رواية شريعة العشق الفصل الخامس 5 - بقلم نورا ناصر

في شريعة العشق
بارت ٤
نورا ناصر

ظل بابا يضرب على راسه بثنين ايديه ويصيح
ميت ميت لكو جثة بالطب العدلي مكتول مكتوووول .. وراح للسيارة شغلها بسرعة وطلع ..

امي بس سمعته هيج كال انهارت ووكعت بباب البيت وظلت تلطم على رجليها وتبجي ها ضياء رحت وفجعت قلب امك وكسرت قلب مرتك لو ابنك اول فرحتك حتى بعده مجاي للدنيا رحت يا ابو ضحكة الحلوة يا ابو النفس الطيبة ..

امي تبجي وتنعى لضياء واحنا كلمن مكانها هم نبجي فتحنا عيونه بس ع الموت والدم والحروب وشباب تنقطف اعمارها مثل الورد وبعمره ، مايوم ارتاحينا
او شفنا الراحة ..

ورة كم ساعة اجه علينا صفاء كال يلله امشو اوديكم لبيت عمتي عمود العزا ، جان صوته بايح وعيونه حمرة جمر ، يدنك توكع الدمعة من عينه ، مرد كلبي واحس روحي صارت تتكطع على منظره هذا ..

وصلنا للعزاء وجان الكل مقهور على شاب مثل ضياء طول عمره يمشي بصف الحايط يروح بدربه ويرجع بدره وممأذي بالعكس ، بس شنكول واحنا عايشين ببلد مايعرف المقتول باي ذنب قُتِل والقاتل ميعرف ليش يقتل ، مكتوب علينا نعيش كل هذا الالم ..

عمة جانت منهارة طول فترة ال ٣ ايام الفاتحة
وسوسن زوجة ضياء لمن افتقدت عمة وهي بالمستشفى انهارت وانجبروا يكولولها انو هم لكو جثته لضياء ميت .. ماتحملت صار عدهه نزف وسقطت الجنين ..

رجعنا لبيتنا ومرت الايام كئيبة حتى بابا ظل دائما منعزل وحزين ويومية يروح يم عمة يواسيها
ولا كدرنا حتى ننتقل لبيتنا الجديد وابو الايجار هم قدر وضعنا وخلانا نبقى فترة الى ان طلع الاربعين مال ضياء رحنا زرنا قبره بالنجف ..

وراها بأيام سألت ماما شوكت نشيل لعد ؟
كالت خلصوا امتحاناتكم مالة اخر السنة وننتقل ان شاءالله ..
_ يعني البيت الي بصف بيت عمو ابو صفاء هو حنكعد بي .؟ حجيتها بنبرة فرح وممسيطرة على نفسي وبدون وعي مني ..

حسيت ماما ضاجت من ملامحها كالتلي اتبعيني للغرفة .. كمت وراها ودخلنا للغرفة كالت تعالي اكعدي يمي واشرتلي على السرير ..

كالت :- شوفي انت صرتي كبيرة وان شاءالله بعد هالامتحانات تنجحين وترحين للخامس
واحنا راح ننتقل ونكعد يم بيت عمج اي حجايه اسمعها عنج او اشوفج بعد الج نفس يم صفاء وحق العلي العظيم يازهراء ازعل عليج اني امج واعرف
بمصلحتج الموال الي براسج شيلي زين دتفتهمين
شنو احجي ؟

حسيت الدمعة راح تطفر من عيني وقلبي ظل يدك سريع وانفاسي توترت وما اعرف رغم كلام امي الشديد اللهجة كتلها لامي بس ماما مو بيدي اني ..

وبنبرة حادة كالت لا بيدج ونص وخلي ببالج صفاء استأذن من عمتج نهاية هالشهر يخطب لتخليني اطلع
نار قلبي بيج و اول وحده انتي تحضرين وتشوفين فرحته حتى يموت حبه بقلبج افتهمتي
مااريد ااذيج لان اني مرة مريضه اليوم باجر
ميته مااريدج تحقدين عليه وتكولين امي اذتني ..

كمت بسرعة حضنتها وماكو شي وكف كدام دموعي الي جنت حابستها قبل شوية ، بجيت بحركة وكتلها لا ماما فدوة لتكولين هيج وصرت ابوس بيدها
عمرج طويل يوم والله اروحلج فدوة اني يومي قبل يومج كلشي تريدي اسوي حاضرة اني خلص خلص اعتبريني نسيته من هاللحظة ..

عبير..
وبالفعل زهراء ابتعدت عن صفاء وصارت مسؤوليتها
البيت وتساعد امي وتهتم بينا لحد قبل خطبة صفاء بأسبوع وبعد ما اخذوا موافقة عمة ام ضياء حددو موعد للخطبة ..

جانت زهراء ممهتمه او تمثل انو هي ممهتمه بس هواي تصفن امي جانت مقربتها حيل الها من تصفن تجي تحضنها وتبوسها وتضحكها ..

لو من تضوج تروح هي وياها يسوون كيك
ونطلع بالحديقه حاولت امي شكد متكدر تطلعها
من المود الي هي بي..

وبالفعل زهراء جانت مستجابه لأمي بس بالليل اسمع بجيها وأنينها جانت تتعذب بس متبين كدام امي متريد تخذلها ...

صفاء ... قرب موعد خطبتي رحت لعمتي ترخصت منها كالت تزوج حبيبي البلد وضعه ماينحزر والراح مايرجع بعد اذا اجلت زواجك تزوج والله يسعدكم ..

بوستها من راسها وايديها ..
كالت تعذرني ما اكدر اجي بس ورة الخطبة اجي اباركلكم وشتيفين الف خير ..

طلعت من بيت عمتي ورحت لبيت عمي تحسين واني جنت اتمنى ضياء عايش ويحضر فرحتي بس حرموني منه المجرمين قتلو بدون ذنب وحرمونا كلنا منه ..

دكيت الباب فتحته الي زهراء .. سلمت عليها
ردت بصوت مليئ بالخيبة ودنكت بسرعة ما ان اجت عيوني بعيونها ..

فاتت قبلي وطلعت عمتي من الباب سلمت عليها
كالت تفضل جوة ..
_ لا عمة الجو حلو هنا واني جاي اشوفكم واروح عمي موجود ؟
_ لا عمك طالع .. تعالي زهراء جيب جاي لابن عمج ..

بعدهه اجتي زهراء جايبة صينية بيها جاي وكلتص مي قدمتها الي بس كلش مبينه ضايجة ..
كتلها شكرا ام الزوز باوعتلها وابتسمت بس هيه بقت مخنزرة وضايجة ..

رفعت راسي صفنت بوجهه انتبهت على نظراتي وتحسرت باوعتلي ، عبثت بخصلات شعرها المتناثرة على طول وجهه ويم عيونها تركت خصلة متدلية على جبينها تتأرجح بالفراغ والباقي خلته وره اذنها وراحت ..

كتلها عمة شبيها زهراء ؟ اشو مو على بعضها ؟
كالت :- امتحانات جايتها وضايجة شوية ..
_ الله يوفقها شوكت تنتقلون اشو طولتو ؟

_ والله البيت يحتاجله ترتيبات وهم البنات عدهم امتحانات اخر السنة مبقى شي عليها واذا انتقلنا تصير المدرسة بعيدة عنهن ..

_ ان شاءالله خير عمة ، الخميس الجاي ان شاءالله حنسوي خطوبتنا اني واسراء حفلة بسيطة بيناتنا وجيت دا ابلغكم وغير مرة امر على عمي وهم اكوله ..
_ شايفين كل الخير ان شاءالله ..
_ يله اني اترخص عمة ..
_ وين بعد وكت انتظر عمك على جية ..
_ لا عمة هاي جيتي من الدوام ورحت بيت عمتي واريد ارجع ارتاح وهم اشوف اسراء شنو ناقصها ..
_ لعد روح ارتاح وعمك اني ابلغه ..
،_واني هم اخابره عود .. الله وياج عمه
_ الله وياك ابني ..

زهراء .. وقرب موعد خطبته لصفاء جنت مثل الي يبلع الجمر على انو ثلج هيج جان احساسي باخفاء شعوري ..

بيوم الخطبة رجعنا من الدوام على وقت .. نحضر للخطبة ماما رادت تسوي اكل
كتلها انتظري متما اني اسوي وانت روحي اهتمي بعبير ومريم ..

كالت ماما لا اريدج تطلعين اميرة يلا روحي اسبحي وتعالي اكلي حتى تبدلين ومثل موصيتج زين؟ اوكفي كدامهم وشبعي شوف منه شوفي وهو فرحان حتى ينكسر حبه بقلبج ، كدامج حياة طويله وكلية
حتشوفين بيها نماذج بس تكبرين تضحكين ع
عقلج هسه ..

هزيت راسي ورحت سبحت ومشطت وسرحت شعري واجيت اكلنا ماما جانت تاكل وتبتسم
كالت بناتي كبرن وصايرات اميرات ضحكنا واكلنا
بعدها بدلنا واجه بابا سبح وبدل ورحنا ..
امي جانت تمشي ويايه ومتركتني

بابا كاللها شو تاركتني بنتج صارت شابه واني نسيتيني مو؟ بسيطه !

كلتله ماما لا انت الاصل بس بنيتي شابه وحلوة واخاف عليها ..

_ اي حقج يابه حقج ..

دخلنا جوا واجت عيني على صفاء طالع كولش حلو وبس يضحك مع انو هو مغرور بس بهذا اليوم يضحك
ويا الكل وكل شويه يركص ..

حاولت بأي مكان يتواجد بي اطلع منه .. بعدها اخذونا و رحنا لبيت اسراء بحي اور .. شفتها طالعة تجنن .. هيه حلوة مليانة وعيونها عسلي وبشرتها حنطية وشعرها بني .. رافعة شعرها بتسريحة نازكة وبدلة وردية ..

رحت دا اباركلها .. كالت  يوم الالج واخلص
منج وحصير قريبه عليج مو تظلين كل شويه
تجين بحجة عمي وعمتي .. وظلت تضحك ..

ضربها صفاء بخفة على ايدها وخزرها ..
كاللها هي شوكت اجت زهراء  لبيتنا حتى تحجين
هيج انتي وشنو هالحجي انتي عروس لازم تكونين مميزة حتى بأسلوبج بلا حجي ماصخ مو وكتها ..

هي كلتله شبيك دااتشاقه وهم طكتها ضحكة وكأنه الكاع مشايلتها ..

رفعت حاجبي باوعتلهم بنظرة عدم رضا
  شلون زوج نفس الاسلوب لايكين
لبعض ..

ورحت كعدت يم امي واخواتي ظلت امي تباوعلي بتفحص ..

بدت مراسيم الخطوبه واسراء بس تخزر بيه تدور تدور وتباوعلي لو تسوي حركات عود تغورني ..

واني بس افر بيدي وادير راسي  عنها كلش نرفزتني ..
اخير شي امي غيرت مكاني كمنا من كدامها

اما  وعبير ومريم  ماخذات مهمة الركص عدهم حفله
شاورت امي كتلها مكافي بناتج الراكوصات مصار وقت يكعدن كافي عاد ..

ماما خزرتهن واشرت عليهن
كالت كافي تعالن اكعدن .. اجن كعدن ..
كتلهن  الي تكوم تركص اكسر رجليها اكعدن وبلا لغوة ..

هنه ضاجن وتذمرن ورادن يكومن مرة ثانية
بس ماما ساندتني ومخلتهن ..

رجعت طليت على صفاء واسراء
واشوفه بس يهمس بأذنها  ويضحك
من اعماقه ..

بنفس الوقت امي جانت دتضحكني تريد تنسيني
وتخليني اباوعلهم حتى تقويني بس اني مثل الي لازم جمر بيده ويجويه ..

و صار وقت تلبيس الحلقات وبهاي اللحظة احس صفاء طار من الفرحة ..

كامت  امي جرتني حيل وكالت كومي وياي ..
كتلها شكو ماما ووين ؟

مجاوبتني  لزمتني من اكتافي وكفتني  كدامهم
وجبرتني اباوع عليهم ..

حسيت وجهي احتقن حقن ظليت اعض بشفتي اريد اسيطر على نفسي ، تركت ايد امي وخرتها مني
وعفتهم قبل ليكملون تلبيس الذهب ..

رجعت كعدت شربت مي وسكتت الى
ان رجعنا للبيت انظاهر  بالهدوء ادعي انو انب هادئه
بس بداخلي العكس براكين من نار ووجع تتلاطم وتجويني ..

بس وصلنا للبيت ركضت للغرفة وظليت ابجي بصوت عالي مكدرت اسيطر على نفسي ..

عبير....
من سمعنا صوت زهراء تبجي بصوت عالي ظلينه وحدة تباوع للثانية .. أمي كالت  اتركوها براحتها وانتوا روحوا بدلوا وغسلوا وناموا

صعدنا اني ومريم لغرفتنا فوك
مريم : ولج جان بيه ركص مثل ملايين الرقاصه بس ماما وزهراء وكفوا بطريقي و مقبلوا ..

كلتلها والله هسه اذا تسمعج امي تسويج وصلة ملايين الرقاصه دنامي ولج بطول الابرة وتعرف ملايين..

_ ديلا هسه انتي من كبرج عود ولج نامي ..
صدك بس باجر نشبع نوم السبت دوام غضب وأمي تفتر ع راسنا عبالك مديرة مدرسة هسه هي صح مدرسة بس مو علينا شوكت اخلص مدرسة وارتاح...

بهاللحظة فاتت  أمي ومبينة سمعتها ..
وبنبرة تهديد كالت : ولج سمعتج مو اجيج اشلع اذاناتج نامي احسلج..

مريم : هسه  واحد ميصير يتشاقى ..
وبسرعه تمددت بجربايتها وغطت حتى وجهه ..

الصبح كعدنا باوعت لزهراء عيونها منفوخه وحمر
وخشمها احمر ،  امي باوعتلها بعدم رضا ودارت
وجهه هي راحت لماما ..
كلتلها اساعدج بشي ؟
  امي بقت ساكتة تباوعلها بعيونها بنظرات متذمرة وبس ومحجت وياها ابد ..

رجعت عادت نفس  السؤال وأمي هم مجاوبتها
تحسرت و جرت كرسي وكعدت وخلت ايد ع راسها والثانية تدك بيها ع الميز ..

أمي جان قصدها تتجاهلها حتى تحسسها بغلطها
لان  مسمعت كلام أمي ..

أجه بابا جايب صمون شاف زهراء جان يفز
كال لأمي ولج هاي شبيها بنتج؟

جاوبته أمي : انفلونزا هسه تشرب حليب وترجع
تنام تصير زينه وخزرت زهراء .

بابا انطاني الصمون داافرغه بالسله وامي خلت
الاكل واكلنا بس بابا جان ياكل ويباوع لزهراء
ويهز براسه ..

بس كملنا  أمي كالت لزهراء  روحي
نامي بلكي تصيرين زينه ..  بعدها امي بعدها تحجي
اندك الباب رحت فتحته ..
طلع صفاء ومن شفته عرفت ليش ماما كالت لزهراء روحي حتى لتشوفه وتزيد حالتها سوء ..

كرصني من خدي وفات وهو
ديمشي كال خوما تريكتوا ؟

كلتله قابل ننتظرك لو مثلا عريس ونجيبلك گيمر عرب كال عبود شلون بلسانك احنه انت مشروع زلمة بس مانجح ..

كلتله أسمي عبير مو عبود ..
كال والله انت تلعب ويا ولد المنطقه وتتعارك
وياهم مااشوفك بنية اشوفك ولد
وهسه كوليلي عمي هنا ؟

كلتله بلي دينتظرك تفضل .. جان يفتح
عيونه حيييل كال ولج صار ساعه تخطبين ع
راسي خطبة الجمعه وهسه تكوليلي تفضل لالا
انصدمت ..

كلتله لا خطبة الجمعه بالجامع مو هنا ...
دخل  شاف امي دتخزر بزهراء ظل يباوعلهن

زهراء كلتله هلو صفاء بدون مترفع وجهه وفاتت جوا بسرعة قبل ليرد عليها ..

حتى بقى يباوع وراها  باستغراب لان هيج عاملته.. بعدين
اخذ بابا وراحوا واني كمت دااساعد أمي دخلت انظف غرفة زهراء  شو لكيتها  تبجي ولازمه
صورة بيدها ..

باوعت وركزت بالصورة طلعت صورة صفاء تعجبت  كتلها هاي شتسوي يمج الصورة مو عيب أمي اذا شافتها ترزلج ..

احجي وياهه  بس هي مهتمتلي
أمي سمعتنا واجت شافتها ..

كالت : عبير ماما اطلعي برا
كلتلها :عفيه عبير وين متولي تنطرد اطردوني بالشارع
بعد ياامي اشرف ..

كالت بلا لغوة واطلعي برا يلا
كلتلها اي حطلع بس ماانظف الغرفه انتوا اطلعوا
حتى انظفها وسووا نقاشكم بالمطبخ والله مااجي
يمكم ..

شو ماما عصبت كالت ولج تطلعين لا اجي
اخلي رأسج بالبلوعه ..

كلتلها اووووووع هسه متريكه شنو بلوعه والله ياربي طالعه طالعه لعبت نفسي ..

أمي صح مخنزرة عليه بس بالكوة
كاتمه ضحكتها ..

زهراء من طلعت عبير جتي ماما كعدت بصفي
كالت  وتالي وياج ولج مو حتى صفاء يمكن
عرف بيج انتي ليش هيج تسوين بيه الرجال ارتبط ولج انسسسي لتخليني اجبرج بالزواج بهذا عمرج لتتخبلين من تالي كومي بسرعه كدامي ...

تجاهلت امي واحس صوتها يوصلني بعيد
وعبالك اني عنها بغير عالم ..

ظلت  أمي تهز بيه من اكتافي :  ولج مو دااحجي وياج متسمعين..

باوعت لماما بطرف عيني ورجعت درت وجهي

ماما كالت ولج شنو هالصلافه شلون تباوعيلي
هيج افكس عينج ترى ..

عصبت كلش وجرتني من شعري  ودخلتني للحمام خلت راسي  جوا الدوش ..

وتصيح بيه  اصحي لا ادخل ابوج بالموضوع والله واخلي يشوفلج حل اني تعببببت منج ولج اخواتج
صغار متعبني مثلج انتي مريم شكدوتها وتدافعلج
وعبير صايرتلج سند واخ وانتي المفروض تقومين
بهذا الدور كاعده تبجين ع واحد بنعال ممعترف
بيج ولج لا عبالج اني ماادري ادري بي كاشفج
ومغلسه وبالعه سمي شحجي وشكول من كون الله يأخذني ولا اشوف بنتي اموته نفسها ع شخص ميريدها كرامتج من كرامتي بس انتي وحده بلا عقل...

ظليت ابجي ورفعت راسي من المي ومبللة ملابسي وشعري .. كلتلها مو بيدي والله الليل كله احجي واقنع نفسي بس اني احبه من الطفوله ياامي افتهمي عليه انتي مو امي لازم تحسين بيه منو يحس بيه غيرج منوو؟ ماعندي احد اني ..

_ ومنو كالج محاسه بيج ولج حموت من قهرج حمووووت بس هاي هي  تعبت احسن شي اكول لابوج وهاي انتي كلتيها تحبي من الطفوله لعد كيف هو واسراء حبهم طفولي وهسه كبروا وهي تخرجت وهو دكتور راح يتخرج شبوا وهم يحبون بعض جايه انتي بكد الفصمه تريدين تاخذي الج ولج اني امج مااقبل
اسراء ينكسر قلبها علمود سعادتج ...

سكتت ماعندي اجابة اني ماريد اخرب علاقتها بس ماعندي قدرة على مواجهة مشاعري ..

بعدها طلعت امي وتركتني وحدي ... بقيت للظهر بغرفتي سمعت صوت هوسة وطلعت وشفت امي تعبانة كلش وبابا ديوديها للمستشفى بس اني مالي عين حتى اتقرب منها لان اني السبب بكلشي هيه بي ..

عبير .. رحت ويا ماما للمستشفى لان زهراء مريضة بابا
مقبل ياخذها لا تتعب اكثر .. و دخلوها مستشفى
و سكرها كولش مرتفع ..

بابا سالني كال شصار شبيها امج الصبح مابيها شي خو ما انتن تعبتنها ؟
امي خزرتني حتى مااحجي ..
كلتله ماادري بس هي امي الصبح تذكرت علي وفدى وكامت تبجي عليهم ..

بابا باوع ع امي وكاللها أم زهراء انتي ضوء عيوني
وحق الله اعزج اكثر منهن واشر عليه يعني علي
وفدى ماتوا منقهرت عليهم كد ماانقهرت عليج
من شفتج اغمى عليج ليش تأذين نفسج وتأذيني ..
امي كلتله مابيه شي هسه اصير زينه واوعدك اهتم بنفسي منا وجاي..

ماقبل الدكتور يطلعها محتاجة عناية بقيت اني يمها  بالليل اجت خالتي دتبات يم امي وبابا يرجع يم زهراء ومريم ..

خالتي كلتله اخذ عبوره وياك ... بس اني مقبلت
شلون اطلع وامي هيج تعبانه واتركها عاندت وبقيت يم أمي ...

الصبح اجت زهراء للمستشفى جابها بابا ومريم بقت يم بيت عمي ، زهراء بس اجت شمرت نفسها ع امي وكامت تبجي وتبوس  بأمي وتعتذر امي مسحت ع راسها بس محجت ..

بابا ظل يباوع مستغرب كال شكو زهراء  ليش تعتذر؟

رفعت راسها تباوع وعيونها تجري دمع وصايرة حمرة .. جان اني انط وكلتله مو هي جابت صور فدى وعلي وشوفتهم لماما وهسه دتحس بالذنب اكيد ...

بعدها  الدكتور كتب لماما خروج وطلعنا
بس وصلنا للبيت بابا كال امشي عبيكة نسوي اكل وكعت براسنا منا زهورة مريضة ومنا امج ايدنا ورجلنا هم تعبانة مظل بس احنا .. وانتي طبخ طيب ..

حسيته ديشجعني حتى اساعده رحت وياه كعدنا نطبخ
هو يدور ع البهارات وأني ادور ع الجداحه ..

كال ولج انتي صدك ولد شو كولشي متندلين ؟
كلتله: شنو ولد بابا هسه كلت طبخج طيب وهسه
سويتني ولد؟

كال اتشاقه اتشاقه استمري بالبحث مبين هاليوم حلو من بدايته بشغل النسوان ..

كلتله بس تدري لايكلك ..
كال شنو ولج ؟
كلتله وكفتك بالمطبخ والله حلوة وتضحك
_ تضحكين على ابوج لان يطبخ ها ولج . وكرصني ابتسمت .. وساعدته بالطبخ .. وكل شويه واحد من عدنا يتذوق الاكل خاف يخرب ..

ضحكت  كلتله والله بابا حيخلص الاكل
بس ع شغلة التذوق مالتنا ..

كال اي مبين هيج  اني شلون نسيت اجيب جاهز
كلتله الحظ نساك حتى نتورط بشغل المطبخ ..

كملنا طبخ وبابا راح يسبح واني صبيت لماما
طلع بابا اخذ الاكل وراحلها واني صعدت فوك
دااريد اسبح جان الكي مريم  الغضب دايرته
ع سبيستون ودتشوف توم وجيري كعدت وياها
اتفرج ياسبح يابطيخ حتى نسيت اكل اخير شي
خلصت كلتلها جيبي ولج ندير ع الاغاني ونكمل
الركص الي مركصنا بحفلة صفاء......

كالت دروحي اريد اشوف كارتون..
كلتلها تجيبي لا اكوملج والله
هي تخاف مني كولش واني ممصدكه عايشه اللحظه براسها ..
كالت عبورة انطيج الف والله بس اشوف شويه ..
كلتلها يلا جيبي الالف ..
كامت جابته وباستني وهي الممنونه..
تركتها ودخلت سبحت ..

ونزلت جوا صبيت اكل اليه والها لان الجماعه تغدوا وناموا شكلهم نسونا هاي كل متتمرض امي
هيج نتشتت ويطيح حظنا ..

.. صعدت لكيتها نايمه وحاضنه دبدوبها وهي دبدوبه
وتشبه أمي نسخه منها خليت ايدي جوا راسها
ورفعته وخليته ع رجلي وبستها وحطيت الالف بيدها ...

كعدت احجي وياها وهي نايمه كلتلها ولج مريم امي مريضه اذا ماتت احنه شلون بينا وين نولي هي بس تتمرض احنه نتبهذل ادعي من الله انتي طفله كون الله يحفظها النا ...

بس اني لتخافين والله احبج صح اتعارك وياج واضوجج انتي وزهراء لان اخاف عليكم اني حاسبه نفسي ولد واخ الكم حتى محد يأذيكم.....

جريت مخده وخليتها جوا راسها وغطيتها ونزلت لزهراء  لكيت العينتين حاطه صورة صفاء وتنوح اني شفتها وشياطين الدنيا كلها تربعت براسي ..

رحت عليها جريت الصورة كلتلها ولج انتي صدك وحده
متستحين وادبسز اني صح اصغر منج بس اعقل
منج بهواي سخيفه حرامات انتي اختي ولج امي وصلت الموت من وراج ياحقيرة وانتي كاعده تباوعين بصورته لاعبالج مااعرف لا حبيبتي كولشي اعرف انتي تحبين صفاء  وجريتها من ياختها وكملت كلامي وهذا صفاء نعال اسراء يفضله عليج احترمي نفسج واثكلي حلوة البنية من تبيع ثكل من وراج حتنزلين راس امي وابويه ...

هيه بس صافنة بوجهي ومتفاجأة ..
اجيت اطلع رجعت درت وجهي عليها
كلتلها اذا صار شي بماما محد يخلصج مني

كالت  انتي ولج منو علمج هذا الكلام الي
اكبر من راسج ؟

كلتلها حبيبتي من شفت اختي الجبيرة فاشلة قررت ابني شخصيتي ومااصير مثلج ومنا وجاي لتتوقعين مني احترمج اني احترمج لخاطر امي وابويه كدامهم حعاملج بكل احترام تدرين ليش مو اخدعهم لا بس حتى ميكولون ماعرفنا نربي صح...

جريت الصورة وشكيتها وشمرتها ع راسها...

تقربت مني رافعة ايدها و اجت تضربني
وجان ينفتح الباب ودخلت ماما...

كالت عبير ليش هيج ويا اختج الاكبر منج ؟
كلتلها امي تعبت احنه ماعدنا هيج عيارة شخص
ميريدها شكو لازكه شنو من شخصية وشوفي امي صح احبج ونعالج تاج ع راسي بس خلي
اكولجياها هاي بنتج انتي معرفتي تربيها زين
عيدي تربيتج بيها ..

بعدني دااحجي جان ماما ضربتني راشدي اجت ايدها على اذني والترجية  من قوته اذني طلع منها دم ...

كالتلي سخيفه دتحجين عدل وفرحانه بيج واكول عندي بنية بألف رجال بس توكفين بوجهي وتكوليلي
معرفتي تربين ادوس ع راسج بنعالي هسه والله
ولج اني اعامل اختج بهدوء لان اعرفها مابيها
خير خاف اذيها وتسوي شي بنفسها وتفضحني
بس انتي من اقسي عليج اعرفج سباعية متهتمين
وقسوتي الج تزيدج قوة بس مو معناها تقللين
ادب ويايه ...كومي اطلعي برا ..

كلتلها اي حطلع بس بنتج ربيها عدل ترى والله اني بس تتخربطين بعد اكول لبابا وحتى صفاء اوصلها اله  اكوله بنت عمك تحبك بعد لتجي لبيتنا حتى متشوفك جوليت وتنهار ..

ماما خزرتني خزرة تخوف عرفت راح يجيني الثاني ...تركتهم وطلعت

واسمع ماما تعيط على زهراء   ولا نزلت ولا اهتميت كلت شيصير خلي يصير صعدت لكيت مريم  تبجي....
كلتلها شكو بس اسمعلج نفس اجرج من شعرج والله...

هي خافت اني خزرتها ...
كالت عبير بس اكولج شي اني مااخذته هو اجه يمي...

صفنت عليها شنو مااخذته شنو اجه يمي شبيها هاي اهلي شبيهم؟

كلتلها شنو ؟
كالت بس مو تضربيني
كلتلها لا احجي
كالت اني مو انطيتج الف؟
كلتلها اي صح
كالت اني نايمه وكعدت شو لكيته راجع بيدي يصير هو رجع من حاله لان عرف اني امه ؟

هي حجت هيج واني وكعت بالكاع من الضحك
كلتلها ولج متدرين انتي البنك المركزي وصرتي امه  ولج هو الف ملزوك بمية نعال ..

كالت اي عفيه هاجيا بس لتضربيني ..
كلتلها دروحي هو اني انطتجيا من نمتي
جنت اضحك عليج واخذته
كالت زين هسه
اني جوعانه شوكت ناكل ؟
كلتلها مو سويتلج اكل وانتي نايمه ...

كالت اي بس هسه جوعانه..
_ تعالي ننزل اسويلج اكل..
_  وانتي متاكلين ويايه ؟
_ اووو  مااريد سم ..
_  لعد مااريد اني همين ..
اريد اجاوبها ظلت تصرخ   دم دم دم ..

كمزت كتلها شنو؟؟  وين ؟؟
ظلت تأشر يم اذنج دم ..

لزمت اذني نسيت هي طلعت دم ..
كلتلها اي من التراجي هسه انزعهم..
كمت نزعت التراجي و  نظفت اذني

ونزلنا جوة دنتغده  ..  دخلت ماما للمطبخ باوعتلي بخزرة وراها فاتت زهراء ..
ماما: كومي اعتذري من اختج يله اشو كدامي ..

كلتلها منو؟ تقصدين عليه ؟
كالت ليش اكو غيرج ؟
كلتلها بس اني مسويت شي
كالت دااكولج كووومي لتخليني اتصرف غير تصرف وياج ..

كمت جاي اعتذر من زهراء  بستها وكعدت

امي كالت شو مسمعت كلمة اسفه
كلتلها بوسة معناها اسفه ..

كالت كولي اسفه كلتلها وغصيت باللكمة حسيت امي هانتني وزهراء  راحت ..
كامت امي حضنتني ..
كالت ولج انتي احبج واكول سباعية بس مو توصل لدرجة تقللين مني ليش تجبريني ااذيج ..

كلتلها وانتي ليش مااذيتني مو طلعتي دمي

اجت دتلزم اذني بعدت راسي عنها
كالت بكيفج ماما بكيفج وراحت ..

امتحنا اخر السنة وبابا كمل ترميم البيت الجديد الي يم بيت عمو ابو صفاء .. بابا كال اني رايح اشوف شنو ناقص بعد وانتوا فرغو المكتبة من الكتب وخلوهن بالكراتين وديرو بالكم عليهم كلش زين ...

طلع بابا واحنه كبل للمكتب ظلينه نطلع الكتب ونخليهن بالكراتين اكو بوفيه وبيها دواليب هم دنفرغها حتى نفتحها وننقلها للبيت الجديد .. فتحت ماما وحدة من الدواليب وطلعت منها اغراض وجان توكع ويا الاغراض ملابس داخلية ..

ظلت تقلب بيهن ماما بصدمة ، صاحت زهراء هاي الج شيسوون هنا ؟

تقدمت منها زهراء كم خطوة باوعت عليهن برفض كالت لا لا ماما قابل ليش اخليهم هنا مثلا وبعدين هذا حجم كبير مو السايز مالتي ..

امي لطمت وجهها وكالت يا عزا خاف خاف هاي الملابس لهبة بنت ام حسين ، ولج عبير انطيني تليفوني بسرعة ..

ركضت جبت تليفونها جان كتكات اسمه جانن التليفونات انتشرن قبل بوقت ..

انطيتها الفون اخذته مني بسرعة
خابرت بابا وظلت تعيط
كلتله هسه تجي للبيت ترى وحق الله متلكاني بي اخذ بناتي واطلع ..

مااعرف شنو جاوبها هو .. بس هيه بسرعة عيطت مرة ثانية بانفاس متهالكة ..
صاحت ملابس داخلية  سودة وقذرة وعليها اثار ممارسة شيسوون ببيتي وبغرفة المكتب هاا ؟؟

يتبع ..

كلش اعتذر ع تأخير 😔هواي صارت اعتذارات اعرف بس عندي شعنونة صغيرة تاخذ تليفوني وتشوف ع يوتيوب وجويسم مكيف ع الوضعية وميقبل يجيبلها ايباد يكول احسن نهار كله عيونج بالتليفون 😏

بنات طلب وليس امر 😅وبصالحكم هم تابعو هالكاتبة هيه مكلتلي انشرلها بس اسلوبها كلش حلو بالكتابة ومواضيع قصصها حلوة كلش ومختلفة خاصة الدعلج فد شي كلش حلو تستاهل الدعم تابعوهه ❤

alraawih