

-هجران: هسة گال يريد يطلع لان كُلش تعبان

-ندى: لعد گومييي بدلي شو گاعدده

-صباح: گومي بنتي بدلي ومعليچ بزينب يمي تظل

طفرت من مكانهه وفتحت عيونهه وصاحت...

-شنوووو ما اخذذذ زينببب؟؟؟!!!

-صباح: طبعاً متاخذيهه هاي هم ينرادلهه

-هجران: مااا مااا مستحيل ماگدر ماما حبااابه

-صباح بنتر: كافيي هجراان مصختيهه امشي بدلي رجلچ منتظرچ لتضوجي

من شافت امي حادة وياهه سُكتت وماحچت بعد، طلعت من الغرفه وراحت للحمام تسبح واني سألت امي..

-جوري: ماماتي ليش حچيتي وياهه هيچ خطيه

-صباح: اختچ فاهيه ومتفتهم وشوفي شگدما الرجال زين اخذهه ؏ هواها وگال نظل هنا بفندق واهله يرجعون يعني وين تلگه هيج واحد يخاف عليهه وع مشاعرهه هاي ليش تريد تدفر النعمه برجليهه وتخلي يبزع منهه وحتى ميحترمهه بعد!!

-ندى: ماشي هسة عوفينه من هجران ماما شصار ؏ الولد الخطبني

كفختهه امي ؏ راسهه وهيه سُكتت، رحت لبنتي ارضعهه ونمت وياهه من التعب..

**

"هجران"
اگدر اگول اليوم اسوء يوم بحياتي، شگد مريت بصعوبات وتمرمرت بحياتي بَـس مثل صعوبه هاليوم ما صار..

طلعت وياه واني منزلة راسي وماحچيت شي وهوه كذلك ما گال شي الطريق كله، رحنه لفندق اسمه البارون، دخلت للفندق وچان خياال يجننن، اني سامعه بي وفاضل گال بالجديد مفتتحي هذا الفندق وصاحب الفندق مو عراقي..

حجزنه غرفه واخذنه المفاتيح، عبرت الممر واحس الوقت وگف، كأن صارلي ساعاات امشي، تعبت ورجليه ثگلن، حتى نفسي تقطّع وصرت گوة اجر النفس، بطني خبطت وعيوني غورگن من فتح باب الغرفه وگال...

-عُثمان: تفضلي

دخلت قبله وهوه دخل وقفل الباب فوراً، بوجهه راح للحمام وسمعت صوت الدوش مبين ديسبح واني استغليت الفرصه وگعدت ؏ الكرسي اجر نفس..

نزلن دموعي واني اتذكر ليلة عرسي من اخو وشلون چانت الاجواء والفرحة الحسيت بيهه ولهفتي اله ماگدر اوصفهه، نفضت الذكرى من بالي وگمت نزعت عبايتي وترددت انزع شالي لو لا بَـس شنو الفائده ورايه ورايه السالفه خليني انزع هسة بأرادتي احسن مما انغصب ؏ فد شي..

نزعت الربطه وعفت شعري مثل ماهوه شايلته بقراصه وصاير يشبه الطوبه، رحت للمرايه واذا اشوف الكحلة سايله چني باندا، مسحتهه بسرعه وانفتحت باب الحمام وطلع وصاحبهُ البخار الطلع من الحمام..

چان لاف منشفتين ؏ جسمه وحده ؏ خصره والثانيه ؏ صدره ولازم طرف منهه ينشف شعره، اگدر اشوفه من المرايه وشنو الي ديسوي بالضبط..

اخذ الملابس الاجه بيهن ورجع للحمام وطلع لابسهن ولسه ينشف بشعره واول جملة صدرت منه هيه..

-شَنو تفضلينو للعشى؟

هزيت راسي وهمست...

-ماشتهي

-عُثمان: ليش؟

-اكلت كيكة ويه زنوبه من چنه بالبيت

-عُثمان: ممم

رجع التلفون وراح ؏ السرير تمدد واني صافنه عليه، غطه عيونه بذراعه ورخى اطرافه، باوعت ؏ الساعه چانت بالـ 11 هستوهه..

رحت اگعد ؏ الكرسي وحاطه ايدي ؏ گلبي خاف يصيحلي، مر وقت لا بأس به ودرت وجهي اباوعله چان گالب ؏ صفحته اليسره ومبين نام، قررت انام لان صدُك تعبنه اليوم واني صارلي 3 ايام منايمه والارهاق ماخذ من حيلي حصة..

تمنيت اكو قنفة بالغرفه وانام عليهه بَـس للاسف اكو كرسيين فقط والتعب الي اني بي مو مال انام نومة مرعبله..

تقدمت ؏ السرير امشي ؏ اطراف اصابعي، تابعته اذا نايم لو لا بَـس چان هاادئ كُلش يعني مال واحد نايم او يجوز يمثل النوم..

نمت بطرف السرير وهوه بالطرف الثاني وانطيته ظهري، صرت الوب ماعرف انام ؏ صفحتي اليسره اله اليمنه واذا انام ؏ اليمنه حنصير وجه بوجه..

عالجت هواي وظليت مُصرّة مانطي وجهي بَـس بالنهاية استسلمت ودرته، صرت اشوف وجهه لان فاتحه تيبل لاب اخاف اسويهه ظلمه لا يروح يسوي شي غفله وتكون ردة فعلي قويه..

غمضت عيوني وماحسيت اله الصبح وهوه ؏ نفس نومته بَـس اني شويه متدنيه عليه، گمزت من مكاني وفكرت خاف طخيته بالليل لو ضوجته واني محاسه..

رحت بسرعه للحمام وفرشت اسناني ومشطت، طلعت وشفته واگف وبيده المحفظه من شافني ابتسم وگال..

-صباح الخير

-صباح النور

-شلون نمتي؟

-زين

هز راسه وراح للحمام، شويه وطلع نشف وجهه وگال بضحكة...

-امس خليتيني انام وبطني تصوصي يولي

ضحكت ؏ حچايته وگلت خجلانه..

-اني شعليه انته نمت بسرعه و...

بلعت الحچايه وسكتت صخام بوجهي خاف هسة يفتهم غير شي بَـس چنه فهم قصدي ورجع جاوبني..

-دحگي كنت كثير جوعان وتعبان بنفس الوقت فَـہ گلتو خلص خليني انام وانسى الجوع

هزيت براسي وگلي لبسي حتى نطلع نتريگ، كملت كلشي وبعدنه هستونه دنطلع من الغرفه وبابا اتصل گال ريوگكم يمنه..

طلعنه بوجهنه لبيت اهلي تريگنه وعثمان گال نطلع نزور وناخذ زنايب، بدلت ملابسي وبدلت لزنوبه ورحنه للحظرة، گعدنه باللواوين وزينب گدامنه تطفر وتلعب واحنه نباوعلهه..

قريت الزيارة وعثمان جر نفس عميق وگال...

-عُثمان: احبو لهلمكان واحب اجوائو

-هجران: بابا نفسك كلما يضوج لو يحس بضيق يجي هنا للامام الحُسين ويشكيله همه يگول احس كل التعب والالم يروح من عندي

اللتفت عليه يباوعلي وفتح عيونه، حچه بحماس...

-صحح أنَا هم هيك حسيت اول ما زرت، أنَا اول مرة ازور كربلاء بيوم الجبتِك زعلانه

-صدُك تحچي؟؟

-والحمزة

-زين ليش مچنت تجي من قبل؟

-ماعرف

-يله هسة خو اجيت ومبين حبيت الاوضاع

ابتسم وهز براسه اي، رجعنه نباوع لزنوبه الي حطت بالهه وبال طفله صغيره وكل شويه تروح تريد تبوسهه لو تحضنهه وعثمان يگوم يجيبهه يگعدهه بحضنه وهم ترجع، لحدما مَل وخلاهه بحضنه مقبل تگوم، فطستني ضحك من عگدت حواجبهه مطنگره وگالت لعثمان...

-زينب: ماهبك

-عُثمان: لااا صدك والله بابا ماتهبيني (ماتحبيني)؟

هزت راسهه وگالبه وجهها، هوه ضحك بخبث وگال...

-عُثمان: هجران خلص زنايب ماتحبني فَـہ انتي رح احكيلك القصص بالليل بعد هيه ماتريدني وانا ماريدهه

باوعتله وعيونهه مركزه عليه متفاجئه وهوه كمل...

-ورح اشتريلِك مصاص وچبس ونساتل وعصاير وكل يوم افرِك بالسيارة واخذ رهوفة وئلاوي ومريومه الصغيره وزنايب شحايتي بيهه (معليه بيهه)

-زينب: لاااااااء

-عُثمان: اييييي

-زينب: لااااء بااابه اهبكككك

-عُثمان: لااا أنَا ماهبك

-زينب: ماامااا گوليله اهبكككك

-هجران: زينب صوتچ شبيچ

صارت تبچي وعثمان يضحك عليهه ويغمزلي ويهمس...

-عُثمان: دحگي الدلع دحگيلو

-هجران: هههه عثماان خلص عوفهه

-عُثمان: شبيكي احنه كل يوم هيك

-هجران: چذااب هههه

-والحمزة خو عميدي تاكل راسو اذا ماجابلهه مصاصه وتركض وراه وين ماتشوفو وتگولو أنَا ماهبك ههههه

-هههه لچ ماما انتي منين متعلمه هالسوالف

تباوعلي مغضبه وعافسه ارنبه خشمهه ضايجة عود، طلعنه من الامام وعثمان راضاهه اشترالهه نميات بَـس گال وره الغده تاكلين وهيه كيفت..

رحنه نتغده بمطعم وزينب بهذلتني بَـس تبچي ومعاجبهه ومتنحسه ماعرف شبيهه..

-هجران: خبلتينيي لچ بنتي شبيييچ

-عُثمان: خليهه

شالهه وگام يفتر بيهه وهيه تبچي وتدفر برجليهه، هسة ليش هيچ تتصرف ماعرف اني گلت من تكبر تتغير وتبطل نحوسيه بَـس شو زادت..

رجع بيهه وهيه ساكته، انطانياهه وگال...

-عُثمان: گظبيهه مصخنه

-هجران: چذبب هاي لييش

لزمت جسمهه صدُك حارة، طلعنه بسرعه للصيدليه واشتريتلهه خافض حرارة، انطيتهه وگلت لـ عُثمان بَـس ناخذ غراضي من بيت اهلي ونطلع للناصريه حتى زينب تنام بالطريق..

كملت كلشي وطلعنه بوجهنا للناصريه واني حاطه ايدي ؏ گلبي ماعرف شنو حَ يواجهني وشنو العيشه المنتظرتني وشلون رح اتأقلم ويه اخو رجلي وهم رح اعاني واتبهذل مثل قبل لو اكو شي رح يتغير؟؟

**

مادري اروح اشوفه؟؟ اووف مشتاقتله مووت.. نزلت الدرج مثل الفارة اخاف احد يحس عليّ وانفضح..

تقربت ؏ باب الديوانيه چانت مردودة اهوو شلون افتحهه هسّ انه؟!! حظييي ادري بحظي العكرة ماراح اشوفنه اليوم.. انتظر هاليوم ؏ نار تالي من يجي ما احصل شي يرجع لمرته السوسة ولا چنهم تعاركو وتصاخمو ووصلت عركتهم للستار..

تصنطت ماكو صوت اخاف نايم، فتحت الباب ؏ كييييف ومديت راسي.. چانت الديوانية فارغة بَـس ملابسه مشمورة ؏ الجلسة العربية.. نزيت من شفته يطلع من الكليدور مجرد من كل الملابس بَـس منشفه بيضه لافهه ؏ خصره..

جفل من شافني صفن عليّ وانه تنحرت چني مطي.. ابتسم خفيف وگال بقلق...

-محتاجة شي غزاله؟

اخذتني الجمدة شمالي ما احجي صخام الصخم وجهج غزاله ؏ هالعملة لو يجون اخوانج يمرعوچ وعلي، تقدم ع الجلسة وسحب قميصه لبسه بساع وهوه يباوعلي بحيرة.. لملمت هالچم حچاية المتبعثرة بلساني وگلت...

-ءء انه اجيت.. ءء اريدن ءء

ضحك خفيف، ومسح وجهه...

-شتردين باباتي؟

خدرت من گال باباتي اوووف هالچلمة وين توديني، رجعت لوعيي من تقرب عليّ وگال بحنية...

-شمالچ يروحي محتاجة شي؟

لاا هذا يريد يجيب نهايتي اليوم، عگد حواجبه من شافني صافنه...

-شمالچ غزل؟

-ءء اريدن تدرسني

-اخيراً نويتي ترجعين للمدرسة؟

-احم.. اي

-تمام.. چا وين كتابچ؟

-هاا؟؟

-ههههه غزالة وين كتابچ؟

-شني؟

تقدم عليه، حط عينه بعيني وهمس بكلمات متقطعه...

-كـ..تـ..ا..ـبـ..ـچ و..ـيـ..ـن؟؟

برطمت شفافي دوم اخجل روحي وياه، هستوني جاي اكله اريد اشوفك الك شصخم بالدراسة بَـس اجه صوت رجولي قوي من ورانه نززنه ثنينه...

-شجاي يصير هناا؟؟؟؟

-عميد الدين: عمي هاي غزاله تريدني اقريهه

-سيد خليل: شيقريچ ولچ؟؟

-اءء بابا اءء شوف هاي انه چنت افكر ورهف قنعتني ارد ادرس

صفن ابوي بوجهي وعميد لسه ؏ وگفته وعاگد حاجبه، نتر بيه..

-سيد خليل: امشي ولي موش وكتهه هسّ خلي الزلمة بحاله خلي يرتاح لا تظلين تنگين براسه

هزيت راسي بـ "اي" وطلعت وظليت اتسمع لحچيهم...

-عميد الدين: عمي خطيه شمالك وياهه

-سيد خليل: خليهه تتعلم وانته سيد لا تنطيهه مجال زايد

-عميد الدين: شني السالفه موش مرت اخوي الله يرحمه واكثر من هذا انه الربيتهه وبحسبة رهوفه

-سيد خليل: تظل تتنعوص وتضوجك عاد رهف انته تستحملهه هيه بنيتك بَـس غزاله موش لازم تتحمل

ظل عميد يحچي وابوي ساكت، نزلت راسي مكسوره عميد مايدري انه بعدني اعشگه واتمناه، ومن شاف حالتي وكسرتي من راح مرتضى عباله انه احبن مرتضى وتعلگت بي مايدري انوح ؏ حظي المعثور وهوه ظل يعاملني مثل رهف وما فرگ بيناتنه حتى گبل چم يوم سوده عليه اشترى لرهوفة ملابس وجابلي حصتي..

شكثر حاولت شكثر فكرت وگلت مايصير ومايصلح بَـس الگلب من يهوى صعب يكره..

-سيد خليل: هسّ عوفك منهه تعال عُثمان ماخابرك؟

-عميد: هههه عمي ادري بيك بالك وياه

-لااع شني بالي وياه انه شعليّ بي

-عميد: چا غير وليدك

-خليل: عميد الدين مايهمني وليد كتل امه

-عميد: وتالي عمي شني رح تظل هيچ وياه ترا الزلمة ماله خص امه هذا يومهه وأي ام تسوي نفس سوايت ام بكر الله يرحمهم

-خليل: بسك انسى السالفه يلا اخذ راحتك

ركضت بساع وختلت وره البوفيه خاف يشوفني ويگول ليش تسنطيلنه، شفته راح لغرفته وسد الباب وانه طلعت..

رجعت دگيت الباب ؏ عميد الدين چان لابس كل ملابسه، من شافني ابتسم وگال...

-هم اجت وكتابهه مو بيدهه

تگربت عليه وگلت..

-بابا انه بعدني ماسجلت وچذبت من گلت اريدك تدرسني

-وليش تچذبين؟

-غزاله: انه جاي افكر اقدم خارجي خاطر بَـس انجح من السادس واداوم مثل رهف جامعه واجيت اخذ رأيك، انته ابوي الربيتني وما امشي برأي أي بشر غيرك

-عميد الدين: بابا براحتچ واذا تردين اسويلچ المعامله واقدملچ من هاي العين گبل هاي العين تدللين بنيتي چم غزاله عندي انه

ابتسمت وهزيتله راسي، ردت اطلع من الديوانيه وصاحلي...

-غزاله: نعم باباتي؟

-عميد الدين: جواهر صاحيه؟

-اي

-شني جاي تسوي؟

-جاي تبچي

جحظ عينه وسأل ملهوف...

-تبچي؟؟؟ شمالهه لييش؟؟؟

-غزاله: مادري والله

هز راسه وطلع من الديوانيه وچفت ؏ باب غرفتهم فتحهه بدون مايدگ، چانت جواهر گاعده ؏ القريوله ومتربعه وفاتحة شعرهه فارگته نصين وتبچي، من عاينتلنه طبينه باوعتله وخشمهه صاير احمر وخدودهه هم..

-عميد الدين: ولچ شمالچ ليش تبچين؟؟؟

-جواهر: ليش اجيت

-عميد: لا تخبليني شني شماالچ؟؟ شني اكو شي يوجعچ احد مزعلچ؟؟؟ ابوچ صابه شيي شنيي شصايرر؟؟؟؟

مسحت دموعهه وبرزت شفتهه السفليه وگالت بطفوليه...

-جواهر: بابا مبي شي يعني نفس حالته دياخذ العلاج وبعده مسافر، بَـس دا ابچي لان شعري مدا يتمشط وجزعت منه

فتحنه عيونه متفاجئين وهيه تعاينلنه ومبحلقه عيونهه الخضر الكبار علينه، من بعد صفنه دامت لثواني عميد ضحك خفيف وهمس...

-عميد الدين: اشتعلو مروان وخلفته

-جواهر: هاي ليش تضحك؟؟ شنو تشوفني ابچي وانته تضحك؟!!

-عميد الدين: هههههه والعباس مسودنه

-جواهر: رووح عميد لمرتك معليك بيه

-عميد: انتي لوتيه؟

-جواهر: لاااء انته اللوتي (طلعت غزاله وبقه وحده بالغرفه، تقدم عليه مظيگ عيونه ويباوعلي بخبث، عدلت گعدتي وگلت...

-خير؟؟ اكو شي؟؟؟

-عميد: اشتعلو عشيرتي اروح حلوة ارجع اللگاهه احلى

گمت ؏ حيلي وتخوصرت..

-جواهر: والله يا حبيبي شسوي هذا وجهي والله يريد يسويني حلوة يعني شلوون عندك اعتراض ؏ حكم الله؟!!!

-لا لا لا استغفر الله

تقدم اكثر واخذ المشط وگال..

-تعاي

-شنو؟

-تعاي امشطلچ

-ماا ماريييد روح مشط لـ سُهى

-ههههههه تعااي ولچ مسودنه

جرني عليه وهوه گعد ؏ الچربايه وگعدني بنص رجليه وصار يمشطلي ؏ كيف، گوة كتمت ضحكتي عبالك جاي يدغدغني مو يمشطلي..

طولنه قريب النص ساعه واحنه ساكتين وهوه لسه يمشط انشلع گلبي، اخير شي ختمهه ببوسه ؏ خدي وهمس بأذني...

-خلصت

ردت اگوم عنه ورجع جرني وحاوطني بأيده، همس...

-الله يلعن الفراگ

-عميد اريد اگوم

-اصبري

-اريد اگوم شبيك

-اشششش

محاوطني بإيده وحاط حنچه ؏ چتفي، استمرينه بهالهدوء وبهالگعده لخمس دقايق..

-جواهر: ليش عايف البنات وحدهن بالبيت

-متعارك ويه سهى

-مو عليه هالسوالف

رفع راسه عن چتفي واني اللتفتت اباوعله..

-عميد الدين: شني؟

-جواهر: ادري بيكم متتعاركون وتسوي هيچ بالعمدني بَـس گدام اهلك حتى ميحچون شي

-انه ما خايف من هلي

-لعد ليش تسوي هيچ؟

-لان هاي الطريچة الوحيده الي اگدر اشوفچ بيهه

-ولهدرجة تريد تشوفني؟

-انه ما انام الليل وانه افكر بيچ، ولچ خذيتي روحي وعگلي وتفكيري وعافيتي وحتى گلبي يا لبت گلبي

-عميد احنه حاچين بهالموضوع

-جوهرتي ردي لحضني ترا مايلوگ للعميد غير جوهرته

-رهف شلون تعوفهه وحدهه ويه سُهى؟

-ليش تغيرين الموضوع

-جاوبني اني اخاف عليهه

ابتسم وگال..

-انتي موش مرت ابوهه انتي امهه جواهر واتطمني رهف مو هين راحت لسلمان ببغداد تغير جو

-شوكت هاي؟؟

-اليوم الظهر من اجه سلمان ردت وياه

-هااا وشسمه.. اءء وسُهى؟

-ماكو سهى

-شنو؟

-راحت سهى جوهرتي

-شنو راحت سُهى؟؟ مفهمت؟؟

-انتي مو ترديني اردهه يله رديتهه لخاطرچ

-انته صدوك تحچي لو تضحك عليه؟؟

ضحك وگال بخبث وهوه يعيب عليه...

-ايي صيدوووك احچي

-عميد راسي افتر يعني سُهى رجعت لأهلهه؟؟ شلوون؟

-البارحة چانت عندي گعده بالنجف بتت هناك ورديت اليوم الصبح وشفت مروان جاي وحايب وياه چم زلمه، حاچاني وقدم فدية خاطر ترد بنيته

-هاي ليش هيچ سوه؟؟؟

-چا بنيته

-ادريي بَـس ليش اله هسة؟؟

-لاا هاي ثالث مره يجيني ويتعنه وارده خايب بَـس هالمرة اجيتي انتي بين عيوني وفكرت بهالبت المسچينه شني ذنبهه رغم عايشه عيشه كريمه ويشهد الله ما فد يوم ظاگت عيني والبت نظيفه وخوش بت وماعدهه سوالف لواته موش نفس ابوهه واخوانهه النجسين

-وشصار بعدين اخذت فدية منهم؟؟

-چؤؤ (لا)

-لعد؟

-صار الردته انه كل بالي وتفكيري اريده يتربى ويعرف ويامن اندگ وكسرته بين الشيوخ وخذيت فصليه منه وهوه شيخ عشيره وهاي عيبة بحگة وانه ماتدنيت لبنيته ومالمستهه خاطر ما تتأذة وتدمر حياتهه يعني بين قوسين حسبتهه چن دخيله يمي

-عميد الحچي الي دا اسمعه مستحيل

-شني المستحيل؟

-شلوون ترجع فصليه انته مو تگول ميصير؟؟!

-چا مو سلمان گالچ يصير

يباوعلي ورافع تك حاحب، بلعت ريگي ونزلت راسي اريد استوعب كل هذا، رجع همس...

-هاا جوهرة رضت علينه؟

-هااا

-هسّ من صگد اشتعل مروان ؏ هالفهاوة بسچ ساح گلبي

ضحكت ونزلت راسي ورجع رفعه بأطراف اصابعه..

-انتي حبيبتي وبنيتي وجوهرتي والي يمسچ اطبره والي يزعلچ اصلخ جلده عن لحمة والي ينزل دمعه من عيونچ انحره والي يذبل هالبسمه من وجهچ اسوي راسه پاچه

-ههههههه ماشالله ابد مو گصاب انته

-چا شون

-شگد تحبني؟

-انتي شتگولين؟

اخذت خصله من شعري وگلت...

-جواهر: بگد ابداع الله من خلقني

-وبعد؟

-وتعشگني فوگ العشگ عشگين

-اعشگچ وعلي

-واني اموت عليك

بحركة مفاجأة باسني ؏ خدي وراسي، دارني ؏ الچربايه وراد يتجرأ اكثر لكن قبلهه همست...

-حبيبي اني حامل بتوأم

-ادري جوهرتي

-وهالتوأم بنات

فتح عيونه مصدوم، حچيت بسرعه..

-شوف اني ادري انته تريد ولد بَـس بعد شسوي و...

-عميد: بويه شتحچين انتي كله هذا رزق من الله شمالهن البنيات وابو فاضل تحطيهن ؏ الجرح يطيب واشكر ربي ان رزقني بخلفة منچ

-يعني مزعلان؟

-ابدد بابه انه احب البنيات صح يشلعن الافاد نفس رهف هههه

-هههه خليهه تسمعك

-تدري بروحهه لا تخافين بَـس يبقن عزيزات ابوهن

-اي

سكت شويه وهوه يباوع لتفاصيل وجهي..

-عميد: يعني راح يجنلي جوهرتين بعد؟

-اييي

-چا شني رأيچ نسميهن زمرد وياقوت

-لااا عميد اني اريد لارا ولارين

-شني بوية شني هالاسماء لااع مو حلوات

-عميدييي حبيبي اني يعجبني

-يعني ما منچ رجه؟

-ابدد بناتي اسمهن لارا ولارين

-چا يله ام لارا ولارين لا تغيرين الموضوع وتعاي

جرني عليه وعشت ليله تجنن وياه، حسيت روحي عروسه ولهفته واضحة وشلون يخاف عليه حتى ما اتأذه ويداريني ويتغزل بيه ما اللگه اب نفس عميد الدين ولا رح اللگه زوج نفسه..

**

"هجران"
دخلنه للبيت ساعه بالـ 12:30 بالليل وزينب نايمه ومبين البيت كلهم نايمين، دخلت بغرفه عُثمان وحطيت زينب ؏ الفراش حتى ترتاح وتطمنت من شفت حرارتهه نازله..

بدلت ملابسي واخذت راحتي لان عُثمان چان بره الغرفه، لبست دشداشه سوده طويله ردن كامله، حست زينب وصارت تبچي فَـہ رحت اسكتهه بلكي ترجع تنام، تمددت ؏ الفراش بصفهه وحضنتهه حتى تحس بيه موجوده..

وبأثناء ما اني اسكتهه دخل عُثمان للغرفه وراح بوجهه للحمام طلع وبدل ملابسه گدامي وظل بالملابس الداخليه، نزلت عيوني خجلانه كُلش ومباوعتله، شمر روحه ؏ الفراش وتقرب ؏ زينب حتى يبوسهه..

بلعت ريگي من قربنه وصاير راس زينب ؏ صدري وهوه ظل يبوس بيهه وبخدودهه ويشمهه، گلبي صار يدگ سريع وتوترت كُلش، ذبلن عيوني وحسيت رجفة بجسمي من همس وهوه يباوع لعيوني...

-هجران شبي گلبِك؟

-هااا

-شبيكي؟

-شبيه؟

-أنَا گعد اسألِك

بلعت ريگي ولزگن عيوني بعيونه مدا اگدر انزلهن وهوه نزلت عيونه ؏ شفايفي ورجع يباوع لعيوني، همس...

يتبع☘️...

♛ ♛ ♛ ♛ ♛ ♛ ♛ ♛ ♛ ♛
لتنسون التصويت والتعليق بين الفقرات حبايبي🌸.