رواية شريعة العشق الفصل الثامن 8 - بقلم نورا ناصر

في شريعة العشق
بارت7
نورا ناصر

صفاء: شكد دااحاول انجمع ويا محبوبتي داخل
بيت واحد مديصير ،  القدر يخالف ويايه ..

قبل جان بس  اخوها الوسطاني معارض هسه صاروا ابوها واخوها الوسطاني و زوج اختي هم ..

وهي هم خبلتني خابرتها  ..
كتلها راح اجي احجي وياهم واذا سألوج تريدي لولا احجي التردي.. ماشي

ظلت تبجي وكالت اجل الموضوع واني هسه مشغولة بعدين نحجي حسيتها ممسيطرة على نفسها ومااعرف شبيها .. كتلها براحتج وانهت المكالمة ..

ظليت كلما اخابرها مترد تغيرت فجأة خاصة بعد ما اجه غيث من السفر ..

دخت حسيت نفسي بدوامه وعمامي كد مطلبت مساعدتهم احس فشلتهم ويايه وصرت احس بالاحراج منهم ..

بس الي ماعرفته انو عمي تحسين ابو زهراء رايح وحاجي وياهم بس مفشلي وكايليله  احنه ممنطي
بنتنه وانتهى الموضوع ..

والي عرفته انو عمي متلاطم وياهم وتاركهم وطالع وهاي انسدت كل الابواب بوجهي...

اخر شي قررت اخذ عمامي واروح ووين ماتريد توصل
خل توصل ..

وفعلاً اخذتهم ورحت بدون مااكول لاسراء
لان اعرف اذا خابرتها حتكوم تبجي وترجف وتخاف والسبب مااعرفه اعتقد اخوها غيث اله ايد بالموضوع وخاصة بعد مارجع من السفر وعرف احنا لبسنا حلقات وظل يسوي مشاكل اليه والله اعلم بشنو هدد اسراء ..

انطيت خبر لابوهه واخذت عمامي ورحت
وصلنا لبيتهم  لكينه عمامها جايين ..

بدأ ابويه يحجي وياهم ..
كال :  احنه نريد نزوج ابنه وانتوا انطيتونا المرة
ووانطيتونا موافقتكم نريد نعرف الي تغيير هسه شنو ؟  الي عرفنا انتوا متقبلون ورافضين هذا الشي لعد ليش وافقتوا ع الخطوبه من البداية وارفض وخو انتوا عدكم علم هم من الصغر واحد يريد الثاني احنه اهل ونعرف هالشي ..

نط غيث من مكانه كال اني مموافق ابويه استغل سفري وانطاهه الكم وابن عمها رايدها هو اولى بيها ..

انتفضت وكمت على حيلي حاجيته بعصبية
_ شنو هو لعب خلي عندك رجولة ابن عمها يريدها شنو تحجيها كدامي اني خطيبها ..

_ دروح ماكو شي يربطكم بس حلقات ..
_ احترم نفسك كاعدين ابيتك المفروض تحترم مو تتجاوز لو انت منين تعرف الاحترام الي دزيت الامريكان على ابن بلدك وابن خالتك يا خسيس ..

صاح : انت الي تحترم نفسك كاعد ابيتي لو تطلع برا

ابويه وعمامي طلبو مني اهدأ ، اجه ابويه
همس باذني اكعد بلا عصبية مو هيج تنحل الامور ..

ابوها كال هسه الامور اختلفت واني بنتي
ماانطيها .. ويوزع نظراته صوب ابنه غيث ..

عمي تحسين : والله عيب عليكم احنا عود اهل وانتوا انطيتو كلمة والزلم من تنطي حجاية المفروض تلتزم بيها ..

غيث بصياح :  مو انت تعلمني العيب افتهمت لولا؟

احنا شفناه هيجي عاط بوجه عمي وما احترمه
كمنا  اني وولد عمامي بس  عمي اشرلنا نكعد ..

   هم شافونا  هيج ابوها كال تردون  تهدون عليه وبيتي امشو كلكم طلعو بره ومالكم مرة يمنا  .. 

شفته هيج ميحترم واهانه هجمت عليه
مفكرت بشي غير ارد الاعتبار لعمامي لان صارت بوجهي وفشلت ومهتميت للحب  انعل ابوه
لابو حتى الحب وياه..

هان عمي وبأمر عمي سكتت انوب يكول يطردنه  اني مردت ادك الناقصه واترك بنتهم اجيتهم بكل الطرق لان مو من اخلاقي اخذل الي احبها ..

جيت اضربه لزموني عمامي ظليت اصيح
كلتله هسه تصيحها واسمع كلامها اذا رفضتني لو تصير ملاك بعد مااريدها وفوك كل هذا انت ابوها خرررب هيج نسب ...

راح صاحها اخوها الي هو زوج رشا اختي
اجت وجهه محتقن وخايفة مدنكة
متخلي عينها بعيني ..

سألها غيث احجي اسراء تريدين صفاء  لولا..

رفعت راسها باتجاهي وبسرعة دنكت
كالت لا .. وظلت تعصر باصابعها ..

ظليت صافن ثواني ممصدك عيوني انفتحت على اوسعها تقربت منها بس اخوها وكفني وكال حدك لهنا

كلتلها شنو ولج باستغراب .

سكتت شوية وكالت الي يحجي ابويه هو الصح اني
مااتزوج بدون رضاتهم  لو اموت..

كلتلها لاااا تشاقين... اكيد
كالت لا وداعة امي حسبتها صح اني وياك منرهم
ونزعت الحلقه وحطتها بيدي..وايدها ترجف .. وعينها متخليها بعيني ...

فشلتني كدام اهلي وناسي وشفت نظرة الشماته بعيون اخوتها ،  نزلت من عيني و كرهتها كره مصاير لو لازمها الا اموتها كتل وانتقم الكرامتي بس متستاهل اوصخ ايدي بيها بعد ...

بهالاثناء غيث  كال  اتفضل يلا متريدك هسه صدكت
هو بس حجه هيج واني صاير نار باوعتله بنظرة حقد ..

كمزت  عليه هو بكد البكه بس بوخة وحجي
واني شطولني والعب حديد ..
لزمته وضربته بوكس على وجهه ..طلعت حركة الي خلفتها  اخته كلها بي ..

اجوي عمامي واولادهم فاككونا مخلوني اضربه بعد جان جنزته تجنز ..

طلعنا اني وعمامي والخذلان مطوقني اسمعهم يحجون بس صوتهم يوصلني بعيد ..

كالو يلله  هاي متفيدك مدام باعتك من اولها

يحجون عود يقنعوني بس اني  شيقنعني
وخاصة الاهانة الي تعرضت الها و كدام اهلي وناسي وخسرت حب حياتي ، لا ياحب اقشمر ع نفسي واكول  هاي وحده رخيصه باعتني بارخص ثمن وقت الي جنت مستعد اضحي بروحي علمودها ..  مجاي اصدك وليش سوت هيج ليش !!!!

زهراء: باليوم الي راحو بابا وعمامي لحتى يحجون ويا اهل اسراء ويسمحون الهم يتزوجون لان صفاء حيتخبل عليها ، راحو واني بقيت على نار مدا اعرف شراح يصير والي اعرفه انو غيث رافض الخطبة جملة وتفصيلا ومن جان مسافر ابوه وافق ومن اجه ضغط عليه وتغير كل شي ..

سمعت صوت الباب انفتحت طلعت من غرفتي ركض
اشوف بابا اذا اجه او لا حتى  اعرف الاخبار الي جايبها ويا من الكعدة ويا اهل اسراء. 

شفت بابا هستوة فات للهول وامي كامت كلتله ها تحسين بشر شصار اليوم وافقو الجماعة ؟

جر حسرة وكال  خربت السالفة اهل اسراء  رفضوا ينطوا اسراء لان اخوها يكول الخطبة تمت بدون علمي وموافقتي ولازم تتفركش ..

جاوبته ماما : صدك جذب والله عجيبه هيج بسهولة واسراء شنو موقفها ؟

_  الحقيرة صارت ضده وصفاء منهار وهناك عصب وكوة لزمنا ضرب أخوها ودممه واهلها كلش موخوش صارو ويانه لا احترمونه ولا ابد ما ادري شجاهم ..

ظل بابا يحجي ويا ماما وأني بس سمعت الخطبة خربت حسيت مثل واحد محكوم اعدام واجه قرار
الافراج عنه ..والله لو ماعيب اكوم اركص من الفرح..

أمي كلتله سوده عليه هالولد ولا ارتاح انوب
المسكين يموت عليها الله يصبره ويعوضه ان شاءالله ببنت الحلال الي تسعده ..

بابا كال بقهر أمين...

عبير نطت خزرتني وكالت لأمي طبعاً ماما ميتهنى ولا
يشوف الخير ما دام اكو ناس تنغط عليه مثل
البومه فكرته فكر وهسه ردتلهم الحياة بس علاجهم عندي بسيطه ...

أمي وبنبرة تحذيرية كالت : عبير وكزت ع سنونها
بابا بتعجب كال:  شكو؟ عبك بابا شبيج تبسمرين منو يمج ؟

كلتله لا بس الغربان كثرانه هالايام يحتاجلهم حشاك نعال وصوندا ..

  امي كلتلها بعصبية : كومي اصعدي شوفي
مريم  شدتسوي شو هاي خانسه اني اخاف منها
من تخنس اكيد دتسوي مصيبة ...

كامت وهي تفر بيدها معاجبها الوضع ..

اني رحت للغرفه شغلت نوال الزغبي اغنية الليالي وانطربت وياهه منا وجاي  اسراء  طلعت من حياة صفاء هسه اجه دوري الا اجيبه للطريق ....

عبير: من سمعت كلام بابا حسيت مثل الصاعقه
ووكعت ع راسي صفاء مو بس ابن عمي لا اخويه
المجابته أمي جان دومه يوكفلنا وكفات حلوة
اتمنيت يتزوج اسراء لان يحبها..

سعادته جانت مقتصرة ع هذا الشخص بس اسراء نذلة خذلته خافت من اهلها او الله اعلم يمكن اخوها هددها

ومنا هاي اختي العوبة الواكعه بحبه وهو مو بحالها ومتأكدة منها حتحاول تتقربله وهو هسه
طالع من تجربة فاشلة أكيد حيجرحها واذا جرح
اختي اني مستحيل اسكتله وبنفس الوقت مااريد
اخسره هذا حزام ظهري ...

صعدت للغرفه من طردتني أمي اني مخلصه حياتي كل مااحجي أمي تخاف ع بنتها الخوثه وتطردني بس مع ذلك مااسكت وهي صح تطردني بس بعدين تجي تحجي ويايه حتى مااحقد ع اختي ولا ازعل من
أمي..

متدري أمي اني فاهمتها وعاذرتها لان هيج
دتتصرف ويايه خطيه عبالها بنتها الصخله بلا
احساس وكرامة ..

عجيب مدري شلون تحس بالحب
اتجاه صفاء هم نعمة عدها حاسة تشتغل..

بعدين ضجت صعدت بالسطح كعدت ع القنفه
اجت أمي كالت ام العبر ماما ..

كلتلها نعم أمي تفضلي

كالت ماماتي اتركي اختج بحالها ولتظلين تشمرين حجي لا ابوج يحس شفتي شلون ظل يسأل ..

كلتلها صار ..
كالت ليش زعلانه الحلوة ؟
كلتلها لا منو كال زعلانه بس اتمنى من احجي منا وجاي تنطيني مجال ترى كبرت مو بعدني ابتدائي ودومج تسكتيني مثل ماهي بنتج اني هم بنتج انتي تدرين بيها ع غلط ومع ذلك تتعاملين وياها بكل هدوء واني كل مااحجي لو تسكتيني لو تطرديني..

كالت وانتي مافكرتي ليش اني اسوي هيج ؟

كلتلها بلي فكرت
كالت اي و وين وصلتي بالتفكير

كلتلها أنتي تسوين هيج عود حتى بنتج يصير براسها خير وتكول أمي رغم اني مأذيتها بس هي متنطي بيه عبالج انتي هي حتقدر هالشي لا ماما انتي غلطانه هاي عبالها انتي دتشجعيها

كالت زين هسه اني اريد اطلع واريد اخذ بنيتي ويايه يصير ؟

باوعتلها كلتلها وين؟
كالت للصالون..
ضحكت وسكتت ..

كالت شكو ولج ؟
كلتلها ها عدكم حفلة بالليل مو؟
فتحت  عيونها على اتساعها
كالت ولج ادبسز هاي منيلج هالسوالف ؟ طايحة الحظ..

مستمرة ترزل بيه واني خربانه ضحك
كالت عبالي زعلانه وكلت اسويلج مفاجئة واخذج اشتريلج ملابس بس ولا تستاهلين ..

طفرت عليها كلتلها شبيج غير دااتشاقه وياج مااريد ملابس سويلي كيكه اخذها واروح يم كرار وعبودي

كالت ولج بس لا تسوين مثل زهراء..
كلتلها لا يوم اني بنتج الا اخلي الكل تحسدج عليه لتقارنيني بزهراء وبست ايدها ونزلنا ..

علي: من طلعت من بيت اهل اسراء شغلت سيارتي
فرفحت روحي وين اروح ياربي أول مرة بحياتي
هيج انحط بموقف بس حلفت يمين الا ابجي اسراء
دم ..

تدلل سهله داامشي ومااحس الا واني
بالكاظمية يا يابه اني شفت المناير احس مثل
واحد عطشان وصايم وبعز تموز وانطوا مي بارد..

كمت اهرول الى ان وصلت للامام كعدت يم الشباك وكمت احجي بصوت عالي ليش ياربي مو ردتها بالحلال والله حتى مدنستها كلت كولشي بالحلال احلى.

ياربي مااعترض ع ارادتك بس طفيلي نار قلبي فدووة
رحت لاسمك اللهي بحق باب الحوائج سيدي ومولاي اريد حاجتي منكم مو من غيركم ربي بردلي قلبي..

فتحت عيني عليها انت احن من الام
ع ولدها ارحم بحالي واني ع هالحال اجه گيم من
گوام الامام حط بيدي علك صغير وانطاني مي
وكال بويه الله يبرد قلبك هي هاي دنيتنا بيها
هواي مفارقات اصبر ورا كل خسارة تعويض
اللهي رب العباد ميترك عبده لا حزين ولا مظلوم
هو يتولى امره ..

_ اشرب بويه اشرب اخذته منه اباوعله واحس روحي جمر  شربت مي قسم بالله حسيت براحه وطمائنينه محاس-بيها قبل ابد..

زرت ورحت صليت رجعت للبيت لكيت أمي كاعده بالباب تنتظرني وبيدها سبحتها ..

نزلت من السيارة دنكت عليها بستها كالت يمه خوفتني عليك ليش تأخرت ..انت زين مابيك شي يمه لاتضوج الله يعوضك .. 

كتلها ليظل بالج اني زين بس رحت زرت ..
اخذتها من ايدها ودخلتها للبيت ورجعت دخلت سيارتي وبوجهي للحمام سبحت وطلعت
حسيت برغبه فضيعه اريد بس انام ..

بس شينومني ظليت اتكلب بفراشي كمت دخنت
يمكن باكتين وماحسيت على نفسي ..

صفنت وين انطي وجهي كلت ماكو غيرها بس هي تحلها اليه زوجة عمي تحسين اروحلها احسن شي....

باوعت ساعه ١٢ بالليل فكرت لا زحمه مو مال اروح احسن شي اخابر ع موبايل البنات واشوف بلكي امهم كاعده..

خابرت دك ويا اول رنه جان تجاوب عبير كالت
ها صفاء بالي يمك طمني فدوة خوما بيك شي. ؟

كلتلها لا حبيبتي مابيه شي كالت ولك شنو حبيبتك
متستحي ماعندك اخوات افتهمنا انفصلت شبسرعه كمت تنسق عابت شكول شكول والله ..

ضليت اضحك ..كلتلها ولج انتي والله فلم
كالت فلم محروك الله وكيلك

كلتلها ليش ؟ كالت يمعود عسى مااحجي ورفعولي كارت احمر وطردوني خرررب حظي عبالك ماعدهم غيري مخلصه حياتي بس طردات لتستغرب اذا شفتني فديوم كاعده بالشارع وحاطه ملابسي بحضني...

كلتلها منو وياج ولج ؟وهيج تدردمين ؟
كالت ماما كلتلها صدك وينها هي نايمه كاعده ..

ضحكت وكالت ولك غير من عرفت الي صار وياك كامت تبجي ولزمت القرأن تقرأ وتدعي حتى الله يبرد قلبك هو اني بنتها متدعيلي هيج بس هي حظوظ....

كلتلها ولج هسه هي نايمه؟
كالت لا شينومها كالت متأكدة صفاء اليوم يحتاجني ودتنتظرك هاي دااشوفها من شباك الغرفه دتنتظر ابنها بالحديقه اتأخر عليها وضحكت..

كلتلها فدووة اروح لتراب رجليها تحس بيه جايكم هسه

كالت اي مو احنه ناقصين عطلات منا انت ومنا زه. وجان تسكت اني عرفت
شتقصد بس غلست سويت نفسي مااسمع
كلتلها ديلا باي
كالت هلو ....

لبست سترتي و رحت لعمتي شفتها بالحديقة تنتظرني
كالت تعال ابني تفضل .. رحت كعدت يمها بالحديقة
كتلها عمة تعبان كلش ..

كالت يا ابني  مو كولشي نريده نحصله
(عسى ان تحبوا شيئاً وهو شراً لكم) ماما انت
لو متزوجها ويصير شي يصدمكم ممكن لا سمح الله تخونك  ممكن يصير معدكم اطفال ولتكولي حب ومدري شنو وليدي الاطفال زينة الحياة سعادتكم متكمل بدونهم..

الشي الي صار هذا يمكن لمصلحتك او مصلحة بنت خالتك ربك يقسم رزقه للعباد وانت إسراء مو نصيبك..

كلتلها عمه تدرين شكد جنت احبها بس داست ع كرامتي من كالت مااريدك أكذب عليج اذا اكولج كرهتها هذا الشي مبالغ بي مو بهالسرعه بس ماطول هيج اهانتني ادوس ع قلبي واشمره وهذا اخوها النذل أني اعلمه اطلبه فلوس بكد شعر راسه اذا ما زوعته العافيه
فلا اتسمى صفاء يتدلل سهله ...

كلتلي وليدي الانتقام مو حلو الزم القرأن هسه تلكه الطمأنينة بي الله يعوضك ان شاءالله بالاحسن منها...

ضحكت كلتلها تربية أيدي وغدرت بيه شترجى من غيرها ؟

كالت لا متعرف الله شضاملك وضحكت

كمت بوستها كلتلها أروح اني الحجي والحجية وحدهم ليرحون يسوون وكاحه خلي الحك بيهم ..

ضربتني بخفة ع كتفي كالت انزول عليك وع سوالفك سلمت عليها وطلعت..

زهراء: الايام البعدها نفذت كلام أمي وابتعدت عن
صفاء..

صح جان ابالي مخطط ان اتقرب منه بس
كافي زودتها منا وجاي دراستي واهلي وبس..

على كولة أمي الحياة كدامي واني اذا اتقربت
من صفاء هسه وهو توه طالع من تجربة فاشلة
يطيح حظي ..

كافي بعد منا وجاي اخلي هو يركض وراي
على شنو اختي الصغيرة ترزل بيه ، لازم
اني افرض نفسي عليها مو هي..
بس اني امشي بالعكس ..

وهالسنه اني خامس والحمدلله دروسي
كلها مسيطرة عليها وان شاءالله انعفي بكل الدروس  ماعدا العربي ماانعفي بي بعدها لازم احضر للسادس وارفع راس ماما تعبتها هواي وهيه اصلا مريضة ...

اجونه خالاتي ع الغداء تغدوا يمنا والعصر ديروحون
عبير استأذنت من امي كالت الها ماما اريد اروح وياهم للدورة والله مشتاقتلها ..

امي : اكعدي واسكتي الاسبوع الجاي امتحانات كعدي اقري احسن ..
_ ماما فدوة تدرين بيه مسيطرة وحافظة المادة هيج راح يصير عليه ضغط كلش جبير خليني اغير جو وياهم وباجر دزي بابا عليه يجي ياخذني ..

مقبلت امي واستمرت بالرفض بس خالاتي تدخلوا وقنعوها راحت عبير اخذت ملابس وراحت وياهم ..

يوم ثاني المقروض عبير تجي الصبح بس ما اجتي وامي ظلت كلش قلقة دتخابر على خالتي ميجاوبنها ..

للعصر طلعت من غرفتي على هوسة وصياح
و البيت مخبوص ، خليت ايدي على قلبي ميتة خوف  شكو  شصاير ياربي ..

ركضت اريد ادور واتبع صوت امي وهي تبجي وتصيح ..

صارت كبالي مريم كتلها ولج شكو شبيها امي ..

ظلت تحجي وترجف ولج زهراء لحكي اختنا راح تروح منه  عبير متصوبة ..

لطمت على صدري عزاا ورحت اركض لامي
ومريم تحجي وتمشي وراي
كالت ولج هسه عبير  متصوبة براسها وايدها وظهرها صحت  عزززا بعيني بعد عمري اختي ، رحت اركض ادور ع أمي لكيت أمي ماده رجليها وتلطم ..

يتبع ..