رواية شوگ و ورد الفصل الثالث عشر 13 - بقلم wad. al.Basha

للكاتبه: ود الباشا

"لعل الأيام لم تكن في صفنا على النحو الذي تأملناه، لكنّ هذا القلب الذي لا يكف عن محاولاته الدائمة هو كل ما أمتلك".

ارشد: شنووو يبيييعج؟

غسق: مرته كلتلي سامعته يحجي ويا واحد ويتفق ويا

ارشد: انتي متاااكده هذه خااالج

غسق: اني ماريد ارجع اخاف يسويها على لحظه
لهل سبب اريد اشوف خليل متاكده مبقي واحد من البيوت ممعقوله بايع كلشي

ارشد: خليل حتى لو تشوفي ماتستفادين منه مو بوعيه ويهجم اصلاً مو بسهوله تكدرين تشوفي
ابقي عندي هلفتره واذا تحبين ارجعج يم الوالده

غسق: ماريد اكعد عند احد افهمني الله يخليك

ارشد: اخذج للمشتمل

غسق: تكدر تشوفلي مكان اجار ؟

ارشد: شيلي هلفكره من راسج مستحيل

غسق: اريد اعتمد على نفسي ماريد اتكل على احد

ارشد: كملي دراستج ويصير خير

غسق: سكتت لأن صرت اخاف اذا اخويه وخالي يطلع منهم كل هذه الغريب شيطلع منه

ارشد: ليش سكتي؟

غسق: حجاها وشهگت ابجيتي صعبه عليه مووو سهله هيج اتمرمط

ارشد: اخ الله لج شبيج ليش هلبجي

غسق: لييش بقيت ليش مامتت وياهم لو ميته وياهم مجان صار بيه كل هذه

ارشد: مسحي دموعج والله ناقص على عرضي لو خليتج تحتاجين احد وترجعين لدراستج معززه مكرمه وبكيفج تردين اخذج عند الاهل لو للمشتمل

غسق: للمشتمل

ارشد: ليش ماترحين عند الوالده تفرح بشوفتج

غسق: مسحت دموعي غير مره ان شالله ماريدها تشوفني بهلحاله ماحجه شي اني جذبت ماريد اسببله مشاكل ادري بمرته وغيرتها وخايفه من رائد يرجع يسويلي سالفه مراح ابقى هواي علما الگه مكان استقر بي ماعندي غير حل وصلني دخلنا وكف شويه وترخص

ارشد: اروح اتسوك محتاجه شي ؟

غسق: ماكو داعي اذا احتاجيت اني اروح اجيب

ارشد: طلعه من البيت ماكوو ماتاخر ساعه زمان وارجع

غسق: هزيت راسي راح متاكده اكرم مراح يسكت وراح يدور عليه السالفه بيها فلووس وهوه الفلس امه وابوو لزمت راسي مداستوووعب واصلين لهيج حقاااره بلدنياااا خاال يبيع بنت اخته زين ليش مو داشتغل وانطيك فلوس ضحكت على نفسي هوه حال جهاله يبجي الحايط ومامهتملهم حاسب نفسه اب يروح فدوه لتراب رجلين بابا الله يرحمه مايوم خلانه بعازه احد لا من ناحيه الماده ولا من ناحيه الحجايه الطيبه شايلنه على چفوف الراحه نزلت دمعتي راحت الراحه وياك بابا مشتاقتلكم نص ساعه ورجع ارشد جايب مسواگ خلاهن بلمطبخ ووكف كدامي يمسح بايده

ارشد: محتاجه شي من بره؟

غسق: لا شكراً تعبتك وياي

ارشد: ديري بالج علنفسج انه رايح والباب لا تفتحيها لاحد

غسق: صار
راح كمت سديت الباب وراء ورجعت لمكاني مابيه حيل اشيل ايد احس بيه شي مكسور مرت يومين وحدي بلبيت افتر ماكو شي جديد ارشد بعد ما اجه عاذرته خوما تورط بيه دگ موبايلي ارشد رديت
تسالمنه مبين صوته تعبان

ارشد: محتاجه شي اجيبلج؟

غسق: لا شكراً بس اكدر باجر اروح للشغل

ارشد: حالياً لا لأن خالج ديدور عليج واجاني للبيت
ومتاكد مراقبني يعرف بيج عندي لهل سبب مدامر عليج

غسق: اخاف سواها هوسه كلش اعتذر

ارشد: لا يابه سهله اذا احتاجيتي شي خابريني لا تترددين

غسق: شكراً الك كطعته ورجعت راسي على القنفه
والله صرت اخاف اطلع منا بسببه الله لا ينطي ساعه السوده الفكرت اروحله متندمه بكد شعر راسي
بقيت للمغرب افتر مره اشغل التلفزيون مره العب من الموبايل مره اكوم للمطبخ افتر مادري بنفسي شريد اندگت الباب خفت مستحيل اروح افتحها رجعت تندك اقوه تقربت يم باب الصاله باوعت من الجام مامبين شي توترت حيل وكلما الباب دتندك اقوه فتحت باب الصاله وصحت بصوت خايف منوو؟

رائد: فتحي الباب لا اكسرها علئ راس الخلفوووج

غسق: بلعت ريگي بخوف وطبكت الباب بسرعه وقفلتها هذه الجنت خايفه منه سديت السرگي خفت لا يكون عنده مفتاح ويدخل كعدت وره الباب بخوووف
خفت اخابر ارشد احجيله ويتعارك ويا اخو بسببي بس لازم يعرف باوعت من الشباك ماكو رجليه جوه الباب راح رحت كرفصت علئ نفسي خايفه تنزل دموعي وامسحها بطرف تشيرتي دك موبايلي جاوبت بشهگه

ارشد: شبيييج؟

غسق: احس لساني نربط والكلمه مدتطلع من حلكي كطعت الخط دزيتله رساله مابيه شي حلمت حلم محلو
نص ساعه وتحركت يده باب الصاله اهنا انخلست حتئ رجليه صارت خيوووط رجعت اندكت

ارشد: غسق تسمعيني فتحي الباب انه ارشد

غسق: مسحت دموعي وجريت نفس كمت فتحت الباب
ورجعت ليوره

ارشد: ليش البجي شصاير؟

غسق: ماكو شي

ارشد: احجيي لا تكذبين حالتج مادكول ماكو شي

غسق: داريد احجي ورجعت اندگت الباب بقوه باوعلي طابگ حواجبه راح فتحها دخل رائد وعيونه بگصته من الخوف رجعت ليوره

رائد: هااي تااااليتتتتك

ارشد: ااانچب واحجي عدل

رائد: شلوون تريدني احجييي بالله تخووون مرتك ويا هاي الزباااله

ارشد: راائد لا تضل تخوووط بكيفك

رائد: شخوووط بكيفيييي راح ترجع دكلي أمانه مووو
ومرتك مافكرت بيهاااااا

ارشد: صووووتك لا تعلي احترم نفسك انت شعندك جااي اهنا؟

رائد: والله يا خوي اجيت اشوفك شلون جاي تختلي بأمانتك الخابصنه بيها

ارشد: رائد قنادر لا تاكل بكيفك وبعدين انه لو اريد اسوي شي مخايف منك وهسه يلا بدون مطرود

رائد: خطووه ماتحرك منا علما اعرف شعندك ويا هاذي انه اجيت قبل فتره هددتها وراحت شعدها رجعت مره ثانيه بعد باقي علينه بنات الكوفي

غسق: باوعلي ورجع باوع على اخو

ارشد: طاااايح الحظ شو صاير ماتعرف تحجي كوووم اطلع حسابي وياك بعدييين

رائد: ابقى علئ عمه عيونك

ارشد: راااااائد اذا مامفتهم شي لا تاكل خره من يمك يلاااا تووكل عود بعدين احاجيك

غسق: باوعلي من جوه ليفوك وطلع طبگ الباب بكل قوته ارشد بعده نفس وكفته  التفتلي بتعب

ارشد: شوكت جاي رائد ليجاااي؟

غسق: سكتت ماحجيت خفت منه ومن نبرته

ارشد: مووو داحاجيييج

غسق: بيوم الرجعت يم خالي

ارشد: هوه طردج

غسق: هزيت راسي اي

ارشد: سهله سدي الباب وراييه وأمني لا تخافين

غسق: طلع رحت سديت الباب وقفلتها وبعدني ممستوعبه الصار. ليش شايل هلكميه من الكره اني لا اعرفه معرفه شخصيه ولا يعرفني كعدت خليت ايدي علئ راسي اريد اتذكر اني ماذيته بشي او مسمعته حجايه تخلي يكرهني بهلطريقه بس ماكو احتمال علمود خليل اي ماكو غيرها جريت حسره ومشئ اليوم عاادي ثاني يوم اتصلت بارشد علمود الشغل
مجاوبني وره شويه رجع اتصل رديت عليه صوته جان معصب بلكوه يحجي

ارشد: محتاجه شي؟

غسق: اتصلت بيك علمود الشغل اكدر باجر اروح

ارشد: يرحم والديج كعدي وسكتي هلفتره خالج صاير چلب مسعور وديدور علييج

غسق: شيريد مني ماكلك

ارشد: علساس انتي مخطووبه وكاطعه مهر وشارده؟

غسق: لا والله ماكو هيج شي مرته كلتلي روحيي يريد يبيعج

ارشد: ادري بي خسيس ميحتاج تسولفين عنه كعدي هلفتره عوفج من الشغل واذا محتاجه شي احجي لا تستحين

غسق: تسلم ماتقصر كطعته منه بقيت كاعده لليل مليت كمت جبت كرزات وكعدت اتفرج فلم
سمعت طكه بره ماهتميت اكيد البزونه والباب قافلته ومسرگيته يعني مطمئنه للوحده بليل واسمع باب الصاله تندك زوعت العافيه طفرت من مكاني بخووف
ختلت وره القنفه وكرفصت نفسي والباب مستمره تندك
نزلت دموعي مادري من الخوف لو من الوحده
سمعت صوت يكول فحتي الباب ركزت بي صوت رائد
لزمت رجليه قوي كأنو دانطي امأن النفسي

رائد: افتحييي الباب بس احاجيج

غسق: كمت اشوف موبايلي وين لكيته على القنفه عيوني مغوشه من الدمووع وايدي ترجف
دكيت على ارشد مافكرت بشي الخوف مسيطر عليه
انفصل بوجهي رجعت دكيت وحجيت ارشد وينك حباب طلعت مرته بلعت ريگي

ريتاج:  انتي ماتستحييين ماتخجلييين تتصلين على رجال متزوج تااالي الليل

غسق: كطعته بسرعه ورحت بخطوات ثگيله وكفت وره الباب وهمست شترييد مني انت؟

رائد: افتحي الباب احاجيج

غسق: ماافتح روح مناا والله اصرخ والم عليك العالم

رائد: دفتحي الباب ولا تستشرفين براسي

غسق: روح منا الله يخليييك

رائد: تفتحين لو افلشها علئ راسج وراس الخلفوج بنت السگط

غسق: لاا تغلط روح منا والله باجر اارووح وبعد ماتشوفني بس الليله

رائد: انطيتج فرصه بس مبين انتي ناويه تلفين على ارشد سوالف الگح..... ماتمشي عليه

غسق: والله ماعندي شي ويا مجرد ديساعدني وثق بالله باجر اطلع منا وبعد خلقتي ماتشوفها

رائد: راح اعوفج بس ثقي بلخلقج اذا شفت رگعه وجهج اهنا مره ثانيه ماضمنلج نفسي شسوووي

غسق: حجاها وسمعت طكه الباب يعني راح جريت نفس براحه دگ جهازي ارشد خفت اجاوب وتطلع مرته واني منا خرطت العافيه مابيه اسمع حجايه زايده تاذيني اكثر بقت دموعي تنزل وامسح بيها وين اروح بقيت ساعه ابجي وساعه افتر بلبيت مثل المخبله واعاتب بابا وماما ضايعه مداعرف شسووي لوجه الصبح يلا غفيت كعدت على دك الباب شفت ساعه ب 10 صحت منو اجا صوت ارشد فتحتها ورجعت ليوره

ارشد: كعدتج اعتذر بس ضل بالي عليج البارحه متصله بيه واتصل بيج ماااكو خوما صاير شييي

غسق: لا ماكو شي الصراحه سمعت طگه بلكراج وعبالي انت الاجيت كلش اعتذر سببتلك مشكله مسح وجهه

ارشد: مصار شي
محتاجه شي قبل لا اروح

غسق: بلا أمر عليك اريد رقم غسان عندي حجايه ويا
طبگ حواجبه

ارشد: احجي بلكت اكدر اساعدج

غسق: لا سالفه تخص عمو ابو غسان حگ طرف شاربه وباوعلي بنظرات مبين مامصدگني طلع الموبايل انطاني الرقم وراد يطلع رجع التفت عليه

ارشد: لا تغلطين بشي تندمين عليه واذا اكو شي براسج اتمنى تنطيني علم اساعدج

غسق: هزيت راسي تسلم ماتقصر ركز بوجهي

ارشد: انتي باجيه

غسق: حجاها ورجعت وعيوني دمعتي بسرعه مسحتهم لا مباجيه بس البارحه نمت متاخره لهل سبب عيوني ادمع هز راسه وطلع سديت الباب وراء اخذت الموبايل اتصلت بغسان مرتين يلا جاوب
سلمت عليه

غسان: منو؟

غسق: اني غسق

غسان: الضلعه وينج مختفيه يمعود عرفنا اخوج وعزيز علئ گلبج بس انه هم بمثابه اخوج

غسق: الاخت اذا طلبت مساعده من اخوها يساعدها؟

غسان: عيوني الج صاير وياج شي صوتج مو طبيعي شبيج؟

غسق: ماكدر احجي بتليفون غسان تكدر تلگالي شغل حباب حتى لو خدامه عادي اقبل

غسان: شبيج غسق شدتحجين خدامتيش وين انتي مو عند اخوج؟

غسق: لا اخويه بسجن وبايع املاگ بابا كلها وحالياً اني مادري وين اروح

غسان: عمج خالج عمتج

غسق: مسحت دموعي محد يريدني
حباب تكدر تساعدني

غسان: بس شغل؟

غسق: البيت اني ادبره زمخ بيه

غسان: شدددبرين انتي يمعووود وين انتي لا تخبليني

غسق: من اشوفك احجيلك

غسان: ويينج جااايج

غسق: انطيته عنوان قريب على هذه البيت كمت غسلت وجهي رجعت شعري ليوره شلت اغراضي وطلعت وصلت للعنوان النطيته اله انتضرته ربع ساعه واجه رگبت بسياره باوعلي

غسان: شصاير بيييج وين جنتي كل هلفتره كل ضني عند اخوج

غسق: صارت هواي اشياء وياي تعبت من كلشي باوعتله وعيوني متجمع بيها الدموع تصدك دافكر انتحر واخلص

غسان: شراح تستفادين عبالج ترتاحين تخلصين من عذاب مؤقت بلدنيا ترحين لعذاب دائم وغضب من رب العالمين خلي ثقتج بربج قويه

غسق: سكتت ماعندي شي اكوله خجلانه منه

غسان:  اخذج يم عمتي ماعدها احد بنيه ورجلها بلفراش

غسق: ماريد احد يعرف مكاني الله يخليك

غسان:  مااخذج المكان علما اعرف شسالفتج انتيي احجيلي شايفه روحج وشصاير بيج شايفه حالج

غسق: مكدرت اسيطر على نفسي بچيت لزمت وجهي بثنين ايديه

غسان:  فهميني غسق شصاير ويااج انه سمعت من ارشد راجعه عند اخووج  هوه الماذيج احجي

غسق:  بقى يباوعلي منتضرني احجيله بس ماكدرت حسيت الكلمه متطلع مني وكف السياره راح جاب ماي واجه

غسان: احجي يلا تره ضل بالي

غسق:  كعدت حجيتله كلشي بس ماذكرت رائد ماريد تصير مشكله وهوه عايش يمهم بقئ ساعه يلومني وساعه يصفگ بيده مقهور

غسان: لو الزم اخوووج ازوووعه العاافيه سگط هذه سگط

غسق: مسحت دمووعي لو هوه زين اني ماتبهذل هيج حتى مكانه ماعرف ويين ارشد يكول بمصح ديتعالج من الادمان

غسان: مكملتي ليش طلعتي من بيت ارشد صاير شي؟

غسق:  لا بس اخاف مرته تعرف وتصير مشكله بيناتهم بسببي محجه شي هز راسه
دگ موبايلي ارشد  مارديت خليته صامت اريد ابتعد منهم مبين رائد شراني ومابيه حيله وحيل مشاكله
وصلنه يم بيت بطراف بغداد طابق واحد بس كلش جبير وكف السياره وباوعلي

غسان:  بيت عمتي جبتج اهنا لأن هيه وبابا مو صلح ومحد راح يعرف مكانج والاهم من هذه ماعدها احد غير زوجها جبير بلعمر ونايم بلفراش وهيه وبنتها

غسق: اخاف اضايقهم

غسان:  لا ياابه نزلي راح تحبيهم

غسق: نزلت راح كدامي فتح للباب ودخل باوعلي واشر براسه بمعنى يلا دخلت وراء اجتي مره جبيره تلگته حضنته وبقت تبوس بي

مشتاقتلك يا بذات مدكول عمتي اشوفنها

غسان: اي والله حقج عمه بس تعرفين بلحال انتي ميحتاج احجي

ياهي هاي جايبها وياك لا يكون تزوجت بدون علمي اگصه االك ولك غسان العار

غسان:  يمعوود عمه مو هيج لزمي بررريك

شعباالك لعد حضك اطيحه لك عار ابن العار لو ما ابوك عار ماتطلع انت هم عار

غسق:  بلكوه كاتمه ضحكتي طريقه حجيها كلش حلوه

امشي عمتك تحبك غداك جاهز تغده واحجيلي منين هلحليوه هاي

غسق:  مشت مشينا وراها وجان توكف بنص الكراج وتلتفت لغسان طابگه حواجيها واكو دگه على حنجها وحواجبها

ولك غسااان لايكووون غلطاااان ويا البنتتت وحامل منك؟

غسان:  عمه رحمه للكائنات دخلي خليني افهمج اذا تبقين بعد عشر ثواني اطلعيني مجرم اربعه ارهاب

غسق: دخلنا صاله جبيره كلش بيها ديوان وسرير نفر نايم عليها رجال جبير كعدنا مرتبكه حيل المره كل شويه تباوعلي

اي عيني احجي اسمعك

غسان:  عمه هاي بنيه

ايي ادري بنيه قابل ولد داشوفها بعيني اختصصر

غسان: خليننيي اكل نعل اكمل رحمه لوالديج

ايي كمل منين هاي وشعدك ويااها

غسان: اهلها ماتو بحادث سياره ومابقالها احد غير عمها ومايريدها طردها كلت انتي ام گلب الحنين تخليها عندج فتره علما اشوفلها مكان

يا يمه سوده عليه الله يرحمهم

غسق: ويرحم موتاج خاله

ولج مسرره

غسق: دخلت بنيه كلش حلوه باوعتلي وابتسمت

غسان:  شلونج خيتي مسره

مسره:  بخير الحمدالله انت شلونك خالي خالتي

غسان:  نحمد الله يسلمون عليكم

غسق: ركعته عمته بلبطل

ام مسره:  شكووو تجذب ابووك الگطعي شوكت مسلم علينه لا تكعد تجذب خووش يلا هسه وصلت هلحلوه وهيه بأمانتي تووكل ولا تكعد تهمبل براسنه

غسان: هههههههههه ياهو هذه اليهمبل الله يرحم الايام الجنتي اطيرين الفياله بيهن مادري عمي شلون قبل بيج وانتي جنج جبار ابو الشربت مابيج اي انوثه

غسق: لزمت حلكي متت من الضحك ركضت وراء بلنعال وهوه يصيح

غسان: غسق موو تخربج واجي اشوف جبار الثاني

غسق: حجاها وطبك الباب 

ام مسره: چلب علئ ابو ماتصيرله جاره

غسق: اجتي وكفت فوك راسي

ام مسره: وانتي يلا كومي بدلي ملابسج خلينه نكعد نتغده انخرطت من جوع لا تستحين محد اكو بلبيت
مسررره بنتي تعاي اخذي البت للغرفه

غسق: اجتي مبتسمه رحت وياها للغرفه سئلتني علئ اسمي شكد هادئه دخلت گلبي

مسره: حلو اسمج

غسق: مو احلئ من اسمج حبيبتي

مسره: يلا بدلي علما احضر الاكل لا تستحين ماعدنه احد

غسق: ابتسمت راحت غيرت ملابسي وطلعت رحت للمطبخ شفتها دتغسل الخضره اساعدج بشي

مسره: اي تعاي ثردي هلخبزه

غسق: كعدت اثرد وماخذتني صفنه رفعت راسي شفتها كاعده كبالي صافنه بوجهي

مسره: شبيج؟ شنو هلدموع

غسق: مسحت دموعي لا ماكو شي بس احس شي دخل بعيوني

مسره: لا تشوفج امي شيخلصج ادخلج تحقيق سين وجيم

غسق: ابتسمت مبينه لطيفه كلش
فرت حلگها يمين ويسار وقربت راسها مني

مسره: الله لا يراويج من تتعصب تخبط العدلين والميتين

غسق: مامبينه عصبيه

مسره:  شدراج خيه باقيه عدنا ان شالله وتشوفين الفصول الاربعه لامي

غسق: ههههه ان شالله

مسره:  تدرين صح ماعرفج بس كلش فرحت بجيتج طگت روحي بوحدي بهلبيت ليل ونهار انضف بي من الضوجه

غسق:  ردت احجي وسمعت صوت امها

ام مسره:  ولج مصخمه شمنضفه كاعده تتشكين

مسره: حشه يمه ليش اتشكئ بس داسولفلها ماعندي شي اونس روحي بي غير التنضيف

ام مسره:  چا شتردين اجيبلج فرقه تعزفلج وتدگين وترگصين عليها

غسق: مجاوبتها هيه هم دارت وجه وراحت مبينه فعلاً صعبه صبينا الاكل كعدنا ناكل بعدني استحي منهم صح لطيفين وتصرفاتهم طبيعيه وياي مامحسسيني بشي شلنا السفره صبيت چاي جبته خليته كدامها

ام مسره:  عاشت ايدج

غسق: بلعافيه

ام مسره:  كعدي احجي وياج

غسق: كعدت افرگ بصابيعي

ام مسره:  منين انتي وشعندج ويا غسان

غسق: ماعندي شي وياي حسبة اخوي صغرت عيونها

ام مسره:  منين تعرفي؟

غسان:  الناس العايشين عدهم

ام مسره:  بيت ابو ارشد

غسق: اي اني جنت عدهم بس صارت مشاكل وطلعت منهم وجابني اهنا

ام مسره:  اهلج صدك ميتين

غسق:  هزيت راسي اي

ام مسره:  زين عمج خالج

غسق: مايردوني

ام مسره:  لا حول ولا قوه الا بالله العلي العظيم الناس فدور مكطوعه الرحمه من كلوبهم لا تهتمين انه حسبة امج ولا تتقيدين بيتج هذه

غسق: ماعرف شلون اشكركم

ام مسره:  على شنو تشكرينا حبيبه حالج من حال بنيتي مسره

غسق: بقينه نسولف مسره تاركه الدراسه من صف الثالث متوسط
خطيه سولفتلي على ابوها مابي شي طالع لشغله الصبح يضحك والضهر جايبي مجلوط لا ايد لا رجل وصار سنتين نفس الحاله

مسره:  الحجي هواي كومي نتمدد شويه مبين عليج تعبانه

غسق: اي والله البارحه مانمت زين رحت للغرفه وتذكرت ارشد اكيد هسه راجع متصل بيه لازم احجي ويا زحمه مااجاوبه مهما يكون اله فضل عليه كمت اخذت الموبايل دكيت رقمه مشغول بعد مادكيت نمت كعدت الدنيا ليل وحدي بلغرفه طلعت هم ماكو احد رحت للكراج شفتهم ديخبزون ويسولفون شكد حبيت كعدتهم

مسره:  صح النوم عيني

غسق: ابتسمت هواي نمت

ام مسره:  مبين عليج تعبانه مارضيت تكعدج

غسق: دتخجلوني والله

ام مسره:  ماكو خجل بين الاهل

غسق:  بست راسها الله يحفظج اساعدكم بشي

ام مسره:  مبين عليج فاااهيه وماتعرفين لشي

مسره:  يمه هسه جنتو حبايب شبساع كلبتي عليها وسويتيها فاهيه

ام مسره:  بالله هاي جهره وحده تعرف تخبز الفهاوه تنگط منها

غسق: هههههههه صح ماعرف اركب ولا اخبز بس اعجبج بلتنظيف

ام مسره:  وشسوي بلتنظيف وبطني فارغه تعلمي اطبخين

غسق. ان شالله كعدت وسحبت خبزه اكل بيها اجواء حلوه نفسيتهم نضيفه وحلوه وجهم بشوش بس يضحك صح مصارلي شكم ساعه اجيت بس كلش ارتاحيتلهم دخلنا جوه سمعت موبايلي يدك رحت شفته غسان جاوبته

غسان:  بشريني شونج

غسق: مادري شلون اشكرك عرفتني بهيج ناس

غسان:  هاي عمتي ورده تخليها علجرح يطيب خابرتج على شغله

غسق: شنو ؟

غسان:  ارشد لازم خالج مشبعه كتل عباله انتي عنده وميكول اكله اني لو انتي تخابري؟

غسق:  حباب غسان ماريد احد يعوف مكاني

غسان: اعرف خابري ارشد تره متخبل عباله خالج ماخذج

غسق: هسه اخابره كطعته منه خابرت ارشد مرتين يلا رد

ارشد: وييييبن انتي مووو اتصل بيييج ليش ماترددين

غسق: ماسمعته شصاير؟

ارشد:  انه مشتعل جد جدي وانتي اعصابج ابرد من الثلج وين انتي فهمينيي؟

غسق: ماعليك بمكاني بس عوف اكرم اني مو يمه

ارشد:  وينج لعد شصاير شلووون هيج اطلعين من البيت بدون علمي الاصول هيج دكول

غسق: اسفه بس جنت مضطره
ماقصرت انت وماعرف شلون اشكرك الصراحه

ارشد:  غسق وين انتييي احجي ولا تخليني انبشش واطلعج من جوه الكاااع

غسق: الله يخليك ابتعد اني مرتاحه بلمكان الكاعده بي
وماريد ارجع اكعد عند احد

ارشد:  لييش وين انتي هسه

غسق:  مالك علاقه

ارشد:  لا تخبليينييي ماتقرب ولا اجيييج بس خليني افتهم وين انتييي

غسق: بجهنم كتلك ماااالك علاااقه بييه

ارشد:  اللهم صبرج ياروح زييين انطيني سبب واحددد يخليج اطلعين من المهجووم بهلطريقه

غسق: لأن ادري اذا كتلك مراح تخليني اروح

ارشد:  بالي يمج لخاطر الله كولي وين انتي تره الدنيا متتأمن لا تضيعين نفسج

غسق:  لو اموت مااضيع نفسي علمود فلوس بس اني فعلاً بمكان مرتاحه بي

ارشد:  شوكت لحگتي ترتاحين وانتي مصارلج كم ساعه

غسق:  المهم اكون بعيده منكم

ارشد:  دقيقه دقيقه من عدنا؟  انتي ساامعه شي رائد مسمعج حجايه احجيي مأذيج

غسق:  لا

ارشد: لااا تجذبييين احجييي

غسق: اني صار لازم اروح اترخص كطعته منه ادري اذا مو هيج مراح يخليني علما احجي كلشي رجع دك عليه مجاوبته دزلي رساله
بسيطه انه افتهم الموضوع واطلعج من جوه الكاع وين ترحين يعني؟
مارديت عليه شمرت الموبايل مرت الايام وهاي اني اسبوعين عدهم شكد ما اكول ناس بسطاء نفسيتهم طيبه قليل بحقهم كاعدين نتريك نفتحت الباب دخل غسان

غسان: يا هلاا بهلمه وبعمتي الغاليه الصاگه الروح والريه

ام مسره: انجب لا تضل تتلوك

غسان: خلف الله عليج فوك ما اغازلج اطلع اتلوگ نسيت انتي جباار ماتعرفين الغزل. شنو
شلونجن بنات

غسق: بخير انت شلونك

غسان: انه مادام شفت عمتي الحلوه صرت بخير

ام مسره: كلوله يطلع من بيتي الگطعي ابن ابو

غسان: ابن ابوي اي قابل منين طالع غير من ضهره بس مال كطعي لا يا عمه ظلمتيني

غسق:  ديحجون ويحششون فجئه اندفرت الباب كلنا طفرنا من مكانه انصدمت بقيت مخونسه بمكاني

يتبع<>
للكاتبه: ود الباشا

لا شيء يؤلم أكثر من تلك الأحزان التي تأتي دفعة واحدة،
أن تشعر أنك مثقل ولم تعد كالسابق أن لا تستطيع نطق كلمة وأن تختار الصمت بدلاً عن ذلك، أن تتلاشى رغبتك بالحياة ويصبح كل ماتريده هو النوم .