رواية شريعة العشق الفصل السادس 6 - بقلم نورا ناصر

في شريعة العشق
بارت ٥
نورا ناصر

تقريبا وره عشرين دقيقة فات بابا للبيت
ورأسا اجه  دخل للمكتب ماما  جانت تنتظره على نار ومتوترة ..

كبت عيطتهم بسرعة ..
كاللها تشكين بيه ولج؟ بعد هالعمر هذا كله ..

كلتله عمري مشكيت بيك بس اريد هسه تبررلي شنو ذني وليش بمكتبك ..؟

بابا وبعدها علامات الذهول على محياه
كاللها ماعندي علم بيهم ..

كلتله هسه تخابر هبه وامها لا اني اروحلهم للبيت واعرف شون اتصرف وياهم ..

بصياح جاوبها  شبيج تخبلتي اني ماعونت اقلعها من البيت تردين اتصل بيها ..

_  لتخبلني ملابسها قذرة واني مرة متزوجه واعرف شنو هالاثار الي بملابسها شوف
هاي وراها بلوة وتريد تبلينا افتهمني يارجال ..

بابا كاللها شو دروحي والله لو تطلع نخله براسج
مااخابرها واذا  تريدين تروحين انتي تحرمين عليه منا ليوم القيامه ما ناقصني غير انوب ادخل وحده رخيصه لبيتي واني ابو بنات وبناتي اثنينهم مراهقات والله
عقلج صغير لو اريد اخون مخايف لا منج ولا من
غيرج بس اخاف من الله واخاف لتطلع ببناتي
هاي تلكيها مارست ويا نفسها وشمرتهم هنا ..

هو ديحجي جان ماما تعيط بينا امشن ولن منا ييلله طلعنا بس وكفنا اباب الغرفة وصوت صياحهم يوصل النا ..

هو ميدري احنه واكفات التفت شافنه ظل مصدوم
لان هيج حجه ..
كاللها ها ارتاحيتي طلعتيني عن طوري حتى البيت تاركه الج انعل ابو هالعيشه ابتليت جبت وحده تساعدج اني مو خوش ادمي والله هسه اخلي صفاء  يجيب هبه كدامج بس والله وحق هو الله من تعرفين الحقيقه شوفي شسوي بيج ..

لزم الفون حتى يخابر   ركضت امي عليه لزمته من ايده ..
وبتوسل كلتله خلص خلص لتخابر ولا شي ..

بعصبية جاوبها : شو دروحي لعد عليمن هالمهرجان ع امي،  خلي اسوي الي تريدي بلكي ترتاحين ..

وفعلا خابر على صفاء وكاله تروح لبيت ام حسين تجيب هبة وامها وتجي ..

بقى جو البيت  مشحون بالتوتر الى ان وصلت هبة وام حسين ووياهم صفاء فاتو للبيت
واجه بابا بسرعه جاب القرأن وحطه كدام هبه
كللها احلفي ...

امها تباوع بأستغراب متعرف شكو
و هي علامة الخوف على وجهه
رفعت راسها ونظراتها تباوع للكل واخيرا استقر نظرها على بابا وتنصي تباوع ع القران الي بايده
كلتله على شنو احلف دكتور ..

بابا خزرها كاللها ملابسج الداخليه شتسوي بمكتبي ووسخات ولج ؟

هو ديحجي وصفاء صفن عليها وحط ايده ورا
راسه .. وام حسين شهكت وظلت تلطم على صدرهه

هي بسرعه انتفضت كلتله مااحلف

كاللها احلفي لا ابتلي بيج وحق الله ..

بابا ديحجي وياها امها طلعت برة للحديقة ورجعت جايبة وياها صونده ..

ولزمت هبه موتتها كتل وكبت عيطتهن بالبيت ام حسين تضرب بيها وتجر انفاسها بقوة واحنا مفزوعين ...

تضربها وتصيح ولج فشلتيني تردين تفضحيني متستحين شنو يكولون عني معرفت اربي ..

وامي وبابا وصفاء  كوة خلصوا هبه من امها ..

بعدها اخذهم صفاء وطلع ..

بابا خزر امي وراح شغل السيارة ركضت وراه وصعدت وياه واباوع لامي تركض وراه حتى بدون حجاب بس ملحكت بينا وبسرعة بابا شخط السيارة ...
...

زهراء : من طلع بابا امي كالت ادخلوا جوا يلله
مريم : هاي شنو بابا طلع وعبير وياه غير ياخذوني وياهم ..
أمي :  شنو ليش وين عبير ؟
مريم :  ويا هو شغل السيارة وهي فتحت
الباب وصعدت..

أمي ضحكت كالت يا ولا انتبهت الها بس هي هاي
دومها وين ميروح ابوها هي ويا لاتعرف أبوها
ضايج لا شي بالله هسه اذا راح للكهوة هي هم وياه حرام ولد مو بنية مخلفه اني ..

دخلنا جوا كلتلها ماما ارتاحي اني اسوي عشاء
كالت هو منو بحال العشاء اني ادري ابوج وين راح
هسه ..

كلتلها اهدأي ليرتفع السكر فدوة يعني
وين يروح اكيد يرجع للبيت هاي عبير لوتية
راحت وياه حتى تجبره يرجع للبيت

أمي باوعتلي وصفنت بوجهي كالت ياااا صلوات
والله زين طلعتي تفكرين وعندج عقل عبالي
ثور أصلي لعد شبيج ماطلعتي مثلها ومثل
تفكيرها شوفيها شلون صعدت ويا ابوها وهو
بقمة عصبيته لا خافت خاف يضربها ولا شي
كل همها سعادة امها وأبوها الا انتي ربيتيلي
علة تاليتي أموت ناقصة عمر بسببج امشي ولي
من وجهي...

دااروح كالت اوكفي جيبيلي الموبايل
خلي اخابر بلكي عبير ماخذه موبايلكم وياها
رحت جبتلها الفون دكت طلع صدك عند عبير...

فتحت  امي  سبيكر وتحجي وهي متمدده
كلتلها أمي ها حبيبتي انتوا وين؟

  عبير : تكولها اوكفي قبل لا اكولج احنه وين بربج شلون خطوة من عبود اخذت الموبايل لان اعرف بابا
ميجاوبج وعليه من اجي تنطيني فلوس خوش
ام السوس؟

أمي ضحكت كلتلها ولج انتي شنو متشبعين
كلتلها من بنتج زهراء تشبع بجي اني
اشبع من الفلوس حبيباتي ذني المهم لتغيرين
الموضوع بعد روحي حضريلي فلوس..

امي : صار بس مكلتيلي هسه انتوا وين؟
عبير :  والله يا يوم اول شي كوليلي شلونه سكرج
امي : تحجين لو شلون ؟
عبير: هسه دجاوبي مو اخاف عليج
أمي : زين عبير بسيطة اني اعلمج ..
عبير : يله يله حجاوبج احنه بالكهوة وبابا كعد يلعب طاولي ودومنه وابشرج تعلمت العب دومنه وطاولي
عبود صار ولد بأحتراف..

ضحكت  امي  حسيت بيها مفتخرة بعبير الا اني جايبتلها شلعان القلب فوك ماهي مريضه سودة عليه
والله ساعات اضوج من عبير اشوفها شلون
قوية وتاخذ حقها وحقنا ومن تصير مشكله
شلون تكلب جو البيت من تشنج الى هدوء من
حقها امي تفتخر بيها كل هذا وهي عمرها ١٣
واني عود خامس اعدادي ع كولت ماما ثور ع
اقل شي وكعدت ابجي بكولشي مفالحه عاد
همزين فالحه بالدراسة الحمدلله نعمه ...

انتبهت من صفنتي امي دتضحك كالت والله
هالبنية الله انطانيها تعويض وباست ايدها وحطتها ع كصتها وكامت راحت تتوضى واني
هم تبعتها وصحت مريم حتى تصلي هم ...

عبير: من شفت بابا طلع عرفت اذا طلع وامي
شكت بي الوضع حيصير متأزم بيناتهم كلت
خلي اروح وياه واذا ضربني هو شويه اتأذى
وبعدين يروح الالم...

بس  اهم شي ميصير زعل بيناتهم
فتحت باب الصدر وصعدت بابا باوعلي وخزرني
واشرلي بحواجبه يعني انزلي بس اني صفطت
اديه وهم اشرتله بحواجبي عود اطلع هز راسه
وطلعنا ظل يمشي اباوع بغداد رغم حزنها الا
ان هي تجنن اني من صغري احب بغداد بابا
يسوق سريع واني مطلعه راسي من الجامه واباوع
ع شوارع بغداد واستنشق هواء بقوة وبعدين
ازفره ..

بابا كال طببي راسج اجه رتل امريكي ليضربوج كعدت عدل درت وجهي ع بابا ..

كلتله بابا خلي احجي وياك
كال متحجين لازم حلكج اني بعدين تعالي اكولج شنو لزكه انتي شفتي واحد طلع شكو تحطين روحج بالنص
بالله اني عاقل لو واحد غيري يضربج..

كلتله هو اني اعرف انت متضربني فصعدت هسه خلي احجي

كال احجي بويه

كلتله شوف بابا أمي تحبك وهي حتى مكلتلك خنتني ومن هذا الحجي
هي بس سألتك وبعدين احنه نحبكم يعني من
تتعاركون احنه نضوج وهسه ام السوس تلكاها
مرتفع سكرها وضيف ع هذا كله انت هسه تجوع
ومتحب تاكل برا يلا بابا العن الشيطان وخلي
نرجع للبيت ...

كال ولج انتي شوكت كبرتي منو علمج هالحجي

باوعتله وعدلت ياختي وهزيت راسي
_ تربيتك حبيبي تربيتك ..

ضحك وبعدين راح بابا للحديقه العامه وخابر جماعته واجوا جابوا طاولي ودومنه وكعدت اباوعلهم شلون يلعبون كملوا

قبل لنرجع للبيت بابا اخذ سوار ذهب لامي واشترى اليه ولاخواتي حلويات رجعنا للبيت لكينا
ماما كاعده بالحديقه بس شافت بابا اجت ركض حضنته  .

كالت : اسفه والله اني مشكيت بيك بس سألتك لو اموت مااشك بيك اشك بنفسي وانت لا ..
ابتسم بابا وخلى ايده على راسها يمسح عليه بحنية

كلتلها الله يساعدج شنو جاي من السفر ووكعتيله حضن وبوس زين اني مو بنتج وجنت وياه تعالي حضنيني بوسيني ..

بابا : امشي ولي ولج حاطه عينج علينا اكول اليوم
تعاركنا ..

كلتله : هو منو صالحكم غيري كلت لماما
قبل لا انام وين الفلوس ..

كالت ع سريرج خليتهم
كلتلها عفيه بنيتي الحلوة
كالت تعالي يانوم اكلي ونامي هزيت راسي  وصعدت نمت من التعب والفرة ويا بابا ....

من كعدت نزلت جوا باوعت بالمراية  وجهي صاير احمر نمت على ايدي ولابسة  سوار صار خدي احمر بسببه غسلت  رحت للمطبخ شفت زهراء صافنة
دتغسل مواعين الثوله ممنتبهه صافنه بعالم
العلاسه اقصد الحب ..

طلعت برتقال كشرته واشمر كشوره ع السنك
وهم منتبهت   اخير شي كلت هاي
ممهتمه شلون يربي كمت وكفت يمها جريتها من
ايدها هي عصبت وظلت تصيح شكو شكو شبيج مخبلة صار ساعة ساكتتلج هسه اصيح لامي عليج..

  كلتلها بس تصيحيها ولج اكول لبابا عليج انجبي واشتغلي عدل وكملي واصعدي نظفي غرفتي اني ومريم  ام الحب بكد الشبر مال الايد وتحب عشتووو..

سكتت ودارت وجهه وتهز براسها وتجلف بالطاوة الي بيدها .. تركتها وصعدت ..

للمغرب  نزلت و سمعت الباب تندك
طلعت شفته كرار ابن عمو محسن  .

كتله ها شعندك ؟
فات وكال ابوج دز عليه انكل اغراض لبيتكم الجديد
....

باوع بوجهي  كال ولك عبود شنو هذا خدك احمر
اتمكيج ؟ شوكت صرت انثى ؟

كلتله شسوي شفت ماعندك همه تطلع شوارب اني قررت اصير انثى ...

ماما بالحديقة  تباوعلنا وتضحك
كاللها عمه شنو هاي بنتج شو كولش تحترمني

كلتله ياعمه هو انت وياها عبالك رويسية وذاك اليوم من تعاركتوا واجيت رزلتها انت مقبلت وكمت تدافعلها اذا هسه احجي وياها هم تكوم تدافعلها اسكت احسن

كاللها اي صح عمه اي واحد يضوج عبودي اني مااقبل ترى حتى لو انتي بس اني اذا اضوجها عادي لان هي ولد...

كلتله اني ولد وانت شنو شو انت متحترم وتريد احترمك ؟....

كال جيبي الكتب الي ابوج يريد انقلهم لبيتكم الجديد وتعالي رحت اريد واديهم اله  لكيت
زهراء دتجلف بالحمام ..

كلتلها ولج غبية ترى ميصير تنظفين الحمام المغرب يصير بيج جني وانتي منا مقاصرة من غير شي راكبج جني كومي توضي واقري قرأن بلكي الله يهديج وتبطلين بجي ع المرحوم ..

كالت مو باجر راح نخلص نقل كل الاغراض خو مانسلم البيت الهم هيجي ..

كتلها ها اي صحيح  وطفرت جبت الكتب وطلعتهم لكرار وفتت جوة  لكيت ست زهراء صدك دتقرأ قرأن
الحمدلله كلامي جاب نتيجه ..

ونقلنا كل اغراضنا للبيت الجديد الي بصف بيت عمو ابو صفاء ورحنا لهناك وسلمنا البيت لصاحبه الاصلي ..
واستقرينا بي وسجلنا بمدارس جديدة  ..

وبيوم بابا كال راح يجي عمكم ابو صفاء وصفاء
ويا هم  ..  وزهراء  كالعادة من تسمع بأسم بيت عمو
ابو صفاء  تنخبص وكأن هي خطيبة صفاء  مو اسراء...

كامت حضرت ضيافه وعدلت نفسها وكعدت بالحديقه حتى اذا اندك الباب هي تطلع تفتحته مو احد غيرها لان عرفت صفاء حيجي...

أمي شافت زهراء بالحديقه ظليت تعيط بيها
ودخلتها غصب للغرفه بهاللحظه امي دك موبايلها والمتصلة  خالتي ودك سوالف ..

زهراء استغلت فرصة انشغال امي  طفرت للحديقه
سمعت صوت الجرس ركضت اطل ع الحديقة من شباك المطبخ ..

شفت زهراء  طلعت تركض من دتركض زلكت ووكعت ع وجهه بس شفتها بهذه الحالة  طلعت اركض
نسيت حتى الجرس..

دنكت يمها كلتلها حيييييل عساج لا كمتي ولج بس فهميني انتي شنو من بشر او اكولج ماارزلج اوكفي خلي اطك اصبعتين واركص.. امج دتخابر متشوفني هزيتلها خصر ..

ممهتمة ظلت تنكت بملابسها وتعدل بشعرها ..

كلتلها خررررب حظج هسه هو منا خاطب
ومنا انتي حتموتين نفسج عليه وانوب وكعتي
اني منج انتحر هاي مو عيشة ترى ...

هي كامت دفعتني ولا اهتمت للرزاله وطلعت دتفتح بس انتبهت تراكها انشك من يم  ركبته على اثر الوكعة ..

صحت عليها  ولج وجهج مجروح وانوب تراكج مشكوك فضحتنيا امشي فوتي جوا عطت بيها ..

هي انتبهت على نفسها شالتها ركضه وكبل للبيت
عاد اني هنا حسيت نفسي الاخ السبع عدلت
ياختي وطلعت للباب..

فتحته وبوست عمو وصفاء ودخلتهم وصحت بابا ظلوا يحجون بالسياسه وامي هم استغلت الوضع خلت زهراء  تسوي عشاء حتى متكعد يم عمو وصفاء

بعدين عمو كال لبابا: ابو زهراء  اني جاي عليك اريدك تروح ويايه لبيت أبو غيث ( الي هم نفسهم اهل اسراء) هذا قافل ميقبل يعقدون هسه وابن اخوك مستعجل ع الزواج  وانت الك تأثير عليه تكدر تجي ويايه هسه نروح نحجي وياه بلكي يقتنع اني مااعرف ليش-قبل
خطوبه بدون عقد هذا الرجال يمشي عكس
العالم..

بابا :  تدلل شوكت ميصير اني حاضر واروح وياكم

ومانسمع اله صوت شي يتكسر  بالمطبخ
وصوت زهراء وهيه تتألم وتصيح على ماما ..

ركض  بابا واحنا كلنا ورحنا وراه اني
لكيناها مجروحه من كف ايدها وجرح عميق كلش والدم هوايه ..

بابا تعصب عليها كاللها غير تنتبهين انتي
شنو بالج وين ؟

هي جاوبته بخجل وخوف وحيرة كلتله بابا منتبهت وظلت تبجي بحركة  واضح انو بجيها مو من الجرح لا بجيها لان عرفت صفاء يريد يعقد ..

بابا صاح ام زهراء جيبيلها شي تلبس
تستر نفسها بي حتى اخذها اخيط ايدها ..

هي سمعت خياط ايد وكامت تكمز وظلت تصيح لا بابا عفية هسه اصير زينة ..

صفاء جان واكف  يمها متخصر ويباوعلها بشك ..
طلع بابا وطلع عمو وامي راحت تلبس تروح وياهم وتجيب لزهراء شي تلبسه ..

ظل صفاء  يفر ايده
كال : انوب عليه الزعاطيط  ولج اني مو كلتلج لو
تموتين مااباوعلج مو حتى بيت عمي كمت مااوصله بسببج انتي متستحين حرامات انتي بنت عمي تحسين بايعه روحج ع انسان ميباوعلج حتى بطرف عينه هسه شحصلتي من جرحتي ايدج شنو عبالج العقد حتأخر لو شنو والله لو تموتين مااجل العقد بلا كرامه طاحظج...

هيه بس كاعدة بالكاع بمكانها رافعة راسها باتجاهه  تباوعله بحيرة وايدها على كفها المجروح وعيونها تجري دمع ..

عاط بيها كوووومي اوكفي يلا خلي نوديج
للمستشفى شبيج صافنة ..

اتقدمت عليه كلتله انت صح اكبر مني وخطار بيتنا بس مااسمحلك ترزل اختي وتعيط بيها افتهمت لولا
شنو هالميانه هاي واذا ابن عمها وبعدين يا دكتور
المفروض انت مثقف متحجي بهيج اسلوب مال
عربنچيه تكدر تفهمها بأسلوب حلو يليق بيك
كدكتور مو كحم..

بعدني  ممكمله كلامي جان يعيط بيه شكلتي ولج؟

كلتله الي سمعته انت واحد همجي ومامثقف واني بعد مااسمحلك لا ترزل اختي ولا تدخل لبيتنا افتهمت لولا امشي اطلع برا

جان يكول والله عمي خوش مربي بناته

كلتله نسوا راسك احسن تربية هي صح حبتك بس
ما تجرأت تصارحك ولا خربت-عليك اكتفت تكتم
بداخلها واتمنتلك السعادة اما عن ردي الك فهذا
رد ع اسلوبك السخيف...

خزرني خزرة تموت تقرب مني كال شنو هالحجي ولج
  جان يفوت بابا اخذ زهراء ..
صفاء كال انتظرني عمو اروح وياك ..
وبعده خازرني ..

كلتله زهراء لا لا صفاء ميحتاج والله شنو نسيت قبل شويه خابرتك اسراء وكلتلك تعال امها متخربطة

هو بقى صافن بس افتهم انو زهراء متريده يروح وياهه لذاك الفت هالحجي من يمها لابعاده عنها ..

هو انحرج وكال ها اي اي خابرتني
وظل يرفع بشعره ليفوك ..

بابا-اخذ زهراء وامي وعمو راح وياهم
اني بسرعه كلتله يلا صفاء اتفضل وبعد اي شي
يخص زواجك خابر بابا ولتجي لبيت انت متحترم
اهله ..

ظل صافن بوجهي بعدين كال لسانج يراد اله كص بس اصبريلي  هز راسه وراح ..

واني دخلت للبيت لكيت مريم  حاطه دبدوبها
تريد تسبحه ولا مهتمه للوضع واختها الي انجرحت..

تغسل بالدودب وتغني هي وصوتها
المزنجر اغنية نانسي مفيش حاجه تجي كدا
وتعلي وتنصي بصوتها منطربة ومغمضه عيونها
وساعه تركص وساعه ترجع تسبح بالدب...

باوعتلها ورحت نظفت مكان الدم كملت ورحت اشوف مريم شو هاي ع وضعيتها..
كلتلها انتي...  لج كافي تغنين لا اجيج والله ويلا سدي المي وخلي الدب بالمجفف وتعالي اشد شعرج ماادري بيج عندج عرس وبس انتي معزومه ..

هي خافت واجت بسرعه جابت المشط ووكفت كدامي مشطتلها ورحت خليت الدب بالمجفف ورجعت كعدت يمها بينما يجون اهلي  ...

زهراء : بالطريق من اخذوني للمستشفى الافكار
تتراطم براسي عبير اصغر مني  بس شخصيتها اقوى مني دافعتلي ووكفت صفاء  عند حده اني شوكت اصير مثلها؟

وبعدين اني شفت صفاء شلون يعشق التراب الي
تمشي عليه اسراء اني ليش اريد افرض نفسي
عليه وبأي حق؟ اريد اخذه اليه امي كلتلي الي
يحب يفرح من يشوف محبوبه مرتاح وسعيد
اني ليش من اشوفه وياها قلبي ينعصر هاي
انانيه مني ..

احجي واريد اقنع نفسي بس قلبي حقير
ميقتنع ذلني اني شلون ابطل احبه واني حتى
كحته اميزها كولشي بي اميزه ..

وصلنا للمشفى خيطولي ايدي اني حتى الوجع محسيت بي كد ما قلبي يوجعني ع شخص مو بحالي..

من  دنطلع بابا راح ديجيب السيارة اجت امي وكفت
يمي دااحجي وياها اشرت باصبعها ع حلكها
بمعنى لتحجين وكالت اني لو امج وتهتمين اليه
جان فكرتي بكرامتج الي هي جزء من كرامتي
بس لا اني مو امج مااعرف اني يمكن ما ربيت
عدل لا ليش ما ربيت ذيج اختج بعدها اول متوسط
واذا تحجي ويايه اني اسكتني الا انتي اي خير
مابيج وحده عوبه حتموتين نفسج ع وهم اني
خايفه عليج حتى من نفسج لان كلج غلط ..

باوعت ليكدام جان اتأشرلي انتبهت ع تأشيرتها طلع
بابا واكف دينتظرنا صعدنا جان بابا يكول ع سلامة زهورو اكو محل مال هدايا مفتح جديد
انزل اشتريلها هديه ..

كلتله بغصة : شكرا بابا
كال تدللين عزيزة ابوج وصلنا للمحل نزل جاب اليه باقة مال ورود وبنصها شكولاته ولماما جاب ورد
وكال الورد ميشتروا للورد بس حبيت اغوره
بيجن ...

ابتسمنا رغم الالم الي جاي نحس بي سواء اني او امي .. اثنينا وجعنا واحد ..

وصلنا للبيت وجان ننصدم بعبير ومريم  لكينا
مريم  تصرخ وعبير شاده راسها ورافعه البجامه
ولازمه نعال وتركض ..

يتبع ..

هذا الغلاف الجديد للقصة تصميم عبير حسناوي  AbeerAL_Hussnawy