رواية شوگ و ورد الفصل التاسع 9 - بقلم wad. al.Basha

للكاتبه: ود الباشا

تعبان
مثل الهوه
بس  يمشي  ماراكد ..
ونعسان
مثل الضوه
كل عمره ضل گاعد !

ابو ارشد: علئ يا ساعه ترجع لهلها زحمه نطلع بسوواد الوجهه

غسق: خليت ايدي على حلگي اكتم شهگتي رجعت ليوره كعدت علئ السرير كمت اضرب بثنين ايدي علئ رجلي ياااا اهل ارجعلهم يا اهل كلهم عافوووني كلهم مايردوونيي بااابا وينك ليش هيج سويت بيه ليش هيج اذيتني لووو ادري ميييته ولا كايلتلك اخذنه سفره محتاجتلك لازم اطلع اهنا اني مضايجه منهم بلعكس حقهم يردون ياخذون راحتهم ابيتهم
لازم اطلع خليت ايدي على راسي ويين اروح المن انطي وجهي غمضت عيوني بتعب اروح لخليل ينطيني حصتي من فلوس بابا واشوفلي بيت واكعد وانجب بي
مسحت دموعي يجي واحجي ويا هوه من يمه يخابر عمو ينطي خبر ماااريد احجي ويا احد كلهمم سبب اذيتي بقيت انتضر ارشد يرجع احجي ويا
شلون راح اعرف رجع واني حابسه نفسي مادري فتحت الباب على كيفي ماكو احد طلعت للحديقه شفت غسان كاعد ولازم بيده كتاب شافني ابتسم
رديتله الابتسامه شلونك

غسان:  الحمدالله
انتي شونج شخبارج بدراستج

غسق:  هزيت راسي ماشي الحال بس حالياً مكاعد اداوم

غسان:  ليش

غسق:  مادري شعور بداخلي يكلي ابتعدي من كلشي

غسان:  صاير وياج شي لا تحسبي فضول بس ممكن اساعدج

غسق:  الموته يرجعون؟
باوعلي متعجب

غسان:  الميت مايرجع غسق بس هوه حي يرزق يم رب العالمين وحي يرزق بگلوبنه ياكل ويشرب ويانه ويفرح على فرحتنه ويحزن على حزنه ويحس بينه

غسق:  دمعت عيني بس اني متت وراهم. بقيت بس جسد يمشي بدون روح كام اليسوه والمايسوه يلطش بيه من بعدهم انت مو دكول الميت يحس؟

غسان:  اي طبعاً يحس بينه يحس بحبابه ووجع گلبهم عليه

غسق: يعني ديحسون اني متااذيه ديشووفوني داحترك ؟ ليش مياخذوني يمهم ليش عاافووني اتعذب وحدي ماااريد اعيش بدونهم

غسان:  مسحي دموعج انتي دتعترضين على حگمة ربج وحرام الددكولي كلمن يومه وساعته وانتي خبزتج باقيه بلدنيا ومتاكد اكو ايام حلوه منتضرتج ايام تنسيج التعب ولا تنسين كلام رب العالمين
بسم الله الرحمن الرحيم
(إِنَّمَا يُوَفَّى الصَّابِرُونَ أَجْرَهُمْ بِغَيْرِ حِسَابٍ)
(وسيجعل الله بعد العسر يسراً)
صدق الله العظيم
اذكري الله وذبي حملج عليه لا تفكرين بشي وتحملين نفسج فوك طاقتها انتي راح تاكلين نصيبج من هلحياة راضيه او لا اقتنعي بحياتج وعيشي كل لحظه منها بفرح ولا تفكرين بلماضي وتضيعين الحاظر
والله يا غسق احنه عايشين بنعمه ومدنحس بيها
اكو ناس لو تشوفيها تسجدين شكر لرب العالمين على حياتج وعلى كلشي صاير وياج مرات انروح حمله مساعدات لمناطق الفقيره لو تشوفيهم شلون عاايشين انه مادري شصاير وياج ولا ادري شعشتي بحياتج بس تعالي وياي فديوم نروحلهم وشوفيهم صدكيني راح تحبين حياتج وتحمدين الله عليها وتغيرين نظرتج للحياة

غسق: شوكت تروح

غسان:  بيوم الاروح انطيج علم

غسق:  سمعت صوت خطوات ورانا التفت ارشد
وكف يمنا

ارشد:  ماعندك شغل غسان

غسان: محتاج شي

ارشد: لا سلامتك بس ابوك راد كم شغله للحديقه ياريت تروح تجيبهن

غسان: اي صار يلا اترخص

غسق: الله وياك راح كمت اني هم ادخل جوه

ارشد: وين؟

غسق: جوه

ارشد: انه مو محذرج ماتكعدين يم غسان؟

غسق: باوعتله بطرف عيني عايش الدور حضرتك؟
انتت لا ابوي ولا عمي ولا خالي ولا اخوي ولا ابن عمي شكوو تحاسبني خليك بنفسك ومالك شغل بيه
رفع حاجبه وكعد علئ الكرسي وخله رجله على الطبله

ارشد:  ليش تعاندين باباتي؟

غسق:  صفنت بوجه

ارشد:  احجي لمصلحتج ماعندي شي وياج
المهم عوفينه من هلموضوع ليش مدترحين لمدرستج

غسق:  ماريد اروح نزلت راسي متوتره وكلامه يوترني اكثر

ارشد:  السبب؟

غسق:  ماكو سبب كارهه المدرسه وخلص

ارشد:  كارهه مستقبلج؟

غسق:  هههه ضحكتني الماعنده اهل ماعنده وطن والماعنده وطن ماعنده مستقبل

ارشد:  شنو هل يأس العندج كولي ياالله

غسق: مو يأس استاذ ارشد حقيقه الماعنده اهل بعتباره ماعنده وطن والماعنده وطن ماعنده مستقبل واني احمد الله واشكره 3 ماعندي

ارشد: ارجعي لدواامج تتغير نفسيتج لو تبقين هيج اطگج كأبه للظالين

غسق:  الله كريم اكدر احجي وياك بموضوع

ارشد:  اي اسمعج

غسق: اريد حصتي من ورث بابا تكدر تساعدني؟

ارشد:  يجي عمج وهوه يساعدج بهلموضوع

غسق:  ماااعندي عم وحتى مساعدتك هم ماريدها اتررخص عفته ومشييت صاحني مره وحده بس ماهتميت دخلت جوه صارت بوجهي ريتاج باوعتلي صفح عبرتها ودخلت للغرفه مرت الايام وصار اسبوعين لا حاجيه ويا عمو ولا اعرف اخباره وحابسه روحي بهلغرفه تجي خاله تحجي وياي لحد ماتمل وترووح
وارشد ماحجيت ويا بعد كلت باجر ارجع لدراستي التهي بيها شويه اختنكت من الغرفه وكعدت الاربع حياطين   حضرت جنطتي وملابس الدوام وكعدت
شويه وسمعت صوت هوسه وضحك صار عندي فضول بس ماتجرئت افتح الباب ابقى غريبه عنهم رجعت كعدت واني الفضوول ماكلني لليل نفتحت الباب دخلت خاله مبتسمه

ام ارشد:  كومي ييمه تعشي وياانه مامليتي وحدج بهلغرفه هاي

غسق:  كمت بدون ما احجي جوعانه طلعت وياها دخلنه للمطبخ شفت مريه ورجال كبار بلعمر وثنين ولد شباب وبنيه اول مره اشوفهم سلمت وكعدت

ابو ريتاج:  ضيفتكم ماعرفتونه؟

غسق:  بلعت ريگي بالله بصفتي شنو يعرفوني صرت هدوتني

ابو ارشد:  بنت صديق قريب كلش عليه سافر وخلاها يمي

ابو ريتاج:  تشرفت بنتي

غسق:  اكتفيت ببتسامه لو باقيه مطموره بلغرفه اشرفلي حتى اكل استحي اكل شويه وترخصت منهم

ام ارشد:  ماكلتي

غسق:  عاشت ايدج خاله شبعت
دخلت جوه احس بروحي مخنوگه طلعت من باب الاستقبال للحديقه كعدت بزويه مانشاف بيها

بقيت صافنه على السما بابا يكولون انت دتشوفني وتحس بيه وبلديصير وياي شفت اخووانك شسوو بيه مخليني يم ناس غرربه بابا ترضاااها بلعت غصتي ساعدني مسحت دموعي حسيت واحد كعد يمي التفت غسان مبتسم بوجهي

غسان:  عليش هلدمووع منو وياج؟

غسق: مخنوگه

غسان: اذا تردين احجيلي علمود ترتاحيين لا تكتمين بگلبج

غسق: شحجيلك ليش اني مفتهمه الديصير وياي علمود احجي للمقابيل وافهمه طبك حواجبه

غسان: براحتج بس شوكت ماحبيتي تحجين انه موجود

غسق:  ماتقصر نويت ارجع للدوام

غسان:  عين العقل والله باجر اداومين

غسق:  ابتسمت اي انت اول واحد يدري

غسان:  چا شلون صديق جيس حب المفروض ادري اول باوول

غسق:  ردت احجي وسمعنئ صوت ورانه يصيح باسمه
التفتنه وشفت رائد

رائد:  صار ساعه ادور عليك

غسان:  محتاج شي

رائد:  خوش مختلي

غسق:  حجاها وغمزله

غسان:  مثل اختي لا يشطح بالك بعيد

رائد:  ههههههههههه اييي اختك بلرضاعه خيوولن المهم تعال وصلنه

غسان:  تدلل

رائد:  منتضريك

غسق:  راح تقرب غسان ومبين هم ضاج من كلامه

غسان:  لا تفكرين بكلامه صدگيني حاسبج حسبة اخيتي

غسق:  ماحجيت شي راح بقيت اتگرضم بمكاني شفت خيال ورايه وصوت يحمحم التفت ارشد اخاف ناقصني كملت

ارشد:  كاعده اهنا اليوم ؟

غسق: عندك مانع؟

ارشد:  لا ابد براحتج وين مايعجبج
محتاجه شي

غسق:  باوعتله صفح مادري ليش احسه ثكيل على المعده ومااطيق اشوف رگعه وجهه باجر اداوم

ارشد:  خوش خطوه

غسق: عمو خابرك رفع تك حاجب

ارشد:  يا عم مو كلتي ماعندي عم؟

غسق:  همست ويا نفسي فوك ما مكروهه مستفززز هم
ماتوقعته سمعني بس طگني بخزره تاكدت سامعني
ماحجيت شي كمت نكتت ملابسي وترخصت منه صاحني وكفت

ارشد:  حجابج وين؟

غسق:  مو محجبه اني

ارشد:  تلبسيي ومن ترحين يم عمج عوود انزعي

غسق:  انت هسه كلت ماعندي عم منين اجه هسه
بقى يباوع عليه عفته ودخلت جوه گبل لغرفتي لفيت راسي ونمت
كعدت ثاني يوم مالي وهس للمدرسه جرجرت بروحي تجرجر علما حضرت نفسي وطلعت صبحت عليهم باوعلي بطرف عينه

ارشد:  السايق منتضرج بره

غسق:  هزيت راسي وطلعت ركبت السياره ودمعتي بطرف عيني وصلت للمدرسه دخلت للصف اكو بنيه حبابه اسمها دانه اخذت منها الدروس الفاتتني وبقيت اراجع واكتب يوم متعب خلص الدوام طلعت انتضر السايق بره واتلفت خفت خليل يرجع يجي ويكرر السواء بيه رفعت راسي شفته اجه ركبت بسرعه

ابو غايب:  تاخرت عليج

غسق:  لا عمو بوكتك وصلني للبيت دخلت شفتهم مجتمعين كلهم بلحديقه ويشوون مشاوي تقربت سلمت وسحبت نفسي للغرفه غيرت ملابسي وجريت نفس طشرت كتبي ودفاتري وكعدت بنصهم جريت نفس بتعب وبديت ادرس تقريباً ساعه ونص وندكت الباب خاله

ام ارشد:  يلا يمه كومي اكلي سندي نفسج

غسق:  ابتسمت مجوعانه خاله بلعافيه

ام ارشد: ماكو مجوعانه يلا بنتي يلا اجيتي شحلاتج صفيتي عظم اليشوفج يكول مدنطيج اكل تاكلين

غسق:  استحيت منها وكمت وياها صار بوجهنه اخو ريتاج باوعلي من فوك ليجوه دنجت راسي بسااع اخاف يفهمني غلط فارشين بره حبيت الاجواء كعدت بصف خاله يسولفون ويضحكون رائد غص بلاكل من كثر ماضحك وارشد كام يضرب بضهره

رائد:  كااافي موووو ضهري راح هوه هييج

ارشد:  فوكاها

رائد:  غير زوعتني العافيه دكول مو ايييد متعلمه على التكفخ

غسق:  دنجت راسي واضحك على طريقه كلامهم دكول جهال انتبهت على اخت ريتاج عرفت منهم اسمها ريم عينها على رائد وهوه ولا يمه درت وجهي لصفحه الثانيه شفت اخو ريتاج مركز عيونه عليه ترخصت منهم وكمت وترني

ام ارشد:  مااكلتي شي

غسق:  شبعت خاله بلعافيه

ام ارشد: اوكفي اسويلج لفه سندي بيها گلبج

غسق:  انطتني لفه اخذتها ورجعت للبيت داريد ادخل غرفتي وسمعت صوت ورايه يصيحني درت وجهي نفسه اخوها شكد عينه صلفه اني عفت الكعده من وراء تالي يلحكني
تقرب وكف كبالي

اكدر احجي وياج؟

غسق:  هزيت راسي اي

اهلج شوكت يرجعون من السفر؟

غسق:  ضيگت عيني بستغراب
ليش؟
حگ شعره

الصراحه وبدون لف ودوران اجيج من الاخير عجبتيني واريد اخطبج واتمنى قبل لا تجاوبين تفكرين

غسق:  ردت احجي واجه ارشد دگ على جتفه

ارشد: شو اهنا. ثامر اكو شي

ثامر:  لا حبيب سلامتك

ارشد:  يردوك الاهل

ثامر:  اي رايح

غسق:  راح باوعلي ارشد

ارشد:  شنو الموضوع اليريدج تفكرررين بي؟ 

غسق: ماكو موضوع
عفته ودرت وجهي ادخل للغرف ونتر بيه

ارشد:  موووو داكل قنادر وياج اتجاوبين مو ديرين وجهج

غسق:  اول شي ماالك حق تصيح عليه ثاني شي مايخصك شنو الراده مني رفع اصبعه بوجهي

ارشد:  مااادامج ابيتتتي غصب عنج يخصني

غسق:  نرفزني حسسني مسوي منيه عليه مكعدني ابيته شرايد انت؟ كعدتي يمكم مضايقتك؟ اخذني لبيت عمي

ارشد:  لوووو عممج بي خير مجان خلاج يمي كل هل ايام

غسق:  بقيت فاتحه عيني بصدمه قصده عمامي بلا غيره وشرف وفعلاً هلشي كلامه صح
بقيت صافنه بعيونه اريد احجي بس احس الكلام انبلع عندي دخلت للغرفه وقفلت الباب كلامه يوجع لو اني صايره حساسه لاا اكيد كلامه يوجع فعلاً لو براسهم ذرة غيره ميخلوني اكعد اهنا ساعه وحده
بقت دمعتي بعيني لا راضيه تنزل ولا راضيه تروح
غمضت عيوني بتعب ورجعت راسي على الحايط
باجر لازم ارووح لعمي محمد مستعده اتحمل كلشييي من مرررته ولا ابقى اهنا مسحت دموعي وبديت ادرس لليل خلصت احس بروحي مخنوكه ماحبيت اطلع بلحديقه اريد اطلع بره رحت على غسان سألت امه مجاوبتني مادري ليش تكرهني داريد ارجع للبيت وصار كبالي

غسان:  هلا والله وانه اكول صفحتنه منوره

غسق:  ههههههه بنورك

غسان:  بيج شي

غسق:  نكدر نطلع شويه

غسان:  وين

غسق:  مادري نفتر ضايجه اذا تكدر طبعاً

غسان:  مو تدللين اصبري هسه اجيج

غسق:  وكفت انتضره سمعت حمحمه من ورايه التفت شفت رائد

رائد:  حياالله واكفه اهنا؟

غسق:  اي منتضره غسان هز راسه
اجه تسالم ويا

رائد:  وين رايح

غسان: رايحين نفتر شويه عندك شي

رائد:  لا حبيبي اخذ راحتك

غسق:  حجاها وغمزله باوعت على غسان اني بطلت عندي دراسه غير يوم ان شالله
عفته ومشيت سريع بدون ما اسمع جوابه
شكد نذل هذه الاسمه رائد اخلص من اخو يطلعلي هوه
دخلت جوه بعصبيه صارت كبالي ريتاج

ريتاج: اهلج مايفكرون يجون ياخذوج بعد؟
لو عندي چلب هم ماخلي كل هلفتره بيت ناس غربه
مو ادور ابنيه شابه

ثامر: ريتااااج شهلحجييي

غسق:  عفتهم ودخلت حجايتها ترن براسي لو عندي جلب ماخلي كل هلفتره بيت ناس غربه
كرفصت على نفسي وبقيت ابجي ماحسيت شلون نمت لليل كعدت راسي مصدع كمت غسلت وجهي جريت نفس طلعت سألت خاله على ارشد كالت كاعدين بلحديقه طلعت شفتهم كلهم مجتمعين نراكيل وطاولي كل واحد ضحكته شاكه حلگه حتئ غسان وياهم وكفت كبال ارشد بقى يباوعلي اكدر احجي وياااك

ارشد:  دخلي هسه اجي

غسق:  هسه اريد احجي وياك كام وكف

ارشد:  امشي

غسق:  داريد امشي وسمعت رائد يكول الغسان بضحكه

رائد : خلصص وكتك غسااان

غسق:  استجمعت كل قوتي ورجعت وكفت كباله انتتت ماتستحييي؟ ؟
طبك حواجبه وبقى يباوعلي بعصبيه
اشر على روحه

رائد:  اني

غسق:  ايي انت ماتستحي تره اني مو مثل ما انت مفكر وغسااان مثل اخوووي ولا تاخذ الناااس كلها بوصاخه عيونك وگلبك اذا انت هيج وصخ مو شرط كلها مثلك ماكو داعي كلما تشوفني تشمر حجااايه سخيفه مثلك انسحبت من ايددي وهوه بقى صافن بوجهي

رائد:  ارررشد دقيقه انتضرررر

غسق:  وكفنه باوعت عليه بعصبيه

رائد:  شهل اكلان التبن الهسه اكلتيييي

غسق:  احترم ولا تغلط

رائد:  من احترم غير المقابيل يكون محترم

غسق:  رفعت اصبعي بوجه محترررمه وغصب عنگ رفع ايده راد يضربني لزمه ارشد

ارشد:  شو دتاكلين قنادر هواي شصاير غير نفتهم

رائد:  ماتحجي لاان اصلاً مصاااير شييي انت شموووازيك ومخلي اخت خليل المدمن  يمك اشمرها على عمامها فوكاها معاجبها وتتجاوووز بنت السطل

ارشد:  رااااائد ارجع لمكانك

غسق:  ماااكو غيرك سطلل لا تغلط حقييررر
هجم عليه راد يضربني لزمه ارشد

ارشد:  روح اكعددد عوفها

رائد: دقيقه ماتبقى اهنا هسه تااااخذها لاخوها يكوو...... عليهااااا

ارشد:  رائد الساانك ضبه لا  تفضحنا منا اخوان ريتاج روووح اكعد بعدين نتفاهم

غسق:  راح وتقرب ارشد لزمني من ايدي حسيتها انخلعت
رحنه لاخر الحديقه مسحت دموعي

ارشد:  شهل استهتاااار؟ ممكن تفهميني شصايررررر

غسق:  كلما يشوفني يذب حجااايه ويلمح اني موووزينه

ارشد:  هوه شوووكت شااايفج

غسق: االضهر جنت داحجي ويا غساان وهوه واكف يغمز لغسان وهسه يكله خلص وكتك

ارشد:  وانتييي شعندج يم غسان االضهر

غسق:  ميخصك

ارشد:  شوفي تره انه منقهرلج وساكتلج وكتاب الله اخذج لخليل وانتي ادره بلباقي السااانج بلعيييي والله على السويتي هسه والسااانج الطويل  بنص الزلم لو بداله افلقج فلق

غسق:  افلق اخوك احسن يا مطي حجيتها  بهمس بس حضي خلا يسمعني

ارشد:  شكلتي؟  ياهو هذه المطي؟ ؟

غسق: فتحت عيوني بوجه عيوني منا تحركني ويوجعني من البجي البجيته

ارشد: منووو المطييي لج ادبسزززز

غسق:  اني

ارشد: شنوووو انتي

غسق:  اني اني مطيه قصدي ابتسم ودار وجه

ارشد: ولييي من خلقتي رگعه وجهج ماررريد اشووفها

غسق:  اريد احجي ويااك

ارشد:  استغفر الله احجيي فضينيي بلوووه ووكعتي على راسي

غسق:  اخذني يم عمي ممجبووور بيه

ارشد:  احجي يابه احجي

غسق:  اريد اخابر عمووو احجي ويا علمود ارجع يم عمو محمد

ارشد:  وحضرتج هيج واثقه عمج محمد الشفيه يستقبلج !

غسق:  بلعت ريك اخذني ومااالك علااقه يستقبلني او لا

ارشد:  وعمج الكاتل روحه يسحبج عنده ؟

غسق: اني بعدين احجي ويا وعادي من يكمل المعامله يكدر يسحبني من بيت عمي

ارشد:  دخلي جوه لا اطلع ضيمي بيييج

غسق:  مسحت عيوني زين اريد احجي ويا عمو انطيني موبايلك طلع الجهاز فتحه واتصل بعمو انطانيا

ارشد:  فضيني

غسق:  رحت بعيد عنه كعدت بنص الحشيش
شويه وجاوب عمو

علاء: هلا بلحبيب شلونك بشرني غسق شونها

غسق:  عمو اني غسق

علاء: شلونج بنتي بشريني شلون صرتي ارشد كال تعبانه ذيج الفتره

غسق:  موزينه عمو فدوه خابر عمي محمد اروح يمه علما انت تسحبني

علاء: غسق رجعنا لنفس الاسطوانه

غسق:  ياا اسطوانه عمو حبابه روحي دتطلع اني محد ديحس بيه زييين خاابر خليل ينطيني حصتي من بيت بابا علموود اكعد وانجب بي بعد لا منيتك ولا منيه غيررررك

علاء: غسسق الساااانج ضبييي وطلعه مناك مااااكو علماااا اجي اني اخذذذج اصبررري مابقى ششي بنتي لا تاذيني

غسق:  عمووو ساعه ماريد ابقى اهنا حباب فدوه رحتلك شوفلي حل

علاء: عمو حبيبتي انتي ثقي بالله خايف عليج اني اخوووج غركااان وماريده يغرگج ويا وعمج مرته تكرهج وراح تشوفج نجوم الضهر وهوه اصلاً مايريدج

غسق:  يعنييي محد يريدني شكوووو مخليني عند الناس الغربه راح اروح يم خليل اخذ حصتي منه وادبر روحي انت هم عمو لا تاذي وتعب  نفسك اكثر وياي

علاء: جرررربي توصلين لخليل رجلج اكسرررها كتلج مبقى شي تحملي

غسق:  مااااتحمل عمو مااااتحمل دقيقه زايده اهنااا

علاء: انطيني ارشد

غسق: شتريد منه

علاء: اصخم وجهي ويااا انطينييي

غسق:  تقربت منه واكف مخلي ايد بجيبه وايد الثانيه يدخن بيها انطيته الموبايل عمو يريد يحجي ويا اخذ مني سلم على عمو وبقى ساكت يسمعله

ارشد:  تدلل حبيبي
بعيوني صار تأمرني امر

غسق:  سد الخط وباوعلي

ارشد:  مثل البنيه الحبابه اديرين وجهج گبل لغرفتج تكملين دروسج

غسق:  شگال عموو

ارشد:  تردين ترحين لخليل؟

غسق:  گلبي دگ بخووف اي مااريد ابقى اهنا

ارشد:  تعااي مبين انتي غبيه ماتفتهمين بلحجي الا طگ بطگ

غسق: لا تتجاااوز

ارشد:  كعدي بابا تالي عمري الزعاطيط عليه
اسمعيني وفتحيلي اذناتج زيييين لا تخليني اعييييد اكثر
اخووووج معتاااد مخدرات اخوووج يقشمر على البنات ياخذهن وهسه هوه مطلووب اخوج غرگان من جدمه لراسه بلدين اخوج على يا ساعه الديانه تخلي طلقه براسه وتكتله
واذا ترحيله احسبي 3 ايام مو اكثر يبيعج الج هم لان واحد لا ذمه ولا ضمير ولا غيره انه ماعندي شي وياج لو ما عمج صديق عزيز عليه وموصيني بيج. جان من زمان اخذتج اله علمووو اتوووبين من اعنااادج

غسق: مسحت دموعي اخذني يم عمو

ارشد:  شبيج  انتي تفتهمين الحجي لو انه صار ساعه احاجي روحي عمج مايريدج تردين تتاكدين اكثر؟

غسق:  ابقى بنت اخووو مجبور بيه

ارشد:  دمشييي لبسي شي وتعالي منتضرج بسياره

غسق:  ويين

ارشد:  بعدين تعرفين استعجليي

غسق:  رحت بدلت بسرعه وطلعت صارت بوجهي ريتاج

ريتاج:  ويين؟

غسق:  ماعرفت شجاوبها شفت ارشد جاي
صاح بيه استعجل تقربت منه لزمت ايده

ريتاج: وين تروح حبيبي

ارشد:  رايحين بشغله

ريتاج:  اجيي وياك

ارشد:  ويين تجين ماخذها لاخوها وارجع ماتاخر

ريتاج:  ابقى بلسياره

ارشد:  مووو وكتج ريتاج
ماتاخر شويه وراجع

غسق:  طلع طلعت وراء او بلاصح شردت من نظراتها
ركبت السياره باوعت عليه صدك ماخذني يم خليل
هز راسه لا
لعد وين ماخذني

ارشد:  يم عمج بلكت اطلع غلطان وياخذج بلاحظان

غسق:  بلعت ريكي وصلنه يم بابهم واني مابقى دعاء مدعيته مااريد يفشلني كدامه اتمنئ يستقبلني وبعد مايروح يسوي اليريده راضيه باوعت عليه مرتجي علسياره مجتف ايده ويباوعلي سميت باسم الله ودكيت الباب. شويه وطلعتلي دينا باوعتلي متعجبه

دينا: غسق

غسق:  شلونج

دينا:  خير شجايبج

غسق:  وين عموو

دينا:  شررايده منه

غسق: صيحيليا حبابه دخلت شويه وطلع باوعلي بخزره وزمخ بوجهي

ابو رافد:  شجاااايبج انتيييي ويين اولي واخلص من شررركم

غسق:  عموو بس خليني احجي ويياك الله يخليك

ابو رافد:   رجعييييي لزباله الاجيتي منها انتييي واخووووج ماتشرف بيكم وانسووو هلعنوااان لا تخليني اغير بيتي

غسق:  بس اني ماعندي احد غيرك افهمني عمو حباب والله اسوي الاتريده بس خليني اشرحلك ضروفي
رفع اصبعه بوجهي

ابو رافد:  رگعة وجهج ماااريد اشوفها رجعي للخيسه مالتج انتي واخوووج يللااااا

غسق:  سمعت صوت ارشد جاوبه احس فصلت من الدنيا

ارشد: يوواشك ابو رافد تبقى بنت اخوك وزحمه تحاجيها هيج بنص الشارع

ابو رافد:  حياك الله ارشد حبيبي والله راسي صاير هلكبر ومابيه حيل مشاكل وهيه واخوها مايجي من وره راسهم غير المشاااكل واني بركبتي عائله

ارشد:  حقك يابه بس هم تبقى بنت اخوك وحقها عليك والعم بمثابه اب

ابو رافد:  بيتي يتعذرهم هيه واخوها غير هلحجي ماعندي

ارشد:  يلا لعد بس خلي ابالك الدنيا دواره وراح ادور بييك نترخصص
امشييي

غسق:  مشيت ويا وبعدني مصدومه صح جنت متوقعه يسوي هيج بس الواقع غير
ركبت السياره واني متوتره احساس غررريب بيه صرخه تصحي الموته كلهم

ارشد:  جنت متاااكد بس اعنااادج خلاني اجيبج وتتاكدين بنفسسسج ارتاحيتي

غسق: ماحجيت شي حسيت رجفه سرت بجسمي بقيت افرك بايدي

ارشد:  بيج شيي؟ 

غسق:  مجاوبته اسناني واحد يصك بلثاني احوالي كلها تغيرت

ارشد:  استغفرررر الله احجييي شبيجج

غسق:  ب بردانه

ارشد:  انتي ليييش تحبين تاااذين نفسج وتعيشين دراماا اذا صار بيج شي منو يستاااهل

غسق:  مبقالي احد دتحسسسس بيه شنو يعني تعيش وحيد لا اهل ولا عمام ولا خوال تريدك
ركزت علئ كلمه خووال اني ليش ماروح يمهم ليش بس همه وين شو حتئ صار سنين محد سأل عليه

ارشد:  اخذج للمستشفى

غسق:  لا اريد انام احجي ويا وارجف
وصلنه للبيت دخلت كبل للغرفه تغطيت حتئ ملابسي ماغيرتها بقيت ابجي بس علئ شنو بضبط ابجي مادري كلبي احسه يتگطع عندي امل الكي عنوان خوالي
نمت ماحسيت غير علئ ايد علئ راسي

ام ارشد:  سلامتج يمه ضل بالي عليج

غسق:  عدلت كعدتي ماكو شي بس  تعبانه شويه

ام ارشد:  يا ماكو شي وانتي الليل كله الرجيف اخذج خفنه عليج والله

غسق:  اسفه تعبتكم وياااي

ام ارشد:  تعبج راحه يلا يمه كومي اسبحي ريحي جسمج شويه بين ما اسويلج شوربه

غسق:  ماكو داعي خاله لا تعبين نفسج

ام ارشد:  كومي يمه تعبج راحه

غسق كمت اخذت ملابس سبحت غمضت عيني وتذكرت كلامه وشلون يحاجيني
مرت يومين عاديه كاعده واكل بگلبي حتئ للمدرسه مارحت وبهليومين ارشد ماكو تعجبت مو من عوايده اذا مو كل ساعه ينط كبالي طلعت شفت خاله بلمطبخ تساعد ام غسان بلغده كعدت يمها خاله ارشد وين

ام ارشد:  كل ساعه يخابرني يسأل عليج التحق بنتي فتره ويرجع

غسق:  وين التحق

ام ارشد:  لشغله

غسق:  ها الله يوفقه كمت من يمها حتى ريتاج واهلها هم ماكو بعدين عرفت راجعين لبيتهم وهيه هم رايحه وياهم مرت الايام طبيعيه رجعت لدوامي وبديت اتناسه الصار وياي مرت الايام وهاي 15 يوم من رجعت مكسوره من عمي وارشد ليهسه مراجع اكثر شي اكضيها بين غرفتي ودراسه ابد ماختلط وياهم احاول اتتجنب المشاكل ريتاج وره 5 ايام رجعت ورائد اصلا ضايج مني من اخر مشكله صارت بيناتنه
اليوم كعدت من المدرسه انتضر الخط سمعت
صوت هورن باوعت ارشد تعجبت شوكت رجع بعده بملابس الدوام عسكري علئ جتاف نجمتين ماعرف يعني شنو  اشرلي بيده اركبي ركبت واني مستغربه من جيته سلمت جاوبني بعنتگه مو شي جديد هوه هيج طبعه خرائي  شعجب انت اجيت الخط وينه
باوعلي ورجع باوع علطريق بدون مايحجي
بعد ماحجيت شي شبي هذه
جابني للبيت الجابني بي من جنت يم خليل ليش جايبني اهنا

ارشد:  نزلي

غسق: وين انزل شعندي اهنا؟

ارشد:  بلااااا لغوووه يلااااا

غسق: لاا تصيييح مااانزل طبگ الباب واجه فتحت صفحه الباب الكاعده بيها

ارشد:  لا تخليني اسحلج والفرع كله كامراتتت انزلي

غسق:  غير افتهم ليش جايبني اهنا

ارشد:  انزليي وبعدين تفهمين

غسق:  نرلت دخلنه جوه كعدت على القنفه مرتبكه وهوه مرتجي كدامي برهاوه ويدخن ويباوع وترني
شبييك هيج تبااوع احجي شصاير

ارشد:   اسمعيني كلنه بهلدنيا ضيوف
وماكو احد يبقى غير وجه العزيز الكريم

غسق:  بلعت ريكي من كلامه بس اني منو عندي يموت معقوله خليل رمشت اكثر من مره اريد استوعب شديكول ممكن تفهمني شصاير منو مات

يتبع <>
للكاتبه: ود الباشا

أول مــرة أحــس..
مــــا بيــدي حِيلــة
ولا عنــدي شخــص حتـی أشتكيلــه