رواية شريعة العشق الفصل الرابع 4 - بقلم نورا ناصر

#في_شريعة_العشق
بارت ٣
نورا ناصر

بابا ظل يدك ع الباب بقوة وعصبية ثواني يلله طلعت هبة متوترة تباوع ع الوجوه الكدامها وتنصي ..
بس طلعت كللها بابا ..
شعندج هنا بالمكتب قافلة عليج الباب وشعندج بالبيت اصلا اني مو كلت متجين بعد شهالتصرف هذا ؟

جاوبته :- والله ابو زهراء جنت دا انظفه ..
كالتلها امي :- تنظفي ؟؟ زهراء تكول من الصبح لهسه وقافلة عليج الباب ؟
_ لا والله قبل شويه هاي زهراء جذابة ..
_ جذابة شنو احترمي نفسج انت بنص بيتنا استحي شوية ولج هو اني وبناته بس ندخل للمكتب امج الي هي امج ميقبل تدخل انتي شنو من صلافه عندج
وقلة تربية ادبسز امشي اطلعي برا بيتي..

بابا عاط بأمي كاللها اسكتي عييب لتصيحين ..

ام حسين :- امسحوهه بيه واني اعتذر وهسه اخذهه للبيت وبعد ما اخليها تجي وعد عليه ..
وخزرت بنتها وجرتها من ايدها راحت لبست عبايتها وطلعت ..

امي كالت لبابا هاي هبة بعد ما اريدها ابيتي نهائيا وامها هماتين مبينه تدري بسوالف بنتها هذني الاثنين ما اريدهم بعد ابيتي وتريد تساعدهم وديلهم فلوس للبيت وخلصنا بلا دوخة راس ..

جاوبها بابا بهدوء خلص اهدي بسيطة مصار شي لاتعصبين .. بعد لحظات صمت
تكلم بابا وكال حضرو نفسكم باجر نروح لبيت ابو صفاء معزومين ع الغدا ..

_ خير ان شاءالله ..
نغزني گلبي باوعت لامي برجاء وحزن بنفس الوقت
تغدينا وخلصنا وصار الليل بعد العشا ودا اساعد ماما نغسل مواعين ونعزل بالمطبخ ..
كتلها شنسوي نروح لبيت عمو باجر ؟
_ عازمينا كلنا عمامج وعماتج يردون يتناقشون بخطبة صفاء واسراء ..
_ واحنا شعلينا بيهم ؟؟ صيحت بدون وعي مني
.. انتبهت على حالي ودنكت سويت نفسي مشغولة امسح الكاونتر ..

_ زهراااء .. صاحت عليه امي بنبرة حزم
وكملت كلامها .. احنا شنو كلنا بخصوص هذا الموضوع ؟ ..

_ اسفة ماما ..
_ هو غير ابوج عمه لصفاء يصير شنو نسيتي غير يتفقون كلهم خاف واحد عنده شي ..

هزيت راسي وبلعت ريكي ..
كتلها تردين شي بعد رايحة اقرا .
_ لا سلامتج روحي اقري وركزي .. زيين ؟
باوعتلها نظراتها بيها تحذير رعبتني طلعت من المطبخ غسلت ايدي وصعدت لفوك ..

يوم ثاني داومت ورجعت للبيت واشوفهم يحضرون يردون نروح لبيت عمو ابو صفاء واني مالي خلك حتى ابدل ملابس المدرسة .. مددت ع جرباية بصدريتي وحتى الجواريب مانزعتهم ..

فاتت ماما واخواتي مبدلات ومشطات .. شافتني امي تفاجأت .. كالت لج زهراء بعدج مامبدلة شمنتظرة لهسه لج راح نرووح لج زهراء لا تخبليني كدامي يله ..

كمت بكسل كتلها ماما عفية بس هلمرة خليني ابقى ما اروح ..

اشرت لعبير ومريم يطلعن ينتظرن جوا .. طلعن سدت الباب واجت يمي كالت ميصير هيه مو كل مرة يا امي كلما نروح وانت متروحيين اريدج تبينين لصفاء انو السالفة انست وراحت وصار ميهمج لتخلينهم يشكون بيج ..

_ بس ماما انتِ حاسة بيه مو ؟
حجيتها بنبرة تنذر ببكاء قريب ..

كالت :- اي ولهذا اريدج متماسكة وقوية اني مصرة اخذج ويايه اريدج تتعودين ويصير عندج عادي الموضوع ..

_ خلص مثل متردين هسه راح اكوم ابدل ..
_ عفية بنتي وبسرعة لان ابوج دينتظرنا جوه ..

طلعت ماما واني كمت كوة مسيطرة على نفسي
لبست قميص وبنطرون ورفعت شعري ليفوك ..
نزلت جوا لبست حذائي وتبعتهم شفتهم دينتظروني قفلت الباب وفتت بالسيارة ..

وصلنا لبيت عمو اول واحد شفنا ضياء ابن عمتي
تلكانه وسلم على بابا
كال اهلي هم اجوي وجان كلش فرحان لان زوجته حامل اول طفل بعد ٥ سنوات زواج وانتظار وعلاج واطباء وهو كلش يحب الاطفال لذلك جان طاير طير بزوجته ..

دخلنا جوا وسلمنا عليهم الكل موجودين .. فات صفاء سلم فرحان والضحكة تارسه وجهه ..
كال مدام كلكم متجمعين هسه دمشو هسه نخطبها للمحروسة ..

جاوبه ضياء لك على شنو مستعجل اصبر للجمعة .

صفاء :- دا اشوفك هواي صبرت من شفت سوسن اشو بيوم الي كتلي شفتها بالكلية بنفس الاسبوع دزيت عليها النسوان مو زين مني صبرت كل هالسنين كلما اريد اخطب تطلعلي سالفة صفح نوب حرب نوب اخوهه يحقر ويايه نوب مدري شنو وهسه مستر ضياء يريدني ااجلهها ..

كام ضياء مد ايده لحلكه عود يخيطه وكال يا كلمة ردي لمكانج صارت بيها فضايح يابه شعليه بيك ..

عمو ابو صفاء كال احنا حددنا الجمعة شنو نروح الهم هسه مو عيب ناس بعدهم ما مستعدين وهسه راح تصير السبعة بالليل اشو اكعد واسكت صفاء صبرت هالسنين اصبر منانه للجمعة احسن ..

صفاء كاعد ع التخم وشابك اصابعه ومدنك ويهز راسه برضى بس هو العكس وكال صار يابه بس ترة منريد نتعبهم كل يوم جايين نروح اليوم فد مرة ..

ضياء :- لا والله نجي يوميه شعدنه شورانه هو طبخ خالتي يتفوت اشو تنوكل الاصابع ويا ..

صفاء :- انت جاي تشبع بطنك وتولي مو؟
_ وبطن ابني هماتين .. ومد ايده لبطن مرته يمسح عليها ويضحك ..
_ لك هيه كلها خمس سنوات مصار عندك طفل اشو خبصتنا خبص غيرك ١٥ و٢٠ سنة ومسوو مثلك ..

_ لك حتى ع الفرحة لحكتني دخليني افرح ..
_ افرح افرح قابل لازمك بس لاتخبصنا ..

زهراء .. اني بقيت لازكة بأمي وما احجي ولا كلمة بس اباوع بعيوني وانصي .. واشوف صفاء مشايلته الكاع من الفرحة وبس يحجي بخطوبته اسوي هيج واجيب هيج واني اعرف اوصف شعوري .. مرة اكول اني فرحانة لفرحته ومرة اتمناه الي واكون مكان اسراء اني بس ما اعرف شنو الي مضموم اليه ..

خلصنا عشى وامي كلتلي كومي شيلي الصحونة وياهم
كمت اشيلهم وواوديهم للمطبخ بالممر الي يودي للمطبخ قطع طريقي صفاء ..

كال ها ولج بومه اشو حتى مشفتج سلمتي عليه ..
سويت احم وكتله سلمت عليك بس انت ماسمعتني ..

باوعلي بعين ونص وكال متأكدة ؟
دنكت وصديت نظراته خاف يكشفني اكذب
كتله اي وهزيت راسي ..
كال شعجب جايه كل مرة متجين ؟
_ شنو متريدني اجي ؟
_ لا مو هيج فهمتي غلط ، اي شلونج بالمدرسة هالسنة انت رابع عام مو ؟
_ اي .. زينة رايحة اودي المواعين للمطبخ ايدي تعبت ..
عفتع ومشيت كال اي شردي شردي ..

بعدهه كعدوا يتناقشون بموضوع خطبة صفاء واني حسيت الدمعة واكفة بنص عيني تنتظرني ارمش لحتى توكع ..

خليت وكمت من يمهم واحس الكل باوعلي بس مهتميت فتت جوة بغرفة هدير اخت صفاء وكعدت اسوي نفسي اعدل شعري واستغليتها فرصة وحدي كاعدة بجيت وكفكفت دموعي ..

بفيت هناك لحد ما صاحت عليه ماما وكالت يلله دنروح طلعت من الغرفة وماباوعت بوجه احد لان احس بعيوني جمر..

بعد بس اليوم وباجر والجمعة يخطب ويصير الها حلالها ملكها بس غير يقتنع گلبي .. !!!

يوم الخميس جنت بحالة يرثى لها اتمنى يمر هاليوم مثل الحلم واخلص منه اخذتنا ماما للسوك واشترينا ملابس لحفلة صفاء ..

رحت وياهه بلا نفس ومختاريت شي كله امي اختارت واني اكتفيت بكلمة كيفج واقيسهم عليه مثل اللعبة هيه ماما تحركني وتشوف القياس اني ابد ما الي رأي ...

رجعنا للبيت وما اعرف شلون نمت الليل اصلا مانمت بس اتقلب وابجي وكلساع اكوم احس شي بداخلي يجويني ..

الصبح اجتي امي كعدتني اصلا جنت كاعدة ..
واني جوة البطانية سمعتها تكول ولج ماما زهراء شصار بيج لهسه نايمة ديلله كومي نروح لبيت عمج و نتغدى هناك ..

وخرت البطانية شافتني امي انصدمت اجت بسرعة حضنتني كالت هاي شنو عيونج حمرة شمسوية بروحج .. تعبتيني زهراء انت اكثر وحدة دتعبيني ..

طفرت من السرير للارض بسرعة كتلها ماما الله يخليج
اعرف شحتكولين وفاهمة كلش زين بس الموضوع خارج عن ارداتي رايحة هسه اغسل بمي بارد وادلك جوه عيوني وارجع لطبيعتي والبس قناع الامبالاة تدللين ..

عفتها ورحت غسلت بمي بارد ثلج كلما اشمر على وجهي اتمنى يطفي لهيب جروحي ويهدأ البركان المشتعل بجوفي بس هيهات..

بدلت ملابسي ونزلت شافتني ماما كالت اخذتي ملابسج الجدد الي حتلبسيهن العصر بالحفلة ..
_ لا نسيت هسه اجيبهم .. صعدت فتحت الكنتور اخذتهم خليتهم بعلاكة ونزلت مرة لخ ..

وصلنا لبيت عمو وهناك هوسه واحس هالضجيج يدك براسي بهذا جنت كلش محتاجة اختلي بروحي انفرد ويا نفسي مو اكضيها مجاملات ابتسمي وضحكي وتصنعي وجاملي ليكولون عليج معقدة او يفسرون الواقع الي اني بي من صدك ..

الكل جان حاضر ببيت عمو ما عدا عمه ام ضياء وضياء جان مجهول سبب عدم حضورهم وجانت التليفونات مو كلش متوفرة فما عرفنا ليش ما اجوي ..

انتظروهم للوحدة ع الغداء بس هم ما اجو راحو ودزو كرار لبيتهم رجع كرار بخبر كلش مو حلو ..

كاللهم ضياء طالع من البارحة ومحد يعرف عنه شي اخوته وعمامه جاي يدورون عليه وملاكيله اثر ، امه ومرته بحالة صعبة كلش ..

اختفى ضياء بوقت جان نهر دجلة بي مئات الجثث من المغدوريين ..
وبوقت جان الخطف والقتل على الهوية ..
والامريكان يعتقلون ع الماشي اي واحد يشكون بي يعتقلوا .. ويغيبو بسجن ابو غريب او بوكا او اي معتقل اخر بلا تحقيق ولا محاكمة ولا عدالة بس الله يعلم الي يصير بي جوة السجن شنو ..
وجانت المفخخات والعبوات تحصد بارواح العراقيين بذنب وبدون ذنب ..

عفية ارض متشبع ولا ترتوي من دم ولدها ..

جان الوضع مخيف ومتأزم ومحظوظ الي يسلم على روحه .. لذلك جنه كلنا خايفين على ضياء

واختفى ضياء ومحد يعرف عنه شي ، وسط غضب بابا وعمامي ليش ما بلغوهم بلحظة اختفاءه ، اكيد مرادو يقلقوننا او عبالهم شويه ويجي ..

بابا سأل كرار وين جان رايح وبعد مارجع ..
كرار ؛- جان ديجيب علاج لزوجته لان تعبانة حالتها
_ هذا شوكت صار هالحجي ..
_ عمتي تكول المغرب طلع ..

الكل استنفر والكل طلع من البيت يدور وانطو خبر لاهل اسراء بتأجيل الخطوبة ..

كلنا ضجنه على ضياء وكعدنا نبجي وندعيله جتي عبير تهمس بأذني كالت باعي طول عمره صفاء يكولج بومة وهو هسه بس راد يخطب اختفى ضياء منو البومة هسه ؟؟

كتلها عبير مو وكتج لج ضياء الله اعلم وينه .. خطية كعدي خلي ندعيله بلكي يلكونه ..

كالت والله هاي اسراء البومة هيه فكرتنا وبسبلها ابن عمتنا مدري وين راح ..

هسه شلون مراح تسكتين اسكتي ليسمعج احد عيب هيه هم مو غريبة تصير بنت خالتهم عيب منهم متعرفين العيب انتِ ..
قوست شفايفها وهزت اكتافها وراحت طلعت ..

اجو المغرب وماكو خبر عنه اخذنا بابا للبيت وكال باجر هم نرجع ندور عليه ..

وبسبب اختفاء ابن عمتي ضياء تأجلت الخطوبه والكل
ظل يدور عليه بس محد عرف هو وين يوم يجر
يوم وصار اسبوع على اختفاءه ..

اندكت الباب طلعت فتحتها شفته صفاء بالباب وكفت اباوعله .. عاط بيه كال دروحي من وجهي فكرتيني امج وين ؟

ضجت كلش منه ولازم اوكفه عند حده
كلتله اطلع برا بيتنا امي مو هنا وانت واحد مامحترم
من افتحلك الباب المفروض تكولي السلام عليكم
مو تعيط عليه عود انت دكتور شبقيت لولد
الشارع ..

هو عصب خزرني كال هاي عليمن ولج طايحة الحظ ؟

ماخليته يكمل بسرعه طبكت الباب
وكلتله من ورا الباب دمشي لك يريد يعصب عليه
انت ضايج خطوبتك تأخرت احنه شكو يلا روح
ابجي بيتكم لتجي يم ماما لان مريضه ..

سمعت دفرة الباب وراهه اجه صوته يصيح
_ بنت ابوج افتحي الباب ..

كلتله هو لان بنت ابويه ماادخلك يلا روح .. وتركته يصيح .. لج اني اعلمج بسيطة افتحي الباب لا مايحصلج خير ..

واريد ادخل طلعت امي كالت منو بالباب زهورة

حجيت بصوت عالي متقصدة اسمعه
كلتلها مستعطي انطيته هالقاسمه الله وراح..

اني حجت هيج جان صفاء يحجي من
ورا الباب كال بالله شنتطيني ولج كلاص مي
ماكو .. ها نسيت صح طلعتيلي لسانج مال الدلاله..

صاحت امي عليه .. ولج عيب شلون هيج تسوين
وراحت فتحت الباب لصفاء اجه من باب الشارع يمشي ويخزر بيه ، بسرعة فتت جوا اني ورحت للمطبخ
وامي فوتت صفاء للاستقبال ودخلته جوا ..

بس كعد صاح زهراااء جاوبته من المطبخ شتريد؟

كال سويلي جاي ...

ضحكت عبالي راح يرزلني ، سويت جاي وديته اله
كال خوطي وانطي اليه ..

كمشته منه بتذمر بحيث ظل يترقرق الجاي بالاستكان وهو حار وقطراته وكعدت على ايده خزرني ماحجى شي واني ابتسمت بس مباوعتله ..

خطته وكتله هاك بحدية ، اخذه وضاكه واني دا اروح جان يكول شنو من جاي هذا باااارد ؟

كتله واني متفاجأة منيله بارد والله حار ..
كال هاج هاج روحي حمي ورجعي صبيله ..

اخذته من ايده وانطيته لامي
كتلها هاج ماما شوفي صدك بارد الله عليج
ماما مالزمته بس كالت بارد ماما روحي دفي
وعضتلي شفتها السفلية ..

قوست شفايفي ورحت للمطبخ فتحت النار ع الجاي
خليته خمس دقايق وصبيته من جديد وديته اله
قدمته ما اخذه مني بس كال خطتي ؟

مديت ايدي للخاشوكة وكلت اللهم طولج ياروحي بصوت عالي وظليت اخوط وهو يسولف لامي شون جاي يدور على ضياء ومديلكاه وشلون ضايج عليه كلش وحتى اكل مدياكل واني بقلبي اكول اي خاف ضايج لان تأجلت خطبتك الگشرة ..

انطيته اله ضاكه كال ولج هذا محرووك بطلت ماريد جاي سويلي كهوة ..

كتله اوو احنه ماعدنا كهوة افتهمت هذا اخير شي اشربه واسكت شهالدوخه هاي ..

امي خزرتني وصاحت زهراااء واشرتلي بعيونها بخزر تأمرني بأن اسكت سكتت وصعدت فوك ..
بس انافخ وضايجة واحس خدودي انترسن دم بين خجل وبين غضب..

شفت خواتي بالغرفة مفترشات الارض والالوان بكل مكان وجاي يرسمن كعدت اتلهى وياهن وانسى شوية لانه احسه مسيطر على مشاعري وبقوة ..

للمغرب نزلت اتلفت ماكو صوت لصفاء رحت للاستقبال مشفته رحت للمطبخ امي دتحضر العشاء
كتلها لعد وينه صفاء ؟

باوعتلي لحظة يلله جاوبت كالت راح وجرتها حسرة ..

خليت ادي على حلكي وحجيت بقلبي هسه اله اسأل عليه هف .. تأفأفت ..

كملت العشاء وياهه اجه بابا وخلينه العشاء ودناكل ..
بابا كال :- ابو البيت يريد بيته ..

امي تفاجأت كالت شوكت ؟
_ يكول اقل من شهر محتاجه كلش ..
_ تسرعت وبعت بيتنا الي بالدورة يا ابو زهراء ..
_ المنطقة بعد مينكعد بيها وفلوسه موجودة ان شاءالله نحصل بيت بهالفترة ..
_ شكولك يعني شهر مو قليلة المدة معرف يكولنه قبلها بوقت ..
_ اي والله وخاصة احنا هسه مشغولين ندور على ضياء وامه حالتها حالة ..
_ الله يفكه ان شاءالله ويرجع الهم سالم ..

صفاء .. طلعت من الكلية ورحت لبيت خالتي ام غيث فتت سلمت على خالتي وسألتها عن اسراء
راحت تصيح الها واني كعدت بالاستقبال
جتي اسراء ضايجة ومغندبة سلمت وكعدت بعيد عني ..

كتلها خير اشو خشمج المكعبر ما يكصه السيف ..

كالت يعني هسه انت عاجبك الي ديصير للمرة للشكد وهم تأجلت خطوبتنا ؟

كتلها لا معاجبني طبعا ولا عاجبني اختفاء ابن عمتي المفاجئ بوقت الجثث مشمرة بكل مكان ولا عاجبني حالة عمتي الي تصعب ع الكافر ولا زوجته الي حملها مهدد بالاسقاط ومحتارة عليمن تبجي .. لج ضياء ابن عمتي واخوي وصديقي ومتربين سوى دتحسين بيه انت وبكمية الالم والقهر الي بداخلي لو لا ؟

باوعتلها دنكت راسها كملت كلامي
كتلها لتصيرين انت والضروف ضدي اسراء ..
رحت كعدت يمها كتلها اسراء اني صبرت وتحملت وقدرت الضروف الي اجلت خطوبتنا من قبل وجان سببها اخوج الغثة غيث .. هسه اجه دورج توكفين وياي وتصبرين وتتحملين ..

_ مو اني اريد ننخطب باسرع وقت هم صارت الشغلة طويلة واخويه هم ميتأمن وخايفة لياخذوك مني ..

_ منو ياخذني منج بلا زحمة تدرين بيه بس انت عندي وما اباوع لغيرج ..

_ بنات عمك ويا كثرهن ماشاءالله ..
_ هم خليتي بنات عمي بالنص شون وياج انت لج بابا بس انت عندي هاي السنين كلها وياج وبعدج مالج ثقة بيه ؟

خلت راسها على كتفي وسكتت ظليت احرك بكتفي الي مخلية راسها عليه كتلها ها متحجين مالج ثقة بيه ..
_ والله انتوا الزلم متنحزرون .
_ طيح الله حظج اي والله اشو وخري خلي اولي ليجي اخوج ما اريد التقي بي واشوف وجهه ..

_ لا والله غيث مسافر ...
_ يا الله فكه منه ومن وجهه كومي صبيلي غداء لعد خلي الشيطان نايم ..

_ تدلل حبيبي اطيب غداء لحبيبي ....

كامت صبتلي غدى تغديت وطلعت رحت لبيتنا نمت شويه ورحت حاجيت ابويه ..
_ كتله يابه امشي على بيت عمي تحسين خلي ناخذه ونروح لابو اسراء نحجي ويا ونثبت موقفنا ويا مدام ابنه غيث مسافر ميأثر عليه ..

_ صدك تحجي يا صفاء احنا بيا حال هسه ..
_ يا به محد محروك كلبه على ضياء بكدي بس البنية احبها والي سنين وياهه ومواعدهه بالخطوبة ما اكدر اتأخر اكثر بعد ..

_ شسويلك كمت تلح خلي نتعشى ونروح لبيت عمك ..
تعشينا ورحنا لبيت عمي تحسين ابو زهراء ..
كعدنا بالاستقبال ابويه كال لعمي راح اروح ع ابو اسراء بس اذب حجايه يمه حتى مينطيها لغير صفاء هذا يحبها وميصبر بعد ..
عمي كاله عيب من اختنا حالتها حالة ..

خليتهم يحجون ورحت اريد اصب الي مي شفت زهراء بالمطبخ دايرة ظهرها تقربت منها خرعتها التفتت الي مخلية ايدها على قلبها وجهها مخطوف .. ظليت اضحك عليها ..

كالت شعندك صبح وعصر وليل عدنا ماعندك بيت ....

كتلها شعندك كاعد بكلبي ماعدكم بيتة ...

_ هذا الحجي كوله لاسراء حبيبتك مو تكوله اليه ..

ضحكت بصوت عالي كتلها طبعا اكوللها قابل خايف منج وبعدين منو كلج اني دا اقصد عليج ؟

زهراء .. يبووو متت من الخجل امداني شكد غبية هسه شيكول عليه شون حجيت هالكلمة اني ..
حاولت اداري الموقف كتله ادري مو عليه دتكوله للثلاجة مالتنه مو هيج قصدج ..

_ شنووو ؟ الثلاجة شبيها بعد ؟
_ مو بس اني والثلاجة هنا
_ على طاري الثلاجة صبيلي مي بارد كلبي حار نار تعرفين خطوبتي متأجله وكذا ..

_ يمك الثلاجة افتحها وصبلك مي اخدم نفسك بنفسك دكتور صفاء ..
ودرت وجهي ورحت عنه ..ورحت سلمت على عمو وكعدت يمهم وماما هم كاعدة واجه صفاء ..

بابا كال لعمو جاي ادور على بيت ابو البيت يريد البيت مالته ..

ليش تدور على بيت مو كتلك قبل فترة بيت ست فهميه جيرانه فارغ وهي حتستقر يم
اخوها بأربيل وتريد تبيعه وهم البيت بصف بيتنا حايط على حايط ..

_ اي لعد نتوكل ونشوفه انت شايفه خوش بيت خما تعبان ؟

_ لا مو تعبان جبير عكس هذا بي حديقه جبيرة
وطرمه هم واستقبال و٤ غرف نوم ومطبخ ..

واتفقوا يروحون يشوفو وبنفس الوقت يروحون لبيت اهل اسراء يحاجونهم جنت فرحانة لان راح نكعد يمهم وضايجة لان حيروحون لبيت اهل اسراء مشاعري مجاي اكدر اسيطر عليها ..

يوم ثاني ماما راحت شافت عمة ام ضياء ومرته سوسن بالمستشفى طفلها مهدد بالاسقاط تعبت حالتها كلش بعد ما اختفى زوجها ..

اجتي ماما وعيونها متروسة دموع سألتها عن عمة وسوسن زادت بالبجي كالت عمتج تعبانة حيل وسوسن وضعها اصعب محتارة عليمن تبجي على طفلها لو زوجها تكول خايفة ما اشوف ضياء بعد والطفل هم يوكع ع الاقل يبقى ابنه ريحة منه ..

ظلت تبجي امي واني هم نزلت دموعي خطية سوسن حيل تحبه لضياء وهو هم ربي يرده سالم الها
ظليت ادعيله ..

ظلت الايام تجر يوم يجر يوم واسبوع يجر اسبوع ومر شهر وضياء ماكو ما ظهر ابد..

وبيوم جنا كاعدين وجاي نحضر اغراضنا حتى ننتقل للبيت الجديد .. اجه لبابا اتصال بس سمعنا كال ها لكيتوو ؟ اي اي هسه جااااي ..

ركضت وراه امي صاحت عليه ها تحسين دتحجي عن ضياء ؟؟

بابا طلع يركض برة وبملابسه مالة البيت لابس تراك اسود .. وامي بعدها تابعته .. كلتله تحسين بس كولي ..
كللها بنبرة سريعة اي اي لكوو ضياء لكوو رايحيين نجيبه ..

امي بصدمة :- عفية عايش لو ميت ؟؟؟

يتبع ..