للكاتبه: ود الباشا
من انـا؟
انا مگمط حزن ومرضع دموع
ومشرب ونين بشفت الاحاه
ومن نگلت التاته گليبي موجوع
وگبل چلمة اليمه معلم الاه
انا بأول صباي معاشر العود
وعلى شفته طبع مطبوعه الاشاه (اللّــــه)
رض بيا الزمان كسار الضلوع
وصابر ع السنين منتضر رجواك..!
غسق: غمضت عيني بهدوئ ودخلت بسبات
فتحت عيني متوجعه واحس حلكي متفطر محتاجه اشرب ماي همست طفليي احس الم يكطعني احاول افتح عيني ماكدر بقيت اردد طفلي لحد ما سمعت صوت بنيه دكول بخير ارتاحي بعد ماحسيت بشي رجعت سمعت اصوات هلمره حاولت افتح عيني انفتحت لساني ثكيل كلش شفت الغرفه فارغه همست اررشد خاله وينكم ردت اكوم حسيت بألم فضيع ابطني رجعت تمددت بقيت اباوع على الباب متأمله احد يدخل نزلت دموعي بقله صبر
همست ماكدر احجي من الوجع الاحسه باابا وينك تعال محتاجتلك ماماا رجعت غمضت بتعب حسيت الباب نفتحت فتحت عيني بسرعه سستر ابتسمتلي همست طفلي وين
طلعو كالو شوي ويجون عليج
غسق: بلعت ريكي شنو يعني طلعو وين اخذو بلكوه احجي رفعت جتفها بمعنى ماعرف ضربتي ابره بلمغذي وثنين بلعظل شويه وحسيت جسمي خدر ودمعتي بعيني شلون هيج يسوي بيه وين كلامه معقوله كله كذب معقوله انخدعت بي جنت اسمع جنس ادم مكااار بس مو لهل درجه غمضت عيني ورجعت نمت بتعب ووجع راسي بسبب افكاري فتحت عيني منأمله اشوفه متأمله يكول ابنا جوعان كومي وياي رضعي
بس ماكو احد كرهت روحي بسبب العجز الااني بي مداكدر اكوم او اتحرك اريد اروح اشوف وين اخذووو
3 ايام من عمري 3 ايام عبالك دهر مرت عليه دمعتي مانشفت ماشفت احد منهم الممرضه ساعدتني ومشتني ونضفتي ووكلتني حقدت وكرهتهم واحد واحد
حتئ على اهلي الميتين لان عافوني مافكرو بيه ماحترك كلبهم عليه نزلت دموعي نفتخت الباب رفعت راسي شفت غسان باوعلي وابتسم
غسان: الحمدالله علسلامه
غسق: ابنيي وين
غسان: كتبتلج خروج كومي وياي
غسق: ابنيي وين غسان باووعلي ليش هو ما اجه ليييش انت ماحجه دخلت السستر ساعدتني هو طلع خلصنا دخل وباوعلي
غسان: تكددرين دكومين لو اجيبلج عربانه
غسق: ابنيي وين عااايش
غسان: عايش عند ابو فكري بنفسج هسه
غسق: اخذني خليني اتفاهم وياهم
غسان: وصوني اخذج لبيتج
غسق: فتحت عيني يااا بيتتتت وابني يمهم وبعدني حتى مشايفته ياااااا بييييت تحجي عننننه صرخت من وجع عمليتي وكعدت متألمه. اطلع بررره
غسان: غسق لا تعاندين فدوه والله بالي يمج كومي اخذج وصيري زينه بعدين حلي كلشي بهلحاله متكدرين تسوين شي
غسق: اطلللع عافني وطلع كمت بتعب فتحت الباب شفته واكف ايدي على بطني امشي وابجي من الوجع
طلعت اخذت تكسي على بيتهم غسان حاول وياي مانطيته مجال بلكوه اجر النفس عندي وجع وصلت انتضرني عفته ونزلت دخلت شافني عمو ابو غسان مهتميتله بلكوه امشي دخلت الباب مسدوده دكيتها بكل قووتي انفتحت صارت بوجهي خاله
خ خ خاله ابنيي وينن مسحت دموعها واجاني صوت ابو
ابو ارشد : ماااالج طفل عدنا وهسه ديري وجهج ورجعي منين ما اجيتي
غسق: كلامي موووو وياااك حجيتها ولزمت بطني احس نار كامت تطلع منها وين ارشششد اطلع يا حقير جباااان الله ياخذك حوبتي متتعداكم واحد واحد اشوف بيكم يووووم طلع واجتي وراء ريتاج ورائد باعولي لزمت الحايط تقربت مني خاله تساعدني زمخ بيها ابو ارشد
ابو ارشد: لا تتتقربيلهاااا
غسق: رجعت ليوره وبس تبجي مهتميتلهم باوعت على ارشد انطيني ابنييي
ابو ارشد: كتتتتلج طفل ماعندج يمنااااا
غسق: مووو بكيفك مو بكيفك اني التعبت اني المنمت اللليل من الوجع اني التسع اشهر شفت الويل اني الحسيت برووووح بداخلي انييي جربت وجع الطبيعي والعمليه وبطني ليهسه متوجعه منها ومشكوكه شبررررر موووو من حقكم تمنعوووني عنه هييي الفكرت بنفسها وجسمها هي راحت سقطت باردتها علمووود جسم مافكرت بطفل ليييش على الحاظر تاخذ ابني
ابو ارشد: طلعييي من بيتي
بيتي يتعذرج
غسق: اخذ ابنيي واطلع
رائد: خلوها تشوفه ميصير هيج تره
ابو ارشد: انت انطم
غسق: بس اشوفه خلوني اشوفه اريد ارضعه
اني امه حرام عليكم
ارشد: غساااان انه شكلت
غسق: رفعت راسي شفت غسان واكف عيونه دم
مجاوبه تقرب مني
غسان: كومي وياي غسق لا تنفتح عمليتج
غسق: ماااتحرك منا اذا ماشوف ابني والله ماتحرك هيه مو لعبه ولا حاجه ويردون ياخذوها مني احرررك البيت عليكم وحق الله سندت نفسي علحايط وكمت ردت ادخل جوه ابوو اوشد دفعني وكعت ليوره صحتتت صيحه رجت البيت احس عيوني طلعن
ارشد: ياااااااابه مووو هيج صدك تحجييي
غسق: بقيت اباوعله بعتب نزلت دموعي وبعد ماحسيت بشي فقدت من الوجع فتحت عيوني ثكيلات باوعت نفسي بغرفه علسرير رجعت غمضت واون موجوعه نفتحت الباب شفت مسره
باستني
مسره: الحمدالله على سلامتج گلبي نار عليج
غسق: وين اني
مسره: مادري بيت يكولون بيتج
غسق: رجعت غمضت
مسره: لا تنامين اجيبلج شي تاكلي
غسق: ماريد منو اهنا
مسره: محد بس اني غسان رجع للبيت كال عندي شغل
غسق: ارشد ماااجه مسره اريد ابنيي الله عليكم حسووو بنار كلبي بس كليلهم اشوفه والله بس اشوفه
مسره: صيري زينه غسه اوكفي على رجلج ودخلي بنص عينهم
غسق: خدعوني مسره
مسره: خدعيهم ودخلي بنص عينهم
غسق: كسروني
مسره:ماعاش اليكسرج غسق لا تاذين نفسج بهلطريقه حبابه
كومي اوكفي على رجلج وابنج اول وتالي يرجع لحظنج
غسق: مسره خدعني وهمني بحبه واني الغبيه صدكته
واني ادري متزوج ريتاج عن حب شلون صدكته ليش كلهد غبيه اني خلت تيدها على راسي بقت تلعب بشعري تحاول تهديني
مسره: غسق حبيبتي انتي بفتره نفاس موزين عليج تقهرين روحج والله موزين
غسق: باوعتلها وعيوني مدمعه اريد بابا محتاجتلها بلحظه والله محتاجتله يروحلهم يطلعه من عينهم بس هو يكدر شافوني ماعندي احد شافوني وحددي
ماعندي ضهر كسرونييي بقيت اصررخ فقدت كسروووني مسررره كسرووووني والله الا اكسرهم اضعااااف كسرتي هاااي الا اخلييي نااار بنص بيتهم وماتببرررد گلبي حرموووني منه تسع اشهر ابطنييي احس بي ياااكل يشرررب ويااااااي انتضر يوووم يووم يجي واشوفه وافرححه بي تتتاليييي ياخذه مني ويكسرني وبخلي شوفته حسررره بكلبي نزلت دموعها وياي لزمت ايدي بثنين ايدها تحاول تهديني
مسره: غسق عمليتج لا تنفتح فدووه كافي والله كلبي احترك
غسق: بقيت اشهك واضرب روحي عافتني وراحت للصاله
بلكوه كمت اجت لزمت ايدي
مسره: ولج وييين شوفي حاالج
غسق: اروحلهممم لا عبالهم اسكتلهم
مسره: غسسق مو هيج صيري زيننه ماتكدرين بهلحاله الله علييج لا تاذين نفسج امشي اكلي لكمه انطيج دواااج لا تلتهب عمليتج
غسق: عساااني بلمووت كولي امينننن عسااني ميته ولا باقيه ليش مامتتت عااار اني مو يكولون الغااار ميموت اني عااار
مسره: الله يحبج كتبلج عمررر جديد لا دكولين هيج
غسق: ميحبني ميحبني لو يحبني ميخلي هيج نااااس بطريقييي مسررره محد يريدني محددد يحاااول يفهمنييي ويحس بيه كلهم اذوني كلهم حركو گلبي
نفتحت الباب دخل غسان
غسان: غسق شبيج
غسق: باوعتله بترجي غسان مو دكول اني اختك
هز راسه ريح كلبي فدوه اريد اشوفه مو من حقهم هيج يسون بيه والله مو من حقهم
غسان: اهدي وصيري زينه وعد اني وياج انطلع منهم وغصب عنهم بس هسه منكدر نسوي شي وهاي حالتج
غسق: مسحت دموعي ليش هيج سوه بيه هو مو يحبني اليحب ميكدر ياذي محبوبه شلون كسرني
غسان: مو وكت ملامه لملمي روحج واوكفي على رجلج والباقي سهل صدكيني وابنج تاليته بحظنج
هسه اخذي علاجج وكومي نامي شويه
غسق: تقربت مسره انطتتي علاج سندتني رحت للغرفه مرت الايام نفس ادشي مسره دقيقه معافتني غسان يررح ويجي علينا عمليتي صارت زينه وفگيت الخياط وكدرت اوكف على رجلي حليبي نشف ويا دموعي
اليرن صار عمره 35 يوم واني حتى شكله ماعرف شلونه گلبي محروك واحد منهم ماسأل عليه ولا مال عايشه ميته وكأنو كل هل ايام والاشهر احتوووني وخلوني ابيتهم علمود غايه وحصلوها وشمروني حيل مقهوره على نفسي وعلى الديصير بيه تاخذني صفنه وتجيبني واكول جوعان بردان عطشان اخاف ديبجي يريدني غمضت عيوني بتعب رجعت راسي ليوره نزلت دموعي كمت واني افكر خاله اكيد تكدر تساعدني رحت يم مسره بلمطبخ باوعتلي
مسره عندج رقم خاله ام ارشد طبكت حواجبها
مسره: شسوين بي
غسق: احجي وياها
مسره: ماعندي بس اجيبه الج هسه اخابر غسان
غسق: لا تخابرين غسان مينطيجيا خابري على عمو
هزت راسها اخذت موبايلها خابرت شويه ودزه اخذت الموبايل من ايدها دكيت مره مرتين ماكر بثالثه جاوبتني
خاله فددوووه لا تكطعي سمعيني
ام ارشد: غسق
غسق: ليش هيج سويتو بيه حركتوني موتوني واني عايشه
ام ارشد: شونج يمه
غسق: ابني شلونه خاله فدوه احجيلي لا تحركين كلبي
ام ارشد: هادى والله مثلج نسخه عليج
غسق: رجعوليا فدوه لا تحركون كلبي اكثر حرام عليكم
بجت وياي
ام ارشد: والله يوميه احجي ويوميه اكللهم محد يسمعني يا امي وتالي عمري يكعد عمج يهددني بطلاگ
والله وداعة نظر عيني محروك كلبي عليج وليل ويا نهار ادعيلج
غسق: ليش ماكتيلي هيج ناووين تسوون ليش ماحذرتيني
ام ارشد: ماعرف ماااعرف والله شلون انه هيج اسوي انه ام واعرف بحركه گلبج
غسق: داحجي واجاني صوت عمو احقر انسان شفته بحياتي
ابو ارشد: انه مو حذرررتج تختفين من حياتته لا نريد نشوفج ولا نريد نسمع صوتج
غسق: حسبيي الله ونعم الوكيل بيك ان شالله. بي يحرگ كلبك اضعاااف حركتي ونار صدري ربي يفجعك بعزيز گلبك
كطعه بوجهي كعدت منهار تقربت مسره مني ارررريد احجي ويا ارررشد خلييي يجي لييييش ضااام راسه لييييش
اخذت الموبايل من الكاع دكيت رقمه ايدي ترجف رد بهدوء عكس نار كلبي
ارشد: نعم
غسق:نعم الله عليك احجي وصوتي يرجف تججججي هسه اشوفك هسه بهلحضه والله والله اذا متجي تشوووف مني شي عمررررك مشايفه اخلييك عايش بلندم طووول عمرررك
ارشد: ساعه وانه يمج
غسق: كطعته بوجه
عفت مسره ودخلت للغرفه ماريد احد يشفق عليه ماريد اني ممحتاحه شفقه محتاحه احد اسند نفسي عليه اخد يمسد على راسي ويطمني ويكلي اني بضهرج لا تخافين من شي كمت غسلت وجهي بماي بارد احس ررحي تفرفح شوكت تحملت هلمده كلها غمضت عيني ثلث رباع الساعه وندكت الباب كمت من الفراش جريت نفس مسحت دموعي لازم اكون قويه لاززم
فتحت الباب صار بوجهي يحجي ويا غسان ومسره باوعلي غسان وكال رايح غمضت عيني بمعنى تمام
اشرلي على اذنه اذا حتاجيت شي اخابره هزيت راسي اخذ مسره وطلع بعده بملابس الدوام واكف كبالي ولا كانو مسوي شي ولا كأنو حارك كلبي وماخذ ابني وخدعني وكسر كلبي ماريد اصيح ولا اعصب ولا احجي حجي محلو اريد اتفاهم ويا بكل هدوء ويجاوب اسئلتي وحده وحده رتد يتقرب اشرتله اومف بمكانك
انت متخاف الله شنووو من بشر انت شنووو كل هلمده تخدع بيه ليش بشنو تذيتك ماخليت الله بين عيونك ماكلت يتيمه حوبتها تطلع بيه
بس فهمني كلامك وين راح معقوله كلامك الجنت مغركني بي كبه تمثيل كله جذب شلون كدرت شلوون
اخذت ابني وشمرتني شمره الچلب ومادرت وجهك
دموعي ينزلت وجسمي يرجف اريد اسيطر ماكدر كعدت وكمت اشهك
ارشد: الصار صار وحاولي تتعودين وتعتبرين الطفل مات
غسق: رفعت راسي بصدمه باوعت عليه يحجي بكل ثقه على شنو اتعود؟
وعلى يا اساس اعتبر ابني ماااات رانت مخلي بايد وحده ساقط....
على يا اساسس تطلب مني اعتبر ابني ماااات انت شنو من بشررررر
ارشد: انه احجي لمصلحتج اذا تبقين هيج تتاذين وصحتج تتاذه انتي تكدرين تجيبين بدال هذه عشره اما هي الله مارزقعا وانحرمت من هلنعمه
غسق: انت تعرف الله تعررررف شراح يسوووري بيك والله راح تبجي دم علسويته بيه وراح اكعد اضحك عليك وبعدين الدتحجي عنها مايصير عدها اطفال مو الله رزقها وانطاها روح هديه هييي شسووت راااااحت سقطته خااافت على جسمها خافت على تفسها انت دتشوف حالي مو دتشوف الصاير بيه ليش على يا ااساس تاخذهه محجه كعد مقابيلي ورث جكارته يباوعلي بكل برود
ارشد: المطلوب شنوو
غسق: شنووو المطلووووب ليييش كاااعد تحجيييي وياي بدم بارررد ليييش
ارشد: اكوم اشلع بوجهي لو شسوي مفتهمت
غسق: غمضت عيني بقله صبر كعدت يم رجله اريد اشوف ابني لا تحرمني منه اطلع من حياتكم وطلكني
بس جيبه يمي وتعال يوميه اخذها راضيه والله
ارشد: الطفل تسجل بأسم ريتاج شوفي حياتج وعيشيها لا تنتضرين هلطفل كتلج وارجع اكررلج اعتبري مااات
غسق: صرخت بوجه حسيت بلعومي شحط بسسس هوووووو عااااااايش مامييييت شلوووون اعتبره مييييت شلوووون
ارشد: فتره وتنسين ويبرد كلبج كلشي يرجع طبيعي
غسق: لزمت ايده شمر الجكاره بقى مركز بعيوني
شلون گلبك ينطيك هيج تسوي بيه لا تحرك كلبي هليني اشوقه على الاقل
ارشد: راح تتاذين اكثر راح تتعلقين بي وتصعبين علينا الامور
غسق: مسحت دموعي وكمت وكفت عدلت ملابسي مرراح اسامحك طووول عمررري مراح اسامحك لووو تموووت مانقهر عليك على حركه كلبي
ارشد: اني ماقصرت وياااج بشي سجلت بيت بأسمج وراتب يجيج كل شهر علما تكملين دراستج
غسق: رجعت مسحت دمووعب عساااااك مقصر ولا مسوي بيه هيج عساااني متت وماشفت هليوووم يا بيت الدتحجي عنه يا فلوووووس اخذت قطعه مني حرمتني منه ومن شوفته والله يا ارشد وررح اهلييي العااافوني اتمرمط بايدك وراحوووو الا ابجيك دمم
الا اخلييييك تتمنى الموت وماتلكا هسه اطلع بيتي يتعذرك وبااااجررر اطلگني والله باجر الصبح ماتطلكني اجي احرك البيت على راسكم انذاااال
ارشد: راح اسكت واكول ميخالف كلبج محروك بس هذه كلامج لا تحاولين مجردد محاوله تعيدي ائذيج والقران ائذيج مااارحم بحااالج
غسق: ضحكت بهستريه علساااس هسه انت راااااحم بحااالي امشييي اطلعععع امشيييي حقييير الحقااار والسن يمشن بدمك غداااار باوعلي بطرف عينه اخذ الموبايل خابر غسان بقى كاعد يباوعلي علما اجه غسان هو واد يطلع صحت بي اوووووكف
التفتلي طلگني قبببل لا تروووح طلگني عافني وطلع وركع الباب حيل باوعتلي مسره وغسان كعد مقابيلي
غسان: تبقين هيج تموتين شدي حيلج
غسق: دخلت للغرفه قفلت الباب ركعدت وراها كرفصت على نفسي حقييير نذل لك حبيتك يا مستهتر حبيتك والله تحرررك كلبي بابني ليييش ليييش بقيت متمدده واشهك علما نمت فزيت علئ صوت الباب كمت عيوني ماكدر افتحها واحسها تحركني
غسان: غسسسسق افتحي الباب لا تسوووين شي بنفسج مااايستاهل والله
مسره: اكسر الباب اخاااف بيها شي
غسان: ابتعدي
غسق: كمت انتحيت على الحايط فتحت الباب وشفته محضر نفسه بطريقه هجوم يكسر الباب شافني تقرب ومسره لزمتني
مسره: وكفتي كلبنا والله
غسق: اذيتكم وياي
مسره: محد متااذي غيرج اوكفي على رجلج وكاافي بعددد احسبي روحج ماخلفتي تردين تموتين انتتتي
غسق: مجاوبتها لان مهما احجي متحس بلنار البصدري متحس بل احسه وكلبي المحروك بس قررت فعلاً اوكف على رجلي هاي حالتي اخسر صحتي وماستفاد شي دخلر سبحت غيرت ملابسي وكعدت اكلت لكمه ويا مسره مرت الايام وهذه شهر ثاني ونار كلبي تززززيد متنقص حاسبه الليام يوم يوم عمره صار 65 يوم بضبط وبعدني مشايفه ضله اليوم مسره واكفه كبالي خجلانه تفرك بايدها وتباوعلي ابتسمت صاير شي
مسره: خاله خابرتني ارجع للبيت قبل اسبوعين وماسمعت منها اليوم متعاركه ويا غسان صايره لخه والله گلبي مينطيني اعوفج بس مجبوره
غسق: بقيت اباوع عليها روحي عادي مسره لا تفكرين بيه
مسره: عندي اقتراح
غسق: كعدت كبالي اني كعدت اسمعلها
مسره: ترحين يم امي والله هي وحدها وابويه انتي ادره بحاله
غسق: مسره لا تفكرين بيه ورجعي لبيتج اني ماطلع منا اصلاً محتاجه ابقى وحدي حضنتني وبجت وتعجبت على نفسي دمعه وحده مانزلت من عيني رغم روحتها راح تاذيني عليش البجي شوكت ماتجين اخليج بنص عيني لليل اجه عمو تبو غسان اخذها ودمعتها بخدها قفلت البيبان كعدت بصاله باجر لازم اروح ادور شغل اريد اوكف على رجلي باسرع وكت اريد اذوكهم الذكته ثاني يوم كمت من الصبح غيرت ملابسي طلعت قفلت البيبان اول شي رحت لاهل الصالونات شفتهن ميتحاجن وخشمهن اعلى من راسهن عاد ردت ارجع لأن روحي طلعت منهن عبالك حايه احدي منهم صار كبالي حضانه اهليه جريت نفس ودعيت ربي من كل گلبي يبلوني حتى لو راتب بسيط هم ميخالف ابمهم اكضي وكتي احسن ما اكعد اتصفن وعلى يا ساعه اتخبل دخلت وسميت باسم الله صارت كبالي بنيه يطلع عمرها نهايه العشرينات سلمت عليها ممكن اخذ من وقتج شويه
تفضلي عيني
غسق: اني دادور شغل والصراحه كلش احب الاطفال واطول خلك وياهم. خجلت من نفسي وكلامي لأن ماعرفت شلرن ابدي وياها او افتح موضوع هيج بسرعه جيتت بلسالفه باوعتلي بتركيز
الصراحه احنا منشغل اذا مو احد ثقه ونختبره فتره مثل متعرفين كلها اطفال واذا صار عليهم شي لا سامح الله راح ندخل سين وجيم والصراحه اني ممحتاجه احد بلوقت الحالي
غسق: بلعت غصتي زين جربيني والله حابه الشغل اهنا بين الاطفال اذا شفتي مني شي ماعجبج اني اطلع برجلي قبل لا تنطقين واذا تردين الا تنطيني راتب علما تشوفين تعاملي ويا الاطفال
رجعيلي باجر وانطيج خبر
غسق: شكراً تعبتج
ابتسمت عفتها وطلعت متمنيه هلشغل من كل كلبي ادعي ربي تصير. بقيت اتمشى وصلت لراس الشارع شفتها هوسه وناس ملتمه تعجبت شصاير تقربت شفت رجال شايب مدعووم والناس واكفه فوك راسه محد يتقربله صرخت بيهم خاااابرو الاسعاف ساعدووو لا تخلووو الله عليكم شفت راسه كله دم تخبلت صار بابا بعيني وكفت تكسي ولد شاب انزل وياي ساعدني خطيه محجه نزل بسرعه شلنا للسياره اتحمل عمو هسه نوصل وصلنا للمستشفى وهو يون اجوي اخذو بسرعه بقيتت كاعده اباب الصاله علما طلع الدكتور
وكفت يمه انعادت عليه الايام السوده انعادت عليه نفس الشي من وكفت كدام الدكتور وكال بابا ماتت دمعتي بعيني هز راسه الدكتور
الدكتور: البقيه بحياتكم مكدرنا نسيطر علنزيف انتي تقربين شي للمريض
غسق: حجيت وياريتني محاجيه لا مسوي حادث ونقلته للمستشفى
الدكتور: انتضري لعد يحققون وياااج
غسق: حجاها وراح بقيت باهته شنو يحققون وياي شويه ودخلو. ثنين شباب اجه الدكتور حجه وياهم عرفت بيهم ولد المات ماصحيت من صفنتي الا من الدكتور اشر عليه تقرب واحد منهم راد يضربني سحبه الثاني
اطلع دم ابووويه من عيوونج ماتعرفيين تسوقييين شكووو مخلين بايدج سياره طايحه الحظ
غسق: اني ماعليه اني نقلته مو اني الدعمته حجيتها بلكوه خفت حيل خفت احس جسمي صار سعفه
رفع اصبعه بوجهي
لا تحاااولين تبررين لنفسسسج ابووويه مااات تعرفين شنووو ماتتت والله اطلت روحج بنت الگلب
غسق: ردت اطلع دخلو الشرطه حجو وياي حجيتلهم كلشي بس ذولي ثنينهم اشتكو عليه تقربت منهم احسبني اختك شلوون تقبلها عليه ادخل مراكز
والله مو اني الدعمته شفته متمدد بشارع والناس تتفرج عليه اني النقلته جان بي روح هاي زينيتي
لا مسويه علينا منيه اخذوووها
غسق: شويه ودخلو جوكه زلم اني فقدت شنو يعني اروح حبس رجعت تقدمت عليهم وكلها تباوعلي يردون ياكلوني بعيونهم تقوبت من ذولي الثنين لأن جانف بلبدايه كلامي وياهم عيونهم حمر وديبجون حاسه بيكم والله بس مالي ذنب صدكوني مالي ذنب اني حتى ماعرف اسوق ولا عندي سياره لا تخلوهم ياخذوني ساعدته وروح اسأال كل الواكفين جانو بلمنطقه كلولي بيها سين وجيم بس ماهتميت
مجاوبني ولا باوع بوجهي استسلمت ورحت وياهم بطريق خابرت غسان ماريد اخوفه بس مجبوره ماعندي غيره استنجد بي انصدم وكال عشر دقايق اني يمج كل شويه امسح دموعي ويرجعن ينزل ردت ابدي بدايه جديده ردت انسى مصيبتي وكعت بمصيبه اكبر
بعدني واكفه اجه غسان ونصدمت من دخل وراء ارشد خازرني
يتبع <>
للكاتبه ود الباشا
لگينه الدنيا ما تنحب
حزن ودروب ما تنطب
درب مكتوب بي نبچي
ودرب مكتوب بي نتعب
تاخرت عليكم اعتذر اليوم شغل شغل تعبت 😭 طلعووني من الكوكب على كولت جدتي العمر يخلص والشغل مايخلص وانه عمري خلص بشغل عندي وهواس شسوي 😓
المهم حبايبي كتبولي رئيكم بلقصه وتوقعاتكم وفجرولياها بلفيس والانستا اذا ماتصير زحمه عليه ولو ادري هي رحمه 😁 احبنكم ورداتي
وهذه الانستا تنوروني
تابعنا وما يفوتك جديد
اختر المنصة اللي تناسبك وتوصلك الفصول أول بأول.
التعليقات (0)
جاري تحميل التعليقات...
لا توجد تعليقات بعد
كن أول من يشارك برأيه!