رواية شريعة العشق الفصل الثالث 3 - بقلم نورا ناصر

في شريعة العشق
بارت ٢
نورا ناصر

طلع صفاء من البيت ..
اجاني شعور بالذنب تارة
وشعور بالحزن والحنين تارةً أخرى ..
بسببي طلع ، بسبب نظراتي اله الي ماعندي غيرها ، الوسيلة الوحيدة الي امتلكها حتى اعبر عن حب اكتمه بداخلي ، اتقلب بصمت على جمر الحنين والشوق اله ، فاقدة الارادة ، مهزوزة ، حبه مقيدني باصفاد من جمر تحرقني وتكويني بكل لحظة ..

شنو من حظ عليه واني اتعلق بشخص يحب وحدة وميت بيها ومو حاس بيه ، شنو من حظ يخليني احب شخص واني بعد مكملت ال ١٤ سنة ..

مرات افكر اكول هذا مجرد اعجاب ويروح لحاله
بس ديزيد مينقص كلما يجي واني اتعذب اكثر ..

واني على اتقلب على فراشي والالم يغرس انيابه
تطلع مني آهة عصية تكسر هدوء الليل ، اخلي ايدي على حلكي والايد الثانية اوخر بيها الغطى عني واشوف اخواتي خاف سمعوني بس اشوفهن نايمين واحسدهن على راحة بالهن وادعي الله يديمها عليهن ولا يبتلي بأحد مثلي لان صعب الي دا امر بي ..

غفيت وبعد وقت فتحت عيوني واني جوا الغطى حسيت بضوة  الشمس ، حاولت ابقى بالفراش اطول فترة ممكنة بس سمعت انفتحت الباب وصوت عبير من يم الباب ليجاي تصحيني الى ان وصلت يمي .. سحبت الغطى ، غمضت عيوني حييل ، خلت ايدها على كتفي وظلت تهز حيل ..

_ زهيران كومي كومي صفاء جوة يريدج ديسأل عنج يلله كومي ..

كمت على حيلي بسرعة خليت رجلية ع الارض واريد اروح بعدهه وكفت وماحركت ساكن صحيت على نفسي ورجعت للفراش ، تمددت باوعت لعبير ..
كتلها ما اريد انام لتكعديني بعد خبلة ..
ورجعت تلفلفت بالغطى ..

رجعت تحاول تكعدني لج كومي لا مرة ولا مرتين يسأل عنج كومي كومي مطية ..

صرخت بوجهه طلللعي برة كافي ماريد كتلج طلللعي يلله .. صيحت بكل قوة املكها ..
غمتني وطلعت من الغرفة تركض ..

ورة يومين شفتهم يجهزون نفسهم يردون يرحون لبيت عمو رياض ابو صفاء لان اجوي من ديالى ويردون يروحون يشوفوهم ..

نزلت جوة شفت ماما دتوكل فدى وعلي بالمطبخ
رحت يمها كتلها ماما بقيهم يمي وروحي اني ما اريد اروح وياكم ..
حجيت كلامي ودنكت راسي خجلانة ..

باوعتلي بنصف نظرة وهيه مشغولة توكل الاطفال
كالت لا اني ما اروح ابقى يمكم الوضع مو امان
خلي أبوج والبنات يروحون واحنا غير مرة ..

دمعت عيوني خليت ايديه على وجهي .. بس عيوني اطالعها بيهن كتلها بنبرة تنذر بالبكاء ..
_ ماما انت حاسة بيه اني دا اتعذب والله مو بيدي والله ..
اجت اخذتني لحضنها وظلت تلعب بشعري
كالت لا تكولين هيج فترة وتعدي بداية مراهقة هذي
هسه تفتح المدارس من جديد وتلتهين ويا صديقاتج
ودروسج اريد تركزين بيها زين وترفعين راسي وراس ابوج ..

اومأت الها راسي بقبول وهيه ظلت تمسح دموعي
وتباوعلي مبتسمة وبعيونها يلالي الحزن عليه ..

اجتي فدى كامت من مكانها تدفع بيه متريد امي تحضني تغار تخلي ايدها على راسي وتدفعني وتجر بخصلات شعري ..

وخرتها امي وحضنتني ، تبوس بيه و تغورها
تكوللها هاي بنيتي هذا حضنها انت اخذتي ..

عصبت فدى شالت الخاشوكة وركعتها بيه وكعت على كتفي .. ضلينا نضحك وفدى مبرطمة ومعصبة وتحاول توخرني من حضن امي ..

وخرت واخذتها افر بيها ، حسيت براحة جنت خايفة لايجبروني اروح وياهم واشوف صفاء ويمكن اشوف اسراء لان هيه معشعشة عدهم .. بس امي فرحتني وانطتني جرعة من حب عوضتني وسكنت جروحي ..

فاتت عبير بيدهه قميص وردي والخ سمائي تسأل ماما اي قميص تلبسه منهم ..
كلتلها ماما البسي السمائي واسمعيني زين اني مراح اروح وياكم مو تصيرين وكحة وخاف يجون بيت عمج محسن اياني واياج تتعاركين ويا كرار ..

جاوبتها عبير بتذمر اوو ماما ترة والله هو يتحارش ..
ماما ؛- اني حذرتج بعد ماريد مريم تكولي عبير صارت وكحة ..
_ صار ماما بس نطلع لان ضجنا من الكعدة والله ..

.
.
.

صفاء..... مرت ايام اروح لبيت عمي تحسين ابو زهراء
يجن البنات يسلمن عدا زهراء ماكو من يوم عركتها ويا اسراء وبعد ما شفتها .. دخل لقلبي الشك هالبنت بيها شي ، اسراء دائما تكولي تصفن بيك وتباوع عليك معجبة وتحبك ..

بس اني ما اصدك بيها رغم ملاحظ عليها هالشي ومنتبه كلش زين بس ما كعد اصدك مستحيل بعدهه طفلة .. أأول تصرفاتها ونظراتها على اانها فهاوة وشغلة طبيعية ..

وكم مرة اعيط بيها اكوللهه الصفنة مو الج للمطي ابو صابر هيه تضحك بتكلف وتزعل ومتشوفني وجهه اله بعد ايام ..

ردت اقطع الشك باليقين واواجهه اسالها ليش متطلع من اصير يمهم ، اخذت الها نساتل وككاو ورحت لبيت عمي بعد ما طلعت من دوامي لان بهذه الايام رجعنا للدوام بعد توقف اسابيع بسبب الحرب ..

سألت عنها كالو بغرفتها  ترخصت منهم افوت اشوفهه
صعدت دكيت الباب وفتت شفتها كاعدة دتقرا
فاجئتني وهيه تطرد بيه وتريدني اطلع ومتريد تشوفني ..

عصبت منها وصرت قاسي وياهه ردت اشوفها قساوتي
بس عمود تكرهني وما تتأمل بيه بتصرفها هذا قطعت الشك باليقين وايقنت انو كلام اسراء صح هالبنت معجبة بيه ..

.
.
.

زهراء ... مشت  الايام الوضع ببغداد صار كلش خطر انفجارات بكل مكان ، يوم منهن كعدنا على صوت انفجار هز البيت هز وكع على اثره كل الجام مال الشبابيك ..

غير هذا صوت صريخ ماما هز البيت هز وصارت هوسة
نزلنا نركض من الدرج ونشوف بابا وماما شايلين فدى وعلي والدم ينزل منهم بشكل مرعب ..

اخذهم بابا للسيارة وسط انهيار وصراخ امي الي يقطع القلب .. بابا كال ابقوا بالبيت اوديهم للمستشفى ديري بالج على خواتج ..

طلع بابا واحنا ركضنا لغرفتهم ونشوف سريرهم الي ينامون عليه بصف الشباك  مليان دم وشضايا وجام متكسر  وكع عليهم وهم نايمين سودة عليه .. بسبب انفجار هز بغداد من الصبح

كعدنا نبجي وارواحنا  تملكها الفزع والرعب
ونبجي بشكل هستيري وحدنا
الى ان للظهر يله اجوي نسوان عمامي
وكالو الاطفال اصاباتهم خطرة ماتحملوها وتوفوا ..

ظلينه نبجي ونسألهم عن ماما لان صحتها ماتتحمل هيج صدمة ..
كالو تعبانة وبالمستشفى وبابا راح يدفن فدى وعلي ..

راحن نسوان عمامي شالن الجام وشالن الفراش المدمى ونظفن المكان كالن تجي امجن تنقهر اكثر من تشوف المنظر .. 

بقت روحي معلقة بيهم اخواني الي ماشبعت منهم ولا هم الي شبعوا من الدنيا ولا ماما نترست اذنها من كلمة الماما منهم .. راحو طيور للجنة بس احنا الي ما كدرنا نستوعب الفاجعة الي حلت علينا واثنين بيوم واحد ..

لليل يلله رجعت ماما جابها بابا وويا صفاء
وجهه اصفر وعيونها طابات بحفرة وجواهن اسود
شفافهه بيضة وناشفة وجهه مخرمش ..

جانت تهذي .. وتمتم ويا ابوية
مو كتلك يا تحسين منطلع من بيتنا الي بالدورة جان قلبي حاسس راح افقد شي عزيز عليه ليش جيت هنا ليييش ما ابقى هنا بعد ما ابقى ما اريد اشوف مكانهم ..

نشيجها يقطع روحي وقلبي اشلاء كلنا نبجي على بجاهه ما اعرف شلون مر ذاكه اليوم المر المشؤؤم
ومن يومها وامي صحتها بالنازل حتى دوام متكدر تداوم ويسألوني عنها بالمدرسة هوايه بس هيه تعبانة كلش وهيه اصلا مريضة ..

بهذه الفترة صرت اطلع كدام صفاء واشوفه احزاني بسبب فقد اخواني ومرض امي استولت على مشاعري واحساسي كان الحزن وبداخلي اتمنى احزن العمر كله حتى انسى شعور الحب الي يألمني بس هيهات
البذرة الي نزرعت بيه تأبى التوقف عن النمو
كلما الها تتشعب وتكبر ..

جان صفاء يجي يعالج امي يخليلها كانيولا او مغذي ويصيح عليه اساعده ، جنت احسه يباوعلي بتفحص بس اني ابد ماخليت عيني بعينه بعد ..

'
'
'

صفاء رجعت لبيتنا جاي من بيت عمي بعد ما اطمنت على صحة عمتي و الدنيا كلش الحارة تلكتني اسراء  بكلاص مي ابتسمت واخذته منها شربته وخليته ع الكاونتر  اجت اسراء تريد  تحضني..

رفعت ايدي  بوجهه مقبلت ..
كتلها من تصيرين حلالي عود نسوي الي نريده مو بس حضن وغمزتلها .. اما هسه حرام يا روح صفاء انتي ..

هي مقبلت وبرطمت ..

كرصتها من خدها كتلها بعدين كلهن اطلعهن
من عيونج الا اخليج تملين مني لتستعجلين
ع رزقج بنيتي العمر كدامنا

كالت يبوو  امووووت اموووووت واتوسد ذراعك شوكت يجي هاليوم ..

ضحكت .. كالت جنت بيت عمك مو ؟ شفت زهراء شحجيت وياهه خو مابعدهه تصفن بوجهك ؟

جاوبتها بعصبية .. لج شبيج همَ بيا حال هسه مفجوعين خطية وعمتي حالتها حالة وزهراء ذبلانة وعيونها  حمر  .. وترة السالفة انست ذيج صارلها سنتين سالفة عركتج وياهه وزهراء جانت مجرد طفلة وتصرفاتها عفوية هسه اكيد نست الموضوع وانت هماتين انسي ..

كالت لعد شسوي اضوج من تروح هناك واني جاية اشوفك مدا اشبع منك وانت تتأخر عليه  .. وبعدين السناين هاي جان هسه احنا مخطوبين ولابسين حلقات ..

كتلها لعد شون واجبي هذا اوكفلهم مو بيت عمي وهم يستاهلون واحنا اهل ..  لج اسراء وربج يجي يوم تملين مني و متتحمليني واذكرج بيها .. واذا ع السنتين الفاتت فالفضل يرجع لاخوج الغثة الحقنة هو الي وكف النا عظمة بالبلعوم وسوا بيها انه واجلها لتلوميني الي اصلا مستغرب شلون قبل تجين تبقين يمنه هالكم يوم ..

جرت حسرة وكالت شسوي غير يريدك تكمل كليه ..
هيه بس هالسنة والي وراها واخلص ونصير احنا الاثنين جوا سكف واحد ..

ورحت اريد اصعد وكفت على ثالث باية واجاني صوتها .. وهي ضحكت وكلتله اروحلك فدوة هو اني مصدكه اهلي انطوني الك يوم المنى ونعقد واصير بأسمك اجت دتصعد وراي ..

صحت عليها  اسراااااااء شكلنا اثكلي بابا اثكلي  هو اني
كوة مصبر نفسي ليش تتحرشين يا بنت الناس
شنو ماعندج صبر الي اعرفه المرأة تصبر الرجال
مو الرجال يصبرها ..

هي كالت  شبيك تفكيرك منحرف بس داساعدك ..

كال  بشنو تساعديني مثلا وغمزلها من انزع الشورت لو من اسبح تليفين ظهري وضليت اضحك..

هي شهكت وضربتني على صدري ...

كالت عابت ..

جريتها من ايدها وخزرتها خزرة
كتلها  عليمن هاي ؟

كالت  مو عليك شبيك ميصير اتشاقه وياك ؟

كفختها على راسها بخفه واريد اصعد
التفتت عليها وكتلها  اصعد احسلي الشيطان فز عندي بس من انزل اريد الكاج محضرتلي الاكل لان اريد اطلع ومن اكل لتكعدين يمي حتى مااكلج ..

قبل متجاوب طلعت امي من الغرفه
كالت والله لو مو اني هنا انت تحبلها وشرط بتوأم ولكم سفلة  شو ماخذين راحتكم انعل شيب الخلفكم..

جنت  ع اخر درجة كلتلها بنت اختج مستخفه تتحرش بيه واني عندي شيطان مو شيطان وحق محمد لو عاقد عليها متطلع منا
الا وهي حامل ..

.
.
.

عبير...
مرت الايام وماما صحتها بالنازل ومن دوامها كاضيتها اجازات ( هيه مدرسة بمدرسة زهراء )
واني وخواتي مدارس
بابا تعرف على عائلة شهيد قرر  يساعدهم بس امهم مقبلت بدون مقابل ..

هيه عدها بنات اثنين وولد معوق تعوق بالحرب شضية ضربت رجله وصار مقعد اجه بابا حجه لأمي كالتله .. اذا هي ترفض اني اروح احجي وياها ..
راحوا امي وابويه حجوا وياها وهم رفضت  ..

وبيوم اندكت الباب رحت فتحتها شفتها مرية بالخمسين عمرها ووياهه بنية تقريبا بالثلاثين ..
كالت هذا بيت الدكتور تحسين . ؟

كتلها اي وصلتي منو انت ؟ كالت اني ام حسين يعرفوني اهلج ..
كتلها هسه اروح اصيح ماما .  دخلت وكتلها
كالت خليها تفوت نعرفها ..

رحت فوتتها ودخلتها على امي بالاستقبال جانت كاعدة وشوية صحتها تعبانة ..
فاتت وسلمت عليها ..
كلتلها اذا انتوا هيج مصرين تساعدوني خلي
اشتغل عدكم انظف واغسل ملابس واعزل البيت
وانطوني هالقاسمه الله واني سمعت بيج مريضة وبناتج مدارس وصغار ..

امي كالت والله ما اعرف خلي اشوف ابو زهراء وارجعلج خبر .. اشربي جايج هسه ابو زهراء على جية ..

قدمت الهم الجاي وبنتها جانت تباوع ع البيت بانبهار وتعجب .. للظهر اجه بابا وامي اخذته على صفحة تحاجي وقبل يشتغلون عدنا ..

عرفتنا على بنتها الجاية وياهه كالت هاي هبه عمرها ٣٠ ممتزوجة وعندي بعد زينه والولد حسين ..

ظلت تجي يومية هيه وهبه يشتغلن بس امي متقبل احد يطبخ غيرها اجت خاله أم حسين كامت تساعد
أمي وبابا مشالها مصرف يومي وبقى دكتورها
وزايدتها وناقصتها هم ع بابا ..

... دنيا العصر  جنت دا اقرا وأمي جانت ماخذه ام حسين للدكتور وبقت بس هبه يمنا ..

عطشت نزلت اريد اشرب مي توجهت للمطبخ اريد افوت وصدمني المنظر .. لكيت هبه لازمه ايد بابا وتبجي ..

وكفت اباوع مصدومة بس هم منتبهو عليه ..

هبة تكوله والله مااكدر حبيتك من جنت تجي يمنا
وتعرض ع أمي تساعدها انت ليش متحس والله
مو بيدي حبيتك اتزوجني واني اساعد زوجتك
المريضه واجيبلك ولد ..

بابا جان صافن عليها شوية وما ادري شنو الي يدور براسه ويمكن متفاجأ من جرءتها ..

جرها من ايدها وكاللها بويه صح اني اكبر
منج بكم سنه بس راح اعاملج معاملة اب لبنته
اني زوجتي وبناتي ماابدلهم بكنوز الدنيا وانتي
اذا بنفسج الزواج اني صديقي ارمل واحجي وياه
علمودج ..

ا شو هاي وكفت و كامت تعيط وتصيح ع بابا انت
واحد حقير ونذل علقتني بيك ..

بابا حط اصبعه ع حلكه وسوالها اششششش وكمل كلامه بعصبية ... ولج انتي شنو من صلافه اني لخاطر امج راح اسكت واسوي نفسي مشفت ولاسمعت هالمسرحية هاي وانتي بعد اذا شفت ركعة وجهج داخل بيتي ميصير  خير مفهوووم ..

من طلع من المطبخ شافني اباوعلهم جرني
من ايدي وكال عبره باباتي الي شفتي وسمعتي
متحجي ابد حتى لاخواتج لان خاف يكولون لامج
واذا كالوا لامج هي مريضه خاف يصير عليها
شي مو زين..

هزيت راسي برفض ومصدومة كلتله اي بابا مااكول كال عفيه بنيتي .. تعالي اخذني ورحنا للاستقبال كال شلونج بالمدرسة ؟

كلتله زينه ديريد يحجي ويايه جان
تفوت هبه تركض وحاطه ايدها ع حلكها وتبجي ..

بابا شافها جان يكول استغفرالله العلي العظيم
واتوب اليه ..

بهاي اللحظه اندك الباب طلع بابا ديفتحه جان اطلع ورا كال ادري سبير ولج خوما سبير رب الحلو حجاها وهو يضحك ..

باوع ورايه جان يشوف زهراء ومريم
  كال مخروعات مسامعات باب يندك ولجن شنو انتن؟

جان مريم  كلتله دطلع هسه افتح الباب بابا حيرحون وانت تحجي ويانه ..

كاللها صار بويه صار فتح الباب جان يطلع صفاء
اجه وجايب امي وام حسين من الدكتور .. فاتو جوا وصفاء منطلق ويغني كاظم الساهر .. قولي احبك ويدندن

بابا كاله ها ولك ابو الحب اشوفك تغني جنك عندك سالفة خير ان شاءالله ..

  كاله عمي احضني اشبكني اضربني جلاق اهلي قررو  الخميس اليجي نروح نخطب رويحتي مااصدك ..

هو بس حجه أمي بسرعه باوعت ع زهراء وخزرتها
لان زهراء  حطت ايدها ع حلكها ودموعها نزلت
بس هو مشافها جان طاير ويحجي ويا بابا ..

بعد ماامي
خزرت زهراء  هي صعدت ركض للغرفه وامي لحكتها اجيت اروح وياهم جان تخزرني رجعت
كعدت..

اجت مريم شاورتني  كلتلي اروح اسمع؟

كلتلها لا عيب الله يذبج بالنار ..

كالت خوش ..
كلتلها شنو الخوش يذبج بالنار ولج يعني يشويج

..  لا ولج اعرف نار يعني شوي مثل ماامي تسوي الدجاجه
كلتلها دكافي اشتهيت دجاج شوي .. وامي صعدت
يم زهورة  شينزلها هسه..

اجه صفاء و جرنا اني ومريم كال تعالن اركصن لابن عمجن .. وشغل اغاني واحنه ماصدكنا عبالك جوعان وحطوا كدامه طلي شوي ..

اني ومريم  ركصنا ركص مصاير ونزلت زهراء وماما
اجه صفاء يجر بزهراء كاللها تعالي اركصي .. مقبلت تركص وظلت تهز باكتافها ..

جان هو يكولها دولي شكد بومه من شفتج
وشفتيني كالبه خلقتج .. ييله اني ارووح ..

بابا وين رايح لك ابقى ع العشا ..
لا والله عمو اروح اني .. عندي شغل ..

راح صفاء واحنا تعشينا .. بابا كال لام حسين
ام حسين رجاءا ما اريد هبة بعد تجي لهنا ..

كلتله ليش دكتور ؟ هيه قابل سوت شي بس كولي عليها اني اتصرف وياهه ..

لا مسوت شي بس خليها بيتكم احسن لتجي حجاية محلوة وهيه شابة ومصرفها يوصلها ..

ماما ظلت تباوع  الهم بشك  ..

.... ام حسين مقتنعت وظلت تخزر بهبة وتدنك فشلانة ..  بس بالاخير وافقت على طلبه ..

خلصنا العشاء وبابا طلع ديوصل ام حسين .. و
ماما كالت فرشوا اسنانكم ويلا روحوا ناموا ..
وانت زهورة مثل ماوصيتج امي ..
زهراء  كالت لماما صار.. و مريم مقبلت تصعد
تريد تنام يم أمي وبابا ، دخلنا لغرفتنا
وزهراء بسرعه دخلت بالفراش وبس اسمع صوتها تبجي ..  رحت كعدت يمها
كلتلها زهراء شبيج بس تبجين؟ امي سوتلج شي لو انتي راسبه ؟

كالت لا كولشي مابيه روحي نامي باجر دوامنا صباحي لنتأخر ..
كلتلها اي رايحه تركتها ورحت لفراشي واباوع الها من مكاني وهي استمرت تبجي وتضم راسها حيل بالمخده حتى مااسمع صوت بجيها نمت على صوت نشيجها

كعدت الصبح رأسا رحت كعدتها شفتها مصخنه حييل حرارتها مرتفعة وعيونها مورمه ..

نزلت جوة شفت امي مسوية الريوك
كتلها صباح الخير
كالت صباح النور امي يلله اني اليوم اداوم وعي اخواتج ..

_ ماما زهراء مصخنة كلش ومبيها تكوم ..
هزت راسها بأسى وراحت لحتى تشوفها ..

واني مريم تريكنا وكملت تبديل ورحت لامي
حتى تمشطلي شفتها كاعدة بغرفتنا
تحجي ويا زهراء ..

_ ماما ميفيدج انتي هسه يلا بديتي تراهقين وهو
دكتور وشايف وعايف ويحب بنت خالته من
الطفوله فتح عيونه عليها ...

زهراء بس جانت بس تبجي وتهز براسها واني اباوعلهم عيوني انحولت كد ماباوعت ع الاثنين..

كملت ماما كلامها كلتلها خلي اكولج شي اذا شفتي قميص عند صديقتج عجبج وهو جان مو مالتج تكدرين تروحين للبنية وتكوليلها اريده ؟

زهراء كلتلها لا .. 
امي كالتلها شوفي هاي نفس هاي هو مو الج والمو الج لو روحج بي متحصلي انسي بنتي وادرسي وارفعي
راسي وراس ابوج انتي بنتي الجبيرة اذا انتي
هيج مهزوزة اخواتج من يشوفنج يصيرن مثلج
مااريد دموع واذا انتي تحبي لصفاء المفروض تفرحين من تشوفي مرتاح اني هالمرة حجيت وياج بهدوء مرة ثانية ممكن هم بهدوء بس بالثالثه ابوج يتدخل عيب الي دتسوي زين  اني مااحب بنتي هيج تسوي وهسه راح انزل اسويلج حليب اشربي حتى بلاعيمج تصير زينه هسه اذا ابوج سألني شبيها زهراء شكوله اكوله تحب ليش تنزلين راسي وانتي بكد الحمصه ؟

زهراء ... لا لا ماما والله مو هيج بس.. وظلت تبجي ..  _

_ لا بس ولا شي هسه مشطي لاختج بين مااسويلج حليب ..

عبير ..  لالا مااريد متعرف انتي صارلج
ساعه تحجين وياها واني اباوع عليكم وممشطتيلي وهسه كملتي وتسوين حليب الها شنو بس هي بنتج ماما حبابه بس مشطيلي وام حسين جتي خلي  تسويلها حليب هاي زهراء بس فالحه
الليل كله تبجي يم راسي عبالك مسجل بي كاسيت مال بجي ..  الزمي المشط حبابه والله متتأخرين ماما..
ظلت  تضحك وزهراء  دفرتني ..

زهراء .. راحو للدوام وبقيت اني بالبيت وجمر قلبي بعده مو راضي يطفى كرهت الفراش كد مظليت بي وكد ما انترس من دموعي ، من اتذكره البارحة شلون فرحان بخطبته واتذكر ضحكته
شي بداخلي يفرح ويا ..

كمت من فراشي لان مليت واحس تكسرت ، باوعت بالمراية واشوف وجهي عيوني حمرة ومورمة .. نزلت جوة شفت ام حسين دتشتغل صبحت عليها ورحت شربت مي ..اندكت الباب ورحت فتحتها .. انصدمت بهبة مو ع اساس بابا كال لتجي لو اني متوهمة ..

كالت شبيج صافنة خليني افوت شجاج ؟ وخرتني وفاتت قبل لا افوت واسمع عياط امها ..

ام حسين ؛- ولج انت شنو  ناويه ؟نصفى بلا شغل رجال ساتر علينا ومتكفل بينا ولج اني امج محجالي شنو الي صار وليش ميريدج بعد بالبيت  الا انتي
حجيتيلي شكو لافية وراي شكوو ..

رفعت ايدها بالهواء بعدم اهتمام وولا اهتمت لامها تركتها وراحت نزعت صايتها ..

رحت وراها واشوفها دخلت لمكتب بابا رحت فتت وراها شفتها دتسوي روحها تنظفه ..

كتلها  اتركي بابا ميقبل احد يدخل للمكتب مالته بس ماما واحنه ..

كلتلي معليج اطلعي برا خليني اشتغل وانت ليش ممداومة اليوم وامج مو مريضة شعجب مداومة

_ انت معليج بينا ا شو ماخذه راحتج احنه نحب امج اكثر منج امشي اطلعي بره المكتب واذا بيج خير ساعدي امج مو كاعده تدخلين مكتب بابا ودااكولج هو
ميقبل ..

_ بلله طلعي طلعي زعطوطة ..

احجي وياهه ولا اهتمت كامت طلعتني بالكوة
ودخلت  للمكتب وقفلت الباب ..
ظليت افر بيدي ورحت كعدت بالحديقة ..

أمي اجتي من المدرسة كالت اخذتلج اجازة والكل يسأل عنج اليوم ..
كتلها ان شاءالله باجر اداوم وقريت شوي
صرتي زينة حبيبتي
اي ماما صرت زينة ..

دخلت ماما جوة وبيدها علاليك كالت مريت ع السوك
واشتريت شغلات وهاي العلاليك الج ام حسين ملابس الج وللبنات .  اخذتهم ام حسين وتشكرت منها ..

دخلت امي سبحت وطلعت دتروح للمكتب فتحت الباب لكته مقفول استغربت ماما
كالت زهراء ليش المكتب مقفول ابوكم ميقفل
الباب شعجب قافله هالمرة خاف بي اوراق مال
طلاب وخاف لتشككوها وقفل الباب ..

توة اريد احجي وجتي  ام حسين
حاجت امي ؛- اصب غداء الكم لو بعد ؟
امي ممجاوبتها بقت صافنه شويه وتالي تبعتها تحجي وياهه  وراحن للمطبخ وهاي هبة بعدها جوة الها ٣ ساعات ماطلعت هسه شسوي اروح اكول لماما ..

شفت الباب انفتحت ودخل بابا للبيت جاي من الجامعة
(بابا دكتور جامعي) ..

شافني اجه يمي خله ايده على جبيني يقيس حرارتي
كال شلون صرتي هسه ؟
كتله بقلبي اه يا بابا لو تدري البيه ..
جاوبته الحمدلله بابا احسن اخذت علاج ..
كال تمام وراح بدل وغسل وكعد بالهول دينتظر الغداء واحنا يمه بعد ما اجو البنات من المدرسة ..

جتي ماما سألته ابو زهراء اشو قافل باب المكتب شعجب مو من عوايدك بيها اوراق الطلاب ؟

تفاجأ بابا كال  لا مقافلها شكو دااقفله وحتى اذا اكو اوراق مال طلاب مثل متكولين البنات ميتدخلون لان اني منبه عليهم ..

زهراء اني بسرعة طفرت وكتله بابا هاي هبه جوا اجت وقفلت الباب عليها من الصبح لهسه متقبل تطلع ..

بابا باوع ع امي مستغرب كال مو كلت لتجي شجابها ؟
اجت ام حسين وكانها سمعت الحجي كله .. كلتله بس هالمرة والله وعد ان شاءالله متجي بعد ..

بابا ظل بس يهز راسه بعدم قبول وراح ركض لغرفة المكتب
ظل  يدك الباب حييييل وبعصبية

... يتبع

اسفة ع التأخير ان شاءالله راح التزم وياكم منا وجاي ⚘😘