شخوص متداخلة الفصل الرابع وأربعون 44 - بقلم Namarq

روايـة: شخـوص داخلـة

مُهم:"لاتنسون التصويت والتعليق ع كل فقرة+ مُتابعة حسابي🔴.

"ليلعنك الله عند كُل أمين يبوح بها
المسلمون بعد سورة الفاتحة" .

____

إبـراهيم:- وصلنا للنهاية أعرف هذا اليوم رح يكون نهايتي لذلك رح تكونين مدركة لكل شيء أنتهت محطه الغموض يا شرسَـتي..

أنا فاروق صاحب أكبر مافيا تاجرة للمخدرات في العراق وصاحب أكبر عصابة إجرام..

أدعي نفسي بـF حرف الأول من أسمي، الجرائم إلي تحدث بالساعة المُميزة Xll الوقت الثاني عشر في اللغة الرومانية خرجت من سجن الرومان هاربًا الئ العراق لأنفذ مُخططات والدي من قتل ..

إبريل هو وفاة زوجتي والساعة 12:00 وقت المقتل .. كُنت أنا القاتل هههههههههه

خانتني مع جمال الدين قتلتها وقتلت رويدا ما كان عندي علم هذه زوجة الاغا مو هو لأن كانوا تؤام .. وهو قتل أخو بيدهَ ما تعبني ..

أعترف أنا إلي قتلت عائلتچ كُلها
جردتچ من كل شيء
هربتي إلئ تركيا بسببي
أنا إلي دخلت لحياتچ بالبداية كضابط
ومن ثم مدير أعمال ..

وقعتچ بحُبي بسهولة لأجل شيء واحد
ومبتغئ واحد وهو " الحصول علئ الرام..

وهالرام گدرت أخذه قبل ٣ أشهر بس زوجچ الذكي الاغا محول النسخه الأحتياطية للقاضي بنفس اليوم إلي شمرت نفسي بالشط..

الشرطة بهالفترة دا تبحث عني متأكدين إنُ أنا ما ميت بالشط واليوم گدروا بجداره يحددون موقعي من خطفت دانيال ولورين وبعد أقل من الساعة يوصلون اهنيهم صراحةً زلم طلعوا..

ودام نهايتي قربت وكل شيء أنتهئ ما رح يهمني إذا خفيت الحقيقة عنچ لذلك هسة أنتِ دا تسمعين كل شيء مضموم عنچ

ها شرسَتي حاليًا أنتِ مصدومة مو ؟ بس بعدچ ما شايفة الصدمة الأكبر ، أخذي شهييق زفيرر وغمضي عيونچ بهدوء وفتحيهم وشوفي شنو محضرلچ من مفاجئة لعيونچ الحلوة ..

ماتيلـدا:- مشتغل الفيديو علئ الشاشة بنص الصالة مسجلة إبراهيم وهو گاعد علئ الكرسي وي كل كلمة يضحك ويسوي حركة مجنونة

ايدي علئ حلگي وأني أسمع كلامة القذر وأشوف جنونه .. تالي گام من الكرسي وجهة الكاميرة علئ الجهة اليمين من مكانه وهو يضحك بصوت عالي..

إبراهيـم:- شرسَـتي أخذي نفس عميق يلاا واحد أثنين ثلاثة مُفاااااااجئة ..

شهگت بصوووت عاااالي وأني أشوف لورين ودانيال علئ الأرض روسهم منفصلة عن أجسادهم!!!! "ذابحهم "...

رجليه صارن خيوط عيوني ما تحملت المنظر والصدمة إلي أجت مثل الصاعقة علئ گلبي غوشت وانغمئ علية مباشرةً..

...

في مكان أخر ..

المستشفئ الساعة ثامنة ليلاً ..

الدكتور راشد:- اهلاً نورتينا ست ساندرا

سانـدرا:- أهلاً بيك دكتور، أجيت بعدما بلغتني أكو خبر مفرح النا ياريت تحچي ماعندي صبر

أبتسم وعقد ايديه لبعض وجاوبني بهدوء:" صح

-شنو هو دكتور احچي؟..

الدكتور راشد:- الصبح صارت تطور بحالة ذو الفقار الحمدلله گعد من الغيبوبه بعد ٣ أشهر..

خليت ايدي علئ حلگي وگمت رئستًا والدنيا ما واسعتني من الفررررحة

سانـدرا:- فدواااا صدگ تحچي دكتوور متأكدد ؟

أبتسم وگام وهو يگول:- أي نعم وتگدرين تشوفينه وتحچين وياه ..

سانـدرا:- ربي يبشررك بالخير جزيل الشكر الك وللكادر العربي ما قصرتووا ..

دكتور راشد:- بالخدمة الكم يادكتورة الراقية ..

تشكرته وطلعت مسرعة، سبقته وهو وراي دخلت للغرفة وعيني صارت علئ أخوي متمدد علئ السرير وايده علئ صدرة ..

تقربت يمه ولزمت ايده بسته براسه ودموعي علئ خدي گلتله:-"الحمدلله علئ سلامتك حـبيبي..

راد يعدل گعدته ساعدته واجا الدكتور راشد والممرضه عدلوا المخده وطلعوا..

حچه بصعوبة تامة وبكلمات متقاطعة:" ها ياروح اخوچ ليش تبچين قارورتي الغالية دموعچ مسحيهم..

جاوبتة وايدي تمسح دموعي من خدي:"حبيبي دموع الفرح هذه ما داصدگ گعدت ودا احچي وياك گولي أني بحلم لو بعلم هذه حقيقة فدواا واخيررا كحلت نظر عيوني بشوفه عيونك حبيب أختك..

ذو الـفقار:- اشششش كافي بويه لاتعبيني فوگ تعبي بهالحچي..

سانـدرا:- تمام تمام هاهيه شنو تحس ؟ اكو شيء يأذيك ؟ تريد تاكل تشرب تطلع گول عيوني الأثنين الك..

ذو الفـقار:- أي صليب گلبي ما موجودة وينها ما مشتاقتلي يابويه أشهر وهي بعيده عني شصاير بيها هالترفه شصاير بنسمتي..

بلعت ريگي بأي عين أجاوبة أحتاريت شنو اگول وشلون اطمنه واطمن گلبه التعبان..

ظل يباوعلي بنظرات شك وقلق رفع اصبعه وگال..

ذو الـفقار:- ماتيلدا مو بخير احچي!؟..

-أرتاح هسة خوية مو الوقت المناسب..

رص علئ اسنانه وگال بنبره حادهَ:"هي كلمة وحده گوليلي ماتيلدا بخير أو حالتها أسوء مني ؟ احچي لاتبقين ساكتة..

- اجاووبك والله بس فدواا مو هسة ارتاح أنت صح گعدت من الغيبوبه بس جسمك يحتاج للراحه مو زين عليك الحچي الهواي..

ذو الـفقار:- اششششش أذن شكي صح! ساعديني اگوم بسرعة بدون كلام زايد ..

-لا مستحييل ذو الفقارر فدواا لاتعاند صحتك أهمم بعدين تعررف كل شيء وعد مني اسولفلك شنو صار من چنت بالغيبوبه وبالتفاصييل..

ذو الـفقار:- كلامي ما أعيده إذا ما تگوميني أنا اگوم ما أحتاج مساعدة بس أبتعدي عني ساندرا..

-ذو الفقاررر..

بعد الغطى عن جسمة ونزل رجلية للأرض لزم صدرة بألم..

-لا تنفتح الخياطات اغااا !! ..

سندته ولزم كتفي گام وأني لازمتة دخل الدكتور اتفاجئ وگال ما يصير يطلع بهاليوم..

ذو الـفقار:- أطلع علئ مسؤوليتي أنا..

دكتور راشد:- لكن أحنا ما نتحمل أي شيء يصير عليك وعلئ عمليتك..

ذو الـفقار:- تمام هذا هو..

سانـدرا:- رح أوقع علئ الأجرائات الخروج والممرضه تبقئ يمك تساعدك..

ذو الـفقار:- تمام يابه تمام..

.. رجعنا للقصر دخلوا أخواني للغرفة وذبح أبوي ذبيحه بسلامة الاغا بنفس اليوم الباب ما أنسد من كثر الناس إلي أجت للفجر يلا فرغ القصر.. وثاني يوم من الصبح أصدقائة أجوي..

لدرجة ما گدر ياخذ نفس ويگعد ويانا أمي گعدت وياه نص ساعة وبعد ما گدرنا نشوفه.. ولا سأل عنا اصدقائة متجمعين حوله وحواليه..

تالي طلع من الديوان ودخل للصالة بوسط القصر وگال:" تعالووا يااابه ..

طلعنا كلنا نركض وگفنا يمه.. ردت احچي خلا ايده بمعنئ لا تتقربين..

عائـشة:- ها ياروح أمك أرتاح اگعد علئ القنفة لا تبقئ واگف فدوا..

ذو الـفقار:- اششششش هي كلمة وجاوبوني عليها صحتي مهتم بيها وأعرف نفسي شدا أسوي..

سانـدرا:- شنو احچي ؟؟

ذو الـفقار:- من البارحة عرفت ماتيلدا مريضة وموجودة يمكم تخبلت ردت اجي بس عمليتي واصدقائي ما انطوني مجال اتنفس وطمني اباذر وگال زينة ما بيها شيء لا يظل بالك

صبرت روحي للصبح لأن زحمة من الناس وهسة اجا ذو النون وگال ما اخليك تشوفها أنا أمنعك وما أسمحلك دا تلعبون علية لو شنو بالضبط خلي يجي واحد كفو ورجااال ويمنعني..

سجَئ:- اگلك أني علئ مكانها ههههههه..

خزرتها وعطت بيها:- سجئئئئ أسكتي..

سجَئ:- ها حبيبتي ساندرا خلي خطية يريد يشوف زوجتة المتخبلة..

التفت عليها بشك وگال إلها:- شنو تقصدين بالمخبلة ؟ سجئ احچي معليچ بيهم..

سانـدرا:- انچبيييي سجئ إذا فتحتي حلگچ بكلمة والله أبوي يطيح حظچ ويطردچ حذرچ لاتحچييين..

ذو الـفقار:- ما تنطرد بـَس خليها تحچي وتريح گلبي وعقلي ولكم الله وأكبررر أريد زوجتي عيوني بـَس تريد تشووفهاااا وترتاااح !! ..

سجئ:- موجودة ماتيلدا بالطابق الثالث بالغرفة المقفولة..

سانـدرا:- الله لا ينطيچ ارتاااحيتي هسسة أحنا ما نعرررف نحچي ولچ خخ ياحييييه..

ردت اوقفه وأمنعه بسرعة راح للدرج ما گدر يركض ايد علئ صدره وايد علئ رجله.. رحتله ركض دفعني من كتفي ارتديت للخلف وكمل مشيه وراح صعد..

صعدت وراه يمشي وأني اگول اله:- لاترووح أنتظرر..

كمل مشيته وهو يجاوبني:"لچ لا توگفين گلبي التعبان وتزيدينه تعب يارب أحفظها بس هي البقتلي..

سانـدرا:- علمود گلبك التعبان منعناك تشووفها..

ذو الـفقار:- من عمري علئ عمرها لچ هاي الترفه نسمتي مو شخص عادي شلون ترديني ما أشوفها شلوووووون ..

سانـدرا:- اهدئ اهدئ هاهيه سوي الي ترديه بس الله يكون بعونك وقوي گلبك..

ذو الـفقار:- لچ بويه أسكتتي لاتخبلينييي بهالحچيي..

سكتت كمل مشيه صعدنا للطابق الثالث فتح الباب برجله چان مفتوح علئ نصه، ودخلنا ..

باوع يمنه ويسره ما موجودة، دخل يدور عليها، صارت عينه علئ الزاوية..

تمشى بهدوء وشافها گاعده علئ الأرض متچيه علئ الحايط وادگ راسها عليه ورجليها لصدرها وساكتة وشعرها مغطي نص جسمها ..

گد علئ ركبه وهمس بحنيه إلها:- ها حبيبتي أجيت أنا يمچ گالولي تعبانه الحلوة..

ما ردت بـَس نسمع صوت أنفاسها ونبضها العالية تجر نفس بالگوه وتزفره بصوت مسموع هدوء المكان فقط ذو الفقار يحچي وهي ما تجاوبه..

أخر شيء تلمس شعرها وبعده عنها ورفع راسها بيده .. مباشرةً صرررخت بصوت عالي گامت من مكانها وهي لازمه السچين بيدها

أنصدم من حالتها حاول يهديها وماكو أي نتيجة بـَس تصرخ تضحك وتبچي بنفس الووقت...

ماتيلـدا:- ما أررريد أشووف أي شخص أطلعوووااااااااا وخرووووا عنييييي..

سانـدرا:- أهدددي حبيبتي تمام تمام طالعين ..

أشرت عليه بعيني بمعنئ نطلعَ ما قبل وگالي أنتِ أطلعي أنا مستحيل أطلع وأتركها وهي بهذه الحالة..

بعد أصراره طلعت وسديت الباب ..

ذو الـفقار:- تقدمت للأمام بهدوء وگفت يمها همست وايدي تحاول تلزمها ..

-ماتيلدا حبيبتي أحچيلي لا تتعصبين فهميني منو الضوجچ منو مضايقچ ؟

ماتيـلدا:- اششششش اطططلع اطلللع قبلما تنذذبح مثلهممم..

وجهت السكين أمامي تقدمت يمها وگلتلها:" لچ أنا مو عدوچ أنا الشخص الي يحبچ ويفديچ بروحه اصحي ماتيلدااا..

ماتيلـدا:- محدد يحبنييي كلكم كذااابين وخاينين كلكم مخادعيييين اكرهكم اطلللع براااااا لا تنذبح والرررب..

أتفاجئت وأنصدمت من حالتها اليُرثئ لها تقربت منها أكثر وعيني علئ السكين ركضت بسرعة واخذتها منها وشمرتها علئ الأرض بحركة سريعة..

ظلت تصررخ وتهذي بكلمات ما مفهومه جريتها من ايدها وحضنتها لصدري قوي سديتها حلگها بأيدها وأني أهمس بأذنها اششششش لا تحچين ولا كلمة بـَس حسي بشعوَري وأسمعي نبضات گلبي الرايدچ..

ماتيلـدا:- ذو الفقارر أريد أمووت ما أريد أعييش..

جاوبتها وأنا أبوس راسها وخدها:" ياروحه لذو فقار ولچ بويه بـَس أهدي گوليلي من شنو تعبانه منو مغير معانيچ أنا أعرفچ أقوئ أنسانة..

ماتيلـدا:- دانيال ولورين أنذبحوا ياذو الفقار..

أبتعدت عنها وأنا مصدوم من كلامها، صرخت و وگعت علئ الأرض مغمئ عليها دنگت خليتها بحضني مثل الحمامة والطير المذبوح ريشهَ خفيفه صايرة..

صحت بصوت عالي بأسم ساندرا دقايق ودخلت ساعدتني وگومتها وصاحت لأمي شالوها وطلعوها دخلوها جوا بغرفة نومنا وأنا وراهم وعيوني عليها ..

غسلت وجهة وشممناها عطر دقايق وگعدت فتحت عيونها وما گالت شيء ..

طلعت حچيت وي ساندرا علئ صفحة، گلتلها شصاير بغيابي شنوو انذبحوا اصدقائها شلوون وشووكتت ومنووو قتلهم!...

سانـدرا:- للأسف كلامها صح، هالخبر كلنا صدمنا، رح احچيلك كل شيء صار..

ذو الفـقار:- احچيلي من الالف للياء اسمعچ..

سانـدرا:- سولفتله..

جريت نفسَ وزفرتهَ عقلي ما أستوعب هالكلام ركزت علئ فقرة إنُ F إلي طلع أسمه فاروق، هو إلي قتل رويدا المرحومة !! مو جمال الدين..

(صار الثار ثارين ، والأنتقام مو فقط إلها )

...

بعد مرور أيام زادت حالة ماتيلدا شعرها صارت تشلعه بيدها وملابسها تشگگهن تضحك وتبچي بنفس الوقت بأيدها السكين وتگعد وحدها ما تحب الضوء ولا تختلط بأحد عرفنا صارت بيها حالة نفسية بسبب قتل اصدقائها وشوفه اجسادهم منفصلة عن رؤوسهم ..

وبليلة چانت الساعة ب12 چنه نايمين سمعنه صرخه سجَئ رحت لغرفة ماتيلدا ما شفتها موجودة أنرعبت ركضت بسرعة وكلهم ركضوا وياي أنصدمنا من شفناها لازمة السكين بوجهة سچئ وتريد تذبحها ..

دفعتها وأخذت منها السكين گوه وشلتها للغرفة وقفلت الباب ظلت ادگگ بي وتصرخ .. من سألت سجئ شنو صار گالت چنت عطشانة نزلت أشرب مي ودخلت ماتيلدا لازمة السكين تريد تقتلني صرخت وأجيتوا بالوقت..

من بعد هذا الموقف ما تركتها ولا لحظة بـَس تصرفاتها المجنونة أزدادت أنا چنت أكثر شخص فاهمها لأنُ مار بهالحالة وچنت مثلها وأزيد ..

تالي أقترحت ساندرا بعدما فشلت بمعالجتها، إنُ نوديها للمُستشفئ المصح العقلي حتئ لو كم شهر ما يصير تبقئ بالبيت تزداد حالتها وممكن تأذي نفسها وتقتل روحها وأحنا ما ندري ..

بالأول أعترضت بـَس من شفتها جرحت ايديها بالسكين وجسمها كله دم تخبلت وغصبًا عني وافقت لسوء حالتها النفسية ..

وديتها بأيدي بـَس گلبي چَان مُعترض بيوم إلي دخلت للمسَتشفئ دخلت أنا للسجَن !! ..

سلمت نفسي للشرطة بتهمة قديمة مسويها أعترفت أنا إلي قتلت أخي بسنة ٢٠٠٦ ..

أنفتحت ملفات قديمة وچَان القاضي وياي گال أنت مو مجرم أخوك المجرم !!!!! ..

أنصدمت من عرفت أخي جمال الدين عنده سوابق وقاتل ٥ أشخاص وتاجر بالمخدرات والشرطة چَانت تدور علية بـَس بصيت أبوي محد شك بي لأنُ أبوي بهذاك الوقت كُلش معروف وملفه أبيض مستحيل شخص يتهمه لو يتهم أحد أولاده ..

مع هذا أنحكمت وأنحبست ، خففوا عني الأحكام بسبب أنا إلي سلمت نفسي وكذلك بسبب لزموا أكبر الأشخاص المجرمين إلي هو فاروق F وأنا وأباذر چنهَ سبب القبض وإلي قتلتة مجرم مطالب للعدالة لذلك خففوا عني الحكم وأتعاملوا وياي بالأحسن ..

أنحكم علية سنة كاملة ، بهالسنة ماتيلدا چَانت بالمُستشفئ وأنا بالسجَن وفاروق چَان وياي بنفَس السجَن..

عرفت إنُ فاروق حاول يطلع روحهَ وينقذ نفسه وما يعدموا وتواسط ويا جماعتهَ وطلع منها وما تأذه بشعرهَ وگالوا ما عدهم الأدله الكافية فقط عائشة شهدت علية هو الي قتل الحارس القصر!

أحتاجوا أدلة أكثر وشهود ومن ضمنهم رادوا ماتيلدا أو أحد الطرف منها ومن عائلتها لكن لسوء الحظ كاردينيا چَانت تعالجها ساندرا، وماتيلدا بالمصح العقلي ومحد غيرهم شاهد علئ الجرائم !! ..

بديهيًا رح يبقئ فاروق سنة كاملة والقاضي أنتظر تحسن بصحة ماتيلدا يلا يصدر الأحكام النهائي ..

...

بعد مرور سنة |

2014 / ١٥ يناير . .

يُصادف خروج ماتيلدا من المُستشفئ بعدما دكتورها الخاص المُشرف علئ حالتها النفسية تمكن من معالجتها نهائيًا وقدر علئ شفائها . .

ويُصادف حُكم فاروق وأنتهاء مدة حبس ذو الفقار ..

( اليوم هو اللقاء بعد سنة كاملة فرَاق)
..

ماتيـلدا:- من أصعب الأيام إلي عشتها ومن أصعب السنوات المرت علية بتاريخ حياتي كلها هي سنة ٢٠١٣ فترة علاجي وخروجي من الازمة الصحية والنفسية الي وگعت بيها

لكن الحمدلله تعالجت ونسيت وتعايشت تقبلت واقعي بعد مدة طويلة ..

الساعة ثامنة صباحًا .. يوم لقائي مع الشخص إلي مشتاقة إلهُ بگد شوقي لأبوي!! أرتميت لحضنه مثل الطفلة من تحضن أبوها بعد فراق طويل لهلحضن الدافي..

" چان الشوگ يكتل ..

بچيت بحضنه سولفت بحضنه بقيت بحضنه لساعات طويلة وما ردت اگووم !! ..

- أتحبني . بعد الذي كانَ ؟
- إني أحبك رغم ما كانَا
ماضيك لا أنوي إثارته
حسبي بأنك ها هنا الآن
تتبسمين .. وتمسكين يدي
فيعود شكي فيك إيمانا
عن أمس . لا تتكلمي أبداً
وتألقي شعراً .. وأجفانا
أخطاؤك الصغرى أمر بها
وأحول الأشواك ريحانا
لولا المحبة في جوانحه
ما أصبح الإنسان إنسانا
عامٌ مضى ، وبقيت غاليةً
لا هنت أنت ولا الهوى هانا
إني أحبك . كيف يمكنني؟
أن أشعل التاريخ نيرانا
وبه معابدنـا جرائدنا
أقداح قهوتنا ، زوايانا
طفلين كنا .. في تصرفنا
وغرورنا ، وضلال دعوانا
كلماتنا الرعناء .. مضحكةٌ
ما كان أغباها .. وأغبانا
فلكم ذهبت وأنت غاضبةٌ
ولكم قسوت عليك أحيانا
ولربما انقطعت رسائلنا
ولربما انقطعت هدايانا
مهما غلونا في عداوتنا
فالحب أكبر من خطايانا
عيناك نيسانان .. كيف أنا
أغتال في عينيك نيسانا ؟
قدر علينا أن نكون معاً
يا حلوتي رغم الذي كانا
إن الحديقة لا خيار لها
إن أطلعت ورقاً وأغصانا
هذا الهوى ضوءٌ بداخلنا
ورفيقنا .. ورفيق نجوانا
طفلٌ نداريه ونعبده
مهما بكى معنا .. وأبكانا
أحزاننا منه .. ونسأله
لو زادنا دمعاً وأحزانا
هاتي يديك .. فأنت زنبقتي
وحبيبتي رغم الذي كانا ..

أحتار بشنو يرضي شوگه بيه وأحتاريت أني شلون أعبر شوگي اله .. أمتزجنا سويًا چانت الأبتسامة سيدَة الموقف .. والكلام ما انقطع دقيقة كُل ثانية وثانية يگلي أحبچ يابقائي..

صارت الساعة ٢ الظهَر موعد المحكمة والحكم علئ فاروق مُنتظرين وجودي حتئ أشهد ويتم الحكم أما مؤبد أو أعدام ..

أصريت علئ الروحه رغم ذو الفقار گالي يجوز تنهارين من تشوفين قاتلچ لكن أني چان عندي حماس كُلش كبير لهلساعة إلي أشوفهه بي ..

حمَاس من أشوف لحظات أعدامة أمامي ..
الشخص إلي عدم كُل الأشخاص الأحبهم والسعادة إلي تخصني قتلها بسهولة ..

..

دخلنا للمحكمة چَنت لابسة لون "أبيض" من هاليوم الحكم علئ قاتلي أعلنت دخول اللون الأبيض لحياتي ودلالته ثوبي الأبيض ..

دخلنا وگفنا والقاضي والمحامي أمامي أتفاجئت من شفت ذو النون هو المحامي وكيلي .. ما چَنت أعرف بشغلة ..

چانَ ذو الفقار حاضن ايديَ ويطمني بعيونه إنُ الشيء إلي منتظرته من سنين رح يتحقق وتحقق العدالة وتتنصرين ويتحقق أنتقامچ ..

دخل فاروقَ مكلبش ومربط بحُكم ولازمينه من ذراعه ومجموعة ضباط دخلوا بأثناء دخوله ..

صعد علئ المنصه بعد كلام طويل ... طلبوا مني أصعد وياخذون اقوالي وأكون شاهده وبعدها يتم الحكم ..

جريت نفسَ وزفرته بقوة لكن ما توترت بالعكس چنَت فرحانه وطايرررة من الفرح والأبتسامة غامرتني هواي منتظرة هاليوم علئ أحَر من الجمر

وچنت منتظرة أطلع من المستشفئ وأحسب دقيقة دقيقة وساعدت روحي بالشفاء حتئ أكون حاضره هاليوم وما افوته من المستحيل..

غمزلي ذو الفقار وهز براسه برياحه بمعنئ روحي واحچي إلي عندچ وتوكلي علئ الرب والرب ينصرچ علئ عدوچ ومجرمچ..

أخذت نفَس ومشيت بكُل هدوء ممَزوج بثقةَ تامة وخطواتي تنسمع ..

چَنت أتقصد أسمع صوت الكعب الرنان الهَ وأخلي عيوني بعيونهَ ..

چَنت متقصدة بكُل حركة تصدر مني صغيرة وكبيرَة رايدته يشوفني سعيدَة ويشَوف أنتصاري بعيوني وأشوف هزيمتهَ الكبيررة بعيونه ..

شهدت وحچيت كُل شيء وكُل حدث وجريمة شهدت عليها بحياَتي مَر وقت طويل وما توقفت ولا دقيقَة وحدَة احچي وي كُل حدث أرجع لتسع سنوات ورا وترجع ذكرياتي السيئة والمشؤومة ..

وچَانت فرحة عظيمة من صدر الحكم أعدام شنقًا للمُجرم "فاروق مازن " ..

شمرت روحي بحضن ذو الفقار وأني أضحك من الفرررحة وهو فرحان علئ فرحتي الكبيررة ..

لثموا بالقناع الأسود وكلبشوا وطلعوا من المحكمة إلي چانت عباره عن فرحَ ودخول السرور إلها ..

الساعة ٥ الفجر .. تنفيذ الأعدام ..

طلبت منهم أكون حاضره بالگوه قبلوا بعد اللحاح شديد مني الهم وتوسط ذو النون للقاضي وللبقية الموجودين فقبلوا ..

..

صعد علئ منصه المسرح المشنقة الاعدام وجهة ما طالع مغطينة صعد علئ الكرسي ورگبته حاوطت الحبل السميك ..

دخل الشيخ وصار يردد الأيات وفاتح القران، تالي گال اله قبل تنفيذ الأحكام بدقايق قليلة إنُ يردد الشهادة ..

چَان جوابه لا .. وما فتح حلگه بكلمة وما ردد أي قول ولا تمتم بالشهاده ..

رجع الشيخ لمكانه واجا المُنفذ الحكم ودفع الكرسي وأنشنق ..

أنقطعت أنفاسه صعدت روحهَ وأنعدم .. "مات

تحققت العدالـة ..

وتم الأنتـصار ..

الشخص إلي دمر حياتي حضرت أعدامة وأنتصرت ..

تحقق مُبتغاي أنتصررت وتحَقق أنتقامي وأخذت بثاري وثار أهلي وأحبائي وأصدقائي ..

چَنت واعده نفسي من يموت أهلهل وأطش چكليت وبالفعل سوووويتها ..

هلهلت بصووووت عاااالي وي كُل هلهوله دمعة فررح وأنتصاارر تنزل .. وي كُل شمَره الچكليت لمعة أنتصار من عيووني..

لزمت صليبي قوي وشددت القبضه والفرحة ما واسعتني حضنت ذو الفقار وهو ضمني لصدرة رجعنا للقصَر مُنتصرين والفررحة ما واسعتني

چنت أسعد أنسانـه .. شارركت الكُل بهالفررحة .. عبد القادر سوا عزيمة وليمة مصلاوية كبيرة والسفرة أنمدت من بداية القصر لنهايتة ..

الديوان والصالة والغرف كُلها أنملت بالناس تشاركنا فرحتنا الواسعة وأنتصارنا الكبير علئ العدو إلي دمر حياتنا ..

هالتاريخ أنحفر بگلبي وأنولدت من جديد .. 15 ينايَر تاريخ ينخلد بتاريخ حياتي ..

أنولدت ماتيلدا جديدَة كُل شيء بيه تغير ، نفسيتي ، حياتي ، حتئ طعَم الفرحة صرت أحس بيها وبكُل لحظات تمر بعُمري أعيشها..

بالنسبة لأختي كاردينيا وحبيبة عُمري رجعت مثل الأول وعالجتها ساندرا وتحسنت بهواااي ..

محينا كُل ذكرئ سيئة وسودة مرينا بيها .. وأنكتب إلنا عُمر جديد ..

ربي عوضني وكتبلي سعادة ونساني المُـر إلي عشته وأنتصرت بعد عناء وعذاب طووويل دام لسنين طوويلة ..

لكن أم لورين أنشلت وأم دانيال تمرضت بسبب الفاجعه ما تركتهم أكيد! خصص الهم ذو الفقار ممرضه خاصه وين ما نروح اخذهم ومستحيل أتركهم أمهاتي معتبرتهم ..
..

بعد مرور ٤ أشهر .. أنتهت المُدة زواجنا إلي وضعها فاروق سنتين وأربع أشهر واليوم هو موعد خروج أبو (مازن) من السجن بغداد ..

حضرنا الجنط السفر وطلعنا كلنا من القصر ذاهبين ومسافرين الئ العراق العظيم ..

وصلنا بعد مرور ساعات وخطت رجلي الأرض إلي أنولدت بيها ( بغداد ) بعد فَراقًا طويلاً وأشتياقًا كثيرًا لها قسملي ربي إنُ أزورها ..

رحنا سوية أني وياهَ بنفس اليوم وقدم الرام للقاضي وأنحكم بالأول مؤبد تالي أتدخلوا المحاميين وبعد نقاش جدًا طويل ليومين كاملين صدر الأحكام ( أعدام شنقًا)

وأنشنق وكان مصيرهَ مثل مصير أبنه ولحقه وإلئ الجحيم وبأس المصير مُخـلد ..

وتحققت العدالـة ..

بهاليوم كان أنتصار أكبر لأنُ عبد القادر وذو الفقار كذلك أنتقموا من المُجرم وأبنه ..

أجرنا فندق وبقينا ببغداد أول أسبوع وما طلعت چنت أراجع نفسي وأراجع كل شيء صار إلي وي كُل ذكرئ أتذكر ربي عوضني بالأحسن وجازه تعبي وعذابي وأحمدهَ الف مليون مرهَ ..

وي كُل صفنتي أبتسم من أشوف أختي بحضَني وذو الفقار أمام عيونَي .. لعد أني شنو أريد من الدنيا إذا روحي وأعز ناسي موجودين بقُربي..

بيوم رحت إلئ الكنيسة أني وكاردينيا الصبح.. صليت صلواتي وقريت جزء من الإنجيل وراحه بال وأنشراح صدر وسعته مو طبيعية چَنت حيل حيل سعيدةَ ..

شغلت شمعَة وايديه حضنت بعَض وغمضت عيوني والصليب برقبتي ..

همَست.. يا أمنا العذراء .. سنة ٢٠٠٩ بيوم من الأيام الصعبة چَنت بحالة يُرثئ لها دخلت إلئ هذه الكنيسة نفسهاا چنت بخوف ورعب مو طبيعي

چنت أطلب وأرجوا منچ أنُ تمنحيني القوة الكبيرة والصبر الأطول علئ مواجهة الاعداء في حياتي المُتعبة ..

طلعت من الكنيسة حاضنه أختي والقوة مُتملكتني مع نزول المطر من السماء والرياح القوووية والصاعقة إلي لامست گلبي الرؤوف..

مرت أيام حيل صعبة چنت بكُل لحظة أشعر بيها بتعب وضعف الزم صليبي وأدعي ربي وأدعي أمنا العذراء إنُ تمنحني القوة

وأرجع بعد كُل ضعف من عز ألمي أقوئ أنسانه اوگف علئ رجلية بكُل حيل بيه وأقاوم أكثرر وأحارب بَجهاد كبير مني ..

الحمدلله حمدًا كبيرًا واسعًا علئ مَنحه لهلعوض إلي وجازاني بعد رحلتي الطويلة والعناء بضحكة أختي ولمعة عيونَ وحُب ذو الفقار إلية وقربه..

طلعت من الكنيسة فرحانهَ وايدي حاضنه أختي إلها.. تمشيت بشوارع بغداد المُحزنة ..

أباوع وأصفن بكُل تركيز علئ الناس إلي تمشي والسيارات إلي تعَبر .. دخلت بأفرع وشوارع شعبية ..

توقفت بساحةَ التحرير .. أبتسمت بيأس ودموعي نزلوا علئ خدي ..

رفعت راسي وعيوني صاروا علئ تمثال نصب الحرية هُنا سأقف وترتج كلماتي المُتعبة لها ..

اهَ يا بغداد الحزينَة ياعاصمة العراق العظيم يا منصب الأنفجارات والقتلة يا حبيبتي الأجمل ..

تَعالي اُقبِّلُ وجهَكِ
تَعالي أُضمِّدُ جرحكِ
تعالي أُمشِّطُ شعركِ
دَعينا نَحلم تحتَ الرصاصِ
دَعينا نَعيشُ بَإذنِ اللهِ
فَحُب العِراقيين عَجيبٌ
يُذلِلُ فِعلَ السلاح الرهيبّ
تَعالي لِماذا الجَمالُ كَئيبٌ !
تَعالي حَبيبةَ عُمري إليَّ
تَعالي أعزَّ وأَغلى حَبيبْ
آه بَغدادٌ يا بَغدادْ
لَيّسَ لَنا سواكَ يا الله
ارحَمنا مِن الذين دَمروا بِلادنّا
يَكرهونَّ الحُب يَكرهونَّ الحياةّ
يَكرهونَّ الوَرد يَكرهونَّ النَساء
يَكرهونَّ النُور يَكرهونَّ السَلامّ ..

.....

رجلية أخذتني إلئ منطقتني القديمة دخلت إلئ الشارع الذي يُكاد يسمئ شارع الموت لكُثرة الجرائم التي تحَصل فيهُ ..

أتفاجئت من شفت متغير ومرمرينه ومسوينه شارع جديد ومنطقة مختلفة تمامًا عن الي تركتها من سنين ، تختلف تمامًا عن الشارع إلي شردت منه من 2009 مرتعبة ..

تمشيت بالمنطقة وأختي وياي أباوع علئ كل ركن بالشارع وكل زاوية أباوع علئ الأرض وعلئ السماء ..

هُنا ضحكت هُنا لعبت هُنا سولفنه هُنا چنت اشكي همي وي أصدقائي هُنا كُل ذكرياتي الحلوة والمُره إلي عشتها ..

أستوقفتني كُلمة اصدقائي ! اهَ يا دانيال يا أعز وأخلص صديق لگلبي لورين حبيبتي چانت بمثابه أخت إلية ساعدوني وأحتويت بيهم ما چانوا اصدقاء فقط چانوا اخوة وقوةَ إلية ..

أصدقائي الأوفياء ما رح أنساكم كُل يوم أتذكركم واهدي لروحكم النقية الدعاء والثواب..

الرب يرحمكم عنَد الرب اللقاء أجمل ..

...

بعد مرور أيام أقترح علية ذو الفقار إنُ نستقر في بغداد الحبيبة وافقت لكن صارت حروب ودخول داعش والاوضاع أبدًا مو تمام غصبًا عنا طلعنا الئ تركيا ..

لكن قبلها بساعات زرت المقبَرة وأقبار عائلتي كُلها (والدي ، أمي ، وأبوي وأمي إلي عشت عدهم، مُوسئ رحمهُ الله ، اصدقائي القديميَن وأب لورين واصدقاء والدي ربي يرحمهم جميعًا)

بچيت يم قبورهم قريت الهم الدعاء وشغلت البخور سولفت وياهم وأبتسمت وأني احچي بأنتصاري واگلهم أخذت بثاركم وگدرت أنام وأني مرتاحة وسعيدَة ..

أتفاجئت بوجود قبور بأسماء "لورين ، دانيال ، ماتيلدا ، كاردينيا " ..

تحققت بالموضوع وحچيت وي الدفان وأصريت علية يحچي بعد عناء طويل واللحاح مني أتذكررر وگال إنُ أكو شخص يدعوا نفسه بـF

اجا بيوم وطلب مني أسوي قبور بهذه الاسماء وإذا ما سويت يقتل عائلتي بعد خوف كبير نفذت إلي سويته وطلع من المقبرة وبعد ما اجا وهلحچي من سنتين تقريبًا !! ..

اتفاجئت وتالي ضحكت بأستهزاء ما صار طاريي يهزني ولا يأثر بيه ولا بشوي ولابشعرَه .. أسمه يمَر بأذني مرور الكرام ..

جهزنا الحقائب وطلعنا من العراق سافرنا إلئ تركيا ورجعنا للقصر ..

دخلت للقصر وأني راغبته عكس أول دخولية إلية چانت صعبة وچنت احس بغربه فضيعه ..

بعد أيام فاجئنا اباذر من طلب ايد كاردينيا للزواج!..

بالبداية ما وافقت وگالت ما أريد أتزوج، بس اباذر چان مُصر ورايدها عن حُب ومتمسك بيها ..

چان يعيد ويحچي وأصر عليها وكرر طلبه وتقدم إلها مرة الثانية وچان يتوسط إلية حتئ أقنعها تالي وافقت بعدما عذبت گلبه..

چانت تگول إلي يريد الحلو يصبر علئ مُره وهو جاوبها أنتِ الچ العُمر كله أصبرلچ وأنا الممنون..

من أتزوجوا ورا أشهَر تقدم الدكتور راشد لخطبة ساندرا .. لكن ما وافقت .. ورفضت..

سئلناها علئ سبب الرفض گالت ما أريد أرتبط بأنسان ولا أريد أتزوج أريد أدرس وأكمل دراسات عُليا الدراسة أهم من الزواج أحسن وأفضل إلي..

أريد أسس حياتي ومستقبلي وأكون نفسي وشغلي الخاص ويكون إلي أسم بالمجتمع تالي أتزوج ..

احترمنا واتقبلنا رأيها وبالفعل سافرت لغير بلد مع أبن خالها وكملت دراسات والتهت بحياتها الدراسة تتصل علينا ونطمن عليها وبين كل فترة وفترة بالعطلة مالتها تجي تزورنا ..

حياتي صارت هادئةَ مناسبات تمرنا نحضرها بكل حُب والأعياد والحفلات إلي ما تخلص والي اكون بيها سعيدة..

مرت أيام علية من الفرحة ما گدرت أنام! ..

أدركت بيها فعلاً إنُ الرب يعووض..

ومن يعوض مايكون عوضه عادي عووضه كبير ..

قادر علئ تحويل الأيام السودة إلئ بيضة والتعاسه والحزن الئ فرح وسعادةَ ..

...

بعد مرور سنوات ..

تركيا - 2018 - إبريل

قررت أحتفل .. اليوم مُميز بالنسبة إلية..

عيد ميلادي .. وخبر حملي بجنين بأحشائي من الأنسان إلي ربي عوضني بي خيرًا ..

زينت الغرفة بالنفاخ شغلت شموع عُمري الـ35 ..

لابسه روب نوم وفاتحة شعَري مُتزينة بالمكياج الهادئ والأبتسامة مرسومة علئ وچهي مُنتظرة قدوم حبيب روحي للغرفة ..

أنفتح الباب ودخل شغل الأضوية واتفاجئ بالغرفة المتزينة وأني الي متحضره اله والمفاجئة الثانية الأكبر والأسعد هو خبر حملي..

طارر من الفررح من عرف بيه حامل تركني دقايق راح توضئ وصلى ركعتين شكر وحمد للرب الأعظم..

تقرب مني وبعد شعري وأني أبتسمت برجفهَ حاوطني من خصري وغازلني بهمسات من أذني..

ذو الفـقار:- رح أصير أب يا فرحتك يا ذو الفقارر ما تصورين شگد زرعتي غصن ورد بداخلي بهالخبر يا بقائي ونسمتي..

-رح تكون اللطف واحلئ وأحن أب بالدنيا فُقاري..

ذو الفـقار:- صليبي المُميز أحبچ بويه ..

-وأني أكثرر..

ضحك بخبثَ وگال:- وأنتِ أكثر شنو؟..

غمرت راسي بحضنهَ بخجَل وجاوبتةَ..

-أحَبــك..

ذو الفـقار:- يا ويل حالي ول أبويي..

-فرحَان ؟..

ذو الفـقار:- عليم الله إنِي طايرر من الفررح بهالخبر نعَمتي أنتِ فؤادي ونسمَتي الهادئة..

-وأنت عوض ربي الأكبرَ أحبك هوااااي والرب يعلم شگد أني أحبك وميتهَ حُب بيك..

تمَشئ بيه وشغل اللابتوب علئ مقطعَ من أغنيَة كُلش يحبها ويغنيها إلية كُل ما يصفن بعيوني..

شغلها وحضن خُصري صرنا نسمعها وأني مُبتسمة وعيونه بعيونَي تلمع..

"كُل القصائد من حلى عينيكِ من دفى ايديكِ كتبتن وقلتن هودي القصائد مُش حكي يا روحي هو لكي كلن"..

ذو الفـقار:- وإعلم ان حُضني متاحٌ لكِ، في كل مرة ترُيدين بها البكاء، او الإبتسام، اعدُك إنني سأحتويكِ من كُل ما يُخيفك وسأغني لكِ كل تهويدة جميلة، وأمسح عن عينيكِ الجميلة الندى المُتقطر وازرع على مَبسمكِ الرقيق الضحكات التي تُليق بكِ ..

أبتسمت وجاوبتهَ:" مممم شگد تحبني؟..

ذو الفـقار:- بگد دعائي لرب العالمين إنُ يحفظچ إلية بكُل صلاة فجر ..

-فدواا اروحلك فُقاري مممم زين تعشقني؟..

ذو الفـقار:- ‏وتسألني أتعشقني تخيل .. إنها تسألْ
بربكَ كيف أسمعها ألا من نفسها تخجلْ ألم تقرأ بأشعاري بأني قتيلها الأولْ؟ وأني دون عينيها
ضياع ضائع أعزلْ ألم تلمح بكف الشمس مكتوبًا لها مرسلْ؟ ألم تلمح بعرض البحر ديوانًا بها منزلْ؟ ..

-ما تتصور شگد احب كلامك والحنيهَ إلي بيها يعجز كلامي فُقاري أحببببك هوااااي...

ذو الفـقار:- أحبچ يا عصَبي ..

-شنو عصبي هههه..

أبتسمَ وشدد لزمته إلية وقربني لصدرة وگال بهَمس وهو مُركز بباطن عيوني..

ذو الفـقار:- فقلت لكِ بأنكِ عصبي ، تعرفين مامعنى هذهِ الجملة ؟ ..

-لاا!..

ذو الفـقار:- يلغي العصب جميع وظائف الجسد
عندما ينقطع فيصبح القلب قطعة متصلبة! كما تهرب الروح بعيدًا عن الجسد الخالي من الأعصاب .. هل يصبح للوتين حاجة بغياب العصب ؟ بالطبع لا ، لذلك لم يجرفني السيل كغيري ، ولم أقل لكِ بأنكِ وتيني، أنا جثة هامدة من دونكِ عزيزتي " أنتِ عصبي " .

-ياعُمر عُمرري وفُقاري فدواا لعد شگد هنيالي علئ حُبك الكبير إلية!! أموت عليك وأمنا العذراء ياعوضي يالمحتويني..

طُبع قبلة علئ شفايفي غمرت راسي برگبته بخجَل..

هداني هدية بمناسبة عيد ميلادي وگال ما نسيتچ طبعًا، الهدية قلادة ذهب حرفي وحرفهَ (M،Z) ..

چانت أجمل ليلة تتخَلد من ليالي حياتي ليلةَ كُل شخص عبر عن شوقه وحُبه بطريقتة الخاصة..

(كلمّا شعر باليأس تذكرّ انها موجودة تُشاركه يأسه وحُزنه تُخبئه في قلبها يعود اليها يستند على صَدرها مثلما يعود جندي مُتعب بعد الحَرب
الى وطنه الآمن لكنّ وطنه هو صدرها الدافئ يديها الرقيقة التي تمسح بها على شعره حُضنها الحنون وقلبها الممتلئ بالحُب له هوَّ فقط)

من بين كُل صفناتي أجت عيني بعينه وصفنتَ بيها .. صرت أشوفها كوكب مو مُجرد عيون

گلتله بمَرح هادئ:- فُقاري يا فُقاري..

حضني وجاوبني:" نعم ياصليبي المُميز وبقائي..

-مره ساندرا گالتلي ببداية زواجنا هنيالچ علئ ذو الفقار وحُبه مستحيل رح تلگين مثله رجَل بمعنئ الكلمة يحتويچ ويحبَچ ويقدس الامراة ويعتبرچ قارورته الرقيقة ..

جذابا ثقيلآ لآ يأبه للنساء ولآ يقف ضعيفآ أمامهن
رجلا ناضجا عقله وفكره نظيف ..

رجلا وآثقا من نفسه وبكِ .. ولا يطمع بأملاك غيره .. علآقته محدودة بجنس حوآء مخلصًا حنونًا رزينًا ..

فهذا النوع مـن الرجآل يظل متميزا بشخصيته الجذابة ويبقى وفيا و نادرآ أيضا ولا يمكن أن يخون لآنك ستبقين في عينيه حبه الأزلي وقناعته الدائمة وستعيشين بأعماقه على مر السنين ..

ما چنت مُقدره كلامها واليوم من صفنت بعيونك أجا كلامها علئ بالي وتذكرت كل كلمة گالتها وفعلاً شفت هالكلام بيك وبمواقفك ويايَ صُدگ ثبتت إلية أنت الشخص إلي عوضني ربي بي وما من الممكن تفرط بيه هواي أحبك أني تدري مو؟

ذو الفـقار:- هههههه أووويلي يااابه فدوا اروحلچ أنا يا راحتي..

- من چنت اگولك أنت زوچي سر سعادتي ما چنت اشاقة طلعت صُدگ هههههه بس أنت مو سر سعادتي أنت سعادتي أساسًا ..

ذو الفـقار:- ممممم ساندرا هم گالتلي شيءَ ببداية زواجنا يا قَوتي ..

-سولفلي أحب سوالفَك وكلامك..

ذو الفـقار:- گالتلي ماتيلدا رح تكون الأنسانه إلي رح تحمد رب العالمين عليها وعلئ كل صفة بيها من قوة وحنان وحب وحنية ورح تعوضك عن الناس كلها وفعلاً كلامها ..

أبتسمت بغرور بريئ وگلتله ..

-سأنسيك النِساء ولطفهنّ وأمحو بالوضاءة حسنهنَّ وأملاأ قلبكَ الموهوم حُبًا لتدرك بعد حبّي وهمَهنّ سأُلبسك الغرامَ رداء عزٍ وأُرغم بالإباء أنوفهُنّ لأني طفلةٌ بدهاءِ أنثى سأغلب بالبراءة كيدهنّ ..

غمزلي وجرني لصدرة باسني بشفايفي بقوة..

ذو الفـقار:- تعجبني الأنثى القوية، التي لايضيرها غائب ؛ ولا يعذبها اشتياق، أنثى وضعت حدودا للتعامل معها، أنثى يحسب لها الرجل الف حساب، تعرف متى تتكلم ومتى تصمت، متى تثور ومتى تهدأ، تعرف بين الجرأة والوقاحة، أنثى لا يكسرها سخف مجتمعنا ولا يطغوا عليها رجل أحبچ يابقائي..

أبتسمت بثقة وجاوبتة:" ‏لا احد غيري يليقُ بك
انا التي فُصلت من الله تفصيلاً لتُريح قلبكَ لتُشبع رجولتكَ لتُسعدك الى آخر عُمرك من التي يا رَجُلي تجتمع بها كل النساء من التي تعظّمك
وتراكَ سيّد الرجال من التي تحتمي بك عن العالم وتبكي في حضنها من العالم من يا رَجُلي غيرنا يليقُ بنُدرتنا، بتفرّدنا وبحبنا الرائع !..

- ممممم يحق الچ الغرور يحق بوية..

- هههههه عُمررري..

- أحبچ بوووووويه..

- أحب كلمة بوية منك.. أحس بيها هواي دفو وحنيه..

ذو الفـقار:- أبوية أنتِ..

ماتيلـدا:- أحبك يا عوضي..

خذني بنور حبك قربني بلطفآ
اطفئ ناري بصدى جليدك
او اتركني اذبـه بأشتعال ملمس جسدي
أجعل يداك تلتف حولي حتى تحويني

ولا تبعد شعرك عن خديكَ
دعـني اخذ رحيقك بشهقـتن
ما ابالي أن مُت بين يديكَ

اخطوا لعوالم بقربك ولا تلتف عيني لغيركَ
ياليتك اختصرت تلك المسافة الـتي تشقـينا
ولتكن عيناك ليلي وذراعك وسادتي
ثم تدلعني بهمـسًا في أذني
وتقل لي أحبك ألفًا ولا تقف
وتبتسم أمام عيناي ..

حبي إليكَ هـو احتلالي
هنـالك سفرًا في قلبي
لا زالت تفصح عنه كلماتي ..
لصـدفة تدونت في ورقي والآن تنثر لأحبائي ..

....

للحُب تضحيات .. للحُب حياة وموت، سعادة وحزن كل شيء وجد فيه..

لكن نحن من نخلق تلك الاشياء "ان وجدت الأنانيه " لا وجود لشيء اسمهُ الحُب !!

لكل منا دين ... وانا ديني المسيح.. ولكل منا ربآ واحد " هو الله "

شخصان .. الاول هو الشيطان وجهان لعمله واحد ، مخادع سلب الحب من قلبه ، تناثرت الاشواك في قلبه عندما قتل أرواح ليس لها ذنب حتى اصبح يراوده الانتقام القديم حتى في منامه ... الانتقام ما هو الا احتراق قلب ... واضطراب روح ... وذوبان جسد .. اخذ يبحث عن سبيل لانتقامة وأخذ قطعة الرام الصغيرة .. حتى لقى في خيار طريقة طفلة جننها حبه ..!!
بأسم الحب سوف ينتقم ..وتلك الحوائيه ما هي الا قربان لأنتقامه !! ..

والثاني ..اقسئ من الجبل واشد بروده من الجليد الذي في قمة الجبل ...مريض من محتوى اسمه حواء ... الحُب ما هوى الا مزحه امامه .. هو السلطان والاغا والرئيس ..هو القوى التي سوف تدهس بحُب تلك الحوائية وتذيب جليده ويصبح مجنون بحبهَا والأحن لها وسندها !!

اما هي .. هي تلك الحوائيه التي عشقت النار حتى اكتوت فأطفاها الثلج ... اغرمت بالنار فحكم عليها بالزواج من ذلك الرجل البائس الذي يدعى الاغا ثم تبدأ بتنفيذ الحكم تحت لسان الحُب وتتزوج وترضى ان تكون قربانآ..ما هي الا مجنونة حبها .. لكن كان لها عوضًا كبير وحبًا صادقًا عشقت الاغا وأحبتهُ وأتخذتهُ سندًا وأحتواء ..

بأسم الحُب والفداء يبدأ حُبها
وبأسم الثأر يبدأ الأنتقام ..
لتلون حكايتنا الغريبة والمُثيرة
والشخصيات المُتداخلة ..
والآن أنتهت ✞.

⭐⭐⭐⭐⭐⭐⭐

تم بحمدلله ختام رواية شخوص داخلة بعد رحلة كتابتها دامت ٦ أشهر ❤️

شكرًا لكُل شخص دعم الرواية وصوت وعلق اليوم وصلنا لأخر بارت في رحلتنا بقراءة الأحداث الغامضة🎭

لاتنسون التصويت فجرو هذا البارت بالتفاعل أنتظر تاگاتكم وتعليقاتكم 😍🔥

وارائكم بالرواية بكُل صدق وتقييمكم من ناحية السرد والأحداث ؟💋🤤

أنتظروني في رواية جديدة بأذن الله في العطلة الصيفية لاتنسون متابعة حسابي -NAMARQ

الكاتبـة #نمارق رحيم⚜️

چَا غير أحبكم 🙈♥️.