رواية شريعة العشق الفصل السابع 7 - بقلم نورا ناصر

في شريعة العشق
بارت6
نورا ناصر

وصلنا للبيت وجان ننصدم بعبير ومريم
لكينا مريم  تصرخ وعبير شاده راسها ورافعه البجامه
ولازمه نعال وتركض وتكمز ع التخم وذيج ساعه
تعيط وساعه تشجع بيها نريد نفهم شكو محد تحجي مستمرات يعيطن ومريم  تصفك وتهوس
لعبير عبالك عبير دتحرر العراق....

بابا يكول لعبير ولج بويه شكو ؟
هي تكوله اوكف اوكف او اكولك انت روح مناك حاصره حتى اني الزمه ...

هسه بس نريد نفهم شكو ونخاف نفوت عبالنا شو شكو
الى ان  بابا زمخ بيهن يلله ظلن يصرخن ويكولن صرصور صرصور يمعود دااكتله هاي مريم تخاف واني داركض وراه دووووخر حباب ع رجلك ..

بابا بعده مموخر وعبير سمطت الصرصور بنعال وهو على رجل بابا ..

رفع ايده بابا  امي ركضت عليه
كلتله لا عفيه كولشي ولا عبرة لا تضربها ..

كاللها شكو شبيج ؟ كلتله انت تريد تضربها واني قبل يومين ضاربتها دخيلك اتركها ..

بابا ظل يضحك كاللها ولج اريد اشيل الصرصر خوما اخليها هي تشيله ..

ماما فشلت كلتله انتوا كلكم مو عاقلين واني ابتليت بيكم ..

بابا غمزلها كاللها ليش هو  اليشوف جمالج يبقى براسه عقل ..

  ضحكت كلتله والله عليك سوالف حتى كدام بناتك متخجل عيب بناتك كبرن ..

كاللها واني شعليه واذا كبرن قلبي بعده شباب ويشوفج ست العرايس ..

صار جو الصالة رومانسي  عبير تسوي حركة
العزف ومريم  واكفه تركص سلو من وحدها ..
انتبه عليها بابا   كام ووكف وياها يركص سلو

تركت اهلي ودخلت لغرفتي
داانام اكو دوامه بداخلي
اتمنى اشلع حبه من داخلي
بس قلبي حقير ميقتنع ذلني هواي
من اشوفه او اسمع صوته كياني يختل ..

اريد اغفى  واجت مريم  ..
كالت كومي اكلي امي وعبير سوولج كبد شوي...

كلتلها مااريد اريد انام وبس
هزت راسها و تركتني وراحت

وراها بدقيقة اجت  عبير وبيدهه الصينية
هاي تركيبة غريبة رغم قسوتها وخزرتها من تخزر بس شايله حنية عبالك حنية أمي...

كالت كومي لج اكلي مابيدنا تتخربطين وتعالوا اخذوني مستشفى ..

تحجي وعاكدة حواجبها الظاهر نبع الحنان دازتها غصب عنها ..
الصراحه خفت هاي عرمه اذا اكولها لا..
تكفخني .. كعدت اكلت وهي كدامي
كاعدة ع الكرسي وتباوعلي وتهز برجليها معاجبها
مرات اتمنى اصير مثلها قوية اصفن عليها اكول
هاي منين جابت هالقوة هي انتبهت اني صافنه....

جان تكول ها شكو كدامج لوحة كملي اكل دااخذ
الصينية حتى اغسلها ادري بيج معوقه من اجل
الحب ..

خزرتني خرررب عبالك هي الجبيرة مو اني
كملت اكل واخذت الصينية وطلعت ضحكت عرفت أمي ليش-دزتها لان تعرف هي متطلع اذا
متجبرني اكل وبالفعل هذا الصار ...

نمت للمغرب كعدت ع لمسات بابا ع شعري فتحت
عيني ابتسمت بوجهه
كال يلا باباتي اكعدي دنيا المغرب
ميصير كومي صلي يلا بويه كومي ..

كمت ورا طلعت من الغرفه رحت دااتوضى شفت عبير
كدامي لازمه مريم ودتعلمها حتى تبدي تصلي
اباوع لمريم منصاعه لعبير وتعليماتها شافني ابتعدن سوولي مجال حتى اتوضى..

مريم  لعبير : غير انكمل وضوء يلله ..
عبير : انتظري اختج تكمل وضوء لان سالفتنا مطوله ع هذا غبائج ..

سكتت مريم ، واني خلصت وضوء
ورجعت عبير تعلم مريم ع الوضوء
وصوتهن طالع ، أمي ظلت تعيط عليهن من مكانها بالمطبخ
_ ولجن شكوو شبيجن ؟  شنو خطبة مرة ؟

عبير :  مو بنتج غبائها موهبة اكولها
شي تسوي شي شمااشوف تالي حكفخها اووووف
مليت ..

أمي : اتركيها اجيت اني اعلمها روحي انتي ..

عبير: لا  لااا الي يبدي بشي يكمله اتركيها هسه تتعلم
وبالفعل متركتها الا تعلمت الوضوء ..

بس خلصت لزمت مريم  من اذنها وهي تباوع منا ومنا عبالك حرامي تخاف من امي وبابا خاف يشوفوها كالتلها : شوفي ولج تكملين صلاة وتصعدين حتى اقريج املاء مو تخلين أمي تشوف درجتج وانتي ماخذه خمسه ترى ادوس ببطنج مناقصه قهر أمي..

مريم لازمه ايد عبير الي لازمه بيها اذنها
كلتلها اي والله هسه بس اذني حبابه هديها
جرتها و باستها وراحت اجت شافتني باوعتلي بشموخ وفاتت والله هاي ع ساعه تجلطني بكيفها تقسى وبكيفها تعامل بحنية ومريم انصياعها لعبير  بشكل فضيع  ..

تركتهن ورحت صليت ونزلت  اسوي عشاء
لان امي مرتفع سكرها وذني راحن يقرن
وبابا كاعد يشوف اخبار كملت العشاء
وصحتهم للمطبخ حتى يجوون ياكلون ..
تجمعهم كلهم وبلشنا تونا دناكل ..

وسمعنا صوت المناداة بالجهاز ع الاهالي
عدم الخروج من المنازل لوجود سيارة مفخخه ..

كام بابا من الاكل بسرعة كال ربي دخيلك شنو هاي سيارة صفاء وعنوان بيتهم ..

بابا اجه يطلع  وماما ركضت علي لزمته ..
كلتله : استر عليه دخيلك وين تريد تطلع ..

كاللها يامرة بيت اخوي صدك تحجين انت اشو وخري  كلتله اي بيت اخوك بس فكر بينا اني وبناتك وين نولي تريد تهجم بيتك بيدك ...

بابا ماسمع لامي دفعها بهدوء وطلع ..
بسرعة عبير تبعته وطلعت ورا بابا مثل  السبير
وهو هم ماعارض طلعتها وياه لزمها وطلع وياها بدون مانعرف شنو السبب ..

ظلينه متوترين و امي  تدك وتلطم وهي منا سكرها مرتفع اليوم وصحتها مو تمام .. عبالي بابا
حيرجع من يشوف انهيار امي بس ابد ..

ركضنا كلنا وكفنا اباب الاستقبال ومقابيلنا باب الشارع    فتح بابا  الباب و  طلع عبير قبله ومانشوف اله والامريكان موجهين السلاح باتجاههم ..

عبير: من طلعنا بابا كال لتخافين بابا اني مو دااضحي بيج بس انتي طفله وهم مستحيل يأذون طفل طلعتج ويايه لان عندي غايه بطلعتج..

ظل بابا يحجي  وياهم انكليزي انو هذا بيت
طالب كلية  طب ومستحيل يكون ارهابي وبلغهم انو هو عمه لصاحب السيارة بس هم ظلوا موجهين سلاحهم علينا ..

بهاي الاثناء طلع صفاء من بيتهم  جنت اشوف الناس تباوع علينا من السطح هم بس شافوا صفاء
هجموا علي ونيموا بالكاع  وخلوا البندقيه براسه..

وهو يصيح من مكانه ع الارض  ويحجي وياهم بالانكليزي بصياح وعصبية و ابد ماسكت ..

دخلو الامريكان فتشو البيت والسيارة فلسوهه تفلس والكلاب البوليسية واجهزة البحث عن المتفجرات
ما لكو اي شي ..

المترجم كال اجانه اتصال من شخص يأكد النا وجود سيارة مفخخة ومتفجرات وشخص مشبوه بهذه المنطقة ..

تركو صفاء وراحو بدون مايلكون شي اجو
الجيران سلموا ع صفاء وتحمدوله السلامه ..

رحت لأمي لكيتيها فاقده ومريم لازمة ايدها وتصرخ  متت خوف عليها
ومناك زهراء منهارة وتبجي ومو بحال امي ابد
ركضت عليها اهزها من اكتافها ..

كتلها انتي متعرفين تصحيها لو فاقده لان حبيب القلب راد يروح بالرجلين .. شبيج ترة هذي امج هيه جنتج ونارج ..

بهاي اللحظه صدك حقدت على زهراء
الي فضلت حبها على امها اتمنيت الي سلطه عليها
جان قتلتها وخلصت منها..

تركتهم ورحت جبت الانسولين وضربت امي صافي ٢٠ سيسي حتى ينزل السكر وشممتها عطر وبعدت مريم عنها لان حتموت من البجي..

اخذتها لحضني كتلها :  لتخافين مابيها شي هاي لان خافت ع بابا تعالي ويايه حتى نعدلها..

صرخت كالت صيحي لبابا
كلتلها راح يم بيت عمو  هسه شويه ويجي..
كل هذا وزهراء  ع كعدتها وفاصله عبالك..

رحت يمها كلتلها شوفي ولج محد موجود امج فاقدة وابوج يم بيت عمج تكومين تنقبرين بغرفتج لا وحق الله ابتلي بيج خلقه زفرة ذابحه روحج عليه وهو بنعال ممعترف بيج-امج دتموت وانتي تفكرين
بطيحان حظج ولج كرهتج من شفت أمي بهالحال
وانتي ممهتمتلها ياادبسز....
راحت تركض لغرفتها ...

واني رجعت لأمي دااقيس سكرها لكيته شويه دينزل اخذت مريم غسلتلها وخابرت بابا حتى يجي
بس  مكلتله امي مغمي عليها..

ورة دقايق  اجه بابا شاف امي كعد يمها ظل يبجي كاللها دومج سند اليه بس من اشوفج هيج
اتمنى الموت اليه ولا اشوفج بهذه الوضع حبيبة
كومي بناتج يخافن ...

كتله بابا خل ناخذها للمستشفى
كال المصيبه منكدر ناخذها للمستشفى لان المنطقه بعدها  مطوقه اجراءات ديسوون ..

زهراء ..  بجيت بجي مصاير  اتمنيت لو مجايه
للدنيا لو الله ماخذني اني ليش هيج مو ذني اخواتي اشجع مني الا اني جبانه مابيه خير بس منا وجاي الا اخلي امي ترفع راسها بيه والله كافي حتموت ناقصه عمر بسببي....

عبير :   بابا يتصل بصفاء حتى يجي يسعف امي لان كولش تعبت خلال ثواني اجه  يركض..

كال شبيها عمتي ؟  عمي دخيلك لتكولي بيها شي

بابا طمنه كاله مغمي عليها .. اخذ الجهاز وقاس السكر  كتله :  اني انطيتها ٢٠ سيسي ..
كال بعد محتاجة ٥ سيسي وجيبي شكر .. 

ضرب أمي انسولين وحط شكر بحلكها تقريب الخمس دقائق صحت أمي..
بابا كال وين زهراء ا شو مشفتها أمها بهالحال وهي ماكو..

كلتله هبط ضغطها عبالها صار بينا شي من طلعنا برا بابا :  هااا ..
صفاء  كال لبابا عمي ابات يمكم مااكدر اعوف عمتي واروح للبيت..

بابا التفت عليه كال افرشي لابن عمج بالصاله واني وامج هم هنا حتى صفاء يدير باله عليها..

رحت جبت فراشات واجيت فرشتلهم واخذت مريم للغرفه حتى تنام نامت ورحت غسلت المواعين وشفت أمي كاعده وعينها ع غرفة زهراء

رحت بوستها كلتلها خفت عليج شلون صرتي فدوة طمنيني أمي ..

واني دااحجي وياها صفاء طفر لزم رجل أمي باسها وهي دتسحبها بس ملحكت..
كلتله ليش يوم هيج تسوي هو اشر ع خشمه وسحب نفس كاللها يمه وحق ستر العقيله انتي اعز من النفس الاتنفسه واعز من أمي هم هي جرت راسه باسته
كلتله نام وليدي الصبح نحجي ..

بعدها كلتلي اخذيني لاختج اريد احجي وياها
اخذتها لزهراء.. كلتلها ها اطلع كالعادة قبل ماانطرد لو تقبلون ابقى وياكم..

كالت انتي شتكولين؟
كلتلها اطلع بكرامتي احسن ..
ضحكت و طلعت داافوت اطفي ضوء المطبخ لكيت
صفاء صافن ..

كلتله ها ابن عمي شكو ؟
كال شو منايمه ام لسان
كلتله شنام ماما جانت فاقدة والمطبخ هوسه نظفته وضيف عليهم كلهم المصيبة الصارت ..

صفن عليه جان يكول عبير دائما كلامج اكبر من عمرج صراحة عمي يستاهل هيج خلفه الله يحفظج اله...

شكرته كال جيبيلي مي حبابه
كلتله هذا البطل يم راسك
كال مشفته
كلتله شحتسوي
كال عمي نايم تعالي بالاستقبال نحجي
رحنا للاستقبال كال عبير صح انتي صغيرة بس اني محتاج احجي بس اسمعيني والكلام ميطلع
مو؟  وباوعلي..

كلتله اكيد كال عبير اني اسراء احبها
واتمنى تصير أم بيتي تدرين شكد تصير مشاكل بس اني اتلافاها حتى ماينتهي حبنا بس اخوها حقير هواي اتمادى وقبل شوي اكتشفت هو الي مبلغ عليه
يعني وصلت بي راد يسويني ارهابي هذا مو بعيد باجر عكبه اذا الله سهل وتزوجت اخته يمكن يسويني خاطفها ..

كال الحب مو كولشي بالحياة صح بس اني مااريد احسسها اني بعتها باجر اخذ اهلي وعمامي واروحلهم اذا قبلوا نعقد اقل الاسبوعين نتزوج ....

صفن بعدين كال واني ادري مو ماادري اختج تحبني ومسببتلكم مشاكل هم ونص مرض عمتي منها ..

فتحت عيوني عليه كال لتباوعين هيج اني لا غشيم ولا غبي صح اتعامل وياها بحقارة بس اريدها تكرهني هي طفله واني اكبر منها ب٥سنوات مااريدها تشغل بالها بشخص مو يمها ولا يفكر بيها وعقله يم غيرها هاي اختج بعدها مراهقه..

دااريد احجي اشرلي مااحجي
كال بس اسمعيني
كال شوفي اني زهراء اشوفها بريئة حيل
مرات اتجاوز عليها من كد حبها اليه تكوم تبجي عبالج ماانقهر لج ارجع من يمكم اخلص باكتين جكاير لان بجيتها ...

بس اريدها تكرهني بس اختج تزيد بحبها متنقص هي مو ذنبها ولا ذنبي ذنب الحظ الي وكعها بحب واحد مشغول باله بغيرها...

عبير امانة الله كرهيها بيه اختج بريئة وحبابه
ابد لتلوموها الحب مو بيدها الحب احساس وشي
مقدس واني اختج اقدسها كتمت حبها بقلبها صارلها يمكن ٥ سنوات وهي مراهقه ابد مااذتني ..

اني او اسراء بحبها المكتوم متعرفين هالشي شكد
صعب الله ادعي من الله كون تنساني ....

كلتله كملت ابتسم وكال ادري البيكيسي مالتج
حينفتح عليه بس شنو تحجين احجي ..

كلتله شوف صفاء  انت صح ابن عمي واحترمك والي صار البارحة اعتذر اني والي كلته انته هسه صح مااكذب واكولك لا بس ياريت انت تعامل زهراء
باحترام ترى هي جبيرتنا من تكعد ترزلها كدامنا
ترى هي متكرهك لان هي تحبك لا احنه الي حنكرهك فلا تكرهنا بيك زين..

كال زين هسه بشنو تأمريني ؟
كلتله قلل جياتك لهنا واتزوج بأسرع وقت
لان انت تستاهل السعادة وسعادتك ويا اسراء لان
انت تعشقها وهي مااتصور  تصير نصيبك يجي يوم وتتذكر كلامي..

صفن عليه كال ليش هيج تحجين؟،
كلتله شوف معاملة ابوها واخوها وانت
تعرف واذا عندك كرامة اتركها..

كال عبرة هي مو شغلة كرامة هي شغلة رجولة واني منطيها وعد تريديني اخلف وعدي وياها؟

كلتله لعد اتحمل الي حيصير بيك وتركته
وكمت شفت أمي بعدها
مراجعه لفراشها ارتاحيت جان استلمتني تحقيق
صعدت لغرفتي لكيت مريم نايمه بجربايتي وتاركه جربايتها باوعت عليها قربت وجهي ع وجهه هاي
نايمه واني ماانام الا بمكاني كمت وحشكت نفسي
بصفها ونمت.....

زهراء: من اجت أمي يمي وطلعت عبير كعدت ع الكرسي صفنت بس مو عليه..

كالت تعرفين شي اني غسلت ايدي منج و لو ميته ولا شايفه هذا  اليوم ولج صحيت ومشفتج يمي كلهم مرعوبين اول مفتحت عيني دورت عليج كلت هاي تموت اذا صار بأبن عمها شي واني افتح عيني ومااشوفج شمنتظره منج بعد اذا انتي بوكعتي
مااهتميتيلي وفضلتي حبج عليه من امده بطني
الجابتج شكد شجعت بيج بس انتي خيبتي كل
أمالي ..

ولج صفاء ابن عمج فقد عليه وانتي خاتله
بغرفتج..

بجيت واجيت يم رجلها كلتلها ماما ..

بسرعه دفعتني كالت اني مو امج لو امج جان
فكرتي بالكلام الي كلته الج ودفعتني وطلعت

..

مرت الايام امي علاقتها ويايه مو تمام احسها دتعاقبني
و الايام دتمر وصفاء ديحاول يعقد بس اهل اسراء
رافضين رفض واني افرح من اسمع هالاخبار صح
انانية بس احبه والله مو بيدي اكره نفسي من
افكر هيج بس جيب اليقنع قلبي ...

فديوم كاعده بالحديقه وحدي وعدنا قفص بي
طيور الحب هاي عبير ومريم  يموتون عليهم
عبالك اطفالهم مداريتهم اكل وينظفن القفص
اني صافنه عليهم جان يندك الباب طلعت فتحته
صارت رشا اخت صفاء  بوجهي..

رشا الي هي زوجة اخو اسراء  سلمت عليها
وفاتت كالت عمو موجود؟
كلتلها لا طالع بس هو ع جية ..

كالت ها اني جايته بشغله مهمه
كلتلها تفضلي امي جوا
دخلت ظلت تنتظر بابا بين مااجه بابا سلم عليها
كلتله عمو زوجي قافل ميقبل ينطي اسراء لصفاء
وهذا صفاء  يحبها واخير شي هددني يطلكني اذا صفاء ظل هيج قافل واني مكلت لصفاء  لان اعرفه مخبل فدوة عمو داخله ع الله وعليك حلها اليه اني اخاف لابيتي ينهجم وعندي اطفال وين اروح..

كاللها سهله احجي ويا وان شاءالله خير ولو مااتوقع لان اخوج مجنون بيها وحقه رباها ع ايده بس عيالج
و زوجج اكبر انذال الله لايوفقهم ليش هيج ديسوون بي هو مو غريب ابن خالتهم مو وافقو شكو هسه ديماطلون وديجبرو يتركهه ..

كلتله لان غيث وصفاء واحد ميحب الخ من قبل وسوالف قديمة

كاللها اليوم اني اروح لعمج ابو زوجج واحجي وياه

اني سمعت كلامهم يعني اكو امل ينتهي كولشي قلبي كام يدك سريع ..

امي باوعتلي وخزرتني

عبير فاتت من يمي جان تغمني
وهمست شكد اكرهج حطيتي عينج عليهم الى ان
فكرتيهم تف عليج من اخت بلا كرامه اذا ما شوفتج نجوم الظهر فلا بنت ابويه اني بسيطه
وخلت وصعدت فوك ....

يتبع