رواية شوگ و ورد الفصل الخامس والثلاثون 35 - بقلم wad. al.Basha

للكاتبه:  ود الباشا

سلام عليكم اعتذر على التاخير ❤️❤️

"ذنبهُ عظيم من أطفئ شغف إنسانٌ ما في هذه الحيّاة وتركهُ يُصارع التساؤلات ويبحث عن عيُوبٍ في نفسه تُفسر سوء قدره.

غسق: باوعت مصدومه الا شويه ويدعمني نزع النظارت وبقى يباوعلي مبتسم صفح تجاهلته ومشيت دك هورن قوي وبقى ضاغط عليه التفت كزيت على اسناني شتررريد

نحجي شوي

غسق: ماعندي ويا حضرتك حجي ممكن تتوكل

يابه يايمه

غسق: بقيت اباوع علبه شبي هذع مو صااحي حرام بلحرم

صعدي يلاا تره شغلي لفوك راسي وتعنيت اشوف خلقتج

غسق: بابا انت شبييك روح لشغلك منو لازمك ولا توكف بطريقي مره ثانيه عفته ومشيت شخط السياره كدامي كلبي وكف الا شوي يدعمني زمخت بي انتتت عاااقل

بس من اشوفج اتخبل وروح جدي

غسق: استغفر الله

شايفه منكر كدامج

غسق: تره الناس دتباوع علينا روح لطريقك خويه
باوعلي بطرف عينه وشمر جكارته

هواي طولتيها تره وهي كصيره

غسق: شترريد انت ليش تخليني الم عليك الناس باوع يمين ويسار ورجع باوعلي

بيج خير سويها وبعدين انه مو اتفقت وياااج شوكت ما اجي احاجيج وانتي قبلتي

غسق: اي بس بحال عندك كلااام يخص الموضوع مو شوكت ماتجي وشوكت مايعجبك اني اجي وياك غلطان

يابه بعلي اذا نزلت تشوفين وجهي الثاني فحترمي نفسج وصعدي احاجيج

غسق: طلعت جهازي من جنطتي خليته بايدي احتياط كلشي يبدر منه وخليته على رقم غسان يعني بس ادوس يتصل عليه شفته مراح يجوز مني اذا ميحجي
صعدت ومشى السياره سرريع خفف السررررعه وين طاير

مرره ثانيه اذا عليتي صوتتج اكسر اسنانج بحلكج واخليج تاكليهم

غسق: وكف السياره واحجي شعندك

تتذكرين الوجوه الجانت واكفه بيومهم بلشارع
واريدج تعصرين مخج زيين شفتي هيج سياره واكفه قريب

غسق: طلع بجهازه صوره سياره قلصت عيوني باوعتله اني بوكتها ماجنت منتبهه الشي كل همي اسعفه قبل لا يموت يعني مامنتبه لداير مدايري

اذا تعرفين احجي لا تنكرين

غسق:  ماتذكر شي

زين هو ماحجه شي من اخذتو للمستشفى مكاللكم شي

غسق: الرجال جان فااقد حتى عيونه مافتحهم فرك وجه بتوتر صار عندي فضول اعرف شنو يقربله المات
شيقربلك باوعلي وعيونه صايره دم

اخوي

غسق: الله يصبرك ليش شاك مكتوول ليش مادكول حادث وصار وجان حد يومه

اكو هواي اموور تثبت هو مكتول مو حادث واحنه اليكرهونا هوواي. يعني ماكدر بسهوله اكول مجرد حادث وهاهي اطلع الجان سبب من جووه الكاااع

غسق: همست ويا نفسي هو انت بس مطلعني اني من جوه هلكاع وكدرتك عليه تكدر تنزلني

شيقربلج ابو التبرعات الرحتي ويا ذاك اليوم يمكن اسمه غسان

غسق: مراقبني انتت

صدفه

غسق: هاا صدفه ماكو داعي تجذب عليش تراقب تره اني مالي شغل باخوك روح شوف منو السبب بدال ما يوميه طالع بطريقي حتى توبتني بعد ماسوي زينيه لاحد. جر نفس من جكارته

انه اكول احسن لو ماتسوين زينيه بوكتنا هذه ماينفع

غسق: وكف السياره نزلني

اوصلج لبيتج

غسق: ماكو داعي نزلني

يااابه شكد عنوووديه

غسق: مره ثااانيه ماريد اشوف خلقتك كبالي رجاءً
كتلك وفهمتك مالي شغل بقضيه اخوك واتمنى تفهم هلشي مجاوبني وصلنا لباب بيت خاله تعجبت اني مانطيته العنوان شلوون اندله وشلون عرف اني اهنا
باوعت عليه وملامحي مبينه عليها الصدمه اني مانطيتك العنوان شلوون عرفته

ماعتقد شي صعب عليش مصدومه

غسق: انتت مراقبني

اي مو ماعندي شغل وعمل اكعد اراقب زليخه

غسق: باوعتله بطرف عيني اكرر عليك ماااريد اشوفك مره ثانيه

هلشي انه احدده مو انتي وهسه يلا نزلي تاخرت

غسق: نزلت وطبگت باب السياره حيييل عبالك اطلع قهر گلبي بهلطريقه نزل الجامه واشرلي بسيطه عفته ودخلت للبيت مصدومه اكيد ديراقبني منين عرف بسالفه التبرعات ومنين عرف عنوان البيت خفت منه كلش متاكده نيته مو صافيه ناوي على نيه كشره مثل جهرته الكشره
مديت راسي بلمطبخ شفت خاله كاعده تسوي غده شافتني ابتسمت

ام مسره:  الله يساعدج

غسق: ويساعدج

ام مسره:  غيري ملابسج وتعاي تغدي وياي

غسق: دقايق عفتها ورحت بوجهي غسلت بدلت ورجعت عليها كعدنا نتغده سوه

ام مسره:  مامصدكه اكو احد يملي عليه البيت حسيت روحي راح اتخبل بوحدي

غسق: اكتفيت ببتسامه ماعرفت شجاوبها

ام مسره:  مامفكره تحجين ويا ارشد تحلون المشكله الصارت بينكم؟

غسق: بلعت غصتي ويا لگمتي خاله اني وارشد مصايره مشكله بيناتنه ارشد من البدايه غايته جانت طفل واجاني مثل الثعلب بمكر ووهمني بحبه ويكدر ياخذ اليريده نزلت دمعتي واني بقيت بحسره شوفه ابني

ام مسره:  شلون ماحسيتي ممعقوله كل هل ايااام يا بنتي وماحسيتي بي ولا شكيتي بتصرفاته

غسق:  خاله والله لو جنتي شايفته شلون يعاملني دكولين هنيالها على هيج رجال اني محسيت بتصرفاته ولا شكيت وهمني بحبه دللني بس من صرت حامل ابتعد مني شكيت بس هم مااجه ابالي هيج يسوي ويااي مااجه ابالي يحرك گلبي بهلطريقه انتي هم تعرفين ضرووفي وعمامي شسوو بيه مجان عندي غيره

ام مسره:  يايمه والله انه هم من جنت اشوفه اشوف بعيونه نظرات حب بس ماعرفت بي يطلع ثعلب ماكر
يوولي اصلاً هو الخسر جوهره مثلج

غسق: اني الوحيده خسرت
خسرت صحتي وخسرت ابني وخسرت نفسي
مسحت عيونها بثوبها وباوعتلي

ام مسره: سوده عليه ولج يمه حوبه اليتيم مايتعداهم
خلي حملج على ربج

غسق: ذبيت الخاشوكه تعبت خاله اني ام وانتي اكثر وحده حااسه بيه طلعت من المستشفى وابني مو بحضني لوو ميت على الاقل اكول طير بلجنه واصبر روحي صدري نشف وابني ماشرب قطره حليب مني ايام اني الليل كله كاعده اكول هسه جوعان هسه سهران هسه ديبجي افكاار براسي هوواي فوك ماتتخيلين وكل هذه واصبر نفسي عسا ولعل يجي يوم ربي يرحم بحالي ويلين گلب ابو ويرجعه لحظني

ام مسره: مو كال رجعي جان رجعتي لخاطر وليدج يمه وانتي هيج محروك كلبج

غسق: خاله يريدني ارررجع بدون مايسجل الطفل بأسمي يعني يبقيي باسم ريتاج واحتمال اذا بلمستقبل جبت اطفال مو صعبه عليه هم ياخذهم يسجلهم باسمها انيي ماتحمل هلشيي اتحمل فراك ابني وماتحمل انهاان مره ثانيه خاله تعرفين شنو يعني افتح عيني من عمليه وما الگه اي احد يمي تدرين شنووو من تتوجعين وتصيحين احد يجيبلج ابنج تجي السستر دكول اخذو اهله وطلعوو عافني مثل الچلبه وهو يعرف اني ماعندي احد كامت من مكانها حضنتي وبقت تبجي اني هم لكيتها من الله صرت اشهك بحضنها وهي تدعي عليهم بعدها كامت تشوف عمو واني الشهكه بقت بصدري غسلت الامواعين ودخلت للغرفه مر اليوم عادي ثاني يوم طلعت للحضانه سلمت ودخلت ويا الاطفال اروح لغير عالم افصل وياهم
اكو بيهم طفل حيل وكح عمره تقريباً 5 سنوات دائماً عيني عليه اخاف يتعور اليوم صعد على الزحليكه وديلعب التفت شفت وحده من البنات واكفه يمه اطمئنيت التفت العب ويا طفل ثاني وماسمع غير صراخه ركضت عليه والهبطه ماخذه من حيلي حيل
كومته شفت راسه مشكوك كلش خفت عليه لا متاذي اجتي مس رنا تركض من شافته انصدمت الدم تارس وجهه اخذته من ايدي وركضت بي بره كمت ركضت وراها اريد اشوفه اخاف صار بي شي رجلي كامت ترجف بعد ماسيطرت على نفسي كعدت بلكاع اباوع عليهم حايرين بي. مادري رنا منين جابت سياره صعدت بيها واني بعدني بمكاني اجتي وحده ويانه كعدت يمنى

غسق شبيج اصحي مابي شي والله

غسق: مات والله مات شفتي الدم

مابي شي كومي غسلي وجهج وتعاي كعدي خلينا نخابر رنا نفتهم منها ونطي خبر لاهل الطفل

غسق: انتضري يجون وخابري اهله

لا منكدر لازم ننطيهم خبر كلشي يصير

غسق: كمت وياها للمكتب خليت ايدي على راسي وگلبي يدك سريع نرجس خابرت رنا بقيت استمعلها اريد حجايه تبرد كلبي
بس متجاوب شكد دكينه عليها ماكو نرجس دكت على اهل الولد ماكو ربع ساعه وهمه يمنه وجهم لونه مخطوف وعيون الام حمره من البجي

ويين ابنيي

نرجس: جان يلعب بزحليكه ووكع

انتووو شنو شغلكم اهنااا شنوووو فهموووني

نرجس:  ياابه اهدئو ماكو داعي للصياح انتضرو تجي مس رنا وتفاهمو وياها

غسق: زمخ الاب على نرجس من يمي اخترعت

خاااابريها شووفيها ووييين لو اهجم الحضانه على راسكم

غسق: كعدت نرجس تتصل برنا ورنا ماكو مرت ساعه ونص وهي لا تجاوب ولا بينت علما اجتي والطفل بحضنها مبينه الهبطه على وجهه

رنا:  سلام عليكم

غسق: حتى سلام ماردو عليها كعدت شربت ماي والام خلت الطفل بحظنها وتبوس بي كلش اثر بيه هلمنظر
اجه ابالي ابنيي من يبجي من يتعور من يجوع هم يحس اني مو يمه يحس بيه اخاف من يكبر يكرهني بقيت اباوع عليهم ودموعي تجري وامسحهم

رنا:  غسسق تسمعيني وين صافنه

غسق: اعتذر مس ماسمعتج

رنا: الطفل منو جان واكف عنده من وكع

غسق: باوعت على المس الجانت واكفه يمه ترجتني بعيونها مس اني بس طفل ثاني كام يبجي ماكو ثواني عفته وصار الصار مو بقصد والله كمزت ام الطفل من مكانها

شنووو مو بقصددد احنه نطيكم افلللوووس مو بلاااش والله اطلع كل قطره دم وكعت من راسه من عيونكم
اني ادزلكم ابني مطمئنه يجيني راسه مفشوووخ ليييش

غسق: اعتذر والله متكررر والتردي اني حاضره بي

تنفصلييين منا احنه شلووون نطمئن على اطفالنا واكو وحده عديمه مسئوليه اهنا

غسق: باوعت على مس رنا غمضت عيونها بمعنى اسكتي اني هم سكتت مو خوف منها اما مقدره موقفها كأام طلعت وهي وابو يهدون ويردون واحنه ساكتين وحاولنه نحاجيهم بس مانطونا مجال كعدت خليت ايدي على راسي

رنا:  ليش تحملتي للمسئوليه تره الكامرات موجوده ومس سهى هي الجانت واكفه عنده وغفلت عنه

غسق: سكتت ماحجيت مصار شي

رنا: شلون مصار شي غسسق اني بعد ماكدر ابقيج

غسق: باوعتلها بترجي يعني شنو

رنا: مجان لازم تتحملين المسئوليه اني مجبوره افصلج علمود يسكتون ومايشوهون سمعه الحضانه

غسق: بس انتي تعرفين اني محتاجه لكل فلس حالياً
هزت راسها بأسف

رنا: كلش اعتذر منج حبيتج وحبيت شغلج ومعاملتج ويا الاطفال بس بعد الصار تعذريني

غسق: مالحيت وياها  التعب البيه كاافي عليه حاسبتني مال شهر تشكرت منها وطلعت دمعتي بخدي
جريت نفس وباوعت على السما بعز الضهريه والشمس ادك براسي شكرت ربي وكملت مشي علما تعبت واخذت تكسي انطيته عنوان بيت ارشد مادري بالي وين جان بس كل باااالي اشوف ابني هو محتاجني هسه اكيد هو بحاجتي. وصلت نزلت تحاسبت ويا واني اباوع على البيت بگلب محروك دخلت شفت غسان وعمو ابو غسان واكفين بلحديقه تقدم غسان حجه بصدمه

غسان:  غسق شجايبج

غسق: اشوف ابني

غسان: رجعي غسق امشي كداامي

غسق: ماارجع لمكان غصب عنهم يخلوني اشوفه مو بكيفهم والله اشتكي عنهم

غسان: الطفل مووو باسمج شلون تشتكين عنهم

غسق: هم شلووون سجلو باسم ريتااج بدرن موافقتيي والله افضحهم اريد اشوف ابنييي
فرك وجه وباوع على البيت ورجع باوعلي

غسان: امشيي كدامي قبل لا احد يشوووفج وتصير سالفه

غسق: تجاهلته ومشيت شفت باب المطبخ مفتوح دخلت للصاله شفتهم كلهم متجمعين خاله كاعده علقنفه وبايدها سند وعمو وريتاج وارشد ورائد كلهم كاعدين ارشد كاعد بصف ريتاج ومخلي ايده وره ضهرها كلت سلام عليكم وكلهم التفتو عليه مصدومين اني هم مصدومه من نفسي ماتوقعت بيوم ارجع ادخل هذه البيت بعد كل الصار ومتاكده مراح يستقبلوني وراح انهان مثل كل مره بس ابالي اشووف ابني احضنه. ابوسه  الصار بلحضانه حيل اثر بيه

ام ارشد : غسق

ابو ارشد:  استغفر الله انه متاكد هلبت تحببب الاهانه شجااايبج اهنا انتيييي

غسق: اجيت اشوف ابنيي عندك مانع

ابو ارشد:  قنددرا مااالج عدنا طلعيي بره لا اهينج

غسق: موو بكيفج تقربت اخذه من حضن خاله ماحس الا انلزمت من حجابي شفتها ريتاج دفعتها حيل اكسررر ايدج تمديهااا عليه طايحه الحظ

ريتااج:  طلعييي بره هذه ابني مامسموحلج مره ثانيه تجيبين طاااريه على السااانج

غسق: منين اجه ابنج من النحت السويتي لو الشفط
وخررري من وجهي لا اطلع قهري وضيمي بيج

ابو ارشد:  لاا الظاهر انتييي تردين اعيد تربيتج

غسق: مربااايه لدرجه بعمريي مماخذه شي مو الي ولا سالبه حق غيري انت رجال جبير خاف ربك باجر عكبه وراك حساب وكتاب شدكول لربك؟

رائد: طالعلج السااان والله وجايه تنطينا محاظره

غسق: انت لا تدخل محد دايسلك على طرف راد يجي يضربني لزمه ارشد

ارشد:  شتردين

غسق:  اشوف ابني

ارشد:  يمه انطي الها تشوفه وتروح

ابو ارشد:  على جثتي والله ماتاخذه وماتتقرب منه

ريتاج: ارررشد شتحجييي انت ابني ماتاخذه والله اموت نفسي

ارشد:  يااابه شبيكم تشوفه وتروح

ريتاج:  والله دقيقه ماتلزمه امشييي طلعييي بره

ابو ارشد : ماتطلع اذا ماتنهااان

غسق: تقرب عليه واني عيوني على سند بايد خاله يلعب ويطلع اصوات حسيت روحي فرفحت عليه تقربت اريد اشيله واندفعت حيل وكعت ليوره اخذته ريتاج وصعدت ركض فوك مسحت عيوني

ابو ارشد:  لا بارك الله بيج ولا بلساعه الشفناج بيها كووومي طلعي بررره وجه الفكر

غسق: عفته يحجي ماهتميتله وكفت كدام ارشد مسحت دموعي خليني اشوفه ارشد حباب بس نص ساعه والله

ارشد: روحي باجر انه اجيبه الج تشوفي

غسق: يحجي ومايريد ابو يسمعه متجذب عليه

ارشد:  روحي وباجر ادزه بيد الوالده. وغسان انتي مو بيت اهل مسره

غسق: هزيت راسي اي

ارشد:  هاهي باجر هو عندج

غسق: ابتسمت وطلعت وابو يغلط ويحجي عليه بصوت عالي ماهتميت عبالك كال باجر اردلج روحج ميخالف راضيه حتى لو نص ساعه راضيه والله طلعت صار بوجهي غسان ابتسمت من بين دموعي تقرب مني

غسان:  كتلح لا ترحين ذولي مايسكتون

غسق: ارشد كال باجر ادزه الج بايد غسان وخاله
باوعلي متعجب
شبيك والله هو كال

غسان:  ان شالله خير امشي اوصلج

غسق: اخاف اتعبك

غسان:  لا ماكو تعب بطريقي

غسق: تاخذني للسوك اشتريله شكم غرض
ابتسم على ضحكتي وفرحتي اخذني لمجمع بي مجموعه محلات نزلت لمحل اطفال وهو نزل وياي اخذتله كم قطعه ملابس ولعبتين كلش حلوات تحاسبت وطلعت طايره من الفرح رجعت لبيت خاله ام مسره نزل وياي غسان سلم على خاله وراح دخلت شوفت الغراض الخاله واني احجيلها باجر راح يجيبه اشوفه رفعت راسي شفته تباوعلي تبجي وتمسح بعيونها

ام مسره:  لا تثقين بي غسق خايفه عليج مبين هذه مكاار ماينكدرله وانتي على نياتج

غسق: ماعندي شي ويا خاله والله بس اشوف اني ارتاح وخليسوي اليسوي مايهمني كمت صعدت الغراض مشى اليوم بطيى بلشافعات اجه الليل ونمت ثاني يوم الصبح سئلتني خاله ليش مارحت للحضانه حجيتلها كلشي لامتني شلون هيج اسوي واخسر شغلي

ام مسره:  يا امي مايصير السويتي انتي شلون تفرين السالفه على نفسج بلكت الطفل صار بي شي طلع متاذي براسه تخربط عليهم بليل يجون اهله يلزمون ركبتج وانتي بطرگ روحج فكري يا امي

غسق: خاله والله ترجتني بعيونها واني ادري بيها حالتهم ضعيفه وعدها اخوها مريض مافكرت بشي عقلي وكف

ام مسره:  مره ثانيه فكري لا تخلين مشاعرج تغلبج بكلشي تتاذين

غسق: اكتفيت بهز راسي وفعلاً اني الوحيده الاتاذيت وخسرت شغلي المحتاجته ولازم هم ارجع افتر وادور على شغل فركت وجهي بتوتر وفتحت شعري ورجعت سديته عيني على الباب بلهفه
للضهر انتضر وماكو للعصر وماكو كعدت اباب المطبخ ابجي بشهكه وخاله يم خالو ابو مسره احس كلبي يريد يوكف من القهر اندكت الباب لبست حجابي وتقربت فتحته شفت خاله لازمته لكفته من ايدها بقيت ابوس بي وهو مستغرب مبرطم يريد يبجي دخلت جوه حتئ علئ خاله ماسلمت طلعت خاله ام مسره استقبلتها ودخلتها جوه خليته بحضني وطلعتله الالعاب

كمت بست خاله سلمت عليها عذريني والله ماصدكت جبتوو كلت اكيد نسوو

ام ارشد:  حقج يمه الوم اليلومج والله

ام مسره : والله يا ام ارشد من الصبح مكابله الباب وكاعده وللعصر كامت تبجي كالت بعد مايجيبو الي

ام ارشد:  والله اكلت راس ارشد كل اشوي واكله يلا اخذني الها غسان طلعتله شغله مكدر يجيبني هو جابني للباب وراح

ام مسره: الله يهدي النفوس ويصفي الكلوب

غسق: عفتهم ورحت للمطبخ اجيب ضيافه وصلت لباب الصاله واسمع خاله ام ارشد تحاجي خاله ام مسره

ام ارشد: بلكت تحاجيها يا ام مسره ترجع لبيتها احسن من هذه العذاب العايشته وحسرتها على ابنها

ام مسره: والله يا خيه مادري شكلج بس المسوي بيها ابو سند مو قليل وهي يتيمه والله دمعتها تعثر وهو حارك كلبها حرك على ابنها وكل ليله دمعتها على خدها

ام ارشد:  انه احبها ويشهد الله علي وماتمنالها الاذيه وهووواي حجيت وكلت وتعاركت علمود منوصل لهل مرحله محد سمع مني وانه اكلج ومخايفه ساس البله رجلي ابو ارشد هو سبب بكلشي صار وانه مراضيه عليه وعلى اليسوي يابه شنو هو يحب ريتاج ومايرضئ يزعلها

ام مسره:  بس مو علئ حساب هليتيمه هاي تخيلي حتئ من شغلها نفصلت وهي حامده الله وشكارته ومشاكيه لاحد اذا ميريدها جان عافها من البدايه ليش تزوجها ووهمها بحبه الها و بحلام ورديه وتالي هيج يسوي بيها

ام ارشد:  هو هسه متندم ويتمنى يرجعها

غسق: عفتهم ورحت بدلت الجاي برد ورجعت عليهم وكلامهم يرن براسي لحظه ضعف تمنيت ارجع لحظه انكسار بس هم ارجع واكول مراح يفيد اليكسر مره مايهمه اذا كسر الف مره اخذت ابني وكعدت على صفحه العب ويا واضحك ماردته يبجي ويستغرب مني وفعلاً ماستغرب بس اول ما شافني حبيب كلبي اكثر شي ينطي شبهه لارشد نفس العيون والخشم والگصه
ساعتين ودك جهاز خاله
شفتها كامت لو احس روحي طلعت

ام ارشد:  صار لازم نروح

غسق: خاله خلي اليوم يمي الله عليج والله كلبي مفرفح علييه اجتي باستني وحضنتني

ام ارشد:  والله يا امي اتمنى وادعي بكل صلاه تبقيت يم ابنج ويكبر على ايدج بس وروح ابوي ارشد انطاني ساعه محدده اجي بيها ونرجع للبيت

غسق: خاله مداتحمل فراگه والله گلبي ياذيني
بقت تبجي وياي علما اخذته وطلعت للكراج وكفت اباب الصاله ابجي واحس روحي راح تروح وياها طلعت صعدت للغرفه ماريد ابجي كدام خاله ام مسره وتتاذه وهي مره مريضه تمددت فتحت جف ايدي كلاوه بقى عندي بقيت اشتم ريحته علما نمت واني حاظنته كعدت الصبح بلكوه فتحت عيني من كثر الدموع المتيبسه بعيني غسلت وجهي شفت الساعه ب 10. نزلت كعدت كبال خاله بست راسها محتاجه شي اسوي

ام مسره:  لا سلامتج ليش هيج عيونج مورمه يا بنتي

غسق: ماكو شي بِس البارحه مانمت زين هزت راسها ماحجت شي كمت نضفت الببيت لملمته وغسلت الكرراج دخلت دكيت على مسره تسالمنا

مسره: شبي صوتج

غسق: مابي شي

مسره:  مو انه اعرفج صوتج معاجبني

غسق: البارحه شفت سند وگلبي مشتعل نار عليه

مسره:  وانه اكول من الصبح يتعاركون يمكن عرفو جايبي الج. وگبت العيطه

غسق: مادري بس احس گلبي صاير نار عليه ودافكر ارجع علموده

مسره:  مراح تحصلين شي اذا ترجعين تره ريتاج ماتخليج تشوفين اضفر منه والله ابقي كاعده وساكته احسن لج

غسق: ليش؟

مسره: غسق ريتاج مو طبيعيه احس حبها بخبال واخاف تااذيج ابتعدي منها وابنج اول وتالي يرجع عليج

غسق: اخاف دتاذي اخاف محتاجلي

مسره: والله ام ارشد ممخليته بحاجه شي بلكاع متخلي

غسق: اريد ادور شغل مادري وين اروح منين اجي

مسره:  والحضانه

غسق: سولفتلها الصار

مسره: استغفر الله بابا ليش هيج انتي

غسق: مافكرت هيج يصير

مسره: اكول الغسان يشوفلج شغله زينه ابقي بلبيت انتي لا طلعين

غسق: ياريت والله ابقى معتمده عليج بقينه نسولف ختمته وياها مرت الايام عادي وهاي اسبوعين من اخر مره شفت بيها سند وشغل بعدني ملاكيه وغسان يكول لا تستعجلين اليوم مثل كل يوم مخابره مسره واحجي وياها ومندمجين نسولف على الدراسه دكول رجعي واني اكللها شلون ارجع واني فلس ماعندي معقوله اخلي خاله تصرف عليه

مسره: شكو بيها هيه على اللكمه

غسق: مستحيل مسره اني كاعده ومداشتغل واحس روحي ثكيله عليها ورغم الله شاهد مامحسستني بشي

مسره: انتي ذبحتيني والله ابقي هيج وضيعي كلشي من ايديج والمشكله اهل الشغل كلهم يردون شهادات

غسق: اكيد اكو شغله تقبلني مثل ما اني انتضر والله كريم شسوي دتريد تحجي وسمعت صوت هوسه يمها وصياح مسره شكو شنو هلصوت

مسره: ماعرف من الكراج ديلا اروح اشوف شكو

غسق: ابقي على الخط لا تكطعي
بقت على الخط كلما تتقرب من الكراج كلما الصوت يصير اقوه كلبي نغزني سمعت صوت شهكه مسره

مسره:  يييمه اسم الله شبييي

غسق: مسرره شكو شصاير شنو هلصوت فدووه
مجاوبتني واني تخبلت

مسره: ولج يمه خاله فدوه شبي ليش هيج راسه مفتوح شصاير

غسق: مسرررره الووووو تسمعيني
سمعت خاله دكللها

ام ارشد:  وكع يمه سوده بوجهي وكع من الدرج ولج راح وليدي راااح سوده بوجهج غسق راح وليدج ولج ييييمه
ربييي بجاه هليتيمه عندددك باوع لحالها وردلها ابنها ساالم

غسق: بقيت فاتحه عيني وكلماتها تتردد باذني اريد استوعب اريد اركز ماكو حتى الموبايل وكع من ايدي كعدت بلكاع مصدومه وكع من الدرج

يتبع <>
"أخاف أن يفرح قلبي مجددًا بأشياء ستتركني."